MALAQUÍAS

1 Ña̱yóʼo kúú tu̱ʼun ña̱ ni̱ka̱ʼa̱n Ndióxi̱.

Ña̱yóʼo kúú tu̱ʼun ña̱ ni̱ka̱ʼa̱n Jehová xíʼin ta̱ Malaquías* ná ka̱ʼa̱nra xíʼin na̱ ñuu Israel:

2 “Ni̱na̱ʼi̱ ña̱ kúʼvi̱-inii̱ xínii̱ ndóʼó”, káchi Jehová.

Soo ndóʼó káchindó: “¿Ndáa ki̱ʼva ni̱na̱ʼún ña̱ kúʼvi̱-iniún xíniún ndi̱ʼi̱?”.

“¿Á su̱ví ñani ta̱ Esaú níxi̱kuu ta̱ Jacob? Káchi Jehová. Yi̱ʼi̱ ni̱kuʼvi̱-inii̱ xi̱nii̱ ta̱ Jacob, 3 soo ni̱sa̱a̱-inii̱ xi̱nii̱ ta̱ Esaú. Va̱ása nítaxikai̱ koo nda̱a̱ ni iin ña̱ʼa nu̱ú yuku̱ra ta herenciara sa̱ndákoi̱ña ndaʼa̱ ti̱na* yukú* tí íyo chí nu̱ú ñuʼú yi̱chí”.

4 “Ni ni̱ka̱ʼa̱n na̱ ñuu Edom ña̱yóʼo: ‘Ndi̱ʼi-xa̱ʼa̱ndi̱ soo ndikóvandi̱ sandáʼandi̱ ña̱ ndi̱ʼi-xa̱ʼa̱’, soo Jehová ta̱ xáʼndachíñu nu̱ú na̱ ángel káchira: ‘Na̱kán sandáʼanaña, soo yi̱ʼi̱ sandíʼi-xa̱ʼíi̱ña, ta na̱ yiví chinanínaña “ñuʼú nu̱ú íyoní na̱ kéʼé ña̱ va̱ása va̱ʼa” ta saátu chinanínaña “na̱ ñuu na̱ kǒo kuni̱ka Jehová kunira nda̱a̱ ni iin ki̱vi̱”. 5 Ndóʼó kuninu̱úndó ña̱yóʼo ta kachindó: “Ná ndukáʼnu Jehová iníísaá ñuu Israel”’”.

6 “‘Iin ta̱ loʼo íxato̱ʼóra yivára ta iin ta̱ káchíñundáʼvi íxato̱ʼóra ta̱ káchíñura nu̱ú. Tá saá, tá yi̱ʼi̱ kúú yivándó, ¿nda̱chun va̱ása íxato̱ʼóndó yi̱ʼi̱? Ta tá yi̱ʼi̱ kúú ta̱ káchíñundó nu̱ú, ¿nda̱chun va̱ása íxato̱ʼóndó yi̱ʼi̱?’, káchi Jehová ta̱ xáʼndachíñu nu̱ú na̱ ángel xíʼin ndóʼó na̱ su̱tu̱ na̱ kúndasí ki̱víi̱.

”‘Soo ndóʼó káchindó: “¿Nda̱chun káʼún ña̱ va̱ása íxato̱ʼóndi̱ ki̱vi̱ún?”’.

7 ”‘Saáchi sóko̱ndó* ña̱ʼa ña̱ ku̱yaku̱a̱ nu̱ú altar ña̱ kúúmiíi̱’.

”‘Ta ndóʼó káchindó: “¿Ndáa ki̱ʼva kúú ña̱ i̱xayaku̱a̱ndi̱ yóʼó?”’.

”‘Káchindó “Va̱ása xíniñúʼu ixato̱ʼóvíyó altar Jehová”. 8 Tá sóko̱ndó iin kití tí kúáa,* káchindó: “Va̱ʼavarí”. Ta tá sóko̱ndó iin kití tí lenko á tí kúúmií kue̱ʼe̱, káchindó: “Va̱ʼavarí”’”.

“Ixandó ña̱ ma̱ní, so̱kóndórí nu̱ú ta̱ xáʼndachíñu nu̱úndó. ¿Á kusi̱í-inira xíʼinndó? ¿Á vií ndakiʼinra ndóʼó?”, káchi Jehová ta̱ xáʼndachíñu nu̱ú na̱ ángel.

9 “Ta vitin ka̱ʼa̱n-ndáʼvindó xíʼin Ndióxi̱, ta ka̱ʼa̱nndó xíʼinra ña̱ ná kundáʼvi-inira kunira miíyó. Tá ndóʼó sóko̱ndó ña̱ʼa yóʼo, ¿á kusi̱í-inii̱ ndakiʼii̱n ndóʼó?”, káchi Jehová ta̱ xáʼndachíñu nu̱ú na̱ ángel.

10 “¿Ndáa ndóʼó kúni̱ ndakasi yéʼé?* Chi nda̱a̱ kúni̱ndó ña̱ chaʼvina ndóʼó ña̱ va̱ʼa ndatuunndó ñuʼu̱ nu̱ú altar ña̱ kúúmiíi̱. Va̱ása kúsi̱í-inii̱ xíʼinndó, ta ni va̱ása kúsi̱í-inii̱ xíʼin nda̱a̱ ni iin ña̱ʼa ña̱ sóko̱ndó nu̱úi̱”, káchi Jehová ta̱ xáʼndachíñu nu̱ú na̱ ángel.

11 “Chí nu̱ú kíta ñu̱ʼu* iinsaá nda̱a̱ nu̱ú kíʼviña, ndiʼi na̱ ñuu ndasakáʼnuna ki̱víi̱. Iníí so̱kóna kití nu̱úi̱ ña̱ va̱ʼa kokorí* ta kana yi̱ʼma̱rí. Ta so̱kóna ña̱ʼa yóʼo ña̱ va̱ʼa ndukáʼnu ki̱víi̱; ta ña̱yóʼo kooña iin regalo ña̱ va̱ʼaní nu̱úi̱. Saáchi ki̱víi̱ ndukáʼnuña nu̱ú ndiʼi na̱ ñuu”, káchi Jehová ta̱ xáʼndachíñu nu̱ú na̱ ángel.

12 “Soo ndóʼó kǒo íxato̱ʼóndó ki̱víi̱ ta káchindó ‘Ña̱ ku̱yaku̱a̱va kúú altar Jehová ta va̱ása ndáyáʼvi ña̱ʼa ña̱ ndóso nu̱úña’. 13 Ta saátu káchindó, ‘Kúxúxanníndi̱ nu̱úña’, ta kúndasíndó xínindóña káchi Jehová ta̱ xáʼndachíñu nu̱ú na̱ ángel. Ndóʼó va̱xindó xíʼin kití tí i̱xakuíʼnándó, tí lenko á tí kúúmií kue̱ʼe̱. Ta tíyóʼo kúú tí táxindó ndaʼíi̱. ¿Á xíniñúʼu ndakiʼii̱n tíyóʼo ndaʼa̱ndó?”, káchi Jehová.

14 “Na̱ yiví na̱ kéʼé iin trato xíʼin Jehová ta sóko̱na iin kití tí ndu̱chiʼña nu̱úra ná ndakiʼinna chiʼña, saáchi ni kúúmiína iin ndikachi* che̱e tí kǒo kue̱ʼe̱ kúúmií xíʼin kití sa̱na̱na tí kivi so̱kóna, kǒo sóko̱narí. Saáchi yi̱ʼi̱ kúi̱ iin Rey ta̱ káʼnuní, ta ndiʼi na̱ ñuu yi̱ʼvína tá ná kuniso̱ʼona ki̱víi̱ ta ixato̱ʼónaña”, káchi Jehová ta̱ xáʼndachíñu nu̱ú na̱ ángel.

2 “Ta vitin, ña̱yóʼo kúú chiñu ña̱ xáʼndai̱ nu̱ú ndóʼó na̱ su̱tu̱. 2 Tá kǒo xíínndó kuniso̱ʼondó ña̱ káʼi̱n ta su̱ví xíʼin ndiʼi níma̱ndó íxato̱ʼóndó ki̱víi̱, sakúisochiʼñai̱* ndóʼó ta chiʼñava ndasai̱ bendición ña̱ kúúmiíndó. Ña̱kán, xa̱ʼa̱ ña̱ su̱ví xíʼin ndiʼi níma̱ndó íxato̱ʼóndó ki̱víi̱, chiʼñava ndasai̱ bendición ña̱ kúúmiíndó”, káchi Jehová ta̱ xáʼndachíñu nu̱ú na̱ ángel.

3 “Kotondó. Xa̱ʼa̱ ña̱ ke̱ʼéndó sandíʼi-xa̱ʼíi̱ si̱ʼva̱ ña̱ chi̱ʼindó, kundai̱ si̱ʼví nu̱úndó, si̱ʼví kití tí xi̱sokóndó* tá xi̱keʼéndó vikó, ta kuniʼina ndóʼó ku̱ʼu̱nna nda̱a̱ nu̱ú ndóo ña̱kán.* 4 Tasaá kunda̱a̱-inindó ña̱ yi̱ʼi̱ kúú ta̱ xáʼnda chiñu yóʼo nu̱úndó ña̱ va̱ʼa kǒo ndiʼi-xa̱ʼa̱ trato ña̱ ke̱ʼíi̱ xíʼin ta̱ Leví”, káchi Jehová ta̱ xáʼndachíñu nu̱ú na̱ ángel.

5 “Trato ña̱ ke̱ʼíi̱ xíʼinra chi̱ndeétáʼanña xíʼinra ña̱ kutakura ta saátu ña̱ va̱ʼaní koora. Xa̱ʼa̱ ña̱ ta̱xii̱ bendición yóʼo ndaʼa̱ra i̱xato̱ʼóníra yi̱ʼi̱. Xa̱ʼa̱ ña̱ xi̱ndasakáʼnura ki̱víi̱, xi̱saa̱-inira xi̱xinira ndiʼi ña̱ʼa ña̱ kǒo níxi̱kutói̱. 6 Ta̱kán xi̱sanáʼa̱ra xa̱ʼa̱ ley ña̱ nda̱a̱ ta kǒo níxi̱kaʼa̱nra ña̱ʼa ña̱ va̱ása va̱ʼa. Nda̱kúní ni̱xi̱yo ña̱ xi̱keʼéra xa̱ʼa̱ Ndióxi̱ ta va̱ʼaní xi̱kitáʼanra xíʼinra, ta chi̱ndeétáʼanra xíʼin ku̱a̱ʼánína ña̱ kǒo ku̱ʼu̱nkana yichi̱ ña̱ va̱ása va̱ʼa. 7 Saáchi ta̱ su̱tu̱ kúú ta̱ xíniñúʼu sanáʼa̱ xa̱ʼa̱ ña̱ xíni̱ra, na̱ ñuu xíniñúʼu nda̱ka̱tu̱ʼunnara xa̱ʼa̱ ña̱ káʼa̱n ley, ndiʼi tiempo xíniñúʼu kuxini̱ ta̱ su̱tu̱ xa̱ʼa̱ ley, saáchi ta̱yóʼo kúú ta̱ xíniñúʼu Jehová ta̱ xáʼndachíñu nu̱ú na̱ ángel ña̱ va̱ʼa ka̱ʼa̱nra xa̱ʼa̱ ña̱ kúni̱ra.

8 ”Soo ndóʼó sa̱ndákoondó yichi̱ ña̱ ku̱a̱ʼa̱nndó. Ta xa̱ʼa̱ ña̱ ke̱ʼéndó, ku̱a̱ʼání na̱ yiví va̱ása ndíku̱nkana ña̱ káʼa̱n ley Ndióxi̱. Sa̱ndíʼi-xa̱ʼa̱ndó trato ña̱ ke̱ʼíi̱ xíʼin ta̱ Leví, káchi Jehová ta̱ xáʼndachíñu nu̱ú na̱ ángel. 9 Xa̱ʼa̱ ña̱kán, taxii̱ ña̱ ná kundasí inkana kunina ndóʼó ta sakúkaʼi̱n nu̱úndó nu̱ú ndiʼi na̱ ñuu, saáchi va̱ása níxi̱ndiku̱nndó yichíi̱ ta saátu va̱ása inkáchi níxi̱keʼéndó xíʼin ndiʼi na̱ yiví tá xi̱ndiku̱nndó ña̱ xi̱kaʼa̱n ley”.

10 “¿Á su̱ví iin kuitíva kúú yivá ndiʼiyó? ¿Á su̱ví iin kuití Ndióxi̱ kúú ta̱ i̱xava̱ʼa ndiʼiyó? Tá saá, ¿nda̱chun sándaʼvi-táʼanyó tá íxayaku̱a̱yó trato ña̱ ke̱ʼé na̱ táʼanyó na̱ xi̱ndoo xi̱naʼá? 11 Na̱ ñuu Judá sa̱ndáʼvina. Na̱ ñuu Israel xíʼin na̱ ñuu Jerusalén ke̱ʼéna iin ña̱ʼa ña̱ kininí. Saáchi na̱ ñuu Judá i̱xayaku̱a̱na ña̱ yi̱i̱* ña̱ kúúmií Jehová, ña̱ yi̱i̱ ña̱ kúni̱níra xínira, ta ti̱ndaʼa̱na xíʼin ná ñaʼá ná ndásakáʼnu inka ndióxi̱. 12 Ndiʼi na̱ kéʼé ña̱yóʼo na̱ íyo chí veʼe válí ta̱ Jacob, ni nda̱a̱ ndáakana kúúna, sandíʼi-xa̱ʼa̱va Jehová na̱yóʼo, ni ná so̱kóna iin ña̱ʼa nu̱ú Jehová ta̱ xáʼndachíñu nu̱ú na̱ ángel”.

13 “Ta saátu, ndóʼó kéʼéndó inka ña̱ʼa, ta xa̱ʼa̱ ña̱yóʼo iin chu̱tú nu̱ú altar Jehová xíʼin nduta̱ nu̱úna xa̱ʼa̱ ña̱ xákuna ta tánana, xa̱ʼa̱ ña̱kán kǒo kíʼinkara kuenta xíʼin ña̱ʼa ña̱ sóko̱ndó nu̱úra ta ni va̱ása kíndo̱oka-inira xíʼin nda̱a̱ ni iin ña̱ʼa ña̱ táxindó ndaʼa̱ra. 14 Ta ndóʼó ndáka̱tu̱ʼunndó: ‘¿Ndáa xa̱ʼa̱ kúu ña̱yóʼo?’. Saáchi Jehová kúúra testigo xa̱ʼa̱ miíún ta saátu xa̱ʼa̱ ñá síʼún ñá ti̱ndaʼa̱ xíʼún tá ni̱xi̱yo loʼokaún, ta sa̱ndáʼviúnñá ni kúúñá ñá ti̱ndaʼa̱ va̱ʼa xíʼún ta íyoñá xíʼún. 15 Soo ni̱xi̱yo iin ta̱ kǒo níkeʼé ña̱yóʼo, saáchi xi̱kuumiíkara espíritu santo. ¿Ta ndáana xi̱ndakanixi̱ní ta̱yóʼo xa̱ʼa̱? Na̱ xi̱ndakanixi̱níra xa̱ʼa̱ kúú na̱ se̱ʼe Ndióxi̱, na̱ ñuu na̱ nda̱kaxin Ndióxi̱. Xa̱ʼa̱ ña̱kán kiʼinníndó kuenta xíʼin ki̱ʼva ña̱ kéʼéndó ta va̱ása sandáʼvindó ñá síʼindó ñá ti̱ndaʼa̱ xíʼinndó tá ni̱xi̱yo válíkandó. 16 Saáchi yi̱ʼi̱ sáa̱-inii̱ xínii̱ na̱ sándákootáʼan, káchi Jehová, Ndióxi̱ na̱ ñuu Israel, ta saátu sáa̱-inii̱ xínii̱ na̱ kútóoní kanitáʼan, káchi Jehová ta̱ xáʼndachíñu nu̱ú na̱ ángel. Kiʼinníndó kuenta xíʼin ki̱ʼva ña̱ kéʼéndó ta kǒo sandáʼvindó.

17 ”Ndóʼó xa̱a̱ sa̱kúnaandó Jehová xíʼin tu̱ʼun ña̱ káʼa̱nndó. Soo káchindó: ‘¿Ndáa ki̱ʼva sa̱kúnaandi̱ra?’. Kéʼéndó ña̱yóʼo xa̱ʼa̱ ña̱ káʼa̱nndó ‘Ndiʼi na̱ kéʼé ña̱ va̱ása va̱ʼa, va̱ʼavana nu̱ú Jehová ta kíndo̱ova-inira xíʼinna’, á xa̱ʼa̱ ña̱ káʼa̱ntundó ‘¿Ndáa míí ku̱a̱ʼa̱n Ndióxi̱ ta̱ kéʼé ña̱ nda̱kú?’”.

3 “Kotondó, chindaʼíi̱ iin ta̱ ku̱ʼu̱n xíʼin tu̱ʼi̱n, ta̱yóʼo kúú ta̱ kunúu ku̱ʼu̱n chí nu̱ú ta ndasaviíra* yichi̱ ña̱ xa̱i̱. Ndióxi̱ ta̱ nda̱a̱ ta̱ nándukúndó, iin kama kixira chí ini templora. Kixi ta̱ níʼi tu̱ʼun ña̱ káʼa̱n xa̱ʼa̱ trato, ta̱ kúsi̱íní-inindó ndátundó. Kotondó, kixivara”, káchi Jehová ta̱ xáʼndachíñu nu̱ú na̱ ángel.

2 “Soo, ¿ndáana kundeé-ini ki̱vi̱ ña̱ ná kixira? ¿Ndáana kundeé kundita tá ná ndetara?* Saáchi ta̱yóʼo koora nda̱a̱ táki̱ʼva íyo iin ñuʼu̱ ña̱ ndásandii* iin ka̱a, ta koora nda̱a̱ táki̱ʼva íyo na̱ma̱ tí ndákatana ti̱ko̱to̱. 3 Ta nda̱a̱ táki̱ʼva kéʼé na̱ sánduta plata ta ndásandiinaña saá ndasandiira na̱ se̱ʼe ta̱ Leví. Ndasandiirana nda̱a̱ táki̱ʼva ndásandiina oro ta saátu plata, ta nda̱a̱ táki̱ʼva koo na̱ yiví na̱ sóko̱* iin ña̱ va̱ʼa saá koona nu̱ú Jehová. 4 Ta kusi̱íní-ini Jehová xíʼin ña̱ʼa ña̱ so̱kó na̱ ñuu Judá nu̱úra ta saátu ña̱ so̱kó na̱ ñuu Jerusalén nu̱úra, nda̱a̱ táki̱ʼva xi̱kusi̱í-inira tiempo xi̱naʼá.

5 ”Kuyatii̱n nu̱úndó ña̱ va̱ʼa ndatii̱n ku̱a̱chi xíʼinndó, ta kamaní ndatii̱n ku̱a̱chi xíʼin na̱ kéʼé ña̱ tási, na̱ kísi̱ xíʼin na̱ kǒo nítindaʼa̱ xíʼinna, na̱ chínaʼá* xa̱ʼa̱ ña̱ vatá,* na̱ sándaʼvi na̱ káchíñu táti̱,* na̱ sándaʼvi ñá ni̱xi̱ʼi̱ yii̱, na̱ sándaʼvi na̱ ni̱xi̱ʼi̱ yivá, ta saátu na̱ kǒo xíín chindeétáʼan xíʼin na̱ inka ñuu. Na̱ yiví yóʼo va̱ása íxato̱ʼóna yi̱ʼi̱”, káchi Jehová ta̱ xáʼndachíñu nu̱ú na̱ ángel.

6 “Yi̱ʼi̱ kúú Jehová ta va̱ása nása̱mai̱.* Ndóʼó kúúndó se̱ʼe ta̱ Jacob ta kúma̱níva ndiʼi-xa̱ʼa̱ndó. 7 Nani tá xi̱ndoo na̱ táʼanndó tiempo xi̱naʼá, ku̱xíkándó nu̱ú chiñu ña̱ xáʼndai̱ ta va̱ása ndíku̱nndóña. Ndikóndó nu̱úi̱ ta yi̱ʼi̱ ndikói̱ nu̱úndó”, káchi Jehová ta̱ xáʼndachíñu nu̱ú na̱ ángel.

Soo ndóʼó káchindó: “¿Á ku̱xíkándi̱ nu̱ún ña̱kán kúú ña̱ ndikóndi̱ nu̱ún?”.

8 “¿Á kuchiñu iin ta̱a ixakuíʼnára ña̱ʼa nu̱ú Ndióxi̱? Ndóʼó kéʼévandó ña̱yóʼo saáchi íxakuíʼnándó ña̱ʼa nu̱úi̱”.

Ta ndóʼó káchindó: “¿Ama i̱xakuíʼnándi̱ ña̱ʼa nu̱ún?”.

“Ndóʼó va̱ása táxindó iin táʼví* ña̱ʼa ña̱ kúúmiíndó ndaʼíi̱ ta ni va̱ása táxindó inkaka ña̱ʼa ndaʼíi̱. 9 Ndóʼó ndakiʼinndó castigo chi íxakuíʼnándó ña̱ʼa ña̱ kúúmiíi̱. Ta ndiʼi na̱ ñuu kéʼé ña̱yóʼo. 10 Taxindó iin táʼví* ndiʼi ña̱ʼa ña̱ kúúmiíndó ña̱ va̱ʼa nde̱eva̱ʼaña* tasaá koo ña̱ kuxuna ini veʼi̱. Ixandó ña̱ ma̱ní, kotondosóndó yi̱ʼi̱, káchi Jehová ta̱ xáʼndachíñu nu̱ú na̱ ángel, ta kunindó ña̱ kunái̱ chí ndiví ta nda̱a̱ táki̱ʼva kúun sa̱vi̱ saá sakóyoi̱ ku̱a̱ʼání ña̱ va̱ʼa ndakiʼinndó nda̱a̱ ná kǒo kuma̱níka nda̱a̱ ni iin ña̱ʼa nu̱úndó”.

11 “Xa̱ʼa̱ ndóʼó kúú ña̱ va̱ása taxikai̱ sandíʼi-xa̱ʼa̱ ti̱ka náʼnu ña̱ chíʼindó, va̱ása sandíʼi-xa̱ʼa̱rí ña̱ʼa ña̱ ná kana nu̱ú ñuʼúndó, ta koova ku̱i̱ʼi ndaʼa̱ tú uvandó”, káchi Jehová ta̱ xáʼndachíñu nu̱ú na̱ ángel.

12 “Ndiʼi na̱ ñuu ka̱ʼa̱nna xa̱ʼa̱ndó ña̱ kúsi̱íní-inindó, saáchi ndóʼó kundoondó iin ñuu nu̱ú kusi̱íní-inindó”, káchi Jehová ta̱ xáʼndachíñu nu̱ú na̱ ángel.

13 “Ndóʼó káʼa̱nndó ña̱ va̱ása va̱ʼa xa̱ʼíi̱”, káchi Jehová.

Ta ndóʼó káchindó: “¿Ama ni̱ka̱ʼa̱nndi̱ ña̱ va̱ása va̱ʼa xa̱ʼún xíʼin táʼanndi̱?”.

14 “Ndóʼó káchindó: ‘Kǒo xa̱ʼa̱ví ña̱ ndasakáʼnuyó Ndióxi̱. ¿Ndáaña va̱ʼa nda̱kiʼinyó xa̱ʼa̱ ña̱ ke̱ʼéyó ndiʼi chiñu nu̱úra? ¿Ndáaña va̱ʼa nda̱kiʼinyó xa̱ʼa̱ ña̱ ni̱na̱ʼa̱yó ña̱ kúsuchí-iniyó xa̱ʼa̱ ku̱a̱chi ña̱ ni̱ki̱ʼviyó nu̱ú Jehová ta̱ xáʼndachíñu nu̱ú na̱ ángel? 15 Vitin, ka̱ʼa̱nyó ña̱ si̱íníkava íyo na̱ yiví na̱ ni̱nu kúni. Ta na̱ yiví na̱ kéʼé ña̱ va̱ása va̱ʼa, va̱ʼaní kána ña̱ kéʼéna. Xítondosóna Ndióxi̱ ta kǒo ña̱ ndóʼona’”.

16 Tiempo saá, na̱ xi̱ ixato̱ʼó Jehová ki̱xáʼana káʼa̱nna xíʼin táʼanna, iin tá iinna xi̱kaʼa̱nna xíʼin na̱ kítáʼan xíʼinna, ta viíní xi̱xiniso̱ʼo Jehová ña̱ xi̱kaʼa̱nna. Jehová kúúmiíra iin libro nu̱ú káʼyi̱ ki̱vi̱ na̱ íxato̱ʼó-ñaʼá, ta saátu káʼyi̱ ki̱vi̱ na̱ ndákanixi̱ní xa̱ʼa̱ ki̱vi̱ra* ña̱ va̱ʼa ndakaʼánra xa̱ʼa̱na.

17 Jehová ta̱ xáʼndachíñu nu̱ú na̱ ángel káchira: “Na̱yóʼo xa̱a̱na koona kuentai̱, ki̱vi̱ ña̱ ná ndaka̱xii̱nna ña̱ koona na̱ ñuu miíi̱ na̱ ndáyáʼviní. Kundáʼvi-inii̱ kunii̱na nda̱a̱ táki̱ʼva kúndáʼvi-ini iin ta̱a xínira se̱ʼera ta̱ kándíxa miíra. 18 Kuni tukundó ña̱ síín íyo na̱ nda̱kú-ini nu̱ú na̱ ndi̱va̱ʼa-ini, ña̱ síín íyo na̱ káchíñu nu̱ú Ndióxi̱ nu̱ú na̱ va̱ása káchíñu nu̱úra”.

4 Jehová ta̱ xáʼndachíñu nu̱ú na̱ ángel káchira: “Kuniso̱ʼondó. Xa̱a̱ va̱xi ki̱vi̱ ta ndeéní niʼní koo ki̱vi̱ yóʼo nda̱a̱ táki̱ʼva niʼní iin horno,* ndiʼi na̱ yiví na̱ ni̱nuní kúni xíʼin ndiʼi na̱ yiví na̱ kéʼé ña̱ va̱ása va̱ʼa, koona nda̱a̱ táki̱ʼva íyo ku̱ʼu̱ yi̱chí. Ndiʼi-xa̱ʼa̱na ki̱vi̱ ña̱ xa̱a̱ ku̱nu̱mí kixaa̱ ta nda̱a̱ ni loʼokana va̱ása kindo̱o. 2 Soo ñu̱ʼu* ña̱ táxi ña̱ koo ña̱ nda̱kú, tu̱u̱nña sa̱tá ndóʼó na̱ íxato̱ʼó ki̱víi̱, ta tá ná ndaye̱ʼe̱ña nu̱úndó kivi sandáʼaña ndóʼó. Ta ndavandó nda̱a̱ táki̱ʼva ndáva si̱ndi̱ki̱ válí tí ndu̱nduʼú”.

3 “Ta ndóʼó ku̱a̱ñi̱ndó* na̱ ndi̱va̱ʼa-ini saáchi ki̱vi̱ ña̱ ná keʼíi̱ ña̱yóʼo, na̱yóʼo koona nda̱a̱ táki̱ʼva íyo yáká* ña̱ xáñi̱ndó”, káchi Jehová ta̱ xáʼndachíñu nu̱ú na̱ ángel.

4 “Ndakaʼánndó xa̱ʼa̱ Ley ña̱ ta̱xii̱ ndaʼa̱ ta̱ Moisés ta̱ xi̱kachíñu nu̱úi̱, saátu ndakaʼánndó xa̱ʼa̱ chiñu ña̱ xa̱ʼndai̱ ta saátu ley ña̱ ta̱xii̱ chí Horeb ña̱ va̱ʼa ná kundiku̱n ndiʼi na̱ ñuu Israel ña̱yóʼo.

5 ”Kotondó. Tá kúma̱níka kixaa̱ ki̱vi̱ káʼnu Jehová, ki̱vi̱ ña̱ ndakanda̱ní-inindó* xíʼin, chindaʼíi̱ ta̱ profeta Elías xa̱a̱ra nu̱úndó. 6 Ta ta̱ Elías taxira ña̱ ná nduu níma̱ na̱ íyo se̱ʼe nda̱a̱ táki̱ʼva íyo níma̱ na̱ se̱ʼena, ta níma̱ na̱ se̱ʼena nduuña nda̱a̱ táki̱ʼva íyo níma̱ na̱ yivána, tasaá va̱ása kixii̱ ta sandíʼi-xa̱ʼíi̱ ñuʼú”.

(Yóʼo ndíʼi ña̱ ni̱ka̱ʼyi̱ tu̱ʼun hebreo xíʼin arameo ta kíxáʼa ña̱ ni̱ka̱ʼyi̱ tu̱ʼun griego).