1 Crónicas

12 Na̱yóʼo kúú na̱ ta̱a na̱ nda̱kutáʼan xíʼin ta̱ David chí Ziclag tá tiempo ña̱ va̱ása níkivi kakara nu̱ú kúni̱ miíra xa̱ʼa̱ ña̱ xi̱kuni̱ ta̱ Saúl se̱ʼe ta̱ Quis kaʼnírara; na̱yóʼo xi̱kitáʼanna xíʼin na̱ ta̱a na̱ ndakúní na̱ xi̱xini̱ní kanitáʼan na̱ xi̱chindeétáʼan xíʼinra tá xi̱xaʼa̱nra nu̱ú ku̱a̱chi. 2 Na̱yóʼo xi̱niʼina kuxu̱n* ta va̱ʼa xi̱xiniñúʼuna ndaʼa̱ kúaʼana xíʼin ndaʼa̱ yitinna ña̱ sakánana yu̱u̱ ta saátu ña̱ sakánana iin flecha xíʼin kuxu̱n. Ta xi̱kuuna ñani ta̱ Saúl ta̱ ki̱xi ti̱xin na̱ veʼe ta̱ Benjamín. 3 Ta̱ xi̱niʼi yichi̱ nu̱ú na̱yóʼo xi̱kuu ta̱ Ahiézer xíʼin ta̱ Joás. U̱vi̱ saá na̱yóʼo xi̱kuu se̱ʼe ta̱ Semaá ta̱ guibeatita. Ta saátu xi̱kitáʼan ta̱ Jeziel xíʼin ta̱ Pélet se̱ʼe ta̱ Azmávet xíʼinna, saátu ta̱ Beracá, ta̱ Jehú ta̱ anatotita, 4 ta̱ Ismayá ta̱ gabaonita (iin ta̱a ta̱ ndakúní ta̱ xi̱xini̱ní kanitáʼan ta xi̱kitáʼanra xíʼin na̱ 30 ta xi̱niʼira yichi̱ nu̱úna), ta̱ Jeremías, ta̱ Jahaziel, ta̱ Johanán, ta̱ Jozabad ta̱ guederatita, 5 ta̱ Eluzái, ta̱ Jerimot, ta̱ Bealías, ta̱ Semarías, ta̱ Sefatías ta̱ harifita, 6 ta̱ Elcaná, ta̱ Isías, ta̱ Azarel, ta̱ Joézer, ta̱ Jasobeam, na̱yóʼo xi̱kuuna na̱ coreíta, 7 ta̱ Joelá xíʼin ta̱ Zebadías, na̱ xi̱kuu se̱ʼe ta̱ Jeroham ta̱ ñuu Guedor.

8 Sava na̱ gadita nda̱kutáʼanna xíʼin ta̱ David tá ni̱xi̱yo se̱ʼéra chí nu̱ú ñuʼú yi̱chí; na̱yóʼo ndakúní ni̱xi̱yona ta xi̱kuuna soldado na̱ xa̱a̱ xi̱xini̱ ku̱ʼu̱n nu̱ú ku̱a̱chi, xa̱a̱ ni̱xi̱yo tu̱ʼvana ta xi̱niʼina escudo ña̱ náʼnu xíʼin lanza. Nu̱úna xi̱naʼa̱ña nda̱a̱ táki̱ʼva náʼa̱ nu̱ú ndikaʼa* ta kamaní ni̱xi̱yona nda̱a̱ táki̱ʼva kama yusu tí íyo chí yuku̱. 9 Ta̱ Ézer kúú ta̱ xi̱niʼi yichi̱ nu̱úna, ta̱ u̱vi̱ xi̱kuu ta̱ Abdías, ta̱ u̱ni̱ xi̱kuu ta̱ Eliab, 10 ta̱ ku̱mí xi̱kuu ta̱ Mismaná, ta̱ u̱ʼu̱n xi̱kuu ta̱ Jeremías, 11 ta̱ i̱ñu̱ xi̱kuu ta̱ Atái, ta̱ u̱xa̱ xi̱kuu ta̱ Eliel, 12 ta̱ u̱na̱ xi̱kuu ta̱ Johanán, ta̱ i̱i̱n xi̱kuu ta̱ Elzabad, 13 ta̱ u̱xu̱ xi̱kuu ta̱ Jeremías, ta̱ u̱xu̱ iin xi̱kuu ta̱ Macbanái. 14 Na̱yóʼo xi̱kuu na̱ gadita na̱ xi̱niʼi yichi̱ nu̱ú na̱ soldado. Ta na̱ va̱ása ndakú va̱ʼa níxi̱yo xi̱kuchiñuna xi̱kanitáʼanna xíʼin 100 na̱ soldado, ta na̱ ndakú va̱ʼaka xi̱kuchiñuna xi̱kanitáʼanna xíʼin 1,000 na̱ soldado. 15 Tá yo̱o̱ nu̱ú tá ndeéní xi̱xaʼnu yu̱ta Jordán, na̱ ta̱a yóʼo ni̱ya̱ʼana yu̱ta kán ta ni̱xa̱ʼa̱nna ta̱xínna na̱ xi̱ndoo chí yoso̱ ta na̱yóʼo ku̱a̱ʼa̱nna chí este xíʼin oeste.*

16 Ta saátu sava na̱ ta̱a na̱ tribu ta̱ Benjamín xíʼin ta̱ Judá, ni̱xa̱ʼa̱nna nda̱kutáʼanna xíʼin ta̱ David chí nu̱ú ni̱xi̱yo se̱ʼéra. 17 Tasaá ki̱ta ta̱ David ta xi̱kundichira nu̱úna ta ni̱ka̱ʼa̱nra xíʼinna: “Tá na̱ va̱xi va̱ʼa kúúndó ña̱ chindeétáʼanndó xíʼi̱n, viíva kutáʼanyó. Soo tá va̱xindó ña̱ sandáʼvindó yi̱ʼi̱ ta ndataxindó yi̱ʼi̱ ndaʼa̱ na̱ sáa̱-ini xíni yi̱ʼi̱ ni kǒo ña̱ va̱ása va̱ʼa níkeʼíi̱, mií Ndióxi̱ na̱ táʼanyó na̱ xi̱ndoo xi̱naʼá ná kotora ña̱yóʼo ta ná taxira castigo ndaʼa̱ndó”. 18 Tasaá, ta̱ Amasái ta̱ xi̱niʼi yichi̱ nu̱ú 30 na̱ ta̱a nda̱kiʼinra espíritu santo Ndióxi̱ ta ni̱ka̱ʼa̱nra:

“David se̱ʼe ta̱ Jesé, na̱ káchíñu nu̱úvaún kúúndi̱ ta chindeétáʼanvandi̱ xíʼún.

Xa̱ʼa̱ ña̱kán nda̱kiʼinva ta̱ David na̱yóʼo, ta ta̱xira chiñu ndaʼa̱na ña̱ kuniʼina yichi̱ nu̱ú na̱ soldado.

19 Ta saátu sava na̱ ta̱a na̱ tribu ta̱ Manasés nda̱kutáʼanna xíʼin ta̱ David tá ku̱a̱ʼa̱nra xíʼin na̱ filisteo ña̱ kanitáʼanna xíʼin ta̱ Saúl; va̱ása níchindeétáʼanra xíʼin na̱ filisteo saáchi na̱ xi̱niʼi yichi̱ nu̱úna na̱túʼun-táʼanna xa̱ʼa̱ ña̱yóʼo ta ta̱xínna ta̱ David, saáchi ka̱china: “Ndakutáʼanvara xíʼin ta̱ Saúl ta̱ xi̱kachíñura nu̱ú, ta kaʼnívana miíyó”. 20 Na̱yóʼo kúú na̱ ta̱a na̱ tribu ta̱ Manasés na̱ nda̱kutáʼan xíʼin ta̱ David tá ni̱xa̱ʼa̱nra chí Ziclag: ta̱ Adná,* ta̱ Jozabad, ta̱ Jediael, ta̱ Miguel, ta̱ Jozabad, ta̱ Elihú xíʼin ta̱ Ziletái, iin tá iin na̱yóʼo xi̱niʼina yichi̱ nu̱ú mil na̱ yiví na̱ tribu ta̱ Manasés. 21 Na̱yóʼo kúú na̱ chi̱ndeétáʼan xíʼin ta̱ David tá ka̱nitáʼanra xíʼin na̱ xi̱ ixakuíʼná ña̱ʼa na̱ yiví, saáchi ndiʼi na̱yóʼo xi̱kuuna ta̱a na̱ ndakúní ta va̱ása níxi̱yiʼvína ta saátu ni̱xa̱a̱na ku̱una na̱ xi̱niʼi yichi̱ nu̱ú na̱ soldado. 22 Ki̱vi̱ tá ki̱vi̱ xi̱xaa̱ka na̱ ta̱a na̱ xi̱kuni̱ chindeétáʼan xíʼin ta̱ David, ta ku̱a̱ʼáníka ni̱xa̱a̱na ndu̱una nda̱a̱ táki̱ʼva ku̱a̱ʼání kúú na̱ ángel Ndióxi̱.

23 Na̱yóʼo xi̱kuu na̱ ta̱a na̱ xi̱niʼi yichi̱ nu̱ú na̱ soldado na̱ xa̱a̱ ni̱xi̱yo tu̱ʼva ña̱ kanitáʼanna, na̱ ni̱xa̱a̱ nda̱kutáʼan xíʼin ta̱ David chí Hebrón ña̱ va̱ʼa chindeétáʼanna xíʼinra ña̱ ndakiʼinra kaʼndachíñura nu̱ú ta̱ Saúl, nda̱a̱ táki̱ʼva ni̱ka̱ʼa̱n mií Jehová. 24 Ni̱xi̱yo 6,800 na̱ ta̱a na̱ tribu ta̱ Judá na̱ xi̱niʼi escudo ña̱ náʼnu xíʼin lanza ta xa̱a̱ ni̱xi̱yo tu̱ʼvana ña̱ ku̱ʼu̱nna nu̱ú ku̱a̱chi. 25 Ta 7,100 xi̱kuu na̱ ta̱a na̱ tribu ta̱ Simeón, ta na̱yóʼo ndakúní ni̱xi̱yona ta va̱ása níxi̱yiʼvína.

26 Ta 4,600 xi̱kuu na̱ levita. 27 Ta̱ Jehoiadá kúú ta̱ xi̱niʼi yichi̱ nu̱ú na̱ se̱ʼe ta̱ Aarón, ta xíʼin ta̱yóʼo xi̱kitáʼan 3,700 na̱ ta̱a, 28 ta saátu xi̱kitáʼan ta̱ Sadoc xíʼinra, iin ta̱a ta̱ ndakúní ta̱ va̱ása níxi̱yiʼví, xíʼin inkaka 22 na̱ xi̱niʼi yichi̱ nu̱ú na̱ veʼera.

29 Nda̱kutáʼantu 3,000 na̱ ta̱a na̱ tribu ta̱ Benjamín xíʼin ta̱ David, na̱ xi̱kuu ñani ta̱ Saúl. Tá ya̱chi̱, ku̱a̱ʼání na̱yóʼo xi̱chindeétáʼanna xíʼin ta̱ Saúl. 30 Ta 20,800 xi̱kuu na̱ ta̱a na̱ tribu ta̱ Efraín, na̱yóʼo ndakúní ni̱xi̱yona ta va̱ása níxi̱yiʼvína, ta va̱ʼaní xi̱kaʼa̱n na̱ veʼena xa̱ʼa̱na.

31 Saátu 18,000 xi̱kuu na̱ ta̱a na̱ xi̱kuu táʼan iin táʼví na̱ tribu ta̱ Manasés, na̱ nda̱kaxinna ña̱ va̱ʼa ku̱ʼu̱nna ta ndasana ta̱ David rey. 32 Ti̱xin na̱ tribu ta̱ Isacar ni̱xi̱yo 200 na̱ ta̱a na̱ xi̱niʼi yichi̱ nu̱ú na̱ soldado, ta na̱yóʼo va̱ʼaní xi̱kunda̱a̱-inina xa̱ʼa̱ tiempo ta saátu xi̱kunda̱a̱-inina ndáa ña̱ʼa xi̱xiniñúʼu keʼé na̱ ñuu Israel ta ndiʼi na̱ ñanina xi̱keʼéna ña̱ xi̱kaʼa̱nna xíʼinna. 33 Ta 50,000 xi̱kuu na̱ ta̱a na̱ tribu ta̱ Zabulón na̱ kivi koo soldado ta xa̱a̱ xi̱kuumiína ndiʼi ña̱ʼa ña̱ xi̱xiniñúʼuna ña̱ va̱ʼa ku̱ʼu̱nna nu̱ú ku̱a̱chi, ta ndiʼi na̱yóʼo nda̱kúní ni̱xi̱yo inina xíʼin ta̱ David. 34 Ti̱xin na̱ tribu ta̱ Neftalí ni̱xi̱yo 1,000 na̱ xi̱niʼi yichi̱ nu̱ú na̱ soldado ta xíʼin na̱yóʼo xi̱kitáʼan 37,000 na̱ ta̱a na̱ xi̱niʼi escudo náʼnu xíʼin lanza. 35 Ta 28,600 xi̱kuu na̱ ta̱a na̱ tribu ta̱ Dan na̱ xa̱a̱ ni̱xi̱yo tu̱ʼva ña̱ kanitáʼanna. 36 Ta 40,000 xi̱kuu na̱ ta̱a na̱ tribu ta̱ Aser na̱ kivi koo soldado ta xa̱a̱ ni̱xi̱yo tu̱ʼvana ña̱ kanitáʼanna.

37 Ta chí inka táʼví yu̱ta Jordán ni̱xi̱yo 120,000 na̱ soldado na̱ tribu ta̱ Rubén, na̱ tribu ta̱ Gad xíʼin iin táʼví na̱ tribu ta̱ Manasés ta na̱yóʼo xi̱kuumiína ku̱a̱ʼání ña̱ʼa ña̱ kivi kuniñúʼuna ña̱ ku̱ʼu̱nna nu̱ú ku̱a̱chi. 38 Ndiʼi na̱ ta̱a yóʼo na̱ xa̱a̱ xi̱xika nu̱ú ku̱a̱chi xi̱kuuna ta xa̱a̱ ni̱xi̱yo tu̱ʼvana ña̱ kanitáʼanna; ni̱xa̱ʼa̱nna chí Hebrón ta xíʼin ndiʼi níma̱na xi̱kuni̱na ndasana ta̱ David rey nu̱ú ndiʼi na̱ ñuu Israel, ta saátu ndiʼika na̱ israelita xi̱kuni̱vana ña̱ ná xa̱a̱ ta̱ David koora rey. 39 Ta kán ki̱ndoona xíʼin ta̱ David u̱ni̱ ki̱vi̱ ta xi̱xina ta xi̱ʼina, saáchi na̱ ñanina i̱xatu̱ʼvana ña̱yóʼo xa̱ʼa̱na. 40 Ta ndiʼi na̱ xi̱ndoo yatin kán ta saátu na̱ xi̱ndoo nda̱a̱ chí nu̱ú xi̱ndoo na̱ tribu ta̱ Isacar, ta̱ Zabulón xíʼin ta̱ Neftalí xi̱xaʼa̱nna xíʼin burro, camello, mula xíʼin si̱ndi̱ki̱ tí ndíso ña̱ʼa ña̱ kuxuna: xi̱niʼina harina, si̱ta̱váʼa ña̱ ku̱vaʼa xíʼin higo tí ni̱yi̱chi̱ ta saátu pasa, vino xíʼin aceite; ta saátu xi̱xaʼa̱nna xíʼin ku̱a̱ʼání si̱ndi̱ki̱ xíʼin ndikachi,* saáchi na̱ ñuu Israel xi̱kusi̱íní-inina.