JOSUÉ

1 Tá ni̱xi̱ʼi̱ ta̱ Moisés ta̱ xi̱kachíñu nu̱ú Jehová, Jehová ni̱ka̱ʼa̱nra xíʼin se̱ʼe ta̱ Nun ta̱ xi̱naní Josué,* ta̱ xi̱chindeétáʼan xíʼin ta̱ Moisés: 2 “Ta̱ Moisés ta̱ xi̱kachíñu nu̱úi̱ xa̱a̱ ni̱xi̱ʼi̱vara. Ña̱kán xa̱a̱ koo tu̱ʼvaún ña̱ va̱ʼa ya̱ʼún yu̱ta Jordán xíʼin ndiʼi na̱ ñuu Israel, ta ki̱ʼvindó nu̱ú ñuʼú ña̱ taxii̱ ndaʼa̱ndó. 3 Nda̱a̱ ndáaka nu̱ú ná xa̱a̱ndó taxii̱ ñuʼú kán ndaʼa̱ndó, chi saá kúú ña̱ ki̱ndoi̱ xíʼin ta̱ Moisés. 4 Ñuʼú ña̱ taxii̱ ndaʼa̱ndó kixáʼaña chí nu̱ú ñuʼú yi̱chí ta xa̱a̱ña nda̱a̱ chí Líbano, ta saátu nda̱a̱ chí yu̱ta káʼnu tá naní Éufrates (iníísaá ñuʼú nu̱ú ndóo na̱ hitita) ta chí oeste* xa̱a̱ña nda̱a̱ mar Grande.* 5 Ndiʼi tiempo ña̱ ná kutakún, kǒo nda̱a̱ ni iin na̱ kuchiñu kanitáʼan xíʼún. Nda̱a̱ táki̱ʼva chi̱ndeétáʼi̱n xíʼin ta̱ Moisés saátu chindeétáʼi̱n xíʼin yóʼóva. Va̱ása sandákoondaʼíi̱ yóʼó ta ni va̱ása kuxíkái̱ nu̱ún. 6 Ndakú koo iniún ta va̱ása yi̱ʼvíún, saáchi yóʼó kúú ta̱ kuniʼi yichi̱ nu̱ú na̱ ñuu yóʼo ña̱ va̱ʼa ndakiʼinna ñuʼú ña̱ ki̱ndoi̱ taxii̱ ndaʼa̱ na̱ táʼanna na̱ xi̱ndoo xi̱naʼá.

7 ”Ña̱kán ndakú koo iniún, va̱ása yi̱ʼvíún ta viíní kundiku̱ún ndiʼi Ley ña̱ ni̱ka̱ʼa̱n ta̱ Moisés xíʼún, ta̱ xi̱kachíñu nu̱úi̱. Ndáyáʼviní ña̱ ná keʼún ña̱ káʼa̱n ña̱yóʼo chi saá kúú ña̱ viíní koo ña̱ ndaka̱xiún keʼún ni nda̱a̱ ndáaka nu̱ú ná ku̱ʼún. 8 Va̱ása xíniñúʼu sandákoún ña̱ kaʼviún ña̱ káʼa̱n Ley yóʼo. Ñuú xíʼin káʼñu* xíniñúʼu kaʼviúnña ta ndakanixi̱níún xa̱ʼa̱ ña̱ káʼa̱nña, ña̱ va̱ʼa viíní keʼún ndiʼi ña̱ ni̱ka̱ʼyi̱ nu̱úña, saáchi saá kúú ña̱ va̱ʼaní koo ndiʼi ña̱ keʼún ta na̱ʼún ña̱ kúúmiíún ña̱ ndíchi. 9 Yi̱ʼi̱ kúú ta̱ káʼa̱n xíʼún ña̱ ndakú koo iniún ta va̱ása yi̱ʼvíún. Ña̱kán va̱ása yi̱ʼvíún. Saáchi yi̱ʼi̱ Jehová, ta̱ kúú Ndióxi̱ miíún chindeétáʼanvai̱ xíʼún ni nda̱a̱ ndáaka nu̱ú ná ku̱ʼún”.

10 Tasaá ta̱ Josué ni̱ka̱ʼa̱nra xíʼin na̱ kíʼin kuenta xíʼin na̱ ñuu kán: 11 “Kúáʼanndó chí nu̱ú ndóo na̱ ñuu ta ka̱ʼa̱nndó ña̱yóʼo xíʼinna: ‘Xa̱a̱ ná koo tu̱ʼva ña̱ʼa ña̱ kuniñúʼundó, saáchi ti̱xin ña̱ u̱ni̱ ki̱vi̱ ya̱ʼayó yu̱ta Jordán, ña̱ va̱ʼa ki̱ʼviyó nu̱ú ñuʼú ña̱ ni̱ka̱ʼa̱n Jehová Ndióxi̱yó taxira ndaʼa̱yó ta ndakiʼinyóña ña̱ kooña kuentayó’”.

12 Soo ta̱ Josué ni̱ka̱ʼa̱nra ña̱yóʼo xíʼin na̱ tribu ta̱ Rubén, na̱ tribu ta̱ Gad ta saátu iin táʼví na̱ tribu ta̱ Manasés: 13 “Ndakaʼánndó chi ta̱ Moisés ta̱ xi̱kachíñu nu̱ú Jehová ni̱ka̱ʼa̱nra ña̱yóʼo xíʼinndó: ‘Jehová Ndióxi̱yó xa̱a̱ ta̱xira ñuʼú yóʼo ndaʼa̱ndó ña̱ va̱ʼa koondó nu̱úña. 14 Ná síʼindó xíʼin na̱ se̱ʼendó kindo̱ona koona nu̱ú ñuʼú ña̱ ta̱xi ta̱ Moisés ndaʼa̱ndó chí táʼví yu̱ta Jordán yóʼo ta saátu kití sa̱na̱ndó, soo ndiʼi ndóʼó na̱ xíni̱ní kanitáʼan kúú na̱ kunúu ku̱ʼu̱n nu̱ú na̱ ñanindó. Ndóʼó kúú na̱ chindeétáʼan xíʼinna 15 nda̱a̱ ná taxi Jehová nu̱ú kundoona nda̱a̱ táki̱ʼva ke̱ʼéra xíʼin ndóʼó, ta saátu na̱yóʼo ná ndakiʼinna ñuʼú ña̱ ni̱ka̱ʼa̱n Jehová Ndióxi̱ taxira ndaʼa̱na. Tasaá kúú ña̱ ndikóndó nu̱ú ñuʼú ña̱ xa̱a̱ nda̱kiʼinndó ña̱ va̱ʼa koondó nu̱úña, ñuʼú ña̱ ta̱xi ta̱ Moisés ta̱ xi̱kachíñu nu̱ú Jehová ndaʼa̱ndó, chí táʼví este* yu̱ta Jordán’”.

16 Ta na̱yóʼo nda̱kuiinna yuʼú ta̱ Josué ta ka̱china: “Keʼévandi̱ ndiʼi ña̱ ni̱ka̱ʼún xíʼinndi̱ ta ku̱ʼu̱nvandi̱ nda̱a̱ ndáaka nu̱ú ná chindaʼún ndi̱ʼi̱. 17 Kandíxavandi̱ ndiʼi ña̱ ni̱ka̱ʼún, nda̱a̱ táki̱ʼva ka̱ndíxandi̱ ndiʼi ña̱ ni̱ka̱ʼa̱n ta̱ Moisés. Ta mií Jehová Ndióxi̱yó ná chindeétáʼan xíʼún nda̱a̱ táki̱ʼva chi̱ndeétáʼanra xíʼin ta̱ Moisés. 18 Nda̱a̱ ndáaka na̱ ta̱a na̱ kǒo xíín kandíxa chiñu ña̱ xáʼndaún, xíniñúʼu kuvina. Ña̱kán xíniñúʼu ndakú koo iniún ta va̱ása yi̱ʼvíún”.

2 Tá ndóona chí Sitim, ta̱ Josué se̱ʼe ta̱ Nun chi̱ndaʼára u̱vi̱ na̱ ta̱a ña̱ ná ku̱ʼu̱nna kotona̱nína* ñuʼú ña̱ íyo chí Canaán. Ta ni̱ka̱ʼa̱nra xíʼinna: “Kúáʼanndó kotondó ndáa ki̱ʼva íyo ñuʼúna ta ndakaʼánndó ña̱ koto va̱ʼandó ndáa ki̱ʼva íyo ñuu Jericó”. Tasaá nda̱kiʼinna ku̱a̱ʼa̱nna ta ni̱xa̱a̱na veʼe iin ñaʼá ñá xi̱kisi̱ xíʼin ku̱a̱ʼání ta̱a, ñá xi̱naní Rahab, ta veʼe ñákán ki̱ndoona. 2 Soo íyo na̱ na̱túʼun xíʼin ta̱ rey ñuu Jericó ta ni̱ka̱ʼa̱nna xíʼinra: “Xíni̱ún, ki̱xaa̱ u̱vi̱ na̱ ta̱a na̱ ñuu Israel ña̱ kotona̱nína ñuu yóʼo”. 3 Tá ku̱ndaa̱-ini ta̱ rey ñuu Jericó xa̱ʼa̱ ña̱yóʼo, ni̱ka̱ʼa̱nra xíʼin na̱ káchíñu nu̱úra ña̱ ná ku̱ʼu̱nna ka̱ʼa̱nna xíʼin ñá Rahab: “Tavá na̱ ta̱a na̱ ki̱xaa̱ veʼún saáchi na̱ ki̱xaa̱ kotona̱ní ñuu yóʼo kúúna”.

4 Soo ñá Rahab chi̱se̱ʼéñá u̱vi̱ saá na̱ ta̱a kán. Ta ni̱ka̱ʼa̱nñá: “Ña̱ ndixa kúúva ña̱ ki̱xina veʼi̱, soo va̱ása xíni̱i̱ ndáa míí ke̱ena. 5 Soo tá xa̱a̱ ki̱xáʼa kúñuú ta kúma̱níka ndasi yéʼé ñuu, na̱ ta̱a yóʼo ke̱ena ku̱a̱ʼa̱nna. Va̱ása xíni̱i̱ ndáa míí ku̱a̱ʼa̱nna. Soo tá kama ná ku̱ʼu̱nndó sa̱tána ndakutáʼanvandó xíʼinna”. 6 (Soo ña̱ ke̱ʼéñá kúú ña̱ nda̱añá xíʼinna chí xi̱ní veʼe ta chi̱se̱ʼéñána tañu yu̱ku̱ ña̱ lino ña̱ ndóo kán). 7 Ña̱kán, na̱ ta̱a kán ki̱xáʼana ndíku̱nna ku̱a̱ʼa̱nna sa̱tána chí nu̱ú xi̱yaʼana yu̱ta Jordán. Tá ke̱e na̱yóʼo ku̱a̱ʼa̱nna sa̱tá na̱ ni̱xa̱ʼa̱n xi̱tona̱ní ñuu Jericó, ndi̱ku̱n nda̱si yéʼé ñuu kán.

8 Tá kúma̱níka ku̱su̱n na̱ ta̱a na̱ ni̱xa̱ʼa̱n xi̱tona̱ní ñuu kán, ñáyóʼo nda̱añá chí xi̱ní veʼe nu̱ú ndóona, 9 ta ni̱ka̱ʼa̱nñá xíʼinna: “Yi̱ʼi̱ kúnda̱a̱va-inii̱ ña̱ mií Jehová taxi ñuʼú yóʼo ndaʼa̱ndó, xa̱ʼa̱ ña̱kán yíʼviníndi̱ xínindi̱ ndóʼó. Ndiʼi na̱ ndóo ñuu yóʼo va̱ása kúnda̱a̱ka-inina ndáaña keʼéna xa̱ʼa̱ ña̱ yíʼvinína xínina ndóʼó. 10 Saáchi xi̱niso̱ʼondi̱ ndáa ki̱ʼva sa̱yíchi̱ Jehová ti̱kui̱í tá mar Rojo ña̱ va̱ʼa ni̱ya̱ʼandó tá ke̱endó ñuu Egipto, ta saátu ku̱ndaa̱-inindi̱ ndáaña ke̱ʼéndó xíʼin u̱vi̱ saá na̱ rey na̱ amorreo, ta̱ Sehón xíʼin ta̱ Og, na̱ xa̱ʼníndó chí inka táʼví yu̱ta Jordán. 11 Tá ku̱ndaa̱-inindi̱ xa̱ʼa̱ ña̱yóʼo, ni̱yi̱ʼvíníndi̱, ta vitin kǒoka na̱ kúni̱ kanitáʼan xíʼinndó, saáchi Jehová Ndióxi̱ndó kúúra Ndióxi̱ chí ndiví ta saátu nu̱ú ñuʼú yóʼo. 12 Ta vitin, chinaʼándó* xa̱ʼa̱ ki̱vi̱ Jehová ña̱ na̱ʼa̱ndó ña̱ ndixaní kúʼvi̱-inindó* xínindó na̱ veʼi̱ nda̱a̱ táki̱ʼva ni̱na̱ʼi̱ ña̱ ndixaní kúʼvi̱-inii̱ xíni̱i̱ ndóʼó; ta taxindó iin seña nu̱úi̱ ña̱ va̱ʼa kunda̱a̱-inii̱ ña̱ ndixa keʼéndó ña̱yóʼo. 13 Xíniñúʼu ixakáʼnu-inindó xa̱ʼa̱ yivái̱, xa̱ʼa̱ siʼíi̱, xa̱ʼa̱ ku̱ʼvai̱, xa̱ʼa̱ ku̱ʼvi̱i̱ ta saátu xa̱ʼa̱ ndiʼi na̱ veʼena, ta xíniñúʼu sakǎkundó ndi̱ʼi̱ ña̱ va̱ʼa va̱ása kuvindi̱”.

14 Tasaá na̱ ta̱a kán ni̱ka̱ʼa̱nna xíʼinñá: “Tá xíniñúʼu kuvindi̱ xa̱ʼa̱ndó keʼévandi̱ña, tá ná kǒo ka̱ʼa̱nndó ndáa xa̱ʼa̱ kúú ña̱ ki̱xindi̱, saá na̱ʼa̱ndi̱ ña̱ ndixaní kúʼvi̱-inindi̱* xínindi̱ ndóʼó ta nda̱kú koo inindi̱ xíʼinndó tá ná ndataxi Jehová ñuʼú yóʼo ndaʼa̱ndi̱”. 15 Tándi̱ʼi ni̱ka̱ʼa̱nna ña̱yóʼo xíʼinñá, ñákán ka̱tikaañá iin yoʼo̱ chí ventana veʼeñá ña̱ va̱ʼa nuuna, saáchi veʼeñá xi̱ndichiña chí nu̱ú íyo nama̱ ña̱ ñuu kán. 16 Tasaá ni̱ka̱ʼa̱nñá xíʼinna: “Kúáʼanndó chí yuku̱ ta kán koose̱ʼéndó* u̱ni̱ ki̱vi̱, tasaá na̱ ndíku̱n sa̱tándó va̱ása ndani̱ʼína ndóʼó, tá ná ndikó na̱yóʼo, saá kivi ku̱ʼu̱nndó”.

17 Ta na̱ ta̱a yóʼo ni̱ka̱ʼa̱nna xíʼinñá: “Keʼévandi̱ ña̱ ni̱ka̱ʼa̱nndi̱ xíʼún. 18 Soo tá ná ki̱ʼvindi̱ ñuu yóʼo, xíniñúʼu katikaún yoʼo̱ kúáʼa yóʼo chí ventana nu̱ú sanúún ndi̱ʼi̱. Ta ndakayaún na̱ veʼún ná koona xíʼún, tá kúú yiváún, siʼún, ku̱ʼvaún, ku̱ʼvi̱ún xíʼin nda̱a̱ ndáaka na̱ táʼún. 19 Soo tá ná kita iin na̱yóʼo chí ke̱ʼe,* ku̱a̱chi miína kooña tá ná kuvina ta ndi̱ʼi̱ va̱ása kuumiíkandi̱ ku̱a̱chi xa̱ʼa̱ ña̱yóʼo. Soo tá íyo ña̱ ndo̱ʼona nani ndíkaa̱na ini veʼún, ndi̱ʼi̱ kúú na̱ kuumií ku̱a̱chi tá ná kuvina. 20 Soo tá ná natúʼún xíʼin inkana ndáa xa̱ʼa̱ kúú ña̱ ki̱xindi̱, va̱ása kuumiíkandi̱ ku̱a̱chi xa̱ʼa̱ ña̱ ni̱ka̱ʼún xíʼinndi̱ chinaʼándi̱ xa̱ʼa̱”. 21 Ta ñákán ni̱ka̱ʼa̱nñá xíʼinna: “Nda̱a̱ táki̱ʼva ni̱ka̱ʼa̱nndó saá ná koo”.

Tasaá ni̱nda̱yíñána ta nda̱kiʼinna ku̱a̱ʼa̱nna. Tándi̱ʼi, ñá Rahab ka̱túnñá yoʼo̱ kúáʼa kán ventana veʼeñá. 22 Ta na̱kán nda̱kiʼinna ku̱a̱ʼa̱nna chí yuku̱ ta kán ki̱ndoona u̱ni̱ ki̱vi̱, nda̱a̱ tá ndi̱kó na̱ ta̱a ñuu Jericó na̱ ni̱xa̱ʼa̱n na̱ndukúñaʼá. Ta ni na̱ndukúnína na̱yóʼo ndiʼi yichi̱ nu̱ú kivi ku̱ʼu̱nna, kǒona níndani̱ʼína. 23 Tándi̱ʼi, u̱vi̱ saá na̱ ta̱a yóʼo ke̱ena chí yuku̱, ni̱ya̱ʼana yu̱ta Jordán ta ni̱xa̱a̱na nu̱ú ta̱ Josué se̱ʼe ta̱ Nun, ta na̱túʼunna xíʼinra xa̱ʼa̱ ndiʼi ña̱ ku̱u. 24 Ta ni̱ka̱ʼa̱nna xíʼin ta̱ Josué: “Jehová xa̱a̱ nda̱taxivara ñuʼú yóʼo ndaʼa̱yó. Ndiʼi na̱ ndóo nu̱úña yíʼvinína xínina miíyó ta ni kǒo xíni̱kana ndáaña keʼéna”.

3 Tasaá ya̱chi̱ní nda̱koo ta̱ Josué, ta miíra xíʼin ndiʼi na̱ ñuu Israel ke̱ena chí Sitim ta ni̱xa̱a̱na chí nu̱ú ndíkaa̱ yu̱ta Jordán. Ta kán ki̱ndoona ni̱ki̱si̱na.

2 Tá ni̱ya̱ʼa u̱ni̱ ki̱vi̱, na̱ kíʼin kuenta xíʼin na̱ ñuu ni̱xa̱ʼa̱nna chí nu̱ú ndóo ndiʼina 3 ta ni̱ka̱ʼa̱nna ña̱yóʼo xíʼinna: “Tá ná kunindó ña̱ ndakiʼin na̱ su̱tu̱ levita arca ña̱ trato Jehová Ndióxi̱yó ku̱ʼu̱n xíʼinna, kundiku̱nndó ku̱ʼu̱nndó sa̱tána. 4 Soo ki̱ʼva 900 metro* xíniñúʼu xíká kundiku̱nndó ku̱ʼu̱nndó ta va̱ása kuyatinníkandó, ña̱ va̱ʼa kunda̱a̱-inindó ndáa míí ku̱ʼu̱nndó saáchi nda̱a̱ ni iin yichi̱ ta̱ʼán ku̱ʼu̱nndó chí yichi̱ yóʼo”.

5 Tasaá, ta̱ Josué ni̱ka̱ʼa̱nra xíʼin na̱ ñuu kán: “Koo tu̱ʼvandó,* saáchi taa̱n kunindó ña̱ keʼé Jehová ña̱ʼa ña̱ ndakanda̱-inindó* xíʼin”.

6 Tándi̱ʼi, ta̱ Josué ni̱ka̱ʼa̱nra xíʼin na̱ su̱tu̱: “Ndaniʼindó arca ña̱ trato ta ndakunúundó ku̱ʼu̱nndó nu̱ú na̱ ñuu”. Ta na̱kán nda̱niʼina arca ña̱ trato ta nda̱kunúuna ku̱a̱ʼa̱nna nu̱ú na̱ ñuu.

7 Saá ni̱ka̱ʼa̱n Jehová xíʼin ta̱ Josué: “Ki̱vi̱ vitin kixáʼa na̱ ñuu Israel ixato̱ʼóna yóʼó, saáchi kunina ña̱ chindeétáʼi̱n xíʼún nda̱a̱ táki̱ʼva chi̱ndeétáʼi̱n xíʼin ta̱ Moisés. 8 Xíniñúʼu ka̱ʼún ña̱yóʼo xíʼin na̱ su̱tu̱ na̱ ndíso arca ña̱ trato: ‘Tá ná xa̱a̱ndó yuʼú yu̱ta Jordán, ki̱ʼvindó inirá ta kán kunditandó’”.

9 Tasaá, ta̱ Josué ni̱ka̱ʼa̱nra xíʼin na̱ ñuu Israel: “Naʼandó ta kuniso̱ʼondó tu̱ʼun ña̱ ni̱ka̱ʼa̱n Jehová Ndióxi̱yó xíʼi̱n”. 10 Ña̱kán ni̱ka̱ʼa̱n ta̱ Josué xíʼinna: “Ña̱yóʼo kúú ña̱ kuu ña̱ va̱ʼa kunda̱a̱-inindó ña̱ mií Ndióxi̱ ta̱ táku kúú ta̱ íyo xíʼinyó, ta miíra kúú ta̱ chindeétáʼan xíʼinyó ña̱ va̱ʼa ndakiʼinyó ñuʼú na̱ cananeo, na̱ hitita, na̱ heveo, na̱ perizita, na̱ guirgaseo, na̱ amorreo xíʼin na̱ jebuseo. 11 Siʼna na̱ ndíso arca ña̱ trato tú kúú kuenta Ndióxi̱ ta̱ xáʼndachíñu nu̱ú iníísaá ñuʼú kúú na̱ ki̱ʼvi ini yu̱ta Jordán. 12 Ta vitin, ti̱xin 12 saá tribu na̱ ñuu Israel ndaka̱xinndó 12 na̱ ta̱a, iinna iin iin tribu. 13 Tá ná ki̱ʼvi xa̱ʼa̱ na̱ su̱tu̱ na̱ ndíso arca Jehová (ta̱ xáʼndachíñu nu̱ú iníísaá ñuʼú) ini yu̱ta Jordán, ti̱kui̱í tá yu̱ta Jordán tá va̱xi chí ni̱nu va̱ása ya̱ʼakará”.

14 Ña̱kán, tá sa̱ndákoo na̱ ñuu Israel nu̱ú xi̱ndoona yatin yuʼú yu̱ta Jordán ta nda̱kiʼinna ku̱a̱ʼa̱nna, na̱ su̱tu̱ na̱ ndíso arca ña̱ trato kúú na̱ kánuu ku̱a̱ʼa̱n nu̱úna. 15 (Tiempo tá xi̱sakéena,* tá yu̱ta Jordán xi̱xaʼnunírá). Tá ni̱xa̱a̱ na̱ su̱tu̱ na̱ ndíso Arca chí yuʼú yu̱ta Jordán ta chi̱kaa̱na xa̱ʼa̱na inirá, 16 ti̱kui̱í tá va̱xi chí ni̱nu va̱ása níxinukará. Saáchi chí ñuu Adán, ña̱ kíndo̱o yatin Zaretán, ndu̱urá nda̱a̱ táki̱ʼva íyo iin nama̱. Ña̱kán ti̱kui̱í tá ku̱a̱ʼa̱n chí mar Arabá á mar Salado* ni̱yi̱chi̱vará. Xa̱ʼa̱ ña̱ ni̱yi̱chi̱rá, na̱ ñuu yóʼo va̱ʼa ni̱ya̱ʼana chí inka xiyo, chí nu̱ú ndíkaa̱ ñuu Jericó. 17 Nani ndíta na̱ su̱tu̱ na̱ ndíso arca ña̱ trato tú kúú kuenta Jehová nu̱ú ñuʼú yi̱chí ma̱ʼñú yu̱ta Jordán, ndiʼi na̱ ñuu Israel ki̱xáʼana yáʼana chí inka xiyo. Ta kán xi̱ndita na̱ su̱tu̱ nda̱a̱ tá ndi̱ʼi ni̱ya̱ʼa ndiʼi na̱ ñuu kán.

4 Ndi̱ku̱n tá ndi̱ʼi ni̱ya̱ʼa na̱ ñuu Israel yu̱ta Jordán, saá ni̱ka̱ʼa̱n Jehová xíʼin ta̱ Josué: 2 “Ti̱xin 12 saá tribu na̱ ñuu Israel, ndaka̱xinndó 12 na̱ ta̱a, iinna iin iin tribu. 3 Ta ka̱ʼa̱nndó ña̱yóʼo xíʼinna: ‘Ndakayandó 12 yu̱u̱ ma̱ʼñú yu̱ta Jordán chí nu̱ú ndíta na̱ su̱tu̱. Ndakiʼinndóña ku̱ʼu̱n xíʼinndó ta chindoondóña nu̱ú ku̱su̱nndó ñuú vitin’”.

4 Tasaá ta̱ Josué ka̱nara 12 saá na̱ ta̱a na̱ nda̱kaxinra, na̱ ka̱na ti̱xin iin tá iin tribu na̱ ñuu Israel, 5 ta ni̱ka̱ʼa̱nra xíʼinna: “Kúáʼanndó chí ma̱ʼñú yu̱ta Jordán chí nu̱ú ndíta na̱ su̱tu̱ na̱ ndíso Arca Jehová Ndióxi̱yó, ta iin tá iinndó ndakiʼinndó iin yu̱u̱ kundisondó kixindó, ta nda̱a̱ táki̱ʼva 12 kúú tribu na̱ ñuu Israel saátu ná koo yu̱u̱ yóʼo, 6 ña̱ va̱ʼa kooña iin seña nu̱úndó. Tá chí nu̱únínu ná ka̱ʼa̱n na̱ va̱lí se̱ʼendó xíʼinndó ‘¿Ndáa xa̱ʼa̱ kúú ña̱ ndóo yu̱u̱ yóʼo?’, 7 ña̱yóʼo ka̱ʼa̱nndó xíʼinna ‘Ndóoña yóʼo saáchi tá ni̱ya̱ʼa na̱ su̱tu̱ na̱ ndíso arca ña̱ trato tú kúú kuenta Jehová ini yu̱ta Jordán, ti̱kui̱í tá yu̱ta yóʼo ni̱yi̱chi̱vará. Ña̱kán, yu̱u̱ yóʼo chindeétáʼanña xíʼin na̱ ñuu Israel ña̱ va̱ʼa ndakaʼánna xa̱ʼa̱ ña̱ ku̱u yóʼo ndiʼi tiempo’”.

8 Ña̱kán na̱ ñuu Israel ke̱ʼéna ndiʼi ña̱ ni̱ka̱ʼa̱n ta̱ Josué. Ta 12 saá na̱ ta̱a kán, na̱ ka̱na ti̱xin iin tá iin tribu na̱ ñuu Israel nda̱kiʼinna 12 yu̱u̱ ma̱ʼñú yu̱ta Jordán, nda̱a̱ táki̱ʼva ni̱ka̱ʼa̱n mií Jehová xíʼin ta̱ Josué, ta níʼina yu̱u̱ yóʼo ni̱xa̱ʼa̱n xíʼinna chí nu̱ú ku̱su̱nna, ta kán chi̱ndoonaña.

9 Ta̱ Josué chi̱ndoora 12 yu̱u̱ ma̱ʼñú yu̱ta Jordán, nu̱ú xi̱ndita na̱ su̱tu̱ na̱ xi̱ndiso arca ña̱ trato, ta kán ndóo yu̱u̱ yóʼo nda̱a̱ ki̱vi̱ vitin.*

10 Ta na̱ su̱tu̱ na̱ ndíso Arca xi̱kunditana ma̱ʼñú yu̱ta Jordán, ta kán xi̱nditana nda̱a̱ tá ndi̱ʼi ke̱ʼé na̱ ñuu Israel ndiʼi ña̱ ni̱ka̱ʼa̱n Jehová xíʼin ta̱ Josué, ta saátu nda̱a̱ táki̱ʼva íyo ña̱ ni̱ka̱ʼa̱n ta̱ Moisés xíʼin ta̱ Josué. Na̱ ñuu Israel chi̱kaa̱nína ndee̱ ña̱ kama ya̱ʼana chí inka táʼví yuʼú yu̱ta. 11 Tá xa̱a̱ ndi̱ʼi ni̱ya̱ʼa ndiʼi na̱ ñuu chí inka táʼví yuʼú yu̱ta, saátu na̱ su̱tu̱ na̱ ndíso Arca Jehová ni̱ya̱ʼana ta ndiʼi na̱ ñuu xi̱ni tá ku̱u ña̱yóʼo. 12 Ta na̱ tribu ta̱ Rubén, na̱ tribu ta̱ Gad xíʼin iin táʼví loʼo na̱ tribu ta̱ Manasés kúú na̱ kánuu ku̱a̱ʼa̱n nu̱ú ndiʼika na̱ ñuu Israel, nda̱a̱ táki̱ʼva ni̱ka̱ʼa̱n ta̱ Moisés xíʼinna. 13 Ta ki̱ʼva 40,000 kúú na̱ soldado na̱ xa̱a̱ íyo tu̱ʼva ña̱ kanitáʼanna ta ni̱ya̱ʼana ku̱a̱ʼa̱nna chí yoso̱ yi̱chí yatin ñuu Jericó ta mií Jehová kúú ta̱ xi̱chindeétáʼan xíʼinna.

14 Ta ki̱vi̱ kán na̱ ñuu Israel xi̱nina ña̱ mií Jehová kúú ta̱ chíndeétáʼan xíʼin ta̱ Josué, ta xa̱ʼa̱ ña̱yóʼo i̱xato̱ʼónínara ndiʼi tiempo ña̱ xi̱takura, nda̱a̱ táki̱ʼva i̱xato̱ʼónína ta̱ Moisés.

15 Tasaá ni̱ka̱ʼa̱n Jehová xíʼin ta̱ Josué: 16 “Ka̱ʼa̱n xíʼin na̱ su̱tu̱ na̱ ndíso arca ña̱ trato ña̱ ná keena ini yu̱ta Jordán”. 17 Ña̱kán ni̱ka̱ʼa̱n ta̱ Josué ña̱yóʼo xíʼin na̱ su̱tu̱: “Keendó yu̱ta Jordán”. 18 Ndi̱ku̱n tá ke̱e na̱ su̱tu̱ na̱ ndíso arca ña̱ trato tú kúú kuenta Jehová ma̱ʼñú yu̱ta Jordán ta ni̱xa̱ñi̱na* nu̱ú ñuʼú yi̱chí, ti̱kui̱í tá yu̱ta Jordán ki̱xáʼa xínu tukurá.

19 Ta na̱ ñuu Israel ni̱ya̱ʼana yu̱ta Jordán ki̱vi̱ u̱xu̱ tí yo̱o̱ nu̱ú ta xi̱kundoona chí Guilgal, chí táʼví este* ña̱ ñuu Jericó.

20 Tasaá nda̱kiʼin ta̱ Josué 12 saá yu̱u̱ ña̱ ta̱vána ini yu̱ta Jordán ta chi̱ndooraña chí Guilgal. 21 Tasaá ni̱ka̱ʼa̱n ta̱ Josué xíʼin na̱ ñuu Israel: “Tá chí nu̱únínu ná ka̱ʼa̱n na̱ va̱lí se̱ʼendó xíʼinndó ‘¿Ndáa xa̱ʼa̱ kúú ña̱ ndóo yu̱u̱ yóʼo?’, 22 xíniñúʼu ka̱ʼa̱nndó ña̱yóʼo xíʼin na̱ va̱lí se̱ʼendó ‘Na̱ ñuu Israel va̱ʼa ni̱ya̱ʼana yu̱ta Jordán 23 saáchi Jehová Ndióxi̱yó sa̱yíchi̱ra ti̱kui̱í yu̱ta Jordán ña̱ va̱ʼa ni̱ya̱ʼana, nda̱a̱ táki̱ʼva ke̱ʼé mií Jehová Ndióxi̱yó tá sa̱yíchi̱ra mar Rojo ni̱ya̱ʼandi̱. 24 Ke̱ʼéra ña̱yóʼo ña̱ va̱ʼa ndiʼi na̱ ñuu na̱ íyo nu̱ú ñuʼú ná kunda̱a̱-inina ña̱ kúúmiíní Jehová ndee̱, ta saátu ña̱ va̱ʼa ndiʼi tiempo ndasakáʼnundó Jehová Ndióxi̱yó’”.

5 Ta ndiʼi na̱ rey na̱ amorreo na̱ xi̱ndoo chí táʼví oeste* tá yu̱ta Jordán ta saátu ndiʼi na̱ rey na̱ cananeo na̱ xi̱ndoo yatin yuʼú tá mar, ku̱ndaa̱-inina ña̱ sa̱yíchi̱ Jehová ti̱kui̱í yu̱ta Jordán ña̱ va̱ʼa ni̱ya̱ʼa na̱ ñuu Israel. Xa̱ʼa̱ ña̱yóʼo ki̱xáʼa ni̱yi̱ʼvínína xi̱nina na̱ ñuu Israel ta va̱ása níkunda̱a̱ka-inina ndáaña keʼéna.

2 Tiempo saá, Jehová ni̱ka̱ʼa̱nra xíʼin ta̱ Josué: “Kuniñúʼu yu̱u̱ ña̱ téʼé* ta keʼún cuchillo ña̱ va̱ʼa ta̱ʼnda̱ tuku nu̱ú yi̱i̱ na̱ ta̱a ñuu Israel”. 3 Xa̱ʼa̱ ña̱kán ta̱ Josué xi̱niñúʼura yu̱u̱ ña̱ téʼé ña̱ va̱ʼa ke̱ʼéra cuchillo ta xa̱ʼndara nu̱ú yi̱i̱ na̱ ta̱a ñuu Israel chí Guibeat-Haaralot. 4 Ta̱ Josué xa̱ʼndara nu̱ú yi̱i̱na saáchi ndiʼi na̱ ta̱a na̱ ñuu kán na̱ ke̱e chí Egipto na̱ xi̱xika nu̱ú ku̱a̱chi, xa̱a̱ ni̱xi̱ʼi̱vana chí nu̱ú ñuʼú yi̱chí nu̱ú ni̱xi̱kana nani tá ke̱ena chí Egipto. 5 Ndiʼi na̱ ke̱e chí ñuu Egipto ni̱ta̱ʼnda̱va nu̱ú yi̱i̱na, soo ndiʼi na̱ ka̱ku ndiʼi tiempo ña̱ ni̱xi̱kana chí nu̱ú ñuʼú yi̱chí nani tá ke̱ena ñuu Egipto, nda̱a̱ ni iin na̱yóʼo va̱ása níta̱ʼnda̱ nu̱ú yi̱i̱na. 6 Na̱ ñuu Israel ni̱xi̱kana ki̱ʼva 40 ku̱i̱ya̱ chí nu̱ú ñuʼú yi̱chí, nda̱a̱ tá ni̱xi̱ʼi̱ ndiʼi na̱ ta̱a na̱ ni̱xi̱ka nu̱ú ku̱a̱chi na̱ ke̱e chí ñuu Egipto na̱ va̱ása níkandíxa ña̱ ni̱ka̱ʼa̱n Jehová. Ña̱kán Jehová ni̱ka̱ʼa̱nra xíʼin na̱ ta̱a yóʼo ña̱ va̱ása taxira ki̱ʼvina nu̱ú ñuʼú ña̱ va̱ʼaní kána ña̱ʼa nu̱ú,* ña̱ ni̱ka̱ʼa̱n Jehová taxira ndaʼa̱ na̱ táʼanndi̱ na̱ xi̱ndoo xi̱naʼá. 7 Xa̱ʼa̱ ña̱yóʼo ta̱xiraña ndaʼa̱ se̱ʼena, ña̱kán xa̱ʼnda ta̱ Josué nu̱ú yi̱i̱na, saáchi ta̱ʼán ta̱ʼnda̱ví nu̱ú yi̱i̱na.

8 Tándi̱ʼi ni̱ta̱ʼnda̱ nu̱ú yi̱i̱ ndiʼi na̱ ta̱a ñuu Israel, na̱ ñuu yóʼo ki̱ndoona kán nda̱a̱ tá nda̱ʼa ndiʼi na̱ ta̱a yóʼo.

9 Tasaá ni̱ka̱ʼa̱n Jehová xíʼin ta̱ Josué: “Xa̱ʼa̱ ña̱ ke̱ʼíi̱ vitin, va̱ása kusi̱kindaaka na̱ ñuu Egipto ndóʼó”. Ña̱kán lugar kán nda̱kunaníña Guilgal,* ta saá naníña nda̱a̱ ki̱vi̱ vitin.*

10 Ta na̱ ñuu Israel nda̱kundeéna xi̱ndoona chí Guilgal, chí nu̱ú ñuʼú yi̱chí ña̱ íyo yatin ñuu Jericó. Ta kán ke̱ʼéna vikó ña̱ Pascua tá xi̱kuaá ña̱ ki̱vi̱ 14 yo̱o̱ kán. 11 Tándi̱ʼi vikó ña̱ Pascua, mií ki̱vi̱ saá ki̱xáʼana xíxina ña̱ xi̱kana nu̱ú ñuʼú kán: si̱ta̱váʼa ña̱ kǒo yuxa̱n iyá* xíʼin ta saátu trigo* ña̱ ya̱tan. 12 Ña̱kán, ki̱vi̱ ña̱ ki̱xáʼana xíxina ña̱ʼa ña̱ xi̱kana nu̱ú ñuʼú kán va̱ása níxi̱yoka maná. Ku̱i̱ya̱ saá ki̱xáʼa na̱ ñuu Israel xíxina ña̱ʼa ña̱ xi̱kana chí Canaán, chi kǒoka maná níxi̱yo.

13 Tá xíka ta̱ Josué yatin ñuu Jericó, xi̱nira ña̱ níndichi iin ta̱ ta̱a ta níʼira iin espada. Tasaá ta̱ Josué ku̱yatinra nu̱úra ta ni̱nda̱ka̱tu̱ʼunrara: “¿Á xíʼin ndi̱ʼi̱ kítáʼún, á xíʼin na̱ sáa̱-ini xíni ndi̱ʼi̱va kítáʼún?”. 14 Ta ta̱kán nda̱kuiinra: “Va̱ása, chi yi̱ʼi̱ ki̱xai̱ yóʼo xa̱ʼa̱ ña̱ kúi̱ ta̱ xáʼndachíñu nu̱ú na̱ soldado* Jehová”. Tá xi̱niso̱ʼo ta̱ Josué ña̱yóʼo xi̱kuxítíra ta ni̱ka̱ʼa̱nra: “Ta̱ káchíñu nu̱úvaún kúi̱ táta miíi̱, ¿ndáaña kúni̱ún ka̱ʼún xíʼi̱n?”. 15 Tasaá, ta̱ xáʼndachíñu nu̱ú na̱ soldado Jehová ni̱ka̱ʼa̱nra xíʼin ta̱ Josué: “Tavá ndu̱xa̱ún, saáchi nu̱ú níndichiún yóʼo ña̱ yi̱i̱ kúúña”. Tasaá ndi̱ku̱n ta̱vá ta̱ Josué ndu̱xa̱nra.

6 Na̱ ñuu Jericó nda̱kasina yéʼé ñuu kán xa̱ʼa̱ ña̱ xi̱yiʼvína xi̱xinina na̱ ñuu Israel, ña̱kán kǒo na̱ níxi̱kita ta ni kǒo na̱ níxi̱kiʼvi.

2 Tasaá ni̱ka̱ʼa̱n Jehová xíʼin ta̱ Josué: “Kuchiñuvaún sandíʼi-xa̱ʼún ñuu Jericó saátu ta̱ rey ñuu yóʼo xíʼin ndiʼika na̱ ta̱a na̱ xíni̱ní kanitáʼan. 3 Ndiʼi ndóʼó na̱ xíni̱ní kanitáʼan, xíniñúʼu ka̱va̱nduundó sa̱tá ñuu yóʼo iin yichi̱. Ta i̱ñu̱ ki̱vi̱ xíniñúʼu keʼéndó ña̱yóʼo. 4 Ta u̱xa̱ na̱ su̱tu̱ ná kuniʼina u̱xa̱ ndiki̱ tí ti̱xúʼú* ta ná kunúuna ku̱ʼu̱nna chí nu̱ú Arca. Soo ña̱ ki̱vi̱ u̱xa̱ xíniñúʼu ka̱va̱nduundó u̱xa̱ yichi̱ sa̱tá ñuu yóʼo, ta na̱ su̱tu̱ xíniñúʼu tivina ndiki̱. 5 Tá ná kuniso̱ʼondó ña̱ ndeéní tivina ndiki̱ tí ti̱xúʼú, ndiʼi na̱ ñuu xíniñúʼu ndeéní nda̱ʼyi̱na. Tasaá iin kama nduva nama̱ ñuu kán, ta na̱ ta̱a ñuu Israel xíniñúʼu ki̱ʼvina ñuu Jericó”.

6 Ña̱kán ta̱ Josué se̱ʼe ta̱ Nun ka̱nara na̱ su̱tu̱ ta ni̱ka̱ʼa̱nra xíʼinna: “Ndaniʼindó arca ña̱ trato ku̱ʼu̱n xíʼinndó, ta u̱xa̱ na̱ su̱tu̱ ná kuniʼina u̱xa̱ ndiki̱ tí ti̱xúʼú ta ná kunúuna ku̱ʼu̱nna chí nu̱ú Arca Jehová”. 7 Tasaá ni̱ka̱ʼa̱nra xíʼin na̱ ñuu: “Kúáʼanndó ta ka̱va̱nduundó sa̱tá ñuu Jericó, ta na̱ soldado na̱ xa̱a̱ íyo tu̱ʼva ña̱ kanitáʼanna ná kunúuna ku̱ʼu̱nna chí nu̱ú Arca Jehová”. 8 Na̱ ñuu ke̱ʼéna nda̱a̱ táki̱ʼva ni̱ka̱ʼa̱n ta̱ Josué xíʼinna. Ta u̱xa̱ saá na̱ su̱tu̱ níʼina u̱xa̱ ndiki̱ tí ti̱xúʼú ku̱a̱ʼa̱nna chí nu̱ú Arca Jehová ta tívina ndiki̱ yóʼo. Ta na̱ ndíso arca tú kúú kuenta Jehová ndíku̱nna ku̱a̱ʼa̱nna sa̱tána. 9 Na̱ soldado na̱ xa̱a̱ íyo tu̱ʼva ña̱ kanitáʼanna kúú na̱ kánuu ku̱a̱ʼa̱n nu̱ú na̱ su̱tu̱ na̱ tívi ndiki̱, ta ni̱xi̱yotu inkaka na̱ soldado na̱ ndíku̱n ku̱a̱ʼa̱n chí sa̱tá Arca, ta na̱ su̱tu̱ va̱ása nísandákoona ña̱ tivina ndiki̱.

10 Ta̱ Josué xa̱a̱ ni̱ka̱ʼa̱nra xíʼin na̱ ñuu: “Va̱ása nda̱ʼyi̱ndó ta ni va̱ása ka̱ʼa̱nndó. Va̱ása ka̱ʼa̱nndó nda̱a̱ ni iin tu̱ʼun nda̱a̱ ná ka̱ʼi̱n xíʼinndó ama kúú ña̱ xíniñúʼu nda̱ʼyi̱ndó, tasaá kúú ña̱ nda̱ʼyi̱ndó”. 11 Ta̱ Josué ni̱ka̱ʼa̱nra ña̱ ná ka̱va̱nduuna xíʼin Arca Jehová iin yichi̱ sa̱tá ñuu Jericó. Tándi̱ʼi ndi̱kóna chí nu̱ú ndóo na̱ ñuu Israel ta kán ni̱ki̱si̱na.

12 Tá ni̱tu̱vi inka ki̱vi̱ ta̱ Josué ya̱chi̱ní nda̱koora, ta na̱ su̱tu̱ nda̱kundisona Arca Jehová ku̱a̱ʼa̱n xíʼinna. 13 Ta u̱xa̱ saá na̱ su̱tu̱ kánuuna ku̱a̱ʼa̱nna chí nu̱ú Arca Jehová, ta níʼina u̱xa̱ ndiki̱ tí ti̱xúʼú ta ndeéní tívina ña̱yóʼo. Ta na̱ soldado na̱ xa̱a̱ íyo tu̱ʼva ña̱ kanitáʼanna kúú na̱ siʼna ku̱a̱ʼa̱n nu̱ú na̱ su̱tu̱, ta inkaka na̱ soldado ndíku̱nna ku̱a̱ʼa̱nna chí sa̱tá Arca Jehová. Ta na̱ su̱tu̱ ndákundeéna ndeéní tívina ndiki̱. 14 Ta ña̱ ki̱vi̱ u̱vi̱, tuku ni̱xa̱ʼa̱nna ni̱ka̱va̱nduuna sa̱tá ñuu Jericó iin yichi̱. Tándi̱ʼi, ndi̱kóna chí nu̱ú ndóo ndiʼi na̱ ñuu Israel. Ta i̱ñu̱ ki̱vi̱ ke̱ʼéna ña̱yóʼo.

15 Ki̱vi̱ u̱xa̱ ya̱chi̱ní nda̱koona ta ki̱xáʼana káva̱nduuna sa̱tá ñuu Jericó, soo u̱xa̱ yichi̱ ke̱ʼéna ña̱yóʼo. Ta iinlá ki̱vi̱ yóʼo kúú ña̱ ni̱ka̱va̱nduuna u̱xa̱ yichi̱ sa̱tá ñuu yóʼo. 16 Tá ni̱ka̱va̱nduuna u̱xa̱ yichi̱ sa̱tá ñuu Jericó, na̱ su̱tu̱ ndeéní ti̱vina ndiki̱ ta ta̱ Josué ni̱ka̱ʼa̱nra xíʼin na̱ ñuu: “Nda̱ʼyi̱ndó, saáchi Jehová nda̱taxira ñuu yóʼo ndaʼa̱yó. 17 Ñuu yóʼo xíʼin ndiʼi ña̱ʼa ña̱ íyo yóʼo xíniñúʼu ndiʼi-xa̱ʼa̱ña, saáchi kuenta Jehová kúú ndiʼi ña̱yóʼo. Iinlá ñá Rahab ñá xi̱kisi̱ xíʼin ku̱a̱ʼá ta̱a kúú ñá kivi ka̱ku ta saátu ndiʼi na̱ ñúʼu xíʼinñá ini veʼeñá, saáchi chi̱se̱ʼéñá na̱ ta̱a na̱ chi̱ndaʼáyó ki̱xi xi̱tona̱ní* ñuu yóʼo. 18 Soo va̱ása kuyatinníndó nu̱ú ña̱ʼa ña̱ xíniñúʼu ndiʼi-xa̱ʼa̱, ña̱ va̱ʼa kǒo kutóondóña ta ndakiʼinndóña. Chi tá ná keʼéndó ña̱yóʼo kixi ku̱a̱ʼání tu̱ndóʼo nu̱ú na̱ ñuu Israel ta nda̱a̱ ndiʼi-xa̱ʼa̱na. 19 Soo ña̱ʼa ña̱ plata, ña̱ oro, ña̱ cobre xíʼin ña̱ hierro xíniñúʼu nduyi̱i̱ña ta kooña kuenta Jehová. Ta xíniñúʼu ndataánva̱ʼandóña* nu̱ú ñúʼu ña̱ʼa ña̱ ndáyáʼvi veʼe Jehová”.

20 Tasaá na̱ su̱tu̱ ti̱vina ndiki̱ tí ti̱xúʼú, ta na̱ ñuu ni̱nda̱ʼyi̱na. Tá xi̱niso̱ʼo na̱ ñuu Israel ña̱ ti̱vina ndiki̱ tí ti̱xúʼú saá kúú ña̱ ndeéní ni̱nda̱ʼyi̱na, tasaá ndu̱va nama̱ ñuu Jericó. Tá ku̱u ña̱yóʼo na̱ ta̱a ñuu Israel ni̱ki̱ʼvina ñuu yóʼo ta ku̱chiñuna ka̱nitáʼanna xíʼinna. 21 Ta xa̱ʼnína na̱ íyo ñuu kán xíʼin espada: tá kúú na̱ ta̱a, ná ñaʼá, na̱ va̱lí xíʼin na̱ xi̱kuaʼa̱ ta saátu si̱ndi̱ki̱, ndikachi* xíʼin burro.

22 Tasaá ta̱ Josué ni̱ka̱ʼa̱nra xíʼin u̱vi̱ saá na̱ ta̱a na̱ ni̱xa̱ʼa̱n xi̱tona̱ní ñuu Jericó: “Ki̱ʼvindó veʼe ñá Rahab ñá xi̱kisi̱ xíʼin ku̱a̱ʼání ta̱a ta tavándóñá xíʼin ndiʼi na̱ veʼeñá na̱ ñúʼu xíʼinñá, nda̱a̱ táki̱ʼva ki̱ndoondó xíʼinñá”. 23 Ta na̱ ta̱a na̱ ni̱xa̱ʼa̱n xi̱tona̱ní ñuu Jericó ni̱xa̱ʼa̱nna ta̱vána ñá Rahab, ta saátu yiváñá, siʼíñá, ku̱ʼvañá, ku̱ʼvi̱ñá xíʼin ndiʼika na̱ veʼeñá, ta̱vána ndiʼi na̱yóʼo ta ni̱xa̱ʼa̱nna nda̱koonana yatin nu̱ú ni̱xa̱a̱ na̱ ñuu Israel ndóona.

24 Tándi̱ʼi, xa̱ʼmina ndiʼi ñuu Jericó xíʼin ndiʼika ña̱ʼa ña̱ íyo nu̱úña. Soo ña̱ʼa ña̱ plata, ña̱ oro, ña̱ cobre xíʼin ña̱ hierro nda̱taánva̱ʼanaña nu̱ú ñúʼu ña̱ʼa ña̱ ndáyáʼvi veʼe Jehová. 25 Soo ta̱ Josué i̱xakáʼnu-inira xa̱ʼa̱ ñá Rahab ñá xi̱kisi̱ xíʼin ku̱a̱ʼá ta̱a, ta saátu na̱ veʼe yiváñá xíʼin ndiʼika na̱ táʼanñá; ta ñáyóʼo íyoñá ñuu Israel nda̱a̱ ki̱vi̱ vitin* saáchi chi̱se̱ʼéñá na̱ ta̱a na̱ ni̱xa̱ʼa̱n xi̱tona̱ní ñuu Jericó.

26 Ta ki̱vi̱ saá ta̱ Josué ni̱ka̱ʼa̱nra ña̱yóʼo:* “Mií Jehová ná sakúisochiʼiña* na̱ yiví na̱ kúni̱ sandáʼa ñuu Jericó. Tá ná kixáʼana tavána xa̱ʼa̱ ñuu yóʼo xíniñúʼu kuvi se̱ʼena na̱ nu̱ú, tá ná chikaa̱na yéʼé ñuu yóʼo xíniñúʼu kuvi se̱ʼena na̱ loʼoka”.

27 Ña̱kán mií Jehová chi̱ndeétáʼan xíʼin ta̱ Josué, ta ndiʼika na̱ ñuu ku̱ndaa̱-ini xa̱ʼa̱ ña̱ ke̱ʼéra.

7 Soo na̱ ñuu Israel va̱ása nísandíʼi-xa̱ʼa̱na ndiʼi ña̱ xi̱niñúʼu sandíʼi-xa̱ʼa̱na, saáchi ta̱ Acán se̱ʼe ta̱ Carmí, ta̱ xi̱kuu se̱ʼe ta̱ Zabdí, ta̱ xi̱kuu se̱ʼe ta̱ Zérah, na̱ tribu ta̱ Judá, nda̱kiʼinra sava ña̱ʼa ña̱ xi̱niñúʼu ndiʼi-xa̱ʼa̱. Xa̱ʼa̱ ña̱yóʼo, Jehová ni̱sa̱a̱níra xíʼin na̱ ñuu Israel.

2 Tá ndóokana chí Jericó, ta̱ Josué chi̱ndaʼára sava na̱ ta̱a ña̱ ku̱ʼu̱nna kotona̱nína* ñuu Hai, ña̱ ndíkaa̱ chí este* ña̱ ñuu Betel, ña̱ kíndo̱o yatin Bet-Aven. Ta ni̱ka̱ʼa̱nra xíʼinna: “Kúáʼanndó ta kotona̱níndó ñuu Hai”. Ña̱kán na̱ ta̱a yóʼo ni̱xa̱ʼa̱nna ta xi̱tona̱nína ñuu Hai. 3 Tá ndi̱kóna, ni̱ka̱ʼa̱nna xíʼin ta̱ Josué: “Va̱ása xíniñúʼu ku̱ʼu̱n ndiʼivíyó. Nani 2,000 á 3,000 kuitíva na̱ ta̱a kuchiñu kanitáʼan xíʼin na̱ ñuu Hai. Loʼoníva kúú na̱ ndóo kán, va̱ása xíniñúʼu ku̱ʼu̱n ndiʼivína ña̱ va̱ʼa kǒo kunaána”.

4 Ña̱kán, 3,000 kúú na̱ ta̱a na̱ ni̱xa̱ʼa̱n soo xi̱nuvana nu̱ú ña̱ ñuu Hai. 5 Ta na̱ ta̱a na̱ ñuu Hai ta̱xínna na̱ ta̱a na̱ ñuu Israel chí yéʼé ñuu kán ta xi̱ndiku̱nna sa̱tána nda̱a̱ chí Sebarim.* Ta nani va̱xinuuna yuku̱ kán, xa̱ʼnína 36 na̱ ta̱a na̱ ñuu Israel. Xa̱ʼa̱ ña̱yóʼo na̱ ñuu Israel ni̱yi̱ʼvínína ta ki̱xáʼa kándita ni̱nu níma̱na.

6 Tá xi̱ni ta̱ Josué ña̱yóʼo nda̱tára ti̱ko̱to̱ra ta xi̱kuxítíra nu̱ú Arca Jehová. Ta miíra xíʼin na̱ níʼi yichi̱ nu̱ú na̱ ñuu* Israel saá ni̱xi̱yona nda̱a̱ tá xi̱kuaá, ta xi̱ndakundeéna xi̱chikaa̱na yáká* xi̱nína. 7 Tasaá ni̱ka̱ʼa̱n ta̱ Josué: “Táta káʼnu Jehová, ¿nda̱chun chi̱ndeétáʼún xíʼinndi̱ ña̱ ni̱ya̱ʼandi̱ yu̱ta Jordán ta ki̱xaa̱ndi̱ nda̱a̱ yóʼo? ¿Á ke̱ʼúnña ña̱ va̱ʼa ndataxiún ndi̱ʼi̱ ndaʼa̱ na̱ amorreo ña̱ sandíʼi-xa̱ʼa̱na ndi̱ʼi̱? Va̱ʼaníkava tá níkindo̱ondi̱ koondi̱ chí inka táʼví* yu̱ta Jordán. 8 Káʼnuní koo iniún xa̱ʼíi̱ Jehová, ¿soo ndáaña keʼíi̱ vitin xa̱ʼa̱ ña̱ xi̱nu na̱ ñuu Israel nu̱ú na̱ sáa̱-ini xíniñaʼá? 9 Tá ná kunda̱a̱-ini na̱ ndóo chí Canaán ta saátu ndiʼika na̱ ndóo nu̱ú ñuʼú yóʼo xa̱ʼa̱ ña̱ ku̱u, kixina ta sandíʼi-xa̱ʼa̱na ndi̱ʼi̱ ta kǒoka na̱ ndakaʼán xa̱ʼa̱ndi̱. ¿Á va̱ása kusi̱kindaana ki̱vi̱ún xa̱ʼa̱ ña̱yóʼo?”.

10 Tasaá nda̱kuiin Jehová yuʼú ta̱ Josué: “Nda̱kundichi, ¿nda̱chun kánduʼún* nu̱ú ñuʼú? 11 Na̱ ñuu Israel ni̱ki̱ʼvina ku̱a̱chi, va̱ása nísaxínuna ña̱ ni̱ka̱ʼi̱n xíʼinna saáchi nda̱kiʼinna sava ña̱ʼa ña̱ xi̱niñúʼu ndiʼi-xa̱ʼa̱. I̱xakuíʼnánaña ta chi̱se̱ʼénaña tañu ña̱ʼa ña̱ kúú kuenta miína. 12 Xa̱ʼa̱ ña̱yóʼo na̱ ñuu Israel va̱ása kuchiñuna kanitáʼanna xíʼin na̱ sáa̱-ini xíniñaʼá. Vitin nina kunuvana nu̱úna, chi xa̱ʼa̱ ña̱ ke̱ʼéna na̱ xíniñúʼu ndiʼi-xa̱ʼa̱va kúúna. Va̱ása chindeétáʼankai̱ xíʼinndó, nda̱a̱ ná sandíʼi-xa̱ʼa̱ndó ña̱ xi̱niñúʼu ndiʼi-xa̱ʼa̱. 13 Ndakundichi ta ixatu̱ʼvaún* na̱ ñuu, ta ka̱ʼún ña̱yóʼo xíʼinna: ‘Xa̱a̱ koo tu̱ʼvandó taa̱n, saáchi ña̱yóʼo kúú ña̱ káʼa̱n Jehová Ndióxi̱ na̱ ñuu Israel: “Ndóʼó na̱ ñuu Israel, nda̱kiʼinndó sava ña̱ʼa ña̱ xi̱niñúʼu ndiʼi-xa̱ʼa̱. Xa̱ʼa̱ ña̱yóʼo va̱ása kuchiñundó kanitáʼanndó xíʼin na̱ sáa̱-ini xíni ndóʼó, nda̱a̱ ná sandíʼi-xa̱ʼa̱ndó ña̱yóʼo. 14 Taa̱n xíniñúʼu ndakutáʼan iin tá iin tribu. Ta tribu ña̱ ndaka̱xin Jehová xíniñúʼu kuyatin iin tá iin familia. Ta na̱ familia na̱ ndaka̱xin Jehová, xíniñúʼutu kuyatin iin tá iin familia na̱yóʼo. Ta xíniñúʼutu kuyatin iin tá iin na̱ ta̱a na̱ familia na̱ ndaka̱xin Jehová. 15 Ta na̱ kúúmií ña̱ʼa ña̱ xi̱niñúʼu ndiʼi-xa̱ʼa̱, xíniñúʼu kaʼmindóna xíʼin ñuʼu̱ ta saátu ndiʼi ña̱ʼa ña̱ kúúmiína, saáchi va̱ása níkeʼéna ña̱ ni̱ka̱ʼa̱n Jehová xíʼinna. Ta ke̱ʼéna iin ña̱ʼa ña̱ kaʼan nu̱ú ñuu Israel”’”.

16 Tá inka ki̱vi̱, ta̱ Josué ya̱chi̱ní nda̱koora ta ka̱nara iin tá iin tribu na̱ ñuu Israel. Ta Ndióxi̱ nda̱kaxinra tribu ta̱ Judá. 17 Tasaá ku̱yatin ndiʼi na̱ familia na̱ tribu ta̱ Judá, ta na̱ nda̱kaxin Ndióxi̱ kúú na̱ veʼe ta̱ Zérah. Tándi̱ʼi, ku̱yatin ndiʼi na̱ ta̱a na̱ veʼe ta̱ Zérah, ta ta̱ nda̱kaxin Ndióxi̱ kúú ta̱ Zabdí. 18 Tándi̱ʼi ku̱yatin ndiʼi na̱ ta̱a na̱ veʼe ta̱ Zabdí, ta Ndióxi̱ nda̱kaxinra ta̱ Acán se̱ʼe ta̱ Carmí, ta̱ xi̱kuu se̱ʼe ta̱ Zabdí, ta̱ xi̱kuu se̱ʼe ta̱ Zérah, na̱ tribu ta̱ Judá. 19 Tasaá ni̱ka̱ʼa̱n ta̱ Josué xíʼin ta̱ Acán: “Yivá,* ixaún ña̱ ma̱ní na̱ʼa̱ ña̱ íxato̱ʼún Jehová ta̱ kúú Ndióxi̱ na̱ ñuu Israel, ta na̱ʼma̱ xa̱ʼa̱ ku̱a̱chiún. Ka̱ʼa̱n xíʼi̱n xa̱ʼa̱ ña̱ ke̱ʼún ta va̱ása chise̱ʼé yuʼún xa̱ʼa̱ ña̱yóʼo”.

20 Tasaá nda̱kuiin ta̱ Acán yuʼú ta̱ Josué: “Ña̱ nda̱a̱ kúúvaña, yi̱ʼi̱ kúú ta̱ ni̱ki̱ʼvi ku̱a̱chi nu̱ú Jehová Ndióxi̱ na̱ ñuu Israel. Ña̱yóʼo kúú ña̱ ke̱ʼíi̱: 21 tá xi̱nii̱ iin ti̱ko̱to̱ ña̱ liviní ña̱ ku̱vaʼa chí Sinar ta saátu u̱vi̱ kilo* ña̱ plata ta saátu iin táʼví ña̱ oro ña̱ ve̱e ki̱ʼva sava kilo,* ku̱tóoníi̱ña ta nda̱kiʼii̱nña va̱xi xíʼi̱n ta chi̱seʼíi̱ña ti̱xin ñuʼú ini veʼe loʼo nu̱ú íyoi̱”.

22 Tasaá ndi̱ku̱n chi̱ndaʼá ta̱ Josué sava na̱ ta̱a ku̱a̱ʼa̱nna kotona veʼe ta̱ Acán ta kán ndíkaa̱ ti̱ko̱to̱ yóʼo ta ti̱xin ña̱kán ñúʼu xu̱ʼún. 23 Ña̱kán ta̱vána ña̱yóʼo ini veʼe ta̱ Acán, ta nda̱kiʼinnaña ku̱a̱ʼa̱n xíʼinna chí nu̱ú íyo ta̱ Josué xíʼin ndiʼika na̱ ñuu Israel ta chi̱ndoonaña ña̱ va̱ʼa kuni Jehová ña̱yóʼo. 24 Ta̱ Josué xíʼin ndiʼika na̱ ñuu Israel nda̱kiʼinna ta̱ Acán se̱ʼe ta̱ Zérah ku̱a̱ʼa̱n xíʼinna ta saátu plata, ti̱ko̱to̱ ña̱ liviní ta saátu táʼví ña̱ oro, se̱ʼeta̱ara, se̱ʼe-síʼira, si̱ndi̱ki̱, burro xíʼin ndikachi* sa̱na̱ra, veʼe loʼora ta saátu ndiʼika ña̱ʼa ña̱ kúú kuentara ta nda̱kiʼinnaña ku̱a̱ʼa̱n xíʼinna chí yoso̱ ña̱ Acor. 25 Tasaá ni̱ka̱ʼa̱n ta̱ Josué xíʼinra: “¿Nda̱chun chi̱kaún miíyó ndaʼa̱ tu̱ndóʼo? Ki̱vi̱ vitin Jehová sandíʼi-xa̱ʼa̱ra yóʼó”. Tasaá na̱ ñuu Israel ku̱unna yu̱u̱ra nda̱a̱ ni̱xi̱ʼi̱ra ta saátu ke̱ʼéna xíʼin na̱ veʼera, ta tándi̱ʼi xa̱ʼminana xíʼin ndiʼi ña̱ʼa ña̱ xi̱kuumiína. 26 Ta nu̱ú xa̱ʼminara chi̱ndoona iin koʼndo yu̱u̱ ta kán ndóoña nda̱a̱ ki̱vi̱ vitin.* Tasaá va̱ása nísa̱a̱ka Jehová xíʼin na̱ ñuu Israel. Ña̱kán, lugar kán naníña yoso̱ ña̱ Acor* nda̱a̱ ki̱vi̱ vitin.

8 Tasaá ni̱ka̱ʼa̱n Jehová xíʼin ta̱ Josué: “Va̱ása yi̱ʼvíún. Ndakiʼin na̱ ta̱a na̱ xíni̱ní kanitáʼan ta kúáʼanndó kanitáʼanndó xíʼin na̱ ñuu Hai. Saáchi xa̱a̱ nda̱taxii̱ ta̱ rey ñuu Hai ndaʼún, ta saátu ndiʼi na̱ ñuura xíʼin ñuʼúra. 2 Nda̱a̱ táki̱ʼva ke̱ʼún xíʼin ta̱ rey ñuu Jericó saátu keʼún xíʼin ta̱ rey ñuu Hai. Soo vitin kiviva ndakiʼinndó ndiʼi ña̱ʼa ña̱ ndáyáʼvi ña̱ kúúmiína ta saátu kití sa̱na̱na. Ta saátu xa̱a̱ ná koo tu̱ʼva na̱ ta̱a na̱ ku̱ʼu̱n koose̱ʼé* sa̱tá ñuu Hai”.

3 Ña̱kán, ta̱ Josué xíʼin ndiʼi na̱ ta̱a na̱ xíka nu̱ú ku̱a̱chi ku̱a̱ʼa̱nna kanitáʼanna xíʼin na̱ ñuu Hai. Tasaá nda̱kaxinra 30,000 na̱ ta̱a na̱ xíni̱ní kanitáʼan ta chi̱ndaʼárana ku̱a̱ʼa̱nna ñuu kán tá xa̱a̱ ku̱ñuú. 4 Ta ni̱ka̱ʼa̱nra xíʼinna: “Kúáʼanndó koose̱ʼéndó chí sa̱tá ñuu Hai. Soo yatin kundoondó sa̱tá ñuu yóʼo ta xa̱a̱ koo tu̱ʼvandó. 5 Yi̱ʼi̱ xíʼin ndiʼi na̱ kítáʼan xíʼi̱n kuyatinndi̱ ñuu yóʼo. Tá ná keena ña̱ kanitáʼanna xíʼinndi̱ nda̱a̱ táki̱ʼva xa̱a̱ ke̱ʼéna, kunuvandi̱ nu̱úna. 6 Tá ná keena taxínna ndi̱ʼi̱, kunuvandi̱ nu̱úna tasaá kuxíkána nu̱ú ñuuna saáchi ndakanixi̱nína: ‘Xínuna nu̱úyó nda̱a̱ táki̱ʼva xa̱a̱ ke̱ʼéna inkaka yichi̱’. 7 Tasaá ndóʼó keendó nu̱ú íyo se̱ʼéndó ta ki̱ʼvindó ñuuna; saáchi Jehová Ndióxi̱yó ndataxiraña ndaʼa̱yó. 8 Tá xa̱a̱ ni̱ki̱ʼvindó ñuuna ta ku̱chiñundó ka̱nitáʼanndó xíʼinna, kaʼmindóña. Xíniñúʼu keʼéndó nda̱a̱ táki̱ʼva ni̱ka̱ʼa̱n mií Jehová. Ña̱yóʼo kúú chiñu ña̱ xáʼndai̱ nu̱úndó”.

9 Tasaá, na̱kán nda̱kiʼinna ku̱a̱ʼa̱nna koose̱ʼéna nu̱ú ni̱ka̱ʼa̱n ta̱ Josué xíʼinna. Ta xi̱kundoona chí oeste* ñuu Hai, yatin ñuu Betel. Soo ta̱ Josué xíʼin inkaka na̱ ta̱a na̱ kítáʼan xíʼinra va̱ása níxa̱ʼa̱nvína chi kán ki̱ndoona ñuú saá.

10 Tá nda̱koo ta̱ Josué tá xi̱ta̱a̱n,* nda̱kayara ndiʼi na̱ ta̱a na̱ xíni̱ní kanitáʼan ta miíra xíʼin na̱ níʼi yichi̱ nu̱ú na̱ ñuu* Israel kúú na̱ kánuu nu̱úna ku̱a̱ʼa̱nna chí Hai. 11 Ta ndiʼi na̱ ta̱a na̱ xíni̱ní kanitáʼan na̱ kítáʼan xíʼinra nda̱kiʼinna ku̱a̱ʼa̱nna ta ni̱xa̱a̱na xi̱kundoona chí norte ña̱ ñuu Hai, chí nu̱ú túvi yéʼé ñuu yóʼo. Ta chí nu̱ú ni̱xa̱a̱na xi̱kundoona xi̱ndikaa̱ iin yoso̱, ta chí nu̱ú xi̱ndiʼi yoso̱ yóʼo xi̱ndikaa̱ ñuu Hai. 12 Soo ta̱kán xa̱a̱ ni̱ka̱ʼa̱nvara xíʼin 5,000 na̱ ta̱a ña̱ koose̱ʼéna chí oeste ña̱ ñuu Hai, yatin chí nu̱ú ndíkaa̱ ñuu Betel. 13 Tasaá ta̱ Josué xíʼin ndiʼika na̱ kítáʼan xíʼinra xi̱kundoona chí norte ña̱ ñuu Hai, ta na̱ ku̱a̱ʼa̱n koose̱ʼé xi̱kundoona chí oeste ña̱ ñuu kán. Ta ñuú saá, ta̱ Josué xíʼin na̱ kítáʼan xíʼinra nda̱kiʼinna ku̱a̱ʼa̱nna ta ni̱xa̱a̱na nda̱a̱ ma̱ʼñú yoso̱.

14 Tá xi̱ni ta̱ rey ñuu Hai ña̱yóʼo, kamaní nda̱kutáʼanra xíʼin na̱ ta̱a na̱ ñuu kán ta ya̱chi̱ní ke̱ena ku̱a̱ʼa̱nna kanitáʼanna xíʼin na̱ ñuu Israel iin lugar ña̱ kíndo̱o chí yoso̱ yi̱chí. Soo ta̱yóʼo va̱ása níxikunda̱a̱-inira ña̱ xa̱a̱ ndóose̱ʼé savana chí sa̱tá ñuu Hai. 15 Tá ki̱xáʼa na̱ ta̱a na̱ ñuu Hai kánitáʼanna xíʼin ta̱ Josué xíʼin ndiʼi na̱ kítáʼan xíʼinra, na̱yóʼo xi̱nuna ku̱a̱ʼa̱nna chí nu̱ú ñuʼú yi̱chí. 16 Tasaá ka̱nana ndiʼika na̱ ta̱a na̱ ki̱ndoo chí ñuu ña̱ va̱ʼa kundiku̱nna ku̱ʼu̱nna sa̱tá ta̱ Josué, ta xa̱ʼa̱ ña̱ ndíku̱nna ku̱a̱ʼa̱nna sa̱tára ki̱ndoo mií ñuu kán. 17 Kǒo nda̱a̱ ni iin na̱ ta̱a níkindo̱o chí ñuu Hai ni chí ñuu Betel, chi ndiʼina ke̱ena ku̱a̱ʼa̱nna sa̱tá na̱ ñuu Israel. Xa̱ʼa̱ ña̱kán va̱ása níxindaakana ñuu Hai, saáchi ndíku̱nna ku̱a̱ʼa̱nna sa̱tá na̱ ñuu Israel.

18 Tasaá ni̱ka̱ʼa̱n Jehová xíʼin ta̱ Josué: “Katanii lanza tú níʼún chí ñuu Hai,* saáchi xa̱a̱ ndaʼa̱ miívandó nda̱taxii̱ ñuu yóʼo”. Tasaá ka̱tanii ta̱ Josué lanza tú níʼira chí ñuu Hai. 19 Ndi̱ku̱n tá ka̱taniira lanza tú níʼira chí ñuu Hai, na̱ ta̱a na̱ íyo se̱ʼé sa̱tá ñuu Hai kama ni̱ki̱ʼvina ñuu kán ta nda̱kiʼinnaña. Tasaá ki̱xáʼana xáʼminaña.

20 Tá nda̱koto na̱ ta̱a yóʼo chí ñuu Hai xi̱nina ña̱ ndeéní kána yi̱ʼma̱ ñuu kán, ña̱kán va̱ása níkunda̱a̱ka-inina ndáa míí ku̱ʼu̱nna. Tasaá na̱ xínu ku̱a̱ʼa̱n chí nu̱ú ñuʼú yi̱chí ndi̱kóna ta ki̱xáʼana táxínna na̱ ñuu Hai. 21 Tá xi̱ni ta̱ Josué ta saátu ndiʼi na̱ ta̱a na̱ kítáʼan xíʼinra ña̱ xa̱a̱ ku̱chiñu na̱ xi̱ndoose̱ʼé ni̱ki̱ʼvina ñuu kán ta saátu ña̱ ndeéní kána yi̱ʼma̱ ñuu kán xa̱ʼa̱ ña̱ ndeéní xíxi̱ña, ndi̱kóna ta ki̱xáʼana kánitáʼanna xíʼin na̱ ta̱a na̱ ñuu Hai. 22 Tasaá na̱ ta̱a na̱ ñuu Israel na̱ ni̱ki̱ʼvi ñuu Hai, ke̱ena ta ku̱a̱ʼa̱nna ndakutáʼanna xíʼin ta̱ Josué xíʼin na̱ ta̱a na̱ kítáʼan xíʼinra. Ña̱kán na̱ ñuu Hai ki̱ndoona ma̱ʼñú na̱ ñuu Israel, tasaá xa̱ʼnína ndiʼi na̱ ta̱a yóʼo ta kǒo nda̱a̱ ni iin na̱ níkivi ka̱ku. 23 Soo va̱ása níxaʼnína ta̱ rey ñuu Hai, chi nda̱kiʼinnara ku̱a̱ʼa̱n xíʼinna chí nu̱ú ta̱ Josué.

24 Tá sa̱ndíʼi na̱ ta̱a ñuu Israel xa̱ʼnína ndiʼi na̱ ta̱a ñuu Hai xíʼin espada chí nu̱ú ñuʼú yi̱chí nu̱ú ni̱xa̱ʼa̱nna ta̱xínnana, saá ndi̱kóna chí ñuu Hai ta xa̱ʼnína ndiʼi na̱ ki̱ndoo kán xíʼin espada. 25 Ta ndiʼi na̱ ta̱a xíʼin ná ñaʼá na̱ ñuu Hai na̱ ni̱xi̱ʼi̱ ki̱vi̱ kán, xi̱kuuna 12,000. 26 Nda̱a̱ tá sa̱ndíʼina xa̱ʼnína ndiʼi na̱ ñuu Hai, saá sa̱núu ta̱ Josué ndaʼa̱ra xíʼin lanza. 27 Soo na̱ ñuu Israel nda̱kiʼinna kití sa̱na̱ na̱ ñuu kán ta saátu ña̱ʼa ña̱ ndáyáʼvi ña̱ xi̱kuumiína, nda̱a̱ táki̱ʼva ni̱ka̱ʼa̱n Jehová xíʼin ta̱ Josué.

28 Tándi̱ʼi, ta̱ Josué xa̱ʼmira ñuu Hai ta sa̱ndíʼi-xa̱ʼa̱ va̱ʼaraña, tasaá íyoña nda̱a̱ ki̱vi̱ vitin.* 29 Ta xa̱ʼnítura ta̱ rey ñuu Hai ta ka̱tikaarara ndaʼa̱ iin yitu̱n nda̱a̱ tá xi̱kuaá. Ta tá xa̱a̱ ku̱a̱ʼa̱n kíʼvi ñu̱ʼu,* ta̱ Josué ni̱ka̱ʼa̱nra ña̱ ná sanúuna ta̱ rey ndaʼa̱ yitu̱n. Tasaá sa̱kánanara chí yéʼé ñuu Hai ta chi̱ndoona iin koʼndo yu̱u̱ sa̱tára, ta kán ndóoña nda̱a̱ ki̱vi̱ vitin.*

30 Saá i̱xava̱ʼa ta̱ Josué iin altar chí yuku̱ Ebal, ña̱ va̱ʼa ndasakáʼnuna Jehová Ndióxi̱ na̱ ñuu Israel, 31 ta i̱xava̱ʼana altar yóʼo nda̱a̱ táki̱ʼva ni̱ka̱ʼa̱n ta̱ Moisés ta̱ xi̱kachíñu nu̱ú Jehová xíʼin na̱ ñuu Israel, ta saátu nda̱a̱ táki̱ʼva káʼa̱n Ley ña̱ ka̱ʼyi ta̱ Moisés: “Nina yu̱u̱ ña̱ níí kuniñúʼundó ña̱ ixava̱ʼandó altar, ta va̱ása kuniñúʼundó nda̱a̱ ni iin ka̱a ña̱ kaʼndandóña”. Ta nu̱ú altar yóʼo xa̱ʼmina kití* tí ni̱so̱kóna nu̱ú* Jehová, saátu ni̱so̱kóna ña̱ʼa nu̱úra ña̱ va̱ʼa ndakutáʼan viína xíʼinra.

32 Tasaá sa̱tá yu̱u̱ kán ka̱ʼyi ta̱ Josué ña̱ káʼa̱n Ley ña̱ ka̱ʼyi ta̱ Moisés nu̱ú na̱ ñuu Israel. 33 Ndiʼi na̱ ñuu Israel, na̱ níʼi yichi̱ nu̱ú na̱ ñuu, na̱ kíʼin kuenta xíʼin na̱ ñuu ta saátu na̱ ndátiin ku̱a̱chi xi̱nditana u̱vi̱ saá táʼví tú Arca, ta xi̱xitona chí nu̱ú na̱ su̱tu̱ levita na̱ ndíso arca ña̱ trato tú kúú kuenta Jehová. Ta kán xi̱ndita na̱ ke̱e inka ñuu ta saátu ndiʼi mií na̱ ñuu Israel. Nda̱taʼvína ta ni̱xi̱yo na̱ xi̱ndita chí xa̱ʼa̱ yuku̱ Guerizim ta saátu chí xa̱ʼa̱ yuku̱ Ebal, ña̱ va̱ʼa ndakiʼin ndiʼi na̱ ñuu Israel bendición (nda̱a̱ táki̱ʼva ni̱ka̱ʼa̱n ta̱ Moisés ta̱ xi̱kachíñu nu̱ú Jehová). 34 Tasaá ta̱ Josué ka̱ʼvira ña̱ káʼa̱n Ley nu̱ú ndiʼi na̱yóʼo, ña̱ káʼa̱n xa̱ʼa̱ ña̱ va̱ʼa ña̱ ndakiʼinna ta saátu ña̱ káʼa̱n xa̱ʼa̱ chiʼña ña̱ ndakiʼinna nda̱a̱ táki̱ʼva káʼa̱n ndiʼi ña̱ ni̱ka̱ʼyi̱ nu̱ú Ley. 35 Nda̱a̱ táki̱ʼva íyo ndiʼi ña̱ ni̱ka̱ʼa̱n ta̱ Moisés saá íyo ña̱ ka̱ʼvi ta̱ Josué nu̱ú ndiʼi na̱ ñuu Israel, ni kúúna ñaʼá, na̱ va̱lí á na̱ ke̱e inka ñuu na̱ ndóo xíʼinna.

9 Tá ku̱ndaa̱-ini ndiʼi na̱ rey na̱ ndóo chí táʼví oeste tá yu̱ta Jordán, na̱ ndóo chí nu̱ú íyo yuku̱ ta saátu chí Sefelá xíʼin ndiʼi na̱ ndóo yatin nu̱ú ndíkaa̱ tá mar Grande* ta saátu chí Líbano, tá kúú na̱ hitita, na̱ amorreo, na̱ cananeo, na̱ perizita, na̱ heveo xíʼin na̱ jebuseo, 2 nda̱kutáʼanna ña̱ kanitáʼanna xíʼin ta̱ Josué ta saátu xíʼin na̱ ñuu Israel.

3 Ta saátu ndiʼi na̱ ndóo chí Gabaón ku̱ndaa̱-inina xa̱ʼa̱ ndiʼi ña̱ ke̱ʼé ta̱ Josué xíʼin na̱ ñuu Jericó ta saátu xíʼin na̱ ñuu Hai. 4 Soo na̱yóʼo ndíchiní nda̱kanixi̱nína ta sa̱kúisona burro sa̱na̱na xíʼin ña̱ʼa ña̱ ta̱ánna ti̱xin coxta ña̱ xa̱a̱ ku̱yatá, ta saátu ta̱ánna vino ti̱xin ñii̱* ña̱ xa̱a̱ ni̱nda̱ta̱ ta sa̱ndáʼanaña. 5 Ta ndu̱xa̱n ña̱ ñúʼu xa̱ʼa̱na xa̱a̱ yatáníña ta sa̱ndáʼanaña ta saátu xa̱a̱ yatání ti̱ko̱to̱ ña̱ ndíxina. Ta ndiʼi si̱ta̱váʼa ña̱ ndísona ku̱a̱ʼa̱nna xa̱a̱ ku̱téʼé* ndiʼiña ta ku̱a̱ʼa̱n cháchi ndiʼiña. 6 Tasaá ni̱xa̱a̱na chí Guilgal nu̱ú íyo ta̱ Josué xíʼin ndiʼi na̱ ñuu Israel, ta ni̱ka̱ʼa̱nna xíʼinra ta saátu xíʼin ndiʼi na̱ ta̱a ñuu Israel: “Xíkání ke̱endi̱ ki̱xaa̱ndi̱ yóʼo, ta kúni̱ndi̱ ña̱ ná keʼéndó iin trato xíʼinndi̱”. 7 Soo na̱ ta̱a na̱ kíʼin kuenta xíʼin na̱ ñuu Israel ni̱ka̱ʼa̱nna xíʼin na̱ heveo yóʼo: “Sana yatin yóʼova ndóondó. Ña̱kán, ¿nda̱chun kúni̱ndó ná keʼéndi̱ iin trato xíʼinndó?”. 8 Ta na̱ ta̱a yóʼo ni̱ka̱ʼa̱nna xíʼin ta̱ Josué: “Kúni̱ndi̱ koondi̱ na̱ káchíñu nu̱ún”.

Tasaá ta̱ Josué ni̱nda̱ka̱tu̱ʼunrana: “¿Ndáana kúú ndóʼó ta ndáa míí ke̱endó?”. 9 Ta na̱yóʼo ni̱ka̱ʼa̱nna xíʼinra: “Iin ñuu ña̱ xíkání kíndo̱o ke̱endi̱, saáchi xi̱niso̱ʼondi̱ ña̱ va̱ʼaní káʼa̱nna xa̱ʼa̱ ki̱vi̱ Jehová Ndióxi̱ndó, ta saátu xa̱ʼa̱ ndiʼi ña̱ ke̱ʼéra chí Egipto 10 ta saátu xa̱ʼa̱ ndiʼi ña̱ ke̱ʼéra xíʼin u̱vi̱ saá na̱ rey na̱ amorreo na̱ xi̱ndoo inka táʼví yu̱ta Jordán, ta̱ rey Sehón ta̱ ni̱xi̱yo chí Hesbón xíʼin ta̱ rey Og ta̱ ni̱xi̱yo chí Astarot, ña̱ ndíkaa̱ chí Basán. 11 Xa̱ʼa̱ ña̱yóʼo na̱ níʼi yichi̱ nu̱ú na̱ ñuundi̱* xíʼin ndiʼika na̱ ñuu ni̱ka̱ʼa̱nna xíʼinndi̱: ‘Kúáʼanndó nu̱úna ta kuniʼindó ña̱ʼa ña̱ kuniñúʼundó yichi̱ ta ka̱ʼa̱nndó xíʼinna “Kúni̱ndi̱ kachíñundi̱ nu̱úndó, ña̱kán keʼéndó iin trato xíʼinndi̱”’. 12 Si̱ta̱váʼa yóʼo niʼníkavaña tá ke̱endi̱ veʼendi̱ va̱xindi̱ nu̱ú ndóondó yóʼo. Ta kotondóña, xa̱a̱ ku̱téʼévaña ta ku̱a̱ʼa̱n cháchi ndiʼiña. 13 Ta ña̱ xa̱áva kúú ñii̱ yóʼo tá ta̱ánndi̱ vino ti̱xinña, soo vitin xa̱a̱ ni̱nda̱ta̱vaña. Ta ti̱ko̱to̱ndi̱ xíʼin ndu̱xa̱nndi̱ xa̱a̱ ku̱yatá ndiʼivaña xa̱ʼa̱ ña̱ xíkání ke̱endi̱ va̱xindi̱”.

14 Tasaá na̱ ta̱a na̱ ñuu Israel ki̱ʼinna sava ña̱ʼa ña̱ níʼina ta xi̱tondaanaña, soo va̱ása níka̱ʼa̱nna xíʼin Jehová ndáaña xíniñúʼu keʼéna. 15 Ña̱kán, ta̱ Josué ki̱ndoora ña̱ va̱ása kanitáʼanra xíʼinna ta saátu ke̱ʼéra iin trato xíʼinna ña̱ va̱ása kaʼnínana ta ña̱yóʼo kúútu ña̱ ni̱ka̱ʼa̱n na̱ kíʼin kuenta xíʼin na̱ ñuu xíʼinna.

16 Soo tá xa̱a̱ ni̱ya̱ʼa u̱ni̱ ki̱vi̱ ña̱ ke̱ʼéna trato yóʼo xíʼinna, ku̱ndaa̱-inina ña̱ yatin kánva íyo ñuuna. 17 Tasaá na̱ ñuu Israel nda̱kiʼinna ku̱a̱ʼa̱nna ñuu na̱yóʼo ta tá ni̱ya̱ʼa u̱ni̱ ki̱vi̱ ni̱xa̱a̱na kán; ta ñuu na̱yóʼo xi̱kuuña Gabaón, Kefirá, Beerot xíʼin Quiryat-Jearim. 18 Soo na̱ ñuu Israel va̱ása níkanitáʼanna xíʼinna saáchi na̱ kíʼin kuenta xíʼin na̱ ñuu Israel xa̱a̱ chi̱naʼána* xa̱ʼa̱ ki̱vi̱ Jehová Ndióxi̱ na̱ ñuu Israel ña̱ va̱ása kanitáʼanna xíʼinna, tasaá ndiʼi na̱ ñuu ki̱xáʼana káʼa̱nkúáchina* xíʼin na̱ kíʼin kuenta xíʼinna. 19 Xa̱ʼa̱ ña̱yóʼo ndiʼi na̱ kíʼin kuenta xíʼin na̱ ñuu Israel ni̱ka̱ʼa̱nna xíʼinna: “Xa̱a̱ chi̱naʼándi̱ xa̱ʼa̱ ki̱vi̱ Jehová Ndióxi̱ na̱ ñuu Israel, ña̱kán va̱ása kivi ixandi̱va̱ʼayó xíʼinna. 20 Ña̱yóʼo kúú ña̱ keʼéyó xíʼinna: va̱ása kaʼníyóna ña̱ va̱ʼa ná va̱ása sa̱a̱ Ndióxi̱ xíʼinyó xa̱ʼa̱ ña̱ xa̱a̱ chi̱naʼáyó ña̱ kǒo nda̱a̱ ni iin ña̱ʼa keʼéyó xíʼinna”. 21 Ta ni̱ka̱ʼa̱nkana xíʼin na̱ ñuu: “Ná kutakuvana, soo na̱yóʼo kúú na̱ ndakaya titu̱n ta ndukúna ti̱kui̱í tá kuniñúʼu ndiʼi na̱ ñuu”. Ta ña̱yóʼo kúú ña̱ ki̱ndoo na̱ kíʼin kuenta xíʼin na̱ ñuu Israel xíʼinna.

22 Tasaá ka̱na ta̱ Josué na̱ ta̱a yóʼo ta ni̱ka̱ʼa̱nra xíʼinna: “¿Nda̱chun sa̱ndáʼvindó ndi̱ʼi̱ ta ni̱ka̱ʼa̱nndó xíʼinndi̱ ‘Xíkáníva kíndo̱o ñuundi̱’, soo mií ña̱ nda̱a̱ yatin yóʼova ndóondó? 23 Vitin ndiʼi tiempo kuisondó chiʼña xa̱ʼa̱ ña̱ ke̱ʼéndó yóʼo, ta saátu ndiʼi tiempo kachíñundó ña̱ ndakayandó titu̱n ta ndukúndó ti̱kui̱í tá kuniñúʼuna veʼe Ndióxi̱ndi̱”. 24 Tasaá nda̱kuiinna yuʼú ta̱ Josué ta ka̱china: “Ku̱ndaa̱-inindi̱ ña̱ káxiníva ni̱ka̱ʼa̱n Jehová Ndióxi̱ndó xíʼin ta̱ Moisés ta̱ xi̱kachíñu nu̱úra ña̱ ndataxira ndiʼi ñuʼú yóʼo ndaʼa̱ndó, ta sandíʼi-xa̱ʼa̱ra ndiʼi na̱ ndóo nu̱úña. Ta xa̱ʼa̱ ña̱ ni̱yi̱ʼvíndi̱ ña̱ kaʼníndó ndi̱ʼi̱, ña̱kán kúú ña̱ ke̱ʼéndi̱ ña̱yóʼo. 25 Ta vitin íyondi̱ nu̱ún yóʼo. Kivi keʼún xíʼinndi̱ nda̱a̱ ndáaka ña̱ va̱ʼa túvi miívaún”. 26 Tasaá ke̱ʼévara; sa̱kǎkurana nu̱ú na̱ ñuu Israel, ta va̱ása níxaʼnínana. 27 Soo ki̱vi̱ saá ta̱ Josué ni̱ka̱ʼa̱nra xíʼinna ña̱ kixáʼana ndakayana titu̱n, ta ndukúna ti̱kui̱í tá kuniñúʼu na̱ ñuu, ta saátu titu̱n xíʼin ti̱kui̱í tá kuniñúʼuna xíʼin altar Jehová nda̱a̱ ndáaka nu̱ú ná ndaka̱xin miíra,* ta ña̱yóʼo kúú ña̱ kéʼéna nda̱a̱ ki̱vi̱ vitin.*

10 Ta̱ rey Adoni-Zédec ta̱ ñuu Jerusalén xi̱niso̱ʼora ña̱ nda̱kiʼin ta̱ Josué ñuu Hai ta sa̱ndíʼi-xa̱ʼa̱raña ta xa̱ʼníra ta̱ rey ñuu yóʼo, nda̱a̱ táki̱ʼva ke̱ʼéra xíʼin ñuu Jericó ta saátu xíʼin ta̱ rey ñuu kán. Saátu xi̱niso̱ʼora ña̱ ki̱ndoo na̱ ñuu Israel ña̱ va̱ása kanitáʼanna xíʼin na̱ ñuu Gabaón ta ndóokana xíʼinna. 2 Ña̱kán ni̱ndi̱ʼiní-inira, saáchi ñuu Gabaón káʼnuníña nda̱a̱ táki̱ʼva káʼnuní iin ñuu nu̱ú xáʼndachíñu na̱ rey. Káʼnuníka ñuu Gabaón nu̱ú ñuu Hai, ta ndiʼi na̱ ta̱a na̱ íyo yóʼo xíni̱nína kanitáʼanna. 3 Ña̱kán, ta̱ Adoni-Zédec ta̱ kúú rey ñuu Jerusalén ni̱ka̱ʼa̱nra ña̱yóʼo xíʼin ta̱ Hoham ta̱ kúú rey ñuu Hebrón, xíʼin ta̱ Piram ta̱ kúú rey ñuu Jarmut, ta̱ Jafía ta̱ kúú rey ñuu Lakís ta saátu ta̱ Debir ta̱ kúú rey ñuu Eglón: 4 “Naʼandó chindeétáʼanndó xíʼi̱n ta ná kanitáʼanyó xíʼin na̱ ñuu Gabaón, saáchi nda̱kutáʼan viína xíʼin ta̱ Josué ta saátu xíʼin na̱ ñuu Israel”. 5 Tasaá ta̱ rey ñuu Jerusalén, ta̱ rey ñuu Hebrón, ta̱ rey ñuu Jarmut, ta̱ rey ñuu Lakís xíʼin ta̱ rey ñuu Eglón, u̱ʼu̱n saá na̱ rey yóʼo nda̱kayana ndiʼi na̱ soldado na̱ kúúmiína ta nda̱kiʼinna ku̱a̱ʼa̱nna, ta xi̱kundoona yatin ñuu Gabaón ña̱ va̱ʼa kanitáʼanna xíʼinna.

6 Na̱ ta̱a ñuu Gabaón ni̱ka̱ʼa̱nna ña̱yóʼo xíʼin ta̱ Josué tá ndóoka na̱ ñuu Israel chí Guilgal: “Va̱ása sandákoondaʼún ndi̱ʼi̱, kamaní kixiún chindeétáʼún xíʼinndi̱ ta sakǎkún ndi̱ʼi̱, saáchi ndiʼi na̱ rey na̱ amorreo na̱ íyo chí táʼví nu̱ú íyo yuku̱ nda̱kutáʼanna ña̱ kanitáʼanna xíʼinndi̱”. 7 Ña̱kán ta̱ Josué xíʼin ndiʼi na̱ ta̱a na̱ xíka nu̱ú ku̱a̱chi ta saátu na̱ xíni̱ní kanitáʼan ke̱ena chí Guilgal ta nda̱kiʼinna ku̱a̱ʼa̱nna.

8 Tasaá, Jehová ni̱ka̱ʼa̱nra xíʼin ta̱ Josué: “Va̱ása yi̱ʼvíún kuniúnna, saáchi xa̱a̱ nda̱taxii̱na ndaʼún. Nda̱a̱ ni iin na̱yóʼo va̱ása kuchiñuna kanitáʼanna xíʼún”. 9 Tá ke̱ena chí Guilgal iníísaá ñuú ni̱xi̱kana, ta iin kama kuití ni̱xa̱a̱ ta̱ Josué xíʼin na̱ kítáʼan xíʼinra ta ki̱xáʼana kánitáʼanna xíʼinna. 10 Jehová chi̱kaa̱ra ini na̱ amorreo ña̱ yi̱ʼvínína kunina na̱ ñuu Israel, ta na̱yóʼo xa̱ʼnína ku̱a̱ʼánína chí Gabaón. Ta ki̱xáʼana ndíku̱nna sa̱tána chí yichi̱ ña̱ ku̱a̱ʼa̱n chí Bet-Horón nda̱a̱ chí Azecá ta saátu Maquedá, ta ku̱a̱ʼánína xa̱ʼnína. 11 Nani xínuna ku̱a̱ʼa̱nna chí Bet-Horón nu̱ú na̱ ñuu Israel, Jehová sa̱kóyora ñíí* ña̱ íyo nda̱a̱ táki̱ʼva íyo yu̱u̱ ña̱ náʼnuní sa̱tána. Ta ni̱ko̱yoña sa̱tána iníísaá yichi̱ kán nda̱a̱ Azecá, ta ni̱xi̱ʼi̱vana. Ku̱a̱ʼákavana ni̱xi̱ʼi̱ xa̱ʼa̱ ña̱ ni̱ko̱yo ñíí sa̱tána nu̱úka na̱ xa̱ʼní na̱ ñuu Israel.

12 Ki̱vi̱ tá xi̱ni na̱ ñuu Israel ña̱ sa̱ndíʼi-xa̱ʼa̱ Jehová na̱ amorreo, saá kúú ña̱ ni̱ka̱ʼa̱n ta̱ Josué ña̱yóʼo xíʼin Jehová nu̱ú ndiʼi na̱ ñuu Israel:

13 Ña̱kán ni ñu̱ʼu va̱ása níkanda̱ña ta ni tí yo̱o̱ va̱ása níkanda̱rí, nda̱a̱ tá ku̱chiñu na̱ ñuu Israel xa̱ʼnína ndiʼi na̱ sáa̱-ini xíni miína. ¿Á su̱ví saá kúú ña̱ káchi libro ña̱ naní Jasar? Ñu̱ʼu ki̱ndoo táxi̱nña ma̱ʼñú ndiví ta va̱ása níkanda̱ña ki̱ʼva iníí ki̱vi̱. 14 Nda̱a̱ ni iin ki̱vi̱ ta̱ʼán kuu ña̱ ku̱u ki̱vi̱ kán, chi Jehová xi̱niso̱ʼora ña̱ ni̱ka̱ʼa̱n iin ta̱a. Saáchi mií Jehová kúú ta̱ xi̱kanitáʼan xa̱ʼa̱ na̱ ñuu Israel.

15 Tándi̱ʼi ku̱u ña̱yóʼo, ta̱ Josué xíʼin na̱ ta̱a na̱ ñuu Israel ndi̱kóna chí Guilgal nu̱ú ndóo ndiʼi na̱ ñuu.

16 Ta u̱ʼu̱n saá na̱ rey na̱ amorreo xi̱nuna ku̱a̱ʼa̱nna ta xi̱koose̱ʼéna* ini kavá ña̱ íyo chí Maquedá. 17 Tasaá ni̱ka̱ʼa̱nna xíʼin ta̱ Josué: “Ini kavá ña̱ íyo chí Maquedá nda̱ni̱ʼína u̱ʼu̱n saá na̱ rey na̱ amorreo”. 18 Tasaá ni̱ka̱ʼa̱n ta̱ Josué xíʼinna: “Ndakasindó yuʼú kavá kán xíʼin yu̱u̱ ña̱ náʼnu, ta ná ku̱ʼu̱n sava na̱ ta̱a kundaana yuʼú kavá kán. 19 Soo ndiʼika ndóʼó kundiku̱nndó ku̱ʼu̱nndó sa̱tá na̱ sáa̱-ini xíni ndóʼó, ta kaʼníndóna. Va̱ása taxindó ki̱ʼvina ñuuna, saáchi Jehová Ndióxi̱yó xa̱a̱ nda̱taxivarana ndaʼa̱yó”.

20 Ta̱ Josué xíʼin na̱ ta̱a ñuu Israel xa̱ʼnína ku̱a̱ʼánína, soo savana ni̱ka̱kuna saáchi xi̱nuna ta ni̱ki̱ʼvina ñuu ña̱ kútu̱ní ndási. 21 Ta ndiʼi na̱ ta̱a na̱ ni̱xa̱ʼa̱n ka̱nitáʼan kǒo ña̱ʼa níndoʼona, ta ndi̱kóna chí nu̱ú íyo ta̱ Josué chí Maquedá. Ta kǒo nda̱a̱ ni iin na̱ yiví níka̱ʼa̱n ña̱ va̱ása va̱ʼa xa̱ʼa̱ na̱ ñuu Israel. 22 Tasaá ta̱ Josué ni̱ka̱ʼa̱nra: “Sakútaʼandó yu̱u̱ ña̱ ndási yuʼú kavá, tavándó u̱ʼu̱n saá na̱ rey ta ná kixina xíʼinndó nu̱ú íyoi̱ yóʼo”. 23 Tasaá ta̱vána u̱ʼu̱n saá na̱ rey yóʼo ini kavá: ta̱ rey ñuu Jerusalén, ta̱ rey ñuu Hebrón, ta̱ rey ñuu Jarmut, ta̱ rey ñuu Lakís xíʼin ta̱ rey ñuu Eglón ta ni̱xa̱a̱na xíʼinna nu̱ú ta̱ Josué. 24 Tá ki̱xaa̱na xíʼin na̱ rey yóʼo, ta̱ Josué ka̱nara ndiʼi na̱ ta̱a ñuu Israel. Ta ni̱ka̱ʼa̱nra xíʼin na̱ comandante na̱ kíʼin kuenta xíʼin na̱ ta̱a na̱ ni̱xa̱ʼa̱n xíʼinra: “Naʼandó yóʼo ta ku̱a̱ñi̱ndó* si̱kí na̱ rey yóʼo”. Ña̱kán ku̱yatinna ta ni̱xa̱ñi̱na si̱kí na̱ rey yóʼo. 25 Tasaá ni̱ka̱ʼa̱n ta̱ Josué xíʼinna: “Va̱ása yi̱ʼvíndó. Ndakú koo inindó ta va̱ása yi̱ʼvíníndó, saáchi ña̱yóʼo kúú ña̱ keʼé Jehová xíʼin ndiʼi na̱ sáa̱-ini xíni ndóʼó na̱ ku̱ʼu̱nndó kanitáʼanndó xíʼin”.

26 Tándi̱ʼi, ta̱ Josué sa̱túkue̱ʼe̱rana ta xa̱ʼnírana ta ka̱tikaara na̱yóʼo ndaʼa̱ u̱ʼu̱n yitu̱n, ta kán xi̱tikaana nda̱a̱ tá xi̱kuaá. 27 Soo tá xa̱a̱ ni̱ki̱ʼvi ñu̱ʼu xa̱ʼndara chiñu ña̱ ná sanúunana ndaʼa̱ yitu̱n ta ná katanana ini kavá nu̱ú xi̱ñuʼuna. Tándi̱ʼi nda̱kasina yuʼú kavá kán xíʼin yu̱u̱ náʼnu, ta kán ndóoña nda̱a̱ ki̱vi̱ vitin.*

28 Ki̱vi̱ kán, ta̱ Josué ni̱ki̱ʼvira ñuu Maquedá ta xa̱ʼníra ndiʼi na̱ ñuu kán xíʼin espada, xa̱ʼníra ta̱ rey ñuu kán ta saátu ndiʼi na̱ yiví, ta kǒo nda̱a̱ ni iin na̱ níka̱ku. Nda̱a̱ táki̱ʼva ke̱ʼéra xíʼin ta̱ rey ñuu Jericó saá ke̱ʼéra xíʼin ta̱ rey ñuu Maquedá.

29 Tasaá, ta̱ Josué ke̱era chí ñuu Maquedá ta ni̱xa̱ʼa̱nra chí ñuu Libná xíʼin ndiʼi na̱ ta̱a ñuu Israel ta ka̱nitáʼanna xíʼin na̱ ñuu Libná. 30 Ta mií Jehová nda̱taxi ñuu yóʼo ta saátu ta̱ rey ñuu yóʼo ndaʼa̱ na̱ ñuu Israel. Sa̱ndíʼi-xa̱ʼa̱naña ta xa̱ʼnína ndiʼi na̱ yiví na̱ íyo kán xíʼin espada, ta kǒo ni iin na̱ níka̱ku. Nda̱a̱ táki̱ʼva ke̱ʼéna xíʼin ta̱ rey ñuu Jericó saátu ke̱ʼéna xíʼin ta̱ rey ñuu yóʼo.

31 Ta ndi̱ku̱n ke̱e ta̱ Josué chí ñuu Libná xíʼin na̱ ta̱a na̱ kítáʼan xíʼinra ta ku̱a̱ʼa̱nna chí ñuu Lakís. Ta ni̱xa̱a̱na xi̱kundoona yatin ñuu kán ña̱ va̱ʼa kanitáʼanna xíʼinna. 32 Ta mií Jehová nda̱taxi ñuu Lakís ndaʼa̱ na̱ ñuu Israel. Ta ki̱vi̱ u̱vi̱ ku̱chiñuna nda̱kiʼinna ñuu yóʼo. Sa̱ndíʼi-xa̱ʼa̱naña ta xa̱ʼnína ndiʼi na̱ íyo kán xíʼin espada, nda̱a̱ táki̱ʼva ke̱ʼéna chí ñuu Libná.

33 Tá ku̱u ña̱yóʼo, ta̱ Horam ta̱ kúú rey ñuu Guézer ni̱xa̱ʼa̱nra chi̱ndeétáʼanra xíʼin na̱ ñuu Lakís. Soo ta̱ Josué xa̱ʼníra ta̱yóʼo ta saátu xa̱ʼníra ndiʼi na̱ ñuura ta nda̱a̱ ni iinna va̱ása níka̱ku.

34 Ta̱ Josué ke̱era chí Lakís ta nda̱kiʼinra ku̱a̱ʼa̱nra chí Eglón xíʼin ndiʼi na̱ ta̱a na̱ ñuu Israel na̱ kítáʼan xíʼinra. Ta ni̱xa̱a̱na xi̱kundoona yatin ñuu kán ña̱ va̱ʼa kanitáʼanna xíʼinna. 35 Mií ki̱vi̱ kán nda̱kiʼinna ñuu yóʼo ta xa̱ʼnína ndiʼi na̱ yiví na̱ íyo kán xíʼin espada, nda̱a̱ táki̱ʼva ke̱ʼéna xíʼin ñuu Lakís.

36 Ta̱ Josué ke̱era chí Eglón xíʼin ndiʼi na̱ ta̱a na̱ kítáʼan xíʼinra ta ku̱a̱ʼa̱nna chí Hebrón ña̱ va̱ʼa kanitáʼanna xíʼin na̱ ñuu kán. 37 Nda̱kiʼinna ñuu yóʼo ta xa̱ʼnína ndiʼi na̱ íyo yóʼo xíʼin espada, ta saátu xa̱ʼnína ta̱ rey ñuu yóʼo. Ta xa̱ʼnítuna ndiʼi na̱ yiví na̱ íyo ñuu válí ña̱ íyo yatin kán, ta kǒo nda̱a̱ ni iin na̱ níka̱ku. Ta sa̱ndíʼi-xa̱ʼa̱ra ñuu Hebrón nda̱a̱ táki̱ʼva ke̱ʼéra xíʼin ñuu Eglón.

38 Ta̱ Josué nda̱kiʼinra ku̱a̱ʼa̱nra xíʼin ndiʼi na̱ ta̱a na̱ ñuu Israel chí ñuu Debir ña̱ va̱ʼa kanitáʼanna xíʼin na̱ ñuu kán. 39 Nda̱kiʼinna ñuu yóʼo xíʼin ñuu válí ña̱ íyo yatin kán ta xa̱ʼnína ta̱ rey ñuu yóʼo. Ta saátu xa̱ʼnína ndiʼi na̱ yiví na̱ íyo kán xíʼin espada ta kǒo nda̱a̱ ni iin na̱ níka̱ku. Nda̱a̱ táki̱ʼva ke̱ʼéra xíʼin ñuu Hebrón xíʼin ñuu Libná ña̱ sa̱ndíʼi-xa̱ʼa̱raña ta saátu xa̱ʼníra na̱ rey ñuu yóʼo, saá ke̱ʼéra xíʼin ñuu Debir ta xa̱ʼníra ta̱ rey ñuu yóʼo.

40 Ta̱ Josué nda̱kiʼinra ndiʼi ñuʼú ña̱ ni̱xi̱yo chí nu̱ú íyo yuku̱, chí Négueb, chí Sefelá ta saátu xa̱ʼa̱ yuku̱. Xa̱ʼníra ndiʼi na̱ rey na̱ ni̱xi̱yo yóʼo ta kǒo nda̱a̱ ni iin na̱ níka̱ku. Xa̱ʼníra ndiʼi na̱ yiví na̱ xi̱ndoo kán, nda̱a̱ táki̱ʼva ni̱ka̱ʼa̱n mií Jehová Ndióxi̱ na̱ ñuu Israel xíʼinra. 41 Ta̱ Josué nda̱kiʼinra ndiʼi ñuʼú ña̱ ni̱xi̱yo chí Cadés-Barnea iinsaá nda̱a̱ Gaza ta saátu ndiʼi ña̱ ni̱xi̱yo chí Gosén iinsaá nda̱a̱ Gabaón. 42 Ta̱ Josué ti̱inra ndiʼi na̱ rey ñuu yóʼo ta nda̱kiʼinra ndiʼi ñuʼúna, ta iin kuití yichi̱ ni̱xa̱ʼa̱nra ka̱nitáʼanra xíʼinna, saáchi Jehová Ndióxi̱ na̱ ñuu Israel kúú ta̱ xi̱kanitáʼan xa̱ʼa̱ na̱ ñuu Israel. 43 Tándi̱ʼi, ndi̱kó ta̱ Josué xíʼin ndiʼi na̱ ta̱a na̱ ñuu Israel chí Guilgal, chí nu̱ú ndóo ndiʼi na̱ ñuu.

11 Tá ku̱ndaa̱-ini ta̱ Jabín ta̱ xi̱kuu rey ñuu Hazor xa̱ʼa̱ ña̱yóʼo, chi̱ndaʼára na̱ ku̱a̱ʼa̱n natúʼun xíʼin ta̱ Jobab ta̱ xi̱kuu rey ñuu Madón, saátu xíʼin ta̱ rey ñuu Simrón xíʼin ta̱ rey ñuu Acsaf, 2 ta saátu xíʼin na̱ rey na̱ ndóo chí norte chí nu̱ú íyo yuku̱, na̱ ndóo yoso̱* ña̱ íyo chí sur ña̱ Kinéret, na̱ ndóo chí Sefelá, na̱ ndóo chí xa̱ʼa̱ yuku̱ chí oeste ña̱ ñuu Dor, 3 na̱ cananeo na̱ ndóo chí este* ta saátu chí oeste,* na̱ amorreo, na̱ hitita, na̱ perizita, saátu na̱ jebuseo na̱ ndóo chí nu̱ú íyo yuku̱ xíʼin na̱ heveo na̱ ndóo xa̱ʼa̱ yuku̱ Hermón, ña̱ ndíkaa̱ chí Mizpá. 4 Ña̱kán nda̱kayana ndiʼi na̱ soldado na̱ xi̱kuumiína ta ke̱ena ku̱a̱ʼa̱nna, ta ku̱a̱ʼání xi̱kuuna nda̱a̱ táki̱ʼva ku̱a̱ʼání kúú yu̱ti ña̱ íyo yuʼú tá mar. Ta xi̱kuumiína ku̱a̱ʼání kuáyi̱ ta saátu carreta tú xi̱xaʼa̱n xíʼinna nu̱ú ku̱a̱chi. 5 Tasaá na̱ rey yóʼo nda̱kutáʼanna ta nda̱kiʼinna ku̱a̱ʼa̱nna ta ni̱xa̱a̱na xi̱kundoona yatin nu̱ú kána ti̱kui̱í chí Merom, ña̱ va̱ʼa kanitáʼanna xíʼin na̱ ñuu Israel.

6 Tasaá ni̱ka̱ʼa̱n Jehová xíʼin ta̱ Josué: “Va̱ása yi̱ʼvíún kuniúnna, saáchi taa̱n hora yóʼo ndataxii̱na ndaʼa̱ndó ta kaʼníndó ndiʼi na̱yóʼo. Ta saátu xíniñúʼu kaʼndaún xa̱ʼa̱ kuáyi̱ sa̱na̱na ta xíniñúʼu kaʼmiún carretana”. 7 Ña̱kán ta̱ Josué xíʼin ndiʼi na̱ ta̱a na̱ xíka nu̱ú ku̱a̱chi, iin kama kuití ni̱xa̱a̱na ta ki̱xáʼana kánitáʼanna xíʼinna chí nu̱ú kána ti̱kui̱í chí Merom. 8 Ta mií Jehová nda̱taxira na̱yóʼo ndaʼa̱ na̱ ñuu Israel, ña̱kán ku̱chiñuna ka̱nitáʼanna xíʼinna ta ta̱xínnana nda̱a̱ chí Sidón iin ñuu ña̱ káʼnuní, saátu chí Misrefot-Maim ta chí este ka̱taxínnana nda̱a̱ chí yoso̱ ña̱ Mizpé. Ta xa̱ʼnína ndiʼi na̱yóʼo, ta kǒo nda̱a̱ ni iin na̱ níka̱ku. 9 Ta̱ Josué ke̱ʼéra nda̱a̱ táki̱ʼva ni̱ka̱ʼa̱n mií Jehová xíʼinra, xa̱ʼndara xa̱ʼa̱ kuáyi̱ sa̱na̱na ta xa̱ʼmira carretana.

10 Ta su̱ví ña̱yóʼo níxikuu ndiʼiña, saáchi ta̱ Josué ndi̱kóra ta nda̱kiʼinra ñuu Hazor, ta xa̱ʼníra ta̱ rey ñuu yóʼo xíʼin espada, saáchi ñuu Hazor xi̱kuu ñuu ña̱ ndáyáʼvika nu̱ú ndiʼi ñuu kán. 11 Xa̱ʼnína ndiʼi na̱ yiví na̱ íyo kán xíʼin espada tasaá kúú ña̱ sa̱ndíʼi-xa̱ʼa̱nana. Kǒo nda̱a̱ ni iin na̱ níka̱ku, tándi̱ʼi xa̱ʼmina ñuu Hazor. 12 Ta̱ Josué nda̱kiʼinra ndiʼi ñuu na̱ rey yóʼo ta xa̱ʼníra ndiʼi na̱yóʼo xíʼin espada. Sa̱ndíʼi-xa̱ʼa̱rana nda̱a̱ táki̱ʼva ni̱ka̱ʼa̱n ta̱ Moisés ta̱ xi̱kachíñu nu̱ú Jehová. 13 Soo na̱ ñuu Israel va̱ása níxaʼmina nda̱a̱ ni iin ñuu ña̱ ni̱xi̱yo chí xi̱kí ña̱ va̱ása súkun, chi iinlá ñuu Hazor kúú ña̱ xa̱ʼmi ta̱ Josué. 14 Na̱ ñuu Israel nda̱kiʼinna ndiʼi ña̱ʼa ña̱ ndáyáʼvi ña̱ xi̱kuumií na̱ ñuu kán ta saátu kití sa̱na̱na, soo xa̱ʼnína ndiʼi na̱ yiví xíʼin espada ta kǒo nda̱a̱ ni iin na̱ níka̱ku. 15 Ndiʼi ña̱ ni̱ka̱ʼa̱n Jehová xíʼin ta̱ Moisés kúú ña̱ ni̱ka̱ʼa̱n ta̱ Moisés xíʼin ta̱ Josué, ta ña̱kán kúú ña̱ ke̱ʼéva ta̱ Josué. Ke̱ʼéra ndiʼi ña̱ ni̱ka̱ʼa̱n Jehová xíʼin ta̱ Moisés ta̱ xi̱kachíñu nu̱úra.

16 Ta̱ Josué nda̱kiʼinra ku̱a̱ʼání ñuʼú. Nda̱kiʼinra ndiʼi ñuʼú nu̱ú íyo yuku̱ (ña̱ xi̱ndikaa̱ chí este ña̱ ñuu Judá), nda̱kiʼinra ndiʼi ña̱ ni̱xi̱yo chí Négueb, chí Gosén, chí Sefelá, chí Arabá xíʼin ndiʼi yuku̱ ña̱ ni̱xi̱yo chí Israel ta saátu xi̱kí válí ña̱ ni̱xi̱yo kán. 17 Saátu ña̱ ni̱xi̱yo chí yuku̱ Halac, ña̱ ndíkaa̱ chí Seír, iinsaá nda̱a̱ Baal-Gad, chí yoso̱ ña̱ Líbano, chí xa̱ʼa̱ yuku̱ Hermón. Ti̱inra ndiʼi na̱ rey yóʼo, ku̱chiñura ka̱nitáʼanra xíʼinna ta xa̱ʼnírana. 18 Ku̱a̱ʼání tiempo ka̱nitáʼan ta̱ Josué xíʼin ndiʼi na̱ rey yóʼo. 19 Ta nda̱a̱ ni iin na̱ ñuu va̱ása níndakutáʼan viína xíʼin na̱ ñuu Israel, chi iinlá na̱ ke̱ʼé ña̱yóʼo kúú na̱ heveo na̱ xi̱ndoo chí Gabaón. Ta ndiʼika ñuu kán, na̱ ñuu Israel ku̱chiñuna nda̱kiʼinnaña xa̱ʼa̱ ña̱ ka̱nitáʼanna xíʼinna. 20 Mií Jehová kúú ta̱ ta̱xi ña̱ ná ndundakú-inina ña̱ va̱ʼa ku̱ʼu̱nna kanitáʼanna xíʼin na̱ ñuu Israel, tasaá sandíʼi-xa̱ʼa̱rana ta va̱ása kundáʼvi-inira kunirana. Xi̱niñúʼu ndiʼi-xa̱ʼa̱na chi saá kúú ña̱ ni̱ka̱ʼa̱n Jehová xíʼin ta̱ Moisés.

21 Tiempo saá, ta̱ Josué sa̱ndíʼi-xa̱ʼa̱ra ndiʼi na̱ anaquim na̱ xi̱ndoo chí yuku̱, chí Hebrón, chí Debir xíʼin Anab, ta saátu ndiʼi na̱ xi̱ndoo chí yuku̱ ña̱ ni̱xi̱yo chí Judá ta saátu ña̱ ni̱xi̱yo chí Israel. Ta̱ Josué xa̱ʼníra na̱yóʼo ta sa̱ndíʼi-xa̱ʼa̱ra ñuuna. 22 Kǒo nda̱a̱ ni iin na̱ anaquim níkindo̱o nu̱ú ñuʼú ña̱ nda̱kiʼin na̱ ñuu Israel, chi ndáa ñuu Gaza, Gat xíʼin Asdod ki̱ndoona. 23 Tasaá kúú ña̱ nda̱kiʼin ta̱ Josué ñuʼú kán nda̱a̱ táki̱ʼva ni̱ka̱ʼa̱n Jehová xíʼin ta̱ Moisés. Tándi̱ʼi, ta̱ Josué nda̱taxiraña ndaʼa̱ na̱ ñuu Israel ña̱ va̱ʼa ndataʼvínaña, tasaá ndakiʼin iin tá iin tribu ñuʼú ña̱ xi̱niñúʼu ndakiʼinna. Ta kǒoka ku̱a̱chi níxi̱yo kán.

12 Na̱ rey na̱ ku̱chiñu na̱ ñuu Israel ka̱nitáʼanna xíʼin ta nda̱kiʼinna ñuʼúna ña̱ ni̱xi̱yo chí táʼví este tá yu̱ta Jordán, chí nu̱ú íyo yoso̱ ña̱ Arnón iinsaá nda̱a̱ yuku̱ Hermón ta saátu iníísaá chí este ña̱ Arabá, xi̱kuu na̱yóʼo: 2 ta̱ Sehón ta̱ xi̱kuu rey na̱ amorreo ta̱ ni̱xi̱yo chí Hesbón ta xi̱xaʼndachíñura chí Aroer, ña̱ xi̱ndikaa̱ chí yuʼú yoso̱ ña̱ Arnón, ta saátu xi̱xaʼndachíñura iin táʼví yoso̱ kán, iin táʼví ña̱ Galaad iinsaá nda̱a̱ yoso̱ ña̱ Jaboc, chí nu̱ú kíxáʼa ñuʼú na̱ ammonita. 3 Ta saátu xi̱xaʼndachíñura chí Arabá iinsaá nda̱a̱ nu̱ú xi̱ndikaa̱ mar tá Kinéret* chí táʼví este ta iinsaá nda̱a̱ nu̱ú ndíkaa̱ mar tá Arabá á mar Salado,* tá xi̱ndikaa̱ chí este chí nu̱ú xi̱ndikaa̱ ñuu Bet-Jesimot, ta chí sur xi̱xaʼndachíñura nu̱ú ñuʼú ña̱ ni̱xi̱yo chí xa̱ʼa̱ yuku̱ Pisgá.

4 Ta nda̱kiʼinna ñuʼú nu̱ú xi̱xaʼndachíñu ta̱ rey Og ta̱ ñuu Basán, ndáa ta̱yóʼo kuití xi̱kuu táʼan na̱ refaím ta̱ ni̱xi̱yoka tiempo saá, ta ni̱xi̱yora chí Astarot xíʼin Edréi. 5 Ta ta̱yóʼo xi̱xaʼndachíñura chí yuku̱ Hermón, chí Salecá xíʼin iníísaá Basán nda̱a̱ nu̱ú kíxáʼa ñuʼú na̱ guesurita xíʼin na̱ maacatita, ta saátu iin táʼví ña̱ Galaad iinsaá nda̱a̱ nu̱ú xi̱kixáʼa ñuʼú nu̱ú xi̱xaʼndachíñu ta̱ rey Sehón ta̱ ñuu Hesbón.

6 Ta̱ Moisés ta̱ xi̱kachíñu nu̱ú Jehová, ta saátu na̱ ñuu Israel ku̱chiñuna ka̱nitáʼanna xíʼin na̱ rey yóʼo. Tándi̱ʼi, ta̱ Moisés ta̱ xi̱kachíñu nu̱ú Jehová nda̱taxira ñuʼú na̱yóʼo ndaʼa̱ na̱ tribu ta̱ Rubén, na̱ tribu ta̱ Gad xíʼin iin táʼví na̱ tribu ta̱ Manasés.

7 Na̱yóʼo kúú ndiʼika na̱ rey na̱ ku̱chiñu ta̱ Josué xíʼin na̱ ñuu Israel ka̱nitáʼanna xíʼin chí táʼví oeste yu̱ta Jordán, nda̱a̱ chí Baal-Gad, chí yoso̱ ña̱ Líbano, iinsaá nda̱a̱ yuku̱ Halac, ña̱ ndíkaa̱ chí Seír. Tándi̱ʼi, ta̱ Josué nda̱taxira ñuʼú na̱yóʼo ndaʼa̱ na̱ tribu na̱ ñuu Israel ña̱ va̱ʼa ndataʼvínaña xíʼinna ta ndakiʼinna ñuʼú ña̱ xíniñúʼu ndakiʼinna, 8 chí nu̱ú íyo yuku̱, chí Sefelá, chí Arabá, chí xa̱ʼa̱ yuku̱, chí nu̱ú ñuʼú yi̱chí ta saátu chí Négueb. Ña̱yóʼo xi̱kuu ñuʼú na̱ hitita, na̱ amorreo, na̱ cananeo, na̱ perizita, na̱ heveo xíʼin na̱ jebuseo. Ta na̱yóʼo xi̱kuu ndiʼi na̱ rey na̱ ku̱chiñuna ka̱nitáʼanna xíʼin:

13 Tá ni̱ya̱ʼa ku̱i̱ya̱, ta̱ Josué xa̱a̱ ku̱chéevara, ña̱kán Jehová ni̱ka̱ʼa̱nra xíʼinra: “Xa̱a̱ ku̱chéevaún vitin, soo kúma̱níkava kanitáʼanndó xíʼin ku̱a̱ʼá ñuu ña̱ va̱ʼa ndakiʼinndó ñuʼúna. 2 Ña̱yóʼo kúú ñuʼú ña̱ kúma̱ní ndakiʼinndó: ndiʼi ñuʼú na̱ filisteo ta saátu na̱ guesurita, 3 ndiʼi ña̱ íyo chí Sihor* ña̱ ndíkaa̱ chí este ñuu Egipto iinsaá nda̱a̱ nu̱ú kíxáʼa ñuu Ecrón, ña̱ ndíkaa̱ chí norte, ña̱ xi̱kuu ñuʼú na̱ cananeo, ta saátu ñuʼú u̱ʼu̱n saá na̱ xáʼndachíñu nu̱ú na̱ filisteo: na̱ gazeo, na̱ asdodita, na̱ asquelonita, na̱ guitita xíʼin na̱ ecronita; saátu chí nu̱ú íyo na̱ avim 4 ña̱ ndíkaa̱ chí táʼví sur; ndiʼi ñuʼú na̱ cananeo; saátu ñuu Meará ña̱ kúú kuenta na̱ sidonio iinsaá nda̱a̱ ñuu Afec, ña̱ ndíkaa̱ nu̱ú kíxáʼa ñuʼú na̱ amorreo; 5 ta saátu ñuʼú na̱ guebalita xíʼin ndiʼi ña̱ íyo chí Líbano chí táʼví este,* ndiʼi Baal-Gad, ndiʼi xa̱ʼa̱ yuku̱ Hermón iinsaá nda̱a̱ Lebó-Hamat,* 6 saátu ndiʼi ñuʼú na̱ ndóo chí yuku̱ ña̱ ni̱xi̱yo chí Líbano iinsaá nda̱a̱ Misrefot-Maim xíʼin ndiʼi ñuʼú na̱ sidonio. Yi̱ʼi̱ ndataxii̱ ñuʼú na̱yóʼo ndaʼa̱ na̱ ñuu Israel. Ña̱ xíniñúʼu keʼé kuitíún kúú ña̱ ndataʼvíún ñuʼú yóʼo xíʼinna ña̱ va̱ʼa kooña kuentana, nda̱a̱ táki̱ʼva xa̱a̱ ni̱ka̱ʼi̱n xíʼún. 7 Ta xíniñúʼu ndataʼvíún ñuʼú yóʼo xíʼin 9 tribu na̱ ñuu Israel ta saátu xíʼin iin táʼví na̱ tribu ta̱ Manasés”.

8 Na̱ tribu ta̱ Rubén, na̱ tribu ta̱ Gad xíʼin inka táʼví na̱ tribu ta̱ Manasés nda̱kiʼinna ñuʼú ña̱ ta̱xi ta̱ Moisés ndaʼa̱na chí táʼví este yu̱ta Jordán, ta mií ñuʼú ña̱ ta̱xi ta̱ Moisés ta̱ xi̱kachíñu nu̱ú Jehová ndaʼa̱na kúú ña̱ nda̱kiʼinna. 9 Nda̱kiʼinna Aroer, ña̱ ndíkaa̱ chí yuʼú yoso̱ Arnón, saátu ñuu ña̱ ndíkaa̱ ma̱ʼñú yoso̱ kán xíʼin iníísaá yoso̱ ña̱ íyo chí Medebá nda̱a̱ Dibón. 10 Nda̱kiʼintuna Hesbón nu̱ú xi̱xaʼndachíñu ta̱ Sehón rey na̱ amorreo, iinsaá nda̱a̱ nu̱ú xi̱kixáʼa ñuʼú na̱ ammonita, 11 nda̱kiʼinna Galaad xíʼin ndiʼi ñuʼú na̱ guesurita xíʼin na̱ maacatita, ndiʼi yuku̱ Hermón xíʼin Basán iinsaá nda̱a̱ Salecá, 12 ta saátu ndiʼi ñuʼú nu̱ú xi̱xaʼndachíñu ta̱ Og, rey ñuu Basán, ta̱ xi̱xaʼndachíñu chí Astarot xíʼin Edréi. Ndáa ta̱yóʼo kuití xi̱kuu táʼan na̱ refaím ta̱ ni̱xi̱yo tiempo saá. Ta̱ Moisés ku̱chiñura ka̱nitáʼanra xíʼinna ta nda̱kiʼinra ñuʼúna. 13 Soo na̱ ñuu Israel va̱ása nítavána na̱ guesurita ni na̱ maacatita na̱ xi̱ndoo nu̱ú ñuʼú kán, saáchi na̱ yiví na̱ xi̱ndoo chí Guesur ta saátu chí Maacat ndóokavana xíʼin na̱ ñuu Israel nda̱a̱ ki̱vi̱ vitin.*

14 Soo iinlá na̱ tribu ta̱ Leví kúú na̱ va̱ása nítaxi ta̱ Moisés ñuʼú ndaʼa̱. Herencia ña̱ ndakiʼin na̱yóʼo kúú ña̱ʼa ña̱ xáʼmina ta sóko̱na nu̱ú Jehová, Ndióxi̱ na̱ ñuu Israel, chi saá kúú ña̱ ki̱ndoo miíra xíʼinna.

15 Tasaá ta̱ Moisés nda̱taxira ñuʼú ndaʼa̱ na̱ tribu ta̱ Rubén, ña̱ va̱ʼa ndataʼvínaña xíʼin na̱ familia na̱ íyo ti̱xin tribu kán, 16 ta ñuʼúna xi̱kixáʼaña chí Aroer, ña̱ ndíkaa̱ chí yuʼú yoso̱ Arnón, ta kuenta miítuna xi̱kuu ñuu ña̱ xi̱ndikaa̱ ma̱ʼñú yoso̱ kán, saátu iníísaá yoso̱ ña̱ xi̱ndikaa̱ yatin Medebá. 17 Ñuʼúna xi̱kuu Hesbón saátu ndiʼi ñuu ña̱ íyo yoso̱ kán, ta saátu Dibón, Bamot-Baal, Bet-Baal-Meón, 18 Jáhaz, Quedemot, Mefaat, 19 Quiryataim, Sibmá, Zéret-Sáhar ña̱ xi̱ndikaa̱ chí yuku̱ nu̱ú íyo yoso̱, 20 saátu Bet-Peor, xa̱ʼa̱ yuku̱ ña̱ íyo Pisgá, Bet-Jesimot, 21 ta saátu ndiʼi ñuu ña̱ ni̱xi̱yo chí yoso̱ xíʼin ndiʼi ñuʼú nu̱ú xi̱xaʼndachíñu ta̱ Sehón rey na̱ amorreo, ta̱ xi̱xaʼndachíñu chí Hesbón. Ta̱ Moisés ku̱chiñura ka̱nitáʼanra xíʼin ta̱yóʼo ta saátu xíʼin na̱ xi̱xaʼndachíñu nu̱ú na̱ ñuu Madián tá kúú ta̱ Eví, ta̱ Réquem, ta̱ Zur, ta̱ Hur xíʼin ta̱ Reba, na̱yóʼo xi̱keʼéna ña̱ xi̱kaʼa̱n ta̱ Sehón ta xi̱ndoona nu̱ú ñuʼú kán. 22 Na̱ ñuu Israel xa̱ʼnína ta̱ Balaam se̱ʼe ta̱ Beor, ta̱ xi̱kuu ta̱ ndáku,* tá xa̱ʼnína ku̱a̱ʼání na̱ yiví xíʼin espada. 23 Chí nu̱ú ndíkaa̱ yu̱ta Jordán xi̱ndiʼi ñuʼú na̱ tribu ta̱ Rubén. Ndiʼi ñuʼú yóʼo ta saátu ñuu ña̱ ni̱xi̱yo kán kúú ña̱ nda̱kiʼin na̱ tribu ta̱ Rubén ña̱ va̱ʼa ndataʼvínaña xíʼin ndiʼi na̱ familia na̱ tribu kán.

24 Tasaá, ta̱ Moisés ta̱xira ñuʼú ndaʼa̱ na̱ tribu ta̱ Gad ña̱ va̱ʼa ndataʼvínaña xíʼin ndiʼi na̱ familia na̱ tribu kán, 25 ta ñuʼú ña̱ nda̱kiʼinna kúú Jazer, ndiʼi ñuu ña̱ ni̱xi̱yo chí Galaad ta saátu iin táʼví ñuʼú ña̱ xi̱kuu kuenta na̱ ammonita iinsaá nda̱a̱ Aroer, ña̱ ndíkaa̱ chí nu̱ú xítondaa Rabá. 26 Ta saátu Hesbón iinsaá nda̱a̱ Ramat-Mizpé xíʼin Betonim, saátu Mahanaim iinsaá nda̱a̱ nu̱ú xi̱kixáʼa Debir. 27 Ta chí yoso̱ nda̱kiʼinna Bet-Haram, Bet-Nimrá, Sucot, Zafón xíʼin ndiʼika ñuʼú nu̱ú xi̱xaʼndachíñu ta̱ Sehón rey ñuu Hesbón, ta ñuʼúna xi̱ndiʼiña chí yu̱ta Jordán, chí táʼví sur tá mar Kinéret,* chí táʼví este yu̱ta Jordán. 28 Ña̱yóʼo kúú ñuʼú ña̱ nda̱kiʼin na̱ tribu ta̱ Gad ña̱ va̱ʼa ndataʼvínaña xíʼin ndiʼi na̱ familia na̱ tribu kán, ta nda̱kiʼintuna ñuu náʼnu xíʼin ñuu válí ña̱ ni̱xi̱yo kán.

29 Ta saátu, ta̱ Moisés ta̱xira ñuʼú ndaʼa̱ iin táʼví na̱ tribu ta̱ Manasés ña̱ va̱ʼa ndataʼvínaña xíʼin ndiʼi na̱ familia na̱ íyo ti̱xin iin táʼví tribu kán. 30 Ta ñuʼúna xi̱kuu ndiʼi ña̱ ni̱xi̱yo chí Mahanaim ta saátu iníísaá Basán, ndiʼi nu̱ú xi̱xaʼndachíñu ta̱ Og rey ñuu Basán ta saátu ndiʼi ñuu nu̱ú íyo veʼe válí ña̱ nda̱kiʼin ta̱ Jaír chí Basán, xi̱kuuña 60 ñuu. 31 Ta nda̱kiʼintuna iin táʼví Galaad, saátu Astarot xíʼin Edréi, ñuu nu̱ú xi̱xaʼndachíñu ta̱ Og rey ñuu Basán, ndiʼi ña̱yóʼo kúú ña̱ nda̱kiʼin na̱ se̱ʼe ta̱ Makir ta̱ xi̱kuu se̱ʼe ta̱ Manasés, ña̱ va̱ʼa ndataʼvínaña xíʼin iin táʼví na̱ se̱ʼe ta̱ Makir.

32 Ña̱yóʼo kúú ñuʼú ña̱ nda̱taxi ta̱ Moisés ndaʼa̱na chí yoso̱ yi̱chí ña̱ íyo chí Moab, chí inka táʼví yu̱ta Jordán, chí táʼví este ñuu Jericó.

33 Soo ta̱ Moisés kǒo nda̱a̱ ni iin herencia nítaxira ndaʼa̱ na̱ tribu ta̱ Leví. Saáchi Jehová Ndióxi̱ na̱ ñuu Israel kúú herenciana, chi saá kúú ña̱ ki̱ndoora xíʼinna.

14 Ña̱yóʼo kúú ndiʼi ñuʼú ña̱ nda̱kiʼin na̱ ñuu Israel chí Canaán, ta ta̱ su̱tu̱ Eleazar, ta̱ Josué se̱ʼe ta̱ Nun xíʼin na̱ xi̱kiʼin kuenta xíʼin iin tá iin tribu na̱ ñuu Israel kúú na̱ ta̱xi ña̱yóʼo ndaʼa̱na. 2 Ta chi̱kaa̱na suerte ña̱ va̱ʼa ndataʼvína ñuʼú xíʼin 9 saá tribu ta saátu xíʼin iin táʼví tribu ta̱ Manasés, nda̱a̱ táki̱ʼva ni̱ka̱ʼa̱n mií Jehová xíʼin ta̱ Moisés. 3 Soo ta̱ Moisés xa̱a̱ ta̱xivara ñuʼú ndaʼa̱ u̱vi̱ tribu sava chí inka táʼví* yu̱ta Jordán, soo na̱ tribu ta̱ Leví kǒo ñuʼú nítaxira ndaʼa̱na. 4 Ta na̱ se̱ʼe ta̱ José xi̱kuuna u̱vi̱ tribu, tribu ta̱ Manasés xíʼin tribu ta̱ Efraín, soo kǒo nda̱a̱ ni iin ñuʼú nítaxina ndaʼa̱ na̱ levita chi ña̱ ta̱xi kuitína ndaʼa̱na kúú ñuu nu̱ú kundoona xíʼin ña̱ʼa ña̱ kúúmiína ta saátu ñuʼú nu̱ú kivi kixáʼan* kití sa̱na̱na. 5 Ña̱kán na̱ ñuu Israel nda̱taʼvína ñuʼú nda̱a̱ táki̱ʼva ni̱ka̱ʼa̱n Jehová xíʼin ta̱ Moisés.

6 Tasaá na̱ ta̱a na̱ tribu ta̱ Judá ku̱yatinna nu̱ú ta̱ Josué chí Guilgal, ta ta̱ Caleb se̱ʼe ta̱ Jefuné ta̱ quenizita ni̱ka̱ʼa̱nra xíʼinra: “Yóʼó kúnda̱a̱va-iniún ndáaña ni̱ka̱ʼa̱n Jehová Ndióxi̱ ta̱ nda̱a̱ xíʼin ta̱ Moisés ta̱ xi̱kachíñu nu̱úra, xa̱ʼa̱ miíún ta saátu xa̱ʼa̱ yi̱ʼi̱ chí Cadés-Barnea. 7 Tá xi̱kuumiíi̱ 40 ku̱i̱ya̱ ta xi̱ndookayó chí Cadés-Barnea, ta̱ Moisés ta̱ xi̱kachíñu nu̱ú Jehová, chi̱ndaʼára yi̱ʼi̱ ña̱ ku̱ʼi̱n kotona̱níi̱* ñuʼú ña̱ íyo chí Canaán ta tá ndi̱kói̱ va̱ása nísandáʼvii̱ra chi ña̱ nda̱a̱va kúú ña̱ na̱túʼi̱n xíʼinra. 8 Na̱ ñanii̱ na̱ ni̱xa̱ʼa̱n xi̱tona̱ní ñuʼú xíʼi̱n, sa̱yíʼvina na̱ ñuu Israel xíʼin ña̱ na̱túʼunna soo yi̱ʼi̱ ka̱ndíxanívai̱ Jehová Ndióxi̱yó xíʼin ndiʼi níma̱i̱. 9 Ki̱vi̱ saá, ta̱ Moisés ki̱ndoora ña̱yóʼo xíʼi̱n: ‘Ñuʼú nu̱ú ni̱xa̱ʼún xa̱a̱ña kooña kuenta miíún ta saátu kuenta na̱ se̱ʼún ndiʼi tiempo, saáchi ka̱ndíxaníún Jehová Ndióxi̱yó xíʼin ndiʼi níma̱ún’. 10 Nda̱a̱ táki̱ʼva xa̱a̱ ki̱ndoo Jehová, xa̱a̱ 45 ku̱i̱ya̱ kúú ña̱ ni̱ya̱ʼa ña̱ ni̱ka̱ʼa̱n mií Jehová ña̱yóʼo xíʼin ta̱ Moisés tá ni̱xi̱ka na̱ ñuu Israel chí nu̱ú ñuʼú yi̱chí, ta vitin tákukavai̱ ta xa̱a̱ kúúmiíi̱ 85 ku̱i̱ya̱. 11 Ta nda̱a̱ táki̱ʼva ndakúi̱ tá chi̱ndaʼá ta̱ Moisés yi̱ʼi̱ ña̱ ni̱xa̱ʼi̱n xi̱tona̱níi̱ ñuʼú, saátu ndakúi̱ vitinva. Íyokava ndeíi̱ ña̱ kanitáʼi̱n ta saátu ña̱ keʼíi̱ inkaka ña̱ʼa. 12 Ña̱kán, taxi ñuʼú ña̱ íyo chí yuku̱ ndaʼíi̱, chi mií Jehová kúú ta̱ ki̱ndoo ña̱ taxiraña ndaʼíi̱ ki̱vi̱ saá. Ni ki̱vi̱ saá xi̱niso̱ʼún ña̱ ndóo na̱ anaquim nu̱úña ta kútu̱ní ndási ñuuna, soo chindeétáʼanva Jehová xíʼi̱n ña̱ ndakiʼii̱n ñuʼú yóʼo, chi saá kúú ña̱ ki̱ndoo mií Jehová”.

13 Ña̱kán, ta̱ Josué ta̱xira bendición ndaʼa̱ ta̱ Caleb se̱ʼe ta̱ Jefuné ta ta̱xira ñuʼú ña̱ íyo chí Hebrón ndaʼa̱ra. 14 Ña̱kán, nda̱a̱ tiempo vitin* ñuu Hebrón kúúña kuenta ta̱ Caleb se̱ʼe ta̱ Jefuné ta̱ quenizita, saáchi ka̱ndíxaníra Jehová Ndióxi̱ na̱ ñuu Israel xíʼin ndiʼi níma̱ra. 15 Tá ya̱chi̱, ñuu Hebrón xi̱naníña Quiryat-Arbá (ta̱ Arbá xi̱kuu ta̱ ndáyáʼvi va̱ʼaka nu̱ú ndiʼi na̱ anaquim). Ta kǒoka ku̱a̱chi níxi̱yo kán.

15 Ñuʼú ña̱ nda̱kiʼin ndiʼi na̱ familia na̱ tribu ta̱ Judá xi̱kixáʼaña chí nu̱ú kíxáʼa Edom, chí nu̱ú ñuʼú yi̱chí ña̱ Zin, iinsaá nda̱a̱ chí táʼví sur ña̱ Négueb. 2 Ñuʼú na̱yóʼo xi̱kixáʼaña nu̱ú ndíkaa̱ mar Salado,* chí táʼví sur yuʼú mar yóʼo. 3 Ñuʼú miína xi̱kuu ndiʼi ña̱ ni̱xi̱yo chí sur ña̱ Acrabim, iinsaá nda̱a̱ Zin, ta saátu ndiʼi ña̱ ni̱xi̱yo chí sur ña̱ Cadés-Barnea iinsaá nda̱a̱ Hezrón, ña̱ xi̱xaa̱ nda̱a̱ Addar ta xi̱ndikóko̱oña chí Carcá. 4 Tándi̱ʼi xi̱xaa̱ña nda̱a̱ chí Azmón iinsaá nda̱a̱ chí nu̱ú xi̱yaʼa ku̱a̱ʼání ti̱kui̱í chí Egipto, ta xi̱ndiʼiña nda̱a̱ nu̱ú ndíkaa̱ Mar.* Nda̱a̱ yóʼo kúú nu̱ú xi̱ndiʼi ñuʼúna chí táʼví sur.

5 Ta chí táʼví este,* ñuʼúna xi̱kixáʼaña chí nu̱ú ndíkaa̱ mar Salado* iinsaá nda̱a̱ nu̱ú xi̱ndiʼi yu̱ta Jordán, ta xi̱ndakutáʼanña xíʼin yuʼú mar chí táʼví norte nu̱ú xi̱ndiʼi yu̱ta Jordán. 6 Ta ñuʼúna xi̱xaa̱ña nda̱a̱ Bet-Hoglá ta xi̱yaʼaña chí norte ña̱ Bet-Arabá, ta xi̱xaa̱ña nda̱a̱ nu̱ú kánduʼú yu̱u̱ ña̱ níʼi ki̱vi̱ ta̱ Bohán se̱ʼe ta̱ Rubén. 7 Ta ñuʼúna xi̱ndaaña nda̱a̱ Debir, chí yoso̱ ña̱ Acor, ta chí táʼví norte xi̱ndikóko̱oña chí Guilgal, ña̱ ndíkaa̱ chí nu̱ú xítondaa yichi̱ ña̱ ku̱a̱ʼa̱n chí Adumim, ña̱ ndíkaa̱ chí sur nu̱ú xi̱yaʼa ku̱a̱ʼání ti̱kui̱í ta saátu xi̱xaa̱ña nda̱a̱ chí nu̱ú xi̱kana ku̱a̱ʼání ti̱kui̱í chí En-Semes ta xi̱ndiʼiña nda̱a̱ En-Roguel. 8 Ta ñuʼúna xi̱ndaaña nda̱a̱ nu̱ú ndíkaa̱ yoso̱ ña̱ Hinón, chí xa̱ʼa̱ yuku̱ chí nu̱ú xi̱ndoo na̱ jebuseo chí táʼví sur á ñuu Jerusalén, ta chí oeste* xi̱ndaaña nda̱a̱ chí xi̱ní yuku̱ ña̱ xítondaa chí yoso̱ ña̱ Hinón, chí táʼví norte ña̱ yoso̱ ña̱ Refaím. 9 Ta nu̱ú ñuʼúna xi̱yaʼaña xi̱ní yuku̱ kán iinsaá nda̱a̱ chí nu̱ú xi̱kana ti̱kui̱í chí Neftóah ta xi̱xaa̱ña nda̱a̱ chí ñuu ña̱ ni̱xi̱yo chí yuku̱ Efrón iinsaá nda̱a̱ Baalá á Quiryat-Jearim. 10 Ta nu̱ú ñuʼúna ña̱ xi̱xaa̱ chí Baalá, xi̱ndikóko̱oña chí oeste nda̱a̱ yuku̱ Seír, ta chí norte xi̱xaa̱ña nda̱a̱ xa̱ʼa̱ yuku̱ Jearim á Kesalón, ta xi̱nuuña nda̱a̱ Bet-Semes iinsaá nda̱a̱ Timná.* 11 Ta chí norte xi̱xaa̱ña nda̱a̱ xa̱ʼa̱ yuku̱ Ecrón, ta saátu ndiʼi ñuʼú ña̱ ni̱xi̱yo chí Sikerón iinsaá nda̱a̱ yuku̱ Baalá ta saátu iinsaá nda̱a̱ Jabneel, ta ñuʼú na̱yóʼo xi̱ndiʼiña nda̱a̱ chí nu̱ú xi̱ndikaa̱ mar.

12 Ta chí oeste, ñuʼúna xi̱xaa̱ña nda̱a̱ chí yuʼú mar Grande.* Ña̱yóʼo kúú ndiʼi ñuʼú ña̱ nda̱kiʼin na̱ tribu ta̱ Judá ña̱ va̱ʼa ndataʼvínaña xíʼin ndiʼi na̱ familia na̱ tribu kán.

13 Nda̱a̱ táki̱ʼva ni̱ka̱ʼa̱n mií Jehová saá ke̱ʼé ta̱ Josué chi ta̱xira iin táʼví ñuʼú ndaʼa̱ ta̱ Caleb se̱ʼe ta̱ Jefuné, ta ñuʼú yóʼo ni̱xi̱yoña chí nu̱ú ndóo na̱ tribu ta̱ Judá. Ña̱ nda̱kiʼinra kúú Quiryat-Arbá á Hebrón (ta̱ Arbá xi̱kuura yivá ta̱ Anac). 14 Ña̱kán ta̱ Caleb ta̱vára u̱ni̱ saá na̱ se̱ʼe ta̱ Anac nu̱ú ñuʼú kán, ta̱ Sesái, ta̱ Ahimán xíʼin ta̱ Talmái, na̱yóʼo xi̱kuu se̱ʼe ta̱ Anac. 15 Tasaá nda̱kiʼinra ku̱a̱ʼa̱nra kanitáʼanra xíʼin na̱ ndóo chí Debir (tá ya̱chi̱ ñuu Debir xi̱naníña Quiryat-Séfer). 16 Tasaá ni̱ka̱ʼa̱n ta̱ Caleb: “Ta̱a ta̱ ná kuchiñu kanitáʼan xíʼin na̱ ñuu Quiryat-Séfer ta ndakiʼinraña, taxii̱ se̱ʼi̱ ñá Acsá ña̱ kooñá ñá síʼira”. 17 Ta̱ Otniel se̱ʼe ta̱ Quenaz ñani ta̱ Caleb kúú ta̱ ku̱chiñu nda̱kiʼin ñuu yóʼo, ña̱kán ta̱ Caleb ta̱xira se̱ʼera ñá Acsá ña̱ kooñá xíʼinra. 18 Tá ku̱a̱ʼa̱nna chí veʼena, ñáyóʼo xa̱kundáʼviñá nu̱ú ta̱ Otniel ña̱ ná ka̱ʼa̱nra xíʼin yiváñá ña̱ taxira iin ñuʼú ndaʼa̱na. Tasaá nu̱uñá sa̱tá burro* ta ni̱ka̱ʼa̱n ta̱ Caleb xíʼinñá: “¿Ndáaña kúni̱ún?”. 19 Ñáyóʼo ni̱ka̱ʼa̱nñá xíʼinra: “Ixaún ña̱ ma̱ní, saníʼún iin ñuʼú yi̱ʼi̱ ña̱ va̱ʼa na̱ʼún ña̱ táxiún bendición ndaʼíi̱. Xa̱a̱ ta̱xivaún iin ñuʼú ndaʼíi̱ chí sur* soo saátu kúni̱i̱ ña̱ ná taxiún Gulot-Maim* ndaʼíi̱”. Ña̱kán ta̱xira Gulot Alto xíʼin Gulot Bajo ndaʼa̱ñá.

20 Ña̱yóʼo kúú ñuʼú ña̱ nda̱kiʼin na̱ tribu ta̱ Judá ña̱ va̱ʼa ndataʼvínaña xíʼin ndiʼi na̱ familia na̱ tribu kán.

21 Ta ñuʼú ña̱ nda̱kiʼin na̱ tribu ta̱ Judá chí táʼví sur chí nu̱ú xi̱kixáʼa ñuʼú na̱ ñuu Edom xi̱kuuña: Cabzeel, Éder, Jagur, 22 Quiná, Dimoná, Adadá, 23 Quedes, Hazor, Itnán, 24 Zif, Télem, Bealot, 25 Hazor-Hadatá xíʼin Queriyot-Hezrón á Hazor, 26 Amam, Sema, Moladá, 27 Hazar-Gadá, Hesmón, Bet-Pélet, 28 Hazar-Sual, Beer-Seba, Biziotías, 29 Baalá, Iyim, Ézem, 30 Eltolad, Kesil, Hormá, 31 Ziclag, Madmaná, Sansaná, 32 Lebaot, Silhim, Ain xíʼin Rimón. Ndiʼi ñuu yóʼo xi̱kuuña 29 ta nda̱kiʼintuna savaka ñuu válí.

33 Ta ñuu ña̱ nda̱kiʼinna chí Sefelá xi̱kuuña: Estaol, Zorá, Asná,* 34 Zanóah, En-Ganim, Tapúah, Enam, 35 Jarmut, Adulam, Socó,* Azecá, 36 Saaraim, Aditaim, Guederá xíʼin Guederotaim:* 14 ñuu kúú ña̱ nda̱kiʼinna ta saátu savaka ñuu válí.

37 Zenán, Hadasá, Migdal-Gad, 38 Dileán, Mizpé, Jocteel, 39 Lakís, Bozcat, Eglón, 40 Cabón, Lahmam, Kitlís, 41 Guederot, Bet-Dagón, Naamá xíʼin Maquedá: 16 ñuu kúú ña̱ nda̱kiʼinna ta saátu savaka ñuu válí.

42 Libná, Éter, Asán, 43 Iftá, Asná,* Nezib, 44 Queilá, Aczib xíʼin Maresá:* 9 ñuu kúú ña̱ nda̱kiʼinna ta saátu savaka ñuu válí.

45 Nda̱kiʼintuna ñuu Ecrón ta saátu ñuu ña̱ ni̱xi̱yo yatin kán xíʼin savaka ñuu válí, 46 ta nda̱kiʼinna Ecrón iinsaá nda̱a̱ ña̱ ni̱xi̱yo chí táʼví oeste, ndiʼi ña̱ ni̱xi̱yo chí Asdod ta saátu savaka ñuu válí.

47 Nda̱kiʼinna Asdod ta saátu ñuu ña̱ íyo yatin kán xíʼin savaka ñuu válí, nda̱kiʼinna ñuu Gaza saátu ñuu ña̱ ni̱xi̱yo yatin kán xíʼin savaka ñuu válí iinsaá nda̱a̱ nu̱ú kána ku̱a̱ʼání ti̱kui̱í chí Egipto, chí mar Grande* ta saátu ndiʼi ñuʼú ña̱ íyo yuʼú tá mar yóʼo.

48 Ta chí nu̱ú íyo yuku̱ nda̱kiʼinna Samir, Jatir, Socó,* 49 Daná, Quiryat-Saná á Debir, 50 Anab, Estemó, Anim, 51 Gosén, Holón xíʼin Guiló: 11 ñuu kúú ña̱ nda̱kiʼinna ta saátu savaka ñuu válí.

52 Arab, Dumá, Esán, 53 Janim, Bet-Tapúah, Afecá, 54 Humtá, Quiryat-Arbá á Hebrón xíʼin Zior: 9 ñuu kúú ña̱ nda̱kiʼinna ta saátu savaka ñuu válí.

55 Maón, Carmelo, Zif, Jutá, 56 Jezreel, Jocdeam, Zanóah, 57 Cayín, Guibeá* xíʼin Timná: 10 ñuu kúú ña̱ nda̱kiʼinna ta saátu savaka ñuu válí.

58 Halhul, Bet-Zur, Guedor, 59 Maarat, Bet-Anot xíʼin Eltecón: i̱ñu̱ ñuu kúú ña̱ nda̱kiʼinna ta saátu savaka ñuu válí.

60 Quiryat-Baal á Quiryat-Jearim xíʼin Rabá: u̱vi̱ ñuu kúú ña̱ nda̱kiʼinna ta saátu savaka ñuu válí.

61 Ta chí ñuʼú yi̱chí nda̱kiʼinna, Bet-Arabá, Midín, Secacá, 62 Nibsán, saátu ñuu ña̱ naní Ciudad de la Sal xíʼin En-Guedí: i̱ñu̱ ñuu kúú ña̱ nda̱kiʼinna ta saátu savaka ñuu válí.

63 Soo na̱ ta̱a na̱ ñuu Judá va̱ása níkuchiñuna tavána na̱ jebuseo na̱ xi̱ndoo chí Jerusalén, xa̱ʼa̱ ña̱yóʼo na̱ jebuseo ndóokana xíʼin na̱ ñuu Judá chí Jerusalén nda̱a̱ ki̱vi̱ vitin.*

16 Ta ñuʼú ña̱ nda̱kiʼin na̱ veʼe ta̱ José ki̱xáʼaña chí Jericó chí nu̱ú ndíkaa̱ yu̱ta Jordán iinsaá nda̱a̱ nu̱ú xi̱ndikaa̱ ti̱kui̱í chí táʼví este* ñuu Jericó, ña̱ kíxáʼa chí ñuʼú yi̱chí chí nu̱ú ndíkaa̱ ñuu Jericó iinsaá nda̱a̱ nu̱ú íyoní yuku̱ chí Betel. 2 Ta ñuʼúna xi̱kuu ndiʼi ña̱ ni̱xi̱yo chí Betel, ña̱ kíndo̱o chí ñuu Luz, ta xi̱xaa̱ña nda̱a̱ nu̱ú xi̱kixáʼa ñuʼú na̱ arkita chí Atarot. 3 Ta ñuʼú miína xi̱kuutu ña̱ ni̱xi̱yo chí táʼví oeste* nu̱ú kíxáʼa ñuʼú na̱ jafletita iinsaá nda̱a̱ nu̱ú kíxáʼa ñuu Bet-Horón Baja xíʼin Guézer ta ndíʼiña chí mar.

4 Tasaá na̱ se̱ʼe ta̱ José, ta̱ Manasés xíʼin ta̱ Efraín, nda̱kiʼinna ñuʼú ña̱ ta̱xina ndaʼa̱na. 5 Ta ña̱yóʼo kúú ndiʼi ñuʼú ña̱ nda̱kiʼin na̱ tribu ta̱ Efraín ña̱ va̱ʼa ndataʼvínaña xíʼin ndiʼi na̱ familia na̱ tribu kán: chí táʼví este, ñuʼúna xi̱kixáʼaña chí Atarot-Addar iinsaá nda̱a̱ Bet-Horón Alta, 6 ta xi̱xaa̱ña nda̱a̱ nu̱ú ndíkaa̱ mar. Micmetat xi̱ndikaa̱ña chí norte, ta ñuʼúna xi̱ndikóko̱oña chí táʼví este nda̱a̱ chí nu̱ú ndíkaa̱ Taanat-Siló ta xi̱xaa̱ña nda̱a̱ chí táʼví este ñuu Janóah. 7 Ta saátu xi̱kixáʼa ñuʼúna chí Janóah iinsaá nda̱a̱ Atarot xíʼin Naará, ta xi̱xaa̱ña nda̱a̱ ñuu Jericó iinsaá nda̱a̱ nu̱ú xi̱ndikaa̱ yu̱ta Jordán. 8 Ta ñuʼúna ña̱ ni̱xi̱yo chí Tapúah xi̱xaa̱ña nda̱a̱ chí oeste chí nu̱ú xi̱yaʼa ku̱a̱ʼání ti̱kui̱í chí Caná* ta xi̱ndiʼiña chí nu̱ú ndíkaa̱ mar. Ña̱yóʼo kúú ndiʼi ñuʼú ña̱ nda̱kiʼin na̱ tribu ta̱ Efraín ña̱ va̱ʼa ndataʼvínaña xíʼin ndiʼi na̱ familia na̱ tribu kán, 9 ta na̱ tribu ta̱ Efraín nda̱kiʼintuna sava ñuu náʼnu xíʼin ñuu válí ña̱ ni̱xi̱yo nu̱ú ñuʼú ña̱ nda̱kiʼin na̱ tribu ta̱ Manasés.

10 Soo va̱ása nítavána na̱ cananeo na̱ xi̱ndoo chí Guézer; ta na̱ cananeo yóʼo ndóona xíʼin na̱ tribu ta̱ Efraín nda̱a̱ ki̱vi̱ vitin,* ta i̱xandúxana xíʼinna ña̱ kachíñundáʼvina nu̱úna.

17 Tá chi̱kaa̱na suerte ña̱ va̱ʼa ndataʼvína ñuʼú, na̱ tribu ta̱ Manasés, ta̱ xi̱kuu se̱ʼenu̱ú ta̱ José nda̱kiʼinna iin táʼví ñuʼú. Ta̱ Makir, ta̱ xi̱kuu se̱ʼenu̱ú ta̱ Manasés ta xi̱kuutura yivá ta̱ Galaad, nda̱kiʼinra ñuʼú ña̱ ni̱xi̱yo chí Galaad ta saátu chí Basán xa̱ʼa̱ ña̱ xi̱kuura iin ta̱a ta̱ ni̱xi̱ka nu̱ú ku̱a̱chi. 2 Ta ndiʼika na̱ familia na̱ ke̱e ti̱xin tribu ta̱ Manasés nda̱kiʼinna iin táʼví ñuʼú: na̱ se̱ʼe ta̱ Abí-Ézer, na̱ se̱ʼe ta̱ Hélec, na̱ se̱ʼe ta̱ Asriel, na̱ se̱ʼe ta̱ Siquem, na̱ se̱ʼe ta̱ Héfer ta saátu na̱ se̱ʼe ta̱ Semidá. Na̱yóʼo xi̱kuu na̱ veʼe ta̱ Manasés ta̱ xi̱kuu se̱ʼe ta̱ José, miína xíʼin na̱ veʼena. 3 Soo ta̱ Zelofehad se̱ʼe ta̱ Héfer, ta̱ xi̱kuu se̱ʼe ta̱ Galaad, ta̱ xi̱kuu se̱ʼe ta̱ Makir, ta̱ xi̱kuu se̱ʼe ta̱ Manasés, kǒo se̱ʼeta̱ara níxi̱yo chi nina ñaʼá xi̱kuu se̱ʼera. Ta náyóʼo xi̱naníná Mahlá, Noá, Hoglá, Milcá xíʼin Tirzá. 4 Tasaá, náyóʼo ni̱xa̱ʼa̱nná nu̱ú ta̱ su̱tu̱ Eleazar, nu̱ú ta̱ Josué se̱ʼe ta̱ Nun ta saátu nu̱ú na̱ kíʼin kuenta xíʼin na̱ ñuu Israel, ta ni̱ka̱ʼa̱nná xíʼinna: “Mií Jehová kúú ta̱ ni̱ka̱ʼa̱n xíʼin ta̱ Moisés tá ná ndataʼvína ñuʼú xíʼin na̱ táʼanndi̱, xíniñúʼu taxina iin táʼví ña̱yóʼo ndaʼa̱ndi̱”. Ña̱kán, xa̱ʼa̱ ña̱ ni̱ka̱ʼa̱n Jehová ña̱yóʼo ta̱xina iin táʼví ñuʼú ndaʼa̱ná tá nda̱taʼvínaña xíʼin na̱ xitoná.

5 Na̱ tribu ta̱ Manasés nda̱kiʼinna ñuʼú ña̱ ni̱xi̱yo chí Galaad xíʼin Basán, ña̱ ni̱xi̱yo chí inka táʼví* yu̱ta Jordán, ta saátu nda̱kiʼinna inkaka u̱xu̱ táʼví ñuʼú 6 saáchi ná ñaʼá ná tribu ta̱ Manasés nda̱kiʼinná ñuʼú tá nda̱taʼvínaña xíʼin savaka na̱ ta̱a na̱ tribu kán, ta ndiʼi ñuʼú ña̱ ni̱xi̱yo chí Galaad ni̱xa̱a̱ña ku̱uña kuenta inka táʼví na̱ tribu ta̱ Manasés.

7 Ta ñuʼú ña̱ nda̱kiʼin na̱ tribu ta̱ Manasés xi̱kixáʼaña chí nu̱ú xi̱ndiʼi ñuʼú na̱ tribu ta̱ Aser iinsaá nda̱a̱ Micmetat ña̱ xítondaa chí ñuu Siquem, ta chí táʼví sur, ñuʼúna xi̱xaa̱ña nda̱a̱ En-Tapúah. 8 Ñuʼú ña̱ ni̱xi̱yo yatin Tapúah ni̱xa̱a̱ña ku̱uña kuenta na̱ tribu ta̱ Manasés, soo mií ñuu Tapúah yóʼo xi̱kuuña kuenta na̱ tribu ta̱ Efraín. 9 Ta ñuʼú na̱yóʼo xi̱xaa̱ña nda̱a̱ chí nu̱ú yáʼa ti̱kui̱í chí Caná,* chí táʼví sur nu̱ú xi̱yaʼa ti̱kui̱í yóʼo. Nu̱ú ñuʼú kán ni̱xi̱yo sava ñuu na̱ tribu ta̱ Efraín ta ni̱xi̱yotu sava ñuu na̱ tribu ta̱ Manasés, ta ñuʼú na̱ tribu ta̱ Manasés ni̱xi̱yoña chí táʼví norte nu̱ú xi̱yaʼa ti̱kui̱í ta xi̱xaa̱ña nda̱a̱ chí mar. 10 Ñuʼú ña̱ ni̱xi̱yo chí sur xi̱kuuña ñuʼú na̱ tribu ta̱ Efraín, ta ñuʼú ña̱ ni̱xi̱yo chí norte xi̱kuuña ñuʼú na̱ tribu ta̱ Manasés, ta chí nu̱ú ni̱xi̱yo mar xi̱ndiʼi ñuʼú u̱vi̱ saána. Chí norte, ñuʼú na̱ tribu ta̱ Manasés xi̱xaa̱ña nda̱a̱ nu̱ú xi̱kixáʼa ñuʼú na̱ tribu ta̱ Aser, ta chí este xi̱xaa̱ña nda̱a̱ nu̱ú xi̱kixáʼa ñuʼú na̱ tribu ta̱ Isacar.

11 Ta na̱ tribu ta̱ Manasés nda̱kiʼintuna sava ñuu ña̱ ni̱xi̱yo nu̱ú ñuʼú na̱ tribu ta̱ Isacar ta saátu na̱ tribu ta̱ Aser, ña̱yóʼo kúú ñuʼú ña̱ nda̱kiʼinna: Bet-Seán xíʼin ñuu ña̱ ni̱xi̱yo yatin kán, Ibleam xíʼin ñuu ña̱ ni̱xi̱yo yatin kán, ñuʼú na̱ ni̱xi̱yo chí Dor ta saátu ñuu ña̱ ni̱xi̱yo yatin kán, ñuʼú na̱ ni̱xi̱yo chí En-Dor ta saátu ñuu ña̱ ni̱xi̱yo yatin kán, ñuʼú na̱ ni̱xi̱yo chí Taanac ta saátu ñuu ña̱ ni̱xi̱yo yatin kán, ñuʼú na̱ ni̱xi̱yo chí Meguidó ta saátu ñuu ña̱ ni̱xi̱yo yatin kán, u̱ni̱ ñuu yóʼo ni̱xi̱yoña chí nu̱ú ni̱xi̱yoní yuku̱.

12 Na̱ tribu ta̱ Manasés va̱ása níkuchiñuna ndakiʼin ndiʼina ñuu yóʼo, saáchi na̱ cananeo na̱ xi̱ndoo nu̱úña va̱ása níxiinna keena. 13 Tá ndu̱ku̱a̱ʼáka na̱ ñuu Israel, i̱xandúxana xíʼin na̱ cananeo ña̱ kachíñundáʼvina nu̱úna, soo va̱ása nítavána na̱yóʼo ñuuna.

14 Na̱ se̱ʼe ta̱ José ni̱ka̱ʼa̱nna xíʼin ta̱ Josué: “¿Nda̱chun iin táʼví loʼo kuití ñuʼú ta̱xiún ndaʼa̱ndi̱ tá chi̱kaa̱na suerte ña̱ nda̱taʼvína ñuʼú? Ndi̱ʼi̱ ku̱a̱ʼáníva kúúndi̱, saáchi Jehová ku̱a̱ʼání ña̱ va̱ʼa táxira ndaʼa̱ndi̱”. 15 Tasaá nda̱kuiin ta̱ Josué yuʼúna: “Tá ku̱a̱ʼání kúúndó, kúáʼanndó chí yuku̱ chí nu̱ú íyo ñuʼú na̱ perizita xíʼin na̱ refaím, ta kán ndasaviíndó ñuʼú nu̱ú kundoondó, saáchi ñuʼú ña̱ íyo chí yuku̱ ña̱ Efraín va̱ása naniña kundoondó”. 16 Ta na̱ se̱ʼe ta̱ José ni̱ka̱ʼa̱nna: “Va̱ása nani kundoondi̱ chí nu̱ú íyo yuku̱. Ta ndiʼi na̱ cananeo na̱ ndóo chí yoso̱, tá kúú na̱ ndóo chí Bet-Seán xíʼin ñuu ña̱ íyo yatin kán ta saátu na̱ ndóo chí yoso̱ ña̱ Jezreel kúúmiína carreta tú xáʼa̱n nu̱ú ku̱a̱chi tú ñúʼu ka̱a ña̱ xi̱ín* nu̱ú xa̱ʼa̱”. 17 Ña̱kán ta̱ Josué ni̱ka̱ʼa̱nra xíʼin na̱ se̱ʼe ta̱ José, na̱ tribu ta̱ Efraín xíʼin na̱ tribu ta̱ Manasés: “Ku̱a̱ʼání kúúndó ta ndakúníndó. Su̱ví iin kuití táʼví ñuʼú ndakiʼinndó, 18 chi ndiʼi ñuʼú ña̱ íyo chí yuku̱, kuenta miíndó kooña. Ni yuku̱ kúúña ndasaviíndóña ta nda̱a̱ ña̱yóʼo nduu ñuʼúndó. Kuchiñuvandó kanitáʼanndó xíʼin na̱ cananeo ni ndakúnína ta kúúmiína carreta tú xáʼa̱n nu̱ú ku̱a̱chi tú ñúʼu ka̱a ña̱ xi̱ín nu̱ú xa̱ʼa̱”.

18 Tasaá ndiʼi na̱ ñuu Israel ni̱xa̱a̱na chí Siló, ta kán ka̱nindichina tabernáculo saáchi xa̱a̱ nda̱kiʼinvana ñuʼú kán. 2 Soo u̱xa̱ka tribu na̱ ñuu Israel xi̱kuma̱ní ndakiʼin ñuʼú. 3 Tasaá ni̱ka̱ʼa̱n ta̱ Josué xíʼin na̱ ñuu Israel: “Jehová Ndióxi̱ na̱ táʼanndó na̱ xi̱ndoo xi̱naʼá xa̱a̱ ta̱xivara ñuʼú ndaʼa̱ndó, ¿ña̱kán nda̱saaka tiempo kundatundó tasaá ku̱ʼu̱nndó ndakiʼinndóña? 4 Ti̱xin iin tá iin tribu ndaka̱xinndó u̱ni̱ na̱ ta̱a, ña̱ va̱ʼa chindaʼíi̱na ku̱ʼu̱nna kotona ñuʼú yóʼo, ta sanánana nu̱ú mapa* ndáa ñuʼú kúú ña̱ ndakiʼin iin tá iin na̱ tribu yóʼo. Ta tándi̱ʼi ná ndikó tukuna nu̱úi̱. 5 Ta u̱xa̱ táʼví xíniñúʼu ndataʼvíndó ñuʼú yóʼo. Na̱ tribu ta̱ Judá kindo̱ona xíʼin ñuʼú ña̱ xa̱a̱ kúúmiína chí táʼví sur, ta na̱ veʼe ta̱ José kindo̱ona xíʼin ñuʼú ña̱ xa̱a̱ kúúmiína chí táʼví norte. 6 Ña̱kán u̱xa̱ táʼví xíniñúʼu ndataʼvíndó ñuʼú yóʼo ta sanánandóña nu̱ú mapa. Tándi̱ʼi kuniʼindó ña̱yóʼo kixindó, ta yi̱ʼi̱ chika̱i̱ suerte ña̱ va̱ʼa ndataʼvíi̱ ñuʼú yóʼo xíʼinndó, ta ná kuni Jehová Ndióxi̱yó. 7 Soo na̱ tribu ta̱ Leví va̱ása ndakiʼinna ñuʼú, saáchi herencia na̱yóʼo kúú ña̱ koona su̱tu̱ ta kachíñuna nu̱ú Jehová. Ta na̱ tribu ta̱ Gad, na̱ tribu ta̱ Rubén xíʼin iin táʼví na̱ tribu ta̱ Manasés xa̱a̱ nda̱kiʼinna ñuʼú chí táʼví este tá yu̱ta Jordán, ña̱ ta̱xi ta̱ Moisés ta̱ xi̱kachíñu nu̱ú Jehová ndaʼa̱na”.

8 Na̱ ta̱a na̱ nda̱kaxinna xa̱a̱ íyo tu̱ʼvana ña̱ ku̱ʼu̱nna, ta ta̱ Josué ni̱ka̱ʼa̱nra xíʼin na̱ sanána mapa ñuʼú kán: “Kúáʼanndó kotondó ñuʼú yóʼo ta sanánandóña nu̱ú mapa ta ndikóndó nu̱úi̱, ta chí Siló yóʼo chikai̱ suerte ña̱ va̱ʼa ndataʼvíi̱ ñuʼú yóʼo, ta ná kuni Jehová”. 9 Tándi̱ʼi na̱ ta̱a yóʼo nda̱kiʼinna ku̱a̱ʼa̱nna ña̱ kotona ñuʼú kán, ta sa̱nánanaña nu̱ú mapa, ta ñuʼú na̱ ñuu na̱ ni̱xi̱yo kán nda̱taʼvínaña u̱xa̱ táʼví, ta tándi̱ʼi nda̱chitáʼanna ndiʼi ña̱ sa̱nánana nu̱ú iin libro. Tasaá ndi̱kóna chí Siló nu̱ú ni̱xi̱yo ta̱ Josué. 10 Tándi̱ʼi, ta̱ Josué chi̱kaa̱ra suerte chí Siló ña̱ va̱ʼa ndataʼvíra ñuʼú yóʼo xíʼin na̱ ñuu Israel, ta xi̱ni Jehová ña̱yóʼo.

11 Tá chi̱kaa̱ ta̱ Josué suerte, na̱ tribu ta̱ Benjamín nda̱kiʼinna ñuʼú ña̱ va̱ʼa ndataʼvínaña xíʼin na̱ familia na̱ tribu yóʼo, ta ñuʼú ña̱ nda̱kiʼinna ni̱xi̱yoña yatin nu̱ú ni̱xi̱yo ñuʼú na̱ veʼe ta̱ Judá xíʼin na̱ veʼe ta̱ José. 12 Chí norte, ñuʼúna xi̱kixáʼaña chí Jordán iinsaá nda̱a̱ chí xa̱ʼa̱ yuku̱ ña̱ íyo chí táʼví norte ña̱ ñuu Jericó, ta kuenta miítuna ni̱xi̱yo yuku̱ ña̱ ni̱xi̱yo chí oeste* iinsaá nda̱a̱ nu̱ú ñuʼú yi̱chí ña̱ ni̱xi̱yo chí Bet-Aven. 13 Ta ñuʼúna xi̱xaa̱ña nda̱a̱ xa̱ʼa̱ yuku̱ ña̱ íyo chí táʼví sur ña̱ ñuu Luz á Betel. Saátu ñuʼúna xi̱kuu ndiʼi ña̱ ni̱xi̱yo chí yuku̱ chí táʼví sur ña̱ Bet-Horón Baja iinsaá nda̱a̱ Atarot-Addar. 14 Ta ñuʼúna xi̱xaa̱ña nda̱a̱ oeste ta xi̱ndikóko̱oña chí sur chí nu̱ú íyo yuku̱ ña̱ xítondaa Bet-Horón, ta xi̱ndiʼiña nda̱a̱ Quiryat-Baal á Quiryat-Jearim iin ñuu ña̱ xi̱kuu kuenta na̱ tribu ta̱ Judá. Ña̱yóʼo xi̱kuu ñuʼúna chí táʼví oeste.

15 Ta chí táʼví sur xi̱kixáʼaña chí Quiryat-Jearim iinsaá nda̱a̱ chí oeste ta xi̱xaa̱ña nda̱a̱ nu̱ú xi̱kana ti̱kui̱í chí Neftóah. 16 Ta ña̱yóʼo xi̱xaa̱ña nda̱a̱ chí yuku̱ ña̱ xítondaa chí yoso̱ ña̱ Hinón, ña̱ ndíkaa̱ chí norte ña̱ yoso̱ Refaím, ta xi̱xaa̱ña nda̱a̱ yoso̱ ña̱ Hinón chí táʼví sur chí xa̱ʼa̱ yuku̱ nu̱ú xi̱ndoo na̱ jebuseo iinsaá nda̱a̱ En-Roguel. 17 Ta chí norte xi̱xaa̱ña nda̱a̱ En-Semes iinsaá nda̱a̱ Guelilot, ña̱ ndíkaa̱ chí nu̱ú xítondaa yichi̱ ña̱ ku̱a̱ʼa̱n chí Adumim, ta xi̱xaa̱ña nda̱a̱ nu̱ú kánduʼú yu̱u̱ ña̱ níʼi ki̱vi̱ ta̱ Bohán se̱ʼe ta̱ Rubén. 18 Ta saátu nda̱a̱ xa̱ʼa̱ yuku̱ ña̱ íyo chí norte ña̱ Arabá ta xi̱xaa̱tuña nda̱a̱ mií Arabá. 19 Ta ñuʼú na̱yóʼo xi̱xaa̱ña nda̱a̱ chí xa̱ʼa̱ yuku̱ ña̱ ni̱xi̱yo chí norte ña̱ Bet-Hoglá ta xi̱ndiʼiña chí táʼví norte chí yuʼú tá mar Salado,* chí táʼví sur tá yu̱ta Jordán. Yóʼo kúú nu̱ú xi̱ndiʼi ñuʼúna chí táʼví sur. 20 Ta yu̱ta Jordán xi̱kuu xáʼñuna* chí táʼví este.* Ña̱yóʼo kúú ñuʼú ña̱ nda̱kiʼin na̱ tribu ta̱ Benjamín ña̱ va̱ʼa ndataʼvínaña xíʼin ndiʼi na̱ familia na̱ tribu yóʼo.

21 Ñuu ña̱ nda̱kiʼin na̱ tribu ta̱ Benjamín ña̱ va̱ʼa ndataʼvínaña xíʼin na̱ familia na̱ tribu yóʼo xi̱kuu ña̱yóʼo: Jericó, Bet-Hoglá, Émec-Queziz, 22 Bet-Arabá, Zemaraim, Betel, 23 Avim, Pará, Ofrá, 24 Kefar-Amoní, Ofní xíʼin Gueba: 12 kúú ñuu ña̱ nda̱kiʼinna ta saátu savaka ñuu válí.

25 Gabaón, Ramá, Beerot, 26 Mizpé, Kefirá, Mozá,* 27 Réquem, Irpeel, Taralá, 28 Zelá,* Ha-Élef, Jebusí á Jerusalén, Guibeá* xíʼin Quiryat: 14 ñuu kúú ña̱ nda̱kiʼinna ta saátu savaka ñuu válí.

Ña̱yóʼo kúú ñuʼú ña̱ nda̱kiʼin na̱ tribu ta̱ Benjamín ña̱ va̱ʼa ndataʼvínaña xíʼin ndiʼi na̱ familia na̱ tribu yóʼo.

19 Tá chi̱kaa̱ tukuna suerte ña̱ yichi̱ u̱vi̱, saá nda̱kiʼin na̱ tribu ta̱ Simeón ñuʼú ña̱ va̱ʼa ndataʼvínaña xíʼin na̱ familia na̱ tribu kán. Iin táʼví ñuʼú na̱ tribu ta̱ Judá kúú ña̱ nda̱kiʼin na̱ tribu ta̱ Simeón. 2 Ña̱yóʼo kúú ñuʼú ña̱ nda̱kiʼinna, Beer-Seba xíʼin Seba, Moladá, 3 Hazar-Sual, Balá, Ézem, 4 Eltolad, Betul, Hormá, 5 Ziclag, Bet-Marcabot, Hazar-Susá, 6 Bet-Lebaot xíʼin Saruhén: 13 ñuu kúú ña̱ nda̱kiʼinna ta saátu savaka ñuu válí. 7 Ain, Rimón, Éter xíʼin Asán: ku̱mí ñuu kúú ña̱ nda̱kiʼinna ta saátu savaka ñuu válí, 8 nda̱kiʼintuna ndiʼi ñuu válí ña̱ ni̱xi̱yo yatin ñuu yóʼo iinsaá nda̱a̱ Baalat-Beer á Ramá del sur. Ña̱yóʼo kúú ndiʼi ñuʼú ña̱ nda̱kiʼin na̱ tribu ta̱ Simeón ña̱ va̱ʼa ndataʼvínaña xíʼin na̱ familia na̱ tribu yóʼo. 9 Ñuʼú ña̱ nda̱kiʼin na̱ tribu ta̱ Simeón xi̱kuu iin táʼví ñuʼú na̱ tribu ta̱ Judá, saáchi ñuʼú ña̱ nda̱kiʼin na̱ tribu ta̱ Judá káʼnuníña. Ña̱kán, iin táʼví loʼo ñuʼú na̱yóʼo kúú ña̱ nda̱kiʼin na̱ tribu ta̱ Simeón ña̱ va̱ʼa kooña ñuʼúna.

10 Tándi̱ʼi, tá chi̱kaa̱na suerte ña̱ yichi̱ u̱ni̱, saá nda̱kiʼin na̱ tribu ta̱ Zabulón ñuʼú ña̱ va̱ʼa ndataʼvínaña xíʼin na̱ familia na̱ tribu kán, ta ñuʼú na̱yóʼo xi̱xaa̱ña nda̱a̱ chí Sarid. 11 Ta chí oeste,* ñuʼúna xi̱xaa̱ña nda̱a̱ chí Mareal iinsaá nda̱a̱ Dabéset ta saátu yoso̱ ña̱ xítondaa chí Jocneam. 12 Ta chí táʼví este xi̱kixáʼaña chí Sarid chí nu̱ú kána ñu̱ʼu,* iinsaá nda̱a̱ nu̱ú kíxáʼa Kislot-Tabor ta xi̱xaa̱ña nda̱a̱ Daberat iinsaá nda̱a̱ Jafía. 13 Iinsaá nda̱a̱ chí este, chí táʼví nu̱ú kána ñu̱ʼu saátu chí Gat-Héfer xíʼin Et-Cazín, ta saátu ña̱ ni̱xi̱yo chí Rimón iinsaá nda̱a̱ Neá. 14 Ta ñuʼúna xi̱ndikóko̱oña chí norte ta xi̱xaa̱ña nda̱a̱ Hanatón ta xi̱ndiʼiña nda̱a̱ yoso̱ ña̱ Iftá-El, 15 ta nda̱kiʼintuna Catat, Nahalal, Simrón, Idalá xíʼin Belén: 12 ñuu kúú ña̱ nda̱kiʼinna ta saátu savaka ñuu válí. 16 Ña̱yóʼo kúú ñuʼú ña̱ nda̱kiʼin na̱ tribu ta̱ Zabulón ña̱ va̱ʼa ndataʼvínaña xíʼin na̱ familia na̱ tribu kán. Nda̱kiʼinna ñuu náʼnu ña̱ ni̱xi̱yo kán ta saátu savaka ñuu válí.

17 Tá chi̱kaa̱na suerte ña̱ yichi̱ ku̱mí, saá kúú ña̱ nda̱kiʼin na̱ tribu ta̱ Isacar ñuʼú ña̱ va̱ʼa ndataʼvínaña xíʼin na̱ familia na̱ tribu yóʼo. 18 Ta ñuʼúna xi̱xaa̱ña nda̱a̱ Jezreel, Kesulot, Sunem, 19 Hafaraim, Shion, Anaharat, 20 Rabit, Quisión, Ébez, 21 Rémet, En-Ganim, En-Hadá xíʼin Bet-Pazez. 22 Ta xi̱xaa̱ña nda̱a̱ Tabor, Sahazuma xíʼin Bet-Semes ta xi̱ndiʼiña nda̱a̱ yu̱ta Jordán: 16 ñuu kúú ña̱ nda̱kiʼinna ta saátu savaka ñuu válí. 23 Ña̱yóʼo kúú ñuʼú ña̱ nda̱kiʼin na̱ tribu ta̱ Isacar ña̱ va̱ʼa ndataʼvínaña xíʼin na̱ familia na̱ tribu yóʼo, nda̱kiʼinna ñuu náʼnu ta saátu savaka ñuu válí.

24 Tasaá, tá chi̱kaa̱na suerte ña̱ yichi̱ u̱ʼu̱n, saá kúú ña̱ nda̱kiʼin na̱ tribu ta̱ Aser ñuʼú ña̱ va̱ʼa ndataʼvínaña xíʼin na̱ familia na̱ tribu yóʼo. 25 Ta ñuʼúna xi̱kuu Helcat, Halí, Beten, Acsaf, 26 Alamélec, Amad xíʼin Misal. Ta chí oeste xi̱xaa̱ña nda̱a̱ chí yuku̱ Carmelo xíʼin Sihor-Libnat, 27 ta xi̱ndikóko̱oña chí táʼví este nda̱a̱ Bet-Dagón ta xi̱xaa̱ña nda̱a̱ nu̱ú íyo ñuʼú na̱ tribu ta̱ Zabulón ta saátu nda̱a̱ chí táʼví norte chí nu̱ú ndíkaa̱ yoso̱ ña̱ Iftá-El, Bet-Émec xíʼin Neiel ta chí ndaʼa̱ yitin xi̱xaa̱ña nda̱a̱ chí Cabul, 28 saátu chí Ebrón, Rehob, Hamón xíʼin Caná* iinsaá nda̱a̱ Sidón iin ñuu ña̱ káʼnuní. 29 Ta ñuʼúna xi̱ndikóko̱oña nda̱a̱ Ramá ta xi̱xaa̱ña nda̱a̱ ñuu Tiro ña̱ kútu̱ní ndási. Tándi̱ʼi, xi̱ndikóko̱oña ta xi̱xaa̱ña nda̱a̱ Hosá ta xi̱ndiʼiña nda̱a̱ nu̱ú ndíkaa̱ mar chí Aczib, 30 Umá, Afec xíʼin Rehob: 22 ñuu kúú ña̱ nda̱kiʼinna ta saátu savaka ñuu válí. 31 Ña̱yóʼo kúú ñuʼú ña̱ nda̱kiʼin na̱ tribu ta̱ Aser ña̱ va̱ʼa ndataʼvínaña xíʼin na̱ familia na̱ tribu yóʼo. Nda̱kiʼinna ñuu náʼnu xíʼin savaka ñuu válí.

32 Tá chi̱kaa̱na suerte ña̱ yichi̱ i̱ñu̱, saá kúú ña̱ nda̱kiʼin na̱ tribu ta̱ Neftalí ñuʼú ña̱ va̱ʼa ndataʼvínaña xíʼin na̱ familia na̱ tribu yóʼo. 33 Ñuʼúna xi̱kuu ndiʼi Hélef iinsaá nda̱a̱ nu̱ú xi̱ndichi iin yitu̱n tú káʼnuní chí Zaananim, ta xi̱yaʼaña Adamí-Néqueb iinsaá nda̱a̱ Jabneel ta xi̱xaa̱ña nda̱a̱ Lacum ta xi̱ndiʼiña nda̱a̱ yu̱ta Jordán. 34 Ñuʼúna xi̱ndikóko̱oña nda̱a̱ oeste chí Aznot-Tabor iinsaá xi̱xaa̱ña nda̱a̱ Hucoc,* ta chí táʼví sur ñuʼúna xi̱xaa̱ña nda̱a̱ nu̱ú íyo ñuʼú na̱ tribu ta̱ Zabulón, ta chí táʼví oeste ñuʼúna xi̱xaa̱ña nda̱a̱ nu̱ú íyo ñuʼú na̱ tribu ta̱ Aser, ta chí táʼví este ñuʼúna xi̱xaa̱ña nda̱a̱ nu̱ú íyo ñuʼú na̱ tribu ta̱ Judá, chí nu̱ú ndíkaa̱ yu̱ta Jordán. 35 Tasaá nda̱kiʼinna ñuu ña̱ kútu̱ní ndási, ña̱yóʼo xi̱kuuña: Zidim, Zer, Hammat, Racat, Kinéret, 36 Adamá, Ramá, Hazor, 37 Quedes, Edréi, En-Hazor, 38 Yirón, Migdal-El, Horem, Bet-Anat xíʼin Bet-Semes: 19 ñuu kúú ña̱ nda̱kiʼinna ta saátu savaka ñuu válí. 39 Ña̱yóʼo kúú ñuʼú ña̱ nda̱kiʼin na̱ tribu ta̱ Neftalí ña̱ va̱ʼa ndataʼvínaña xíʼin na̱ familia na̱ tribu kán, nda̱kiʼinna ñuu náʼnu ta saátu savaka ñuu válí.

40 Tá chi̱kaa̱na suerte ña̱ yichi̱ u̱xa̱, saá kúú ña̱ nda̱kiʼin na̱ tribu ta̱ Dan ñuʼú ña̱ va̱ʼa ndataʼvínaña xíʼin na̱ familia na̱ tribu yóʼo. 41 Ta ñuʼú ña̱ nda̱kiʼin na̱yóʼo xi̱kuu Zorá, Estaol, Ir-Semes, 42 Saalabín, Ayalón, Itlá, 43 Elón, Timná, Ecrón, 44 Eltequé,* Guibetón, Baalat, 45 Jehúd, Bene-Berac, Gat-Rimón, 46 Me-Jarcón xíʼin Racón, ta ñuʼú na̱yóʼo xi̱ndiʼiña chí nu̱ú xi̱ndikaa̱ Jope. 47 Soo ñuʼú ña̱ nda̱kiʼin na̱ tribu ta̱ Dan loʼoní ni̱xi̱yoña. Ña̱kán ni̱xa̱ʼa̱nna ka̱nitáʼanna xíʼin na̱ ñuu Lésem, ta xa̱ʼnína ndiʼi na̱ xi̱ndoo yóʼo xíʼin espada ta nda̱kiʼinna ñuu yóʼo. Tándi̱ʼi, xi̱kundoona ñuu Lésem, ta na̱samana ki̱vi̱ña ta nda̱kunaníña Dan, chi ti̱xin na̱ veʼe ta̱ Dan ki̱xi ndiʼi na̱yóʼo. 48 Ña̱yóʼo kúú ñuʼú ña̱ nda̱kiʼin na̱ tribu ta̱ Dan ña̱ va̱ʼa ndataʼvínaña xíʼin na̱ familia na̱ tribu yóʼo. Nda̱kiʼinna ñuu náʼnu ta saátu savaka ñuu válí.

49 Saá kúú ña̱ sa̱ndíʼina nda̱taʼvína ñuʼú xíʼin ndiʼi na̱ tribu na̱ ñuu Israel. Tasaá, na̱ ñuu Israel nda̱taxina iin táʼví ñuʼú ña̱ nda̱kiʼinna ndaʼa̱ ta̱ Josué se̱ʼe ta̱ Nun. 50 Ta nda̱a̱ táki̱ʼva ni̱ka̱ʼa̱n mií Jehová xíʼin na̱ ñuu Israel saá ke̱ʼéna, saáchi ta̱xina ñuu ña̱ ndu̱kú ta̱ Josué nu̱úna. Nda̱kiʼinra ñuu Timnat-Sérah ña̱ ndíkaa̱ chí xa̱ʼa̱ yuku̱ nu̱ú ndóo na̱ tribu ta̱ Efraín, ta nda̱sava̱ʼara ñuu yóʼo ta kán ni̱xi̱yora.

51 Ña̱yóʼo kúú ñuʼú ña̱ nda̱taxi ta̱ su̱tu̱ Eleazar, ta̱ Josué se̱ʼe ta̱ Nun xíʼin na̱ kíʼin kuenta xíʼin iin tá iin tribu ndaʼa̱ na̱ ñuu Israel, tá chi̱kaa̱na suerte chí Siló chí nu̱ú níndichi tabernáculo ta xi̱ni Jehová ña̱ ke̱ʼéna. Saá kúú ña̱ sa̱ndíʼina nda̱taʼvína ñuʼú.

20 Tasaá ni̱ka̱ʼa̱n Jehová xíʼin ta̱ Josué: 2 “Ka̱ʼa̱n xíʼin na̱ ñuu Israel: ‘Ndaka̱xinndó sava ñuu nu̱ú kivi ku̱ʼu̱n na̱ yiví ña̱ va̱ʼa ka̱kuna, ña̱ xa̱a̱ ni̱ka̱ʼi̱n xa̱ʼa̱ xíʼin ta̱ Moisés. 3 Ña̱kán, tá iin na̱ yiví xa̱ʼnína inkana soo ña̱ ku̱u sanava kúú ña̱yóʼo, kivi kununa ku̱ʼu̱nna ñuu yóʼo. Yóʼo kúú nu̱ú kivi ku̱ʼu̱nna ña̱ va̱ʼa ka̱kuna tá kúni̱ na̱ táʼan na̱ yiví na̱ ni̱xi̱ʼi̱ kán kaʼnínana. 4 Na̱ xa̱ʼní na̱ yiví kán xíniñúʼu ku̱ʼu̱nna ñuu yóʼo, ta tá ni̱xa̱a̱na yéʼé ñuu yóʼo xíniñúʼu ka̱ʼa̱nna xíʼin na̱ níʼi yichi̱ nu̱ú na̱ ñuu yóʼo xa̱ʼa̱ ndiʼi ña̱ ku̱u. Ta na̱yóʼo taxina ña̱ ki̱ʼvina ñuu yóʼo ta saátu taxina iin lugar nu̱ú koona. 5 Tá ndíku̱n na̱ táʼan na̱ ni̱xi̱ʼi̱ kán sa̱tána nda̱a̱ ñuu nu̱ú ni̱xa̱a̱na ndóona, va̱ása xíniñúʼu ndataxindó na̱ yiví yóʼo ndaʼa̱na, saáchi su̱ví xa̱ʼa̱ ña̱ kúni̱ miína kúú ña̱ xa̱ʼnína táʼan na̱ yiví kán, chi ña̱ ku̱u sanava kúúña. Saáchi, va̱ása níxi̱saa̱ví-inina kunina na̱ yiví na̱ xa̱ʼnína. 6 Na̱ yiví yóʼo xíniñúʼu koona ñuu kán nda̱a̱ ná ku̱ʼu̱nna nu̱ú na̱ juez ña̱ ndatiinna ku̱a̱chi xíʼinna, ta xíniñúʼu kindo̱ona koona ñuu kán nda̱a̱ ná kuvi ta̱ kúú su̱tu̱ káʼnu tiempo saá. Ta saáví kúú ña̱ kivi ndikó na̱ yiví yóʼo ñuu nu̱ú ke̱ena ta saátu veʼena’”.

7 Ña̱kán nda̱sayi̱i̱na ñuu Quedes, ña̱ íyo chí Galilea, nu̱ú íyo yuku̱ chí nu̱ú ndóo na̱ tribu ta̱ Neftalí. Saátu Siquem, ña̱ íyo chí nu̱ú íyo yuku̱ chí nu̱ú ndóo na̱ tribu ta̱ Efraín xíʼin Quiryat-Arbá á Hebrón, ña̱ íyo chí nu̱ú íyo yuku̱ chí nu̱ú ndóo na̱ tribu ta̱ Judá. 8 Ta chí nu̱ú ndíkaa̱ yu̱ta Jordán chí táʼví este ñuu Jericó, nda̱kaxinna Bézer ña̱ ndíkaa̱ nu̱ú íyo yoso̱ chí nu̱ú ñuʼú yi̱chí, chí nu̱ú íyo tribu ta̱ Rubén. Saátu Ramot ña̱ kíndo̱o chí Galaad, chí nu̱ú íyo tribu ta̱ Gad xíʼin Golán ña̱ kíndo̱o chí Basán, chí nu̱ú íyo na̱ tribu ta̱ Manasés.

9 Ña̱yóʼo kúú ñuu ña̱ nda̱kaxinna nu̱ú kivi ku̱ʼu̱n na̱ ñuu Israel á na̱ ke̱e inka ñuu na̱ ndóo xíʼinna. Ña̱kán, tá xa̱ʼnína iin na̱ yiví soo ña̱ ku̱u sana kúúña, kivi kununa ku̱ʼu̱nna ñuu kán tasaá va̱ása kuvina ixaa na̱ táʼan na̱ ni̱xi̱ʼi̱, ña̱ va̱ʼa ná ndatiin na̱ juez ku̱a̱chi xíʼinna.

21 Na̱ ta̱a na̱ kíʼin kuenta xíʼin iin tá iin na̱ familia na̱ tribu ta̱ Leví, ku̱yatinna nu̱ú ta̱ su̱tu̱ Eleazar, nu̱ú ta̱ Josué se̱ʼe ta̱ Nun ta saátu nu̱ú savaka na̱ ta̱a na̱ kíʼin kuenta xíʼin iin tá iin tribu na̱ ñuu Israel, 2 ta ni̱ka̱ʼa̱nna ña̱yóʼo xíʼinna chí Siló ña̱ ndíkaa̱ chí Canaán: “Jehová ni̱ka̱ʼa̱nra xíʼin ta̱ Moisés ña̱ ná taxina sava ñuu nu̱ú kundoondi̱ ta saátu ñuʼú nu̱ú íyo yita* ña̱ kixáʼan* kití sa̱na̱ndi̱”. 3 Ta xa̱ʼa̱ ña̱ ni̱ka̱ʼa̱n mií Jehová ña̱yóʼo, na̱ ñuu Israel ta̱xina sava ñuu ña̱ nda̱kiʼinna ña̱ kooña kuenta na̱ tribu ta̱ Leví ta saátu ñuʼú nu̱ú íyo yita.

4 Tá chi̱kaa̱na suerte, na̱ siʼnaka nda̱kiʼin ñuu kúú na̱ cohatita, tándi̱ʼi nda̱kiʼin na̱ tribu ta̱ Leví na̱ veʼe ta̱ su̱tu̱ Aarón 13 ñuu. Sava ñuu yóʼo xi̱kuu kuenta na̱ tribu ta̱ Judá, savaña xi̱kuu kuenta na̱ tribu ta̱ Simeón ta savakaña xi̱kuu kuenta na̱ tribu ta̱ Benjamín.

5 Ta ndiʼika na̱ cohatita na̱ ki̱ndoo nda̱kiʼinna 10 ñuu, savaña xi̱kuu kuenta na̱ tribu ta̱ Efraín, savaña xi̱kuu kuenta na̱ tribu ta̱ Dan ta savakaña xi̱kuu kuenta iin táʼví na̱ tribu ta̱ Manasés.

6 Ta na̱ guersonita nda̱kiʼinna 13 ñuu, savaña xi̱kuu kuenta na̱ tribu ta̱ Isacar, savaña xi̱kuu kuenta na̱ tribu ta̱ Aser, savaña xi̱kuu kuenta na̱ tribu ta̱ Neftalí ta savakaña xi̱kuu kuenta iin táʼví na̱ tribu ta̱ Manasés na̱ xi̱ndoo chí Basán.

7 Ta na̱ merarita nda̱kiʼinna 12 ñuu, savaña xi̱kuu kuenta na̱ tribu ta̱ Rubén, savaña xi̱kuu kuenta na̱ tribu ta̱ Gad ta savakaña xi̱kuu kuenta na̱ tribu ta̱ Zabulón.

8 Ta nda̱a̱ táki̱ʼva ni̱ka̱ʼa̱n Jehová xíʼin ta̱ Moisés saá ke̱ʼé na̱ ñuu Israel, saáchi chi̱kaa̱na suerte ña̱ va̱ʼa ndataxina ñuu yóʼo ta saátu ñuʼú nu̱ú íyo yita ndaʼa̱ na̱ levita.

9 Ta yóʼo va̱xi ki̱vi̱ sava ñuu ña̱ ta̱xi na̱ tribu ta̱ Judá xíʼin na̱ tribu ta̱ Simeón ndaʼa̱ na̱ levita, 10 ta̱xina ñuʼú yóʼo ndaʼa̱ na̱ se̱ʼe ta̱ Aarón na̱ xi̱kuu na̱ veʼe na̱ cohatita na̱ tribu ta̱ Leví, saáchi na̱yóʼo kúú na̱ nu̱ú ka̱na tá chi̱kaa̱na suerte. 11 Nda̱kiʼinna Quiryat-Arbá á Hebrón (ta̱ Arbá xi̱kuu yivá ta̱ Anac) ña̱ íyo chí nu̱ú íyo yuku̱ chí nu̱ú ndóo na̱ tribu ta̱ Judá, ta saátu nda̱kiʼinna ñuʼú ña̱ íyo yita nu̱ú ña̱ íyo yatin kán. 12 Soo ñuʼú ña̱ ni̱xi̱yo ñuu kán ta saátu ñuu ña̱ ni̱xi̱yo yatin kán, ta̱xinaña ndaʼa̱ ta̱ Caleb se̱ʼe ta̱ Jefuné.

13 Na̱ se̱ʼe ta̱ su̱tu̱ Aarón nda̱kiʼinna ñuu nu̱ú kivi ku̱ʼu̱n na̱ yiví ña̱ va̱ʼa ka̱kuna, nda̱kiʼinna Hebrón xíʼin ñuʼú nu̱ú íyo yita, Libná xíʼin ñuʼú nu̱ú íyo yita, 14 Jatir xíʼin ñuʼú nu̱ú íyo yita, Estemoa xíʼin ñuʼú nu̱ú íyo yita, 15 Holón xíʼin ñuʼú nu̱ú íyo yita, Debir xíʼin ñuʼú nu̱ú íyo yita, 16 Ain xíʼin ñuʼú nu̱ú íyo yita, Jutá xíʼin ñuʼú nu̱ú íyo yita ta saátu Bet-Semes xíʼin ñuʼú nu̱ú íyo yita: u̱vi̱ saá na̱ tribu yóʼo ta̱xina 9 ñuu yóʼo ndaʼa̱na.

17 Ta na̱ tribu ta̱ Benjamín ta̱xina: Gabaón xíʼin ñuʼú nu̱ú íyo yita, Gueba xíʼin ñuʼú nu̱ú íyo yita, 18 Anatot xíʼin ñuʼú nu̱ú íyo yita ta saátu Almón xíʼin ñuʼú nu̱ú íyo yita: ku̱mí ñuu ta̱xina.

19 Ta ndiʼi ñuu ña̱ ta̱xina ndaʼa̱ na̱ su̱tu̱ na̱ se̱ʼe ta̱ Aarón xi̱kuuña 13 ta saátu ta̱xina ñuʼú nu̱ú íyo yita ndaʼa̱na.

20 Tá chi̱kaa̱na suerte, ta̱xina sava ñuu ña̱ kúú kuenta na̱ tribu ta̱ Efraín ndaʼa̱ savaka na̱ veʼe na̱ cohatita na̱ tribu ta̱ Leví. 21 Nda̱kiʼinna ñuu nu̱ú kivi ku̱ʼu̱n na̱ yiví ña̱ va̱ʼa ka̱kuna, nda̱kiʼinna Siquem xíʼin ñuʼú nu̱ú íyo yita ña̱ íyo chí yuku̱, chí nu̱ú ndóo na̱ tribu ta̱ Efraín, Guézer xíʼin ñuʼú nu̱ú íyo yita, 22 Quibzaim xíʼin ñuʼú nu̱ú íyo yita ta saátu Bet-Horón xíʼin ñuʼú nu̱ú íyo yita: ku̱mí ñuu nda̱kiʼinna.

23 Ta na̱ tribu ta̱ Dan ta̱xina: Eltequé xíʼin ñuʼú nu̱ú íyo yita, Guibetón xíʼin ñuʼú nu̱ú íyo yita, 24 Ayalón xíʼin ñuʼú nu̱ú íyo yita, Gat-Rimón xíʼin ñuʼú nu̱ú íyo yita: ku̱mí ñuu ta̱xina.

25 Ta iin táʼví na̱ tribu ta̱ Manasés ta̱xina: Taanac xíʼin ñuʼú nu̱ú íyo yita ta saátu Gat-Rimón xíʼin ñuʼú nu̱ú íyo yita: u̱vi̱ ñuu ta̱xina.

26 Ta ndiʼi ñuʼú ña̱ nda̱kiʼin na̱ veʼe na̱ cohatita na̱ kíndo̱o xi̱kuuña u̱xu̱ ta saátu nda̱kiʼinna ñuʼú nu̱ú íyo yita.

27 Ta iin táʼví na̱ tribu ta̱ Manasés ta̱xina u̱vi̱ ñuu ndaʼa̱ na̱ guersonita na̱ tribu ta̱ Leví, nu̱ú kivi ku̱ʼu̱n na̱ yiví ña̱ va̱ʼa ka̱kuna, ta̱xina Golán ña̱ kíndo̱o chí Basán xíʼin ñuʼú nu̱ú íyo yita ta saátu Beesterá xíʼin ñuʼú nu̱ú íyo yita: u̱vi̱ ñuu ta̱xina.

28 Ta na̱ tribu ta̱ Isacar ta̱xina: Quisión xíʼin ñuʼú nu̱ú íyo yita, Daberat xíʼin ñuʼú nu̱ú íyo yita, 29 Jarmut xíʼin ñuʼú nu̱ú íyo yita, En-Ganim xíʼin ñuʼú nu̱ú íyo yita: ku̱mí ñuu ta̱xina.

30 Na̱ tribu ta̱ Aser ta̱xina: Misal xíʼin ñuʼú nu̱ú íyo yita, Abdón xíʼin ñuʼú nu̱ú íyo yita, 31 Helcat xíʼin ñuʼú nu̱ú íyo yita ta saátu Rehob xíʼin ñuʼú nu̱ú íyo yita: ku̱mí ñuu ta̱xina.

32 Ta na̱ tribu ta̱ Neftalí ta̱xina ñuu nu̱ú kivi ku̱ʼu̱n na̱ yiví ña̱ va̱ʼa ka̱kuna, ta̱xina Quedes ña̱ kíndo̱o chí Galilea xíʼin ñuʼú nu̱ú íyo yita, Hamot-Dor xíʼin ñuʼú nu̱ú íyo yita, Cartán xíʼin ñuʼú nu̱ú íyo yita: u̱ni̱ ñuu ta̱xina.

33 Ndiʼi ñuu ña̱ nda̱kiʼin na̱ guersonita xi̱kuuña 13 ta saátu nda̱kiʼinna ñuʼú nu̱ú íyo yita.

34 Ta na̱ tribu ta̱ Zabulón ta̱xina ñuu yóʼo ndaʼa̱ ndiʼika na̱ familia na̱ merarita na̱ tribu ta̱ Leví: Jocneam xíʼin ñuʼú nu̱ú íyo yita, Cartá xíʼin ñuʼú nu̱ú íyo yita, 35 Dimná xíʼin ñuʼú nu̱ú íyo yita, Nahalal xíʼin ñuʼú nu̱ú íyo yita: ku̱mí ñuu ta̱xina.

36 Ta na̱ tribu ta̱ Rubén ta̱xina: Bézer xíʼin ñuʼú nu̱ú íyo yita, Jáhaz xíʼin ñuʼú nu̱ú íyo yita, 37 Quedemot xíʼin ñuʼú nu̱ú íyo yita, ta saátu Mefaat xíʼin ñuʼú nu̱ú íyo yita: ku̱mí ñuu ta̱xina.

38 Ta na̱ tribu ta̱ Gad ta̱xina ñuu nu̱ú kivi ku̱ʼu̱n na̱ yiví ña̱ va̱ʼa ka̱kuna, ta̱xina Ramot ña̱ kíndo̱o chí Galaad xíʼin ñuʼú nu̱ú íyo yita, Mahanaim xíʼin ñuʼú nu̱ú íyo yita, 39 Hesbón xíʼin ñuʼú nu̱ú íyo yita, Jazer xíʼin ñuʼú nu̱ú íyo yita: ku̱mí ñuu ta̱xina.

40 Ta ndiʼi ñuu ña̱ nda̱kiʼin na̱ merarita na̱ tribu ta̱ Leví xi̱kuuña 12.

41 Ñuu ña̱ ta̱xi ndiʼi na̱ tribu na̱ ñuu Israel ndaʼa̱ na̱ levita xi̱kuuña 48 ta saátu nda̱kiʼinna ñuʼú nu̱ú íyo yita. 42 Ta ñuu yóʼo ni̱xi̱yoña ma̱ʼñú ñuʼú nu̱ú ni̱xi̱yoní yita tasaá ni̱xi̱yo ndiʼi ñuu ña̱ nda̱kiʼinna.

43 Ña̱yóʼo kúú ña̱ ke̱ʼé Jehová ña̱ va̱ʼa nda̱taxira ñuʼú ndaʼa̱ na̱ ñuu Israel nda̱a̱ táki̱ʼva ki̱ndoora xíʼin na̱ táʼanna na̱ xi̱ndoo xi̱naʼá, ta ndiʼi na̱yóʼo nda̱kiʼinna ñuʼú kán ta xi̱ndoona nu̱úña. 44 Ta mií Jehová kúú ta̱ chi̱ndeétáʼan xíʼinna ña̱ viíní kundoona* nda̱a̱ táki̱ʼva ni̱ka̱ʼa̱nra xíʼin na̱ táʼanna na̱ xi̱ndoo xi̱naʼá, ta nda̱a̱ ni iin na̱ sáa̱-ini xíniñaʼá va̱ása níkuchiñu kanitáʼan xíʼinna. Saáchi mií Jehová nda̱taxi ndiʼi na̱ sáa̱-ini xíniñaʼá ndaʼa̱na. 45 Ta ndiʼi ña̱ va̱ʼa ña̱ ni̱ka̱ʼa̱n Jehová keʼéra xa̱ʼa̱ na̱ ñuu Israel ni̱xi̱nuvaña, ta nda̱a̱ ni iinña kǒo níkuma̱ní.

22 Tasaá, ta̱ Josué ka̱nara na̱ tribu ta̱ Rubén, na̱ tribu ta̱ Gad xíʼin iin táʼví na̱ tribu ta̱ Manasés 2 ta ni̱ka̱ʼa̱nra xíʼinna: “Ndóʼó ke̱ʼéndó ndiʼi ña̱ ni̱ka̱ʼa̱n ta̱ Moisés ta̱ xi̱kachíñu nu̱ú Jehová, ka̱ndíxatundó ke̱ʼéndó ndiʼi ña̱ ni̱ka̱ʼi̱n xíʼinndó. 3 Va̱ása nísandákoondaʼa̱ndó na̱ ñanindó ndiʼi tiempo yóʼo, ta sa̱xínundó ndiʼi ña̱ ni̱ka̱ʼa̱n Jehová Ndióxi̱yó xíʼinndó. 4 Ta vitin Jehová Ndióxi̱yó xa̱a̱ chi̱ndeétáʼanra xíʼin na̱ ñanindó ña̱ viíní kundoona, nda̱a̱ táki̱ʼva ki̱ndoora xíʼinyó. Xa̱ʼa̱ ña̱kán, vitin xa̱a̱ kivi ndikóndó chí nu̱ú íyo veʼe válíndó nu̱ú ñuʼú ña̱ ta̱xi ta̱ Moisés ta̱ xi̱kachíñu nu̱ú Jehová ndaʼa̱ndó, ña̱ íyo chí inka táʼví* tá yu̱ta Jordán. 5 Soo ndakaʼánndó ña̱ xíniñúʼu saxínundó chiñu ña̱ xáʼnda Jehová xíʼin ña̱ káʼa̱n Ley ña̱ ta̱xira ndaʼa̱ ta̱ Moisés ta̱ xi̱kachíñu nu̱úra, kuʼvi̱-inindó kunindó Jehová Ndióxi̱yó ta nina ña̱ kútóora keʼéndó, kandíxandó ndiʼi chiñu ña̱ xáʼndara, viíní kutáʼanndó xíʼinra ta kachíñundó nu̱úra xíʼin ndiʼi níma̱ndó ta saátu xíʼin ndiʼi ña̱ tákundó”.*

6 Tándi̱ʼi, ta̱ Josué ta̱xira bendición ndaʼa̱ na̱yóʼo ta ni̱nda̱yírana, tasaá nda̱kiʼinna ku̱a̱ʼa̱nna chí nu̱ú íyo veʼe válína. 7 Ta̱ Moisés ta̱xira ñuʼú ña̱ íyo chí Basán ndaʼa̱ iin táʼví na̱ tribu ta̱ Manasés, ta ta̱ Josué ta̱xira ñuʼú ña̱ íyo chí oeste tá yu̱ta Jordán ndaʼa̱ inka táʼví na̱ tribu ta̱ Manasés, ña̱ va̱ʼa yatin kundoona xíʼin na̱ ñanina. Tá ni̱ka̱ʼa̱n ta̱ Josué xíʼinna ña̱ ndikóna nu̱ú íyo veʼe válína, ta̱xira bendición ndaʼa̱na 8 ta ni̱ka̱ʼa̱nra xíʼinna: “Ndikóndó chí nu̱ú íyo veʼe válíndó ta kuniʼindó ku̱a̱ʼání ña̱ʼa ku̱ʼu̱nndó, kití tí koo sa̱na̱ndó, plata, oro, cobre, hierro xíʼin ku̱a̱ʼání ti̱ko̱to̱. Ndakiʼinndó sava ña̱ʼa ña̱ ndáyáʼvi ña̱ xi̱kuu kuenta na̱ sáa̱-ini xíni miíyó ku̱ʼu̱n xíʼinndó, ta ndataʼvíndóña xíʼin na̱ ñanindó”.

9 Tándi̱ʼi, na̱ tribu ta̱ Rubén, na̱ tribu ta̱ Gad xíʼin iin táʼví na̱ tribu ta̱ Manasés, ta̱ʼví-táʼanna xíʼin savaka na̱ ñuu Israel na̱ xi̱ndoo chí Siló ña̱ ndíkaa̱ chí Canaán, ta nda̱kiʼinna ku̱a̱ʼa̱nna chí Galaad nu̱ú ñuʼú ña̱ nda̱kiʼinna, chi kán ni̱ka̱ʼa̱n mií Jehová xíʼin ta̱ Moisés kundoona. 10 Tá xa̱a̱ ni̱xa̱a̱ na̱ tribu ta̱ Rubén, na̱ tribu ta̱ Gad xíʼin iin táʼví na̱ tribu ta̱ Manasés yatin nu̱ú ndíkaa̱ yu̱ta Jordán chí Canaán, i̱xava̱ʼana iin altar ña̱ káʼnuní. 11 Tá ni̱ya̱ʼa loʼo, savaka na̱ ñuu Israel ku̱ndaa̱-inina xa̱ʼa̱ ña̱yóʼo: “Na̱ tribu ta̱ Rubén, na̱ tribu ta̱ Gad xíʼin iin táʼví na̱ tribu ta̱ Manasés i̱xava̱ʼana iin altar yatin yuʼú yu̱ta Jordán chí nu̱ú ndíʼi Canaán, nu̱ú ñuʼú ña̱ kúú kuenta miíyó”. 12 Tá ku̱ndaa̱-ini savaka na̱ ñuu Israel xa̱ʼa̱ ña̱yóʼo, nda̱kutáʼan ndiʼina chí Siló ña̱ va̱ʼa ku̱ʼu̱nna kanitáʼanna xíʼinna.

13 Tasaá ndiʼika na̱ ñuu Israel chi̱ndaʼána ta̱ Finehás se̱ʼe ta̱ su̱tu̱ Eleazar chí Galaad nu̱ú ndóo na̱ tribu ta̱ Rubén, na̱ tribu ta̱ Gad xíʼin iin táʼví na̱ tribu ta̱ Manasés, 14 ta ni̱xa̱ʼa̱n inka u̱xu̱ na̱ ta̱a xíʼinra, iin na̱ ta̱a na̱ ke̱e ti̱xin iin tá iin tribu, ta na̱yóʼo kúú na̱ xi̱kiʼin kuenta xíʼin ndiʼi na̱ familia na̱ ni̱xi̱yo ti̱xin iin tá iin tribu na̱ ñuu Israel. 15 Tá ni̱xa̱a̱na chí Galaad nu̱ú na̱ tribu ta̱ Rubén, na̱ tribu ta̱ Gad xíʼin iin táʼví na̱ tribu ta̱ Manasés ni̱ka̱ʼa̱nna xíʼinna:

16 “Ña̱yóʼo kúú ña̱ káʼa̱n ndiʼi na̱ ñuu Jehová: ‘¿Nda̱chun kúú ña̱ va̱ása nda̱kú níxi̱yo inindó xíʼin Ndióxi̱ na̱ ñuu Israel ta ke̱ʼéndó ña̱yóʼo? Vitin ku̱xíkándó nu̱ú Jehová xa̱ʼa̱ ña̱ i̱xava̱ʼandó altar yóʼo ta kǒo níkandíxakandó Jehová. 17 ¿Á va̱ása nísakúaʼavandó xíʼin ku̱a̱chi ña̱ ni̱ki̱ʼviyó chí Peor? ¿Á xa̱a̱ na̱ndósovandó xa̱ʼa̱ ña̱ ndo̱ʼo na̱ ñuu Jehová? Nda̱a̱ vitin xóʼvi̱kayó* xa̱ʼa̱ ña̱ ku̱u kán. 18 ¿Á va̱ása kúni̱kavandó kundiku̱nndó Jehová? Tá vitin ná kuxíkándó nu̱ú Jehová, sa̱a̱níra xíʼin ndiʼi na̱ ñuu Israel. 19 Soo tá ñuʼú nu̱ú ndóondó kúú ña̱ va̱ása va̱ʼa, ya̱ʼandó chí nu̱ú ñuʼú ña̱ kúú kuenta Jehová, nu̱ú níndichi tabernáculo Jehová ta kindo̱ondó koondó xíʼinndi̱ yóʼo. Soo va̱ása kuxíkándó nu̱ú Jehová saáchi nda̱a̱ ndi̱ʼi̱ sákuxíkandó nu̱úra xa̱ʼa̱ ña̱ i̱xava̱ʼandó inka altar, saáchi xa̱a̱ níndichiva iin altar Jehová Ndióxi̱yó. 20 Tá ni̱ki̱ʼvi ta̱ Acán se̱ʼe ta̱ Zérah ku̱a̱chi xa̱ʼa̱ ña̱ nda̱kiʼinra sava ña̱ʼa ña̱ xi̱niñúʼu ndiʼi-xa̱ʼa̱, ¿á su̱ví ña̱ nda̱a̱ kúúña ña̱ ni̱sa̱a̱níra xíʼin ndiʼi na̱ ñuu Israel? Ta su̱ví iinlá mií ta̱ Acán níxi̱ʼi̱ xa̱ʼa̱ ku̱a̱chira chi ku̱a̱ʼákavana ni̱xi̱ʼi̱’”.

21 Tasaá na̱ tribu ta̱ Rubén, na̱ tribu ta̱ Gad xíʼin iin táʼví na̱ tribu ta̱ Manasés ni̱ka̱ʼa̱nna xíʼin na̱ kíʼin kuenta xíʼin ndiʼi na̱ familia na̱ iin tá iin tribu na̱ ñuu Israel: 22 “Jehová, Ndióxi̱ ta̱ káʼnuníka nu̱ú inkaka ndióxi̱, Jehová, Ndióxi̱ ta̱ káʼnuníka nu̱ú inkaka ndióxi̱, xa̱a̱ kúnda̱a̱va-inira ta saátu na̱ ñuu Israel kunda̱a̱-inina á ku̱xíkándi̱ nu̱ú Jehová ta va̱ása nda̱kú níxi̱yo inindi̱ xíʼinra. Tá saá ke̱ʼéndi̱ ná va̱ása sakǎkura ndi̱ʼi̱ vitin. 23 Tá i̱xava̱ʼandi̱ iin altar xa̱ʼa̱ ña̱ va̱ása kúni̱kandi̱ kundiku̱nndi̱ Jehová ta kuniñúʼundi̱ña ña̱ so̱kóndi̱ ku̱a̱ʼá nu̱ú ña̱ʼa,* mií Jehová taxi castigo ndaʼa̱ndi̱ xa̱ʼa̱ ña̱ va̱ása níkandíxakandi̱ra. 24 Soo su̱ví xa̱ʼa̱ ña̱yóʼo níkeʼéndi̱ña, saáchi xa̱ʼa̱ inka ña̱ʼa ña̱ sándi̱ʼi-inindi̱ ke̱ʼéndi̱ña. Chi ka̱chindi̱: ‘Chí nu̱únínu na̱ se̱ʼendó ka̱ʼa̱nna xíʼin na̱ se̱ʼendi̱: “Ndóʼó kǒo derecho kúúmiíndó ña̱ ndasakáʼnundó Jehová, Ndióxi̱ na̱ ñuu Israel. 25 Jehová xi̱niñúʼura yu̱ta Jordán ña̱ ndataʼvíra ndi̱ʼi̱ nu̱ú ndóʼó na̱ tribu ta̱ Rubén xíʼin na̱ tribu ta̱ Gad. Ndóʼó kǒo derecho kúúmiíndó ña̱ ndasakáʼnundó Jehová”. Na̱ se̱ʼe ndóʼó kasina nu̱ú na̱ se̱ʼe ndi̱ʼi̱ ña̱ ndasakáʼnuna Jehová’.

26 ”Ña̱kán ka̱chindi̱: ‘Ná keʼéyó iin ña̱ʼa ña̱ va̱ʼa ná kǒo kuu ña̱yóʼo. Ná keʼéyó iin altar, soo su̱ví ña̱ kuniñúʼuyó ña̱ so̱kóyó ña̱ʼa kooña, 27 chi keʼéyóña ña̱ kooña testigo nu̱ú ndiʼiyó ta saátu nu̱ú na̱ se̱ʼeyó ña̱ kíndo̱oyó ña̱ kachíñuyó nu̱ú Jehová ta saátu ña̱ so̱kóyó ña̱ʼa nu̱úra. Tasaá, chí nu̱únínu na̱ se̱ʼe ndóʼó va̱ása ka̱ʼa̱nna xíʼin na̱ se̱ʼendi̱: “Ndóʼó kǒo derecho kúúmiíndó ña̱ ndasakáʼnundó Jehová”’. 28 Ña̱kán ka̱chindi̱: ‘Tá ná ka̱ʼa̱nna ña̱yóʼo xíʼinyó ta saátu xíʼin na̱ se̱ʼeyó chí nu̱únínu, saá ka̱ʼa̱nyó ña̱yóʼo xíʼinna: “Kotondó altar ña̱ ke̱ʼé na̱ táʼanndi̱ na̱ xi̱ndoo tá ya̱chi̱, ña̱ íyo nda̱a̱ táki̱ʼva íyo altar Jehová, soo va̱ása níkeʼénaña ña̱ so̱kóna ña̱ʼa nu̱úña, chi ke̱ʼénaña ña̱ va̱ʼa kooña testigo nu̱ú ndiʼiyó”’. 29 Ndi̱ʼi̱ ni loʼoví va̱ása keʼéndi̱ inka altar ña̱ va̱ʼa so̱kóndi̱ ña̱ʼa nu̱úña, tasaá kuxíkándi̱ nu̱ú Jehová ta sandákoondi̱ ña̱ ndasakáʼnundi̱ Jehová. Chi iinlá nu̱ú altar mií Jehová Ndióxi̱yó ña̱ níndichi chí nu̱ú íyo tabernáculo so̱kóndi̱ ña̱ʼa”.

30 Tándi̱ʼi ni̱ka̱ʼa̱n na̱ tribu ta̱ Rubén, na̱ tribu ta̱ Gad ta saátu iin táʼví na̱ tribu ta̱ Manasés ña̱yóʼo, va̱ása nísa̱a̱kaví ta̱ su̱tu̱ Finehás, ni na̱ kíʼin kuenta xíʼin na̱ ñuu ni na̱ kíʼin kuenta xíʼin ndiʼi na̱ familia na̱ iin tá iin tribu na̱ ñuu Israel. 31 Tasaá ta̱ Finehás se̱ʼe ta̱ su̱tu̱ Eleazar ni̱ka̱ʼa̱nra xíʼin na̱ tribu ta̱ Rubén, na̱ tribu ta̱ Gad ta saátu xíʼin iin táʼví na̱ tribu ta̱ Manasés: “Vitin kúnda̱a̱-inindi̱ ña̱ íyova Jehová xíʼinyó, saáchi va̱ása níki̱ʼvindó ku̱a̱chi nu̱ú Jehová. Ña̱kán va̱ása taxiví Jehová castigo ndaʼa̱yó”.

32 Tándi̱ʼi, ta̱ Finehás se̱ʼe ta̱ su̱tu̱ Eleazar ta saátu ndiʼika na̱ ni̱xa̱ʼa̱n xíʼinra ndi̱kóna chí Canaán ta na̱túʼunna xa̱ʼa̱ ndiʼi ña̱ ku̱u xíʼin inkaka na̱ ñuu Israel. Soo na̱ tribu ta̱ Rubén xíʼin na̱ tribu ta̱ Gad ni̱ndo̱ona chí Galaad. 33 Tasaá na̱ ñuu Israel va̱ása nísa̱a̱kana tá ku̱ndaa̱-inina xa̱ʼa̱ ña̱yóʼo. Ta nda̱sakáʼnuna Ndióxi̱ ta va̱ása níka̱ʼa̱nkana ña̱ ku̱ʼu̱nna kanitáʼanna xíʼin na̱ tribu ta̱ Rubén ta saátu xíʼin na̱ tribu ta̱ Gad, ña̱ va̱ʼa sandíʼi-xa̱ʼa̱na ñuu nu̱ú xi̱ndoona.

34 Ta na̱ tribu ta̱ Rubén xíʼin na̱ tribu ta̱ Gad chi̱núuna ki̱vi̱ altar kán,* saáchi ka̱china: “Ña̱yóʼo kúúña testigo nu̱úyó ña̱ mií Jehová kúú Ndióxi̱ ta̱ nda̱a̱”.

23 Tá xa̱a̱ ni̱ya̱ʼa ku̱a̱ʼá tiempo, Jehová ta̱xira ña̱ vií kundoo na̱ ñuu Israel saáchi sa̱kǎkurana nu̱ú na̱ sáa̱-ini xíniñaʼá, tá xa̱a̱ ku̱chéení ta̱ Josué, 2 saá ka̱nara ndiʼi na̱ ñuu Israel, na̱ níʼi yichi̱ nu̱ú na̱ ñuu,* na̱ kíʼin kuenta xíʼin na̱ ñuu, na̱ ndátiin ku̱a̱chi xíʼinna ta saátu inkaka na̱ chíñu ta ka̱chira xíʼinna: “Xa̱a̱ ku̱chéenívai̱ vitin. 3 Ta ndóʼó xi̱nindó ndiʼi ña̱ ke̱ʼé Jehová Ndióxi̱ xíʼin na̱ ñuu yóʼo xa̱ʼa̱ndó, saáchi Jehová Ndióxi̱yó kúú ta̱ xi̱kanitáʼan xa̱ʼa̱ndó. 4 Yi̱ʼi̱ xa̱a̱ chi̱kai̱ suerte ña̱ va̱ʼa ndataʼvíi̱ ñuʼú na̱ yiví na̱ ndóo yóʼo xíʼinndó ta saátu na̱ ñuu na̱ xa̱a̱ sa̱ndíʼi-xa̱ʼíi̱, na̱ xi̱ndoo chí yu̱ta Jordán iinsaá nda̱a̱ chí oeste* chí nu̱ú íyo mar Grande.* 5 Ta Jehová Ndióxi̱ kúú ta̱ xi̱niñúʼu ndee̱ra ña̱ va̱ʼa sa̱kúxíkárana nu̱úndó ta ta̱várana nu̱ú xi̱ndoona ña̱ va̱ʼa ndakiʼinndó ñuʼúna, nda̱a̱ táki̱ʼva ki̱ndoo mií Jehová Ndióxi̱yó xíʼinndó.

6 ”Ta vitin xíniñúʼu ndakúní koo inindó ta kandíxandó ndiʼi ña̱ káʼa̱n Ley ña̱ ka̱ʼyi ta̱ Moisés, ta ndáyáʼviní ña̱ keʼéndó ndiʼi ña̱ káʼa̱n ña̱yóʼo. 7 Ta va̱ása xa̱a̱ndó kutáʼanndó xíʼin na̱ ñuu na̱ ndóoka yóʼo. Ta ni va̱ása xíniñúʼu ka̱ʼa̱nndó ki̱vi̱ ndióxi̱na ni ña̱ chinaʼándó* xa̱ʼa̱ ndióxi̱na, ta nda̱a̱ ni iin yichi̱ va̱ása xíniñúʼu ndasakáʼnundó ña̱yóʼo á kuxítíndó nu̱úña. 8 Chi ña̱ xíniñúʼu keʼéndó kúú ña̱ ndakundeéndó vií kutáʼanndó xíʼin Jehová Ndióxi̱yó, nda̱a̱ táki̱ʼva xa̱a̱ kéʼéndó nda̱a̱ tiempo vitin. 9 Jehová kúú ta̱ tavá ndiʼi na̱ ñuu na̱ ndóo yóʼo ni ndakúnína ta náʼnuní ñuuna, nda̱a̱ tiempo vitin nda̱a̱ ni iinna ta̱ʼán kuchiñu kanitáʼan xíʼinndó. 10 Iinlá kuití ndóʼó kuchiñundó kanitáʼanndó xíʼin mil na̱kán saáchi Jehová Ndióxi̱yó kúú ta̱ kánitáʼan xa̱ʼa̱ndó, nda̱a̱ táki̱ʼva xa̱a̱ ki̱ndoora xíʼinndó. 11 Ña̱kán, ndakundeéndó kiʼinndó kuenta ta kuʼvi̱-inindó kunindó Jehová Ndióxi̱yó.

12 ”Tá ná va̱ása keʼéndó ña̱yóʼo ta ndakutáʼanndó xíʼin na̱ ñuu yóʼo, ta satíndaʼa̱ndó se̱ʼendó xíʼin na̱ se̱ʼe na̱yóʼo ta ndakutáʼanna xíʼinndó, 13 Jehová Ndióxi̱ va̱ása tavákara na̱ ñuu yóʼo ña̱ va̱ʼa ndakiʼinndó ñuʼúna. Ta na̱yóʼo sandákavana ndóʼó, ta koona nda̱a̱ táki̱ʼva íyo iin yoʼo̱ ña̱ kanina sa̱tándó ta saátu koona nda̱a̱ táki̱ʼva íyo iñú ña̱ síso* nduchúnu̱úndó nda̱a̱ ná ndiʼi-xa̱ʼa̱ndó nu̱ú ñuʼú ña̱ va̱ʼaní ña̱ ta̱xi Jehová Ndióxi̱ ndaʼa̱ndó.

14 ”Ta vitin xa̱a̱ ku̱nu̱mí kuvii̱, ta ndóʼó kúnda̱a̱ va̱ʼa inindó xíʼin ndiʼi níma̱ndó ta saátu xíʼin ndiʼi ña̱ tákundó ña̱ ndiʼi ña̱ ni̱ka̱ʼa̱n Jehová taxira ndaʼa̱ndó, ni̱xi̱nuvaña. Ndiʼi ña̱ va̱ʼa ña̱ ni̱ka̱ʼa̱nra keʼéra xa̱ʼa̱ndó, ni̱xi̱nu ndiʼivaña. Ta kǒo nda̱a̱ ni iinña níkuma̱ní. 15 Soo nda̱a̱ táki̱ʼva ni̱xi̱nu ndiʼi ña̱ va̱ʼa ña̱ ni̱ka̱ʼa̱n Jehová Ndióxi̱yó taxira, saátu kivi taxi Jehová tu̱ndóʼo ndaʼa̱yó nda̱a̱ táki̱ʼva ki̱ndoora. Ta sandíʼi-xa̱ʼa̱ Jehová Ndióxi̱yó miíyó nu̱ú ñuʼú ña̱ va̱ʼa ña̱ ta̱xira ndaʼa̱yó. 16 Soo tá ndóʼó va̱ása sáxi̱nundó ña̱ ki̱ndoondó xíʼin Jehová Ndióxi̱yó ña̱ ni̱ka̱ʼa̱nra xíʼinyó saxínuyó, ta ndásakáʼnundó inka ndióxi̱ ta kúxítíndó nu̱úña, sa̱a̱ní Jehová xíʼinndó ta kamaní sandíʼi-xa̱ʼa̱ra ndóʼó nu̱ú ñuʼú ña̱ va̱ʼa ña̱ ta̱xira ndaʼa̱ndó”.

24 Ta̱ Josué sa̱ndátakara ndiʼi na̱ tribu na̱ ñuu Israel chí Siquem, ta saátu ka̱nara na̱ níʼi yichi̱ nu̱ú na̱ ñuu,* na̱ kíʼin kuenta xíʼin na̱ ñuu, na̱ ndátiin ku̱a̱chi xíʼinna ta saátu inkaka na̱ chíñu, ta na̱yóʼo nda̱kutáʼanna nu̱ú Ndióxi̱ ta̱ nda̱a̱. 2 Ta̱ Josué ni̱ka̱ʼa̱nra xíʼin na̱ ñuu: “Ña̱yóʼo kúú ña̱ káʼa̱n Jehová, Ndióxi̱ na̱ ñuu Israel: ‘Xa̱a̱ ku̱a̱ʼání tiempo kúú ña̱ ni̱xi̱yo na̱ táʼanndó chí inka táʼví yu̱ta Éufrates, ta na̱yóʼo xi̱ndasakáʼnuna inka ndióxi̱, ta kán ni̱xi̱yo ta̱ Taré, yivá ta̱ Abrahán ta saátu ta̱ Nacor.

3 ”’Tá ni̱ya̱ʼa tiempo ni̱ka̱ʼi̱n xíʼin ta̱ Abrahán ña̱ ná ya̱ʼara yu̱ta Éufrates ta ná ku̱ʼu̱nra chí ñuʼú ña̱ Canaán, ta ta̱xii̱ ña̱ ku̱a̱ʼání koo se̱ʼera. Tasaá ka̱ku se̱ʼera ta̱ Isaac; 4 ta saátu ta̱ Isaac ka̱ku se̱ʼera ta̱ Jacob xíʼin ta̱ Esaú. Ta nda̱taxii̱ ñuʼú ña̱ íyo chí yuku̱ Seír ndaʼa̱ ta̱ Esaú; ta ta̱ Jacob xíʼin na̱ se̱ʼera ni̱xa̱ʼa̱nna ni̱xi̱yona chí Egipto. 5 Tá ni̱ya̱ʼa tiempo chi̱ndaʼíi̱ ta̱ Moisés xíʼin ta̱ Aarón chí Egipto, tasaá chi̱ndaʼíi̱ ku̱a̱ʼání tu̱ndóʼo sa̱tá ñuu kán tasaá ta̱vái̱ ndóʼó ñuu kán. 6 Tá ta̱vái̱ na̱ yivándó chí ñuu Egipto ta ni̱xa̱a̱ndó chí nu̱ú ndíkaa̱ mar, na̱ ñuu Egipto xi̱ndiku̱nna sa̱tá na̱ yivándó xíʼin carreta tú xáʼa̱n nu̱ú ku̱a̱chi ta saátu na̱ ta̱a na̱ yósó* kuáyi̱ ta ni̱xa̱ʼa̱nna sa̱tándó nda̱a̱ mar Rojo. 7 Tasaá na̱ yivándó ki̱xáʼana xákundáʼvina nu̱ú Jehová ña̱ ná chindeétáʼanra xíʼinna. Ta ta̱yóʼo xi̱niñúʼura iin vi̱kó ña̱ naa ña̱ va̱ʼa ndataʼvíra ndóʼó nu̱ú na̱ ñuu Egipto. Ta ti̱kui̱í tá mar Rojo ni̱ko̱yo ndiʼirá sa̱tána tá ni̱ki̱ʼvina inirá. Ta ndóʼó xi̱ninu̱úndó ndiʼi ña̱ ke̱ʼíi̱ xíʼin na̱ ñuu Egipto. Tándi̱ʼi ku̱a̱ʼání ku̱i̱ya̱ ni̱xi̱yondó chí nu̱ú ñuʼú yi̱chí.

8 ”’Ta ni̱xa̱ʼi̱n xíʼinndó nu̱ú ñuʼú na̱ amorreo na̱ ni̱xi̱yo chí inka táʼví* yu̱ta Jordán, ta na̱yóʼo ka̱nitáʼanna xíʼinndó. Soo nda̱taxii̱ na̱yóʼo ndaʼa̱ndó ña̱ va̱ʼa ndakiʼinndó ñuʼúna, ta sa̱ndíʼi-xa̱ʼíi̱na. 9 Tasaá ta̱ Balac se̱ʼe ta̱ Zipor, ta̱ rey ñuu Moab, ka̱nitáʼanra xíʼin na̱ ñuu Israel. Ta ka̱nara ta̱ Balaam se̱ʼe ta̱ Beor ña̱ va̱ʼa ná sakúisochiʼñara* ndóʼó. 10 Yi̱ʼi̱ va̱ása níxiniso̱ʼi̱ ña̱ ni̱ka̱ʼa̱n ta̱ Balaam. Ña̱kán ku̱a̱ʼá yichi̱ chi̱kaa̱ra bendición ndóʼó, ta yi̱ʼi̱ kúú ta̱ sa̱kǎku ndóʼó nu̱úna.

11 ”’Tándi̱ʼi ni̱ya̱ʼandó yu̱ta Jordán ta ni̱xa̱a̱ndó chí Jericó. Ta na̱ níʼi yichi̱* nu̱ú na̱ ñuu Jericó, ta saátu na̱ amorreo, na̱ perizita, na̱ cananeo, na̱ hitita, na̱ guirgaseo, na̱ heveo xíʼin na̱ jebuseo ka̱nitáʼanna xíʼinndó, soo yi̱ʼi̱ nda̱taxii̱ na̱yóʼo ndaʼa̱ndó. 12 Ta yi̱ʼi̱ kúú ta̱ chi̱kaa̱-ini na̱kán ña̱ yi̱ʼvínína kunina ndóʼó tasaá kununa nu̱úndó, nda̱a̱ táki̱ʼva ke̱ʼíi̱ xíʼin u̱vi̱ saá na̱ rey na̱ amorreo. Ta su̱ví xíʼin espada á xíʼin kuxu̱n* kúú ña̱ níkuchiñundó kanitáʼanndó xíʼinna. 13 Tasaá nda̱kiʼinndó iin ñuʼú ña̱ va̱ása níndoʼondó xa̱ʼa̱, ta saátu nda̱kiʼinndó ñuu ña̱ va̱ása ní ixava̱ʼandó ta xi̱kundoondó ñuu yóʼo. Ta ndákiʼinndó ña̱ʼa ndaʼa̱ tú uva ta saátu tú olivo tú va̱ása níchiʼindó’.

14 ”Xa̱ʼa̱ ña̱kán, yi̱ʼvíndó kunindó Jehová* ta iinlá miíra kachíñundó nu̱ú, ta nda̱kúní koo inindó xíʼinra. Sandíʼi-xa̱ʼa̱ndó ndióxi̱ na̱ xi̱ndasakáʼnu na̱ táʼanndó na̱ xi̱ndoo chí inka táʼví yu̱ta Éufrates ta saátu na̱ xi̱ndoo chí Egipto, ta ndasakáʼnundó Jehová. 15 Soo tá va̱ása kúni̱ndó ndasakáʼnundó Jehová, ndaka̱xinndó ndáana kúni̱ndó ndasakáʼnundó: á ndióxi̱ na̱ xi̱ndasakáʼnu na̱ táʼanndó na̱ xi̱ndoo chí inka táʼví yu̱ta Éufrates, á ndióxi̱ na̱ amorreo na̱ xíʼin kuenta ñuʼú nu̱ú ndóondó yóʼo. Soo miíi̱ xíʼin na̱ veʼi̱ ndasakáʼnundi̱ Jehová”.

16 Tasaá nda̱kuiin na̱ ñuu: “Nda̱a̱ ni loʼo va̱ása sandákoondi̱ Jehová ta ndasakáʼnundi̱ inka ndióxi̱. 17 Saáchi Jehová Ndióxi̱yó kúú ta̱ ta̱vá ndi̱ʼi̱ ta saátu na̱ yivándi̱ chí ñuu Egipto, nu̱ú i̱xandúxana xíʼinndi̱ ña̱ kachíñundi̱ nu̱úna. Ta xi̱ninu̱úndi̱ ña̱ ke̱ʼéra ku̱a̱ʼání milagro. Ta xi̱ndaara ndi̱ʼi̱ ndiʼi yichi̱ nu̱ú ni̱xi̱kandi̱, ta saátu xi̱ndaara ndi̱ʼi̱ nu̱ú na̱ ñuu nu̱ú ni̱ya̱ʼandi̱. 18 Jehová ta̱vára ndiʼi na̱ ñuu na̱ ni̱xi̱yo nu̱ú ñuʼú yóʼo, nda̱a̱ na̱ amorreo ña̱kán va̱ʼa ki̱xaa̱yó ndóoyó yóʼo. Xa̱ʼa̱ ña̱yóʼo ndi̱ʼi̱ ndasakáʼnundi̱ Jehová saáchi ta̱yóʼo kúú Ndióxi̱yó”.

19 Tasaá ta̱ Josué ni̱ka̱ʼa̱nra xíʼin na̱ ñuu: “Va̱ása kuchiñuvíndó ndasakáʼnundó Jehová, saáchi iin Ndióxi̱ ta̱ yi̱i̱ kúúra; ta kúni̱ra ña̱ iinlá miíra ná ndasakáʼnundó. Ta va̱ása ixakáʼnu-inira xa̱ʼa̱ ña̱ va̱ása va̱ʼa kéʼéndó ni xa̱ʼa̱ ku̱a̱chi ña̱ kíʼvindó. 20 Tá ná sandákoondó Jehová ta kixáʼandó ndasakáʼnundó inka ndióxi̱, sa̱a̱ra xíʼinndó ta sandíʼi-xa̱ʼa̱ra ndóʼó, ni ku̱a̱ʼáníva ña̱ va̱ʼa ke̱ʼéra xa̱ʼa̱ndó tá ya̱chi̱”.

21 Ta na̱ ñuu Israel ni̱ka̱ʼa̱nna xíʼin ta̱ Josué: “Va̱ása keʼéndi̱ ña̱yóʼo, chi Jehová kúú ta̱ ndasakáʼnundi̱”. 22 Tasaá ta̱ Josué ni̱ka̱ʼa̱nra xíʼin na̱ ñuu: “Vitin kúúndó testigo xa̱ʼa̱ miívandó, saáchi miíndó kúú na̱ nda̱kaxin ña̱ ndasakáʼnundó Jehová”. Ta na̱yóʼo nda̱kuiinna: “Miíndi̱ kúú testigova”.

23 “Ña̱kán sandíʼi-xa̱ʼa̱ndó ndióxi̱ na̱ inka ñuu na̱ íyo yóʼo, ta iinlá Jehová Ndióxi̱ na̱ ñuu Israel ndasakáʼnundó xíʼin ndiʼi níma̱ndó”. 24 Ta na̱ ñuu ni̱ka̱ʼa̱nna xíʼin ta̱ Josué: “Ndasakáʼnundi̱ Jehová Ndióxi̱yó ta kandíxandi̱ ña̱ káʼa̱nra”.

25 Ta ki̱vi̱ saá ta̱ Josué ke̱ʼéra iin trato xíʼin na̱ ñuu chí Siquem ta chi̱ndúʼúra xa̱ʼa̱ iin ña̱ xíniñúʼu keʼéna. 26 Tasaá ta̱ Josué ka̱ʼyira ña̱yóʼo nu̱ú libro nu̱ú va̱xi Ley Ndióxi̱, ta chi̱ndúʼúra iin yu̱u̱ káʼnu xa̱ʼa̱ iin yitu̱n káʼnu tú níndichi yatin nu̱ú nda̱sayi̱i̱ Jehová.

27 Ta̱ Josué nda̱kundeéra ni̱ka̱ʼa̱nra xíʼin na̱ ñuu: “Kotondó, yu̱u̱ yóʼo kooña testigo xa̱ʼa̱yó saáchi ña̱yóʼo xi̱niso̱ʼoña ndiʼi ña̱ ni̱ka̱ʼa̱n Jehová xíʼinyó, ta kootuña testigo xa̱ʼa̱ndó tasaá kǒo ka̱ʼa̱nndó ña̱ va̱ása xíni̱ndó Ndióxi̱yó”. 28 Tándi̱ʼi, ta̱ Josué ni̱nda̱yíra na̱ ñuu ta iin tá iinna nda̱kiʼinna ku̱a̱ʼa̱nna nu̱ú ñuʼú ña̱ nda̱kiʼinna.

29 Tándi̱ʼi ku̱u ña̱yóʼo, ta̱ Josué se̱ʼe ta̱ Nun, ta̱ xi̱kachíñu nu̱ú Jehová ni̱xi̱ʼi̱ra tá xi̱kuumiíra 110 ku̱i̱ya̱. 30 Ta sa̱ndúxu̱nnara nu̱ú ñuʼú ña̱ nda̱kiʼinra chí Timnat-Sérah, ña̱ íyo chí nu̱ú íyo yuku̱ nu̱ú ndóo na̱ tribu ta̱ Efraín, ña̱ kíndo̱o chí norte ña̱ yuku̱ Gaas. 31 Na̱ ñuu Israel nda̱sakáʼnuna Jehová ndiʼi tiempo ña̱ xi̱taku ta̱ Josué ta saátu ndiʼi tiempo ña̱ xi̱taku na̱ xi̱kuaʼa̱ na̱ ki̱ndoo tá xa̱a̱ ni̱xi̱ʼi̱ ta̱ Josué, saáchi na̱yóʼo xi̱xini̱na ndiʼi ña̱ ke̱ʼé Jehová xa̱ʼa̱ na̱ ñuu Israel.

32 Ta leke ta̱ José ña̱ nda̱kiʼin na̱ ñuu Israel tá ke̱ena ñuu Egipto sa̱ndúxu̱nnaña chí Siquem, nu̱ú ñuʼú ña̱ cha̱ʼvi ta̱ Jacob 100 xu̱ʼún* xa̱ʼa̱ ndaʼa̱ na̱ se̱ʼe ta̱ Hamor yivá ta̱ Siquem; ta ni̱xa̱a̱ña ndu̱uña ñuʼú na̱ se̱ʼe ta̱ José.

33 Tasaá ni̱xi̱ʼi̱ ta̱ Eleazar se̱ʼe ta̱ Aarón. Ta sa̱ndúxu̱nnara chí xi̱kí nu̱ú ñuʼú se̱ʼera ta̱ Finehás, ña̱ nda̱kiʼinra chí yuku̱ nu̱ú ndóo na̱ tribu ta̱ Efraín.