1 Crónicas

11 Tá ni̱ya̱ʼa tiempo, ndiʼi na̱ ñuu Israel ni̱xa̱ʼa̱nna xi̱tona ta̱ David chí Hebrón ta ni̱ka̱ʼa̱nna xíʼinra: “Yóʼo ki̱xaa̱ndi̱. Táʼanvayó.* 2 Tá xi̱kuuka ta̱ Saúl rey, yóʼó kúú ta̱ xi̱niʼi yichi̱ nu̱ú na̱ ñuu Israel tá xi̱xaʼa̱nna nu̱ú ku̱a̱chi. Ta Jehová Ndióxi̱yó ni̱ka̱ʼa̱nra xíʼún: ‘Yóʼó kúú ta̱ kundaa na̱ ñui̱ Israel ta kuniʼún yichi̱ nu̱úna’”. 3 Xa̱ʼa̱ ña̱kán, ndiʼi na̱ níʼi yichi̱ nu̱ú na̱ ñuu Israel ni̱xa̱ʼa̱nna xi̱tona ta̱ rey David chí Hebrón, ta ke̱ʼéra iin trato xíʼinna nu̱ú Jehová chí Hebrón. Tándi̱ʼi, nda̱kaxinna ta̱ David ña̱ koora rey nu̱ú na̱ ñuu Israel, nda̱a̱ táki̱ʼva íyo tu̱ʼun ña̱ ni̱ka̱ʼa̱n Jehová xíʼin ta̱ Samuel ña̱ ka̱ʼa̱nra.

4 Tá ni̱ya̱ʼa loʼo, ta̱ David xíʼin ndiʼi na̱ ta̱a na̱ ñuu Israel ni̱xa̱ʼa̱nna chí Jerusalén á Jebús, chí nu̱ú xi̱ndoo na̱ jebuseo. 5 Na̱ yiví na̱ xi̱ndoo chí Jebús ni̱xa̱ku̱ndaana ta̱ David ta ni̱ka̱ʼa̱nna xíʼinra: “Nda̱a̱ ni loʼo va̱ása kuchiñún ki̱ʼviún yóʼo”. Soo ta̱ David ku̱chiñura nda̱kiʼinra ñuu ña̱ kútu̱ní ndási chí Sion, ta vitin naníña Ñuu ta̱ David. 6 Tasaá ni̱ka̱ʼa̱n ta̱ David: “Na̱ siʼnaka ná ku̱ʼu̱n kanitáʼan xíʼin na̱ jebuseo kúú na̱ kuniʼi yichi̱ nu̱ú na̱ soldado”. Ta̱ Joab se̱ʼe ñá Zeruyá kúú ta̱ siʼnaka ni̱xa̱ʼa̱n, ña̱kán ta̱yóʼo kúú ta̱ ki̱xáʼa níʼi yichi̱ nu̱ú na̱ soldado. 7 Ta ta̱ David ki̱ndoora ni̱xi̱yora ñuu ña̱ kútu̱ní ndási. Ña̱kán na̱samara ki̱vi̱ña ta nda̱kunaníña Ñuu ta̱ David. 8 Ta ki̱xáʼara íxava̱ʼara ku̱a̱ʼání ña̱ʼa iníí ñuu kán, chí nu̱ú íyo koʼndo ña̱ Miló* ta saátu iníí sa̱tá ña̱yóʼo, ta ta̱ Joab kúú ta̱ nda̱sava̱ʼa ndiʼika táʼví ñuu kán. 9 Tasaá, ta̱ David ki̱xáʼara kúúmiíra ku̱a̱ʼáníka ndee̱, ta Jehová ta̱ xáʼndachíñu nu̱ú na̱ ángel ni̱xi̱yora xíʼinra.

10 Na̱yóʼo kúú na̱ xi̱niʼi yichi̱ nu̱ú na̱ ta̱a na̱ ndakúní na̱ xi̱xini̱ní kanitáʼan na̱ xi̱kitáʼan xíʼin ta̱ David. Va̱ʼaní chi̱ndeétáʼanna xíʼinra ña̱ kaʼndachíñura nda̱a̱ táki̱ʼva ke̱ʼé ndiʼi na̱ ñuu Israel, ta chi̱ndeétáʼanna xíʼinra ña̱ va̱ʼa xa̱a̱ra koora rey nda̱a̱ táki̱ʼva íyo ña̱ ni̱ka̱ʼa̱n Jehová xa̱ʼa̱ na̱ ñuu Israel. 11 Na̱yóʼo kúú na̱ ta̱a na̱ ndakúníka na̱ xi̱xini̱ní kanitáʼan na̱ xi̱kitáʼan xíʼin ta̱ David: u̱ni̱ xi̱kuuna, iinra xi̱kuu ta̱ Jasobeam se̱ʼe iin ta̱ hacmonita ta ta̱yóʼo kúú ta̱ xi̱niʼi yichi̱ nu̱úna. Iin yichi̱ xa̱ʼníra 300 na̱ ta̱a xíʼin lanzara. 12 Inkara xi̱kuu ta̱ Eleazar se̱ʼe ta̱ Dodó, iin ta̱ ahohíta. Ta̱yóʼo xi̱kuura táʼan u̱ni̱ na̱ ta̱a na̱ ndakúníka na̱ xi̱xini̱ní kanitáʼan. 13 Ta̱yóʼo ni̱xa̱ʼa̱nra xíʼin ta̱ David chí Pas-Damim, nu̱ú ni̱xi̱yo iin ñuʼú nu̱ú chi̱ʼina cebada, ta kán kúú nu̱ú nda̱kutáʼan na̱ filisteo ña̱ kanitáʼanna xíʼinna. Ta ndiʼi na̱ soldado ñuu Israel xi̱nuna nu̱ú na̱ filisteo. 14 Soo ta̱yóʼo va̱ása níxinura chi ki̱ndoora ma̱ʼñú ñuʼú kán ta va̱ása nítaxira ña̱ ndakiʼinnaña, ta ku̱a̱ʼání na̱ filisteo xa̱ʼníra tasaá ku̱chiñu Jehová sa̱kǎkura na̱ ñuu Israel.

15 O̱ko̱ u̱xu̱ xi̱kuu na̱ xi̱niʼi yichi̱ nu̱ú na̱ soldado ta u̱ni̱ na̱yóʼo ni̱xa̱ʼa̱nna nu̱ú ta̱ David chí kavá ña̱ ni̱xi̱yo chí Adulam, ta na̱ soldado filisteo xi̱ndoona chí yoso̱ ña̱ Refaím. 16 Ta̱ David xi̱ndikaa̱ra ini kavá ta chí Belén ni̱xa̱a̱ sava na̱ soldado filisteo xi̱kundoona. 17 Tasaá ni̱ka̱ʼa̱n ta̱ David ña̱yóʼo xa̱ʼa̱ iin ña̱ xi̱kuni̱ra: “Va̱ʼaníví tá ná kivi koʼo loʼi̱ ti̱kui̱í tá ñúʼu ini pozo ña̱ ndíkaa̱ yatin yéʼé ñuu Belén”. 18 Xa̱ʼa̱ ña̱kán, u̱ni̱ saá na̱ ta̱a na̱ ndakúníka na̱ xi̱xini̱ní kanitáʼan ni̱ki̱ʼvina nu̱ú ndóo na̱ filisteo ta ka̱nitáʼanna xíʼinna, tasaá ta̱vána ti̱kui̱í ini pozo ña̱ ndíkaa̱ yatin yéʼé ñuu Belén ta níʼinará ni̱xa̱ʼa̱nna ta̱xina ndaʼa̱ ta̱ David. Soo va̱ása níxiinra koʼorará ta xa̱tarará nu̱ú ñuʼú ña̱ va̱ʼa so̱kórará nu̱ú* Jehová. 19 Ta ni̱ka̱ʼa̱nra: “Xa̱a̱ kúnda̱a̱va-inii̱ ndáa ki̱ʼva ndákanixi̱ní Ndióxi̱ xa̱ʼa̱ ña̱yóʼo, xa̱ʼa̱ ña̱kán nda̱a̱ ni loʼoví va̱ása keʼíi̱ ña̱yóʼo. Na̱ ta̱a yóʼo ni̱xa̱ʼa̱nna ta ndáa si̱lóʼo kuvina, ¿ña̱kán nda̱chun koʼi̱ ni̱i̱na? Saáchi nda̱a̱ kivi kaʼnínana xa̱ʼa̱ ña̱ ni̱xa̱ʼa̱nna xa̱ʼa̱ ti̱kui̱í yóʼo”. Ta va̱ása níxiinra koʼorará. Ña̱yóʼo kúú ña̱ ke̱ʼé u̱ni̱ saá na̱ ta̱a na̱ ndakúníka na̱ xi̱xini̱ní kanitáʼan na̱ xi̱kitáʼan xíʼinra.

20 Ni̱xi̱yo inka u̱ni̱na, ta iin táʼan na̱yóʼo xi̱kuu ta̱ Abisái ñani ta̱ Joab, ta ta̱yóʼo kúú ta̱ xi̱niʼi yichi̱ nu̱úna. Ta̱yóʼo xa̱ʼníra 300 na̱ ta̱a xíʼin lanzara ta nda̱a̱ táki̱ʼva xi̱kaʼa̱nna xa̱ʼa̱ u̱ni̱ na̱ ta̱a na̱ ndakúníka na̱ xi̱xini̱ní kanitáʼan saátu xi̱kaʼa̱nna xa̱ʼa̱ ta̱yóʼo. 21 Ta̱yóʼo kúú ta̱ xi̱kuchiñuníka nu̱ú inka u̱vi̱ na̱ xi̱kitáʼan xíʼinra, ta miíra kúú ta̱ xi̱niʼi yichi̱ nu̱úna. Soo va̱ása níxa̱a̱ra koora nda̱a̱ táki̱ʼva ni̱xi̱yo u̱ni̱ na̱ ta̱a na̱ ndakúníka na̱ xi̱xini̱ní kanitáʼan.

22 Ta̱ Benaya se̱ʼe ta̱ Jehoiadá xi̱kuura iin ta̱a ta̱ ndakúní-ini, ta ku̱a̱ʼání ña̱ ku̱chiñura ke̱ʼéra chí Cabzeel. Xa̱ʼníra u̱vi̱ saá na̱ se̱ʼe ta̱ Ariel ta̱ ñuu Moab, ta iin ki̱vi̱ tá kóyoní kaxin* ni̱ki̱ʼvira ini iin pozo nu̱ú kǒo ti̱kui̱í ta xa̱ʼníra iin ndikaʼa.* 23 Ta saátu xa̱ʼníra iin ta̱ egipcio ta̱ káʼnuní; ta̱yóʼo yáʼaka u̱vi̱ metro* súkun ni̱xi̱yora. Iin yitu̱n kuití xi̱niʼi ta̱ Benaya soo ta̱ egipcio xi̱niʼira iin lanza tú káʼnuní, nda̱a̱ táki̱ʼva káʼnu yitu̱n tú xíniñúʼuna ña̱ kúnuna saá káʼnu ni̱xi̱yonú. Soo ni saá, ka̱nitáʼanra xíʼin ta̱ egipcio ta ki̱ndaara lanza ndaʼa̱ra ta xíʼin túyóʼo xa̱ʼnírara. 24 Ña̱yóʼo kúú ña̱ ke̱ʼé ta̱ Benaya se̱ʼe ta̱ Jehoiadá, ta va̱ʼaní xi̱kaʼa̱nna xa̱ʼa̱ra nda̱a̱ táki̱ʼva xi̱kaʼa̱nna xa̱ʼa̱ u̱ni̱ na̱ ta̱a na̱ ndakúníka na̱ xi̱xini̱ní kanitáʼan. 25 Ta ni xi̱kaʼa̱n va̱ʼanína xa̱ʼa̱ ta̱yóʼo nu̱ú inka na̱ 30, soo va̱ása níxa̱a̱ra koora nda̱a̱ táki̱ʼva íyo u̱ni̱ na̱ ta̱a na̱ ndakúníka na̱ xi̱xini̱ní kanitáʼan. Soo ni saá, ta̱ David ta̱xira chiñu ndaʼa̱ra ña̱ kuniʼira yichi̱ nu̱ú na̱ soldado na̱ xi̱ndaañaʼá.

26 Na̱ soldado na̱ ndakúní na̱ xi̱xini̱ní kanitáʼan xi̱kuu ta̱ Asahel ñani ta̱ Joab, ta̱ Elhanán se̱ʼe ta̱ Dodó ta̱ ñuu Belén, 27 ta̱ Samot ta̱ harorita, ta̱ Hélez ta̱ pelonita, 28 ta̱ Irá se̱ʼe ta̱ Iqués ta̱ tecoíta, ta̱ Abí-Ézer ta̱ anatotita, 29 ta̱ Sibecái ta̱ husatita, ta̱ Ilái ta̱ ahohíta, 30 ta̱ Maharái ta̱ netofatita, ta̱ Héled se̱ʼe ta̱ Baaná* ta̱ netofatita, 31 ta̱ Itái se̱ʼe ta̱ Ribái ta̱ ñuu Guibeá* ña̱ xi̱kuu kuenta na̱ tribu ta̱ Benjamín, ta̱ Benaya ta̱ piratonita, 32 ta̱ Hurái ta̱ ni̱xi̱yo chí nu̱ú yáʼa ti̱kui̱í chí Gaas, ta̱ Abiel ta̱ arbatita, 33 ta̱ Azmávet ta̱ baharumita, ta̱ Eliahbá ta̱ saalbonita, 34 na̱ se̱ʼe ta̱ Hasem ta̱ guizonita, ta̱ Jonatán se̱ʼe ta̱ Sagué ta̱ hararita, 35 ta̱ Ahiam se̱ʼe ta̱ Sacar ta̱ hararita, ta̱ Elifal se̱ʼe ta̱ Ur, 36 ta̱ Héfer ta̱ mekeratita, ta̱ Ahíya ta̱ pelonita, 37 ta̱ Hezró ta̱ carmelita, ta̱ Naarái se̱ʼe ta̱ Ezbái, 38 ta̱ Joel ñani ta̱ Natán, ta̱ Mibhar se̱ʼe ta̱ Hagrí, 39 ta̱ Zélec ta̱ ammonita, ta̱ Naharái ta̱ berotita, ta̱yóʼo kúú ta̱ xi̱niʼi escudo ta̱ Joab se̱ʼe ñá Zeruyá; 40 ta̱ Irá ta̱ itrita, ta̱ Gareb ta̱ itrita, 41 ta̱ Urías ta̱ hitita, ta̱ Zabad se̱ʼe ta̱ Ahlái, 42 ta̱ Adiná se̱ʼe ta̱ Sizá ta̱ rubenita, ta̱yóʼo kúú iin ta̱ xi̱niʼi yichi̱ nu̱ú na̱ rubenita ta xi̱kitáʼan 30 na̱ ta̱a xíʼinra; 43 ta̱ Hanán se̱ʼe ta̱ Maacá, ta̱ Josafat ta̱ mitnita, 44 ta̱ Uzía ta̱ asteratita, ta̱ Sama xíʼin ta̱ Jeiel, na̱ xi̱kuu se̱ʼe ta̱ Hotam ta̱ aroerita; 45 ta̱ Jediael se̱ʼe ta̱ Simrí xíʼin ñanira ta̱ Johá ta̱ tizita; 46 ta̱ Eliel ta̱ mahavita, ta̱ Jeribái xíʼin ta̱ Josavías, na̱ xi̱kuu se̱ʼe ta̱ Elnaam, ta̱ Itmá ta̱ moabita; 47 ta̱ Eliel, ta̱ Obed xíʼin ta̱ Jaasiel ta̱ mezobaíta.