LEVÍTICO

1 Jehová ka̱nara ta̱ Moisés, ta nda̱a̱ chí ini tabernáculo ni̱ka̱ʼa̱nra xíʼinra. Ka̱chira: 2 “Ña̱yóʼo ka̱ʼún xíʼin na̱ israelita: ‘Tá iinndó kúni̱ndó so̱kóndó* iin kití sa̱na̱ndó nu̱ú Jehová, kití yóʼo xíniñúʼu koorí iin si̱ndi̱ki̱, iin ndikachi* á iin ti̱xúʼú.*

3 ”’Tá iinna kúni̱na taxina iin si̱ndi̱ki̱ ña̱ va̱ʼa kaʼminarí* ta so̱kónarí nu̱ú Ndióxi̱, iin si̱ndi̱ki̱ che̱e xíniñúʼu koorí ta va̱ása kuumiírí kue̱ʼe̱. Níma̱ miína kana ña̱ taxina tíyóʼo ndaʼa̱ Jehová chí yéʼé tabernáculo. 4 Xíniñúʼu chinúuna ndaʼa̱na xi̱ní kití tí kaʼmina ña̱ so̱kónarí, ta Ndióxi̱ ndakiʼinra tíyóʼo ña̱ va̱ʼa ndoo ku̱a̱china.

5 ”’Ta nu̱ú Jehová xíniñúʼu kuvi tí si̱ndi̱ki̱ yúta̱* yóʼo. Ta na̱ se̱ʼe ta̱ Aarón na̱ kúú su̱tu̱, so̱kóna ni̱i̱ tíyóʼo ta ko̱so̱yávánaña* iníí sa̱tá altar ña̱ níndichi chí yéʼé tabernáculo. 6 Xíniñúʼu kee ñii̱ sa̱tá kití tí kaʼmina ña̱ so̱kóna, ta saátu xíniñúʼu sakúachi válínarí. 7 Na̱ se̱ʼe ta̱ Aarón na̱ kúú su̱tu̱ xíniñúʼu kaʼmina ñuʼu̱ nu̱ú altar ta sa̱tá ña̱yóʼo chindósona titu̱n. 8 Ta na̱ se̱ʼe ta̱ Aarón na̱ kúú su̱tu̱ chindósona ku̱ñu kití tí sa̱kúachi válína ta saátu xi̱nírí xíʼin xa̱ʼanrí* sa̱tá ti̱tu̱n tú xíxi̱ nu̱ú altar. 9 Xíʼin ti̱kui̱í xíniñúʼu ndoo xitirí xíʼin xa̱ʼa̱rí, ta ta̱ su̱tu̱ xíniñúʼu kaʼmira ña̱yóʼo nu̱ú altar ña̱ va̱ʼa kana yi̱ʼma̱ña. Kití yóʼo kúú tí kaʼmina ña̱ so̱kónarí nu̱ú Jehová ta táminí kuxaʼa̱nrí nu̱úra.

10 ”’Tá iinna kúni̱na taxina iin ndikachi yúta̱ á iin ti̱xúʼú yúta̱ ña̱ va̱ʼa so̱kónarí, tí che̱e xíniñúʼu koorí ta va̱ása kuumiírí kue̱ʼe̱. 11 Ta xíniñúʼu kaʼnína tíyóʼo nu̱ú Jehová chí ndaʼa̱ kúaʼa* altar. Ta na̱ se̱ʼe ta̱ Aarón na̱ kúú su̱tu̱ ko̱so̱yávána ni̱i̱ tíyóʼo iníí sa̱tá altar. 12 Xíniñúʼu kuachi válírí, ta ta̱ su̱tu̱ chindósora ku̱ñurí ña̱ cha̱chi válí xíʼin xi̱nírí ta saátu xa̱ʼanrí sa̱tá titu̱n tú xíxi̱ nu̱ú altar. 13 Xíʼin ti̱kui̱í xíniñúʼu ndoo xitirí xíʼin xa̱ʼa̱rí, ta ta̱ su̱tu̱ xíniñúʼu kaʼmira ña̱yóʼo nu̱ú altar ña̱ va̱ʼa kana yi̱ʼma̱ña. Kití yóʼo kúú tí kaʼmina nu̱ú Jehová ta táminí kuxaʼa̱nrí nu̱úra.

14 ”’Soo tá iinna kúni̱na taxina tí saa ña̱ va̱ʼa kaʼminarí ta so̱kónarí nu̱ú Jehová xíniñúʼu koorí paloma káʼnu á paloma loʼo.* 15 Ta ta̱ su̱tu̱ chinúura tí saa yóʼo nu̱ú altar ta so̱kórarí nu̱ú Ndióxi̱. Xíʼin chíi̱nra kaʼndara su̱kúnrí ta taxira ná ku̱i̱ta̱ ni̱i̱rí chí síi̱n* altar. Tándi̱ʼi, kaʼmira tíyóʼo nu̱ú altar. 16 Ta xíniñúʼu kindaara yaʼa̱rí* xíʼin tu̱mirí ta sakánara ña̱yóʼo chí síi̱n altar chí nu̱ú kána ñu̱ʼu* nu̱ú xátana ya̱a̱.* 17 Ta xíniñúʼu ndakunára yatin nu̱ú íyo ndi̱xi̱nrí soo va̱ása xíniñúʼu ndataʼvírarí u̱vi̱ táʼví. Tasaá, ta̱ su̱tu̱ xíniñúʼu kaʼmira tíyóʼo nu̱ú altar ña̱ va̱ʼa kana yi̱ʼma̱rí. Kití yóʼo kúú tí kaʼmina ña̱ so̱kónarí nu̱ú Jehová, ta táminí kuxaʼa̱nrí nu̱úra.

2 ”’Tá iinna sóko̱na harina nu̱ú* Jehová, xíniñúʼu taxina harina ña̱ va̱ʼa. Xíniñúʼu kaa aceite sa̱táña xíʼin olíbano.* 2 Tándi̱ʼi, ku̱ʼu̱nna xíʼinña nu̱ú na̱ se̱ʼe ta̱ Aarón, na̱ kúú su̱tu̱. Ta ini ndaʼa̱ ta̱ su̱tu̱ kiʼinra harina ña̱ va̱ʼa, ña̱ ni̱sa̱ka̱ xíʼin aceite ta saátu xíʼin olíbano ta kaʼmiraña nu̱ú altar, tasaá kivi ndakaʼán Ndióxi̱ xa̱ʼa̱ iníísaá ña̱ ni̱so̱kóra. Ña̱yóʼo kúú ña̱ kaʼmina ña̱ so̱kónaña nu̱ú Jehová ta táminí kuxaʼa̱nña nu̱úra. 3 Ta harina ña̱ ná kindo̱o ña̱ so̱kóna, kooña kuenta ta̱ Aarón xíʼin na̱ se̱ʼera. Ña̱yóʼo kúú ña̱ xáʼmina ta sóko̱na nu̱ú Jehová ta iin ña̱ yi̱i̱ní kúúña.

4 ”’Tá ná so̱kóún si̱ta̱váʼa ña̱ ku̱vaʼa ini horno,* ña̱yóʼo xíniñúʼu kuva̱ʼaña xíʼin harina ña̱ va̱ʼa. Xíniñúʼu kooña si̱ta̱váʼa ña̱ ti̱ku̱i̱ta̱* ña̱ kǒo yuxa̱n iyá* xíʼin ña̱ kúúmií aceite á xíniñúʼu kooña galleta yásín* ña̱ kǒo yuxa̱n iyá kúúmií ña̱ ka̱a aceite sa̱tá.

5 ”’Soo tá kúni̱ún so̱kóún si̱ta̱váʼa ña̱ ya̱tan nu̱ú xi̱yo̱, ña̱yóʼo xíniñúʼu kuva̱ʼaña xíʼin harina ña̱ va̱ʼa, va̱ása kuumiíña yuxa̱n iyá ta xíniñúʼu sa̱ka̱ña xíʼin aceite. 6 Xíniñúʼu kuachi si̱ta̱váʼa yóʼo tasaá kaa aceite sa̱táña. Ña̱yóʼo kúú harina ña̱ sóko̱na nu̱ú Ndióxi̱.

7 ”’Tá kúni̱ún so̱kóún si̱ta̱váʼa ña̱ ku̱vaʼa ini iin cazuela, ña̱yóʼo xíniñúʼu kuva̱ʼaña xíʼin harina ña̱ va̱ʼa ta kuumiíña aceite. 8 Xíniñúʼu kuniʼún ña̱ ke̱ʼún yóʼo ku̱ʼu̱n xíʼún nu̱ú Jehová, ña̱ ku̱vaʼa xíʼin ña̱ xa̱a̱ ni̱ka̱ʼi̱n xíʼún. Ta xíniñúʼu taxiúnña ndaʼa̱ ta̱ su̱tu̱, ta ta̱kán sakúyatinraña nu̱ú altar. 9 Ta̱ su̱tu̱ kiʼinra loʼo si̱ta̱váʼa ña̱ ni̱so̱kóna, ña̱ va̱ʼa ndakaʼán Ndióxi̱ xa̱ʼa̱ iníísaá ña̱ ni̱so̱kóna ta kaʼmiraña nu̱ú altar. Ña̱yóʼo kúú ña̱ kaʼmina ña̱ so̱kónaña nu̱ú Jehová ta táminí kuxaʼa̱nña nu̱úra. 10 Ta ña̱ ni̱so̱kóna ña̱ kindo̱o, kooña kuenta ta̱ Aarón xíʼin na̱ se̱ʼera. Ña̱yóʼo kúú ña̱ xáʼmina ta sóko̱na nu̱ú Jehová ta iin ña̱ yi̱i̱ní kúúña.

11 ”’Va̱ása xíniñúʼu so̱kóndó ña̱ʼa ña̱ kúúmií yuxa̱n iyá nu̱ú Jehová, saáchi va̱ása xíniñúʼu kaʼmindó yuxa̱n iyá ni ña̱ʼa vi̱si̱,* ña̱ va̱ʼa so̱kóndóña nu̱ú Jehová.

12 ”’Kivi so̱kóún ña̱yóʼo nu̱ú Jehová tá ná so̱kóún ña̱ʼa ña̱ nu̱ú va̱ʼa kána, soo va̱ása kivi kaʼmiún ña̱yóʼo nu̱ú altar ña̱ va̱ʼa kooña iin ña̱ xáʼa̱n táminí nu̱ú Ndióxi̱.

13 ”’Ndiʼi ña̱ʼa ña̱ ná so̱kóún ña̱ kúúmií harina, xíniñúʼu chika̱ún ñi̱i̱ xíʼinña. Va̱ása nandósoún ña̱ chika̱ún ñi̱i̱ xíʼin ña̱ so̱kóún, saáchi ña̱yóʼo sandákaʼánña yóʼó xa̱ʼa̱ ña̱ ki̱ndoo Ndióxi̱ xíʼún. Ndiʼi yichi̱ ña̱ ná so̱kóún iin ña̱ʼa, saátu xíniñúʼu so̱kóún ñi̱i̱.

14 ”’Tá ná so̱kóún ña̱ chi̱ʼún nu̱ú Jehová ña̱ nu̱ú va̱ʼa ka̱na, ña̱yóʼo xíniñúʼu kooña si̱ʼva̱ ña̱ trigo ña̱ xa̱á ta yatanña nu̱ú ñuʼu̱ ta xíniñúʼu kuachi válíña. 15 Xíniñúʼu chika̱ún aceite sa̱táña xíʼin olíbano. Ña̱yóʼo kúú harina ña̱ so̱kóún nu̱ú Ndióxi̱. 16 Ta̱ su̱tu̱ xíniñúʼu kiʼinra loʼo si̱ʼva̱ trigo xa̱á ña̱ cha̱chi, ta saátu kiʼinra aceite xíʼin olíbano ta kaʼmiraña ña̱ va̱ʼa kana yi̱ʼma̱ña, tasaá kivi ndakaʼán Ndióxi̱ xa̱ʼa̱ iníísaá ña̱ ni̱so̱kóna. Ña̱yóʼo kúú ña̱ kaʼmina ña̱ so̱kónaña nu̱ú Jehová.

3 ”’Tá iinna kúni̱na so̱kóna* iin si̱ndi̱ki̱ che̱e á iin si̱ndi̱ki̱ síʼi nu̱ú Jehová ña̱ va̱ʼa ndakutáʼan viína xíʼinra, tíyóʼo va̱ása xíniñúʼu kuumiírí kue̱ʼe̱. 2 Xíniñúʼu chinúuna ndaʼa̱na xi̱ní tíyóʼo ta xíniñúʼu kuvirí chí yéʼé tabernáculo. Ta na̱ se̱ʼe ta̱ Aarón na̱ kúú su̱tu̱ xíniñúʼu ko̱so̱yávána* ni̱i̱rí iníí sa̱tá altar. 3 Ta xíniñúʼu kaʼmina sava táʼví kití tí ni̱so̱kóna nu̱ú Jehová ña̱ va̱ʼa ndakutáʼan viína xíʼinra. So̱kóna xa̱ʼan* ña̱ íyo sa̱tá xitirí ta saátu xa̱ʼan ña̱ tíinndaa sa̱tá xitirí, 4 saátu u̱vi̱ saá nduchu̱ inirí xíʼin xa̱ʼan ña̱ íyo sa̱tá ña̱yóʼo ña̱ íyo yatin sa̱tárí. Tá ná tavána nduchu̱ inirí saátu xíniñúʼu tavána xa̱ʼan ña̱ íyo sa̱ta̱xáʼarí. 5 Ta na̱ se̱ʼe ta̱ Aarón kaʼmina ndiʼi ña̱yóʼo nu̱ú altar ña̱ va̱ʼa kana yi̱ʼma̱ña ta chindósonaña sa̱tá kití tí xa̱ʼmina,* tí ni̱so̱kóna nu̱ú Ndióxi̱ tí chi̱núuna nu̱ú titu̱n tú xíxi̱. Ña̱yóʼo kúú ña̱ kaʼmina ña̱ so̱kóna nu̱ú Jehová ta táminí kuxaʼa̱nña nu̱úra.

6 ”’Tá iinna kúni̱na so̱kóna iin ndikachi* á iin ti̱xúʼú* nu̱ú Jehová ña̱ va̱ʼa ndakutáʼan viína xíʼinra, tíyóʼo va̱ása xíniñúʼu kuumiírí kue̱ʼe̱ ta kivi koorí iin che̱e á iin síʼi. 7 Tá kúni̱na so̱kóna iin ndikachi che̱e tí yúta̱,* xíniñúʼu ku̱ʼu̱nna xíʼinrí nu̱ú Jehová. 8 Xíniñúʼu chinúuna ndaʼa̱na xi̱nírí ta xíniñúʼu kuvirí chí yéʼé tabernáculo. Ta na̱ se̱ʼe ta̱ Aarón na̱ kúú su̱tu̱ xíniñúʼu ko̱so̱yávána ni̱i̱rí iníí sa̱tá altar. 9 Xíniñúʼu kaʼmina xa̱ʼan kití tí ni̱so̱kóna ña̱ va̱ʼa ndakutáʼan viína xíʼin Jehová. Xíniñúʼu kindaana xa̱ʼan ña̱ íyo si̱ʼma̱rí* ta xíniñúʼu kaʼndana ña̱yóʼo yatin nu̱ú íyo leke sa̱tárí. Saátu xíniñúʼu kindaana xa̱ʼan ña̱ íyo sa̱tá xitirí xíʼin ndiʼi xa̱ʼan ña̱ tíinndaa xitirí, 10 saátu u̱vi̱ saá nduchu̱ inirí xíʼin xa̱ʼan ña̱ íyo sa̱tá ña̱yóʼo ña̱ íyo yatin sa̱tárí. Tá ná tavána nduchu̱ inirí saátu xíniñúʼu tavána xa̱ʼan ña̱ íyo sa̱ta̱xáʼarí. 11 Ta̱ su̱tu̱ kaʼmira ndiʼi ña̱yóʼo nu̱ú altar ña̱ va̱ʼa kana yi̱ʼma̱ña. Ña̱yóʼo kúú kuenta Jehová ña̱ kaʼmina ta so̱kóna nu̱úra.

12 ”’Tá iinna kúni̱na so̱kóna iin ti̱xúʼú, xíniñúʼu ku̱ʼu̱nna xíʼinrí nu̱ú Jehová. 13 Xíniñúʼu chinúuna ndaʼa̱na xi̱ní tíyóʼo ta xíniñúʼu kuvirí chí yéʼé tabernáculo. Ta na̱ se̱ʼe ta̱ Aarón na̱ kúú su̱tu̱ xíniñúʼu ko̱so̱yávána ni̱i̱rí iníí sa̱tá altar. 14 Ta táʼví ña̱ kaʼmina ña̱ so̱kóna nu̱ú Jehová kúú xa̱ʼan ña̱ íyo sa̱tá xitirí ta saátu ndiʼi xa̱ʼan ña̱ tíinndaa xitirí, 15 saátu u̱vi̱ saá nduchu̱ inirí xíʼin xa̱ʼan ña̱ íyo sa̱tá ña̱yóʼo ña̱ íyo yatin sa̱tárí. Tá ná tavána nduchu̱ inirí saátu xíniñúʼu tavána xa̱ʼan ña̱ íyo sa̱ta̱xáʼarí. 16 Ta ta̱ su̱tu̱ kaʼmira ndiʼi ña̱yóʼo nu̱ú altar ña̱ va̱ʼa kana yi̱ʼma̱ña. Ña̱yóʼo kúú kuenta Ndióxi̱ ña̱ kaʼmina ta so̱kóna nu̱úra, ta táminí kuxaʼa̱nña nu̱úra. Ndiʼi xa̱ʼanrí, kuenta Jehová kúúña.

17 ”’Ña̱yóʼo kúú iin ley ña̱ kundiku̱n miíndó ta saátu se̱ʼendó na̱ kaku chí nu̱únínu nda̱a̱ ndáaka nu̱ú ná kundoondó: nda̱a̱ ni iin yichi̱ va̱ása xíniñúʼu kuxundó xa̱ʼan ni ni̱i̱’”.

4 Jehová ni̱ka̱ʼa̱nkara xíʼin ta̱ Moisés: 2 “Ka̱ʼa̱n ña̱yóʼo xíʼin na̱ ñuu Israel: ‘Tá iinna ni̱ki̱ʼvina ku̱a̱chi soo kǒo níkiʼinna kuenta ta ke̱ʼéna ña̱ʼa ña̱ va̱ása kútóo Jehová, ña̱yóʼo kúú ña̱ xíniñúʼu keʼéna:

3 ”’Tá ta̱ su̱tu̱ káʼnu ni̱ki̱ʼvira ku̱a̱chi ta sa̱kíʼvira ku̱a̱chi ndiʼi na̱ ñuu, xíniñúʼu so̱kóra* iin si̱ndi̱ki̱ yúta̱* tí kǒo kue̱ʼe̱ kúúmií nu̱ú Jehová xa̱ʼa̱ ku̱a̱chi ña̱ ni̱ki̱ʼvira. 4 Xíniñúʼu ku̱ʼu̱nra xíʼin tí si̱ndi̱ki̱ yóʼo nu̱ú Jehová chí yéʼé ña̱ tabernáculo. Ta chinúura ndaʼa̱ra xi̱ní tí si̱ndi̱ki̱ yóʼo ta kaʼnírarí nu̱ú Jehová. 5 Ta ta̱ su̱tu̱ káʼnu yóʼo xíniñúʼu kuniʼira loʼo ni̱i̱ tí si̱ndi̱ki̱ yóʼo ku̱ʼu̱n xíʼinra chí ini tabernáculo. 6 Ta xíʼin nu̱ú ndaʼa̱ra* kiʼinra loʼo ni̱i̱ ta ko̱so̱yáváraña* u̱xa̱ yichi̱ nu̱ú íyo Jehová chí nu̱ú tíkaa cortina nu̱ú íyo lugar ña̱ yi̱i̱. 7 Ta saátu chikaa̱ ta̱ su̱tu̱ yóʼo loʼo ni̱i̱ ndiki̱ altar nu̱ú chíʼmána ña̱ʼa ña̱ xáʼa̱n támi, ña̱ níndichi nu̱ú íyo Jehová chí ini tabernáculo. Ta katara ndiʼi ni̱i̱ tí si̱ndi̱ki̱ yóʼo xa̱ʼa̱ altar nu̱ú xáʼmina kití* tí sóko̱na nu̱ú Ndióxi̱ ña̱ níndichi chí yéʼé tabernáculo.

8 ”’Tándi̱ʼi, kindaara ndiʼi xa̱ʼan* tí si̱ndi̱ki̱ tí so̱kóra xa̱ʼa̱ ku̱a̱chira: xa̱ʼan ña̱ íyo sa̱tá xitirí xíʼin xa̱ʼan ña̱ tíindaa xitirí, 9 saátu u̱vi̱ saá nduchu̱ inirí xíʼin xa̱ʼan ña̱ íyo sa̱tá ña̱yóʼo ña̱ íyo yatin sa̱tárí. Tá ná tavára nduchu̱ inirí saátu xíniñúʼu tavára xa̱ʼan ña̱ íyo sa̱ta̱xáʼarí. 10 Ta nda̱a̱ táki̱ʼva kéʼéna xíʼin si̱ndi̱ki̱ tí sóko̱na ña̱ va̱ʼa ndakutáʼan viína xíʼin Ndióxi̱ saátu xíniñúʼu keʼéna xíʼin tíyóʼo. Ta ta̱ su̱tu̱ kaʼmira ndiʼi ña̱yóʼo ña̱ va̱ʼa kana yi̱ʼma̱ña nu̱ú altar nu̱ú xáʼmina kití tí sóko̱na.*

11 ”’Soo ñii̱ tí si̱ndi̱ki̱, ku̱ñurí, xi̱nírí, xa̱ʼa̱rí, xitirí xíʼin si̱ʼvírí, 12 xíniñúʼu ndakiʼinra ndiʼi ña̱yóʼo ku̱ʼu̱n xíʼinra chí sa̱tá nu̱ú ndóona, nu̱ú va̱ása yaku̱a̱,* nu̱ú xátana ya̱a̱* ta kaʼmira ndiʼi ña̱yóʼo nu̱ú titu̱n tú xíxi̱. Xíniñúʼu kokoña* nu̱ú xátana ya̱a̱.

13 ”’Soo tá ndiʼi na̱ ñuu Israel ni̱ki̱ʼvina ku̱a̱chi xa̱ʼa̱ ña̱ ke̱ʼéna ña̱ va̱ása va̱ʼa ta kǒo níkiʼinna kuenta ña̱ ke̱ʼéna ña̱yóʼo. Ta na̱ congregación* va̱ása níkunda̱a̱-inina ña̱ ke̱ʼé na̱yóʼo iin ña̱ʼa ña̱ va̱ása kútóo Jehová, 14 soo tándi̱ʼi ni̱xa̱a̱na ku̱ndaa̱-inina xa̱ʼa̱ ku̱a̱chi ña̱ ni̱ki̱ʼvi na̱ ñuu, na̱ congregación yóʼo xíniñúʼu so̱kóna iin si̱ndi̱ki̱ yúta̱ xa̱ʼa̱ ku̱a̱chi na̱ ñuu ta ku̱ʼu̱nna xíʼinrí chí yéʼé tabernáculo. 15 Na̱ níʼi yichi̱ nu̱ú na̱ ñuu* chinúuna ndaʼa̱na xi̱ní tí si̱ndi̱ki̱ yóʼo nu̱ú Jehová, ta kaʼnínarí nu̱ú Jehová.

16 ”’Ta ta̱ su̱tu̱ káʼnu, xíniñúʼu kuniʼira loʼo ni̱i̱ tí si̱ndi̱ki̱ yóʼo ku̱ʼu̱n xíʼinra chí ini tabernáculo. 17 Ta xíʼin nu̱ú ndaʼa̱ra kiʼinra loʼo ni̱i̱ ta ko̱so̱yáváraña u̱xa̱ yichi̱ nu̱ú íyo Jehová chí nu̱ú tíkaa cortina. 18 Ta saátu chikaa̱ ta̱ su̱tu̱ yóʼo loʼo ni̱i̱ ndiki̱ altar ña̱ níndichi nu̱ú íyo Jehová chí ini tabernáculo. Ta katara ndiʼi ni̱i̱ tí si̱ndi̱ki̱ yóʼo xa̱ʼa̱ altar nu̱ú xáʼmina kití* tí sóko̱na nu̱ú Ndióxi̱ ña̱ níndichi chí yéʼé tabernáculo. 19 Ta tavára ndiʼi xa̱ʼan ña̱ kúúmií tí si̱ndi̱ki̱ yóʼo ta kaʼmiraña nu̱ú altar ña̱ va̱ʼa ná kana yi̱ʼma̱ña. 20 Ta nda̱a̱ táki̱ʼva ke̱ʼéra xíʼin tí si̱ndi̱ki̱ tí sóko̱na xa̱ʼa̱ ku̱a̱china, saátu keʼéra xíʼin tíyóʼo. Saá kúú ña̱ xíniñúʼu keʼéra xíʼinrí. Ta, ta̱ su̱tu̱ kúú ta̱ so̱kó tíyóʼo xa̱ʼa̱ ku̱a̱chi na̱ ñuu ta ixakáʼnuva-ini Ndióxi̱ xa̱ʼa̱ ku̱a̱chi na̱yóʼo. 21 Ta ta̱yóʼo kaʼndara chiñu ña̱ ná tavána tí si̱ndi̱ki̱ yóʼo chí sa̱tá nu̱ú ndóo na̱ ñuu ta kaʼmirarí nda̱a̱ táki̱ʼva xa̱ʼmira tí si̱ndi̱ki̱ tí nu̱ú. Tíyóʼo kúú tí so̱kóra xa̱ʼa̱ na̱ congregación.

22 ”’Tá iin ta̱ níʼi yichi̱ nu̱ú na̱ ñuu ni̱ki̱ʼvira ku̱a̱chi ta ke̱ʼéra iin ña̱ʼa ña̱ va̱ása kútóo Jehová Ndióxi̱, soo kǒo níkiʼinra kuenta ña̱ ke̱ʼéra ña̱yóʼo, 23 á ki̱ʼintura kuenta ña̱ ni̱ki̱ʼvira ku̱a̱chi xa̱ʼa̱ ña̱ ni̱ya̱ʼandosóra ña̱ káʼa̱n ley, xíniñúʼu so̱kóra iin ti̱xúʼú* loʼo tí kǒo kue̱ʼe̱ kúúmií xa̱ʼa̱ ña̱yóʼo. 24 Xíniñúʼu chinúura ndaʼa̱ra xi̱ní tí ti̱xúʼú yóʼo ta kaʼnírarí nu̱ú xáʼnína kití tí xáʼmina* ña̱ so̱kónarí nu̱ú Jehová. Tíyóʼo kúú tí so̱kóra xa̱ʼa̱ ku̱a̱chira. 25 Ta̱ su̱tu̱ kiʼinra loʼo ni̱i̱ kití tí ni̱so̱kó ta̱ ni̱ki̱ʼvi ku̱a̱chi, ta xíʼin nu̱ú ndaʼa̱ra chikaa̱ra ni̱i̱ yóʼo ndiki̱ altar nu̱ú xáʼmina kití tí sóko̱na ta katara ndiʼi ni̱i̱rí xa̱ʼa̱ altar yóʼo. 26 Ta kaʼmira ndiʼi xa̱ʼan kití yóʼo nu̱ú altar nda̱a̱ táki̱ʼva ke̱ʼéra xíʼin xa̱ʼan kití tí ni̱so̱kóna ña̱ va̱ʼa ndakutáʼan viína xíʼin Ndióxi̱. Ña̱yóʼo kúú ña̱ xíniñúʼu keʼé ta̱ su̱tu̱ xa̱ʼa̱ ta̱ ni̱ki̱ʼvi ku̱a̱chi ña̱ va̱ʼa ná ixakáʼnu-ini Ndióxi̱ xa̱ʼa̱ ku̱a̱chira. Ta ixakáʼnuva-ini Ndióxi̱ xa̱ʼa̱ ku̱a̱chira.

27 ”’Tá iin na̱ ñuu ni̱ki̱ʼvina ku̱a̱chi ta ke̱ʼéna iin ña̱ʼa ña̱ va̱ása kútóo Jehová ta kǒo níkiʼinna kuenta ña̱ ke̱ʼéna ña̱yóʼo, 28 á ki̱ʼintuna kuenta ña̱ ni̱ki̱ʼvina ku̱a̱chi, xíniñúʼu so̱kóna iin ti̱xúʼú síʼi tí yúta̱ tí kǒo kue̱ʼe̱ kúúmií xa̱ʼa̱ ku̱a̱chi ña̱ ni̱ki̱ʼvina. 29 Xíniñúʼu chinúuna ndaʼa̱na xi̱ní ti̱xúʼú síʼi tí so̱kóna xa̱ʼa̱ ku̱a̱china ta kaʼnínarí nu̱ú xáʼnína kití tí xáʼmina ña̱ sóko̱narí. 30 Ta̱ su̱tu̱ kiʼinra loʼo ni̱i̱ kití tí ni̱so̱kóna xa̱ʼa̱ ku̱a̱china ta xíʼin nu̱ú ndaʼa̱ra chikaa̱ra ni̱i̱ yóʼo ndiki̱ altar nu̱ú xáʼmina kití tí sóko̱na ta katara ndiʼi ni̱i̱rí xa̱ʼa̱ altar yóʼo. 31 Ta tavára ndiʼi xa̱ʼan kití tí ni̱so̱kóna yóʼo nda̱a̱ táki̱ʼva ta̱vára ndiʼi xa̱ʼan kití tí ni̱so̱kóna ña̱ va̱ʼa ndakutáʼan viína xíʼin Ndióxi̱, ta ta̱ su̱tu̱ kaʼmira ña̱yóʼo nu̱ú altar ta táminí kuxaʼa̱nña nu̱ú Jehová. Ña̱yóʼo kúú ña̱ xíniñúʼu keʼé ta̱ su̱tu̱ xa̱ʼa̱ na̱ ni̱ki̱ʼvi ku̱a̱chi ña̱ va̱ʼa ná ixakáʼnu-ini Ndióxi̱ xa̱ʼa̱ ku̱a̱china, ta ixakáʼnuva-ini Ndióxi̱ xa̱ʼa̱ ku̱a̱china.

32 ”’Soo tá ná taxina iin ndikachi* loʼo ña̱ va̱ʼa so̱kónarí xa̱ʼa̱ ku̱a̱china, xíniñúʼu koorí iin ndikachi síʼi loʼo tí kǒo kue̱ʼe̱ kúúmií. 33 Xíniñúʼu chinúuna ndaʼa̱na xi̱ní ndikachi síʼi tí yúta̱ tí sóko̱na xa̱ʼa̱ ku̱a̱china ta kaʼnínarí nu̱ú xáʼnína kití tí xáʼmina ña̱ so̱kónarí. 34 Ta̱ su̱tu̱ kiʼinra loʼo ni̱i̱ kití tí ni̱so̱kóna xa̱ʼa̱ ku̱a̱china ta xíʼin nu̱ú ndaʼa̱ra chikaa̱ra ni̱i̱ yóʼo ndiki̱ altar nu̱ú xáʼmina kití tí sóko̱na ta katara ndiʼi ni̱i̱rí xa̱ʼa̱ altar yóʼo. 35 Ta tavára ndiʼi xa̱ʼan tíyóʼo nda̱a̱ táki̱ʼva ta̱vára ndiʼi xa̱ʼan tí ndikachi yúta̱ tí ni̱so̱kóna ña̱ va̱ʼa ndakutáʼan viína xíʼin Ndióxi̱, ta ta̱ su̱tu̱ kaʼmira ña̱yóʼo nu̱ú altar sa̱tá kití tí xa̱ʼmina tí ni̱so̱kóna nu̱ú Jehová. Ña̱yóʼo kúú ña̱ xíniñúʼu keʼé ta̱ su̱tu̱ xa̱ʼa̱ na̱ ni̱ki̱ʼvi ku̱a̱chi ña̱ va̱ʼa ná ixakáʼnu-ini Ndióxi̱ xa̱ʼa̱ ku̱a̱china, ta ixakáʼnuva-ini Ndióxi̱ xa̱ʼa̱ ku̱a̱china.

5 ”’Tá iinna xítona ña̱ inkana kíʼvina ku̱a̱chi* á kúndaa̱-inina xa̱ʼa̱ ña̱yóʼo ta kánana na̱yóʼo ña̱ ku̱ʼu̱nna natúʼunna xa̱ʼa̱ ku̱a̱chi yóʼo soo kǒo xáʼa̱nna, ki̱ʼvina ku̱a̱chi ta ndakuiinna xa̱ʼa̱ ku̱a̱chi yóʼo.

2 ”’Á tá iin na̱ yiví ti̱inna iin kití yaku̱a̱, kúúrí iin kití yukú tí yaku̱a̱, á iin kití sa̱na̱na tí yaku̱a̱, á iin kití loʼo* tí yaku̱a̱, na̱ yiví yóʼo ku̱yaku̱a̱na ta kúúmiína ku̱a̱chi ni va̱ása níkiʼinna kuenta ña̱ ti̱innarí. 3 Tá iin na̱ yiví ti̱inna iin na̱ yiví na̱ yaku̱a̱ á iin ña̱ʼa ña̱ yaku̱a̱ ta kíʼinna kuenta ña̱ ku̱yaku̱a̱na xa̱ʼa̱ ña̱yóʼo, kúúmiívana ku̱a̱chi xa̱ʼa̱ña.

4 ”’Tá iinna kamaní chína’ána* ña̱ keʼéna iin ña̱ʼa ni kúúña ña̱ va̱ʼa á ña̱ va̱ása va̱ʼa, soo tá so̱ndíʼi ki̱ʼinna kuenta ña̱ kamaní chi̱naʼána xa̱ʼa̱ ña̱yóʼo, sáki̱ʼvina miína ku̱a̱chi.*

5 ”’Tá iinna ni̱ki̱ʼvina ku̱a̱chi xa̱ʼa̱ ña̱ ke̱ʼéna iin ña̱yóʼo, xíniñúʼu natúʼunna ndáa ki̱ʼva ni̱ki̱ʼvina ku̱a̱chi. 6 Ta saátu xíniñúʼu so̱kóna iin kití nu̱ú* Jehová xa̱ʼa̱ ña̱ ke̱ʼéna ña̱ va̱ása va̱ʼa, xíniñúʼu so̱kóna iin ndikachi* síʼi á iin ti̱xúʼú* síʼi xa̱ʼa̱ ku̱a̱china. Ña̱yóʼo kúú ña̱ xíniñúʼu keʼé ta̱ su̱tu̱ xa̱ʼa̱ na̱ ni̱ki̱ʼvi ku̱a̱chi ña̱ va̱ʼa ná ixakáʼnu-ini Ndióxi̱ xa̱ʼa̱ ku̱a̱china.

7 ”’Soo tá kǒo kívi taxina iin ndikachi chi kǒo xu̱ʼúnna ña̱ satánarí,* xíniñúʼu so̱kóna u̱vi̱ paloma náʼnu á u̱vi̱ paloma válí nu̱ú Jehová xa̱ʼa̱ ku̱a̱chi ña̱ ni̱ki̱ʼvina, iin tíyóʼo so̱kóna xa̱ʼa̱ ku̱a̱china ta inkarí kaʼmina* ña̱ so̱kónarí. 8 Xíniñúʼu kuniʼina tí saa yóʼo ku̱ʼu̱n xíʼinna nu̱ú ta̱ su̱tu̱, ta siʼna so̱kóra tí ta̱xina xa̱ʼa̱ ku̱a̱china. Kaʼndara loʼo su̱kúnrí xíʼin chíi̱nra soo va̱ása kindaara xi̱nírí. 9 Ta ko̱so̱yávára* loʼo ni̱i̱ tíyóʼo síi̱n* altar, soo ndiʼika ni̱i̱rí kataraña xa̱ʼa̱ altar. Ña̱yóʼo kúú ña̱ so̱kóra xa̱ʼa̱ ku̱a̱china. 10 Ta̱yóʼo kaʼmira inka tí saa ña̱ va̱ʼa so̱kórarí nda̱a̱ táki̱ʼva káʼa̱n ley. Ña̱yóʼo kúú ña̱ xíniñúʼu keʼé ta̱ su̱tu̱ xa̱ʼa̱ na̱ ni̱ki̱ʼvi ku̱a̱chi ña̱ va̱ʼa ná ixakáʼnu-ini Ndióxi̱ xa̱ʼa̱ ku̱a̱china.

11 ”’Soo tá kǒo kívi taxina u̱vi̱ paloma náʼnu á u̱vi̱ paloma válí chi kǒo xu̱ʼúnna ña̱ satánarí, xíniñúʼu taxina iin kilo* harina ña̱ va̱ʼaní, ña̱ va̱ʼa so̱kónaña xa̱ʼa̱ ku̱a̱chi ña̱ ni̱ki̱ʼvina. Va̱ása xíniñúʼu chikaa̱na aceite ni olíbano* sa̱tá ña̱yóʼo chi ña̱ sóko̱na xa̱ʼa̱ ku̱a̱china kúúña. 12 Kuniʼina ña̱yóʼo ku̱ʼu̱n xíʼinna nu̱ú ta̱ su̱tu̱, ta ini ndaʼa̱ ta̱ su̱tu̱ kiʼinra loʼo ña̱yóʼo ña̱ va̱ʼa so̱kóraña tasaá kivi ndakaʼán Ndióxi̱ xa̱ʼa̱ iníísaá ña̱ ni̱so̱kóra. Ta̱ su̱tu̱ kaʼmira ndiʼi ña̱yóʼo ña̱ va̱ʼa kana yi̱ʼma̱ña nu̱ú altar nu̱ú xáʼmina kití* tí sóko̱na nu̱ú Jehová. Ña̱yóʼo kúú ña̱ so̱kóra xa̱ʼa̱ ku̱a̱china. 13 Ña̱yóʼo kúú ña̱ xíniñúʼu keʼé ta̱ su̱tu̱ xa̱ʼa̱ na̱ ni̱ki̱ʼvi ku̱a̱chi, ña̱ va̱ʼa ná ixakáʼnu-ini Ndióxi̱ xa̱ʼa̱ nda̱a̱ ndáaka ku̱a̱chi ña̱ ni̱ki̱ʼvina. Ta ixakáʼnuva-ini Ndióxi̱ xa̱ʼa̱ ku̱a̱china. Ta ndiʼika ña̱ ni̱so̱kóna ña̱ ná kindo̱o kooña kuenta ta̱ su̱tu̱, nda̱a̱ táki̱ʼva kíndo̱ora xíʼin harina ña̱ sóko̱na’”.

14 Ta ni̱ka̱ʼa̱nka Jehová xíʼin ta̱ Moisés. Ta ka̱chira: 15 “Tá iinna ni̱ki̱ʼvina ku̱a̱chi xa̱ʼa̱ ña̱ va̱ása va̱ʼa níkeʼéna xíʼin ña̱ʼa ña̱ yi̱i̱ ña̱ kúú kuenta Jehová, soo va̱ása níkiʼinna kuenta tá ke̱ʼéna ña̱yóʼo, xíniñúʼu so̱kóna iin ndikachi che̱e tí kǒo kue̱ʼe̱ kúúmií nu̱ú Jehová xa̱ʼa̱ ña̱ ke̱ʼéna ña̱ va̱ása va̱ʼa. Ta̱ su̱tu̱ kúú ta̱ ka̱ʼa̱n nda̱saa xu̱ʼún ña̱ plata* koo ya̱ʼvi tí ndikachi che̱e yóʼo, ta xíniñúʼu katanaña nda̱a̱ táki̱ʼva kátana plata lugar ña̱ yi̱i̱. 16 Ta na̱yóʼo xíniñúʼu chaʼvina xa̱ʼa̱ ku̱a̱chi ña̱ ni̱ki̱ʼvina xa̱ʼa̱ ña̱ va̱ása va̱ʼa níkeʼéna xíʼin ña̱ʼa ña̱ yi̱i̱, ta saátu xíniñúʼu taxina inkaka táʼví* ya̱ʼvi ña̱yóʼo. Taxina ndiʼi ña̱yóʼo ndaʼa̱ ta̱ su̱tu̱, ta ta̱ su̱tu̱ kúú ta̱ so̱kó ña̱yóʼo xíʼin ndikachi che̱e tí so̱kóna xa̱ʼa̱ ku̱a̱china, ta ixakáʼnuva-ini Ndióxi̱ xa̱ʼa̱ ku̱a̱china.

17 ”Tá iinna ni̱ki̱ʼvina ku̱a̱chi ta ke̱ʼéna ña̱ va̱ása kútóo Jehová ni kǒo níkiʼinna kuenta tá ke̱ʼéna ña̱yóʼo, kúúmiívana ku̱a̱chi xa̱ʼa̱ ña̱yóʼo ta ndakuiinna xa̱ʼa̱ ku̱a̱china. 18 Xíniñúʼu kuniʼina iin ndikachi che̱e tí kǒo kue̱ʼe̱ kúúmií ku̱ʼu̱n xíʼinna nu̱ú ta̱ su̱tu̱ ña̱ va̱ʼa so̱kórarí xa̱ʼa̱ ña̱ ke̱ʼéna ña̱ va̱ása va̱ʼa. Tasaá ta̱ su̱tu̱ so̱kóra tíyóʼo xa̱ʼa̱ ku̱a̱chi ña̱ ni̱ki̱ʼvina ni tá kǒo níkiʼinna kuenta ña̱ ke̱ʼéna ña̱yóʼo ta ixakáʼnuva-ini Ndióxi̱ xa̱ʼa̱na. 19 Ña̱yóʼo kúú ña̱ so̱kóra xa̱ʼa̱ ña̱ ke̱ʼéna ña̱ va̱ása va̱ʼa. Saáchi ni̱ki̱ʼvina ku̱a̱chi nu̱ú Jehová xa̱ʼa̱ ña̱ ke̱ʼéna ña̱ kǒo kútóora”.

6 Ta ni̱ka̱ʼa̱nka Jehová xíʼin ta̱ Moisés: 2 “Tá iinna kǒo níxi̱niso̱ʼona ña̱ káʼa̱n Jehová ta ni̱ki̱ʼvina ku̱a̱chi xa̱ʼa̱ ña̱ sa̱ndáʼvina na̱ táʼanna xa̱ʼa̱ iin ña̱ʼa ña̱ ni̱ka̱ʼa̱nna xíʼinna kundaana á i̱xakuíʼnána ña̱ʼa na̱ táʼanna á ki̱ndaanaña ndaʼa̱na xíʼin ña̱ ndúxa̱, 3 á tá nda̱ni̱ʼína iin ña̱ʼa ña̱ nda̱ñúʼu soo va̱ása káʼa̱nna ña̱ nda̱a̱ xa̱ʼa̱ña, ta chi̱naʼána* iin ña̱ vatá* xa̱ʼa̱ nda̱a̱ ndáaka ku̱a̱chi yóʼo, ña̱yóʼo kúú ña̱ xíniñúʼu keʼéna: 4 tá kúúmiína ku̱a̱chi xa̱ʼa̱ña, xíniñúʼu ndataxina ña̱ i̱xakuíʼnána, ña̱ ki̱ndaana ndaʼa̱ inkana xíʼin ña̱ ndúxa̱, ña̱ ki̱ndaana ndaʼa̱ na̱ sa̱ndáʼvina, ña̱ ta̱xina ndaʼa̱na kundaana, ña̱ nda̱ñúʼu ta nda̱ni̱ʼínaña 5 á nda̱a̱ ndáaka ña̱ʼa ña̱ chi̱naʼána iin ña̱ vatá xa̱ʼa̱, ta xíniñúʼu chaʼvina xa̱ʼa̱ ña̱yóʼo ta taxina inka táʼví* ya̱ʼviña. Ta mií ki̱vi̱ ña̱ ná kunda̱a̱-inina ña̱ kúúmiína ku̱a̱chi, xíniñúʼu ndataxina ña̱yóʼo ndaʼa̱ na̱ xíʼin kuentaña. 6 Ta kuniʼina iin ndikachi* che̱e tí kǒo kue̱ʼe̱ kúúmií ku̱ʼu̱n xíʼinna nu̱ú ta̱ su̱tu̱ ña̱ va̱ʼa so̱kónarí nu̱ú* Jehová xa̱ʼa̱ ña̱ ke̱ʼéna ña̱ va̱ása va̱ʼa, ta nda̱a̱ táki̱ʼva íyo ya̱ʼvi ña̱ʼa ña̱ i̱xakuíʼnána saá koo ya̱ʼvi tíyóʼo ña̱ va̱ʼa so̱kónarí xa̱ʼa̱ ña̱ ke̱ʼéna ña̱ va̱ása va̱ʼa. 7 Ña̱yóʼo kúú ña̱ xíniñúʼu keʼé ta̱ su̱tu̱ xa̱ʼa̱ na̱ ni̱ki̱ʼvi ku̱a̱chi ña̱ va̱ʼa ná ixakáʼnu-ini Jehová xa̱ʼa̱ ku̱a̱china, ta ixakáʼnuva-inira xa̱ʼa̱na ni nda̱a̱ ndáaka ku̱a̱chi kúú ña̱ ni̱ki̱ʼvina”.

8 Ta ni̱ka̱ʼa̱nka Jehová xíʼin ta̱ Moisés. Ta ka̱chira: 9 “Ka̱ʼa̱n ña̱yóʼo xíʼin ta̱ Aarón ta saátu xíʼin na̱ se̱ʼera: ‘Ña̱yóʼo kúú iin ley xa̱ʼa̱ kití tí kaʼmindó* ña̱ so̱kóndórí. Ta kití tí kaʼmindó tí so̱kóndó xíniñúʼu kokorí* nu̱ú altar iníí ñuú iinsaá nda̱a̱ ná tu̱vi, ta va̱ása xíniñúʼu nda̱ʼva̱ ñuʼu̱ nu̱ú altar. 10 Ta ta̱ su̱tu̱ xíniñúʼu ndakundixira ti̱ko̱to̱ ña̱ lino ta saátu xíniñúʼu ndakundixira xatu loʼo ña̱ lino. Tándi̱ʼi, tavára ya̱a̱ kití tí ni̱so̱kóra tí xa̱ʼmira* nu̱ú altar ta chindooraña síi̱n* altar. 11 Tasaá tavára ti̱ko̱to̱ ña̱ ndíxira ta ndakundixira inkaña, ta ku̱ʼu̱nra xíʼin ya̱a̱ yóʼo nu̱ú va̱ása yaku̱a̱* chí sa̱tá nu̱ú ndóo na̱ ñuu. 12 Ta ñuʼu̱ ña̱ koko nu̱ú altar, va̱ása xíniñúʼu nda̱ʼva̱ña. Ndiʼi xi̱ta̱a̱n,* ta̱ su̱tu̱ xíniñúʼu kaʼmira titu̱n nu̱ú altar ta chinúura kití tí kaʼmira sa̱tá tú titu̱n yóʼo ta saátu kaʼmira xa̱ʼan* kití tí so̱kóra ña̱ va̱ʼa ndakutáʼan viína xíʼin Ndióxi̱ ña̱ va̱ʼa kana yi̱ʼma̱ña. 13 Ta ñuʼu̱ ña̱ koko nu̱ú altar, va̱ása xíniñúʼu nda̱ʼva̱ña.

14 ”’Ña̱yóʼo kúú iin ley xa̱ʼa̱ harina ña̱ so̱kóndó. Ndóʼó na̱ se̱ʼe ta̱ Aarón, xíniñúʼu ku̱ʼu̱nndó xíʼinña nu̱ú Jehová yatin nu̱ú altar. 15 Iin na̱yóʼo kiʼinna loʼo harina ña̱ va̱ʼaní xíʼin ini ndaʼa̱na ta saátu loʼo aceite xíʼin ndiʼi olíbano* ña̱ ka̱a sa̱tá ña̱yóʼo ta kaʼminaña sa̱tá altar ña̱ va̱ʼa ná kana yi̱ʼma̱ña tasaá kivi ndakaʼán Ndióxi̱ xa̱ʼa̱ iníísaá ña̱ ni̱so̱kóna, ña̱yóʼo kúú ña̱ so̱kóna nu̱ú Jehová ta táminí kuxaʼa̱nña nu̱úra. 16 Ta̱ Aarón xíʼin na̱ se̱ʼera kuxuna harina ña̱ ni̱so̱kóna ña̱ ná kindo̱o. Ta kuniñúʼuna ña̱yóʼo ña̱ ixava̱ʼana si̱ta̱váʼa ña̱ kǒo yuxa̱n iyá* ñúʼu xíʼin, ta kuxunaña nu̱ú lugar ña̱ yi̱i̱. Kuxunaña chí yéʼé tabernáculo. 17 Va̱ása xíniñúʼu yatanña xíʼin inka ña̱ʼa ña̱ kúúmií yuxa̱n iyá. Ña̱yóʼo kúú iin táʼví ña̱ʼa ña̱ xáʼmina ta sóko̱na nu̱úi̱ ña̱ táxii̱ ndaʼa̱na. Iin ña̱ yi̱i̱ní kúú ña̱yóʼo, nda̱a̱ táki̱ʼva íyo ña̱ʼa ña̱ sóko̱na nu̱úi̱ xa̱ʼa̱ ku̱a̱china xíʼin ña̱ʼa ña̱ sóko̱na nu̱úi̱ xa̱ʼa̱ ña̱ ke̱ʼéna ña̱ va̱ása va̱ʼa. 18 Ndiʼi na̱ ta̱a na̱ veʼe ta̱ Aarón kuxuna ña̱yóʼo. Tá ná kaʼmina ña̱ʼa ña̱ so̱kóna nu̱ú Jehová, kooña kuenta miína xíʼin na̱ se̱ʼena ndiʼi tiempo. Nda̱a̱ ndáaka ña̱ʼa ná tu̱ndaa ña̱yóʼo, xa̱a̱ña kooña ña̱ yi̱i̱’”.

19 Ta tuku ni̱ka̱ʼa̱n Jehová xíʼin ta̱ Moisés, ta ka̱chira: 20 “Ña̱yóʼo kúú ña̱ so̱kó ta̱ Aarón xíʼin na̱ se̱ʼera nu̱ú Jehová tá ná ndaka̱xinnara ña̱ koora su̱tu̱: xíniñúʼu so̱kóna iin kilo* harina ña̱ va̱ʼaní, ki̱ʼva iin litroña so̱kóna xi̱ta̱a̱n ta inka litroña so̱kóna xi̱kuaá. 21 Xíʼin aceite xíniñúʼu kuva̱ʼa ña̱yóʼo ta yatanña nu̱ú iin xi̱yo̱. Vií va̱ʼa xíniñúʼu ndasaka̱ña xíʼin aceite, ta si̱ta̱váʼa ña̱ ya̱tan ini horno* xíniñúʼu kuachi válíña ña̱ va̱ʼa so̱kóúnña ta táminí kuxaʼa̱n ña̱yóʼo nu̱ú Jehová. 22 Se̱ʼe ta̱ Aarón ta̱ ná ndaka̱xinna ña̱ xa̱a̱ra koora su̱tu̱ káʼnu kúú ta̱ so̱kó ña̱yóʼo. Ña̱yóʼo kúú iin ley ña̱ xíniñúʼu kundiku̱nna ndiʼi tiempo: xíniñúʼu kaʼmina ndiʼi ña̱ ni̱so̱kóna nu̱ú Jehová ña̱ va̱ʼa kana yi̱ʼma̱ña. 23 Ndiʼi harina ña̱ ná so̱kóna xa̱ʼa̱ iin ta̱ su̱tu̱ xíniñúʼu so̱kó ndiʼinaña. Va̱ása xíniñúʼu kuxunaña”.

24 Tuku ni̱ka̱ʼa̱n Jehová xíʼin ta̱ Moisés, ta ka̱chira: 25 “Ka̱ʼa̱n ña̱yóʼo xíʼin ta̱ Aarón ta saátu xíʼin na̱ se̱ʼera: ‘Ña̱yóʼo kúú ley ña̱ káʼa̱n xa̱ʼa̱ ña̱ʼa ña̱ so̱kóna xa̱ʼa̱ ku̱a̱china. Ta kití tí so̱kóna xa̱ʼa̱ ku̱a̱china xíniñúʼu kaʼnínarí nu̱ú Jehová, nu̱ú xáʼnína kití tí xáʼmina* tí sóko̱na. Iin ña̱ʼa ña̱ yi̱i̱ní kúú ña̱yóʼo. 26 Ta̱ su̱tu̱ ta̱ ná so̱kó ña̱yóʼo xa̱ʼa̱ ku̱a̱china kúú ta̱ xíniñúʼu kuxuña. Kuxuraña nu̱ú lugar ña̱ yi̱i̱, chí yéʼé tabernáculo.

27 ”’Ndiʼi ña̱ ná tu̱ndaa ku̱ñu yóʼo xa̱a̱ña kooña ña̱ yi̱i̱, ta tá ná kundaa* ni̱i̱ tíyóʼo ti̱ko̱to̱ iinna xíniñúʼu ndakataún ña̱yóʼo iin lugar ña̱ yi̱i̱. 28 Tá ini iin ki̱si ña̱ ñuʼú ni̱chi̱ʼyo̱ ku̱ñu yóʼo, xíniñúʼu ta̱ʼvíña. Soo tá ni̱chi̱ʼyo̱ña ini iin ki̱si ña̱ ka̱a, xíniñúʼu vií va̱ʼa ndakatana iniña xíʼin ti̱kui̱í.

29 ”’Ndiʼi na̱ ta̱a na̱ kúú su̱tu̱ kivi kuxu ña̱yóʼo. Iin ña̱ yi̱i̱ní kúúña. 30 Soo va̱ása xíniñúʼu kuxuna nda̱a̱ ni iin kití tí sóko̱na xa̱ʼa̱ ku̱a̱china tá ki̱ʼinna loʼo ni̱i̱ tíyóʼo ku̱a̱ʼa̱n xíʼinna chí ini tabernáculo. Xíniñúʼu kokorí.

7 ”’Ña̱yóʼo kúú iin ley ña̱ xíniñúʼu kundiku̱nra tá sóko̱ra ña̱ʼa xa̱ʼa̱ na̱ ke̱ʼé ña̱ va̱ása va̱ʼa. Iin ña̱ yi̱i̱ní kúú ña̱yóʼo. 2 Kití tí sóko̱na xa̱ʼa̱ ña̱ ke̱ʼéna ña̱ va̱ása va̱ʼa xíniñúʼu kaʼnínarí nu̱ú xáʼnína kití tí xáʼmina* ña̱ sóko̱narí, ta ko̱so̱yávána* ni̱i̱rí iníí sa̱tá altar. 3 So̱kóra* ndiʼi xa̱ʼanrí:* xa̱ʼan ña̱ íyo sa̱tá si̱ʼma̱rí,* xa̱ʼan ña̱ íyo sa̱tá xitirí, 4 ta saátu u̱vi̱ saá nduchu̱ inirí xíʼin xa̱ʼan ña̱ íyo yatin sa̱tárí. Tá ná tavára nduchu̱ inirí saátu tavára xa̱ʼan ña̱ íyo sa̱ta̱xáʼarí. 5 Ta, ta̱ su̱tu̱ kaʼmira ndiʼi ña̱yóʼo nu̱ú altar nda̱a̱ táki̱ʼva xáʼmira ña̱ sóko̱ra nu̱ú Jehová. Iin ña̱ sóko̱ra xa̱ʼa̱ ña̱ ke̱ʼéna ña̱ va̱ása va̱ʼa kúúña. 6 Ta ndiʼi na̱ ta̱a na̱ kúú su̱tu̱ xíniñúʼu kuxu ña̱yóʼo. Ta xíniñúʼu kuxunaña iin lugar ña̱ yi̱i̱, saáchi iin ña̱ yi̱i̱ní kúú ña̱yóʼo. 7 Ley yóʼo kúú ña̱ xíniñúʼu kundiku̱nna xíʼin ña̱ sóko̱na xa̱ʼa̱ ku̱a̱china ta saátu ña̱ sóko̱na xa̱ʼa̱ ña̱ ke̱ʼéna iin ña̱ va̱ása va̱ʼa. Ku̱ñu kití tí so̱kóna kooña kuenta ta̱ su̱tu̱ ta̱ ná so̱kórí xa̱ʼa̱ ku̱a̱china.

8 ”’Tá ná kaʼmi ta̱ su̱tu̱ iin kití ña̱ so̱kórarí xa̱ʼa̱ iin na̱ yiví, xíniñúʼu kindo̱ora xíʼin ñii̱ tíyóʼo.

9 ”’Ndiʼi ña̱ ná so̱kóna ña̱ ku̱vaʼa xíʼin harina ini horno,* ini iin cazuela á nu̱ú iin xi̱yo̱, kooña kuenta ta̱ su̱tu̱ ta̱ ná so̱kóña. 10 Soo ndiʼi harina ña̱ ná so̱kóna ña̱ nda̱saka̱ xíʼin aceite á ña̱ kǒo aceite ñúʼu xíʼin, kooña kuenta ndiʼi na̱ se̱ʼe ta̱ Aarón; inkáchi ndata̱ʼví ña̱ ndakiʼin ndiʼi na̱yóʼo.

11 ”’Ña̱yóʼo kúú iin ley xa̱ʼa̱ ña̱ so̱kóna nu̱ú Jehová ña̱ ndakutáʼan viína xíʼinra. 12 Tá kúni̱na so̱kónaña xa̱ʼa̱ ña̱ kúni̱na taxina tíxa̱ʼvi ndaʼa̱ Ndióxi̱, tá ná so̱kóna ña̱yóʼo saátu xíniñúʼu so̱kóna si̱ta̱váʼa ña̱ ti̱ku̱i̱ta̱* ña̱ kǒo yuxa̱n iyá* ñúʼu xíʼin ña̱ ku̱vaʼa xíʼin aceite, saátu galleta yásín* ña̱ kǒo yuxa̱n iyá ñúʼu xíʼin ña̱ ka̱a aceite sa̱tá, xíʼin si̱ta̱váʼa ña̱ ti̱ku̱i̱ta̱ ña̱ ku̱vaʼa xíʼin harina ña̱ va̱ʼaní ña̱ viíní nda̱saka̱ ta kúúmiíña aceite. 13 Tá ná taxina ña̱yóʼo saátu xíniñúʼu taxina si̱ta̱váʼa ña̱ ti̱ku̱i̱ta̱ ña̱ kúúmií yuxa̱n iyá, saátu taxina ña̱ sóko̱na ña̱ taxina tíxa̱ʼvi ndaʼa̱ Ndióxi̱ ña̱ va̱ʼa ndakutáʼan viína xíʼinra. 14 Tá ná so̱kóna ña̱yóʼo saátu xíniñúʼu taxina iin tá iin nu̱ú si̱ta̱váʼa ña̱ kooña ña̱ yi̱i̱ nu̱ú Jehová. Ña̱yóʼo kooña kuenta ta̱ su̱tu̱ ta̱ ná kundaa ni̱i̱ kití tí ni̱so̱kóna xa̱ʼa̱ ña̱ ndakutáʼan viína xíʼin Ndióxi̱. 15 Ku̱ñu kití tí sóko̱na ña̱ táxina tíxa̱ʼvi ndaʼa̱ Ndióxi̱ ña̱ va̱ʼa ndakutáʼan viína xíʼinra, xíniñúʼu kuxunaña mií ki̱vi̱ ña̱ sóko̱naña. Va̱ása xíniñúʼu ndataánva̱ʼanaña* nda̱a̱ inka ki̱vi̱.

16 ”’Tá sóko̱na iin ña̱ʼa xa̱ʼa̱ ña̱ ki̱ndoona keʼéna iin ña̱ʼa nu̱ú Ndióxi̱ á xa̱ʼa̱ ña̱ kúni̱ miína sóko̱naña, xíniñúʼu kuxuna ña̱ níʼina ku̱a̱ʼa̱n xíʼinna mií ki̱vi̱ ña̱ sóko̱naña, ta ña̱ ki̱ndoo kivitu kuxunaña inka ki̱vi̱. 17 Soo ki̱vi̱ u̱ni̱ xíniñúʼu kaʼmina ku̱ñu ña̱ ni̱so̱kóna ña̱ ki̱ndoo. 18 Soo tá ná kuxuna ku̱ñu kití tí ni̱so̱kóna ña̱ va̱ʼa ndakutáʼan viína xíʼin Ndióxi̱ ki̱vi̱ u̱ni̱, va̱ása kandíxa Ndióxi̱ ndakiʼinra ña̱yóʼo. Va̱ása kundayáʼvi ña̱ ni̱so̱kóna yóʼo. Iin ña̱ yaku̱a̱ kúú ña̱yóʼo. Ta na̱ ná kuxu ña̱yóʼo ndakuiinna xa̱ʼa̱ ku̱a̱china. 19 Tá ná tu̱ndaa ku̱ñu yóʼo iin ña̱ʼa ña̱ yaku̱a̱* va̱ása xíniñúʼu kuxunaña. Xíniñúʼu kaʼminaña. Na̱ kǒo kéʼé ña̱ yaku̱a̱ kivi kuxuna ku̱ñu ña̱ va̱ása yaku̱a̱.*

20 ”’Soo tá ná kuxu nda̱a̱ ndáaka na̱ kéʼé ña̱ yaku̱a̱ ku̱ñu kití tí ni̱so̱kóna ña̱ ndakutáʼan viína xíʼin Ndióxi̱ ña̱ kúú kuenta Jehová, xíniñúʼu kuvina. 21 Tá iin na̱ yiví ná tiinna iin na̱ yiví na̱ yaku̱a̱ á iin kití tí yaku̱a̱ á nda̱a̱ ndáaka ña̱ʼa ña̱ kini ña̱ yaku̱a̱ ta xíxina ku̱ñu kití tí ni̱so̱kóna ña̱ ndakutáʼan viína xíʼin Ndióxi̱ ña̱ kúú kuenta Jehová, xíniñúʼu kuvina’”.

22 Ta ni̱ka̱ʼa̱nka Jehová xíʼin ta̱ Moisés, ta ka̱chira: 23 “Ña̱yóʼo ka̱ʼún xíʼin na̱ israelita: ‘Va̱ása kuxundó xa̱ʼan tí si̱ndi̱ki̱, ni xa̱ʼan tí ndikachi* che̱e tí yúta̱,* ni xa̱ʼan tí ti̱xúʼú.* 24 Tá nda̱ni̱ʼíndó iin kití tí ni̱xi̱ʼi̱ á tí xa̱ʼní inka kití, kivi kuniñúʼundó xa̱ʼan tíyóʼo ña̱ keʼéndó nda̱a̱ ndáaka ña̱ʼa soo va̱ása kivi kuxundóña. 25 Nda̱a̱ ndáaka na̱ ná kuxu xa̱ʼan kití tí xáʼmina* tí sóko̱na nu̱ú Jehová, xíniñúʼu kuvina.

26 ”’Ni nda̱a̱ ndáaka nu̱ú ndóondó va̱ása kuxundó ni̱i̱ tí saa, ni ni̱i̱ inkaka kití. 27 Nda̱a̱ ndáaka na̱ ná kuxu ni̱i̱ xíniñúʼu kuvina’”.

28 Ta ni̱ka̱ʼa̱nka Jehová xíʼin ta̱ Moisés: 29 “Ña̱yóʼo ka̱ʼún xíʼin na̱ israelita: ‘Nda̱a̱ ndáaka na̱ ná so̱kó iin kití nu̱ú Jehová ña̱ va̱ʼa ndakutáʼan viína xíʼinra, xíniñúʼu taxina iin táʼví tíyóʼo ndaʼa̱ Jehová. 30 Xíniñúʼu kuniʼina xa̱ʼan xíʼin kándíkarí ña̱ va̱ʼa kaʼminaña ta so̱kónaña nu̱ú Jehová. Xíniñúʼu sakúikónaña* ña̱ va̱ʼa so̱kónaña nu̱ú Jehová. 31 Ta̱ su̱tu̱ kúú ta̱ kaʼmi xa̱ʼan nu̱ú altar ña̱ va̱ʼa kana yi̱ʼma̱ña, soo kándíkarí xa̱a̱ña kooña kuenta ta̱ Aarón xíʼin na̱ se̱ʼera.

32 ”’Xa̱ʼa̱ kúaʼa kití tí sóko̱ndó ña̱ va̱ʼa ndakutáʼan viíndó xíʼin Ndióxi̱ kúú ña̱ taxindó ndaʼa̱ ta̱ su̱tu̱ ña̱ kooña kuentara chi ña̱ yi̱i̱ kúú ña̱yóʼo. 33 Se̱ʼe ta̱ Aarón ta̱ ná so̱kó ni̱i̱ xíʼin xa̱ʼan kití tí sóko̱na ña̱ va̱ʼa ndakutáʼan viína xíʼin Ndióxi̱, ndakiʼinra xa̱ʼa̱ kúaʼa tíyóʼo. 34 Saáchi kuenta yi̱ʼi̱ kúú kándíkarí ña̱ sákuikóna ña̱ sóko̱na nu̱úi̱, ta saátu xa̱ʼa̱rí ña̱ yi̱i̱ ña̱ sóko̱ na̱ israelita ña̱ va̱ʼa ndakutáʼan viína xíʼi̱n, ta táxii̱ña ndaʼa̱ ta̱ Aarón xíʼin na̱ se̱ʼera ña̱ kooña kuentana, ta ña̱yóʼo koo iin ley ña̱ kundiku̱n na̱ israelita ndiʼi tiempo.

35 ”’Nu̱ú ndiʼi ña̱ xi̱xaʼmina ña̱ xi̱sokóna nu̱ú Jehová, iin táʼví ña̱yóʼo xi̱taxina ndaʼa̱ ta̱ su̱tu̱ Aarón xíʼin na̱ se̱ʼera. Ña̱yóʼo kúú ña̱ ku̱u ki̱vi̱ ña̱ nda̱kaxinrana ña̱ koona su̱tu̱ nu̱ú Jehová. 36 Jehová ni̱ka̱ʼa̱nra ña̱ taxi na̱ israelita iin táʼví ña̱yóʼo ndaʼa̱ na̱ su̱tu̱ tá nda̱kaxinrana. Ña̱yóʼo kúú iin ley ña̱ kundiku̱n miína xíʼin na̱ se̱ʼena na̱ kaku chí nu̱únínu ndiʼi tiempo”’.

37 Ña̱yóʼo kúú ley ña̱ kundiku̱nna tá ná kaʼmina kití* tí so̱kóna nu̱ú Ndióxi̱, tá ná so̱kóna harina, tá ná so̱kóna ña̱ʼa xa̱ʼa̱ ku̱a̱china, tá ná so̱kóna ña̱ʼa xa̱ʼa̱ ña̱ ke̱ʼéna ña̱ va̱ása va̱ʼa, tá ná so̱kóna kití ña̱ ndaka̱xinna na̱ koo su̱tu̱, ta saátu tá ná so̱kóna kití ña̱ va̱ʼa ndakutáʼan viína xíʼin Ndióxi̱, 38 nda̱a̱ táki̱ʼva ni̱ka̱ʼa̱n Jehová xíʼin ta̱ Moisés chí yuku̱ Sinaí tá ni̱ka̱ʼa̱nra xíʼin na̱ israelita ña̱ ná so̱kóna ña̱ʼa nu̱ú Jehová chí ñuʼú yi̱chí ña̱ Sinaí.

8 Ta ni̱ka̱ʼa̱nka Jehová xíʼin ta̱ Moisés, ta ka̱chira: 2 “Ná ku̱ʼu̱n ta̱ Aarón xíʼin na̱ se̱ʼera xíʼún, ta saátu ná ku̱ʼu̱n ti̱ko̱to̱ ña̱ kundixina, aceite tá yi̱i̱, si̱ndi̱ki̱ tí so̱kóna* xa̱ʼa̱ ku̱a̱china, u̱vi̱ saá ndikachi* che̱e xíʼin canasta nu̱ú ñúʼu si̱ta̱váʼa ña̱ kǒo yuxa̱n iyá* xíʼin, 3 ta ka̱ʼa̱n xíʼin ndiʼi na̱ ñuu ná ndatakana chí yéʼé tabernáculo”.

4 Tasaá ta̱ Moisés ke̱ʼéra nda̱a̱ táki̱ʼva ni̱ka̱ʼa̱n mií Jehová xíʼinra, ta na̱ ñuu nda̱takana chí yéʼé tabernáculo. 5 Tándi̱ʼi, ta̱ Moisés ni̱ka̱ʼa̱nra xíʼin na̱ ñuu: “Ña̱yóʼo kúú chiñu ña̱ xa̱ʼnda Jehová nu̱úyó keʼéyó”. 6 Tasaá ni̱ka̱ʼa̱n ta̱ Moisés xíʼin ta̱ Aarón xíʼin na̱ se̱ʼera ná kuyatinna, ta sa̱kúchirana. 7 Tándi̱ʼi, sa̱ndákundixira ti̱ko̱to̱ káni̱ ta̱ Aarón ta ka̱túnra ña̱ʼa tokóra, saátu sa̱ndákundixirara ti̱ko̱to̱ káni̱ ña̱ kǒo ndaʼa̱, ta nda̱kundixira ña̱ efod,* ta kútu̱va̱ʼa* ka̱túnra ña̱yóʼo xíʼin cinturón ña̱ ni̱ku̱kuna.* 8 Tasaá sa̱ndákundixirara ti̱ko̱to̱ ña̱ kundasi kándíkara, ta chi̱kaa̱ra ña̱ Urim xíʼin ña̱ Tumim* ini ña̱yóʼo. 9 Tasaá chi̱núura ti̱ko̱to̱ xi̱níra ña̱ ku̱vaʼa kunúu xi̱níra, ta nu̱ú ña̱yóʼo chi̱núura ka̱a ña̱ oro ña̱ yi̱i̱ ña̱ náʼa̱ ña̱ nda̱taxira miíra ndaʼa̱ Ndióxi̱, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés.

10 Tándi̱ʼi, ta̱ Moisés chi̱kaa̱ra aceite tá yi̱i̱ sa̱tá tabernáculo xíʼin ndiʼi ña̱ʼa ña̱ xi̱kuumiíña, ña̱ va̱ʼa ndasayi̱i̱raña. 11 Ta u̱xa̱ yichi̱ ku̱ndaara loʼo aceite sa̱tá altar ta nda̱sayi̱i̱raña xíʼin ndiʼi ña̱ʼa ña̱ kuniñúʼuna xíʼinña, ta saátu ke̱ʼéra xíʼin ña̱ʼa nu̱ú kuñuʼu ti̱kui̱í xíʼin ña̱ʼa nu̱ú kunúuña, ke̱ʼéra ña̱yóʼo ña̱ va̱ʼa ndasayi̱i̱raña. 12 Tándi̱ʼi, chi̱kaa̱ra loʼo aceite tá yi̱i̱ xi̱ní ta̱ Aarón ña̱ va̱ʼa ndasayi̱i̱rara.

13 Tasaá, ta̱ Moisés ni̱ka̱ʼa̱nra xíʼin na̱ se̱ʼe ta̱ Aarón ná kuyatinna, ta sa̱ndákundixirana ti̱ko̱to̱ náni̱, ka̱túnra ña̱ʼa tokóna ta saátu chi̱ndósóra ti̱ko̱to̱ xi̱nína ña̱ ku̱vaʼa kundóso xi̱nína, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés.

14 Tándi̱ʼi, ni̱ka̱ʼa̱nra ná kuniʼina si̱ndi̱ki̱ tí so̱kóra xa̱ʼa̱ ku̱a̱china ku̱ʼu̱n xíʼinna nu̱úra, ta ta̱ Aarón xíʼin na̱ se̱ʼera chi̱ndósona ndaʼa̱na xi̱ní tí si̱ndi̱ki̱ tí so̱kóna xa̱ʼa̱ ku̱a̱china. 15 Ta̱ Moisés xa̱ʼníra tí si̱ndi̱ki̱ yóʼo, ta xíʼin nu̱ú ndaʼa̱ra* ki̱ʼinra loʼo ni̱i̱rí ta xa̱kinraña ndiʼi ndiki̱ altar tasaá nda̱sayi̱i̱ra altar, ta ni̱i̱rí ña̱ ni̱ndoo xa̱taraña xa̱ʼa̱ altar ña̱ va̱ʼa ndasayi̱i̱raña, tasaá kivi so̱kóna ña̱ʼa nu̱úña ña̱ va̱ʼa ixakáʼnu-ini Ndióxi̱ xa̱ʼa̱ ku̱a̱china. 16 Tándi̱ʼi, ki̱ʼinra ndiʼi xa̱ʼan* ña̱ íyo sa̱tá xitirí, ndiʼi xa̱ʼan ña̱ íyo sa̱ta̱xáʼarí xíʼin u̱vi̱ saá nduchu̱ inirí ta saátu xa̱ʼan ña̱ íyo sa̱tá ña̱yóʼo, ta ta̱ Moisés xa̱ʼmiraña nu̱ú altar ña̱ va̱ʼa kana yi̱ʼma̱ña. 17 Tasaá xa̱ʼndara chiñu ña̱ ná kaʼmina ñii̱ tí si̱ndi̱ki̱ yóʼo, ku̱ñurí xíʼin si̱ʼvírí chí sa̱ta nu̱ú ni̱xi̱yo veʼe válína, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés.

18 Tándi̱ʼi, ni̱ka̱ʼa̱nra ña̱ ná kuniʼina ndikachi che̱e tí kaʼnína tí so̱kóna nu̱ú Ndióxi̱ ku̱ʼu̱n xíʼinna nu̱úra, ta ta̱ Aarón xíʼin na̱ se̱ʼera chi̱ndósona ndaʼa̱na xi̱ní tí ndikachi che̱e yóʼo. 19 Tasaá ta̱ Moisés xa̱ʼníra tí ndikachi che̱e yóʼo, ta ni̱ko̱so̱yávára* ni̱i̱rí iníí sa̱tá altar. 20 Ta̱ Moisés xa̱ʼnda válíra tí ndikachi che̱e yóʼo, ta xa̱ʼmira xi̱nírí, ku̱ñurí ña̱ xa̱ʼndara xíʼin xa̱ʼanrí* ña̱ va̱ʼa kana yi̱ʼma̱ña. 21 Ta xíʼin ti̱kui̱í nda̱katara xitirí xíʼin xa̱ʼa̱rí, ta ta̱ Moisés xa̱ʼmira iníísaá tí ndikachi che̱e yóʼo nu̱ú altar ña̱ va̱ʼa kana yi̱ʼma̱rí. Kití yóʼo kúú tí xa̱ʼmira,* tí ni̱so̱kóra nu̱ú Ndióxi̱ ta táminí xi̱xaʼa̱nrí. Tíyóʼo kúú tí xa̱ʼmina ña̱ ni̱so̱kónarí nu̱ú Jehová, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés.

22 Tándi̱ʼi, ta̱ Moisés ni̱ka̱ʼa̱nra ña̱ ná kuniʼina ndikachi che̱e tí u̱vi̱ ku̱ʼu̱n xíʼinna nu̱úra, tíyóʼo kúú tí so̱kóra ña̱ ndaka̱xinra na̱ koo su̱tu̱, ta ta̱ Aarón xíʼin na̱ se̱ʼera chi̱ndósona ndaʼa̱na xi̱nírí. 23 Ta̱ Moisés xa̱ʼníra tí ndikachi che̱e ta chi̱kaa̱ra loʼo ni̱i̱rí yuʼú so̱ʼo kúaʼa ta̱ Aarón, saátu nu̱ú ndaʼa̱ kúaʼara ña̱ nduʼú xíʼin nu̱ú xa̱ʼa̱* kúaʼara ña̱ nduʼú. 24 Tasaá, ta̱ Moisés ni̱ka̱ʼa̱nra xíʼin na̱ se̱ʼe ta̱ Aarón ná kuyatinna, ta chi̱kaa̱ra loʼo ni̱i̱ yuʼú so̱ʼo kúaʼana, saátu nu̱ú ndaʼa̱ kúaʼana ña̱ nduʼú xíʼin nu̱ú xa̱ʼa̱ kúaʼana ña̱ nduʼú. Ta ta̱ Moisés ni̱ko̱so̱yávára ndiʼika ni̱i̱ tíyóʼo iníí sa̱tá altar.

25 Tasaá ki̱ʼinra xa̱ʼanrí, xa̱ʼan ña̱ íyo si̱ʼma̱rí,* ndiʼi xa̱ʼan ña̱ íyo sa̱tá xitirí, xa̱ʼan ña̱ íyo sa̱ta̱xáʼarí, u̱vi̱ saá nduchu̱ inirí xíʼin xa̱ʼan ña̱ kúúmiíña, ta saátu xa̱ʼa̱ kúaʼarí. 26 Tasaá, ini canasta nu̱ú ñúʼu si̱ta̱váʼa ña̱ kǒo yuxa̱n iyá xíʼin ña̱ níndichi nu̱ú Jehová, ta̱vára iin si̱ta̱váʼa ña̱ ti̱ku̱i̱ta̱* ña̱ kǒo yuxa̱n iyá xíʼin, ta̱vátura iin si̱ta̱váʼa ña̱ ti̱ku̱i̱ta ña̱ kúúmií aceite xíʼin iin galleta ña̱ yásín,* tándi̱ʼi chi̱ndósoraña sa̱tá xa̱ʼan tí ndikachi xíʼin xa̱ʼa̱ kúaʼarí. 27 Tasaá chi̱ndósora ndiʼi ña̱yóʼo nu̱ú ndaʼa̱ ta̱ Aarón xíʼin na̱ se̱ʼera, ta ki̱xáʼara sákuikóraña* ña̱ va̱ʼa so̱kónaña nu̱ú Jehová. 28 Tasaá ta̱ Moisés ki̱ʼinraña ndaʼa̱na, ta chi̱ndósoraña sa̱tá kití tí xíxi̱ nu̱ú altar ña̱ va̱ʼa kokoña.* Ni̱so̱kóna ña̱yóʼo ña̱ va̱ʼa ndaka̱xinna na̱ koo su̱tu̱ ta táminí xi̱xaʼa̱nña. Ña̱yóʼo kúú ña̱ xa̱ʼmina ña̱ ni̱so̱kóna nu̱ú Jehová.

29 Tándi̱ʼi, ki̱ʼin ta̱ Moisés kándíkarí ta sa̱kúikóraña ña̱ va̱ʼa so̱kóraña nu̱ú Jehová. Kándíka tí ndikachi che̱e tí ni̱so̱kóra tá nda̱kaxinra na̱ su̱tu̱ kúú ña̱ nda̱kiʼinra, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés.

30 Ta, ta̱ Moisés ki̱ʼinra loʼo aceite tá yi̱i̱ xíʼin loʼo ni̱i̱ ña̱ ndóso nu̱ú altar, ta ku̱ndaaraña ta̱ Aarón xíʼin ti̱ko̱to̱ra ta saátu na̱ se̱ʼera xíʼin ti̱ko̱to̱na, saá kúú ña̱ nda̱sayi̱i̱ra ta̱ Aarón xíʼin ti̱ko̱to̱ra saátu na̱ se̱ʼera xíʼin ti̱ko̱to̱na.

31 Tasaá, ta̱ Moisés ni̱ka̱ʼa̱nra xíʼin ta̱ Aarón ta saátu xíʼin na̱ se̱ʼera: “Sachíʼyo̱ndó ku̱ñurí chí yéʼé tabernáculo. Ta kán kuxundóña xíʼin si̱ta̱váʼa ña̱ ñúʼu ini canasta* nda̱a̱ táki̱ʼva ni̱ka̱ʼa̱n Ndióxi̱ xíʼi̱n tá ka̱chira: ‘Ta̱ Aarón xíʼin na̱ se̱ʼera kúú na̱ kuxu ña̱yóʼo’. 32 Ta xíniñúʼu kaʼmindó ku̱ñu xíʼin si̱ta̱váʼa ña̱ ná kindo̱o. 33 U̱xa̱ ki̱vi̱ kúú ña̱ va̱ása kuxíkándó yéʼé tabernáculo, nda̱a̱ ná sandíʼi̱ ña̱ ndaka̱xii̱n ndóʼó ña̱ koondó su̱tu̱. Saáchi u̱xa̱ ki̱vi̱ kúú ña̱ kuniñúʼi̱ ña̱ ndaka̱xii̱n ndóʼó ña̱ koondó su̱tu̱. 34 Jehová kúú ta̱ xa̱ʼnda chiñu ña̱ ná keʼéyó nda̱a̱ táki̱ʼva ke̱ʼéyó vitin ña̱ va̱ʼa ndoo ku̱a̱chindó. 35 Ta u̱xa̱ ki̱vi̱ kúú ña̱ kindo̱ondó chí yéʼé tabernáculo káʼñu xíʼin ñuú,* ta saxínundó chiñu ña̱ kúúmiíndó nu̱ú Jehová, ña̱ va̱ʼa ná kǒo kuvindó chi saá kúú ña̱ ni̱ka̱ʼa̱nra xíʼi̱n”.

36 Ta ta̱ Aarón xíʼin na̱ se̱ʼera, ke̱ʼéna ndiʼi ña̱ ni̱ka̱ʼa̱n Jehová xíʼin ta̱ Moisés.

9 Tá ni̱ya̱ʼa u̱na̱ ki̱vi̱, ta̱ Moisés ka̱nara ta̱ Aarón xíʼin na̱ se̱ʼera ta saátu na̱ xi̱niʼi yichi̱ nu̱ú na̱ ñuu* Israel. 2 Tasaá ni̱ka̱ʼa̱nra xíʼin ta̱ Aarón: “Kiʼin iin si̱ndi̱ki̱ che̱e loʼo tí kǒo kue̱ʼe̱ kúúmií ta so̱kóúnrí* xa̱ʼa̱ ku̱a̱chiún, saátu kiʼún iin ndikachi* che̱e tí yúta̱* tí kǒo kue̱ʼe̱ kúúmií ta kaʼmiúnrí* ña̱ so̱kóúnrí nu̱ú Jehová. 3 Soo ña̱yóʼo ka̱ʼún xíʼin na̱ israelita: ‘Kiʼinndó iin ti̱xúʼú* che̱e ta so̱kóndórí xa̱ʼa̱ ku̱a̱chindó, saátu kiʼinndó iin si̱ndi̱ki̱ yúta̱ xíʼin iin ndikachi che̱e loʼo tí kǒo kue̱ʼe̱ kúúmií tí iin ku̱i̱ya̱, ta kaʼmindórí ña̱ va̱ʼa so̱kóndórí nu̱ú Ndióxi̱, 4 saátu kiʼinndó iin si̱ndi̱ki̱ che̱e xíʼin iin ndikachi che̱e ta so̱kóndórí ña̱ ndakutáʼan viíndó xíʼin Ndióxi̱, ta so̱kóndó tíyóʼo nu̱ú Jehová, saátu so̱kóndó harina ña̱ nda̱saka̱ xíʼin aceite saáchi vitin ndeta Jehová nu̱úndó’”.

5 Xa̱ʼa̱ ña̱kán ni̱xa̱ʼa̱nna xíʼin ndiʼi ña̱yóʼo chí nu̱ú tabernáculo, nda̱a̱ táki̱ʼva ni̱ka̱ʼa̱n ta̱ Moisés xíʼinna. Tándi̱ʼi, ndiʼi na̱ ñuu ku̱yatinna ta xi̱kuitana nu̱ú Jehová. 6 Tasaá ta̱ Moisés ka̱chira: “Ña̱yóʼo kúú ña̱ káʼa̱n Jehová xíʼinndó keʼéndó ña̱ va̱ʼa kunindó ndee̱ Jehová”. 7 Tasaá ta̱ Moisés ni̱ka̱ʼa̱nra xíʼin ta̱ Aarón: “Kuyatin nu̱ú altar ta so̱kó ña̱ níʼún ki̱xaa̱ xíʼún xa̱ʼa̱ ku̱a̱chiún, saátu kaʼmiún kití* tí so̱kóún nu̱ú Ndióxi̱ xa̱ʼa̱ ku̱a̱chiún ta saátu xa̱ʼa̱ na̱ veʼún. Saátu so̱kóún ña̱ʼa ña̱ ki̱xaa̱ xíʼin na̱ ñuu ña̱ va̱ʼa ixakáʼnu-ini Ndióxi̱ xa̱ʼa̱ ku̱a̱china, nda̱a̱ táki̱ʼva ni̱ka̱ʼa̱n Jehová”.

8 Ta kamaní ku̱yatin ta̱ Aarón nu̱ú altar ta xa̱ʼníra tí si̱ndi̱ki̱ loʼo tí so̱kóra xa̱ʼa̱ ku̱a̱chira. 9 Tasaá, na̱ se̱ʼe ta̱ Aarón ta̱xina ni̱i̱rí ndaʼa̱ra, sa̱ndáxira* nu̱ú ndaʼa̱ra* xíʼin ni̱i̱ yóʼo ta xa̱kinraña ndiki̱ altar. Tándi̱ʼi, xa̱tara ndiʼika ni̱i̱ ña̱ ni̱ndo̱o xa̱ʼa̱ altar. 10 Ta nu̱ú altar xa̱ʼmira xa̱ʼanrí,* nduchu̱ inirí xíʼin xa̱ʼan sa̱ta̱xáʼarí ña̱ ni̱so̱kóra xa̱ʼa̱ ku̱a̱chira, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés. 11 Ta xa̱ʼmira ku̱ñurí xíʼin ñii̱rí chí sa̱tá nu̱ú xi̱ndita veʼe válína.

12 Tándi̱ʼi, xa̱ʼníra kití tí kaʼmira nu̱ú Ndióxi̱. Ta na̱ se̱ʼe ta̱ Aarón ta̱xina ni̱i̱ ndaʼa̱ra ta ta̱yóʼo ni̱ko̱so̱yáváraña* iníí sa̱tá altar. 13 Na̱yóʼo ta̱xina ku̱ñurí ña̱ xa̱ʼnda válína xíʼin xi̱nírí ta xa̱ʼmiraña nu̱ú altar ña̱ kana yi̱ʼma̱ña. 14 Saátu nda̱katara xitirí xíʼin xa̱ʼa̱rí ta chi̱ndósora ña̱yóʼo sa̱tá kití tí xáʼmira nu̱ú altar ña̱ va̱ʼa kokoña* ta kana yi̱ʼma̱ña.

15 Tasaá ni̱so̱kóra ña̱ʼa ña̱ ki̱xaa̱ xíʼin na̱ ñuu: ki̱ʼinra ti̱xúʼú che̱e tí ki̱xaa̱ xíʼin na̱ ñuu ña̱ so̱kóra xa̱ʼa̱ ku̱a̱china, xa̱ʼnírarí ta ni̱so̱kórarí xa̱ʼa̱ ku̱a̱china nda̱a̱ táki̱ʼva ke̱ʼéra xíʼin tí nu̱ú. 16 Saátu xa̱ʼmirarí ta ni̱so̱kórarí nu̱ú Ndióxi̱, ta nda̱a̱ táki̱ʼva káʼa̱n ley saá ke̱ʼéra xíʼinrí.

17 Tándi̱ʼi, ni̱so̱kótura harina, ta ini ndaʼa̱ra ki̱ʼinra loʼo ña̱yóʼo ta xa̱ʼmiraña nu̱ú altar xíʼin kití tí xa̱ʼmira tí ni̱so̱kóra nu̱ú Ndióxi̱ tá xi̱ta̱a̱n.*

18 Tándi̱ʼi, xa̱ʼníra si̱ndi̱ki̱ che̱e xíʼin ndikachi che̱e tí so̱kóra ña̱ va̱ʼa ndakutáʼan vií na̱ ñuu xíʼin Ndióxi̱. Tasaá na̱ se̱ʼe ta̱ Aarón ta̱xina ni̱i̱ ndaʼa̱ra ta ni̱ko̱so̱yáváraña iníí sa̱tá altar. 19 Soo xa̱ʼan tí si̱ndi̱ki̱ che̱e xíʼin xa̱ʼan ña̱ íyo si̱ʼma̱* tí ndikachi che̱e ta saátu xa̱ʼan ña̱ íyo sa̱tá nduchu̱ inirí xíʼin xa̱ʼan ña̱ íyo sa̱ta̱xáʼarí, 20 chi̱ndósona ndiʼiña sa̱tá kándíka tí kití yóʼo, tándi̱ʼi xa̱ʼminaña nu̱ú altar ña̱ va̱ʼa kana yi̱ʼma̱ña. 21 Soo ta̱ Aarón sa̱kúikóra* kándíka tí kití yóʼo xíʼin xa̱ʼa̱ kúaʼarí, ta ni̱so̱kóraña nu̱ú Jehová, nda̱a̱ táki̱ʼva ni̱ka̱ʼa̱n ta̱ Moisés.

22 Tá sa̱ndíʼi ta̱ Aarón ni̱so̱kóra kití xa̱ʼa̱ ku̱a̱china, saátu tá sa̱ndíʼira xa̱ʼmira kití ta ni̱so̱kóra ña̱ʼa ña̱ ndakutáʼan viína xíʼin Ndióxi̱, nda̱niʼira ndaʼa̱ra chí nu̱ú íyo na̱ ñuu, chi̱kaa̱ra bendiciónna tasaá nu̱ura. 23 Ta, ta̱ Moisés xíʼin ta̱ Aarón ni̱ki̱ʼvina ini tabernáculo; tándi̱ʼi ke̱ena ta chi̱kaa̱na bendición na̱ ñuu.

Tasaá ndiʼi na̱ ñuu xi̱nina ndee̱ Jehová, 24 ta Jehová chi̱ndaʼára iin ñuʼu̱ ta ki̱xáʼaña xáʼmiña kití tí ni̱so̱kóna nu̱úra xíʼin xa̱ʼan ña̱ ndóso nu̱ú altar. Tá xi̱ni ndiʼi na̱ ñuu ña̱yóʼo nda̱kanda̱ní-inina* ta ndeéní ki̱xáʼa ndáʼyi̱ kóʼóna* ta xi̱kuxítína.

10 Tándi̱ʼi, na̱ se̱ʼe ta̱ Aarón, ta̱ Nadab xíʼin ta̱ Abihú ki̱ʼinna ña̱ʼa nu̱ú kuñuʼu ñuʼu̱ ta ta̱ánna ñuʼu̱ ña̱ xíxi̱ iniña, sa̱tá ña̱yóʼo chi̱kaa̱na ña̱ chíʼmána ta ki̱xáʼana xáʼminaña nu̱ú Jehová, soo va̱ása vií níkeʼéna ña̱yóʼo ta va̱ása níka̱ʼa̱ntu Ndióxi̱ xíʼinna ña̱ keʼénaña. 2 Tasaá, Jehová chi̱ndaʼára iin ñuʼu̱ ta xa̱ʼmiña na̱yóʼo, tasaá ni̱xi̱ʼi̱na nu̱ú Jehová. 3 Ta ta̱ Moisés ni̱ka̱ʼa̱nra xíʼin ta̱ Aarón: “Ña̱yóʼo kúú ña̱ ni̱ka̱ʼa̱n Jehová: ‘Nduyi̱íi̱ nu̱ú na̱ íyo yatin xíʼi̱n ta ndukáʼnui̱ nu̱ú ndiʼi na̱ ñuu’”. Ta ni kǒo ña̱ níka̱ʼa̱n ta̱ Aarón.

4 Tasaá, ta̱ Moisés ka̱nara ta̱ Misael xíʼin ta̱ Elzafán na̱ se̱ʼe ta̱ Uziel xito ta̱ Aarón, ta ni̱ka̱ʼa̱nra xíʼinna: “Naʼandó yóʼo. Tavándó na̱ ñanindó ini tabernáculo ta ku̱ʼu̱nndó xíʼinna chí sa̱tá nu̱ú ndíta veʼe válíyó”. 5 Ta nda̱a̱ táki̱ʼva ni̱ka̱ʼa̱n ta̱ Moisés saá ke̱ʼéna, ni̱xa̱ʼa̱nna ta nda̱kiʼinna na̱yóʼo ku̱a̱ʼa̱n xíʼinna chí sa̱tá nu̱ú xi̱ndoona ta va̱ása nítavána ti̱ko̱to̱ náni̱ ña̱ ndíxina.

6 Tándi̱ʼi, ta̱ Moisés ni̱ka̱ʼa̱nra xíʼin ta̱ Aarón ta saátu xíʼin inkaka na̱ se̱ʼera, ta̱ Eleazar xíʼin ta̱ Itamar ta ka̱chira: “Va̱ása taxindó kutaka̱ xi̱níndó ta ni va̱ása ndatándó ti̱ko̱to̱ndó, tasaá va̱ása kuvindó ta va̱ása sa̱a̱ Ndióxi̱ xíʼin na̱ ñuu. Ndiʼi na̱ ñuu Israel kúú na̱ kuaku xa̱ʼa̱ na̱ xa̱ʼní Jehová xíʼin ñuʼu̱. 7 Va̱ása kuxíkándó chí yéʼé tabernáculo chi tá ná keʼéndó ña̱yóʼo kuvindó, saáchi mií Jehová kúú ta̱ nda̱kaxin ndóʼó xíʼin aceite tá yi̱i̱”. Tasaá ke̱ʼéna ña̱ ni̱ka̱ʼa̱n ta̱ Moisés xíʼinna.

8 Tándi̱ʼi, Jehová ni̱ka̱ʼa̱nra xíʼin ta̱ Aarón: 9 “Ni miíún ni na̱ se̱ʼún va̱ása xíniñúʼu koʼondó vino ni inkaka ndixi tá ná ki̱ʼvindó ini tabernáculo, tasaá va̱ása kuvindó. Ña̱yóʼo kúú iin ley ña̱ xíniñúʼu kundiku̱n miíndó xíʼin na̱ se̱ʼendó na̱ kaku chí nu̱únínu ndiʼi tiempo. 10 Ña̱yóʼo kúú ña̱ kivi chindeétáʼan xíʼinndó ña̱ ndakunindó ña̱ʼa ña̱ yi̱i̱ nu̱ú ña̱ va̱ása yi̱i̱ ta saátu ña̱ʼa ña̱ va̱ása yaku̱a̱* nu̱ú ña̱ yaku̱a̱,* 11 tasaá sanáʼa̱ndó na̱ israelita ndiʼi ña̱ ni̱ka̱ʼa̱n Jehová xíʼin ta̱ Moisés ña̱ xíniñúʼu keʼéna”.

12 Ta ni̱ka̱ʼa̱n ta̱ Moisés xíʼin ta̱ Aarón ta saátu xíʼin ta̱ Eleazar xíʼin ta̱ Itamar na̱ se̱ʼera na̱ tákuka, ta ka̱chira: “Tá ná so̱kóna* harina ta kaʼmindóña nu̱ú Jehová, xíniñúʼu ndakiʼinndó ña̱ ná kindo̱o ta keʼéndó si̱ta̱váʼa xíʼinña, va̱ása chikaa̱ndó yuxa̱n iyá* xíʼinña ta kuxundóña yatin nu̱ú níndichi altar chi iin ña̱ yi̱i̱ní kúú ña̱yóʼo. 13 Xíniñúʼu kuxundóña nu̱ú lugar ña̱ yi̱i̱, saáchi nu̱ú ndiʼi ña̱ʼa ña̱ sóko̱na ña̱ xáʼmina nu̱ú Jehová, ña̱yóʼo kúú táʼví ña̱ xíniñúʼu ndakiʼin miíún xíʼin na̱ se̱ʼún, chi ña̱yóʼo kúú ña̱ ni̱ka̱ʼa̱n Ndióxi̱ xíʼi̱n. 14 Saátu, nu̱ú iin lugar ña̱ va̱ása yaku̱a̱* xíniñúʼu kuxu miíún, se̱ʼeta̱ún xíʼin se̱ʼe-síʼún kándíka kití tí ni̱so̱kóna tí sa̱kúikóna* nu̱ú Ndióxi̱ saátu xa̱ʼa̱rí ña̱ yi̱i̱. Saáchi tá sóko̱ na̱ israelita ña̱ʼa ña̱ va̱ʼa ndakutáʼan viína xíʼin Ndióxi̱, ña̱yóʼo kúú táʼví ña̱ xíniñúʼu ndakiʼin miíún xíʼin na̱ se̱ʼún. 15 Kuniʼindó xa̱ʼa̱ kití ña̱ ndu̱yi̱i̱ xíʼin kándíkarí ña̱ sakúikóndó, saátu xa̱ʼan* kití tí kaʼmindó tí so̱kóndó nu̱ú Ndióxi̱ ña̱ va̱ʼa so̱kóndó ndiʼi ña̱yóʼo ta sakúikóndóña nu̱ú Jehová, saáchi ña̱yóʼo kúú táʼví ña̱ ndakiʼin miíún xíʼin na̱ se̱ʼún ndiʼi tiempo nda̱a̱ táki̱ʼva ni̱ka̱ʼa̱n Jehová”.

16 Tasaá, ta̱ Moisés na̱ndukúra tí ti̱xúʼú* che̱e tí ni̱so̱kóna xa̱ʼa̱ ku̱a̱china ta ku̱ndaa̱-inira ña̱ xa̱ʼminarí. Tasaá ni̱sa̱a̱níra xíʼin ta̱ Eleazar ta saátu xíʼin ta̱ Itamar, na̱ se̱ʼe ta̱ Aarón na̱ tákuka, ta ni̱ka̱ʼa̱nra ña̱yóʼo xíʼinna: 17 “¿Nda̱chun va̱ása níxixindó ku̱ñu kití tí ni̱so̱kóna xa̱ʼa̱ ku̱a̱china ini tabernáculo? ¿Á va̱ása xíni̱ndó ña̱ iin ña̱ yi̱i̱ní kúú ña̱yóʼo? ¿Á su̱ví ña̱yóʼo kúú ña̱ ta̱xi Ndióxi̱ ndaʼa̱ndó ña̱ va̱ʼa ndakuiinndó xa̱ʼa̱ ku̱a̱chi na̱ ñuu, tasaá kivi so̱kóndóña nu̱úra ta ixakáʼnu-ini Jehová xa̱ʼa̱na? 18 Va̱ása níxa̱ʼa̱nndó xíʼin ni̱i̱ tí ni̱so̱kóndó yóʼo ini tabernáculo, ña̱kán xi̱niñúʼu kuxundó ku̱ñu tíyóʼo ini tabernáculo, nda̱a̱ táki̱ʼva ni̱ka̱ʼa̱n Ndióxi̱ xíʼi̱n”. 19 Ta ta̱ Aarón ni̱ka̱ʼa̱nra xíʼin ta̱ Moisés: “Na̱yóʼo ni̱so̱kóna ña̱ʼa xa̱ʼa̱ ku̱a̱china ta saátu xa̱ʼmina kití* tí ni̱so̱kóna nu̱ú Jehová, soo xa̱a̱ xíni̱vaún ndiʼi ña̱ ndo̱ʼi̱ vitin. Tá vitin níxixii̱ ña̱ ni̱so̱kóna xa̱ʼa̱ ku̱a̱china, ¿á kutóo Jehová ña̱yóʼo?”. 20 Tá xi̱niso̱ʼo ta̱ Moisés ña̱yóʼo, va̱ʼava ni̱tu̱vira xíʼin ña̱ ni̱ka̱ʼa̱nra.

11 Tasaá Jehová ni̱ka̱ʼa̱nra xíʼin ta̱ Moisés ta saátu xíʼin ta̱ Aarón: 2 “Ña̱yóʼo ka̱ʼa̱nndó xíʼin na̱ israelita: ‘Tíyóʼo kúú kití tí íyo nu̱ú ñuʼú tí kivi kuxundó: 3 ndiʼi kití tí nda̱taʼví chíi̱n ta saátu nda̱taʼví ti̱xin xa̱ʼa̱rí, tí ndákaxíndi̱ʼi̱ ña̱ xáxirí kúú tí kivi kuxundó.

4 ”’Soo kití tí ndákaxíndi̱ʼi̱ ña̱ xáxirí á tí nda̱taʼví chíi̱n, tí va̱ása xíniñúʼu kuxundó kúú tíyóʼo: tí camello, saáchi ni ndákaxíndi̱ʼi̱rí ña̱ xáxirí va̱ása níndata̱ʼví chíi̱nrí. Tí yaku̱a̱ xíniñúʼu koo tíyóʼo nu̱úndó. 5 Saátu va̱ása xíniñúʼu kuxundó tí damán, saáchi ni ndákaxíndi̱ʼi̱rí ña̱ xáxirí, soo va̱ása níndata̱ʼví chíi̱nrí. Tí yaku̱a̱ xíniñúʼu koo tíyóʼo nu̱úndó. 6 Saátu va̱ása xíniñúʼu kuxundó leso,* saáchi ni ndákaxíndi̱ʼi̱rí ña̱ xáxirí, soo va̱ása níndata̱ʼví chíi̱nrí. Tí yaku̱a̱ xíniñúʼu koo tíyóʼo nu̱úndó. 7 Saátu va̱ása kuxundó tí kini̱, saáchi ni nda̱taʼvíva chíi̱nrí ta nda̱taʼví ti̱xin xa̱ʼa̱rí, soo va̱ása ndákaxíndi̱ʼi̱rí ña̱ xáxirí. Tí yaku̱a̱ xíniñúʼu koo tíyóʼo nu̱úndó. 8 Va̱ása xíniñúʼu kuxundó nda̱a̱ ni loʼo ku̱ñu tíyóʼo, ta ni va̱ása xíniñúʼu tiinndórí tá ni̱xi̱ʼi̱rí. Tí yaku̱a̱ xíniñúʼu koo tíyóʼo nu̱úndó.

9 ”’Tíyóʼo kúú kití tí ñúʼu ini ti̱kui̱í tí kivi kuxundó: kivi kuxundó kití tí íyo ndi̱xi̱n, tí íyo nduchu* sa̱tá, tí ñúʼu ini mar á tí ñúʼu ini yu̱ta. 10 Soo ndiʼi kití tí ñúʼu ini mar á tí ñúʼu ini yu̱ta tí kǒo ndi̱xi̱n ta ni kǒo nduchu sa̱tárí, ni kúúrí tí xíka tiʼvi á nda̱a̱ ndáaka kití tí ñúʼu ini ti̱kui̱í, tí yaku̱a̱ xíniñúʼu koorí nu̱úndó. 11 Va̱ása xíniñúʼu kuxundó nda̱a̱ ni loʼo ku̱ñurí, tí yaku̱a̱ xíniñúʼu koorí nu̱úndó. Ta xíniñúʼu kukini-inindó kunindó tíyóʼo tá ni̱xi̱ʼi̱rí. 12 Ndiʼi tí ñúʼu ini ti̱kui̱í, tí kǒo ndi̱xi̱n ta ni kǒo nduchu sa̱tárí, tí yaku̱a̱ xíniñúʼu koo tíyóʼo nu̱úndó.

13 ”’Tíyóʼo kúú kití tí ndáchí tí xíniñúʼu kukini-inindó kunindó. Va̱ása kuxundó kití yóʼo chi tí yaku̱a̱ kúúrí, tá kúú: tí ta̱sú,* ta̱sú tí tíin ti̱a̱ká, tí buitre* tu̱ún, 14 tí milano real* ta saátu nda̱a̱ ni iin nu̱ú tí milano tu̱ún, 15 nda̱a̱ ni iin nu̱ú saa ndáa, 16 tí avestruz, tí ti̱o̱mi, tí gaviota ta saátu nda̱a̱ ni iin nu̱ú tí halcón, 17 tí mochuelo, saa tí tíin ti̱a̱ká, kalakoko* tí loʼo, 18 tí cisne, tí pelícano, tí buitre, 19 tí cigüeña ta saátu nda̱a̱ ni iin nu̱ú tí garza, tí abubilla ni tí chináká. 20 Ndiʼi kití válí tí íyo ndi̱xi̱n, tí ndáchí tiʼvi, tí xíka xíʼin ku̱mí xa̱ʼa̱rí, tí yaku̱a̱ xíniñúʼu koo tíyóʼo nu̱úndó.

21 ”’Nu̱ú ndiʼi kití válí tí íyo ndi̱xi̱n, tí iin tiʼvi ndáchí xíka, tí íyo ku̱mí xa̱ʼa̱, tí kivi kaxíndó kúú tí kúúmií u̱vi̱ xa̱ʼa̱ ña̱ náni̱ ta ndávarí nu̱ú ñuʼú. 22 Ta tí kivi kaxíndó kúú tíyóʼo: ti̱ka náʼnu tí xa̱a̱ síín síín nu̱ú ku̱a̱ʼa̱n, xíʼin inkaka ti̱ka náʼnu tí kivi kaxína, mbri* xíʼin ti̱ka válí. 23 Ndiʼi nu̱ú kití tí kúúmií ndi̱xi̱n tí iin tiʼvi ndáchí xíka, tí kúúmií ku̱mí xa̱ʼa̱, xíniñúʼu kukini-inindó kunindórí. 24 Tá ná kuxundó tí kití yóʼo kuyaku̱a̱ndó. Ndiʼi na̱ ná tiin tí kití yóʼo tá ná kuvirí, koona na̱ yaku̱a̱ nda̱a̱ ná ki̱ʼvi ñu̱ʼu.* 25 Nda̱a̱ ndáaka na̱ ná kuiso tí kití yóʼo tá ni̱xi̱ʼi̱rí, xíniñúʼu ndakatana ti̱ko̱to̱na, ta koona na̱ yaku̱a̱ nda̱a̱ ná ki̱ʼvi ñu̱ʼu.

26 ”’Nda̱a̱ ndáaka kití tí nda̱taʼví chíi̱n ta va̱ása níndata̱ʼví ti̱xin xa̱ʼa̱rí, ta ni va̱ása ndákaxíndi̱ʼi̱rí ña̱ xáxirí, tí yaku̱a̱ xíniñúʼu koorí nu̱úndó. Ndiʼi na̱ ná tiin tíyóʼo kuyaku̱a̱na. 27 Ndiʼi kití tí xíka xíʼin ku̱mí xa̱ʼa̱rí ta saátu ndiʼi kití tí kúúmií chíi̱n ña̱ si̱ín nu̱ú,* tí yaku̱a̱ xíniñúʼu koorí nu̱úndó. Ndiʼi na̱ ná tiin tí kití yóʼo tá ná kuvirí, koona na̱ yaku̱a̱ nda̱a̱ ná ki̱ʼvi ñu̱ʼu. 28 Nda̱a̱ ndáaka na̱ ná kuiso tí kití yóʼo tá ni̱xi̱ʼi̱rí xíniñúʼu ndakatana ti̱ko̱to̱na ta koona na̱ yaku̱a̱ nda̱a̱ ná ki̱ʼvi ñu̱ʼu.

29 ”’Ta kití tí iin tiʼvi xíka nu̱ú ñuʼú, tí xíniñúʼu koo yaku̱a̱ nu̱úndó kúú tíyóʼo: ti̱ín tí xáta ti̱xin ñuʼú,* ti̱ín válí, ndiʼi nu̱ú kití tí ñúu* mií tí kúúmií ku̱mí xa̱ʼa̱, 30 tí geco, tí lagarto káʼnu, tí salamandra tí ndíkaa̱ ini ti̱kui̱í, tí mbíʼla* xíʼin tí camaleón. 31 Ndiʼi tí kití yóʼo tí iin tiʼvi kítáʼan xíka, tí yaku̱a̱ xíniñúʼu koorí nu̱úndó. Ndiʼi na̱ ná tiin tí kití yóʼo tá ná kuvirí koona na̱ yaku̱a̱ nda̱a̱ ná ki̱ʼvi ñu̱ʼu.

32 ”’Tá ni̱xi̱ʼi̱ tí kití yóʼo ta nda̱kavarí sa̱tá iin ña̱ʼa, ña̱ yaku̱a̱ xíniñúʼu koo ña̱yóʼo, kúúña iin vaso ña̱ ku̱vaʼa xíʼin yitu̱n, iin ti̱ko̱to̱, iin ñii̱ kití á iin ñáʼñu ti̱ko̱to̱ ndayí.* Á nda̱a̱ ndáaka ña̱ʼa ña̱ xíniñúʼu ni̱ʼina, xíniñúʼu chikaa̱naña ini ti̱kui̱í ta kooña ña̱ yaku̱a̱ nda̱a̱ ná ki̱ʼvi ñu̱ʼu. Tasaá va̱ása yaku̱a̱ka kooña. 33 Tá ná ndakavarí ini iin ña̱ʼa ña̱ ku̱vaʼa xíʼin ñuʼú, xíniñúʼu taʼvíndóña, ta nda̱a̱ ndáaka ña̱ʼa ñúʼu iniña kuyaku̱a̱ña. 34 Tá ni̱tu̱ndaa ti̱kui̱í tá ñúʼu ini ña̱ʼa yóʼo sa̱tá nda̱a̱ ndáaka ña̱ʼa ña̱ xíxindó á xáxindó, kuyaku̱a̱ña ta nda̱a̱ ndáaka tá xíʼindó tá ñúʼu ini ña̱yóʼo, kuyaku̱a̱tu táyóʼova. 35 Nda̱a̱ ndáaka ña̱ʼa ná ndakava kití tí ni̱xi̱ʼi̱ yóʼo sa̱tá, kuyaku̱a̱ña. Tá nda̱kavarí sa̱tá horno* á nu̱ú xáʼmindó ñuʼu̱, xíniñúʼu sandíʼi-xa̱ʼa̱ndóña, ña̱ yaku̱a̱ koo ña̱yóʼo nu̱úndó ta va̱ása kuniñúʼukandóña. 36 Tá ná ndakavarí nu̱ú kána ti̱kui̱í á nu̱ú ndátaánva̱ʼana* ti̱kui̱í, va̱ása kuyaku̱a̱* ña̱yóʼo. Soo nda̱a̱ ndáaka na̱ ná tiin kití tí ni̱xi̱ʼi̱ yóʼo, kuyaku̱a̱na. 37 Tá ná ndakava tí kití tí ni̱xi̱ʼi̱ yóʼo sa̱tá iin si̱ʼva̱ ña̱ chiʼina, va̱ása kuyaku̱a̱ví si̱ʼva̱ yóʼo. 38 Soo tá ná chikaa̱na ti̱kui̱í sa̱tá si̱ʼva̱ yóʼo ta ná ndakava iin ñáʼñu kití tí ni̱xi̱ʼi̱ yóʼo sa̱táña, ña̱ yaku̱a̱ xíniñúʼu koo si̱ʼva̱ yóʼo nu̱úndó.

39 ”’Soo tá ná kuvi iin kití tí kivi kuxundó, nda̱a̱ ndáaka na̱ ná tiin tíyóʼo koona na̱ yaku̱a̱ nda̱a̱ ná ki̱ʼvi ñu̱ʼu. 40 Nda̱a̱ ndáaka na̱ ná kuxu loʼo ku̱ñu kití tí ni̱xi̱ʼi̱ yóʼo, xíniñúʼu ndakatana ti̱ko̱to̱na ta koona na̱ yaku̱a̱ nda̱a̱ ná ki̱ʼvi ñu̱ʼu. Nda̱a̱ ndáaka na̱ ná ndakiʼin kití tí ni̱xi̱ʼi̱ yóʼo ku̱ʼu̱n xíʼinna, xíniñúʼu ndakatana ti̱ko̱to̱na ta koona na̱ yaku̱a̱ nda̱a̱ ná ki̱ʼvi ñu̱ʼu. 41 Ndiʼi kití tí iin tiʼvi kítáʼan xíka, tí yaku̱a̱ kúú tíyóʼo, va̱ása xíniñúʼu kuxundórí. 42 Va̱ása xíniñúʼu kuxundó nda̱a̱ ni iin kití tí ñúu mií, nda̱a̱ ni iin kití tí xíka xíʼin ku̱mí xa̱ʼa̱rí, nda̱a̱ ni iin kití tí inkáchi kítáʼan xíka tí íyo ku̱a̱ʼání xa̱ʼa̱, saáchi tí yaku̱a̱ kúú tíyóʼo. 43 Va̱ása kuxundó nda̱a̱ ni iin kití tí iin tiʼvi kítáʼan xíka, tasaá va̱ása kuyaku̱a̱ndó. Va̱ása kuxundó nda̱a̱ ni iin kití yóʼo, ña̱ va̱ʼa kǒo kuyaku̱a̱ndó. 44 Saáchi yi̱ʼi̱ kúú Jehová Ndióxi̱ndó, ta ndóʼó xíniñúʼu ndasayi̱i̱ndó miíndó ña̱ va̱ʼa koondó na̱ yi̱i̱ saáchi ta̱ yi̱i̱ kúú yi̱ʼi̱. Xa̱ʼa̱ ña̱kán va̱ása xíniñúʼu kuxundó á tiinndó nda̱a̱ ni iin kití tí iin tiʼvi kítáʼan xíka nu̱ú ñuʼú, tasaá va̱ása kuyaku̱a̱ndó. 45 Saáchi yi̱ʼi̱ kúú Jehová ta̱ nda̱tavá ndóʼó ti̱xin ñuu Egipto ña̱ va̱ʼa koi̱ Ndióxi̱ndó, ta ndóʼó xíniñúʼu koondó na̱ yi̱i̱ saáchi ta̱ yi̱i̱ kúú yi̱ʼi̱.

46 ”’Ña̱yóʼo kúú ley ña̱ kundiku̱nndó xa̱ʼa̱ ndiʼi kití, kití tí ndáchí, ndiʼi kití tí ñúʼu ini ti̱kui̱í xíʼin ndiʼi kití tí iin tiʼvi kítáʼan xíka nu̱ú ñuʼú. 47 Ña̱ va̱ʼa kunda̱a̱-inindó ndáa tí kúú tí yaku̱a̱ ta ndáa tí va̱ása yaku̱a̱, ndáa tí kúú tí kivi kuxundó ta ndáa tí va̱ása kivi kuxundó”’.

12 Jehová ni̱ka̱ʼa̱nkara ña̱yóʼo xíʼin ta̱ Moisés: 2 “Ña̱yóʼo ka̱ʼún xíʼin na̱ israelita: ‘Tá ni̱ke̱e se̱ʼe iin ñaʼá ta sa̱kákuñá iin ta̱ loʼo, u̱xa̱ ki̱vi̱ kooñá ñá yaku̱a̱,* nda̱a̱ táki̱ʼva xíyoñá ñá yaku̱a̱ ndiʼi ki̱vi̱ ña̱ núu ni̱i̱ñá. 3 Tá ná xi̱nu u̱na̱ ki̱vi̱ ña̱ ka̱ku ta̱ loʼo se̱ʼeñá, saá ta̱ʼnda̱ nu̱ú yi̱i̱ra. 4 Ta 33 ki̱vi̱ ndundiiñá* xa̱ʼa̱ ña̱ ni̱xi̱ta̱ ni̱i̱ñá. Va̱ása xíniñúʼu tiinñá nda̱a̱ ni iin ña̱ʼa ña̱ yi̱i̱, ni va̱ása xíniñúʼu kuyatinñá nu̱ú níndichi tabernáculo nda̱a̱ ná ya̱ʼa ki̱vi̱ ña̱ ndundiiñá.

5 ”’Ta tá ná sakákuñá iin ñá loʼo, 14 ki̱vi̱ kooñá ñá yaku̱a̱, nda̱a̱ táki̱ʼva xíyoñá ñá yaku̱a̱ ndiʼi ki̱vi̱ ña̱ núu ni̱i̱ñá. Ta 66 ki̱vi̱ ndundiiñá xa̱ʼa̱ ña̱ ni̱xi̱ta̱ ni̱i̱ñá. 6 Tá ná xi̱nu ki̱vi̱ ña̱ ndu̱ndiiñá xa̱ʼa̱ ña̱ sa̱kákuñá iin ta̱ loʼo á iin ñá loʼo, ñáyóʼo ku̱ʼu̱nñá nu̱ú ta̱ su̱tu̱ chí yéʼé tabernáculo ta kuniʼiñá iin ndikachi* che̱e tí yúta̱* tí kúúmií iin ku̱i̱ya̱ ku̱ʼu̱n xíʼinñá nu̱úra ña̱ va̱ʼa kaʼmirarí* ta so̱kórarí nu̱ú* Ndióxi̱, saátu kuniʼiñá iin paloma loʼo á iin paloma káʼnu* tí so̱kóñá xa̱ʼa̱ ku̱a̱chiñá. 7 Ta̱yóʼo so̱kóra ndiʼiña nu̱ú Jehová ña̱ va̱ʼa koo káʼnu-ini Ndióxi̱ xa̱ʼa̱ ku̱a̱chiñá, tasaá kúú ña̱ ndundiiñá xa̱ʼa̱ ña̱ ni̱xi̱ta̱ ni̱i̱ñá. Ña̱yóʼo kúú ley ña̱ kundiku̱n ñá ñaʼá tá ná sakákuñá iin ta̱ loʼo á iin ñá loʼo. 8 Soo tá kǒo kívi taxiñá iin ndikachi chi kǒo xu̱ʼúnñá ña̱ satáñárí.* Kivi kuniʼiñá u̱vi̱ paloma náʼnu á u̱vi̱ paloma válí ku̱ʼu̱n xíʼinñá so̱kóñá nu̱ú Ndióxi̱, iinrí kaʼmi ta̱ su̱tu̱ ña̱ so̱kórarí nu̱ú Ndióxi̱ ta inkarí so̱kóra xa̱ʼa̱ ku̱a̱chiñá, ta̱ su̱tu̱ keʼéra ña̱yóʼo ña̱ va̱ʼa ná ixakáʼnu-ini Ndióxi̱ xa̱ʼa̱ ku̱a̱chiñá tasaá ndundiiñá’”.

13 Jehová ni̱ka̱ʼa̱nkara xíʼin ta̱ Moisés ta saátu xíʼin ta̱ Aarón, ta ka̱chira: 2 “Tá iin na̱ yiví ka̱a kuiñu ñii̱na á ka̱na iin ta̱ʼyi̱* á iin ndi̱ʼi ña̱ kivi koo kue̱ʼe̱ lepra* ña̱ kána ñii̱na. Xíniñúʼu ku̱ʼu̱nna xíʼin na̱ yiví yóʼo nu̱ú ta̱ su̱tu̱ Aarón á nu̱ú iin na̱ se̱ʼera na̱ kúú su̱tu̱. 3 Ta̱ su̱tu̱ kotora ña̱ ka̱na ñii̱ na̱ yiví yóʼo. Tá ndu̱yaa ixí* ña̱ íyo nu̱ú ka̱na ña̱yóʼo ta náʼa̱ ña̱ kúnúka* ki̱xáʼaña kíʼviña ku̱ñuna, ña̱yóʼo kúúña kue̱ʼe̱ ña̱ lepra. Ta̱ su̱tu̱ kotora ña̱yóʼo ta ka̱ʼa̱nra ña̱ kúú na̱ yiví yóʼo na̱ yaku̱a̱*. 4 Soo, tá ña̱ yaa kúú ndi̱ʼi ña̱ ka̱na ñii̱na ta va̱ása náʼa̱ ña̱ kúnúva̱ʼa níki̱ʼviña ku̱ñuna, ni va̱ása nínduyaa ixí ña̱ íyo nu̱ú ka̱na ña̱yóʼo, ta̱ su̱tu̱ tavá xíkára na̱yóʼo nu̱ú ndóo ndiʼi na̱ ñuu ta u̱xa̱ ki̱vi̱ xíniñúʼu koo xíkána. 5 Tá ná ya̱ʼa u̱xa̱ ki̱vi̱, ta̱ su̱tu̱ koto tukura ñii̱ na̱yóʼo, tá va̱ása níta̱ʼyi̱ka ña̱yóʼo ta va̱ása níka̱a̱kaña ñii̱na, ta̱ su̱tu̱ ka̱ʼa̱nra ña̱ inka u̱xa̱ ki̱vi̱ xíniñúʼu koo xíkána nu̱ú ndóo ndiʼi na̱ ñuu.

6 ”Tá ná ya̱ʼa u̱xa̱ ki̱vi̱, ta̱ su̱tu̱ koto tukura ñii̱ na̱yóʼo. Tá va̱ása níta̱ʼyi̱ka ñii̱na ta va̱ása níka̱a̱ña ku̱ñuna, ta̱ su̱tu̱ ka̱ʼa̱nra ña̱ xa̱a̱ ndu̱ndiina.* Iin ta̱ʼyi̱ kuití xi̱kuuña. Tasaá, na̱yóʼo ndakatana ti̱ko̱to̱na ta ka̱ʼa̱nra ña̱ xa̱a̱ ndu̱ndiina. 7 Soo, tá iníí ku̱ñuna ka̱na ña̱ táʼyi yóʼo ni xa̱a̱ ni̱xa̱ʼa̱nna nu̱ú ta̱ su̱tu̱ ta ni̱ka̱ʼa̱nra ña̱ xa̱a̱ ndu̱ndiina, xíniñúʼu ku̱ʼu̱n tukuna nu̱ú ta̱ su̱tu̱. 8 Ta̱ su̱tu̱ kotora ñii̱na. Tá iníí ku̱ñuna ka̱na ña̱ táʼyi, ta̱ su̱tu̱ ka̱ʼa̱nra ña̱ kúúna na̱ yaku̱a̱. Lepra kúúmiína.

9 ”Tá ki̱ʼin kue̱ʼe̱ lepra iin na̱ yiví, xíniñúʼu ku̱ʼu̱nna xíʼinna nu̱ú ta̱ su̱tu̱. 10 Ta̱ su̱tu̱ kotora ñii̱na. Tá ña̱ yaa kúú kuiñu ña̱ ka̱na ñii̱na, ta ndu̱yaa ixí ña̱ íyo nu̱ú ka̱na ña̱yóʼo, ta ni̱ka̱a̱n nu̱ú kuiñu yóʼo, 11 lepra kúúmiína ta naʼání kooña ñii̱na. Ta̱ su̱tu̱ ka̱ʼa̱nra ña̱ kúúna na̱ yaku̱a̱, ta va̱ása xíniñúʼu tavá xíkárana nu̱ú na̱ ñuu loʼo kuití ki̱vi̱ chi xa̱a̱ na̱ yaku̱a̱ kúúvana. 12 Soo tá iníí ku̱ñuna ni̱ka̱a̱ lepra yóʼo, ta ndiʼi saá ku̱ñuna nu̱ú xíto ta̱ su̱tu̱ ka̱na kue̱ʼe̱ yóʼo, 13 ta xítora ñii̱ na̱yóʼo ta iníísaá ñii̱na ka̱na ña̱ lepra, ta̱ su̱tu̱ ka̱ʼa̱nra ña̱ kue̱ʼe̱ yóʼo va̱ása kúúkaña iin kue̱ʼe̱ xíkun. Tá ku̱yaa ndiʼi ña̱yóʼo, na̱yóʼo va̱ása kúúkana na̱ yiví yaku̱a̱. 14 Soo tá ni̱ka̱a̱n nu̱ú ña̱ ka̱na ku̱ñuna, na̱ yaku̱a̱ kúúna. 15 Tá ná kuni ta̱ su̱tu̱ ña̱ ni̱ka̱a̱n nu̱ú ña̱yóʼo, ta̱ su̱tu̱ ka̱ʼa̱nra ña̱ kúúna na̱ yaku̱a̱. Ña̱ ni̱ka̱a̱n nu̱ú ña̱ ka̱na ñii̱na ña̱ yaku̱a̱ kúúña. Lepra kúúmiína. 16 Soo tá ndu̱yaa tuku nu̱ú ña̱ ni̱ka̱a̱n ñii̱na yóʼo, xíniñúʼu ku̱ʼu̱nna nu̱ú ta̱ su̱tu̱, 17 ta̱ su̱tu̱ kotora ña̱yóʼo ta tá ndu̱yaaña, ka̱ʼa̱nra ña̱ kue̱ʼe̱ yóʼo va̱ása kúúkaña iin kue̱ʼe̱ xíkun. Na̱yóʼo xa̱a̱ ndu̱ndiina.

18 ”Tá ka̱na iin ndi̱ʼi táʼyi ku̱ñu iin na̱ yiví ta nda̱ʼana 19 soo nu̱ú ka̱na ndi̱ʼi yóʼo ka̱na iin kuiñu ña̱ yaa á iin ndi̱ʼi ña̱ yaa ta saátu kúáʼaña, na̱yóʼo xíniñúʼu ku̱ʼu̱nna nu̱ú ta̱ su̱tu̱. 20 Ta̱ su̱tu̱ kotoraña. Ta tá xi̱nira ña̱ náʼa̱ ña̱ kúnú ni̱ki̱ʼviña ñii̱na ta ixí ña̱ íyo nu̱ú ka̱naña ndu̱yaaña, ta̱ su̱tu̱ ka̱ʼa̱nra ña̱ kúúna na̱ yaku̱a̱. Chi kue̱ʼe̱ ña̱ lepra kúú ña̱ ka̱na nu̱ú ka̱na ndi̱ʼi táʼyi. 21 Soo tá ta̱ su̱tu̱ xítora ñii̱na, ta xítora ña̱ va̱ása nínduyaa ixí nu̱ú ka̱naña ta va̱ása kúnú níki̱ʼviña ñii̱na ta náʼa̱ ña̱ xa̱a̱ ku̱a̱ʼa̱n ndíʼiña, ta̱ su̱tu̱ tavá xíkára na̱yóʼo nu̱ú ndóo ndiʼi na̱ ñuu ta u̱xa̱ ki̱vi̱ xíniñúʼu koo xíkána. 22 Soo tá iníí ku̱ñuna ni̱ka̱a̱ kue̱ʼe̱ yóʼo ku̱a̱ʼa̱nña, ta̱ su̱tu̱ ka̱ʼa̱nra ña̱ kúúna na̱ yaku̱a̱. Iin kue̱ʼe̱ kúúmiína. 23 Soo tá va̱ása xáʼnu ndi̱ʼi yóʼo ta va̱ása káa̱ña ku̱a̱ʼa̱nña* saáchi iin kuiñu kuití kúúña xa̱ʼa̱ ña̱ ka̱na iin ndi̱ʼi táʼyi ñii̱na, ta̱ su̱tu̱ ka̱ʼa̱nra ña̱ xa̱a̱ nda̱ʼava na̱yóʼo.

24 ”Tá nu̱ú ni̱ndi̱i̱* ku̱ñu iin na̱ yiví ka̱na iin ndi̱ʼi ña̱ yaa ta saátu kúáʼaña, á ña̱ yaa kuití kúúña, 25 xíniñúʼu koto ta̱ su̱tu̱ ña̱yóʼo. Tá ndu̱yaa ixí nu̱ú ka̱na ña̱yóʼo ta náʼa̱ ña̱ kúnúka ni̱ki̱ʼviña ku̱ñuna, lepra kúú ña̱ ka̱na nu̱ú ni̱ndi̱i̱ ku̱ñuna, ta ta̱ su̱tu̱ ka̱ʼa̱nra ña̱ kúúna iin na̱ yiví na̱ yaku̱a̱. Kue̱ʼe̱ ña̱ lepra kúúmiína. 26 Soo tá ta̱ su̱tu̱ xítora ñii̱na ta xítora ña̱ va̱ása nínduyaa ixí nu̱ú ka̱naña ta va̱ása kúnú níki̱ʼviña ñii̱na ta náʼa̱ ña̱ xa̱a̱ ku̱a̱ʼa̱n ndíʼiña, ta̱ su̱tu̱ tavá xíkára na̱yóʼo nu̱ú ndóo ndiʼi na̱ ñuu ta u̱xa̱ ki̱vi̱ xíniñúʼu koo xíkána. 27 Tá ná ya̱ʼa u̱xa̱ ki̱vi̱, ta̱ su̱tu̱ koto tukura ñii̱ na̱yóʼo. Soo tá iníí ku̱ñuna ni̱ka̱a̱ ndi̱ʼi yóʼo ku̱a̱ʼa̱nña, ta̱ su̱tu̱ ka̱ʼa̱nra ña̱ kúúna na̱ yaku̱a̱. Kue̱ʼe̱ lepra kúúmiína. 28 Soo tá va̱ása xáʼnu ndi̱ʼi yóʼo ta va̱ása káa̱ña ku̱a̱ʼa̱nña ta ki̱xáʼa ku̱a̱ʼa̱n ndíʼiña saáchi iin kuiñu kuití kúúña xa̱ʼa̱ ña̱ ni̱ndi̱i̱na. Ta̱ su̱tu̱ ka̱ʼa̱nra ña̱ xa̱a̱ nda̱ʼava na̱yóʼo saáchi iin kuiñu kuití kúúña xa̱ʼa̱ ña̱ ni̱ndi̱i̱na.

29 ”Tá iin ta̱a á iin ñaʼá ka̱na iin ndi̱ʼi xi̱nína á ta̱ʼya̱-yuʼu̱na,* 30 ta̱ su̱tu̱ xíniñúʼu kotora ña̱yóʼo. Tá náʼa̱ ña̱ kúnúka ni̱ki̱ʼviña ñii̱na á ndu̱kúáan ixí ña̱ íyo nu̱ú ka̱na ña̱yóʼo á loʼonítu ixí íyo nu̱ú ña̱yóʼo, ta̱ su̱tu̱ ka̱ʼa̱nra ña̱ iin na̱ yaku̱a̱ kúú na̱ yiví yóʼo, iin kue̱ʼe̱ kúú ña̱ ki̱ʼin ñii̱ xi̱nína á ta̱ʼya̱-yuʼu̱na. Lepra ña̱ kána xi̱nína á ta̱ʼya̱-yúʼu̱na kúú ña̱yóʼo. 31 Soo tá xíto ta̱ su̱tu̱ ña̱ va̱ása náʼa̱ kúnú níki̱ʼvi kue̱ʼe̱ yóʼo ñii̱na ta kǒo ixí tu̱ún íyo nu̱ú ka̱naña, ta̱ su̱tu̱ tavá xíkára na̱yóʼo nu̱ú ndóo ndiʼi na̱ ñuu ta u̱xa̱ ki̱vi̱ xíniñúʼu koo xíkána. 32 Tá ná ya̱ʼa u̱xa̱ ki̱vi̱, ta̱ su̱tu̱ koto tukura ñii̱ na̱yóʼo. Tá va̱ása níka̱a̱ ña̱yóʼo ta kǒo ixí kúáan níkana nu̱ú íyoña ta va̱ása kúnúka níki̱ʼviña ñii̱na, 33 na̱ yiví yóʼo xíniñúʼu xa̱tána xi̱nína á ta̱ʼya̱-yuʼu̱na soo va̱ása xa̱tána nu̱ú ka̱na ndi̱ʼi yóʼo. Ta̱ su̱tu̱ tavá xíkára na̱yóʼo nu̱ú ndóo ndiʼi na̱ ñuu ta u̱xa̱ ki̱vi̱ xíniñúʼu koo xíkána.

34 ”Tá ná ya̱ʼa u̱xa̱ ki̱vi̱, ta̱ su̱tu̱ koto tukura na̱yóʼo, tá va̱ása níka̱a̱ ndi̱ʼi yóʼo ñii̱ xi̱nína xíʼin ta̱ʼya̱-yuʼu̱na ta va̱ása náʼa̱ ña̱ kúnúka níki̱ʼviña, ta̱ su̱tu̱ ka̱ʼa̱nra ña̱ xa̱a̱ nda̱ʼa na̱yóʼo ta xíniñúʼu ndakatana ti̱ko̱to̱na tasaá ndundiina. 35 Soo tá iníí ku̱ñuna ka̱na ña̱ táʼyi yóʼo ni xa̱a̱ ni̱xa̱ʼa̱nna nu̱ú ta̱ su̱tu̱ ta ni̱ka̱ʼa̱nra ña̱ xa̱a̱ ndu̱ndiina, 36 ta̱ su̱tu̱ kotorana. Tá iníí ku̱ñuna ka̱na ña̱yóʼo, ta̱ su̱tu̱ va̱ása xíniñúʼu kotokara á íyo ixí kúáan nu̱ú ka̱na ña̱yóʼo, na̱ yiví yóʼo na̱ yaku̱a̱ kúúna. 37 Soo tá xi̱nira ña̱ va̱ása níka̱a̱ kue̱ʼe̱ yóʼo ta xa̱ʼnu ixí tu̱ún nu̱ú íyoña, xa̱a̱ nda̱ʼavana. Va̱ása kúúkana na̱ yiví yaku̱a̱, ta ta̱ su̱tu̱ ka̱ʼa̱nra ña̱ xa̱a̱ nda̱ʼavana.

38 ”Tá iin ta̱a á iin ñaʼá ka̱na ndi̱ʼi ñii̱na ta ña̱ yaa kúú ña̱yóʼo, 39 ta̱ su̱tu̱ kotoraña. Tá ña̱ yaa ña̱ ndáʼvi náʼa̱ kúú ndi̱ʼi yóʼo iin ña̱ ka̱na miíva kúúña, su̱ví kue̱ʼe̱ ndeéví kúúña. Na̱ yiví yóʼo xa̱a̱ ndu̱ndiina.

40 ”Tá iin ta̱a ni̱ko̱yo ixí xi̱níra ta ki̱ndoo chálá ndiʼi xi̱níra, su̱ví ta̱ yaku̱a̱ kúúra. 41 Tá chí ta̱ʼya̱ra* kúú ña̱ ni̱ko̱yo ixí ta ki̱ndoo cháláña, su̱ví ta̱ yaku̱a̱ kúúra. 42 Soo tá chí ñii̱ xi̱níra á chí ta̱ʼya̱ra ná kana iin ndi̱ʼi táʼyi ña̱ yaa ta saátu kúáʼaña, lepra kúú ña̱ ki̱xáʼa kána ñii̱ xi̱níra á ta̱ʼya̱ra. 43 Ta̱ su̱tu̱ kotora ña̱yóʼo. Tá kuiñu ña̱ ka̱na nu̱ú ndi̱ʼi yóʼo ña̱ yaa kúúña ta saátu kúáʼaña ta ka̱naña xa̱ʼñura nu̱ú ni̱ko̱yo ixí á ka̱naña ta̱ʼya̱ra ta náʼa̱ña nda̱a̱ táki̱ʼva íyo lepra ña̱ kána ñii̱na, 44 lepra ki̱ʼin ta̱yóʼo. Ta̱ yaku̱a̱ kúúra ta ta̱ su̱tu̱ xíniñúʼu ka̱ʼa̱nra ña̱ kúúra ta̱ yaku̱a̱ xa̱ʼa̱ ña̱ ki̱ʼin kue̱ʼe̱ xi̱níra. 45 Ta ta̱ kúúmií kue̱ʼe̱ ña̱ lepra yóʼo xíniñúʼu kundixira ti̱ko̱to̱ ña̱ ni̱nda̱ta̱ ta va̱ása xíniñúʼu ndachuʼunra xi̱níra. Ta saátu xíniñúʼu ndakasira yuʼúra ta ndeé va̱ʼa ka̱ʼa̱nra: ‘Ta̱ yaku̱a̱ kúi̱, ta̱ yaku̱a̱ kúi̱’. 46 Ndiʼi ki̱vi̱ ña̱ ná kuumiíra kue̱ʼe̱ yóʼo koora ta̱ yaku̱a̱. Ta xa̱ʼa̱ ña̱ kúúra ta̱ yaku̱a̱ xíniñúʼu koo xíkára. Chí sa̱tá nu̱ú ndóo ndiʼi na̱ ñuu koora.

47 ”Tá kue̱ʼe̱ ña̱ lepra ka̱naña sa̱tá iin ti̱ko̱to̱ ña̱ ku̱vaʼa xíʼin ixí ndikachi* á lino, 48 ni kúúña ti̱ko̱to̱ ña̱ ni̱ku̱kuna* xíʼin lino á ixí ndikachi á iin ñii̱ kití á nda̱a̱ ndáaka ña̱ʼa ña̱ ku̱vaʼa xíʼin ñii̱ kití, 49 tá sa̱tá ti̱ko̱to̱ ña̱ ndíxina ka̱na iin kusu* kúii̱ ta saátu kúáanña á kúáʼaña á ka̱natuña sa̱tá ñii̱ kití, á ti̱ko̱to̱ ña̱ ni̱ku̱kuna xíʼin lino á nda̱a̱ ndáaka ña̱ʼa ña̱ ku̱vaʼa xíʼin ñii̱ kití, kue̱ʼe̱ ña̱ lepra kúúmiíña ta xíniñúʼu na̱ʼa̱naña nu̱ú ta̱ su̱tu̱. 50 Ta̱ su̱tu̱ kotora kue̱ʼe̱ yóʼo, ta u̱xa̱ ki̱vi̱ xíniñúʼu chindúʼu xíkára ña̱ʼa yóʼo. 51 Tá ná ya̱ʼa u̱xa̱ ki̱vi̱, kotora kue̱ʼe̱ yóʼo. Tá ni̱ka̱a̱ña nu̱ú iníísaá ti̱ko̱to̱ ni kúúña ti̱ko̱to̱ ña̱ ni̱ku̱kuna xíʼin lino á ñii̱ kití ni nda̱a̱ ndáaka ña̱ʼa ku̱vaʼa xíʼin ñii̱ tí kití yóʼo, kue̱ʼe̱ lepra ña̱ ndeé kúúmiíña. Ta ña̱ yaku̱a̱ kúú ña̱ʼa yóʼo vitin. 52 Xíniñúʼu kaʼmira ti̱ko̱to̱ yóʼo ni xíʼin ixí ndikachi ni̱ku̱kunaña á xíʼin lino á ni nda̱a̱ ndáaka ña̱ʼa ke̱ʼéna xíʼin ñii̱ tí kití nu̱ú ka̱na kue̱ʼe̱ yóʼo, lepra ña̱ ndeé kúú ña̱ kúúmiíña. Ta xíniñúʼu kaʼminaña.

53 ”Soo tá ta̱ su̱tu̱ xi̱tora ti̱ko̱to̱ yóʼo ta ki̱ʼinra kuenta ña̱ va̱ása níka̱a̱ kusu yóʼo nu̱ú ti̱ko̱to̱ ni nu̱ú ña̱ ni̱ku̱kuna xíʼin lino á nda̱a̱ ndáaka ña̱ʼa ña̱ ku̱vaʼa xíʼin ñii̱ kití, 54 ta̱ su̱tu̱ ka̱ʼa̱nra ña̱ ná ndakatana ña̱yóʼo ta u̱xa̱ ki̱vi̱ chindúʼu xíkáraña. 55 Tándi̱ʼi, ta̱ su̱tu̱ kotora ña̱yóʼo tá xa̱a̱ ndi̱ʼi ndo̱ova̱ʼaña. Tá va̱ása nínasa̱ma ki̱ʼva ña̱ náʼa̱ kusu yóʼo ni va̱ása níka̱a̱ kue̱ʼe̱ yóʼo, ña̱ yaku̱a̱ kúú ña̱yóʼo. Xíniñúʼu kaʼmindóña saáchi ña̱ ku̱a̱ʼa̱n ndíʼi-xa̱ʼa̱ kúú chí iniña á chí sa̱táña.

56 ”Soo tá xa̱a̱ xi̱tova̱ʼa ta̱ su̱tu̱ ña̱yóʼo, ta xa̱a̱ ku̱a̱ʼa̱n ndíʼi kusu chi xa̱a̱ nda̱katava̱ʼanaña, ta̱yóʼo kaʼndara nu̱ú ka̱na kusu sa̱tá ti̱ko̱to̱, ñii̱ kití á ti̱ko̱to̱ ña̱ ni̱ku̱kuna xíʼin lino. 57 Soo tá tuku kána kusu yóʼo nu̱ú inka táʼví ti̱ko̱to̱ ña̱ ndíxina, ti̱ko̱to̱ ña̱ ni̱ku̱kuna xíʼin lino á nda̱a̱ ndáaka ña̱ʼa ña̱ ku̱vaʼa xíʼin ñii̱ kití, ña̱ káa̱ ku̱a̱ʼa̱n kúúña. Xíniñúʼu kaʼmindó ña̱yóʼo. 58 Soo tá kǒoka kusu yóʼo nu̱ú ti̱ko̱to̱ ña̱ ndíxindó, ti̱ko̱to̱ ña̱ ni̱ku̱kuna xíʼin lino á nda̱a̱ ndáaka ña̱ʼa ña̱ ku̱vaʼa xíʼin ñii̱ kití ña̱ xa̱a̱ nda̱katandó, xíniñúʼu ndakata tukundóña tasaá ndundiiña.

59 ”Ña̱yóʼo kúú ley ña̱ xíniñúʼu kundiku̱nndó xíʼin lepra ña̱ kána nu̱ú ti̱ko̱to̱ ña̱ ku̱vaʼa xíʼin ixí ndikachi ña̱ ku̱vaʼa xíʼin lino, ña̱ ni̱ku̱kuna xíʼin lino á nda̱a̱ ndáaka ña̱ʼa ña̱ ku̱vaʼa xíʼin ñii̱ kití, ña̱ va̱ʼa ka̱ʼa̱nndó á ña̱ yaku̱a̱ kúúña á ña̱ va̱ása yaku̱a̱ kúúña”.

14 Ta ni̱ka̱ʼa̱nka Jehová xíʼin ta̱ Moisés: 2 “Ña̱yóʼo kúú ley ña̱ kundiku̱nndó xíʼin na̱ ki̱ʼin kue̱ʼe̱ lepra ki̱vi̱ ña̱ ka̱ʼa̱nndó ña̱ xa̱a̱ ndu̱ndiina* tá ná ku̱ʼu̱nndó xíʼinna nu̱ú ta̱ su̱tu̱. 3 Ta̱ su̱tu̱ kitara chí sa̱tá nu̱ú ndóo na̱ ñuu ta kotora na̱ kúúmií kue̱ʼe̱. Ta tá xa̱a̱ nda̱ʼa na̱ kúúmií kue̱ʼe̱ ña̱ lepra yóʼo, 4 ta̱ su̱tu̱ ka̱ʼa̱nra xíʼinna ña̱ ná kuniʼina u̱vi̱ tí saa tí táku tí va̱ása yaku̱a̱, yitu̱n tú cedro, yi̱ʼva̱ kúáʼa ña̱ yéʼe̱ní xíʼin yu̱ku̱ ña̱ naní hisopo* tasaá kivi ndundiina. 5 Ta̱ su̱tu̱ ka̱ʼa̱nra ña̱ ná kaʼnína iin tí saa yóʼo nu̱ú iin ña̱ʼa ña̱ ku̱vaʼa xíʼin ñuʼú ña̱ ñúʼu ti̱kui̱í tá yu̱ta ini. 6 Soo xíniñúʼu kiʼinra saa tí táku xíʼin yitu̱n tú cedro, yi̱ʼva̱ kúáʼa ña̱ yéʼe̱ní xíʼin yu̱ku̱ ña̱ naní hisopo ta sandáxiraña* xíʼin ni̱i̱ tí saa tí xa̱ʼníra nu̱ú ti̱kui̱í tá yu̱ta. 7 Tasaá u̱xa̱ yichi̱ ko̱so̱yávára* ni̱i̱ yóʼo na̱ xi̱kuumií kue̱ʼe̱ lepra ña̱ va̱ʼa ndundiina tasaá ka̱ʼa̱nra ña̱ kǒoka kue̱ʼe̱ kúúmií na̱yóʼo, ta sañára tí saa tí táku ku̱ʼu̱nrí chí yuku̱.

8 ”Na̱ ndúndii yóʼo xíniñúʼu ndakatana ti̱ko̱to̱na, xa̱tána ndiʼi ixí* xi̱nína ta saátu iníísaá ñii̱na, kuchina tasaá nduyi̱i̱na. Tá ná sandíʼina keʼéna ña̱yóʼo saá kivi ki̱ʼvina nu̱ú ndóo na̱ ñuu, soo va̱ása koona ini veʼe loʼona chi xíniñúʼu kundoona chí ke̱ʼe* u̱xa̱ ki̱vi̱. 9 Tá ná ya̱ʼa u̱xa̱ ki̱vi̱, xíniñúʼu xa̱tána ndiʼi ixí xi̱nína, ixí yuʼúna xíʼin ixí nu̱úna.* Tá xa̱a̱ ndi̱ʼi ni̱xa̱tána ndiʼi ña̱yóʼo, ndakatana ti̱ko̱to̱na ta kuchina tasaá ndundiina.

10 ”Ki̱vi̱ u̱na̱, kiʼinna u̱vi̱ ndikachi* che̱e tí yúta̱* tí kǒo kue̱ʼe̱ kúúmií, iin ndikachi síʼi tí yúta̱ tí kúúmií iin ku̱i̱ya̱, u̱ni̱ kilo sava* harina ña̱ va̱ʼa ña̱ nda̱saka̱ xíʼin aceite ña̱ so̱kóna nu̱ú* Ndióxi̱ ta saátu kiʼinna iin taza* aceite. 11 Ta̱ su̱tu̱ ta̱ ná ka̱ʼa̱n ña̱ xa̱a̱ ndu̱ndiina, chí yéʼé ña̱ tabernáculo xíniñúʼu na̱ʼa̱ra na̱yóʼo xíʼin ña̱ʼa ña̱ so̱kóna nu̱ú Jehová. 12 Ta̱ su̱tu̱ kiʼinra iin tí ndikachi che̱e tí yúta̱ xíʼin iin taza aceite ta so̱kóraña xa̱ʼa̱ ku̱a̱china ta saátu sakúikóraña* ña̱ va̱ʼa so̱kóraña nu̱ú Jehová. 13 Tándi̱ʼi, kaʼníra ndikachi che̱e tí yúta̱ iin nu̱ú yi̱i̱ chí nu̱ú xáʼnína kití tí sóko̱na xa̱ʼa̱ ku̱a̱china xíʼin kití tí xáʼmina* ta sóko̱na, saáchi ña̱ sóko̱na xa̱ʼa̱ ña̱ ke̱ʼéna ña̱ va̱ása va̱ʼa, kuenta ta̱ su̱tu̱ kúúña xíʼin ña̱ sóko̱na xa̱ʼa̱ ku̱a̱china. Iin ña̱ yi̱i̱ní kúúña.

14 ”Tándi̱ʼi, ta̱ su̱tu̱ chikaa̱ra loʼo ni̱i̱ kití tí ni̱so̱kóna xa̱ʼa̱ ña̱ ke̱ʼéna ña̱ va̱ása va̱ʼa, yuʼú so̱ʼo kúaʼa na̱ ndúndii, nu̱ú ndaʼa̱* kúaʼana ña̱ nduʼú xíʼin nu̱ú xa̱ʼa̱* kúaʼana ña̱ nduʼú. 15 Ta ta̱ su̱tu̱ sakáara loʼo aceite nu̱ú ndaʼa̱ yitinra. 16 Tándi̱ʼi, ta̱ su̱tu̱ sandáxira nu̱ú ndaʼa̱ra ña̱ kúaʼa xíʼin aceite tá ndóso nu̱ú ndaʼa̱ yitinra ta xíʼin nu̱ú ndaʼa̱ra u̱xa̱ yichi̱ ko̱so̱yávára loʼo táyóʼo nu̱ú íyo Jehová. 17 Tándi̱ʼi, ta̱ su̱tu̱ kiʼinra loʼo aceite tá kíndo̱o ini ndaʼa̱ra ta chikaa̱rará yuʼú so̱ʼo kúáʼa na̱ ndúndii, nu̱ú ndaʼa̱ kúaʼana ña̱ nduʼú xíʼin nu̱ú xa̱ʼa̱ kúaʼana ña̱ nduʼú, nu̱ú xa̱a̱ xa̱kinra ni̱i̱ kití tí ni̱so̱kóna xa̱ʼa̱ ña̱ ke̱ʼéna ña̱ va̱ása va̱ʼa. 18 Ta ta̱ su̱tu̱ kiʼinra loʼo aceite tá kíndo̱o ini ndaʼa̱ra ta sakáarará xi̱ní na̱ ndúndii, ta̱ su̱tu̱ keʼéra ña̱yóʼo nu̱ú íyo Jehová ña̱ va̱ʼa ná ixakáʼnu-inira xa̱ʼa̱ ku̱a̱china.

19 ”Ta̱ su̱tu̱ kaʼníra kití tí so̱kóna xa̱ʼa̱ ku̱a̱china ta keʼéra ña̱yóʼo ña̱ va̱ʼa ná ixakáʼnu-ini Ndióxi̱ xa̱ʼa̱ ku̱a̱chi na̱ ndúndii ta tándi̱ʼi kaʼníra kití tí kaʼmira ta so̱kórarí. 20 Ta̱ su̱tu̱, so̱kóra kití tí kaʼmira nu̱ú Ndióxi̱ ta saátu so̱kóra harina nu̱ú altar. Ta̱ su̱tu̱ keʼéra ña̱yóʼo ña̱ va̱ʼa ná ixakáʼnu-ini Ndióxi̱ xa̱ʼa̱ ku̱a̱china, tasaá ndundiina.

21 ”Soo, tá na̱ nda̱ʼví kúúna ta kǒo xu̱ʼúnna, xíniñúʼu kiʼinna iin ndikachi che̱e tí yúta̱, tí so̱kóna xa̱ʼa̱ ña̱ ke̱ʼéna ña̱ va̱ása va̱ʼa ta sakúikónarí ña̱ so̱kónarí nu̱ú Ndióxi̱ ña̱ va̱ʼa ixakáʼnu-inira xa̱ʼa̱ ku̱a̱china ta saátu so̱kóna iin kilo* harina ña̱ va̱ʼa ña̱ nda̱saka̱ xíʼin aceite, iin taza* aceite, 22 ta saátu u̱vi̱ paloma náʼnu á u̱vi̱ paloma válí,* nda̱a̱ ndáaka ña̱ kivi taxina. Iin paloma yóʼo so̱kónarí xa̱ʼa̱ ku̱a̱china ta inkarí kaʼmina ña̱ so̱kónarí. 23 Ta ki̱vi̱ u̱na̱, kuniʼina ndiʼi ña̱yóʼo ku̱ʼu̱n xíʼinna nu̱ú ta̱ su̱tu̱ chí yéʼé tabernáculo nu̱ú Jehová, ña̱ va̱ʼa ndundiina.

24 ”Ta̱ su̱tu̱ kiʼinra iin ndikachi che̱e tí yúta̱ tí so̱kóra xa̱ʼa̱ ña̱ ke̱ʼéna ña̱ va̱ása va̱ʼa xíʼin iin taza aceite, ta sakúikóra ña̱yóʼo nu̱ú Jehová ña̱ va̱ʼa so̱kóraña nu̱úra. 25 Tasaá kaʼníra tí ndikachi che̱e loʼo tí ni̱so̱kóna xa̱ʼa̱ ña̱ ke̱ʼéna ña̱ va̱ása va̱ʼa. Ta ta̱ su̱tu̱ chikaa̱ra loʼo ni̱i̱ kití tí ni̱so̱kóna xa̱ʼa̱ ña̱ ke̱ʼéna ña̱ va̱ása va̱ʼa yuʼú so̱ʼo kúaʼa na̱ ndúndii, nu̱ú ndaʼa̱ kúaʼana ña̱ nduʼú xíʼin nu̱ú xa̱ʼa̱ kúaʼana ña̱ nduʼú. 26 Ta̱ su̱tu̱ chikaa̱ra loʼo aceite ini ndaʼa̱ yitinra 27 tasaá, xíʼin nu̱ú ndaʼa̱ kúaʼara, kiʼinra loʼo aceite tá ndíkaa̱ ini ndaʼa̱ yitinra ta u̱xa̱ yichi̱ ko̱so̱yávárará nu̱ú íyo Jehová. 28 Ta̱ su̱tu̱ kiʼinra loʼo aceite tá ndíkaa̱ ini ndaʼa̱ra ta chikaa̱rará yuʼú so̱ʼo kúaʼa na̱ ndúndii, nu̱ú ndaʼa̱ kúaʼana ña̱ nduʼú xíʼin nu̱ú xa̱ʼa̱ kúaʼana ña̱ nduʼú, mií nu̱ú xa̱a̱ xa̱kinna ni̱i̱ kití tí ni̱so̱kóna xa̱ʼa̱ ña̱ ke̱ʼéna ña̱ va̱ása va̱ʼa. 29 Ta ta̱ su̱tu̱ kiʼinra loʼo aceite tá kíndo̱o ini ndaʼa̱ra ta sakáarará xi̱ní na̱ ndúndii, ta̱ su̱tu̱ keʼéra ña̱yóʼo nu̱ú íyo Jehová ña̱ va̱ʼa ná ixakáʼnu-inira xa̱ʼa̱ ku̱a̱china.

30 ”So̱kóna iin paloma káʼnu á iin paloma loʼo, nda̱a̱ ndáaka tí kivi taxina, 31 á tí kivi satána* ña̱ va̱ʼa so̱kónarí xa̱ʼa̱ ku̱a̱china. Ta tí inka kaʼminarí ta so̱kónarí xíʼin harina. Ta ta̱ su̱tu̱ keʼéra ña̱yóʼo xa̱ʼa̱ na̱ ndúndii ña̱ va̱ʼa ná ixakáʼnu-ini Jehová xa̱ʼa̱ ku̱a̱china.

32 ”Na̱ yiví na̱ xi̱kuumií lepra, soo kǒo ku̱a̱ʼá xu̱ʼún kúúmiína ña̱ satána ña̱ so̱kóna nu̱ú Ndióxi̱, xíniñúʼu kundiku̱nna ley yóʼo ña̱ va̱ʼa ka̱ʼa̱n ta̱ su̱tu̱ xa̱ʼa̱na ña̱ xa̱a̱ ndu̱ndiina”.

33 Tándi̱ʼi, Jehová ni̱ka̱ʼa̱nra xíʼin ta̱ Moisés ta saátu xí’in ta̱ Aarón: 34 “Tá ná ki̱ʼvindó nu̱ú ñuʼú ña̱ Canaán, ña̱ taxii̱ ndaʼa̱ndó kundoondó, ta ná sakíʼi̱n kue̱ʼe̱ lepra iin veʼe ña̱ koo ñuundó, 35 na̱ xíʼin veʼe yóʼo, ku̱ʼu̱nna ta ka̱ʼa̱nna xíʼin ta̱ su̱tu̱: ‘Ka̱na iin kusu* veʼi̱’. 36 Ta̱ su̱tu̱ ka̱ʼa̱nra ña̱ ná tavána ndiʼi ña̱ʼana ini veʼe kán tá kúma̱níka ku̱ʼu̱nra kotora kusu ña̱ ka̱na tasaá va̱ása ka̱ʼa̱n ta̱ su̱tu̱ ña̱ ku̱yaku̱a̱* ndiʼi ña̱ʼa ña̱ íyo ini veʼena. Tándi̱ʼi, ki̱ʼvira ini veʼe kán ña̱ va̱ʼa kotoraña. 37 Kotora nu̱ú ka̱na kusu kán ta tá ki̱xáʼa káa̱n kándíka veʼe kán ta náʼa̱ kúii̱ña á náʼa̱ kúáanña á náʼa̱ kúáʼaña ta saátu tá náʼa̱ kúnú* ña̱ ni̱ka̱a̱n kándíka veʼe, 38 ta̱ su̱tu̱ kitara chí yéʼé veʼe kán ta ka̱ʼa̱nra ña̱ va̱ása xíniñúʼu ki̱ʼvina iniña nda̱a̱ ná ya̱ʼa u̱xa̱ ki̱vi̱.

39 ”Tá ná xi̱nu u̱xa̱ ki̱vi̱, ta̱ su̱tu̱ ku̱ʼu̱n tukura kotora veʼe kán. Tá ki̱xáʼa káa̱ kusu iníí kándíka veʼe kán, 40 ta̱ su̱tu̱ ka̱ʼa̱nra ña̱ ná tavána yu̱u̱ ña̱ ñúʼu kándíka veʼe kán nu̱ú ka̱na kusu ta ná tavánaña chí sa̱tá ñuu nu̱ú iin lugar ña̱ yaku̱a̱. 41 Tándi̱ʼi, ka̱ʼa̱nra xíʼinna ña̱ ná ñiʼina* ini veʼe kán. Ta yeso xíʼin nda̱ʼyi̱ ña̱ ná kindaana, xíniñúʼu tavánaña chí sa̱tá ñuu nu̱ú iin lugar ña̱ yaku̱a̱. 42 Ta nu̱ú tavána yu̱u̱, ndataánna inkaña ta chikaa̱ tukuna nda̱ʼyi̱ kándíka veʼe kán.

43 ”Soo tá ka̱na tuku kusu kándíka veʼe kán ni xa̱a̱ ta̱vána yu̱u̱ ña̱ xi̱kuumiíña ta xa̱a̱ ñi̱ʼina kándíkaña ta nda̱kasi tukunaña, 44 ta̱ su̱tu̱ ki̱ʼvi tukura iniña ta kotoraña. Tá ni̱ka̱a̱ kusu yóʼo ini veʼe kán, lepra ña̱ ndeé kúúña. Ña̱ yaku̱a̱ kúú veʼe kán. 45 Ka̱ʼa̱nra ña̱ ná sandíʼi-xa̱ʼa̱na veʼe yóʼo, ta yu̱u̱ xíʼin yitu̱n ta saátu yeso xíʼin nda̱ʼyi̱ ña̱ ná tavána, xíniñúʼu ku̱ʼu̱nna xíʼinña chí sa̱tá ñuu, nu̱ú iin lugar ña̱ yaku̱a̱. 46 Soo nda̱a̱ ndáaka na̱ ná ki̱ʼvi ini veʼe yóʼo ki̱vi̱ ña̱ ná ka̱ʼa̱n ta̱ su̱tu̱ ña̱ va̱ása xíniñúʼu ki̱ʼvina iniña, koona na̱ yaku̱a̱ nda̱a̱ ná ki̱ʼvi ñu̱ʼu,* 47 nda̱a̱ ndáaka na̱ ná ku̱su̱n ini veʼe kán, xíniñúʼu ndakatana ti̱ko̱to̱na ta nda̱a̱ ndáaka na̱ ná kuxu ini veʼe kán xíniñúʼu ndakatana ti̱ko̱to̱na.

48 ”Soo tá xa̱a̱ nda̱kasina kándíka veʼe yóʼo xíʼin nda̱ʼyi̱ ta ni̱xa̱a̱ ta̱ su̱tu̱ xi̱nira ña̱ kǒo níka̱a̱ kusu kándíkaña, xíniñúʼu ka̱ʼa̱nra ña̱ xa̱a̱ ndu̱ndii veʼe yóʼo saáchi kǒoka kusu kándíkaña. 49 Ña̱ va̱ʼa ndasandiira veʼe yóʼo, kiʼinra u̱vi̱ tí saa, yitu̱n tú cedro, yi̱ʼva̱ kúáʼa ña̱ yéʼe̱ní xíʼin yu̱ku̱ ña̱ naní hisopo. 50 Xíniñúʼu kaʼníra iin tí saa yóʼo nu̱ú iin ña̱ʼa ña̱ ku̱vaʼa xíʼin ñuʼú ña̱ ñúʼu ti̱kui̱í yu̱ta ini. 51 Tándi̱ʼi, kiʼinra yitu̱n tú cedro, yu̱ku̱ ña̱ naní hisopo, yi̱ʼva̱ kúáʼa ña̱ yéʼe̱ní xíʼin saa tí táku ta sandáxira ndiʼi ña̱yóʼo xíʼin ni̱i̱ tí saa tí xa̱a̱ xa̱ʼníra ta saátu xíʼin ti̱kui̱í tá yu̱ta, ta u̱xa̱ yichi̱ ko̱so̱yávára ni̱i̱ yóʼo sa̱tá veʼe kán. 52 Ña̱ va̱ʼa ndasandiira veʼe kán, kuniñúʼura ni̱i̱ tí saa, ti̱kui̱í tá yu̱ta, saa tí táku, yitu̱n tú cedro, yu̱ku̱ ña̱ naní hisopo xíʼin yi̱ʼva̱ kúáʼa ña̱ yéʼe̱ní. 53 Tándi̱ʼi, sañára saa tí táku chí sa̱tá ñuu chí yuku̱, ta tavára ña̱ yaku̱a̱ ña̱ íyo veʼe kán tasaá ndundiiña.

54 ”Ña̱yóʼo kúú ley ña̱ kundiku̱nna xíʼin na̱ ki̱ʼin lepra, na̱ ki̱ʼin kue̱ʼe̱ ñii̱ xi̱ní á ta̱ʼya̱-yuʼu̱na,* 55 ta saátu tá ka̱na lepra iin ti̱ko̱to̱ á iin veʼe, 56 tá ka̱a kuiñu ñii̱na, tá ka̱na ta̱ʼyi̱* á tá ka̱na ndi̱ʼi ñii̱na, 57 tasaá va̱ʼa kunda̱a̱-ini ta̱ su̱tu̱ á na̱ yaku̱a̱ kúúna á na̱ ndii kúúna. Ña̱yóʼo kúú ley ña̱ kundiku̱nna xa̱ʼa̱ lepra”.

15 Jehová ni̱ka̱ʼa̱nkara xíʼin ta̱ Moisés ta saátu xíʼin ta̱ Aarón, ta ka̱chira: 2 “Ña̱yóʼo ka̱ʼa̱nndó xíʼin na̱ israelita: ‘Tá iin ta̱a kúúmiíra iin kue̱ʼe̱ ña̱ xíta̱ nduta̱ra chí nu̱ú tátálásara,* xa̱ʼa̱ ña̱ ndóʼora ña̱yóʼo kúúra ta̱ yaku̱a̱.* 3 Ta̱ yaku̱a̱ kúú ta̱yóʼo xa̱ʼa̱ ña̱ kúúmiíra kue̱ʼe̱ ña̱ xíta̱ nduta̱ra, ni xíta̱ka nduta̱ra á ni va̱ása kívi tatálásara, ta̱ yaku̱a̱va kúú ta̱yóʼo.

4 ”’Nda̱a̱ ndáaka xi̱to nu̱ú ná kandúʼura,* kooña ña̱ yaku̱a̱ xa̱ʼa̱ ña̱ xíta̱ nduta̱ra, ta nda̱a̱ ndáaka ña̱ʼa ná koora* nu̱ú, kooña ña̱ yaku̱a̱. 5 Nda̱a̱ ndáaka ta̱a ta̱ ná tiin xi̱to yóʼo, xíniñúʼu ndakatara ti̱ko̱to̱ra ta kuchira, ta koora ta̱ yaku̱a̱ nda̱a̱ ná ki̱ʼvi ñu̱ʼu.* 6 Nda̱a̱ ndáaka na̱ ná koo nu̱ú ni̱xi̱yo ta̱ kúúmií kue̱ʼe̱ ña̱ xíta̱ nduta̱ra, xíniñúʼu ndakatana ti̱ko̱to̱na ta kuchina ta koona na̱ yaku̱a̱ nda̱a̱ ná ki̱ʼvi ñu̱ʼu. 7 Nda̱a̱ ndáaka na̱ ná tiin ta̱ kúúmií kue̱ʼe̱ ña̱ xíta̱ nduta̱ra, xíniñúʼu ndakatana ti̱ko̱to̱na ta kuchina ta koona na̱ yaku̱a̱ nda̱a̱ ná ki̱ʼvi ñu̱ʼu. 8 Tá ta̱ kúúmií kue̱ʼe̱ ña̱ xíta̱ nduta̱ra kúndaara tási̱íra* nu̱ú iin na̱ yiví, na̱yóʼo xíniñúʼu ndakatana ti̱ko̱to̱na ta kuchina, ta koona na̱ yaku̱a̱ nda̱a̱ ná ki̱ʼvi ñu̱ʼu. 9 Tá ná koo ta̱ kúúmií kue̱ʼe̱ ña̱ xíta̱ nduta̱ra sa̱tá iin tayi̱ tú xíniñúʼuna ña̱ yósóna* kití, tú yaku̱a̱tu koo túyóʼova. 10 Nda̱a̱ ndáaka na̱ ná tiin ña̱ʼa nu̱ú ni̱xi̱yora, koona na̱ yaku̱a̱ nda̱a̱ ná ki̱ʼvi ñu̱ʼu, ta nda̱a̱ ndáaka na̱ ná kuiso ña̱ʼa yóʼo, ndakatana ti̱ko̱to̱na ta kuchina, ta koona na̱ yaku̱a̱ nda̱a̱ ná ki̱ʼvi ñu̱ʼu. 11 Tá ta̱ kúúmií kue̱ʼe̱ ña̱ xíta̱ nduta̱ra va̱ása níndakatara ndaʼa̱ra tasaá ti̱inra iin na̱ yiví, na̱yóʼo xíniñúʼu ndakatana ti̱ko̱to̱na ta kuchina, ta koona na̱ yaku̱a̱ nda̱a̱ ná ki̱ʼvi ñu̱ʼu. 12 Tá ta̱ kúúmií kue̱ʼe̱ ña̱ xíta̱ nduta̱ra ti̱inra iin ki̱si ñuʼú, xíniñúʼu taʼvína ña̱yóʼo, ta saátu tá ti̱inra iin ña̱ʼa ña̱ ku̱vaʼa xíʼin yitu̱n nu̱ú táanva̱ʼana ña̱ʼa, xíniñúʼu ndakatana ña̱yóʼo.

13 ”’Tá va̱ása xíta̱ka nduta̱ra ta xa̱a̱ nda̱ʼara, xíniñúʼu kundatura u̱xa̱ ki̱vi̱ ña̱ va̱ʼa ndundiira, ta xíniñúʼu ndakatara ti̱ko̱to̱ra ta kuchira ti̱kui̱í tá yu̱ta, tasaá ndundiira.* 14 Tá ná xi̱nu u̱na̱ ki̱vi̱ xíniñúʼu kiʼinra u̱vi̱ paloma náʼnu á u̱vi̱ paloma válí,* ta ku̱ʼu̱nra xíʼinrí nu̱ú Jehová chí yéʼé tabernáculo ta taxirarí ndaʼa̱ ta̱ su̱tu̱. 15 Ta̱ su̱tu̱ so̱kóra* tí saa yóʼo, iinrí so̱kóra xa̱ʼa̱ ku̱a̱chira ta inkarí kaʼmira* ña̱ so̱kórarí nu̱ú Ndióxi̱. Ta ta̱ su̱tu̱ keʼéra ña̱yóʼo ña̱ va̱ʼa ná ixakáʼnu-ini Jehová xa̱ʼa̱ ta̱ kúúmií kue̱ʼe̱ ña̱ xíta̱ nduta̱ra.

16 ”’Soo tá xíta̱ nduta̱ iin ta̱a, xíniñúʼu kuchira ta koora ta̱ yaku̱a̱ nda̱a̱ ná ki̱ʼvi ñu̱ʼu. 17 Tá ni̱ko̱yo nduta̱ra sa̱tá nda̱a̱ ndáaka ti̱ko̱to̱ á nda̱a̱ ndáaka ña̱ʼa ña̱ ku̱vaʼa xíʼin ñii̱ kití, xíniñúʼu ndooña ta ña̱yóʼo kooña ña̱ yaku̱a̱ nda̱a̱ ná ki̱ʼvi ñu̱ʼu.

18 ”’Tá iin ta̱a kísi̱ra xíʼin iin ñaʼá ta xíta̱ nduta̱ra, u̱vi̱ saána xíniñúʼu kuchina ta koona na̱ yaku̱a̱ nda̱a̱ ná ki̱ʼvi ñu̱ʼu.

19 ”’Tá núu ni̱i̱ iin ñaʼá, u̱xa̱ ki̱vi̱ kooñá ñá yaku̱a̱. Nda̱a̱ ndáaka na̱ ná tiinñá, koona na̱ yaku̱a̱ nda̱a̱ ná ki̱ʼvi ñu̱ʼu. 20 Nda̱a̱ ndáaka ña̱ʼa ná kandúʼuñá nu̱ú kooña ña̱ yaku̱a̱ xa̱ʼa̱ ña̱ núu ni̱i̱ñá, ta saátu nda̱a̱ ndáaka ña̱ʼa ná kooñá nu̱ú, kooña ña̱ yaku̱a̱. 21 Nda̱a̱ ndáaka na̱ ná tiin xi̱toñá, xíniñúʼu ndakatana ti̱ko̱to̱na ta kuchina, ta koona na̱ yaku̱a̱ nda̱a̱ ná ki̱ʼvi ñu̱ʼu. 22 Ndiʼi na̱ ná tiin nda̱a̱ ndáaka ña̱ʼa ña̱ ni̱xi̱yoñá nu̱ú, xíniñúʼu ndakatana ti̱ko̱to̱na ta kuchina, ta koona na̱ yaku̱a̱ nda̱a̱ ná ki̱ʼvi ñu̱ʼu. 23 Tá íyo iin na̱ ti̱in xi̱toñá á nda̱a̱ ndáaka ña̱ʼa ña̱ ni̱xi̱yoñá nu̱ú, na̱ yiví yóʼo koona na̱ yaku̱a̱ nda̱a̱ ná ki̱ʼvi ñu̱ʼu. 24 Tá núu ni̱i̱ iin ñaʼá ta kísi̱ iin ta̱a xíʼinñá, ta̱yóʼo koora ta̱ yaku̱a̱ u̱xa̱ ki̱vi̱, ta nda̱a̱ ndáaka xi̱to nu̱ú ná kandúʼura koonú tú yaku̱a̱.

25 ”’Tá xa̱a̱ ku̱a̱ʼá ki̱vi̱ xíta̱ ni̱i̱ iin ñá ñaʼá ta su̱ví ki̱vi̱ ña̱ núu ni̱i̱ñá kúúña, á ku̱a̱ʼá ki̱vi̱ núu ni̱i̱ñá, kooñá ñá yaku̱a̱ ndiʼi ki̱vi̱ ña̱ ná ku̱i̱ta̱ ni̱i̱ñá, nda̱a̱ táki̱ʼva xíyoñá ñá yaku̱a̱ xa̱ʼa̱ ña̱ núu ni̱i̱ñá. 26 Nda̱a̱ ndáaka xi̱to nu̱ú ná kandúʼuñá ndiʼi ki̱vi̱ ña̱ xíta̱ ni̱i̱ñá koonú tú yaku̱a̱, nda̱a̱ táki̱ʼva kúyaku̱a̱ xi̱toñá tá núu ni̱i̱ñá. Ta nda̱a̱ ndáaka ña̱ʼa ná kooñá nu̱ú, kooña ña̱ yaku̱a̱ nda̱a̱ táki̱ʼva kúyaku̱a̱ ña̱yóʼo tá núu ni̱i̱ñá. 27 Ndiʼi na̱ ná tiin ña̱yóʼo koona na̱ yaku̱a̱, ta xíniñúʼu ndakatana ti̱ko̱to̱na ta kuchina, ta koona na̱ yaku̱a̱ nda̱a̱ ná ki̱ʼvi ñu̱ʼu.

28 ”’Soo tá va̱ása xíta̱ka ni̱i̱ñá, xíniñúʼu kundatuñá u̱xa̱ ki̱vi̱, tasaá ndundiiñá. 29 Tá ná xi̱nu u̱na̱ ki̱vi̱, xíniñúʼu kiʼinñá u̱vi̱ paloma náʼnu á u̱vi̱ paloma válí, ta kuniʼiñárí ku̱ʼu̱n xíʼinñá nu̱ú ta̱ su̱tu̱ chí yéʼé tabernáculo. 30 Ta̱ su̱tu̱ so̱kóra tíyóʼo, iinrí so̱kóra xa̱ʼa̱ ku̱a̱chiñá ta inkarí kaʼmira* ta so̱kórarí nu̱ú Ndióxi̱. Ta̱ su̱tu̱ keʼéra ña̱yóʼo ña̱ va̱ʼa ná ixakáʼnu-ini Jehová xa̱ʼa̱ ñá xíta̱ ni̱i̱.

31 ”’Xíniñúʼu chindeétáʼanndó xíʼin na̱ israelita ña̱ ndii ná koona, tasaá va̱ása kuvina xa̱ʼa̱ ña̱ ixayaku̱a̱na tabernáculo ña̱ níndichi ma̱ʼñú nu̱ú ndóona.

32 ”’Ña̱yóʼo kúú ley ña̱ xíniñúʼu kundiku̱n iin ta̱a ta̱ kúúmií kue̱ʼe̱ ña̱ xíta̱ nduta̱ra, saátu ta̱a ta̱ kúyaku̱a̱ xa̱ʼa̱ ña̱ xíta̱ nduta̱ra, 33 saátu ñaʼá ñá núu ni̱i̱, nda̱a̱ ndáaka ta̱a á ñaʼá na̱ ndóʼo ña̱yóʼo xíniñúʼu kundiku̱nna ley yóʼo, ta saátu ta̱a ta̱ ná ku̱su̱n xíʼin iin ñaʼá ñá yaku̱a̱’”.

16 Jehová ni̱ka̱ʼa̱nra xíʼin ta̱ Moisés tá xa̱a̱ ni̱xi̱ʼi̱ u̱vi̱ saá na̱ se̱ʼe ta̱ Aarón xa̱ʼa̱ ña̱ ku̱yatinna nu̱ú Jehová. 2 Ña̱yóʼo ni̱ka̱ʼa̱n Jehová xíʼin ta̱ Moisés: “Ka̱ʼa̱n xíʼin ñaniún ta̱ Aarón ña̱ va̱ása kivi ki̱ʼvira nda̱a̱ ndáaka ki̱vi̱ nu̱ú lugar yi̱i̱ ña̱ íyo chí sa̱tá cortina chí nu̱ú níndichi tú arca ña̱ va̱ʼa ná kǒo kuvira, saáchi yi̱ʼi̱ kitai̱ ma̱ʼñú vi̱kó chí sa̱tá tú arca.

3 ”Ña̱yóʼo kúú ña̱ xíniñúʼu ku̱ʼu̱n xíʼin ta̱ Aarón tá ná ki̱ʼvira nu̱ú lugar ña̱ yi̱i̱: iin si̱ndi̱ki̱ yúta̱* tí so̱kóra* xa̱ʼa̱ ku̱a̱chira xíʼin iin ndikachi* che̱e tí kaʼmira* ña̱ so̱kórarí nu̱úi̱. 4 Xíniñúʼu ndakundixira ti̱ko̱to̱ káni̱ra ña̱ yi̱i̱ ña̱ ku̱vaʼa xíʼin lino, ndakundixira xatu loʼora ña̱ lino ta katúnra ti̱ko̱to̱ ña̱ lino tokóra, ta saátu chinúura ti̱ko̱to̱ ña̱ lino xi̱níra ña̱ ku̱vaʼa kunúu xi̱níra. Ndiʼi ña̱yóʼo ña̱ yi̱i̱ kúúña. Xíniñúʼu kuchira tasaá ndakundixira ña̱yóʼo.

5 ”Na̱ ñuu Israel taxina u̱vi̱ ti̱xúʼú* loʼo tí so̱kóra xa̱ʼa̱ ku̱a̱china, ta saátu taxina iin ndikachi che̱e tí kaʼmira ña̱ so̱kórarí nu̱úi̱.

6 ”Ta̱ Aarón xíniñúʼu so̱kóra iin si̱ndi̱ki̱ xa̱ʼa̱ ku̱a̱chira, keʼéra ña̱yóʼo ña̱ va̱ʼa ná koo káʼnu-inii̱ xa̱ʼa̱ ku̱a̱chira ta saátu xa̱ʼa̱ ku̱a̱chi na̱ veʼera.

7 ”Tasaá kiʼinra u̱vi̱ saá ti̱xúʼú loʼo ta ku̱ʼu̱nra xíʼinrí nu̱ú yi̱ʼi̱ Jehová chí yéʼé tabernáculo. 8 Ta̱ Aarón chikaa̱ra suerte xa̱ʼa̱ u̱vi̱ saá ti̱xúʼú loʼo: iinrí koo kuenta yi̱ʼi̱ Jehová ta inkarí kuniʼi ku̱a̱chi na̱ ñuu ku̱ʼu̱n xíʼinrí.* 9 Ta̱ Aarón kiʼinra ti̱xúʼú loʼo tí ki̱ta suerte xa̱ʼa̱ ña̱ koorí kuenta yi̱ʼi̱ Jehová ta so̱kóra tíyóʼo xa̱ʼa̱ ku̱a̱chi na̱ ñuu. 10 Soo tí ti̱xúʼú loʼo tí ki̱ta suerte xa̱ʼa̱ ña̱ kuniʼirí ku̱a̱chi na̱ ñuu ku̱ʼu̱n xíʼinrí, ku̱ʼu̱n tákurí nu̱ú yi̱ʼi̱ Jehová ña̱ va̱ʼa koo káʼnu-inii̱ xa̱ʼa̱ ku̱a̱chi na̱ ñuu, tasaá chindaʼánarí ku̱ʼu̱nrí chí ñuʼú yi̱chí xíʼin ku̱a̱chi na̱ ñuu.

11 ”Ta̱ Aarón xíniñúʼu so̱kóra iin si̱ndi̱ki̱ xa̱ʼa̱ ku̱a̱chira, keʼéra ña̱yóʼo ña̱ va̱ʼa ná koo káʼnu-inii̱ xa̱ʼa̱ ku̱a̱chira ta saátu xa̱ʼa̱ ku̱a̱chi na̱ veʼera. Tándi̱ʼi, kaʼníra tí si̱ndi̱ki̱ yóʼo ta so̱kórarí xa̱ʼa̱ ku̱a̱chira.

12 ”Tasaá kiʼinra ña̱ʼa nu̱ú xíñuʼu ñuʼu̱ ña̱ ndóso nu̱ú altar ña̱ níndichi nu̱ú yi̱ʼi̱ Jehová, ta ini ndaʼa̱ra kiʼinra u̱vi̱ koʼndo ña̱ʼa ña̱ xáʼa̱n támi ña̱ chíʼmána, ta ku̱ʼu̱nra xíʼinña chí sa̱tá ña̱ cortina. 13 Saátu chindósora ña̱ʼa ña̱ chíʼmára nu̱ú ñuʼu̱ ña̱ xíxi̱ nu̱ú yi̱ʼi̱ Jehová, ta yi̱ʼma̱ ña̱ kana tá xíxi̱ ña̱yóʼo ndakasiña iníí yuʼú tú Arca nu̱ú ñúʼu Yu̱u̱ nu̱ú va̱xi u̱xu̱ ley, keʼéra ña̱yóʼo ña̱ va̱ʼa kǒo kuvira.

14 ”Ta xíʼin nu̱ú ndaʼa̱ra* kiʼinra loʼo ni̱i̱ tí si̱ndi̱ki̱ ta ko̱so̱yáváraña* chí síi̱n nu̱ú níndichi tú Arca ña̱ xítondaa chí nu̱ú kíta ñu̱ʼu.* Ta xíʼin nu̱ú ndaʼa̱ra u̱xa̱ yichi̱ kundaara loʼo ni̱i̱rí chí nu̱ú íyo yuʼú tú Arca.

15 ”Tándi̱ʼi, kaʼníra tí ti̱xúʼú loʼo tí so̱kóra xa̱ʼa̱ ku̱a̱chi na̱ ñuu. Ta kuniʼira loʼo ni̱i̱rí ku̱ʼu̱n xíʼinra chí sa̱tá ña̱ cortina, ta nda̱a̱ táki̱ʼva ke̱ʼéra xíʼin ni̱i̱ tí si̱ndi̱ki̱ saá keʼéra xíʼin ni̱i̱ tíyóʼo. Ta ko̱so̱yávára loʼo ni̱i̱rí chí yuʼú tú arca.

16 ”Ta̱ Aarón xíniñúʼu ka̱ʼa̱n-ndáʼvira xíʼi̱n xa̱ʼa̱ lugar ña̱ yi̱i̱ chi ku̱a̱ʼání ña̱ yaku̱a̱* ke̱ʼé na̱ israelita ta saátu ku̱a̱ʼání ku̱a̱chi ni̱ki̱ʼvina. Ña̱yóʼo kúú ña̱ xíniñúʼu keʼéra xa̱ʼa̱ tabernáculo ña̱ íyo ma̱ʼñú na̱ israelita chi ku̱a̱ʼání ña̱ va̱ása va̱ʼa kéʼéna.

17 ”Tá ná ki̱ʼvira ini tabernáculo ña̱ ka̱ʼa̱n-ndáʼvira xíʼi̱n ini lugar ña̱ yi̱i̱, va̱ása xíniñúʼu kundikaa̱ nda̱a̱ ni iin ta̱a iniña nda̱a̱ ná kitara. Keʼéra ña̱yóʼo ña̱ va̱ʼa ná ixakáʼnu-inii̱ xa̱ʼa̱ra, xa̱ʼa̱ na̱ veʼera ta saátu xa̱ʼa̱ ndiʼi na̱ ñuu Israel.

18 ”Tasaá kitara nu̱ú níndichi altar ña̱ níndichi nu̱ú yi̱ʼi̱ Jehová ta ka̱ʼa̱n-ndáʼvira xa̱ʼa̱ra xíʼi̱n, ta kiʼinra loʼo ni̱i̱ tí si̱ndi̱ki̱ xíʼin loʼo ni̱i̱ tí ti̱xúʼú loʼo ta kakinraña ndiʼi saá ndiki̱ ña̱ altar. 19 Ta xíʼin nu̱ú ndaʼa̱ra u̱xa̱ yichi̱ ko̱so̱yávára loʼo ni̱i̱ nu̱ú altar, tasaá ndasandiiraña* nu̱ú ndiʼi ña̱ yaku̱a̱ ña̱ kéʼé na̱ israelita ta ndasayi̱i̱raña.

20 ”Tá ná sandíʼira ka̱ʼa̱n-ndáʼvira xíʼi̱n xa̱ʼa̱ lugar ña̱ yi̱i̱, xa̱ʼa̱ tabernáculo ta saátu altar, saátu xíniñúʼu ku̱ʼu̱nra xíʼin ti̱xúʼú loʼo tí táku nu̱úi̱. 21 Ta̱ Aarón chindósora u̱vi̱ saá ndaʼa̱ra xi̱ní tí ti̱xúʼú loʼo tí táku, ta ka̱ʼa̱nra xa̱ʼa̱ ndiʼi ña̱ va̱ása va̱ʼa ña̱ kéʼé na̱ israelita ta saátu xa̱ʼa̱ ndiʼi ku̱a̱china, tá ná keʼéra ña̱yóʼo nda̱a̱ táki̱ʼva koo ña̱ chindósora ndiʼi ku̱a̱chi xi̱ní tí ti̱xúʼú yóʼo saá kooña, ta iin ta̱a ta̱ xa̱a̱ nda̱kaxinna kúú ta̱ ku̱ʼu̱n xíʼin tíyóʼo chí ñuʼú yi̱chí. 22 Tí ti̱xúʼú yóʼo kuniʼirí ndiʼi ku̱a̱chi na̱yóʼo ku̱ʼu̱n xíʼinrí chí ñuʼú yi̱chí, ta ta̱yóʼo chindaʼára tí ti̱xúʼú yóʼo ku̱ʼu̱nrí chí ñuʼú yi̱chí.

23 ”Tasaá ki̱ʼvi ta̱ Aarón ini tabernáculo ta tavára ti̱ko̱to̱ra ña̱ lino ña̱ nda̱kundixira tá ni̱ki̱ʼvira ini lugar ña̱ yi̱i̱ ta kán sandákooraña. 24 Ta xíniñúʼu kuchira nu̱ú iin lugar ña̱ yi̱i̱ ta ndakundixira ti̱ko̱to̱ra. Tándi̱ʼi, kitara ta kaʼmira kití* tí so̱kóra xa̱ʼa̱ miíra ta saátu kaʼmira kití tí so̱kóra xa̱ʼa̱ na̱ ñuu. Keʼéra ña̱yóʼo ña̱ va̱ʼa ixakáʼnu-inii̱ xa̱ʼa̱ra ta saátu xa̱ʼa̱ na̱ ñuu. 25 Ta nu̱ú altar kaʼmira xa̱ʼan* tí kití tí ni̱so̱kóna xa̱ʼa̱ ku̱a̱china ña̱ va̱ʼa kana yi̱ʼma̱ña.

26 ”Ta̱ ta̱a ta̱ chi̱ndaʼá tí ti̱xúʼú loʼo tí níʼi ku̱a̱chi na̱ ñuu ku̱a̱ʼa̱n xíʼinrí, xíniñúʼu ndakatara ti̱ko̱to̱ra ta kuchira; tándi̱ʼi saá kivi ki̱ʼvira nu̱ú ndóo na̱ ñuu.

27 ”Ta chí sa̱tá nu̱ú ndóo na̱ ñuu koko* ñii̱ tí si̱ndi̱ki̱ tí ni̱so̱kóra xa̱ʼa̱ ku̱a̱chira xíʼin ñii̱ tí ti̱xúʼú loʼo tí ni̱so̱kóra xa̱ʼa̱ ku̱a̱chi na̱ ñuu, saátu keʼéra xíʼin ku̱ñurí xíʼin si̱ʼvírí (ni̱i̱ tíyóʼo kúú ña̱ ni̱xa̱ʼa̱n xíʼinra ini lugar ña̱ yi̱i̱ ña̱ ni̱ka̱ʼa̱n-ndáʼvira xíʼi̱n). 28 Ta̱ ta̱a ta̱ ná kaʼmi ña̱yóʼo xíniñúʼu ndakatara ti̱ko̱to̱ra ta kuchira, tándi̱ʼi saá kivi ki̱ʼvira nu̱ú ndóo na̱ ñuu.

29 ”Ña̱yóʼo koo iin ley ña̱ kundiku̱nndó ndiʼi tiempo: ki̱vi̱ 10 ña̱ yo̱o̱ u̱xa̱ xíniñúʼu na̱ʼa̱ndó ña̱ kúsuchí-inindó* xa̱ʼa̱ ku̱a̱chi ña̱ ni̱ki̱ʼvindó, ta va̱ása xíniñúʼu keʼéndó nda̱a̱ ni iin chiñu. Ndiʼina xíniñúʼu kundiku̱n ley yóʼo ni kúúna na̱ ñuu miíndó á na̱ ke̱e inka ñuu na̱ ki̱xaa̱ ndóo xíʼinndó. 30 Ki̱vi̱ yóʼo, ta̱ su̱tu̱ ka̱ʼa̱n-ndáʼvira xíʼi̱n ná koo káʼnu-inii̱ xa̱ʼa̱ndó tasaá ndundiindó.* Saá kúú ña̱ koo káʼnu-ini yi̱ʼi̱ Jehová xa̱ʼa̱ ndiʼi ku̱a̱chindó ta ndundiindó nu̱úi̱. 31 Iin sábado ña̱ ndakindee̱ndó kúú ña̱yóʼo ta xíniñúʼu na̱ʼa̱ndó ña̱ kúsuchí-inindó xa̱ʼa̱ ku̱a̱chindó. Iin ley ña̱ kundiku̱nndó ndiʼi tiempo kúú ña̱yóʼo.

32 ”Ta̱ su̱tu̱ ta̱ ná ndaka̱xinna ña̱ va̱ʼa ndakiʼinra chiñu ña̱ xi̱kuumií yivára ña̱ koora su̱tu̱, so̱kóra ña̱ʼa nu̱úi̱ ña̱ va̱ʼa koo káʼnu-inii̱ xa̱ʼa̱na ta ndakundixira ti̱ko̱to̱ ña̱ lino ña̱ yi̱i̱. 33 So̱kóra ña̱yóʼo xa̱ʼa̱ lugar ña̱ yi̱i̱, xa̱ʼa̱ tabernáculo, xa̱ʼa̱ altar, xa̱ʼa̱ na̱ su̱tu̱ ta saátu xa̱ʼa̱ ndiʼi na̱ ñuu Israel. 34 Ña̱yóʼo kúú iin ley ña̱ kundiku̱nndó ndiʼi tiempo, ta iin yichi̱ nu̱ú ku̱i̱ya̱ keʼéndó ña̱yóʼo ña̱ va̱ʼa ná ixakáʼnu-inii̱ xa̱ʼa̱ ku̱a̱chi na̱ israelita”.

Ta nda̱a̱ táki̱ʼva ni̱ka̱ʼa̱n Jehová xíʼin ta̱ Moisés saá ke̱ʼéra.

17 Jehová ni̱ka̱ʼa̱nkara xíʼin ta̱ Moisés ta ka̱chira: 2 “Ña̱yóʼo ka̱ʼún xíʼin ta̱ Aarón xíʼin na̱ se̱ʼera ta saátu xíʼin na̱ israelita: ‘Ña̱yóʼo kúú chiñu ña̱ xa̱ʼnda Jehová:

3 ”’“Tá iin ta̱ ñuu Israel xa̱ʼníra iin si̱ndi̱ki̱, iin ndikachi* che̱e yúta̱* á iin ti̱xúʼú* ini nu̱ú ndóona á chí sa̱tá nu̱ú ndóona, 4 ta̱ ta̱a yóʼo kuumiíra ku̱a̱chi, saáchi xi̱niñúʼu ku̱ʼu̱nra xíʼin kití yóʼo chí yéʼé tabernáculo ña̱ va̱ʼa kaʼnírarí ta so̱kórarí nu̱ú* Jehová nu̱ú tabernáculo nu̱ú ndásakáʼnuna Jehová. Xa̱ʼa̱ ña̱ xa̱ʼníra tí kití yóʼo inka lugar, xíniñúʼu kuvira. 5 Ña̱ va̱ʼa ná kǒo kaʼníka na̱ israelita kití nu̱ú Jehová chí yoso̱ ndíka̱ ta ná ku̱ʼu̱nna xíʼinrí chí yéʼé tabernáculo nu̱ú ta̱ su̱tu̱, xíniñúʼu so̱kónarí nu̱ú Jehová ña̱ va̱ʼa ndakutáʼan viína xíʼinra. 6 Ta̱ su̱tu̱ ko̱so̱yávára* ni̱i̱rí nu̱ú altar Jehová chí yéʼé tabernáculo ta kaʼmira xa̱ʼanrí* ña̱ va̱ʼa so̱kóraña nu̱ú Jehová ta táminí kuxaʼa̱n ña̱yóʼo nu̱úra. 7 Tasaá, va̱ása so̱kókana ña̱ʼa nu̱ú na̱ ta̱chí ndi̱va̱ʼa na̱ náʼa̱ nda̱a̱ táki̱ʼva náʼa̱ ti̱xúʼú, chi na̱yóʼo kúú na̱ ndásakáʼnuna.* Ña̱yóʼo kúú ley ña̱ kundiku̱nndó ndiʼi tiempo, miíndó xíʼin na̱ se̱ʼendó na̱ kaku chí nu̱únínu”’.

8 ”Saátu xíniñúʼu ka̱ʼún ña̱yóʼo xíʼinna: ‘Nda̱a̱ ndáaka ta̱a ta̱ ñuu Israel á ta̱ ke̱e inka ñuu ta̱ ki̱xaa̱ íyo xíʼinndó, tá kúni̱ra so̱kóra iin kití tí koko* á nda̱a̱ ndáaka ña̱ʼa, 9 ta ná va̱ása ku̱ʼu̱nra xíʼinrí chí yéʼé tabernáculo nu̱ú Jehová, xíniñúʼu kuvira.

10 ”’Nda̱a̱ ni iin na̱ ñuu Israel á na̱ inka ñuu na̱ ki̱xaa̱ íyo xíʼinndó va̱ása xíniñúʼu kuxuna nda̱a̱ ni loʼo ni̱i̱,* chi tá ná keʼéna ña̱yóʼo kundasíi̱ kunii̱na ta sandíʼi-xa̱ʼíi̱na. 11 Saáchi ni̱i̱ kúú ña̱ táxi ña̱ táku na̱ yiví xíʼin ndiʼi nu̱ú kití. Yi̱ʼi̱ kúú ta̱ káʼa̱n xíʼinndó ndáa ki̱ʼva kuniñúʼundó ni̱i̱, ta xíniñúʼu ko̱so̱yávándóña nu̱ú altar ña̱ va̱ʼa ixakáʼnu-inii̱ xa̱ʼa̱ ku̱a̱chindó. Saáchi ni̱i̱ kúú ña̱ táxi ña̱ táku na̱ yiví á kití, ta ña̱ va̱ʼa ixakáʼnu-inii̱ xa̱ʼa̱ndó xíniñúʼu ko̱so̱yávándó ña̱yóʼo nu̱ú altar. 12 Xa̱ʼa̱ ña̱yóʼo ni̱ka̱ʼi̱n xíʼin na̱ israelita: “Nda̱a̱ ni iinndó va̱ása xíniñúʼu kuxundó ni̱i̱, ta nda̱a̱ ni iin na̱ inka ñuu na̱ ki̱xaa̱ íyo xíʼinndó va̱ása xíniñúʼu kuxuna ni̱i̱”.

13 ”’Tá iin na̱ israelita á iin na̱ inka ñuu na̱ ki̱xaa̱ íyo xíʼinndó xíkana xáʼnína kití ta ti̱inna iin kití yukú á iin saa tí kivi kuxuna, xíniñúʼu katana ni̱i̱rí ta xíʼin ñuʼú ndakasina sa̱táña. 14 Saáchi ni̱i̱ kúú ña̱ táxi ña̱ táku na̱ yiví á kití. Xa̱ʼa̱ ña̱kán kúú ña̱ ni̱ka̱ʼi̱n ña̱yóʼo xíʼin na̱ israelita: “Va̱ása kuxundó nda̱a̱ ni loʼo ni̱i̱, saáchi ni̱i̱ kúú ña̱ táxi ña̱ táku na̱ yiví á kití. Nda̱a̱ ndáaka na̱ ná kuxuña, xíniñúʼu kuvina”. 15 Tá iin na̱ ñuu Israel á na̱ inka ñuu ná kuxuna iin kití tí ni̱xi̱ʼi̱ tí nda̱ni̱ʼína á tí xa̱ʼní iin kití yukú, xíniñúʼu ndakatana ti̱ko̱to̱na ta kuchina ta koona na̱ yaku̱a̱* nda̱a̱ ná ki̱ʼvi ñu̱ʼu.* Tándi̱ʼi, saá ndundiina.* 16 Soo tá ná va̱ása ndakatana ti̱ko̱to̱na ta ná va̱ása kuchina, ndakuiinna xa̱ʼa̱ ku̱a̱china’”.

18 Jehová ni̱ka̱ʼa̱nkara xíʼin ta̱ Moisés ta ka̱chira: 2 “Ña̱yóʼo ka̱ʼún xíʼin na̱ israelita: ‘Yi̱ʼi̱ kúú Jehová Ndióxi̱ndó. 3 Kǒo keʼéndó nda̱a̱ táki̱ʼva kéʼé na̱ ñuu Egipto nu̱ú xi̱ndoondó. Ta kǒo keʼéndó nda̱a̱ táki̱ʼva kéʼé na̱ ñuu Canaán nu̱ú ku̱a̱ʼi̱n xíʼinndó kundoondó. Kǒo kundiku̱nndó costumbre ña̱ kúúmií na̱yóʼo. 4 Saxínundó chiñu ña̱ xáʼndai̱ nu̱úndó ta kundiku̱nndó ley ña̱ káʼi̱n xíʼinndó. Yi̱ʼi̱ kúú Jehová Ndióxi̱ndó. 5 Xíniñúʼu saxínundó chiñu ña̱ xáʼndai̱ nu̱úndó ta kundiku̱nndó ley ña̱ káʼi̱n xíʼinndó. Tá ná keʼéndó ña̱yóʼo, kutakundó. Yi̱ʼi̱ kúú Jehová.

6 ”’Nda̱a̱ ni iinndó kǒo ku̱su̱nndó xíʼin na̱ táʼanndó. Yi̱ʼi̱ kúú Jehová. 7 Va̱ása ku̱su̱ún xíʼin yiváún ta ni va̱ása ku̱su̱ún xíʼin siʼún. Saáchi siʼún kúú ñáyóʼo ta va̱ása xíniñúʼu ku̱su̱ún xíʼinñá.

8 ”’Va̱ása ku̱su̱ún xíʼin ñá síʼi yiváún, saáchi ña̱yóʼo sakúkaʼanña nu̱ú yiváún.

9 ”’Va̱ása ku̱su̱ún xíʼin ku̱ʼvaún ni kúúñá se̱ʼe yiváún á se̱ʼe siʼún, ni inkáchi veʼe ka̱kundó á inka veʼe ka̱kuñá.

10 ”’Tá se̱ʼeta̱ún íyo iin ñaʼá se̱ʼera á se̱ʼe-síʼún íyo iin ñaʼá se̱ʼeñá, va̱ása ku̱su̱ún xíʼin ñáyóʼo, saáchi ña̱yóʼo sakúkaʼanña nu̱ún.

11 ”’Va̱ása ku̱su̱ún xíʼin se̱ʼe ñá síʼi yiváún, saáchi se̱ʼe yiváún kúú ñáyóʼo ta ku̱ʼvaún kúúñá.

12 ”’Va̱ása ku̱su̱ún xíʼin ku̱ʼva yiváún. Saáchi táʼan yiváún kúú ñáyóʼo.

13 ”’Va̱ása ku̱su̱ún xíʼin ku̱ʼvi̱ siʼún, saáchi táʼan siʼún kúú ñáyóʼo.

14 ”’Va̱ása ku̱su̱ún xíʼin ñá síʼi ñani yiváún ña̱ va̱ʼa kǒo sakúkaʼún nu̱úra. Chi xixiún kúú ñáyóʼo.

15 ”’Va̱ása ku̱su̱ún xíʼin xa̱nuún. Saáchi ñá síʼi se̱ʼún kúú ñáyóʼo; va̱ása ku̱su̱ún xíʼinñá.

16 ”’Va̱ása ku̱su̱ún xíʼin ñá síʼi ñaniún, saáchi tá ná keʼún ña̱yóʼo sakúkaʼún nu̱ú ñaniún.

17 ”’Va̱ása ku̱su̱ún xíʼin iin ñaʼá ta saátu xíʼin se̱ʼe-síʼiñá á se̱ʼeñániñá, saáchi táʼanñá kúú náyóʼo. Ta iin ña̱ kininí kúú ña̱yóʼo tá ná keʼúnña.*

18 ”’Va̱ása tindaʼún xíʼin ku̱ʼvi̱ ñá síʼún, chi kanitáʼan náyóʼo, ta ni va̱ása ku̱su̱ún xíʼinñá tá tákuka ñá síʼún.

19 ”’Va̱ása ku̱su̱ún xíʼin iin ñaʼá ñá yaku̱a̱ xa̱ʼa̱ ña̱ núu ni̱i̱ñá.

20 ”’Va̱ása ku̱su̱ún xíʼin ñá síʼi inka ta̱a, chi tá ná keʼún ña̱yóʼo koún ta̱ yaku̱a̱.*

21 ”’Va̱ása kaʼníún* nda̱a̱ ni iin se̱ʼún nu̱ú ndióxi̱ ña̱ naní Mólek, chi tá ná keʼún ña̱yóʼo ixayaku̱a̱ún ki̱vi̱ Ndióxi̱ún. Yi̱ʼi̱ kúú Jehová.

22 ”’Va̱ása ku̱su̱ún xíʼin iin ta̱a nda̱a̱ táki̱ʼva kísi̱ún xíʼin iin ñaʼá. Iin ña̱ kininí kúú ña̱yóʼo.

23 ”’Nda̱a̱ ni iin ta̱a va̱ása xíniñúʼu ku̱i̱i̱nra xíʼin iin kití, saáchi kuyaku̱a̱ra tá ná keʼéra ña̱yóʼo. Ta nda̱a̱ ni iin ñaʼá va̱ása xíniñúʼu ku̱i̱i̱nñá xíʼin iin kití. Iin ña̱ kininí kúú ña̱yóʼo.

24 ”’Va̱ása keʼéndó ña̱yóʼo tasaá va̱ása kuyaku̱a̱ndó chi ña̱yóʼo kúú ña̱ kéʼé na̱ inka ñuu, ña̱kán ku̱yaku̱a̱na ta tavái̱na nu̱úndó. 25 Xa̱ʼa̱ ña̱kán ku̱yaku̱a̱ ñuʼú yóʼo ta ndakiʼinna castigo xa̱ʼa̱ ña̱ ke̱ʼéna, ta keena nu̱ú ñuʼú nu̱ú ndóona. 26 Soo ndóʼó xíniñúʼu saxínundó chiñu ña̱ xáʼndai̱ nu̱úndó ta keʼéndó ña̱ káʼa̱n ley ña̱ táxii̱ ndaʼa̱ndó, ni miíndó ni na̱ inka ñuu na̱ ki̱xaa̱ ndóo xíʼinndó va̱ása xíniñúʼu keʼéndó ña̱ʼa ña̱ kininí ña̱ kéʼé na̱ ñuu yóʼo. 27 Saáchi tá kúma̱níka kundoondó nu̱ú ñuʼú ña̱ taxii̱ ndaʼa̱ndó, na̱ yiví na̱ xi̱ndoo nu̱úña kúú na̱ ke̱ʼé ña̱ʼa ña̱ kininí yóʼo, xa̱ʼa̱ ña̱yóʼo ku̱yaku̱a̱ña. 28 Xa̱ʼa̱ ña̱kán, tá ná keʼéndó ña̱yóʼo, keendó nu̱ú ñuʼú nda̱a̱ táki̱ʼva kee na̱ ñuu na̱ ndóo nu̱ú ña̱yóʼo. 29 Saáchi ndiʼi na̱ ná keʼé ña̱ʼa ña̱ kininí yóʼo, xíniñúʼu kuvina. 30 Ndóʼó xíniñúʼu kundiku̱nndó ña̱ káʼi̱n xíʼinndó ta va̱ása kundiku̱nndó costumbre ña̱ kininí ña̱ xi̱keʼé na̱ yiví kán, tasaá va̱ása kuyaku̱a̱ndó. Yi̱ʼi̱ kúú Jehová Ndióxi̱ndó’”.

19 Jehová ni̱ka̱ʼa̱n tukura xíʼin ta̱ Moisés, ta ña̱yóʼo ni̱ka̱ʼa̱nra xíʼinra: 2 “Ña̱yóʼo ka̱ʼún xíʼin ndiʼi na̱ ñuu Israel: ‘Xíniñúʼu koondó na̱ yi̱i̱ saáchi yi̱ʼi̱ Jehová Ndióxi̱ndó, ta̱ yi̱i̱ kúi̱.

3 ”’Iin tá iinndó xíniñúʼu ixato̱ʼóndó siʼíndó xíʼin yivándó, ta xíniñúʼu ixato̱ʼóndó ley ña̱ ta̱xii̱ ndaʼa̱ndó xa̱ʼa̱ ki̱vi̱ sábado. Yi̱ʼi̱ kúú Jehová Ndióxi̱ndó. 4 Va̱ása ndasakáʼnundó ndióxi̱ ña̱ kǒo ndáyáʼvi, ni va̱ása keʼéndó ndióxi̱ ña̱ kúva̱ʼa xíʼin ka̱a ña̱ ndasakáʼnundóña. Yi̱ʼi̱ kúú Jehová Ndióxi̱ndó.

5 ”’Tá ná so̱kóndó iin kití nu̱ú* Jehová ña̱ va̱ʼa ndakutáʼan viíndó xíʼinra, viíní xíniñúʼu so̱kóndórí ña̱ va̱ʼa kandíxara ndakiʼinrarí. 6 Mií ki̱vi̱ ña̱ ná kuvirí xíniñúʼu kuxundórí ta saátu tá ná ya̱ʼa inka ki̱vi̱, soo tá ni̱ya̱ʼa u̱ni̱ ki̱vi̱ ta ni̱ndo̱oka ku̱ñu tíyóʼo, xíniñúʼu kaʼmindóña. 7 Soo tá ni̱ya̱ʼa u̱ni̱ ki̱vi̱ ta xi̱xindó ku̱ñu kití tí ni̱so̱kóndó, iin ña̱ kininí kúú ña̱yóʼo ta va̱ása kandíxa Ndióxi̱ ndakiʼinra tíyóʼo. 8 Na̱ ná kuxu ku̱ñu yóʼo ndakuiinna xa̱ʼa̱ ku̱a̱china, saáchi kǒo ní ixato̱ʼóna ña̱ yi̱i̱ ña̱ kúú kuenta Jehová; na̱ yiví yóʼo xíniñúʼu kuvina.

9 ”’Tá ná sakéún, va̱ása ndakayaún ña̱ íyo yuʼú ñuʼú nu̱ú chi̱ʼún, ni va̱ása ndakayaún ña̱ ki̱ndoo nu̱ú chi̱ʼún. 10 Va̱ása ndakayaún uva tí ki̱ndoo nu̱ú chi̱ʼúnrí, ná kindo̱o tíyóʼo ndakaya na̱ ndáʼvi ta saátu na̱ inka ñuu na̱ ki̱xaa̱ íyo xíʼinndó. Yi̱ʼi̱ kúú Jehová Ndióxi̱ndó.

11 ”’Va̱ása ixakuíʼnandó, va̱ása ka̱ʼa̱nndó ña̱ vatá* ta va̱ása sandáʼvi-táʼanndó. 12 Va̱ása kuniñúʼundó ki̱víi̱ ña̱ chinaʼándó* xa̱ʼa̱ iin ña̱ vatá, saáchi tá ná keʼéndó ña̱yóʼo na̱ʼa̱ndó ña̱ kǒo íxato̱ʼóndó ki̱vi̱ Ndióxi̱ndó. Yi̱ʼi̱ kúú Jehová. 13 Va̱ása sandáʼviún inkana ña̱ kindaún ña̱ʼa ña̱ kúúmiína ta ni va̱ása ixakuíʼnaún. Xíniñúʼu chaʼviún na̱ káchíñu nu̱ún mií ki̱vi̱ ña̱ ka̱chíñuna nu̱ún, va̱ása xíniñúʼu chaʼviúnna nda̱a̱ inka ki̱vi̱.

14 ”’Va̱ása sakúisochiʼñaún* iin na̱ sóʼó, ta ni va̱ása chindúʼún iin ña̱ʼa ña̱ kivi sandákava na̱ kúáa,* ta ixato̱ʼún Ndióxi̱ún. Yi̱ʼi̱ kúú Jehová.

15 ”’Nda̱kúní ndatiinndó ku̱a̱chi. Tá ndátiinndó ku̱a̱chi xíʼin iin na̱ ndáʼvi, su̱ví xa̱ʼa̱ ña̱ kúúna na̱ ndáʼvi xíniñúʼu viíka ndatiinndó ku̱a̱chi xíʼinna á xa̱ʼa̱ ña̱ kúúna na̱ ku̱i̱ká viíka ndatiinndó ku̱a̱chi xíʼinna. Nda̱kúní ndatiinndó ku̱a̱chi xíʼin ndiʼina.

16 ”’Va̱ása ka̱ʼún tu̱ʼun síkí xa̱ʼa̱ inkana. Va̱ása keʼún nda̱a̱ ni iin ña̱ʼa ña̱ kivi kaʼní inkana. Yi̱ʼi̱ kúú Jehová.

17 ”’Va̱ása sa̱a̱-iniún kuniún ñanitáʼún. Tá xi̱niún ña̱ iinna ni̱ki̱ʼvina ku̱a̱chi xíniñúʼu ka̱ʼún xíʼinna xa̱ʼa̱ ña̱ va̱ása va̱ʼa ke̱ʼéna, tasaá va̱ása kuisoún ku̱a̱chi xíʼinna.

18 ”’Tá iin na̱ ñuún ke̱ʼéna ña̱ va̱ása va̱ʼa xíʼún, va̱ása keʼún xíʼinna nda̱a̱ táki̱ʼva ke̱ʼéna xíʼún ni va̱ása sa̱a̱-iniún kuniúnna, ta kuʼvi̱-iniún kuniúnna nda̱a̱ táki̱ʼva kúʼvi̱-iniún xíniún miíún. Yi̱ʼi̱ kúú Jehová.

19 ”’Xíniñúʼu kundiku̱nndó ley ña̱ táxii̱ ndaʼa̱ndó: va̱ása sakúii̱nndó u̱vi̱ kití sa̱na̱ndó tá xa̱a̱ síín síín raza tíyóʼo; va̱ása ndasakándó u̱vi̱ nu̱ú si̱ʼva̱ tá ná chiʼindó nu̱ú ñuʼúndó, ta ni va̱ása kundixindó iin ti̱ko̱to̱ ña̱ ku̱vaʼa xíʼin u̱vi̱ nu̱ú yi̱ʼva̱.

20 ”’Tá iin ta̱a ni̱ki̱si̱ra xíʼin iin ñaʼá ta xa̱a̱ íyo iin ta̱a ta̱ ki̱ndoo ndasatá ñáyóʼo, soo ta̱ʼán ndasatárañá á ni ta̱ʼán sa̱ñáñá, u̱vi̱ saána xíniñúʼu ndakiʼinna castigo. Soo va̱ása xíniñúʼu kuvina chi ta̱ʼán sa̱ñáví ñá ñaʼá yóʼo. 21 Ta̱yóʼo xíniñúʼu kuniʼira ña̱ so̱kóra nu̱ú Jehová xa̱ʼa̱ ña̱ ke̱ʼéra ña̱ va̱ása va̱ʼa ta ku̱ʼu̱nra xíʼinña chí yéʼé tabernáculo: xíniñúʼu kuniʼira iin ndikachi* che̱e tí so̱kóra xa̱ʼa̱ ña̱ ke̱ʼéra ña̱ va̱ása va̱ʼa. 22 Ta tí ndikachi che̱e tí kuniʼira ña̱ so̱kóra xa̱ʼa̱ ña̱ ke̱ʼéra ña̱ va̱ása va̱ʼa kúú tí kuniñúʼu ta̱ su̱tu̱ ña̱ va̱ʼa ná ixakáʼnu-ini Jehová xa̱ʼa̱ra. Ta ixakáʼnuva-inira xa̱ʼa̱ ku̱a̱chi ña̱ ni̱ki̱ʼvi ta̱yóʼo.

23 ”’Tá ná ki̱ʼvindó nu̱ú ñuʼú ña̱ taxii̱ ndaʼa̱ndó ta tá ná chiʼindó iin yitu̱n tú táxi ku̱i̱ʼi, tí yaku̱a̱ xíniñúʼu koo tíyóʼo nu̱úndó. Ta u̱ni̱ ku̱i̱ya̱ kúú ña̱ va̱ása kaxíndórí. 24 Soo tá ná xi̱nu ku̱mí ku̱i̱ya̱, ndiʼi ku̱i̱ʼi tí taxi túyóʼo tí yi̱i̱ koorí, ta kusi̱íní-inindó tá ná taxindó tíyóʼo ndaʼa̱ Jehová. 25 Soo tá ná xi̱nu u̱ʼu̱n ku̱i̱ya̱, saá kivi kaxíndó ku̱i̱ʼi yóʼo; tasaá nduku̱a̱ʼáníka ña̱ chiʼindó. Yi̱ʼi̱ kúú Jehová Ndióxi̱ndó.

26 ”’Va̱ása kuxundó nda̱a̱ ni iin ña̱ʼa ña̱ kúúmií ni̱i̱.

’”Va̱ása ku̱ʼu̱nndó nu̱ú na̱ xíto ña̱ kuu chí nu̱únínu, ni va̱ása keʼéndó magia.

27 ”’Va̱ása xa̱tándó ixí* ña̱ íyo xa̱ʼa̱ so̱ʼondó, ta ni va̱ása kaʼndandó nu̱ú ixí yuʼúndó.

28 ”’Va̱ása kaʼndandó ku̱ñundó xa̱ʼa̱ ña̱ ni̱xi̱ʼi̱ iin na̱ yiví, ta ni va̱ása sanánandó tatuaje ñii̱ndó. Yi̱ʼi̱ kúú Jehová.

29 ”’Va̱ása sakúkaʼún nu̱ú se̱ʼún ña̱ ndasaúnñá ñá kísi̱ xíʼin ku̱a̱ʼá ta̱a, chi tá ná keʼún ña̱yóʼo ku̱a̱ʼánítuna kuni̱na keʼéna ña̱yóʼo, ta kutú nu̱ú ñuʼú yóʼo xíʼin ña̱ kini.

30 ”’Ixato̱ʼóndó ley ña̱ ta̱xii̱ ndaʼa̱ndó xa̱ʼa̱ ki̱vi̱ sábado, ta ixato̱ʼóníndó nu̱ú íyoi̱. Yi̱ʼi̱ kúú Jehová.

31 ”’Va̱ása ku̱ʼu̱nndó nu̱ú na̱ káʼa̱n ña̱ kivi ka̱ʼa̱nna xíʼin na̱ ni̱xi̱ʼi̱ ta ni va̱ása ku̱ʼu̱nndó nu̱ú na̱ ndáku* ña̱ chindeétáʼanna xíʼinndó, chi tá ná keʼéndó ña̱yóʼo koondó na̱ yaku̱a̱. Yi̱ʼi̱ kúú Jehová Ndióxi̱ndó.

32 ”’Xíniñúʼu ndakundichiún ta chindeún* na̱ xa̱a̱ ku̱chée, na̱ xa̱a̱ ku̱yaa ixí xi̱ní ta xíniñúʼu ixato̱ʼúnna, ta saátu xíniñúʼu ixato̱ʼún Ndióxi̱ún. Yi̱ʼi̱ kúú Jehová.

33 ”’Tá ndóo na̱ inka ñuu xíʼinndó va̱ása ixandi̱va̱ʼandó xíʼinna. 34 Ni na̱ inka ñuu kúúna, xíniñúʼu kotondóna nda̱a̱ táki̱ʼva íyo na̱ ñuu miíndó, ta xíniñúʼu kuʼvi̱-inindó kunindóna nda̱a̱ táki̱ʼva kúʼvi̱-inindó xínindó miíndó, saáchi na̱ inka ñuu xi̱kuutu miíndó tá xi̱ndoondó chí ñuu Egipto. Yi̱ʼi̱ kúú Jehová Ndióxi̱ndó.

35 ”’Va̱ása sandáʼvindó tá ná tavándó ki̱ʼva ña̱ káni̱ iin ña̱ʼa, tá ná chuʼunndóña á tá ná katandóña. 36 Viíní xíniñúʼu koo ki̱ʼva ña̱ chúʼunndó ña̱ʼa ña̱ yi̱chí* á nduta̱.* Yi̱ʼi̱ kúú Jehová Ndióxi̱ndó ta̱ ta̱vá ndóʼó chí ñuu Egipto. 37 Kundiku̱nndó ndiʼi chiñu ña̱ xáʼndai̱ nu̱úndó xíʼin ley ña̱ táxii̱ ndaʼa̱ndó, ta kandíxandóña. Yi̱ʼi̱ kúú Jehová’”.

20 Jehová ni̱ka̱ʼa̱nkara xíʼin ta̱ Moisés: 2 “Xíniñúʼu ka̱ʼún ña̱yóʼo xíʼin na̱ israelita: ‘Nda̱a̱ ndáaka ta̱a ta̱ ñuu Israel á nda̱a̱ ndáaka na̱ ke̱e inka ñuu na̱ ki̱xaa̱ ndóo xíʼinndó, tá ná kaʼnína se̱ʼena nu̱ú ndióxi̱ ña̱ naní Mólek, xíniñúʼu kuvina. Na̱ ñuu xíniñúʼu kuunna yu̱u̱ na̱yóʼo nda̱a̱ ná kuvina. 3 Sa̱a̱níi̱ xíʼin na̱yóʼo ta sandíʼi-xa̱ʼíi̱na, saáchi xa̱ʼnína se̱ʼena nu̱ú ndióxi̱ ña̱ naní Mólek ta i̱xayaku̱a̱na nu̱ú íyoi̱ ta saátu kǒo ní ixato̱ʼóna ki̱víi̱ ña̱ yi̱i̱. 4 Tá xíto na̱ ñuu ña̱ xáʼní na̱yóʼo se̱ʼena nu̱ú ndióxi̱ ña̱ naní Mólek ta kǒo ña̱ káʼa̱nna xíʼinna ni va̱ása xáʼnínana, 5 yi̱ʼi̱ sa̱a̱níi̱ xíʼin na̱ ke̱ʼé ña̱yóʼo ta saátu xíʼin na̱ veʼena, ta sandíʼi-xa̱ʼíi̱na xíʼin ndiʼi na̱ ndásakáʼnu ndióxi̱ ña̱ naní Mólek.*

6 ”’Na̱ yiví na̱ va̱ása nda̱kú íyo ini xíʼi̱n saáchi ku̱a̱ʼa̱nna nu̱ú na̱ káʼa̱n ña̱ kivi ka̱ʼa̱nna xíʼin na̱ ni̱xi̱ʼi̱ ta saátu ku̱a̱ʼa̱nna nu̱ú na̱ ndáku,* sa̱a̱níi̱ xíʼinna ta sandíʼi-xa̱ʼíi̱na.

7 ”’Ndóʼó, xíniñúʼu ndasandiindó* miíndó ta koondó na̱ yi̱i̱, saáchi yi̱ʼi̱ kúú Jehová Ndióxi̱ndó. 8 Ta xíniñúʼu kundiku̱nndó chiñu ña̱ xáʼndai̱ nu̱úndó ta saxínundóña. Yi̱ʼi̱ kúú Jehová ta̱ ndásayi̱i̱ ndóʼó.

9 ”’Tá iin ta̱a sákuisochiʼñara* yivára á siʼíra, xíniñúʼu kuvira. Ta ku̱a̱chi miíra kúú ña̱ kuvira. Saáchi sa̱kúisochiʼñara yivára á siʼíra.

10 ”’Tá iin ta̱a kísi̱ra xíʼin ñá síʼi inka ta̱a, xíniñúʼu kuvira. Xíniñúʼu kuvi ta̱ ta̱a yóʼo ta saátu mií ñá ñaʼá. 11 Tá iin ta̱a kísi̱ra xíʼin ñá síʼi yivára, sákúkaʼanra nu̱ú yivára. U̱vi̱ saána xíniñúʼu kuvi. Miína kúúmií ku̱a̱chi xa̱ʼa̱ ña̱ kuvina. 12 Tá iin ta̱a kísi̱ra xíʼin xa̱nura, u̱vi̱ saána xíniñúʼu kuvi. Saáchi iin ña̱ kininí kúú ña̱yóʼo. Miína kúúmií ku̱a̱chi xa̱ʼa̱ ña̱ kuvina.

13 ”’Tá iin ta̱a kísi̱ra xíʼin inka ta̱a nda̱a̱ táki̱ʼva kísi̱ra xíʼin iin ñaʼá, u̱vi̱ saána ke̱ʼéna iin ña̱ kininí.* Xíniñúʼu kuvina. Miína kúúmií ku̱a̱chi xa̱ʼa̱ ña̱ kuvina.

14 ”’Tá iin ta̱a kísi̱ra xíʼin iin ñaʼá ta saátu xíʼin siʼíñá. Iin ña̱ kininí kúú ña̱yóʼo. Xíniñúʼu kaʼmindó miíra ta saátu náyóʼo tasaá va̱ása kooka na̱ kéʼé ña̱ kini.

15 ”’Tá iin ta̱a xíi̱nra xíʼin iin kití, xíniñúʼu kuvira ta xíniñúʼu kaʼníndó kití yóʼo. 16 Tá iin ñaʼá xíi̱nñá xíʼin iin kití, xíniñúʼu kaʼníndó ñá ñaʼá yóʼo ta saátu tí kití yóʼo. Nda̱a̱ ndáaka na̱ ná keʼé ña̱yóʼo, ku̱a̱chi miívana kooña tá ná kuvina.

17 ”’Tá iin ta̱a kísi̱ra xíʼin ku̱ʼvara ni kúúñá se̱ʼe yivára á se̱ʼe siʼíra, iin ña̱ kaʼanní nu̱ú kúú ña̱yóʼo. Xíniñúʼu koto ndiʼi na̱ ñuu Israel tá ná kaʼnína na̱yóʼo. Saáchi ta̱yóʼo sa̱kúkaʼanra nu̱ú ku̱ʼvara. Xíniñúʼu ndakuiinra xa̱ʼa̱ ku̱a̱chira.

18 ”’Tá iin ta̱a kísi̱ra xíʼin iin ñaʼá tá núu ni̱i̱ñá, u̱vi̱ saána náʼa̱na ña̱ va̱ása íxato̱ʼóna ni̱i̱ chi ña̱ yi̱i̱ kúú ña̱yóʼo. U̱vi̱ saána xíniñúʼu kuvina.

19 ”’Va̱ása ku̱su̱ún xíʼin ku̱ʼvi̱ siʼún ni xíʼin ku̱ʼva yiváún saáchi ña̱yóʼo sákukaʼanña nu̱ú na̱ táʼún. U̱vi̱ saá na̱yóʼo ndakuiinna xa̱ʼa̱ ku̱a̱china. 20 Ta̱a ta̱ kísi̱ xíʼin ñá síʼi xitora, sákukaʼanra nu̱ú xitora. U̱vi̱ saá na̱yóʼo xíniñúʼu ndakuiinna xa̱ʼa̱ ku̱a̱china. Na̱yóʼo kuvina ta va̱ása koo se̱ʼena. 21 Tá iin ta̱a tíndaʼa̱ra xíʼin ñá síʼi ñanira,* iin ña̱ kininí kúú ña̱yóʼo. Ta̱yóʼo sa̱kúkaʼanra nu̱ú ñanira. Va̱ása koo se̱ʼena.

22 ”’Kundiku̱nndó ndiʼi chiñu ña̱ xáʼndai̱ nu̱úndó xíʼin ley ña̱ táxii̱ ndaʼa̱ndó ta saxínundóña, tasaá va̱ása keendó nu̱ú ñuʼú nu̱ú ku̱a̱ʼi̱n xíʼinndó kundoondó. 23 Kǒo kundiku̱nndó costumbre ña̱ kúúmií na̱ ñuu na̱ tavái̱ nu̱ú ku̱ʼu̱nndó kundoondó, saáchi kininí íyo ña̱ kéʼé na̱yóʼo ta kúkininí-inii̱ xínii̱na. 24 Ña̱kán kúú ña̱ ni̱ka̱ʼi̱n ña̱yóʼo xíʼinndó: “Ndóʼó kúú na̱ kindo̱o xíʼin ñuʼú na̱ ñuu kán ta taxii̱ña ña̱ kooña kuentandó, iin ñuʼú nu̱ú íyoní leche xíʼin ñu̱ñú kúúña. Yi̱ʼi̱ kúú Jehová Ndióxi̱ndó, ta̱ nda̱kaxin ndóʼó nu̱ú na̱ inka ñuu”. 25 Xíniñúʼu kunda̱a̱-inindó ndáa kití kúú tí yaku̱a̱ ta ndáa kití kúú tí va̱ása yaku̱a̱, ndáa saa kúú tí yaku̱a̱ ta ndáa saa kúú tí va̱ása yaku̱a̱. Va̱ása sakúyaku̱a̱ndó miíndó xa̱ʼa̱ ña̱ kuxundó iin kití, iin saa á nda̱a̱ ndáaka kití tí ñúu* mií tí ni̱ka̱ʼi̱n xíʼinndó ña̱ kúúrí tí yaku̱a̱. 26 Xíniñúʼu koondó na̱ yi̱i̱ saáchi yi̱ʼi̱ Jehová, ta̱ yi̱i̱ kúi̱. Ndáka̱xii̱n ndóʼó nu̱ú na̱ inka ñuu ña̱ koondó kuenta miíi̱.

27 ”’Nda̱a̱ ndáaka ta̱a á nda̱a̱ ndáaka ñaʼá na̱ káʼa̱n ña̱ kivi ka̱ʼa̱nna xíʼin na̱ ni̱xi̱ʼi̱ á kúúna na̱ ndáku, xíniñúʼu kuvina. Na̱ ñuu xíniñúʼu kuunna yu̱u̱ na̱yóʼo nda̱a̱ ná kuvina. Miína kúúmií ku̱a̱chi xa̱ʼa̱ ña̱ kuvina’”.

21 Jehová ni̱ka̱ʼa̱ntura xíʼin ta̱ Moisés: “Ka̱ʼa̱n xíʼin na̱ su̱tu̱, na̱ se̱ʼe ta̱ Aarón: ‘Nda̱a̱ ni iin na̱ su̱tu̱ va̱ása xíniñúʼu tiinna iin na̱ ñuuna na̱ ni̱xi̱ʼi̱, chi tá ná keʼéna ña̱yóʼo kuyaku̱a̱na. 2 Soo kiviva tiinna iin na̱ táʼan yatinna tá ni̱xi̱ʼi̱na, tá kúú: siʼína, yivána, se̱ʼeta̱ana, se̱ʼe-síʼina á ñanina, 3 saátu kivi tiinna ku̱ʼvana ñá íyo yatin xíʼinna tá ñá kúa̱an kúúñá. 4 Va̱ása xíniñúʼu tiinna ñá síʼi inka ta̱a tá ni̱xi̱ʼi̱ñá, chi tá ná keʼéna ña̱yóʼo kuyaku̱a̱vana.* 5 Na̱yóʼo va̱ása xíniñúʼu xa̱tána xi̱nína, ni va̱ása xíniñúʼu kaʼndana nu̱ú ixí* yuʼúna ta ni va̱ása xíniñúʼu kaʼndana ku̱ñuna. 6 Na̱ yi̱i̱ xíniñúʼu koo na̱yóʼo nu̱ú Ndióxi̱na ta va̱ása xíniñúʼu ixayaku̱a̱na ki̱vi̱ Ndióxi̱na, saáchi na̱yóʼo kúú na̱ sóko̱ ña̱ʼa* ta xáʼminaña nu̱ú Jehová, sóko̱na ña̱ʼa nu̱ú Ndióxi̱na. Xíniñúʼu koona na̱ yi̱i̱. 7 Va̱ása xíniñúʼu tindaʼa̱na xíʼin iin ñaʼá ñá kísi̱ xíʼin ku̱a̱ʼání ta̱a á iin ñaʼá ñá xa̱a̱ ni̱ki̱si̱ xíʼin iin ta̱a á iin ñaʼá ñá ni̱xi̱yo yii̱ soo sa̱ndákootáʼanna, saáchi na̱ su̱tu̱ na̱ yi̱i̱ kúúna nu̱ú Ndióxi̱. 8 Xíniñúʼu ndasayi̱únna saáchi na̱yóʼo kúú na̱ sóko̱ ña̱ʼa nu̱úi̱. Na̱ yi̱i̱ xíniñúʼu koo na̱yóʼo saáchi yi̱ʼi̱ Jehová, ta̱ ndásayi̱i̱ ndóʼó, ta̱ yi̱i̱ kúi̱.

9 ”’Soo tá iin se̱ʼe ta̱ su̱tu̱, ki̱xáʼañá kísi̱ñá xíʼin ku̱a̱ʼání ta̱a, xa̱ʼa̱ ña̱ kéʼéñá ña̱yóʼo íxayaku̱a̱ñá yiváñá. Xíniñúʼu kaʼminañá.

10 ”’Ta̱ kúú su̱tu̱ káʼnu nu̱ú na̱ su̱tu̱, ta̱ sa̱káana aceite tá yi̱i̱ xi̱ní ta nda̱kaxinnara ña̱ kundixira ti̱ko̱to̱ ña̱ xíndixi ta̱ su̱tu̱, va̱ása xíniñúʼu taxira kutaka̱ xi̱níra ta ni va̱ása xíniñúʼu ndatára ti̱ko̱to̱ra. 11 Va̱ása xíniñúʼu kuyatinra nu̱ú nda̱a̱ ni iin na̱ yiví na̱ ni̱xi̱ʼi̱. Ni va̱ása xíniñúʼu kuyatinra nu̱ú yivára á siʼíra tá ni̱xi̱ʼi̱na, chi tá ná keʼéra ña̱yóʼo kuyaku̱a̱ra. 12 Va̱ása xíniñúʼu kitara nu̱ú íyo Ndióxi̱ ta ni va̱ása xíniñúʼu ixayaku̱a̱ra nu̱ú íyo Ndióxi̱, saáchi aceite tá yi̱i̱ tá sa̱káana xi̱níra kúú tá náʼa̱ ña̱ nda̱taxira miíra ndaʼa̱ Ndióxi̱ra. Yi̱ʼi̱ kúú Jehová.

13 ”’Ta̱yóʼo xíniñúʼu tindaʼa̱ra xíʼin iin ñá kúa̱an. 14 Va̱ása xíniñúʼu tindaʼa̱ra xíʼin iin ñá xa̱a̱ ni̱xi̱ʼi̱ yii̱, ni iin ñá xa̱a̱ ni̱xi̱yo yii̱ soo sa̱ndákootáʼanna, ni iin ñá xa̱a̱ ni̱ki̱si̱ xíʼin iin ta̱a á iin ñá kísi̱ xíʼin ku̱a̱ʼání ta̱a, saáchi xíniñúʼu tindaʼa̱ra xíʼin iin ñá kúa̱an ñá íyo ñuura. 15 Va̱ása xíniñúʼu ixayaku̱a̱ra na̱ se̱ʼera saáchi yi̱ʼi̱ Jehová, kúú ta̱ ndásayi̱i̱ miíra’”.

16 Jehová ni̱ka̱ʼa̱nkara xíʼin ta̱ Moisés, ta ka̱chira: 17 “Ka̱ʼa̱n xíʼin ta̱ Aarón: ‘Tá ná nduchiʼña iin se̱ʼún na̱ kaku chí nu̱únínu, va̱ása kivi kuyatinna ña̱ so̱kóna ña̱ʼa nu̱ú* Ndióxi̱. 18 Va̱ása kivi kuyatin nda̱a̱ ni iin ta̱a nu̱ú altar tá ndu̱chiʼñara, tá kúú: iin ta̱a ta̱ kúáa,* ta̱ va̱ása kívi kaka, ta̱ ndu̱chiʼña nu̱ú, ta̱ ku̱káni̱ iin ndaʼa̱ á xa̱ʼa̱, 19 ta̱ ni̱ta̱ʼnu̱ xa̱ʼa̱ á ta̱ ni̱ta̱ʼnu̱ ndaʼa̱, 20 iin ta̱ ku̱toso sa̱tá, á iin ta̱ va̱ása níxaʼnu,* ta̱ kúúmií iin kue̱ʼe̱ nduchúnu̱ú, ta̱ ka̱na ndi̱ʼi kúáʼa ñii̱, ta̱ kúúmií kue̱ʼe̱ ñii̱ á ta̱ ndi̱ʼi-xa̱ʼa̱ ndi̱vi̱.* 21 Nda̱a̱ ni iin na̱ se̱ʼe ta̱ su̱tu̱ Aarón na̱ ndu̱chiʼña va̱ása kivi kuyatinna nu̱ú Jehová ña̱ so̱kóna ña̱ʼa nu̱úra ta kaʼminaña. Xa̱ʼa̱ ña̱ ndu̱chiʼñana va̱ása kivi kuyatinna nu̱ú Ndióxi̱ ña̱ so̱kóna ña̱ʼa nu̱úra. 22 Kivi kuxuna ña̱ sóko̱na nu̱ú Ndióxi̱, ña̱ yi̱i̱ní ta saátu ña̱ yi̱i̱. 23 Soo va̱ása kivi ku̱ʼu̱nna yatin nu̱ú tíkaa cortina ta ni va̱ása kivi kuyatinna nu̱ú níndichi altar, saáchi na̱ ndu̱chiʼña kúúna. Va̱ása xíniñúʼu ixayaku̱a̱na nu̱ú íyoi̱, saáchi yi̱ʼi̱ kúú Jehová ta̱ ndásayi̱i̱ ndóʼó’”.

24 Xa̱ʼa̱ ña̱kán, ta̱ Moisés ni̱ka̱ʼa̱nra ña̱yóʼo xíʼin ta̱ Aarón xíʼin na̱ se̱ʼera ta saátu xíʼin ndiʼi na̱ ñuu Israel.

22 Jehová ni̱ka̱ʼa̱n tukura xíʼin ta̱ Moisés, ta ka̱chira: 2 “Ka̱ʼa̱n xíʼin ta̱ Aarón ta saátu xíʼin na̱ se̱ʼera ña̱ ná kiʼinna kuenta xíʼin ña̱ʼa ña̱ yi̱i̱ ña̱ táxi na̱ israelita ña̱ ndásayi̱i̱na ta sóko̱na nu̱úi̱, ta ná va̱ása ixayaku̱a̱na ki̱víi̱ ña̱ yi̱i̱. Yi̱ʼi̱ kúú Jehová. 3 Ña̱yóʼo ka̱ʼún xíʼinna: ‘Nda̱a̱ ndáaka se̱ʼendó na̱ kaku chí nu̱únínu, tá ku̱yaku̱a̱na* ta ku̱yatinna nu̱ú ña̱ʼa ña̱ yi̱i̱ ña̱ nda̱sayi̱i̱ na̱ israelita nu̱ú Jehová, na̱ yiví yóʼo xíniñúʼu kuvina. Yi̱ʼi̱ kúú Jehová. 4 Nda̱a̱ ni iin na̱ se̱ʼe ta̱ Aarón na̱ kúúmií lepra á na̱ kúúmií kue̱ʼe̱ ña̱ xíta̱ nduta̱na nu̱ú tátálásana,* va̱ása kívi kuxuna ña̱ʼa ña̱ yi̱i̱ nda̱a̱ ná ndundiina.* Ta saátu ta̱ ti̱in iin na̱ ku̱yaku̱a̱ xa̱ʼa̱ ña̱ ti̱inna iin na̱ ni̱xi̱ʼi̱, va̱ása kivi kuxura ña̱yóʼo ni ta̱ xíta̱ nduta̱, 5 ni ta̱ ná tiin iin kití tí yaku̱a̱ tí iin tiʼvi kítáʼan xíka, ni ta̱ ná tiin iin ta̱a ta̱ yaku̱a̱ ta xa̱ʼa̱ ña̱yóʼo ku̱yaku̱a̱ra. 6 Nda̱a̱ ndáaka na̱ ná tiin ña̱yóʼo kuyaku̱a̱na nda̱a̱ ná ki̱ʼvi ñu̱ʼu,* ta va̱ása kivi kuxuna ña̱ʼa ña̱ yi̱i̱ nda̱a̱ ná kuchina. 7 Tá ná ki̱ʼvi ñu̱ʼu, saá kúú ña̱ ndundiina ta tándi̱ʼi kivi kuxuna ña̱ʼa ña̱ yi̱i̱, saáchi ña̱yóʼo kúú kuentana. 8 Ta saátu va̱ása xíniñúʼu kuxuna nda̱a̱ ni iin kití tí nda̱ni̱ʼína tí ni̱xi̱ʼi̱ á tí xa̱ʼní iin kití yukú, saáchi tá ná keʼéna ña̱yóʼo, kuyaku̱a̱na. Yi̱ʼi̱ kúú Jehová.

9 ”’Na̱yóʼo, xíniñúʼu saxínuna chiñu ña̱ xáʼndai̱ nu̱úna tasaá va̱ása ki̱ʼvina ku̱a̱chi xa̱ʼa̱ ña̱ va̱ása nísaxínuna ña̱yóʼo, ta va̱ása kuvina xa̱ʼa̱ ña̱ i̱xayaku̱a̱na ña̱ʼa ña̱ yi̱i̱. Yi̱ʼi̱ kúú Jehová, ta̱ ndásayi̱i̱ ndóʼó.

10 ”’Nda̱a̱ ni iin na̱ yiví na̱ va̱ása kúúmií nda̱yí* ña̱ kuxuna ña̱ʼa ña̱ yi̱i̱, va̱ása xíniñúʼu kuxunaña. Nda̱a̱ ni iin na̱ inka ñuu na̱ ki̱xaa̱ íyo xíʼin ta̱ su̱tu̱ á na̱ káchíñu táti̱,* va̱ása kivi kuxuna iin ña̱ʼa ña̱ yi̱i̱. 11 Soo tá iin ta̱ su̱tu̱ sátára* iin na̱ yiví xíʼin xu̱ʼún miíra, na̱ yiví yóʼo kivi kuxuna ña̱ yi̱i̱. Ta na̱ káchíñundáʼvi nu̱úra na̱ ka̱ku veʼera, kiviva kuxuna ña̱ xíxira. 12 Tá se̱ʼe-síʼi iin ta̱ su̱tu̱ ná tindaʼa̱ñá xíʼin iin ta̱ va̱ása kúú su̱tu̱, ñáyóʼo va̱ása kivi kuxuñá ña̱ʼa ña̱ yi̱i̱ ña̱ ni̱so̱kó* na̱ ñuu. 13 Tá se̱ʼe-síʼi iin ta̱ su̱tu̱ ni̱xi̱ʼi̱ yiíñá á nda̱kootáʼanna ta kǒo se̱ʼeñá níkaku ta nda̱ndikóñá veʼe yiváñá, ñáyóʼo kivi kuxuñá ña̱ xíxi yiváñá. Soo na̱ va̱ása kúúmií nda̱yí* ña̱ kuxuna ña̱ʼa ña̱ yi̱i̱, va̱ása xíniñúʼu kuxunaña.

14 ”’Tá iin ta̱a xi̱xira ña̱ʼa ña̱ yi̱i̱ soo kǒo níkiʼinra kuenta ña̱ kúúña ña̱ yi̱i̱, xíniñúʼu ndataxira ña̱yóʼo ndaʼa̱ ta̱ su̱tu̱ chi ña̱ yi̱i̱ kúúña ta xíniñúʼu ndataxira inka táʼví* ya̱ʼvi ña̱yóʼo. 15 Ña̱kán, na̱ su̱tu̱ va̱ása xíniñúʼu ixayaku̱a̱na ña̱ʼa ña̱ yi̱i̱ ña̱ sóko̱ na̱ israelita nu̱ú Jehová 16 saáchi tá ná keʼéna ña̱yóʼo, sakúisona ku̱a̱chi na̱ israelita xa̱ʼa̱ ña̱ xi̱xina ña̱ʼa ña̱ yi̱i̱ ña̱ ni̱so̱kóna, saáchi yi̱ʼi̱ kúú Jehová ta̱ ndásayi̱i̱ ndóʼó’”.

17 Jehová ni̱ka̱ʼa̱nkara xíʼin ta̱ Moisés, ta ka̱chira: 18 “Ka̱ʼa̱n xíʼin ta̱ Aarón ta saátu xíʼin na̱ se̱ʼera xíʼin ndiʼi na̱ israelita ta kachiún: ‘Tá iin na̱ ñuu Israel á na̱ inka ñuu na̱ ki̱xaa̱ ndóo xíʼinndó kúni̱na so̱kóna iin kití nu̱ú Jehová ña̱ kaʼminarí* ña̱ va̱ʼa saxínuna ña̱ ki̱ndoona xíʼinra, á kúni̱ miína taxinarí, 19 na̱yóʼo xíniñúʼu so̱kóna iin si̱ndi̱ki̱ che̱e tí kǒo kue̱ʼe̱ kúúmií, iin ndikachi* che̱e tí loʼo á iin ti̱xúʼú* ña̱ va̱ʼa ndakiʼin Ndióxi̱ ña̱ so̱kóna. 20 Taxindó kití tí va̱ása kúúmií kue̱ʼe̱ chi tá ná va̱ása keʼéndó ña̱yóʼo, va̱ása ndakiʼin Ndióxi̱ ña̱ so̱kóndó.

21 ”’Tá iin ta̱a sóko̱ra iin kití nu̱ú Jehová ña̱ va̱ʼa ndakutáʼan viíra xíʼinra ña̱ va̱ʼa saxínura iin ña̱ ki̱ndoora xíʼinra, á ña̱ kúni̱ miíra sóko̱rarí, tí si̱ndi̱ki̱ á tí ndikachi tí so̱kóra, va̱ása xíniñúʼu kuumiírí kue̱ʼe̱ ña̱ va̱ʼa ná kandíxa Ndióxi̱ ndakiʼinra ña̱ so̱kóra. Va̱ása xíniñúʼu kuumiírí nda̱a̱ ni iin kue̱ʼe̱. 22 Va̱ása xíniñúʼu so̱kóra nda̱a̱ ni iin kití tí kúáa,* tí ni̱ta̱ʼnu̱, tí ni̱ta̱ʼnda̱, tí kúúmií iin ti̱nda̱á,* tí kúúmií iin ta̱ʼyi̱* á tí kúúmií iin kue̱ʼe̱ ñii̱rí. Va̱ása xíniñúʼu taxindó nda̱a̱ ni iin kití tí kúúmií ña̱yóʼo ndaʼa̱ Jehová ni va̱ása xíniñúʼu so̱kóndórí nu̱ú Jehová nu̱ú altar. 23 Tá kúni̱ miíndó so̱kóndó iin kití, kivi so̱kóndó iin si̱ndi̱ki̱ á iin ndikachi tí káni̱ iin ndaʼa̱ á xa̱ʼa̱, tí kúití iin ndaʼa̱ á xa̱ʼa̱, soo va̱ása kivi so̱kóndó tíyóʼo xa̱ʼa̱ ña̱ ki̱ndoondó keʼéndó iin ña̱ʼa nu̱ú Ndióxi̱. 24 Tá sóko̱ndó iin kití nu̱ú Jehová, va̱ása so̱kóndó tí ndi̱ʼi-xa̱ʼa̱ ndi̱vi̱,* tí ni̱cho̱ʼma̱ ndi̱vi̱, tí tu̱ʼunna ndi̱vi̱ á tí xa̱ʼndana ndi̱vi̱. Va̱ása xíniñúʼu so̱kóndó nda̱a̱ ni iin kití yóʼo ñuundó. 25 Tá na̱ inka ñuu táxina táʼan tíyóʼo ndaʼa̱ndó, va̱ása kandíxandó kiʼinndórí ndaʼa̱na ña̱ so̱kóndórí nu̱ú Ndióxi̱, saáchi tí ni̱ta̱ʼnda̱ kúú tíyóʼo á tí ndu̱chiʼña kúúrí ta va̱ása kandíxa Ndióxi̱ ndakiʼinra tíyóʼo ndaʼa̱ndó’”.

26 Jehová ni̱ka̱ʼa̱nkara xíʼin ta̱ Moisés, ta ka̱chira: 27 “Tá ná kaku iin si̱ndi̱ki̱, iin ndikachi che̱e tí yúta̱* á iin ti̱xúʼú loʼo, u̱xa̱ ki̱vi̱ koo tíyóʼo xíʼin siʼírí soo tá ná xi̱nurí u̱na̱ ki̱vi̱, xa̱a̱ kivi so̱kónarí ña̱ kokorí* nu̱ú Jehová. 28 Xa̱a̱ síín ki̱vi̱ kaʼníndó iin si̱ndi̱ki̱ ta xa̱a̱ síín ki̱vi̱ kaʼníndó se̱ʼerí, xa̱a̱ síín ki̱vi̱ kaʼníndó iin ndikachi ta xa̱a̱ síín ki̱vi̱ kaʼníndó se̱ʼerí.

29 ”Tá ná so̱kóndó iin kití ña̱ va̱ʼa taxindó tíxa̱ʼvi ndaʼa̱ Jehová, xíniñúʼu so̱kóndó tíyóʼo nda̱a̱ táki̱ʼva kúni̱ mií Ndióxi̱. 30 Mií ki̱vi̱ ña̱ so̱kóndórí xíniñúʼu kuxundórí. Va̱ása xíniñúʼu sandákoondó ku̱ñu tíyóʼo ña̱ kuxundóña nda̱a̱ inka ki̱vi̱. Yi̱ʼi̱ kúú Jehová.

31 ”Xíniñúʼu kandíxandó chiñu ña̱ xáʼndai̱ nu̱úndó ta saxínundóña. Yi̱ʼi̱ kúú Jehová. 32 Va̱ása sakúyaku̱a̱ndó ki̱víi̱ ña̱ yi̱i̱; yi̱ʼi̱ nduyi̱íi̱ nu̱ú na̱ israelita. Yi̱ʼi̱ kúú Jehová, ta̱ ndásayi̱i̱ ndóʼó, 33 ta̱ ta̱vá ndóʼó nu̱ú ñuʼú na̱ egipcio ña̱ va̱ʼa koi̱ Ndióxi̱ndó. Yi̱ʼi̱ kúú Jehová”.

23 Jehová ni̱ka̱ʼa̱nkara xíʼin ta̱ Moisés, ta ka̱chira: 2 “Ña̱yóʼo ka̱ʼún xíʼin na̱ israelita: ‘Ku̱i̱ya̱ tá ku̱i̱ya̱ xíniñúʼu keʼéndó vikó nu̱ú Jehová ta ña̱ yi̱i̱ kúú ña̱yóʼo. Ña̱yóʼo kúú vikó ña̱ keʼéndó ku̱i̱ya̱ tá ku̱i̱ya̱:

3 ”’Kivi kachíñundó i̱ñu̱ ki̱vi̱, soo ki̱vi̱ sábado ña̱ kúú ki̱vi̱ u̱xa̱, ña̱ ndakindee̱ndó kúú ña̱yóʼo, iin reunión ña̱ yi̱i̱ kúú ña̱yóʼo. Va̱ása kivi keʼéndó nda̱a̱ ni iin chiñu. Nda̱a̱ ndáaka nu̱ú ndóondó, iin sábado ña̱ ixato̱ʼóndó Jehová kúú ña̱yóʼo.

4 ”’Ña̱yóʼo kúú vikó ña̱ keʼéndó ku̱i̱ya̱ tá ku̱i̱ya̱ nu̱ú Jehová, reunión ña̱ yi̱i̱ kúú ña̱yóʼo ta xíniñúʼu keʼéndóña mií ki̱vi̱ ña̱ xa̱a̱ ni̱ka̱ʼi̱n xíʼinndó. 5 Ki̱vi̱ 14 tí yo̱o̱ nu̱ú, tá xa̱a̱ ku̱ñuú xíniñúʼu keʼéndó vikó ña̱ Pascua nu̱ú Jehová.

6 ”’Ki̱vi̱ 15 tí yo̱o̱ nu̱ú, keʼéndó Vikó ña̱ si̱ta̱váʼa ña̱ kǒo yuxa̱n iyá* xíʼin nu̱ú Jehová. U̱xa̱ ki̱vi̱ xíniñúʼu kuxundó si̱ta̱váʼa ña̱ kǒo yuxa̱n iyá kúúmií. 7 Ki̱vi̱ nu̱ú xíniñúʼu keʼéndó iin reunión ña̱ yi̱i̱ ta va̱ása xíniñúʼu kachíñundó. 8 Chi xíniñúʼu kaʼmindó kití ña̱ va̱ʼa so̱kóndórí nu̱ú* Jehová u̱xa̱ ki̱vi̱. Ki̱vi̱ u̱xa̱ koo reunión ña̱ yi̱i̱, ta va̱ása xíniñúʼu kachíñundó’”.

9 Ta ni̱ka̱ʼa̱nka Jehová xíʼin ta̱ Moisés: 10 “Ña̱yóʼo ka̱ʼún xíʼin na̱ israelita: ‘Tá ná ki̱ʼvindó nu̱ú ñuʼú ña̱ taxii̱ ndaʼa̱ndó ta ndakayandó ña̱ chi̱ʼindó, xíniñúʼu taxindó iin numi ña̱ chi̱ʼindó ndaʼa̱ ta̱ su̱tu̱, mií ña̱ nu̱ú va̱ʼa ka̱na. 11 Ta ta̱ su̱tu̱ sakúikóra* ña̱yóʼo nu̱ú Jehová ña̱ va̱ʼa kandíxara ndakiʼinra ña̱yóʼo. Ta ta̱ su̱tu̱ xíniñúʼu sakúikóra ña̱yóʼo tá ná ya̱ʼa ki̱vi̱ sábado. 12 Ki̱vi̱ ña̱ ná sakúikóra numi ña̱ chi̱ʼindó xíniñúʼu so̱kóndó iin ndikachi* che̱e tí yúta̱,* tí kǒo kue̱ʼe̱ kúúmií, tí kúúmií iin ku̱i̱ya̱ ña̱ va̱ʼa so̱kórarí ta kaʼmirarí* nu̱ú Jehová. 13 Saátu xíniñúʼu so̱kóndó ki̱ʼva u̱vi̱ kilo* ña̱ harina ña̱ va̱ʼa, ña̱ nda̱saka̱ xíʼin aceite, ña̱yóʼo kúú ña̱ kaʼmindó ta so̱kóndóña nu̱ú Jehová ta táminí kuxaʼa̱nña. Saátu xíniñúʼu so̱kóndó iin litro* tá vino. 14 Va̱ása kivi kuxundó si̱ta̱váʼa, ni cebada ña̱ yatá, ni cebada ña̱ xa̱á, nda̱a̱ ná ku̱ʼu̱nndó xíʼin ña̱ so̱kóndó nu̱ú Ndióxi̱. Ni nda̱a̱ ndáaka nu̱ú kundoondó, ña̱yóʼo kúú iin ley ña̱ xíniñúʼu kundiku̱nndó ndiʼi tiempo, miíndó ta saátu na̱ se̱ʼendó na̱ kaku chí nu̱únínu.

15 ”’Ki̱vi̱ sábado kúú ña̱ ku̱ʼu̱nndó xíʼin numi ña̱ chi̱ʼindó ña̱ so̱kóndó nu̱ú Ndióxi̱, ta tá ná ya̱ʼa ki̱vi̱ yóʼo, kixáʼandó kaʼvindó u̱xa̱ semana. Xíniñúʼu xi̱nu ndiʼi semana yóʼo. 16 Tá xa̱a̱ ni̱xi̱nu u̱xa̱ semana ta ná ya̱ʼa inka ki̱vi̱ ña̱ va̱ʼa xi̱nu 50 ki̱vi̱, saá xíniñúʼu so̱kóndó harina xa̱á nu̱ú Jehová. 17 Ta nda̱a̱ chí veʼendó xíniñúʼu kuniʼindó u̱vi̱ si̱ta̱váʼa ku̱ʼu̱n xíʼinndó ta ña̱yóʼo kúú ña̱ sakúikóndó ta so̱kóndóña nu̱ú Ndióxi̱. Ña̱yóʼo xíniñúʼu kuva̱ʼaña xíʼin u̱vi̱ kilo* ña̱ harina ña̱ va̱ʼa, ta saátu xíniñúʼu kuumiíña yuxa̱n iyá ta sayátanndó ña̱yóʼo ini horno.* Ña̱yóʼo kúú ña̱ nu̱ú ña̱ ndakayaún ña̱ so̱kóún nu̱ú Jehová. 18 Ta saátu xíniñúʼu kuniʼindó u̱xa̱ ndikachi válí tí che̱e, tí kǒo kue̱ʼe̱ kúúmií, tí iin ku̱i̱ya̱, iin si̱ndi̱ki̱ yúta̱ xíʼin u̱vi̱ ndikachi che̱e. Tíyóʼo kúú tí kuniñúʼuna tí kaʼmina ta so̱kónarí nu̱ú Jehová xíʼin harina ña̱ ni̱so̱kóndó ta saátu vino tá ni̱so̱kóndó. Ña̱yóʼo kúú ña̱ kaʼmina ta so̱kónaña nu̱ú Jehová ta táminí kuxaʼa̱nña nu̱úra. 19 Ta xíniñúʼu kuniʼindó iin ti̱xúʼú* loʼo ña̱ va̱ʼa so̱kóndórí xa̱ʼa̱ ku̱a̱chindó, ta saátu u̱vi̱ ndikachi válí tí kúúmií iin ku̱i̱ya̱ ña̱ va̱ʼa so̱kóndórí nu̱ú Ndióxi̱ ña̱ ndakutáʼan viíndó xíʼinra. 20 Ta̱ su̱tu̱ sakúikóra u̱vi̱ ndikachi válí xíʼin si̱ta̱váʼa ña̱ ku̱vaʼa xíʼin trigo ña̱ xa̱á ña̱ va̱ʼa so̱kóraña nu̱ú Jehová. Iin ña̱ʼa ña̱ yi̱i̱ní xa̱ʼa̱ Jehová kúúña, ta kuenta ta̱ su̱tu̱ kúú ña̱yóʼo. 21 Mií ki̱vi̱ saá keʼéndó iin reunión ña̱ yi̱i̱. Va̱ása kivi keʼéndó nda̱a̱ ni iin chiñu. Ni nda̱a̱ ndáaka nu̱ú kundoondó, ña̱yóʼo kúú iin ley ña̱ xíniñúʼu kundiku̱nndó ndiʼi tiempo, miíndó ta saátu na̱ se̱ʼendó na̱ kaku chí nu̱únínu.

22 ”’Tá ná sakéendó,* va̱ása ndakayandó ña̱ chi̱ʼindó yuʼú ñuʼú nu̱ú chi̱ʼindó ni va̱ása ndakayandó ña̱ ki̱ndoo nu̱ú chi̱ʼindó. Ná kindo̱o ña̱yóʼo ndakaya na̱ ndáʼvi* ta saátu na̱ inka ñuu na̱ ki̱xaa̱ ndóo naʼa* xíʼinndó. Yi̱ʼi̱ kúú Jehová Ndióxi̱ndó’”.

23 Jehová ni̱ka̱ʼa̱nkara xíʼin ta̱ Moisés, ta ka̱chira: 24 “Ña̱yóʼo ka̱ʼún xíʼin na̱ israelita: ‘Ki̱vi̱ nu̱ú ña̱ yo̱o̱ u̱xa̱, xíniñúʼu ndakindee̱ndó, ta tivina trompeta ña̱ va̱ʼa ndakaʼánndó ña̱ iin reunión ña̱ yi̱i̱ kúú ña̱yóʼo. 25 Va̱ása kivi kachíñundó ta xíniñúʼu ku̱ʼu̱nndó xíʼin ña̱ʼa ña̱ so̱kóndó ta kaʼmindóña nu̱ú Jehová’”.

26 Jehová ni̱ka̱ʼa̱nkara xíʼin ta̱ Moisés: 27 “Ki̱vi̱ 10 tí yo̱o̱ u̱xa̱ kúú Ki̱vi̱ ña̱ ndóo ku̱a̱china. Xíniñúʼu keʼéndó iin reunión ña̱ yi̱i̱ ta xíniñúʼu na̱ʼa̱ndó ña̱ kúsuchíní-inindó xa̱ʼa̱ ku̱a̱chi ña̱ ni̱ki̱ʼvindó ta saátu xíniñúʼu kaʼmindó ña̱ʼa ña̱ so̱kóndó nu̱ú Jehová. 28 Ta va̱ása xíniñúʼu kachíñundó ki̱vi̱ yóʼo, saáchi iin ki̱vi̱ ña̱ ndoo ku̱a̱chindó nu̱ú Jehová Ndióxi̱ndó kúú ña̱yóʼo. 29 Ndiʼi na̱ ná va̱ása kusuchí-ini xa̱ʼa̱ ku̱a̱china ki̱vi̱ yóʼo, xíniñúʼu kuvina. 30 Yi̱ʼi̱ sandíʼi-xa̱ʼíi̱ ndiʼi na̱ ná keʼé nda̱a̱ ndáaka chiñu ki̱vi̱ yóʼo. 31 Va̱ása keʼéndó nda̱a̱ ni iin chiñu. Ni nda̱a̱ ndáaka nu̱ú kundoondó, ña̱yóʼo kúú iin ley ña̱ xíniñúʼu kundiku̱nndó ndiʼi tiempo, miíndó ta saátu na̱ se̱ʼendó na̱ kaku chí nu̱únínu. 32 Iin sábado ña̱ ndakindee̱ndó kúú ña̱yóʼo, ta xíniñúʼu na̱ʼa̱ndó ña̱ kúsuchíní-inindó xa̱ʼa̱ ku̱a̱chindó ki̱vi̱ i̱i̱n tí yo̱o̱ yóʼo. Sábado ña̱ ndakindee̱ndó kixáʼaña iin xi̱kuaá iinsaá nda̱a̱ inka xi̱kuaá”.

33 Jehová ni̱ka̱ʼa̱nkara xíʼin ta̱ Moisés, ta ka̱chira: 34 “Ka̱ʼa̱n xíʼin na̱ israelita: ‘Ki̱vi̱ 15 tí yo̱o̱ u̱xa̱, xíniñúʼu keʼéndó Vikó ña̱ Cabaña nu̱ú Jehová, ta u̱xa̱ ki̱vi̱ koo ña̱yóʼo. 35 Ki̱vi̱ nu̱ú xíniñúʼu keʼéndó iin reunión ña̱ yi̱i̱, ta va̱ása xíniñúʼu kachíñundó. 36 Ta u̱xa̱ ki̱vi̱ xíniñúʼu so̱kóndó ña̱ʼa ña̱ kaʼmindó nu̱ú Jehová. Tá ná xi̱nu u̱na̱ ki̱vi̱, saá keʼéndó iin reunión ña̱ yi̱i̱ ta so̱kóndó ña̱ʼa ña̱ kaʼmina nu̱ú Jehová. Iin reunión ña̱ ndáyáʼviní kúú ña̱yóʼo, va̱ása kivi kachíñundó.

37 ”’Ña̱yóʼo kúú vikó ña̱ keʼéndó ku̱i̱ya̱ tá ku̱i̱ya̱ nu̱ú Jehová, ta reunión ña̱ yi̱i̱ koo ña̱yóʼo ña̱ va̱ʼa so̱kóndó ña̱ʼa ña̱ kaʼmina nu̱ú Jehová: so̱kóndó kití tí kaʼmina nu̱ú Ndióxi̱ saátu so̱kóndó harina xíʼin vino, ta xa̱a̱ íyo ki̱ʼva ña̱ keʼéndó iin tá iin ña̱yóʼo. 38 So̱kóndó ña̱yóʼo ta saátu so̱kóndó ña̱ xa̱a̱ sóko̱ndó ki̱vi̱ sábado nu̱ú Jehová, ña̱ʼa ña̱ sáni̱ʼíndó ndaʼa̱ Ndióxi̱, ña̱ sóko̱ndó xa̱ʼa̱ ña̱ ki̱ndoondó keʼéndó iin ña̱ʼa á ña̱ so̱kóndó xa̱ʼa̱ ña̱ kúni̱ miíndó, xíniñúʼu taxikavandóña ndaʼa̱ Jehová. 39 Soo ki̱vi̱ 15 tí yo̱o̱ u̱xa̱ tá xa̱a̱ nda̱kayandó ña̱ chi̱ʼindó, u̱xa̱ ki̱vi̱ xíniñúʼu keʼéndó vikó nu̱ú Jehová. Ta ña̱ ki̱vi̱ nu̱ú xíʼin ña̱ ki̱vi̱ u̱na̱ kúú ña̱ ndakindee̱ndó. 40 Ki̱vi̱ nu̱ú ndakayandó ku̱i̱ʼi ndaʼa̱ yitu̱n tú náʼnuní, tú liviní, yu̱ku̱ ndaʼa̱ tú ñu̱u̱, ndaʼa̱ yitu̱n tú ndokoní xíʼin ndaʼa̱ tú álamo tú íyo chí yoso̱, ta u̱xa̱ ki̱vi̱ kusi̱íní-inindó nu̱ú Jehová Ndióxi̱ndó. 41 U̱xa̱ ki̱vi̱ ti̱xin iin ku̱i̱ya̱ keʼéndó vikó yóʼo nu̱ú Jehová. Xíniñúʼu keʼéndóña yo̱o̱ u̱xa̱. Ña̱yóʼo kúú iin ley ña̱ xíniñúʼu kundiku̱nndó ndiʼi tiempo, miíndó ta saátu na̱ se̱ʼendó na̱ kaku chí nu̱únínu. 42 U̱xa̱ ki̱vi̱ xíniñúʼu koondó ini veʼe válí. Ndiʼi na̱ ñuu Israel, xíniñúʼu koona ini veʼe válí, 43 ña̱ va̱ʼa kunda̱a̱-ini se̱ʼendó na̱ kaku chí nu̱únínu ña̱ ni̱ka̱ʼi̱n xíʼinndó ña̱ koondó ini veʼe válí tá ta̱vái̱ ndóʼó chí ñuu Egipto. Yi̱ʼi̱ kúú Jehová Ndióxi̱ndó’”.

44 Xa̱ʼa̱ ña̱kán, ta̱ Moisés ni̱ka̱ʼa̱nra xíʼin ndiʼi na̱ israelita xa̱ʼa̱ vikó ña̱ keʼéna nu̱ú Jehová ku̱i̱ya̱ tá ku̱i̱ya̱.

24 Jehová ni̱ka̱ʼa̱n tukura xíʼin ta̱ Moisés, ta ka̱chira: 2 “Ka̱ʼa̱n xíʼin na̱ israelita ña̱ ná taxina aceite tá oliva tá va̱ʼa, tá kuniñúʼuna xíʼin lámpara, tasaá va̱ása nda̱ʼva̱ña. 3 Ta̱ Aarón xíniñúʼu kiʼinra kuenta xíʼin lámpara ña̱ ndíta chí sa̱tá nu̱ú tíkaa cortina, chí nu̱ú ndíkaa̱ tú Arca ini tabernáculo, kiʼinra kuenta xíʼinña ña̱ ná kutuu̱nña nu̱ú Jehová nani tá xi̱kuaá iinsaá nda̱a̱ xi̱ta̱a̱n.* Ña̱yóʼo kúú ley ña̱ xíniñúʼu kundiku̱nndó ndiʼi tiempo, miíndó ta saátu se̱ʼendó na̱ kaku chí nu̱únínu. 4 Ta̱ Aarón xíniñúʼu kiʼinra kuenta xíʼin lámpara ña̱ ndóso nu̱ú candelabro ña̱ ku̱vaʼa xíʼin oro ña̱ va̱ʼa, tasaá va̱ása nda̱ʼva̱ña nu̱ú Jehová.

5 ”Kiʼún harina ña̱ va̱ʼa, ta xíʼin ña̱yóʼo keʼún 12 si̱ta̱váʼa ña̱ ti̱ku̱i̱ta̱,* ki̱ʼva u̱vi̱ kilo* ña̱ harina kuniñúʼún ña̱ ixava̱ʼún iin tá iin si̱ta̱váʼa yóʼo. 6 Sakúisotáʼún si̱ta̱váʼa yóʼo, i̱ñu̱ña iin táʼví ta i̱ñu̱ña inka táʼví, chindósoúnña nu̱ú mesa tú oro tú níndichi nu̱ú Jehová. 7 Xíniñúʼu sakáún olíbano* tá va̱ʼa sa̱tá u̱vi̱ saá koʼndo si̱ta̱váʼa yóʼo, tasaá kivi ndakaʼán Ndióxi̱ xa̱ʼa̱ si̱ta̱váʼa ña̱ ni̱so̱kóna,* ña̱yóʼo kúú ña̱ kaʼmina ta so̱kóna nu̱ú Jehová. 8 Ndiʼi sábado xíniñúʼu chindósora si̱ta̱váʼa yóʼo nu̱ú Jehová. Ña̱yóʼo kúú iin trato ña̱ chíka̱i̱ xíʼin na̱ israelita ta kooña ndiʼi tiempo. 9 Kuenta ta̱ Aarón xíʼin na̱ se̱ʼera koo ña̱yóʼo ta xíniñúʼu kuxunaña nu̱ú iin lugar ña̱ yi̱i̱, saáchi iin ña̱ yi̱i̱ní ña̱ sóko̱na ta xáʼmina nu̱ú Jehová kúúña. Ña̱yóʼo kúú iin ley ña̱ xíniñúʼu kundiku̱nna ndiʼi tiempo”.

10 Ta xíʼin na̱ israelita ni̱xi̱yo iin ta̱ loʼo se̱ʼe iin ñá israelita ta yivára ta̱ egipcio xi̱kuura, ta̱yóʼo ki̱xáʼara kánitáʼanra xíʼin iin ta̱ israelita chí nu̱ú xi̱ndoona. 11 Ta̱ se̱ʼe ñá israelita ki̱xáʼara káʼa̱n-ndi̱va̱ʼara ta ki̱xáʼara sákuisochiʼñara* ki̱vi̱ Ndióxi̱,* ña̱kán ni̱xa̱ʼa̱nna xíʼinra nu̱ú ta̱ Moisés. Siʼíra xi̱naníñá Selomit ta ñáyóʼo xi̱kuuñá se̱ʼe ta̱ Dibrí ta̱ ke̱e ti̱xin tribu ta̱ Dan. 12 Tasaá nda̱kasinara, nda̱a̱ ná kunda̱a̱-inina ndáaña ka̱ʼa̱n Jehová.

13 Tasaá ni̱ka̱ʼa̱n Jehová xíʼin ta̱ Moisés: 14 “Tavá ta̱ sa̱kúisochiʼña ki̱víi̱, ta ndiʼi na̱ xi̱niso̱ʼo ña̱ sa̱kúisochiʼñara ki̱víi̱ xíniñúʼu chindósona ndaʼa̱na xi̱níra, tándi̱ʼi, na̱ ñuu kuunna yu̱u̱ra. 15 Xa̱ʼa̱ ña̱kán xíniñúʼu ka̱ʼún ña̱yóʼo xíʼin na̱ ñuu Israel: ‘Tá iin na̱ yiví sákuisochiʼñana Ndióxi̱na, ndakuiinna xa̱ʼa̱ ku̱a̱china. 16 Ña̱kán, ndiʼi na̱ ná ka̱ʼa̱n-ndi̱va̱ʼa xa̱ʼa̱ ki̱vi̱ Jehová, xíniñúʼu kuvina. Ndiʼi na̱ ñuu xíniñúʼu kuunna yu̱u̱ na̱yóʼo, ni kúúna na̱ ke̱e inka ñuu ta ki̱xaa̱na íyona xíʼinndó á ni kúúna na̱ ñuu miíndó, xíniñúʼu kuvina xa̱ʼa̱ ña̱ ni̱ka̱ʼa̱n-ndi̱va̱ʼana xa̱ʼa̱ ki̱vi̱ Ndióxi̱.

17 ”’Tá iin ta̱a xáʼníra iin na̱ yiví, xíniñúʼu kuvira. 18 Ndiʼi na̱ sátukue̱ʼe̱ á na̱ xáʼní iin kití xíniñúʼu ndacháʼvina xa̱ʼa̱rí, xíniñúʼu ndataxina iin kití xa̱ʼa̱ tí sa̱túkue̱ʼe̱na á tí xa̱ʼnína. 19 Tá iin ta̱a sa̱túkue̱ʼe̱ra iin na̱ yiví, nda̱a̱ táki̱ʼva ke̱ʼéra xíʼin na̱kán saá xíniñúʼu keʼéna xíʼinra. 20 Tá ni̱xa̱ʼnu̱ra inkana, tá ka̱nirana ta sa̱túkue̱ʼe̱ra nduchúnu̱úna á tá sa̱ndákavara nu̱ʼuna, saátu xíniñúʼu keʼéna xíʼin ta̱yóʼova. 21 Na̱ ná satúkue̱ʼe̱ iin kití ta ná kuvirí xíniñúʼu ndacháʼvina xa̱ʼa̱rí, soo na̱ ná satúkue̱ʼe̱ iin na̱ yiví ta ná kuvina, xíniñúʼu kuvitu na̱yóʼova.

22 ”’Ni na̱ inka ñuu na̱ ki̱xaa̱ ndóo xíʼinndó kúúna á ni na̱ ñuu miíndó kúúna, xíniñúʼu kundiku̱nndó ley yóʼo xíʼinna, saáchi yi̱ʼi̱ kúú Jehová Ndióxi̱ndó’”.

23 Tasaá ta̱ Moisés ni̱ka̱ʼa̱nra xíʼin na̱ israelita, ta na̱yóʼo ta̱vána ta̱ ta̱a ta̱ sa̱kúisochiʼña ki̱vi̱ Ndióxi̱ ta ku̱unna yu̱u̱ra. Ta na̱ israelita ke̱ʼéna nda̱a̱ táki̱ʼva ni̱ka̱ʼa̱n Jehová xíʼin ta̱ Moisés.

25 Jehová ni̱ka̱ʼa̱n tukura xíʼin ta̱ Moisés chí yuku̱ Sinaí, ta ka̱chira: 2 “Ka̱ʼa̱n xíʼin na̱ israelita: ‘Tá ná ki̱ʼvindó nu̱ú ñuʼú ña̱ ni̱ka̱ʼi̱n taxii̱ ndaʼa̱ndó, iin ku̱i̱ya̱ va̱ása xíniñúʼu chiʼindó nu̱ú ñuʼú, saáchi iin sábado ña̱ ixato̱ʼóndó Jehová kúú ña̱yóʼo. 3 I̱ñu̱ ku̱i̱ya̱ xíniñúʼu chiʼún nu̱ú ñuʼún ta kaʼndaún ndaʼa̱ tú uva ta kivi ndakayaún ña̱ chi̱ʼún. 4 Soo ku̱i̱ya̱ u̱xa̱ kooña iin sábado ña̱ ndakindee̱ ñuʼú, iin sábado ña̱ ixato̱ʼóndó Jehová koo ña̱yóʼo. Va̱ása xíniñúʼu chiʼún nu̱ú ñuʼún ta ni va̱ása xíniñúʼu kaʼndaún ndaʼa̱ tú uva. 5 Tá ka̱na mií ña̱ʼa nu̱ú ñuʼún xa̱ʼa̱ ña̱ ni̱ko̱yo ndiki̱n tá chi̱ʼún va̱ása xíniñúʼu ndakayaún ña̱yóʼo, ta ni va̱ása xíniñúʼu ndakayaún uva ndaʼa̱ tú uva tú va̱ása níxaʼndaún ndaʼa̱. Iin ku̱i̱ya̱ xíniñúʼu taxiún ndakindee̱ ñuʼú yóʼo. 6 Soo kiviva kuxundó ña̱ ná kana mií nu̱ú ñuʼúndó ku̱i̱ya̱ yóʼo. Miíndó, na̱ káchíñundáʼvi nu̱úndó, na̱ káchíñu táti̱* nu̱úndó xíʼin na̱ inka ñuu na̱ ndóo xíʼinndó kivi kuxuna ña̱yóʼo. 7 Saátu kití sa̱na̱ndó xíʼin kití yukú, kiviva kaxírí ña̱yóʼo. Ndiʼi ña̱ ná kana nu̱ú ñuʼú kivi kuxundóña.

8 ”’U̱xa̱ yichi̱ kaʼviún ku̱i̱ya̱ ña̱ kúú sábado, u̱xa̱ yichi̱ kaʼviún u̱xa̱ ku̱i̱ya̱, ta ndiʼi ña̱yóʼo kooña 49 ku̱i̱ya̱. 9 Ta ki̱vi̱ u̱xu̱ ña̱ yo̱o̱ u̱xa̱ ndeé va̱ʼa tiviún ndiki̱, ta Ki̱vi̱ ña̱ ndóo ku̱a̱china xíniñúʼu ndeé va̱ʼa kutaku̱ tivindó ndiki̱ ndiʼi ñuu nu̱ú kundoondó. 10 Xíniñúʼu ndasayi̱i̱ndó ku̱i̱ya̱ 50 ta ka̱ʼa̱nndó ña̱ sa̱ñá ndiʼi na̱ ñuundó. Ña̱yóʼo koo iin ku̱i̱ya̱ ña̱ sa̱ñándó ta iin tá iin ndóʼó ndakiʼinndó ñuʼúndó, ta ndikóndó xíʼin na̱ veʼendó. 11 Ña̱ ku̱i̱ya̱ 50 kooña iin Ku̱i̱ya̱ ña̱ sáña̱ na̱ yiví. Va̱ása chiʼindó ta ni va̱ása ndakayandó ña̱ ka̱na mií nu̱ú ni̱ko̱yo ndiki̱n ña̱ chi̱ʼindó, ni va̱ása ndakayandó uva tí ka̱na ndaʼa̱ tú uva tú va̱ása níxaʼndandó ndaʼa̱. 12 Iin Ku̱i̱ya̱ ña̱ sáña̱ na̱ yiví kúú ña̱yóʼo ta ña̱ yi̱i̱ xíniñúʼu kooña nu̱úndó. Ña̱ kivi kuxu kuitíndó kúú ña̱ ka̱na mií nu̱ú ñuʼú.

13 ”’Ku̱i̱ya̱ ña̱ sáña̱ na̱ yiví, iin tá iin ndóʼó xíniñúʼu ndakiʼinndó ñuʼúndó. 14 Tá ná xi̱íkondó* á tá ná satándó* iin ña̱ʼa nu̱ú inkana, va̱ása sandáʼvindóna. 15 Na̱ sátá* ñuʼú nu̱ú inkana xíniñúʼu kaʼvina nda̱saa ku̱i̱ya̱ ni̱ya̱ʼa tá ni̱xi̱yo Ku̱i̱ya̱ ña̱ sáña̱ na̱ yiví ta na̱ íxi̱íko xíniñúʼu kiʼinna kuenta nda̱saaka ku̱i̱ya̱ chiʼina nu̱ú ñuʼú. 16 Tá ku̱a̱ʼáka ku̱i̱ya̱ kúma̱ní ña̱ kixaa̱ Ku̱i̱ya̱ ña̱ sáña̱ na̱ yiví, kivi sandáandó ya̱ʼvi ñuʼú ña̱ íxi̱íkondó, soo tá loʼo ku̱i̱ya̱ kúma̱ní, xíniñúʼu sanúundó ya̱ʼviña, saáchi ku̱i̱ya̱ ña̱ sakéena* nu̱úña kúú ña̱ kiʼinndó xu̱ʼún xa̱ʼa̱. 17 Nda̱a̱ ni iin ndóʼó va̱ása xíniñúʼu sandáʼvindó inkana ta xíniñúʼu ixato̱ʼóndó Ndióxi̱ndó, saáchi yi̱ʼi̱ kúú Jehová Ndióxi̱ndó. 18 Tá sáxi̱nundó chiñu ña̱ xáʼndai̱ nu̱úndó, ta ndíku̱nndó ley ña̱ táxii̱ ndaʼa̱ndó, va̱ʼaní kundoondó nu̱ú ñuʼúndó. 19 Kana ña̱ʼa nu̱ú ñuʼú nu̱ú kundoondó, ta kuxundó nda̱a̱ xa̱a̱-inindó* ta va̱ása yi̱ʼvíndó kundoondó nu̱úña.

20 ”’Soo, tá ndóʼó káchindó “¿Ndáa míí kee ña̱ kuxundi̱ ku̱i̱ya̱ u̱xa̱ tá va̱ása kivi chiʼindi̱ ta ni va̱ása kivi sakéendi̱ nu̱ú ñuʼúndi̱?”, 21 xíniñúʼu kunda̱a̱-inindó ña̱ ku̱i̱ya̱ i̱ñu̱ chika̱i̱ bendición sa̱tá ñuʼúndó ta ku̱a̱ʼání ña̱ʼa kana nu̱úña, nda̱a̱ u̱ni̱ ku̱i̱ya̱ koo ña̱ kuxundó. 22 Ta ku̱i̱ya̱ u̱na̱ kivi kuxundó ta chiʼindó ña̱ yatá ña̱ nda̱kayandó, ta nda̱a̱ ku̱i̱ya̱ i̱i̱n kivi kuxundó ña̱yóʼo. Ña̱ yatá ña̱ kúúmiíndó kúú ña̱ kuxundó nda̱a̱ ná sakéendó ña̱ xa̱á.

23 ”’Va̱ása xíniñúʼu xi̱íkondó ñuʼú nu̱ú inkana ña̱ kindo̱ona xíʼinña, saáchi kuenta yi̱ʼi̱ kúú ña̱yóʼo. Ta nda̱a̱ táki̱ʼva íyo na̱ ke̱e inka ñuu ta ki̱xaa̱ndó íyondó nu̱ú ñuʼíi̱ á na̱ ki̱xaa̱ ndóo naʼa,* saá íyondó nu̱úi̱. 24 Ndiʼi ñuʼú ña̱ kúú kuentandó xíniñúʼu taxindó ña̱ ndasatánaña nu̱úndó.

25 ”’Tá iin na̱ ñuún ku̱ndáʼvina ta ni̱xi̱íkona ñuʼúna, iin na̱ táʼan yatinna xíniñúʼu kixi ndasatá* ña̱yóʼo. 26 Soo tá kǒo na̱ táʼanna na̱ kivi ndasatá ñuʼúna ta na̱yóʼo ndu̱kúikána ta kivi ndasatá miína ñuʼúna, 27 na̱yóʼo xíniñúʼu kotona nda̱saa ku̱i̱ya̱ ni̱ya̱ʼa ña̱ ni̱xi̱íkona ñuʼúna ta xíniñúʼu ndataxina xu̱ʼún ndaʼa̱ na̱ sa̱tá ñuʼú nu̱úna xa̱ʼa̱ ku̱i̱ya̱ ña̱ kúma̱ní ña̱ sa̱ñána. Tasaá kivi ndasatána ñuʼúna.

28 ”’Soo, tá kǒo xu̱ʼún kúúmiína ña̱ ndasatánaña, na̱ sa̱tá ñuʼú yóʼo kindo̱ona xíʼinña nda̱a̱ ná kixaa̱ Ku̱i̱ya̱ ña̱ sáña̱ na̱ yiví. Ta ndakiʼinna ñuʼúna nda̱a̱ ná kixaa̱ Ku̱i̱ya̱ ña̱ sáña̱ na̱ yiví.

29 ”’Soo tá iin na̱ yiví ni̱xi̱kóna iin veʼe ña̱ íyo ini iin ñuu ña̱ íyo nama̱ sa̱tá, na̱yóʼo kivi ndasatánaña nda̱a̱ ná xi̱nu iin ku̱i̱ya̱ ña̱ ni̱xi̱íkonaña; iin ku̱i̱ya̱ kuití kúúmiína ña̱ kivi ndasatánaña. 30 Soo tá xa̱a̱ ni̱ya̱ʼa iin ku̱i̱ya̱ ta va̱ása níkivi ndasatána veʼe ña̱ ni̱xi̱íkona ini ñuu ña̱ íyo nama̱ sa̱tá, veʼe yóʼo xa̱a̱ña kuuña kuenta mií na̱ sa̱táña ta saátu se̱ʼena na̱ kaku chí nu̱únínu. Va̱ása ndataxina ña̱yóʼo tá ná ki̱xaa̱ Ku̱i̱ya̱ ña̱ sáña̱ na̱ yiví. 31 Soo tá kǒo nama̱ sa̱tá veʼe ña̱ ni̱xi̱íkona yóʼo, kúúkavaña táʼan ñuʼú ña̱ íyo chí yuku̱, ta kivi ndasatána ña̱yóʼo ta xíniñúʼu ndataxina ña̱yóʼo tá ná kixaa̱ Ku̱i̱ya̱ ña̱ sáña̱ na̱ yiví.

32 ”’Soo veʼe na̱ levita ña̱ íyo ñuundó, kiviva ndasatána ña̱yóʼo nda̱a̱ ama kúni̱ miína. 33 Soo, tá ná va̱ása ndasatá na̱ levita veʼena, ndakiʼinna veʼe ña̱ ni̱xi̱íkona tá ná kixaa̱ Ku̱i̱ya̱ ña̱ sáña̱ na̱ yiví. Saáchi veʼe mií na̱ levita kúú ña̱ íyo ñuundó. 34 Soo, ñuʼú ña̱ íyo sa̱tá ñuundó, va̱ása kivi xi̱íkondóña, saáchi kuenta miíndó kooña ndiʼi tiempo.

35 ”’Tá iin na̱ ñuún na̱ íyo yatin xíʼún ku̱ndáʼvina ta va̱ása kívi satána ña̱ xíniñúʼuna, xíniñúʼu taxiún ña̱ xíniñúʼuna nda̱a̱ táki̱ʼva kéʼún xíʼin na̱ inka ñuu na̱ ki̱xaa̱ íyo xíʼún ña̱ va̱ʼa ná kundookana xíʼún. 36 Va̱ása kiʼún si̱kí xu̱ʼún ndaʼa̱na. Xíniñúʼu ixato̱ʼún Ndióxi̱ún tasaá kooka na̱ táʼún xíʼún. 37 Va̱ása taxi tóún* xu̱ʼún ndaʼa̱ inkana xa̱ʼa̱ ña̱ kúni̱ún kiʼún si̱kí ña̱yóʼo ta ni va̱ása taxiún ña̱ kuxu inkana xa̱ʼa̱ ña̱ kúni̱ún kiʼún si̱kí ña̱ táxiún ndaʼa̱na. 38 Yi̱ʼi̱ kúú Jehová Ndióxi̱ndó ta̱ nda̱tavá ndóʼó chí Egipto ña̱ va̱ʼa taxii̱ ñuʼú na̱ Canaán ndaʼa̱ndó ta koi̱ Ndióxi̱ndó.

39 ”’Tá iin na̱ ñanindó na̱ íyo yatin xíʼinndó ku̱ndáʼvina ta íxi̱íkona miína nu̱úndó ña̱ va̱ʼa kachíñuna nu̱úndó, va̱ása xíniñúʼu ixandúxandó xíʼinna ña̱ kachíñuna nda̱a̱ táki̱ʼva kéʼé na̱ káchíñundáʼvi nu̱ú inkana. 40 Nda̱a̱ táki̱ʼva kéʼéndó xíʼin na̱ káchíñu táti̱ nu̱úndó saá xíniñúʼu keʼéndó xíʼinna, á nda̱a̱ táki̱ʼva kéʼéndó xíʼin na̱ ke̱e inka ñuu na̱ ki̱xaa̱ íyo xíʼinndó. Na̱yóʼo kachíñuna nu̱úndó nda̱a̱ ná kixaa̱ Ku̱i̱ya̱ ña̱ sáña̱ na̱ yiví. 41 Tasaá na̱yóʼo sandákoona ndóʼó. Ta miína xíʼin se̱ʼena ndikóna nu̱ú na̱ veʼena, ta ndakiʼinna ñuʼúna ña̱ xi̱kuu kuenta na̱ táʼanna na̱ xi̱ndoo xi̱naʼá. 42 Saáchi nu̱ú yi̱ʼi̱va káchíñundáʼvina, ta yi̱ʼi̱ kúú ta̱ ta̱vána ti̱xin ñuu Egipto. Na̱yóʼo va̱ása xíniñúʼu xi̱íkona miína nda̱a̱ táki̱ʼva kéʼé na̱ káchíñundáʼvi nu̱ú inkana. 43 Va̱ása ixandi̱va̱ʼandó xíʼinna ta xíniñúʼu ixato̱ʼóndó Ndióxi̱ndó. 44 Na̱ ñuu na̱ ndóo yatin xíʼinndó kúú na̱ kivi kachíñundáʼvi nu̱úndó, na̱yóʼo kúú na̱ kivi satándó ña̱ kachíñundáʼvina nu̱úndó. 45 Saátu kivi satándó na̱ se̱ʼe na̱ inka ñuu na̱ ki̱xaa̱ ndóo xíʼinndó ña̱ kachíñundáʼvina nu̱úndó ta saátu na̱ veʼe na̱yóʼo na̱ ka̱ku ñuundó, na̱yóʼo xa̱a̱na koona kuenta miíndó. 46 Kivi sandákoondóna ndaʼa̱ se̱ʼendó ña̱ kachíñuna nu̱úna ta ndiʼi tiempo koona kuenta na̱yóʼo. Soo va̱ása xíniñúʼu ixandi̱va̱ʼandó xíʼin na̱ israelita, chi na̱ ñuundó kúú na̱yóʼo.

47 ”’Soo tá iin na̱ inka ñuu na̱ ki̱xaa̱ íyo xíʼinndó á na̱ ndóo naʼa xíʼinndó ndu̱kúikána ta iin na̱ ñanindó na̱ íyo yatin xíʼinna ku̱ndáʼvina ta xíniñúʼu xi̱íkona miína nu̱ú na̱yóʼo á nu̱ú na̱ veʼena, 48 kiviva ndasatána na̱yóʼo, iin na̱ ñanina kivi ndasatáñaʼá. 49 Saátu xitona, se̱ʼe xitona, á iin na̱ táʼan yatinna kúú na̱ kivi ndasatáñaʼá.

”’Ta saátu kivi ndasatána miína tá ná ndukúikána. 50 Ña̱ va̱ʼa keʼéna ña̱yóʼo, miína xíʼin ta̱ sa̱táñaʼá xíniñúʼu ndakaʼvina xa̱a̱ nda̱saa ku̱i̱ya̱ kúú ña̱ sa̱tánana ta nda̱saaka ku̱i̱ya̱ kúma̱ní ña̱ kixaa̱ Ku̱i̱ya̱ ña̱ sáña̱ na̱ yiví, ta ku̱i̱ya̱ ña̱ kúma̱ní yóʼo kúú ña̱ chaʼvina xa̱ʼa̱. Ña̱ va̱ʼa kunda̱a̱-inina nda̱saa chaʼvina xa̱ʼa̱ iin tá iin ku̱i̱ya̱, xíniñúʼu kiʼinna ki̱ʼva xíʼin ña̱ cháʼvina iin na̱ káchíñu táti̱. 51 Tá kúma̱ní ku̱a̱ʼáníka ku̱i̱ya̱ ña̱ kivi sa̱ñána, na̱yóʼo xíniñúʼu chaʼvina xa̱ʼa̱ ndiʼi ku̱i̱ya̱ yóʼo. 52 Soo, tá loʼo kuití ku̱i̱ya̱ kúma̱ní ña̱ kixaa̱ Ku̱i̱ya̱ ña̱ sáña̱ na̱ yiví, loʼo kúú ña̱ xíniñúʼu chaʼvina xa̱ʼa̱ ku̱i̱ya̱ ña̱ kíndo̱o ña̱ sa̱ñána. 53 Na̱ nda̱satá na̱yóʼo xíniñúʼu chaʼvinana ku̱i̱ya̱ tá ku̱i̱ya̱ xa̱ʼa̱ ña̱ káchíñuna nu̱úna, ta ndóʼó xíniñúʼu kiʼinndó kuenta ña̱ va̱ása ixandi̱va̱ʼana xíʼinna. 54 Soo tá va̱ása kívi keʼéna ña̱yóʼo ña̱ va̱ʼa sa̱ñána, miína xíʼin se̱ʼena sa̱ñána nda̱a̱ ná kixaa̱ Ku̱i̱ya̱ ña̱ sáña̱ na̱ yiví.

55 ”’Saáchi nu̱ú yi̱ʼi̱ kúú ña̱ káchíñundáʼvi na̱ israelita. Nu̱ú yi̱ʼi̱va káchíñundáʼvina, ta yi̱ʼi̱ kúú ta̱ ta̱vána ti̱xin ñuu Egipto. Yi̱ʼi̱ kúú Jehová Ndióxi̱na.

26 ”’Va̱ása keʼéndó ndióxi̱ ña̱ ni loʼo va̱ása ndáyáʼvi, ni va̱ása kanindichindó ña̱ʼa ña̱ ndásakáʼnu na̱ yiví ña̱ va̱ʼa ndasakáʼnundóña ni nama̱ ña̱ ndásakáʼnuna, ni va̱ása kanindichindó iin yu̱u̱ ña̱ kuxítíndó nu̱úña ta ndasakáʼnundóña, saáchi yi̱ʼi̱ kúú Jehová Ndióxi̱ndó. 2 Xíniñúʼu ixato̱ʼóníndó ley ña̱ táxii̱ ndaʼa̱ndó xa̱ʼa̱ ki̱vi̱ sábado ta ixato̱ʼóníndó nu̱ú íyoi̱. Yi̱ʼi̱ kúú Jehová.

3 ”’Tá sáxi̱nundó ndiʼi chiñu ña̱ xáʼndai̱ nu̱úndó ta ndíku̱nndó ndiʼi ley ña̱ táxii̱ ndaʼa̱ndó ta sáxi̱nundóña, 4 yi̱ʼi̱ sakúi̱n sa̱vi̱ mií tiempo ña̱ xíniñúʼu kuunrá, ta va̱ʼaní kana ña̱ʼa nu̱ú ñuʼú ta saátu va̱ʼaní kana ku̱i̱ʼi ndaʼa̱ yitu̱n. 5 Tiempo ña̱ ndaka̱xinndó trigo kooña nda̱a̱ ná kixaa̱ tiempo ña̱ ndakayandó uva, ta tiempo ña̱ ndakayandó uva kooña nda̱a̱ ná kixaa̱ tiempo ña̱ chiʼindó. Kuxundó si̱ta̱váʼa nda̱a̱ ná xa̱a̱-inindó* ta va̱ása yi̱ʼvíndó kundoondó ñuundó. 6 Yi̱ʼi̱ chindeétáʼi̱n xíʼinndó ña̱ va̱ása kundi̱ʼi-inindó, tá ná ku̱su̱nndó kǒo nda̱a̱ ni iin na̱ sayíʼvi ndóʼó. Yi̱ʼi̱ tavái̱ ndiʼi kití tí kue̱ʼe̱ ñuundó ta nda̱a̱ ni iin na̱ sáa̱-ini xíni ndóʼó va̱ása kanitáʼanna xíʼinndó. 7 Kundiku̱nndó sa̱tá ndiʼi na̱ sáa̱-ini xíni ndóʼó, ta kuchiñuvandó kaʼníndó ndiʼina xíʼin espada. 8 U̱ʼu̱n ndóʼó kundiku̱nndó ku̱ʼu̱nndó sa̱tá 100 na̱kán, ta 100 ndóʼó kundiku̱nndó ku̱ʼu̱nndó sa̱tá 10,000 na̱kán, ta kuchiñuvandó kaʼníndó na̱ sáa̱-ini xíni ndóʼó xíʼin espada.

9 ”’Yi̱ʼi̱ taxii̱ bendición ndaʼa̱ndó ta ku̱a̱ʼání se̱ʼendó koo ta nduku̱a̱ʼándó, ta saxínui̱ trato ña̱ ki̱ndoi̱ xíʼinndó. 10 Tá xíxikandó ña̱ chi̱ʼindó ku̱i̱ya̱ ni̱ya̱ʼa, xíniñúʼu tavándóña ña̱ va̱ʼa ndataánndó ña̱ xa̱á. 11 Ma̱ʼñú nu̱ú ndóondó kanindichii̱ tabernáculoi̱ ta ndakiʼinvai̱ ndóʼó. 12 Yi̱ʼi̱ koi̱ xíʼinndó ta koi̱ Ndióxi̱ndó, ta ndóʼó koondó na̱ ñui̱. 13 Yi̱ʼi̱ kúú Jehová Ndióxi̱ndó, ta̱ nda̱tavá ndóʼó ti̱xin ñuu Egipto, ña̱ va̱ʼa sandákoondó ña̱ kachíñundáʼvindó nu̱úna, saáchi nda̱a̱ táki̱ʼva ni̱xi̱yo na̱ xi̱núu yókó* si̱kí saá ni̱xi̱yondó, ta yi̱ʼi̱ ni̱xa̱ʼnu̱i̱nú ña̱ va̱ʼa ndaniʼindó nu̱úndó kakandó.

14 ”’Soo, tá va̱ása xíniso̱ʼondó ña̱ káʼi̱n xíʼinndó ni va̱ása ndíku̱nndó ley ña̱ táxii̱ ndaʼa̱ndó, 15 tá va̱ása kándíxandó ndiʼi chiñu ña̱ xáʼndai̱ nu̱úndó ta kúndasíndó xínindó ley ña̱ táxii̱ ndaʼa̱ndó, ta saátu tá sándiʼi-xa̱ʼa̱ndó trato ña̱ ki̱ndoi̱ xíʼinndó, 16 yi̱ʼi̱ keʼíi̱ ña̱yóʼo xíʼinndó: taxii̱ castigo ndaʼa̱ndó ta ndi̱ʼiní-inindó, taxii̱ ná kiʼinndó kue̱ʼe̱ tuberculosis xíʼin kue̱ʼe̱ kaʼní, ta xa̱ʼa̱ ña̱yóʼo va̱ása kivi kotokandó ta sakúvitáña ndóʼó. Chiʼindó, soo ni va̱ása ndakayandó ña̱ chi̱ʼindó, saáchi na̱ sáa̱-ini xíni ndóʼó kuxuña. 17 Yi̱ʼi̱ kundasíi̱ kunii̱ ndóʼó, ta na̱ sáa̱-ini xíni miíndó sandíʼi-xa̱ʼa̱na ndóʼó. Na̱ sáa̱-ini xíni ndóʼó ixandi̱va̱ʼana xíʼinndó, ta kunundó ku̱ʼu̱nndó ni kǒoví na̱ ndíku̱n ku̱a̱ʼa̱n sa̱tándó.

18 ”’Tá ni saá va̱ása xíínndó kandíxandó ña̱ káʼi̱n xíʼinndó, u̱xa̱ka yichi̱ ndakiʼinndó castigo xa̱ʼa̱ ku̱a̱chindó. 19 Sakúkaʼan va̱ʼi̱ nu̱úndó xa̱ʼa̱ ña̱ ni̱nuní kúnindó. Ndakasii̱ ndiví ta va̱ása kuunka sa̱vi̱ ta va̱ása taxii̱ kana ña̱ʼa nu̱ú ñuʼú.* 20 Ndeéní kunaandó, soo ni kǒo ña̱ ndakiʼinvíndó, saáchi kǒo ña̱ʼa kana nu̱ú ñuʼú ta ni kǒo ña̱ʼa kana ndaʼa̱ yitu̱n.

21 ”’Soo, tá ndákundeéndó íxaso̱ʼondó ña̱ káʼi̱n xíʼinndó ta va̱ása xíínndó kandíxandó yi̱ʼi̱, u̱xa̱ka yichi̱ taxii̱ castigo ndaʼa̱ndó xa̱ʼa̱ ku̱a̱chindó. 22 Chindaʼíi̱ kití yukú ña̱ kaxírí se̱ʼendó ta kaxírí kití sa̱na̱ndó, ta va̱ása ku̱a̱ʼáka koondó, ta ni kǒo na̱ yiví kaka yichi̱ nu̱ú xíkandó.

23 ”’Tá va̱ása xíínndó nasamandó miíndó ni ná kuu ndiʼi ña̱yóʼo ta ndákundeéndó íxaso̱ʼondó nu̱úi̱, 24 yi̱ʼi̱ kundasíi̱ kunii̱ ndóʼó ta u̱xa̱ka yichi̱ taxii̱ castigo ndaʼa̱ndó xa̱ʼa̱ ku̱a̱chindó. 25 Yi̱ʼi̱ chindaʼíi̱ na̱ sáa̱-ini xíni ndóʼó ña̱ kanitáʼanna xíʼinndó xa̱ʼa̱ ña̱ sa̱ndíʼi-xa̱ʼa̱ndó trato ña̱ chi̱kai̱ xíʼinndó. Tá ná nde̱eva̱ʼandó ñuundó ña̱ va̱ʼa sakǎkundó miíndó, chindaʼíi̱ iin kue̱ʼe̱ xa̱a̱ña nu̱úndó ta ko̱yovandó ndaʼa̱ na̱ sáa̱-ini xíni ndóʼó. 26 Tá ná sandíʼi-xa̱ʼíi̱ si̱ta̱váʼa ña̱ xíxindó, iin kuití horno* kivi kuniñúʼu 10 ná ñaʼá ña̱ taviná si̱ta̱váʼa, ndataʼvíná ña̱yóʼo ta loʼokavíña taxiná kuxundó, ta kuxundóña soo va̱ása xa̱a̱-inindó.

27 ”’Tá va̱ása xíínndó nasamandó miíndó ni ná kuu ndiʼi ña̱yóʼo ta ndákundeéndó íxaso̱ʼondó nu̱úi̱, 28 yi̱ʼi̱ kundasíi̱ kunii̱ ndóʼó ta u̱xa̱ka yichi̱ taxii̱ castigo ndaʼa̱ndó xa̱ʼa̱ ku̱a̱chindó. 29 Tasaá kuxundó ku̱ñu se̱ʼeta̱andó ta kuxundó ku̱ñu se̱ʼe-síʼindó. 30 Sandíʼi-xa̱ʼíi̱ nu̱ú ndásakáʼnundo ndióxi̱ndó ña̱ vatá, ta sandíʼi-xa̱ʼíi̱ altar nu̱ú chíʼmándó. Tá ná kaʼníi̱ ndóʼó, chindóso koʼndoi̱ ndóʼó sa̱tá ña̱ kini ña̱ ndásakáʼnundó ta kuxíkái̱ nu̱úndó xa̱ʼa̱ ña̱ kukini-inii̱ kunii̱ ndóʼó. 31 Taxii̱ ná sandíʼi-xa̱ʼa̱na ñuundó xíʼin espada ta kǒoka na̱ kindo̱o lugar ña̱ yi̱i̱ nu̱ú ndásakáʼnundó* ta va̱ása taʼmii̱ ña̱ʼa ña̱ xáʼa̱n támi ña̱ sóko̱ndó nu̱úi̱. 32 Yi̱ʼi̱ taxii̱ ña̱ kǒoka na̱ kindo̱o ñuundó ta na̱ sáa̱-ini xíni ndóʼó kundoona nu̱úña ta ndakanda̱ní-inina tá ná kuninaña. 33 Ta yi̱ʼi̱ taxii̱ ña̱ xa̱a̱ síín síín ñuu ku̱ʼu̱nndó kundoondó, taxii̱ ña̱ ná ku̱ʼu̱n na̱ sáa̱-ini xíni ndóʼó kanitáʼanna xíʼinndó xíʼin espada, kǒoka na̱ kindo̱o ñuundó ta ndiʼi-xa̱ʼa̱ ñuundó.

34 ”’Ndiʼi ku̱i̱ya̱ ña̱ ná kundoondó ñuu na̱ sáa̱-ini xíni ndóʼó, ta ná kindo̱o vichí ñuʼúndó, ndakindee̱ña saáchi ku̱a̱ʼání ku̱i̱ya̱ va̱ása níndakindee̱ña. Ku̱i̱ya̱ yóʼo kúú ña̱ ndacháʼviña sábado ña̱ va̱ása níndakindee̱ña. 35 Ndakindee̱ña ndiʼi tiempo ña̱ ná kindo̱o vichí nu̱úña, saáchi va̱ása níndakindee̱ña ndiʼi sábado ña̱ ni̱xi̱yondó nu̱úña.

36 ”’Ta na̱ ná kindo̱o, taxii̱ ña̱ ná kundi̱ʼiní-inina kundoona nu̱ú ñuʼú na̱ sáa̱-ini xíniñaʼá. Tá ná kuniso̱ʼona ña̱ kánda̱ iin yu̱ku̱ loʼo xíʼin ta̱chí, kununa ku̱ʼu̱nna. Táki̱ʼva xínu na̱ kúni̱na kaʼnína xíʼin espada saá kununa ku̱ʼu̱nna, ko̱yona ni kǒo na̱ ndíku̱n ku̱a̱ʼa̱n sa̱tána. 37 Ta sakóyotáʼan miína nda̱a̱ táki̱ʼva kéʼé na̱ xínu nu̱ú na̱ ku̱a̱ʼa̱n kaʼní miína xíʼin espada, ni kǒo na̱ ndíku̱n ku̱a̱ʼa̱n sa̱tána. Va̱ása kuchiñuna kanitáʼanna xíʼin na̱ sáa̱-ini xíni miína. 38 Ku̱a̱ʼání ndóʼó kuvindó ñuu inkana, ta kuvindó nu̱ú ñuʼú na̱ sáa̱-ini xíni ndóʼó. 39 Ndóʼó na̱ ná kindo̱o, xo̱ʼvi̱ndó* nu̱ú ñuʼú na̱ sáa̱-ini xíni ndóʼó xa̱ʼa̱ ku̱a̱chi ña̱ ni̱ki̱ʼvindó. Xo̱ʼvi̱ndó xa̱ʼa̱ ku̱a̱chi na̱ yivándó. 40 Tasaá natúʼunndó xa̱ʼa̱ ku̱a̱chindó, ta saátu xa̱ʼa̱ ku̱a̱chi na̱ yivándó, ta saátu natúʼunndó xa̱ʼa̱ ña̱ va̱ása nda̱kú níxi̱yo inina xíʼi̱n. Ndakunindó ña̱ va̱ása nda̱kú níxi̱yo inindó xíʼi̱n saáchi i̱xaso̱ʼondó nu̱úi̱. 41 Ta tiempo saá, saátu yi̱ʼi̱ kundasíi̱ kunii̱ ndóʼó ta chindaʼíi̱ ndóʼó nu̱ú ñuʼú na̱ sáa̱-ini xíni ndóʼó.

”’Sana nduvitá níma̱ndó ta kixáʼa kusuchí-inindó xa̱ʼa̱ ku̱a̱chi ña̱ ni̱ki̱ʼvindó, tasaá chaʼvindó xa̱ʼa̱ ku̱a̱chindó. 42 Ta yi̱ʼi̱ ndakaʼíi̱n xa̱ʼa̱ trato ña̱ ki̱ndoi̱ xíʼin ta̱ Jacob, ña̱ ki̱ndoi̱ xíʼin ta̱ Isaac, ta ndakaʼíi̱n xa̱ʼa̱ trato ña̱ ki̱ndoi̱ xíʼin ta̱ Abrahán ta saátu ndakaʼíi̱n xa̱ʼa̱ ñuʼúndó. 43 Tá ná va̱ása kundookandó nu̱ú ñuʼúndó, ña̱yóʼo ndakindee̱ña xa̱ʼa̱ ndiʼi sábado ña̱ va̱ása níndakindee̱ña ta kindo̱o vichíña, ta ndóʼó chaʼvindó xa̱ʼa̱ ku̱a̱chindó, saáchi ndóʼó va̱ása níxindiku̱nndó ley ña̱ ta̱xii̱ ndaʼa̱ndó ta ku̱ndasíndó xi̱nindó chiñu ña̱ xa̱ʼndai̱ nu̱úndó. 44 Soo, ni ná keʼéndó ndiʼi ña̱yóʼo, tá ná kundoondó nu̱ú ñuʼú na̱ sáa̱-ini xíni ndóʼó, yi̱ʼi̱ va̱ása kundasínívíi̱ kunii̱ ndóʼó, ni va̱ása sa̱a̱nívíi̱ xíʼinndó ta va̱ása kaʼníi̱ ndóʼó, saáchi tá saá ná keʼíi̱, ndiʼi-xa̱ʼa̱ trato ña̱ ke̱ʼíi̱ xíʼinndó, chi yi̱ʼi̱ kúú Jehová Ndióxi̱ndó. 45 Xa̱ʼa̱ ña̱ va̱ʼa miíndó, ndakaʼíi̱n xa̱ʼa̱ trato ña̱ ke̱ʼíi̱ xíʼin na̱ táʼanndó na̱ xi̱ndoo xi̱naʼá, na̱ ta̱vái̱ ti̱xin ñuu Egipto ña̱ va̱ʼa koi̱ Ndióxi̱na ta ku̱a̱ʼání na̱ ñuu xi̱ni ña̱yóʼo. Yi̱ʼi̱ kúú Jehová’”.

46 Ña̱yóʼo kúú chiñu ña̱ xa̱ʼnda Jehová xíʼin ley ña̱ ta̱xira kundiku̱n na̱ israelita tá ni̱ka̱ʼa̱nra xíʼin ta̱ Moisés chí yuku̱ Sinaí.

27 Jehová ni̱ka̱ʼa̱n tukura xíʼin ta̱ Moisés, ta ka̱chira: 2 “Ña̱yóʼo ka̱ʼún xíʼin na̱ israelita: ‘Tá iin na̱ yiví kúni̱na taxina ya̱ʼvi iin na̱ yiví ndaʼa̱ Jehová, ña̱ va̱ʼa kindo̱ona keʼéna iin ña̱ʼa nu̱úra, 3 ya̱ʼvi iin ta̱a ta̱ kúúmií 20 nda̱a̱ 60 ku̱i̱ya̱ kooña 50 xu̱ʼún ña̱ plata,* ta katanaña* nda̱a̱ táki̱ʼva kátana plata lugar ña̱ yi̱i̱. 4 Soo tá iin ñaʼá kúú ñáyóʼo, 30 xu̱ʼún ña̱ plata koo ya̱ʼviñá. 5 Ta 20 xu̱ʼún ña̱ plata chaʼvina xa̱ʼa̱ na̱ ta̱a na̱ kúúmií 5 nda̱a̱ 20 ku̱i̱ya̱, ta 10 xu̱ʼún ña̱ plata chaʼvina xa̱ʼa̱ ná ñaʼá ná kúúmií 5 nda̱a̱ 20 ku̱i̱ya̱. 6 Ta u̱ʼu̱n xu̱ʼún ña̱ plata koo ya̱ʼvi iin ta̱ loʼo ta̱ kúúmií iin yo̱o̱ nda̱a̱ u̱ʼu̱n ku̱i̱ya̱, ta u̱ni̱ xu̱ʼún ña̱ plata koo ya̱ʼvi iin ñá loʼo ñá kúúmií iin yo̱o̱ nda̱a̱ u̱ʼu̱n ku̱i̱ya̱.

7 ”’Ta 15 xu̱ʼún ña̱ plata koo ya̱ʼvi ta̱ kúúmií 60 á ku̱a̱ʼáka ku̱i̱ya̱, ta 10 xu̱ʼún ña̱ plata koo ya̱ʼvi ñá ñaʼá ñá kúúmií 60 á ku̱a̱ʼáka ku̱i̱ya̱. 8 Soo tá na̱ kíndo̱o keʼé iin ña̱ʼa nu̱ú Ndióxi̱ ndáʼvinína ta kǒo kívi chaʼvina, xíniñúʼu ku̱ʼu̱nna nu̱ú ta̱ su̱tu̱ ta ta̱yóʼo ka̱ʼa̱nra xíʼinna nda̱saa chaʼvina. Ta ña̱ kivi chaʼvi iin na̱ kíndo̱o keʼé iin ña̱ʼa nu̱ú Ndióxi̱ kúú ña̱ ka̱ʼa̱n ta̱ su̱tu̱ chaʼvina.

9 ”’Tá ki̱ndoona taxina iin kití tí kivi so̱kóna nu̱ú* Jehová, nda̱a̱ ndáaka ña̱ʼa ña̱ ná taxina ndaʼa̱ Jehová nduuña ña̱ yi̱i̱. 10 Va̱ása kivi nasamana tíyóʼo, ni va̱ása kivi nasamana iin tí va̱ʼa xa̱ʼa̱ iin tí va̱ása va̱ʼa, ni iin tí va̱ása va̱ʼa xa̱ʼa̱ iin tí va̱ʼa. Soo tá níʼina inka kití ta kúni̱na nasamanarí xíʼin tí ta̱xina tá nu̱ú, u̱vi̱ saá tíyóʼo nduurí tí yi̱i̱. 11 Soo tá iin kití tí yaku̱a̱ kúúrí ta va̱ása kívi so̱kónarí nu̱ú Jehová, xíniñúʼu ku̱ʼu̱nna xíʼinrí nu̱ú ta̱ su̱tu̱. 12 Ta ta̱ su̱tu̱ kotora á tí va̱ʼa kúúrí á tí va̱ása va̱ʼa kúúrí, tasaá chinúura ya̱ʼvirí. 13 Soo tá na̱ kíndo̱o keʼé iin ña̱ʼa nu̱ú Ndióxi̱ kúni̱na ndasatá* tukuna tí kití yóʼo, xíniñúʼu ndataxina ya̱ʼvirí ta ndachinúukana inka táʼví* ya̱ʼvirí.

14 ”’Ta tá iinna ndásayi̱i̱na veʼena ta táxinaña ndaʼa̱ Jehová ña̱ va̱ʼa kooña ña̱ yi̱i̱, ta̱ su̱tu̱ kúú ta̱ xíniñúʼu koto á ña̱ va̱ʼa kúúña á ña̱ va̱ása va̱ʼa kúúña, tasaá chinúura ya̱ʼviña. Ña̱ ná ka̱ʼa̱n ta̱ su̱tu̱, ña̱kán koo ya̱ʼvi veʼe yóʼo. 15 Soo tá na̱ ta̱xi veʼe yóʼo kúni̱na ndasatá tukunaña xíniñúʼu taxina ya̱ʼvi veʼe yóʼo, ta ndachinúuna inka táʼví* ya̱ʼviña, tasaá ndikóña kooña kuentana.

16 ”’Tá iinna ndásayi̱i̱na iin táʼví ñuʼú nu̱ú chíʼina ña̱ va̱ʼa taxinaña ndaʼa̱ Jehová, ña̱ va̱ʼa kunda̱a̱-inina nda̱saa koo ya̱ʼvi ña̱yóʼo xíniñúʼu tavána ki̱ʼva nda̱saa ndiki̱n kuniñúʼuna ña̱ chiʼina nu̱úña, 50 xu̱ʼún ña̱ plata koo ya̱ʼvi 130 kilo* ndiki̱n ña̱ cebada. 17 Tá Ku̱i̱ya̱ ña̱ sáña̱ na̱ yiví kúni̱na taxina ñuʼú yóʼo, va̱ása nasa̱maví ya̱ʼviña. 18 Soo tá kúni̱na taxina ñuʼú yóʼo tá xa̱a̱ ni̱ya̱ʼa Ku̱i̱ya̱ ña̱ sáña̱ na̱ yiví, ta̱ su̱tu̱ tavára ki̱ʼva nda̱saaka ku̱i̱ya̱ kúma̱ní ña̱ kixaa̱ Ku̱i̱ya̱ ña̱ sáña̱ na̱ yiví, tasaá sanúura ya̱ʼviña. 19 Soo tá na̱ ta̱xi ñuʼú yóʼo kúni̱na ndasatá tukunaña, xíniñúʼu ndataxina ya̱ʼviña ta ndachinúukana inka táʼví* ya̱ʼviña, tasaá ndikó tukuña kooña kuentana. 20 Soo tá va̱ása ndásatána ñuʼúna ta inka na̱ yiví ki̱ʼin ña̱yóʼo, va̱ása kivika ndasatá tukunaña. 21 Tá ná kixaa̱ Ku̱i̱ya̱ ña̱ sáña̱ na̱ yiví, ñuʼú yóʼo nduyi̱i̱ña ta xa̱a̱ña kooña kuenta Jehová, tasaá nduuña kuenta na̱ su̱tu̱.

22 ”’Tá iin na̱ yiví ndásayi̱i̱na iin ñuʼú, ña̱ va̱ʼa xa̱a̱ña kooña kuenta Jehová, soo ña̱ sa̱tána kúú ña̱yóʼo ta su̱ví herenciana kúúña, 23 ta̱ su̱tu̱ kotora nda̱saaka ku̱i̱ya̱ kúma̱ní ña̱ kixaa̱ Ku̱i̱ya̱ ña̱ sáña̱ na̱ yiví, tasaá chinúura ya̱ʼvi ña̱yóʼo, ta mií ki̱vi̱ saá ka̱ʼa̱nra xíʼinna nda̱saa ya̱ʼviña. Iin ña̱ yi̱i̱ní ña̱ nda̱taxina ndaʼa̱ Jehová kúú ña̱yóʼo. 24 Tá ná kixaa̱ Ku̱i̱ya̱ ña̱ sáña̱ na̱ yiví, ndataxina ñuʼú yóʼo ndaʼa̱ na̱ sa̱tánaña nu̱ú, na̱ xíʼin kuenta mií ñuʼú yóʼo.

25 ”’Xíniñúʼu kuniñúʼuna ki̱ʼva ña̱ kátana plata lugar ña̱ yi̱i̱, ña̱ va̱ʼa tavána ya̱ʼvi ndiʼi ña̱ʼa. Iin xu̱ʼún ña̱ plata ve̱eña 12 gramo.*

26 ”’Soo nda̱a̱ ni iinna va̱ása xíniñúʼu ndasayi̱i̱na se̱ʼenu̱ú kití sa̱na̱na, ña̱ taxinarí ndaʼa̱ Jehová, chi xa̱a̱ kuenta miívara kúú tíyóʼo. Ni kúúrí si̱ndi̱ki̱ á ndikachi,* kuenta Jehová kúúrí. 27 Tá iin kití yaku̱a̱ kúú tíyóʼo ta cháʼvina ña̱ ndakiʼin tukunarí, xíniñúʼu chaʼvina ya̱ʼvirí ta ndachinúukana inka táʼví* ya̱ʼvi tíyóʼo. Soo tá kǒo na̱ níndasatá tíyóʼo, xi̱íkonarí nda̱a̱ táki̱ʼva íyo ya̱ʼvirí.

28 ”’Soo va̱ása kivi xi̱íkona* ni ndasatá tukuna ña̱ʼa ña̱ xa̱a̱ nda̱taxiva̱ʼana ndaʼa̱ Jehová, ni kúúna iin na̱ yiví, iin kití á iin ñuʼú ña̱ kúú kuentana. Ndiʼi ña̱ ná taxina ndaʼa̱ Jehová ña̱ yi̱i̱ní kúú ña̱yóʼo. 29 Va̱ása kivi ndakiʼin tukuna nda̱a̱ ni iin na̱ yiví na̱ xa̱a̱ nda̱taxina ña̱ kuvina, chi xíniñúʼu kuviva na̱yóʼo.

30 ”’Ndiʼi ña̱ kána nu̱ú ñuʼú, iin táʼvíña* kúú kuenta Jehová ni kúúña ña̱ chíʼina nu̱ú ñuʼú á ku̱i̱ʼi ña̱ kána ndaʼa̱ yitu̱n. Iin ña̱ yi̱i̱ní ña̱ ndataxina ndaʼa̱ Jehová kúú ña̱yóʼo. 31 Tá iinna kúni̱na ndasatá tukuna iin táʼví ña̱ ta̱xina, xíniñúʼu ndataxina inka táʼvíña.* 32 Tá ná ndakaʼvi ta̱ ndáa kití, si̱ndi̱ki̱ sa̱na̱ra, ndikachi sa̱na̱ra xíʼin ti̱xúʼú* sa̱na̱ra, tí u̱xu̱* kúú tí koo kuenta Jehová ta tí yi̱i̱ koorí. 33 Va̱ása xíniñúʼu kotona tí kití yóʼo á tí va̱ʼa kúúrí á tí va̱ása va̱ʼa kúúrí ta va̱ása xíniñúʼu nasamanarí. Soo tá iinna kúni̱na nasamanarí, tí nu̱ú xíʼin tí u̱vi̱ tí yi̱i̱ xa̱a̱rí koorí, va̱ása kivi ndasatá tukuna tíyóʼo’”.

34 Ña̱yóʼo kúú ley ña̱ ta̱xi Jehová kundiku̱n na̱ israelita tá ni̱ka̱ʼa̱nra xíʼin ta̱ Moisés chí yuku̱ Sinaí.