OSEAS
1 Ña̱yóʼo kúú tu̱ʼun ña̱ ni̱ka̱ʼa̱n Jehová xíʼin ta̱ Oseas* se̱ʼe ta̱ Beerí tá tiempo ña̱ ni̱xi̱yo ta̱ Uzías, ta̱ Jotán, ta̱ Acaz xíʼin ta̱ Ezequías, na̱ xi̱kuu rey chí Judá, ta saátu tá tiempo ña̱ ni̱xi̱yo ta̱ Jeroboán se̱ʼe ta̱ Joás ta̱ xi̱kuu rey chí ñuu Israel. 2 Tá xi̱niñúʼu Jehová ta̱ Oseas ña̱ ka̱ʼa̱nra ña̱ yichi̱ nu̱ú xíʼin na̱ ñuu Israel, Jehová ni̱ka̱ʼa̱nra ña̱yóʼo xíʼin ta̱ Oseas: “Kúáʼan ta tindaʼún xíʼin iin ñá ñaʼá ñá ku̱su̱n xíʼin ku̱a̱ʼání ta̱a ta koún yivá na̱ va̱lí na̱ sakákuñá xíʼin inka ta̱a, saáchi na̱ ñuu yóʼo nda̱a̱ táki̱ʼva íyo na̱ kísi̱ xíʼin ku̱a̱ʼání ta̱a á xíʼin ku̱a̱ʼání ñaʼá saá íyona, chi va̱ása nda̱kú níxi̱yo inina xíʼin Jehová”.
3 Ña̱kán ni̱xa̱ʼa̱nra ta ti̱ndaʼa̱ra xíʼin ñá Gómer se̱ʼe ta̱ Diblaim, ta ñákán ni̱ke̱e se̱ʼeñá ta sa̱kákuñá iin ta̱ loʼo.
4 Tasaá ni̱ka̱ʼa̱n Jehová xíʼinra: “Ná kunaníra Jezreel,* saáchi si̱lóʼoní tiempo kúma̱ní ta taxii̱ castigo ndaʼa̱ na̱ veʼe ta̱ Jehú xa̱ʼa̱ ndiʼi na̱ xa̱ʼnína chí Jezreel, ta sandíʼi-xa̱ʼíi̱ ña̱ xáʼndachíñuna nu̱ú na̱ ñuu Israel. 5 Ta ki̱vi̱ kán, ka̱ʼnu̱i̱ kuxu̱n* na̱ ñuu Israel chí yoso̱ ña̱ Jezreel”.
6 Ta ñákán, tuku ni̱ke̱e se̱ʼeñá ta sa̱kákuñá iin ñá loʼo. Ta Ndióxi̱ ni̱ka̱ʼa̱nra xíʼin ta̱ Oseas: “Ná kunaníñá Lo-Ruhamá,* saáchi va̱ása na̱ʼa̱kai̱ ña̱ kúndáʼvi-inii̱ xínii̱ na̱ ñuu Israel, saáchi taxínvai̱na ku̱ʼu̱nna. 7 Soo na̱ʼa̱vai̱ ña̱ kúndáʼvi-inii̱ xínii̱ na̱ ñuu Judá, ta yi̱ʼi̱ Jehová Ndióxi̱na sakǎkuvai̱na; soo tá ná sakǎkui̱na va̱ása kuniñúʼi̱ kuxu̱n, ni espada, ni ku̱a̱chi, ni kuáyi̱, ni na̱ yósó* kuáyi̱”.
8 Tá xa̱a̱ sa̱ndákoo ñá Lo-Ruhamá ña̱ chíchínñá, tuku ni̱ke̱e se̱ʼe ñá Gómer ta sa̱kákuñá iin ta̱ loʼo. 9 Tasaá ni̱ka̱ʼa̱n Ndióxi̱: “Ná kunaníra Lo-Ammí,* saáchi ndóʼó va̱ása kúúkandó na̱ ñui̱ ta ni yi̱ʼi̱ va̱ása kúúkai̱ Ndióxi̱ndó.
10 ”Ta na̱ ñuu Israel ku̱a̱ʼání xa̱a̱na koona nda̱a̱ táki̱ʼva ku̱a̱ʼání kúú yu̱ti ña̱ íyo yuʼú tá mar, ña̱ kǒo kívi chuʼunna ta ni kǒo kívi kaʼvina. Ta chí lugar nu̱ú ni̱ka̱ʼi̱n xíʼinndó ‘Ndóʼó va̱ása kúúndó na̱ ñui̱’, yi̱ʼi̱ ka̱ʼi̱n xíʼinndó ‘Ndóʼó na̱ kúú se̱ʼe Ndióxi̱ ta̱ táku’. 11 Na̱ ñuu Judá xíʼin na̱ ñuu Israel inkáchi ndakutáʼanna ta ndaka̱xinna iin ta̱ kuniʼi yichi̱ nu̱úna ta keena ñuu nu̱ú ndóona, saáchi iin ki̱vi̱ ña̱ ndáyáʼviní kooña nu̱ú ta̱ Jezreel.
2 ”Ka̱ʼa̱nndó xíʼin na̱ ñanindó ‘Ndóʼó kúú na̱ ñui̱’.*
ta ka̱ʼa̱nndó xíʼin ná ku̱ʼvandó ‘Ndóʼó kúú ná ñaʼá ná ku̱ndáʼvi-inina xi̱nina’.*
2 Ka̱ʼa̱nndó xa̱ʼa̱ ku̱a̱chi ña̱ ni̱ki̱ʼvi siʼíndó; natúʼunndó xa̱ʼa̱ñá,
saáchi va̱ása kúúkañá ñá síʼi̱ ta ni yi̱ʼi̱ va̱ása kúúkai̱ yii̱ñá.
Ná sandákooñá ña̱ ku̱su̱nñá xíʼin ku̱a̱ʼání ta̱a
ta ná va̱ása sandáʼvikañá yii̱ñá xíʼin inka ta̱a;
3 chi tá ná kǒo sandákooñá ña̱yóʼo, tavái̱ ti̱ko̱to̱ñá ta kindo̱o cháláñá nda̱a̱ táki̱ʼva íyoñá tá ka̱kuñá,
ta kooñá nda̱a̱ táki̱ʼva íyo ñuʼú yi̱chí,
ñuʼú nu̱ú kǒo nda̱a̱ ni iin ña̱ʼa íyo
ta kuviñá xa̱ʼa̱ ña̱ yíchi̱ñá.*
4 Ta va̱ása kundáʼvi-inii̱ kunii̱ se̱ʼeñá,
saáchi na̱yóʼo ka̱kuna xa̱ʼa̱ ña̱ ni̱ki̱si̱ñá xíʼin inka ta̱a.
5 Saáchi siʼína ni̱ki̱si̱ñá xíʼin ku̱a̱ʼání ta̱a.
Ñá xi̱ñuʼuna ti̱xin, iin ña̱ kaʼanní nu̱ú kúú ña̱ ke̱ʼéñá, saáchi ka̱chiñá:
‘Ku̱ʼi̱n sa̱tá na̱ ta̱níi̱ na̱ kúni̱ní ku̱su̱n xíʼi̱n,
na̱ táxi si̱ta̱váʼa ndaʼíi̱ xíʼin ti̱kui̱í,
ixí* sa̱tá ndikachi,* lino, aceite tá kuniñúʼi̱ xíʼin vino tá koʼi̱’.
6 Xa̱ʼa̱ ña̱kán kúú ña̱ ndakasii̱ nu̱úñá xíʼin iin corra ña̱ iñú;
ixava̱ʼi̱ iin nama̱ ña̱ yu̱u̱ ña̱ va̱ʼa ndakasii̱ nu̱úñá,
tasaá kǒo kivi ndani̱ʼíñá yichi̱ nu̱ú ku̱ʼu̱nñá.
7 Kunuñá ku̱ʼu̱nñá sa̱tá na̱ ta̱ni̱ñá na̱ kúni̱ní ku̱su̱n xíʼinñá, soo va̱ása kuchiñuñá ni̱ʼí-táʼanñá xíʼinna;
nandukúñána soo kǒona ndani̱ʼíñá.
Tándi̱ʼi ka̱ʼa̱nñá: ‘Ndikói̱ nu̱ú yiíi̱ ta̱ ni̱xi̱yo xíʼi̱n,
saáchi va̱ʼaníkava ni̱xi̱yoi̱ saá, nu̱úka ki̱ʼva ña̱ íyoi̱ vitin’.
8 Soo va̱ása níndakuniñá ña̱ yi̱ʼi̱ kúú ta̱ ta̱xi trigo, vino xa̱á xíʼin aceite ndaʼa̱ñá,
ta ta̱xitui̱ ku̱a̱ʼání plata xíʼin oro ndaʼa̱ñá,
soo xi̱niñúʼuñáña ña̱ nda̱sakáʼnuñá ña̱ Baal.
9 ‘Xa̱ʼa̱ ña̱kán ndikói̱ ta ndakiʼii̱n trigoi̱ ku̱ʼu̱n xíʼi̱n tiempo ña̱ sákeena*
ta saátu ndakiʼii̱n vino xa̱á tiempo tá xa̱a̱ ná ku̱a̱ñi̱na* uva,
ta ixí sa̱tá ndikachi xíʼin lino ña̱ ta̱xii̱ ndaʼa̱ñá ña̱ kundixiñá ña̱ va̱ʼa kǒo kaka cháláñá, kindai̱ña ndaʼa̱ñá.
10 Vitin sandákoo chálái̱ñá ta ndiʼi na̱ ta̱ni̱ñá na̱ kúni̱ní ku̱su̱n xíʼinñá kunina kaʼa̱ñá,
ta kǒo nda̱a̱ ni iin na̱ ta̱a kuchiñu sakǎkuñá nu̱úi̱.
11 Va̱ása taxikai̱ ña̱ kusi̱í-iniñá,
kǒo keʼékañá vikó tá íyo yo̱o̱ xa̱á, saátu kǒo ndakaʼánkañá xa̱ʼa̱ ki̱vi̱ sábado xíʼin ndiʼika vikó ña̱ xi̱keʼéñá.
12 Ta sandíʼi-xa̱ʼíi̱ tú uvañá xíʼin tú higoñá, tú ni̱ka̱ʼa̱nñá xa̱ʼa̱
“Túyóʼo kúú tú cha̱ʼvi na̱ ta̱níi̱ yi̱ʼi̱, na̱ xi̱kuni̱ní ku̱su̱n xíʼi̱n”.
Túyóʼo xa̱a̱nú koonú nda̱a̱ táki̱ʼva íyo ku̱ʼu̱
ta tí kití yukú sandíʼi ndiʼirínú.
13 Ta ndatii̱n ku̱a̱chi xíʼinñá xa̱ʼa̱ ña̱ xi̱sokóñá ña̱ʼa nu̱ú* ña̱ Baal,
tá xi̱ndataánñá seʼe̱* ndaʼa̱ñá ta xi̱ndasaliviñá miíñá ta xi̱xinuñá xi̱xaʼa̱nñá sa̱tá na̱ ta̱ni̱ñá na̱ xi̱kuni̱ní ku̱su̱n xíʼinñá,
ta xi̱nandóso-iniñá xa̱ʼíi̱’, káchi Jehová.
14 ‘Xa̱ʼa̱ ña̱kán saxínu̱i̱-iniñá*
ta kuniʼii̱ yichi̱ nu̱úñá ña̱ ku̱ʼu̱nñá chí nu̱ú ñuʼú yi̱chí
ta ka̱ʼi̱n xíʼinñá tu̱ʼun ña̱ sandíko-iniñá.
15 Tasaá kúú ña̱ ndataxii̱ tú uvañá ndaʼa̱ñá
ta taxii̱ ña̱ ná ya̱ʼañá chí yoso̱ ña̱ Acor ña̱ va̱ʼa ndakiʼinñá ña̱ ndátuñá;
kán kúú nu̱ú keʼéñá xíʼi̱n nda̱a̱ táki̱ʼva ke̱ʼéñá tá ni̱xi̱yo loʼoñá,
nda̱a̱ táki̱ʼva ke̱ʼéñá tá ki̱tañá ñuu Egipto.
16 Ta ki̱vi̱ kán, káchi Jehová,
ka̱ʼún xíʼi̱n ña̱ kúi̱ yii̱ún ta va̱ása ka̱ʼa̱nkaún ña̱ kúi̱ ta̱ káchíñún nu̱ú’.*
17 ‘Va̱ása taxikai̱ ña̱ ka̱ʼa̱nñá ki̱vi̱ ña̱ Baal,
ta va̱ása ndakaʼánkañá xa̱ʼa̱ ki̱vi̱ ña̱yóʼo.
18 Ki̱vi̱ kán keʼíi̱ iin trato xíʼin kití yukú,
saátu kití tí ndáchí chí ndiví xíʼin kití tí ñúu* mií nu̱ú ñuʼú, ña̱ va̱ʼa chindeétáʼi̱n xíʼin na̱ ñui̱;
va̱ása taxikai̱ ña̱ koo ku̱a̱chi ni ña̱ kuniñúʼuna kuxu̱n* xíʼin espada,
ta viíní kundoona ta kǒo kundi̱ʼika-inina.
19 Kindo̱i̱ ña̱ koi̱ yii̱ún ndiʼi tiempo;
ta saátu kindo̱i̱ ña̱ na̱ʼi̱ ña̱ nda̱kúní íyo inii̱ xíʼún,
ña̱ ndixaní kúʼvi̱-inii̱* xínii̱ yóʼó ta saátu ña̱ kúndáʼvi-inii̱ xínii̱ yóʼó.
20 Kindo̱i̱ ña̱ nda̱kúní koo inii̱ xíʼún
tasaá kúú ña̱ xa̱ún kuxini̱ va̱ʼún yi̱ʼi̱ Jehová’.
21 ‘Ki̱vi̱ kán, káchi Jehová,
taxivai̱ ña̱ xíniñúʼu ndiví,
ta ña̱yóʼo taxiña ña̱ xíniñúʼu ñuʼú;
22 ta ñuʼú taxiña ña̱ xíniñúʼu trigo, vino xa̱á xíʼin aceite;
ta ña̱yóʼo taxiña ña̱ xíniñúʼu ta̱ Jezreel.*
23 Nda̱a̱ táki̱ʼva íyo iin si̱ʼva̱ saá íyo na̱ ñui̱ ta chiʼii̱na nu̱ú ñuʼú,
ta na̱ʼi̱ ña̱ kúndáʼvi-inii̱ xínii̱ na̱ va̱ása níkundáʼvi-inina kunina;*
ta na̱ kǒo kúú na̱ ñui̱,* ka̱ʼi̱n ña̱yóʼo xíʼinna “Ndóʼó kúúndó na̱ ñui̱”,
ta na̱kán kachina “Yóʼó kúú Ndióxi̱ndi̱”’”.
3 Tasaá ni̱ka̱ʼa̱n tuku Jehová xíʼi̱n: “Kúáʼan ta nandukú tukún ñaʼá ñá kúni̱ ku̱a̱ʼání na̱ ta̱a xínina ta kísi̱ñá xíʼin ta̱a ta̱ va̱ása kúú yii̱ñá, ta tuku kuʼvi̱-iniún kuniúnñá nda̱a̱ táki̱ʼva kúʼvi̱-ini Jehová xínira na̱ ñuu Israel ni ndákundeéna ndásakáʼnuna inka ndióxi̱ ta kútóonína si̱ta̱váʼa ña̱ kúva̱ʼa xíʼin tí pasa”.*
2 Xa̱ʼa̱ ña̱kán sa̱tái̱ñá ta cha̱ʼvii̱ 15 xu̱ʼún ña̱ plata ta saátu ta̱xii̱ 220 litro* ña̱ cebada xa̱ʼa̱ñá. 3 Tasaá ni̱ka̱ʼi̱n xíʼinñá: “Kuenta miíi̱ koún ku̱a̱ʼání ki̱vi̱. Va̱ása ki̱ʼviún ku̱a̱chi kini ta ni kǒo ku̱su̱n xíʼin inka ta̱a, ta ni yi̱ʼi̱ kǒo ku̱su̱i̱n xíʼún”.
4 Saáchi ku̱a̱ʼání tiempo kǒo kuumiíka na̱ ñuu Israel iin rey ta̱ kaʼndachíñu nu̱úna ni na̱ kuniʼi yichi̱ nu̱úna, kǒo so̱kókana* nda̱a̱ ni iin ña̱ʼa, va̱ása kooka nama̱ nu̱ú ndasakáʼnuna ndióxi̱na, ta ni kǒo kuumiíkana efod* xíʼin ña̱ terafim.* 5 Tá ná ndiʼi, na̱ ñuu Israel ndikóna ta nandukúna Jehová Ndióxi̱na ta saátu ta̱ David ta̱ kúú rey nu̱úna, ta nda̱a̱ kísiñana kixina nu̱ú Jehová ña̱ na̱ʼa̱ra ña̱ va̱ʼa-inira xíʼinna ki̱vi̱ so̱ndíʼi.
4 Ndóʼó na̱ ñuu Israel kuniso̱ʼondó tu̱ʼun ña̱ káʼa̱n Jehová,
saáchi Jehová ndatiinra ku̱a̱chi xíʼin na̱ ndóo ñuu yóʼo,
saáchi ñuu yóʼo kǒo nda̱a̱ ni iin na̱ káʼa̱n ña̱ nda̱a̱, kǒo na̱ ndixaní kúʼvi̱-ini* xínitáʼan ta ni kǒo na̱ kúnda̱a̱-ini xa̱ʼa̱ Ndióxi̱.
2 Ña̱ vatáva* kúú ña̱ chínaʼána,* káʼa̱nna ña̱ vatá, xáʼnína,
íxakuíʼnána ta kísi̱na xíʼin na̱ kǒo nítindaʼa̱ xíʼinna ta iníí ñuu yóʼo kéʼénaña,
ta tuku ta tuku na̱ yiví xáʼnína.
3 Xa̱ʼa̱ ña̱kán, na̱ ñuu yóʼo kusuchíní-inina
ta ndiʼi na̱ ndóo yóʼo kuvitána ta kuvina;
kití tí íyo chí yuku̱, kití tí ndáchí chí ndiví
ta saátu ti̱a̱ká tí ñúʼu ini mar kuvi ndiʼirí.
4 “Soo nda̱a̱ ni iin ta̱ ta̱a ná kǒo kanitáʼanra xíʼin inkara ta ni ná kǒo nda̱ʼyi̱ra xíʼinra xa̱ʼa̱ ña̱ kéʼéra,
saáchi na̱ ñuún íyona nda̱a̱ táki̱ʼva íyo na̱ kánitáʼan xíʼin iin ta̱ su̱tu̱.
5 Xa̱ʼa̱ ña̱kán kúú ña̱ kachiʼún* ni kúúña káʼñu*
ta na̱ profeta kachiʼina xíʼún nda̱a̱ táki̱ʼva ndóʼona tá ñuú.
Ta sayái̱ yuʼú* siʼún.
6 Sayái̱ yuʼú* na̱ ñui̱ xa̱ʼa̱ ña̱ kǒo níxiinna kuxini̱na yi̱ʼi̱.
Xa̱ʼa̱ ña̱ kǒo níxiún sakúaʼún xa̱ʼíi̱,
saátu yi̱ʼi̱ kundasínu̱úi̱ kunii̱ yóʼó ta va̱ása koún su̱tu̱ nu̱úi̱.
Ta xa̱ʼa̱ ña̱ na̱ndóso-iniún xa̱ʼa̱ ley* Ndióxi̱ún,
saátu yi̱ʼi̱ nandóso-inii̱ xa̱ʼa̱ na̱ se̱ʼún.
7 Tá ku̱a̱ʼáka xi̱kuuna, ku̱a̱ʼáka ku̱a̱chi xi̱kiʼvina nu̱úi̱.
Va̱ása taxii̱ ña̱ ná ixato̱ʼó na̱ yivína, chi nu̱úka ña̱yóʼo taxii̱ ña̱ ná sakúkaʼanna nu̱úna.*
8 Na̱kán* xíxina ta ndúnduʼúna xa̱ʼa̱ ña̱ kíʼvi na̱ ñui̱ ku̱a̱chi,*
ña̱kán kúú ña̱ kúni̱nína ña̱ ná ki̱ʼvina ku̱a̱chi.
9 Inkáchi ña̱ kundoʼo na̱ ñuu xíʼin ta̱ su̱tu̱;
ndatii̱n ku̱a̱chi xíʼinna xa̱ʼa̱ ña̱ kéʼéna
ta taxii̱ castigo ndaʼa̱ iin tá iinna nda̱a̱ táki̱ʼva íyo ña̱ kéʼéna.
10 Kuxuna soo kǒo xa̱a̱-inina;*
ku̱su̱nna xíʼin ku̱a̱ʼánína soo kǒo kaku se̱ʼena,
saáchi ni loʼo kǒo ní ixato̱ʼóna Jehová.
11 Xa̱ʼa̱ ña̱ kíʼvina ku̱a̱chi kini, xa̱ʼa̱ ña̱ xíʼina vino tá yatá ta saátu vino tá xa̱á
kǒo kúni̱kana keʼéna ña̱ va̱ʼa.
12 Na̱ ñui̱ ndáka̱tu̱ʼunna ndióxi̱ ña̱ ndásakáʼnuna ña̱ ku̱vaʼa xíʼin yitu̱n
ta kéʼéna ña̱ káʼa̱n yitu̱n* tú kúúmiína,
xa̱ʼa̱ ña̱ kúni̱nína ku̱su̱nna xíʼin ku̱a̱ʼánína kúxíkána
ta xa̱ʼa̱ ña̱ kísi̱na xíʼin ku̱a̱ʼánína kǒo xíínna keʼéna ña̱ káʼa̱n Ndióxi̱.
13 Sóko̱na* ña̱ʼa chí nu̱ú súkun xi̱ní yuku̱
ta chí xi̱ní xi̱kí sóko̱na kití ña̱ va̱ʼa kana yi̱ʼma̱rí
ta saátu xa̱ʼa̱ tú roble xíʼin tú estoraque, á xa̱ʼa̱ nda̱a̱ ndáaka yitu̱n náʼnu,
saáchi va̱ʼaní ku̱nda̱ti̱* xa̱ʼa̱nú.
Xa̱ʼa̱ ña̱kán ná se̱ʼe-síʼina kísi̱ná xíʼin ku̱a̱ʼání ta̱a
ta saátu ná xa̱nuna kísi̱ná xíʼin na̱ ta̱a na̱ kǒo nítindaʼa̱ xíʼinná.
14 Va̱ása ndatii̱n ku̱a̱chi xíʼin ná se̱ʼe-síʼina xa̱ʼa̱ ña̱ kísi̱ná xíʼin ku̱a̱ʼání ta̱a
ta kǒo ndatii̱n ku̱a̱chi xíʼin ná xa̱nuna xa̱ʼa̱ ña̱ kísi̱ná xíʼin na̱ ta̱a na̱ kǒo nítindaʼa̱ xíʼinná.
Saáchi na̱ ta̱a ku̱a̱ʼa̱nna nu̱ú ná ñaʼá ná kísi̱ xíʼin ku̱a̱ʼání ta̱a
ta kítáʼanna sóko̱na ña̱ʼa xíʼin ná ñaʼá ná kísi̱ xíʼin ku̱a̱ʼání ta̱a chí nu̱ú ndásakáʼnuná ndióxi̱ná.
Xa̱ʼa̱ ña̱ kíʼvíní kéʼé na̱ ñuu yóʼo ndiʼi-xa̱ʼa̱vana.
15 Ni kísi̱va yóʼó ñuu Israel xíʼin ku̱a̱ʼánína,
na̱ ñuu Judá ná kǒo kuumiína ku̱a̱chi xa̱ʼa̱ ña̱yóʼo.
Va̱ása kixindó chí Guilgal ni chí Bet-Aven,
ta ni kǒo ka̱ʼa̱nndó ña̱yóʼo tá chínaʼándó ‘Chínaʼíi̱ xa̱ʼa̱ Jehová Ndióxi̱ ta̱ táku’.
16 Saáchi na̱ ñuu Israel so̱ʼonína ta ni̱xa̱a̱na ndu̱una nda̱a̱ táki̱ʼva íyo iin si̱ndi̱ki̱ síʼi tí so̱ʼoní.
¿Á taxi Jehová kaka ndíka̱na chí yoso̱ nda̱a̱ táki̱ʼva xíka ndíka̱ iin ndikachi* che̱e tí yúta̱?*
17 Na̱ ñuu ta̱ Efraín ndásakáʼnuna ndióxi̱ vatá.
Sandákoondóna ta miíkana xíni̱.
18 Tá sándiʼina xíʼina ndixi kíxáʼana kísi̱na xíʼin ku̱a̱ʼánína.
Ta na̱ xáʼndachíñu nu̱úna kútóonína keʼéna ña̱ʼa ña̱ kaʼan nu̱ú.
19 Ta̱chí ndakiʼinñana ku̱ʼu̱n xíʼinña
ta kukaʼanní nu̱úna xa̱ʼa̱ ña̱ʼa ña̱ xi̱sokóna”.
5 “Kuniso̱ʼo ndóʼó na̱ su̱tu̱,
kuniso̱ʼo ndóʼó na̱ ñuu Israel,
kuniso̱ʼo ndóʼó na̱ veʼe ta̱ rey,
saáchi ndóʼó kúú na̱ ndatiinna ku̱a̱chi xíʼin;
nda̱a̱ táki̱ʼva íyo iin trampa saá íyondó chí Mizpá
ta íyondó nda̱a̱ táki̱ʼva íyo iin ñunú* ña̱ nda̱ndika̱ kánduʼú chí Tabor.
2 Na̱ ku̱xíká nu̱úi̱ ku̱a̱ʼání na̱ yiví xáʼnína,
ta xa̱a̱ káʼa̱nvai̱ xíʼinna xa̱ʼa̱ ña̱ kundoʼona.*
3 Xíni̱vai̱ na̱ ñuu ta̱ Efraín,
ta na̱ ñuu Israel va̱ása kivi koose̱ʼéna* nu̱úi̱.
Saáchi vitin, yóʼó Efraín kísi̱ún xíʼin ku̱a̱ʼánína;
na̱ ñuu Israel ku̱yaku̱a̱na.
4 Ña̱ʼa ña̱ kéʼéna kúú ña̱ sási nu̱úna ña̱ ndikóna nu̱ú Ndióxi̱na,
saáchi kútóonína ku̱su̱nna xíʼin ku̱a̱ʼánína,
ta kǒo ndákunina ña̱ kéʼé Jehová xa̱ʼa̱na.
5 Ña̱ ni̱nuní kúni na̱ ñuu Israel kúú ña̱ náʼa̱ ña̱ va̱ása va̱ʼa íyo ña̱ kéʼéna;
na̱ ñuu Israel xíʼin na̱ ñuu ta̱ Efraín ni̱ko̱yona xa̱ʼa̱ ku̱a̱chi ña̱ ni̱ki̱ʼvina,
ta nda̱a̱ na̱ ñuu Judá ni̱ko̱yo xíʼinna.
6 Xíʼin ndikachi* sa̱na̱na ta saátu xíʼin si̱ndi̱ki̱ sa̱na̱na ni̱xa̱ʼa̱nna na̱ndukúna Jehová,
soo kǒo níkivi ndani̱ʼínara.
Ta̱kán ku̱xíkávara nu̱úna.
7 Sa̱ndáʼvina Jehová,
saáchi ni̱xa̱a̱na ku̱una yivá na̱ va̱lí na̱ sa̱káku ná ñaʼá ná inka ñuu.*
Vitin, iin yo̱o̱ sandíʼi-xa̱ʼa̱ñana* ta saátu ndiʼi ña̱ʼa ña̱ kúúmiína.*
8 Tivindó ndiki̱ chí Guibeá* ta tivindó trompeta chí Ramá.
Nda̱ʼyi̱ kóʼóndó* ña̱ va̱ʼa na̱ʼa̱ndó ña̱ xa̱a̱ íyo tu̱ʼvandó ña̱ kanitáʼanndó chí Bet-Aven. Yóʼó ta̱ Benjamín, kúáʼan chí nu̱ú.
9 Yi̱ʼvíní na̱ yiví tá ná kunina ña̱ kundoʼo ndóʼó na̱ ñuu ta̱ Efraín ki̱vi̱ tá ná ndakiʼinndó castigo.
Xa̱a̱ ni̱ka̱ʼa̱nvai̱ xíʼin na̱ tribu na̱ ñuu Israel xa̱ʼa̱ ña̱ kuu.
10 Na̱ kúúmií chiñu ña̱ ndáyáʼvi* ñuu Judá íyona nda̱a̱ táki̱ʼva íyo na̱ sáka̱nda̱ ña̱ʼa ña̱ náʼa̱ ndáa míí kúú nu̱ú xáʼñu* ñuʼú.
Ku̱a̱ʼání castigo taxii̱ ndaʼa̱na, ta nda̱a̱ táki̱ʼva keʼé ta̱ sákaa ti̱kui̱í sa̱tána saá keʼíi̱.
11 Ta̱ Efraín xóʼvi̱níra, ña̱ ndóʼora kúú ña̱ xíniñúʼu ndakiʼinvara,
saáchi chi̱kaa̱-inira ña̱ ndakutáʼanra xíʼin ta̱ sáa̱-ini xíniñaʼá.
12 Xa̱ʼa̱ ña̱kán, ni̱xi̱yoi̱ nda̱a̱ táki̱ʼva íyo iin ti̱kixín nu̱ú ta̱ Efraín
ta nda̱a̱ táki̱ʼva íyo iin ña̱ sáta̱ʼyi̱ saá ni̱xi̱yoi̱ nu̱ú na̱ veʼe ta̱ Judá.
13 Tá xi̱ni ta̱ Efraín kue̱ʼe̱ ña̱ kúúmiíra ta saátu tá xi̱ni ta̱ Judá ndi̱ʼi táʼyi ña̱ ka̱na ñii̱ra,
ta̱ Efraín ni̱xa̱ʼa̱nra chí Asiria ta chi̱ndaʼára na̱ ku̱a̱ʼa̱n ka̱ʼa̱n xíʼin iin rey ta̱ ndakúní.
Soo ta̱ rey yóʼo kǒo níkuchiñura sandáʼara ndóʼó,
kǒo níkuchiñura sandáʼara ndi̱ʼi táʼyi ña̱ ka̱na ñii̱ndó.
14 Saáchi nda̱a̱ táki̱ʼva íyo iin ndikaʼa* tí yúta̱* saá koi̱ nu̱ú ta̱ Efraín
ta nda̱a̱ táki̱ʼva íyo iin ndikaʼa tí ndakúní saá koi̱ nu̱ú na̱ veʼe ta̱ Judá.
Sakúachi válíi̱na ta ndakiʼii̱n ku̱ʼi̱n;
ndakiʼii̱nna ku̱ʼu̱n xíʼi̱n ta kǒo na̱ sakǎkuñaʼá.
15 Ku̱ʼi̱n ta ndikói̱ chí nu̱ú íyoi̱ nda̱a̱ ná ndakiʼinna castigo xa̱ʼa̱ ku̱a̱chi ña̱ ni̱ki̱ʼvina,
ta na̱kán kuni̱na ña̱ ná chindeétáʼi̱n xíʼinna.
Nandukúna yi̱ʼi̱ tá ná kundi̱ʼiní-inina”.
6 “Naʼandó, ná ndikóyó nu̱ú Jehová,
saáchi ni sa̱kúachi válíra miíyó sandáʼavara miíyó;
ni ka̱nira miíyó katúnvara ti̱ko̱to̱ nu̱ú tu̱kue̱ʼe̱yó.
2 Tá ná ya̱ʼa u̱vi̱ ki̱vi̱, sandátakura miíyó.
Ki̱vi̱ u̱ni̱ ndaniʼira miíyó,
ta nani tákuyó kindo̱o-inira xíʼinyó.
3 Kuxini̱yó Jehová, chikaa̱yó ndee̱ ña̱ kuxini̱yóra.
Nda̱a̱ táki̱ʼva kúnda̱a̱-iniyó ña̱ tu̱vi, saá kúnda̱a̱-iniyó ña̱ kixaa̱ra;
kixaa̱ra nu̱úyó nda̱a̱ táki̱ʼva kéʼé sa̱vi̱ tá ndeéní kúun,
nda̱a̱ táki̱ʼva kéʼé sa̱vi̱ tá kuee tá ndákutú nu̱ú ñuʼú”.
4 “¿Ndáaña keʼíi̱ xíʼún Efraín?
¿Ndáaña keʼíi̱ xíʼún Judá?
Saáchi ña̱ ndixaní kúʼvi̱-iniún* xíniún yi̱ʼi̱* íyoña nda̱a̱ táki̱ʼva íyo vi̱kónúu* ña̱ íyo tá xi̱ta̱a̱n,*
nda̱a̱ táki̱ʼva íyo yúyú ña̱ kamaní yíchi̱.
5 Xa̱ʼa̱ ña̱kán kuniñúʼi̱ na̱ profeta ña̱ kanii̱ ndóʼó;
ta xíʼin tu̱ʼun ña̱ kée yuʼíi̱ kaʼníi̱ ndóʼó.
Ta ndiʼi ña̱ ná ka̱ʼa̱n na̱ profeta kundoʼondó káxiní kooña nda̱a̱ táki̱ʼva káxiní túvi tá yéʼe̱.
6 Saáchi ña̱ sákusi̱í-ini yi̱ʼi̱ kúú ña̱ na̱ʼa̱na ña̱ ndixaní kúʼvi̱-inina* xínina yi̱ʼi̱,* ta su̱víka ña̱ so̱kóna ña̱ʼa nu̱úi̱,*
ta saátu ña̱ sákusi̱í-inii̱ kúú ña̱ kuxini̱va̱ʼana xa̱ʼíi̱, yi̱ʼi̱ ta̱ kúú Ndióxi̱ndó, ta su̱víka ña̱ kaʼmina kití* ta so̱kónarí nu̱úi̱.
7 Soo na̱kán, xa̱ʼa̱ ña̱ kúúna na̱ yiví ku̱a̱chi, sa̱ndíʼi-xa̱ʼa̱na trato ña̱ ke̱ʼíi̱ xíʼinna.
Va̱ása nda̱kú níxi̱yo inina xíʼi̱n lugar nu̱ú ndóona.
8 Galaad kúúña iin ñuu nu̱ú ndóo na̱ yiví na̱ kéʼé ña̱ va̱ása va̱ʼa,
iin nda̱kutú ni̱i̱ nu̱úña.
9 Na̱ su̱tu̱ íyona nda̱a̱ táki̱ʼva íyo iin tiʼvi na̱ yiví na̱ xa̱a̱ ndóo tu̱ʼva ña̱ ixakuíʼnána ña̱ʼa inkana.
Chí yichi̱ ña̱ íyo yatin chí Siquem xáʼnína inkana,
saáchi iin ña̱ kaʼanní nu̱ú kúú ña̱ kéʼéna.
10 Xi̱nii̱ iin ña̱ʼa ña̱ kininí chí ñuu Israel.
Kán kúú nu̱ú kísi̱ na̱ ñuu ta̱ Efraín xíʼin ku̱a̱ʼánína;
ñuu Israel ku̱yaku̱a̱ ndiʼiña.
11 Ndóʼó na̱ ñuu Judá, xa̱a̱ nda̱kaxii̱n iin ki̱vi̱ ña̱ ndakaya̱ndó, nda̱a̱ táki̱ʼva kéʼéna tá ndákayana ña̱ sákeena,*
sandákutáʼi̱n ndiʼi na̱ ñui̱ na̱ nda̱kiʼinna ku̱a̱ʼa̱n xíʼinna inka ñuu”.
7 “Ndiʼi yichi̱ ña̱ kúni̱i̱ sandáʼi̱ na̱ ñuu Israel,
ndátu̱vi tuku ku̱a̱chi ña̱ ni̱ki̱ʼvi na̱ ñuu ta̱ Efraín
ta saátu ña̱ va̱ása va̱ʼa ña̱ ke̱ʼé na̱ ñuu Samaria.
Saáchi ndiʼi na̱yóʼo sándaʼvina;
na̱ kui̱ʼná kíʼvina veʼe inkana ta chí sa̱tá ñuu ndóo ku̱a̱ʼání na̱ íxakuíʼná ña̱ʼa inkana.
2 Soo na̱yóʼo ni loʼo kǒo ndákani-inina ña̱ ndakaʼánvai̱ xa̱ʼa̱ ña̱ va̱ása va̱ʼa kéʼéna.
Mií ña̱ va̱ása va̱ʼa kéʼéna kúú ña̱ nda̱kasiñaʼá;
nda̱a̱ ni iin ña̱ kéʼéna kǒo íyo se̱ʼé nu̱úi̱.
3 Na̱kán sákusi̱ína-ini ta̱ rey xíʼin ña̱ʼa ña̱ va̱ása va̱ʼa kéʼéna
ta saátu sákusi̱ína-ini na̱ kúúmií iin chiñu ña̱ ndáyáʼvi* xa̱ʼa̱ ña̱ sándaʼvina.
4 Nda̱a̱ ni iin na̱yóʼo va̱ása nda̱kú íyo inina xíʼi̱n,*
na̱yóʼo íyona nda̱a̱ táki̱ʼva íyo iin horno* ña̱ ndeéní xíxi̱ ña̱ ndákaʼmi iin ta̱ íxava̱ʼa si̱ta̱váʼa
ta kǒo tívikara nu̱ú ñuʼu̱ yóʼo nani tá kíxáʼara ndásakára yuxa̱n iinsaá nda̱a̱ tá xíya̱ña.
5 Tá ni̱xi̱yo vikó ta̱ kúú rey nu̱úyó, na̱ kúúmií chiñu ña̱ ndáyáʼvi nu̱úyó ki̱ʼinna kue̱ʼe̱:
xa̱ʼa̱ ña̱ xi̱ʼina vino ndeéní sáa̱na.
Ta̱ rey ki̱xáʼara kúúra migo na̱ kúsi̱kindaa inkana.
6 Nda̱a̱ táki̱ʼva íyo iin horno ña̱ niʼníní saá íyo níma̱na.*
Ta̱ íxava̱ʼa si̱ta̱váʼa kísi̱ra iníí ñuú;
soo tá xa̱a̱ túvi, niʼníníkava hornora nda̱a̱ táki̱ʼva íyo iin ñuʼu̱ ña̱ ndeéní xíxi̱.
7 Ndiʼi na̱yóʼo niʼnínína nda̱a̱ táki̱ʼva íyo iin horno
ta xáʼnína na̱ xáʼndachíñu nu̱úna.
Kǒo ña̱ va̱ʼa níndoʼo ndiʼi na̱ xi̱kuu rey nu̱úna;
ni iin na̱yóʼo kǒo níkanana yi̱ʼi̱ ña̱ chindeétáʼi̱n xíʼinna.
8 Na̱ ñuu ta̱ Efraín nda̱kutáʼanna xíʼin na̱ inka ñuu.
Íyona nda̱a̱ táki̱ʼva íyo iin si̱ta̱váʼa ña̱ ta̱ʼán xikóʼnina.*
9 Na̱ inka ñuu nda̱kiʼin ndiʼina ndee̱ ña̱ kúúmiína soo ta̱ʼán kiʼinna kuenta.
Ixí* xi̱nína ndu̱yaa ndiʼiña soo ta̱ʼán kiʼinna kuenta.
10 Ña̱ ni̱nuní kúni na̱ ñuu Israel kúú ña̱ náʼa̱ ña̱ va̱ása va̱ʼa íyo ña̱ kéʼéna,
soo na̱yóʼo ta̱ʼán ndikóna nu̱ú Jehová Ndióxi̱na
ni ndo̱ʼona ndiʼi ña̱yóʼo.
11 Na̱ ñuu ta̱ Efraín íyona nda̱a̱ táki̱ʼva íyo iin paloma tí kíʼvíní, kúma̱níní ña̱ ndíchi nu̱úna.
Ni̱ka̱ʼa̱nna xíʼin na̱ ñuu Egipto ña̱ ná chindeétáʼanna xíʼinna;
saátu ni̱ka̱ʼa̱nna xíʼin na̱ ñuu Asiria.
12 Ni nda̱a̱ ndáaka nu̱ú ná ku̱ʼu̱nna sakánai̱ ñunúi̱* sa̱tána.
Taxii̱ ña̱ ná ko̱yona nda̱a̱ táki̱ʼva ndóʼo saa tí ndáchí chí ndiví.
Taxii̱ castigo ndaʼa̱na nda̱a̱ táki̱ʼva íyo ña̱ xa̱a̱ ni̱ka̱ʼi̱n xíʼin na̱ ñuuna.
13 Ndáʼvinína saáchi xi̱nuna nu̱úi̱.
Na̱ ndiʼi-xa̱ʼa̱va kúúna saáchi ni̱ki̱ʼvina ku̱a̱chi nu̱úi̱.
Yi̱ʼi̱ xa̱a̱ ni̱xi̱yo tu̱ʼvai̱ ña̱ sakǎkui̱na, soo na̱kán ni̱ka̱ʼa̱nna ña̱ vatá xa̱ʼíi̱.
14 Tá ni̱ka̱ʼa̱nna xíʼi̱n ña̱ chindeétáʼi̱n xíʼinna su̱ví xíʼin ndiʼi níma̱na níkeʼéna ña̱yóʼo,
ni xi̱kusuchíkaví-inina xi̱ndoona nu̱ú xi̱tona.
Xáʼndana miína xa̱ʼa̱ trigo xíʼin vino tá xa̱á.
Ndúuna contra xíʼi̱n.
15 Ni sa̱náʼi̱na ta ta̱xii̱ ndee̱ ndaʼa̱na,*
ndu̱una contra xíʼi̱n ta nina ña̱ va̱ása va̱ʼa kúni̱na keʼéna.
16 Na̱samana yichi̱ ña̱ ku̱a̱ʼa̱nna, soo su̱ví xa̱ʼa̱ ña̱ keʼéna iin ña̱ va̱ʼaka níxi̱kuuña;*
ni̱xi̱yona nda̱a̱ táki̱ʼva íyo iin flecha tú ku̱yakúá chi va̱ása níxi̱kivi kundaa-ininana.
Na̱ kúúmií iin chiñu ña̱ ndáyáʼvi nu̱úna, kaʼnínana xíʼin espada xa̱ʼa̱ ña̱ káʼa̱nkúáchina* xa̱ʼa̱ Ndióxi̱.
Ta xa̱ʼa̱ ña̱yóʼo kúú ña̱ kusi̱kindaanana chí ñuu Egipto”.
8 Jehová káchira: “Tivi ndiki̱.
Na̱ sáa̱-ini xíni na̱ ñui̱ va̱xina kanitáʼanna xíʼinna nda̱a̱ táki̱ʼva kéʼé iin ta̱sú,*
saáchi sa̱ndíʼi-xa̱ʼa̱na trato ña̱ ke̱ʼíi̱ xíʼinna ta ni̱ya̱ʼandosóna ña̱ káʼa̱n ley ña̱ ta̱xii̱ ndaʼa̱na.
2 Ndeéní káʼa̱nna xíʼi̱n: ‘Ndióxi̱ miíndi̱. Ndi̱ʼi̱ na̱ ñuu Israel, xíni̱vandi̱ yóʼó’.
3 Na̱ ñuu Israel kǒo níxiinna keʼéna ña̱ va̱ʼa.
Taxii̱ ña̱ ná kuchiñu na̱ sáa̱-ini xíniñaʼá kanitáʼanna xíʼinna.
4 Na̱kán nda̱kaxinna na̱ koo rey nu̱úna, soo yi̱ʼi̱ kǒo níka̱ʼi̱n xíʼinna ña̱ keʼéna ña̱yóʼo.
Nda̱kaxinna na̱ kuumií chiñu ña̱ ndáyáʼvi nu̱úna, soo su̱ví yi̱ʼi̱ níndaka̱xinna.
Xi̱niñúʼuna oro xíʼin plata ña̱ kúúmiína ña̱ i̱xava̱ʼana ña̱ʼa ña̱ ndasakáʼnuna,
ña̱ sandíʼi-xa̱ʼa̱ miína.
5 Yi̱ʼi̱ ku̱ndasínu̱úi̱ xi̱nii̱ si̱ndi̱ki̱ loʼo tí xi̱ndasakáʼnu ndóʼó na̱ ñuu Samaria.
Ndeéní sái̱ xíʼinna ta ña̱ sái̱ íyoña nda̱a̱ táki̱ʼva íyo iin ñuʼu̱.
¿Nda̱a̱ amaví kuchiñuna ndasandiina miína?
6 Saáchi na̱ ñuu Israel kúú na̱ ke̱ʼé ña̱yóʼo.
Iin na̱ xíni̱ní ixava̱ʼa ku̱a̱ʼá ña̱ʼava kúú na̱ ke̱ʼé ña̱yóʼo;
su̱ví ndixa Ndióxi̱ví kúúña.
Si̱ndi̱ki̱ loʼo tí ndásakáʼnu na̱ ñuu Samaria kuachi válírí.
7 Xa̱ʼa̱ ña̱ kéʼéna ña̱ va̱ása va̱ʼa, nda̱a̱ táki̱ʼva íyo na̱ chíʼi ta̱chí saá íyona
ta ndakiʼinna ña̱ va̱ása va̱ʼa, ña̱ íyo nda̱a̱ táki̱ʼva íyo sa̱vi̱ ta̱chí.
Nda̱a̱ ni iin yo̱kó va̱ása kana trigo ña̱ xu̱xa ndaʼa̱ña;
tá kǒoña kána, va̱ása kivi kuumiína harina.
Tá ná kanaña, na̱ inka ñuuva kuxuña.
8 Na̱ ñuu Israel ndiʼi-xa̱ʼa̱na.
Vitin koona xíʼin na̱ inka ñuu,
ta koona nda̱a̱ táki̱ʼva íyo iin vaso ña̱ kǒo xíínna kunina.
9 Saáchi ni̱xa̱ʼa̱nna chí ñuu Asiria nda̱a̱ táki̱ʼva kéʼé iin burro yukú tí xíka mií.
Na̱ ñuu ta̱ Efraín cha̱ʼvina ná ñaʼá ña̱ va̱ʼa ku̱su̱nná xíʼinna.
10 Ni inka ñuu ke̱e ta̱ni̱na ná cha̱ʼvina, vitin sandákutáʼi̱nna;
kixáʼana xo̱ʼvi̱na* xa̱ʼa̱ ña̱ ndukú ta̱ rey nu̱úna ta saátu xa̱ʼa̱ ña̱ ndukú na̱ kúúmií chiñu ña̱ ndáyáʼvi.
11 Saáchi na̱ ñuu ta̱ Efraín tuku ta tuku altar kéʼéna ña̱ va̱ʼa ki̱ʼvina ku̱a̱chi.
Na̱yóʼo xíniñúʼuna altar ña̱ i̱xava̱ʼana ña̱ va̱ʼa ki̱ʼvina ku̱a̱chi.
12 Viíní ka̱ʼyii̱ ley ña̱ ta̱xii̱ ndaʼa̱na,
soo va̱ása níxiinna kundiku̱nna ña̱ káʼa̱n ña̱yóʼo.
13 Sóko̱na kití nu̱úi̱* ta xíxina ku̱ñurí,
soo yi̱ʼi̱ Jehová, ni loʼo kǒo kútói̱ ña̱ kéʼéna.
Vitin ndakaʼíi̱n xa̱ʼa̱ ña̱ va̱ása va̱ʼa ke̱ʼéna ta taxii̱ castigo ndaʼa̱na xa̱ʼa̱ ndiʼi ku̱a̱chi ña̱ ni̱ki̱ʼvina.
Ndi̱kóna* chí Egipto.
14 Na̱ ñuu Israel na̱ndóso-inina xa̱ʼa̱ ta̱ i̱xava̱ʼa miína ta ki̱xáʼana íxava̱ʼana ku̱a̱ʼáníka templo,
ta na̱ ñuu Judá ki̱xáʼana íxava̱ʼana tuku ta tuku ñuu ña̱ kútu̱ní ndási.
Soo chindaʼíi̱ iin ñuʼu̱ nu̱ú ndiʼi ñuuna, ta ña̱yóʼo kaʼmiña iin tá iin veʼe súkun ña̱ íyo ñuu kán”.
9 “Kǒo kixáʼún kusi̱í-iniún ñuu Israel,
kǒo kixáʼún kusi̱í-iniún nda̱a̱ táki̱ʼva kéʼé na̱ inka ñuu.
Saáchi xa̱ʼa̱ ña̱ ni̱ki̱si̱ún xíʼin ku̱a̱ʼánína* ku̱xíkáún nu̱ú Ndióxi̱ún.
Ki̱xáʼa kútóoníkaún xu̱ʼún ña̱ xi̱kiʼún xa̱ʼa̱ ña̱ xi̱kisi̱ún xíʼin ku̱a̱ʼánína chí nu̱ú xi̱ndativina trigo.
2 Soo ni nu̱ú ndátivina trigo ni nu̱ú xáñi̱na* uva kǒo taxiña kuxundó,
ta kuma̱ní vino xa̱á nu̱úndó.
3 Kǒo kundookandó nu̱ú ñuʼú ña̱ kúú kuenta Jehová,
saáchi ndikóvandó chí Egipto,
ta chí Asiria kuxundó ña̱ʼa ña̱ yaku̱a̱.*
4 Va̱ása so̱kókandó vino nu̱ú* Jehová;
nda̱a̱ ndáaka ña̱ʼa ná so̱kóndó nu̱úra kǒo kindo̱o-inira xíʼinña.
Nda̱a̱ táki̱ʼva íyo si̱ta̱váʼa ña̱ xíxina tá kúsuchí-inina saá íyondó:
ndiʼi na̱ ná kuxu ña̱yóʼo kuyaku̱a̱na.
Saáchi si̱ta̱váʼa yóʼo mií kuitína kúú na̱ kuxuña;
kǒo ki̱ʼviña veʼe Jehová.
5 ¿Ndáaña keʼéndó tá ná kixaa̱ ki̱vi̱ ña̱ ndakutáʼanndó?*
¿Ndáaña keʼéndó tá ná kixaa̱ ki̱vi̱ ña̱ keʼéndó vikó nu̱ú Jehová?
6 Kunuvandó, saáchi kixi na̱ sáa̱-ini xíni ndóʼó sandíʼi-xa̱ʼa̱na ndóʼó.
Ñuu Egipto kúú ña̱ sandákutáʼan ndóʼó ta ñuu Menfis kúú ña̱ sandúxu̱n ndóʼó.
Yu̱ku̱ túmí kuaʼnuña ta ndakasiña ndiʼi ña̱ʼa ña̱ plata ña̱ ndáyáʼvi ña̱ kúúmiíndó
ta ndakutú tú iñú veʼe válíndó.
7 Kixaa̱va ki̱vi̱ ña̱ ndatii̱n ku̱a̱chi xíʼinndó,
kixaa̱va ki̱vi̱ ña̱ taxii̱ castigo ndaʼa̱ndó,
ta na̱ ñuu Israel kunda̱a̱-inina xa̱ʼa̱ ña̱yóʼo.
Ta̱ profeta nduura iin ta̱ kíʼví, ta ta̱a ta̱ káʼa̱n ña̱ nátúʼunra xa̱ʼa̱ ña̱ káʼa̱n Ndióxi̱ sanavara;
xa̱ʼa̱ ña̱ ndeéní ku̱a̱chi ni̱ki̱ʼvindó, ndeéní sái̱ xíʼinndó”.
8 Ta̱ profeta ta̱ xi̱ndaa na̱ ñuu ta̱ Efraín xi̱kitáʼanra xíʼin Ndióxi̱ miíi̱.
Soo vitin, nda̱a̱ táki̱ʼva íyo trampa ña̱ xíniñúʼuna ña̱ tíinna saa, saá íyo ndiʼi yichi̱ ña̱ ku̱a̱ʼa̱n na̱ profeta na̱ ñuu ta̱ Efraín;
na̱yóʼo sáa̱-inina xínitáʼanna chí veʼe Ndióxi̱na.
9 Ki̱xáʼana kéʼéna nina ña̱ va̱ása va̱ʼa nda̱a̱ táki̱ʼva ku̱u chí Guibeá.
Ta kán ndakaʼánra xa̱ʼa̱ ña̱ va̱ása va̱ʼa ke̱ʼéna ta taxira castigo ndaʼa̱na xa̱ʼa̱ ku̱a̱chi ña̱ ni̱ki̱ʼvina.
10 “Nda̱a̱ táki̱ʼva íyo uva tí ndóo chí nu̱ú ñuʼú yi̱chí saá ni̱xi̱yo na̱ ñuu Israel tá nda̱ni̱ʼíi̱na.
Na̱ táʼanna na̱ xi̱ndoo xi̱naʼá nda̱a̱ táki̱ʼva íyo higo tí nu̱ú kána saá ni̱xi̱yona.
Soo na̱yóʼo ni̱xa̱ʼa̱nna nu̱ú ña̱ Baal ña̱ xi̱ndasakáʼnuna chí Peor;
nda̱taxina miína ndaʼa̱ ña̱ʼa ña̱ kaʼanní nu̱ú yóʼo*
ta ni̱xa̱a̱na ndu̱una na̱ yaku̱a̱ nu̱ú Ndióxi̱
nda̱a̱ táki̱ʼva íyo ña̱ yaku̱a̱ ña̱ xi̱kuni̱nína xi̱xinina.
11 Ña̱ ndáyáʼvi ña̱ xi̱kuumií na̱ ñuu ta̱ Efraín nda̱chíña ku̱a̱ʼa̱nña nda̱a̱ táki̱ʼva kéʼé saa;
va̱ása ke̱eka se̱ʼena ta ni va̱ása kakuka se̱ʼena.
12 Ni ná kuchiñuna sakúaʼnuna se̱ʼena,
soo loʼo tá loʼo kindai̱na ndaʼa̱na nda̱a̱ ná kǒoka nda̱a̱ ni iinna kindo̱o;
ndáʼvinína tá ná kǒo chindeétáʼi̱n xíʼinna.
13 Na̱ ñuu ta̱ Efraín na̱ ni̱xi̱yo iin yoso̱ nu̱ú íyoní yita,* xi̱sandákaʼánna yi̱ʼi̱ xa̱ʼa̱ ñuu Tiro;
vitin na̱ ñuu ta̱ Efraín ku̱ʼu̱nna xíʼin na̱ se̱ʼena ña̱ ná kaʼnínana”.
14 Táta Jehová, taxi castigo ña̱ xíniñúʼu taxiún ndaʼa̱na:
ná nuu se̱ʼena ta ná kǒoka leche kuñuʼu ndosóna.
15 “Chí Guilgal kúú nu̱ú ki̱xáʼana ke̱ʼéna ndiʼi ña̱ va̱ása va̱ʼa, ta kán kúú nu̱ú ki̱xáʼíi̱ sáa̱-inii̱ xínii̱na.
Kǒo taxikai̱ kundoona veʼi̱ xa̱ʼa̱ ndiʼi ña̱ va̱ása va̱ʼa ke̱ʼéna.
Kǒo kuʼvi̱ka-inii̱ kunii̱na;
ndiʼi na̱ kúúmií chiñu ña̱ ndáyáʼvi nu̱úna so̱ʼonína.
16 Na̱ ñuu ta̱ Efraín ndiʼi-xa̱ʼa̱vana.
Na̱yóʼo koona nda̱a̱ táki̱ʼva íyo iin yitu̱n tú ni̱yi̱chi̱ ti̱oʼo* ta kǒo táxikanú ku̱i̱ʼi.
Ni ná kaku se̱ʼena, yi̱ʼi̱ taxii̱ ña̱ ná kuvi na̱ va̱lí se̱ʼena na̱ kúni̱nína xínina”.
17 Ndióxi̱ miíi̱ kundasíra kunirana
saáchi kǒo níxiinna kuniso̱ʼona ña̱ káʼa̱nra,
ta kununa kakana xa̱a̱ síín síín ñuu.
10 “Na̱ ñuu Israel íyona nda̱a̱ táki̱ʼva íyo tú uva tú ndu̱chiʼña* ta vitin ki̱xáʼanú táxinú ku̱a̱ʼáka ku̱i̱ʼi.
Tá ku̱a̱ʼáka ku̱i̱ʼi táxinú, ku̱a̱ʼáka altar íxava̱ʼana;
tá va̱ʼaníka ña̱ʼa kána nu̱ú ñuʼúna, va̱ʼaníka náʼa̱ nama̱ ña̱ íxava̱ʼana ña̱ ndasakáʼnuna ndióxi̱na.
2 Na̱ vatáva* kúúna;
vitin ka̱ʼi̱n ña̱ kúúmiívana ku̱a̱chi.
Koo iin na̱ sandíʼi-xa̱ʼa̱ altar ña̱ kúúmiína xíʼin nama̱ ña̱ xíniñúʼuna ña̱ ndasakáʼnuna ndióxi̱na.
3 Vitin ka̱ʼa̱nna: ‘Kǒo rey kúúmiíndi̱, saáchi va̱ása yíʼvindi̱ xínindi̱ Jehová.
¿Ta ndáaña kivi keʼé iin rey xa̱ʼa̱ndi̱?’.
4 Káʼa̱nna tu̱ʼun ña̱ va̱ása ndáyáʼvi, kéʼéna trato xíʼin inkana ta su̱ví ña̱ ndixaví kúú ña̱ chínaʼána* xa̱ʼa̱;
ña̱ va̱ása nda̱kú ndátiinna ku̱a̱chi íyoña nda̱a̱ táki̱ʼva íyo yu̱ku̱ ña̱ kúúmií veneno ña̱ kána chi̱chi nu̱ú chíʼina.
5 Na̱ ndóo chí Samaria yi̱ʼvína xa̱ʼa̱ ña̱ kundoʼo si̱ndi̱ki̱ loʼo tí ndásakáʼnuna, tí níndichi chí Bet-Aven.
Na̱ ñuu kán kusuchíní-inina xa̱ʼa̱rí;
kusuchínítu-ini na̱ kúú su̱tu̱ ndióxi̱ na̱ inka ñuu (saáchi na̱yóʼo xi̱kusi̱íní-inina xíʼin tí si̱ndi̱ki̱ loʼo yóʼo ta xi̱ndayáʼvinírí nu̱úna),
saáchi ndakiʼinnarí ku̱ʼu̱n xíʼinna inka ñuu, xíkáva̱ʼa kuniʼinarí ku̱ʼu̱n xíʼinna.
6 Kuniʼinarí ku̱ʼu̱n xíʼinna chí Asiria ña̱ va̱ʼa saníʼi̱narí iin ta̱ rey.
Na̱ ñuu ta̱ Efraín kukaʼan nu̱úna xa̱ʼa̱ consejo ña̱ xi̱ndiku̱nna
ta saátu na̱ ñuu Israel kukaʼanní nu̱úna.
7 Na̱ ñuu Samaria xíʼin ta̱ kúú rey nu̱úna, ndiʼi-xa̱ʼa̱vana,
nda̱a̱ táki̱ʼva ndóʼo iin ndaʼa̱ loʼo yitu̱n ña̱ xáʼndana ta sákananaña nu̱ú ti̱kui̱í.
8 Ndiʼi nu̱ú xi̱ndasakáʼnuna ndióxi̱na* ña̱ ni̱xi̱yo chí Bet-Aven, ña̱ sa̱kíʼvi na̱ ñuu Israel ku̱a̱chi, ndiʼi-xa̱ʼa̱vaña.
Nina tú iñú kuaʼnu nu̱ú altarna.
Na̱ yiví kixáʼana ka̱ʼa̱nna xíʼin yuku̱ ‘Ndakasindó sa̱tándi̱’,
ta ka̱ʼa̱nna xíʼin xi̱kí ‘Ko̱yondó sa̱tándi̱’.
9 Ki̱vi̱ tá ku̱u tu̱ndóʼo chí Guibeá ni̱ki̱ʼvi ndóʼó na̱ ñuu Israel ku̱a̱chi.
Na̱ ñuu yóʼo ndákundeéna kíʼvina táʼan ku̱a̱chi yóʼo.
Tá ni̱xi̱yo ku̱a̱chi chí Guibeá, va̱ása níxi̱ʼi̱ ndiʼiví na̱ ke̱ʼé ña̱ va̱ása va̱ʼa.
10 Ama kúú ña̱ va̱ʼa túvi miíi̱, saá kúú ña̱ taxii̱ castigo ndaʼa̱na.
Ta ndakutáʼan ku̱a̱ʼání na̱ ñuu kanitáʼanna xíʼinna tá ná ndachindósona u̱vi̱ saá ku̱a̱china si̱kína.*
11 Na̱ ñuu ta̱ Efraín ni̱xi̱yona nda̱a̱ táki̱ʼva íyo iin si̱ndi̱ki̱ loʼo tí va̱ʼaní sa̱kúaʼa sákuachi trigo ta xi̱kutóonírí keʼérí ña̱yóʼo;
xa̱ʼa̱ ña̱kán kúú ña̱ va̱ása níchinúi̱ yókó* si̱kí loʼorí.
Soo vitin taxii̱ ña̱ ná koo iin na̱ kosorí.*
Ta̱ Judá kúú ta̱ taʼví; ta̱ Jacob kúú ta̱ ndaya̱kún nu̱ú ñuʼú.
12 Íyokava tiempo ña̱ va̱ʼa nandukúndó Jehová.
Xa̱ʼa̱ ña̱kán nu̱ú iin ñuʼú va̱ʼa taʼvíndó ta chiʼindó.
Si̱ʼva̱ ña̱ chiʼindó nu̱ú ña̱yóʼo kúú ña̱ nda̱kúní koo ña̱ keʼéndó,
ta ña̱ sakéendó* kúú ña̱ ndixaní kuʼvi̱-ini* Ndióxi̱ kunira ndóʼó.
Tasaá kixi Ndióxi̱ ta sanáʼa̱ra ndóʼó ña̱ keʼéndó ña̱ va̱ʼa.
13 Soo ndóʼó chi̱ʼindó ña̱ va̱ása va̱ʼa,
ña̱kán ña̱ va̱ása va̱ʼa kúú ña̱ sa̱kéevandó
ta vitin xa̱a̱ kíʼinndó kuenta ndáaña kúú ña̱ ndóʼondó xa̱ʼa̱ ña̱ va̱ása nda̱kú níxi̱yo inindó;
saáchi ndáaníka-inindó ki̱ʼva ña̱ kéʼé miíndó ña̱ʼa
ta saátu ndáaní-inindó ndiʼi na̱ soldado na̱ kúúmiíndó.
14 Nda̱ʼyi̱ kóʼóna* tá ná kixina kanitáʼanna xíʼin na̱ ñuundó,
ta ndiʼi ñuu ña̱ kútu̱ní ndási ña̱ kúúmiíndó ndiʼi-xa̱ʼa̱ ndiʼiña,
nda̱a̱ táki̱ʼva ke̱ʼé ta̱ Salmán tá sa̱ndíʼi-xa̱ʼa̱ra veʼe ta̱ Arbel ki̱vi̱ tá ni̱xi̱yo ku̱a̱chi,
tá sa̱kúachi válína ná ñaʼá xíʼin na̱ va̱lí se̱ʼená.
15 Ña̱yóʼo kúú ña̱ keʼéna xíʼin yóʼó ñuu Betel, xa̱ʼa̱ ña̱ va̱ása va̱ʼa kéʼún.
Tá ná tu̱vi, ta̱ kaʼnína kúúva ta̱ rey ñuu Israel”.
11 “Tá ni̱xi̱yo loʼo ta̱ Israel, ni̱kuʼvi̱ní-inii̱ xi̱nii̱ra,
ta ka̱nai̱ se̱ʼi̱ ña̱ va̱ʼa kitara chí Egipto.
2 Tá xi̱kaʼa̱nka na̱kán* xíʼin na̱ israelita,
na̱ israelita xi̱ndakundeéna xi̱kuxíkána nu̱úna.
Tuku ta tuku xi̱sokóna ña̱ʼa nu̱ú* ña̱ Baal ña̱ xi̱ndasakáʼnuna
ta xi̱sokótuna ña̱ʼa nu̱ú ndióxi̱ ña̱ i̱xava̱ʼana ndasakáʼnuna.
3 Soo yi̱ʼi̱ kúú ta̱ sa̱náʼa̱ na̱ ñuu ta̱ Efraín ña̱ kakana ta yi̱ʼi̱tu kúú ta̱ nda̱numindaana;
soo kǒo níndakunina ña̱ yi̱ʼi̱ kúú ta̱ sa̱ndáʼa-ñaʼá.
4 Viíkaví nda̱kundeíi̱ ka̱nai̱ na̱ yiví, nda̱a̱ táki̱ʼva íyo ta̱ xi̱niñúʼu iin yoʼo̱ ña̱ va̱ʼa xi̱tái̱na saá ni̱xi̱yoi̱;*
ña̱ kúʼvi̱-inii̱ xínii̱na ni̱xi̱yoña nda̱a̱ táki̱ʼva íyo iin yoʼo̱ ña̱ xi̱niñúʼi̱ ña̱ va̱ʼa kuniʼii̱ yichi̱ nu̱úna ta sakúyatii̱nna nu̱úi̱.
Va̱ʼaní ni̱xi̱yo inii̱ xíʼinna ta xi̱taxii̱ ña̱ xi̱xixi iin tá iinna.
5 Va̱ása ndikókana chí Egipto, soo na̱ ñuu Asiria kúú na̱ kaʼndachíñu nu̱úna,
saáchi kǒo níxiinna ndikóna nu̱úi̱.
6 Na̱ sáa̱-ini xíniñaʼá ku̱ʼu̱nna sandíʼi-xa̱ʼa̱na ñuuna,
sandíʼi-xa̱ʼa̱ ndiʼina ña̱ʼa* ña̱ ndási yéʼéna
ta sandíʼi-xa̱ʼa̱naña chi va̱ása va̱ʼa íyo ña̱ nda̱kanixi̱nína keʼéna.
7 Na̱ ñui̱ chi̱kaa̱-inina ña̱ va̱ása nda̱kú koo inina xíʼi̱n.
Ni ka̱nanana ña̱ ndikóna nu̱úi̱, nda̱a̱ ni iinna kǒo níkeʼé ña̱yóʼo.
8 Va̱ása kiviví sandákoondaʼíi̱ yóʼó Efraín.
Kǒo kiviví ndataxii̱ yóʼó ndaʼa̱ inkana, Israel.
Va̱ása kiviví keʼíi̱ xíʼún nda̱a̱ táki̱ʼva ke̱ʼíi̱ xíʼin na̱ xi̱ndoo chí Admá.
Kǒo kiviví keʼíi̱ xíʼún nda̱a̱ táki̱ʼva ke̱ʼíi̱ xíʼin na̱ xi̱ndoo chí Zeboyim.
Xa̱a̱ na̱samavai̱ ña̱ ndákanixi̱níi̱;
ta ki̱xáʼíi̱ kúndáʼvi-inii̱ xínii̱ ndóʼó.
9 Ña̱ sái̱ íyoña nda̱a̱ táki̱ʼva íyo ñuʼu̱ ña̱ xíxi̱ soo va̱ása chindaʼávíi̱ ña̱yóʼo nu̱úndó.
Va̱ása sandíʼi-xa̱ʼa̱ tukui̱ ndóʼó na̱ ñuu ta̱ Efraín,
saáchi yi̱ʼi̱ su̱ví iin na̱ yiví kúi̱ chi Ndióxi̱va kúi̱,
yi̱ʼi̱ kúú Ndióxi̱ ta̱ yi̱i̱ ta̱ íyo xíʼinndó;
va̱ása taxivíi̱ castigo ndaʼa̱ndó xa̱ʼa̱ ña̱ sái̱ xíʼinndó.
10 Kundiku̱nna kakana sa̱tá Jehová, ta ta̱yóʼo nda̱ʼyi̱ra nda̱a̱ táki̱ʼva kéʼé iin ndikaʼa;*
tá ná nda̱ʼyi̱ra, na̱ se̱ʼera nda̱a̱ kisina kixina chí nu̱ú kíʼvi ñu̱ʼu.*
11 Tá ná keena chí Egipto, kisina nda̱a̱ táki̱ʼva kísi iin saa;
tá ná keena chí nu̱ú ñuʼú na̱ ñuu Asiria, keʼéna nda̱a̱ táki̱ʼva kéʼé iin tí paloma;
ta taxii̱ ña̱ ná kundoona veʼena”, káchi Jehová.
12 “Na̱ ñuu ta̱ Efraín nina ña̱ vatá* káʼa̱nna;
nda̱a̱ ndáaka nu̱ú ndákotoi̱, nina na̱ sándaʼvi kúú na̱ ñuu Israel.
Soo na̱ ñuu Judá ndákundeékavana kítáʼanna xíʼin Ndióxi̱,
ta nda̱kúní-inina xíʼin Ndióxi̱ ta̱ yi̱i̱”.
12 “Na̱ ñuu ta̱ Efraín ndáaní-inina ña̱ʼa ña̱ va̱ása ndáyáʼvi.
Iníí ki̱vi̱ xíkana táxínna ta̱chí ña̱ va̱xi chí nu̱ú kíta ñu̱ʼu.*
Ndákundeéna káʼa̱nna ña̱ vatá* ta kéʼéna ña̱ va̱ása va̱ʼa.
Kéʼéna iin trato xíʼin na̱ ñuu Asiria ta níʼina aceite ku̱a̱ʼa̱n xíʼinna chí Egipto.
2 Jehová ndatiinra ku̱a̱chi xíʼin ta̱ Judá;
ta̱ Jacob chaʼvira xa̱ʼa̱ ña̱ ke̱ʼéra;
nda̱a̱ táki̱ʼva íyo mií ña̱ ke̱ʼéna saá koo ña̱ ndakiʼinna.
3 Tá ndíkaa̱ra ti̱xin siʼíra, ti̱inra si̱ʼndi̱-xa̱ʼa̱ ñanira.
Ta xíʼin ndiʼi ndee̱ra ka̱nitáʼanra xíʼin Ndióxi̱.
4 Ndeéní ka̱nitáʼanra xíʼin iin ángel ta ku̱chiñuvara xíʼinra.
Xa̱kura ta ni̱ka̱ʼa̱n-ndáʼvira xíʼinra ña̱ ná taxira bendición ndaʼa̱ra”.
Ta̱kán* nda̱ni̱ʼírara chí Betel, ta kán ni̱ka̱ʼa̱nra xíʼinndi̱.
5 Jehová Ndióxi̱ ta̱ xáʼndachíñu nu̱ú na̱ ángel;
ndákaʼánna xa̱ʼa̱ra ña̱ naníra Jehová.
6 “Xa̱ʼa̱ ña̱kán ndikó nu̱ú Ndióxi̱ún,
na̱ʼa̱ ña̱ ndixaní kúʼvi̱-iniún* xíniúnra* ta keʼé ña̱ nda̱kú,
ta ndiʼi tiempo kundaaní-iniún Ndióxi̱ún.
7 Soo na̱ íxi̱íko* ña̱ʼa va̱ása vií xíniñúʼuna balanza ña̱ kátana ña̱ʼa ña̱ íxi̱íkona, chi kútóonína sandáʼvina.
8 Na̱ ñuu ta̱ Efraín nina káʼa̱nna: ‘Mií ña̱ nda̱a̱ ndu̱kúikánívai̱ vitin;
ku̱a̱ʼání ña̱ ku̱i̱ká nda̱ni̱ʼíi̱.
Ta ti̱xin ndiʼi chiñu ña̱ kúúmiíi̱ va̱ása ndani̱ʼína ni iin ña̱ va̱ása va̱ʼa kéʼíi̱ ta kǒo ni iin ku̱a̱chi kíʼvii̱’.
9 Nani tá xi̱ndoo na̱ ñuu Israel chí ñuu Egipto xa̱a̱ saáví kúi̱ Jehová Ndióxi̱ndó.
Xa̱ʼa̱ ña̱kán kúú ña̱ taxii̱ ña̱ ná ndikóndó kundoondó ini veʼe válí
nda̱a̱ táki̱ʼva xa̱a̱ xi̱ndoondó iniña tiempo ña̱ nda̱kaxin miíi̱.*
10 Ni̱ka̱ʼi̱n xíʼin na̱ profeta,
ta̱xii̱ ña̱ ná kunina ku̱a̱ʼání visión
ta xi̱niñúʼi̱ na̱ profeta ña̱ ná ka̱ʼa̱nna xa̱ʼa̱ ilustración xíʼinndó.
11 Chí Galaad ke̱ʼéna magia ta ni̱ka̱ʼa̱nna ña̱ vatá.
Chí Guilgal ni̱so̱kóna* si̱ndi̱ki̱ che̱e
ta altar ña̱ i̱xava̱ʼana íyoña nda̱a̱ táki̱ʼva íyo iin koʼndo yu̱u̱ ña̱ ndóo chi̱chi nu̱ú chíʼina.
12 Ta̱ Jacob xi̱nura ku̱a̱ʼa̱nra chí nu̱ú ñuʼú ña̱ íyo chí Aram;*
ta kán kúú nu̱ú ka̱chíñu ta̱ Israel ña̱ va̱ʼa ni̱ʼíra ñá síʼira,
ta xa̱ʼa̱ ñá síʼira xi̱ndaara ndikachi.*
13 Jehová xi̱niñúʼura iin profeta ña̱ va̱ʼa tavára na̱ ñuu Israel chí Egipto,
ta xi̱niñúʼura iin profeta ña̱ va̱ʼa kundaarana.
14 Ta̱ Efraín sa̱xóʼvi̱níra* ini Ndióxi̱;
miíra kúúmií ku̱a̱chi xa̱ʼa̱ ni̱i̱ ndiʼi na̱ xa̱ʼníra;
taxi Ndióxi̱ra* castigo ndaʼa̱ra chi kǒo ní ixato̱ʼórara”.
13 “Tá xi̱kaʼa̱n ta̱ Efraín, na̱ yiví xi̱kisina;
ta̱kán xi̱ndayáʼviníra chí Israel.
Soo xa̱ʼa̱ ña̱ nda̱sakáʼnura ña̱ Baal, ni̱ki̱ʼvira ku̱a̱chi ta ni̱xi̱ʼi̱vara.
2 Soo vitin ndeéníka kíʼvina ku̱a̱chi
ta xíʼin plata ña̱ kúúmiína íxava̱ʼana ndióxi̱ ña̱ ka̱a ña̱ ndasakáʼnuna;
xíni̱kavína keʼéna ndióxi̱ ña̱ ndasakáʼnuna, ndiʼi ña̱yóʼo na̱ yivíva kúú na̱ íxava̱ʼaña.
Ta káchina: ‘Ndiʼi na̱ ta̱a na̱ sóko̱ ña̱ʼa* ná chitóna* tí si̱ndi̱ki̱ válí’.
3 Xa̱ʼa̱ ña̱kán, xa̱a̱na koona nda̱a̱ táki̱ʼva íyo vi̱kónúu* ña̱ íyo tá xi̱ta̱a̱n,*
nda̱a̱ táki̱ʼva íyo yúyú ña̱ kamaní yíchi̱ tá xi̱ta̱a̱n,
nda̱a̱ táki̱ʼva íyo xe̱ʼe̱* ña̱ ndóo nu̱ú ndátivina trigo ña̱ ndáchí ku̱a̱ʼa̱n xíʼin ta̱chí
ta saátu nda̱a̱ táki̱ʼva íyo yi̱ʼma̱ ña̱ kána chí xi̱ní veʼe.
4 Nani tá xi̱ndoo na̱ ñuu Israel chí ñuu Egipto xa̱a̱ saáví kúi̱ Jehová Ndióxi̱ndó;
kǒo inka Ndióxi̱ níxi̱xini̱ún chi iinlá yi̱ʼi̱va xi̱xini̱ún,
yi̱ʼi̱ kúú ta̱ sa̱kǎku yóʼó ta kǒoka inka na̱ kivi sakǎku yóʼó.
5 Xi̱nitáʼi̱n xíʼún chí nu̱ú ñuʼú yi̱chí, chí nu̱ú kǒo sa̱vi̱ kúun.
6 Na̱kán xi̱kusi̱íní-inina xa̱ʼa̱ ña̱ ni̱xi̱yo ku̱a̱ʼání ña̱ʼa ña̱ kuxuna,
ta xa̱ʼa̱ ña̱ xi̱kusi̱í-inina, níma̱na ki̱xáʼaña ni̱nuní kúniña.
Xa̱ʼa̱ ña̱kán na̱ndóso-inina xa̱ʼíi̱.
7 Xa̱i̱ koi̱ nda̱a̱ táki̱ʼva íyo iin ndikaʼa* tí yúta̱* nu̱ú na̱kán,
xa̱i̱ koi̱ nda̱a̱ táki̱ʼva íyo iin leopardo tí xíka xítona̱ní* chí yichi̱.
8 Ku̱ʼi̱n tii̱nna nda̱a̱ táki̱ʼva kéʼé iin oso síʼi tí nda̱ñúʼu se̱ʼe válí ta ndatái̱ kándíkana.
Kokói̱na nda̱a̱ táki̱ʼva kéʼé iin tí ndikaʼa;
iin kití yukú sakúachi válírína.
9 Tíyóʼo sandíʼi-xa̱ʼa̱rí yóʼó Israel,
saáchi ndu̱ún contra xíʼin yi̱ʼi̱, ta̱ kivi chindeétáʼan xíʼún.
10 ¿Á ndákaʼún tá ni̱ka̱ʼún xíʼi̱n ‘Taxi ná kuumiíi̱ iin rey xíʼin na̱ kuumií chiñu ña̱ ndáyáʼvi’?
¿Ndáa míí ku̱a̱ʼa̱n ta̱ kúú rey nu̱ún? ¿Ndáa míí ku̱a̱ʼa̱n na̱ xáʼndachíñu nu̱ún?
Taxi ná kixina ta ná sakǎkuna ndiʼi ñuu ña̱ kúúmiíún.
11 Tá ni̱sa̱a̱níi̱ ta̱xii̱ ña̱ ná kuumiíún iin rey,
ta xa̱ʼa̱ ña̱ sáa̱níi̱ kindai̱ra ndaʼún.
12 Kǒo nandóso-inii̱ xa̱ʼa̱ ña̱ va̱ása va̱ʼa ke̱ʼé ta̱ Efraín;
ndiʼi ku̱a̱chi ña̱ ni̱ki̱ʼvira viíní ñúʼu-va̱ʼaña.
13 Xo̱ʼvi̱vara* nda̱a̱ táki̱ʼva xóʼvi̱ iin ñaʼá ñá káku se̱ʼe.
Soo iin ta̱ loʼo kíʼvíva kúúra:
tá xa̱a̱ kíxaa̱ tiempo ña̱ kakura, va̱ása xíínra kakura.
14 Yi̱ʼi̱ kúú ta̱ sakǎku ndóʼó nu̱ú Ya̱vi̱* nu̱ú ñúʼu na̱ ni̱xi̱ʼi̱ ta saátu nu̱ú ña̱ xíʼi̱ndó.
Yóʼó Ña̱ xáʼní, ¿ndáa míí ku̱a̱ʼa̱n ndee̱ ña̱ kúúmiíún ña̱ sáxo̱ʼvi̱ún na̱ yiví?
Yóʼó Ya̱vi̱ nu̱ú ñúʼu na̱ ni̱xi̱ʼi̱, ¿ndáa míí ku̱a̱ʼa̱n ndee̱ ña̱ kúúmiíún ña̱ sándiʼi-xa̱ʼún?
Soo va̱ása ndi̱ku̱nví kundáʼvi-inii̱ kunii̱ ta̱ Efraín.
15 Ni ná koora nda̱a̱ táki̱ʼva íyo tu̱yo̱ó* tá xáa yitanú,
kixi iin ta̱chí chí nu̱ú kíta ñu̱ʼu,* iin ta̱chí ña̱ chindaʼá mií Jehová;
kixiña chí nu̱ú ñuʼú yi̱chí ta sayíchi̱ ndiʼiña ti̱kui̱í tá ñúʼu ini pozona ta yi̱chi̱ ndiʼi nu̱ú kána ti̱kui̱ína.
Ndakiʼinna ndiʼi ña̱ ku̱i̱ká ña̱ kúúmiíra ku̱ʼu̱n xíʼinna, ndiʼi ña̱ʼa ña̱ ndáyáʼvi ña̱ kúúmiíra.
16 Na̱ ñuu Samaria kúúmiína ku̱a̱chi, saáchi i̱xaso̱ʼona nu̱ú Ndióxi̱.
Kaʼnínana xíʼin espada,
sakúachi válína se̱ʼena
ta ndatána ti̱xin ná ñaʼá ná ñúʼu se̱ʼe”.
14 “Ndóʼó na̱ ñuu Israel, ndikóndó nu̱ú Jehová Ndióxi̱ndó,
saáchi ni̱ko̱yondó* xa̱ʼa̱ ña̱ ke̱ʼéndó ña̱ va̱ása va̱ʼa.
2 Ndikóndó nu̱ú Jehová ta ka̱ʼa̱nndó ña̱yóʼo xíʼinra:
‘Káʼnu koo iniún xa̱ʼa̱ ña̱ va̱ása va̱ʼa ke̱ʼéndi̱ ta ña̱ va̱ʼa ña̱ kéʼéndi̱ kiʼún kuenta xíʼin,
ta tu̱ʼun ña̱ káʼa̱nndi̱ ná kooña nda̱a̱ táki̱ʼva íyo si̱ndi̱ki̱ yúta̱* tí sóko̱ndi̱ nu̱ún.*
3 Na̱ ñuu Asiria va̱ása sakǎkuvína ndi̱ʼi̱.
Va̱ása kosondi̱* kuáyi̱
ta ni va̱ása ndikóndi̱ ka̱ʼa̱nndi̱ ña̱yóʼo xíʼin ña̱ʼa ña̱ i̱xava̱ʼandi̱ “Ndióxi̱ miíndi̱”,
saáchi yóʼóva kúú ta̱ náʼa̱ ña̱ kúndáʼvi-iniún xíniún na̱ ni̱xi̱ʼi̱ yivá’.
4 Sandáʼi̱na ña̱ va̱ʼa nda̱kú tuku koo inina xíʼi̱n.
Xa̱ʼa̱ ña̱ kúni̱ miíi̱ kúú ña̱ kuʼvi̱-inii̱ kunii̱na,
saáchi va̱ása sáa̱kai̱ xíʼinna.
5 Nda̱a̱ táki̱ʼva íyo yúyú saá xa̱i̱ koi̱ nu̱ú na̱ ñuu Israel;
nda̱a̱ táki̱ʼva xáa yita ña̱ lirio saá xa̱a̱na koona
ta koona nda̱a̱ táki̱ʼva íyo yitu̱n tú íyo chí Líbano tú kúnúní ñúʼu ti̱oʼo.*
6 Kuaʼnuna nda̱a̱ táki̱ʼva xáʼnu ndaʼa̱ yitu̱n,
liviní kunaʼa̱na nda̱a̱ táki̱ʼva liviní tú olivo
ta kuxaʼa̱n támina nda̱a̱ táki̱ʼva xáʼa̱n támi chí Líbano.
7 Na̱ ñui̱ xa̱a̱ tukuna kundoona ti̱xin ku̱nda̱tíi̱.*
Chiʼina ku̱a̱ʼání trigo, ta xa̱a̱na koona nda̱a̱ táki̱ʼva íyo ndaʼa̱ válí tú uva tá sa̱kán kánaña.
Va̱ʼaní ka̱ʼa̱nna xa̱ʼíi̱ nda̱a̱ táki̱ʼva va̱ʼaní káʼa̱nna xa̱ʼa̱ vino tá íyo chí Líbano.
8 Ta̱ Efraín ka̱ʼa̱nra: ‘Va̱ása ndásakáʼnukavíi̱ ndióxi̱ vatá’.*
Yi̱ʼi̱ ndakuii̱n yuʼúra ta kundai̱ra.
Xa̱i̱ koi̱ nda̱a̱ táki̱ʼva íyo tú enebro tú ndokoní ndaʼa̱.
Ta ku̱i̱ʼi ña̱ kana ndaʼún, yi̱ʼi̱ kúú ta̱ taxiña”.
9 ¿Ndáana kúú na̱ ndíchi? Ná kunda̱a̱-inina xa̱ʼa̱ ña̱yóʼo.
¿Ndáana kúú na̱ xíni̱ní? Ná kuxini̱na xa̱ʼa̱ ña̱yóʼo.
Saáchi yichi̱ Jehová nda̱kúníña
ta na̱ kéʼé ña̱ nda̱kú kúú na̱ kaka yichi̱ yóʼo,
soo na̱ kíʼvi ku̱a̱chi kachiʼivana* nu̱úña.
Ki̱vi̱ yóʼo ka̱naña ti̱xin ki̱vi̱ Hosaya, ta kúni̱ kachiña ‘ta̱ sa̱kǎku Jah’ á ‘Jah sa̱kǎkura’.
Ña̱ kúni̱ kachi ‘Ndióxi̱ chiʼira iin si̱ʼva̱’.
Inka variante “koxi̱”.
Ña̱ kúni̱ kachi ‘kǒo nína̱ʼa̱ra ña̱ kúndáʼvi-inira xínirana’.
Inka variante “na̱ nánoo ya̱ta̱”, “na̱ kúnuu sa̱ta̱”.
Ña̱ kúni̱ kachi ‘su̱ví na̱ ñui̱ kúúna’.
Koto Oseas 1:9, nota.
Koto Oseas 1:6, nota.
Inka variante “yíchi̱-iniñá”.
Inka variante “yisi̱”.
Inka variante “levo”.
Inka variante “síkeena”.
Inka variante “ku̱niʼnina”, “ku̱a̱ʼnina”.
Inka variante “xi̱taxiñá ña̱ʼa ndaʼa̱”.
Á “anillo”. Inka variante “xeʼé”.
Inka variante “sanúi̱-iniñá”.
Á “Baal miíi̱”.
Inka variante “káñuʼu”.
Inka variante “koxi̱”.
Koto glosario, ña̱ ndixaní kúʼvi̱-ini.
Ña̱ kúni̱ kachi ‘Ndióxi̱ chiʼira iin si̱ʼva̱’.
Koto Oseas 1:6, nota.
Koto Oseas 1:9, nota.
Ña̱yóʼo káʼa̱nña xa̱ʼa̱, ña̱ xi̱xiniñúʼuna ña̱ ndasakáʼnuna ndióxi̱ vatá.
Tu̱ʼun ña̱ ni̱ka̱ʼyi̱ña káchiña “iin homer sava”. Koto apéndice B14.
Inka variante “taxikana”.
Koto glosario, efod.
Koto glosario, terafim.
Koto glosario, ña̱ ndixaní kúʼvi̱-ini.
Inka variante “Ña̱ to̱ʼónva”.
Koto glosario, chinaʼá.
Inka variante “kaki̱ʼi xa̱ʼún”.
Inka variante “ñúú káʼñu”.
Á “sandíʼi-xa̱ʼíi̱”.
Á “Ndiʼi-xa̱ʼa̱”.
Á “xa̱ʼa̱ ña̱ sánáʼa̱”.
Á sana “Nda̱sana ña̱ ndáyáʼviní ña̱ kúúmiíi̱ iin ña̱ kaʼan nu̱ú”.
Ña̱yóʼo káʼa̱nña xa̱ʼa̱, na̱ su̱tu̱.
Ña̱yóʼo káʼa̱nña xa̱ʼa̱, ña̱ ni̱xi̱yo ku̱a̱ʼání ña̱ʼa xi̱xixina xa̱ʼa̱ ña̱ ku̱a̱ʼání ña̱ʼa xi̱sokó na̱ yiví ña̱ va̱ʼa ndoo ku̱a̱china.
Inka variante “chitú ti̱xinna”, “ndaʼa-inina”.
Túyóʼo xi̱kuu yitu̱n tú xi̱xiniñúʼu na̱ ndáku.
Inka variante “Táxina”.
Inka variante “kati̱”, “ndatí”, “ku̱nda̱ʼvi̱”.
Inka variante “levo”.
Inka variante “ítíá”.
Inka variante “yi̱ʼva̱”.
Á “castigo ña̱ ndakiʼinna”.
Inka variante “chise̱ʼéna”.
Inka variante “levo”.
Tu̱ʼun ña̱ ni̱ka̱ʼyi̱ña káchiña “ni̱xa̱a̱na ku̱una yivá na̱ va̱lí na̱ inka ñuu”.
Á sana “iin yo̱o̱ kuití ndiʼi-xa̱ʼa̱na”.
Á “ñuʼúna”.
Á “Guibeah”. Saá va̱xiña iníísaá nu̱ú libro yóʼo. Koto apéndice A2.
Inka variante “Nda̱ʼyi̱ ñoondó”.
Á “Na̱ se̱ʼe ta̱ rey”.
Inka variante “sáʼñú”.
Á “león”.
Inka variante “ítíá”.
Koto glosario, ña̱ ndixaní kúʼvi̱-ini.
Á “ña̱ ndixaní kúʼvi̱-iniún xíniún inkana”.
Inka variante “vi̱ko̱núʼú”.
Inka variante “ñaʼa”.
Koto glosario, ña̱ ndixaní kúʼvi̱-ini.
Á “ña̱ ndixaní kúʼvi̱-inina xínina inkana; ña̱ na̱ʼa̱na ña̱ kúndáʼvi-inina xínina inkana”.
Inka variante “taxina ña̱ʼa ndaʼíi̱”.
Koto glosario, kití tí xi̱sokóna ta xi̱xaʼminarí.
Inka variante “síkeena”.
Á “na̱ se̱ʼe ta̱ rey”.
Tu̱ʼun ña̱ ni̱ka̱ʼyi̱ña káchiña “Ndiʼi na̱yóʼo kíʼvina ku̱a̱chi kini”.
Á “xi̱tu̱n”.
Á sana “Saáchi níma̱na íyoña nda̱a̱ táki̱ʼva íyo iin horno ña̱ niʼníní tá kúyatinna xíʼin ña̱ va̱ása va̱ʼa ñúʼu níma̱na”.
Inka variante “ndikóniʼina”.
Inka variante “Yisi̱”.
Inka variante “yi̱ʼva̱i̱”.
Tu̱ʼun ña̱ ni̱ka̱ʼyi̱ña káchiña “nda̱sandakúi̱ ndaʼa̱na”.
Ña̱yóʼo káʼa̱nña xa̱ʼa̱, ña̱ va̱ása níkeʼénaña ña̱ va̱ʼa viíka ndasakáʼnuna Ndióxi̱.
Inka variante “káʼa̱nválína”, “káʼa̱n-yuʼu̱na”.
Á “águila”. Inka variante “síʼñá”.
Inka variante “ndoʼo-inina”.
Inka variante “Táxina kití ndaʼíi̱”.
Á sana “Ndikóna”.
Á “Xa̱ʼa̱ ña̱ ni̱ki̱ʼviún ku̱a̱chi kini”.
Á “kúʼnína”. Inka variante “xíniʼnina”, “xáʼnina”.
Koto glosario, ña̱ yaku̱a̱.
Inka variante “taxikandó vino ndaʼa̱”.
Á “ki̱vi̱ ña̱ kuumiíndó vikó”.
Á “ndióxi̱ ña̱ sákukaʼan nu̱úna”.
Inka variante “ita”, “itia”, “yi̱ku̱”.
Inka variante “yoʼo̱”.
Á sana “tú xa̱ʼnuní”.
Inka variante “Na̱ to̱ʼónva”.
Koto glosario, chinaʼá.
Tu̱ʼun ña̱ ni̱ka̱ʼyi̱ña káchiña “lugar ña̱ súkun”. Koto glosario, lugar ña̱ súkun.
Ña̱yóʼo káʼa̱nña xa̱ʼa̱, tá ná ndakiʼinna castigo nda̱a̱ táki̱ʼva íyo ña̱ chinúuna yókó si̱kína saá kooña. Inka variante “kási̱kína”, “xa̱síkina”.
Inka variante “íku”, “yúkú”.
Inka variante “kuyósórí”, “kondóso ya̱ta̱rí”.
Inka variante “sikéendó”.
Koto glosario, ña̱ ndixaní kúʼvi̱-ini.
Inka variante “Nda̱ʼyi̱ ñoona”.
Ña̱yóʼo káʼa̱nña xa̱ʼa̱, na̱ profeta xíʼin inkaka na̱ yiví na̱ chi̱ndaʼá Ndióxi̱ ña̱ va̱ʼa sanáʼa̱na na̱ ñuu Israel.
Inka variante “xi̱taxina ña̱ʼa ndaʼa̱”.
Sana chítáʼanña ña̱yóʼo xíʼin yoʼo̱ ña̱ xi̱xiniñúʼu na̱ íyo se̱ʼe ña̱ va̱ʼa sanáʼa̱na na̱ va̱lí se̱ʼena ña̱ kakana.
Inka variante “íku”, “yúkú”.
Inka variante “kási̱kína”, “xa̱síkina”.
Ña̱yóʼo xi̱kuuña iin yitu̱n káni̱ á iin ka̱a ña̱ káni̱ ña̱ xi̱chikaa̱na sa̱tá yéʼé ñuuna tasaá va̱ása ku̱náña.
Á “león”.
Inka variante “ña̱ ka̱ndii”.
Inka variante “ña̱ to̱ʼón”.
Inka variante “ña̱ ka̱ndii”.
Inka variante “ña̱ to̱ʼón”.
Ña̱yóʼo káʼa̱nña xa̱ʼa̱, Ndióxi̱.
Koto glosario, ña̱ ndixaní kúʼvi̱-ini.
Á “ña̱ ndixaní kúʼvi̱-iniún xíniún inkana”.
Inka variante “síkó”.
Á sana “ki̱vi̱ ña̱ kúúmiíndó vikó”.
Inka variante “ta̱xina”.
Á “Siria”.
Inka variante “levo”.
Inka variante “sa̱ndóʼora”.
Tu̱ʼun ña̱ ni̱ka̱ʼyi̱ña káchiña “tátara”.
Inka variante “táxi ña̱ʼa”.
Á “taxina beso”. Inka variante “tuviyuʼúna”.
Inka variante “vi̱ko̱núʼú”.
Inka variante “ñaʼa”.
Inka variante “mi̱ʼí”.
Á “león”.
Inka variante “ítíá”.
Inka variante “xítose̱ʼé”, “xítoniʼnivíxí”.
Inka variante “Ndoʼova-inira”.
Á “Seol”. Ña̱yóʼo káʼa̱nña xa̱ʼa̱, nu̱ú ñúʼu na̱ ni̱xi̱ʼi̱ ta iin ña̱ náʼa̱ kuitíva kúúña. Koto glosario, ya̱vi̱ nu̱ú ñúʼu na̱ ni̱xi̱ʼi̱. Inka variante “Ñáñá”, “Ka̱ká”.
Koto glosario, tu̱yo̱ó.
Inka variante “ña̱ ka̱ndii”.
Á “ka̱chiʼindó”.
Inka variante “ítíá”.
Inka variante “táxindi̱ ndaʼún”.
Inka variante “kuyósóndi̱” “kondósondi̱ ya̱ta̱”.
Inka variante “yoʼo̱”.
Ña̱yóʼo sana káʼa̱nña xa̱ʼa̱, ku̱nda̱ti̱ Ndióxi̱. Inka variante “katíi̱”, “ndatíi̱”, “ku̱nda̱ʼvíi̱”.
Inka variante “to̱ʼón”.
Inka variante “kaki̱ʼiva xa̱ʼa̱na”.