LAMENTACIONES
א [álef]*
1 Ñuu nu̱ú ni̱xi̱yo ku̱a̱ʼání na̱ yiví, ki̱ndoo miívaña vitin.
Ñuu ña̱ xi̱ndayáʼviní nu̱ú ndiʼika ñuu, vitin íyoña nda̱a̱ táki̱ʼva íyo iin ñaʼá ñá ni̱xi̱ʼi̱ yii̱.
Ñá xi̱xaʼndachíñu nu̱ú inkana, vitin íxandúxana xíʼinñá ña̱ kachíñundáʼviñá nu̱úna.
ב [bet]
2 Iníí ñuú xákuñá; iin tíkaa ti̱kui̱í nu̱úñá.
Ni ku̱a̱ʼání kúú na̱ ta̱ni̱ñá, kǒo nda̱a̱ ni iinna íyo xíʼinñá ña̱ sandíkona-iniñá.
Ndiʼi na̱ xi̱kuu migoñá, ndu̱una contrañá; vitin sáa̱-inina xíninañá.
ג [guímel]
3 Nda̱kiʼinna ñá loʼo se̱ʼe ñuu Judá ku̱a̱ʼa̱n xíʼinna inka ñuu, xóʼvi̱níñá* ta káchíñundáʼviñá nu̱úna.
Vitin xíniñúʼu kooñá xíʼin na̱ inka ñuu; kǒoka nu̱ú ndakindee̱ñá.
Ndiʼi na̱ sáa̱-ini xíniñaʼá* xa̱a̱ ku̱chiñuna nda̱kutáʼanna xíʼinñá saáchi kǒo níkivika kunuñá.
ד [dálet]
4 Yichi̱ ña̱ ku̱a̱ʼa̱n chí Sion kúsuchíní-iniña, saáchi kǒoka nda̱a̱ ni iin na̱ yáʼa nu̱úña ña̱ ku̱ʼu̱nna vikó.
Ndiʼi yéʼé ña̱ kúúmiíña ki̱ndoo miíña; na̱ su̱tu̱ ndeéní kúsuchí-inina.
Kǒo nda̱a̱ ni iin na̱ kivi sandíko-ini ná válí ná ñuu kán, ta mií ñuu Sion xóʼvi̱níña.
ה [he]
5 Vitin káchíñuñá nu̱ú na̱ xi̱saa̱-ini xi̱xiniñaʼá; na̱ sáa̱-ini xíniñaʼá kǒo ña̱ sándi̱ʼiví-inina.
Saáchi Jehová sa̱xóʼvi̱nírañá xa̱ʼa̱ ndiʼi ku̱a̱chi ña̱ ni̱ki̱ʼviñá.
Na̱ sáa̱-ini xíniñaʼá nda̱kiʼinna na̱ va̱lí se̱ʼeñá ku̱a̱ʼa̱n xíʼinna inka ñuu.
ו [waw]
6 Ñá loʼo se̱ʼe Sion ni loʼo va̱ása livika náʼa̱ñá vitin.
Na̱ xi̱niʼi yichi̱ nu̱ú na̱ ñuu íyona nda̱a̱ táki̱ʼva íyo yusu tí kǒo ndáni̱ʼí yita* nu̱ú kixáʼanrí,*
ta ku̱naakavína i̱xaa na̱ ndíku̱n sa̱tána.
ז [zayin]
7 Vitin xa̱ʼa̱ ña̱ ndíʼi̱ní-ini ñá loʼo se̱ʼe ñuu Jerusalén ta kǒoka veʼeñá,
ndákaʼánñá xa̱ʼa̱ ndiʼi ña̱ʼa ña̱ ndáyáʼvi ña̱ xi̱kuumiíñá tá ya̱chi̱.
Tá ku̱chiñu na̱ sáa̱-ini xíniñaʼá ka̱nitáʼanna xíʼin na̱ ñuuñá ta kǒo nda̱a̱ ni iin na̱ níchindeétáʼan xíʼinñá,
na̱ sáa̱-ini xíniñaʼá xi̱nina ña̱ ndi̱ʼi-xa̱ʼa̱ñá ta ku̱sikindaanañá.
ח [jet]
8 Ndeéní ku̱a̱chi ni̱ki̱ʼvi Jerusalén.
Xa̱ʼa̱ ña̱kán ni̱xa̱a̱ñá ndu̱uñá iin ña̱ʼa ña̱ kininí.
Ndiʼi na̱ xi̱ ixato̱ʼó-ñaʼá tá ya̱chi̱, vitin kúndasínu̱úna xíninañá, saáchi xi̱nina ña̱ ki̱ndoo cháláñá.
Ndáʼviní tánañá ta chíse̱ʼéñá nu̱úñá xa̱ʼa̱ ña̱ kúkaʼanní nu̱úñá.
ט [tet]
9 Ku̱yaku̱a̱ ti̱ko̱to̱ñá.
Va̱ása níndakanixi̱níñá xa̱ʼa̱ ña̱ kundoʼoñá chí nu̱únínu.
Nda̱kanda̱ní-inina* tá xi̱nina ña̱ ndi̱ʼi-xa̱ʼa̱ ndiʼi ña̱ kúúmiíñá; kǒo nda̱a̱ ni iin na̱ sandíko-iniñá.
Jehová, kotoún ña̱ xóʼvi̱níi̱, saáchi na̱ sáa̱-ini xíni yi̱ʼi̱ ni̱nuní kúnina xa̱ʼa̱ ña̱ ku̱chiñuna xíʼi̱n.
י [yod]
10 Na̱ sáa̱-ini xíniñaʼá nda̱kiʼinna ndiʼi ña̱ʼa ña̱ ndáyáʼvi ña̱ xi̱kuumiíñá.
Ñákán xi̱niñá ña̱ ni̱ki̱ʼvi na̱ inka ñuu ini templo,
na̱ ñuu na̱ ni̱ka̱ʼún ña̱ va̱ása ndakutáʼanna xíʼin na̱ ñuún.
כ [kaf]
11 Ndiʼi na̱ yiví ndeéní xóʼvi̱na; xíkana ndúkúna ña̱ kuxuna.
Nda̱taxina ña̱ʼa ña̱ ndáyáʼvi ña̱ kúúmiína ndaʼa̱ inkana ña̱ va̱ʼa taxina ña̱ kuxuna, tasaá kutakuna.
Kotoún ña̱ ndóʼi̱ Jehová, saáchi vitin íyoi̱ nda̱a̱ táki̱ʼva íyo iin ñaʼá* ñá va̱ása ndáyáʼvi.
ל [lámed]
12 Ndiʼi ndóʼó na̱ yáʼa chí yichi̱, ¿á va̱ása ndíʼi̱va-inindó xa̱ʼíi̱?
Kotondó, Jehová kúú ta̱ ta̱xi castigo ndaʼíi̱ xa̱ʼa̱ ña̱ ndeéní ni̱sa̱a̱ra,
¿á íyo inka na̱ xóʼvi̱ nda̱a̱ táki̱ʼva xóʼvi̱ yi̱ʼi̱?
מ [mem]
13 Nda̱a̱ chí nu̱ú súkun chi̱ndaʼára iin ñuʼu̱ ña̱ ni̱ki̱ʼvi lekei̱, ta miíra xáʼndachíñu nu̱ú iin tá iinña.
Chi̱ndúʼúra iin ñunú* nu̱ú ti̱in xa̱ʼíi̱; i̱xandúxara xíʼi̱n ña̱ ndikói̱.
Nda̱a̱ táki̱ʼva íyo iin ñaʼá ñá ni̱ndo̱o mitúʼun saá íyoi̱ i̱xaara.
Iníí ki̱vi̱ ndeéndóʼi̱.
נ [nun]
14 Ku̱a̱chi ña̱ ni̱ki̱ʼvii̱ núʼniña nda̱a̱ táki̱ʼva núʼni iin yókó,* miíra kúú ta̱ ka̱tún ña̱yóʼo.
Chi̱ndósoraña si̱kíi̱* ta kǒo níkundeíi̱ xíʼinña.
Jehová nda̱taxira yi̱ʼi̱ ndaʼa̱ na̱ kǒo kúchiñui̱ xíʼin.
ס [sámekh]
15 Jehová ki̱ndaara ndiʼi na̱ ta̱a na̱ ndakúní na̱ xi̱kuumiíi̱.
Nda̱kayara ku̱a̱ʼání na̱ yiví ña̱ va̱ʼa sandíʼi-xa̱ʼa̱ra na̱ ta̱a válí na̱ xi̱kuumiíi̱.
Jehová ni̱xa̱ñi̱ra* ñá loʼo kúa̱an se̱ʼe ñuu Judá chí nu̱ú xáñi̱na uva.
ע [ayin]
16 Xákuníi̱ xa̱ʼa̱ ndiʼi ña̱yóʼo; iin nda̱kutú ti̱kui̱í nduchúnu̱úi̱.
Saáchi ndiʼi na̱ kivi sandíko-inii̱ á chikaa̱na ndee̱ xíʼi̱n xíkání ndóona nu̱úi̱.
Na̱ se̱ʼi̱ kǒoka ña̱ va̱ʼa ndátuna, saáchi na̱ sáa̱-ini xíni ndi̱ʼi̱ ku̱chiñuvana ka̱nitáʼanna xíʼinndi̱.
פ [pe]
17 Sion sa̱káa̱ñá ndaʼa̱ñá; kǒo nda̱a̱ ni iin na̱ sandíko-iniñá.
Jehová xa̱ʼndara chiñu nu̱ú ndiʼi na̱ sáa̱-ini xíni ta̱ Jacob na̱ ndóo yatin xíʼinra, ña̱ ná ku̱ʼu̱nna kanitáʼanna xíʼinra.
Ñuu Jerusalén ndu̱uña iin ña̱ʼa ña̱ kininí ña̱ kúndasína xínina.
צ [sadé]
18 Jehová nda̱kúní-inira, saáchi chiñu ña̱ xáʼndara kúú ña̱ kǒo níxii̱n kundiku̱i̱n.
Kuniso̱ʼo ndiʼi ndóʼó na̱ ñuu, ta kotondó ña̱ xóʼvi̱níi̱.
Ná ñaʼá válí ná xi̱kuumiíi̱ ta saátu na̱ ta̱a válí nda̱kiʼinnana ku̱a̱ʼa̱n xíʼinna inka ñuu.
ק [qof]
19 Ka̱nai̱ na̱ ta̱níi̱, soo ndu̱una contra xíʼi̱n.
Chí ñuu, na̱ su̱tu̱ xíʼin na̱ níʼi yichi̱ nu̱ú na̱ ñuu ni̱xi̱ʼi̱na
nani xíkana ndúkúna ña̱ʼa ña̱ kuxuna ña̱ va̱ʼa kutakuna.
ר [resh]
20 Kotoún Jehová, chi xóʼvi̱níi̱.
Iin nda̱kava̱nuu xitii̱.
Iin ndákava̱tíóʼó* níma̱i̱ saáchi so̱ʼoní ni̱xi̱yoi̱.
Ku̱a̱ʼání kúú na̱ xáʼnína xíʼin espada chí ke̱ʼe;* ta xíʼi̱tu na̱ ñúʼu chí ini veʼe.
ש [shin]
21 Na̱ yiví xi̱niso̱ʼona ña̱ xóʼvi̱níi̱; kǒo nda̱a̱ ni iin na̱ sándi̱ko-inii̱.
Ndiʼi na̱ sáa̱-ini xíni yi̱ʼi̱ ku̱ndaa̱-inina xa̱ʼa̱ tu̱ndóʼo ña̱ ndóʼi̱.
Kúsi̱íní-inina saáchi miíún kúú ta̱ chi̱ndaʼáña nu̱úi̱.
Soo taxiún ña̱ ná kixaa̱ ki̱vi̱ ña̱ ni̱ka̱ʼún xa̱ʼa̱, ki̱vi̱ ña̱ kundoʼona nda̱a̱ táki̱ʼva ndóʼo yi̱ʼi̱.
ת [taw]
22 Ndiʼi ña̱ va̱ása va̱ʼa ña̱ kéʼéna ná xa̱a̱ña nu̱ún ta taxiún castigo ndaʼa̱na,
nda̱a̱ táki̱ʼva ta̱xiún castigo ndaʼíi̱ xa̱ʼa̱ ndiʼi ku̱a̱chi ña̱ ni̱ki̱ʼvii̱.
Saáchi xóʼvi̱níi̱ ta ndeéníndóʼo níma̱i̱.
א [álef]
2 Xa̱ʼa̱ ña̱ ni̱sa̱a̱ní Jehová nda̱kasira ñá loʼo se̱ʼe ñuu Sion xíʼin vi̱kó ndáá.
Nda̱a̱ chí ndiví xi̱xaa̱ ña̱ liviní xi̱naʼa̱ ñuu Israel soo sa̱kánaraña nda̱a̱ nu̱ú ñuʼú.
Ki̱vi̱ ña̱ ni̱sa̱a̱níra, va̱ása níndakaʼánra xa̱ʼa̱ tayi̱ loʼo nu̱ú xi̱ndakindee̱ xa̱ʼa̱ra.
ב [bet]
2 Va̱ása níkundáʼvi-ini Jehová kunira ndiʼi veʼe ña̱ kúúmií ta̱ Jacob chi sa̱ndíʼi-xa̱ʼa̱raña.
Tá ni̱sa̱a̱níra sa̱ndíʼi-xa̱ʼa̱ra ñuu ña̱ kútu̱ní ndási ña̱ kúúmií ñá loʼo se̱ʼe ñuu Judá.
Sa̱ndíʼi-xa̱ʼa̱ra nu̱ú xáʼndachíñuñá ta saátu sa̱ndíʼi-xa̱ʼa̱ra na̱ níʼi yichi̱ nu̱ú na̱ ñuuñá.
ג [guímel]
3 Xa̱ʼa̱ ña̱ ndeéní ni̱sa̱a̱ra, sa̱ndíʼi-xa̱ʼa̱ra ndee̱ ña̱ xi̱kuumií ñuu Israel.
Va̱ása níchindeétáʼankara xíʼinna tá ku̱yatin na̱ sáa̱-ini xíniñaʼá,
ta ña̱ sáa̱ra xíʼin ta̱ Jacob ndákundeéña xíxi̱ña nda̱a̱ táki̱ʼva íyo iin ñuʼu̱ ta xáʼmiña ndiʼi ña̱ íyo yatin nu̱ú íyora.
ד [dálet]
4 Sa̱ndéera kuxu̱nra* nda̱a̱ táki̱ʼva kéʼé na̱ sáa̱-ini xíniñaʼá; xa̱a̱ íyo tu̱ʼva ndaʼa̱ kúaʼara ña̱ kanitáʼanra xíʼinna;
nda̱kundeéra xa̱ʼníra ndiʼi na̱ liviní xi̱naʼa̱ nu̱úndi̱.
Ta sa̱ndíʼi-xa̱ʼa̱ra veʼe loʼo ñá se̱ʼe Sion xa̱ʼa̱ ña̱ ndeéní ni̱sa̱a̱ra, ta ña̱ sáa̱ra íyoña nda̱a̱ táki̱ʼva íyo ñuʼu̱.
ה [he]
5 Jehová íyora nda̱a̱ táki̱ʼva íyo na̱ sáa̱-ini xíniñaʼá;
sa̱ndíʼi-xa̱ʼa̱ra ñuu Israel.
Sa̱ndíʼi-xa̱ʼa̱ra ndiʼi veʼe súkun ña̱ kúúmií ñuu kán;
sa̱ndíʼi-xa̱ʼa̱ra ndiʼi ñuu ña̱ kútu̱ní ndási.
Ku̱a̱ʼání kúú na̱ xáku ta kúsuchí-inina nu̱ú ñá loʼo se̱ʼe ñuu Judá.
ו [waw]
6 Íxandi̱va̱ʼara xíʼin veʼe loʼo ña̱ kúúmiíra, nda̱a̱ táki̱ʼva kéʼéna xíʼin iin veʼe loʼo ña̱ níndichi chí yuku̱.
Sa̱ndíʼi-xa̱ʼa̱ra vikó.
Kǒo nítaxika Jehová ña̱ ndakaʼánna xa̱ʼa̱ vikó ni xa̱ʼa̱ ki̱vi̱ sábado chí Sion,
ta xa̱ʼa̱ ña̱ ndeéní sáa̱ra va̱ása náʼa̱ra ña̱ kúndáʼvi-inira xínira ta̱ rey ni ta̱ su̱tu̱.
ז [zayin]
7 Kǒo níxiinka Jehová kunira altar ña̱ xi̱kuu kuentara;
ku̱ndasínu̱úra xi̱nira nu̱ú xi̱ndasakáʼnunara.
Nda̱taxira nama̱ nu̱ú ni̱xi̱yo veʼe súkun ña̱ kútu̱ní ndási ndaʼa̱ na̱ sáa̱-ini xíniñaʼá.
Ni̱nda̱ʼyi̱ kóʼóna* chí veʼe Jehová, nda̱a̱ táki̱ʼva kéʼéna ki̱vi̱ tá íyo vikó.
ח [jet]
8 Xa̱a̱ chi̱kaa̱-ini Jehová ña̱ sandíʼi-xa̱ʼa̱ra nama̱ ñá loʼo se̱ʼe ñuu Sion.
Ka̱taʼnura* yi̱ʼva̱ ña̱ xíniñúʼuna ña̱ távána ki̱ʼva.
Sa̱káa̱ra ndaʼa̱ra ña̱ va̱ʼa sandíʼi-xa̱ʼa̱rana.
Xa̱ʼa̱ ña̱ kéʼéra, ña̱ sási sa̱tá nama̱ ta saátu mií nama̱ kúsuchíní-iniña; ndi̱ʼi ndee̱ña.
ט [tet]
9 Tú yéʼéna ni̱sa̱ʼvinú ti̱xin ñuʼú.
Ta̱kán sa̱ndíʼi-xa̱ʼa̱ra ña̱ʼa* ña̱ ndási yéʼéna ta sa̱kúachi válíraña.
Ta̱ rey xíʼin na̱ níʼi yichi̱ nu̱ú na̱ ñuu nda̱kiʼinna ku̱a̱ʼa̱nna inka ñuu.
Kǒoka na̱ sánáʼa̱-ñaʼá;* va̱ása táxika Jehová ña̱ kuni na̱ profeta visión.
י [yod]
10 Na̱ níʼi yichi̱ nu̱ú* ñá loʼo se̱ʼe Sion va̱ása káʼa̱nkana ndóona nu̱ú ñuʼú.
Chi̱kaa̱na yáká* xi̱nína ta ndíxina ti̱ko̱to̱ ndayí.*
Ná válí ñuu Jerusalén nda̱kundee xi̱níná* nda̱a̱ nu̱ú ñuʼú.
כ [kaf]
11 Xa̱a̱ ku̱naa nduchúnu̱úi̱ xa̱ʼa̱ ña̱ xákuníi̱.
Iin nda̱kava̱nuu xitii̱.
Sa̱ta̱xáʼíi̱ nda̱kavaña nu̱ú ñuʼú xa̱ʼa̱ ña̱ nda̱kava ñá loʼo se̱ʼe na̱ ñui̱,
saátu xa̱ʼa̱ na̱ va̱lí xíʼin na̱ lée válí chi xíʼi̱tóona* ndóona chí ñuu.
ל [lámed]
12 Kǒo sándakoona ña̱ ka̱ʼa̱nna xíʼin siʼína “Kúni̱níi̱ kuxui̱ ta yíchi̱níi̱”,*
xíʼi̱tóona nda̱a̱ táki̱ʼva ndóʼo na̱ tu̱kue̱ʼe̱ na̱ ndóo chí calle ñuu,
ta mií ndaʼa̱ siʼína xíʼi̱vana.
מ [mem]
13 ¿Ndáaña kivi kuniñúʼi̱ ña̱ ka̱ʼi̱n xa̱ʼún,
á ndáaña kivi chitáʼi̱n yóʼó xíʼin, yóʼó ñá se̱ʼe ñuu Jerusalén?
¿Ndáaña kivi chitáʼi̱n yóʼó xíʼin ña̱ va̱ʼa sandíkoi̱-iniún, yóʼó ñá loʼo kúa̱an se̱ʼe ñuu Sion?
Nda̱a̱ táki̱ʼva káʼnuní tá mar saá káʼnuní ña̱ ndo̱ʼún. ¿Ndáana kivi sandáʼa yóʼó?
נ [nun]
14 Na̱ profetaún xi̱xitona visión ña̱ vatá,* ta ña̱ xi̱kaʼa̱nna su̱ví ña̱ ndáyáʼvi níxikuuña.
Xi̱ndakundeéna xi̱kaʼa̱nna xíʼún xa̱ʼa̱ visión ña̱ vatá ta xi̱sandáʼvina yóʼó, ta xa̱ʼa̱ ña̱ kǒo níka̱ʼa̱nna xíʼún xa̱ʼa̱ ña̱ va̱ása va̱ʼa kéʼún, ña̱kán kúú ña̱ nda̱kiʼinna yóʼó ku̱a̱ʼa̱n xíʼinna inka ñuu.
ס [sámekh]
15 Ndiʼi na̱ yáʼa chí yichi̱ kánindaʼa̱na xa̱ʼa̱ ña̱ kúsi̱kindaana yóʼó.
Tá xítona ñá loʼo se̱ʼe ñuu Jerusalén ndákanda̱ní-inina,* tútuna, sákuikóna* xi̱nína ta káchina:
“¿Á ñuu yóʼo kúú ña̱ xi̱kaʼa̱nna xa̱ʼa̱ ‘Liviní náʼa̱ña, ta ña̱yóʼo kúú ña̱ sákusi̱í-ini ndiʼi na̱ ndóo iníísaá nu̱ú ñuʼú’?”.
פ [pe]
16 Ndiʼi na̱ sáa̱-ini xíni yóʼó káʼa̱n-ndi̱va̱ʼana xa̱ʼún.
Tútuna, ndákaxí nu̱ʼuna ta káchina: “Ku̱chiñuvayó sa̱ndíʼi-xa̱ʼa̱yóña.
Ña̱yóʼo kúú ki̱vi̱ ña̱ xi̱ndatuníyó, ki̱xaa̱vaña ta xi̱nivayóña”.
ע [ayin]
17 Jehová ke̱ʼévara ña̱ xi̱kuni̱ra; sa̱xínura ña̱ ni̱ka̱ʼa̱nra,
ña̱ xa̱a̱ íyo ku̱a̱ʼání tiempo ni̱ka̱ʼa̱nra.
Va̱ása níkundáʼvi-inira kuniraña ta sa̱ndíʼi-xa̱ʼa̱raña.
Ta̱xira ña̱ ná kusi̱íní-ini na̱ sáa̱-ini xíni yóʼó xa̱ʼa̱ ña̱ ndo̱ʼún; ta̱xira ña̱ ndakúníka ná koo na̱ sáa̱-ini xíni yóʼó.
צ [sadé]
18 Níma̱ na̱ ñuu kánaña Jehová, ta̱ íyo nda̱a̱ táki̱ʼva íyo iin nama̱ nu̱ú ñá se̱ʼe ñuu Sion.
Ñuú xíʼin káʼñu* ná kunu ti̱kui̱í nu̱úñá, nda̱a̱ táki̱ʼva xínu ti̱kui̱í yu̱ta.
Kǒo ndakiʼún ta̱chíún ta ni va̱ása taxiún ña̱ ndakindee̱ nduchúnu̱ún.
ק [qof]
19 Ndako̱o. Kuaku iníísaá ñuú.
Ndeéní kuakún ka̱ʼún xíʼin Jehová xa̱ʼa̱ ndiʼi ña̱ ñúʼu níma̱ún.
Ndaniʼi ndaʼún chí nu̱ú íyora ña̱ va̱ʼa ná kutaku na̱ va̱lí se̱ʼún,
na̱ xíʼi̱tóo xa̱ʼa̱ so̱ko chí ti̱tu̱n ndiʼi calle.
ר [resh]
20 Jehová, koto va̱ʼa ñuu ña̱ ndeéní ta̱xiún castigo ndaʼa̱.
¿Á xíniñúʼu ndakundeéka ná ñaʼá kuxuná na̱ va̱lí se̱ʼená na̱ sa̱kákuná, na̱ kǒo kue̱ʼe̱ kúúmií?
¿Á xíniñúʼu ndakundeékana kaʼnína na̱ su̱tu̱ ta saátu na̱ profeta ini veʼe miíún Jehová?
ש [shin]
21 Na̱ ta̱a na̱ válí xíʼin na̱ xi̱kuaʼa̱ ni̱xi̱ta̱na ndóona chí calle.
Xíʼin espada xa̱ʼnína ná válí xíʼin ta̱ va̱lí.
Xa̱ʼníúnna ki̱vi̱ ña̱ ni̱sa̱a̱níún; kǒo níkundáʼvi-iniún kuniúnna ta sa̱ndíʼi-xa̱ʼa̱ ndiʼúnna.
ת [taw]
22 Ndiʼi táʼví ndákayaún na̱ sáyi̱ʼví yi̱ʼi̱, nda̱a̱ táki̱ʼva ndátaka na̱ va̱xi ki̱vi̱ tá íyo vikó.
Ki̱vi̱ ña̱ ni̱sa̱a̱ní Jehová, kǒo nda̱a̱ ni iinna níxinu ta kǒo nda̱a̱ ni iinna níka̱ku;
na̱ sáa̱-ini xíni yi̱ʼi̱ sa̱ndíʼi-xa̱ʼa̱na na̱ sa̱kákui̱ ta sa̱kúaʼnui̱.
א [álef]
3 Yi̱ʼi̱ kúú ta̱a ta̱ xi̱ni tu̱ndóʼo ña̱ ku̱u xa̱ʼa̱ castigo ña̱ ta̱xi Ndióxi̱ ndaʼa̱ndi̱ tá ni̱sa̱a̱níra.
2 Ta̱kán ta̱vára yi̱ʼi̱ ta íxandúxara xíʼi̱n ña̱ kakai̱ nu̱ú naa, ta su̱ví nu̱ú íyo luz.
3 Ta̱kán íyora contra xíʼi̱n iníí ki̱vi̱, tuku ta tuku kéʼéra ña̱yóʼo.
ב [bet]
4 Íxandi̱va̱ʼara xíʼin ku̱ñui̱ ta saátu xíʼin ñiíi̱;
ni̱xa̱ʼnu̱ra lekei̱.
5 Iníí nu̱ú íyoi̱ nda̱kasira xíʼin nama̱;
iníí nu̱ú íyoi̱ ta̱xira ña̱ ná kuaʼnu yuku̱ ña̱ kivi kaʼní na̱ yiví
ta táxitura ku̱a̱ʼání tu̱ndóʼo ndaʼíi̱.
6 I̱xandúxara xíʼi̱n ña̱ kindo̱i̱ nu̱ú naa, nda̱a̱ táki̱ʼva íyo na̱ ta̱a na̱ xa̱a̱ ku̱a̱ʼání tiempo ni̱xi̱ʼi̱.
ג [guímel]
7 Kútu̱ní nda̱kasira yi̱ʼi̱ ini iin nama̱ ña̱ va̱ʼa kǒo kunui̱.
Ka̱túnra ndaʼíi̱ xíʼin ka̱a ña̱ cobre ña̱ ve̱ení.
8 Ta tá ndeéní kánai̱ra ña̱ chindeéra yi̱ʼi̱, kǒo xíínra kuniso̱ʼora ña̱ káʼi̱n xíʼinra.
9 Xi̱niñúʼura yu̱u̱ ña̱ tu̱xína ña̱ nda̱kasira yichi̱ nu̱ú xíkai̱;
xa̱ʼa̱ ña̱ kéʼéra íxayo̱ʼvi̱níña* xíʼi̱n kakai̱ yichi̱ nu̱ú ku̱a̱ʼi̱n.
ד [dálet]
10 Ta̱kán ndátura kaʼníra yi̱ʼi̱ nda̱a̱ táki̱ʼva kéʼé iin tí oso,
nda̱a̱ táki̱ʼva kéʼé iin ndikaʼa* tí ndíkaa̱se̱ʼé.
11 I̱xandúxara xíʼi̱n ña̱ kitai̱ yichi̱ nu̱ú ku̱a̱ʼi̱n ta sa̱kúachi válíra yi̱ʼi̱.*
Sa̱ndákoo miíra yi̱ʼi̱.
12 Xa̱a̱ sa̱ndéera kuxu̱nra* ta kúni̱ra kanira yi̱ʼi̱ xíʼin flecha.
ה [he]
13 Mií nduchu̱ inii̱ ka̱nira flecha tú ñúʼu nu̱ú táanva̱ʼaranú.
14 Ndiʼi na̱ ñuu kúsi̱kindaana yi̱ʼi̱, xa̱ʼa̱ yi̱ʼi̱ káʼa̱nna iníí ki̱vi̱ tá xítana yaa.
15 Sa̱kútúra ti̱xii̱n xíʼin yuku̱ o̱va̱ ta ndákundeéra táxira yuku̱ o̱va̱ xíʼii̱.
ו [waw]
16 Sákuachira nu̱ʼii̱ xíʼin yu̱ti;
xa̱ʼa̱ ña̱ yíʼviníi̱ ndákandúʼi̱ nu̱ú ya̱a̱.
17 Va̱ása táxiún ña̱ vií koi̱; ni loʼo kǒo ndákaʼánkai̱ xa̱ʼa̱ ña̱ʼa ña̱ va̱ʼa.
18 Xa̱ʼa̱ ña̱kán kúú ña̱ káchii̱: “Ña̱ va̱ʼaní xi̱naʼi̱ ndi̱ʼi-xa̱ʼa̱vaña vitin, ta kǒoka ña̱ ndátui̱ keʼé Jehová xa̱ʼíi̱”.
ז [zayin]
19 Ndakaʼún xa̱ʼíi̱ vitin ña̱ ndíʼi̱ní-inii̱ ta kǒoka veʼi̱, ndakaʼún ña̱ xa̱xíi̱ yu̱ku̱ o̱va̱ ta xi̱ʼii̱ veneno o̱va̱.
20 Ndakaʼánvaún xa̱ʼíi̱ ta kuyatiún nu̱úi̱ ña̱ chindeétáʼún xíʼi̱n.
21 Ndákaʼánvai̱ xa̱ʼa̱ ña̱yóʼo xíʼin ndiʼi níma̱i̱; xa̱ʼa̱ ña̱kán kúee koo inii̱ kundatui̱.
ח [jet]
22 Xa̱ʼa̱ ña̱ ndixaní kúʼvi̱-ini* Jehová xínira miíyó kúú ña̱ ta̱ʼán ndiʼi-xa̱ʼa̱yó,
saáchi va̱ása sándakoora ña̱ kúʼvi̱-inira xínira miíyó.
23 Xa̱a̱ síín síín ki̱ʼva náʼa̱raña ki̱vi̱ tá ki̱vi̱; nina sáxi̱nuvara ña̱ kíndo̱ora keʼéra.
24 Yi̱ʼi̱ ka̱chii̱: “Jehová kúú herenciai̱, xa̱ʼa̱ ña̱kán kúee koo inii̱ kundatui̱ra”.
ט [tet]
25 Va̱ʼaní-ini Jehová xíʼin na̱ ndáa-ini miíra, na̱ kǒo sándakoo ña̱ nandukúnara.
26 Iin ña̱ va̱ʼaní kúú ña̱ kúee koo iniyó kundatuyó ña̱ sakǎku Jehová miíyó.
27 Iin ña̱ va̱ʼaní kúú ña̱ kundiso iin ta̱a yókó* tá loʼora.
י [yod]
28 Ná kindo̱o miíra koora ta ná kǒo ka̱ʼa̱nra nda̱a̱ ni iin ña̱ʼa tá ná chinúu ta̱kán* yókó si̱kíra.*
29 Ná kuxítíra nda̱a̱ ná tu̱ndaa nu̱úra nda̱a̱ nu̱ú ñuʼú chi sana kivikava ka̱kura.
30 Tá káninara, ná taxira nu̱úra ña̱ kanikana; ná ka̱ʼa̱n-ndi̱va̱ʼana xíʼinra nda̱a̱ na̱ kǒo kundeéka-inira.
כ [kaf]
31 Saáchi su̱ví ndiʼi saá tiempoví kúú ña̱ kundasínu̱ú Jehová kunira miíyó.
32 Ni xa̱a̱ sa̱xóʼvi̱vara miíyó, xa̱ʼa̱ ña̱ ndixaní kúʼvi̱-inira* xínira miíyó na̱ʼa̱vara ña̱ kúndáʼvi-inira xínira miíyó.
33 Saáchi ni loʼo va̱ása kútóora saxóʼvi̱ra na̱ yiví ni ña̱ sandóʼora-inina.
ל [lámed]
34 Ndióxi̱ va̱ása kútóora ña̱ kuni̱ iin na̱ yiví ku̱a̱ñi̱na* ndiʼi na̱ ñúʼu veʼeka̱a nu̱ú ñuʼú,
35 ña̱ kuninu̱ú Ndióxi̱ ta̱ káʼnuní ña̱ va̱ása nda̱kú ndatiinna ku̱a̱chi xíʼin iin na̱ yiví
36 ta saátu ña̱ keʼéna ña̱ va̱ása va̱ʼa xíʼin iin na̱ yiví tá ndátiinna ku̱a̱chi xíʼinna,
ña̱yóʼo kúú ña̱ kǒo kútóo Jehová.
מ [mem]
37 Tá saá, ¿ndáana kúú na̱ kivi ka̱ʼa̱n iin ña̱ʼa ta saxínunaña tá su̱ví Jehová kúú ta̱ níxaʼnda chiñu nu̱úna?
38 Tá káʼa̱n Ndióxi̱ ta̱ káʼnuní ña̱ʼa ña̱ va̱ʼa
kǒo káʼa̱nra ña̱ʼa ña̱ va̱ása va̱ʼa.
39 ¿Á xíniñúʼu ka̱ʼa̱nkúáchi* iin na̱ yiví xa̱ʼa̱ ña̱ ndo̱ʼona xa̱ʼa̱ ña̱ ni̱ki̱ʼvina ku̱a̱chi?
נ [nun]
40 Ná koto va̱ʼayó ta ná kiʼinyó kuenta ndáa ki̱ʼva íyo ña̱ kéʼéyó, ta ná ndikóyó nu̱ú Jehová.
41 Xíʼin ndinuʼu-iniyó ná ka̱ʼa̱nyó xíʼin Ndióxi̱ ta ná ndaniʼiyó ndaʼa̱yó chí ndiví ta ná ka̱ʼa̱nyó xíʼinra:
42 “Ni̱ki̱ʼvindi̱ ku̱a̱chi nu̱ún ta kǒo níkeʼéndi̱ ña̱ ni̱ka̱ʼún xíʼinndi̱, ta miíún kǒo ní ixakáʼnu-iniún xa̱ʼa̱ndi̱.
ס [sámekh]
43 Xa̱ʼa̱ ña̱ sáa̱níún kǒo nítaxiún kuyatinndi̱ nu̱ún;
xi̱ndiku̱ún sa̱tándi̱ ta kǒo níkundáʼvi-iniún kuniún ndi̱ʼi̱ chi xa̱ʼníún ndi̱ʼi̱.
44 Xíniñúʼún iin vi̱kó ña̱ kasiún nu̱úndi̱ tasaá kǒo kuniso̱ʼún ña̱ káʼa̱nndi̱ xíʼún.
45 Ndásaún ndi̱ʼi̱ nda̱a̱ táki̱ʼva íyo mi̱ʼí* xíʼin ña̱ʼa ña̱ va̱ása va̱ʼaka ta xátaún ndi̱ʼi̱ ku̱a̱ʼa̱nndi̱ ku̱a̱ʼání ñuu”.
פ [pe]
46 Ndiʼi na̱ sáa̱-ini xíni ndi̱ʼi̱ káʼa̱n-ndi̱va̱ʼana xa̱ʼa̱ndi̱.
47 Ndiʼi tiempo yíʼvindi̱ ta kóyondi̱ ndaʼa̱na, ki̱ndoo mií ñuundi̱ ta ndi̱ʼi-xa̱ʼa̱ña.
48 Nda̱a̱ táki̱ʼva xínu ti̱kui̱í yu̱ta saá xínu ti̱kui̱í nu̱úi̱, saáchi ndi̱ʼi-xa̱ʼa̱ ñá loʼo se̱ʼe na̱ ñui̱.
ע [ayin]
49 Kuakuníi̱ ta ni loʼo kǒo ndakindei̱,
50 nda̱a̱ tá ná koto Jehová ña̱ ndóʼi̱ nda̱a̱ chí ndiví nu̱ú íyora.
51 Kúsuchíní-inii̱ tá xítoi̱ ña̱ xóʼvi̱ní ná se̱ʼe ñui̱.
צ [sadé]
52 Na̱ sáa̱-ini xíni yi̱ʼi̱ kúni̱na kaʼnína yi̱ʼi̱ nda̱a̱ táki̱ʼva kéʼéna xíʼin saa, ni kǒo nda̱a̱ ni iin ña̱ʼa níkeʼíi̱.
53 Sa̱kánana yi̱ʼi̱ ini iin ya̱vi̱ ña̱ va̱ʼa kaʼnína yi̱ʼi̱; xi̱ndakundeéna xi̱kanina yi̱ʼi̱ xíʼin yu̱u̱.
54 Nda̱a̱ xi̱níi̱ ni̱sa̱ʼvi i̱xaa ti̱kui̱í ta ka̱chii̱: “Vitin kúú ña̱ kuvivai̱”.
ק [qof]
55 Nda̱a̱ nu̱ú kúnúva̱ʼa nu̱ú ndíka̱i̱ ini ya̱vi̱, ka̱nai̱ ki̱vi̱ún Jehová ña̱ va̱ʼa chindeétáʼún xíʼi̱n.
56 Kuniso̱ʼún ña̱ káʼi̱n xíʼún. Kǒo ndakasiún so̱ʼún tá kánai̱ yóʼó ña̱ chindeétáʼún xíʼi̱n, ña̱ sandíkoún-inii̱.
57 Yóʼó ku̱yatiún nu̱úi̱ ki̱vi̱ tá ka̱nai̱ yóʼó, ta ka̱chiún: “Va̱ása yi̱ʼvíún”.
ר [resh]
58 Jehová, miíún kúú ta̱ nda̱kiʼin tu̱ʼi̱n ta sa̱kǎkún yi̱ʼi̱.
59 Xi̱niún ña̱ va̱ása va̱ʼa ke̱ʼéna xíʼi̱n, Jehová. Ixaún ña̱ ma̱ní, nda̱kúní ndatiún ku̱a̱chi xa̱ʼíi̱.
60 Xa̱a̱ xi̱nivaún ndiʼi ña̱ va̱ása va̱ʼa ña̱ kúni̱na keʼéna xíʼi̱n.
ש [sin á shin]
61 Xa̱a̱ xi̱niso̱ʼún ndiʼi ña̱ káʼa̱n-ndi̱va̱ʼana xíʼi̱n Jehová, ndiʼi ña̱ kúni̱na keʼéna xíʼi̱n,
62 xa̱a̱ xi̱niso̱ʼún ña̱ káʼa̱n na̱ sáa̱-ini xíni yi̱ʼi̱ ta saátu ña̱ káʼa̱n ya̱ána xa̱ʼíi̱ iníí ki̱vi̱.
63 Koto va̱ʼún ña̱ kéʼéna, ni ndóona á ni ndítana kúsi̱kindaana yi̱ʼi̱ tá xítana yaa.
ת [taw]
64 Jehová, miíún kúú ta̱ taxi castigo ndaʼa̱na xa̱ʼa̱ ña̱ʼa ña̱ kéʼéna.
65 Taxiún ña̱ so̱ʼoní ná koona tasaá kúú ña̱ sakúisochiʼñaúnna.*
66 Tá ná sa̱a̱níún Jehová, kundiku̱ún ku̱ʼún sa̱tána ta sandíʼi-xa̱ʼúnna nu̱ú ñuʼú yóʼo.
א [álef]
4 Va̱ása yéʼe̱ka oro ña̱ yéʼe̱ní ni̱xi̱yo, oro ña̱ va̱ʼaní.
Yu̱u̱ ña̱ yi̱i̱ ni̱xi̱ta̱ña ndóoña chí ti̱tu̱n ndiʼi calle.
ב [bet]
2 Na̱ se̱ʼe ñuu Sion na̱ ni̱xi̱yo nda̱a̱ táki̱ʼva íyo oro ña̱ ndáyáʼviní,
vitin ni̱xa̱a̱na ndu̱una nda̱a̱ táki̱ʼva íyo ki̱si ña̱ ñuʼú,
ki̱si ña̱ íxava̱ʼa iin ta̱a xíʼin ndaʼa̱ra.
ג [guímel]
3 Nda̱a̱ ti̱na* yukú* táxirí ndosórí ña̱ chíchín se̱ʼe válírí;
soo ñá loʼo se̱ʼe ñui̱ ndi̱va̱ʼaní-iniñá nda̱a̱ táki̱ʼva kéʼé tí avestruz tí íyo chí nu̱ú ñuʼú yi̱chí.
ד [dálet]
4 Na̱ va̱lí na̱ chíchín, tíinndaa yáa̱na* la̱ʼla̱na xa̱ʼa̱ ña̱ yíchi̱nína.*
Na̱ va̱lí ndúkúna ña̱ kuxuna soo kǒo nda̱a̱ ni iin na̱ táxi ña̱ kuxuna.
ה [he]
5 Na̱ xi̱xixi ña̱ʼa ña̱ va̱ʼaní, vitin nda̱a̱ ndúvana chí calle xa̱ʼa̱ ña̱ kǒo ña̱ kuxuna.
Na̱ xi̱ndixi ti̱ko̱to̱ yaʼviní* nani tá va̱xi kuaʼnuna, vitin ndáa ya̱a̱ númindaana ndóona.
ו [waw]
6 Ndeéníka íyo castigo ña̱ nda̱kiʼin ñá loʼo se̱ʼe ñui̱ nu̱úka castigo ña̱ nda̱kiʼin na̱ ñuu Sodoma xa̱ʼa̱ ku̱a̱chi ña̱ ni̱ki̱ʼvina,
ña̱yóʼo iin kama kuití ndi̱ʼi-xa̱ʼa̱ña ta kǒo nda̱a̱ ni iinna níchindeétáʼan xíʼinña.
ז [zayin]
7 Na̱ nazareo* na̱ ni̱xi̱yo ñuu kán ndiiní* ni̱xi̱yona, ta xi̱naʼa̱na nda̱a̱ táki̱ʼva náʼa̱ leche tá yaaní.
Ñii̱na kúáʼaníka ni̱xi̱yoña nu̱ú yu̱u̱ ña̱ livi ña̱ ñúʼu ini mar; nda̱a̱ táki̱ʼva yéʼe̱ yu̱u̱ ña̱ zafiro saá yéʼe̱ ni̱xi̱yona.
ח [jet]
8 Vitin ndááníkana nu̱úka tu̱u̱n,
kǒoka na̱ ndákuniñaʼá chí calle.
Ku̱lampa ndiʼi ñii̱na ta túvi ndiʼi lekena, vitin íyona nda̱a̱ táki̱ʼva íyo yitu̱n tú ni̱yi̱chi̱.
ט [tet]
9 Va̱ʼaka ke̱e na̱ ni̱xi̱ʼi̱ xíʼin espada nu̱úka na̱ xíʼi̱ xíʼin so̱ko,
saáchi loʼo tá loʼo ku̱a̱ʼa̱n ndíʼi-xa̱ʼa̱na xa̱ʼa̱ ña̱ kǒo ña̱ʼa kána kuxuna.
י [yod]
10 Ná ñaʼá ná xi̱kundáʼviní-ini xi̱xini inkana, vitin xíʼin ndaʼa̱ miíná sáchi̱ʼyo̱ná* na̱ va̱lí se̱ʼená.
Na̱yóʼo kúú na̱ xi̱xixiná* tá ndi̱ʼi-xa̱ʼa̱ ñá loʼo se̱ʼe na̱ ñui̱.
כ [kaf]
11 Jehová ni̱na̱ʼa̱ra ña̱ sáa̱níra;
sa̱ndíʼi-xa̱ʼa̱rana xa̱ʼa̱ ña̱ ni̱sa̱a̱níra,
ta ña̱yóʼo íyoña nda̱a̱ táki̱ʼva íyo iin ñuʼu̱.
Chi̱kaa̱ra ñuʼu̱ ñuu Sion ta nda̱a̱ xa̱ʼa̱ña ni̱xi̱xi̱.
ל [lámed]
12 Ni na̱ rey na̱ íyo nu̱ú ñuʼú yóʼo ni nda̱a̱ ni iin na̱ yiví na̱ íyo yóʼo,
kǒo níkandíxana ña̱ ki̱ʼvi na̱ sáa̱-ini xíniñaʼá chí yéʼé ñuu Jerusalén.
מ [mem]
13 Ña̱yóʼo ku̱uña xa̱ʼa̱ ku̱a̱chi ña̱ ni̱ki̱ʼvi na̱ profeta ta saátu xa̱ʼa̱ ku̱a̱chi ña̱ ni̱ki̱ʼvi na̱ su̱tu̱,
chi ini ñuu yóʼo xa̱ʼnína* na̱ kǒo ku̱a̱chi kúúmií.
נ [nun]
14 Xíka sánana chí calle nda̱a̱ táki̱ʼva kéʼé na̱ kúáa nu̱ú,*
ku̱yaku̱a̱ ti̱ko̱to̱na xíʼin ni̱i̱
ta kǒo nda̱a̱ ni iin na̱ kívi tiin ti̱ko̱to̱na.
ס [sámekh]
15 Ndeéní káʼa̱nna xíʼinna: “Kútaʼandó,* ndóʼó na̱ yaku̱a̱,* kútaʼandó. Kúáʼanndó, va̱ása tu̱ndaandó ndi̱ʼi̱”.
Saáchi kǒoka veʼena ta ni kǒo kúnda̱a̱-inina ndáa míí ku̱ʼu̱nna.
Na̱ yiví na̱ inka ñuu, káchina: “Na̱yóʼo kǒo kívi kindo̱ona koona xíʼinyó.
פ [pe]
16 Mií Jehová kúú ta̱ ta̱xi ña̱ xa̱a̱ síín síín ñuu ku̱a̱ʼa̱nna;
ta̱kán va̱ása kindo̱oka-inira kunirana.
Na̱ ta̱a va̱ása ixato̱ʼókana na̱ su̱tu̱ ni na̱ níʼi yichi̱ nu̱ú na̱ ñuu”.*
ע [ayin]
17 Ku̱naaní nduchúnu̱úndi̱ xa̱ʼa̱ ña̱ ni̱xi̱kandi̱ na̱ndukúndi̱ na̱ chindeétáʼan xíʼinndi̱, soo kǒo na̱ níkuchiñu chindeétáʼan xíʼinndi̱.
Ni̱ka̱ʼa̱nníndi̱ xíʼin iin ñuu ña̱ chindeétáʼanña xíʼinndi̱, soo va̱ása níkuchiñuña sakǎkuña ndi̱ʼi̱.
צ [sadé]
18 Na̱ sáa̱-ini xíni ndi̱ʼi̱ xítona̱nína* ndi̱ʼi̱ ta xáʼnína ndi̱ʼi̱, ña̱kán kǒo kívika kakandi̱ chí calle ñuundi̱.
Vitin kúú ña̱ ndiʼi-xa̱ʼa̱ndi̱, va̱ása ka̱kukandi̱ saáchi xa̱a̱ ki̱xaa̱ ki̱vi̱ ña̱ ndiʼi-xa̱ʼa̱ndi̱.
ק [qof]
19 Na̱ xi̱ndiku̱n sa̱tándi̱ kamaníka ni̱xi̱yona nu̱úka tí ta̱sú.*
Xi̱ndiku̱nna sa̱tándi̱ chí yuku̱, xi̱ndoose̱ʼéna chí nu̱ú ñuʼú yi̱chí ña̱ va̱ʼa tiinna ndi̱ʼi̱.
ר [resh]
20 Ini ya̱vi̱ ña̱ káʼnuní ña̱ i̱xava̱ʼana nda̱kava ta̱ íyo táki̱ʼva íyo ta̱chí ña̱ ndákiʼinyó, ta̱ nda̱kaxin Jehová,
ta̱ xi̱kaʼa̱nyó xa̱ʼa̱ “Ti̱xin ku̱nda̱ti̱ra* kundooyó xíʼin na̱ inka ñuu”.
ש [shin]
21 Kusi̱í-iniún yóʼó ñá loʼo se̱ʼe na̱ ñuu Edom, yóʼó ñá íyo chí nu̱ú ñuʼú ña̱ Uz.
Soo saátu taxina copa ndaʼún ta xi̱niivaún ta na̱ʼa̱ cháláún miíún nu̱ú ndiʼina.
ת [taw]
22 Xa̱a̱ ndi̱ʼiva castigo ña̱ nda̱kiʼún xa̱ʼa̱ ku̱a̱chi ña̱ ni̱ki̱ʼviún, yóʼó ñá loʼo se̱ʼe ñuu Sion.
Ta̱kán va̱ása ndikókara chindaʼára yóʼó ku̱ʼún koún inka ñuu.
Soo vitin taxira castigo ndaʼún xa̱ʼa̱ ku̱a̱chi ña̱ ni̱ki̱ʼviún, yóʼó ñá loʼo se̱ʼe ñuu Edom.
Ta ndiʼina kunda̱a̱-ini xa̱ʼa̱ ku̱a̱chi ña̱ ni̱ki̱ʼviún.
5 Jehová, ndakaʼún xa̱ʼa̱ ña̱ ndo̱ʼondi̱.
Koto ta kiʼún kuenta ña̱ sa̱kúkaʼannína nu̱úndi̱.
2 Na̱ kǒo xíni̱ndi̱ nda̱kiʼinna herenciandi̱ ta na̱ ke̱e inka ñuu nda̱kiʼinna veʼendi̱.
3 Ni̱xi̱ʼi̱ yivándi̱ ta ki̱ndoo ndáʼvindi̱; siʼíndi̱ nda̱a̱ táki̱ʼva íyo ná ni̱xi̱ʼi̱ yii̱ saá íyoná.
4 Xíniñúʼu chaʼvindi̱ ña̱ va̱ʼa koʼondi̱ ti̱kui̱í tá kúú kuentandi̱ ta saátu xíniñúʼu satándi̱* titu̱n tú kúú kuenta miíndi̱.
5 Na̱ ndíku̱n sa̱tándi̱ xa̱a̱ ku̱yatin tiinna ndi̱ʼi̱.
Ku̱naaníndi̱, ta kǒo táxina ña̱ ndakindee̱ndi̱.
6 Sáka̱a̱ndi̱ ndaʼa̱ndi̱ chí ñuu Egipto ta saátu chí ñuu Asiria ña̱ va̱ʼa ndukúndi̱ ña̱ kuxundi̱.
7 Na̱ táʼanndi̱ na̱ xi̱ndoo xi̱naʼá na̱ ni̱ki̱ʼvi ku̱a̱chi kǒoka na̱ ndóo vitin, soo ndi̱ʼi̱ xíniñúʼu chaʼvi xa̱ʼa̱ ña̱ va̱ása va̱ʼa ke̱ʼéna.
8 Na̱ xi̱kachíñu nu̱úndi̱ kúú na̱ xáʼndachíñu nu̱úndi̱ vitin; kǒo ni iin na̱ kivi ndatavá ndi̱ʼi̱ ndaʼa̱na.
9 Xa̱a̱ yatin kaʼnína ndi̱ʼi̱ tá ni̱xa̱ʼa̱nndi̱ ndu̱kúndi̱ ña̱ kuxundi̱, chi na̱ yiví na̱ ndóo chí nu̱ú ñuʼú yi̱chí xa̱a̱ ni̱xi̱yo tu̱ʼvana ña̱ kaʼnína ndi̱ʼi̱ xíʼin espada.
10 Xa̱ʼa̱ ña̱ xóʼvi̱níndi̱* xíʼin so̱ko, ñii̱ndi̱ ndu̱niʼníña nda̱a̱ táki̱ʼva íyo iin horno.*
11 Chí Sion sa̱kúkaʼanna nu̱ú* ná ñaʼá ná íyo yii̱ ta saátu ke̱ʼéna xíʼin ná ñaʼá kúa̱an ná íyo chí ñuu Judá.
12 Ka̱túnna ndaʼa̱ na̱ níʼi yichi̱ nu̱ú na̱ ñuu ta ka̱tikaanana ta ni loʼo kǒo ní ixato̱ʼóna na̱ ta̱a na̱ xi̱kuaʼa̱.
13 Na̱ va̱lí kúa̱an ndísona molino ndaʼa̱* ta na̱ ta̱a va̱lí ndúvana xa̱ʼa̱ ña̱ ve̱ení titu̱n ndísona.
14 Na̱ níʼi yichi̱ nu̱ú na̱ ñuu* kǒokana ndóo chí yéʼé ñuu; na̱ va̱lí kǒo sákaʼakana yaa.
15 Kǒo kúsi̱íka-inindi̱; nu̱úka ña̱ tixáʼandi̱, na̱ kúsuchí-iniva kúúndi̱.
16 Corona ña̱ xi̱núu xi̱níndi̱ nda̱kavavaña. Ndáʼviníndi̱ chi ni̱ki̱ʼvindi̱ ku̱a̱chi.
17 Xa̱ʼa̱ ña̱yóʼo kúú ña̱ ki̱ʼin kue̱ʼe̱ níma̱ndi̱
ta xa̱ʼa̱ ndiʼi ña̱yóʼo nda̱a̱ táki̱ʼva íyo na̱ kúáa nu̱ú* saá íyondi̱,
18 xa̱ʼa̱ yuku̱ Sion kúúña, chi ki̱ndoo miíña vitin. Ndáa tí yu̱kuii* kúú tí xíka kán.
19 Soo yóʼó Jehová, koún nu̱ú tronoún ndiʼi tiempo.
Reinoún kooña ndiʼi tiempo.
20 ¿Nda̱chun na̱ndóso va̱ʼa iniún xa̱ʼa̱ndi̱ ta xa̱a̱ ku̱a̱ʼání tiempo kúú ña̱ sa̱ndákoondaʼún ndi̱ʼi̱?
21 Chindeétáʼan xíʼinndi̱ ña̱ ná ndikóndi̱ nu̱ún Jehová, ta ndi̱ʼi̱ ndi̱ku̱n ndikóvandi̱ nu̱ún.
Taxi ña̱ ná ndikóndi̱ koondi̱ nda̱a̱ táki̱ʼva ni̱xi̱yondi̱ tá ya̱chi̱.
22 Soo yóʼó ku̱ndasí va̱ʼa nu̱ún xi̱niún ndi̱ʼi̱.
Ndákundeún sáa̱níún xíʼinndi̱.
Ña̱ va̱xi nu̱ú capítulo 1 nda̱a̱ 4 kúúña yaa ña̱ suchí-ini ta ni̱ka̱ʼyi̱ña nda̱a̱ táki̱ʼva va̱xi yiku̱n alfabeto hebreo.
Inka variante “ndóʼo-iniñá”.
Á “na̱ ndíku̱n sa̱táñá”.
Inka variante “ita”, “itia”, “yi̱ku̱”.
Inka variante “kuxurí”.
Inka variante “Iin ku̱a̱ʼa̱n-inina”, “Nda̱kaʼndaní-inina”.
Yóʼo chítáʼanña ñuu Jerusalén xíʼin iin ñaʼá.
Á “iin malla”.
Inka variante “íku”, “yúkú”.
Inka variante “kási̱kíi̱”, “xa̱síkii̱”.
Inka variante “xi̱niʼnira”, “ni̱xa̱ʼnira”.
Inka variante “Iin kávandaʼáña”.
Inka variante “ya̱ta̱”.
Inka variante “koxi̱ra”.
Inka variante “Ni̱nda̱ʼyi̱ ñoona”.
Inka variante “Ka̱taniʼnura”.
Ña̱yóʼo xi̱kuuña iin yitu̱n káni̱ á iin ka̱a ña̱ káni̱ ña̱ xi̱chikaa̱na sa̱tá yéʼé ñuuna tasaá va̱ása ku̱náña.
Á “Kǒoka ley”.
Koto glosario, anciano.
Inka variante “ya̱a̱”.
Inka variante “ti̱ko̱to̱ ndeé”, “ti̱ko̱to̱ kúkun”, “ti̱ko̱to̱ ti̱ndaja̱”. Koto glosario, ti̱ko̱to̱ ndayí.
Inka variante “na̱ku̱ndayiná”, “nda̱kandiená”.
Inka variante “xíʼi̱-yi̱ʼína”.
Tu̱ʼun ña̱ ni̱ka̱ʼyi̱ña káchiña “¿Ndáa míí íyo trigo xíʼin vino?”. Inka variante “yíchi̱ní-inii̱”.
Inka variante “ña̱ to̱ʼón”.
Inka variante “iin ku̱a̱ʼa̱n-inina”, “ndákaʼndaní-inina”.
Inka variante “sávikóna”.
Inka variante “ndiví ñuú”.
Inka variante “kísaxuxaña”.
Á “león”.
Á sana “ke̱ʼéra xíʼi̱n nda̱a̱ táki̱ʼva kéʼéna xíʼin ñuʼú ña̱ táʼvína nu̱ú soo va̱ása chíʼinaña”.
Inka variante “koxi̱ra”.
Koto glosario, ña̱ ndixaní kúʼvi̱-ini.
Inka variante “íku”, “yúkú”.
Ña̱yóʼo káʼa̱nña xa̱ʼa̱, Jehová.
Inka variante “kási̱kíra”, “xa̱síkira”.
Koto glosario, ña̱ ndixaní kúʼvi̱-ini.
Inka variante “ku̱niʼnina”, “ku̱a̱ʼnina”.
Inka variante “ka̱ʼa̱nválí”, “ka̱ʼa̱n-yuʼu̱”.
Inka variante “kuayi”, “ta̱ka̱”.
Inka variante “chikaún chiʼñana”, “satávi̱chiʼñaúnna”.
Inka variante “ñina”.
Á “chacal”.
Inka variante “láa̱na”.
Inka variante “yíchi̱ní-inina”.
Tu̱ʼun ña̱ ni̱ka̱ʼyi̱ña káchiña “ti̱ko̱to̱ kúáʼa ña̱ yéʼe̱ní”.
Koto glosario, nazareo.
Inka variante “yi̱i̱ní”, “yaaní”.
Inka variante “sáchu̱ʼu̱ná”.
Á “na̱ xi̱xixiná xa̱ʼa̱ ña̱ xi̱kusuchí-ininá”.
Tu̱ʼun ña̱ ni̱ka̱ʼyi̱ña káchiña “xa̱tana ni̱i̱”.
Inka variante “kóʼo no̱o̱”.
Inka variante “Kunundaʼandó”.
Koto glosario, ña̱ yaku̱a̱.
Koto glosario, anciano.
Inka variante “xítose̱ʼéna”, “xítoniʼnivíxína”.
Á “águila”. Inka variante “síʼñá”.
Inka variante “kati̱ra”, “ndatíra”, “ku̱nda̱ʼvi̱ra”.
Inka variante “kueenndi̱”.
Inka variante “ndóʼo-inindi̱”.
Á “xi̱tu̱n”.
Á “ti̱in tuúnna”. Inka variante “ti̱in kúítína”, “ti̱in u̱ʼvi̱na”.
Koto glosario, yu̱u̱ molino.
Koto glosario, anciano.
Inka variante “kóʼo no̱o̱”.
Inka variante “xi̱kuii”, “ña̱kuiin”, “ño̱kuii”.