SOFONÍAS
1 Tá tiempo ña̱ ni̱xi̱yo ta̱ Josías se̱ʼe ta̱ Amón, ta̱ xi̱kuu rey ñuu Judá, Jehová ni̱ka̱ʼa̱nra ña̱yóʼo xíʼin ta̱ Sofonías,* se̱ʼe ta̱ Cusí, se̱ʼe ta̱ Guedalías, se̱ʼe ta̱ Amarías, se̱ʼe ta̱ Ezequías, ka̱chira:
2 “Sandíʼi-xa̱ʼíi̱ ndiʼi ña̱ íyo nu̱ú ñuʼú”, káchi Jehová.
3 “Sandíʼi-xa̱ʼíi̱ ndiʼi na̱ yiví xíʼin kití.
Sandíʼi-xa̱ʼíi̱ kití tí ndáchí chí ndiví xíʼin ti̱a̱ká tí ñúʼu ini mar,
sandíʼi-xa̱ʼíi̱ ndiʼi ña̱ʼa ña̱ sási nu̱úna* xíʼin na̱ ndi̱va̱ʼa-ini;
sandíʼi-xa̱ʼíi̱ na̱ yiví na̱ ndóo nu̱ú ñuʼú”, káchi Jehová.
4 “Taxii̱ castigo ndaʼa̱ na̱ ñuu Judá ta saátu ndaʼa̱ ndiʼi na̱ ndóo ñuu Jerusalén,
ta sandíʼi-xa̱ʼíi̱ ndiʼi ña̱ Baal ña̱ kíndo̱o,
kǒoka na̱ ndakaʼán xa̱ʼa̱ na̱ xi̱kuu su̱tu̱ nu̱ú ndióxi̱ na̱ inka ñuu
ta sandíʼi-xa̱ʼíi̱ ndiʼi na̱ su̱tu̱ vatá.*
5 Ta saátu sandíʼi-xa̱ʼíi̱ ndiʼi na̱ xíkuxítí chí xi̱ní veʼena nu̱ú ndiʼi ña̱ʼa ña̱ íyo chí ndiví,
ta yi̱ʼi̱ Jehová sandíʼi-xa̱ʼa̱tui̱ na̱ xíkuxítí ta chínaʼána* ña̱ nda̱kú íyo inina xíʼi̱n,
soo saátu ku̱a̱ʼa̱nna nu̱ú ña̱ Malcam* ta chínaʼána ña̱ nda̱kú íyo inina xíʼinña.
6 Yi̱ʼi̱ Jehová, sandíʼi-xa̱ʼa̱tui̱ na̱ sándakoo yi̱ʼi̱,
yi̱ʼi̱ Jehová sandíʼi-xa̱ʼíi̱ na̱ kǒo nándukú yi̱ʼi̱ ta ni va̱ása ndáka̱tu̱ʼunna yi̱ʼi̱ ndáaña va̱ʼa keʼéna”.
7 Kǒo ka̱ʼa̱nndó nda̱a̱ ni iin ña̱ʼa nu̱ú táta káʼnu Jehová,
saáchi ki̱vi̱ Jehová xa̱a̱ ku̱yatinníña.
Jehová xa̱a̱ i̱xatu̱ʼvara iin ña̱ʼa ña̱ so̱kóra;
xa̱a̱ nda̱sayi̱i̱ra na̱ ka̱nara.
8 “Yi̱ʼi̱ Jehová, taxii̱ castigo ndaʼa̱ na̱ kúúmií chiñu ña̱ ndáyáʼvi,
taxitui̱ castigo ndaʼa̱ na̱ se̱ʼe ta̱ rey ta saátu ndaʼa̱ ndiʼi na̱ ndíxi ti̱ko̱to̱ ña̱ ke̱e inka ñuu, ki̱vi̱ ña̱ ná so̱kói̱ ña̱ʼa.
9 Taxii̱ castigo ndaʼa̱ ndiʼi na̱ ku̱a̱ndaa nu̱ú iin ña̱ʼa súkun* ki̱vi̱ kán, taxii̱ castigo ndaʼa̱ na̱ íxandi̱va̱ʼa xíʼin na̱ ñuu ta sándaʼvinana ña̱ va̱ʼa ndakiʼin na̱ káchíñuna nu̱ú ku̱a̱ʼání ña̱ va̱ʼa.
10 Ki̱vi̱ kán, káchi Jehová, kutaku̱ ña̱ ndeéní nda̱ʼyi̱na chí Yéʼé ti̱a̱ká,
ña̱ ndeéní kuakuna chí Ñuu xa̱á ña̱ íyo ñuu yóʼo
ta saátu ña̱ ndeéní ni̱ʼi chí xi̱kí.
11 Ndeéní kuaku ndóʼó na̱ ndóo chí Mactés,*
saáchi ni̱xi̱ʼi̱ ndiʼi na̱ xi̱xi̱íko* ña̱ʼa;
ndi̱ʼi-xa̱ʼa̱ ndiʼi na̱ xi̱kata plata.
12 Tiempo kán kuniñúʼi̱ iin lámpara ña̱ kotoi̱ ndáaña kúú ña̱ kéʼé na̱ ñuu Jerusalén
ta taxii̱ castigo ndaʼa̱ na̱ kúsi̱íní-ini xíʼin ña̱ kéʼéna ta ndákanixi̱nína ña̱yóʼo:
‘Kǒo keʼéví Jehová ña̱ va̱ʼa, ni ña̱ va̱ása va̱ʼa’.
13 Ndakiʼinna ña̱ ku̱i̱ká ña̱ kúúmiíndó ta sandíʼi-xa̱ʼa̱na veʼendó.
Ixava̱ʼandó veʼe soo kǒo kundoondó-iniña;
chiʼindó uva soo va̱ása koʼondó vino tá kuva̱ʼa xíʼinrí.
14 Ki̱vi̱ káʼnu Jehová xa̱a̱ ku̱yatinníña.
Xa̱a̱ ku̱yatinníña ta kamaní va̱xiña.
I̱yoní koo tá ná ki̱xaa̱ ki̱vi̱ Jehová.
Ki̱vi̱ kán, nda̱a̱ na̱ ta̱a na̱ ndakúní na̱ xíka nu̱ú ku̱a̱chi nda̱ʼyi̱ kóʼóna.*
15 Ki̱vi̱ kán ndeéní sa̱a̱ Ndióxi̱,
ki̱vi̱ kán xo̱ʼvi̱nína* ta ndi̱ʼiní-inina,
ki̱vi̱ kán ndeéní kuun sa̱vi̱ ta ndiʼi-xa̱ʼa̱ ndiʼi ña̱ʼa,
ki̱vi̱ kán naaní koo,
ki̱vi̱ kán ndakutú vi̱kó ndáá chí ndiví ta naaní koo,
16 ki̱vi̱ kán, tivina ndiki̱ ta nda̱ʼyi̱ kóʼóna ña̱ va̱ʼa na̱ʼa̱na ña̱ xa̱a̱ íyo tu̱ʼvana ña̱ kanitáʼanna xíʼin ñuu ña̱ kútu̱ní ndási
ta saátu xíʼin ndiʼi veʼe súkun ña̱ íyo chí ti̱tu̱n ñuu kán.
17 Taxii̱ ña̱ ná kundi̱ʼiní-ini na̱ yiví,
ta na̱kán kakana nda̱a̱ táki̱ʼva xíka na̱ kúáa,*
saáchi ni̱ki̱ʼvina ku̱a̱chi nu̱ú yi̱ʼi̱ Jehová.
Nda̱a̱ táki̱ʼva xíta̱ yáká* saá ku̱i̱ta̱ ni̱i̱na.
Ta xitina* xa̱a̱ña kooña nda̱a̱ táki̱ʼva íyo si̱ʼví ña̱ ndóo nu̱ú ñuʼú.
18 Ni plata ta ni oro ña̱ kúúmiína va̱ása kivi sakǎkuñana ki̱vi̱ ña̱ ndeéní ná sa̱a̱ Jehová;
xa̱ʼa̱ ña̱ sáa̱níra sandíʼi-xa̱ʼa̱ra ndiʼi ña̱ʼa ña̱ íyo nu̱ú ñuʼú, nda̱a̱ táki̱ʼva sándiʼi-xa̱ʼa̱ ñuʼu̱ ndiʼi ña̱ʼa,
i̱yoní koo ki̱vi̱ kán saáchi sandíʼi-xa̱ʼa̱ra ndiʼi na̱ ndóo nu̱ú ñuʼú”.
2 Ndóʼó na̱ ñuu na̱ ni loʼo kǒo kúkaʼan nu̱ú,
ndakutáʼanndó, ndataka ndiʼindó.
2 Tá kúma̱níka xi̱nu ña̱ ni̱ka̱ʼa̱n Ndióxi̱,
tá kúma̱níka ya̱ʼa ki̱vi̱ nda̱a̱ táki̱ʼva kéʼé xe̱ʼe̱* ña̱ ndáchí ku̱a̱ʼa̱n xíʼin ta̱chí,
tá kúma̱níka na̱ʼa̱ Jehová ña̱ sáa̱níra xíʼinndó,
tá kúma̱níka kixaa̱ ki̱vi̱ ña̱ ndeéní sa̱a̱ Jehová xíʼinndó,
3 ndiʼi ndóʼó na̱ vitá-ini na̱ íyo nu̱ú ñuʼú, nandukúndó Jehová, ndiʼi ndóʼó na̱ kándíxa chiñu ña̱ xáʼndara ña̱ nda̱kúní íyo.
Chikaa̱níndó ndee̱ ña̱ keʼéndó ña̱ va̱ʼa ta na̱ʼa̱ndó ña̱ vitá íyo inindó.
Chi sana kivi ndani̱ʼíndó nu̱ú koose̱ʼéndó* ki̱vi̱ tá ná sa̱a̱ní Jehová.
4 Ndo̱ondaʼa̱ ñuu Gaza
ta ñuu Asquelón kindo̱o miíña.
Tá káʼñu* tavána na̱ ndóo chí Asdod ta ñuu Ecrón ndiʼi-xa̱ʼa̱ña.
5 “Ndáʼviní ndóʼó na̱ keretita na̱ ndóo chí yuʼú mar.
Ndóʼó kúú na̱ kundoʼo ña̱ ni̱ka̱ʼa̱n Jehová xa̱ʼa̱.
Yóʼó Canaán, ñuʼú nu̱ú ndóo na̱ filisteo, sandíʼi-xa̱ʼíi̱ yóʼó
ta kǒo nda̱a̱ ni iinna kindo̱o koo nu̱ún.
6 Ñuʼú ña̱ íyo chí yuʼú mar nduuña ñuʼú nu̱ú íyo yita,*
ta kán koo pozo nu̱ú koʼo na̱ pastor ti̱kui̱í ta saátu koo corra yu̱u̱ nu̱ú kuñuʼu ndikachi.*
7 Ñuʼú yóʼo kúú ña̱ ndakiʼin na̱ ñuu Judá na̱ ná kindo̱o.
Kán kúú nu̱ú kuxuna.
Ta tá xi̱kuaá ndakindee̱na veʼe ña̱ íyo chí Asquelón.
Saáchi Jehová ta̱ kúú Ndióxi̱na kundaarana
ta taxira ña̱ ná ndikó na̱ nda̱kiʼinna ku̱a̱ʼa̱n inka ñuu”.
8 “Xi̱niso̱ʼi̱ ña̱ xáku̱ndaa na̱ ñuu Moab na̱ ñui̱ ta saátu ña̱ káʼa̱n-ndi̱va̱ʼa na̱ ammonita xíʼinna;
na̱yóʼo kúsi̱kindaana na̱ ñui̱ ta ni̱nuní kúnina káʼa̱nna xíʼinna ña̱ kindaana ñuʼúna.
9 Xa̱ʼa̱ ña̱kán, chínaʼíi̱* xa̱ʼa̱ miíi̱, káchi Jehová ta̱ xáʼndachíñu nu̱ú na̱ ángel ta̱ kúú Ndióxi̱ na̱ ñuu Israel,
ñuu Moab kundoʼoña nda̱a̱ táki̱ʼva ndo̱ʼo ñuu Sodoma
ta na̱ ammonita kundoʼona nda̱a̱ táki̱ʼva ndo̱ʼo ñuu Gomorra,
kooña iin ñuʼú nu̱ú íyo tú iñú, iin ya̱vi̱ nu̱ú ñúʼu ñi̱i̱ ta saátu iin ñuʼú ña̱ kindo̱o mií ndiʼi tiempo.
Na̱ ñui̱ na̱ ná kindo̱o, ndakiʼinna ña̱ʼa na̱yóʼo,
ta na̱ ñui̱ na̱ ná kindo̱o, kindaana ñuʼúna.
10 Ña̱yóʼo kúú ña̱ ndakiʼinndó xa̱ʼa̱ ña̱ ni̱nuní ku̱nindó,
saáchi ku̱sikindaandó na̱ ñuu Jehová ta̱ xáʼndachíñu nu̱ú na̱ ángel ta i̱xandi̱va̱ʼandó xíʼinna.
11 Ndakanda̱ní-inina* xíʼin ña̱ keʼé Jehová.
Sandíʼi-xa̱ʼa̱ra ndiʼi ndióxi̱ ña̱ íyo nu̱ú ñuʼú,
ta ndiʼi na̱ ñuu na̱ íyo chí isla kuxítína nu̱úra,*
ni nda̱a̱ ndáaka nu̱ú ndóona.
12 Saátu kaʼníi̱ ndóʼó na̱ etíope xíʼin espadai̱.
13 Sakáa̱ra ndaʼa̱ra chí norte ta sandíʼi-xa̱ʼa̱ra ñuu Asiria.
Kǒoka na̱ kundoo ñuu Nínive; kooña nda̱a̱ táki̱ʼva íyo ñuʼú yi̱chí.
14 Ma̱ʼñú ñuu yóʼo kundoo ku̱a̱ʼání kití, ndiʼi nu̱ú kití yukú.
Tí pelícano xíʼin tí puercoespín ku̱su̱nrí ma̱ʼñú capitel ña̱ kúúmií nama̱ ñuuna.
Chí ventana kutaku̱ ña̱ xíta iin saa.*
Iin koʼndo ña̱ʼa ña̱ ndi̱ʼi-xa̱ʼa̱ kundoo chí yéʼé.
Ndiʼi tú cedro kundoonú nu̱ú ñu̱ʼu* ta saátu kuun sa̱vi̱ sa̱tánú.
15 Ñuu ña̱ ni̱nuní xi̱kuni ta kǒo níxi̱ndiʼi-iniña,
ta xi̱ndakani-iniña: ‘Ndáyaʼviníi̱, ta kǒo inka ñuu ña̱ íyo nda̱a̱ táki̱ʼva íyo yi̱ʼi̱’.
Vitin ndu̱uña iin ñuu ña̱ kúndasína xínina,
ndu̱uña iin lugar nu̱ú ndákindee̱ kití yukú.
Ndiʼi na̱ ná ya̱ʼa chí nu̱ú ni̱xi̱yoña kusi̱kindaanaña ta sakúikóna xi̱nína”.*
3 Ndáʼviní ñuu Jerusalén ña̱ kǒo xíín kandíxa, ña̱ ku̱yaku̱a̱ ta íxandi̱va̱ʼaníña xíʼin inkana.
2 Va̱ása xíniso̱ʼoña ña̱ káʼa̱n nda̱a̱ ni iinna ta ni kǒo xíínña ndakiʼinña nda̱a̱ ni iin consejo.
Va̱ása ndáa-iniña Jehová ta ni kǒo kúyatinña nu̱ú Ndióxi̱ña.
3 Na̱ kúúmií chiñu ña̱ ndáyáʼvi ñuu yóʼo, íyona nda̱a̱ táki̱ʼva íyo ndikaʼa* tí ndeéní ndáʼyi̱.
Na̱ ndátiin ku̱a̱chi ñuu yóʼo íyona nda̱a̱ táki̱ʼva íyo lobo tí kée tá ñuú ña̱ kaʼnírí kití tí kaxírí,
ta kǒo nda̱a̱ ni iin leke sándakoorí ña̱ kaxíndaarí inka ki̱vi̱.
4 Na̱ profeta ñuu yóʼo ni loʼo kǒo kúkaʼan nu̱úna,
kúúna ta̱a na̱ sándaʼvi inkana.
Na̱ su̱tu̱ ñuu yóʼo íxayaku̱a̱na ña̱ yi̱i̱;
yáʼandosóna ña̱ káʼa̱n ley.
5 Jehová íyora ñuu yóʼo ta nda̱kúní íyo ña̱ kéʼéra;
kǒo kéʼéra ni iin ña̱ va̱ása va̱ʼa.
Ndiʼi ki̱vi̱ sánáʼa̱raña xa̱ʼa̱ ley ña̱ kúúmiíra,
nda̱a̱ táki̱ʼva túvi ndiʼi ki̱vi̱.
Soo na̱ kéʼé ña̱ va̱ása va̱ʼa nda̱a̱ ni loʼo va̱ása kúkaʼan nu̱úna.
6 “Sa̱ndíʼi-xa̱ʼíi̱ ku̱a̱ʼá ñuu; sa̱ndíʼi-xa̱ʼíi̱ ndiʼi veʼe súkun ña̱ íyo titu̱n ndiʼi ñuu yóʼo.
Sa̱ndíʼi-xa̱ʼíi̱ calle ña̱ íyo ñuu yóʼo ña̱ va̱ʼa ná kǒo kakaka nda̱a̱ ni iinna nu̱úña.
Ndiʼi ñuu ña̱ xi̱kuumiíña ndi̱ʼi-xa̱ʼa̱ña ta nda̱a̱ ni iinka na̱ yiví kǒo níkindo̱o nu̱úña.
7 Yi̱ʼi̱ ni̱ka̱ʼi̱n xíʼin na̱ ñuu kán, ‘Yi̱ʼvívandó kunindó yi̱ʼi̱ ta kuniso̱ʼovandó consejo* ña̱ táxii̱ ndaʼa̱ndó’,
ña̱ va̱ʼa kǒo ndatii̱n ku̱a̱chi xíʼinndó xa̱ʼa̱ ndiʼi ña̱ va̱ása va̱ʼa kéʼéndó tasaá kǒo ndiʼi-xa̱ʼa̱ ñuundó.
Soo ndóʼó xi̱kuni̱níkavandó keʼéndó ña̱ʼa ña̱ va̱ása va̱ʼa.
8 ‘Xa̱ʼa̱ ña̱kán kúee koo inindó kundatundó yi̱ʼi̱, káchi Jehová,
nda̱a̱ ná kixaa̱ ki̱vi̱ ña̱ kanitáʼi̱n xíʼin ñuu yóʼo ta ndakiʼii̱n ndiʼi ña̱ va̱ʼa ña̱ kúúmiíña,
saáchi ña̱ nda̱kaxii̱n keʼíi̱ kúú ña̱ sandákutáʼi̱n ndiʼi ñuu náʼnu xíʼin ndiʼika ñuu ña̱ íyo nu̱ú ñuʼú yóʼo
ña̱ va̱ʼa taxii̱ castigo ndaʼa̱na xa̱ʼa̱ ña̱ ndeéní sái̱.
Xa̱ʼa̱ ña̱ sáa̱níi̱ sandíʼi-xa̱ʼíi̱ ndiʼi ña̱ʼa ña̱ íyo nu̱ú ñuʼú, nda̱a̱ táki̱ʼva sándiʼi-xa̱ʼa̱ ñuʼu̱ ndiʼi ña̱ʼa.
9 Tasaá nasamai̱ tu̱ʼun ña̱ káʼa̱n ndiʼi na̱ ñuu ta ndasai̱ña iin tu̱ʼun xa̱á ña̱ va̱ʼaní,
ña̱ va̱ʼa ndiʼina ná ndasakáʼnuna ki̱vi̱ yi̱ʼi̱ Jehová
ta inkáchi kutáʼanna ndasakáʼnuna yi̱ʼi̱’.
10 Ndiʼi na̱ ñui̱ na̱ ni̱ta̱ni̱* ku̱a̱ʼa̱n na̱ xákundáʼvi nu̱úi̱, keena nda̱a̱ nu̱ú ñuʼú ña̱ íyo chí nu̱ú íyo yu̱ta chí Etiopía ta kuniʼina iin ña̱ʼa kixina taxina ndaʼíi̱.
11 Ki̱vi̱ kán, yóʼó ñuu Jerusalén kǒo kukaʼanka nu̱ún
xa̱ʼa̱ ndiʼi ña̱ va̱ása va̱ʼa ke̱ʼún xa̱ʼa̱ ña̱ kǒo níxiún kandíxaún yi̱ʼi̱,
saáchi va̱ása taxikai̱ ña̱ koo na̱ ni̱nuní kúni xíʼún;
ta va̱ása na̱ʼa̱kaún ña̱ ni̱nuní kúni̱ún nu̱ú íyo yuku̱i̱ ña̱ yi̱i̱.
12 Ta taxii̱ ña̱ ná kindo̱o na̱ yiví na̱ vitá-ini xíʼin na̱ va̱ása ni̱nu kúni,
ta na̱yóʼo nandukúna yi̱ʼi̱ Jehová ña̱ kundai̱na.
13 Na̱ ñuu Israel na̱ ná kindo̱o keʼéna nina ña̱ nda̱kú;
va̱ása ka̱ʼa̱nkana ña̱ vatá* ta ni yáa̱na* kǒo sandáʼvikaña inkana.
Kuxuna ta ndakindee̱na, ta kǒo nda̱a̱ ni iin na̱ sayíʼvi-ñaʼá”.
14 Yóʼó ñá loʼo se̱ʼe ñuu Sion, nda̱ʼyi̱ kóʼún* xa̱ʼa̱ ña̱ kúsi̱í-iniún.
Yóʼó ñuu Israel, nda̱ʼyi̱ kóʼún xa̱ʼa̱ ña̱ ndeéní kúsi̱í-iniún.
Xíʼin ndiʼi níma̱ún kusi̱í-iniún, yóʼó ñá loʼo se̱ʼe ñuu Jerusalén.
15 Kǒo taxika Jehová castigo ndaʼún.
Xa̱a̱ sa̱kúxíkára na̱ sáa̱-ini xíni yóʼó.
Jehová ta̱ kúú Rey ñuu Israel íyora xíʼún.
Nda̱a̱ ni iin yichi̱ va̱ása xíniñúʼu yi̱ʼvíkaún saáchi kǒo kixika tu̱ndóʼo nu̱ún.
16 Ki̱vi̱ kán, ka̱ʼa̱nna xíʼin ñuu Jerusalén:
“Yóʼó Sion, kǒo yi̱ʼvíkaún.
Kǒo ndakava-iniún.
17 Jehová Ndióxi̱ún íyora xíʼún.
Sakǎkura yóʼó nda̱a̱ táki̱ʼva kéʼé iin ta̱a ta̱ ndakúní ta̱ xíni̱ní kanitáʼan.
Kusi̱íní-inira xíʼún.
Xa̱ʼa̱ ña̱ kúʼvi̱ní-inira xínira yóʼó va̱ʼaní kunira.
Kusi̱íní-inira xíʼún ta xa̱ʼa̱ ña̱ kúsi̱íní-inira nda̱ʼyi̱ kóʼóra.
18 Sandákutáʼi̱n na̱ kúsuchíní-ini xa̱ʼa̱ ña̱ kǒo níkivi ku̱ʼu̱nna vikó ña̱ xi̱keʼún;
xíkání ni̱xi̱yona nu̱ún, saáchi nda̱kiʼinnana ku̱a̱ʼa̱n xíʼinna inka ñuu ta na̱ sáa̱-ini xíni-ñaʼá xi̱xaku̱ndaanana.
19 Koto, tiempo kán taxii̱ castigo ndaʼa̱ na̱ sáxo̱ʼvi̱ yóʼó;*
sakǎkui̱ na̱ kǒo kívi kaka
ta sandákutáʼi̱n na̱ ni̱ta̱ni̱ ku̱a̱ʼa̱n.
Taxii̱ ña̱ ná ixato̱ʼónana ta ka̱ʼa̱n va̱ʼana xa̱ʼa̱na ndiʼi ñuu nu̱ú sa̱kúkaʼanna nu̱úna.
20 Tiempo kán, taxii̱ ña̱ ná ndikóndó,
tiempo kán sandákutáʼi̱n ndóʼó.
Saáchi taxii̱ ña̱ ná ixato̱ʼóna yóʼó ta ka̱ʼa̱n va̱ʼana xa̱ʼún ndiʼi ñuu ña̱ íyo nu̱ú ñuʼú
tá ná taxii̱ ña̱ ndikó ndiʼi na̱ nda̱kiʼinna ku̱a̱ʼa̱n inka ñuu, ta kuninu̱ún ña̱yóʼo”, káchi Jehová.
Ña̱ kúni̱ kachi ‘Jehová chi̱se̱ʼéra’.
Ña̱yóʼo sana káʼa̱nña xa̱ʼa̱ ña̱ xi̱keʼéna ta saátu xa̱ʼa̱ ña̱ʼa ña̱ xi̱xiniñúʼuna ña̱ ndasakáʼnuna ndióxi̱ vatá.
Inka variante “to̱ʼón”.
Koto glosario, chinaʼá.
Koto glosario, Malcam.
Ña̱yóʼo sana káʼa̱nña xa̱ʼa̱ plataforma nu̱ú ni̱xi̱yo trono ta̱ rey.
Sana káʼa̱nña xa̱ʼa̱ iin táʼví ñuu Jerusalén ña̱ xi̱kindo̱o yatin chí Yéʼé ti̱a̱ká.
Inka variante “xi̱sikó”.
Inka variante “nda̱ʼyi̱ ñoona”.
Inka variante “ndoʼo-inina”.
Inka variante “kóʼo no̱o̱”.
Inka variante “ya̱a̱”.
Á “ku̱ñuna”.
Inka variante “mi̱ʼí”.
Inka variante “chise̱ʼéndó”.
Inka variante “ñúú káʼñu”.
Inka variante “ita”, “itia”, “yi̱ku̱”.
Inka variante “levo”.
Koto glosario, chinaʼá.
Inka variante “Iin ku̱ʼu̱n-inina”, “Ndakaʼndaní-inina”.
Á “ndasakáʼnunara”.
Á sana “ña̱ ndáʼyi̱ kití yukú á ña̱ níʼi ta̱chí”.
Inka variante “ña̱ ka̱ndii”.
Tu̱ʼun ña̱ ni̱ka̱ʼyi̱ña káchiña “tutuna ta kisina yi̱kína”. Inka variante “sávikóxi̱nína”.
Á “león”.
Koto glosario, disciplina.
Inka variante “ni̱xi̱ta̱niʼnu”.
Inka variante “ña̱ to̱ʼón”.
Inka variante “láa̱na”.
Inka variante “nda̱ʼyi̱ ñoún”.
Inka variante “sándoʼo-iniún”.