AGEO

1 Tá xa̱a̱ ku̱a̱ʼa̱n u̱vi̱ ku̱i̱ya̱ ña̱ xáʼndachíñu ta̱ rey Darío, ki̱vi̱ nu̱ú ña̱ yo̱o̱ i̱ñu̱, Jehová ni̱ka̱ʼa̱nra ña̱yóʼo xíʼin ta̱ profeta Ageo* ña̱ ná ka̱ʼa̱nra xíʼin ta̱ Zorobabel se̱ʼe ta̱ Sealtiel ta̱ xi̱xaʼndachíñu chí Judá ta saátu xíʼin ta̱ Josué se̱ʼe ta̱ Jehozadac ta̱ xi̱kuu su̱tu̱ káʼnu:

2 “Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel: ‘Na̱ ñuu yóʼo káchina: “Ta̱ʼán kixaa̱ví ki̱vi̱ ña̱ ndasava̱ʼayó veʼe* Jehová”’”.

3 Ta tuku xi̱niñúʼu Jehová ta̱ profeta Ageo ña̱ va̱ʼa ka̱ʼa̱nra tu̱ʼun yóʼo xíʼinna: 4 “¿Á va̱ʼa kéʼéndó ña̱ ndóondó ini veʼe ña̱ ku̱vaʼa xíʼin yitu̱n tú liviní, soo veʼe yi̱ʼi̱ ndi̱ʼi-xa̱ʼa̱ ndiʼiña? 5 Xa̱ʼa̱ ña̱kán, ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel: ‘Ndakani va̱ʼa xi̱níndó xa̱ʼa̱ ña̱ kéʼéndó. 6 Ndóʼó ku̱a̱ʼání chíʼindó, soo loʼoní ña̱ʼa ndákayandó. Xíxindó soo va̱ása xáa̱-inindó.* Xíʼindó vino soo va̱ása xáa̱-inindó. Ndákundixindó ti̱ko̱to̱, soo va̱ása ndásaa̱ndó. Ta na̱ káchíñu nu̱ú inkana, ndátaánva̱ʼana* xu̱ʼún ña̱ cháʼvinana ini iin bolsa láʼla’”.

7 “Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel: ‘Ndakani va̱ʼa xi̱níndó xa̱ʼa̱ ña̱ kéʼéndó’.

8 ”‘Ndaandó chí yuku̱ ta ná ku̱ʼu̱n yitu̱n xíʼinndó ta ixava̱ʼandó veʼi̱, ña̱ va̱ʼa ná kindo̱o-inii̱ xíʼinña tasaá ndukáʼnui̱’, káchi Jehová”.

9 “‘Ku̱a̱ʼání ña̱ʼa xi̱ndatundó ndakiʼinndó, soo loʼovaña nda̱kiʼinndó. Ta tá nda̱kiʼinndóña ku̱a̱ʼa̱n xíʼinndó chí veʼendó, iin kuití ti̱vii̱ ta nda̱chí ndiʼiña ku̱a̱ʼa̱nña. ¿Nda̱chun? Saáchi veʼi̱ ndi̱ʼi-xa̱ʼa̱ ndiʼiña, soo ña̱ ndíʼi̱níka-ini ndiʼi ndóʼó xa̱ʼa̱ kúú ña̱ kundaandó veʼe miívandó, káchi Jehová ta̱ xáʼndachíñu nu̱ú na̱ ángel. 10 Xa̱ʼa̱ ña̱kán kǒoka yúyú níko̱yo chí ndiví ta kǒoka ña̱ʼa níkana nu̱ú ñuʼú. 11 Ta sa̱yíchi̱i̱ yuku̱ ta saátu ñuʼú, ta xa̱ʼa̱ ña̱yóʼo kǒoka trigo níkana, ni vino, ni aceite ni yitu̱n. Ta vitin xóʼvi̱níndó* ta saátu kití sa̱na̱ndó ta kǒo ña̱ va̱ʼa ndákiʼinndó xa̱ʼa̱ ña̱ ndeéní ka̱chíñundó xa̱ʼa̱’”.

12 Ta̱ Zorobabel se̱ʼe ta̱ Sealtiel, ta̱ su̱tu̱ káʼnu Josué se̱ʼe ta̱ Jehozadac ta saátu ndiʼika na̱ ñuu xi̱niso̱ʼona ña̱ ni̱ka̱ʼa̱n Jehová Ndióxi̱na ta saátu ña̱ ni̱ka̱ʼa̱n ta̱ profeta Ageo, saáchi mií Jehová Ndióxi̱ kúú ta̱ chi̱ndaʼá-ñaʼá. Ta na̱ ñuu ki̱xáʼana náʼa̱na ña̱ yíʼvina xínina Jehová.*

13 Tasaá, ta̱ Ageo ta̱ chi̱ndaʼá Jehová ku̱a̱ʼa̱n nu̱ú na̱ ñuu, ni̱ka̱ʼa̱nra ña̱yóʼo xíʼinna chi Jehová ta̱xi chiñu yóʼo ndaʼa̱ra: “‘Yi̱ʼi̱ íyoi̱ xíʼinndó’, káchi Jehová”.

14 Xa̱ʼa̱ ña̱kán, Jehová chi̱kaa̱ra-ini ta̱ Zorobabel se̱ʼe ta̱ Sealtiel ta̱ xi̱xaʼndachíñu chí Judá, ta̱ Josué se̱ʼe ta̱ Jehozadac ta̱ xi̱kuu su̱tu̱ káʼnu ta saátu ndiʼika na̱ ñuu ña̱ va̱ʼa keʼéna ña̱ kúni̱ra. Ta na̱kán nda̱kiʼinna ku̱a̱ʼa̱nna ta ki̱xáʼana káchíñuna chí veʼe Jehová ta̱ xáʼndachíñu nu̱ú na̱ ángel, ta̱ kúú Ndióxi̱na. 15 Ña̱yóʼo ku̱uña ki̱vi̱ 24 ña̱ yo̱o̱ i̱ñu̱, tá xa̱a̱ ku̱a̱ʼa̱n u̱vi̱ ku̱i̱ya̱ ña̱ xáʼndachíñu ta̱ rey Darío.

2 Tá ki̱vi̱ 21 ña̱ yo̱o̱ u̱xa̱, Jehová ni̱ka̱ʼa̱nra tu̱ʼun yóʼo xíʼin ta̱ profeta Ageo: 2 “Ixaún ña̱ ma̱ní, nda̱ka̱tu̱ʼun ta̱ Zorobabel se̱ʼe ta̱ Sealtiel ta̱ xáʼndachíñu chí Judá, ta̱ Josué se̱ʼe ta̱ Jehozadac ta̱ kúú su̱tu̱ káʼnu ta saátu ndiʼika na̱ ñuu: 3 ‘¿Ndáa ndóʼó xi̱ni veʼe* yóʼo tá ya̱chi̱ tá liviní ni̱xi̱yoña? ¿Ndáaña túvindó xíʼinña vitin? Ni loʼoví va̱ása kítáʼanña xíʼin ña̱kán saáchi liviníkava ni̱xi̱yo ña̱kán’.

4 ”‘Soo ndakúní koo iniún vitin Zorobabel, káchi Jehová, ta ndakúnítu koo ini yóʼó Josué se̱ʼe ta̱ Jehozadac ta̱ kúú su̱tu̱ káʼnu’.

”‘Ta ndakú koo ini ndiʼi ndóʼó na̱ yiví na̱ ndóo nu̱ú ñuʼú yóʼo ta kachíñundó’, káchi Jehová.

”‘Saáchi yi̱ʼi̱ íyoi̱ xíʼinndó, káchi Jehová ta̱ xáʼndachíñu nu̱ú na̱ ángel. 5 Ndakaʼánndó xa̱ʼa̱ ña̱ ki̱ndoi̱ xíʼinndó tá ke̱endó chí Egipto; espíritu santo ña̱ kúúmiíi̱ íyokavaña xíʼinndó.* Va̱ása yi̱ʼvíndó’”.

6 “Saáchi ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel: ‘Si̱lóʼo tiempo kúma̱ní ta tuku sakánda̱i̱ ndiví xíʼin ñuʼú, saátu mar xíʼin ñuʼú yi̱chí’.

7 ”‘Sakánda̱i̱ ndiʼi ñuu, ta ndiʼi ña̱ʼa ña̱ ndáyáʼvi ña̱ íyo ndiʼi ñuu ki̱ʼviña ini veʼe yóʼo ta yi̱ʼi̱ taxii̱ ña̱ ná ixato̱ʼóníkana veʼe yóʼo’, káchi Jehová ta̱ xáʼndachíñu nu̱ú na̱ ángel.

8 ”‘Kuenta miíi̱ kúú plata xíʼin oro’, káchi Jehová ta̱ xáʼndachíñu nu̱ú na̱ ángel.

9 ”‘Ixato̱ʼóníkana veʼe yóʼo nu̱úka ña̱ xi̱ndichi tá ya̱chi̱’, káchi Jehová ta̱ xáʼndachíñu nu̱ú na̱ ángel.

”‘Ta taxii̱ ña̱ viíní ná kundoona yóʼo’, káchi Jehová ta̱ xáʼndachíñu nu̱ú na̱ ángel”.

10 Tá ki̱vi̱ 24 ña̱ yo̱o̱ 9, tá xa̱a̱ ku̱a̱ʼa̱n u̱vi̱ ku̱i̱ya̱ ña̱ xáʼndachíñu ta̱ Darío, Jehová ni̱ka̱ʼa̱nra ña̱yóʼo xíʼin ta̱ profeta Ageo: 11 “Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel: ‘Ixaún ña̱ ma̱ní nda̱ka̱tu̱ʼun na̱ su̱tu̱ xa̱ʼa̱ iin ña̱ʼa ña̱ káʼa̱n ley xa̱ʼa̱: 12 “Tá iin ta̱a ta̱ánra ku̱ñu ña̱ yi̱i̱ nu̱ú ti̱ko̱to̱ra, ta ti̱ko̱to̱ yóʼo túndaaña si̱ta̱váʼa, ña̱ʼa ña̱ i̱xava̱ʼana kuxuna, vino, aceite á inkaka ña̱ʼa ña̱ kivi kuxuna, ¿á nduyi̱i̱ña?”’”.

Ta na̱ su̱tu̱ nda̱kuiinna: “Va̱ásaví”.

13 Tasaá ta̱ Ageo ni̱nda̱ka̱tu̱ʼunrana: “Tá iin na̱ yiví ku̱yaku̱a̱na xa̱ʼa̱ ña̱ ti̱inna iin na̱ yiví na̱ ni̱xi̱ʼi̱, ta túndaana nda̱a̱ ndáaka ña̱ʼa yóʼo, ¿á kuyaku̱a̱ ña̱ túndaana?”.

Ta na̱ su̱tu̱ nda̱kuiinna: “Kuyaku̱a̱vaña”.

14 Ña̱kán ta̱ Ageo ni̱ka̱ʼa̱nra: “‘Saá íyo na̱ yiví yóʼo, saá íyo na̱ ñuu yóʼo nu̱úi̱, káchi Jehová, ta saátu ndiʼi ña̱ʼa ña̱ kéʼéna xíʼin ndaʼa̱na. Ndiʼi ña̱ʼa ña̱ sóko̱na, ña̱ yaku̱a̱va kúúña’.

15 ”‘Soo vitin, ixandó ña̱ ma̱ní ndakani va̱ʼa xi̱níndó xa̱ʼa̱ ña̱yóʼo, vitin ta saátu ndiʼika ki̱vi̱ ña̱ va̱xi chí nu̱únínu: tá kúma̱níka kixáʼandó ndasava̱ʼandó templo Jehová, 16 ¿ndáaña xi̱kuu? Tá iin na̱ yiví xi̱xaʼa̱nna chí nu̱ú ndóo trigo ña̱ va̱ʼa sakútúna 20 canasta, 10 kuitívaña xi̱chutú; ta tá xi̱xaʼa̱nna chí nu̱ú ñúʼu vino ña̱ va̱ʼa sakútúna 50 ki̱si náʼnu, 20 kuitívaña xi̱chutú. 17 Tá ta̱xii̱ castigo ndaʼa̱ndó, chi̱ndaʼíi̱ ta̱chí niʼní nu̱úndó, ka̱ni kue̱ʼe̱ ndaʼa̱ ña̱ʼa ña̱ chi̱ʼindó ta ni̱ko̱yo ñíí,* soo nda̱a̱ ni iin ndóʼó kǒo níndikó nu̱úi̱’, káchi Jehová.

18 ”‘Ixandó ña̱ ma̱ní, ndakani va̱ʼa xi̱níndó xa̱ʼa̱ ña̱yóʼo, vitin ta saátu ndiʼika ki̱vi̱ ña̱ va̱xi chí nu̱únínu, nani tá ki̱vi̱ 24 ña̱ yo̱o̱ 9, ki̱vi̱ tá ki̱xáʼandó íxava̱ʼandó xa̱ʼa̱ templo Jehová; ndakani va̱ʼa xi̱níndó xa̱ʼa̱ ña̱yóʼo. 19 ¿Á ñúʼu va̱ʼaka trigo íxandó? Tú uva, tú higo, tú ti̱ndísi̱* ta saátu tú olivo... ta̱ʼán taxivínú ku̱i̱ʼi, ¿á su̱ví saá? Soo nani ki̱vi̱ vitin kixáʼíi̱ taxii̱ ña̱ ná kana ku̱a̱ʼání ku̱i̱ʼi ndaʼa̱nú’”.

20 Tá ki̱vi̱ 24 ña̱ yo̱o̱ kán, Jehová ni̱ka̱ʼa̱n tukura xíʼin ta̱ Ageo ta ka̱chira: 21 “Ka̱ʼa̱n xíʼin ta̱ Zorobabel ta̱ xáʼndachíñu chí Judá: ‘Sakánda̱i̱ ndiví xíʼin ñuʼú. 22 Sandíʼi-xa̱ʼíi̱ trono nu̱ú ndóo na̱ rey ta saátu sandíʼi-xa̱ʼíi̱ ndee̱ ña̱ kúúmií ndiʼi na̱ ñuu. Sandíʼi-xa̱ʼíi̱ carretana ta saátu na̱ káva túyóʼo, saátu kuáyi̱ sa̱na̱na xíʼin na̱ yósó* tíyóʼo, iin tá iinna kuvina xíʼin espada ñanina’”.

23 “‘Ki̱vi̱ kán, káchi Jehová ta̱ xáʼndachíñu nu̱ú na̱ ángel, kuniñúʼi̱ yóʼó ta̱ Zorobabel se̱ʼe ta̱ Sealtiel ta̱ káchíñu nu̱úi̱, káchi Jehová, ta xa̱ún koún nda̱a̱ táki̱ʼva íyo iin seʼe̱* ña̱ xíniñúʼuna ña̱ chíkaa̱na sello, saáchi yóʼó kúú ta̱ nda̱kaxii̱n’, káchi Jehová ta̱ xáʼndachíñu nu̱ú na̱ ángel”.