NÚMEROS

1 Tá ki̱vi̱ nu̱ú ña̱ yo̱o̱ u̱vi̱, ña̱ ku̱i̱ya̱ u̱vi̱ ña̱ ke̱ena chí Egipto, Jehová ni̱ka̱ʼa̱nra xíʼin ta̱ Moisés nu̱ú ñuʼú yichi̱ ña̱ Sinaí, chí nu̱ú íyo tabernáculo. Ta ka̱chira: 2 “Ndakaʼvindó ndiʼi na̱ ñuu Israel, kaʼyindó ki̱vi̱ iin tá iin na̱ veʼena nda̱a̱ táki̱ʼva ni̱xi̱yo ki̱vi̱ na̱ táʼanna na̱ xi̱ndoo xi̱naʼá, ta kaʼyindó ki̱vi̱ ndiʼi na̱ ta̱a nu̱ú iin lista. 3 Miíún xíʼin ta̱ Aarón xíniñúʼu kaʼyindó ki̱vi̱ iin tá iin tiʼvi na̱yóʼo, ndiʼi na̱ xi̱kuumií 20 á ku̱a̱ʼáka ku̱i̱ya̱ ta na̱yóʼo kúú na̱ kivi ku̱ʼu̱n nu̱ú ku̱a̱chi xa̱ʼa̱ na̱ ñuu Israel.

4 ”Ti̱xin iin tá iin tribu ndakiʼinndó iin na̱ ta̱a na̱ ku̱ʼu̱n xíʼinndó; ta iin tá iin na̱yóʼo xíniñúʼu koona na̱ níʼi yichi̱ nu̱ú na̱ tribu na̱ ñuu Israel. 5 Ña̱yóʼo kúú ki̱vi̱ na̱ ta̱a na̱ ku̱ʼu̱n xíʼinndó: ta̱ Elizur se̱ʼe ta̱ Sedeur, ta̱ ke̱e ti̱xin tribu ta̱ Rubén; 6 ta̱ Selumiel se̱ʼe ta̱ Zurisadái, ta̱ ke̱e ti̱xin tribu ta̱ Simeón; 7 ta̱ Nahsón se̱ʼe ta̱ Aminadab, ta̱ ke̱e ti̱xin tribu ta̱ Judá; 8 ta̱ Netanel se̱ʼe ta̱ Zuar, ta̱ ke̱e ti̱xin tribu ta̱ Isacar; 9 ta̱ Eliab se̱ʼe ta̱ Helón, ta̱ ke̱e ti̱xin tribu ta̱ Zabulón; 10 ta̱ Elisamá se̱ʼe ta̱ Amihud, ta̱ ke̱e ti̱xin tribu ta̱ Efraín xíʼin ta̱ Gamaliel se̱ʼe ta̱ Pedahzur ta̱ ke̱e ti̱xin tribu ta̱ Manasés, ta̱ Efraín xíʼin ta̱ Manasés xi̱kuuna se̱ʼe ta José; 11 ta̱ Abidán se̱ʼe ta̱ Guideoní, ta̱ ke̱e ti̱xin tribu ta̱ Benjamín; 12 ta̱ Ahiézer se̱ʼe ta̱ Amisadái, ta̱ ke̱e ti̱xin tribu ta̱ Dan; 13 ta̱ Paguiel se̱ʼe ta̱ Ocrán, ta̱ ke̱e ti̱xin tribu ta̱ Aser; 14 ta̱ Eliasaf se̱ʼe ta̱ Deuel, ta̱ ke̱e ti̱xin tribu ta̱ Gad; 15 ta̱ Ahirá se̱ʼe ta̱ Enán, ta̱ ke̱e ti̱xin tribu ta̱ Neftalí. 16 Na̱yóʼo kúú na̱ ndaka̱xinndó ti̱xin na̱ ñuu Israel. Na̱yóʼo kúú na̱ níʼi yichi̱ nu̱ú na̱ tribu na̱ yivána, na̱ níʼi yichi̱ nu̱ú mil na̱ yiví ti̱xin ñuu Israel”.

17 Tasaá ta̱ Moisés xíʼin ta̱ Aarón nda̱kiʼinna na̱ ta̱a na̱ nda̱kaxin Ndióxi̱. 18 Tá ki̱vi̱ nu̱ú ña̱ yo̱o̱ u̱vi̱, sa̱ndátakana ndiʼi na̱ ñuu ña̱ va̱ʼa ndakaʼvina na̱ ta̱a na̱ xi̱kuumií 20 á ku̱a̱ʼáka ku̱i̱ya̱ ta kaʼyina ki̱vi̱ iin tá iin na̱yóʼo, saátu ki̱vi̱ na̱ veʼena xíʼin na̱ táʼanna na̱ xi̱ndoo xi̱naʼá, 19 nda̱a̱ táki̱ʼva ni̱ka̱ʼa̱n Jehová xíʼin ta̱ Moisés. Ta ka̱ʼyira ki̱vi̱na tá ndóona chí nu̱ú ñuʼú yi̱chí ña̱ Sinaí.

20 Ka̱ʼyina ki̱vi̱ na̱ se̱ʼe ta̱ Rubén, ta̱ xi̱kuu se̱ʼenu̱ú ta̱ Israel nda̱a̱ táki̱ʼva ni̱xi̱yo ki̱vi̱ na̱ veʼena ta saátu na̱ táʼanna na̱ xi̱ndoo xi̱naʼá. Nda̱kaʼvina ndiʼi na̱ ta̱a na̱ xi̱kuumií 20 á ku̱a̱ʼáka ku̱i̱ya̱ na̱ kivi ku̱ʼu̱n nu̱ú ku̱a̱chi, 21 ta ndiʼi na̱ nda̱kaʼvina ti̱xin tribu ta̱ Rubén xi̱kuuna 46,500.

22 Ka̱ʼyina ki̱vi̱ na̱ se̱ʼe ta̱ Simeón nda̱a̱ táki̱ʼva ni̱xi̱yo ki̱vi̱ na̱ veʼena ta saátu na̱ táʼanna na̱ xi̱ndoo xi̱naʼá. Nda̱kaʼvina ndiʼi na̱ ta̱a na̱ xi̱kuumií 20 á ku̱a̱ʼáka ku̱i̱ya̱ na̱ kivi ku̱ʼu̱n nu̱ú ku̱a̱chi, 23 ta ndiʼi na̱ nda̱kaʼvina ti̱xin tribu ta̱ Simeón xi̱kuuna 59,300.

24 Ka̱ʼyina ki̱vi̱ na̱ se̱ʼe ta̱ Gad, nda̱a̱ táki̱ʼva ni̱xi̱yo ki̱vi̱ na̱ veʼena ta saátu na̱ táʼanna na̱ xi̱ndoo xi̱naʼá. Nda̱kaʼvina ndiʼi na̱ ta̱a na̱ xi̱kuumií 20 á ku̱a̱ʼáka ku̱i̱ya̱ na̱ kivi ku̱ʼu̱n nu̱ú ku̱a̱chi, 25 ta ndiʼi na̱ nda̱kaʼvina ti̱xin tribu ta̱ Gad xi̱kuuna 45,650.

26 Ka̱ʼyina ki̱vi̱ na̱ se̱ʼe ta̱ Judá, nda̱a̱ táki̱ʼva ni̱xi̱yo ki̱vi̱ na̱ veʼena ta saátu na̱ táʼanna na̱ xi̱ndoo xi̱naʼá. Nda̱kaʼvina ndiʼi na̱ ta̱a na̱ xi̱kuumií 20 á ku̱a̱ʼáka ku̱i̱ya̱ na̱ kivi ku̱ʼu̱n nu̱ú ku̱a̱chi, 27 ta ndiʼi na̱ nda̱kaʼvina ti̱xin tribu ta̱ Judá xi̱kuuna 74,600.

28 Ka̱ʼyina ki̱vi̱ na̱ se̱ʼe ta̱ Isacar, nda̱a̱ táki̱ʼva ni̱xi̱yo ki̱vi̱ na̱ veʼena ta saátu na̱ táʼanna na̱ xi̱ndoo xi̱naʼá. Nda̱kaʼvina ndiʼi na̱ ta̱a na̱ xi̱kuumií 20 á ku̱a̱ʼáka ku̱i̱ya̱ na̱ kivi ku̱ʼu̱n nu̱ú ku̱a̱chi, 29 ta ndiʼi na̱ nda̱kaʼvina ti̱xin tribu ta̱ Isacar xi̱kuuna 54,400.

30 Ka̱ʼyina ki̱vi̱ na̱ se̱ʼe ta̱ Zabulón, nda̱a̱ táki̱ʼva ni̱xi̱yo ki̱vi̱ na̱ veʼena ta saátu na̱ táʼanna na̱ xi̱ndoo xi̱naʼá. Nda̱kaʼvina ndiʼi na̱ ta̱a na̱ xi̱kuumií 20 á ku̱a̱ʼáka ku̱i̱ya̱, na̱ kivi ku̱ʼu̱n nu̱ú ku̱a̱chi, 31 ta ndiʼi na̱ nda̱kaʼvina ti̱xin tribu ta̱ Zabulón xi̱kuuna 57,400.

32 Ka̱ʼyina ki̱vi̱ na̱ se̱ʼe ta̱ Efraín ta̱ xi̱kuu se̱ʼe ta̱ José, nda̱a̱ táki̱ʼva ni̱xi̱yo ki̱vi̱ na̱ veʼena ta saátu na̱ táʼanna na̱ xi̱ndoo xi̱naʼá. Nda̱kaʼvina ndiʼi na̱ ta̱a na̱ xi̱kuumií 20 á ku̱a̱ʼáka ku̱i̱ya̱, na̱ kivi ku̱ʼu̱n nu̱ú ku̱a̱chi, 33 ta ndiʼi na̱ nda̱kaʼvina ti̱xin tribu ta̱ Efraín xi̱kuuna 40,500.

34 Ka̱ʼyina ki̱vi̱ na̱ se̱ʼe ta̱ Manasés, nda̱a̱ táki̱ʼva ni̱xi̱yo ki̱vi̱ na̱ veʼena ta saátu na̱ táʼanna na̱ xi̱ndoo xi̱naʼá. Nda̱kaʼvina ndiʼi na̱ ta̱a na̱ xi̱kuumií 20 á ku̱a̱ʼáka ku̱i̱ya̱, na̱ kivi ku̱ʼu̱n nu̱ú ku̱a̱chi, 35 ta ndiʼi na̱ nda̱kaʼvina ti̱xin tribu ta̱ Manasés xi̱kuuna 32,200.

36 Ka̱ʼyina ki̱vi̱ na̱ se̱ʼe ta̱ Benjamín, nda̱a̱ táki̱ʼva ni̱xi̱yo ki̱vi̱ na̱ veʼena ta saátu na̱ táʼanna na̱ xi̱ndoo xi̱naʼá. Nda̱kaʼvina ndiʼi na̱ ta̱a na̱ xi̱kuumií 20 á ku̱a̱ʼáka ku̱i̱ya̱ na̱ kivi ku̱ʼu̱n nu̱ú ku̱a̱chi, 37 ta ndiʼi na̱ nda̱kaʼvina ti̱xin tribu ta̱ Benjamín xi̱kuuna 35,400.

38 Ka̱ʼyina ki̱vi̱ na̱ se̱ʼe ta̱ Dan, nda̱a̱ táki̱ʼva ni̱xi̱yo ki̱vi̱ na̱ veʼena ta saátu na̱ táʼanna na̱ xi̱ndoo xi̱naʼá. Nda̱kaʼvina ndiʼi na̱ ta̱a na̱ xi̱kuumií 20 á ku̱a̱ʼáka ku̱i̱ya̱ na̱ kivi ku̱ʼu̱n nu̱ú ku̱a̱chi, 39 ta ndiʼi na̱ nda̱kaʼvina ti̱xin tribu ta̱ Dan xi̱kuuna 62,700.

40 Ka̱ʼyina ki̱vi̱ na̱ se̱ʼe ta̱ Aser, nda̱a̱ táki̱ʼva ni̱xi̱yo ki̱vi̱ na̱ veʼena ta saátu na̱ táʼanna na̱ xi̱ndoo xi̱naʼá. Nda̱kaʼvina ndiʼi na̱ ta̱a na̱ xi̱kuumií 20 á ku̱a̱ʼáka ku̱i̱ya̱ na̱ kivi ku̱ʼu̱n nu̱ú ku̱a̱chi, 41 ta ndiʼi na̱ nda̱kaʼvina ti̱xin tribu ta̱ Aser xi̱kuuna 41,500.

42 Ka̱ʼyina ki̱vi̱ na̱ se̱ʼe ta̱ Neftalí nda̱a̱ táki̱ʼva ni̱xi̱yo ki̱vi̱ na̱ veʼena ta saátu na̱ táʼanna na̱ xi̱ndoo xi̱naʼá. Nda̱kaʼvina ndiʼi na̱ ta̱a na̱ xi̱kuumií 20 á ku̱a̱ʼáka ku̱i̱ya̱ na̱ kivi ku̱ʼu̱n nu̱ú ku̱a̱chi, 43 ta ndiʼi na̱ nda̱kaʼvina ti̱xin tribu ta̱ Neftalí xi̱kuuna 53,400.

44 Na̱yóʼo kúú na̱ nda̱kaʼvi ta̱ Moisés xíʼin ta̱ Aarón ta saátu 12 na̱ xi̱niʼi yichi̱ nu̱ú na̱ ñuu Israel, ta saátu xi̱niʼina yichi̱ nu̱ú na̱ tribuna. 45 Ta ndiʼi na̱ israelita na̱ xi̱kuumií 20 á ku̱a̱ʼáka ku̱i̱ya̱ na̱ kivi ku̱ʼu̱n nu̱ú ku̱a̱chi, ka̱ʼyina ki̱vi̱ na̱yóʼo nda̱a̱ táki̱ʼva ni̱xi̱yo ki̱vi̱ na̱ táʼanna na̱ xi̱ndoo xi̱naʼá, 46 ta ndiʼi na̱ nda̱kaʼyina ki̱vi̱ xi̱kuuna 603,550.

47 Soo na̱ levita va̱ása níndakaʼvinana xíʼin ndiʼi na̱ tribu. 48 Jehová ni̱ka̱ʼa̱nra xíʼin ta̱ Moisés: 49 “Iinlá na̱ tribu ta̱ Leví kúú na̱ va̱ása xíniñúʼu kaʼyiún ki̱vi̱; va̱ása xíniñúʼu ndakaʼviúnna xíʼin ndiʼika na̱ israelita. 50 Ta xíniñúʼu taxiún chiñu ndaʼa̱ na̱ levita ña̱ kundaana tabernáculo nu̱ú ndíkaa̱ Arca ña̱ trato, ta saátu ndiʼi ña̱ kúúmií túyóʼo. Na̱yóʼo kúú na̱ kuniʼi tabernáculo ta saátu ndiʼi ña̱ʼa ña̱ kúúmiíña, ta kachíñuna ti̱xin tabernáculo ta kundoona yatin nu̱ú íyoña. 51 Tá xíniñúʼu ku̱ʼu̱n tabernáculo xíʼinna, na̱ levita kúú na̱ ndakani ña̱yóʼo ta tá xíniñúʼu ndachitáʼan tukuna tabernáculo, na̱ levita kúú na̱ xíniñúʼu keʼé ña̱yóʼo. Nda̱a̱ ndáaka na̱ ná keʼé ña̱yóʼo ta su̱ví chiñuna kúúña,* xíniñúʼu kuvina.

52 ”Iin tá iin na̱ israelita xíniñúʼu ixava̱ʼana veʼe loʼona nu̱ú xa̱a̱ ni̱ka̱ʼa̱nna xíʼinna koona, ta iin tá iin na̱ ta̱a xíniñúʼu koona nu̱ú ni̱ka̱ʼa̱nna koo u̱ni̱ tribu, ta tiʼvi tá tiʼvi kundoona. 53 Ta na̱ levita xíniñúʼu kindo̱ona kundoona yatin nu̱ú íyo tabernáculo nu̱ú ndíkaa̱ Arca ña̱ trato tasaá va̱ása sa̱íi̱ xíʼin na̱ ñuu Israel. Ta na̱ levita kúú na̱ kuumií chiñu ña̱ kundaana* tabernáculo nu̱ú ndíkaa̱ Arca ña̱ trato”.

54 Ta na̱ ñuu Israel, ke̱ʼéna ndiʼi ña̱ ni̱ka̱ʼa̱n Jehová xíʼin ta̱ Moisés. Nda̱a̱ táki̱ʼva íyo ña̱ ni̱ka̱ʼa̱nra, saá ke̱ʼéna.

2 Tasaá Jehová ni̱ka̱ʼa̱nra xíʼin ta̱ Moisés ta saátu xíʼin ta̱ Aarón. Ta ka̱chira: 2 “Na̱ israelita xíniñúʼu kundoona nu̱ú ni̱ka̱ʼa̱nna xíʼinna kundoo na̱ u̱ni̱ tribu, iin tá iinna xíniñúʼu kundoona yatin nu̱ú chindúʼuna señal xa̱ʼa̱ na̱ táʼanna na̱ xi̱ndoo xi̱naʼá. Ta xíniñúʼu kundoona yatin nu̱ú níndichi tabernáculo ta veʼe válína kotoña chí nu̱ú níndichi tabernáculo.

3 ”Ta chí nu̱ú kíta ñu̱ʼu* kundoo u̱ni̱ tribu ta̱ Judá ta xa̱a̱ tiʼvi tá tiʼvi kundoona; ta̱ níʼi yichi̱ nu̱ú na̱ tribu ta̱ Judá kúú ta̱ Nahsón se̱ʼe ta̱ Aminadab. 4 Ta na̱ ta̱a na̱ kúúmií ta̱yóʼo, na̱ nda̱kaʼyi̱ ki̱vi̱ ña̱ kivi ku̱ʼu̱nna nu̱ú ku̱a̱chi kúúna 74,600. 5 Ta síi̱n* na̱yóʼo kundoo na̱ tribu ta̱ Isacar; ta̱ níʼi yichi̱ nu̱ú na̱ tribu ta̱ Isacar kúú ta̱ Netanel se̱ʼe ta̱ Zuar. 6 Ta na̱ ta̱a na̱ kúúmií ta̱yóʼo, na̱ nda̱kaʼyi̱ ki̱vi̱ ña̱ kivi ku̱ʼu̱nna nu̱ú ku̱a̱chi kúúna 54,400. 7 Chí inka táʼví koo na̱ tribu ta̱ Zabulón; ta̱ níʼi yichi̱ nu̱ú na̱ tribu ta̱ Zabulón kúú ta̱ Eliab se̱ʼe ta̱ Helón. 8 Ta na̱ ta̱a na̱ kúúmií ta̱yóʼo, na̱ nda̱kaʼyi̱ ki̱vi̱ ña̱ kivi ku̱ʼu̱nna nu̱ú ku̱a̱chi kúúna 57,400.

9 ”Ndiʼi na̱ ta̱a na̱ kundoo xíʼin na̱ tribu ta̱ Judá na̱ nda̱kaʼyina ki̱vi̱ ña̱ kivi ku̱ʼu̱nna nu̱ú ku̱a̱chi kúúna 186,400. Ta na̱yóʼo kúú na̱ siʼna kani veʼe válína tá xa̱a̱ ná ku̱ʼu̱nna.

10 ”Chí táʼví sur kundoo u̱ni̱ tribu ta̱ Rubén ta xa̱a̱ tiʼvi tá tiʼvi kundoona; ta̱ níʼi yichi̱ nu̱ú na̱ tribu ta̱ Rubén kúú ta̱ Elizur se̱ʼe ta̱ Sedeur. 11 Ta na̱ ta̱a na̱ kúúmií ta̱yóʼo, na̱ nda̱kaʼyi̱ ki̱vi̱ ña̱ kivi ku̱ʼu̱nna nu̱ú ku̱a̱chi kúúna 46,500. 12 Síi̱n na̱yóʼo kundoo na̱ tribu ta̱ Simeón; ta̱ níʼi yichi̱ nu̱ú na̱ tribu ta̱ Simeón kúú ta̱ Selumiel se̱ʼe ta̱ Zurisadái. 13 Ta na̱ ta̱a na̱ kúúmií ta̱yóʼo, na̱ nda̱kaʼyi̱ ki̱vi̱ ña̱ kivi ku̱ʼu̱nna nu̱ú ku̱a̱chi kúúna 59,300. 14 Chí inka táʼví koo na̱ tribu ta̱ Gad; ta̱ níʼi yichi̱ nu̱ú na̱ tribu ta̱ Gad kúú ta̱ Eliasaf se̱ʼe ta̱ Reuel. 15 Ta na̱ ta̱a na̱ kúúmií ta̱yóʼo, na̱ nda̱kaʼyi̱ ki̱vi̱ ña̱ kivi ku̱ʼu̱nna nu̱ú ku̱a̱chi kúúna 45,650.

16 ”Ndiʼi na̱ ta̱a na̱ nda̱kaʼyina ki̱vi̱ ña̱ kivi ku̱ʼu̱nna nu̱ú ku̱a̱chi na̱ kundoo xíʼin na̱ tribu ta̱ Rubén kúúna 151,450, ta na̱yóʼo kúú na̱ u̱vi̱ na̱ xíniñúʼu kani veʼe válína tá xa̱a̱ ná ku̱ʼu̱nna.

17 ”Tá ná ku̱ʼu̱nna xíʼin tabernáculo, na̱ levita kúú na̱ xíniñúʼu ku̱ʼu̱n ma̱ʼñú nu̱ú íyo veʼe válí na̱ ñuu.

”Nda̱a̱ táki̱ʼva ni̱ka̱ʼa̱nna xíʼinna kundoona saá xíniñúʼu ku̱ʼu̱nna, nda̱a̱ táki̱ʼva xa̱a̱ nda̱taʼví u̱ni̱ tá u̱ni̱ na̱ tribu.

18 ”Chí nu̱ú kíʼvi ñu̱ʼu kundoo u̱ni̱ tribu ta̱ Efraín, ta xa̱a̱ tiʼvi tá tiʼvi kundoona; ta̱ níʼi yichi̱ nu̱ú na̱ tribu ta̱ Efraín kúú ta̱ Elisamá se̱ʼe ta̱ Amihud. 19 Ta na̱ ta̱a na̱ kúúmií ta̱yóʼo, na̱ nda̱kaʼyi̱ ki̱vi̱ ña̱ kivi ku̱ʼu̱nna nu̱ú ku̱a̱chi kúúna 40,500. 20 Síi̱n na̱yóʼo kundoo na̱ tribu ta̱ Manasés; ta̱ níʼi yichi̱ nu̱ú na̱ tribu ta̱ Manasés kúú ta̱ Gamaliel se̱ʼe ta̱ Pedahzur. 21 Ta na̱ ta̱a na̱ kúúmií ta̱yóʼo, na̱ nda̱kaʼyi̱ ki̱vi̱ ña̱ kivi ku̱ʼu̱nna nu̱ú ku̱a̱chi kúúna 32,200. 22 Chí inka táʼví koo na̱ tribu ta̱ Benjamín; ta̱ níʼi yichi̱ nu̱ú na̱ tribu ta̱ Benjamín kúú ta̱ Abidán se̱ʼe ta̱ Guideoní. 23 Ta na̱ ta̱a na̱ kúúmií ta̱yóʼo, na̱ nda̱kaʼyi̱ ki̱vi̱ ña̱ kivi ku̱ʼu̱nna nu̱ú ku̱a̱chi kúúna 35,400.

24 ”Ndiʼi na̱ ta̱a na̱ kundoo xíʼin na̱ tribu ta̱ Efraín na̱ nda̱kaʼyina ki̱vi̱ ña̱ kivi ku̱ʼu̱nna nu̱ú ku̱a̱chi kúúna 108,100, ta na̱yóʼo kúú na̱ u̱ni̱ na̱ xíniñúʼu kani veʼe válína tá xa̱a̱ ná ku̱ʼu̱nna.

25 ”Chí norte kundoo u̱ni̱ tribu ta̱ Dan ta xa̱a̱ tiʼvi tá tiʼvi kundoona; ta̱ níʼi yichi̱ nu̱ú na̱ tribu ta̱ Dan kúú ta̱ Ahiézer se̱ʼe ta̱ Amisadái. 26 Ta na̱ ta̱a na̱ kúúmií ta̱yóʼo, na̱ nda̱kaʼyi̱ ki̱vi̱ ña̱ kivi ku̱ʼu̱nna nu̱ú ku̱a̱chi kúúna 62,700. 27 Síi̱n na̱yóʼo kundoo na̱ tribu ta̱ Aser; ta̱ níʼi yichi̱ nu̱ú na̱ tribu ta̱ Aser kúú ta̱ Paguiel se̱ʼe ta̱ Ocrán. 28 Ta na̱ ta̱a na̱ kúúmií ta̱yóʼo, na̱ nda̱kaʼyi̱ ki̱vi̱ ña̱ kivi ku̱ʼu̱nna nu̱ú ku̱a̱chi kúúna 41,500. 29 Chí inka táʼví koo na̱ tribu ta̱ Neftalí; ta̱ níʼi yichi̱ nu̱ú na̱ tribu ta̱ Neftalí kúú ta̱ Ahirá se̱ʼe ta̱ Enán. 30 Ta na̱ ta̱a na̱ kúúmií ta̱yóʼo, na̱ nda̱kaʼyi̱ ki̱vi̱ ña̱ kivi ku̱ʼu̱nna nu̱ú ku̱a̱chi kúúna 53,400.

31 ”Ndiʼi na̱ ta̱a na̱ kundoo xíʼin na̱ tribu ta̱ Dan na̱ nda̱kaʼyina ki̱vi̱ ña̱ kivi ku̱ʼu̱nna nu̱ú ku̱a̱chi kúúna 157,600. Na̱yóʼo kúú na̱ so̱ndíʼi kani veʼe válína tá xa̱a̱ ná ku̱ʼu̱nna, nda̱a̱ táki̱ʼva xa̱a̱ nda̱taʼví u̱ni̱ tá u̱ni̱ na̱ tribu”.

32 Na̱yóʼo kúú na̱ israelita na̱ nda̱kaʼyi̱ ki̱vi̱ nda̱a̱ táki̱ʼva íyo ki̱vi̱ na̱ táʼanna na̱ xi̱ndoo xi̱naʼá; ndiʼi na̱ ta̱a na̱ nda̱kaʼyi̱ ki̱vi̱ ña̱ kivi ku̱ʼu̱nna nu̱ú ku̱a̱chi xi̱kuuna 603,550. 33 Soo va̱ása níndakaʼyi̱ ki̱vi̱ na̱ levita xíʼin na̱ israelita, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés. 34 Na̱ israelita ke̱ʼéna ndiʼi ña̱ ni̱ka̱ʼa̱n Jehová xíʼin ta̱ Moisés. Saá kúú ña̱ xi̱ndoo u̱ni̱ tá u̱ni̱ na̱ tribu yóʼo ta saátu kúú ña̱ xi̱keʼéna tá xi̱xanina veʼe válína nda̱a̱ táki̱ʼva xi̱ndoo na̱ veʼena xíʼin na̱ táʼanna na̱ xi̱ndoo xi̱naʼá.

3 Na̱yóʼo xi̱kuu na̱ se̱ʼe ta̱ Aarón xíʼin ta̱ Moisés, tá ni̱ka̱ʼa̱n Jehová xíʼin ta̱ Moisés chí yuku̱ Sinaí. 2 Na̱yóʼo xi̱kuu na̱ se̱ʼe ta̱ Aarón: ta̱ Abihú, ta̱ Eleazar, ta̱ Itamar xíʼin ta̱ Nadab ta̱ xi̱kuu se̱ʼenu̱úra. 3 Na̱yóʼo xi̱kuu na̱ se̱ʼe ta̱ Aarón, ta nda̱kaxinna na̱yóʼo ña̱ va̱ʼa koona su̱tu̱. 4 Soo ta̱ Nadab xíʼin ta̱ Abihú ni̱xi̱ʼi̱na nu̱ú Jehová, saáchi ni̱so̱kóna* ña̱ kǒo xíniñúʼu so̱kóna* nu̱ú Jehová chí ñuʼú yi̱chí ña̱ Sinaí, ta kǒo se̱ʼena níxi̱yo. Soo ta̱ Eleazar xíʼin ta̱ Itamar xi̱kuumiíkavana chiñu ña̱ koona su̱tu̱ xíʼin yivána ta̱ Aarón.

5 Tasaá, Jehová ni̱ka̱ʼa̱nra xíʼin ta̱ Moisés: 6 “Ka̱ʼa̱n xíʼin na̱ tribu ta̱ Leví ná kuyatinna nu̱ú ta̱ su̱tu̱ Aarón, ta na̱yóʼo kachíñuna nu̱úra. 7 Ta xíniñúʼu saxínuna chiñu ña̱ kúúmiína nu̱ú ta̱yóʼo ta saátu nu̱ú na̱ ñuu, ta keʼéna chiñu ña̱ xíniñúʼu keʼéna ini tabernáculo. 8 Xíniñúʼu kiʼinna kuenta xíʼin ndiʼi ña̱ʼa ña̱ kúúmií tabernáculo, tasaá keʼéna chiñuna ini tabernáculo, ta saátu saxínuna chiñu ña̱ kúúmiína nu̱ú na̱ israelita. 9 Xíniñúʼu ndataxiún na̱ levita ndaʼa̱ ta̱ Aarón ta saátu ndaʼa̱ na̱ se̱ʼera. Na̱yóʼo kúú na̱ nda̱kaxinna ti̱xin na̱ veʼe na̱ israelita ña̱ va̱ʼa chindeétáʼanna xíʼinra. 10 Xíniñúʼu ndaka̱xiún ta̱ Aarón xíʼin na̱ se̱ʼera ña̱ va̱ʼa keʼéna chiñu ña̱ koona su̱tu̱, nda̱a̱ ndáaka na̱ ná keʼé chiñu yóʼo ta su̱ví chiñuna kúúña,* xíniñúʼu kuvina”.

11 Ta ni̱ka̱ʼa̱nka Jehová xíʼin ta̱ Moisés: 12 “Nu̱úka ña̱ ndakiʼi̱n ndiʼi se̱ʼenu̱ú na̱ israelita, na̱ levita kúú na̱ ndakiʼi̱n, na̱yóʼo kúú na̱ koo kuenta miíi̱. 13 Saáchi ndiʼi se̱ʼenu̱úndó kuenta miíi̱ kúúna ta saátu ndiʼi se̱ʼenu̱ú kití sa̱na̱ndó. Tá xa̱ʼníi̱ ndiʼi se̱ʼenu̱ú na̱ ñuu Egipto ta saátu tá xa̱ʼníi̱ ndiʼi se̱ʼenu̱ú kití sa̱na̱na, nda̱sayi̱íi̱ ndiʼi na̱ se̱ʼenu̱ú na̱ ñuu Israel ña̱ va̱ʼa xa̱a̱na koona kuenta miíi̱, ta saátu ndiʼi se̱ʼenu̱ú kití sa̱na̱na ña̱ va̱ʼa xa̱a̱rí koorí kuenta miíi̱. Kuenta miíi̱ koo ndiʼi na̱yóʼo. Yi̱ʼi̱ kúú Jehová”.

14 Tuku ni̱ka̱ʼa̱n Jehová xíʼin ta̱ Moisés chí ñuʼú yi̱chí ña̱ Sinaí, ta ña̱yóʼo ni̱ka̱ʼa̱nra xíʼinra: 15 “Ndakaʼyi ki̱vi̱ na̱ se̱ʼe ta̱ Leví, nda̱a̱ táki̱ʼva íyo ki̱vi̱ na̱ veʼena xíʼin na̱ táʼanna na̱ xi̱ndoo xi̱naʼá. Xíniñúʼu kaʼyiún ki̱vi̱ ndiʼi na̱ ta̱a, ni kúúna na̱ ta̱a válí na̱ kúúmií iin yo̱o̱ á na̱ kúúmií ku̱a̱ʼáka ku̱i̱ya̱”. 16 Tasaá ta̱ Moisés ka̱ʼyira ki̱vi̱na nda̱a̱ táki̱ʼva ni̱ka̱ʼa̱n Jehová xíʼinra. 17 Na̱yóʼo xi̱kuu na̱ se̱ʼe ta̱ Leví: ta̱ Guersón, ta̱ Cohat xíʼin ta̱ Merarí.

18 Ta na̱yóʼo xi̱kuu na̱ se̱ʼe ta̱ Guersón xíʼin na̱ veʼera: ta̱ Libní xíʼin ta̱ Simeí.

19 Na̱ se̱ʼe ta̱ Cohat xíʼin na̱ veʼera xi̱kuu: ta̱ Amram, ta̱ Izhar, ta̱ Hebrón xíʼin ta̱ Uziel.

20 Na̱ se̱ʼe ta̱ Merarí xíʼin na̱ veʼera xi̱kuu: ta̱ Mahlí xíʼin ta̱ Musí.

Na̱yóʼo xi̱kuu na̱ veʼe na̱ levita xíʼin na̱ táʼanna na̱ xi̱ndoo xi̱naʼá.

21 Na̱ veʼe ta̱ Guersón xi̱kuu: na̱ libnita xíʼin na̱ simeíta. Na̱yóʼo xi̱kuu na̱ veʼe na̱ guersonita. 22 Ndiʼi na̱ ta̱a na̱ ni̱ka̱ʼyi̱ ki̱vi̱ xi̱kuuna 7,500, ni kúúmiína iin yo̱o̱ á ku̱a̱ʼáka ku̱i̱ya̱. 23 Na̱ veʼe na̱ guersonita xi̱ndoona chí sa̱tá tabernáculo, chí nu̱ú kíʼvi ñu̱ʼu.* 24 Ta̱ xi̱niʼi yichi̱ nu̱ú na̱ guersonita xi̱kuu ta̱ Eliasaf se̱ʼe ta̱ Lael. 25 Chiñu ña̱ xi̱kuumií na̱ se̱ʼe ta̱ Guersón kúú ña̱ xi̱ndaana tabernáculo xíʼin ndiʼi ña̱ʼa ña̱ xi̱ndasi sa̱táña, cortina ña̱ tíkaa chí yéʼé tabernáculo, 26 cortina ña̱ tíkaa chí patio, cortina ña̱ tíkaa chí yéʼé patio ña̱ káva̱nduu sa̱tá tabernáculo xíʼin altar, yoʼo̱ xíʼin ndiʼi ña̱ʼa ña̱ xíniñúʼuna ini tabernáculo.

27 Na̱ veʼe ta̱ Cohat xi̱kuu na̱ amramita, na̱ izharita, na̱ hebronita xíʼin na̱ uzielita. Na̱yóʼo xi̱kuu na̱ veʼe na̱ cohatita. 28 Ndiʼi na̱ ta̱a na̱ ni̱ka̱ʼyi̱ ki̱vi̱ xi̱kuuna 8,600, ni kúúmiína iin yo̱o̱ á ku̱a̱ʼáka ku̱i̱ya̱. Na̱yóʼo kúú na̱ xi̱kuumií chiñu ña̱ kundaana lugar ña̱ yi̱i̱. 29 Na̱ veʼe na̱ se̱ʼe ta̱ Cohat xi̱ndoona chí táʼví sur, nu̱ú íyo tabernáculo. 30 Ta̱ xi̱niʼi yichi̱ nu̱ú na̱ cohatita xi̱kuu ta̱ Elizafán se̱ʼe ta̱ Uziel. 31 Chiñu ña̱ xi̱kuumiína kúú ña̱ xi̱ndaana tú Arca, mesa, candelabro, altar, ndiʼi ña̱ʼa ña̱ xi̱xiniñúʼuna nu̱ú lugar ña̱ yi̱i̱, cortina ña̱ xi̱ndataʼví lugar ña̱ yi̱i̱ nu̱ú ña̱ yi̱i̱ní xíʼin ndiʼika ña̱ʼa ña̱ xíniñúʼuna ña̱ keʼéna chiñu yóʼo.

32 Ta̱ xi̱kiʼin kuenta xíʼin na̱ levita xi̱kuu ta̱ Eleazar se̱ʼe ta̱ su̱tu̱ Aarón, ta̱yóʼo kúú ta̱ xi̱kiʼin kuenta ña̱ vií ná keʼéna chiñu nu̱ú lugar ña̱ yi̱i̱.

33 Na̱ veʼe ta̱ Merarí xi̱kuu na̱ mahlita xíʼin na̱ musita. Na̱yóʼo xi̱kuu na̱ veʼe ta̱ Merarí. 34 Ndiʼi na̱ ta̱a na̱ ni̱ka̱ʼyi̱ ki̱vi̱ xi̱kuuna 6,200, ni kúúmiína iin yo̱o̱ á ku̱a̱ʼáka ku̱i̱ya̱. 35 Ta̱ xi̱niʼi yichi̱ nu̱ú na̱ veʼe ta̱ Merarí xi̱kuu ta̱ Zuriel se̱ʼe ta̱ Abihail. Na̱yóʼo xi̱ndoona chí táʼví norte nu̱ú ni̱xi̱yo tabernáculo. 36 Na̱ se̱ʼe ta̱ Merarí kúú na̱ xi̱kiʼin kuenta xíʼin yitu̱n tú ni̱xi̱yo síi̱n* tabernáculo, yitu̱n tú xi̱tiinña, poste tú xi̱kuumiíña, xa̱ʼa̱nú xíʼin ndiʼi ña̱ʼa ña̱ xi̱xiniñúʼuna ña̱ keʼéna chiñu yóʼo, 37 poste tú xi̱ndita sa̱tá patio xíʼin xa̱ʼa̱nú, ka̱a ña̱ xi̱ndita nu̱ú ñuʼú xíʼin yoʼo̱.

38 Yatin nu̱ú ni̱xi̱yo tabernáculo chí nu̱ú kíta ñu̱ʼu kúú nu̱ú ni̱xi̱yo ta̱ Moisés xíʼin ta̱ Aarón ta saátu na̱ se̱ʼera. Na̱yóʼo kúú na̱ xi̱kuumií chiñu ña̱ kundaana lugar ña̱ yi̱i̱ nu̱úka ña̱ keʼé na̱ israelita ña̱yóʼo. Nda̱a̱ ndáaka na̱ ná keʼé chiñu yóʼo ta su̱ví chiñuna kúúña,* xíniñúʼu kuvina.

39 Ta ndiʼi na̱ ta̱a na̱ levita na̱ xi̱kuumií iin yo̱o̱ á ku̱a̱ʼáka ku̱i̱ya̱, na̱ ka̱ʼyi ta̱ Moisés xíʼin ta̱ Aarón ki̱vi̱, nda̱a̱ táki̱ʼva ni̱xi̱yo ki̱vi̱ na̱ veʼena na̱ xi̱ndoo xi̱naʼá xi̱kuuna 22,000, ta ke̱ʼéna ña̱yóʼo nda̱a̱ táki̱ʼva ni̱ka̱ʼa̱n Jehová xíʼinna.

40 Tasaá Jehová ni̱ka̱ʼa̱nra xíʼin ta̱ Moisés: “Kaʼyi ki̱vi̱ ndiʼi na̱ ta̱a na̱ kúú se̱ʼenu̱ú na̱ ñuu Israel na̱ kúúmií iin yo̱o̱ á ku̱a̱ʼáka ku̱i̱ya̱, ndakaʼvina ta keʼé iin lista xíʼin ki̱vi̱na. 41 Ta nu̱úka ña̱ ndakiʼi̱n ndiʼi se̱ʼenu̱ú na̱ ñuu Israel, na̱ ndakiʼi̱n kúú na̱ levita. Yi̱ʼi̱ kúú Jehová. Ta nu̱úka ña̱ ndakiʼi̱n ndiʼi se̱ʼenu̱ú kití sa̱na̱ na̱ israelita, ndakiʼi̱n kití sa̱na̱ na̱ levita”. 42 Tasaá ta̱ Moisés ka̱ʼyíra ndiʼi ki̱vi̱ se̱ʼenu̱ú na̱ israelita, nda̱a̱ táki̱ʼva ni̱ka̱ʼa̱n Jehová xíʼinra. 43 Ndiʼi na̱ ta̱a se̱ʼenu̱ú na̱ israelita na̱ xi̱kuumií iin yo̱o̱ á ku̱a̱ʼáka ku̱i̱ya̱ na̱ ni̱ka̱ʼyi̱ ki̱vi̱, xi̱kuuna 22,273.

44 Ta ni̱ka̱ʼa̱nka Jehová xíʼin ta̱ Moisés. Ta ka̱chira: 45 “Nu̱úka ña̱ ndakiʼi̱n ndiʼi se̱ʼenu̱ú na̱ ñuu Israel, na̱ ndakiʼi̱n kúú na̱ levita. Ta nu̱úka ña̱ ndakiʼi̱n ndiʼi se̱ʼenu̱ú kití sa̱na̱ na̱ israelita, ndakiʼi̱n kití sa̱na̱ na̱ levita. Kuenta miíi̱ xíniñúʼu koo na̱ levita. Yi̱ʼi̱ kúú Jehová. 46 Xa̱ʼa̱ ña̱ ku̱a̱ʼáka kúú se̱ʼenu̱ú na̱ israelita, chi 273 kúú na̱ yóso nu̱ú na̱ levita, xíniñúʼu ndachaʼvína xa̱ʼa̱ na̱yóʼo, chi loʼoka kúú na̱ levita. 47 Xíniñúʼu chaʼvina 5 xu̱ʼún ña̱ plata* xa̱ʼa̱ iin tá iin na̱yóʼo, ta katanaña nda̱a̱ táki̱ʼva kátana plata nu̱ú lugar ña̱ yi̱i̱. Iin xu̱ʼún ña̱ plata ve̱eña 12 gramo.* 48 Xíniñúʼu taxiún xu̱ʼún yóʼo ndaʼa̱ ta̱ Aarón xíʼin na̱ se̱ʼera, ña̱yóʼo kúú ya̱ʼvi ña̱ ndachaʼvína xa̱ʼa̱ ña̱ ku̱a̱ʼáka kúú se̱ʼenu̱ú na̱ israelita nu̱úka na̱ levita”. 49 Ña̱kán ta̱ Moisés nda̱kiʼinra xu̱ʼún ña̱ cha̱ʼvi na̱ israelita xa̱ʼa̱ ña̱ ku̱a̱ʼáka xi̱kuu se̱ʼenu̱úna nu̱úka na̱ levita. 50 Nda̱kiʼinra xu̱ʼún xa̱ʼa̱ se̱ʼenu̱ú na̱ israelita, 1,365 xu̱ʼún ña̱ plata xi̱kuuña, ta ka̱tanaña nda̱a̱ táki̱ʼva kátana plata lugar ña̱ yi̱i̱. 51 Tasaá ta̱ Moisés ta̱xira xu̱ʼún ña̱ cha̱ʼvi na̱yóʼo ndaʼa̱ ta̱ Aarón xíʼin na̱ se̱ʼera, nda̱a̱ táki̱ʼva ni̱ka̱ʼa̱n mií Jehová, ta ta̱ Moisés ke̱ʼéra nda̱a̱ táki̱ʼva ni̱ka̱ʼa̱n Jehová xíʼinra.

4 Tasaá Jehová ni̱ka̱ʼa̱nra xíʼin ta̱ Moisés ta saátu xíʼin ta̱ Aarón: 2 “Xíniñúʼu ndakaʼvindó nda̱saa kúú na̱ se̱ʼe ta̱ Cohat na̱ íyo xíʼin na̱ tribu ta̱ Leví nda̱a̱ táki̱ʼva ni̱ka̱ʼyi̱ ki̱vi̱ na̱ veʼena ta saátu na̱ táʼanna na̱ xi̱ndoo xi̱naʼá, 3 ndiʼi na̱ kúúmií 30 iinsaá nda̱a̱ 50 ku̱i̱ya̱ na̱ káchíñu ini tabernáculo.

4 ”Ña̱yóʼo kúú chiñu ña̱ keʼé na̱ se̱ʼe ta̱ Cohat ini tabernáculo. Iin ña̱ yi̱i̱ní kúú ña̱yóʼo. 5 Tá ná kixáʼa na̱ ñuu ku̱ʼu̱nna, ta̱ Aarón xíʼin na̱ se̱ʼera ki̱ʼvina ini tabernáculo, sanúuna cortina ña̱ ndátaʼví lugar Ña̱ yi̱i̱ xíʼin Ña̱ yi̱i̱ní ta xíʼin ña̱yóʼo ndakasina sa̱tá Arca ña̱ trato. 6 Chinúuna ñii̱ tí foca sa̱tá túyóʼo, ta chinúuna iin tela azul sa̱tá ña̱yóʼo ta saátu taánna yitu̱n síi̱nnú* ña̱ va̱ʼa kuniʼinanú ku̱ʼu̱n xíʼinna.

7 ”Saátu chinúuna iin tela azul nu̱ú mesa nu̱ú kundóso si̱ta̱váʼa ña̱ so̱kóna,* ta sa̱tá ña̱yóʼo chindósona ko̱ʼo̱, copa, ko̱ʼo̱ ña̱ kúnú ini xíʼin jarra nu̱ú ñúʼu nduta̱ tá sóko̱na nu̱ú Ndióxi̱; ta saátu xíniñúʼu kundóso si̱ta̱váʼa ña̱ sóko̱ ni̱ʼina nu̱ú Ndióxi̱ nu̱ú ña̱yóʼo. 8 Sa̱tá ña̱yóʼo chinúuna iin tela kúáʼa ña̱ yéʼe̱ní, ndakasina tú mesa xíʼin ñii̱ tí foca ta taánna yitu̱n síi̱nnú ña̱ va̱ʼa kuniʼinanú ku̱ʼu̱n xíʼinna. 9 Tándi̱ʼi, kuniñúʼuna iin tela azul ña̱ ndakasina candelabro ña̱ túu̱n, saátu ndakasina lámpara ña̱ kúúmiíña, pinza ña̱ kúúmiíña xíʼin nu̱ú ñúʼu ñuʼu̱ ña̱ xíniñúʼuna xíʼin ña̱yóʼo, ta saátu ndiʼi ña̱ʼa nu̱ú táanna aceite ña̱ va̱ʼa kutuu̱n ña̱yóʼo. 10 Ta xíʼin ñii̱ tí foca ndasukúndaana* candelabro xíʼin ndiʼi ña̱ xíniñúʼuna xíʼin ña̱yóʼo, ta chindósonaña nu̱ú iin yitu̱n ña̱ va̱ʼa kuniʼinaña ku̱ʼu̱nna. 11 Ta xíʼin tela azul ndakasina sa̱tá altar ña̱ oro, ta sa̱tá ña̱yóʼo chinúuna ñii̱ tí foca, ta taánna yitu̱n síi̱n altar ña̱ va̱ʼa kuniʼinaña ku̱ʼu̱n xíʼinna. 12 Tasaá kiʼinna ndiʼi ña̱ xíniñúʼu ni̱ʼina nu̱ú lugar ña̱ yi̱i̱ ta chindósonaña nu̱ú iin tela azul ta ndakasina nu̱ú ña̱yóʼo xíʼin ñii̱ tí foca, ta chindósonaña nu̱ú yitu̱n ña̱ va̱ʼa kuniʼinaña ku̱ʼu̱n xíʼinna.

13 ”Xíniñúʼu tavána ya̱a̱* nu̱ú altar ta nu̱ú ña̱yóʼo chinúuna iin tela ña̱ ku̱vaʼa xíʼin ixí* ndikachi* ña̱ nda̱kaʼyi̱ color ndíʼí.* 14 Nu̱ú altar yóʼo chindósona ndiʼi ña̱ʼa ña̱ xíniñúʼuna xíʼinña: ña̱ʼa nu̱ú ñúʼu ñuʼu̱ ña̱ xáʼmina, tenedor tú náʼnu tú náni̱ xa̱ʼa̱, pala xíʼin ko̱ʼo̱ ña̱ kúnú ini, xíʼin ndiʼika ña̱ʼa ña̱ xíniñúʼuna nu̱ú altar. Ta xíniñúʼu chinúuna ñii̱ tí foca nu̱ú altar ta taánna yitu̱n síi̱nña ña̱ va̱ʼa kuniʼinaña ku̱ʼu̱nna.

15 ”Tá ná ku̱ʼu̱n na̱ ñuu, xa̱a̱ xíniñúʼu ku̱ʼu̱n ta̱ Aarón xíʼin na̱ se̱ʼera ña̱ ndakasina ña̱ʼa ña̱ íyo lugar yi̱i̱ xíʼin ndiʼi ña̱ʼa ña̱ xíniñúʼuna yóʼo. Tasaá ki̱ʼvi na̱ se̱ʼe ta̱ Cohat ña̱ va̱ʼa ndakiʼinna ña̱yóʼo ku̱ʼu̱n xíʼinna soo va̱ása xíniñúʼu tiinna ña̱ʼa ña̱ yi̱i̱, chi tá ná keʼéna ña̱yóʼo kuvina. Ña̱yóʼo kúú chiñu ña̱ kuumií na̱ se̱ʼe ta̱ Cohat ti̱xin tabernáculo.

16 ”Ta̱ Eleazar se̱ʼe ta̱ su̱tu̱ Aarón kúú ta̱ kiʼin kuenta xíʼin aceite tá kuniñúʼuna ña̱ kutuu̱n lámpara, ña̱ʼa ña̱ xáʼa̱n támi ña̱ chíʼmána, harina ña̱ sóko̱ ni̱ʼina nu̱ú Ndióxi̱ xíʼin aceite tá yi̱i̱. Ta̱yóʼo kúú ta̱ xíniñúʼu kiʼin kuenta xíʼin iníísaá tabernáculo xíʼin ndiʼi ña̱ íyo iniña, saátu lugar ña̱ yi̱i̱ xíʼin ndiʼi ña̱ xíniñúʼuna xíʼinña”.

17 Jehová ni̱ka̱ʼa̱nkara xíʼin ta̱ Moisés ta saátu xíʼin ta̱ Aarón ta ka̱chira: 18 “Va̱ása taxindó ña̱ ndiʼi-xa̱ʼa̱ na̱ veʼe na̱ cohatita ti̱xin na̱ tribu na̱ levita. 19 Va̱ʼaka keʼéndó ña̱yóʼo xa̱ʼa̱na ña̱ va̱ʼa kutakuna ta va̱ása kuvina xa̱ʼa̱ ña̱ kúyatinna nu̱ú ña̱ʼa ña̱ yi̱i̱ní. Ta̱ Aarón xíʼin na̱ se̱ʼera ki̱ʼvina ini tabernáculo ta ka̱ʼa̱nna xíʼin iin tá iin na̱yóʼo ndáa chiñu kúú ña̱ keʼéna, ta ndáa ña̱ʼa kúú ña̱ kundisona ku̱ʼu̱nna. 20 Tá ná ki̱ʼvina, nda̱a̱ ni loʼo va̱ása xíniñúʼu kotona ña̱ʼa ña̱ yi̱i̱ chi tá ná keʼéna ña̱yóʼo kuvina”.

21 Tasaá, Jehová ni̱ka̱ʼa̱nra xíʼin ta̱ Moisés: 22 “Xíniñúʼu ndakaʼvindó na̱ se̱ʼe ta̱ Guersón nda̱a̱ táki̱ʼva ni̱ka̱ʼyi̱ ki̱vi̱ na̱ veʼena xíʼin na̱ táʼanna na̱ xi̱ndoo xi̱naʼá. 23 Xíniñúʼu kaʼyiún ki̱vi̱ ndiʼi na̱ kúúmií 30 iinsaá nda̱a̱ 50 ku̱i̱ya̱, na̱ kúúmií chiñu ña̱ kachíñuna ini tabernáculo. 24 Ña̱yóʼo kúú ña̱ xíniñúʼu kundaa na̱ guersonita xíʼin ña̱ kuniʼina ku̱ʼu̱nna: 25 kuniʼina tela ña̱ tabernáculo ku̱ʼu̱n xíʼinna, kuniʼina tabernáculo, ña̱ ndási sa̱táña, ñii̱ tí foca ña̱ ndási sa̱táña, cortina ña̱ tíkaa chí yéʼé tabernáculo, 26 cortina ña̱ tíkaa chí patio, cortina ña̱ tíkaa chí yéʼé patio ña̱ káva̱nduu sa̱tá tabernáculo, altar, yoʼo̱ ña̱ xíniñúʼuna xíʼin tabernáculo xíʼin ndiʼika ña̱ʼa ña̱ xíniñúʼuna ña̱ va̱ʼa keʼéna chiñu iniña. Ña̱yóʼo kúú chiñu ña̱ kuumiína. 27 Ta̱ Aarón xíʼin na̱ se̱ʼera xíniñúʼu kiʼinna kuenta xíʼin chiñu ña̱ kéʼé na̱ guersonita ta saátu xíʼin ndiʼi ña̱ʼa ña̱ xíniñúʼu kuniʼina ku̱ʼu̱n xíʼinna. Ndóʼó kúú na̱ ka̱ʼa̱n xíʼinna ndáaña xíniñúʼu kuniʼina ku̱ʼu̱nna; ña̱yóʼo kúú ña̱ xíniñúʼu keʼé na̱kán. 28 Ña̱yóʼo kúú chiñu ña̱ keʼé na̱ veʼe ta̱ Guersón ini tabernáculo. Xíniñúʼu saxínuna chiñu ña̱ kúúmiína, ta ta̱ kuniʼi yichi̱ nu̱úna kúú ta̱ Itamar se̱ʼe ta̱ su̱tu̱ Aarón.

29 ”Ta ndakaʼyiún ki̱vi̱ na̱ se̱ʼe ta̱ Merarí nda̱a̱ táki̱ʼva ni̱ka̱ʼyi̱ ki̱vi̱ na̱ veʼena xíʼin na̱ táʼanna na̱ xi̱ndoo xi̱naʼá. 30 Ndakaʼyiún ki̱vi̱ ndiʼi na̱ kúúmií 30 iinsaá nda̱a̱ 50 ku̱i̱ya̱, ndiʼi na̱ kachíñu ti̱xin tabernáculo. 31 Chiñu ña̱ kuumiína ini tabernáculo kúú ña̱ kuniʼina ña̱yóʼo: yitu̱n tú koo síi̱n tabernáculo, yitu̱n tú kuumiíña, posteña xíʼin ña̱ tiin xa̱ʼa̱nú, 32 poste tú ndíta chí patio xíʼin ña̱ tiin xa̱ʼa̱nú, ka̱a ña̱ kuita nu̱ú ñuʼú, yoʼo̱ ña̱ kuniñúʼuna xíʼin tabernáculo xíʼin ndiʼika ña̱ xíniñúʼuna ña̱ va̱ʼa keʼéna chiñu iniña. Ndóʼó ka̱ʼa̱nndó xíʼinna ndáaña xíniñúʼu kuniʼi iin tá iinna ku̱ʼu̱nna. 33 Ña̱yóʼo kúú ña̱ xíniñúʼu keʼé na̱ veʼe na̱ se̱ʼe ta̱ Merarí tá ná kachíñuna ini tabernáculo, ta ta̱ kuniʼi yichi̱ nu̱úna kúú ta̱ Itamar se̱ʼe ta̱ su̱tu̱ Aarón”.

34 Tasaá, ta̱ Moisés ta̱ Aarón xíʼin ndiʼi na̱ xi̱niʼi yichi̱ nu̱ú na̱ ñuu, ka̱ʼyina ki̱vi̱ na̱ se̱ʼe na̱ cohatita, nda̱a̱ táki̱ʼva ni̱ka̱ʼyi̱ ki̱vi̱ na̱ veʼena xíʼin na̱ táʼanna na̱ xi̱ndoo xi̱naʼá. 35 Ka̱ʼyina ki̱vi̱ ndiʼi na̱ xi̱kuumií 30 iinsaá nda̱a̱ 50 ku̱i̱ya̱, ndiʼi na̱ xi̱keʼé chiñu ini tabernáculo. 36 Ndiʼi na̱ ta̱a na̱ ni̱ka̱ʼyi̱ ki̱vi̱ nda̱a̱ táki̱ʼva ni̱ka̱ʼyi̱ ki̱vi̱ na̱ veʼena, xi̱kuuna 2,750. 37 Na̱yóʼo xi̱kuu na̱ veʼe na̱ cohatita na̱ xi̱kachíñu ini tabernáculo, na̱ nda̱kaʼyina ki̱vi̱. Ta̱ Moisés xíʼin ta̱ Aarón ka̱ʼyina ki̱vi̱ na̱yóʼo nda̱a̱ táki̱ʼva ni̱ka̱ʼa̱n Jehová xíʼin ta̱ Moisés.

38 Nda̱kaʼyina ki̱vi̱ na̱ se̱ʼe ta̱ Guersón nda̱a̱ táki̱ʼva íyo ki̱vi̱ na̱ veʼena xíʼin na̱ táʼanna na̱ xi̱ndoo xi̱naʼá, 39 ka̱ʼyina ki̱vi̱ ndiʼi na̱ xi̱kuumií 30 iinsaá nda̱a̱ 50 ku̱i̱ya̱, ndiʼi na̱ xi̱keʼé chiñu ini tabernáculo. 40 Ndiʼi na̱ ta̱a na̱ ni̱ka̱ʼyi̱ ki̱vi̱ nda̱a̱ táki̱ʼva ni̱ka̱ʼyi̱ ki̱vi̱ na̱ veʼena xíʼin na̱ táʼanna na̱ xi̱ndoo xi̱naʼá, xi̱kuuna 2,630. 41 Ña̱yóʼo xi̱kuu ki̱vi̱ na̱ veʼe na̱ se̱ʼe ta̱ Guerson na̱ xi̱kachíñu ini tabernáculo. Ta̱ Moisés xíʼin ta̱ Aarón, ka̱ʼyina ki̱vi̱ na̱yóʼo nda̱a̱ táki̱ʼva ni̱ka̱ʼa̱n Jehová.

42 Nda̱kaʼyina ki̱vi̱ na̱ se̱ʼe ta̱ Merarí nda̱a̱ táki̱ʼva íyo ki̱vi̱ na̱ veʼena xíʼin na̱ táʼanna na̱ xi̱ndoo xi̱naʼá, 43 ka̱ʼyina ki̱vi̱ ndiʼi na̱ xi̱kuumií 30 iinsaá nda̱a̱ 50 ku̱i̱ya̱, ndiʼi na̱ xi̱keʼé chiñu ini tabernáculo. 44 Ndiʼi na̱ ta̱a na̱ ni̱ka̱ʼyi̱ ki̱vi̱ nda̱a̱ táki̱ʼva ni̱ka̱ʼyi̱ ki̱vi̱ na̱ veʼena, xi̱kuuna 3,200. 45 Ña̱yóʼo xi̱kuu ki̱vi̱ na̱ veʼe na̱ se̱ʼe ta̱ Merarí. Ta̱ Moisés xíʼin ta̱ Aarón ka̱ʼyina ki̱vi̱ na̱yóʼo nda̱a̱ táki̱ʼva ni̱ka̱ʼa̱n Jehová xíʼin ta̱ Moisés.

46 Tasaá, ta̱ Moisés ta̱ Aarón xíʼin ndiʼi na̱ xi̱niʼi yichi̱ nu̱ú na̱ ñuu, ka̱ʼyina ki̱vi̱ ndiʼi na̱ levita nda̱a̱ táki̱ʼva ni̱ka̱ʼyi̱ ki̱vi̱ na̱ veʼena xíʼin na̱ táʼanna na̱ xi̱ndoo xi̱naʼá; 47 na̱yóʼo xi̱kuumiína 30 nda̱a̱ 50 ku̱i̱ya̱ ta ta̱xina chiñu ndaʼa̱na ña̱ kachíñuna ta kuniʼina ña̱ʼa ña̱ íyo ini tabernáculo. 48 Ndiʼi na̱ ta̱a na̱ nda̱kaʼyina ki̱vi̱, xi̱kuuna 8,580. 49 Nda̱kaʼyina ki̱vi̱ na̱yóʼo nda̱a̱ táki̱ʼva ni̱ka̱ʼa̱n Jehová xíʼin ta̱ Moisés, ni̱ka̱ʼyi̱ ki̱vi̱na nda̱a̱ táki̱ʼva íyo chiñu ña̱ keʼéna xíʼin ña̱ʼa ña̱ kuniʼina ku̱ʼu̱nna; ta nda̱a̱ táki̱ʼva ni̱ka̱ʼa̱n Jehová xíʼin ta̱ Moisés saá ni̱ka̱ʼyi̱ ki̱vi̱na.

5 Tuku ni̱ka̱ʼa̱n Jehová xíʼin ta̱ Moisés, ta ka̱chira: 2 “Ka̱ʼa̱n xíʼin na̱ israelita ná tavána ndiʼi na̱ kúúmií kue̱ʼe̱ lepra chí sa̱tá nu̱ú ndóona, na̱ kúúmií iin kue̱ʼe̱ ña̱ xíta̱ nduta̱na xíʼin ndiʼi na̱ ku̱yaku̱a̱* xa̱ʼa̱ ña̱ ti̱inna iin na̱ ni̱xi̱ʼi̱. 3 Ni kúúna ta̱a á ñaʼá, xíniñúʼu tavándóna. Xíniñúʼu tavándóna chí sa̱tá nu̱ú ndóondó ña̱ va̱ʼa ná kǒo kuyaku̱a̱ nu̱ú ndóondó, chi yóʼo kúú nu̱ú íyoi̱ xíʼinndó”. 4 Tasaá ke̱ʼéva na̱ israelita, ta̱vána na̱yóʼo chí sa̱tá nu̱ú ndóona, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés, saá ke̱ʼé na̱ israelita.

5 Jehová ni̱ka̱ʼa̱n tukura xíʼin ta̱ Moisés: 6 “Ka̱ʼa̱n xíʼin na̱ israelita: ‘Tá iin ta̱a á iin ñaʼá, kíʼvina iin ku̱a̱chi ta xa̱ʼa̱ ña̱kán va̱ása nda̱kúka íyo inina xíʼin Jehová, na̱ yiví yóʼo kúúmiína ku̱a̱chi. 7 Xíniñúʼu natúʼunna xa̱ʼa̱ ku̱a̱chi ña̱ ni̱ki̱ʼvina ta chaʼvina xa̱ʼa̱ ku̱a̱china ta ndataxina inka táʼví* ña̱yóʼo. Xíniñúʼu ndataxinaña ndaʼa̱ na̱ i̱xandi̱va̱ʼana xíʼin. 8 Soo tá xa̱a̱ ni̱xi̱ʼi̱na ta kǒo iin na̱ táʼanna na̱ kivi ndakiʼin ña̱ nda̱chaʼvina yóʼo, na̱ ni̱ki̱ʼvi ku̱a̱chi xíniñúʼu ndataxinaña ndaʼa̱ Jehová ta kooña kuenta ta̱ su̱tu̱, saátu ndakiʼinra ndikachi* che̱e tí taxina ña̱ va̱ʼa so̱kórarí* xa̱ʼa̱ ku̱a̱china.

9 ”’Ndiʼi ña̱ yi̱i̱ ña̱ xa̱a̱ xíʼin na̱ israelita nu̱ú ta̱ su̱tu̱, kuenta miíra xíniñúʼu koo ña̱yóʼo. 10 Ta̱yóʼo kindo̱ora xíʼin ña̱ʼa ña̱ yi̱i̱ ña̱ ná xa̱a̱ xíʼin iin tá iin na̱ yiví. Nda̱a̱ ndáaka ña̱ʼa ná taxina ndaʼa̱ ta̱ su̱tu̱, kuenta miíra kooña’”.

11 Jehová ni̱ka̱ʼa̱nkara xíʼin ta̱ Moisés, ta ka̱chira: 12 “Ka̱ʼa̱n xíʼin na̱ israelita: ‘Ña̱yóʼo kúú ña̱ xíniñúʼu keʼéndó tá ñá síʼi iin ta̱a ki̱xáʼañá kéʼéñá ña̱ va̱ása va̱ʼa ta sa̱ndáʼviñá yii̱ñá, 13 chi ni̱ki̱si̱ñá xíʼin inka ta̱a soo va̱ása xíni̱ yii̱ñá xa̱ʼa̱ ña̱yóʼo, saáchi ña̱ íyo se̱ʼé xa̱ʼa̱ kúúña, ñáyóʼo ku̱yaku̱a̱ñá soo kǒo na̱ kivi natúʼun xa̱ʼa̱ñá ta ni kǒo na̱ níxini ña̱ sa̱ndáʼviñá yii̱ñá. 14 Tá ku̱yaku̱a̱ñá nu̱ú Ndióxi̱ ta ki̱xáʼa yii̱ñá íxakúiñura ta xíka-inira ña̱ sa̱ndáʼviñára á tá va̱ása níkuyaku̱a̱ñá nu̱ú Ndióxi̱ soo ki̱xáʼa yii̱ñá íxakúiñurañá ta xíka-inira ña̱ sa̱ndáʼviñára, 15 xíniñúʼu ku̱ʼu̱nra xíʼin ñá síʼira nu̱ú ta̱ su̱tu̱ ta kuniʼira ña̱ʼa ña̱ so̱kóna xa̱ʼa̱ñá: kuniʼira ki̱ʼva iin kilo* harina ña̱ cebada. Ta̱yóʼo va̱ása xíniñúʼu sakáara aceite sa̱tá harina ña̱ so̱kóra ni va̱ása xíniñúʼu chikaa̱ra olíbano* sa̱táña, saáchi harina ña̱ sóko̱na xa̱ʼa̱ ña̱ íxakúiñuna kúúña. Ña̱yóʼo kúú harina ña̱ náʼa̱ á kúúmií ñá ñaʼá yóʼo ku̱a̱chi á va̱ása.

16 ”’Ta̱ su̱tu̱ ka̱ʼa̱nra xíʼin ñá ñaʼá yóʼo ña̱ ná kuyatinñá nu̱ú Jehová. 17 Ta taánra ti̱kui̱í tá yi̱i̱ ini iin ki̱si ña̱ ñuʼú. Tándi̱ʼi, kiʼinra loʼo ñuʼú ña̱ íyo nu̱ú níndichi tabernáculo ta chikaa̱raña ini ti̱kui̱í. 18 Ta̱ su̱tu̱, sakúyatinra ñá ñaʼá yóʼo nu̱ú Jehová ta ndaxínra ixí* xi̱níñá ta nu̱ú ndaʼa̱ñá chindósora harina ña̱ náʼa̱ á kúúmiíñá ku̱a̱chi á va̱ása. Ña̱yóʼo kúú harina ña̱ sóko̱na xa̱ʼa̱ ña̱ íxakúiñuna, ta ta̱ su̱tu̱ kuniʼira ti̱kui̱í o̱va̱ tá sákuisochiʼña.*

19 ”’Tasaá, ta̱ su̱tu̱ ka̱ʼa̱nra xíʼin ñá ñaʼá yóʼo ña̱ ná chinaʼáñá,* ta kachira: “Tá ta̱ʼán ku̱su̱ún xíʼin inka ta̱a nani tá ti̱ndaʼún, tá kǒo kéʼún ña̱ va̱ása va̱ʼa, ta va̱ása níkuyaku̱a̱ún nu̱ú Ndióxi̱, va̱ása ndakiʼún chiʼña ña̱ kúúmií tá ti̱kui̱í o̱va̱ yóʼo. 20 Soo tá ku̱yaku̱a̱ún nu̱ú Ndióxi̱ ta ke̱ʼún ña̱ va̱ása va̱ʼa nani tá ti̱ndaʼún xíʼin yii̱ún ta ni̱ki̱si̱ún xíʼin inka ta̱a...”. 21 Ta̱ su̱tu̱ ka̱ʼa̱nra xíʼin ñá ñaʼá yóʼo ña̱ ná chinaʼáñá ña̱ ndakiʼinñá chiʼña ta ka̱ʼa̱nra xíʼinñá: “Jehová ná na̱ʼa̱ra yóʼó nu̱ú ndiʼina ña̱ nda̱kiʼún chiʼña xa̱ʼa̱ ña̱ chi̱naʼún, xa̱ʼa̱ ña̱kán Jehová va̱ása taxira ña̱ koo se̱ʼún ta kaa kuiñu ti̱xiún. 22 Ta ti̱kui̱í tá táxi chiʼña, ki̱ʼvirá ti̱xiún ta kaa kuiñuña ta va̱ása kivika koo se̱ʼún”. Ta ñá ñaʼá yóʼo xíniñúʼu ndakuiinñá ta kachiñá: “Saá koo. Saá koo”.

23 ”’Ta ta̱ su̱tu̱ kaʼyira chiʼña yóʼo nu̱ú iin libro ta chikaa̱raña ini ti̱kui̱í tá o̱va̱ ña̱ va̱ʼa ndooña. 24 Tasaá taxira ti̱kui̱í tá o̱va̱ tá táxi chiʼña koʼoñá, tá ná koʼoñá ti̱kui̱í yóʼo, nduu o̱va̱-iniñá. 25 Ta̱ su̱tu̱ kiʼinra harina ndaʼa̱ ñá ñaʼá yóʼo, ña̱ sóko̱na xa̱ʼa̱ ña̱ íxakúiñuna, sakúikóraña* nu̱ú Jehová ta sakúyatinraña nu̱ú altar. 26 Ta̱ su̱tu̱ kiʼinra iin koʼndo harina ña̱ va̱ʼa ndakaʼán Ndióxi̱ xa̱ʼa̱ ña̱ ni̱so̱kóra ta kaʼmiraña nu̱ú altar ña̱ va̱ʼa kana yi̱ʼma̱ña, tándi̱ʼi taxira ti̱kui̱í o̱va̱ koʼo ñá ñaʼá yóʼo. 27 Tá ku̱yaku̱a̱ñá nu̱ú Ndióxi̱ ta sa̱ndáʼviñá yii̱ñá xíʼin inka ta̱a, tá ná koʼoñá ti̱kui̱í tá chíkaa̱ chiʼña, ndasao̱va̱rá-iniñá, kaa kuiñu ti̱xinñá ta va̱ása kivika koo se̱ʼeñá, tasaá kuni ndiʼi na̱ ñuu ña̱ nda̱kiʼinñá chiʼña. 28 Soo tá va̱ása níkuyaku̱a̱ ñá ñaʼá yóʼo nu̱ú Ndióxi̱ ta kǒo ña̱ kini níkeʼéñá, va̱ása ndakiʼinñá castigo yóʼo ta kiviva ke̱e se̱ʼeñá.

29 ”’Ña̱yóʼo kúú ley ña̱ xíniñúʼu kundiku̱n ta̱a tá íxakúiñura ñá síʼira xa̱ʼa̱ ña̱ ke̱ʼéñá ña̱ va̱ása va̱ʼa ta ku̱yaku̱a̱ñá nu̱ú Ndióxi̱ ni íyova yii̱ñá, 30 á tá íxakúiñu iin ta̱a ñá síʼira ta xíka-inira á sa̱ndáʼviñára xíʼin inka ta̱a. Ta̱yóʼo, xíniñúʼu ku̱ʼu̱nra xíʼin ñá síʼira nu̱ú Jehová, ta ta̱ su̱tu̱ xíniñúʼu keʼéra ndiʼi ña̱ káʼa̱n ley yóʼo xíʼinñá. 31 Ta̱ ta̱a yóʼo, va̱ása kuumiíra ku̱a̱chi soo ñá síʼira ndakuiinñá xa̱ʼa̱ ku̱a̱chiñá’”.

6 Jehová ni̱ka̱ʼa̱nkara xíʼin ta̱ Moisés, ta ka̱chira: 2 “Ña̱yóʼo ka̱ʼún xíʼin na̱ israelita: ‘Tá iin ta̱a á iin ñaʼá kíndo̱ona keʼéna iin ña̱ ndáyáʼviní nu̱ú Jehová, ña̱ ndataxina miína ndaʼa̱ra ta kachíñuna nu̱úra,* 3 va̱ása xíniñúʼu koʼona vino ni nda̱a̱ ni iin nu̱ú ndixi, va̱ása xíniñúʼu koʼona vino tá iyá ni inkaka ndixi tá iyá. Va̱ása xíniñúʼu koʼona nda̱a̱ ni iin nduta̱ tá kúva̱ʼa xíʼin uva, ni va̱ása xíniñúʼu kaxína uva kúii̱ ni tí ni̱yi̱chi̱. 4 Nani ki̱ndoona keʼéna ña̱yóʼo, va̱ása xíniñúʼu kaxína nda̱a̱ ni iin ña̱ʼa ña̱ ná kuva̱ʼa xíʼin ña̱ kána ndaʼa̱ tú uva, ni va̱ása xíniñúʼu kaxína uva kúii̱ ni so̱o̱rí.

5 ”’Nani nda̱taxina miína ndaʼa̱ Ndióxi̱ ña̱ kachíñuna nu̱úra, va̱ása xíniñúʼu kaʼndana ixí* xi̱nína. Na̱ yi̱i̱ xíniñúʼu koona ta xíniñúʼu taxina kuaʼnu ixí xi̱nína nda̱a̱ ná xi̱nu ki̱vi̱ ña̱ nda̱taxina miína ndaʼa̱ Jehová. 6 Va̱ása xíniñúʼu kuyatinna nu̱ú iin na̱ ni̱xi̱ʼi̱ ndiʼi ki̱vi̱ ña̱ nda̱taxina miína ndaʼa̱ Jehová. 7 Ni tá ná kuvi yivána, siʼína, ñanina, ku̱ʼvi̱na á ku̱ʼvana, va̱ása xíniñúʼu kuyatinna nu̱úna chi kuyaku̱a̱na, saáchi ixí xi̱nína kúú ña̱ náʼa̱ ña̱ nda̱taxina miína ndaʼa̱ Ndióxi̱ ña̱ kachíñuna nu̱úra.

8 ”’Ndiʼi ki̱vi̱ ña̱ ná keʼéna ña̱yóʼo, na̱ yi̱i̱ koona nu̱ú Jehová. 9 Soo tá iin sana ná kuvi iin na̱ íyo yatin xíʼinna, ta xa̱ʼa̱ ña̱yóʼo ku̱yaku̱a̱ ixí xi̱nína ña̱ náʼa̱ ña̱ nda̱taxina miína ndaʼa̱ Ndióxi̱, xíniñúʼu xa̱tána ixí xi̱nína ki̱vi̱ ña̱ ná ndundiina.* Xíniñúʼu xa̱tánaña ki̱vi̱ u̱xa̱. 10 Ta ki̱vi̱ u̱na̱ xíniñúʼu kuniʼina u̱vi̱ paloma náʼnu á u̱vi̱ paloma válí* ku̱ʼu̱n xíʼinna nu̱ú ta̱ su̱tu̱ chí yéʼé tabernáculo. 11 Ta̱ su̱tu̱ so̱kóra* iin tí saa yóʼo xa̱ʼa̱ ku̱a̱china ta inkarí kaʼmira* nu̱ú Ndióxi̱ ña̱ va̱ʼa ixakáʼnu-inira xa̱ʼa̱na xa̱ʼa̱ ña̱ ti̱inna iin na̱ ni̱xi̱ʼi̱. Ta ki̱vi̱ saá xíniñúʼu ndasayi̱i̱na miína ta taxina kuaʼnu ixí xi̱nína. 12 Ta tuku xíniñúʼu ndataxina miína ndaʼa̱ Jehová ña̱ va̱ʼa kixáʼa tukuna kachíñuna nu̱úra. Ta xíniñúʼu kuniʼina iin ndikachi* che̱e loʼo ku̱ʼu̱n xíʼinna, tí kúúmií iin ku̱i̱ya̱, ña̱ va̱ʼa so̱kónarí xa̱ʼa̱ ña̱ ke̱ʼéna ña̱ va̱ása va̱ʼa. Soo ki̱vi̱ ña̱ xa̱a̱ nda̱taxina miína ndaʼa̱ Ndióxi̱ ña̱ kachíñuna nu̱úra, va̱ása ndakaʼvikana ña̱yóʼo saáchi xa̱a̱ ku̱yaku̱a̱na.

13 ”’Ña̱yóʼo kúú ley ña̱ kundiku̱n na̱ nda̱taxi mií ndaʼa̱ Ndióxi̱ ña̱ kachíñuna nu̱úra. Tá ná xi̱nu ki̱vi̱ ña̱ keʼéna ña̱yóʼo, ku̱ʼu̱nna xíʼinna chí yéʼé tabernáculo. 14 Ta kán xíniñúʼu so̱kóna ña̱yóʼo nu̱ú Jehová: iin ndikachi che̱e loʼo tí kǒo kue̱ʼe̱ kúúmií, tí kúúmií iin ku̱i̱ya̱ ña̱ va̱ʼa kaʼminarí nu̱ú Ndióxi̱, iin ndikachi síʼi loʼo tí kúúmií iin ku̱i̱ya̱ ña̱ va̱ʼa so̱kónarí xa̱ʼa̱ ku̱a̱china, iin ndikachi che̱e tí kǒo kue̱ʼe̱ kúúmií ña̱ va̱ʼa so̱kónarí xa̱ʼa̱ ña̱ kúni̱na ndakutáʼan viína xíʼin Ndióxi̱, 15 iin canasta si̱ta̱váʼa ña̱ ti̱ku̱i̱ta̱* ña̱ ku̱vaʼa xíʼin harina ña̱ va̱ʼa, ña̱ kǒo yuxa̱n iyá* kúúmií ña̱ ku̱vaʼa xíʼin aceite, saátu galleta ña̱ yásín* ña̱ kǒo yuxa̱n iyá kúúmií ña̱ ka̱a aceite sa̱tá ta saátu harina xíʼin nduta̱ tá sóko̱na nu̱ú Ndióxi̱. 16 Ta̱ su̱tu̱ kuniʼira ndiʼi ña̱yóʼo ku̱ʼu̱n xíʼinra nu̱ú Jehová, ta saátu taxira ña̱ sóko̱na xa̱ʼa̱ ku̱a̱china xíʼin kití tí kaʼmina nu̱ú Ndióxi̱. 17 Ta̱ su̱tu̱ so̱kóra nu̱ú Jehová ndikachi che̱e tí ta̱xina xa̱ʼa̱ ña̱ kúni̱na ndakutáʼan viína xíʼin Ndióxi̱, saátu taxira canasta si̱ta̱váʼa ña̱ ti̱ku̱i̱ta̱ ña̱ kǒo yuxa̱n iyá kúúmií, ta so̱kóra harina xíʼin nduta̱ tá sóko̱na nu̱ú Ndióxi̱.

18 ”’Tasaá na̱ nda̱taxi mií ndaʼa̱ Ndióxi̱ ña̱ kachíñuna nu̱úra, xíniñúʼu kaʼndana ixí xi̱nína chí yéʼé tabernáculo, ta kiʼinna ixí xi̱nína ña̱ xa̱ʼnu tá nda̱taxina miína ndaʼa̱ Ndióxi̱ ña̱ kachíñuna nu̱úra ta chindósona ña̱yóʼo nu̱ú ñuʼu̱ nu̱ú xíxi̱ kití tí ni̱so̱kóna xa̱ʼa̱ ña̱ kúni̱na ndakutáʼan viína xíʼin Ndióxi̱. 19 Ta̱ su̱tu̱ xíniñúʼu kiʼinra iin so̱ko̱ tí ndikachi che̱e ña̱ ni̱chi̱ʼyo̱, iin si̱ta̱váʼa ña̱ ti̱ku̱i̱ta̱ ña̱ kǒo yuxa̱n iyá kúúmií xíʼin iin galleta yásín ña̱ kǒo yuxa̱n iyá kúúmií, tá xa̱a̱ ndi̱ʼi xa̱ʼndana ixí xi̱ní na̱ nda̱taxi mií ndaʼa̱ Ndióxi̱ ña̱ kachíñuna nu̱úra, xíniñúʼu chindóso ta̱ su̱tu̱ ña̱yóʼo nu̱ú ndaʼa̱na. 20 Ta̱ su̱tu̱ xíniñúʼu so̱kóra ña̱yóʼo nu̱ú Jehová ta sakúikóraña.* Iin ña̱ʼa ña̱ yi̱i̱ní ña̱ koo kuenta mií ta̱ su̱tu̱ koo ña̱yóʼo, saátu kuenta miíra koo kándíkarí ña̱ so̱kóra ta sakúikóra nu̱ú Ndióxi̱ ta saátu xa̱ʼa̱rí ña̱ yi̱i̱. Tándi̱ʼi, kivi koʼo na̱yóʼo vino.

21 ”’Ña̱yóʼo kúú ley ña̱ kundiku̱n na̱ nda̱taxi mií ndaʼa̱ Ndióxi̱ ña̱ kachíñuna nu̱úra ta kíndo̱ona keʼéna iin ña̱ʼa nu̱ú Ndióxi̱: tá kúni̱na taxina ku̱a̱ʼáka ña̱ʼa ndaʼa̱ Jehová nu̱úka ña̱ xíniñúʼu taxina xa̱ʼa̱ ña̱ nda̱taxina miína ndaʼa̱ Ndióxi̱ ña̱ kachíñuna nu̱úra, ta tá kivi keʼéna ña̱yóʼo, xíniñúʼu saxínuna ña̱ ki̱ndoona xa̱ʼa̱ ña̱ nda̱taxina miína ndaʼa̱ Ndióxi̱ ña̱ kachíñuna nu̱úra’”.

22 Tasaá ni̱ka̱ʼa̱n Jehová xíʼin ta̱ Moisés: 23 “Ka̱ʼa̱n xíʼin ta̱ Aarón ta saátu xíʼin na̱ se̱ʼera: ‘Siaʼa kúú ña̱ xíniñúʼu ka̱ʼa̱nndó tá ná ndukúndó bendición xa̱ʼa̱ na̱ ñuu Israel. Kachindó:

24 “Mií Jehová ná taxi bendición ndaʼa̱ndó ta ná kundaara ndóʼó.

25 Mií Jehová ná na̱ʼa̱ ña̱ kúsi̱í-inira xíʼin ña̱ kéʼéndó.

26 Mií Jehová ná na̱ʼa̱ ña̱ va̱ʼaní-inira xíʼinndó, ta ná chindeétáʼanra xíʼinndó ña̱ kǒo kundi̱ʼi-inindó”’.

27 Ta na̱yóʼo xíniñúʼu kuniñúʼuna ki̱víi̱ tá ná ndukúna bendición xa̱ʼa̱ na̱ ñuu Israel. Tasaá taxii̱ bendición ndaʼa̱na”.

7 Tá ki̱vi̱ ña̱ sa̱ndíʼi ta̱ Moisés ña̱ nda̱chitáʼanra tabernáculo, ni̱ko̱so̱ra aceite sa̱táña ta nda̱sayi̱i̱raña xíʼin ndiʼi ña̱ʼa ña̱ kuniñúʼuna iniña saátu altar xíʼin ndiʼi ña̱ kuniñúʼuna xíʼinña. Tá sa̱ndíʼira chi̱kaa̱ra aceite sa̱tá ña̱yóʼo ta nda̱sayi̱i̱ra ndiʼi ña̱ʼa, 2 na̱ xi̱niʼi yichi̱ nu̱ú na̱ ñuu Israel, ta saátu xi̱niʼina yichi̱ nu̱ú na̱ tribuna, ni̱so̱kóna ña̱ʼa nu̱ú* Ndióxi̱. Na̱ xi̱niʼi yichi̱ nu̱ú na̱ tribu yóʼo kúú na̱ ki̱ʼin kuenta tá nda̱kaʼyina ki̱vi̱ na̱ ñuu, 3 ta ña̱yóʼo kúú ña̱ níʼina ni̱xa̱ʼa̱nna ni̱so̱kóna nu̱ú Jehová: 6 carreta tú ndási ti̱ko̱to̱ sa̱tá xíʼin 12 si̱ndi̱ki̱ che̱e, 2 na̱ níʼi yichi̱ nu̱ú na̱ ñuu ki̱táʼanna ta̱xina iin carreta, ta iin si̱ndi̱ki̱ ta̱xi iin tá iin na̱ níʼi yichi̱ nu̱ú na̱ ñuu; ta ni̱xa̱ʼa̱nna xíʼin ndiʼi ña̱yóʼo nu̱ú tabernáculo. 4 Jehová ni̱ka̱ʼa̱nra xíʼin ta̱ Moisés: 5 “Ndakiʼin ña̱yóʼo ndaʼa̱na, saáchi ña̱yóʼo kúú ña̱ kuniñúʼu na̱ kachíñu ini tabernáculo. Ta xíniñúʼu ndataʼviúnña ta taxiúnña ndaʼa̱ na̱ levita; taxi ña̱ xíniñúʼu iin tá iin na̱yóʼo ña̱ va̱ʼa keʼéna chiñuna”.

6 Xa̱ʼa̱ ña̱kán, ta̱ Moisés nda̱kiʼinra carreta xíʼin si̱ndi̱ki̱, nda̱taʼvíraña ta ta̱xiraña ndaʼa̱ na̱ levita. 7 Ta̱xira u̱vi̱ carreta xíʼin ku̱mí si̱ndi̱ki̱ che̱e ndaʼa̱ na̱ se̱ʼe ta̱ Guersón, chi ña̱yóʼo kúú ña̱ xi̱xiniñúʼuna ña̱ va̱ʼa keʼéna chiñuna, 8 ta ta̱xira ku̱mí carreta xíʼin u̱na̱ si̱ndi̱ki̱ che̱e ndaʼa̱ na̱ se̱ʼe ta̱ Merarí, chi ña̱yóʼo kúú ña̱ xi̱xiniñúʼuna ña̱ va̱ʼa keʼéna chiñuna, ta ta̱ Itamar se̱ʼe ta̱ su̱tu̱ Aarón kúú ta̱ xi̱niʼi yichi̱ nu̱úna ña̱ va̱ʼa keʼéna chiñuna. 9 Soo va̱ása nítaxira nda̱a̱ ni iin ña̱ʼa ndaʼa̱ na̱ se̱ʼe ta̱ Cohat saáchi lugar ña̱ yi̱i̱ kúú ña̱ xi̱kiʼin na̱yóʼo kuenta xíʼin. Na̱yóʼo xi̱xikó sátána* ña̱ʼa ña̱ yi̱i̱.

10 Na̱ níʼi yichi̱ nu̱ú na̱ ñuu ni̱so̱kóna ña̱ʼa ndaʼa̱ Ndióxi̱ tá sa̱káana aceite nu̱ú altar ña̱ va̱ʼa kixáʼana kuniñúʼunaña. Tá ni̱xa̱a̱ na̱ níʼi yichi̱ nu̱ú na̱ ñuu nu̱ú níndichi altar ña̱ so̱kóna ña̱ʼa ña̱ níʼina ku̱a̱ʼa̱nna, 11 Jehová ni̱ka̱ʼa̱nra xíʼin ta̱ Moisés: “Ndiʼi ki̱vi̱, iin tá iin na̱ níʼi yichi̱ nu̱ú na̱ ñuu, so̱kóna ña̱ʼa xa̱ʼa̱ ña̱ kixáʼana kuniñúʼuna altar”.

12 Tá ki̱vi̱ nu̱ú, ta̱ nu̱ú ni̱so̱kó ña̱ʼa nu̱ú Ndióxi̱ xi̱kuu ta̱ Nahsón se̱ʼe ta̱ Aminadab, ta̱ ke̱e ti̱xin tribu ta̱ Judá. 13 Ña̱ ni̱so̱kóra xi̱kuu ña̱yóʼo: ña̱ va̱ʼa kuñuʼu harina ña̱ ni̱so̱kóra, ta̱xira iin ko̱ʼo̱ ña̱ plata ña̱ ve̱e iin kilo sava* xíʼin iin ko̱ʼo̱ loʼo ña̱ plata ña̱ ve̱e ki̱ʼva 800 gramo,* ña̱ ka̱tana nda̱a̱ táki̱ʼva kátana plata lugar ña̱ yi̱i̱, ta u̱vi̱ saá ña̱yóʼo chu̱túña xíʼin harina ña̱ va̱ʼa, ña̱ nda̱saka̱ xíʼin aceite; 14 iin copa ña̱ oro ña̱ ve̱e ki̱ʼva 114 gramo* ta chu̱tú iniña xíʼin ña̱ʼa ña̱ chíʼmána; 15 iin si̱ndi̱ki̱ che̱e tí yúta̱,* iin ndikachi* che̱e xíʼin iin ndikachi che̱e loʼo tí iin ku̱i̱ya̱ ta tíyóʼo kúú tí ni̱xi̱xi̱* ña̱ va̱ʼa ni̱so̱kórarí nu̱ú Ndióxi̱; 16 iin ti̱xúʼú* loʼo tí ni̱so̱kóra xa̱ʼa̱ ku̱a̱chira, 17 ta ña̱yóʼo ta̱xira xa̱ʼa̱ ña̱ kúni̱ra ndakutáʼan viíra xíʼin Ndióxi̱: u̱vi̱ si̱ndi̱ki̱, u̱ʼu̱n ndikachi che̱e, u̱ʼu̱n ti̱xúʼú che̱e ta u̱ʼu̱n ndikachi válí tí iin ku̱i̱ya̱. Ña̱yóʼo xi̱kuu ndiʼi ña̱ ni̱so̱kó ta̱ Nahsón se̱ʼe ta̱ Aminadab.

18 Tá ki̱vi̱ u̱vi̱, ta̱ ni̱so̱kó ña̱ʼa nu̱ú Ndióxi̱ xi̱kuu ta̱ Netanel se̱ʼe ta̱ Zuar, ta̱ xi̱niʼi yichi̱ nu̱ú na̱ tribu ta̱ Isacar. 19 Ña̱ ni̱so̱kóra xi̱kuu ña̱yóʼo: ña̱ va̱ʼa kuñuʼu harina ña̱ ni̱so̱kóra, ta̱xira iin ko̱ʼo̱ ña̱ plata ña̱ ve̱e iin kilo sava xíʼin iin ko̱ʼo̱ loʼo ña̱ plata ña̱ ve̱e ki̱ʼva 800 gramo, ña̱ ka̱tana nda̱a̱ táki̱ʼva kátana plata lugar ña̱ yi̱i̱, ta u̱vi̱ saá ña̱yóʼo chu̱túña xíʼin harina ña̱ va̱ʼa, ña̱ nda̱saka̱ xíʼin aceite; 20 iin copa ña̱ oro ña̱ ve̱e ki̱ʼva 114 gramo ta chu̱tú iniña xíʼin ña̱ʼa ña̱ chíʼmána; 21 iin si̱ndi̱ki̱ che̱e tí yúta̱, iin ndikachi che̱e xíʼin iin ndikachi che̱e loʼo tí iin ku̱i̱ya̱ ta tíyóʼo kúú tí ni̱xi̱xi̱ ña̱ va̱ʼa ni̱so̱kórarí nu̱ú Ndióxi̱; 22 iin ti̱xúʼú loʼo tí ni̱so̱kóra xa̱ʼa̱ ku̱a̱chira, 23 ta ña̱yóʼo ta̱xira xa̱ʼa̱ ña̱ kúni̱ra ndakutáʼan viíra xíʼin Ndióxi̱: u̱vi̱ si̱ndi̱ki̱, u̱ʼu̱n ndikachi che̱e, u̱ʼu̱n ti̱xúʼú che̱e ta u̱ʼu̱n ndikachi válí tí iin ku̱i̱ya̱. Ña̱yóʼo kúú ndiʼi ña̱ ni̱so̱kó ta̱ Netanel se̱ʼe ta̱ Zuar.

24 Tá ki̱vi̱ u̱ni̱, ta̱ ni̱so̱kó ña̱ʼa nu̱ú Ndióxi̱ xi̱kuu ta̱ Eliab se̱ʼe ta̱ Helón, ta̱ xi̱niʼi yichi̱ nu̱ú na̱ tribu ta̱ Zabulón. 25 Ña̱ ni̱so̱kóra xi̱kuu ña̱yóʼo: ña̱ va̱ʼa kuñuʼu harina ña̱ ni̱so̱kóra, ta̱xira iin ko̱ʼo̱ ña̱ plata ña̱ ve̱e iin kilo sava xíʼin iin ko̱ʼo̱ loʼo ña̱ plata ña̱ ve̱e ki̱ʼva 800 gramo, ña̱ ka̱tana nda̱a̱ táki̱ʼva kátana plata lugar ña̱ yi̱i̱, ta u̱vi̱ saá ña̱yóʼo chu̱túña xíʼin harina ña̱ va̱ʼa, ña̱ nda̱saka̱ xíʼin aceite; 26 iin copa ña̱ oro ña̱ ve̱e ki̱ʼva 114 gramo ta chu̱tú iniña xíʼin ña̱ʼa ña̱ chíʼmána; 27 iin si̱ndi̱ki̱ che̱e tí yúta̱, iin ndikachi che̱e xíʼin iin ndikachi che̱e loʼo tí iin ku̱i̱ya̱ ta tíyóʼo kúú tí ni̱xi̱xi̱ ña̱ va̱ʼa ni̱so̱kórarí nu̱ú Ndióxi̱; 28 iin ti̱xúʼú loʼo tí ni̱so̱kóra xa̱ʼa̱ ku̱a̱chira, 29 ta ña̱yóʼo ta̱xira xa̱ʼa̱ ña̱ kúni̱ra ndakutáʼan viíra xíʼin Ndióxi̱: u̱vi̱ si̱ndi̱ki̱, u̱ʼu̱n ndikachi che̱e, u̱ʼu̱n ti̱xúʼú che̱e ta u̱ʼu̱n ndikachi válí tí iin ku̱i̱ya̱. Ña̱yóʼo kúú ndiʼi ña̱ ni̱so̱kó ta̱ Eliab se̱ʼe ta̱ Helón.

30 Tá ki̱vi̱ ku̱mí, ta̱ ni̱so̱kó ña̱ʼa nu̱ú Ndióxi̱ xi̱kuu ta̱ Elizur se̱ʼe ta̱ Sedeur, ta̱ xi̱niʼi yichi̱ nu̱ú na̱ tribu ta̱ Rubén. 31 Ña̱ ni̱so̱kóra xi̱kuu ña̱yóʼo: ña̱ va̱ʼa kuñuʼu harina ña̱ ni̱so̱kóra, ta̱xira iin ko̱ʼo̱ ña̱ plata ña̱ ve̱e iin kilo sava xíʼin iin ko̱ʼo̱ loʼo ña̱ plata ña̱ ve̱e ki̱ʼva 800 gramo, ña̱ ka̱tana nda̱a̱ táki̱ʼva kátana plata lugar ña̱ yi̱i̱, ta u̱vi̱ saá ña̱yóʼo chu̱túña xíʼin harina ña̱ va̱ʼa, ña̱ nda̱saka̱ xíʼin aceite; 32 iin copa ña̱ oro ña̱ ve̱e ki̱ʼva 114 gramo ta chu̱tú iniña xíʼin ña̱ʼa ña̱ chíʼmána; 33 iin si̱ndi̱ki̱ che̱e tí yúta̱, iin ndikachi che̱e xíʼin iin ndikachi che̱e loʼo tí iin ku̱i̱ya̱ ta tíyóʼo kúú tí ni̱xi̱xi̱ ña̱ va̱ʼa ni̱so̱kórarí nu̱ú Ndióxi̱; 34 iin ti̱xúʼú loʼo tí ni̱so̱kóra xa̱ʼa̱ ku̱a̱chira, 35 ta ña̱yóʼo ta̱xira xa̱ʼa̱ ña̱ kúni̱ra ndakutáʼan viíra xíʼin Ndióxi̱: u̱vi̱ si̱ndi̱ki̱, u̱ʼu̱n ndikachi che̱e, u̱ʼu̱n ti̱xúʼú che̱e ta u̱ʼu̱n ndikachi válí tí iin ku̱i̱ya̱. Ña̱yóʼo kúú ndiʼi ña̱ ni̱so̱kó ta̱ Elizur se̱ʼe ta̱ Sedeur.

36 Tá ki̱vi̱ u̱ʼu̱n, ta̱ ni̱so̱kó ña̱ʼa nu̱ú Ndióxi̱ xi̱kuu ta̱ Selumiel se̱ʼe ta̱ Zurisadái, ta̱ xi̱niʼi yichi̱ nu̱ú na̱ tribu ta̱ Simeón. 37 Ña̱ ni̱so̱kóra xi̱kuu ña̱yóʼo: ña̱ va̱ʼa kuñuʼu harina ña̱ ni̱so̱kóra, ta̱xira iin ko̱ʼo̱ ña̱ plata ña̱ ve̱e iin kilo sava xíʼin iin ko̱ʼo̱ loʼo ña̱ plata ña̱ ve̱e ki̱ʼva 800 gramo, ña̱ ka̱tana nda̱a̱ táki̱ʼva kátana plata lugar ña̱ yi̱i̱, ta u̱vi̱ saá ña̱yóʼo chu̱túña xíʼin harina ña̱ va̱ʼa, ña̱ nda̱saka̱ xíʼin aceite; 38 iin copa ña̱ oro ña̱ ve̱e ki̱ʼva 114 gramo ta chu̱tú iniña xíʼin ña̱ʼa ña̱ chíʼmána; 39 iin si̱ndi̱ki̱ che̱e tí yúta̱, iin ndikachi che̱e xíʼin iin ndikachi che̱e loʼo tí iin ku̱i̱ya̱ ta tíyóʼo kúú tí ni̱xi̱xi̱ ña̱ va̱ʼa ni̱so̱kórarí nu̱ú Ndióxi̱; 40 iin ti̱xúʼú loʼo tí ni̱so̱kóra xa̱ʼa̱ ku̱a̱chira, 41 ta ña̱yóʼo ta̱xira xa̱ʼa̱ ña̱ kúni̱ra ndakutáʼan viíra xíʼin Ndióxi̱: u̱vi̱ si̱ndi̱ki̱, u̱ʼu̱n ndikachi che̱e, u̱ʼu̱n ti̱xúʼú che̱e ta u̱ʼu̱n ndikachi válí tí iin ku̱i̱ya̱. Ña̱yóʼo kúú ndiʼi ña̱ ni̱so̱kó ta̱ Selumiel se̱ʼe ta̱ Zurisadái.

42 Tá ki̱vi̱ i̱ñu̱, ta̱ ni̱so̱kó ña̱ʼa nu̱ú Ndióxi̱ xi̱kuu ta̱ Eliasaf se̱ʼe ta̱ Deuel, ta̱ xi̱niʼi yichi̱ nu̱ú na̱ tribu ta̱ Gad. 43 Ña̱ ni̱so̱kóra xi̱kuu ña̱yóʼo: ña̱ va̱ʼa kuñuʼu harina ña̱ ni̱so̱kóra, ta̱xira iin ko̱ʼo̱ ña̱ plata ña̱ ve̱e iin kilo sava xíʼin iin ko̱ʼo̱ loʼo ña̱ plata ña̱ ve̱e ki̱ʼva 800 gramo, ña̱ ka̱tana nda̱a̱ táki̱ʼva kátana plata lugar ña̱ yi̱i̱, ta u̱vi̱ saá ña̱yóʼo chu̱túña xíʼin harina ña̱ va̱ʼa, ña̱ nda̱saka̱ xíʼin aceite; 44 iin copa ña̱ oro ña̱ ve̱e ki̱ʼva 114 gramo ta chu̱tú iniña xíʼin ña̱ʼa ña̱ chíʼmána; 45 iin si̱ndi̱ki̱ che̱e tí yúta̱, iin ndikachi che̱e xíʼin iin ndikachi che̱e loʼo tí iin ku̱i̱ya̱ ta tíyóʼo kúú tí ni̱xi̱xi̱ ña̱ va̱ʼa ni̱so̱kórarí nu̱ú Ndióxi̱; 46 iin ti̱xúʼú loʼo tí ni̱so̱kóra xa̱ʼa̱ ku̱a̱chira, 47 ta ña̱yóʼo ta̱xira xa̱ʼa̱ ña̱ kúni̱ra ndakutáʼan viíra xíʼin Ndióxi̱: u̱vi̱ si̱ndi̱ki̱, u̱ʼu̱n ndikachi che̱e, u̱ʼu̱n ti̱xúʼú che̱e ta u̱ʼu̱n ndikachi válí tí iin ku̱i̱ya̱. Ña̱yóʼo kúú ndiʼi ña̱ ni̱so̱kó ta̱ Eliasaf se̱ʼe ta̱ Deuel.

48 Tá ki̱vi̱ u̱xa̱, ta̱ ni̱so̱kó ña̱ʼa nu̱ú Ndióxi̱ xi̱kuu ta̱ Elisamá se̱ʼe ta̱ Amihud, ta̱ xi̱niʼi yichi̱ nu̱ú na̱ tribu ta̱ Efraín. 49 Ña̱ ni̱so̱kóra xi̱kuu ña̱yóʼo: ña̱ va̱ʼa kuñuʼu harina ña̱ ni̱so̱kóra, ta̱xira iin ko̱ʼo̱ ña̱ plata ña̱ ve̱e iin kilo sava xíʼin iin ko̱ʼo̱ loʼo ña̱ plata ña̱ ve̱e ki̱ʼva 800 gramo, ña̱ ka̱tana nda̱a̱ táki̱ʼva kátana plata lugar ña̱ yi̱i̱, ta u̱vi̱ saá ña̱yóʼo chu̱túña xíʼin harina ña̱ va̱ʼa, ña̱ nda̱saka̱ xíʼin aceite; 50 iin copa ña̱ oro ña̱ ve̱e ki̱ʼva 114 gramo ta chu̱tú iniña xíʼin ña̱ʼa ña̱ chíʼmána; 51 iin si̱ndi̱ki̱ che̱e tí yúta̱, iin ndikachi che̱e xíʼin iin ndikachi che̱e loʼo tí iin ku̱i̱ya̱ ta tíyóʼo kúú tí ni̱xi̱xi̱ ña̱ va̱ʼa ni̱so̱kórarí nu̱ú Ndióxi̱; 52 iin ti̱xúʼú loʼo tí ni̱so̱kóra xa̱ʼa̱ ku̱a̱chira, 53 ta ña̱yóʼo ta̱xira xa̱ʼa̱ ña̱ kúni̱ra ndakutáʼan viíra xíʼin Ndióxi̱: u̱vi̱ si̱ndi̱ki̱, u̱ʼu̱n ndikachi che̱e, u̱ʼu̱n ti̱xúʼú che̱e ta u̱ʼu̱n ndikachi válí tí iin ku̱i̱ya̱. Ña̱yóʼo kúú ndiʼi ña̱ ni̱so̱kó ta̱ Elisamá se̱ʼe ta̱ Amihud.

54 Tá ki̱vi̱ u̱na̱, ta̱ ni̱so̱kó ña̱ʼa nu̱ú Ndióxi̱ xi̱kuu ta̱ Gamaliel se̱ʼe ta̱ Pedahzur, ta̱ xi̱niʼi yichi̱ nu̱ú na̱ tribu ta̱ Manasés. 55 Ña̱ ni̱so̱kóra xi̱kuu ña̱yóʼo: ña̱ va̱ʼa kuñuʼu harina ña̱ ni̱so̱kóra, ta̱xira iin ko̱ʼo̱ ña̱ plata ña̱ ve̱e iin kilo sava xíʼin iin ko̱ʼo̱ loʼo ña̱ plata ña̱ ve̱e ki̱ʼva 800 gramo, ña̱ ka̱tana nda̱a̱ táki̱ʼva kátana plata lugar ña̱ yi̱i̱, ta u̱vi̱ saá ña̱yóʼo chu̱túña xíʼin harina ña̱ va̱ʼa, ña̱ nda̱saka̱ xíʼin aceite; 56 iin copa ña̱ oro ña̱ ve̱e ki̱ʼva 114 gramo ta chu̱tú iniña xíʼin ña̱ʼa ña̱ chíʼmána; 57 iin si̱ndi̱ki̱ che̱e tí yúta̱, iin ndikachi che̱e xíʼin iin ndikachi che̱e loʼo tí iin ku̱i̱ya̱ ta tíyóʼo kúú tí ni̱xi̱xi̱ ña̱ va̱ʼa ni̱so̱kórarí nu̱ú Ndióxi̱; 58 iin ti̱xúʼú loʼo tí ni̱so̱kóra xa̱ʼa̱ ku̱a̱chira, 59 ta ña̱yóʼo ta̱xira xa̱ʼa̱ ña̱ kúni̱ra ndakutáʼan viíra xíʼin Ndióxi̱: u̱vi̱ si̱ndi̱ki̱, u̱ʼu̱n ndikachi che̱e, u̱ʼu̱n ti̱xúʼú che̱e ta u̱ʼu̱n ndikachi válí tí iin ku̱i̱ya̱. Ña̱yóʼo kúú ndiʼi ña̱ ni̱so̱kó ta̱ Gamaliel se̱ʼe ta̱ Pedahzur.

60 Tá ki̱vi̱ i̱i̱n, ta̱ ni̱so̱kó ña̱ʼa nu̱ú Ndióxi̱ xi̱kuu ta̱ Abidán se̱ʼe ta̱ Guideoní, ta̱ xi̱niʼi yichi̱ nu̱ú na̱ tribu ta̱ Benjamín. 61 Ña̱ ni̱so̱kóra xi̱kuu ña̱yóʼo: ña̱ va̱ʼa kuñuʼu harina ña̱ ni̱so̱kóra, ta̱xira iin ko̱ʼo̱ ña̱ plata ña̱ ve̱e iin kilo sava xíʼin iin ko̱ʼo̱ loʼo ña̱ plata ña̱ ve̱e ki̱ʼva 800 gramo, ña̱ ka̱tana nda̱a̱ táki̱ʼva kátana plata lugar ña̱ yi̱i̱, ta u̱vi̱ saá ña̱yóʼo chu̱túña xíʼin harina ña̱ va̱ʼa, ña̱ nda̱saka̱ xíʼin aceite; 62 iin copa ña̱ oro ña̱ ve̱e ki̱ʼva 114 gramo ta chu̱tú iniña xíʼin ña̱ʼa ña̱ chíʼmána; 63 iin si̱ndi̱ki̱ che̱e tí yúta̱, iin ndikachi che̱e xíʼin iin ndikachi che̱e loʼo tí iin ku̱i̱ya̱ ta tíyóʼo kúú tí ni̱xi̱xi̱ ña̱ va̱ʼa ni̱so̱kórarí nu̱ú Ndióxi̱; 64 iin ti̱xúʼú loʼo tí ni̱so̱kóra xa̱ʼa̱ ku̱a̱chira, 65 ta ña̱yóʼo ta̱xira xa̱ʼa̱ ña̱ kúni̱ra ndakutáʼan viíra xíʼin Ndióxi̱: u̱vi̱ si̱ndi̱ki̱, u̱ʼu̱n ndikachi che̱e, u̱ʼu̱n ti̱xúʼú che̱e ta u̱ʼu̱n ndikachi válí tí iin ku̱i̱ya̱. Ña̱yóʼo kúú ndiʼi ña̱ ni̱so̱kó ta̱ Abidán se̱ʼe ta̱ Guideoní.

66 Tá ki̱vi̱ 10, ta̱ ni̱so̱kó ña̱ʼa nu̱ú Ndióxi̱ xi̱kuu ta̱ Ahiézer se̱ʼe ta̱ Amisadái, ta̱ xi̱niʼi yichi̱ nu̱ú na̱ tribu ta̱ Dan. 67 Ña̱ ni̱so̱kóra xi̱kuu ña̱yóʼo: ña̱ va̱ʼa kuñuʼu harina ña̱ ni̱so̱kóra, ta̱xira iin ko̱ʼo̱ ña̱ plata ña̱ ve̱e iin kilo sava xíʼin iin ko̱ʼo̱ loʼo ña̱ plata ña̱ ve̱e ki̱ʼva 800 gramo, ña̱ ka̱tana nda̱a̱ táki̱ʼva kátana plata lugar ña̱ yi̱i̱, ta u̱vi̱ saá ña̱yóʼo chu̱túña xíʼin harina ña̱ va̱ʼa, ña̱ nda̱saka̱ xíʼin aceite; 68 iin copa ña̱ oro ña̱ ve̱e ki̱ʼva 114 gramo ta chu̱tú iniña xíʼin ña̱ʼa ña̱ chíʼmána; 69 iin si̱ndi̱ki̱ che̱e tí yúta̱, iin ndikachi che̱e xíʼin iin ndikachi che̱e loʼo tí iin ku̱i̱ya̱ ta tíyóʼo kúú tí ni̱xi̱xi̱ ña̱ va̱ʼa ni̱so̱kórarí nu̱ú Ndióxi̱; 70 iin ti̱xúʼú loʼo tí ni̱so̱kóra xa̱ʼa̱ ku̱a̱chira, 71 ta ña̱yóʼo ta̱xira xa̱ʼa̱ ña̱ kúni̱ra ndakutáʼan viíra xíʼin Ndióxi̱: u̱vi̱ si̱ndi̱ki̱, u̱ʼu̱n ndikachi che̱e, u̱ʼu̱n ti̱xúʼú che̱e ta u̱ʼu̱n ndikachi válí tí iin ku̱i̱ya̱. Ña̱yóʼo kúú ndiʼi ña̱ ni̱so̱kó ta̱ Ahiézer se̱ʼe ta̱ Amisadái.

72 Tá ki̱vi̱ 11, ta̱ ni̱so̱kó ña̱ʼa nu̱ú Ndióxi̱ xi̱kuu ta̱ Paguiel se̱ʼe ta̱ Ocrán, ta̱ xi̱niʼi yichi̱ nu̱ú na̱ tribu ta̱ Aser. 73 Ña̱ ni̱so̱kóra xi̱kuu ña̱yóʼo: ña̱ va̱ʼa kuñuʼu harina ña̱ ni̱so̱kóra, ta̱xira iin ko̱ʼo̱ ña̱ plata ña̱ ve̱e iin kilo sava xíʼin iin ko̱ʼo̱ loʼo ña̱ plata ña̱ ve̱e ki̱ʼva 800 gramo, ña̱ ka̱tana nda̱a̱ táki̱ʼva kátana plata lugar ña̱ yi̱i̱, ta u̱vi̱ saá ña̱yóʼo chu̱túña xíʼin harina ña̱ va̱ʼa, ña̱ nda̱saka̱ xíʼin aceite; 74 iin copa ña̱ oro ña̱ ve̱e ki̱ʼva 114 gramo ta chu̱tú iniña xíʼin ña̱ʼa ña̱ chíʼmána; 75 iin si̱ndi̱ki̱ che̱e tí yúta̱, iin ndikachi che̱e xíʼin iin ndikachi che̱e loʼo tí iin ku̱i̱ya̱ ta tíyóʼo kúú tí ni̱xi̱xi̱ ña̱ va̱ʼa ni̱so̱kórarí nu̱ú Ndióxi̱; 76 iin ti̱xúʼú loʼo tí ni̱so̱kóra xa̱ʼa̱ ku̱a̱chira, 77 ta ña̱yóʼo ta̱xira xa̱ʼa̱ ña̱ kúni̱ra ndakutáʼan viíra xíʼin Ndióxi̱: u̱vi̱ si̱ndi̱ki̱, u̱ʼu̱n ndikachi che̱e, u̱ʼu̱n ti̱xúʼú che̱e ta u̱ʼu̱n ndikachi válí tí iin ku̱i̱ya̱. Ña̱yóʼo kúú ndiʼi ña̱ ni̱so̱kó ta̱ Paguiel se̱ʼe ta̱ Ocrán.

78 Tá ki̱vi̱ 12, ta̱ ni̱so̱kó ña̱ʼa nu̱ú Ndióxi̱ xi̱kuu ta̱ Ahirá se̱ʼe ta̱ Enán, ta̱ xi̱niʼi yichi̱ nu̱ú na̱ tribu ta̱ Neftalí. 79 Ña̱ ni̱so̱kóra xi̱kuu ña̱yóʼo: ña̱ va̱ʼa kuñuʼu harina ña̱ ni̱so̱kóra, ta̱xira iin ko̱ʼo̱ ña̱ plata ña̱ ve̱e iin kilo sava xíʼin iin ko̱ʼo̱ loʼo ña̱ plata ña̱ ve̱e ki̱ʼva 800 gramo, ña̱ ka̱tana nda̱a̱ táki̱ʼva kátana plata lugar ña̱ yi̱i̱, ta u̱vi̱ saá ña̱yóʼo chu̱túña xíʼin harina ña̱ va̱ʼa, ña̱ nda̱saka̱ xíʼin aceite; 80 iin copa ña̱ oro ña̱ ve̱e ki̱ʼva 114 gramo ta chu̱tú iniña xíʼin ña̱ʼa ña̱ chíʼmána; 81 iin si̱ndi̱ki̱ che̱e tí yúta̱, iin ndikachi che̱e xíʼin iin ndikachi che̱e loʼo tí iin ku̱i̱ya̱ ta tíyóʼo kúú tí ni̱xi̱xi̱ ña̱ va̱ʼa ni̱so̱kórarí nu̱ú Ndióxi̱; 82 iin ti̱xúʼú loʼo tí ni̱so̱kóra xa̱ʼa̱ ku̱a̱chira, 83 ta ña̱yóʼo ta̱xira xa̱ʼa̱ ña̱ kúni̱ra ndakutáʼan viíra xíʼin Ndióxi̱: u̱vi̱ si̱ndi̱ki̱, u̱ʼu̱n ndikachi che̱e, u̱ʼu̱n ti̱xúʼú che̱e ta u̱ʼu̱n ndikachi válí tí iin ku̱i̱ya̱. Ña̱yóʼo kúú ndiʼi ña̱ ni̱so̱kó ta̱ Ahirá se̱ʼe ta̱ Enán.

84 Ña̱yóʼo kúú ña̱ ta̱xi na̱ xi̱niʼi yichi̱ nu̱ú na̱ ñuu Israel tá sa̱káana aceite sa̱tá altar ta ki̱xáʼana xíniñúʼunaña: 12 ko̱ʼo̱ ña̱ plata, 12 ko̱ʼo̱ válí ña̱ plata xíʼin 12 copa ña̱ oro 85 (iin tá iin ko̱ʼo̱ ña̱ plata ve̱eña iin kilo sava ta iin tá iin ko̱ʼo̱ válí ña̱ plata ve̱eña 800 gramo, xa̱ʼa̱ ña̱kán ndiʼi ña̱ʼa ña̱ plata ña̱ ta̱xina, ve̱eña yáʼaka 27 kilo* ta ka̱tanaña nda̱a̱ táki̱ʼva kátana plata lugar ña̱ yi̱i̱; 86 iin tá iin copa ña̱ oro ña̱ ta̱xina ña̱ chu̱tú ini xíʼin ña̱ʼa ña̱ chíʼmána, ve̱eña 114 gramo ta ka̱tanaña nda̱a̱ táki̱ʼva kátana plata lugar ña̱ yi̱i̱. Xa̱ʼa̱ ña̱kán, ndiʼi copa ña̱ oro ña̱ ta̱xina, ve̱eña ki̱ʼva iin kilo sava).* 87 Ndiʼi kití tí ta̱xina ña̱ va̱ʼa kaʼminarí ta so̱kónarí, xi̱kuurí: 12 si̱ndi̱ki̱ che̱e, 12 ndikachi che̱e xíʼin 12 ndikachi válí tí kúúmií iin ku̱i̱ya̱ ta saátu ni̱so̱kóna harina, ta kití tí ni̱so̱kóna xa̱ʼa̱ ku̱a̱china xi̱kuurí 12 ti̱xúʼú válí. 88 Ta ndiʼi kití tí ta̱xina ña̱ va̱ʼa so̱kónarí ña̱ va̱ʼa ndakutáʼan viína xíʼin Ndióxi̱, xi̱kuurí: 24 si̱ndi̱ki̱ che̱e, 60 ndikachi che̱e, 60 ti̱xúʼú che̱e xíʼin 60 ndikachi válí tí iin ku̱i̱ya̱. Ña̱yóʼo xi̱kuu ña̱ ni̱so̱kóna tá sa̱ndíʼina sa̱káana aceite sa̱tá altar ña̱ va̱ʼa kixáʼana kuniñúʼunaña.

89 Ndiʼi yichi̱ ña̱ xi̱kiʼvi ta̱ Moisés ini tabernáculo ña̱ va̱ʼa ka̱ʼa̱nra xíʼin Ndióxi̱, xi̱xiniso̱ʼora tu̱ʼun Ndióxi̱ chí si̱kí yuʼú tú arca ña̱ trato, ma̱ʼñú na̱ querubín; mií Ndióxi̱ kúú ta̱ xi̱kaʼa̱n xíʼinra.

8 Jehová ni̱ka̱ʼa̱nra xíʼin ta̱ Moisés ta ka̱chira: 2 “Ña̱yóʼo ka̱ʼún xíʼin ta̱ Aarón: ‘Tá ná ndatuún lámpara, u̱xa̱ saá lámpara xíniñúʼu tu̱u̱nña nu̱ú xítondaa candelabro’”. 3 Tasaá ke̱ʼéva ta̱ Aarón: nda̱tuunra lámpara ña̱ va̱ʼa tu̱u̱nña nu̱ú xítondaa candelabro, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés. 4 Siaʼa kúú ña̱ i̱xava̱ʼana candelabro: xíʼin oro i̱xava̱ʼanaña ta xi̱niñúʼuna martillo ña̱ ke̱ʼénaña. Xíʼin martillo i̱xava̱ʼana ka̱a ña̱ níndichi ma̱ʼñúña ta saátu yita ña̱ íyo ndaʼa̱ña. Candelabro ku̱vaʼaña nda̱a̱ táki̱ʼva íyo ña̱ ni̱na̱ʼa̱ Jehová nu̱ú ta̱ Moisés.

5 Jehová tuku ni̱ka̱ʼa̱nra xíʼin ta̱ Moisés ta ka̱chira: 6 “Ti̱xin na̱ ñuu Israel ndaka̱xiún na̱ levita ta ndasandiúnna. 7 Siaʼa kúú ña̱ xíniñúʼu keʼún ña̱ ndasandiúnna: kiʼin ti̱kui̱í tá ndákata ku̱a̱chi ta ko̱so̱yáváúnrá* na̱yóʼo, ta na̱yóʼo xíniñúʼu kuniñúʼuna iin navaja ña̱ xa̱tána ixí* ñii̱na, ndakatana ti̱ko̱to̱na ta ndasandiina* miína. 8 Ta na̱yóʼo xíniñúʼu kuniʼina iin si̱ndi̱ki̱ tí yúta̱* ku̱ʼu̱n xíʼinna ta saátu harina ña̱ va̱ʼa ña̱ nda̱saka̱ xíʼin aceite, ta yóʼó kuniʼún iin si̱ndi̱ki̱ tí yúta̱ ku̱ʼu̱n xíʼún tí so̱kóún* xa̱ʼa̱ ku̱a̱china. 9 Ta xíniñúʼu ku̱ʼún xíʼin na̱ levita nu̱ú tabernáculo ta sandátakaún ndiʼi na̱ ñuu Israel. 10 Tá ná ku̱ʼún xíʼin na̱ levita nu̱ú Jehová, na̱ israelita xíniñúʼu chindósona ndaʼa̱na xi̱ní na̱ levita. 11 Ta̱ Aarón xíniñúʼu taxira* na̱ levita ndaʼa̱ Jehová, na̱yóʼo kúú na̱ sóko̱ na̱ israelita, nda̱a̱ táki̱ʼva íyo ña̱ sóko̱na ta sákuikóna* nu̱ú Ndióxi̱ saá koo na̱yóʼo, ta kachíñuna nu̱ú Jehová.

12 Tasaá, na̱ levita chindósona ndaʼa̱na xi̱ní tí si̱ndi̱ki̱ yóʼo. Tándi̱ʼi, iinrí so̱kóún xa̱ʼa̱ ku̱a̱china ta inkarí kaʼmiún* ña̱ va̱ʼa koo káʼnu-ini Jehová xa̱ʼa̱ na̱ levita. 13 Ta ka̱ʼún xíʼin na̱ levita ña̱ ná ku̱ʼu̱nna nu̱ú ta̱ Aarón ta saátu na̱ se̱ʼera, ta taxiúnna ndaʼa̱ Jehová ña̱ va̱ʼa koona nda̱a̱ táki̱ʼva íyo ña̱ sákuikóna ña̱ sóko̱na nu̱úra. 14 Ti̱xin na̱ ñuu Israel ndaka̱xiún na̱ levita, ta na̱ levita koona kuenta miíi̱. 15 Tándi̱ʼi, na̱ levita ki̱ʼvina ini tabernáculo ña̱ va̱ʼa kachíñuna kán. Saá kúú ña̱ xíniñúʼu keʼún ña̱ ndasandiúnna ta so̱kóúnna nu̱ú Ndióxi̱ nda̱a̱ táki̱ʼva íyo ña̱ sákuikóna ta sóko̱na nu̱úra. 16 Saáchi na̱yóʼo kúú na̱ nda̱taxi na̱ israelita ña̱ va̱ʼa koona kuentai̱. Na̱yóʼo kúú na̱ ndakiʼi̱n nu̱úka ña̱ ndakiʼi̱n ndiʼi se̱ʼenu̱ú na̱ israelita. 17 Saáchi ndiʼi se̱ʼenu̱ú na̱ israelita kuenta miíi̱ kúúna ta saátu ndiʼi se̱ʼenu̱ú kití sa̱na̱na. Saáchi nda̱sayi̱íi̱ ndiʼi na̱yóʼo xa̱ʼa̱ miíi̱ tá xa̱ʼníi̱ ndiʼi se̱ʼenu̱ú na̱ ñuu Egipto ta saátu ndiʼi se̱ʼenu̱ú kití sa̱na̱na. 18 Ndakiʼi̱n na̱ levita nu̱úka ña̱ ndakiʼi̱n ndiʼi se̱ʼenu̱ú na̱ israelita. 19 Ta ti̱xin na̱ ñuu Israel na̱ levita kúú na̱ ndataxina ndaʼa̱ ta̱ Aarón xíʼin na̱ se̱ʼera ña̱ chindeétáʼanna xíʼinra ña̱ va̱ʼa kachíñuna ini tabernáculo xa̱ʼa̱ na̱ israelita ta ka̱ʼa̱n-ndáʼvina xíʼin Ndióxi̱ xa̱ʼa̱ na̱yóʼo ña̱ va̱ása kixi tu̱ndóʼo nu̱ú na̱ israelita xa̱ʼa̱ ña̱ kúyatinna nu̱ú lugar ña̱ yi̱i̱”.

20 Ña̱yóʼo kúú ña̱ ke̱ʼé ta̱ Moisés, ta̱ Aarón ta saátu ndiʼi na̱ ñuu xíʼin na̱ levita. Nda̱a̱ táki̱ʼva ni̱ka̱ʼa̱n Jehová xíʼin ta̱ Moisés ña̱ keʼéna xíʼin na̱ levita saá ke̱ʼé na̱ ñuu xíʼin na̱yóʼo. 21 Tasaá na̱ levita nda̱sandiina miína ta nda̱katana ti̱ko̱to̱na. Tándi̱ʼi, ta̱ Aarón ni̱xa̱ʼa̱nra xíʼin na̱yóʼo nu̱ú Jehová ta nda̱a̱ táki̱ʼva íyo ña̱ʼa ña̱ sóko̱na ta sákuikóna saá ni̱xi̱yona nu̱úra. Tasaá ni̱ka̱ʼa̱n-ndáʼvi ta̱ Aarón xa̱ʼa̱na ña̱ va̱ʼa ndundiina. 22 Tándi̱ʼi, na̱ levita ni̱ki̱ʼvina ini tabernáculo ña̱ va̱ʼa chindeétáʼanna xíʼin ta̱ Aarón ta saátu xíʼin na̱ se̱ʼera. Nda̱a̱ táki̱ʼva ni̱ka̱ʼa̱n Jehová xíʼin ta̱ Moisés keʼéna xíʼin na̱ levita saá ke̱ʼéna xíʼinna.

23 Jehová ni̱ka̱ʼa̱n tukura xíʼin ta̱ Moisés ta ka̱chira: 24 “Ña̱yóʼo kúú ña̱ xíniñúʼu keʼé na̱ levita: na̱ ta̱a na̱ kúúmií 25 á ku̱a̱ʼáka ku̱i̱ya̱, kivi ndakutáʼanna kachíñuna xíʼin na̱ káchíñu ini tabernáculo, 25 soo tá xa̱a̱ ni̱xi̱nuna 50 ku̱i̱ya̱ va̱ása kivika kutáʼanna kachíñuna xíʼin na̱ káchíñu ini tabernáculo, ta va̱ása kivika keʼéna chiñuna. 26 Kiviva chindeétáʼanna xíʼin na̱ káchíñu ini tabernáculo, soo va̱ása kivi ki̱ʼvina ña̱ kachíñuna iniña. Ña̱yóʼo kúú ña̱ xíniñúʼu keʼún xíʼin na̱ levita ta saátu xíʼin chiñu ña̱ kúúmiína”.

9 Tá xa̱a̱ ni̱ya̱ʼa u̱vi̱ ku̱i̱ya̱ ña̱ ke̱e na̱ ñuu Israel chí Egipto tá yo̱o̱ nu̱ú, Jehová ni̱ka̱ʼa̱nra xíʼin ta̱ Moisés chí nu̱ú ñuʼú yi̱chí ña̱ Sinaí ta ka̱chira: 2 “Na̱ israelita xíniñúʼu ixatu̱ʼvana kití tí kaʼnína tá ná kixaa̱ ki̱vi̱ ña̱ xíniñúʼu koo ña̱ Pascua. 3 Xíniñúʼu ixatu̱ʼvanarí mií ki̱vi̱ ña̱ xa̱a̱ ni̱ka̱ʼi̱n xíʼinna, ki̱vi̱ 14 tí yo̱o̱ yóʼo tá xa̱a̱ ku̱ñuú. Xíniñúʼu ixatu̱ʼvana tíyóʼo nda̱a̱ táki̱ʼva ni̱ka̱ʼi̱n xíʼinna, nda̱a̱ táki̱ʼva káʼa̱n ley”.

4 Tasaá, ta̱ Moisés ni̱ka̱ʼa̱nra xíʼin na̱ israelita ná ixatu̱ʼvana kití tí so̱kóna* vikó ña̱ Pascua. 5 Tasaá na̱ israelita i̱xatu̱ʼvana kití tí so̱kóna vikó ña̱ Pascua ki̱vi̱ 14 tí yo̱o̱ nu̱ú tá xa̱a̱ ku̱ñuú chí nu̱ú ñuʼú yi̱chí ña̱ Sinaí. Ta nda̱a̱ táki̱ʼva ni̱ka̱ʼa̱n Jehová xíʼin ta̱ Moisés saá ke̱ʼé na̱ israelita.

6 Soo mií ki̱vi̱ ña̱ koo vikó ña̱ Pascua, sava na̱ ta̱a va̱ása níkivi ixatu̱ʼvana kití tí so̱kóna, saáchi ku̱yaku̱a̱na* xa̱ʼa̱ ña̱ ti̱inna iin na̱ ni̱xi̱ʼi̱. Ña̱kán ni̱xa̱ʼa̱nna nu̱ú ta̱ Moisés xíʼin ta̱ Aarón, 7 ta ni̱ka̱ʼa̱nna xíʼinna: “Ku̱yaku̱a̱ndi̱ xa̱ʼa̱ ña̱ ti̱inndi̱ iin na̱ ni̱xi̱ʼi̱. ¿Nda̱chun va̱ása kívi so̱kóndi̱ kití nu̱ú Jehová mií ki̱vi̱ ña̱ so̱kó ndiʼi na̱ israelita tíyóʼo?”. 8 Ta̱ Moisés ni̱ka̱ʼa̱nra xíʼinna: “Yóʼo kundatundó, ta ná ku̱ʼi̱n nda̱ka̱tu̱ʼíi̱n Jehová ndáaña ka̱ʼa̱nra xíʼi̱n xa̱ʼa̱ndó”.

9 Tasaá Jehová ni̱ka̱ʼa̱nra xíʼin ta̱ Moisés: 10 “Ña̱yóʼo ka̱ʼún xíʼin na̱ israelita: ‘Tá iin ndóʼó á iin na̱ se̱ʼendó na̱ kaku chí nu̱únínu ná kuyaku̱a̱na xa̱ʼa̱ ña̱ ti̱inna iin na̱ ni̱xi̱ʼi̱ á tá ku̱a̱ʼa̱n xíkána xíniñúʼu ixatu̱ʼvana kití tí so̱kóna nu̱ú yi̱ʼi̱ Jehová tá ná koo vikó ña̱ Pascua. 11 Na̱yóʼo xíniñúʼu ixatu̱ʼvanarí ki̱vi̱ 14 tí yo̱o̱ u̱vi̱ tá xa̱a̱ ku̱ñuú. Xíniñúʼu kuxunarí xíʼin si̱ta̱váʼa ña̱ kǒo yuxa̱n iyá* kúúmií xíʼin yiva ña̱ o̱va̱. 12 Va̱ása xíniñúʼu sandákoondó ku̱ñurí ña̱ va̱ʼa kuxundóña nda̱a̱ inka ki̱vi̱ ni va̱ása xíniñúʼu ka̱ʼnu̱ndó lekerí. Xíniñúʼu ixatu̱ʼvandó tíyóʼo nda̱a̱ táki̱ʼva káʼa̱n ley ña̱ ta̱xii̱ ndaʼa̱ndó xa̱ʼa̱ vikó ña̱ Pascua. 13 Soo tá iin na̱ yiví va̱ása níkuyaku̱a̱na* á va̱ása ku̱a̱ʼa̱n xíkána ta va̱ása ní ixatu̱ʼvana kití tí so̱kóna vikó ña̱ Pascua, na̱ yiví yóʼo xíniñúʼu kuvina saáchi va̱ása níso̱kóna kití nu̱ú yi̱ʼi̱ Jehová, ki̱vi̱ ña̱ xi̱niñúʼu so̱kónarí. Na̱ yiví yóʼo xíniñúʼu ndakuiinna xa̱ʼa̱ ku̱a̱china.

14 ”’Soo tá ki̱xaa̱ na̱ inka ñuu ndóona xíʼinndó saátu na̱yóʼo xíniñúʼu ixatu̱ʼvana kití tí so̱kóna nu̱ú yi̱ʼi̱ Jehová tá ná koo vikó ña̱ Pascua. Xíniñúʼu ixatu̱ʼvana tíyóʼo nda̱a̱ táki̱ʼva ni̱ka̱ʼi̱n xíʼinndó, nda̱a̱ táki̱ʼva káʼa̱n ley. Iin kuití kúú ley ña̱ xíniñúʼu kundiku̱n ndiʼindó ta saátu na̱ inka ñuu na̱ ki̱xaa̱ ndóo xíʼinndó’”.

15 Ta ki̱vi̱ ña̱ nda̱chitáʼanna tabernáculo, iin vi̱kó nda̱kasiña sa̱tá tabernáculo nu̱ú ndíkaa̱ Arca ña̱ trato, soo tá ku̱ñuú iin ña̱ náʼa̱ nda̱a̱ táki̱ʼva náʼa̱ iin ñuʼu̱ xi̱núuña sa̱táña nda̱a̱ tá ni̱tu̱vi. 16 Ta ña̱yóʼo kúú ña̱ xi̱kuu ndiʼi ki̱vi̱: tá káʼñu,* iin vi̱kó xi̱ndakasiña sa̱táña, ta tá ñuú iin ña̱ náʼa̱ nda̱a̱ táki̱ʼva náʼa̱ ñuʼu̱ xi̱núuña sa̱táña. 17 Ndiʼi yichi̱ ña̱ xi̱ndako̱o vi̱kó sa̱tá tabernáculo na̱ israelita xi̱ndiku̱nna sa̱tá ña̱yóʼo, ta nu̱ú xi̱xaa̱ña kán xi̱xaa̱na xi̱kundoona. 18 Mií Jehová kúú ta̱ xi̱kaʼa̱n ama kúú ña̱ ndakiʼin na̱ israelita ku̱ʼu̱nna, ta mií Jehová kúú ta̱ xi̱kaʼa̱n ndáa míí kundoona. Tá xi̱núu vi̱kó sa̱tá tabernáculo, kán xi̱kindo̱o na̱ israelita. 19 Tá ku̱a̱ʼá ki̱vi̱ xi̱núu vi̱kó sa̱tá tabernáculo, na̱ israelita xi̱ndiku̱nna ña̱ xi̱kaʼa̱n Jehová xíʼinna ta va̱ása níxixaʼa̱nna inka lugar. 20 Sava yichi̱ ku̱a̱ʼá ki̱vi̱ xi̱núu vi̱kó sa̱tá tabernáculo. Mií Jehová kúú ta̱ xi̱kaʼa̱n ama kúú ña̱ ndakiʼin na̱ israelita ku̱ʼu̱nna, ta mií Jehová kúú ta̱ xi̱kaʼa̱n ndáa míí kundoona. 21 Sava yichi̱, iníí ñuú va̱ása níxi̱kanda̱ vi̱kó yóʼo soo tá xi̱ta̱a̱n* xi̱ndako̱oña sa̱tá tabernáculo ta na̱ israelita xi̱xaʼa̱nna inka lugar. Tá xi̱ndako̱o vi̱kó yóʼo sa̱tá tabernáculo, ni kúúña káʼñu á ñuú na̱yóʼo xi̱xiniñúʼu ku̱ʼu̱nna. 22 Ni u̱vi̱ ki̱vi̱, iin yo̱o̱ á ku̱a̱ʼáka ki̱vi̱ va̱ása níxi̱kanda̱ vi̱kó sa̱tá tabernáculo, na̱ israelita xi̱kindo̱ona kán ta va̱ása níxixaʼa̱nna inka lugar soo tá xi̱ndako̱oña sa̱tá tabernáculo saá kúú ña̱ xi̱xaʼa̱nna inka lugar. 23 Mií Jehová kúú ta̱ xi̱kaʼa̱n ama kúú ña̱ ndakiʼin na̱ israelita ku̱ʼu̱nna, ta mií Jehová kúú ta̱ xi̱kaʼa̱n ndáa míí kundoona. Na̱yóʼo xi̱saxínuna ña̱ ki̱ndoona xíʼin Jehová nda̱a̱ táki̱ʼva ni̱ka̱ʼa̱n Jehová xíʼin ta̱ Moisés.

10 Tasaá ni̱ka̱ʼa̱n Jehová xíʼin ta̱ Moisés: 2 “Xíʼin martillo keʼún u̱vi̱ trompeta tú plata; túyóʼo kúú tú kuniñúʼún ña̱ va̱ʼa sandátakaún na̱ ñuu, ta saátu ña̱ va̱ʼa ka̱ʼún xíʼinna ama kanina veʼe válína. 3 Tá ná tivina u̱vi̱ saá tú trompeta yóʼo, ndiʼi na̱ ñuu xíniñúʼu ndatakana nu̱ú miíún chí yéʼé tabernáculo. 4 Tá iin kuitínú ná tivina, na̱ níʼi yichi̱ nu̱ú mil na̱ ñuu Israel kuití kúú na̱ ndataka nu̱ún.

5 ”Tá ná kuniso̱ʼona ña̱ ku̱a̱ʼá yichi̱ tívina tú trompeta, xíniñúʼu ku̱ʼu̱n na̱ ndóo chí nu̱ú kíta ñu̱ʼu.* 6 Tá xa̱a̱ u̱vi̱ yichi̱ ná kuniso̱ʼona ña̱ ku̱a̱ʼá yichi̱ tívina tú trompeta, xíniñúʼu ku̱ʼu̱n na̱ ndóo chí táʼví sur. Saá xíniñúʼu tivina trompeta ndiʼi yichi̱ ña̱ ná ku̱ʼu̱n iin tá iin tiʼvi na̱ ñuu Israel.

7 ”Ña̱ va̱ʼa sandátakana na̱ ñuu xíniñúʼu tivina tú trompeta, soo xa̱a̱ síín xíniñúʼu tivina túyóʼo. 8 Na̱ se̱ʼe ta̱ Aarón na̱ kúú su̱tu̱ kúú na̱ xíniñúʼu tivi tú trompeta yóʼo; ña̱yóʼo kúú iin ley ña̱ xíniñúʼu kundiku̱nndó ndiʼi tiempo, miíndó ta saátu na̱ se̱ʼendó na̱ kaku chí nu̱únínu.

9 ”Tá ná ku̱ʼu̱nndó kanitáʼanndó xíʼin na̱ sáa̱-ini xíni ndóʼó, xíniñúʼu tivina trompeta ña̱ va̱ʼa kunda̱a̱-inindó ña̱ ku̱ʼu̱nndó kanitáʼanndó, ta Jehová Ndióxi̱ndó ndakaʼánra xa̱ʼa̱ndó ta sakǎkura ndóʼó nu̱ú na̱ sáa̱-ini xíni ndóʼó.

10 ”Ta tá kéʼéndó vikó xa̱ʼa̱ ña̱ kúsi̱í-inindó ta saátu tá kíxáʼa yo̱o̱, xíniñúʼu tivina trompeta nu̱ú kití tí kaʼmindó* tí so̱kóndó nu̱ú* Ndióxi̱, ta saátu nu̱ú ña̱ sóko̱ndó xa̱ʼa̱ ña̱ kúni̱ndó ndakutáʼan viíndó xíʼin Ndióxi̱. Ña̱ tivina túyóʼo kúú ña̱ chindeétáʼan xíʼinndó ña̱ ndakaʼán Ndióxi̱ xa̱ʼa̱ndó. Yi̱ʼi̱ kúú Jehová Ndióxi̱ndó”.

11 Tá 20 xíka yo̱o̱ u̱vi̱ tá xa̱a̱ ni̱ya̱ʼa u̱vi̱ ku̱i̱ya̱, saá nda̱kunúu súkun vi̱kó sa̱tá tabernáculo nu̱ú ndíkaa̱ Arca ña̱ trato. 12 Tasaá ki̱xáʼa kée na̱ israelita nu̱ú ñuʼú yi̱chí ña̱ Sinaí, nda̱a̱ táki̱ʼva ni̱ka̱ʼa̱nna xíʼinna keena saá ke̱evana, ta vi̱kó ni̱xa̱a̱ña nu̱ú ñuʼú yi̱chí ña̱ Parán. 13 Ña̱yóʼo kúú yichi̱ nu̱ú ña̱ ke̱ena ta xi̱ndiku̱nna ña̱ ni̱ka̱ʼa̱n Jehová xíʼin ta̱ Moisés.

14 Na̱ siʼna ke̱e kúú u̱ni̱ tribu ta̱ Judá ta xa̱a̱ tiʼvi tá tiʼvi ke̱e na̱yóʼo, ta ta̱ xi̱niʼi yichi̱ nu̱úna xi̱kuu ta̱ Nahsón se̱ʼe ta̱ Aminadab. 15 Ta̱ Netanel se̱ʼe ta̱ Zuar kúú ta̱ xi̱niʼi yichi̱ nu̱ú na̱ tribu ta̱ Isacar. 16 Ta ta̱ Eliab se̱ʼe ta̱ Helón kúú ta̱ xi̱niʼi yichi̱ nu̱ú na̱ tribu ta̱ Zabulón.

17 Tá xa̱nina tabernáculo saá ke̱e na̱ se̱ʼe ta̱ Guersón xíʼin na̱ se̱ʼe ta̱ Merarí ku̱a̱ʼa̱nna, na̱yóʼo kúú na̱ xi̱ndiso tabernáculo.

18 Tándi̱ʼi, saá ke̱e u̱ni̱ tribu ta̱ Rubén ta xa̱a̱ tiʼvi tá tiʼvi ke̱ena, ta ta̱ Elizur se̱ʼe ta̱ Sedeur kúú ta̱ xi̱niʼi yichi̱ nu̱úna. 19 Ta̱ Selumiel se̱ʼe ta̱ Zurisadái kúú ta̱ xi̱niʼi yichi̱ nu̱ú na̱ tribu ta̱ Simeón. 20 Ta ta̱ Eliasaf se̱ʼe ta̱ Deuel kúú ta̱ xi̱niʼi yichi̱ nu̱ú na̱ tribu ta̱ Gad.

21 Tándi̱ʼi, ke̱e na̱ cohatita ku̱a̱ʼa̱nna, na̱yóʼo kúú na̱ xi̱ndiso ña̱ʼa ña̱ xi̱ñuʼu ini lugar ña̱ yi̱i̱. Tá xi̱xaa̱ na̱yóʼo xa̱a̱ xi̱niñúʼu ndakutáʼan tabernáculo.

22 Tándi̱ʼi, saá ke̱e u̱ni̱ tribu ta̱ Efraín ta xa̱a̱ tiʼvi tá tiʼvi ke̱ena, ta ta̱ Elisamá se̱ʼe ta̱ Amihud kúú ta̱ xi̱niʼi yichi̱ nu̱úna. 23 Ta̱ Gamaliel se̱ʼe ta̱ Pedahzur kúú ta̱ xi̱niʼi yichi̱ nu̱ú na̱ tribu ta̱ Manasés. 24 Ta ta̱ Abidán se̱ʼe ta̱ Guideoní kúú ta̱ xi̱niʼi yichi̱ nu̱ú na̱ tribu ta̱ Benjamín.

25 Tándi̱ʼi, saá ke̱e u̱ni̱ tribu ta̱ Dan ta xa̱a̱ tiʼvi tá tiʼvi ke̱ena, na̱yóʼo kúú na̱ va̱xi sa̱tá ndiʼina, ta ta̱ Ahiézer se̱ʼe ta̱ Amisadái kúú ta̱ xi̱niʼi yichi̱ nu̱úna. 26 Ta̱ Paguiel se̱ʼe ta̱ Ocrán kúú ta̱ xi̱niʼi yichi̱ nu̱ú na̱ tribu ta̱ Aser. 27 Ta ta̱ Ahirá se̱ʼe ta̱ Enán kúú ta̱ xi̱niʼi yichi̱ nu̱ú na̱ tribu ta̱ Neftalí. 28 Saá kúú ña̱ xi̱kee iin tá iin tribu na̱ israelita tá xi̱xaʼa̱nna inka lugar.

29 Tasaá, ta̱ Moisés ni̱ka̱ʼa̱nra xíʼin ta̱ Hobab se̱ʼe ta̱ Reuel,* ta̱ madianita si̱so ta̱ Moisés: “Vitin keendi̱ ku̱ʼu̱nndi̱ nu̱ú ni̱ka̱ʼa̱n Jehová xíʼinndi̱ tá ka̱chira ‘Taxii̱ ñuʼú yóʼo ndaʼa̱ndó’. Ko̱ʼó xíʼinndi̱ ta viíva keʼéndi̱ xíʼún, saáchi Jehová ni̱ka̱ʼa̱nra ña̱ ku̱a̱ʼání ña̱ va̱ʼa taxira ndaʼa̱ na̱ ñuu Israel”. 30 Soo ta̱yóʼo ni̱ka̱ʼa̱nra xíʼinra: “Va̱ása ku̱ʼi̱n. Ndikóvai̱ ñui̱ nu̱ú ndóo na̱ táʼi̱n”. 31 Tasaá ni̱ka̱ʼa̱nra xíʼinra: “Ixaún ña̱ ma̱ní, va̱ása sandákoún ndi̱ʼi̱, saáchi yóʼó xíni̱vaún ndáa míí kivi kundoondi̱ nu̱ú ñuʼú yi̱chí, ta kivi kuniʼún yichi̱ nu̱úndi̱. 32 Ta tá ná ku̱ʼún xíʼinndi̱ nda̱a̱ ndáaka bendición ná taxi Jehová ndaʼa̱ndi̱, ndakiʼintu yóʼóvaña”.

33 Tasaá chí nu̱ú níndichi yuku̱ Jehová ke̱ena ku̱a̱ʼa̱nna ta u̱ni̱ ki̱vi̱ ni̱xi̱kana, ta arca ña̱ trato tú kúú kuenta Jehová kúú tú xi̱xaʼa̱n chí nu̱úna u̱ni̱ saá ki̱vi̱ ña̱ ni̱xikana na̱ndukúna nu̱ú kivi ndakindee̱na. 34 Tá xi̱sandákoona nu̱ú xi̱ndoona, vi̱kó Jehová xi̱niʼiña yichi̱ nu̱úna tá káʼñu.*

35 Ndiʼi yichi̱ ña̱ xi̱xaʼa̱n tú Arca xíʼinna, ta̱ Moisés xi̱kaʼa̱nra ña̱yóʼo: “Ndakundichi Jehová, ta taxín na̱ kúni̱ kanitáʼan xíʼún, ta na̱ sáa̱-ini xíni yóʼó ná kununa nu̱ún”. 36 Ta tá xi̱sanúuna túyóʼo, ña̱yóʼo xi̱kaʼa̱nra: “Jehová, ndandikó nu̱ú ndiʼi na̱ ñuu Israel”.*

11 Ta na̱ ñuu, ndeéní ki̱xáʼa káʼa̱nkúáchina* nu̱ú Jehová. Tá xi̱niso̱ʼo Jehová ña̱yóʼo, ni̱sa̱a̱níra. Ta chi̱ndaʼá Jehová iin ñuʼu̱ ta ndeéní ki̱xáʼa xíxi̱ña. Ta xa̱ʼmiña sava na̱ xi̱ndoo chí sa̱tá nu̱ú xi̱ndoona. 2 Tá ki̱xáʼa na̱ ñuu xákundáʼvina nu̱ú ta̱ Moisés ña̱ ná chindeétáʼanra xíʼinna, ta̱yóʼo ni̱ka̱ʼa̱n-ndáʼvira xíʼin Jehová ta ni̱nda̱ʼva̱va ñuʼu̱ kán. 3 Tasaá chi̱nanína lugar kán Taberá* saáchi iin ñuʼu̱ ña̱ chi̱ndaʼá Jehová ni̱xi̱xi̱ña nu̱ú xi̱ndoona.

4 Ta na̱ inka ñuu na̱ ku̱a̱ʼa̱n xíʼin na̱ ñuu Israel, ki̱xáʼana káʼa̱nna xa̱ʼa̱ ña̱ kúni̱na kuxuna, ta saátu na̱ israelita, ki̱xáʼa tukuna xákuna ta xi̱kachina: “¿Ndáana taxiví ku̱ñu kuxuyó vitin? 5 Ndákaʼánkavíndi̱ ña̱ ya̱si̱nní xi̱xixindi̱ ti̱a̱ká chí ñuu Egipto ta kǒo níxi̱chaʼvindi̱ xa̱ʼa̱rí. Xi̱xaxindi̱ pepino, sandía, puerro, ti̱kumi xíʼin ti̱kumi ajo. 6 Soo vitin xa̱a̱ ku̱a̱ʼa̱n kúvitávandi̱ ta ña̱ íyo kuití kúú maná yóʼo”.

7 Nda̱a̱ táki̱ʼva yaa si̱ʼva̱ ña̱ cilantro saá yaa ni̱xi̱yo ña̱ maná, ta xi̱naʼa̱ña nda̱a̱ táki̱ʼva náʼa̱ xu̱xa yaa.* 8 Na̱ ñuu xi̱keena ta xi̱ndakayana maná ta xi̱ndikonaña xíʼin molino ndaʼa̱* á xi̱ndikonaña ini ko̱ʼo̱ ndísín.* Xi̱sachíʼyo̱naña ini ki̱si á xi̱ ixava̱ʼana si̱ta̱váʼa ti̱ku̱i̱ta̱* xíʼinña ta nda̱a̱ táki̱ʼva xíxi galleta ña̱ vi̱si̱ ña̱ kúúmií aceite, saá xi̱xixiña.* 9 Tá ñuú xi̱koyo yúyú nu̱ú xi̱ndoona ta saátu xi̱koyo ña̱ maná.

10 Tasaá, ta̱ Moisés xi̱nira ña̱ iin tá iin na̱ ñuu yóʼo xi̱ndoona chí yéʼé veʼe válína ta xi̱xakuna. Ta ni̱sa̱a̱ní Jehová xa̱ʼa̱ ña̱yóʼo, ta saátu ni̱sa̱a̱ní ta̱ Moisés. 11 Tasaá, ta̱ Moisés ni̱ka̱ʼa̱nra xíʼin Jehová: “¿Nda̱chun sáxo̱ʼvi̱ún* yi̱ʼi̱? ¿Nda̱chun sáún xíʼi̱n ta ta̱xiún chiñu yo̱ʼvi̱ní* yóʼo ndaʼíi̱ ña̱ kundai̱ na̱ yiví yóʼo? 12 ¿Á se̱ʼe yi̱ʼi̱va kúú na̱ ñuu yóʼo? ¿Á yi̱ʼi̱va kúú yivána ña̱kán kúú ña̱ káʼún xíʼi̱n, ‘Kunumindaana nda̱a̱ táki̱ʼva kéʼé iin na̱ ndáa iin ña̱ loʼo ña̱ chíchín’, ta káʼún xíʼi̱n ña̱ kuniʼii̱na ku̱ʼi̱n nda̱a̱ nu̱ú ñuʼú ña̱ ni̱ka̱ʼún taxiún ndaʼa̱ na̱ táʼanna na̱ xi̱ndoo xi̱naʼá? 13 ¿Ndáa míí kiʼi̱n ku̱ñu taxii̱ kuxu na̱ ñuu yóʼo? Saáchi xákukavína va̱xina nu̱úi̱ ta káʼa̱nna, ‘Taxi ku̱ñu ná kuxundi̱’. 14 Va̱ása kundeé iinlá miíi̱ xíʼin na̱ ñuu yóʼo. Ku̱a̱ʼání chiñu kúúña túvii̱. 15 Tá saá kúú ña̱ keʼún xíʼi̱n, ixaún ña̱ ma̱ní, ndi̱ku̱n kaʼníún yi̱ʼi̱. Tá ndixa va̱ása sáún xíʼi̱n, va̱ása taxiún ña̱ kotoi̱ ndiʼi tu̱ndóʼo yóʼo”.

16 Jehová nda̱kuiinra yuʼú ta̱ Moisés ta ka̱chira: “Ti̱xin na̱ xi̱kuaʼa̱ na̱ íyo ñuu Israel ndaka̱xiún 70 na̱ ta̱a na̱ kuniʼi yichi̱ nu̱ú na̱ ñuu* ta saátu kiʼinna kuenta xíʼinna, ta ná ku̱ʼu̱nna xíʼún chí yéʼé tabernáculo ta kán ná kindo̱ona xíʼún. 17 Ta yi̱ʼi̱ nui̱ ta ka̱ʼi̱n xíʼún, kiʼi̱n loʼo espíritu santo ña̱ ta̱xii̱ ndaʼún ta taxii̱ña ndaʼa̱ na̱kán. Na̱kán chindeétáʼanna xíʼún ña̱ kiʼún kuenta xíʼin na̱ ñuu tasaá va̱ása keʼé iinlá miíún chiñu yóʼo. 18 Ta ña̱yóʼo ka̱ʼún xíʼin na̱ ñuu: ‘Ndasayi̱i̱ndó miíndó taa̱n, saáchi mií ña̱ ndixa kuxundó ku̱ñu. Saáchi Jehová xi̱niso̱ʼora ña̱ xákundó ta káchindó: “Ndáana taxi ku̱ñu kuxuyó. Va̱ʼaníkava xi̱ndooyó chí Egipto”. Xa̱ʼa̱ ña̱ ni̱ka̱ʼa̱nndó ña̱yóʼo, Jehová taxira ku̱ñu kuxundó. 19 Kuxuvandó ku̱ñu soo su̱ví iin ki̱vi̱, u̱vi̱ ki̱vi̱ ni u̱ʼu̱n ki̱vi̱, ni u̱xu̱ ki̱vi̱, ni o̱ko̱ ki̱vi̱, 20 chi iníí yo̱o̱ kuxundóña nda̱a̱ ná keeña chí si̱ti̱nndó ta ná kukini-inindó kunindóña, saáchi kǒo níxiinndó kunindó Jehová ta̱ íyo xíʼinndó ta ki̱xáʼandó xákundó nu̱úra ta káʼa̱nndó: “¿Nda̱chunví sa̱ndákooyó ñuu Egipto?”’”.

21 Tasaá, ta̱ Moisés ni̱ka̱ʼa̱nra: “Ki̱ʼva 600,000 kúú na̱ ta̱a na̱ íyoi̱ xíʼin yóʼo, soo ni saá káchiún ‘Iníí yo̱o̱ koo ku̱ñu ña̱ kuxuna’. 22 Ni ná kaʼníi̱ ndiʼi ndikachi sa̱na̱na á si̱ndi̱ki̱ sa̱na̱na, ¿á nanirí kuxuna? Á tá ná tii̱n ndiʼi ti̱a̱ká tí ñúʼu ini mar, ¿á nanirí kuxuna?”.

23 Tasaá ni̱ka̱ʼa̱n Jehová xíʼin ta̱ Moisés: “¿Á va̱ása kivi keʼé Jehová ña̱yóʼo túvíún? Vitin kuniún á ndixa xi̱nu ña̱ káʼi̱n á va̱ása xi̱nuña”.

24 Tasaá ta̱ Moisés ki̱tara ta ni̱ka̱ʼa̱nra xíʼin na̱ ñuu ña̱ ni̱ka̱ʼa̱n Jehová xíʼinra. Ta ti̱xin na̱ xi̱kuaʼa̱ na̱ ni̱xi̱yo ñuu kán nda̱kaxinra 70 na̱ ta̱a ta ka̱tarana iníí sa̱tá tabernáculo. 25 Tasaá Jehová nu̱ura ma̱ʼñú iin vi̱kó ta ni̱ka̱ʼa̱nra xíʼinra ta ki̱ʼinra loʼo espíritu santo ña̱ kúúmií ta̱ Moisés ta ta̱xiraña ndaʼa̱ iin tá iin na̱ 70 xi̱kuaʼa̱, ta tá nda̱kiʼinna espíritu santo yóʼo, ki̱xáʼana kéʼéna nda̱a̱ táki̱ʼva kéʼé na̱ profeta* soo iinlá saáva ke̱ʼénaña.

26 Soo ni̱ndo̱o u̱vi̱ na̱ ta̱a chí nu̱ú ndóo na̱ ñuu, iinra xi̱kuu ta̱ Eldad ta inkara xi̱kuu ta̱ Medad. Ta nda̱kiʼintu na̱yóʼova espíritu santo saáchi xa̱a̱ ni̱ka̱ʼyi̱ ki̱vi̱na xíʼin na̱ ta̱a na̱ nda̱kaxinna soo va̱ása níxa̱ʼa̱nna chí nu̱ú níndichi tabernáculo. Ta chí nu̱ú ndóo na̱ ñuu kán ki̱xáʼana kéʼéna nda̱a̱ táki̱ʼva kéʼé na̱ profeta. 27 Ta iin ta̱ loʼo, xínura ni̱xa̱ʼa̱nra na̱túʼunra xa̱ʼa̱ ña̱yóʼo xíʼin ta̱ Moisés ta ka̱chira: “Ta̱ Eldad xíʼin ta̱ Medad, ki̱xáʼana kéʼéna nda̱a̱ táki̱ʼva kéʼé na̱ profeta chí nu̱ú ndóo na̱ ñuu”. 28 Tasaá ta̱ Josué se̱ʼe ta̱ Nun, ta̱ xi̱chindeétáʼan xíʼin ta̱ Moisés tá loʼovíra, nda̱kuiinra ta ka̱chira: “Táta miíi̱ Moisés, kasi nu̱úna”. 29 Soo ta̱ Moisés ni̱ka̱ʼa̱nra xíʼinra: “¿Á ndíʼi-iniún xa̱ʼíi̱? Va̱ása kundi̱ʼi-iniún. Ña̱ va̱ʼaní kúúvaña tá ndiʼi na̱ ñuu Jehová ná koona profeta ta mií Jehová ná taxi espíritu santora ndaʼa̱na”. 30 Tándi̱ʼi, ta̱ Moisés xíʼin na̱ nda̱kaxinra ña̱ kuniʼina yichi̱ nu̱ú na̱ ñuu, ndi̱kóna chí nu̱ú ndóo na̱ ñuu.

31 Tasaá, Jehová chi̱ndaʼára iin ta̱chí ta xíʼin ña̱yóʼo ku̱a̱ʼa̱n ka̱añu̱ʼú* tí ke̱e nda̱a̱ chí nu̱ú mar ta sa̱kóyorárí iníí sa̱tá nu̱ú ndóo na̱ ñuu. Ki̱ʼva iin metro* súkun ka̱arí nu̱ú ñuʼú. Ku̱a̱ʼání xi̱kuu tíyóʼo saáchi iin ki̱vi̱ví xi̱niñúʼu kakana tasaá ya̱ʼana nu̱ú xi̱ndoorí. Iníí sa̱tá nu̱ú xi̱ndoona ni̱ko̱yorí. 32 Tasaá ndiʼi na̱ ñuu nda̱kayana tí ka̱añu̱ʼú iníí ki̱vi̱ saá, iníí ñuú ta saátu iníí ña̱ inka ki̱vi̱, ta iin tá iinna nda̱kayana yáʼaka 10 homer* tíyóʼo ta chi̱ndoonarí nu̱ú ñuʼú iníí sa̱tá nu̱ú xi̱ndoona.* 33 Soo tá ñúʼuka ku̱ñu yóʼo yuʼúna, tá kúma̱níka sandíʼina kaxinaña, ni̱sa̱a̱ní Jehová xíʼin na̱ ñuu, ta Jehová ki̱xáʼara xáʼníra ku̱a̱ʼánína.

34 Xa̱ʼa̱ ña̱kán chi̱nanína lugar kán Quibrot-Hataavá,* saáchi kán kúú nu̱ú sa̱ndúxu̱nna na̱ yiví na̱ ni̱ndi̱ʼiní-ini xa̱ʼa̱ ña̱ kuxuna. 35 Tasaá na̱ ñuu ke̱ena chí Quibrot-Hataavá ta ku̱a̱ʼa̱nna chí Hazerot, ta kán ki̱ndoona.

12 Tasaá, ñá Míriam xíʼin ta̱ Aarón ki̱xáʼana káʼa̱nkúáchina* xa̱ʼa̱ ta̱ Moisés saáchi ti̱ndaʼa̱ra xíʼin iin ñá ke̱e chí Cus. 2 Ta na̱yóʼo xi̱kachina: “¿Á iinlá xíʼin yóʼó ta̱ Moisés kúú ña̱ káʼa̱n Jehová? ¿Á va̱ása káʼa̱ntura xíʼin ndi̱ʼi̱va?”. Ta xi̱niso̱ʼo Jehová ña̱ ni̱ka̱ʼa̱nna. 3 Ta̱ Moisés xi̱kuura iin ta̱a ta̱ vitání-ini nu̱ú ndiʼika na̱ ta̱a na̱ xi̱ndoo nu̱ú ñuʼú yóʼo.

4 Ta iin kama ni̱ka̱ʼa̱n Jehová xíʼin ta̱ Moisés, ta̱ Aarón ta saátu xíʼin ñá Míriam: “Kúáʼan u̱ni̱ saándó chí nu̱ú íyo tabernáculo”. Ta na̱yóʼo nda̱kiʼinna ku̱a̱ʼa̱nna. 5 Tasaá, Jehová nu̱ura ma̱ʼñú iin vi̱kó ta ña̱yóʼo ni̱xa̱a̱ña xi̱kunúuña chí yéʼé tabernáculo. Ka̱nara ta̱ Aarón xíʼin ñá Míriam, ta ku̱yatin u̱vi̱ saá na̱yóʼo. 6 Tasaá ni̱ka̱ʼa̱nra: “Ixandó ña̱ ma̱ní, kuniso̱ʼondó ña̱ káʼi̱n. Tá ná koo iin profeta ta̱ káchíñu nu̱ú Jehová xíʼinndó, yi̱ʼi̱ kitai̱ nu̱úra ti̱xin iin visión ta ka̱ʼi̱n xíʼinra ti̱xin iin xa̱ni. 7 Soo va̱ása kéʼíi̱ saá xíʼin ta̱ Moisés, ta̱ káchíñu nu̱úi̱. Saáchi ta̱yóʼo kúú ta̱ ndáaní-inii̱ ña̱ kundaara na̱ ñui̱.* 8 Káʼi̱n xíʼinra nda̱a̱ táki̱ʼva káʼa̱n iin ta̱a xíʼin inka ta̱a, ta káxiníva káʼi̱n xíʼinra, ta ta̱kán xítora ndáa ki̱ʼva náʼa̱ Jehová. Tá saá, ¿nda̱chun va̱ása níyi̱ʼvíndó ka̱ʼa̱nkúáchindó xa̱ʼa̱ ta̱ Moisés ta̱ káchíñu nu̱úi̱?”.

9 Tasaá ni̱sa̱a̱ Jehová xíʼinna ta nda̱kiʼinra ku̱a̱ʼa̱nra. 10 Ta ku̱xíká vi̱kó chí yéʼé tabernáculo... tasaá ki̱ʼin kue̱ʼe̱ lepra ñá Míriam ta iin ndu̱yaa ñii̱ñá nda̱a̱ táki̱ʼva yaa nieve. Tá nda̱koto ta̱ Aarón nu̱ú níndichi ñá Míriam, xi̱nira ña̱ ki̱ʼinñá kue̱ʼe̱ lepra. 11 Tasaá kama ni̱ka̱ʼa̱n ta̱ Aarón xíʼin ta̱ Moisés: “Táta, káʼa̱n-ndáʼvii̱ xíʼún, ixaún ña̱ ma̱ní va̱ása taxiún castigo ndaʼa̱ndi̱ xa̱ʼa̱ ku̱a̱chi yóʼo. Na̱ kíʼvíva kúúndi̱ ña̱kán ke̱ʼéndi̱ ña̱yóʼo. 12 Ixaún ña̱ ma̱ní, va̱ása taxiún ta̱ʼyi̱ ku̱ñuñá nda̱a̱ táki̱ʼva táʼyi̱ iin táʼví ku̱ñu iin ña̱ loʼo ña̱ ni̱xi̱ʼi̱ tá xa̱a̱ ka̱kuña”. 13 Tasaá, ta̱ Moisés ki̱xáʼara káʼa̱n-ndáʼvira xíʼin Jehová: “Ndióxi̱ miíi̱, ixaún ña̱ ma̱ní, sandáʼa loʼúnñá ndáʼvindi̱”.

14 Ta Jehová nda̱kuiinra yuʼú ta̱ Moisés: “Tá yiváñá ná kundaara tási̱íra* nu̱úñá, ¿á su̱ví u̱xa̱ ki̱vi̱ kúú ña̱ kukaʼan nu̱úñá xa̱ʼa̱ ña̱yóʼo? Ña̱kán, u̱xa̱ ki̱vi̱ ná koo xíkáñá nu̱ú na̱ ñuu, tasaá kivi ndikó tukuñá”. 15 Ña̱kán, u̱xa̱ ki̱vi̱ kúú ña̱ ni̱xi̱yo xíká ñá Míriam nu̱ú xi̱ndoo na̱ ñuu, ta na̱yóʼo va̱ása níkivi keena ku̱ʼu̱nna chi xi̱ndatuna nda̱a̱ tá ndi̱kó ñá Míriam. 16 Tándi̱ʼi, na̱ ñuu ke̱ena chí Hazerot ta ku̱a̱ʼa̱nna koona chí nu̱ú ñuʼú yi̱chí ña̱ Parán.

13 Tasaá ni̱ka̱ʼa̱n Jehová xíʼin ta̱ Moisés, ta ka̱chira: 2 “Chindaʼá sava na̱ ta̱a ná ku̱ʼu̱nna kotona̱nína* ñuʼú ña̱ íyo chí Canaán, ña̱ ki̱ndoi̱ taxii̱ ndaʼa̱ na̱ israelita. Ti̱xin iin tá iin tribu ndaka̱xiún iin ta̱a ta̱ ku̱ʼu̱n, ta iin tá iin ta̱yóʼo xíniñúʼu koora ta̱ níʼi yichi̱ nu̱ú na̱ tribu na̱ ñuu Israel”.

3 Ña̱kán, tá ndóona chí nu̱ú ñuʼú yi̱chí ña̱ Parán, ta̱ Moisés chi̱ndaʼára na̱ ta̱a ku̱a̱ʼa̱nna, chi ña̱yóʼo kúú chiñu ña̱ xa̱ʼnda Jehová. Ta ndiʼi na̱ ta̱a na̱ chi̱ndaʼára yóʼo na̱ xi̱niʼi yichi̱ nu̱ú na̱ israelita xi̱kuuna. 4 Ña̱yóʼo xi̱kuu ki̱vi̱na: ta̱ Samúa se̱ʼe ta̱ Zacur ta̱ ke̱e ti̱xin tribu ta̱ Rubén, 5 ta̱ Safat se̱ʼe ta̱ Horí ta̱ ke̱e ti̱xin tribu ta̱ Simeón, 6 ta̱ Caleb se̱ʼe ta̱ Jefuné ta̱ ke̱e ti̱xin tribu ta̱ Judá, 7 ta̱ Igal se̱ʼe ta̱ José ta̱ ke̱e ti̱xin tribu ta̱ Isacar, 8 ta̱ Hosea se̱ʼe ta̱ Nun ta̱ ke̱e ti̱xin tribu ta̱ Efraín, 9 ta̱ Paltí se̱ʼe ta̱ Rafú ta̱ ke̱e ti̱xin tribu ta̱ Benjamín, 10 ta̱ Gadiel se̱ʼe ta̱ Sodí ta̱ ke̱e ti̱xin tribu ta̱ Zabulón, 11 ta̱ Gaddí se̱ʼe ta̱ Susí ta̱ ke̱e ti̱xin tribu ta̱ José (ta̱ ke̱e ti̱xin tribu ta̱ Manasés), 12 ta̱ Amiel se̱ʼe ta̱ Guemalí ta̱ ke̱e ti̱xin tribu ta̱ Dan, 13 ta̱ Setur se̱ʼe ta̱ Miguel ta̱ ke̱e ti̱xin tribu ta̱ Aser, 14 ta̱ Nahbí se̱ʼe ta̱ Vofsí ta̱ ke̱e ti̱xin tribu ta̱ Neftalí, 15 xíʼin ta̱ Gueuel se̱ʼe ta̱ Makí ta̱ ke̱e ti̱xin tribu ta̱ Gad. 16 Ña̱yóʼo kúú ki̱vi̱ na̱ ta̱a na̱ chi̱ndaʼá ta̱ Moisés ni̱xa̱ʼa̱n xi̱tona̱ní ñuʼú ña̱ íyo chí Canaán. Ta̱ Moisés na̱samara ki̱vi̱ ta̱ Hosea se̱ʼe ta̱ Nun ta nda̱kunaníra Josué.*

17 Tá xa̱a̱ chi̱ndaʼá ta̱ Moisés na̱ ku̱ʼu̱n kotona̱ní ñuʼú ña̱ íyo chí Canaán, ni̱ka̱ʼa̱nra xíʼinna: “Kúáʼanndó chí Négueb tándi̱ʼi ku̱ʼu̱nndó chí yuku̱. 18 Kotondó ndáa ki̱ʼva íyo ñuʼúna ta saátu kotondó á ndakú na̱ ndóo kán á va̱ása ndakúna, ta saátu á ku̱a̱ʼá kúúna á loʼova kúúna, 19 á va̱ʼa ñuʼúna á va̱ása va̱ʼaña, ta kotondó á kútu̱ ndási sa̱tá ñuuna á va̱ása. 20 Kotondó á va̱ʼa kána ña̱ʼa nu̱ú ñuʼúna á va̱ása, ta saátu á íyo yitu̱n nu̱úña á kǒonú íyo. Va̱ása xíniñúʼu yi̱ʼvíndó, ta ná kixi loʼo ku̱i̱ʼi ña̱ kána nu̱ú ñuʼú kán xíʼinndó”. Tiempo saá kúú ña̱ xa̱a̱ chíchi tí uva.

21 Tasaá nda̱kiʼinna ku̱a̱ʼa̱nna ta ni̱xa̱ʼa̱nna xi̱tona̱nína ñuʼú ña̱ íyo chí nu̱ú ñuʼú yi̱chí ña̱ Zin iinsaá nda̱a̱ Rehob ña̱ kíndo̱o chí Lebó-Hamat.* 22 Tá nda̱kiʼinna ku̱a̱ʼa̱nna chí Négueb ni̱xa̱a̱na chí Hebrón nu̱ú ni̱xi̱yo ta̱ Ahimán, ta̱ Sesái xíʼin ta̱ Talmái, ta na̱yóʼo xi̱kuu na̱ anaquim. Siʼnaka ñuu Hebrón ku̱vaʼa ta tá ni̱ya̱ʼa u̱xa̱ ku̱i̱ya̱ saá ku̱vaʼa ñuu Zoan ña̱ íyo chí Egipto. 23 Tá ni̱xa̱a̱na chí yoso̱ ña̱ Escol, xa̱ʼndana ndaʼa̱ iin tú uva ta xa̱ʼa̱ ña̱ ku̱a̱ʼání kúú tí uva yóʼo u̱vi̱ na̱ ta̱a xi̱niñúʼu kundisonarí sa̱tá iin yitu̱n. Ta saátu ka̱yana sava granada xíʼin higo ku̱a̱ʼa̱n xíʼinna. 24 Ta chi̱nanína lugar kán yoso̱ ña̱ Escol,* saáchi kán kúú nu̱ú xa̱ʼnda na̱ israelita tí uva.

25 Tá ni̱ya̱ʼa 40 ki̱vi̱, saá ndi̱kóna ña̱ ni̱xa̱ʼa̱nna xi̱tona̱nína ñuu ña̱ Canaán. 26 Tasaá ni̱xa̱ʼa̱nna nu̱ú ta̱ Moisés, ta̱ Aarón xíʼin ndiʼi na̱ ñuu Israel na̱ xi̱ndoo chí nu̱ú ñuʼú yi̱chí ña̱ Parán ña̱ kíndo̱o chí Cadés. Ta na̱túʼunna xíʼin ndiʼi na̱ ñuu xa̱ʼa̱ ña̱ xi̱nina, ta ni̱na̱ʼa̱na ku̱i̱ʼi tí kána nu̱ú ñuʼú kán nu̱úna. 27 Tasaá ni̱ka̱ʼa̱nna ña̱yóʼo xíʼin ta̱ Moisés: “Ni̱ki̱ʼvindi̱ nu̱ú ñuʼú ña̱ chi̱ndaʼún ndi̱ʼi̱ ni̱xa̱ʼa̱nndi̱ nu̱ú, ta mií ña̱ ndixa íyoní leche nu̱úña xíʼin ñu̱ñú, ta tíyóʼo kúú ku̱i̱ʼi tí kána nu̱úña. 28 Soo na̱ yiví na̱ íyo kán ndakúnína, ta ñuuna náʼnuníña ta kútu̱ní ndásiña ta saátu xi̱nindi̱ ña̱ kán ndóo na̱ anaquim. 29 Na̱ amalequita ndóona chí nu̱ú ñuʼú ña̱ Négueb, ta na̱ hitita, na̱ jebuseo xíʼin na̱ amorreo ndóona chí yuku̱, ta na̱ cananeo ndóona yuʼú mar xíʼin yuʼú yu̱ta Jordán”.

30 Tasaá ki̱xáʼa ta̱ Caleb sándi̱kora-ini na̱ ñuu na̱ ndíta nu̱ú ta̱ Moisés ña̱ va̱ása yi̱ʼvíkana, ta ka̱chira: “Kama koondó, ná ku̱ʼu̱nyó ta kunivandó ña̱ kuchiñuvayó kindaayó ñuʼúna, va̱ása kaka-inindó chi kuchiñuvayó ndakiʼinyóña”. 31 Soo na̱ ta̱a na̱ ni̱xa̱ʼa̱n xíʼinra ka̱china: “Va̱ása kivi ku̱ʼu̱nyó kanitáʼanyó xíʼin na̱ yiví kán, chi ndakúníkavana nu̱úyó”. 32 Na̱yóʼo xi̱natúʼunkavana xíʼin na̱ israelita, soo nina ña̱ va̱ása va̱ʼa xi̱natúʼunna xa̱ʼa̱ ñuʼú ña̱ ni̱xa̱ʼa̱nna xi̱tona̱nína. Ña̱yóʼo xi̱kachina: “Tá ná ku̱ʼu̱nndó nu̱ú ñuʼú ña̱ ni̱xa̱ʼa̱nndi̱ xi̱tona̱níndi̱ na̱ kuvi kúúvandó, chi na̱ yiví na̱ xi̱nindi̱ kán, náʼnunína. 33 Kán xi̱nindi̱ na̱ yiví na̱ náʼnuní ta súkunnína, na̱ se̱ʼe ta̱ Anac, na̱yóʼo kúúna táʼan na̱ nefilim, nda̱a̱ táki̱ʼva náʼa̱ ti̱ka saá xi̱naʼa̱ndi̱ nu̱úna ta saátu xi̱ndakanixi̱ní miívana xa̱ʼa̱ndi̱”.

14 Tasaá, ndiʼi na̱ ñuu ki̱xáʼana ndeéní ndáʼyi̱na ta xákuna, ta iníí ñuú xa̱kuna. 2 Ta ndiʼi na̱ israelita ki̱xáʼana káʼa̱nkúáchina* xa̱ʼa̱ ta̱ Moisés xíʼin ta̱ Aarón. Ta ndiʼi na̱ ñuu ki̱xáʼana káʼa̱nna contra na̱yóʼo ta xi̱kachina: “Va̱ʼaníkava tá níxi̱ʼi̱yó chí Egipto, va̱ʼaníkava tá níxi̱ʼi̱yó chí nu̱ú ñuʼú yi̱chí. 3 ¿Nda̱chun ki̱xaa̱yó nu̱ú ñuʼú yóʼo i̱xaa Jehová? ¿Á ki̱xaa̱yó yóʼo ña̱ va̱ʼa kaʼnína miíyó xíʼin espada? Na̱yóʼo ndakiʼinna ñá síʼiyó ta saátu se̱ʼeyó ku̱ʼu̱n xíʼinna. Va̱ʼaka ná ndikóyó chí ñuu Egipto”. 4 Ta ña̱yóʼo xi̱kaʼa̱nna xíʼin táʼanna: “Ná ndaka̱xinyó iin ta̱ kuniʼi yichi̱ nu̱úyó ta ná ndikóyó chí Egipto”.

5 Tasaá, ta̱ Moisés xíʼin ta̱ Aarón xi̱kuxítína nda̱a̱ nu̱ú ñuʼú, ta ndiʼi na̱ israelita na̱ nda̱kutáʼan kán xi̱nina ña̱yóʼo. 6 Ta̱ Josué se̱ʼe ta̱ Nun xíʼin ta̱ Caleb se̱ʼe ta̱ Jefuné, na̱ ni̱xa̱ʼa̱n xíʼin na̱ xi̱tona̱ní* ñuʼú, nda̱tána ti̱ko̱to̱na 7 ta ni̱ka̱ʼa̱nna xíʼin ndiʼi na̱ ñuu Israel: “Ñuʼú ña̱ ni̱xa̱ʼa̱nndi̱ xi̱tona̱níndi̱, va̱ʼanívaña. 8 Tá kúsi̱í-ini Jehová xíʼin ña̱ kéʼéyó, chindeétáʼanvara xíʼinyó ña̱ xa̱a̱yó nu̱ú ñuʼú kán ta ndataxivaraña ndaʼa̱yó, iin ñuʼú nu̱ú íyoní leche ta saátu ñu̱ñú kúúña. 9 Soo va̱ása ku̱ʼu̱nndó contra Jehová ta ni va̱ása yi̱ʼvíndó kunindó na̱ yiví na̱ íyo nu̱ú ñuʼú kán, saáchi su̱ví ña̱ʼaví kúúna nu̱úyó.* Kǒo na̱ chindeétáʼan xíʼinna, ta Jehová íyora xíʼinyó. Ña̱kán va̱ása yi̱ʼvíndó kunindóna”.

10 Soo ndiʼi na̱ ñuu xi̱kuni̱na kuunna yu̱u̱na. Soo ki̱ta ndee̱ Jehová chí sa̱tá tabernáculo ta ndiʼi na̱ ñuu Israel xi̱ni ña̱yóʼo.

11 Tasaá, Jehová ni̱ka̱ʼa̱nra xíʼin ta̱ Moisés: “Xa̱a̱ ku̱a̱ʼání milagro kéʼíi̱ xíni na̱ ñuu yóʼo. Ña̱kán, ¿nda̱a̱ amaví kixáʼana ixato̱ʼóna yi̱ʼi̱? Ta saátu, ¿nda̱a̱ amaví kixáʼana kandíxana yi̱ʼi̱? 12 Kuniñúʼi̱ kue̱ʼe̱ ña̱ ndeéní ña̱ va̱ʼa taxii̱ castigo ndaʼa̱na tasaá sandíʼi-xa̱ʼíi̱na, ta taxii̱ ña̱ koún iin ñuu ña̱ káʼnuní ta ndakúka xa̱ún koún nu̱ú na̱yóʼo”.

13 Soo ta̱ Moisés ni̱ka̱ʼa̱nra xíʼin Jehová: “Tá ná keʼún ña̱yóʼo, na̱ ñuu Egipto nu̱ú ta̱váún na̱ ñuu yóʼo xíʼin ndeún, kuniso̱ʼona xa̱ʼa̱ña 14 ta ka̱ʼa̱nna xíʼin na̱ ndóo ñuu yóʼo xa̱ʼa̱ña. Chi na̱yóʼo xa̱a̱ kúnda̱a̱-inina ña̱ yóʼó Jehová íyoún xíʼinna ta xíninu̱úna yóʼó. Yóʼó kúú Jehová ta vi̱kóún íyoña xíʼinna, ta xíʼin vi̱kó yóʼo níʼún yichi̱ nu̱úna tá káʼñu* ta xíʼin ñuʼu̱ níʼún yichi̱ nu̱úna tá ñuú. 15 Tá iin kama ná kaʼníún na̱ ñuu yóʼo, na̱ ñuu na̱ xi̱niso̱ʼo xa̱ʼún ka̱ʼa̱nna ña̱yóʼo: 16 ‘Va̱ása níkuchiñu Jehová ku̱ʼu̱nra xíʼin na̱ ñuu yóʼo nu̱ú ñuʼú ña̱ ni̱ka̱ʼa̱nra taxira ndaʼa̱na, ña̱kán xa̱ʼnírana nu̱ú ñuʼú yi̱chí’. 17 Ña̱kán, ixaún ña̱ ma̱ní Jehová, na̱ʼa̱ ña̱ kúúmiíníún ndee̱ nda̱a̱ táki̱ʼva xa̱a̱ ki̱ndoún tá ni̱ka̱ʼún ña̱yóʼo: 18 ‘Jehová ta̱ kúeení-ini,* ta̱ ndixaní kúʼvi̱-ini* xíni inkana, íxakáʼnu-inira xa̱ʼa̱ inkana tá kéʼéna ña̱ va̱ása va̱ʼa ta saátu tá íxaso̱ʼona nu̱úra, soo táxira castigo ndaʼa̱ na̱ kúúmií ku̱a̱chi ta na̱ ku̱a̱kiʼvi ku̱a̱chi nu̱úra taxira castigo ndaʼa̱ se̱ʼena, se̱ʼeñánina xíʼin se̱ʼexíkúána’.* 19 Ixaún ña̱ ma̱ní, xa̱ʼa̱ ña̱ ndixaní kúʼvi̱-iniún xíniún ndi̱ʼi̱, káʼnuní koo iniún xa̱ʼa̱ na̱ ñuu yóʼo, nda̱a̱ táki̱ʼva xa̱a̱ i̱xakáʼnu-iniún xa̱ʼa̱na tá xi̱ndoona chí ñuu Egipto iinsaá nda̱a̱ vitin”.

20 Tasaá Jehová ni̱ka̱ʼa̱nra: “Ixakáʼnuva-inii̱ xa̱ʼa̱na nda̱a̱ táki̱ʼva ni̱ka̱ʼún xíʼi̱n. 21 Nda̱a̱ ndáaka ña̱ ná kuu, chínaʼíi̱* xa̱ʼa̱ miíi̱ ña̱ ndiʼi na̱ ndóo nu̱ú ñuʼú kunda̱a̱-inina xa̱ʼa̱ ndee̱ ña̱ kúúmií Jehová. 22 Ndiʼi na̱ ta̱a na̱ xi̱ni ndeíi̱ xíʼin milagro ña̱ ke̱ʼíi̱ chí Egipto ta saátu chí nu̱ú ñuʼú yi̱chí na̱ xa̱a̱ xítondosó yi̱ʼi̱ 10 yichi̱ ta va̱ása xíniso̱ʼona ña̱ káʼi̱n, nda̱a̱ ni iin na̱yóʼo 23 va̱ása kunina ñuʼú ña̱ ni̱ka̱ʼi̱n taxii̱ ndaʼa̱ na̱ yivána. Ndiʼi na̱ va̱ása íxato̱ʼó yi̱ʼi̱, va̱ása kunina ñuʼú kán. 24 Soo ta̱ Caleb ta̱ káchíñu nu̱úi̱, síínva íyo ña̱ kéʼéra chi ndákundeéra ndíku̱nra yi̱ʼi̱ xíʼin ndiʼi níma̱ra. Ña̱kán chindeétáʼi̱n xíʼinra ña̱ xa̱a̱ra nu̱ú ñuʼú ña̱ ni̱xa̱ʼa̱nra xi̱tora, ta na̱ se̱ʼera kúú na̱ ndakiʼin ña̱yóʼo. 25 Xa̱ʼa̱ ña̱ ndóo na̱ amalequita xíʼin na̱ cananeo chí yoso̱, taa̱n ndikóndó chí nu̱ú ñuʼú yi̱chí ta ku̱ʼu̱nndó yichi̱ ña̱ ku̱a̱ʼa̱n chí mar Rojo”.

26 Tándi̱ʼi, Jehová ni̱ka̱ʼa̱nra ña̱yóʼo xíʼin ta̱ Moisés ta saátu xíʼin ta̱ Aarón: 27 “¿Nda̱a̱ ama sandákoo na̱ ñuu na̱ ndi̱va̱ʼaní-ini yóʼo ña̱ ka̱ʼa̱nkúáchina xa̱ʼíi̱? Xíniso̱ʼovai̱ ña̱ káʼa̱n na̱ israelita xa̱ʼíi̱. 28 Ña̱yóʼo ka̱ʼún xíʼinna: ‘Chínaʼíi̱ xa̱ʼa̱ miíi̱ ña̱ nda̱a̱ táki̱ʼva íyo ña̱ xi̱niso̱ʼi̱ ni̱ka̱ʼa̱nndó saá keʼíi̱ xíʼinndó, káchi Jehová. 29 Nu̱ú ñuʼú yi̱chí yóʼo kuvi ndiʼi ndóʼó, kuvi ndiʼi ndóʼó na̱ kúúmií 20 á ku̱a̱ʼáka ku̱i̱ya̱, na̱ xa̱a̱ nda̱kaʼyi̱ ki̱vi̱, ndiʼi ndóʼó na̱ ni̱ka̱ʼa̱nkúáchi xa̱ʼíi̱ kuvivandó. 30 Nda̱a̱ ni iin ndóʼó va̱ása ki̱ʼvi nu̱ú ñuʼú ña̱ ni̱ka̱ʼi̱n taxii̱ ndaʼa̱ndó ña̱ koondó nu̱úña, iinlá ta̱ Caleb se̱ʼe ta̱ Jefuné xíʼin ta̱ Josué se̱ʼe ta̱ Nun kúú na̱ ki̱ʼvi nu̱úña.

31 ’”Ta na̱ se̱ʼendó na̱ ni̱ka̱ʼa̱nndó ndakiʼinna ku̱ʼu̱n xíʼinna, na̱yóʼo kúú na̱ ku̱ʼi̱n xíʼin nu̱ú ñuʼú ña̱ va̱ása níxiinndó ndakiʼinndó, ta na̱yóʼo kúú na̱ kuniña. 32 Soo ndóʼó kuvindó nu̱ú ñuʼú yi̱chí yóʼo. 33 Ta na̱ se̱ʼendó, 40 ku̱i̱ya̱ kúú ña̱ kundaana kití chí nu̱ú ñuʼú yi̱chí, ta na̱yóʼo kúú na̱ chaʼvi xa̱ʼa̱ ña̱ va̱ása nda̱kú níxi̱yo inindó xíʼi̱n, nda̱a̱ ná kuvi ndiʼi ndóʼó chí nu̱ú ñuʼú yi̱chí. 34 Ni̱xa̱ʼa̱nndó xi̱tona̱níndó ñuu Canaán 40 ki̱vi̱, ña̱kán 40 ku̱i̱ya̱ kúú ña̱ xíniñúʼu chaʼvindó xa̱ʼa̱ ku̱a̱chindó, iin ki̱vi̱ kooña iin ku̱i̱ya̱. Tasaá kunda̱a̱-inindó ndáaña ndóʼo na̱ íyo contra xíʼi̱n.

35 ’”Yi̱ʼi̱ Jehová kúú ta̱ káʼa̱n ña̱yóʼo: Ña̱yóʼo kúú ña̱ keʼíi̱ xíʼin na̱ ñuu na̱ ndi̱va̱ʼa-ini yóʼo, na̱ nda̱kutáʼan ña̱ koona contra xíʼi̱n, nu̱ú ñuʼú yi̱chí yóʼo ndiʼi-xa̱ʼa̱na ta yóʼo kuvivana. 36 Ta na̱ ta̱a na̱ chi̱ndaʼá ta̱ Moisés ña̱ ku̱ʼu̱nna kotona̱nína ñuʼú Canaán, na̱ ki̱xáʼa káʼa̱n ña̱ va̱ása va̱ʼa xa̱ʼa̱ ñuʼú kán, ta xa̱ʼa̱ ña̱kán na̱ ñuu ki̱xáʼana káʼa̱nkúáchina xa̱ʼa̱ ta̱ Moisés, 37 na̱ ta̱a yóʼo ndakiʼinna castigo ta kuvina nu̱ú Jehová, saáchi ni̱ka̱ʼa̱nna ña̱ va̱ása va̱ʼa xa̱ʼa̱ ñuʼú kán. 38 Soo ta̱ Josué se̱ʼe ta̱ Nun xíʼin ta̱ Caleb se̱ʼe ta̱ Jefuné na̱ ni̱xa̱ʼa̱n xi̱tona̱ní ñuʼú Canaán, va̱ása kuvina’”.

39 Tá ni̱ka̱ʼa̱n ta̱ Moisés ña̱yóʼo xíʼin na̱ israelita, ku̱suchíní-inina. 40 Ña̱kán xi̱ta̱a̱nní* nda̱koona ta xi̱kuni̱na ndaana nda̱a̱ xi̱ní yuku̱, ta ka̱china: “Yóʼo ki̱xaa̱ndi̱, ta xa̱a̱ íyo tu̱ʼvandi̱ ña̱ ku̱ʼu̱nndi̱ nu̱ú ni̱ka̱ʼa̱n Jehová, saáchi ni̱ki̱ʼvindi̱ ku̱a̱chi nu̱úra”. 41 Soo ta̱ Moisés ni̱ka̱ʼa̱nra: “¿Nda̱chun va̱ása kándíxandó ña̱ ni̱ka̱ʼa̱n Jehová? Va̱ása va̱ʼa kana ña̱ kúni̱ndó keʼéndó. 42 Va̱ása ku̱ʼu̱nndó saáchi kǒo Jehová íyo xíʼinndó, ta na̱ sáa̱-ini xíni ndóʼó sandíʼi-xa̱ʼa̱na ndóʼó. 43 Saáchi na̱ amalequita xíʼin na̱ cananeo xa̱a̱ íyo tu̱ʼvana ña̱ kanitáʼanna xíʼinndó ta kaʼnína ndóʼó xíʼin espada. Xa̱ʼa̱ ña̱ kǒo ndíku̱nkandó Jehová, kǒoka Jehová íyo xíʼinndó”.

44 Soo ni saá, va̱ása níkandíxana ta nda̱avana xi̱ní yuku̱ kán, soo arca ña̱ trato tú kúú kuenta Jehová ki̱ndoonú nu̱ú ndóo na̱ ñuu ta kán ki̱ndootu ta̱ Moisés. 45 Tasaá na̱ amalequita xíʼin na̱ cananeo na̱ xi̱ndoo yuku̱ kán nu̱una ta ki̱xáʼana kánitáʼanna xíʼinna, ta ta̱xínnana ku̱a̱ʼa̱nna nda̱a̱ Hormá.

15 Jehová ni̱ka̱ʼa̱n tukura xíʼin ta̱ Moisés, ta ka̱chira: 2 “Ña̱yóʼo ka̱ʼún xíʼin na̱ israelita: ‘Tá ná ki̱ʼvindó nu̱ú ñuʼú ña̱ ki̱ndoi̱ taxii̱ ndaʼa̱ndó ña̱ koondó nu̱úña, 3 ta saátu tá ná so̱kóndó* iin si̱ndi̱ki̱, iin ndikachi* á iin ti̱xúʼú* nu̱ú Jehová ta kaʼmindórí* á tá ná so̱kóndó iin kití nu̱ú Ndióxi̱ ña̱ va̱ʼa saxínundó iin ña̱ ki̱ndoondó xíʼinra, tá ná so̱kóndó iin ña̱ʼa nu̱úra xa̱ʼa̱ ña̱ kúni̱ miíndó, á tá ná so̱kóndó iin kití nu̱úra xa̱ʼa̱ vikó ña̱ xíyo ku̱i̱ya̱ tá ku̱i̱ya̱, ña̱ va̱ʼa táminí kuxaʼa̱nña nu̱ú Jehová, 4 na̱ ná so̱kó ña̱yóʼo nu̱ú Jehová, saátu xíniñúʼu so̱kóna si̱ta̱váʼa ña̱ ku̱vaʼa xíʼin iin kilo* harina ña̱ va̱ʼa ña̱ nda̱saka̱ xíʼin iin litro* aceite. 5 Ta saátu xíniñúʼu so̱kóún iin litro* tá vino, táyóʼo koo nduta̱ tá so̱kóún xíʼin kití tí kaʼmina á xíʼin iin tá iin ndikachi tí so̱kóún. 6 Á tá ná so̱kóún iin ndikachi che̱e, saátu xíniñúʼu so̱kóún si̱ta̱váʼa ña̱ ku̱vaʼa xíʼin ki̱ʼva u̱vi̱ kilo* ña̱ harina ña̱ va̱ʼa ña̱ nda̱saka̱ xíʼin ki̱ʼva iin litro sava* aceite. 7 Ta xíniñúʼu so̱kóún ki̱ʼva iin litro sava vino nu̱ú Jehová, ta táminí kuxaʼa̱n táyóʼo nu̱úra.

8 ”’Ta tá ná so̱kóún iin si̱ndi̱ki̱ nu̱ú Jehová ña̱ va̱ʼa kokorí* á ña̱ va̱ʼa saxínún iin ña̱ ki̱ndoún xíʼinra, á ña̱ va̱ʼa ndakutáʼan viíún xíʼinra, 9 xíʼin tí si̱ndi̱ki̱ yóʼo xíniñúʼu so̱kótún si̱ta̱váʼa ña̱ ku̱vaʼa xíʼin u̱ni̱ kilo sava* ña̱ harina ña̱ va̱ʼa ña̱ nda̱saka̱ xíʼin ki̱ʼva u̱vi̱ litro* aceite. 10 Ta saátu xíniñúʼu so̱kóún ki̱ʼva u̱vi̱ litro tá vino, nda̱a̱ táki̱ʼva íyo ña̱ʼa ña̱ xáʼmina ta sóko̱na nu̱ú Ndióxi̱ saá koo táyóʼo, ta táminí ku̱xaʼa̱nrá nu̱ú Jehová. 11 Ta saátu xíniñúʼu keʼún xíʼin iin tá iin si̱ndi̱ki̱ tí so̱kóún, xíʼin iin tá iin ndikachi che̱e, iin tá iin ndikachi válí á iin tá iin ti̱xúʼú che̱e. 12 Ni nda̱saaka kúú kití tí so̱kóndó, ña̱yóʼo kúú ña̱ xíniñúʼu keʼéndó xíʼin iin tá iinrí. 13 Saá kúú ña̱ xíniñúʼu keʼé ndiʼi na̱ israelita xíʼin ña̱ sóko̱na, ña̱ koko ta táminí kuxaʼa̱nña nu̱ú Jehová.

14 ”’Tá iin na̱ inka ñuu na̱ ki̱xaa̱ ndóo naʼa* xíʼinndó á na̱ xa̱a̱ ku̱a̱ʼání ku̱i̱ya̱ ndóo xíʼinndó kúni̱na so̱kóna ña̱ʼa nu̱ú Jehová, ña̱ koko ta táminí kuxaʼa̱nña nu̱úra, nda̱a̱ táki̱ʼva kéʼéndó saátu xíniñúʼu keʼé na̱yóʼova. 15 Ndóʼó na̱ ñuu Israel xíʼin na̱ inka ñuu na̱ ki̱xaa̱ ndóo naʼa xíʼinndó, iin ki̱ʼva xíniñúʼu koo ley ña̱ kundiku̱n ndiʼindó. Ley yóʼo kúú ña̱ kundiku̱nndó ndiʼi tiempo, miíndó ta saátu se̱ʼendó na̱ kaku chí nu̱únínu. Na̱ inka ñuu ta saátu miíndó inkáchiva íyondó nu̱ú Jehová. 16 Inkáchi xíniñúʼu koo ley ña̱ xíniñúʼu kundiku̱n miíndó ta saátu na̱ inka ñuu na̱ ndóo naʼa xíʼinndó chi inkáchi íyo ña̱ káʼa̱n Ndióxi̱ xíʼinndó keʼéndó’”.

17 Tasaá ni̱ka̱ʼa̱n Jehová xíʼin ta̱ Moisés: 18 “Ña̱yóʼo ka̱ʼún xíʼin na̱ israelita: ‘Tá ná ki̱ʼvindó nu̱ú ñuʼú nu̱ú ku̱a̱ʼi̱n xíʼinndó koondó, 19 ta tá ná kuxundó ña̱ʼa* ña̱ kána nu̱ú ñuʼú kán, xíniñúʼu taxindó ña̱ʼa ndaʼa̱ Jehová. 20 Xíniñúʼu so̱kóndó si̱ta̱váʼa ña̱ ti̱ku̱i̱ta̱* ña̱ ku̱vaʼa xíʼin harina ña̱ yikin* ña̱ nu̱ú va̱ʼa ka̱na, xíniñúʼu so̱kóndóña nda̱a̱ táki̱ʼva sóko̱ndó ña̱ʼa xa̱ʼa̱ ñuʼú nu̱ú ndátivindó cebada. 21 Miíndó ta saátu se̱ʼendó na̱ kaku chí nu̱únínu, ndiʼi tiempo xíniñúʼu taxindó harina ña̱ yikin ña̱ nu̱ú va̱ʼa ka̱na ndaʼa̱ Jehová.

22 ”’Soo tá va̱ása níxi̱ndiku̱nndó ndiʼi ley ña̱ ta̱xi Jehová ndaʼa̱ ta̱ Moisés, 23 (ndiʼi chiñu ña̱ xa̱ʼnda Jehová nu̱úndó keʼéndó tá ni̱ka̱ʼa̱nra xíʼin ta̱ Moisés, nani tá ni̱ka̱ʼa̱n Jehová ña̱ kundiku̱nndó ña̱yóʼo ta saátu na̱ se̱ʼendó na̱ kaku chí nu̱únínu), 24 ta ke̱ʼéndó ña̱ va̱ása va̱ʼa soo va̱ása níkunda̱a̱-ini na̱ ñuu xa̱ʼa̱ ña̱yóʼo, ndiʼi na̱ ñuu xíniñúʼu so̱kóna iin si̱ndi̱ki̱ tí yúta̱ tí koko, tí táminí kuxaʼa̱n nu̱ú Jehová, ta saátu so̱kóna harina xíʼin vino nda̱a̱ táki̱ʼva kéʼéna ndiʼi yichi̱ ña̱ sóko̱na ña̱ʼa nu̱ú Ndióxi̱, ta saátu xíniñúʼu so̱kóna iin ti̱xúʼú loʼo xa̱ʼa̱ ku̱a̱china. 25 Ta̱ su̱tu̱ ka̱ʼa̱n-ndáʼvira xíʼin Ndióxi̱ xa̱ʼa̱ na̱ ñuu Israel ta ixakáʼnu-inira xa̱ʼa̱ ku̱a̱china, saáchi ke̱ʼéna ña̱ va̱ása va̱ʼa ta níʼina ña̱ʼa ni̱xa̱ʼa̱nna ni̱so̱kóna nu̱ú Jehová, ña̱ va̱ʼa kokoña nu̱ú Jehová ta saátu níʼina ña̱ ni̱so̱kóna xa̱ʼa̱ ku̱a̱china. 26 Ndiʼi na̱ ñuu Israel xíʼin na̱ ke̱e inka ñuu na̱ ki̱xaa̱ ndóo naʼa xíʼinna ixakáʼnu-ini Ndióxi̱ xa̱ʼa̱na saáchi ndiʼina ke̱ʼé ña̱ va̱ása va̱ʼa.

27 ”’Tá iin na̱ yiví va̱ása níkiʼinna kuenta ta ni̱ki̱ʼvina ku̱a̱chi, xíniñúʼu so̱kóna iin ti̱xúʼú tí kúúmií iin ku̱i̱ya̱ xa̱ʼa̱ ku̱a̱china. 28 Ta̱ su̱tu̱ ka̱ʼa̱n-ndáʼvira xíʼin Ndióxi̱ xa̱ʼa̱ na̱ yiví na̱ va̱ása níkiʼin kuenta ta ni̱ki̱ʼvina ku̱a̱chi nu̱ú Jehová. Keʼéra ña̱yóʼo xa̱ʼa̱ ku̱a̱china tasaá ixakáʼnu-ini Ndióxi̱ xa̱ʼa̱na. 29 Ni kúúna na̱ israelita á na̱ inka ñuu na̱ ki̱xaa̱ ndóo naʼa xíʼinna, iin kúú ley ña̱ xíniñúʼu kundiku̱n ndiʼi na̱yóʼo tá kǒo níkiʼinna kuenta ta ke̱ʼéna iin ña̱ va̱ása va̱ʼa.

30 ”’Soo tá iin na̱ yiví ni̱ki̱ʼvina ku̱a̱chi xa̱ʼa̱ ña̱ kúni̱ miína ni kúúna na̱ israelita á na̱ ke̱e inka ñuu na̱ ki̱xaa̱ ndóo naʼa xíʼinna, nda̱a̱ táki̱ʼva íyo na̱ káʼa̱n-ndi̱va̱ʼa xa̱ʼa̱ Jehová saá íyona, ña̱kán xíniñúʼu kuvina. 31 Xa̱ʼa̱ ña̱ ku̱ndasína xi̱nina ña̱ ni̱ka̱ʼa̱n Jehová xíʼinna, ta va̱ása níkeʼéna chiñu ña̱ xa̱ʼndara, na̱ yiví yóʼo xíniñúʼu kuvina. Ta miína kúúmií ku̱a̱chi xa̱ʼa̱ ña̱ ke̱ʼéna’”.

32 Tá ndóo na̱ israelita chí nu̱ú ñuʼú yi̱chí, xi̱nina iin ta̱a ña̱ xíkara ndákayara titu̱n ki̱vi̱ sábado. 33 Na̱ xi̱ni ta̱yóʼo tá ndákayara titu̱n, ni̱xa̱ʼa̱nna xíʼinra nu̱ú ta̱ Moisés, ta̱ Aarón ta saátu nu̱ú ndiʼi na̱ ñuu. 34 Tasaá nda̱kasinara, saáchi ta̱ʼán ndaka̱xinna ndáaña keʼéna xíʼinra.

35 Ta Jehová ni̱ka̱ʼa̱nra xíʼin ta̱ Moisés: “Ta̱ ta̱a yóʼo xíniñúʼu kuvira, ta ndiʼi na̱ ñuu xíniñúʼu kuunna yu̱u̱ra chí sa̱tá nu̱ú ndóona”. 36 Ña̱kán ndiʼi na̱ ñuu ta̱vánara chí sa̱tá nu̱ú ndóona ta ku̱unna yu̱u̱ra nda̱a̱ ni̱xi̱ʼi̱ra, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés.

37 Ta ni̱ka̱ʼa̱ntu Jehová ña̱yóʼo xíʼin ta̱ Moisés: 38 “Ña̱yóʼo ka̱ʼún xíʼin na̱ israelita: ‘Miína xíʼin se̱ʼena na̱ kaku chí nu̱únínu, xíniñúʼu ku̱kuna* yi̱ʼva̱ válí yuʼú ti̱ko̱to̱na* ta si̱kí ña̱yóʼo ku̱kuna iin yi̱ʼva̱ loʼo ña̱ azul. 39 Tá ná kotona ña̱ ni̱ku̱kuna yuʼú ti̱ko̱to̱na, ndakaʼánna xa̱ʼa̱ ndiʼi chiñu ña̱ xa̱ʼnda Jehová nu̱úna ta keʼénaña. Va̱ása kundiku̱nndó ña̱ kúni̱ níma̱ndó ni ña̱ xítondó, saáchi tá ná keʼéndó ña̱yóʼo va̱ása nda̱kúka koo inindó xíʼi̱n.* 40 Ña̱yóʼo chindeétáʼanña xíʼinndó ña̱ ndakaʼánndó ta saátu ña̱ kandíxandó ndiʼi chiñu ña̱ xa̱ʼnda Ndióxi̱ nu̱úndó, tasaá koondó na̱ yiví yi̱i̱ nu̱ú Ndióxi̱ndó. 41 Yi̱ʼi̱ kúú Jehová Ndióxi̱ndó ta̱ ta̱vá ndóʼó ñuu Egipto ña̱ va̱ʼa koi̱ Ndióxi̱ndó. Yi̱ʼi̱ kúú Jehová Ndióxi̱ndó’”.

16 Tasaá ta̱ Coré se̱ʼe ta̱ Izhar, se̱ʼe ta̱ Cohat, se̱ʼe ta̱ Leví, nda̱kutáʼanra xíʼin ta̱ Datán ta saátu xíʼin ta̱ Abiram, na̱ se̱ʼe ta̱ Eliab, saátu nda̱kutáʼanra xíʼin ta̱ On se̱ʼe ta̱ Pélez, ndiʼi na̱yóʼo ki̱xina ti̱xin tribu ta̱ Rubén. 2 Tasaá, na̱yóʼo ki̱xáʼana káʼa̱nna contra ta̱ Moisés ta nda̱kutáʼanna xíʼin 250 na̱ israelita na̱ nda̱kaxinna ña̱ kuniʼina yichi̱ nu̱ú na̱ ñuu, na̱ ta̱a yóʼo xi̱kuuna na̱ xi̱kuumií chiñu ña̱ ndáyáʼvi. 3 Ta ki̱xáʼana káʼa̱nna contra ta̱ Moisés xíʼin ta̱ Aarón ta xi̱kachina: “Va̱ása kúndeéka-inindi̱ xíʼinndó. Ndiʼiva na̱ ñuu yóʼo kúúna na̱ yi̱i̱ ta Jehová íyora xíʼinna. ¿Nda̱chun kúú ña̱ ndásakáʼnundó miíndó nu̱ú na̱ ñuu Jehová?”.

4 Tá xi̱niso̱ʼo ta̱ Moisés ña̱yóʼo, ndi̱ku̱n kama xi̱kuxítíra. 5 Tasaá ni̱ka̱ʼa̱nra xíʼin ta̱ Coré ta saátu ndiʼi na̱ kítáʼan xíʼin ta̱yóʼo: “Xi̱ta̱a̱n* taa̱n Jehová na̱ʼa̱ra ndáana kúú kuentara, ndáana kúú na̱ yi̱i̱, ta ndáana kúú na̱ xíniñúʼu kuyatin nu̱úra. Ta na̱ yiví na̱ ná ndaka̱xinra, na̱kán kúú na̱ kuyatin nu̱úvara. 6 Xa̱ʼa̱ ña̱kán keʼéndó ña̱yóʼo: Yóʼó ta̱ Coré xíʼin ndiʼi na̱ kítáʼan xíʼún, kiʼinndó ña̱ʼa nu̱ú kuñuʼu ñuʼu̱, 7 ta taánndó ñuʼu̱ iniña ta sakáandó ña̱ʼa ña̱ chíʼmándó sa̱tá ñuʼu̱ yóʼo, ña̱yóʼo keʼéndó taa̱n nu̱ú Jehová, ta ta̱ ná ndaka̱xin Jehová, ta̱yóʼo kúú ta̱ yi̱i̱. Ndóʼó na̱ se̱ʼe ta̱ Leví, xa̱a̱ ni̱ya̱ʼaní ña̱ kéʼéndó”.

8 Tasaá, ta̱ Moisés ni̱ka̱ʼa̱nra xíʼin ta̱ Coré: “Ndóʼó na̱ se̱ʼe ta̱ Leví, ixandó ña̱ ma̱ní, kuniso̱ʼondó ña̱yóʼo. 9 Ti̱xin na̱ ñuu Israel, Ndióxi̱ nda̱kaxinra ndóʼó ña̱ va̱ʼa kuyatinndó nu̱úra ta kachíñundó ini tabernáculo Jehová ta saátu kuitandó kachíñundó nu̱ú na̱ ñuu. ¿Á ni loʼoví va̱ása ndáyáʼvi ña̱yóʼo nu̱úndó? 10 Ta yóʼó ta̱ Coré, ¿á va̱ása ndáyáʼviña nu̱ún ña̱ ta̱xira ña̱ kuyatiún nu̱úra xíʼin ndiʼi na̱ táʼún na̱ se̱ʼe ta̱ Leví? Ta vitin, nda̱a̱ su̱tu̱víta kúni̱ndó xa̱a̱ndó koondó. 11 Xa̱ʼa̱ ña̱kán, yóʼó xíʼin ndiʼi na̱ nda̱kutáʼan ña̱ chindeétáʼanna xíʼún, íyondó contra Jehová. Ta saátu, ¿ndáaña ke̱ʼéví ta̱ Aarón xíʼinndó ña̱kán káʼa̱nkúáchindó* xa̱ʼa̱ra?”.

12 Tándi̱ʼi, ta̱ Moisés ni̱ka̱ʼa̱nra ña̱ ná kixi ta̱ Datán xíʼin ta̱ Abiram, na̱yóʼo xi̱kuuna na̱ se̱ʼe ta̱ Eliab, soo ña̱yóʼo ni̱ka̱ʼa̱nna: “Va̱ása ku̱ʼu̱nndi̱. 13 ¿Á va̱ʼaní ke̱ʼún túviún ña̱ ta̱váún ndi̱ʼi̱ nu̱ú iin ñuʼú nu̱ú íyoní leche xíʼin ñu̱ñú ta kúni̱ún kaʼníún ndi̱ʼi̱ nu̱ú ñuʼú yi̱chí yóʼo? Ta vitin iinlá miíún kúni̱ kaʼndachíñu nu̱úndi̱. 14 Ni ta̱ʼán xa̱ún xíʼinndi̱ nu̱ú iin ñuʼú nu̱ú íyoní leche xíʼin ñu̱ñú, ta ni kǒo iin ñuʼú nítaxiún ndaʼa̱ndi̱ ña̱ koo herenciandi̱ ni iin ñuʼú nu̱ú chiʼindi̱ uva. ¿Á kúni̱ún ná kundiku̱n kúana yóʼó ku̱ʼu̱nna? Ndi̱ʼi̱, va̱ása xa̱a̱ndi̱ nu̱ún”.

15 Tasaá, ni̱sa̱a̱ní ta̱ Moisés xíʼinna ta ni̱ka̱ʼa̱nra xíʼin Jehová: “Va̱ása ndakiʼún harina ña̱ so̱kóna nu̱ún,* nda̱a̱ ni iin burro sa̱na̱na va̱ása níkiʼi̱n ta kǒo nda̱a̱ ni iin ña̱ va̱ása va̱ʼa níkeʼíi̱ xíʼinna”.

16 Tasaá ni̱ka̱ʼa̱n ta̱ Moisés xíʼin ta̱ Coré: “Taa̱n kixiún xíʼin ndiʼi na̱ kítáʼan xíʼún nu̱ú Jehová, xíniñúʼu kixi miíún, na̱ kítáʼan xíʼún ta saátu ta̱ Aarón. 17 Iin tá iinna, xíniñúʼu kiʼinna ña̱ʼa nu̱ú ñúʼu ñuʼu̱ ta sakáana ña̱ʼa ña̱ chíʼmána sa̱táña ta kuniʼina ña̱yóʼo ku̱ʼu̱nna nu̱ú Jehová: 250 koo ndiʼi ña̱ kuniʼina ku̱ʼu̱nna. Kuniʼún ña̱ʼa nu̱ú ñúʼu ñuʼu̱ ku̱ʼún ta saátu ná kuniʼi ta̱ Aarón ña̱yóʼo ku̱ʼu̱nra”. 18 Tasaá, iin tá iinna ki̱ʼinna ña̱ʼa nu̱ú ñúʼu ñuʼu̱, chi̱kaa̱na ñuʼu̱ iniña ta sa̱káana ña̱ʼa ña̱ chíʼmána sa̱táña, tasaá ndiʼina xi̱kunditana chí yéʼé tabernáculo yatin nu̱ú níndichi ta̱ Moisés xíʼin ta̱ Aarón. 19 Tá sa̱ndátaka ta̱ Coré ndiʼi na̱ chíndeétáʼan xíʼinra chí yéʼé ña̱ tabernáculo, ndiʼi na̱ ñuu xi̱nina ña̱ nda̱ye̱ʼe̱ ndee̱ Jehová.

20 Jehová ni̱ka̱ʼa̱nra xíʼin ta̱ Moisés ta saátu xíʼin ta̱ Aarón, ta ka̱chira: 21 “Kuxíkándó nu̱ú na̱ ta̱a yóʼo ña̱ va̱ʼa ndi̱ku̱n ná kaʼníi̱na”. 22 Tasaá, na̱yóʼo xi̱kuxítína nda̱a̱ nu̱ú ñuʼú ta ni̱ka̱ʼa̱nna: “Ndióxi̱ miíndi̱, Ndióxi̱ ta̱ táxi ña̱ táku ndiʼi na̱ yiví, ¿á kaʼníún ndiʼi na̱ ñuu yóʼo xa̱ʼa̱ ña̱ ke̱ʼé iin kuití ta̱a?”.

23 Tasaá ni̱ka̱ʼa̱n Jehová xíʼin ta̱ Moisés: 24 “Ña̱yóʼo ka̱ʼún xíʼin na̱ ñuu: ‘Kuxíkándó nu̱ú ndíta veʼe válí ta̱ Coré, ta̱ Datán xíʼin ta̱ Abiram’”.

25 Tasaá, ta̱ Moisés nda̱kiʼinra ku̱a̱ʼa̱nra xíʼin na̱ xi̱niʼi yichi̱ nu̱ú na̱ ñuu* Israel ta ni̱xa̱a̱na nu̱ú ta̱ Datán xíʼin ta̱ Abiram. 26 Ta ni̱ka̱ʼa̱nra xíʼin na̱ ñuu: “Ixandó ña̱ ma̱ní, kuxíkándó nu̱ú veʼe válí na̱ ta̱a na̱ ndi̱va̱ʼaní-ini yóʼo, ta va̱ása tiinndó nda̱a̱ ni iin ña̱ʼa ña̱ kúú kuentana, chi tá ná keʼéndó ña̱yóʼo nda̱a̱ miíndó ndiʼi-xa̱ʼa̱ xa̱ʼa̱ ku̱a̱china”. 27 Tasaá, na̱yóʼo kama ku̱xíkána nu̱ú ndíta veʼe válí ta̱ Coré, ta̱ Datán xíʼin ta̱ Abiram. Ta ta̱ Datán xíʼin ta̱ Abiram ke̱ena ta xi̱kunditana chí yéʼé veʼe válína xíʼin ñá síʼina, se̱ʼena na̱ náʼnu xíʼin na̱ válí.

28 Tasaá ni̱ka̱ʼa̱n ta̱ Moisés ña̱yóʼo: “Xíʼin ña̱yóʼo kunda̱a̱-inindó ña̱ mií Jehová kúú ta̱ chi̱ndaʼá yi̱ʼi̱ ña̱ keʼíi̱ ndiʼi ña̱ʼa yóʼo, ta va̱ása kéʼíi̱ ña̱ kúni̱ miíi̱: 29 tá nda̱a̱ táki̱ʼva xíʼi̱ ndiʼi na̱ yiví saá ná kuvi na̱yóʼo á ná ndakiʼinna castigo táʼan ña̱ ndákiʼin ndiʼi na̱ yiví, ña̱yóʼo kúni̱ kachiña ña̱ su̱ví Jehová kúú ta̱ níchindaʼá yi̱ʼi̱; 30 soo tá iin ña̱ ná ndakanda̱ní-inindó xíʼin ná keʼé Jehová xíʼin na̱yóʼo, ta ná ndaku̱ná nu̱ú ñuʼú, ta ná ko̱yo tákuna iniña xíʼin ndiʼi ña̱ʼa ña̱ kúúmiína, saá kunda̱a̱ káxi inindó ña̱ va̱ása ní ixato̱ʼó na̱ ta̱a yóʼo Jehová”.

31 Tá sa̱kán sa̱ndíʼi ta̱ Moisés ni̱ka̱ʼa̱nra ña̱yóʼo, mií nu̱ú ñuʼú nu̱ú xi̱nditana nda̱kunáña. 32 Tasaá, nda̱kuná ñuʼú ta ko̱kóña na̱yóʼo xíʼin ndiʼi na̱ veʼena, saátu ko̱kóña ndiʼi na̱ nda̱kutáʼan xíʼin ta̱ Coré xíʼin ndiʼi ña̱ xi̱kuumiína. 33 Tasaá, na̱yóʼo xíʼin ndiʼi na̱ xi̱kitáʼan xíʼinna ni̱ko̱yo tákuna nu̱ú ni̱nu̱ná ñuʼú, tasaá nda̱si ñuʼú sa̱tána ta ni̱xi̱ʼi̱vana. 34 Ta ndiʼi na̱ israelita na̱ xi̱ndoo yatin kán xi̱nuna tá xi̱niso̱ʼona ña̱ ni̱nda̱ʼyi̱na, ta xi̱kachina: “Yíʼviníndi̱, chi va̱ása kúni̱ndi̱ ña̱ ná kokó ñuʼú ndi̱ʼi̱ xíʼinna”. 35 Tasaá chi̱ndaʼá Jehová iin ñuʼu̱ ta xa̱ʼmiña na̱ 250 ta̱a na̱ chíʼmá ña̱ʼa nu̱ú Ndióxi̱.

36 Tasaá ni̱ka̱ʼa̱n Jehová xíʼin ta̱ Moisés: 37 “Ka̱ʼa̱n xíʼin ta̱ Eleazar se̱ʼe ta̱ su̱tu̱ Aarón ña̱ ná va̱ása taxira koko* ña̱ʼa nu̱ú xíñuʼu ñuʼu̱, ta ná ndataváraña nu̱ú xíxi̱ ñuʼu̱ saáchi ña̱ yi̱i̱ kúúña. Ta xíká ná katara ñuʼu̱ ña̱ ñúʼu iniña. 38 Ña̱ʼa nu̱ú xi̱ñuʼu ñuʼu̱ ña̱ xi̱niñúʼu na̱ ta̱a na̱ ni̱xi̱ʼi̱ yóʼo xa̱ʼa̱ ña̱ ni̱ki̱ʼvina ku̱a̱chi, ndu̱yi̱i̱ña saáchi ni̱xa̱ʼa̱nna xíʼinña nu̱ú Jehová, ña̱kán xíniñúʼu ndasayásínna* ka̱a yóʼo ta chinúundaanaña sa̱tá altar. Ta xíʼin ña̱yóʼo ndakaʼán na̱ israelita xa̱ʼa̱ ña̱ ku̱u”. 39 Tasaá, ta̱ su̱tu̱ Eleazar ki̱ʼinra ña̱ʼa ña̱ cobre nu̱ú xi̱ñuʼu ñuʼu̱ ña̱ xi̱niñúʼu na̱ ta̱a na̱ ni̱xi̱xi̱ yóʼo ta ka̱nira martillo sa̱táña nda̱a̱ ndu̱yásínña, ta chi̱núundaanaña sa̱tá altar, 40 nda̱a̱ táki̱ʼva ni̱ka̱ʼa̱n Jehová xíʼin ta̱ Moisés. Ña̱yóʼo xi̱sandákaʼánña na̱ israelita, ña̱ ni iin na̱ yiví na̱ va̱ása kúúmií nda̱yí na̱ va̱ása kúú na̱ veʼe ta̱ Aarón, va̱ása kivi kuyatinna nu̱ú Jehová ta chiʼmána ña̱ʼa nu̱úra, ta nda̱a̱ ni iinna va̱ása xíniñúʼu keʼéna nda̱a̱ táki̱ʼva ke̱ʼé ta̱ Coré xíʼin na̱ xi̱kitáʼan xíʼinra.

41 Tá inka ki̱vi̱, ndiʼi na̱ ñuu Israel ki̱xáʼana káʼa̱nkúáchina xa̱ʼa̱ ta̱ Moisés ta saátu xa̱ʼa̱ ta̱ Aarón. Ta ña̱yóʼo xi̱kachina: “Ndóʼó kúú na̱ xa̱ʼní na̱ ñuu Jehová”. 42 Tá nda̱taka na̱ ñuu ña̱ ka̱ʼa̱nkúáchina xa̱ʼa̱ ta̱ Moisés ta saátu xa̱ʼa̱ ta̱ Aarón, nda̱kotona chí nu̱ú níndichi tabernáculo ta xi̱nina ña̱ nda̱kasi iin vi̱kó sa̱tá ña̱yóʼo, ta xi̱nina ña̱ ki̱xáʼa ndáye̱ʼe̱ ndee̱ Jehová.

43 Ta̱ Moisés xíʼin ta̱ Aarón ku̱yatinna nu̱ú níndichi tabernáculo, 44 ta Jehová ni̱ka̱ʼa̱nra xíʼin ta̱ Moisés: 45 “Kuxíká u̱vi̱ saándó nu̱ú na̱ ñuu yóʼo, ña̱ va̱ʼa ndi̱ku̱n sandíʼi-xa̱ʼíi̱na”. Tá ni̱ka̱ʼa̱nra ña̱yóʼo, u̱vi̱ saána xi̱kuxítína nda̱a̱ nu̱ú ñuʼú. 46 Tasaá, ta̱ Moisés ni̱ka̱ʼa̱nra xíʼin ta̱ Aarón: “Kiʼin ña̱ʼa nu̱ú ñúʼu ñuʼu̱ ta taán ñuʼu̱ ña̱ ndóso nu̱ú altar iniña, sakáa ña̱ʼa ña̱ chíʼmána sa̱táña, ta kamaní ku̱ʼún nu̱ú ndóo na̱ ñuu ta ka̱ʼún xíʼin Jehová ná ixakáʼnu-inira xa̱ʼa̱na, saáchi sáa̱níra xíʼinna. Ta xa̱a̱ ki̱xáʼa xíʼi̱ na̱ yiví xíʼin kue̱ʼe̱”. 47 Tasaá, kamaní ki̱ʼin ta̱ Aarón ña̱yóʼo nda̱a̱ táki̱ʼva ni̱ka̱ʼa̱n ta̱ Moisés xíʼinra ta xínura ni̱ki̱ʼvira nu̱ú ndóo na̱ ñuu, soo xa̱a̱ ki̱xáʼava kue̱ʼe̱ xáʼníña na̱yóʼo. Tasaá chi̱kaa̱ra ña̱ʼa ña̱ chíʼmána ini ña̱ʼa nu̱ú ñúʼu ñuʼu̱ ta ki̱xáʼara káʼa̱n-ndáʼvira xíʼin Ndióxi̱ ná ixakáʼnu-inira xa̱ʼa̱ na̱ ñuu. 48 Ta xi̱kundichira ma̱ʼñú na̱ ni̱xi̱ʼi̱ xíʼin na̱ táku. Ta saáví ni̱ya̱a̱ kue̱ʼe̱. 49 Ndiʼi na̱ ni̱xi̱ʼi̱ xíʼin kue̱ʼe̱ xi̱kuuna 14,700, ta xa̱a̱ síín kúú na̱ ni̱xi̱ʼi̱ xa̱ʼa̱ ña̱ ke̱ʼé ta̱ Coré. 50 Tá ndi̱kó ta̱ Aarón nu̱ú ta̱ Moisés chí yéʼé tabernáculo, xa̱a̱ ni̱ya̱a̱va kue̱ʼe̱ yóʼo.

17 Tasaá ni̱ka̱ʼa̱n Jehová xíʼin ta̱ Moisés: 2 “Ka̱ʼa̱n xíʼin na̱ israelita ná kuniʼina iin yitu̱n kixi xíʼinna xa̱ʼa̱ iin tá iin tribu, tú kúú kuenta na̱ níʼi yichi̱ nu̱ú iin tá iin tribu, 12 yitu̱n koo ndiʼi túyóʼo. Ta kaʼyiún ki̱vi̱ iin tá iinna sa̱tá túyóʼo. 3 Sa̱tá yitu̱n tú kúú kuenta ta̱ Leví kaʼyiún ki̱vi̱ ta̱ Aarón, saáchi iin yitu̱n kuití kúú tú taxi iin tá iin na̱ níʼi yichi̱ nu̱ú iin tá iin tribu. 4 Nu̱ú arca ña̱ trato ña̱ níndichi ini tabernáculo sandákoún yitu̱n yóʼo, chi yóʼo kúú nu̱ú kítai̱ nu̱úndó ndiʼi ki̱vi̱. 5 Ta yitu̱n tú kúú kuenta ta̱ ta̱a ta̱ ná ndaka̱xii̱n, kana yita ndaʼa̱nú tasaá va̱ása ka̱ʼa̱nkúáchika* na̱ israelita xa̱ʼíi̱ ni xa̱ʼa̱ ndóʼó”.

6 Tasaá ni̱ka̱ʼa̱n ta̱ Moisés xíʼin ndiʼi na̱ israelita, ta ndiʼi na̱ xi̱niʼi yichi̱ nu̱ú tribu ta̱xina yitu̱n tú kúú kuentana ndaʼa̱ra, 12 xi̱kuu ndiʼi túyóʼo ta tañu túyóʼo xi̱ndikaa̱ yitu̱n tú xi̱kuu kuenta ta̱ Aarón. 7 Tasaá sa̱ndákoo ta̱ Moisés tú yitu̱n yóʼo nu̱ú Jehová chí ini tabernáculo nu̱ú xi̱ndikaa̱ Arca ña̱ trato.

8 Tá inka ki̱vi̱, ta̱ Moisés ni̱ki̱ʼvira ini tabernáculo nu̱ú xi̱ndikaa̱ Arca ña̱ trato ta xi̱nira yitu̱n tú kúú kuenta ta̱ ke̱e ti̱xin tribu ta̱ Leví ña̱ ka̱na ña̱ʼa ndaʼa̱nú: xi̱kuumiínú yu̱ku̱ válí, yita xíʼin almendra tí xa̱a̱ ni̱chi̱chi. 9 Tasaá, ta̱ Moisés ta̱vára ndiʼi yitu̱n nu̱ú Jehová ta ni̱na̱ʼa̱ranú nu̱ú ndiʼi na̱ ñuu Israel. Tasaá ki̱xáʼana xítonanú ta iin tá iinna nda̱kiʼinna yitu̱n tú kúú kuentana.

10 Tándi̱ʼi ku̱u ña̱yóʼo, Jehová ni̱ka̱ʼa̱nra xíʼin ta̱ Moisés: “Chinúu tuku yitu̱n tú kúú kuenta ta̱ Aarón nu̱ú Arca ña̱ trato tasaá kivi chikaa̱va̱ʼúnnú ña̱ va̱ʼa ndakaʼán na̱ so̱ʼoní yóʼo ña̱ va̱ása va̱ʼa ka̱ʼa̱nkúáchina xa̱ʼíi̱, tasaá va̱ása kuvina”. 11 Ta ndi̱ku̱n ke̱ʼé ta̱ Moisés ña̱ ni̱ka̱ʼa̱n Jehová xíʼinra. Nda̱a̱ táki̱ʼva ni̱ka̱ʼa̱nra xíʼinra, saá ke̱ʼéra.

12 Tasaá ni̱ka̱ʼa̱n na̱ israelita xíʼin ta̱ Moisés: “Kuvivandi̱. Vitin ndixa kúú ña̱ kuvindi̱. Ndiʼindi̱ kuvi. 13 Nda̱a̱ ndáaka na̱ ná kuyatin nu̱ú tabernáculo Jehová, kuvina. ¿Á saáví xíniñúʼu kuvi ndiʼindi̱?”.

18 Tándi̱ʼi, Jehová ni̱ka̱ʼa̱nra xíʼin ta̱ Aarón: “Miíún, na̱ se̱ʼún ta saátu ndiʼi na̱ veʼún ndakuiinndó xa̱ʼa̱ nda̱a̱ ndáaka ña̱ va̱ása va̱ʼa ná keʼéna xíʼin tabernáculo, ta tá ná ya̱ʼandosóndó ley ña̱ kúúmiíndó xa̱ʼa̱ ña̱ kúúndó su̱tu̱, miíún xíʼin na̱ se̱ʼún ndakuiinndó xa̱ʼa̱ ña̱yóʼo. 2 Ka̱ʼa̱n xíʼin na̱ táʼún na̱ tribu ta̱ Leví ná kuyatinna, ti̱xin tribu yóʼo kúú nu̱ú ke̱etu miívaún, tasaá ndakutáʼanna xíʼún ta kachíñuna nu̱ún ta saátu nu̱ú na̱ se̱ʼún yatin nu̱ú tabernáculo nu̱ú ndíkaa̱ Arca ña̱ trato. 3 Na̱yóʼo xíniñúʼu saxínuna chiñu ña̱ kúúmiína nu̱ún ta saátu nu̱ú tabernáculo soo va̱ása xíniñúʼu kuyatinna nu̱ú ña̱ʼa ña̱ xíniñúʼuna ini lugar ña̱ yi̱i̱ ni nu̱ú altar, tasaá va̱ása kuvi na̱kán ni ndóʼó. 4 Na̱yóʼo ndakutáʼanna xíʼún ta keʼéna ndiʼi chiñu ña̱ kuumiína ini tabernáculo. Ta nda̱a̱ ni iin na̱ yiví na̱ va̱ása kúúmií nda̱yí* va̱ása kivi kuyatinna nu̱úndó. 5 Ndóʼó xíniñúʼu saxínundó chiñu ña̱ kúúmiíndó nu̱ú lugar ña̱ yi̱i̱ ta saátu nu̱ú altar, tasaá va̱ása sa̱a̱ka Ndióxi̱ xíʼin na̱ ñuu Israel. 6 Miíi̱ kúú ta̱ nda̱kaxin na̱ levita ti̱xin na̱ israelita ña̱ va̱ʼa taxii̱na ndaʼa̱ndó.* Na̱yóʼo kúú na̱ ndakiʼin yi̱ʼi̱ Jehová ña̱ va̱ʼa keʼéna chiñu ini tabernáculo. 7 Miíún xíʼin na̱ se̱ʼún kúú na̱ koo su̱tu̱ ta keʼéndó chiñu ña̱ íyo nu̱ú íyo altar xíʼin ña̱ íyo chí sa̱tá cortina. Ndóʼó kúú na̱ keʼé chiñu yóʼo. Táxii̱ chiñu ña̱ ndáyáʼviní yóʼo ndaʼa̱ndó ña̱ koondó su̱tu̱. Nda̱a̱ ndáaka na̱ ná keʼé chiñu yóʼo ta su̱ví chiñuna kúúña,* xíniñúʼu kuvina”.

8 Ta ni̱ka̱ʼa̱nka Jehová xíʼin ta̱ Aarón: “Miíi̱ kúú ta̱ ta̱xi chiñu ndaʼún ña̱ ndakiʼún ña̱ taxi na̱ ñuu ndaʼíi̱, ta ndaʼa̱ miíún xíʼin na̱ se̱ʼún taxii̱ iin táʼví ndiʼi ña̱ʼa ña̱ yi̱i̱ ña̱ taxi na̱ israelita ndaʼíi̱. 9 Ndiʼi ña̱ʼa ña̱ yi̱i̱ ña̱ ná so̱kó na̱ ñuu nu̱úi̱* ña̱ ná koko,* miíún kúú ta̱ ndakiʼin ndiʼi ña̱yóʼo, ndakiʼún harina ña̱ so̱kóna, ña̱ʼa ña̱ so̱kóna xa̱ʼa̱ ku̱a̱china xíʼin ña̱ʼa ña̱ so̱kóna xa̱ʼa̱ ña̱ ke̱ʼéna ña̱ va̱ása va̱ʼa. Ña̱ yi̱i̱ xíniñúʼu koo ña̱yóʼo nu̱ún ta saátu nu̱ú na̱ se̱ʼún. 10 Xíniñúʼu kuxundóña nu̱ú iin lugar ña̱ yi̱i̱ní. Ndiʼi na̱ ta̱a xíniñúʼu kuxu ña̱yóʼo. Iin ña̱ yi̱i̱ní koo ña̱yóʼo nu̱ún. 11 Ta ndiʼi ña̱ʼa ña̱ ná taxi na̱ israelita kuenta miíún kooña, ta saátu ndiʼi ña̱ʼa ña̱ sóko̱na ña̱ sákuikóna* kuenta miíún kooña. Táxii̱ña ndaʼa̱ miíún, ndaʼa̱ se̱ʼeta̱ún xíʼin se̱ʼe-síʼún ña̱ kooña kuentandó ndiʼi tiempo. Ta ndiʼi na̱ yiví na̱ ndii* na̱ íyo veʼún kivi kuxunaña.

12 ”Ta saátu aceite tá va̱ʼa, vino tá xa̱á xíʼin trigo* ña̱ nu̱úva̱ʼa ka̱na ña̱ ná taxina ndaʼa̱ yi̱ʼi̱ Jehová, táxii̱ña ndaʼún ña̱ kooña kuentaún. 13 Tá ná kuxa ña̱ chi̱ʼina ta ná ku̱ʼu̱nna xíʼin mií ña̱ nu̱úva̱ʼa ña̱ taxinaña ndaʼa̱ yi̱ʼi̱ Jehová, kuenta miíún xa̱a̱ña kooña. Ta ndiʼi na̱ yiví na̱ ndii na̱ íyo veʼún kivi kuxunaña.

14 ”Ndiʼi ña̱ íyo ñuu Israel ña̱ xa̱a̱ nda̱taxina ndaʼíi̱, kuenta miíún xa̱a̱ña kooña.

15 ”Kuenta miíún koo se̱ʼenu̱úna na̱ ná taxina ndaʼa̱ yi̱ʼi̱ Jehová ta saátu se̱ʼenu̱ú kití sa̱na̱na. Soo xíniñúʼu taxiún ña̱ ná ndachaʼvina xa̱ʼa̱ se̱ʼenu̱úna, ta saátu xíniñúʼu taxiún ña̱ ná ndachaʼvina xa̱ʼa̱ se̱ʼenu̱ú kití sa̱na̱na tí va̱ása yaku̱a̱. 16 Tá xa̱a̱ ná kuumií kití sa̱na̱na á se̱ʼena iin yo̱o̱, xíniñúʼu taxiún ña̱ ná ndachaʼvina 5 xu̱ʼún ña̱ plata* xa̱ʼa̱ na̱yóʼo, ta kataún ña̱yóʼo nda̱a̱ táki̱ʼva kátana plata lugar ña̱ yi̱i̱. 17 Soo va̱ása xíniñúʼu taxiún ña̱ ná ndachaʼvina xa̱ʼa̱ se̱ʼenu̱ú si̱ndi̱ki̱ sa̱na̱na, se̱ʼenu̱ú ndikachi* sa̱na̱na xíʼin se̱ʼenu̱ú ti̱xúʼú* sa̱na̱na tí che̱e, chi tí yi̱i̱ kúú tíyóʼo. Xíniñúʼu ko̱so̱yáváún* ni̱i̱ tíyóʼo nu̱ú altar ta kaʼmiún xa̱ʼanrí* ña̱ va̱ʼa ná kana yi̱ʼma̱ña tasaá so̱kóúnña nu̱ú yi̱ʼi̱ Jehová ta táminí kuxaʼa̱nña nu̱úi̱. 18 Kuenta miíún koo ku̱ñurí ta saátu kándíkarí ña̱ sákuikóna ña̱ sóko̱na nu̱úi̱ ta saátu xa̱ʼa̱ kúaʼarí kuenta miíún kooña. 19 Ndiʼi ña̱ʼa ña̱ yi̱i̱ ña̱ ná taxi na̱ israelita ndaʼa̱ yi̱ʼi̱ Jehová táxii̱ña ndaʼa̱ miíún, ndaʼa̱ se̱ʼeta̱ún ta saátu ndaʼa̱ se̱ʼe-síʼún ña̱ kooña kuentandó ndiʼi tiempo. Ña̱yóʼo kúú iin trato ña̱ va̱ása ndíʼi-xa̱ʼa̱, ña̱ kíndo̱o yi̱ʼi̱ Jehová xíʼún ta saátu xíʼin na̱ se̱ʼún na̱ kaku chí nu̱únínu”.

20 Tasaá ni̱ka̱ʼa̱nka Jehová xíʼin ta̱ Aarón: “Va̱ása ndakiʼún nda̱a̱ ni iin herencia nu̱ú ñuʼú na̱yóʼo ta ni va̱ása ndakiʼún nda̱a̱ ni iin ñuʼú xíʼinna. Yi̱ʼi̱va kúú herencia ña̱ ndakiʼún nu̱ú na̱ ñuu Israel.

21 ”Koto, herencia ña̱ táxii̱ ndaʼa̱ na̱ se̱ʼe ta̱ Leví xa̱ʼa̱ chiñu ña̱ kéʼéna kúú iin táʼví* ña̱ kána nu̱ú ñuʼú na̱ ñuu Israel, ña̱yóʼo kúú ña̱ táxii̱ ndaʼa̱na xa̱ʼa̱ chiñu ña̱ kéʼéna ini tabernáculo. 22 Na̱ ñuu Israel va̱ása kivi kuyatinkana nu̱ú níndichi tabernáculo. Chi tá ná keʼéna ña̱yóʼo, ki̱ʼvina ku̱a̱chi ta kuvina. 23 Mií na̱ levita kúú na̱ xíniñúʼu keʼé chiñu ti̱xin tabernáculo ta na̱yóʼo kúú na̱ ndakuiin xa̱ʼa̱ ña̱ va̱ása va̱ʼa ña̱ ná keʼé na̱ ñuu xíʼin lugar ña̱ yi̱i̱. Ña̱yóʼo kúú iin ley ña̱ kundiku̱n miína ndiʼi tiempo ta saátu na̱ se̱ʼena na̱ kaku chí nu̱únínu: va̱ása ndakiʼinna nda̱a̱ ni iin herencia xíʼin na̱ israelita. 24 Saáchi herencia ña̱ táxii̱ ndaʼa̱ na̱ levita kúú iin táʼví* ña̱ táxi na̱ israelita ndaʼa̱ yi̱ʼi̱ Jehová. Ña̱kán ni̱ka̱ʼi̱n ña̱yóʼo: ‘Na̱yóʼo va̱ása ndakiʼinna nda̱a̱ ni iin herencia xíʼin na̱ israelita’”.

25 Tasaá ni̱ka̱ʼa̱n Jehová xíʼin ta̱ Moisés: 26 “Ña̱yóʼo ka̱ʼún xíʼin na̱ levita: ‘Xíniñúʼu ndakiʼinndó iin táʼví* ña̱ ná taxi na̱ israelita chi ña̱yóʼo kúú ña̱ táxii̱ ndaʼa̱ndó ña̱ kooña herenciandó, ta iin táʼví* ña̱yóʼo xíniñúʼu taxindó ndaʼa̱ yi̱ʼi̱ Jehová. 27 Ta ña̱yóʼo kúú ña̱ so̱kóndó nu̱úi̱ chi ni̱xa̱a̱ña ndu̱uña harina miíndó, vino miíndó xíʼin aceite miíndó. 28 Chi saá kúú ña̱ kivi taxindó iin táʼví* ña̱ sóko̱ na̱ israelita ndaʼa̱ yi̱ʼi̱ Jehová, ta táʼan ña̱yóʼo taxindó ndaʼa̱ ta̱ su̱tu̱ Aarón ña̱ va̱ʼa taxiraña ndaʼa̱ yi̱ʼi̱ Jehová. 29 Nda̱a̱ ndáaka ña̱ ná taxindó ndaʼa̱ yi̱ʼi̱ Jehová, xíniñúʼu taxindó ña̱ yi̱i̱ ña̱ táxi na̱ israelita soo mií ña̱ va̱ʼaka xíniñúʼu kooña’.

30 ”Ña̱yóʼo xíniñúʼu ka̱ʼún xíʼinna: ‘Tá ná taxindó mií ña̱ va̱ʼaka ndaʼa̱ Ndióxi̱, ta ná kindo̱o harina, vino xíʼin aceite, kuenta miíndó kooña. 31 Miíndó xíʼin na̱ veʼendó kivi kuxundóña nda̱a̱ ndáaka nu̱ú kúni̱ndó, chi ya̱ʼvindó ña̱ ndákiʼinndó xa̱ʼa̱ ña̱ káchíñundó ti̱xin tabernáculo kúúña. 32 Tá ná taxindó mií ña̱ va̱ʼaka ndaʼa̱ Ndióxi̱, saá kúú ña̱ va̱ása ki̱ʼvindó ku̱a̱chi. Va̱ása ixayaku̱a̱ndó ña̱ʼa ña̱ yi̱i̱ ña̱ táxi na̱ israelita chi kuvindó tá ná keʼéndó ña̱yóʼo’”.

19 Jehová ni̱ka̱ʼa̱n tukura xíʼin ta̱ Moisés ta saátu xíʼin ta̱ Aarón. Ta ka̱chira: 2 “Ña̱yóʼo kúú ley ña̱ ta̱xi yi̱ʼi̱ Jehová: ‘Ka̱ʼa̱n xíʼin na̱ israelita ná kuniʼina iin si̱ndi̱ki̱ tí kúáʼa kixi xíʼinna, tí kǒo kue̱ʼe̱ kúúmií tí ta̱ʼán kundiso yókó.* 3 Xíniñúʼu taxinarí ndaʼa̱ ta̱ su̱tu̱ Eleazar, ta ta̱yóʼo tavárarí chí sa̱tá nu̱ú ndóo na̱ ñuu ta kaʼnínarí nu̱úra. 4 Tasaá, ta̱ su̱tu̱ Eleazar sandáxira* nu̱ú ndaʼa̱ra xíʼin ni̱i̱ tíyóʼo, ta u̱xa̱ yichi̱ ko̱so̱yáváraña* chí yéʼé tabernáculo. 5 Xíniñúʼu kotora tá ná koko* tí si̱ndi̱ki̱ yóʼo. Xíniñúʼu koko ñii̱rí, ku̱ñurí, ni̱i̱rí xíʼin si̱ʼvírí. 6 Ta̱ su̱tu̱, kiʼinra yitu̱n tú cedro, yu̱ku̱ ña̱ naní hisopo* xíʼin yi̱ʼva̱ kúáʼa ña̱ yéʼe̱ní ta taánraña nu̱ú xíxi̱ tí si̱ndi̱ki̱ ndíkaa̱rí. 7 Tasaá, ta̱ su̱tu̱ ndakatara ti̱ko̱to̱ra ta kuchira, tándi̱ʼi saá kivi ki̱ʼvira nu̱ú ndóo na̱ ñuu; soo ta̱ yaku̱a̱* koora nda̱a̱ ná ki̱ʼvi ñu̱ʼu.*

8 ”’Ta̱ xa̱ʼmi tí si̱ndi̱ki̱ yóʼo, ndakatara ti̱ko̱to̱ra ta kuchira, ta koora ta̱ yaku̱a̱ nda̱a̱ ná ki̱ʼvi ñu̱ʼu.

9 ”’Iin ta̱a ta̱ ndii* kúú ta̱ ndakaya ya̱a̱ tí si̱ndi̱ki̱ tí ni̱xi̱xi̱ ta chindooraña iin lugar ña̱ yi̱i̱ chí sa̱tá nu̱ú ndóo na̱ ñuu, na̱yóʼo xíniñúʼu taánva̱ʼanaña* ña̱ va̱ʼa kuniñúʼunaña xíʼin ti̱kui̱í tá ndásandii tá kuniñúʼu na̱ ñuu Israel. Tí si̱ndi̱ki̱ yóʼo kúú tí sóko̱na xa̱ʼa̱ ku̱a̱china. 10 Na̱ ndakaya ya̱a̱ tí si̱ndi̱ki̱ yóʼo, xíniñúʼu ndakatana ti̱ko̱to̱na ta koona na̱ yaku̱a̱ nda̱a̱ ná ki̱ʼvi ñu̱ʼu.

”’Ña̱yóʼo kúú iin ley ña̱ xíniñúʼu kundiku̱n na̱ israelita ndiʼi tiempo ta saátu na̱ inka ñuu na̱ ndóo naʼa* xíʼinna. 11 Ndiʼi na̱ ná tiin iin na̱ ni̱xi̱ʼi̱, u̱xa̱ ki̱vi̱ koona na̱ yaku̱a̱. 12 Na̱yóʼo xíniñúʼu ndasandiina miína xíʼin ti̱kui̱í yóʼo ki̱vi̱ u̱ni̱, ta ki̱vi̱ u̱xa̱ saá kúú ña̱ ndundii va̱ʼana. Soo tá ná va̱ása ndasandiina miína ki̱vi̱ u̱ni̱, va̱ása ndundii va̱ʼana ki̱vi̱ u̱xa̱. 13 Ndiʼi na̱ ná tiin iin na̱ ni̱xi̱ʼi̱ ta va̱ása ndásandiina miína, íxayaku̱a̱na tabernáculo yi̱ʼi̱ Jehová, ta xíniñúʼu kuvi na̱yóʼo. Na̱ yaku̱a̱ kúúna saáchi va̱ása níndundiina xíʼin ti̱kui̱í tá ndásandii miína.

14 ”’Ña̱yóʼo kúú ley ña̱ xíniñúʼu kundiku̱nna tá xíʼi̱ iin na̱ yiví ini iin veʼe loʼo: ndiʼi na̱ ná ki̱ʼvi ini veʼe kán u̱xa̱ ki̱vi̱ koona na̱ yaku̱a̱ ta saátu ndiʼi ña̱ íyo ini veʼe loʼo kán. 15 Ndiʼi ña̱ʼa ña̱ va̱ása ndási yuʼú, ña̱ yaku̱a̱ kooña. 16 Tá iinna xíkana chí yuku̱ ta ti̱inna iin na̱ xa̱ʼnína xíʼin espada, iin ndi̱i, iin leke na̱ yiví á nu̱ú ni̱ndu̱xu̱n iin na̱ yiví, u̱xa̱ ki̱vi̱ koona na̱ yaku̱a̱. 17 Ña̱ va̱ʼa ndasandiindó na̱ yiví yóʼo, xíniñúʼu kiʼinndó ya̱a̱ kití tí ni̱xi̱xi̱ tí ni̱so̱kóndó* xa̱ʼa̱ ku̱a̱chindó, taánndóña ini iin ña̱ʼa ta chikaa̱ndó ti̱kui̱í yu̱ta sa̱táña. 18 Tasaá, iin ta̱a ta̱ ndii, kiʼinra loʼo yu̱ku̱ ña̱ naní hisopo, ta sandáxiraña xíʼin ti̱kui̱í yóʼo ta kundaarará veʼe loʼo nu̱ú ni̱xi̱ʼi̱na, ta saátu kundaarará ndiʼi ña̱ʼa ña̱ íyo iniña ta saátu na̱ yiví na̱ xi̱ndoo iniña. Ta kundaarará na̱ ti̱in na̱ xa̱ʼnína, na̱ ti̱in iin leke, na̱ ti̱in iin ndi̱i á na̱ ti̱in iin nu̱ú ni̱ndu̱xu̱n na̱ yiví. 19 Ki̱vi̱ u̱ni̱ xíʼin ki̱vi̱ u̱xa̱, na̱ yiví na̱ ndii ko̱so̱yávána ti̱kui̱í yóʼo na̱ yiví na̱ ku̱yaku̱a̱, ta ki̱vi̱ u̱xa̱ kúú ña̱ ndundii va̱ʼana xa̱ʼa̱ ku̱a̱chi ña̱ ni̱ki̱ʼvina. Tándi̱ʼi, na̱ ku̱yaku̱a̱ yóʼo xíniñúʼu ndakatana ti̱ko̱to̱na ta kuchina ta ndundiina tá xa̱a̱ ni̱ki̱ʼvi ñu̱ʼu.

20 ”’Soo na̱ yiví na̱ ku̱yaku̱a̱ ta va̱ása níndundiina, na̱ yiví yóʼo xíniñúʼu kuvina saáchi i̱xayaku̱a̱na tabernáculo yi̱ʼi̱ Jehová. Na̱ yaku̱a̱ kúúna saáchi va̱ása níndundiina xíʼin ti̱kui̱í tá ndásandii miína.

21 ”’Ña̱yóʼo kúú iin ley ña̱ xíniñúʼu kundiku̱nna ndiʼi tiempo: na̱ ná ko̱so̱yává ti̱kui̱í tá ndásandii na̱ ku̱yaku̱a̱ xíniñúʼu ndakatana ti̱ko̱to̱na, ta na̱ ná tiin ti̱kui̱í yóʼo, koona na̱ yaku̱a̱ nda̱a̱ ná ki̱ʼvi ñu̱ʼu. 22 Nda̱a̱ ndáaka ña̱ʼa ná tiin na̱ ku̱yaku̱a̱ yóʼo kooña ña̱ yaku̱a̱, ta na̱ yiví na̱ ná tiin ña̱yóʼo koona na̱ yaku̱a̱ nda̱a̱ ná ki̱ʼvi ñu̱ʼu’”.

20 Tá yo̱o̱ nu̱ú, ndiʼi na̱ ñuu Israel ni̱xa̱a̱na chí nu̱ú ñuʼú yi̱chí ña̱ Zin, ta ki̱ndoona chí Cadés. Ta kán kúú nu̱ú ni̱xi̱ʼi̱ ñá Míriam ta sa̱ndúxu̱nnañá.

2 Soo kǒo ti̱kui̱í tá kuniñúʼu na̱ ñuu níxi̱yo kán, tasaá nda̱takana ta ki̱xáʼana káʼa̱nkúáchina* xa̱ʼa̱ ta̱ Moisés xíʼin ta̱ Aarón. 3 Ta ki̱xáʼana náana* xíʼin ta̱ Moisés ta xi̱kachina: “Va̱ʼaka níxi̱ʼi̱ndi̱ xíʼin na̱ táʼanndi̱ na̱ xa̱ʼní Jehová. 4 ¿Nda̱chun ki̱xaa̱ndó xíʼin na̱ ñuu Jehová nu̱ú ñuʼú yi̱chí yóʼo? ¿Á ki̱xaa̱ndó xíʼinndi̱ yóʼo ña̱ kuvindi̱ ta saátu kití sa̱na̱ndi̱? 5 ¿Nda̱chun ta̱vándó ndi̱ʼi̱ ñuu Egipto ta ki̱xaa̱ndó xíʼinndi̱ nu̱ú kininí káa yóʼo? Va̱ása kívi chiʼindi̱ yóʼo, kǒo higo íyo, ni uva, ni granada ta ni kǒo ti̱kui̱í koʼondi̱”. 6 Tasaá ta̱ Moisés xíʼin ta̱ Aarón ku̱xíkána nu̱ú na̱ ñuu, ni̱xa̱ʼa̱nna chí yéʼé ña̱ tabernáculo ta xi̱kuxítína nda̱a̱ nu̱ú ñuʼú ta xi̱nina ña̱ ki̱xáʼa ndáye̱ʼe̱ ndee̱ Jehová.

7 Tasaá ni̱ka̱ʼa̱n Jehová xíʼin ta̱ Moisés: 8 “Kiʼin yitu̱n tú níʼún ta miíún xíʼin ñaniún ta̱ Aarón xíniñúʼu sandátakandó na̱ ñuu. Nu̱ú ndiʼi na̱ ñuu ka̱ʼa̱nndó xíʼin yu̱u̱ yóʼo ña̱ va̱ʼa ná kee ti̱kui̱í kándíkaña, ta taváún ti̱kui̱í kándíka yu̱u̱ yóʼo ta taxiúnrá ná koʼo na̱ ñuu xíʼin kití sa̱na̱na”.

9 Tasaá ki̱ʼin ta̱ Moisés yitu̱n tú xi̱xiniñúʼura ta ke̱ʼéra nda̱a̱ táki̱ʼva ni̱ka̱ʼa̱n Jehová xíʼinra. 10 Ta ta̱ Moisés xíʼin ta̱ Aarón sa̱ndátakana na̱ ñuu yatin nu̱ú íyo yu̱u̱ kán, ta ña̱yóʼo ni̱ka̱ʼa̱n ta̱ Moisés xíʼinna: “Ndóʼó na̱ so̱ʼoní, kuniso̱ʼondó ña̱ ka̱ʼi̱n xíʼinndó. ¿Á kúni̱ndó ná tavándi̱ ti̱kui̱í kándíka yu̱u̱ yóʼo?”. 11 Tasaá nda̱niʼira ndaʼa̱ra ta u̱vi̱ yichi̱ ka̱nira kándíka yu̱u̱ kán xíʼin yitu̱n tú níʼira ta ki̱xáʼa kée ku̱a̱ʼání ti̱kui̱í, ta na̱ ñuu xíʼin kití sa̱na̱na ki̱xáʼana xíʼina ti̱kui̱í yóʼo.

12 Tándi̱ʼi ku̱u ña̱yóʼo, Jehová ni̱ka̱ʼa̱nra xíʼin ta̱ Moisés ta saátu xíʼin ta̱ Aarón, ta ka̱chira: “Xa̱ʼa̱ ña̱ va̱ása nína̱ʼa̱ndó ña̱ kándíxandó yi̱ʼi̱ ta va̱ása níndasakáʼnundó yi̱ʼi̱ nu̱ú ndiʼi na̱ ñuu Israel, va̱ása ku̱ʼu̱nndó xíʼin na̱ ñuu yóʼo nu̱ú ñuʼú ña̱ taxii̱ ndaʼa̱na”. 13 Táyóʼo xi̱kuu ti̱kui̱í tá xi̱ndikaa̱ chí Meribá,* ta yóʼo kúú nu̱ú ni̱ka̱ʼa̱nkúáchi na̱ israelita xa̱ʼa̱ Jehová, tasaá ni̱na̱ʼa̱ra nu̱úna ña̱ kúúra ta̱ yi̱i̱.

14 Tá ndóokana chí Cadés, ta̱ Moisés chi̱ndaʼára sava na̱ ta̱a na̱ ku̱a̱ʼa̱n ka̱ʼa̱n xíʼin ta̱ rey ñuu Edom, ka̱china: “Ña̱yóʼo kúú ña̱ káʼa̱n na̱ táʼún na̱ ñuu Israel: ‘Kúnda̱a̱va-iniún xa̱ʼa̱ ndiʼi tu̱ndóʼo ña̱ xa̱a̱ ni̱ya̱ʼandi̱ nu̱ú. 15 Na̱ yivándi̱ ni̱xa̱ʼa̱nna xi̱kundoona chí Egipto ta ku̱a̱ʼání ku̱i̱ya̱ xi̱ndoondi̱ kán, soo na̱ egipcio i̱xandi̱va̱ʼana xíʼinndi̱ ta saátu xíʼin na̱ yivándi̱. 16 Tasaá ni̱ka̱ʼa̱n-ndáʼvindi̱ xíʼin Jehová ña̱ ná chindeétáʼanra xíʼinndi̱, ta xi̱niso̱ʼovara ña̱ ni̱ka̱ʼa̱nndi̱, ña̱kán chi̱ndaʼára iin ángel ta̱ ta̱vá ndi̱ʼi̱ ti̱xin ñuu Egipto. Vitin ndóondi̱ chí ñuu Cadés ña̱ ndíkaa̱ yatin nu̱ú ndíʼi ñuʼún. 17 Ixaún ña̱ ma̱ní, taxi loʼo ná ya̱ʼandi̱ nu̱ú ñuʼún. Va̱ása ya̱ʼandi̱ nu̱ú chíʼindó ni nu̱ú íyo tú uvandó ta ni va̱ása koʼondi̱ ti̱kui̱í tá ñúʼu pozondó. Ku̱ʼu̱nndi̱ chí yichi̱ ña̱ naní Yichi̱ ta̱ Rey ta va̱ása ku̱ʼu̱nndi̱ ni chí ndaʼa̱ kúaʼa ni chí ndaʼa̱ yitin nda̱a̱ ná ya̱ʼandi̱ nu̱ú ñuʼún’”.

18 Soo ta̱ rey ñuu Edom ni̱ka̱ʼa̱nra xíʼinna: “Va̱ása kivi ya̱ʼandó nu̱ú ñuʼíi̱. Chi tá ná keʼéndó ña̱yóʼo, xa̱i̱ kanitáʼi̱n xíʼinndó xíʼin espada”. 19 Ta na̱ israelita ni̱ka̱ʼa̱nna xíʼinra: “Ku̱ʼu̱nndi̱ chí yichi̱ káʼnu ta tá miíndi̱ á kití sa̱na̱ndi̱ ná koʼo ti̱kui̱índó, chaʼvivandi̱ xa̱ʼa̱rá. Na̱ kúni̱ ya̱ʼa kuitíva kúúndi̱”. 20 Soo ta̱ rey ñuu Edom ni̱ka̱ʼa̱nra xíʼinna: “Va̱ása ya̱ʼandó chóʼo”. Tasaá ki̱tara ku̱a̱ʼa̱nra ndakutáʼanra xíʼinna ta ku̱a̱ʼa̱n ku̱a̱ʼání na̱ soldado xíʼinra ta saátu inkaka na̱ yiví. 21 Ta̱ rey ñuu Edom va̱ása nítaxira ya̱ʼa na̱ ñuu Israel nu̱ú ñuʼúra. Xa̱ʼa̱ ña̱kán ku̱xíká na̱ ñuu Israel nu̱úra.

22 Ta ndiʼi na̱ ñuu Israel ke̱ena chí Cadés ta ni̱xa̱a̱na chí yuku̱ Hor. 23 Tasaá Jehová ni̱ka̱ʼa̱nra ña̱yóʼo xíʼin ta̱ Moisés ta saátu xíʼin ta̱ Aarón chí yuku̱ ña̱ Hor, ña̱ kíndo̱o yatin nu̱ú ñuʼú ña̱ Edom, ka̱chira: 24 “Kuvi ta̱ Aarón ta ndu̱xu̱nra nda̱a̱ táki̱ʼva ni̱ndu̱xu̱n na̱ táʼanra na̱ xi̱ndoo xi̱naʼá. Ta̱yóʼo va̱ása ki̱ʼvira nu̱ú ñuʼú ña̱ taxii̱ ndaʼa̱ na̱ israelita, saáchi va̱ása níxi̱ndiku̱nndó ña̱ ni̱ka̱ʼi̱n xíʼinndó xa̱ʼa̱ ti̱kui̱í tá xi̱ndikaa̱ chí Meribá. 25 Kúándaa yuku̱ Hor ta ná ku̱ʼu̱n ta̱ Aarón xíʼin se̱ʼera ta̱ Eleazar xíʼún. 26 Tavá ti̱ko̱to̱ ta̱ Aarón ta sandákundixiúnña ta̱ Eleazar se̱ʼera, ta kán kuvi ta̱ Aarón”.

27 Ta nda̱a̱ táki̱ʼva ni̱ka̱ʼa̱n Jehová xíʼin ta̱ Moisés saá ke̱ʼéra. Ta xi̱ni ndiʼi na̱ ñuu tá nda̱ana yuku̱ Hor. 28 Tasaá ta̱vá ta̱ Moisés ti̱ko̱to̱ ta̱ Aarón ta sa̱ndákundixiraña ta̱ Eleazar. Ta xi̱ní yuku̱ kán ni̱xi̱ʼi̱ ta̱ Aarón. Tasaá nu̱u ta̱ Moisés xíʼin ta̱ Eleazar yuku̱ kán. 29 Tá xi̱ni ndiʼi na̱ ñuu Israel ña̱ ni̱xi̱ʼi̱ ta̱ Aarón, 30 ki̱vi̱ xa̱kuna xa̱ʼa̱ra.

21 Tá ku̱ndaa̱-ini ta̱ rey cananeo ta̱ xi̱xaʼndachíñu chí Arad ta̱ ni̱xi̱yo chí Négueb, ña̱ ku̱a̱ʼa̱n na̱ ñuu Israel chí yichi̱ ña̱ Atarim, ni̱xa̱ʼa̱nra ka̱nitáʼanra xíʼinna ta nda̱kiʼinra sava na̱yóʼo ku̱a̱ʼa̱n xíʼinra. 2 Tasaá ki̱ndoo na̱ ñuu Israel ña̱yóʼo xíʼin Jehová ta ni̱ka̱ʼa̱nna: “Tá ná ndataxiún ndiʼi na̱ ñuu yóʼo ndaʼa̱ndi̱, sandíʼi-xa̱ʼa̱ndi̱ ndiʼi ñuuna”. 3 Tasaá xi̱niso̱ʼo Jehová ña̱ ni̱ka̱ʼa̱n na̱ ñuu Israel xíʼinra ta nda̱taxira na̱ ñuu Canaán ndaʼa̱na, ta na̱ ñuu Israel ku̱chiñuna sa̱ndíʼi-xa̱ʼa̱na na̱yóʼo ta saátu ñuuna. Ña̱kán chi̱nanína lugar kán Hormá.*

4 Ke̱ena chí yuku̱ ña̱ Hor ta ni̱xa̱ʼa̱nna chí yichi̱ ña̱ ku̱a̱ʼa̱n chí mar Rojo tasaá va̱ása níya̱ʼana nu̱ú ñuʼú ña̱ Edom. Soo ku̱naa na̱ ñuu Israel. 5 Ta na̱ ñuu ki̱xáʼana káʼa̱nkúáchina* xa̱ʼa̱ Ndióxi̱ ta saátu xa̱ʼa̱ ta̱ Moisés ta xi̱kachina: “¿Nda̱chun ta̱vándó ndi̱ʼi̱ ñuu Egipto? ¿Á ta̱vándó ndi̱ʼi̱ ña̱ kuvindi̱ nu̱ú ñuʼú yi̱chí yóʼova? Kǒo ña̱ kuxundi̱ yóʼo ni ti̱kui̱í koʼondi̱ kǒo, ta va̱ása káchika-inindi̱ kuxundi̱ maná* yóʼo”. 6 Ña̱kán chi̱ndaʼá Jehová ko̱o̱ tí kue̱ʼe̱* nu̱ú na̱ ñuu, ta tí ko̱o̱ yóʼo xa̱xírí* na̱ israelita ta ku̱a̱ʼánína ni̱xi̱ʼi̱.

7 Tasaá ni̱xa̱ʼa̱n na̱ ñuu Israel nu̱ú ta̱ Moisés ta ni̱ka̱ʼa̱nna xíʼinra: “Ni̱ki̱ʼvindi̱ ku̱a̱chi xa̱ʼa̱ ña̱ ni̱ka̱ʼa̱nkúáchindi̱ xa̱ʼa̱ Jehová ta saátu xa̱ʼa̱ miíún. Ka̱ʼa̱n xíʼin Jehová ña̱ ná va̱ása chindaʼákara tí ko̱o̱ yóʼo nu̱úndi̱”. Tasaá ni̱ka̱ʼa̱n ta̱ Moisés xíʼin Ndióxi̱ xa̱ʼa̱ na̱ ñuu. 8 Ta ni̱ka̱ʼa̱n Jehová xíʼin ta̱ Moisés: “Keʼé iin ko̱o̱ kue̱ʼe̱ ta chinúurí nu̱ú iin yitu̱n. Tasaá tá ná kaxí iin ko̱o̱ na̱ yiví, xíniñúʼu kotona nu̱úrí tasaá va̱ása kuvina”. 9 Ta ndi̱ku̱n ke̱ʼé ta̱ Moisés iin ko̱o̱ xíʼin cobre ta chi̱núurarí nu̱ú iin yitu̱n. Tasaá tá xi̱xaxí ko̱o̱ iin na̱ yiví, xi̱xitona nu̱ú ko̱o̱ tí ku̱vaʼa xíʼin cobre ta va̱ása níxi̱xiʼi̱na.

10 Tándi̱ʼi ku̱u ña̱yóʼo, na̱ israelita nda̱kiʼinna ku̱a̱ʼa̱nna ta ni̱xa̱a̱na xi̱kundoona chí Obot. 11 Tasaá ke̱ena chí Obot ta ni̱xa̱a̱na xi̱kundoona chí Iyé-Abarim, ñuʼú yi̱chí ña̱ ndíkaa̱ chí nu̱ú kíta ñu̱ʼu* chí nu̱ú xítondaa Moab. 12 Yóʼo tuku ke̱ena ta ni̱xa̱a̱na xi̱kundoona yatin yoso̱ ña̱ Zered. 13 Kán tuku ke̱ena ta ni̱xa̱a̱na chí Arnón ña̱ ndíkaa̱ chí nu̱ú ñuʼú yi̱chí ña̱ ndákutáʼan xíʼin nu̱ú ñuʼú na̱ amorreo. Ña̱ Arnón yóʼo kíndo̱oña chí nu̱ú ndíʼi ñuʼú ña̱ Moab, ta ndátaʼvíña ñuʼú na̱ moabita xíʼin ñuʼú na̱ amorreo. 14 Ña̱kán, libro ña̱ káʼa̱n xa̱ʼa̱ guerra Jehová káʼa̱nña xa̱ʼa̱ “Vaheb ña̱ ndíkaa̱ chí Sufá xíʼin yoso̱ ña̱ kíndo̱o chí Arnón, 15 ta saátu káʼa̱nña xa̱ʼa̱ yu̱ta válí tá xáa̱ nda̱a̱ yoso̱ yóʼo, ta tá yu̱ta yóʼo xáa̱rá nda̱a̱ Ar ta yáʼará yuʼú ñuʼú ña̱ Moab”.

16 Tándi̱ʼi, ni̱xa̱a̱na chí Beer. Ta ña̱yóʼo kúú pozo nu̱ú ni̱ka̱ʼa̱n Jehová xíʼin ta̱ Moisés: “Sandátaka na̱ ñuu ña̱ va̱ʼa taxii̱ ti̱kui̱í kuniñúʼuna”.

17 Tá ku̱u ña̱yóʼo, na̱ ñuu Israel xi̱tana yaa yóʼo:

“Pozo, ná kee ti̱kui̱í iniún. Katandó nu̱úña.

xíʼin karroti* tú níʼina kúú ña̱ xa̱tanaña”.

Tasaá ke̱ena chí nu̱ú ñuʼú yi̱chí ta nda̱kiʼinna ku̱a̱ʼa̱nna chí Mataná, 19 chí Mataná ke̱ena ta nda̱kiʼinna ku̱a̱ʼa̱nna chí Nahaliel, ta chí Nahaliel ke̱ena ta nda̱kiʼinna ku̱a̱ʼa̱nna chí Bamot. 20 Tasaá ke̱ena chí Bamot ta ni̱xa̱ʼa̱nna chí yoso̱ ña̱ ndíkaa̱ chí Moab, ña̱ ndíkaa̱ chí si̱kí Pisgá ña̱ xítondaa chí Jesimón.*

21 Tasaá chi̱ndaʼá na̱ ñuu Israel na̱ ku̱a̱ʼa̱n ka̱ʼa̱n xíʼin ta̱ Sehón ta̱ xi̱kuu rey nu̱ú na̱ amorreo, ta ña̱yóʼo ni̱ka̱ʼa̱nna xíʼinra: 22 “Taxi loʼo ná ya̱ʼandi̱ nu̱ú ñuʼúndó. Va̱ása ya̱ʼandi̱ nu̱ú chíʼindó, ni nu̱ú íyo tú uvandó ta ni va̱ása koʼondi̱ ti̱kui̱í tá ñúʼu pozondó. Ku̱ʼu̱nndi̱ chí yichi̱ ña̱ naní Yichi̱ ta̱ Rey nda̱a̱ ná ya̱ʼandi̱ nu̱ú ñuʼúndó”. 23 Soo ta̱ Sehón va̱ása nítaxira ya̱ʼa na̱ ñuu Israel nu̱ú ñuʼúra. Nu̱úka ña̱ keʼéra ña̱yóʼo, ta̱ Sehón sa̱ndátakara ndiʼi na̱ soldadora ta ki̱tara ku̱a̱ʼa̱nra ndakutáʼanra xíʼin na̱ ñuu Israel chí nu̱ú ñuʼú yi̱chí, ni̱xa̱a̱ra chí Jáhaz ta ki̱xáʼara kánitáʼanra xíʼin na̱ ñuu Israel. 24 Soo na̱ ñuu Israel ku̱chiñuna ka̱nitáʼanna xíʼinra, ta ki̱ndaana ñuʼúra ña̱ íyo chí Arnón iinsaá nda̱a̱ chí Jaboc yatin nu̱ú ndóo na̱ ammonita, saáchi yatin nu̱ú ndíʼi ñuʼú na̱ ammonita ndíkaa̱ ñuu Jazer.

25 Tasaá nda̱kiʼin na̱ ñuu Israel ndiʼi ñuu na̱ amorreo ta xi̱kundoona ñuu kán, xi̱ndoona chí Hesbón ta saátu ndiʼika ñuu ña̱ ni̱xi̱yo yatin xíʼinña. 26 Saáchi Hesbón xi̱kuu ñuu ta̱ Sehón ta̱ xi̱kuu rey nu̱ú na̱ amorreo ta̱ ka̱nitáʼan xíʼin ta̱ rey ñuu Moab, ta ki̱ndaara ndiʼi ñuʼúra nda̱a̱ ña̱ ni̱xi̱yo chí Arnón. 27 Xa̱ʼa̱ ña̱kán ki̱xáʼa na̱ yiví káʼa̱nna ña̱yóʼo ña̱ va̱ʼa kusi̱kindaana na̱ ñuu Moab:

“Naʼandó chí Hesbón.

Keʼéndó ku̱a̱ʼá veʼe ña̱ va̱ʼa ná xa̱a̱ña kooña ñuu ta̱ Sehón,

ta kútu̱va̱ʼa* ná kooña.

28 Saáchi chí Hesbón ki̱ta iin ñuʼu̱, ñuʼu̱ na̱ ñuu ta̱ Sehón.

Xa̱ʼmiña ñuu Ar ña̱ ndíkaa̱ chí Moab, xa̱ʼmiña na̱ xáʼndachíñu

chí nu̱ú súkun ña̱ Arnón.

29 Ndáʼviní ndóʼó na̱ ñuu Moab.

Ndóʼó na̱ ndásakáʼnu ña̱ ndióxi̱ Kemós, na̱ ndiʼi-xa̱ʼa̱ kúúndó.

Ku̱a̱chi ña̱yóʼo xa̱a̱ síín síín nu̱ú ku̱ʼu̱n se̱ʼendó,

ta ndataxiña se̱ʼe-síʼindó ndaʼa̱ ta̱ rey Sehón

ta̱ xáʼndachíñu nu̱ú na̱ amorreo.

31 Tasaá ni̱xa̱a̱ na̱ ñuu Israel xi̱kundoona nu̱ú ñuʼú na̱ amorreo. 32 Tasaá chi̱ndaʼá ta̱ Moisés sava na̱ ta̱a na̱ ku̱a̱ʼa̱n kotona̱ní* ñuu Jazer. Na̱ ñuu Israel nda̱kiʼinna sava ñuu ña̱ ni̱xi̱yo yatin kán, ta ta̱vána na̱ amorreo na̱ xi̱ndoo kán. 33 Tándi̱ʼi, nda̱ndikóna ta nda̱kiʼinna ku̱a̱ʼa̱nna chí yichi̱ ña̱ ku̱a̱ʼa̱n chí Basán. Ta ta̱ Og ta̱ xi̱kuu rey chí Basán ki̱tara ku̱a̱ʼa̱nra xíʼin na̱ soldadora ña̱ va̱ʼa kanitáʼanra xíʼinna chí Edréi. 34 Jehová ni̱ka̱ʼa̱nra xíʼin ta̱ Moisés: “Va̱ása yi̱ʼvíún kuniúnra chi ndataxii̱ra ndaʼún ta saátu ndiʼi na̱ soldadora xíʼin ñuʼúra. Táki̱ʼva ke̱ʼún xíʼin ta̱ Sehón ta̱ xi̱kuu rey nu̱ú na̱ amorreo ta̱ ni̱xi̱yo chí Hesbón saátu keʼún xíʼin ta̱yóʼova”. 35 Tasaá xa̱ʼnína ta̱ Og xíʼin na̱ se̱ʼera ta saátu ndiʼi na̱ soldadora, kǒo nda̱a̱ ni iinna níka̱ku, ta ku̱chiñuna nda̱kiʼinna ñuʼúra.

22 Tasaá nda̱kiʼin na̱ israelita ku̱a̱ʼa̱nna, ta ni̱xa̱a̱na xi̱kundoona nu̱ú ñuʼú yi̱chí ña̱ Moab, chí inka xiyo yuʼú yu̱ta Jordán, chí nu̱ú xítondaa Jericó. 2 Ta̱ Balac se̱ʼe ta̱ Zipor xi̱nira ndiʼi ña̱ ke̱ʼé na̱ ñuu Israel xíʼin na̱ amorreo, 3 ta na̱ ñuu Moab ni̱yi̱ʼvínína saáchi ku̱a̱ʼání xi̱kuu na̱ ñuu Israel. Na̱ ñuu Moab ndeéní xi̱yiʼvína xi̱xinina na̱ israelita. 4 Ña̱kán ni̱ka̱ʼa̱n na̱ ñuu Moab xíʼin na̱ xi̱niʼi yichi̱ nu̱ú na̱ ñuu* Madián ta ka̱china: “Ku̱a̱ʼání kúú na̱ ñuu yóʼo ta sandíʼi-xa̱ʼa̱na ndiʼi ña̱ kúúmiíyó, keʼéna nda̱a̱ táki̱ʼva kéʼé iin si̱ndi̱ki̱ tí xáxi ndiʼi yita* ña̱ íyo yuku̱”.

Tá ku̱u ña̱yóʼo, ta̱ Balac se̱ʼe ta̱ Zipor xi̱kuu rey nu̱ú na̱ ñuu Moab. 5 Tasaá chi̱ndaʼára na̱ ta̱a na̱ ku̱a̱ʼa̱n ka̱ʼa̱n xíʼin ta̱ Balaam se̱ʼe ta̱ Beor, ta̱ ni̱xi̱yo chí Petor ña̱ xi̱kuu ñuu nu̱ú ka̱kura, ña̱ xi̱ndikaa̱ yatin yuʼú Yu̱ta.* Ta chi̱ndaʼára tu̱ʼun yóʼo ku̱a̱ʼa̱n nu̱úra: “Koto, íyo iin ñuu ña̱ ke̱e chí Egipto. Ku̱a̱ʼání kúúna ta ki̱xaa̱na ndóona yatin nu̱ú íyoi̱. 6 Ta vitin káʼi̱n xíʼún ña̱ kixi loʼún sakúisochiʼñaún* na̱ ñuu yóʼo saáchi ndakúníkavana nu̱ú yi̱ʼi̱. Sana kuchiñuvai̱ tavái̱na ñuu yóʼo, saáchi kúnda̱a̱va-inii̱ ña̱ na̱ chíka̱ún bendición, ndákiʼinna bendición ta na̱ sákuisochiʼñaún, ndákiʼinna chiʼña”.

7 Ta na̱ xi̱niʼi yichi̱ nu̱ú na̱ ñuu Moab xíʼin na̱ xi̱niʼi yichi̱ nu̱ú na̱ ñuu Madián, ke̱ena ku̱a̱ʼa̱nna ta níʼina xu̱ʼún ña̱ chaʼvina ta̱ Balaam ña̱ va̱ʼa sakúisochiʼñara na̱ ñuu Israel. Ni̱xa̱ʼa̱nna nu̱ú ta̱ Balaam ta ni̱ka̱ʼa̱nna xíʼinra xa̱ʼa̱ ña̱ ni̱ka̱ʼa̱n ta̱ Balac. 8 Saá ni̱ka̱ʼa̱nra xíʼinna: “Yóʼo kindo̱ondó ku̱su̱nndó tasaá natúʼi̱n xíʼinndó ndáaña ka̱ʼa̱n Jehová xíʼi̱n”. Ta kán ki̱ndoo na̱ ta̱a yóʼo xíʼin ta̱ Balaam.

9 Tasaá ni̱ka̱ʼa̱n Ndióxi̱ xíʼin ta̱ Balaam ta ka̱chira: “¿Ndáana kúú na̱ ta̱a na̱ ki̱xaa̱ nu̱ún?”. 10 Ta̱ Balaam nda̱kuiinra yuʼú Ndióxi̱ ta̱ nda̱a̱, ta ka̱chira: “Ta̱ Balac se̱ʼe ta̱ Zipor, ta̱ kúú rey chí Moab, chi̱ndaʼára tu̱ʼun yóʼo va̱xi nu̱úi̱: 11 ‘Koto, íyo iin ñuu ña̱ ke̱e chí Egipto ta ku̱a̱ʼání kúúna. Ta vitin káʼi̱n xíʼún ña̱ kixi loʼún sakúisochiʼñaún na̱ ñuu yóʼo. Sana kuchiñuvai̱ tavái̱na ñuu yóʼo’”. 12 Soo Ndióxi̱ ni̱ka̱ʼa̱nra xíʼin ta̱ Balaam: “Va̱ása ku̱ʼún xíʼinna. Va̱ása sakúisochiʼñaún na̱ ñuu yóʼo, saáchi xa̱a̱ ta̱xivai̱ bendición ndaʼa̱na”.

13 Tasaá xi̱ta̱a̱nní* nda̱koo ta̱ Balaam ta ni̱ka̱ʼa̱nra xíʼin na̱ ta̱a na̱ chi̱ndaʼá ta̱ Balac: “Ndikóndó ñuundó saáchi va̱ása xíín Jehová taxira ku̱ʼi̱n xíʼinndó”. 14 Tasaá, na̱ ta̱a na̱ ñuu Moab nda̱kiʼinna ku̱a̱ʼa̱nna ta tá ndi̱kóna nu̱ú ta̱ Balac ka̱china: “Va̱ása níxiin ta̱ Balaam kixira xíʼinndi̱”.

15 Soo ta̱ Balac tuku chi̱ndaʼára na̱ ta̱a na̱ xi̱kuumií chiñu náʼnu; soo ku̱a̱ʼáka xi̱kuu na̱yóʼo ta na̱ ndáyáʼvika xi̱kuuna. 16 Tasaá ni̱xa̱ʼa̱nna nu̱ú ta̱ Balaam ta ni̱ka̱ʼa̱nna xíʼinra: “Ña̱yóʼo kúú ña̱ káʼa̱n ta̱ Balac se̱ʼe ta̱ Zipor: ‘Ixaún ña̱ ma̱ní, va̱ása taxiún kasi nda̱a̱ ni iin ña̱ʼa nu̱ún ña̱ kixiún nu̱úi̱, 17 saáchi taxii̱ ku̱a̱ʼání ña̱ʼa ña̱ livi ndaʼún, ta keʼíi̱ nda̱a̱ ndáaka ña̱ ná ndukún nu̱úi̱. Ña̱kán kixi loʼún ta sakúisochiʼñaún na̱ ñuu yóʼo’”. 18 Tasaá ni̱ka̱ʼa̱n ta̱ Balaam xíʼin na̱ ta̱a yóʼo: “Ni ná taxi ta̱ Balac veʼera ndaʼíi̱ ta ná kutú plata xíʼin oro iniña, va̱ása kivi keʼíi̱ nda̱a̱ ni iin ña̱ʼa chi iinlá ña̱ káʼa̱n Jehová Ndióxi̱ miíi̱ kúú ña̱ kivi keʼíi̱. 19 Soo ndúkúi̱ ña̱ ma̱ní nu̱úndó, kindo̱ondó inka ñuú vitin ña̱ va̱ʼa kotoi̱ ndáaka ña̱ ka̱ʼa̱n Jehová xíʼi̱n”.

20 Ta tá ñuú ni̱ka̱ʼa̱n Ndióxi̱ xíʼin ta̱ Balaam ta ka̱chira: “Tá xa̱ʼa̱ miíún va̱xi na̱ ta̱a yóʼo, kúáʼan xíʼinna soo ña̱ ka̱ʼa̱n kuitíi̱ xíʼún kúú ña̱ kivi ka̱ʼún”. 21 Tasaá, xi̱ta̱a̱nní nda̱koo ta̱ Balaam, i̱xatu̱ʼvara burro* sa̱na̱ra tasaá nda̱kiʼinra ku̱a̱ʼa̱nra xíʼin na̱ ta̱a na̱ ñuu Moab.

22 Soo ni̱sa̱a̱ní Ndióxi̱ xíʼinra xa̱ʼa̱ ña̱ nda̱kiʼinra ku̱a̱ʼa̱nra, ña̱kán xi̱kundichi ángel Jehová chí ma̱ʼñú yichi̱ nu̱ú ku̱a̱ʼa̱nra ña̱ va̱ʼa kasira nu̱úra. Ta kánuu ta̱ Balaam sa̱tá burro sa̱na̱ra ku̱a̱ʼa̱nra, ta ku̱a̱ʼa̱n u̱vi̱ na̱ káchíñu nu̱úra xíʼinra. 23 Tá xi̱ni burro yóʼo ña̱ níndichi ángel Jehová yichi̱ ta níʼira espada, xi̱kuni̱rí kitarí yichi̱ kán ta ku̱ʼu̱nrí chí yuku̱. Ta ki̱xáʼa ta̱ Balaam kánirarí ña̱ va̱ʼa ndikórí chí yichi̱. 24 Tasaá xi̱kundichi ángel Jehová iin yichi̱ táñu ña̱ ku̱a̱ʼa̱n ma̱ʼñú u̱vi̱ ñuʼú nu̱ú íyo tú uva, ta u̱vi̱ saá táʼví yuʼú yichi̱ kán ni̱xi̱yo nama̱ ña̱ ku̱vaʼa xíʼin yu̱u̱. 25 Tá xi̱ni tí burro yóʼo ángel Jehová, ku̱yatinnírí nama̱ kán ta sa̱chóʼma̱rí* xa̱ʼa̱ ta̱ Balaam, tasaá ki̱xáʼa ta̱ Balaam káni tukurarí.

26 Ta̱ ángel Jehová xi̱kundichira chí nu̱úka, iin nu̱ú táñuní, nu̱ú va̱ása kivi ku̱ʼu̱n tí burro yóʼo ni chí ndaʼa̱ kúaʼa ni chí ndaʼa̱ yitin. 27 Tá xi̱ni tí burro yóʼo ta̱ ángel Jehová, saá xi̱kundúʼurí nda̱a̱ nu̱ú ñuʼú xíʼin ta̱ Balaam, ña̱kán ndeéní ni̱sa̱a̱ ta̱ Balaam ta tuku ki̱xáʼara kánirarí xíʼin yitu̱n tú níʼira. 28 Tasaá sa̱káʼa̱n Jehová tí burro kán, ta ni̱ka̱ʼa̱nrí ña̱yóʼo xíʼin ta̱ Balaam: “¿Ndáaña ke̱ʼíi̱ xíʼún ña̱kán nda̱a̱ u̱ni̱ yichi̱ ka̱niún yi̱ʼi̱?”. 29 Ta ta̱ Balaam ni̱ka̱ʼa̱nra xíʼin tí burro kán: “Saáchi sákukaʼanníún nu̱úi̱, tá níxi̱niʼi̱ iin espada, kaʼnívai̱ yóʼó”. 30 Ta tí burro yóʼo ni̱ka̱ʼa̱nrí xíʼin ta̱ Balaam: “Nda̱a̱ tá loʼovíún yósoún yi̱ʼi̱ ta ¿á xa̱a̱ saá kéʼíi̱ xíʼún sava yichi̱?”. Ta nda̱kuiinra ta ka̱chira: “Va̱ásaví”. 31 Tasaá xu̱ná Jehová nduchúnu̱ú ta̱ Balaam, ta xi̱nira ña̱ níndichi ta̱ ángel Jehová chí yichi̱ kán ta níʼira iin espada. Tasaá kama xi̱kuxítíra.

32 Ta ni̱ka̱ʼa̱n ta̱ ángel Jehová xíʼinra: “¿Nda̱chun ka̱niún burro sa̱na̱ún nda̱a̱ u̱ni̱ yichi̱? Yi̱ʼi̱va kúú ta̱ sa̱si nu̱ún ña̱ va̱ása ya̱ʼún, saáchi su̱ví ña̱ kúni̱ yi̱ʼi̱ví ku̱a̱ʼún keʼún. 33 Burro sa̱na̱ún xi̱nirí yi̱ʼi̱ ña̱kán ku̱xíkárí u̱ni̱ yichi̱ yóʼo. ¿Ndáaña kundoʼovíún tá kǒo níkeʼérí ña̱yóʼo? Xa̱a̱ xa̱ʼnívai̱ yóʼó tá kǒo níkeʼérí ña̱yóʼo soo va̱ása kuviví miírí”. 34 Tasaá ni̱ka̱ʼa̱n ta̱ Balaam xíʼin ángel Jehová: “Ni̱kiʼvii̱ ku̱a̱chi saáchi va̱ása níxikunda̱a̱-ini̱i̱ ña̱ yóʼóva kúú ta̱ ndátu yi̱ʼi̱ yichi̱ yóʼo. Tá su̱ví ña̱ va̱ʼa kúú ña̱ kéʼíi̱ túviún, ndikóvai̱”. 35 Tasaá ni̱ka̱ʼa̱n ángel Jehová xíʼin ta̱ Balaam: “Kúáʼan xíʼin na̱ ta̱a yóʼo soo ña̱ ka̱ʼa̱n kuitíi̱ xíʼún kúú ña̱ kivi ka̱ʼún”. Tasaá nda̱kiʼin ta̱ Balaam ku̱a̱ʼa̱nra xíʼin na̱ ta̱a na̱ chi̱ndaʼá ta̱ Balac.

36 Tá ku̱ndaa̱-ini ta̱ Balac ña̱ ni̱xa̱a̱ ta̱ Balaam, ndi̱ku̱n ni̱xa̱ʼa̱nra nda̱a̱ ñuu Moab ña̱ ndíkaa̱ chí Arnón, nu̱ú ndíʼi nu̱ú ñuʼú yóʼo ña̱ va̱ʼa ndakutáʼanra xíʼinra. 37 Ta̱ Balac ni̱ka̱ʼa̱nra xíʼin ta̱ Balaam: “¿Á kǒova na̱ níxa̱a̱ ka̱ʼa̱n xíʼún kixiún? ¿Nda̱chun koo níkixiún nu̱úi̱? ¿Á va̱ása kuchiñui̱ taxii̱ ku̱a̱ʼá ña̱ʼa ndaʼún túviún?”. 38 Ta̱ Balaam ni̱ka̱ʼa̱nra xíʼin ta̱ Balac: “Xa̱a̱ ki̱xai̱ soo va̱ása kivi ka̱ʼi̱n ña̱ kúni̱ miíi̱. Saáchi iinlá ña̱ ná ka̱ʼa̱n Ndióxi̱ xíʼi̱n kúú ña̱ kivi ka̱ʼi̱n”.

39 Tasaá nda̱kiʼin ta̱ Balaam ku̱a̱ʼa̱nra xíʼin ta̱ Balac ta ni̱xa̱a̱na chí Quiryat-Huzot. 40 Ta̱ Balac ni̱so̱kóra si̱ndi̱ki̱ xíʼin ndikachi ta chi̱ndaʼára ku̱ñurí ku̱a̱ʼa̱n ndaʼa̱ ta̱ Balaam xíʼin na̱ ta̱a na̱ ndáyáʼvi na̱ ndóo xíʼinra. 41 Tá inka ki̱vi̱, ta̱ Balac nda̱kiʼinra ta̱ Balaam ku̱a̱ʼa̱n xíʼinra ta nda̱ana chí Bamot-Baal; ta kán kúú nu̱ú túvi ndóo ndiʼi na̱ ñuu.

23 Tasaá ni̱ka̱ʼa̱n ta̱ Balaam xíʼin ta̱ Balac: “Keʼé u̱xa̱ altar yóʼo ta kaʼní u̱xa̱ si̱ndi̱ki̱ xíʼin u̱xa̱ ndikachi* che̱e tí kuniñúʼi̱”. 2 Ta ndi̱ku̱n ke̱ʼé ta̱ Balac nda̱a̱ táki̱ʼva ni̱ka̱ʼa̱n ta̱ Balaam xíʼinra. Ta ta̱ Balac xíʼin ta̱ Balaam ni̱so̱kóna* iin si̱ndi̱ki̱ xíʼin iin ndikachi che̱e nu̱ú iin tá iin altar yóʼo. 3 Tándi̱ʼi, ta̱ Balaam ni̱ka̱ʼa̱nra xíʼin ta̱ Balac: “Yóʼo kindo̱ún xíʼin kití tí ni̱so̱kóún tí ni̱xi̱xi̱,* ta ná ku̱ʼi̱n. Chi sana ka̱ʼa̱n Jehová xíʼi̱n, ta nda̱a̱ ndáaka ña̱ ná ka̱ʼa̱nra xíʼi̱n, ka̱ʼi̱nña xíʼún”. Tasaá nda̱kiʼinra ku̱a̱ʼa̱nra chí xi̱ní iin xi̱kí.

4 Tasaá ni̱ka̱ʼa̱n Ndióxi̱ xíʼin ta̱ Balaam, ta ta̱ Balaam ni̱ka̱ʼa̱nra ña̱yóʼo xíʼinra: “Iin yiku̱n ka̱tai̱ u̱xa̱ altar, ta ni̱so̱kói̱ iin si̱ndi̱ki̱ xíʼin iin ndikachi che̱e nu̱ú iin tá iin ña̱yóʼo”. 5 Jehová ni̱ka̱ʼa̱nra xíʼin ta̱ Balaam ndáaña ka̱ʼa̱nra, ta ka̱chira: “Ndikó nu̱ú ta̱ Balac, ta ña̱yóʼo kúú ña̱ xíniñúʼu ka̱ʼún”. 6 Tasaá ndi̱kóra ta xi̱nira ña̱ níndichi ta̱ Balac xíʼin ndiʼi na̱ ta̱a na̱ ndáyáʼvi na̱ ñuu Moab, yatin nu̱ú ni̱xi̱xi̱ kití* tí ni̱so̱kóna. 7 Tasaá ta̱ Balaam ni̱ka̱ʼa̱nra tu̱ʼun yóʼo:

ta̱vára yi̱ʼi̱ va̱xii̱ ta ni̱ka̱ʼa̱nra ña̱yóʼo xíʼi̱n:

‘Naʼa ta sakúisochiʼñaún* ta̱ Jacob xa̱ʼíi̱.

Naʼa ta sakúisochiʼñaún na̱ ñuu Israel’.

 8 Yi̱ʼi̱ va̱ása kivi sakúisochiʼñai̱ na̱ va̱ása nísakúisochiʼña Ndióxi̱.

Va̱ása kivi sakúisochiʼñai̱ na̱ va̱ása nísakúisochiʼña Jehová.

ta nda̱a̱ táki̱ʼva kuvi na̱kán saá ná kuvii̱”.

11 Tasaá ni̱ka̱ʼa̱n ta̱ Balac xíʼin ta̱ Balaam: “¿Nda̱chun ke̱ʼún ña̱yóʼo xíʼi̱n? Ka̱nai̱ yóʼó ña̱ va̱ʼa sakúisochiʼñaún na̱ sáa̱-inii̱ xínii̱, soo nu̱úka ña̱ keʼún ña̱yóʼo, bendiciónva ta̱xiún ndaʼa̱na”. 12 Tasaá nda̱kuiinra: “Xa̱a̱ ni̱ka̱ʼi̱n xíʼún ña̱ ka̱ʼa̱n kuitíi̱ ña̱ ka̱ʼa̱n Jehová xíʼi̱n”.

13 Ta̱ Balac ni̱ka̱ʼa̱nra xíʼinra: “Ixaún ña̱ ma̱ní, ná ku̱ʼu̱nyó inka táʼví nu̱ú kivi kuniúnna. Su̱ví ndiʼivína kuniún chi loʼo kuitívana kuniún, ta kán kundichiún sakúisochiʼñaúnna xa̱ʼíi̱”. 14 Ña̱kán ni̱xa̱ʼa̱nra xíʼinra chí yuku̱ ña̱ Zofim, ña̱ kíndo̱o chí si̱kí ña̱ Pisgá, tasaá ke̱ʼéra u̱xa̱ altar ta ni̱so̱kóra iin si̱ndi̱ki̱ xíʼin iin ndikachi che̱e nu̱ú iin tá iin ña̱yóʼo. 15 Ta ta̱ Balaam ni̱ka̱ʼa̱nra xíʼin ta̱ Balac: “Yóʼo kindo̱ún xíʼin kití tí ni̱so̱kóún tí ni̱xi̱xi̱, ta ná ku̱ʼi̱n chí káa ña̱ ka̱ʼi̱n xíʼin Ndióxi̱”. 16 Jehová ni̱ka̱ʼa̱nra xíʼin ta̱ Balaam ndáaña ka̱ʼa̱nra, ta ka̱chira: “Ndikó nu̱ú íyo ta̱ Balac ta ña̱yóʼo ka̱ʼún xíʼinra”. 17 Tasaá ndi̱kóra nu̱ú ta̱ Balac ta xi̱nira ña̱ níndichira ndátura nu̱ú ni̱so̱kóra kití tí ni̱xi̱xi̱,* ta saátu ndíta na̱ ta̱a na̱ ndáyáʼvi na̱ ñuu Moab xíʼinra. Ta ta̱ Balac ni̱nda̱ka̱tu̱ʼunrara: “¿Ndáaña ni̱ka̱ʼa̱n Jehová xíʼún?”. 18 Tasaá ni̱ka̱ʼa̱nra ña̱yóʼo xíʼinra:

“Ndakundichi Balac ta kuniso̱ʼo ña̱ ka̱ʼi̱n xíʼún.

Kuniso̱ʼo ña̱ ka̱ʼi̱n xíʼún, yóʼó se̱ʼe ta̱ Zipor.

Tá káʼa̱nra keʼéra iin ña̱ʼa, kéʼévaraña.

Ta tá kíndo̱ora keʼéra iin ña̱ʼa, sáxi̱nuvaraña.

22 Ndióxi̱ ta̱várana ti̱xin ñuu Egipto.

Xíʼin ndee̱ra chíndeétáʼanra xíʼinna,

ta ña̱yóʼo íyoña nda̱a̱ táki̱ʼva íyo ndiki̱ si̱ndi̱ki̱ yukú.

ta nda̱a̱ ni iin na̱ tási va̱ása kivi keʼéna iin ña̱ va̱ása va̱ʼa xíʼin na̱ ñuu Israel.

Ta vitin kivi ka̱ʼa̱nna ña̱yóʼo xa̱ʼa̱ ta̱ Jacob ta saátu xa̱ʼa̱ na̱ ñuu Israel:

‘Kotondó ña̱ ke̱ʼé Ndióxi̱ xa̱ʼa̱na’.

ta nda̱a̱ táki̱ʼva xíʼirí ni̱i̱ kití tí xa̱ʼnírí saá keʼé na̱yóʼo”.

25 Tasaá ni̱ka̱ʼa̱n ta̱ Balac xíʼin ta̱ Balaam: “Tá va̱ása kívi sakúisochiʼñaúnna, va̱ása taxiún bendición ndaʼa̱na”. 26 Tasaá nda̱kuiin ta̱ Balaam yuʼú ta̱ Balac: “¿Á su̱ví xa̱a̱ ni̱ka̱ʼa̱nvai̱ xíʼún ña̱ ndiʼi ña̱ ni̱ka̱ʼa̱n Jehová xíʼi̱n kúú ña̱ ka̱ʼi̱n?”.

27 Tasaá ni̱ka̱ʼa̱n ta̱ Balac xíʼin ta̱ Balaam: “Ixaún ña̱ ma̱ní, ná ku̱ʼu̱nyó xíʼi̱n inkaka lugar. Sana kandíxava Ndióxi̱ ta̱ nda̱a̱ ña̱ sakúisochiʼñaúnna xa̱ʼíi̱”. 28 Tasaá ni̱xa̱ʼa̱n ta̱ Balac xíʼin ta̱ Balaam nda̱a̱ chí xi̱ní yuku̱ ña̱ Peor ña̱ xítondaa chí Jesimón.* 29 Tasaá ni̱ka̱ʼa̱n ta̱ Balaam xíʼin ta̱ Balac: “Keʼé u̱xa̱ altar yóʼo ta kaʼníún u̱xa̱ si̱ndi̱ki̱ xíʼin u̱xa̱ ndikachi che̱e tí kuniñúʼi̱”. 30 Tasaá ke̱ʼé ta̱ Balac nda̱a̱ táki̱ʼva ni̱ka̱ʼa̱n ta̱ Balaam xíʼinra, ta ni̱so̱kóra iin si̱ndi̱ki̱ xíʼin iin ndikachi che̱e nu̱ú iin tá iin altar.

24 Tá xi̱ni ta̱ Balaam ña̱ nina bendición xi̱taxi Jehová ndaʼa̱ na̱ ñuu Israel, va̱ása níxa̱ʼa̱nkara nu̱ú na̱ tási ña̱ va̱ʼa kunda̱a̱-inira á ña̱ va̱ása va̱ʼa kúú ña̱ kundoʼo na̱ ñuu Israel, ta va̱ʼaka nda̱kotora chí nu̱ú ñuʼú yi̱chí. 2 Nda̱niʼira nu̱úra ta xi̱nira ña̱ xa̱a̱ tribu ta tribu ndóo na̱ ñuu Israel. Tasaá nda̱kiʼinra espíritu santo Ndióxi̱. 3 Tándi̱ʼi, ni̱ka̱ʼa̱nra tu̱ʼun yóʼo:

Kaxíndaara lekena ta sandíʼi-xa̱ʼa̱rana xíʼin kuxu̱nra.*

10 Tasaá ta̱ Balac ni̱sa̱a̱níra xíʼin ta̱ Balaam. Ta ta̱ Balac ka̱ni ndaʼa̱ra chi ndeéní ni̱sa̱a̱ra ta ni̱ka̱ʼa̱nra ña̱yóʼo xíʼin ta̱ Balaam: “Ka̱nai̱ yóʼó ña̱ va̱ʼa sakúisochiʼñaún na̱ sáa̱-inii̱ xínii̱, soo nu̱úka ña̱ keʼún ña̱yóʼo, nda̱a̱ u̱ni̱ yichi̱ ta̱xiún bendición ndaʼa̱na. 11 Ndi̱ku̱n ndikóún veʼún. Xi̱kuni̱kavíi̱ taxii̱ ku̱a̱ʼá ña̱ʼa ndaʼún, soo va̱ása nítaxi Jehová ndakiʼúnña”.

12 Ta nda̱kuiin ta̱ Balaam yuʼú ta̱ Balac: “¿Á va̱ása níka̱ʼa̱nvai̱ xíʼin na̱ ta̱a na̱ chi̱ndaʼún ni̱xa̱a̱ nu̱úi̱ 13 ‘Ni ná taxi ta̱ Balac veʼera ndaʼíi̱ ta ná kutú plata xíʼin oro iniña, va̱ása kivi keʼíi̱ nda̱a̱ ni iin ña̱ʼa chi iinlá ña̱ káʼa̱n Jehová kúú ña̱ kivi keʼíi̱’? ¿Á va̱ása níka̱ʼi̱n xíʼinna, ‘Iinlá ña̱ ná ka̱ʼa̱n Jehová xíʼi̱n kúú ña̱ kivi ka̱ʼi̱n’? 14 Ndikóvai̱ ñui̱, soo naʼa ta ná ka̱ʼi̱n xíʼún ndáaña keʼé na̱ ñuu yóʼo xíʼin na̱ ñuún chí nu̱únínu”. 15 Tasaá ni̱ka̱ʼa̱nra ña̱yóʼo:

20 Tá xi̱ni ta̱ Balaam ta̱ Amalec, ni̱ka̱ʼa̱nkara ña̱yóʼo:

21 Tá xi̱nira na̱ quenita, ni̱ka̱ʼa̱nkara ña̱yóʼo:

“Kútu̱níva veʼún ta sa̱tá yu̱u̱ kánuuña.

22 Soo iin na̱ yiví kaʼmina na̱ Cayín.

¿Nda̱saaka kúma̱ní ña̱ kixi na̱ ñuu Asiria ndakiʼinna ndóʼó ku̱ʼu̱n xíʼinna?”.

23 Ta ni̱ka̱ʼa̱nkara ña̱yóʼo:

“¿Ndáana ka̱kuví tá ná keʼé Ndióxi̱ ña̱yóʼo?

Soo na̱ ndiʼi-xa̱ʼa̱ va̱ʼa kúútu miívana”.*

25 Tasaá nda̱kiʼin ta̱ Balaam ku̱a̱ʼa̱nra chí nu̱ú ni̱xi̱yora. Ta nda̱kiʼintu ta̱ Balac ku̱a̱ʼa̱nra, soo xa̱a̱ síín nu̱ú ku̱a̱ʼa̱nra.

25 Tá ndóoka na̱ ñuu Israel chí Sitim, sava na̱ ta̱a ki̱xáʼana kíʼvina ku̱a̱chi kini, chi ni̱ki̱si̱na xíʼin ná ñaʼá ná ñuu Moab. 2 Ta ná ñaʼá yóʼo xi̱kananá na̱ ñuu Israel tá xi̱sokóna ña̱ʼa nu̱ú ndióxi̱ná, ta na̱yóʼo xi̱xixina ña̱ xi̱sokóna ta xi̱kuxítína nu̱ú ndióxi̱ náyóʼo. 3 Tasaá ki̱xáʼa na̱ ñuu Israel ndásakáʼnuna ndióxi̱ ña̱ Baal ña̱ xi̱ndasakáʼnu na̱ yiví chí Peor, ta ni̱sa̱a̱ní Jehová xíʼinna. 4 Ta ni̱ka̱ʼa̱n Jehová xíʼin ta̱ Moisés: “Kiʼin na̱ níʼi yichi̱ nu̱ú na̱ ke̱ʼé ña̱yóʼo ta tá káʼñuka katikaúnna nu̱ú yi̱ʼi̱ Jehová, tasaá va̱ása sa̱a̱ka yi̱ʼi̱ Jehová xíʼin na̱ ñuu Israel”. 5 Tasaá ni̱ka̱ʼa̱n ta̱ Moisés xíʼin na̱ xi̱ndatiin ku̱a̱chi ñuu Israel: “Iin tá iinndó kaʼníndó na̱ ta̱a na̱ kíʼinndó kuenta xíʼin, na̱ nda̱sakáʼnu ndióxi̱ ña̱ Baal ña̱ ndásakáʼnu na̱ yiví chí Peor”.

6 Ta tá ndóoka na̱ ñuu Israel xákuna chí yéʼé tabernáculo, ki̱xaa̱ iin ta̱ israelita xíʼin iin ñá madianita nu̱ú ndóo na̱ ñuu Israel ta ku̱a̱ʼa̱nra xíʼinñá nu̱ú ndóo na̱ táʼanra, ta xi̱ni ta̱ Moisés xíʼin ndiʼi na̱ ñuu ña̱yóʼo. 7 Tá xi̱ni ta̱ Finehás ta̱ ta̱a yóʼo ndi̱ku̱n nda̱kundichira ta ki̱ʼinra iin lanza. Ta̱ Fihehás xi̱kuura se̱ʼe ta̱ Eleazar, ta̱ xi̱kuu se̱ʼe ta̱ su̱tu̱ Aarón. 8 Tasaá ni̱ki̱ʼvira ini veʼe loʼo nu̱ú ni̱ki̱ʼvi ta̱ israelita xíʼin ñá ñaʼá kán ta ka̱anra ti̱xinna* xíʼin tú lanza, tasaá va̱ása níxi̱ʼi̱ka na̱ israelita xíʼin kue̱ʼe̱. 9 Na̱ ni̱xi̱ʼi̱ xíʼin kue̱ʼe̱ xi̱kuuna 24,000.

10 Tasaá ni̱ka̱ʼa̱n Jehová xíʼin ta̱ Moisés: 11 “Xa̱ʼa̱ ña̱ ke̱ʼé ta̱ Finehás se̱ʼe ta̱ Eleazar se̱ʼe ta̱ su̱tu̱ Aarón, va̱ása sáa̱kai̱ xíʼin na̱ ñuu Israel chi va̱ása nítaxira ña̱ ndasakáʼnuna inka ndióxi̱ nu̱úi̱. Xa̱ʼa̱ ña̱kán kǒo nísandíʼi-xa̱ʼíi̱ ndiʼi na̱ ñuu Israel chi kúni̱i̱ ná ndasakáʼnuna iinlá miíi̱. 12 Ña̱kán ka̱ʼa̱n xíʼinra ña̱ keʼíi̱ iin trato xíʼinra ña̱ kutáʼan viíi̱ xíʼinra. 13 Ña̱yóʼo kúú iin trato ña̱ kéʼíi̱ xíʼin miíra ta saátu xíʼin na̱ se̱ʼera na̱ kaku chí nu̱únínu ña̱ va̱ʼa koona su̱tu̱ ndiʼi tiempo, saáchi kǒo nítaxira ña̱ ndasakáʼnuna inka ndióxi̱ nu̱úi̱ ta ni̱ka̱ʼa̱n-ndáʼvira xíʼi̱n ña̱ va̱ʼa ixakáʼnu-inii̱ xa̱ʼa̱ na̱ ñuu Israel”.

14 Ta̱ israelita ta̱ xa̱ʼnína xíʼin ñá madianita xi̱naníra Zimrí ta yivára xi̱naníra Salu, ta̱ xi̱niʼi yichi̱ nu̱ú na̱ tribu ta̱ Simeón. 15 Ta ñá madianita ñá xa̱ʼnína, xi̱naníñá Cozbí ta xi̱kuuñá se̱ʼe ta̱ Zur ta̱ xi̱niʼi yichi̱ nu̱ú iin tribu ña̱ ni̱xi̱yo chí Madián.

16 Tándi̱ʼi, Jehová ni̱ka̱ʼa̱nra ña̱yóʼo xíʼin ta̱ Moisés: 17 “Kúáʼanndó kanitáʼanndó xíʼin na̱ ñuu Madián ta kaʼníndó ndiʼina, 18 saáchi sa̱ndáʼvina ndóʼó ña̱ ndasakáʼnundó ndióxi̱ ña̱ xi̱ndasakáʼnuna chí Peor, ta saátu sa̱kíʼvina ku̱a̱chi ndóʼó xa̱ʼa̱ ña̱ ke̱ʼé ñá Cozbí se̱ʼe iin ta̱ xi̱niʼi yichi̱ nu̱ú iin tribu chí Madián, ñá ni̱xi̱ʼi̱ tá ni̱xi̱ʼi̱ ku̱a̱ʼánína xíʼin kue̱ʼe̱ xa̱ʼa̱ ña̱ ku̱u chí Peor”.

26 Tá ni̱ya̱ʼa kue̱ʼe̱ yóʼo, Jehová ni̱ka̱ʼa̱nra xíʼin ta̱ Moisés ta saátu xíʼin ta̱ Eleazar se̱ʼe ta̱ su̱tu̱ Aarón: 2 “Ti̱xin na̱ ñuu Israel, ndakaʼvindó ndiʼi na̱ kúúmií 20 ku̱i̱ya̱ á ku̱a̱ʼáka ta kaʼyindó ki̱vi̱na nda̱a̱ táki̱ʼva ni̱xi̱yo ki̱vi̱ na̱ táʼanna na̱ xi̱ndoo xi̱naʼá. Ndakaʼvindó ndiʼi na̱ kivi ku̱ʼu̱n nu̱ú ku̱a̱chi xa̱ʼa̱ na̱ ñuu Israel”. 3 Tasaá, ta̱ Moisés xíʼin ta̱ su̱tu̱ Eleazar ni̱ka̱ʼa̱nna xíʼin na̱ ñuu tá ndóona chí nu̱ú ñuʼú yi̱chí ña̱ Moab, ña̱ ndíkaa̱ yatin yu̱ta Jordán, chí nu̱ú xítondaa Jericó. Ka̱china: 4 “Ndakaʼvindó ndiʼi na̱ kúúmií 20 ku̱i̱ya̱ á ku̱a̱ʼáka, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés”.

Ta na̱yóʼo xi̱kuu na̱ ñuu Israel na̱ ke̱e chí Egipto. 5 Ta̱ Rubén kúú ta̱ xi̱kuu se̱ʼenu̱ú ta̱ Israel; ta na̱yóʼo xi̱kuu na̱ se̱ʼera: ta̱ Hanok, ta na̱ veʼera xi̱kuu na̱ hanokita; ta̱ Palú, ta na̱ veʼera xi̱kuu na̱ paluita; 6 ta̱ Hezrón, ta na̱ veʼera xi̱kuu na̱ hezronita, xíʼin ta̱ Carmí ta na̱ veʼera xi̱kuu na̱ carmita. 7 Na̱yóʼo xi̱kuu na̱ veʼe ta̱ Rubén ta na̱ nda̱kaʼyi̱ ki̱vi̱, xi̱kuuna 43,730.

8 Se̱ʼe ta̱ Palú xi̱kuu ta̱ Eliab. 9 Ta na̱ se̱ʼe ta̱ Eliab xi̱kuu ta̱ Nemuel, ta̱ Datán xíʼin ta̱ Abiram. Ta̱ Datán xíʼin ta̱ Abiram kúú na̱ xi̱niʼi yichi̱ nu̱ú na̱ ñuu ta ni̱xa̱ʼa̱nna contra ta̱ Moisés xíʼin ta̱ Aarón, ta nda̱kutáʼanna xíʼin ta̱ Coré ta saátu na̱ xi̱kitáʼan xíʼinra tá ni̱xa̱ʼa̱nna contra Jehová.

10 Tasaá ni̱xu̱na̱ ñuʼú ta ko̱kóña na̱yóʼo. Ta ta̱ Coré xíʼin na̱ xi̱kitáʼan xíʼinra, ni̱xi̱ʼi̱na tá nu̱u iin ñuʼu̱ ta xa̱ʼmiña 250 na̱ ta̱a. Xíʼin ña̱ ndo̱ʼo na̱yóʼo ku̱ndaa̱-ini na̱ ñuu ña̱ va̱ása xíniñúʼu keʼéna nda̱a̱ táki̱ʼva ke̱ʼé na̱yóʼo. 11 Soo va̱ása níxi̱ʼi̱ na̱ se̱ʼe ta̱ Coré.

12 Na̱yóʼo xi̱kuu na̱ se̱ʼe ta̱ Simeón xíʼin na̱ veʼena: ta̱ Nemuel, ta na̱ veʼera xi̱kuu na̱ nemuelita; ta̱ Jamín, ta na̱ veʼera xi̱kuu na̱ jaminita; ta̱ Jakín, ta na̱ veʼera xi̱kuu na̱ jakinita; 13 ta̱ Zérah, ta na̱ veʼera xi̱kuu na̱ zerahíta xíʼin ta̱ Shaúl ta na̱ veʼera xi̱kuu na̱ shaulita. 14 Na̱yóʼo xi̱kuu na̱ veʼe ta̱ Simeón. Ta 22,200 xi̱kuuna.

15 Na̱yóʼo xi̱kuu na̱ se̱ʼe ta̱ Gad xíʼin na̱ veʼena: ta̱ Zefón, ta na̱ veʼera xi̱kuu na̱ zefonita; ta̱ Haguí, ta na̱ veʼera xi̱kuu na̱ haguita; ta̱ Suní, ta na̱ veʼera xi̱kuu na̱ sunita; 16 ta̱ Ozní, ta na̱ veʼera xi̱kuu na̱ oznita; ta̱ Erí, ta na̱ veʼera xi̱kuu na̱ erita; 17 ta̱ Arod, ta na̱ veʼera xi̱kuu na̱ arodita xíʼin ta̱ Arelí, ta na̱ veʼera xi̱kuu na̱ arelita. 18 Na̱yóʼo xi̱kuu na̱ veʼe na̱ se̱ʼe ta̱ Gad ta ndiʼi na̱ nda̱kaʼyi̱ ki̱vi̱, xi̱kuuna 40,500.

19 Na̱ se̱ʼe ta̱ Judá xi̱kuu ta̱ Er xíʼin ta̱ Onán. Soo na̱yóʼo ni̱xi̱ʼi̱na chí Canaán. 20 Na̱yóʼo xi̱kuu na̱ se̱ʼe ta̱ Judá xíʼin na̱ veʼena: ta̱ Selá, ta na̱ veʼera xi̱kuu na̱ selanita; ta̱ Pérez, ta na̱ veʼera xi̱kuu na̱ perezita xíʼin ta̱ Zérah ta na̱ veʼera xi̱kuu na̱ zerahíta. 21 Na̱yóʼo xi̱kuu na̱ se̱ʼe ta̱ Pérez: ta̱ Hezrón, ta na̱ veʼera xi̱kuu na̱ hezronita xíʼin ta̱ Hamul ta na̱ veʼera xi̱kuu na̱ hamulita. 22 Na̱yóʼo xi̱kuu na̱ veʼe ta̱ Judá ta ndiʼi na̱ nda̱kaʼyi̱ ki̱vi̱, xi̱kuuna 76,500.

23 Na̱yóʼo xi̱kuu na̱ se̱ʼe ta̱ Isacar xíʼin na̱ veʼena: ta̱ Tolá, ta na̱ veʼera xi̱kuu na̱ tolaíta; ta̱ Puvá, ta na̱ veʼera xi̱kuu na̱ punita; 24 ta̱ Jasub, ta na̱ veʼera xi̱kuu na̱ jasubita xíʼin ta̱ Simrón ta na̱ veʼera xi̱kuu na̱ simronita. 25 Na̱yóʼo xi̱kuu na̱ veʼe ta̱ Isacar ta ndiʼi na̱ nda̱kaʼyi̱ ki̱vi̱, xi̱kuuna 64,300.

26 Na̱yóʼo xi̱kuu na̱ se̱ʼe ta̱ Zabulón xíʼin na̱ veʼena: ta̱ Séred, ta na̱ veʼera xi̱kuu na̱ seredita; ta̱ Elón, ta na̱ veʼera xi̱kuu na̱ elonita xíʼin ta̱ Jahleel ta na̱ veʼera xi̱kuu na̱ jahleelita. 27 Na̱yóʼo xi̱kuu na̱ veʼe ta̱ Zabulón, ta ndiʼi na̱ nda̱kaʼyi̱ ki̱vi̱, xi̱kuuna 60,500.

28 Na̱ se̱ʼe ta̱ José xi̱kuu ta̱ Manasés xíʼin ta̱ Efraín ta na̱yóʼo xi̱kuu na̱ veʼena. 29 Na̱yóʼo xi̱kuu na̱ se̱ʼe ta̱ Manasés: ta̱ Makir, ta na̱ veʼera xi̱kuu na̱ makirita; ta̱ Makir xi̱kuu yivá ta̱ Galaad; ta na̱ veʼe ta̱ Galaad xi̱kuu na̱ galaadita. 30 Na̱yóʼo xi̱kuu na̱ se̱ʼe ta̱ Galaad: ta̱ Yézer, ta na̱ veʼera xi̱kuu na̱ yezerita; ta̱ Hélec, ta na̱ veʼera xi̱kuu na̱ helequita; 31 ta̱ Asriel, ta na̱ veʼera xi̱kuu na̱ asrielita; ta̱ Siquem, ta na̱ veʼera xi̱kuu na̱ siquemita; 32 ta̱ Semidá, ta na̱ veʼera xi̱kuu na̱ semidaíta xíʼin ta̱ Héfer ta na̱ veʼera xi̱kuu na̱ heferita. 33 Ta̱ Zelofehad se̱ʼe ta̱ Héfer kǒo se̱ʼeta̱ara níxi̱yo chi se̱ʼe-síʼi kuitíra ni̱xi̱yo, ta ña̱yóʼo kúú ki̱vi̱ná: Mahlá, Noá, Hoglá, Milcá xíʼin Tirzá. 34 Na̱yóʼo xi̱kuu na̱ veʼe ta̱ Manasés ta ndiʼi na̱ nda̱kaʼyi̱ ki̱vi̱, xi̱kuuna 52,700.

35 Na̱yóʼo xi̱kuu na̱ se̱ʼe ta̱ Efraín xíʼin na̱ veʼena: ta̱ Sutélah, ta na̱ veʼera xi̱kuu na̱ sutelahíta; ta̱ Béker, ta na̱ veʼera xi̱kuu na̱ bekerita xíʼin ta̱ Tahán, ta na̱ veʼera xi̱kuu na̱ tahanita. 36 Na̱yóʼo xi̱kuu na̱ se̱ʼe ta̱ Sutélah: ta̱ Erán, ta na̱ veʼera xi̱kuu na̱ eranita. 37 Na̱yóʼo xi̱kuu na̱ veʼe na̱ se̱ʼe ta̱ Efraín, ta ndiʼi na̱ nda̱kaʼyi̱ ki̱vi̱, xi̱kuuna 32,500. Na̱yóʼo xi̱kuu na̱ se̱ʼe ta̱ José xíʼin na̱ veʼena.

38 Na̱yóʼo xi̱kuu na̱ se̱ʼe ta̱ Benjamín xíʼin na̱ veʼena: ta̱ Bela, ta na̱ veʼera xi̱kuu na̱ belaíta; ta̱ Asbel, ta na̱ veʼera xi̱kuu na̱ asbelita; ta̱ Ahiram, ta na̱ veʼera xi̱kuu na̱ ahiramita; 39 ta̱ Sefufam, ta na̱ veʼera xi̱kuu na̱ sufamita xíʼin ta̱ Hufam ta na̱ veʼera xi̱kuu na̱ hufamita. 40 Na̱ se̱ʼe ta̱ Bela xi̱kuu ta̱ Ard xíʼin ta̱ Naamán: na̱ veʼe ta̱ Ard xi̱kuu na̱ ardita, ta na̱ veʼe ta̱ Naamán xi̱kuu na̱ naamita. 41 Na̱yóʼo xi̱kuu na̱ se̱ʼe ta̱ Benjamín xíʼin na̱ veʼena, ta ndiʼi na̱ nda̱kaʼyi̱ ki̱vi̱, xi̱kuuna 45,600.

42 Na̱yóʼo xi̱kuu na̱ se̱ʼe ta̱ Dan xíʼin na̱ veʼena: ta̱ Suham, ta na̱ veʼera xi̱kuu na̱ suhamita. Na̱yóʼo xi̱kuu na̱ veʼe ta̱ Dan xíʼin na̱ veʼena. 43 Ndiʼi na̱ suhamita na̱ nda̱kaʼyi̱ ki̱vi̱, xi̱kuuna 64,400.

44 Na̱yóʼo xi̱kuu na̱ se̱ʼe ta̱ Aser xíʼin na̱ veʼena: ta̱ Imná,* ta na̱ veʼera xi̱kuu na̱ imnita; ta̱ Isví, ta na̱ veʼera xi̱kuu na̱ isvita xíʼin ta̱ Berías ta na̱ veʼera xi̱kuu na̱ berita; 45 ta na̱ se̱ʼe ta̱ Berías xi̱kuu ta̱ Héber xíʼin ta̱ Malkiel: na̱ veʼe ta̱ Héber xi̱kuu na̱ heberita, ta na̱ veʼe ta̱ Malkiel xi̱kuu na̱ malkielita. 46 Ñá se̱ʼe-síʼi ta̱ Aser xi̱naníñá Sérah. 47 Na̱yóʼo xi̱kuu na̱ veʼe na̱ se̱ʼe ta̱ Aser ta ndiʼi na̱ nda̱kaʼyi̱ ki̱vi̱, xi̱kuuna 53,400.

48 Na̱yóʼo xi̱kuu na̱ se̱ʼe ta̱ Neftalí xíʼin na̱ veʼena: ta̱ Jahzeel, ta na̱ veʼera xi̱kuu na̱ jahzeelita; ta̱ Guní, ta na̱ veʼera xi̱kuu na̱ gunita; 49 ta̱ Jézer, ta na̱ veʼera xi̱kuu na̱ jezerita xíʼin ta̱ Silem, ta na̱ veʼera xi̱kuu na̱ silemita. 50 Na̱yóʼo xi̱kuu na̱ veʼe ta̱ Neftalí xíʼin na̱ veʼena, ta ndiʼi na̱ nda̱kaʼyi̱ ki̱vi̱, xi̱kuuna 45,400.

51 Ndiʼi na̱ israelita na̱ nda̱kaʼyi̱ ki̱vi̱, xi̱kuuna 601,730.

52 Tándi̱ʼi, Jehová ni̱ka̱ʼa̱nra ña̱yóʼo xíʼin ta̱ Moisés: 53 “Nda̱a̱ táki̱ʼva ni̱ka̱ʼyi̱ ki̱vi̱na,* saá xíniñúʼu ndata̱ʼví ñuʼú ña̱ ndakiʼinna. 54 Tá ku̱a̱ʼá kúúna, ku̱a̱ʼáka ñuʼú xíniñúʼu ndakiʼinna, ta tá loʼo kúúna, loʼoka ñuʼú xíniñúʼu ndakiʼinna. Nda̱saa kúú mií na̱ nda̱kaʼyi̱ ki̱vi̱ ti̱xin iin tá iin tribu, saá xíniñúʼu koo ñuʼú ña̱ ndakiʼinna. 55 Soo xíniñúʼu chikaa̱ndó suerte ña̱ va̱ʼa ndataʼvíndó ña̱yóʼo. Xíniñúʼu ndakiʼinna ñuʼúna nda̱a̱ táki̱ʼva va̱xi ki̱vi̱ tribu na̱ yivána. 56 Nda̱a̱ táki̱ʼva ka̱na suerte saá xíniñúʼu koo ñuʼú ña̱ ndakiʼin iin tá iin tribu ni ku̱a̱ʼá kúúna á loʼo kúúna”.

57 Na̱yóʼo xi̱kuu na̱ levita na̱ nda̱kaʼyi̱ ki̱vi̱ xíʼin na̱ veʼena: ta̱ Guersón, ta na̱ veʼera xi̱kuu na̱ guersonita; ta̱ Cohat, ta na̱ veʼera xi̱kuu na̱ cohatita xíʼin ta̱ Merarí ta na̱ veʼera xi̱kuu na̱ merarita. 58 Na̱yóʼo xi̱kuu na̱ veʼe na̱ levita: na̱ libnita, na̱ hebronita, na̱ mahlita, na̱ musita xíʼin na̱ coreíta.

Ta ta̱ Cohat xi̱kuu yivá ta̱ Amram. 59 Ñá síʼi ta̱ Amram xi̱naníñá Jokébed, ñáyóʼo kúú se̱ʼe ta̱ Leví ñá ka̱ku chí Egipto. Ta se̱ʼe ñáyóʼo xíʼin ta̱ Amram xi̱kuu ta̱ Aarón, ta̱ Moisés xíʼin ñá Míriam. 60 Ta na̱ se̱ʼe ta̱ Aarón xi̱kuu ta̱ Nadab, ta̱ Abihú, ta̱ Eleazar xíʼin ta̱ Itamar. 61 Soo ta̱ Nadab xíʼin ta̱ Abihú ni̱xi̱ʼi̱na saáchi xa̱ʼmina ña̱ʼa nu̱ú Jehová, soo va̱ása vií níkeʼénaña.

62 Ndiʼi na̱ ta̱a na̱ nda̱kaʼyi̱ ki̱vi̱, na̱ xi̱kuumií iin yo̱o̱ á ku̱a̱ʼáka ku̱i̱ya̱, xi̱kuuna 23,000. Na̱yóʼo, va̱ása níndakaʼyi̱ ki̱vi̱na xíʼin na̱ inka israelita, saáchi va̱ása níxiniñúʼu ndakiʼinna herencia ña̱ nda̱kiʼin na̱kán.

63 Ña̱yóʼo kúú ki̱vi̱ na̱ israelita ña̱ nda̱kaʼyi ta̱ Moisés xíʼin ta̱ su̱tu̱ Eleazar nu̱ú ñuʼú yi̱chí ña̱ Moab, yatin yu̱ta Jordán, nu̱ú xítondaa Jericó. 64 Soo xíʼin ki̱vi̱ na̱yóʼo, va̱ása níndakaʼyi̱ ki̱vi̱ na̱ israelita ña̱ ka̱ʼyi ta̱ Moisés xíʼin ta̱ Aarón nu̱ú ñuʼú yi̱chí ña̱ Sinaí. 65 Saáchi, Jehová ni̱ka̱ʼa̱nra ña̱yóʼo xa̱ʼa̱na: “Kuvivana nu̱ú ñuʼú yi̱chí”. Ña̱kán kǒo nda̱a̱ ni iin na̱kán níkindo̱o, chi iinlá ta̱ Caleb se̱ʼe ta̱ Jefuné xíʼin ta̱ Josué se̱ʼe ta̱ Nun kúú na̱ ki̱ndoo.

27 Tasaá ku̱yatin ná se̱ʼe ta̱ Zelofehad, se̱ʼe ta̱ Héfer, se̱ʼe ta̱ Galaad, se̱ʼe ta̱ Makir, se̱ʼe ta̱ Manasés, ta ti̱xin na̱ veʼe ta̱ Manasés se̱ʼe ta̱ José ke̱e ná ñaʼá yóʼo. Ta ña̱yóʼo xi̱kuu ki̱vi̱ná: Mahlá, Noá, Hoglá, Milcá xíʼin Tirzá. 2 Náyóʼo ni̱xa̱ʼa̱nná nu̱ú ta̱ Moisés, nu̱ú ta̱ su̱tu̱ Eleazar, nu̱ú na̱ xi̱niʼi yichi̱ nu̱ú na̱ ñuu ta saátu nu̱ú ndiʼi na̱ ñuu chí yéʼé tabernáculo, ta ka̱chiná: 3 “Chí nu̱ú ñuʼú yi̱chí ni̱xi̱ʼi̱ yivándi̱, soo va̱ása níndakutáʼanra xíʼin na̱ nda̱kutáʼan xíʼin ta̱ Coré na̱ ni̱xa̱ʼa̱n contra Jehová, xa̱ʼa̱ ku̱a̱chi miívara ni̱xi̱ʼi̱ra ta kǒo se̱ʼeta̱ara níxi̱yo. 4 ¿Á xa̱ʼa̱ ña̱ kǒo se̱ʼeta̱a yivándi̱ níxi̱yo, ndiʼi-xa̱ʼa̱ ki̱vi̱ra? Taxi loʼo ná ndakiʼinndi̱ ñuʼú xíʼin na̱ táʼan yivándi̱”. 5 Tasaá ni̱ka̱ʼa̱n ta̱ Moisés xíʼin Jehová xa̱ʼa̱ ña̱ ndu̱kú náyóʼo.

6 Ta ña̱yóʼo ni̱ka̱ʼa̱n Jehová xíʼin ta̱ Moisés: 7 “Ña̱ va̱ʼava kúú ña̱ káʼa̱n ná se̱ʼe ta̱ Zelofehad. Xíniñúʼu taxiún iin ñuʼú ndaʼa̱ná xíʼin na̱ táʼan yiváná, ta ndaʼa̱ náyóʼo sandáya̱ʼún herencia yiváná. 8 Ña̱yóʼo ka̱ʼún xíʼin na̱ israelita: ‘Tá iin ta̱a ni̱xi̱ʼi̱ra ta kǒo se̱ʼeta̱ara níxi̱yo, xíniñúʼu ndataxindó herenciara ndaʼa̱ se̱ʼe-síʼira. 9 Ta tá kǒotu se̱ʼe-síʼira níxi̱yo, na̱ ñanira xíniñúʼu ndakiʼin herenciara. 10 Ta saátu tá kǒo ñanira, na̱ ñani yivára kúú na̱ ndakiʼin herenciara. 11 Ta tá kǒo na̱ ñani yivára, iin na̱ táʼan yatinra kúú na̱ ndakiʼin herenciara. Ña̱ ni̱ka̱ʼi̱n yóʼo koo iin ley ña̱ kundiku̱n na̱ israelita, nda̱a̱ táki̱ʼva ni̱ka̱ʼa̱n yi̱ʼi̱ Jehová xíʼún’”.

12 Tándi̱ʼi, Jehová ni̱ka̱ʼa̱nra xíʼin ta̱ Moisés: “Kúándaa chí yuku̱ ña̱ Abarim, ta koto ñuʼú ña̱ taxii̱ ndaʼa̱ na̱ israelita. 13 Tá ná kotoún ña̱yóʼo saá kuviún nda̱a̱ táki̱ʼva ku̱u xíʼin ñaniún ta̱ Aarón, ta nduxu̱ún nda̱a̱ táki̱ʼva ni̱ndu̱xu̱n na̱ táʼún na̱ xi̱ndoo xi̱naʼá. 14 Saáchi tá ni̱ka̱ʼa̱nkúáchi* na̱ ñuu xa̱ʼíi̱ chí nu̱ú ñuʼú yi̱chí ña̱ Zin, ndóʼó va̱ása níkeʼéndó ña̱ ni̱ka̱ʼi̱n xíʼinndó chi va̱ása níndasakáʼnundó yi̱ʼi̱ nu̱ú ndiʼi na̱ ñuu xa̱ʼa̱ tá ti̱kui̱í. Táyóʼo xi̱kuu ti̱kui̱í tá xi̱ndikaa̱ chí Meribá, ta ña̱yóʼo xi̱ndikaa̱ña chí Cadés chí nu̱ú ñuʼú yi̱chí ña̱ Zin”.

15 Tasaá, ta̱ Moisés ni̱ka̱ʼa̱nra xíʼin Jehová: 16 “Yóʼó Jehová, Ndióxi̱ ta̱ táxi ña̱ táku ndiʼi na̱ yiví, ndaka̱xin iin ta̱a ta̱ kiʼin kuenta xíʼin na̱ ñuu, 17 ta ta̱yóʼo xíniñúʼu kuniʼira yichi̱ nu̱ú na̱ ñuún Jehová, tasaá va̱ása koona nda̱a̱ táki̱ʼva íyo ndikachi tí kǒo xi̱toʼo”. 18 Ña̱kán, Jehová ni̱ka̱ʼa̱nra ña̱yóʼo xíʼin ta̱ Moisés: “Ndaka̱xin ta̱ Josué se̱ʼe ta̱ Nun, chi ta̱yóʼo kúú ta̱ kivi keʼé chiñu yóʼo, ta chinúu ndaʼún xi̱níra. 19 Tándi̱ʼi, kúáʼan xíʼinra nu̱ú ta̱ su̱tu̱ Eleazar ta saátu nu̱ú ndiʼi na̱ ñuu, ta ná koto ndiʼi na̱kán ña̱ nda̱kaxiúnra ña̱ kuniʼira yichi̱ nu̱úna. 20 Xíniñúʼu taxiún nda̱yí* ndaʼa̱ra ña̱ va̱ʼa ka̱ʼa̱nra xíʼin na̱ ñuu Israel, tasaá kuniso̱ʼona ña̱ ka̱ʼa̱nra xíʼinna. 21 Ta ná ku̱ʼu̱nra nu̱ú ta̱ su̱tu̱ Eleazar, ta ta̱ su̱tu̱ yóʼo kuniñúʼura ña̱ Urim ña̱ va̱ʼa kunda̱a̱-inira ndáaña ka̱ʼa̱n Jehová. Miíra kúú ta̱ kuniʼi yichi̱ nu̱ú ndiʼi na̱ ñuu”.

22 Tasaá, ta̱ Moisés ke̱ʼéra nda̱a̱ táki̱ʼva ni̱ka̱ʼa̱n Jehová xíʼinra. Nda̱kiʼinra ta̱ Josué ta ni̱xa̱ʼa̱nra xíʼinra nu̱ú ta̱ su̱tu̱ Eleazar ta saátu nu̱ú ndiʼi na̱ ñuu, 23 chi̱núura ndaʼa̱ra xi̱níra ta nda̱kaxinrara ña̱ kuniʼira yichi̱ nu̱úna, nda̱a̱ táki̱ʼva ni̱ka̱ʼa̱n Jehová xíʼinra.

28 Tasaá ni̱ka̱ʼa̱n Jehová xíʼin ta̱ Moisés: 2 “Kaʼnda chiñu yóʼo nu̱ú na̱ israelita: ‘Va̱ása nandósondó ña̱ so̱kóndó ña̱ʼa nu̱úi̱,* ta nda̱a̱ táki̱ʼva koo ña̱ taxindó kuxui̱ saá koo ña̱yóʼo. Mií ki̱vi̱ ña̱ xa̱a̱ ni̱ka̱ʼi̱n xíʼinndó xíniñúʼu kaʼmindó ña̱ʼa ña̱ so̱kóndó nu̱úi̱, ta ña̱yóʼo táminí kuxaʼa̱nña nu̱úi̱’.

3 ”Ta ka̱ʼún ña̱yóʼo xíʼinna: ‘Ña̱yóʼo kúú ña̱ kaʼmindó ta so̱kóndó nu̱ú yi̱ʼi̱ Jehová: ndiʼi xi̱ta̱a̱n,* xíniñúʼu kaʼmindó* u̱vi̱ ndikachi* válí tí kǒo kue̱ʼe̱ kúúmií, tí kúúmií iin ku̱i̱ya̱. 4 Iin tí ndikachi loʼo yóʼo so̱kóndó tá xi̱ta̱a̱n, ta inkarí so̱kóndó tá xa̱a̱ ku̱a̱ʼa̱n kúñuú, 5 ta xíʼin tíyóʼo so̱kótundó iin kilo* ña̱ harina ña̱ va̱ʼaní, ña̱ ni̱sa̱ka̱ xíʼin iin litro* aceite tá oliva. 6 Ña̱yóʼo kúú ña̱ kaʼmindó ta so̱kó ni̱ʼindóña nu̱úi̱, nda̱a̱ táki̱ʼva ni̱ka̱ʼi̱n xíʼinndó chí yuku̱ Sinaí. Ña̱yóʼo kúú ña̱ kaʼmindó nu̱ú Jehová ta táminí kuxaʼa̱nña nu̱úra. 7 Ta xíʼin iin tá iin tí ndikachi válí yóʼo, xíniñúʼu so̱kóndó iin litro* tá vino. Sakáandó ndixi yóʼo nu̱ú lugar ña̱ yi̱i̱ ña̱ va̱ʼa so̱kóndórá nu̱ú Jehová. 8 Ta tá xa̱a̱ ku̱a̱ʼa̱n kúñuú, so̱kóndó inka ndikachi loʼo. Ta xíʼin tíyóʼo so̱kóndó harina ta saátu vino nda̱a̱ táki̱ʼva ni̱xi̱yo ña̱ ni̱so̱kóndó tá xi̱ta̱a̱n, ña̱yóʼo kúú ña̱ kaʼmindó ta so̱kóndó nu̱ú Jehová ta táminí kuxaʼa̱nña nu̱úra.

9 ”’Soo ki̱vi̱ sábado so̱kóndó u̱vi̱ ndikachi válí tí kǒo kue̱ʼe̱ kúúmií tí iin ku̱i̱ya̱, ta so̱kóndó ki̱ʼva u̱vi̱ kilo* ña̱ harina ña̱ va̱ʼaní ña̱ nda̱saka̱ xíʼin aceite, ta saátu so̱kóndó vino xíʼin ña̱yóʼo. 10 Ña̱yóʼo kúú ña̱ kaʼmindó ta so̱kóndó ki̱vi̱ sábado, ta saátu xíniñúʼu so̱kóndó ta kaʼmindó ña̱ xa̱a̱ sóko̱ndó ndiʼi ki̱vi̱, ta so̱kótundó vino xíʼin ña̱yóʼo.

11 ”’Tá kíxáʼa iin tá iin yo̱o̱, xíniñúʼu so̱kóndó ta kaʼmindó* u̱vi̱ si̱ndi̱ki̱ yúta̱ nu̱ú Jehová, xíʼin iin ndikachi che̱e ta saátu u̱xa̱ ndikachi válí tí kǒo kue̱ʼe̱ kúúmií, tí kúúmií iin ku̱i̱ya̱. 12 Xa̱ʼa̱ iin tá iin tí si̱ndi̱ki̱ yóʼo so̱kóndó u̱ni̱ kilo sava* ña̱ harina ña̱ va̱ʼaní ña̱ nda̱saka̱ xíʼin aceite, xa̱ʼa̱ tí ndikachi che̱e so̱kóndó u̱vi̱ kilo ña̱ harina ña̱ va̱ʼaní ña̱ nda̱saka̱ xíʼin aceite, 13 ta xa̱ʼa̱ iin tá iin tí ndikachi válí so̱kóndó iin kilo ña̱ harina ña̱ va̱ʼaní ña̱ nda̱saka̱ xíʼin aceite, ña̱yóʼo kúú ña̱ kaʼmindó ta so̱kóndóña nu̱ú yi̱ʼi̱ Jehová ta táminí kuxaʼa̱nña nu̱úi̱. 14 Xa̱ʼa̱ tí si̱ndi̱ki̱ so̱kóndó ki̱ʼva u̱vi̱ litro* tá vino, xa̱ʼa̱ tí ndikachi che̱e so̱kóndó ki̱ʼva iin litro sava* tá vino ta xa̱ʼa̱ tí ndikachi loʼo so̱kóndó iin litro* tá vino. Ña̱yóʼo kúú ña̱ so̱kóndó ndiʼi ku̱i̱ya̱, ta yo̱o̱ tá yo̱o̱ keʼéndóña. 15 Saátu so̱kóndó iin ti̱xúʼú* loʼo xa̱ʼa̱ ku̱a̱chindó nu̱ú Jehová, ta saátu xíniñúʼu so̱kóndó ta kaʼmindó ña̱ xa̱a̱ sóko̱ndó ndiʼi ki̱vi̱ ta so̱kótundó vino xíʼin ña̱yóʼo.

16 ”’Ki̱vi̱ 14 tí yo̱o̱ nu̱ú, keʼéndó vikó ña̱ Pascua nu̱ú Jehová. 17 Ki̱vi̱ 15 tí yo̱o̱ nu̱ú keʼéndó vikó, ta u̱xa̱ ki̱vi̱ kuxundó si̱ta̱váʼa ña̱ kǒo yuxa̱n iyá* kúúmií. 18 Ki̱vi̱ nu̱ú keʼéndó iin reunión ña̱ yi̱i̱, ta va̱ása xíniñúʼu kachíñundó. 19 Kaʼmindó u̱vi̱ si̱ndi̱ki̱ yúta̱, iin ndikachi che̱e xíʼin u̱xa̱ ndikachi válí tí kúúmií iin ku̱i̱ya̱ ta so̱kóndórí nu̱ú Jehová. Ndiʼi tíyóʼo va̱ása xíniñúʼu kuumiírí kue̱ʼe̱. 20 Ta xa̱ʼa̱ iin tá iin tíyóʼo xíniñúʼu so̱kóndó harina ña̱ va̱ʼa ña̱ nda̱saka̱ xíʼin aceite: xa̱ʼa̱ tí si̱ndi̱ki̱ so̱kóndó u̱ni̱ kilo sava ña̱ harina, xa̱ʼa̱ tí ndikachi che̱e so̱kóndó u̱vi̱ kilo harina, 21 ta xa̱ʼa̱ iin tá iin tí ndikachi válí, so̱kóndó iin kilo harina. 22 Ta saátu so̱kóndó iin ti̱xúʼú che̱e xa̱ʼa̱ ku̱a̱chindó ña̱ va̱ʼa ná ixakáʼnu-ini Ndióxi̱ xa̱ʼa̱ndó. 23 So̱kóndó ndiʼi ña̱yóʼo ta saátu ña̱ xa̱a̱ xáʼmindó ndiʼi xi̱ta̱a̱n. 24 U̱xa̱ saá ki̱vi̱ inkáchi xíniñúʼu koo ki̱ʼva ña̱ so̱kóndó ña̱yóʼo, nda̱a̱ táki̱ʼva koo ña̱ taxindó kuxui̱ saá kooña. Ña̱yóʼo kúú ña̱ kaʼmindó ta so̱kóndó nu̱ú yi̱ʼi̱ Jehová ta táminí kuxaʼa̱nña nu̱úi̱. Saátu xíniñúʼu so̱kóndó ta kaʼmindó ña̱ xa̱a̱ sóko̱ndó ndiʼi ki̱vi̱ ta so̱kótundó vino xíʼin ña̱yóʼo. 25 Ki̱vi̱ u̱xa̱ xíniñúʼu keʼéndó iin reunión ña̱ yi̱i̱, ta va̱ása xíniñúʼu kachíñundó.

26 ”’Ki̱vi̱ ná kuxa ña̱ nu̱ú ña̱ chi̱ʼindó, tá ná so̱kóndó harina ña̱ xa̱á nu̱ú Jehová ti̱xin Vikó ña̱ Semana, xíniñúʼu keʼéndó iin reunión ña̱ yi̱i̱. Ta va̱ása xíniñúʼu kachíñundó. 27 Kaʼmindó u̱vi̱ si̱ndi̱ki̱ yúta̱, iin ndikachi che̱e xíʼin u̱xa̱ ndikachi válí tí kúúmií iin ku̱i̱ya̱ ta so̱kóndórí nu̱ú Jehová ña̱ va̱ʼa táminí kuxaʼa̱nrí nu̱úra. 28 Ta xa̱ʼa̱ iin tá iin tíyóʼo xíniñúʼu so̱kóndó harina ña̱ va̱ʼa ña̱ nda̱saka̱ xíʼin aceite, xa̱ʼa̱ tí si̱ndi̱ki̱ so̱kóndó ki̱ʼva u̱ni̱ kilo sava harina, xa̱ʼa̱ tí ndikachi che̱e so̱kóndó u̱vi̱ kilo harina 29 ta xa̱ʼa̱ iin tá iin tí ndikachi válí so̱kóndó iin kilo harina, 30 saátu so̱kóndó iin ti̱xúʼú loʼo ña̱ va̱ʼa ixakáʼnu-inii̱ xa̱ʼa̱ ku̱a̱chindó. 31 So̱kóndó ndiʼi ña̱yóʼo ta saátu xíniñúʼu so̱kóndó ta kaʼmindó ña̱ xa̱a̱ sóko̱ndó ndiʼi ki̱vi̱, ta so̱kótundó harina xíʼin ña̱yóʼo. Xíniñúʼu so̱kóndó kití tí kǒo kue̱ʼe̱ kúúmií ta saátu xíniñúʼu so̱kóndó vino xa̱ʼa̱ tíyóʼo.

29 ”’Ki̱vi̱ nu̱ú ña̱ yo̱o̱ u̱xa̱ xíniñúʼu keʼéndó iin reunión ña̱ yi̱i̱. Va̱ása xíniñúʼu kachíñundó. Ki̱vi̱ ña̱ xíniñúʼu tivindó trompeta koo ña̱yóʼo. 2 Kaʼmindó* iin si̱ndi̱ki̱ tí yúta̱,* iin ndikachi* che̱e xíʼin u̱xa̱ ndikachi válí tí iin ku̱i̱ya̱ ta ndiʼi tíyóʼo va̱ása xíniñúʼu kuumiírí kue̱ʼe̱, ta so̱kóndórí nu̱ú* Jehová ña̱ va̱ʼa táminí kuxaʼa̱nrí nu̱úra, 3 ta xa̱ʼa̱ tíyóʼo so̱kóndó harina ña̱ va̱ʼa ña̱ nda̱saka̱ xíʼin aceite, xa̱ʼa̱ tí si̱ndi̱ki̱ so̱kóndó u̱ni̱ kilo sava* ña̱ harina, xa̱ʼa̱ tí ndikachi che̱e so̱kóndó u̱vi̱ kilo* ña̱ harina, 4 xa̱ʼa̱ iin tá iin tí ndikachi válí so̱kóndó iin kilo* ña̱ harina, 5 ta xa̱ʼa̱ ku̱a̱chindó so̱kóndó iin ti̱xúʼú* loʼo ña̱ va̱ʼa ixakáʼnu-ini Ndióxi̱ xa̱ʼa̱ndó. 6 Keʼéndó ña̱yóʼo ta saátu so̱kóndó ña̱ xáʼmindó yo̱o̱ tá yo̱o̱ ta so̱kóndó harina xíʼinña, saátu so̱kóndó ña̱ xáʼmindó ndiʼi ki̱vi̱ ta so̱kóndó harina xíʼinña ta so̱kótundó vino xíʼin ña̱yóʼo, so̱kóndó ña̱yóʼo nda̱a̱ táki̱ʼva kéʼéndó ndiʼi yichi̱ ña̱ sóko̱ndó ña̱ʼa nu̱ú Ndióxi̱, ña̱yóʼo kúú ña̱ so̱kóndó ta kaʼmindó nu̱ú Jehová ta táminí kuxaʼa̱nña nu̱úra.

7 ”’Ki̱vi̱ 10 ña̱ yo̱o̱ u̱xa̱, xíniñúʼu keʼéndó iin reunión ña̱ yi̱i̱ ta xíniñúʼu na̱ʼa̱ndó ña̱ kúsuchí-inindó* xa̱ʼa̱ ku̱a̱chi ña̱ ni̱ki̱ʼvindó. Ta va̱ása xíniñúʼu kachíñundó. 8 Kaʼmindó iin si̱ndi̱ki̱ tí yúta̱, iin ndikachi che̱e xíʼin u̱xa̱ ndikachi válí tí iin ku̱i̱ya̱ ta ndiʼi tíyóʼo va̱ása xíniñúʼu kuumiírí kue̱ʼe̱, ta so̱kóndórí nu̱ú Jehová ña̱ va̱ʼa táminí kuxaʼa̱nrí nu̱úra. 9 Ta saátu so̱kóndó harina ña̱ va̱ʼa ña̱ nda̱saka̱ xíʼin aceite, xa̱ʼa̱ tí si̱ndi̱ki̱ so̱kóndó u̱ni̱ kilo sava ña̱ harina, xa̱ʼa̱ tí ndikachi che̱e so̱kóndó u̱vi̱ kilo ña̱ harina, 10 ta xa̱ʼa̱ iin tá iin tí ndikachi válí so̱kóndó iin kilo ña̱ harina, 11 saátu so̱kóndó iin ti̱xúʼú loʼo xa̱ʼa̱ ku̱a̱chindó, ta Ki̱vi̱ ña̱ ndóo ku̱a̱china so̱kóndó ña̱ʼa xa̱ʼa̱ ku̱a̱chindó, ta saátu kaʼmindó ña̱ʼa ña̱ sóko̱ ni̱ʼindó, ta so̱kóndó harina xíʼin ña̱yóʼo ta saátu vino.

12 ”’Ta ki̱vi̱ 15 ña̱ yo̱o̱ u̱xa̱, xíniñúʼu keʼéndó iin reunión ña̱ yi̱i̱. Va̱ása kachíñundó ta u̱xa̱ ki̱vi̱ keʼéndó vikó nu̱ú Jehová. 13 Xíniñúʼu taxindó 13 si̱ndi̱ki̱ yúta̱, 2 ndikachi che̱e xíʼin 14 ndikachi válí tí iin ku̱i̱ya̱ ta ndiʼi tíyóʼo va̱ása xíniñúʼu kuumiírí kue̱ʼe̱, tíyóʼo kúú tí kaʼmindó* ta so̱kóndó nu̱ú Jehová ta táminí kuxaʼa̱nrí nu̱úra. 14 Ta xíʼin tíyóʼo so̱kóndó harina ña̱ va̱ʼa ña̱ nda̱saka̱ xíʼin aceite, xa̱ʼa̱ iin tá iin tí si̱ndi̱ki̱ so̱kóndó u̱ni̱ kilo sava ña̱ harina, xa̱ʼa̱ iin tá iin tí ndikachi che̱e so̱kóndó u̱vi̱ kilo ña̱ harina, 15 ta xa̱ʼa̱ iin tá iin tí ndikachi válí so̱kóndó iin kilo ña̱ harina, 16 ta saátu so̱kóndó iin ti̱xúʼú loʼo xa̱ʼa̱ ku̱a̱chindó, saátu kaʼmindó ña̱ʼa ña̱ sóko̱ ni̱ʼindó, ta so̱kóndó harina xíʼin ña̱yóʼo ta saátu vino.

17 ”’Ta ki̱vi̱ u̱vi̱, xíniñúʼu taxindó 12 si̱ndi̱ki̱ yúta̱, 2 ndikachi che̱e xíʼin 14 ndikachi válí tí iin ku̱i̱ya̱ ta ndiʼi tíyóʼo va̱ása xíniñúʼu kuumiírí kue̱ʼe̱, 18 ta saátu taxindó harina xíʼin vino xa̱ʼa̱ tí si̱ndi̱ki̱, xa̱ʼa̱ tí ndikachi che̱e ta saátu xa̱ʼa̱ tí ndikachi válí, nda̱saaka kúú mií tíyóʼo saá koo ña̱ taxindó xa̱ʼa̱rí, nda̱a̱ táki̱ʼva kéʼéndó ndiʼi yichi̱ ña̱ sóko̱ndó ña̱ʼa nu̱ú Ndióxi̱, 19 saátu so̱kóndó iin ti̱xúʼú loʼo xa̱ʼa̱ ku̱a̱chindó, ta kaʼmindó ña̱ʼa ña̱ sóko̱ ni̱ʼindó, ta so̱kóndó harina xíʼin ña̱yóʼo ta saátu vino.

20 ”’Ki̱vi̱ u̱ni̱, taxindó 11 si̱ndi̱ki̱, 2 ndikachi che̱e ta saátu 14 ndikachi válí tí iin ku̱i̱ya̱ ta ndiʼi tíyóʼo va̱ása xíniñúʼu kuumiírí kue̱ʼe̱, 21 ta saátu taxindó harina xíʼin vino xa̱ʼa̱ tí si̱ndi̱ki̱, xa̱ʼa̱ tí ndikachi che̱e ta saátu xa̱ʼa̱ tí ndikachi válí, nda̱saaka kúú mií tíyóʼo saá koo ña̱ taxindó xa̱ʼa̱rí, nda̱a̱ táki̱ʼva kéʼéndó ndiʼi yichi̱ ña̱ sóko̱ndó ña̱ʼa nu̱ú Ndióxi̱, 22 saátu so̱kóndó iin ti̱xúʼú che̱e xa̱ʼa̱ ku̱a̱chindó, ta kaʼmindó ña̱ʼa ña̱ sóko̱ ni̱ʼindó, ta so̱kóndó harina xíʼin ña̱yóʼo ta saátu vino.

23 ”’Ki̱vi̱ ku̱mí, taxindó 10 si̱ndi̱ki̱, 2 ndikachi che̱e ta saátu 14 ndikachi válí tí iin ku̱i̱ya̱ ta ndiʼi tíyóʼo va̱ása xíniñúʼu kuumiírí kue̱ʼe̱, 24 ta saátu taxindó harina xíʼin vino xa̱ʼa̱ tí si̱ndi̱ki̱, xa̱ʼa̱ tí ndikachi che̱e ta saátu xa̱ʼa̱ tí ndikachi válí, nda̱saaka kúú mií tíyóʼo saá koo ña̱ taxindó xa̱ʼa̱rí, nda̱a̱ táki̱ʼva kéʼéndó ndiʼi yichi̱ ña̱ sóko̱ndó ña̱ʼa nu̱ú Ndióxi̱, 25 saátu so̱kóndó iin ti̱xúʼú loʼo xa̱ʼa̱ ku̱a̱chindó, ta kaʼmindó ña̱ʼa ña̱ sóko̱ ni̱ʼindó, ta so̱kóndó harina xíʼin ña̱yóʼo ta saátu vino.

26 ”’Ki̱vi̱ u̱ʼu̱n, taxindó 9 si̱ndi̱ki̱, 2 ndikachi che̱e ta saátu 14 ndikachi válí tí iin ku̱i̱ya̱ ta ndiʼi tíyóʼo va̱ása xíniñúʼu kuumiírí kue̱ʼe̱, 27 ta saátu taxindó harina xíʼin vino xa̱ʼa̱ tí si̱ndi̱ki̱, xa̱ʼa̱ tí ndikachi che̱e ta saátu xa̱ʼa̱ tí ndikachi válí, nda̱saaka kúú mií tíyóʼo saá koo ña̱ taxindó xa̱ʼa̱rí, nda̱a̱ táki̱ʼva kéʼéndó ndiʼi yichi̱ ña̱ sóko̱ndó ña̱ʼa nu̱ú Ndióxi̱, 28 saátu so̱kóndó iin ti̱xúʼú che̱e xa̱ʼa̱ ku̱a̱chindó, ta kaʼmindó ña̱ʼa ña̱ sóko̱ ni̱ʼindó, ta so̱kóndó harina xíʼin ña̱yóʼo ta saátu vino.

29 ”’Ki̱vi̱ i̱ñu̱, taxindó 8 si̱ndi̱ki̱, 2 ndikachi che̱e ta saátu 14 ndikachi váli tí iin ku̱i̱ya̱ ta ndiʼi tíyóʼo va̱ása xíniñúʼu kuumiírí kue̱ʼe̱, 30 ta saátu taxindó harina xíʼin vino xa̱ʼa̱ tí si̱ndi̱ki̱, xa̱ʼa̱ tí ndikachi che̱e ta saátu xa̱ʼa̱ tí ndikachi válí, nda̱saaka kúú mií tíyóʼo saá koo ña̱ taxindó xa̱ʼa̱rí, nda̱a̱ táki̱ʼva kéʼéndó ndiʼi yichi̱ ña̱ sóko̱ndó ña̱ʼa nu̱ú Ndióxi̱, 31 saátu so̱kóndó iin ti̱xúʼú che̱e xa̱ʼa̱ ku̱a̱chindó, ta kaʼmindó ña̱ʼa ña̱ sóko̱ ni̱ʼindó, ta so̱kóndó harina xíʼin ña̱yóʼo ta saátu vino.

32 ”’Ki̱vi̱ u̱xa̱, taxindó 7 si̱ndi̱ki̱, 2 ndikachi che̱e ta saátu 14 ndikachi válí tí iin ku̱i̱ya̱, ta ndiʼi tíyóʼo va̱ása xíniñúʼu kuumiírí kue̱ʼe̱, 33 ta saátu taxindó harina xíʼin vino xa̱ʼa̱ tí si̱ndi̱ki̱, xa̱ʼa̱ tí ndikachi che̱e ta saátu xa̱ʼa̱ tí ndikachi válí, nda̱saaka kúú mií tíyóʼo saá koo ña̱ taxindó xa̱ʼa̱rí, nda̱a̱ táki̱ʼva kéʼéndó ndiʼi yichi̱ ña̱ sóko̱ndó ña̱ʼa nu̱ú Ndióxi̱, 34 saátu so̱kóndó iin ti̱xúʼú che̱e xa̱ʼa̱ ku̱a̱chindó, ta kaʼmindó ña̱ʼa ña̱ sóko̱ ni̱ʼindó, ta so̱kóndó harina xíʼin ña̱yóʼo ta saátu vino.

35 ”’Ki̱vi̱ u̱na̱, xíniñúʼu keʼéndó iin reunión ña̱ ndáyáʼviní. Va̱ása xíniñúʼu kachíñundó. 36 Xíniñúʼu taxindó iin si̱ndi̱ki̱, iin ndikachi che̱e ta saátu u̱xa̱ ndikachi válí tí iin ku̱i̱ya̱, ta ndiʼi tíyóʼo va̱ása xíniñúʼu kuumiírí kue̱ʼe̱, tíyóʼo kúú tí kaʼmindó* ta so̱kóndó nu̱ú Jehová ta táminí kuxaʼa̱nrí nu̱úra, 37 ta saátu taxindó harina xíʼin vino xa̱ʼa̱ tí si̱ndi̱ki̱, xa̱ʼa̱ tí ndikachi che̱e ta saátu xa̱ʼa̱ tí ndikachi válí, nda̱saaka kúú mií tíyóʼo saá koo ña̱ taxindó xa̱ʼa̱rí, nda̱a̱ táki̱ʼva kéʼéndó ndiʼi yichi̱ ña̱ sóko̱ndó ña̱ʼa nu̱ú Ndióxi̱, 38 saátu so̱kóndó iin ti̱xúʼú che̱e xa̱ʼa̱ ku̱a̱chindó, ta kaʼmindó ña̱ʼa ña̱ sóko̱ ni̱ʼindó, ta so̱kóndó harina xíʼin ña̱yóʼo ta saátu vino.

39 ”’Ña̱yóʼo kúú ña̱ so̱kóndó nu̱ú Jehová ti̱xin vikó ña̱ kéʼéndó ku̱i̱ya̱ tá ku̱i̱ya̱, so̱kótundó ña̱ʼa xa̱ʼa̱ ña̱ ki̱ndoondó keʼéndó iin ña̱ʼa, ta saátu xa̱ʼa̱ ña̱ kúni̱ miíndó, ña̱yóʼo koo ña̱ kaʼmindó ta so̱kóndó, saátu xíniñúʼu so̱kóndó harina, vino ta saátu ña̱ʼa xa̱ʼa̱ ña̱ kúni̱ndó ndakutáʼan viíndó xíʼin Ndióxi̱’”. 40 Ta ta̱ Moisés ni̱ka̱ʼa̱nra xíʼin na̱ israelita xa̱ʼa̱ ndiʼi chiñu ña̱ xa̱ʼnda Jehová.

30 Tasaá ni̱ka̱ʼa̱n ta̱ Moisés xíʼin na̱ xi̱niʼi yichi̱ nu̱ú na̱ tribu na̱ ñuu Israel ta ka̱chira: “Ña̱yóʼo kúú chiñu ña̱ xa̱ʼnda Jehová. 2 Tá iin ta̱a kíndo̱ora keʼéra iin ña̱ʼa nu̱ú Jehová á chínaʼára* ña̱ va̱ása keʼéra iin ña̱ʼa, va̱ása xíniñúʼu nasamara ña̱ ni̱ka̱ʼa̱nra keʼéra ta xíniñúʼu saxínura ña̱ ki̱ndoora keʼéra.

3 ”Tá iin ñá loʼo kúa̱an kíndo̱oñá keʼéñá iin ña̱ʼa nu̱ú Jehová á kíndo̱oñá ña̱ va̱ása keʼéñá iin ña̱ʼa, ta íyokañá xíʼin yiváñá, 4 ta ku̱ndaa̱-inira xa̱ʼa̱ ña̱yóʼo soo va̱ása káʼa̱nra nda̱a̱ ni iin ña̱ʼa xíʼinñá, kiviva saxínuñá ña̱ ki̱ndooñá keʼéñá ta saátu ña̱ ki̱ndooñá va̱ása keʼéñá. 5 Soo tá ku̱ndaa̱-ini yiváñá ta va̱ása xíínra taxira ña̱ saxínuñá ña̱ ki̱ndooñá keʼéñá nu̱ú Ndióxi̱ á ña̱ ki̱ndooñá va̱ása keʼéñá, va̱ása kivika saxínuñá ña̱yóʼo. Ta ixakáʼnuva-ini Jehová xa̱ʼa̱ñá, saáchi yiváñá kúú ta̱ ni̱ka̱ʼa̱n ña̱ va̱ása keʼékañá ña̱yóʼo.

6 ”Soo tá ki̱ndooñá keʼéñá iin ña̱ʼa nu̱ú Ndióxi̱ á va̱ása vií níndakanixi̱níñá xa̱ʼa̱ ña̱ ki̱ndooñá keʼéñá iin ña̱ʼa ta so̱ndíʼi ti̱ndaʼa̱ñá, 7 ta ku̱ndaa̱-ini yii̱ñá xa̱ʼa̱ ña̱ ki̱ndooñá keʼéñá nu̱ú Ndióxi̱ á xa̱ʼa̱ ña̱ ki̱ndooñá va̱ása keʼéñá, ta kǒo ña̱ káʼa̱nra xíʼinñá, kiviva saxínuñá ña̱yóʼo. 8 Soo tá ku̱ndaa̱-ini yii̱ñá ta va̱ása xíínra taxira saxínuñá ña̱yóʼo, kiviva ka̱ʼa̱nra ña̱ va̱ása saxínuñá ña̱yóʼo, ta ixakáʼnuva-ini Jehová xa̱ʼa̱ñá.

9 ”Soo tá iin ñaʼá ñá ni̱xi̱ʼi̱ yii̱ kúúñá á iin ñaʼá ñá xa̱a̱ ni̱xi̱yo yii̱ kúúñá ta ki̱ndooñá keʼéñá iin ña̱ʼa nu̱ú Ndióxi̱, ñáyóʼo xíniñúʼu saxínuñá ña̱ ki̱ndooñá keʼéñá.

10 ”Tá iin ñaʼá kíndo̱oñá keʼéñá iin ña̱ʼa nu̱ú Ndióxi̱ á kíndo̱oñá va̱ása keʼéñá iin ña̱ʼa tá íyokañá xíʼin yii̱ñá, 11 ta ku̱ndaa̱-ini yii̱ñá soo kǒo ña̱ káʼa̱nra xíʼinñá xa̱ʼa̱ ña̱ ki̱ndooñá keʼéñá, xíniñúʼu saxínuvañá ña̱yóʼo. 12 Soo tá ku̱ndaa̱-ini yii̱ñá ta va̱ása xíínra taxira saxínuñá ña̱yóʼo, va̱ása kivika saxínuñá ña̱yóʼo. Ta ixakáʼnuva-ini Jehová xa̱ʼa̱ñá, saáchi yii̱ñá kúú ta̱ ni̱ka̱ʼa̱n ña̱ va̱ása keʼékañá ña̱yóʼo. 13 Yii̱ñá kúú ta̱ kivi ka̱ʼa̱n á saxínuñá á va̱ása saxínuñá iin ña̱ ki̱ndooñá keʼéñá nu̱ú Ndióxi̱ á ña̱ ki̱ndooñá va̱ása keʼéñá. 14 Soo tá ni̱ya̱ʼa ki̱vi̱ ta ta̱yóʼo va̱ása káʼa̱nra nda̱a̱ ni iin ña̱ʼa xíʼinñá, ña̱yóʼo kúni̱ kachiña ña̱ táxivara saxínuñá ña̱ ki̱ndooñá keʼéñá á ña̱ ki̱ndooñá va̱ása keʼéñá. Xa̱ʼa̱ ña̱ kǒo níka̱ʼa̱nra xíʼinñá, ña̱yóʼo kúni̱ kachiña ña̱ táxivara saxínuñá ña̱ ki̱ndooñá keʼéñá. 15 Soo tá ku̱ndaa̱-inira ta tá ni̱ya̱ʼa tiempo saáví káʼa̱nra xíʼinñá ña̱ va̱ása saxínuñá ña̱ ki̱ndooñá keʼéñá, chaʼvira xa̱ʼa̱ ku̱a̱chi ña̱ ná ki̱ʼviñá.

16 ”Ña̱yóʼo kúú ña̱ ni̱ka̱ʼa̱n Jehová xíʼin ta̱ Moisés xa̱ʼa̱ ña̱ xíniñúʼu keʼé ta̱ íyo ñá síʼi xíʼin ñá síʼira, ta saátu ña̱ xíniñúʼu keʼé ta̱ íyo se̱ʼe xíʼin se̱ʼe-síʼira nani íyokañá veʼera”.

31 Tasaá ni̱ka̱ʼa̱n Jehová xíʼin ta̱ Moisés: 2 “Taxi castigo ndaʼa̱ na̱ madianita xa̱ʼa̱ ña̱ ke̱ʼéna xíʼin na̱ israelita. Tándi̱ʼi, saá kuviún ta ndu̱xu̱ún nda̱a̱ táki̱ʼva ni̱ndu̱xu̱n na̱ táʼún na̱ xi̱ndoo xi̱naʼá”.

3 Tasaá ni̱ka̱ʼa̱n ta̱ Moisés xíʼin na̱ ñuu ta ka̱chira: “Ixatu̱ʼvandó sava na̱ ta̱a ña̱ va̱ʼa ku̱ʼu̱nna kanitáʼanna xíʼin na̱ ñuu Madián tasaá kivi taxi Jehová castigo ndaʼa̱na xa̱ʼa̱ ña̱ ke̱ʼéna xíʼinyó. 4 Iin tá iin na̱ tribu xíniñúʼu chindaʼána 1,000 na̱ ta̱a ña̱ va̱ʼa ku̱ʼu̱nna kanitáʼanna”. 5 Ña̱kán 12,000 xi̱kuu na̱ ta̱a na̱ i̱xatu̱ʼva na̱ ñuu ña̱ va̱ʼa ku̱ʼu̱nna kanitáʼanna, saáchi 1,000 xi̱kuu na̱ ke̱e ti̱xin iin tá iin tribu.

6 Tasaá chi̱ndaʼá ta̱ Moisés na̱ ta̱a yóʼo, 1,000 xi̱kuu na̱ ke̱e ti̱xin iin tá iin tribu ta ku̱a̱ʼa̱nna xíʼin ta̱ Finehás se̱ʼe ta̱ Eleazar, ta̱yóʼo kúú ta̱ su̱tu̱ ta̱ xi̱xaʼa̱n xíʼinna tá xi̱xaʼa̱nna nu̱ú ku̱a̱chi, ta xi̱niʼira ña̱ʼa ña̱ yi̱i̱ ta saátu trompeta tú xi̱xaʼa̱n xíʼinna tá xi̱xikana nu̱ú ku̱a̱chi. 7 Ta na̱yóʼo ni̱xa̱ʼa̱nna ka̱nitáʼanna xíʼin na̱ ñuu Madián, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés, ta xa̱ʼnína ndiʼi na̱ ta̱a. 8 Saátu xa̱ʼnína u̱ʼu̱n na̱ rey na̱ ñuu Madián: ta̱ Eví, ta̱ Réquem, ta̱ Zur, ta̱ Hur xíʼin ta̱ Reba. Ta saátu xa̱ʼnína ta̱ Balaam se̱ʼe ta̱ Beor xíʼin espada. 9 Soo na̱ israelita nda̱kiʼinna na̱ va̱lí xíʼin ná ñaʼá ná ñuu Madián ku̱a̱ʼa̱n xíʼinna. Ta saátu nda̱kiʼinna ndiʼi kití sa̱na̱na xíʼin ña̱ʼa ña̱ xi̱kuumiína. 10 Xa̱ʼmina ndiʼi ñuu nu̱ú ni̱xi̱yona. Saátu veʼe válí nu̱ú xi̱ndoona. 11 Nda̱kiʼinna ndiʼi ña̱ xi̱kuumiína, saátu na̱ yiví xíʼin kití sa̱na̱na. 12 Tándi̱ʼi nda̱kiʼinnana ku̱a̱ʼa̱n xíʼinna xíʼin ndiʼi ña̱ʼa ña̱ ki̱ndaana ndaʼa̱na ta ni̱xa̱a̱na nu̱ú ni̱xi̱yo ta̱ Moisés, ta̱ su̱tu̱ Eleazar ta saátu ndiʼi na̱ ñuu Israel, chi na̱yóʼo xi̱ndoona chí nu̱ú ñuʼú yi̱chí ña̱ Moab, yatin yu̱ta Jordán, chí nu̱ú xítondaa Jericó.

13 Tasaá ta̱ Moisés, ta̱ su̱tu̱ Eleazar xíʼin ndiʼi na̱ xi̱niʼi yichi̱ nu̱ú na̱ ñuu, ke̱ena ta nda̱kutáʼanna xíʼin na̱yóʼo chí sa̱tá nu̱ú xi̱ndoo na̱ ñuu. 14 Soo ta̱ Moisés ni̱sa̱a̱níra xíʼin na̱ xi̱niʼi yichi̱ nu̱ú iin mil na̱ ta̱a ta saátu na̱ xi̱niʼi yichi̱ nu̱ú iin ciento na̱ ta̱a, na̱ ni̱xa̱ʼa̱n ka̱nitáʼan ta ndi̱kóna nu̱ú ku̱a̱chi. 15 Ta̱ Moisés ni̱ka̱ʼa̱nra xíʼinna: “¿Nda̱chun va̱ása níxaʼníndó ndiʼi ná ñaʼá? 16 Náyóʼo kúú ná xi̱ndiku̱n ña̱ ni̱ka̱ʼa̱n ta̱ Balaam, ta chi̱ndaʼáná sava na̱ israelita ña̱ ni̱ki̱ʼvina ku̱a̱chi nu̱ú Jehová ta nda̱sakáʼnuna ndióxi̱ vatá ña̱ Peor, ta xa̱ʼa̱ ña̱ ke̱ʼé náyóʼo, ndiʼi na̱ ñuu Jehová, ni̱xo̱ʼvi̱na* xíʼin kue̱ʼe̱. 17 Ña̱kán, kaʼníndó ndiʼi na̱ ta̱a válí ta saátu ndiʼi ná ñaʼá ná xa̱a̱ ni̱ki̱si̱ xíʼin ta̱a. 18 Soo va̱ása kaʼníndó ná kúa̱an ná ta̱ʼán ku̱su̱n xíʼin ta̱a. 19 Ta u̱xa̱ ki̱vi̱ xíniñúʼu kundoondó chí sa̱tá nu̱ú ndóo ndiʼi na̱ ñuu. Ndiʼi ndóʼó na̱ xa̱ʼní iin na̱ yiví á na̱ ti̱in iin na̱ ni̱xi̱ʼi̱, xíniñúʼu ndasandiindó* miíndó ki̱vi̱ u̱ni̱ xíʼin ki̱vi̱ u̱xa̱, miíndó xíʼin ndiʼi na̱ nda̱kiʼinndó ki̱xaa̱ xíʼinndó, xíniñúʼu keʼéndó ndiʼi ña̱yóʼo. 20 Xíniñúʼu ndasandiindó ndiʼi ti̱ko̱to̱, ndiʼi ña̱ʼa ña̱ ku̱vaʼa xíʼin ñii̱, ndiʼi ña̱ʼa ña̱ ku̱vaʼa xíʼin ixí* ti̱xúʼú* ta saátu ndiʼi ña̱ʼa ña̱ ku̱vaʼa xíʼin yitu̱n”.

21 Tasaá, ta̱ su̱tu̱ Eleazar ni̱ka̱ʼa̱nra ña̱yóʼo xíʼin ndiʼi na̱ ta̱a na̱ ni̱xa̱ʼa̱n ka̱nitáʼan: “Ña̱yóʼo kúú ley ña̱ ta̱xi Jehová ndaʼa̱ ta̱ Moisés ña̱ xíniñúʼu kundiku̱nndó: 22 ‘Iinlá kuití oro, plata, cobre, hierro, estaño xíʼin plomo 23 kúú ña̱ kivi kaʼmindó nu̱ú ñuʼu̱ tasaá ndundiiña,* chi iinlá ña̱yóʼo kúú ña̱ va̱ása ndíʼi-xa̱ʼa̱ xíʼin ñuʼu̱. Ta saátu xíniñúʼu ndasandiindóña xíʼin ti̱kui̱í tá ndásandii. Ta ndiʼi ña̱ʼa ña̱ kivi ndiʼi-xa̱ʼa̱ xíʼin ñuʼu̱, xíniñúʼu ndakatandóña xíʼin ti̱kui̱í yóʼo. 24 Ki̱vi̱ u̱xa̱ xíniñúʼu ndakatandó ti̱ko̱to̱ndó tasaá ndundiindó. Tándi̱ʼi, saá kivi ki̱ʼvindó nu̱ú ndóo ndiʼi na̱ ñuu’”.

25 Tasaá ni̱ka̱ʼa̱n Jehová ña̱yóʼo xíʼin ta̱ Moisés: 26 “Keʼé iin lista ta kaʼyiún ndiʼi ña̱ nda̱kiʼinna, na̱ yiví na̱ nda̱kiʼinna ta saátu kití tí nda̱kiʼinna. Ta̱ su̱tu̱ Eleazar xíʼin na̱ níʼi yichi̱ nu̱ú na̱ tribu kúú na̱ chindeétáʼan xíʼún keʼún ña̱yóʼo. 27 U̱vi̱ táʼví ndataʼvíún ña̱ nda̱kiʼinna: iin táʼví ndakiʼin na̱ ta̱a na̱ ni̱xa̱ʼa̱n ka̱nitáʼan ta inka táʼví ndakiʼin na̱ ñuu. 28 Ta ña̱ ndakiʼin Jehová ndaʼa̱ na̱ ta̱a na̱ ni̱xa̱ʼa̱n ka̱nitáʼan kúú ña̱yóʼo, tá 500 kúú na̱ yiví na̱ nda̱kiʼinna, iinna ndakiʼinra, tá 500 kúú si̱ndi̱ki̱, burro xíʼin ndikachi,* iinrí ndakiʼinra. 29 Ndiʼi ña̱yóʼo, xíniñúʼu kanaña ti̱xin táʼví ña̱ kúú kuentana ta taxiúnña ndaʼa̱ ta̱ su̱tu̱ Eleazar ña̱ va̱ʼa taxiraña ndaʼa̱ Jehová. 30 Ti̱xin táʼví ña̱ ndakiʼin na̱ israelita xíniñúʼu ndakiʼún ña̱yóʼo, tá 50 kúú na̱ yiví, iinna ndakiʼún ta taxiúnna ndaʼa̱ na̱ levita, tá 50 kúú si̱ndi̱ki̱, burro, ndikachi xíʼin ndiʼika kití sa̱na̱na, iinrí ndakiʼún ta taxiúnrí ndaʼa̱ na̱ levita chi na̱yóʼo kúú na̱ kíʼin kuenta xíʼin chiñu ña̱ íyo ti̱xin tabernáculo Jehová”.

31 Tasaá, ta̱ Moisés xíʼin ta̱ su̱tu̱ Eleazar, ke̱ʼéna nda̱a̱ táki̱ʼva ni̱ka̱ʼa̱n Jehová xíʼin ta̱ Moisés. 32 Ta ndiʼi ña̱ nda̱kiʼin na̱ ni̱xa̱ʼa̱n ka̱nitáʼan xi̱kuu ña̱yóʼo: 675,000 ndikachi, 33 saátu 72,000 si̱ndi̱ki̱, 34 xíʼin 61,000 burro. 35 Ná ñaʼá ná ta̱ʼán ku̱su̱n xíʼin nda̱a̱ ni iin ta̱a, xi̱kuuná 32,000. 36 Ndikachi tí nda̱kiʼin na̱ ni̱xa̱ʼa̱n ka̱nitáʼan, xi̱kuurí 337,500. 37 Ta tí nda̱taxina ndaʼa̱ Jehová, xi̱kuurí 675. 38 Si̱ndi̱ki̱ tí nda̱kiʼinna, xi̱kuurí 36,000, ta 72 kúú tí nda̱taxina ndaʼa̱ Jehová. 39 Burro tí nda̱kiʼinna, xi̱kuurí 30,500, ta 61 kúú tí nda̱taxina ndaʼa̱ Jehová. 40 Na̱ yiví na̱ nda̱kiʼinna, xi̱kuuna 16,000 ta 32 kúú na̱ nda̱taxina ndaʼa̱ Jehová. 41 Tasaá, ta̱ Moisés nda̱taxira ndiʼi ña̱yóʼo ndaʼa̱ ta̱ su̱tu̱ Eleazar ña̱ va̱ʼa taxiraña ndaʼa̱ Jehová, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés.

42 Táʼví ña̱ nda̱kiʼin na̱ israelita ña̱ nda̱taʼví ta̱ Moisés nu̱ú ña̱ nda̱kiʼin na̱ ta̱a na̱ ni̱xa̱ʼa̱n nu̱ú ku̱a̱chi 43 xi̱kuu ña̱yóʼo: 337,500 ndikachi, 44 36,000 si̱ndi̱ki̱, 45 30,500 burro, 46 xíʼin 16,000 na̱ yiví. 47 Ta ti̱xin táʼví ña̱ xi̱kuu kuenta na̱ israelita, ta̱ Moisés nda̱kiʼinra ña̱yóʼo; iinna nda̱kiʼinra xa̱ʼa̱ 50 na̱ yiví, ta ti̱xin 50 kití iinrí nda̱kiʼinra ta nda̱taxira ndiʼi ña̱yóʼo ndaʼa̱ na̱ levita, chi na̱yóʼo kúú na̱ xi̱kiʼin kuenta xíʼin chiñu ña̱ ni̱xi̱yo ti̱xin tabernáculo Jehová, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés.

48 Tasaá, na̱ xi̱niʼi yichi̱ nu̱ú iin mil na̱ ta̱a xíʼin na̱ xi̱niʼi yichi̱ nu̱ú iin ciento na̱ ta̱a na̱ ni̱xa̱ʼa̱n ka̱nitáʼan, ku̱yatinna nu̱ú ta̱ Moisés, 49 ta ni̱ka̱ʼa̱nna xíʼinra: “Nda̱kaʼvindi̱ na̱ ta̱a na̱ ni̱xa̱ʼa̱n nu̱ú ku̱a̱chi, na̱ kíʼinndi̱ kuenta xíʼin ta kǒo nda̱a̱ ni iinna kúma̱ní. 50 Ña̱kán, taxi ná so̱kóndi̱ ña̱ʼa ña̱ nda̱ni̱ʼíndi̱ nu̱ú Jehová, ña̱ʼa ña̱ oro, ña̱ʼa ña̱ ñúʼu su̱kún xa̱ʼa̱na, siki̱ ndaʼa̱na, seʼe̱* ña̱ xíniñúʼuna ña̱ chíkaa̱na sello, siki̱ so̱ʼo xíʼin inkaka ña̱ʼa ña̱ ndáyáʼvi, tasaá ixakáʼnu-ini Jehová xa̱ʼa̱ndi̱”.

51 Tasaá, ta̱ Moisés xíʼin ta̱ su̱tu̱ Eleazar, nda̱kiʼinna oro xíʼin ña̱ʼa ña̱ ndáyáʼvi ña̱ ta̱xi na̱ ta̱a yóʼo. 52 Ta 16,750 xu̱ʼún ña̱ plata* xi̱kuu ya̱ʼvi oro ña̱ ta̱xi na̱ xi̱niʼi yichi̱ nu̱ú iin mil na̱ ta̱a ndaʼa̱ Jehová ta saátu na̱ xi̱niʼi yichi̱ nu̱ú iin ciento na̱ ta̱a. 53 Iin tá iin na̱ ta̱a na̱ ni̱xa̱ʼa̱n nu̱ú ku̱a̱chi, nda̱kiʼinna ña̱ʼa ña̱ koo kuenta miína. 54 Ta̱ Moisés xíʼin ta̱ su̱tu̱ Eleazar nda̱kiʼinna oro ña̱ ta̱xi na̱ xi̱niʼi yichi̱ nu̱ú iin mil na̱ ta̱a xíʼin iin ciento na̱ ta̱a, ta ni̱xa̱ʼa̱nna xíʼinña ini tabernáculo ña̱ va̱ʼa ndakaʼán na̱ ñuu Israel ndáa ki̱ʼva chi̱ndeétáʼan Jehová xíʼinna.

32 Ni̱xi̱yo ku̱a̱ʼání kití sa̱na̱ na̱ se̱ʼe ta̱ Rubén xíʼin na̱ se̱ʼe ta̱ Gad, ta na̱yóʼo xi̱nina ña̱ va̱ʼaní ñuʼú xi̱kuu Jazer xíʼin Galaad ña̱ va̱ʼa sakúina̱na kití sa̱na̱na. 2 Tasaá, na̱ se̱ʼe ta̱ Gad xíʼin na̱ se̱ʼe ta̱ Rubén ku̱yatinna nu̱ú ta̱ Moisés, nu̱ú ta̱ su̱tu̱ Eleazar ta saátu nu̱ú na̱ xi̱niʼi yichi̱ nu̱ú na̱ ñuu, ta ka̱china: 3 “Ñuʼú Atarot, Dibón, Jazer, Nimrá, Hesbón, Elealé, Sebam, Nebo xíʼin Beón 4 kúú ñuʼú ña̱ chi̱ndeétáʼan Jehová xíʼinyó nda̱kiʼinyó, va̱ʼaní ñuʼú yóʼo ña̱ ku̱i̱na̱ kití nu̱úña, ta ndi̱ʼi̱ íyoní kití sa̱na̱ndi̱”. 5 Ta ni̱ka̱ʼa̱nkana: “Tá va̱ʼa túviún, taxi loʼo ñuʼú yóʼo ndaʼa̱ndi̱ tasaá va̱ása ka̱ʼún xíʼinndi̱ ña̱ ya̱ʼandi̱ chí inka táʼví yu̱ta Jordán”.

6 Tasaá, ta̱ Moisés ni̱ka̱ʼa̱nra ña̱yóʼo xíʼin na̱ se̱ʼe ta̱ Gad ta saátu xíʼin na̱ se̱ʼe ta̱ Rubén: “¿Á ku̱ʼu̱nva na̱ táʼanndó nu̱ú ku̱a̱chi ta ndóʼó kindo̱ondó koondó yóʼo? 7 ¿Nda̱chun sándakavandó-ini na̱ ñuu Israel ta va̱ása kúni̱ndó xa̱a̱na nu̱ú ñuʼú ña̱ ni̱ka̱ʼa̱n Jehová taxira ndaʼa̱na? 8 Ña̱yóʼo kúú ña̱ ke̱ʼé na̱ yivándó tá xi̱ndoona chí Cadés-Barnea ta chi̱ndaʼíi̱na ña̱ ni̱xa̱ʼa̱nna xi̱tona̱nína* ñuʼú yóʼo. 9 Tá nda̱ana chí yoso̱ ña̱ Escol ta xi̱nina ñuʼú yóʼo, sa̱ndákavana-ini na̱ ñuu Israel ña̱kán ni̱yi̱ʼvína ki̱ʼvina nu̱ú ñuʼú ña̱ ni̱ka̱ʼa̱n Jehová taxira ndaʼa̱na. 10 Ki̱vi̱ saá ni̱sa̱a̱ní Jehová ta ni̱ka̱ʼa̱nra ña̱yóʼo: 11 ‘Na̱ ta̱a na̱ kúúmií 20 á ku̱a̱ʼáka ku̱i̱ya̱, na̱ ke̱e chí Egipto va̱ása kunina ñuʼú ña̱ ni̱ka̱ʼi̱n taxii̱ ndaʼa̱ ta̱ Abrahán, ta̱ Isaac xíʼin ta̱ Jacob, saáchi va̱ása níxindiku̱nna yi̱ʼi̱ xíʼin ndiʼi níma̱na, 12 iinlá ta̱ Caleb se̱ʼe ta̱ Jefuné ta̱ quenizita xíʼin ta̱ Josué se̱ʼe ta̱ Nun kúú na̱ ki̱ʼvi nu̱ú ñuʼú yóʼo, saáchi xi̱ndiku̱nna Jehová xíʼin ndiʼi níma̱na’. 13 Ña̱kán ni̱sa̱a̱ní Jehová xíʼin na̱ ñuu Israel ta ta̱xira ná kakana 40 ku̱i̱ya̱ nu̱ú ñuʼú yi̱chí nda̱a̱ tá ni̱xi̱ʼi̱ ndiʼi na̱ ke̱ʼé ña̱ va̱ása va̱ʼa nu̱ú Jehová. 14 Ta vitin ndóʼó na̱ ta̱a na̱ kúúmií ku̱a̱chi, kéʼéndó nda̱a̱ táki̱ʼva ke̱ʼé na̱ yivándó, ta xa̱ʼa̱ ña̱yóʼo sáa̱níka Jehová xíʼin na̱ ñuu Israel. 15 Tá ná sandákoondó ña̱ kundiku̱nndóra, ku̱a̱ʼáka tiempo kundoondó nu̱ú ñuʼú yi̱chí, ta ku̱a̱chi ndóʼó kúú ña̱ ndiʼi-xa̱ʼa̱ ndiʼi na̱ ñuu”.

16 Tándi̱ʼi, ku̱yatinna nu̱úra ta ni̱ka̱ʼa̱nna xíʼinra: “Taxi ná keʼéndi̱ corra ña̱ yu̱u̱ nu̱ú ndataánndi̱ kití sa̱na̱ndi̱ ta ná keʼéndi̱ ku̱a̱ʼá veʼe nu̱ú ñuʼú yóʼo ña̱ va̱ʼa kundoo na̱ se̱ʼendi̱. 17 Soo ndi̱ʼi̱ koo tu̱ʼvandi̱ ña̱ ku̱ʼu̱nndi̱ kanitáʼanndi̱ ta kunúundi̱ ku̱ʼu̱nndi̱ nu̱ú na̱ israelita, nda̱a̱ ná xa̱a̱ndi̱ xíʼinna nu̱ú kundoona. Soo taxi ná kindo̱o na̱ se̱ʼendi̱ kundoona ñuu ña̱ kútu̱ní ndási, tasaá va̱ása ixandi̱va̱ʼa na̱ yiví na̱ ndóo iníísaá nu̱ú ñuʼú yóʼo xíʼinna. 18 Va̱ása ndikóndi̱ veʼendi̱ nda̱a̱ ná ndakiʼin iin tá iin na̱ israelita ñuʼú ña̱ xíniñúʼu ndakiʼinna. 19 Ndi̱ʼi̱ va̱ása ndakiʼinndi̱ ñuʼú ña̱ ndakiʼinna chí inka táʼví yu̱ta Jordán, saáchi ñuʼú ña̱ ndakiʼinndi̱ koo ñuʼú ña̱ kíndo̱o chí inka táʼví yu̱ta Jordán chí nu̱ú kíta ñu̱ʼu”.*

20 Ta̱ Moisés ni̱ka̱ʼa̱nra xíʼinna: “Tá ná keʼéndó ña̱yóʼo ta ná ku̱ʼu̱nndó nu̱ú Jehová ña̱ kanitáʼanndó nu̱ú ku̱a̱chi, 21 tá iin tá iinndó ná ku̱ʼu̱nndó kanitáʼanndó ta ya̱ʼandó yu̱ta Jordán nu̱ú Jehová, nani távára na̱ sáa̱-ini xíni ndóʼó, 22 nda̱a̱ ná chindeétáʼan Jehová xíʼinndó ña̱ kanitáʼanndó ta kuisochíñundó xíʼin ñuʼú kán, kivi ndikóndó ta va̱ása kuumiíkandó ku̱a̱chi nu̱ú Jehová ni nu̱ú na̱ ñuu Israel. Tasaá taxi Jehová ñuʼú yóʼo ndaʼa̱ndó. 23 Soo tá ná va̱ása keʼéndó ña̱yóʼo, ki̱ʼvindó ku̱a̱chi nu̱ú Jehová. Ta ndakiʼinndó castigo xa̱ʼa̱ ña̱yóʼo. 24 Ña̱kán kivi keʼéndó ku̱a̱ʼá veʼe nu̱ú ñuʼú yóʼo ña̱ va̱ʼa kundoo na̱ se̱ʼendó, ta saátu kivi keʼéndó corra nu̱ú kuñuʼu kití sa̱na̱ndó, soo xíniñúʼu saxínundó ña̱ ni̱ka̱ʼa̱nndó keʼéndó”.

25 Na̱ se̱ʼe ta̱ Gad xíʼin na̱ se̱ʼe ta̱ Rubén ni̱ka̱ʼa̱nna ña̱yóʼo xíʼin ta̱ Moisés: “Keʼéndi̱ nda̱a̱ táki̱ʼva ni̱ka̱ʼún xíʼinndi̱ táta. 26 Chí Galaad kindo̱o se̱ʼendi̱, ñá síʼindi̱, si̱ndi̱ki̱ sa̱na̱ndi̱ xíʼin ndiʼika kití sa̱na̱ndi̱, 27 soo ndi̱ʼi̱ na̱ íyo tu̱ʼva kanitáʼan, ya̱ʼandi̱ chí yu̱ta nu̱ú Jehová ña̱ va̱ʼa ku̱ʼu̱nndi̱ nu̱ú ku̱a̱chi nda̱a̱ táki̱ʼva káchiún táta”.

28 Tasaá ta̱ Moisés xa̱ʼndara chiñu xa̱ʼa̱ na̱yóʼo nu̱ú ta̱ su̱tu̱ Eleazar, nu̱ú ta̱ Josué se̱ʼe ta̱ Nun ta saátu nu̱ú na̱ xi̱niʼi yichi̱ nu̱ú na̱ tribu na̱ ñuu Israel. 29 Ta ni̱ka̱ʼa̱nra xíʼinna: “Tá ná ya̱ʼa na̱ se̱ʼe ta̱ Gad xíʼin na̱ se̱ʼe ta̱ Rubén xíʼinndó chí yu̱ta Jordán, tá ná ku̱ʼu̱nna nu̱ú Jehová ña̱ va̱ʼa kanitáʼanna nu̱ú ku̱a̱chi, ta tá ná kuchiñundó ndakiʼinndó ñuʼú kán, saá kivi taxindó ñuʼú ña̱ Galaad ndaʼa̱na. 30 Soo tá ná va̱ása ku̱ʼu̱nna kanitáʼanna ta ná ya̱ʼana yu̱ta xíʼinndó, xíniñúʼu kundoona chí ñuʼú ña̱ Canaán xíʼinndó”.

31 Ña̱kán, na̱ se̱ʼe ta̱ Gad xíʼin na̱ se̱ʼe ta̱ Rubén ni̱ka̱ʼa̱nna ña̱yóʼo: “Keʼéndi̱ ndiʼi ña̱ ni̱ka̱ʼa̱n Jehová xíʼinndi̱. 32 Ku̱ʼu̱nvandi̱ kanitáʼanndi̱ ta ya̱ʼandi̱ chí yu̱ta nu̱ú Jehová ña̱ va̱ʼa xa̱a̱ndi̱ nu̱ú ñuʼú ña̱ Canaán, soo ñuʼú ña̱ ndakiʼinndi̱ ña̱ koo herenciandi̱ kúú ña̱ íyo chí táʼví ña̱ Jordán yóʼo”. 33 Tasaá, ta̱ Moisés ta̱xira ñuʼú nu̱ú xi̱xaʼndachíñu ta̱ Sehón ta̱ rey na̱ amorreo, ta saátu ñuʼú nu̱ú xi̱xaʼndachíñu ta̱ Og ta̱ rey ña̱ Basán ndaʼa̱ na̱ se̱ʼe ta̱ Gad, na̱ se̱ʼe ta̱ Rubén, xíʼin iin táʼví na̱ tribu ta̱ Manasés se̱ʼe ta̱ José. Na̱yóʼo nda̱kiʼinna ndiʼi ñuu náʼnu xíʼin ñuu válí ña̱ ni̱xi̱yo yatin kán.

34 Ta na̱ se̱ʼe ta̱ Gad nda̱sava̱ʼana ñuu Dibón, Atarot, Aroer, 35 Atrot-Sofán, Jazer, Jogbehá, 36 Bet-Nimrá xíʼin Bet-Harán, ña̱yóʼo xi̱kuu ñuu ña̱ kútu̱ní xi̱ndasi, ta ke̱ʼéna corra ña̱ yu̱u̱ nu̱ú kuñuʼu kití sa̱na̱na. 37 Ta na̱ se̱ʼe ta̱ Rubén nda̱sava̱ʼana ñuu Hesbón, Elealé, Quiryataim, 38 Nebo xíʼin Baal-Meón, ta na̱samana ki̱vi̱ ñuu yóʼo, saátu nda̱sava̱ʼana ñuu Sibmá. Na̱yóʼo ki̱xáʼana násamana ki̱vi̱ ñuu ña̱ nda̱sava̱ʼana.

39 Na̱ se̱ʼe ta̱ Makir se̱ʼe ta̱ Manasés ni̱xa̱ʼa̱nna chí Galaad ta ku̱chiñuna nda̱kiʼinnaña, ta ta̱vána ndiʼi na̱ amorreo na̱ ni̱xi̱yo kán. 40 Ña̱kán, ta̱ Moisés ta̱xira ñuʼú ña̱ Galaad ndaʼa̱ ta̱ Makir se̱ʼe ta̱ Manasés ta kán ki̱ndoora koora. 41 Ta ta̱ Jaír se̱ʼe ta̱ Manasés ni̱xa̱ʼa̱nra ta ku̱chiñura nda̱kiʼinra ñuu válí ña̱ ni̱xi̱yo chí Galaad, ta chi̱naníraña Havot-Jaír.* 42 Ta̱ Nóbah ni̱xa̱ʼa̱nra ta ku̱chiñura nda̱kiʼinra ñuu Quenat xíʼin ñuu válí ña̱ ni̱xi̱yo yatin kán ta ki̱vi̱ miíra chi̱núura xíʼinña ta chi̱naníraña: Nóbah.

33 Tá ke̱e na̱ ñuu Israel chí Egipto, xa̱a̱ tiʼvi tá tiʼvi ke̱ena ta ta̱ Moisés xíʼin ta̱ Aarón kúú na̱ xi̱niʼi yichi̱ nu̱úna. 2 Jehová ni̱ka̱ʼa̱nra xíʼin ta̱ Moisés ña̱ ná kaʼyira ki̱vi̱ lugar nu̱ú xi̱keena xíʼin nu̱ú xi̱xaa̱na. 3 Ki̱vi̱ 15 tí yo̱o̱ nu̱ú, ke̱ena chí Ramesés. Tá ni̱ya̱ʼa iin ki̱vi̱ ña̱ ke̱ʼé na̱ israelita vikó ña̱ Pascua, saá xi̱ni na̱ egipcio ña̱ ke̱ena ta ni loʼo va̱ása yíʼvina. 4 Tá ku̱u ña̱yóʼo, na̱ egipcio ñúʼuna sándu̱xu̱nna se̱ʼenu̱úna na̱ xa̱ʼní Jehová, saáchi Jehová ta̱xira castigo ndaʼa̱ na̱ ndióxi̱na.

5 Tasaá, na̱ israelita ke̱ena chí Ramesés ta ni̱xa̱a̱na xi̱kundoona chí Sucot. 6 Ke̱ena chí Sucot ta ni̱xa̱a̱na xi̱kundoona chí Ezam, nu̱ú xi̱kixáʼa ñuʼú yi̱chí. 7 Ke̱ena chí Ezam, ta nda̱ndikóna ta ku̱a̱ʼa̱nna chí Pihahirot, chí nu̱ú xi̱xitona Baal-Zefón, ta ni̱xa̱a̱na xi̱kundoona nu̱ú xítondaa Migdol. 8 Tándi̱ʼi, ke̱ena chí Pihahirot, ni̱ya̱ʼana ma̱ʼñú tá mar ta ni̱xa̱a̱na chí nu̱ú ñuʼú yi̱chí. U̱ni̱ ki̱vi̱ ni̱xi̱kana chí nu̱ú ñuʼú yi̱chí ña̱ Ezam ta ni̱xa̱a̱na xi̱kundoona chí Mará.*

9 Tasaá ke̱ena chí Mará* ta ni̱xa̱a̱na chí Elim. Kán ni̱xi̱yo 12 ndo̱ʼyo xíʼin 70 tú ñu̱u̱ ta kán xi̱kundoona. 10 Ke̱ena chí Elim ta ni̱xa̱a̱na xi̱kundoona yatin nu̱ú íyo tá mar Rojo. 11 Ke̱ena chí mar Rojo ta ni̱xa̱a̱na xi̱kundoona chí nu̱ú ñuʼú yi̱chí ña̱ Sin. 12 Ke̱ena nu̱ú ñuʼú yi̱chí ña̱ Sin ta ni̱xa̱a̱na xi̱kundoona chí Dofcá. 13 Ke̱ena chí Dofcá ta ni̱xa̱a̱na xi̱kundoona chí Alús. 14 Ke̱ena chí Alús ta ni̱xa̱a̱na xi̱kundoona chí Refidim, yóʼo kúú nu̱ú va̱ása níxi̱yo ti̱kui̱í koʼona. 15 Ke̱ena chí Refidim ta ni̱xa̱a̱na xi̱kundoona nu̱ú ñuʼú yi̱chí ña̱ Sinaí.

16 Ke̱ena nu̱ú ñuʼú yi̱chí ña̱ Sinaí ta ni̱xa̱a̱na xi̱kundoona chí Quibrot-Hataavá. 17 Ke̱ena chí Quibrot-Hataavá ta ni̱xa̱a̱na xi̱kundoona chí Hazerot. 18 Ke̱ena chí Hazerot ta ni̱xa̱a̱na xi̱kundoona chí Ritmá. 19 Ke̱ena chí Ritmá ta ni̱xa̱a̱na xi̱kundoona chí Rimón-Pérez. 20 Ke̱ena chí Rimón-Pérez ta ni̱xa̱a̱na xi̱kundoona chí Libná. 21 Ke̱ena chí Libná ta ni̱xa̱a̱na xi̱kundoona chí Risá. 22 Ke̱ena chí Risá ta ni̱xa̱a̱na xi̱kundoona chí Quehelatá. 23 Ke̱ena chí Quehelatá ta ni̱xa̱a̱na xi̱kundoona chí yuku̱ Séfer.

24 Ke̱ena chí yuku̱ Séfer ta ni̱xa̱a̱na xi̱kundoona chí Haradá. 25 Ke̱ena chí Haradá ta ni̱xa̱a̱na xi̱kundoona chí Maquelot. 26 Ke̱ena chí Maquelot ta ni̱xa̱a̱na xi̱kundoona chí Táhat. 27 Ke̱ena chí Táhat ta ni̱xa̱a̱na xi̱kundoona chí Taré. 28 Ke̱ena chí Taré ta ni̱xa̱a̱na xi̱kundoona chí Mitcá. 29 Ke̱ena chí Mitcá ta ni̱xa̱a̱na xi̱kundoona chí Hasmoná. 30 Ke̱ena chí Hasmoná ta ni̱xa̱a̱na xi̱kundoona chí Moserot. 31 Ke̱ena chí Moserot ta ni̱xa̱a̱na xi̱kundoona chí Bene-Jaacán. 32 Ke̱ena chí Bene-Jaacán ta ni̱xa̱a̱na xi̱kundoona chí Hor-Haguidgad. 33 Ke̱ena chí Hor-Haguidgad ta ni̱xa̱a̱na xi̱kundoona chí Jotbatá. 34 Ke̱ena chí Jotbatá ta ni̱xa̱a̱na xi̱kundoona chí Abroná. 35 Ke̱ena chí Abroná ta ni̱xa̱a̱na xi̱kundoona chí Ezión-Guéber. 36 Ke̱ena chí Ezión-Guéber ta ni̱xa̱a̱na xi̱kundoona chí nu̱ú ñuʼú yi̱chí ña̱ Zin á Cadés.

37 Tándi̱ʼi, ke̱ena chí Cadés ta ni̱xa̱a̱na xi̱kundoona chí yuku̱ Hor, ña̱ kíndo̱o yatin nu̱ú ndíʼi ñuʼú ña̱ Edom. 38 Tá ni̱ya̱ʼa 40 ku̱i̱ya̱ ña̱ ke̱e na̱ israelita chí ñuu Egipto, ki̱vi̱ nu̱ú tí yo̱o̱ u̱ʼu̱n, saá nda̱a ta̱ Aarón chí yuku̱ Hor nda̱a̱ táki̱ʼva ni̱ka̱ʼa̱n Jehová ta kán ni̱xi̱ʼi̱ra. 39 Ta̱ Aarón xi̱kuumiíra 123 ku̱i̱ya̱ tá ni̱xi̱ʼi̱ra chí yuku̱ Hor.

40 Tasaá, ta̱ rey ta̱ xi̱xaʼndachíñu chí Arad, ta̱ ni̱xi̱yo chí Négueb, ña̱ kíndo̱o nu̱ú ñuʼú ña̱ Canaán, ku̱ndaa̱-inira ña̱ ni̱xa̱a̱ na̱ israelita.

41 Tá ni̱ya̱ʼa tiempo, na̱ israelita ke̱ena chí yuku̱ Hor ta ni̱xa̱a̱na xi̱kundoona chí Zalmoná. 42 Ke̱ena chí Zalmoná ta ni̱xa̱a̱na xi̱kundoona chí Punón. 43 Ke̱ena chí Punón ta ni̱xa̱a̱na xi̱kundoona chí Obot. 44 Ke̱ena chí Obot ta ni̱xa̱a̱na xi̱kundoona chí Iyé-Abarim, ña̱ kíndo̱o yatin nu̱ú ndíʼi ñuʼú ña̱ Moab. 45 Ke̱ena chí Iyim ta ni̱xa̱a̱na xi̱kundoona chí Dibón-Gad. 46 Ke̱ena chí Dibón-Gad ta ni̱xa̱a̱na xi̱kundoona chí Almón-Diblataim. 47 Ke̱ena chí Almón-Diblataim ta ni̱xa̱a̱na xi̱kundoona chí yuku̱ ña̱ Abarim, ña̱ xítondaa chí Nebo. 48 Ta saáví ke̱ena chí yuku̱ ña̱ Abarim ta ni̱xa̱a̱na xi̱kundoona chí nu̱ú ñuʼú yichi̱ ña̱ Moab, yatin nu̱ú ndíkaa̱ yu̱ta Jordán, chí nu̱ú xítondaa Jericó. 49 Xi̱kundoona yatin yuʼú yu̱ta Jordán nu̱ú kíxáʼa Bet-Jesimot iinsaá nda̱a̱ Abel-Sitim, ña̱ kíndo̱o nu̱ú ñuʼú yi̱chí ña̱ Moab.

50 Jehová ni̱ka̱ʼa̱nra xíʼin ta̱ Moisés tá xi̱ndoona nu̱ú ñuʼú yi̱chí ña̱ Moab, yatin yu̱ta Jordán, nu̱ú xítondaa Jericó. Ta ka̱chira: 51 “Ña̱yóʼo ka̱ʼún xíʼin na̱ israelita: ‘Ya̱ʼandó yu̱ta Jordán ta ki̱ʼvindó nu̱ú ñuʼú ña̱ Canaán. 52 Xíniñúʼu tavándó ndiʼi na̱ ndóo nu̱ú ñuʼú kán ta sandíʼi-xa̱ʼa̱ndó ndiʼi yu̱u̱ ña̱ ndásakáʼnuna xíʼin ndióxi̱na ña̱ ka̱a, ta saátu xíniñúʼu sandíʼi-xa̱ʼa̱ndó ndiʼi nu̱ú ndásakáʼnuna ndióxi̱na ña̱ vatá. 53 Ki̱ʼvindó nu̱ú ñuʼú kán ta koondó nu̱úña, saáchi mií ña̱ ndixa taxii̱ña ndaʼa̱ndó. 54 Xíniñúʼu chikaa̱ndó suerte tá ná ndataʼvíndó ñuʼú kán xíʼin iin tá iin na̱ tribu. Tá ku̱a̱ʼá kúúna, ku̱a̱ʼáka ñuʼú xíniñúʼu ndakiʼinna, ta tá loʼo kúúna loʼoka ñuʼú xíniñúʼu ndakiʼinna. Ñuʼú ña̱ ná kana nu̱ú suerte, ña̱kán kúú ña̱ ndakiʼinvana. Ta herenciana koo ñuʼú ña̱ ndakiʼinna ti̱xin tribu na̱ yivána.

55 ”’Soo tá ná va̱ása tavándó na̱ yiví na̱ ndóo nu̱ú ñuʼú kán, na̱yóʼo koona nda̱a̱ táki̱ʼva íyo mi̱ʼí* ña̱ ki̱ta nu̱úndó á táki̱ʼva íyo iñú ña̱ ku̱i̱so* ku̱ñundó saáchi na̱yóʼo sa̱a̱-inina kunina ndóʼó tá ná koondó nu̱ú ñuʼúna. 56 Ta ña̱ nda̱kanixi̱níi̱ keʼíi̱ xíʼin na̱kán, xíʼin ndóʼóva keʼíi̱ña’”.

34 Jehová ni̱ka̱ʼa̱n tukura xíʼin ta̱ Moisés ta ka̱chira: 2 “Ña̱yóʼo ka̱ʼún xíʼin na̱ israelita: ‘Tá ná ki̱ʼvindó nu̱ú ñuʼú ña̱ Canaán, ña̱yóʼo koo herenciandó ta ña̱yóʼo koo xáʼñuña.*

3 ”’Xáʼñu ña̱ koo chí táʼví sur kixáʼaña nu̱ú ñuʼú yi̱chí ña̱ Zin ña̱ ndíkaa̱ síi̱n* ña̱ Edom. Ta chí nu̱ú kíta ñu̱ʼu,* xáʼñuña kixáʼaña nu̱ú ndíkaa̱ mar Salado* chí táʼví sur. 4 Ta xáʼñu ñuʼú yóʼo ka̱va̱ña ta ya̱ʼaña chí xi̱kí ña̱ Acrabim, ya̱ʼaña chí Zin ta xa̱a̱ña nda̱a̱ chí táʼví sur ña̱ Cadés-Barnea. Tasaá ya̱ʼaña chí Hazar-Addar ta xa̱a̱ña nda̱a̱ Azmón. 5 Chí Azmón, xáʼñu ñuʼú ndakiʼinña ku̱ʼu̱nña nda̱a̱ nu̱ú yáʼa ti̱kui̱í chí Egipto ta xa̱a̱ña nu̱ú ndíkaa̱ Mar.*

6 ”’Ta chí táʼví nu̱ú kíʼvi ñu̱ʼu, xáʼñu ñuʼú xa̱a̱ña nda̱a̱ chí yuʼú mar Grande.* Ña̱yóʼo koo xáʼñuña chí nu̱ú kíʼvi ñu̱ʼu.

7 ”’Ña̱yóʼo koo xáʼñu ñuʼú chí táʼví norte. Kixáʼaña chí mar Grande ta xa̱a̱ña nda̱a̱ chí yuku̱ Hor. 8 Chí yuku̱ Hor kixáʼa xáʼñu yóʼo, xa̱a̱ña nda̱a̱ Lebó-Hamat* ta ndiʼiña nda̱a̱ chí Zedad. 9 Xáʼñu yóʼo ndakiʼinña ku̱ʼu̱nña chí Zifrón ta xa̱a̱ña nda̱a̱ chí Hazar-Enán. Ña̱yóʼo koo xáʼñuña ña̱ koo chí norte.

10 ”’Ta xáʼñu ñuʼú ña̱ koo chí nu̱ú kíta ñu̱ʼu kixáʼaña chí Hazar-Enán ta xa̱a̱ña nda̱a̱ Sefam. 11 Ta chí Sefam keeña ta xa̱a̱ña nda̱a̱ Riblá ña̱ ndíkaa̱ chí nu̱ú kíta ñu̱ʼu chí nu̱ú ndíkaa̱ Ain. Tándi̱ʼi, nuuña ta ya̱ʼaña chí yuku̱ ña̱ ndíkaa̱ chí mar ña̱ Kinéret* chí nu̱ú kíta ñu̱ʼu. 12 Ta ya̱ʼaña chí Jordán ta xa̱a̱ña nda̱a̱ mar Salado. Ña̱yóʼo koo ñuʼúndó xíʼin xáʼñuña’”.

13 Tasaá ta̱ Moisés xa̱ʼndara chiñu yóʼo nu̱ú na̱ israelita ta ni̱ka̱ʼa̱nra xíʼinna: “Ña̱yóʼo kúú ñuʼú ña̱ chikaa̱ndó suerte xa̱ʼa̱, ña̱ xíniñúʼu ndakiʼin na̱ 9 tribu xíʼin iin táʼví na̱ tribu ta̱ Manasés, nda̱a̱ táki̱ʼva ni̱ka̱ʼa̱n Jehová. 14 Saáchi na̱ tribu ta̱ Rubén, na̱ tribu ta̱ Gad xíʼin iin táʼví na̱ tribu ta̱ Manasés, xa̱a̱ nda̱kiʼinvana ñuʼúna. 15 Xa̱a̱ nda̱kiʼinva na̱ u̱vi̱ tribu sava yóʼo ñuʼúna ña̱ kíndo̱o chí yuʼú yu̱ta Jordán yatin chí Jericó chí nu̱ú kíta ñu̱ʼu”.

16 Tasaá tuku ni̱ka̱ʼa̱n Jehová xíʼin ta̱ Moisés ta ka̱chira: 17 “Na̱yóʼo kúú na̱ ta̱a na̱ ndataʼví ñuʼú ña̱ ndakiʼinndó: ta̱ su̱tu̱ Eleazar xíʼin ta̱ Josué se̱ʼe ta̱ Nun. 18 Ta ndaka̱xinndó iin na̱ níʼi yichi̱ nu̱ú iin tá iin tribu, ña̱ va̱ʼa ndataʼvína ñuʼú ña̱ ndakiʼinndó. 19 Na̱yóʼo kúú na̱ ta̱a na̱ ndataʼví ñuʼú yóʼo: ta̱ Caleb se̱ʼe ta̱ Jefuné, ta̱ ke̱e ti̱xin tribu ta̱ Judá; 20 ta̱ Semuel se̱ʼe ta̱ Amihud, ta̱ ke̱e ti̱xin tribu na̱ se̱ʼe ta̱ Simeón; 21 ta̱ Elidad se̱ʼe ta̱ Kislón, ta̱ ke̱e ti̱xin tribu ta̱ Benjamín; 22 ta̱ Buquí se̱ʼe ta̱ Joglí, ta̱ ke̱e ti̱xin tribu na̱ se̱ʼe ta̱ Dan; 23 ta̱ Haniel se̱ʼe ta̱ Efod, ta̱ ke̱e ti̱xin tribu na̱ se̱ʼe ta̱ Manasés se̱ʼe ta̱ José; 24 ta̱ Quemuel se̱ʼe ta̱ Siftán, ta̱ ke̱e ti̱xin tribu na̱ se̱ʼe ta̱ Efraín; 25 ta̱ Elizafán se̱ʼe ta̱ Parnac, ta̱ ke̱e ti̱xin tribu na̱ se̱ʼe ta̱ Zabulón; 26 ta̱ Paltiel se̱ʼe ta̱ Azán, ta̱ ke̱e ti̱xin tribu na̱ se̱ʼe ta̱ Isacar; 27 ta̱ Ahihud se̱ʼe ta̱ Selomí, ta̱ ke̱e ti̱xin tribu na̱ se̱ʼe ta̱ Aser; 28 ta̱ Pedahel se̱ʼe ta̱ Amihud, ta̱ ke̱e ti̱xin tribu na̱ se̱ʼe ta̱ Neftalí”. 29 Na̱yóʼo kúú na̱ ta̱a na̱ nda̱kaxin Jehová ña̱ ndataʼvína ñuʼú ña̱ ndakiʼin na̱ israelita chí Canaán.

35 Jehová ni̱ka̱ʼa̱nra xíʼin ta̱ Moisés tá xi̱ndoona nu̱ú ñuʼú yi̱chí ña̱ Moab, yatin yu̱ta Jordán, nu̱ú xítondaa Jericó. Ka̱chira: 2 “Ka̱ʼa̱n xíʼin na̱ israelita ná ndataxina loʼo ñuu ña̱ ndakiʼinna ña̱ va̱ʼa kundoo na̱ levita, saátu xíniñúʼu taxina ñuʼú ña̱ íyo yita* nu̱ú ña̱ íyo yatin kán ndaʼa̱ na̱ levita. 3 Na̱ levita kundoona ñuu kán ta kití sa̱na̱na kundoorí nu̱ú ñuʼú ña̱ íyo yita nu̱ú ña̱ ndakiʼinna ta saátu kán kundoo ña̱ʼa ña̱ kúúmiína. 4 Ñuʼú ña̱ íyo yita nu̱ú ña̱ taxindó ndaʼa̱ na̱ levita, kixáʼaña chí sa̱tá nama̱ ña̱ íyo sa̱tá ñuundó, ta ki̱ʼva 445 metro* káni̱ kooña. 5 Ñuʼú ña̱ koo chí táʼví chí nu̱ú kíta ñu̱ʼu,* ki̱ʼva 890 metro* káni̱ kooña, ña̱ koo chí táʼví sur ki̱ʼva 890 metro káni̱ kooña, ña̱ koo chí táʼví chí nu̱ú kíʼvi ñu̱ʼu ki̱ʼva 890 metro káni̱ kooña ta ña̱ koo chí táʼví norte ki̱ʼva 890 metro káni̱ kooña ta ma̱ʼñú kundikaa̱ ñuu. Ña̱yóʼo koo ñuʼúna ña̱ íyo yita nu̱ú.

6 ”Xíniñúʼu taxindó 42 ñuu ndaʼa̱ na̱ levita, ta saátu taxindó inka 6 ñuu ndaʼa̱na nu̱ú kivi ku̱ʼu̱n iin na̱ xa̱ʼní, ña̱ va̱ʼa ka̱kuna. 7 Ña̱kán 48 koo ñuu ña̱ ndakiʼin na̱ levita, ta ña̱yóʼo kuumiíña ñuʼú ña̱ íyo yita nu̱ú. 8 Ti̱xin ñuʼú ña̱ ndakiʼinndó kúú nu̱ú kee ñuʼú ña̱ taxindó ndaʼa̱ na̱ levita. Tá ku̱a̱ʼá kúú na̱ tribundó ku̱a̱ʼá ñuʼú taxindó, tá loʼo kúú na̱ tribundó loʼo ñuʼú taxindó. Nda̱saa kúú mií ñuu ña̱ ndakiʼin iin tá iin tribu, saá koo ñuu ña̱ ndataxina ndaʼa̱ na̱ levita”.

9 Jehová ni̱ka̱ʼa̱nkara xíʼin ta̱ Moisés ta ka̱chira: 10 “Ña̱yóʼo ka̱ʼún xíʼin na̱ israelita: ‘Ya̱ʼandó yu̱ta Jordán ta ki̱ʼvindó nu̱ú ñuʼú ña̱ Canaán. 11 Xíniñúʼu ndaka̱xinndó ñuu nu̱ú kivi kama xa̱a̱ iin na̱ xa̱ʼní sana iin na̱ yiví ña̱ va̱ʼa ka̱kuna. 12 Ñuu yóʼo kúú nu̱ú kivi ku̱ʼu̱n na̱ xa̱ʼní ña̱ va̱ʼa ka̱kuna tá kúni̱ na̱ táʼan na̱ yiví na̱ ni̱xi̱ʼi̱ yóʼo kaʼnínana, tasaá va̱ása kuvi na̱ xa̱ʼní yóʼo nda̱a̱ ná ndatiin na̱ juez ku̱a̱chi xíʼinna. 13 I̱ñu̱ ñuu yóʼo kúú nu̱ú kivi ku̱ʼu̱n na̱ yiví ña̱ va̱ʼa ka̱kuna. 14 U̱ni̱ ñuu kooña chí táʼví yuʼú yu̱ta Jordán yóʼo ta u̱ni̱ña koo chí nu̱ú ñuʼú ña̱ Canaán, ta yóʼo kúú nu̱ú kivi ku̱ʼu̱n na̱ yiví ña̱ va̱ʼa ka̱kuna. 15 I̱ñu̱ ñuu yóʼo kúú nu̱ú kivi ku̱ʼu̱n iin na̱ yiví na̱ xa̱ʼní sana inkana ña̱ va̱ʼa ka̱kuna, kúúna na̱ ñuu Israel, na̱ ke̱e inka ñuu ta ndóona xíʼinndó á na̱ ki̱xaa̱ ndóo naʼa* xíʼinndó.

16 ”’Tá iin na̱ yiví ka̱nina inkana xíʼin iin ña̱ʼa ña̱ ka̱a ta ni̱xi̱ʼi̱ na̱yóʼo, na̱ ke̱ʼé ña̱yóʼo na̱ xáʼníva kúúna ta xíniñúʼu kuvina. 17 Ta tá ka̱ninana xíʼin iin yu̱u̱ ta ni̱xi̱ʼi̱ na̱yóʼo, na̱ ke̱ʼé ña̱yóʼo na̱ xáʼníva kúúna ta xíniñúʼu kuvina. 18 Ta tá ka̱ninana xíʼin iin yitu̱n ta ni̱xi̱ʼi̱na xíʼin túyóʼo, na̱ ke̱ʼé ña̱yóʼo na̱ xáʼníva kúúna ta xíniñúʼu kuvina.

19 ”’Na̱ táʼan na̱ yiví na̱ ni̱xi̱ʼi̱ kúú na̱ kaʼní na̱ xa̱ʼní yóʼo tá ná ndani̱ʼínana. 20 Tá iin na̱ yiví sáa̱-inina xínina inkana ta chi̱ndaʼánana ta ni̱xi̱ʼi̱na á tá sa̱kánana iin ña̱ʼa sa̱tána xa̱ʼa̱ ña̱ kúni̱na kaʼnínana 21 á ka̱ninana xa̱ʼa̱ ña̱ sáa̱-inina xíninana ta ni̱xi̱ʼi̱na, na̱ ke̱ʼé ña̱yóʼo xíniñúʼu kuvina chi na̱ xáʼní kúúna. Na̱ táʼan na̱ yiví na̱ ni̱xi̱ʼi̱ kúú na̱ kaʼní na̱ xa̱ʼní yóʼo tá ná ndani̱ʼínana.

22 ”’Soo tá iin na̱ yiví chi̱ndaʼána inkana á sa̱kánana iin ña̱ʼa sa̱tána, soo va̱ása sáa̱-inina xínina na̱yóʼo ta iin sana ku̱uña 23 á tá iin na̱ yiví va̱ása níxinina ta sa̱kánana iin yu̱u̱ sa̱tá iin na̱ yiví ta xa̱ʼnínana, soo va̱ása sáa̱-inina xínina na̱yóʼo ta ni va̱ása níxikuni̱na keʼéna ña̱yóʼo xíʼinna, 24 na̱ juez kúú na̱ xíniñúʼu ndatiin ku̱a̱chi xíʼin na̱ xa̱ʼní ta saátu xíʼin na̱ táʼan na̱ ni̱xi̱ʼi̱ yóʼo, ta keʼénaña nda̱a̱ táki̱ʼva íyo ña̱ xa̱a̱ ni̱ka̱ʼi̱n xíʼinndó. 25 Ta na̱ juez sakǎkuna na̱ xa̱ʼní yóʼo ndaʼa̱ na̱ táʼan na̱ ni̱xi̱ʼi̱ na̱ kúni̱ kaʼní-ñaʼá, ta ka̱ʼa̱nna xíʼinna ná ndikó tukuna ñuu nu̱ú xi̱nuna ña̱ va̱ʼa ka̱kuna, ta na̱yóʼo xíniñúʼu koona ñuu kán nda̱a̱ ná kuvi ta̱ su̱tu̱ káʼnu ta̱ ka̱a aceite tá yi̱i̱ xi̱ní.

26 ”’Soo tá na̱ xa̱ʼní yóʼo xa̱a̱ xíká ki̱tana ñuu nu̱ú xi̱nuna ni̱xa̱ʼa̱nna ña̱ va̱ʼa ka̱kuna 27 ta na̱ táʼan na̱ ni̱xi̱ʼi̱ yóʼo nda̱ni̱ʼínana ta xa̱ʼnínana, na̱ táʼan na̱yóʼo va̱ása kúúmiína ku̱a̱chi. 28 Saáchi na̱ xáʼní, xíniñúʼu koona ñuu nu̱ú xi̱nuna ni̱xa̱ʼa̱nna ña̱ va̱ʼa ka̱kuna nani tákuka ta̱ su̱tu̱. Soo tá ná kuvi ta̱ su̱tu̱ káʼnu yóʼo, saá kivi ndandikóna ñuuna. 29 Tá ná ndatiinndó ku̱a̱chi xíʼin iin na̱ xa̱ʼní, ña̱yóʼo kúú ña̱ xíniñúʼu kundiku̱n miíndó ta saátu na̱ se̱ʼendó na̱ kaku chí nu̱únínu nda̱a̱ ndáaka nu̱ú ná kundoona.

30 ”’Xíniñúʼu kaʼníndó nda̱a̱ ndáaka na̱ xa̱ʼní iin na̱ yiví tá ná koo na̱ xi̱ni ña̱yóʼo ta nátúʼunna xa̱ʼa̱ña, soo va̱ása kaʼníndóna tá iin kuití kúú na̱ nátúʼun xa̱ʼa̱ na̱yóʼo. 31 Tá kúni̱ iin na̱ xa̱ʼní chaʼvina ndóʼó ña̱ va̱ʼa ka̱kuna, va̱ása kiʼinndóña ndaʼa̱na saáchi xíniñúʼu kaʼnívandó na̱yóʼo. 32 Tá iin na̱ ni̱xa̱a̱ iin ñuu ña̱ va̱ʼa ka̱kuna kúni̱na chaʼvina ndóʼó ña̱ va̱ʼa ndandikóna ñuu nu̱ú ke̱ena soo ta̱ʼán kuvi ta̱ su̱tu̱ káʼnu, va̱ása kiʼinndóña ndaʼa̱na.

33 ”’Va̱ása xíniñúʼu ixayaku̱a̱ndó ñuʼú nu̱ú ndóondó xíʼin ni̱i̱, saáchi ni̱i̱ kúú ña̱ íxayaku̱a̱ ña̱yóʼo, ta tá ná kaʼnína iin na̱ yiví nu̱ú ñuʼúndó, iinlá ña̱ kivi ndasandii* ñuʼú yóʼo kúú ni̱i̱ na̱ xa̱ʼní. 34 Va̱ása xíniñúʼu ixayaku̱a̱ndó ñuʼú nu̱ú ndóondó nu̱ú íyoi̱ xíʼinndó, saáchi yi̱ʼi̱ Jehová íyoi̱ xíʼin ndiʼi ndóʼó na̱ ñuu Israel’”.

36 Ta na̱ xi̱niʼi yichi̱ nu̱ú na̱ se̱ʼe ta̱ Galaad, se̱ʼe ta̱ Makir, se̱ʼe ta̱ Manasés na̱ ke̱e ti̱xin na̱ veʼe na̱ se̱ʼe ta̱ José, ku̱yatinna ta ni̱ka̱ʼa̱nna xíʼin ta̱ Moisés ta saátu xíʼin na̱ xi̱niʼi yichi̱ nu̱ú na̱ israelita. 2 Ka̱china: “Jehová ni̱ka̱ʼa̱nra xíʼún táta ña̱ ná chika̱ún suerte ña̱ va̱ʼa ndataʼvíún ñuʼú xíʼin na̱ ñuu Israel ña̱ va̱ʼa xa̱a̱ña kooña herenciana, ta Jehová ni̱ka̱ʼa̱nra xíʼún ña̱ ná ndataxiún herencia ñanindi̱ ta̱ Zelofehad ndaʼa̱ ná se̱ʼera. 3 Tá ná tindaʼa̱ náyóʼo xíʼin na̱ ta̱a na̱ inka tribu na̱ íyo ti̱xin ñuu Israel, herencia ña̱ kuumií náyóʼo va̱ása kookaña herencia na̱ yivándi̱ ta xa̱a̱ña nduuña herencia na̱ tribu na̱ ta̱a na̱ ná tindaʼa̱ná xíʼin, tasaá va̱ása kookaña táʼan herenciandi̱. 4 Ta tá ná kixaa̱ ku̱i̱ya̱ ña̱ sa̱ñá na̱ ñuu Israel, herencia ña̱ kúúmií ná ñaʼá yóʼo xa̱a̱ña nduuña herencia na̱ tribu na̱ ta̱a na̱ ná tindaʼa̱ná xíʼin, tasaá va̱ása kookaña táʼan herencia na̱ tribu na̱ yivándi̱”.

5 Tasaá ni̱ka̱ʼa̱n ta̱ Moisés xíʼin na̱ israelita xa̱ʼa̱ chiñu ña̱ xa̱ʼnda Jehová ta ka̱chira: “Ña̱ ndixa kúúva ña̱ káʼa̱n na̱ tribu na̱ se̱ʼe ta̱ José. 6 Ña̱yóʼo kúú chiñu ña̱ xa̱ʼnda Jehová nu̱ú ná se̱ʼe ta̱ Zelofehad: ‘Náyóʼo kivi tindaʼa̱ná xíʼin nda̱a̱ ndáaka ta̱ kúni̱ná, soo ti̱xin tribu yivána xíniñúʼu kee ta̱yóʼo. 7 Herencia ña̱ kúúmií iin tá iin tribu ña̱ íyo ti̱xin ñuu Israel, va̱ása xíniñúʼu ndaya̱ʼaña ndaʼa̱ inka tribu, saáchi xíniñúʼu kundaana herencia ña̱ nda̱kiʼin na̱ tribuna. 8 Ndiʼi ná ñaʼá ná ndakiʼin herencia yivána, xíniñúʼu tindaʼa̱ná xíʼin iin ta̱a ta̱ ke̱e ti̱xin tribu yiváná tasaá va̱ása nasa̱ma herencia ña̱ nda̱kiʼin na̱ táʼan na̱ israelita na̱ xi̱ndoo xi̱naʼá. 9 Herencia ña̱ ndakiʼin iin tá iin tribu, va̱ása xíniñúʼu ndaya̱ʼaña ndaʼa̱ inkana, saáchi iin tá iin na̱ tribu na̱ íyo ti̱xin ñuu Israel xíniñúʼu kundaana herencia ña̱ nda̱kiʼinna’”.

10 Ná se̱ʼe ta̱ Zelofehad ke̱ʼéná nda̱a̱ táki̱ʼva ni̱ka̱ʼa̱n Jehová xíʼin ta̱ Moisés. 11 Xa̱ʼa̱ ña̱kán, ñá Mahlá, ñá Tirzá, ñá Hoglá, ñá Milcá xíʼin ñá Noá ti̱ndaʼa̱ná xíʼin na̱ se̱ʼe xitoná.* 12 Náyóʼo ti̱ndaʼa̱ná xíʼin na̱ ta̱a na̱ ke̱e ti̱xin na̱ veʼe ta̱ Manasés se̱ʼe ta̱ José ña̱ va̱ʼa ná kindo̱o herencianá ti̱xin tribu yiváná.

13 Ña̱yóʼo kúú chiñu ña̱ xa̱ʼnda Jehová xíʼin ley ña̱ ta̱xira ndaʼa̱ ta̱ Moisés ña̱ va̱ʼa kundiku̱n na̱ israelita ña̱yóʼo, ta ta̱xiraña tá ndóokana nu̱ú ñuʼú yi̱chí ña̱ Moab, yatin yu̱ta Jordán, nu̱ú xítondaa Jericó.