NAHÚM
1 Ña̱yóʼo káʼa̱nña xa̱ʼa̱ ña̱ kundoʼo ñuu Nínive. Nu̱ú libro yóʼo va̱xi visión ña̱ xi̱ni ta̱ Nahúm* ta̱ elcosita:
2 Jehová kúúra iin Ndióxi̱ ta̱ kúni̱ ña̱ iinlá miíra ná ndasakáʼnuna;
Jehová taxira castigo ndaʼa̱ na̱ sáa̱-ini xíniñaʼá.
Ta̱kán va̱ása nándóso-inira xa̱ʼa̱ ña̱ va̱ása va̱ʼa kéʼéna ta náʼa̱ra ña̱ sáa̱níra xíʼinna.
Jehová taxira castigo ndaʼa̱ na̱ íyo contra xíʼinra ta sáa̱níra xíʼin na̱ sáa̱-ini xíniñaʼá.
3 Kúeení íyo ini* Jehová ta saátu ndakúníra,
soo taxiva Jehová castigo ndaʼa̱ na̱ kúúmií ku̱a̱chi.
Tá xíkara va̱xira ndeéní káni ta̱chí ña̱ sándiʼi-xa̱ʼa̱ ndiʼi ña̱ʼa
ta nda̱a̱ táki̱ʼva ndáko̱o yáká* tá yáʼana saá ndáko̱o vi̱kó tá va̱xira.
4 Ndáʼyi̱ra nu̱ú mar ta yíchi̱ ndiʼirá;
sáyi̱chi̱ra ndiʼi yu̱ta.
Ndiʼi ña̱ʼa ña̱ íyo chí Basán xíʼin Carmelo yíchi̱ña
ta saátu ndiʼi yita ña̱ íyo chí Líbano.
5 Kánda̱ni̱nu yuku̱ nu̱úra ta xi̱kí ndútaña.
Ndeéní kanda̱ ñuʼú nu̱úra ta saátu ñuʼú nu̱ú kána ña̱ʼa,
ta ndiʼi na̱ ndóo nu̱úña ndeéní yi̱ʼvína.
6 ¿Ndáana kuchiñu kundichi nu̱úra tá sáa̱ra?
¿Ndáana kundeé-ini nu̱ú ña̱ ndeéní sáa̱ra?
Ña̱ sáa̱ra kooña nda̱a̱ táki̱ʼva íyo ñuʼu̱ ña̱ ndeéní xíxi̱
ta sakúachira ndiʼi yu̱u̱ náʼnu.
7 Va̱ʼaní-ini Jehová, íyora nda̱a̱ táki̱ʼva íyo iin ñuu ña̱ kútu̱ní ndási nu̱ú kivi ku̱ʼu̱n na̱ yiví tá ná kixaa̱ tu̱ndóʼo.
Kíʼinra kuenta xíʼin* na̱ nándukúñaʼá ña̱ chindeétáʼanra xíʼinna.
8 Iin kama ndakutú ti̱kui̱í ta ndeéní ya̱ʼará
ta sandíʼi-xa̱ʼa̱rá nu̱ú íyo ñuu Nínive,
ta na̱ sáa̱-ini xíniñaʼá kuñuʼuna nu̱ú naa.
9 ¿Á íyo iin ña̱ʼa ña̱ kuchiñundó keʼéndó xíʼin Jehová?
Ta̱kán sandíʼi-xa̱ʼa̱vara ñuu kán.
Iin kuitíva yichi̱ chindaʼára tu̱ndóʼo.
10 Saáchi na̱kán íyona nda̱a̱ táki̱ʼva íyo tú iñú tú ni̱su̱ku̱ndaatáʼan,
nda̱a̱ táki̱ʼva íyo na̱ xíʼi ndixi nda̱a̱ xíniina,
11 Ti̱xin yóʼó kana iin na̱ kuni̱ní keʼé ña̱ʼa ña̱ va̱ása va̱ʼa xíʼin Jehová,
iin na̱ taxi consejo ña̱ va̱ása ndáyáʼvi ndaʼa̱ inkana.
12 Ña̱yóʼo kúú ña̱ káʼa̱n Jehová:
“Ni ndákanixi̱nína ña̱ va̱ʼaní ndóona ta ku̱a̱ʼání kúúna,
soo ni saá, ndiʼi-xa̱ʼa̱vana ta va̱ása kookana.
Sa̱xóʼvi̱vai̱ yóʼó,* soo vitin va̱ása saxóʼvi̱kai̱ yóʼó.
14 Ña̱yóʼo kúú ña̱ nda̱kaxin Jehová keʼéra xíʼún:*
‘Su̱ví ndiʼi tiempoví ndakaʼánna xa̱ʼa̱ ki̱vi̱ún.
Sandíʼi-xa̱ʼíi̱ ndiʼi ña̱ʼa ña̱ i̱xava̱ʼún ndasakáʼnún, ña̱ íyo ini templo ndióxi̱ún
ta saátu ndiʼi ña̱ʼa ña̱ i̱xava̱ʼún xíʼin ka̱a.
Kaii̱n iin ya̱vi̱ nu̱ú ndu̱xu̱ún saáchi kúndasíníi̱ xínii̱ yóʼó’.
15 Koto, chí yuku̱ ku̱a̱ʼa̱n na̱ nátúʼun xa̱ʼa̱ tu̱ʼun va̱ʼa,
na̱ káʼa̱n ña̱ kǒoka ku̱a̱chi íyo.
Yóʼó ñuu Judá, keʼé vikóún ta saxínún ña̱ ki̱ndoún,
saáchi na̱ yiví na̱ ndi̱va̱ʼa-ini va̱ása ndikókana ki̱ʼvina nu̱ún.
Ndiʼi-xa̱ʼa̱ va̱ʼavana”.
2 Na̱ táxín na̱ yiví kúú na̱ ki̱xaa̱ kanitáʼan xíʼin ndóʼó na̱ ñuu Nínive.
Kundaandó nama̱ ña̱ íyo sa̱tá ñuundó.
Kundaandó yichi̱.
Ixatu̱ʼvandó miíndó ta ndakú va̱ʼa koo inindó ña̱ ku̱ʼu̱nndó nu̱ú ku̱a̱chi.
2 Saáchi Jehová taxi tukura ña̱ ná kundayáʼvi ta̱ Jacob
ta saátu ña̱ ná kundayáʼvi na̱ ñuu Israel,
saáchi na̱ kui̱ʼná nda̱kiʼinna ña̱ʼa ña̱ xi̱kuumiína
ta sa̱ndíʼi-xa̱ʼa̱tuna tú uva tú xi̱kuumiína.
3 Escudo ña̱ níʼi na̱ ta̱a na̱ ndakúní na̱ xíni̱ní kanitáʼan nda̱kaʼyi̱ña xíʼin color kúáʼa,
na̱ soldado ndíxina ti̱ko̱to̱ kúáʼa ña̱ yéʼe̱ní.
Ka̱a ña̱ kúúmií carretana ndáye̱ʼe̱ña nda̱a̱ táki̱ʼva yéʼe̱ ñuʼu̱
ki̱vi̱ ña̱ íxatu̱ʼvana miína ña̱ ku̱ʼu̱nna nu̱ú ku̱a̱chi.
Xíniñúʼuna lanza tú ku̱vaʼa xíʼin yitu̱n tú enebro.
4 Carreta tú xíka nu̱ú ku̱a̱chi, ndeéní xínunú chí calle.
Ku̱a̱ʼa̱n va̱xinú xíkanú chí nu̱ú ya̱ʼvi.
Ndáye̱ʼe̱nú nda̱a̱ táki̱ʼva ndáye̱ʼe̱ ñuʼu̱
ta saátu ndáye̱ʼe̱nú nda̱a̱ táki̱ʼva ndáye̱ʼe̱ taxa.
5 Ta̱kán sandátakara na̱ ta̱a na̱ ndakúní na̱ xíni̱ní kanitáʼan.
Na̱kán kachiʼina* ta ko̱yovana nani ndákundeéna ku̱a̱ʼa̱nna.
Kununa ku̱ʼu̱nna chí nu̱ú íyo nama̱ sa̱tá ñuu kán;
ndasakútu̱na nama̱ kán.
6 Ña̱ ndákasi yu̱ta ku̱návaña
ta ndiʼi-xa̱ʼa̱ ndiʼi veʼe* ta̱ rey.
7 Ña̱yóʼo kúú ña̱ kundoʼovaña:
ñuu yóʼo íyoña nda̱a̱ táki̱ʼva íyo iin ñá reina ñá sa̱kúkaʼannína nu̱ú ta nda̱kiʼinnañá ku̱a̱ʼa̱n xíʼinna;
ná káchíñundáʼvi nu̱úñá kúsuchíní-ininá,
kániná kándíkaná ta xákuná nda̱a̱ táki̱ʼva xáku tí paloma.
8 Nda̱a̱ tá xa̱ʼa̱ví, ñuu Nínive íyoña nda̱a̱ táki̱ʼva íyo iin tanque nu̱ú ñúʼu ku̱a̱ʼání ti̱kui̱í,
soo na̱ yiví na̱ ndóo yóʼo xínuvana.
Savana ndeéní káʼa̱nna xíʼinna: “Kundatundó, va̱ása kunundó”.
Soo nda̱a̱ ni iinna va̱ása xíín kundatu.
9 Ndakiʼinndó plata. Ndakiʼinndó oro.
Va̱ása ndíʼiví ña̱ ku̱i̱ká ña̱ kúúmiína.
Ñuu yóʼo chútúña xíʼin ndiʼi nu̱ú ña̱ʼa ña̱ ndáyáʼvi.
10 Ki̱ndoo mií ñuu yóʼo, kǒo na̱ yiví ndóo ta ndi̱ʼi-xa̱ʼa̱ña.
Yíʼvinína, nda̱a̱ kísi koʼndona ta saátu xa̱ʼa̱na;
ku̱yaa ndiʼi nu̱úna xa̱ʼa̱ ña̱ yíʼvina.
11 ¿Ndáa míí ku̱a̱ʼa̱n ya̱vi̱ nu̱ú ñúʼu ndikaʼa,*
nu̱ú kíta ndikaʼa xíʼin se̱ʼe válírí ta kǒo na̱ sáyi̱ʼvírí?
12 Tí ndikaʼa che̱e xi̱xaʼnírí ku̱a̱ʼání kití tí kaxí se̱ʼe válírí
ta xi̱xaʼníturí kití tí kaxí ndikaʼa síʼi.
Xi̱chutú kití tí xi̱xaʼnírí ini ya̱vi̱rí,
ku̱a̱ʼání ku̱ñu kití xi̱ñuʼu iniña.
13 “Koto, yi̱ʼi̱ íyoi̱ contra xíʼún”, káchi Jehová ta̱ xáʼndachíñu nu̱ú na̱ ángel.
“Kaʼmii̱ carreta tú xíka nu̱ú ku̱a̱chi tú kúúmiíún
ta ndiʼi na̱ ta̱a válí na̱ íyo nu̱ún sandíʼi-xa̱ʼa̱nana* xíʼin espada.
Va̱ása taxikai̱ ndakiʼún ña̱ʼa inka na̱ ñuu
ta va̱ása kuniso̱ʼokana ña̱ káʼa̱n na̱ chíndaʼún ku̱a̱ʼa̱n natúʼun xa̱ʼa̱ ña̱ kúu”.
3 Ndáʼviní ñuu ña̱ xáʼní ku̱a̱ʼání na̱ yiví.
Iin chútú nu̱úña xíʼin na̱ yiví na̱ sándaʼvi ta saátu na̱ íxakuíʼná.
Ndiʼi tiempo ndákiʼinña ña̱ʼa inkana.
2 Táku̱ ña̱ sákaʼndina chírríón ta táku̱ ña̱ ndeéní káxan carreta ku̱a̱ʼa̱nnú,
túvi ña̱ ndeéní va̱xi kuáyi̱ tí xínu ta saátu ndeéní xínu carreta va̱xinú.
3 Ku̱a̱ʼání kúú na̱ yósó* kuáyi̱, nda̱a̱ ndáye̱ʼe̱ espadana xíʼin lanzana,
ku̱a̱ʼání kúú na̱ xa̱ʼnína, ku̱a̱ʼání kúú na̱ ni̱xi̱ʼi̱ ndóo.
Nda̱a̱ kóyo na̱ yiví xa̱ʼa̱ ña̱ va̱ása kívi ya̱ʼana saáchi ndóo ku̱a̱ʼání na̱ ni̱xi̱ʼi̱.
4 Ña̱yóʼo ku̱uña xa̱ʼa̱ ña̱ ku̱a̱ʼání ña̱ kini ke̱ʼé ñaʼá ñá kísi̱ xíʼin ku̱a̱ʼání ta̱a,
ñá va̱ʼaní náʼa̱, ñá liviní, ñá xíni̱ní keʼé ña̱ tási,
xíniñúʼuñá ña̱ tási ña̱ sandíʼi-xa̱ʼa̱ñá na̱ yiví.
5 “Koto, yi̱ʼi̱ íyoi̱ contra xíʼún”,* káchi Jehová ta̱ xáʼndachíñu nu̱ú na̱ ángel.
“Ndaniʼii̱ si̱yoún nda̱a̱ nu̱ún;
ndiʼi na̱ ñuu kunina ña̱ cháláún,
ta ndiʼika na̱ ñuu náʼnu kunina ña̱ kaʼanní nu̱ú ña̱ ndo̱ʼún.
6 Katai̱ mi̱ʼí* sa̱táún
ta taxii̱ ña̱ ná kundasína kunina yóʼó;
taxii̱ ña̱ ndiʼina ná kotonde̱ʼéna yóʼó.
7 Nda̱a̱ ndáaka na̱ ná kuni yóʼó, kununa ku̱ʼu̱nna ta kachina:
‘Ndi̱ʼi-xa̱ʼa̱ ñuu Nínive.
¿Ndáana kundáʼvi-ini kuniña?’.
¿Ndáa míí ndani̱ʼíi̱ na̱ sandíko-iniún?
8 ¿Á va̱ʼaníka yóʼó nu̱ú ñuu No-Amón,* ña̱ ni̱xi̱yo yatin yuʼú yu̱ta Nilo?
Iníí sa̱táña xi̱ndikaa̱ ti̱kui̱í;
xíʼin mar xi̱ndukúikáña ta tá mar yóʼo ni̱xi̱yorá nda̱a̱ táki̱ʼva íyo iin nama̱ sa̱tá ñuu yóʼo.
9 Na̱ ñuu Etiopía xíʼin na̱ ñuu Egipto kúú na̱ xi̱ndaaní-iniña xa̱ʼa̱ ña̱ ndakúnína.
Na̱ ñuu Put xíʼin na̱ libio kúú na̱ xi̱chindeétáʼan xíʼinña.
10 Soo ni saá, sa̱ndíʼi-xa̱ʼa̱vana ñuu kán
ta nda̱kiʼinna na̱ ndóo kán ku̱a̱ʼa̱n xíʼinna inka ñuu.
Xa̱ʼnína ndiʼi na̱ va̱lí ñuu kán chí ti̱tu̱n ndiʼi calle.
Chi̱kaa̱na suerte* ña̱ va̱ʼa ndataʼvína ndiʼi na̱ ta̱a na̱ íxato̱ʼóní na̱ ñuu kán,
ta xíʼin ka̱a ka̱túnna ndiʼi na̱ ta̱a na̱ ndáyáʼviní.
11 Saátu yóʼó, koʼún nda̱a̱ xi̱niiún;
ku̱ʼún koose̱ʼún.*
Ndukún nu̱ú kivi kunún ku̱ʼún nu̱ú na̱ sáa̱-ini xíni yóʼó.
12 Ndiʼi nama̱ ña̱ ndási sa̱táún íyoña nda̱a̱ táki̱ʼva íyo tú higo, tú kúúmií higo tí xa̱a̱ ni̱chi̱chi tí nu̱ú va̱ʼa ka̱na;
tá ná kisiún ndaʼa̱nú, ko̱yo higo yóʼo yuʼú na̱ kúni̱ kaxírí.
13 Na̱ soldado na̱ kúúmiíún íyona nda̱a̱ táki̱ʼva íyo ná ñaʼá.
Ndiʼi yéʼé ñuún kununávaña nu̱ú na̱ sáa̱-ini xíni yóʼó.
Ñuʼu̱ kaʼmiña ña̱ʼa* ña̱ kútu̱ní ndákasi yéʼún.
14 Tavá ti̱kui̱í tá kuniñúʼún tá ná ndakasina sa̱tá ñuún.
Ndasakútu̱ nama̱ ña̱ íyo sa̱táún.
Kúáki̱ʼvi ini nda̱ʼyi̱ ta ku̱a̱ñi̱únña;*
ixava̱ʼa ndo̱ʼo xíʼin ña̱yóʼo.
15 Soo ni saá, kaʼmiva ñuʼu̱ yóʼó.
Kaʼnívana yóʼó xíʼin espada.
Ndiʼi-xa̱ʼa̱ va̱ʼún nda̱a̱ táki̱ʼva ndóʼo ku̱ʼu̱ tá xáxi ti̱ka náʼnu tí yúta̱* ña̱yóʼo.
Ku̱a̱ʼá va̱ʼa ndasaún na̱ ñuún nda̱a̱ táki̱ʼva ku̱a̱ʼání kúú ti̱ka náʼnu tí yúta̱.
Ku̱a̱ʼá va̱ʼa ndasaúnna nda̱a̱ táki̱ʼva ku̱a̱ʼání kúú ti̱ka náʼnu.
16 Vitin kúúmiíún ku̱a̱ʼáníka na̱ íxi̱íko* ña̱ʼa,
ku̱a̱ʼáníka kúúna nu̱ú ki̱mi tí íyo chí ndiví.
Ti̱ka náʼnu tí yúta̱ kéerí ti̱xin ñii̱rí ta ndáchírí ku̱a̱ʼa̱nrí.
17 Na̱ ta̱a na̱ kúúmií chiñu ña̱ kundaana yóʼó íyona nda̱a̱ táki̱ʼva íyo ti̱ka náʼnu
ta na̱ níʼi yichi̱ nu̱ú na̱ soldadoún íyona nda̱a̱ táki̱ʼva íyo iin tiʼvi ti̱ka náʼnu.
Xíku̱ndoorí nu̱ú íyo corra ña̱ yu̱u̱ iin ki̱vi̱ ña̱ vi̱xinní,
soo tá xa̱a̱ kíta ñu̱ʼu* ndákiʼinrí ku̱a̱ʼa̱nrí
ta kǒo na̱ kúnda̱a̱-ini ndáa míí ku̱a̱ʼa̱nrí.
18 Kísi̱va na̱ ndáa ndikachi* sa̱na̱ yóʼó ta̱ rey ñuu Asiria;
na̱ ta̱a na̱ ndáyáʼvi na̱ kúúmiíún ndóona veʼena.
Na̱ ñuún ni̱ta̱ni̱na* ku̱a̱ʼa̱nna chí yuku̱
ta kǒo na̱ sándatakañaʼá.
19 Kǒo na̱ sandíko-iniún nu̱ú tu̱ndóʼo ña̱ kixi nu̱ún.
Kǒo na̱ sandáʼa nu̱ú tu̱kue̱ʼún.
Ndiʼi na̱ ná kuniso̱ʼo xa̱ʼa̱ ña̱ kundoʼún kanindaʼa̱na;
saáchi ku̱a̱ʼánína sa̱xóʼvi̱ún* xa̱ʼa̱ ña̱ ndi̱va̱ʼaní-iniún”.
Ña̱ kúni̱ kachi ‘ta̱ sándi̱ko-ini’.
Á “Va̱ása kamaní sáa̱”.
Inka variante “ya̱a̱”.
Á “Ndáara”. Tu̱ʼun ña̱ ni̱ka̱ʼyi̱ña káchiña “Xíni̱ra”.
Inka variante “ka̱yu̱vana”.
Inka variante “ita”, “itia”, “yi̱ku̱”.
Inka variante “Sa̱ndóʼovai̱-iniún”. Ña̱yóʼo káʼa̱nña xa̱ʼa̱, ñuu Judá.
Inka variante “íku”, “yúkú”.
Inka variante “kási̱kíún”, “xa̱síkiún”.
Ña̱yóʼo káʼa̱nña xa̱ʼa̱, ñuu Asiria.
Inka variante “kaki̱ʼi xa̱ʼána”.
Á “palacio”.
Á “león”.
Inka variante “xíxi”.
Inka variante “ítíá”.
Tu̱ʼun ña̱ ni̱ka̱ʼyi̱ña káchiña “ndiʼi ndikaʼa yúta̱ tí kúúmiíún kuvirí”.
Inka variante “na̱ nándoso ya̱ta̱” “na̱ kúnuu sa̱ta̱”.
Ña̱yóʼo káʼa̱nña xa̱ʼa̱, ñuu Nínive.
Inka variante “kuayi”, “ta̱ka̱”.
Ña̱yóʼo káʼa̱nña xa̱ʼa̱, ñuu Tebas.
Koto glosario, chi̱kaa̱na suerte.
Inka variante “chise̱ʼún”.
Ña̱yóʼo xi̱kuuña iin yitu̱n káni̱ á iin ka̱a ña̱ káni̱ ña̱ xi̱chikaa̱na sa̱tá yéʼé ñuuna tasaá va̱ása ku̱náña.
Inka variante “kuniʼniúnña”, “ku̱a̱ʼniúnña”.
Inka variante “ítíá”.
Inka variante “síkó”.
Inka variante “ña̱ ka̱ndii”.
Inka variante “levo”.
Inka variante “ni̱xi̱ta̱niʼnuna”.
Inka variante “sa̱ndóʼún-ini”.