JONÁS

1 Jehová ni̱ka̱ʼa̱nra tu̱ʼun yóʼo xíʼin ta̱ Jonás* se̱ʼe ta̱ Amitái: 2 “Kúáʼan iin ñuu ña̱ káʼnuní ña̱ naní Nínive, ta ka̱ʼún xíʼin na̱ ndóo kán ña̱ sandíʼi-xa̱ʼíi̱na, saáchi xa̱a̱ xi̱nii̱ ña̱ kininí kéʼéna”.

3 Soo ta̱ Jonás xi̱nura nu̱ú Jehová ta nda̱kiʼinra ku̱a̱ʼa̱nra chí Tarsis, ña̱kán ni̱xa̱ʼa̱nra chí Jope ta kán nda̱ni̱ʼíra iin barco tú ku̱a̱ʼa̱n chí Tarsis. Cha̱ʼvira ta nda̱ara tú barco yóʼo, ta nda̱kiʼinra ku̱a̱ʼa̱nra xíʼin na̱ yiví na̱ ku̱a̱ʼa̱n chí ñuu kán, tasaá va̱ása keʼéra ña̱ ni̱ka̱ʼa̱n Jehová xíʼinra.

4 Tasaá Jehová chi̱ndaʼára iin ta̱chí ña̱ ndeéní nu̱ú tá mar, ta ndeéní ki̱xáʼa kúun sa̱vi̱, ta nda̱a̱ xi̱kuni̱ kuachi válí tú barco kán. 5 Ta na̱ káchíñu ini tú barco ni̱yi̱ʼvínína, ta iin tá iinna ki̱xáʼana káʼa̱nna xíʼin ndióxi̱na ña̱ ná chindeétáʼanna xíʼinna. Tasaá ki̱xáʼana xátana ña̱ʼa ña̱ kúúmiína ña̱ va̱ʼa va̱ása ve̱eka koo tú barco kán. Soo ta̱ Jonás nu̱ura chí ini tú barco ta kán nda̱kandúʼura* ta ni̱ki̱si̱ra. 6 Ta̱ ndísochíñu xíʼin tú barco ku̱yatinra nu̱úra ta ni̱ka̱ʼa̱nra xíʼinra: “¿Nda̱chun kísi̱níún? Ndako̱o ta ka̱ʼa̱n xíʼin ndióxi̱ún. Chi sana kundáʼvi-ini Ndióxi̱ ta̱ nda̱a̱ kunira miíyó tasaá va̱ása kuviyó”.

7 Tasaá ni̱ka̱ʼa̱n xíʼin táʼanna: “Ná chikaa̱yó suerte* ña̱ va̱ʼa kunda̱a̱-iniyó ndáana kúúmií ku̱a̱chi xa̱ʼa̱ ña̱ ndóʼoyó yóʼo”. Tasaá chi̱kaa̱na suerte ta ku̱ndaa̱-inina ña̱ ta̱ Jonás kúú ta̱ kúúmií ku̱a̱chi. 8 Ta ni̱ka̱ʼa̱nna xíʼinra: “Ixaún ña̱ ma̱ní, ka̱ʼa̱n xíʼinndi̱, ¿ndáana kúúmií ku̱a̱chi xa̱ʼa̱ tu̱ndóʼo ña̱ ndóʼoyó vitin? ¿Ndáa chiñu kéʼún? ¿Ndáa míí ki̱xiún? ¿Ndáa ñuu ke̱ún ta ndáa tribu kúún?”.

9 Ta nda̱kuiinra yuʼúna: “Ta̱ hebreo* kúi̱, ta ndásakáʼnui̱ Jehová, Ndióxi̱ ta̱ íyo chí ndiví, ta̱ i̱xava̱ʼa ñuʼú xíʼin mar”.

10 Ta xa̱ʼa̱ ña̱yóʼo, ndeéníka ni̱yi̱ʼví na̱ ta̱a yóʼo ta ni̱nda̱ka̱tu̱ʼunnara: “¿Nda̱chun ke̱ʼún ña̱yóʼo?”. (Saáchi na̱ ta̱a yóʼo xa̱a̱ xi̱kunda̱a̱va-inina ña̱ xínura nu̱ú Jehová, chi xa̱a̱ na̱túʼunvara xíʼinna). 11 Tasaá ni̱ka̱ʼa̱nna xíʼinra: “¿Ndáaña xíniñúʼu keʼéndi̱ xíʼún ña̱ va̱ʼa ya̱a̱ tá mar yóʼo?”. Saáchi ndeéníka ki̱xáʼa kánda̱ nu̱úrá. 12 Saá ni̱ka̱ʼa̱nra xíʼinna: “Sakánandó yi̱ʼi̱ ini tá mar tasaá ya̱a̱rá, saáchi ku̱a̱chi yi̱ʼi̱ kúú ña̱ ki̱xáʼa ndeéní kúun sa̱vi̱ yóʼo”. 13 Soo na̱ ta̱a yóʼo chi̱kaa̱nína ndee̱ ña̱ ya̱ʼana nu̱ú sa̱vi̱ yóʼo tasaá xa̱a̱na xíʼin tú barco nda̱a̱ nu̱ú ñuʼú yi̱chí, soo kǒo níkuchiñuna ya̱ʼana saáchi ndeéníka ki̱xáʼa kánda̱ nu̱ú tá mar.

14 Tasaá ki̱xáʼana káʼa̱nna xíʼin Jehová: “Jehová, káʼa̱n-ndáʼvindi̱ xíʼún, va̱ása taxiún kuvindi̱ xa̱ʼa̱ ña̱ ke̱ʼé ta̱ ta̱a yóʼo. Jehová, ta̱ ta̱a yóʼo kǒo ku̱a̱chi kúúmiíra xa̱ʼa̱ ña̱kán tá ná kuvira va̱ása chika̱ún ku̱a̱chi ndi̱ʼi̱, saáchi ña̱ kúni̱ miíún kéʼéndi̱”. 15 Tasaá ti̱inna ta̱ Jonás ta sa̱kánanara ini tá mar ta ni̱ya̱a̱vará. 16 Xa̱ʼa̱ ña̱yóʼo, na̱ ta̱a yóʼo ki̱xáʼana íxato̱ʼónína Jehová ta xa̱ʼnína iin kití ta ni̱so̱kónarí nu̱ú* Jehová, ta ki̱ndoona ña̱ kachíñuna nu̱úra.

17 Tasaá Jehová chi̱ndaʼára iin ti̱a̱ká káʼnu ta ko̱kórí ta̱ Jonás, ta u̱ni̱ ki̱vi̱ xíʼin u̱ni̱ ñuú xi̱ndikaa̱ ta̱ Jonás ti̱xin tíyóʼo.

2 Tasaá tá ndíkaa̱ ta̱ Jonás ini ti̱a̱ká ni̱ka̱ʼa̱nra xíʼin Jehová Ndióxi̱ 2 ta ka̱chira:

“Tá xóʼvi̱níi̱* ni̱ka̱ʼi̱n xíʼún Jehová, ta nda̱kuiinvaún yuʼíi̱.

Tá xa̱a̱ ku̱yatin kuvii̱* xákui̱ ni̱ka̱ʼi̱n xíʼún ña̱ chindeétáʼún xíʼi̱n.

Ta xi̱niso̱ʼún ña̱ ni̱ka̱ʼi̱n xíʼún.

 4 Ta ka̱chii̱: ‘Xíkáníva íyoi̱ nu̱ún vitin.

¿Amaví ndikó tukui̱ kotoi̱ templo nu̱ú ndásakáʼnui̱ yóʼó?’.

Ta yu̱ku̱* ña̱ íyo inirá ni̱suku̱ndaaña xi̱níi̱.*

 6 Nda̱a̱ nu̱ú kúnú tá mar* ni̱xa̱i̱.

Ta nda̱kanixi̱níi̱ ña̱ ndíka̱i̱ ini ya̱vi̱ nu̱ú ndúxu̱nna, ta kǒo kívika kitai̱.

Soo miíún Jehová Ndióxi̱ miíi̱, sa̱kǎkún yi̱ʼi̱, saáchi nda̱taváún yi̱ʼi̱ ini ya̱vi̱.

 7 Tá xa̱a̱ ku̱yatin kuvii̱, nda̱kaʼíi̱n xa̱ʼún Jehová.

Ta xi̱niso̱ʼún ña̱ ni̱ka̱ʼi̱n, chi nda̱a̱ templo nu̱ú íyoún ni̱xa̱a̱ tu̱ʼun ña̱ ni̱ka̱ʼi̱n.

 8 Na̱ ndásakáʼnu ndióxi̱ ña̱ va̱ása táku, sa̱ndákoona Ndióxi̱ ta̱ ndixaní kúʼvi̱-ini xíni miína.

 9 Soo yi̱ʼi̱ taxii̱ tíxa̱ʼvi ndaʼún, ta so̱kói̱ kití nu̱ún.*

Ña̱ ki̱ndoi̱ keʼíi̱ nu̱ún saxínui̱ña.

Yóʼó Jehová kúú ta̱ sáka̱ku yi̱ʼi̱”.

10 Tándi̱ʼi, Jehová ni̱ka̱ʼa̱nra xíʼin tí ti̱a̱ká ña̱ ná nduxanrí ta̱ Jonás nu̱ú ñuʼú, tasaá ke̱ʼévarí.

3 Tasaá tuku ni̱ka̱ʼa̱n Jehová xíʼin ta̱ Jonás ta ka̱chira: 2 “Kúáʼan iin ñuu ña̱ káʼnuní ña̱ naní Nínive, ta natúʼún xíʼinna xa̱ʼa̱ ña̱ ka̱ʼi̱n xíʼún”.

3 Tasaá ke̱ʼé ta̱ Jonás ña̱ ni̱ka̱ʼa̱n Jehová xíʼinra ta nda̱kiʼinra ku̱a̱ʼa̱nra chí Nínive. Soo ñuu Nínive, iin ñuu ña̱ káʼnuní xi̱kuuña; saáchi u̱ni̱ví ki̱vi̱ xi̱niñúʼu kaka xáʼána ña̱ va̱ʼa ka̱va̱ níína sa̱tá ñuu yóʼo. 4 Tasaá, ta̱ Jonás ni̱ki̱ʼvira ñuu yóʼo ta iníí ki̱vi̱ ni̱xi̱kara; ta xi̱kaʼa̱nra ña̱yóʼo: “Ndáa 40 kuití ki̱vi̱ kúma̱ní ta ndiʼi-xa̱ʼa̱ ñuu Nínive”.

10 Tá xi̱ni Ndióxi̱ ta̱ nda̱a̱ ña̱ sa̱ndákoo na̱ ñuu Nínive ña̱ va̱ása va̱ʼa xi̱keʼéna, na̱samara ña̱ nda̱kanixi̱níra keʼéra xíʼinna ta kǒo níchindaʼákara tu̱ndóʼo nu̱úna.

4 Ta ni̱sa̱a̱ní ta̱ Jonás, saáchi ni loʼo va̱ása níkutóora ña̱yóʼo. 2 Ña̱kán ni̱ka̱ʼa̱nra ña̱yóʼo xíʼin Jehová: “Ay Jehová, ña̱yóʼo nda̱kanixi̱níi̱ kuu tá íyoi̱ veʼi̱. Xa̱ʼa̱ ña̱kán kúú ña̱ xi̱nui̱ ni̱xa̱ʼi̱n chí Tarsis, saáchi kúnda̱a̱-inii̱ ña̱ kúún iin Ndióxi̱ ta̱ va̱ʼaní-ini xíʼin na̱ yiví, kúndáʼvi-iniún xíniúnna, kúee íyo iniún xíʼinna,* ndixaní kúʼvi̱-iniún xíniúnna* ta va̱ása kútóún chindaʼún tu̱ndóʼo nu̱ú na̱ kéʼé ña̱ va̱ása va̱ʼa. 3 Jehová Ndióxi̱ miíi̱, va̱ʼaka kaʼní yi̱ʼi̱, chi va̱ʼaka ná kuvii̱ nu̱úka ña̱ kutakui̱”.

4 Tasaá ni̱nda̱ka̱tu̱ʼun Jehová ta̱ Jonás: “¿Á va̱ʼaní kéʼún túviún ña̱ sáa̱níún?”.

5 Tasaá ki̱ta ta̱ Jonás ñuu Nínive ta ku̱a̱ʼa̱nra koora* iin nu̱ú kivi kotora ñuu kán, chí nu̱ú kíta ñu̱ʼu* xi̱kundúʼura, ta kán i̱xava̱ʼara iin veʼe loʼo xíʼin yitu̱n válí, ta xi̱koora iniña ña̱ va̱ʼa kotora ndáaña kundoʼo ñuu kán. 6 Tasaá Jehová Ndióxi̱, sa̱kúaʼnura iin te̱ʼe̱ ña̱ va̱ʼa koo ku̱nda̱ti̱* nu̱ú íyo ta̱ Jonás ta va̱ʼa kunira, ta ku̱si̱íní-ini ta̱ Jonás xíʼin te̱ʼe̱ yóʼo.

7 Soo tá ni̱tu̱vi, Ndióxi̱ ta̱ nda̱a̱ chi̱ndaʼára iin ti̱kuxí* ta xa̱xírí te̱ʼe̱ yóʼo ta ni̱yi̱chi̱vaña. 8 Tá ki̱xáʼa kíta ñu̱ʼu, Ndióxi̱ chi̱ndaʼára iin ta̱chí ña̱ niʼníní ña̱ ke̱e chí nu̱ú kíta ñu̱ʼu, xa̱ʼa̱ ña̱ ndeéní káni ñu̱ʼu nu̱ú íyo ta̱ Jonás, nda̱a̱ xi̱kuni̱ kuvitóora.* Ta xi̱kaʼa̱nkara ña̱ kúni̱ra kuvira. Xi̱kachira: “Va̱ʼaka ná kuvii̱, nda̱chunví tákui̱”.

9 Ndióxi̱ ni̱nda̱ka̱tu̱ʼunra ta̱ Jonás: “¿Á xíniñúʼu sa̱a̱níún xa̱ʼa̱ ña̱ ndo̱ʼo te̱ʼe̱ yóʼo?”.

Ta ta̱ Jonás nda̱kuiinra: “Xíniñúʼu sa̱a̱vai̱; ta nda̱a̱ kúni̱ kuvii̱ xa̱ʼa̱ ña̱ sáa̱níi̱”. 10 Soo Jehová ni̱ka̱ʼa̱nra xíʼinra: “Yóʼó kúsuchí-iniún xa̱ʼa̱ te̱ʼe̱ yóʼo, soo va̱ása níchiʼúnña ta ni va̱ása nísakúaʼnúnña, iin ñuú kuití xa̱ʼnuña ta iin ñuú kuití ni̱yi̱chi̱vaña. 11 Tá saá, ¿á va̱ása xíniñúʼu kundáʼvi-inii̱ kunii̱ na̱ ndóo ñuu Nínive xíʼin ndiʼi kití sa̱na̱na? Saáchi ñuu yóʼo yáʼaka 120,000 na̱ yiví íyo, ta na̱yóʼo va̱ása kúnda̱a̱-inina ndáaña kúú ña̱ va̱ʼa ta ndáaña kúú ña̱ va̱ása va̱ʼa”.