FILIPENSES

1 Yi̱ʼi̱ ta̱ Pablo xíʼin ta̱ Timoteo, na̱ káchíñu nu̱ú ta̱ Cristo Jesús, káʼyíndi̱ ña̱yóʼo ku̱xa̱a̱ nu̱ú na̱ nda̱kaxin Ndióxi̱* na̱ kítáʼan xíʼin ta̱ Cristo Jesús na̱ ndóo chí Filipos ta saátu nu̱ú na̱ anciano xíʼin na̱ siervo ministerial:

2 Va̱ʼaní ná koo ini yiváyó Ndióxi̱ xíʼinndó saátu tátayó Jesucristo ta va̱ʼaní ná kutáʼanndó xíʼinna.

3 Ndiʼi yichi̱ táxii̱ tíxa̱ʼvi ndaʼa̱ Ndióxi̱ tá ndákaʼíi̱n xa̱ʼa̱ndó. 4 Ndiʼi yichi̱ káʼa̱n-ndáʼvii̱ xa̱ʼa̱ndó xíʼin Ndióxi̱, ta xíʼin ña̱ si̱í-ini kéʼíi̱ña. 5 Káʼi̱n xíʼinra xa̱ʼa̱ ña̱ va̱ʼaní chiñu kéʼéndó ña̱ nátúʼunndó xa̱ʼa̱ tu̱ʼun va̱ʼa,* nani tá na̱kunda̱a̱-inindó xa̱ʼa̱ña iinsaá nda̱a̱ vitin. 6 Saáchi ni loʼo va̱ása xíka-inii̱ xa̱ʼa̱ ña̱yóʼo: ta̱ chi̱ndeétáʼan xíʼinndó ña̱ ki̱xáʼandó kéʼéndó iin chiñu ña̱ va̱ʼaní, chindeétáʼantura xíʼinndó nda̱a̱ ná sandíʼindó keʼéndóña tá ná kixaa̱ ki̱vi̱ ta̱ Cristo Jesús. 7 Ña̱ va̱ʼava kúú ña̱ ndákanixi̱níi̱ ña̱yóʼo xa̱ʼa̱ndó, saáchi ñúʼuní-inii̱ xa̱ʼa̱ndó. Ndióxi̱ ni̱na̱ʼa̱ra ña̱ va̱ʼaní-inira xíʼin ndóʼó ta saátu xíʼin yi̱ʼi̱ chi ndiʼi ndóʼó chi̱ndeétáʼanndó xíʼi̱n tá xi̱ndika̱i̱ veʼeka̱a, ta saátu nátúʼunndó xa̱ʼa̱ tu̱ʼun va̱ʼa nda̱a̱ táki̱ʼva káʼa̱n ley ña̱ va̱ʼa kǒo ni iin ña̱ʼa kivi kasi nu̱ú ña̱yóʼo.

8 Ndióxi̱ kúnda̱a̱va-inira ña̱ ndákaʼánníi̱ xa̱ʼa̱ndó ta saátu ña̱ kúʼvi̱ní-inii̱ xínii̱ ndóʼó nda̱a̱ táki̱ʼva kéʼé ta̱ Cristo Jesús. 9 Ta ña̱yóʼo kúú ña̱ ndúkúi̱ nu̱ú Ndióxi̱ tá káʼi̱n xíʼinra: ña̱ ná kuʼvi̱ka-inindó kunitáʼanndó,* ña̱ ná kunda̱a̱ va̱ʼa inindó xa̱ʼa̱ Ndióxi̱ ta vií va̱ʼa koo ña̱ ndákanixi̱níndó, 10 ña̱ ná kiʼin va̱ʼandó kuenta ndáa ña̱ʼa kúú ña̱ ndáyáʼvika, ña̱ va̱ʼa viíní ná koo ña̱ keʼéndó ta kǒo sandákavandó-ini inkana nda̱a̱ ná kixaa̱ ki̱vi̱ ta̱ Cristo, 11 ta xa̱ʼa̱ ña̱ chíndeétáʼan ta̱ Jesucristo xíʼinndó keʼéndó nina ña̱ va̱ʼa ta xíʼin ña̱yóʼo na̱ yiví ixato̱ʼóna Ndióxi̱ ta ndasakáʼnunara.

12 Ñaniyó, kúni̱i̱ ña̱ ná kunda̱a̱-inindó ña̱ ndiʼi ña̱ ndóʼi̱ yóʼo, ndóʼi̱ña ña̱ va̱ʼa ná xa̱a̱ ku̱a̱ʼákana kunda̱a̱-inina xa̱ʼa̱ tu̱ʼun va̱ʼa, 13 saáchi ndiʼi na̱ soldado na̱ ndáa yéʼéchíñu ta̱ rey ñuu Roma xíʼin ndiʼika na̱ yiví, kúnda̱a̱-inina ña̱ ndíka̱i̱ veʼeka̱a xa̱ʼa̱ ta̱ Cristo. 14 Ta vitin, ku̱a̱ʼání na̱ ñaniyó na̱ kándíxa tátayó, xa̱ʼa̱ ña̱ kúnda̱a̱-inina ña̱ ndíka̱i̱ veʼeka̱a va̱ása xíka-inina, ta ndakúní íyo inina nátúʼunna xa̱ʼa̱ tu̱ʼun Ndióxi̱ ta va̱ása yíʼvina.

15 Ndixava, íyo sava na̱ xíka nátúʼun xa̱ʼa̱ ta̱ Cristo xa̱ʼa̱ ña̱ kúini̱-inina* á xa̱ʼa̱ ña̱ kúni̱na keetáʼanna xíʼi̱n, soo inkatuna xíʼin ndinuʼu-inina nátúʼunna xa̱ʼa̱ra. 16 Ta xíʼin ndinuʼu-inina kéʼénaña chi kúʼvi̱-inina xínina ta̱ Cristo, saáchi na̱yóʼo kúnda̱a̱-inina ña̱ xa̱ʼa̱ ña̱yóʼo kúú ña̱ nda̱kaxin Ndióxi̱ yi̱ʼi̱ ña̱ natúʼi̱n xa̱ʼa̱ tu̱ʼun va̱ʼa, 17 soo inkana xíkana nátúʼunna xa̱ʼa̱ra soo kéʼénaña xa̱ʼa̱ ña̱ kúini̱-inina, ta kǒo ña̱ va̱ʼa ndíka̱a̱-inina, ta kúni̱na sakákuna ku̱a̱chi xíʼi̱n nani ndíka̱i̱ veʼeka̱a yóʼo. 18 Xa̱ʼa̱ ña̱ kéʼéna ña̱yóʼo, ¿ndáaña kúu? Ni xíʼin ndinuʼu-inina xíkana nátúʼunna xa̱ʼa̱ ta̱ Cristo á va̱ása, soo na̱ nátúʼun kúúvana xa̱ʼa̱ra ta ña̱yóʼo sákusi̱íña-inii̱. Ta kusi̱íkava-inii̱ 19 saáchi kúnda̱a̱-inii̱ ña̱ ka̱kui̱ xa̱ʼa̱ ña̱ káʼa̱n-ndáʼvindó xa̱ʼíi̱ xíʼin Ndióxi̱, ta saátu xa̱ʼa̱ ña̱ chíndeétáʼan espíritu santo ña̱ kúúmií ta̱ Jesucristo xíʼi̱n. 20 Kǒo xíka-inii̱ ta kándíxaníi̱ ña̱ kǒo kukaʼan nu̱úi̱ xa̱ʼa̱ nda̱a̱ ni iin ña̱ʼa. Saáchi va̱ása yíʼvii̱ ka̱ʼi̱n, ta xíʼin ña̱ kéʼíi̱ vitin ta saátu xíʼin ña̱ ke̱ʼíi̱ tá ya̱chi̱ ndúkáʼnu ta̱ Cristo. Ta ndakundeíi̱ keʼíi̱ ña̱yóʼo ni tákui̱ á ni̱xi̱ʼi̱vai̱.

21 Saáchi yi̱ʼi̱ tá tákui̱, tákui̱ xa̱ʼa̱ ta̱ Cristo ta tá ni̱xi̱ʼi̱i̱ iin ña̱ va̱ʼaní kúútu ña̱yóʼova. 22 Tá xíniñúʼu kutakukai̱ nu̱ú ñuʼú yóʼo ná kutakui̱ ña̱ va̱ʼa ku̱a̱ʼáka chiñu keʼíi̱.* Soo ni saá va̱ása xíni̱i̱ ndáaña ndaka̱xii̱n. 23 Saáchi ni kǒo xíni̱i̱ ndáaña ndaka̱xii̱n chi xa̱a̱ kúni̱i̱ sa̱ñái̱ ña̱ va̱ʼa koi̱ xíʼin ta̱ Cristo chi va̱ʼaníkava ña̱yóʼo. 24 Soo ña̱ va̱ʼakava kúú ña̱ ná kutakui̱ nu̱ú ñuʼú yóʼo ña̱ va̱ʼa chindeétáʼi̱n xíʼin ndóʼó. 25 Xa̱ʼa̱ ña̱kán, va̱ása xíka-inii̱. Chi kúnda̱a̱va-inii̱ ña̱ kutakukai̱ ta koi̱ xíʼinndó ña̱ va̱ʼa kuaʼnukandó xíʼin tu̱ʼun Ndióxi̱ ta si̱í koo inindó ña̱ kandíxandóra. 26 Ta tá ná ndikó tukui̱ kunii̱ ndóʼó, kusi̱íní-inindó xa̱ʼa̱ ña̱ ndíku̱nndó ta̱ Cristo Jesús.

27 Viíní keʼéndó nda̱a̱ táki̱ʼva káʼa̱n tu̱ʼun va̱ʼa ña̱ nátúʼunndó xa̱ʼa̱ ta̱ Cristo, ña̱kán ni ná xa̱i̱ kunii̱ ndóʼó á va̱ása xa̱i̱, kivi kuniso̱ʼi̱ ña̱ ka̱ʼa̱n va̱ʼana xa̱ʼa̱ndó ta kivi kunda̱a̱-inii̱ ña̱ va̱ʼaní kítáʼanndó ta kǒo sandákoondó keʼéndó ña̱yóʼo* xa̱ʼa̱ ña̱ inkáchi chiñu kéʼé ndiʼindó, chi inkáchi kítáʼanndó káchíñundó ña̱ va̱ʼa ku̱a̱ʼákana kunda̱a̱-ini tu̱ʼun va̱ʼa xa̱ʼa̱ Ndióxi̱. 28 Ta va̱ása yi̱ʼvíndó kunindó na̱ sáa̱-ini xíni ndóʼó ta xíʼin ña̱yóʼo na̱ʼa̱ndó ña̱ na̱ ndiʼi-xa̱ʼa̱ koo na̱kán ta ndóʼó na̱ ka̱kuva koondó, ta mií Ndióxi̱ kúú ta̱ káʼa̱n xa̱ʼa̱ ña̱yóʼo. 29 Saáchi iin ña̱ va̱ʼaní kúú ña̱ nda̱kiʼinndó ña̱ kúnda̱a̱-inindó xa̱ʼa̱ ta̱ Cristo ta kándíxandóra. Soo su̱ví ña̱yóʼo kuití, chi nda̱a̱ xo̱ʼvi̱ndó xa̱ʼa̱ra. 30 Ña̱kán xóʼvi̱ndó nda̱a̱ táki̱ʼva ni̱xo̱ʼvi̱ yi̱ʼi̱, ta kúnda̱a̱-inindó ña̱ nda̱a̱ vitin xóʼvi̱kavai̱.

2 Xa̱ʼa̱ ña̱ kítáʼanndó xíʼin ta̱ Cristo, xa̱ʼa̱ ña̱ sándi̱kondó-ini inkana ta chíka̱a̱ndó ndee̱ xíʼinna chi kúʼvi̱-inindó xínindóna, xa̱ʼa̱ ña̱ náʼa̱ndó ña̱ ndíʼi̱-inindó xa̱ʼa̱ inkana, xa̱ʼa̱ ña̱ kúni̱ndó xínindóna ta saátu xa̱ʼa̱ ña̱ kúndáʼvi-inindó xínindóna, 2 na̱ʼa̱ndó ña̱ inkáchi íyo ña̱ ndákanixi̱níndó, ña̱ inkáchi kúʼvi̱-inindó xínitáʼanndó, ña̱ inkáchi kítáʼanndó ta inkáchi ná koo ña̱ ndakanixi̱níndó, keʼéndó ña̱yóʼo ña̱ va̱ʼa sakúsi̱índó-inii̱. 3 Kǒo keʼéndó nda̱a̱ ni iin ña̱ʼa xa̱ʼa̱ ña̱ kúni̱ndó keetáʼanndó xíʼin inkana á xa̱ʼa̱ ña̱ ni̱nu kúnindó,* va̱ʼaka vitá koo inindó, ta ndakanixi̱níndó ña̱ ndáyáʼvika inkana nu̱úndó, 4 ndakundeéndó kundi̱ʼi̱-inindó xa̱ʼa̱ inkana ta va̱ása kundi̱ʼi̱-inindó xa̱ʼa̱ mií kuitíndó.

5 Ndakundeéndó ndakanixi̱níndó nda̱a̱ táki̱ʼva nda̱kanixi̱ní ta̱ Cristo Jesús, 6 chi ni ni̱xi̱yora nda̱a̱ táki̱ʼva íyo Ndióxi̱, ni loʼo va̱ása níndakanixi̱níra ña̱ xa̱a̱ra koora Ndióxi̱. 7 Va̱ása níkeʼéra ña̱yóʼo, chi ña̱ ke̱ʼéra kúú ña̱ sa̱ndákoora ndiʼi ña̱ xi̱kuumiíra ta ni̱xa̱a̱ra ndu̱ura nda̱a̱ táki̱ʼva íyo na̱ yiví ta ndu̱ura iin esclavo. 8 Nu̱úka ña̱yóʼo, tá ndu̱ura nda̱a̱ táki̱ʼva íyo na̱ yiví, va̱ása ni̱nu níxi̱yo inira ta va̱ʼaní ka̱ndíxara, nda̱a̱ ka̱ndíxara kuvira ndaʼa̱ iin yitu̱n tú sa̱xóʼvi̱* miíra. 9 Xa̱ʼa̱ ña̱yóʼo, Ndióxi̱ ta̱xira ña̱ kuumiíra iin chiñu ña̱ káʼnuka ta ni̱na̱ʼa̱ra ña̱ va̱ʼaní-inira xíʼinra chi ta̱xira ña̱ kuumiíra iin ki̱vi̱ ña̱ ndáyáʼvika nu̱ú nda̱a̱ ndáaka inka ki̱vi̱na, 10 ña̱kán xa̱ʼa̱ ki̱vi̱ ta̱ Jesús ndiʼina ná kuxítí, na̱ íyo chí ndiví, na̱ íyo nu̱ú ñuʼú yóʼo ta saátu na̱ ñúʼu ti̱xin ñuʼú, 11 ta ndiʼina ná ndakuni ña̱ ni̱xa̱a̱ ta̱ Jesucristo ndu̱ura táta ña̱ va̱ʼa ndukáʼnu yiváyó Ndióxi̱.

12 Ñanii̱ xíʼin ku̱ʼvai̱ na̱ kúʼvi̱ní-inii̱ xínii̱, tá ni̱xi̱yoi̱ xíʼinndó va̱ʼaní xi̱kandíxandó ña̱ káʼa̱n Ndióxi̱, ta vitin ña̱ kǒi̱ íyo xíʼinndó va̱ʼaníka kándíxandó ña̱ káʼa̱nra ta saátu iin tá iinndó chika̱a̱níkandó ndee̱ ña̱ va̱ʼa ka̱kundó ta xíʼin ña̱ to̱ʼó keʼéndóña ta saátu xa̱ʼa̱ ña̱ yíʼvindó. 13 Saáchi Ndióxi̱ kúú ta̱ táxi ndee̱ ndaʼa̱ndó ña̱ va̱ʼa kuni̱ndó keʼéndó iin ña̱ʼa, ta saátu ña̱ koo ndee̱ ndaʼa̱ndó ña̱ keʼéndóña, ta kéʼéra ña̱yóʼo nda̱a̱ táki̱ʼva kúni̱ miíra. 14 Ndakundeéndó keʼéndó ndiʼi ña̱ʼa ta kǒo ka̱ʼa̱n kúáchindó, ta ni kǒo nda̱ʼyi̱ nu̱ú táʼanndó, 15 ña̱ va̱ʼa xa̱a̱ndó koondó se̱ʼe Ndióxi̱ na̱ kǒo ku̱a̱chi kúúmií, na̱ kǒo kéʼé ña̱ va̱ása va̱ʼa. Ta xa̱ʼa̱ ña̱ kǒo kéʼéndó ña̱ va̱ása va̱ʼa, ndaye̱ʼe̱ndó nda̱a̱ táki̱ʼva íyo iin ñuʼu̱ ña̱ yéʼe̱ní ni ndóondó xíʼin na̱ yiví na̱ kéʼé ña̱ kini, na̱ ndi̱va̱ʼaní-ini, 16 ta nani kéʼéndó ña̱yóʼo, kǒo sandákoondó tu̱ʼun ña̱ táxi ña̱ kutakundó. Tasaá kúú ña̱ kivi kusi̱í-inii̱ tá ná kixaa̱ ki̱vi̱ ta̱ Cristo, chi kunda̱a̱-inii̱ ña̱ ndiʼi ndee̱ ña̱ xi̱niñúʼi̱ xíʼin ndiʼi chiñu ña̱ ke̱ʼíi̱ xa̱ʼa̱ndó, chi̱ndeétáʼanvaña xíʼinndó. 17 Ni íyoi̱ nda̱a̱ táki̱ʼva íyo vino tá sákaana sa̱tá ña̱ sóko̱na nu̱ú Ndióxi̱, ña̱ va̱ʼa viíka ná koo ña̱ sóko̱ndó nu̱ú Ndióxi̱ ta saátu chiñu ña̱ kéʼéndó nu̱úra, ta xa̱ʼa̱ ña̱yóʼo kúsi̱íní-inii̱ xíʼinndó. 18 Ta saátu ndóʼó, xíniñúʼu kusi̱í-inindó ta taxindó ña̱ kusi̱í-inii̱ xíʼinndó.

19 Tá mií tátayó Jesús kúni̱, chindaʼávai̱ ta̱ Timoteo xa̱a̱ra nu̱úndó ña̱ va̱ʼa ndundakúka-inii̱ tá ná kunda̱a̱-inii̱ xa̱ʼa̱ ña̱ kéʼéndó. 20 Saáchi kǒo nda̱a̱ ni iinna íyo nda̱a̱ táki̱ʼva íyo ta̱yóʼo, chi ta̱yóʼo ndixaní ndíʼi̱-inira xa̱ʼa̱ndó. 21 Saáchi ndiʼika na̱ sava xa̱ʼa̱ chiñu miína ndíʼi̱-inina, ta va̱ása ndíʼi̱-inina xa̱ʼa̱ chiñu ta̱ Jesucristo. 22 Ndóʼó xa̱a̱ kúnda̱a̱va-inindó ña̱ ni̱na̱ʼa̱ra ña̱ va̱ʼaní chiñu kéʼéra, chi nda̱a̱ táki̱ʼva íyo iin esclavo saá íyora ña̱ chi̱ndeétáʼanra xíʼi̱n ña̱ na̱túʼunndi̱ xa̱ʼa̱ tu̱ʼun va̱ʼa,* nda̱a̱ táki̱ʼva kéʼé iin ta̱ loʼo xíʼin yivára. 23 Xa̱ʼa̱ ña̱yóʼo, tá ná kunda̱a̱-inii̱ ndáaña kundoʼi̱ ndi̱ku̱n chindaʼíi̱ ta̱yóʼo xa̱a̱ra nu̱úndó. 24 Kándíxaníi̱ ña̱ mií tátayó chindeétáʼan xíʼi̱n ta ndáa si̱lóʼo kúma̱ní xa̱i̱ nu̱úndó.

25 Soo vitin ndákanixi̱níi̱ ña̱ chindaʼíi̱ ta̱ Epafrodito xa̱a̱ra nu̱úndó, ta̱ kúú ñanii̱, ta̱ kítáʼan káchíñu xíʼi̱n ta kúútura soldado ta̱ Cristo, ta̱ chi̱ndaʼándó ña̱ ki̱xira chi̱ndeétáʼanra xíʼi̱n. 26 Chi ta̱yóʼo kúni̱níra xa̱a̱ra kunira ndiʼi ndóʼó ta ndákavaní-inira chi na̱kunda̱a̱-inindó ña̱ ndeéndo̱ʼora. 27 Ndixava, si̱lóʼo kuvira xa̱ʼa̱ ña̱ ndeéníndo̱ʼora, soo Ndióxi̱ ku̱ndáʼvi-inira xi̱nirara. Soo su̱ví ta̱yóʼo kuití níkundáʼvi-inira kunira chi nda̱a̱ yi̱ʼi̱ ku̱ndáʼvi-inira xi̱nira chi kǒo níkuni̱ra kusuchí tuku inii̱. 28 Xa̱ʼa̱ ña̱kán, ndi̱ku̱n chíndaʼíi̱ra ku̱xa̱a̱ra nu̱úndó, ña̱ va̱ʼa tá ná kunindóra kusi̱í-inindó ta saátu yi̱ʼi̱ va̱ʼa kunii̱. 29 Ña̱kán nda̱a̱ táki̱ʼva ndákiʼinndó na̱ ndíku̱n tátayó, saá ndakiʼinndó ta̱yóʼo ta kusi̱íní-inindó. Ndiʼi na̱ ta̱a na̱ íyo nda̱a̱ táki̱ʼva íyo ta̱yóʼo chindayáʼviníndóna, 30 chi ndáa si̱lóʼo kuvira xa̱ʼa̱ ña̱ kéʼéra chiñu nu̱ú ta̱ Cristo, ta kǒo níyi̱ʼvíra kuvira xa̱ʼa̱ ña̱ ki̱xira chi̱ndeétáʼanra xíʼi̱n chi kǒo níkivi koondó yóʼo ña̱ chindeétáʼanndó xíʼi̱n.

3 Xa̱ʼa̱ ña̱kán ñani* miíi̱, ndiʼi tiempo kusi̱í-inindó xa̱ʼa̱ ña̱ ndíku̱nndó tátayó, ni ña̱ xa̱a̱ ka̱ʼyíi̱ nu̱úndó kúú ña̱ káʼyí tukui̱ nu̱úndó, su̱ví ku̱a̱chiví kúú ña̱yóʼo nu̱úi̱, chi xa̱ʼa̱ ña̱ va̱ʼa miívandó kúú ña̱ kéʼíi̱ ña̱yóʼo.

2 Kuentaní koondó xíʼin na̱ íyo nda̱a̱ táki̱ʼva íyo ti̱na;* kuentaní koondó xíʼin na̱ íxandi̱va̱ʼa xíʼin inkana; kuentaní koondó xíʼin na̱ káʼa̱n ña̱ xíniñúʼu ta̱ʼnda̱ nu̱ú yi̱i̱ na̱ yiví.* 3 Chi miíyó kúú na̱ ndixa ni̱ta̱ʼnda̱ nu̱ú yi̱i̱,* ta ndásakáʼnuyó Ndióxi̱ xa̱ʼa̱ ña̱ níʼi espíritu santo yichi̱ nu̱úyó ta kándíxayó ta̱ Cristo Jesús, ta va̱ása kándíxayó ña̱ kándíxa na̱ yiví, 4 soo tá íyo iin na̱ kivi ka̱ʼa̱n ña̱ va̱ʼaní íyo ña̱ kéʼéna, yi̱ʼi̱ kúú ta̱ kivi ka̱ʼa̱n ña̱ va̱ʼaníka íyo ña̱ kéʼíi̱.

Tá íyo iin na̱ ndákanixi̱ní ña̱ va̱ʼaní íyo ña̱ kéʼéna, kiviva ka̱ʼi̱n ña̱ va̱ʼaníka íyo ña̱ kéʼé yi̱ʼi̱: 5 tá ni̱ya̱ʼa u̱na̱ ki̱vi̱ ña̱ ka̱kui̱, ni̱ta̱ʼnda̱ nu̱ú yi̱íi̱,* ta̱ ñuu Israel kúi̱ ta ki̱xii̱ ti̱xin na̱ veʼe ta̱ Benjamín, ta̱ hebreo kúi̱ chi na̱ hebreo kúú yivái̱, ta xi̱kui̱ fariseo chi xi̱ndiku̱i̱n ndiʼi ña̱ káʼa̱n ley; 6 yi̱ʼi̱ kúú mií ta̱ xi̱kandíxaníka ña̱yóʼo, ta xa̱ʼa̱ ña̱kán i̱xandi̱va̱ʼi̱ xíʼin na̱ congregación Ndióxi̱, ta ndiʼi ña̱ káʼa̱n ley nda̱a̱ ni iin ña̱yóʼo va̱ása níya̱ʼandosói̱ña. 7 Soo ña̱ʼa ña̱ xi̱ndayáʼviníka nu̱úi̱, va̱ása ndáyáʼvikaña nu̱úi̱* vitin xa̱ʼa̱ ña̱ ndíku̱i̱n ta̱ Cristo. 8 Xa̱ʼa̱ ña̱yóʼo, ndiʼika ña̱ʼa va̱ása ndáyáʼviña nu̱úi̱ tá chítáʼi̱nña xíʼin ña̱ sa̱kuaʼi̱ xa̱ʼa̱ ta̱ Cristo Jesús ta̱ kúú tátai̱. Xa̱ʼa̱ ta̱yóʼo kúú ña̱ sa̱ndákoi̱ ndiʼi ña̱ʼa ta nda̱a̱ táki̱ʼva íyo mi̱ʼí* saá íyoña nu̱úi̱, sa̱ndákoi̱ ndiʼi ña̱yóʼo ña̱ va̱ʼa kutáʼi̱n xíʼin ta̱ Cristo 9 ta saátu ña̱ kunda̱a̱-ini inkana ña̱ kítáʼi̱n xíʼinra, soo va̱ása káʼi̱n ña̱ kúi̱ ta̱ nda̱kú-ini xa̱ʼa̱ ña̱ kándíxai̱ ña̱ káʼa̱n Ley chi xa̱ʼa̱ ña̱ kándíxai̱ ta̱ Cristo kúú ña̱ kúi̱ ta̱ nda̱kú-ini, chi nu̱ú Ndióxi̱, na̱ yiví na̱ kándíxa ta̱ Cristo kúú na̱ nda̱kú-ini. 10 Chi ña̱ kúni̱i̱ kúú ña̱ kunda̱a̱ va̱ʼa inii̱ xa̱ʼa̱ra, ta saátu xa̱ʼa̱ ndee̱ ña̱ sa̱ndátakuñaʼá, ta xo̱ʼvi̱i̱ nda̱a̱ táki̱ʼva ni̱xo̱ʼvi̱ra ta saátu kuvii̱ nda̱a̱ táki̱ʼva ni̱xi̱ʼi̱ra, 11 ña̱kán, tá ña̱ kivi kúúña, xa̱i̱ ndatakui̱ xíʼin na̱ siʼnaka ndataku.

12 Ta̱ʼán ndakiʼinvíi̱ ña̱ ni̱ka̱ʼa̱nra taxira ndaʼíi̱, ta ni ta̱ʼán sandíʼivíi̱ ña̱ ki̱xáʼíi̱ kéʼíi̱. Soo xa̱ʼa̱ ña̱ nda̱kaxin ta̱ Cristo Jesús yi̱ʼi̱, chíka̱a̱níi̱ ndee̱ ña̱ va̱ʼa ndakiʼi̱n ña̱ ni̱ka̱ʼa̱nra taxira ndaʼíi̱. 13 Ñaniyó, ni ta̱ʼán ndakiʼinvíi̱ ña̱yóʼo túvii̱, soo íyo iin ña̱ kúnda̱a̱ káxi inii̱ xa̱ʼa̱, nándósói̱ xa̱ʼa̱ ndiʼi ña̱ xi̱keʼíi̱ ta chíka̱a̱níi̱ ndee̱ ña̱ ndakiʼi̱n ña̱ va̱xi chí nu̱únínu, 14 chíka̱i̱ ndee̱ ña̱ va̱ʼa xa̱i̱ ndakiʼi̱n ña̱ ni̱ka̱ʼa̱n Ndióxi̱ taxira ndaʼíi̱, chi xi̱niñúʼura ta̱ Cristo Jesús ña̱ ka̱nara yi̱ʼi̱ ña̱ ku̱ʼi̱n chí ndiví. 15 Miíyó na̱ xu̱xa-ini xíʼin tu̱ʼun Ndióxi̱, siaʼa kúú ña̱ xíniñúʼu ndakanixi̱níyó, soo tá íyo iinndó síín íyo ña̱ ndákanixi̱níndó, mií Ndióxi̱ na̱ʼa̱ nu̱úndó ndáa ki̱ʼva xíniñúʼu koo ña̱ ndakanixi̱níndó. 16 Xa̱ʼa̱ ña̱kán, ni nda̱a̱ ndáaka ki̱ʼva kúú ña̱ xu̱xa-iniyó xíʼin tu̱ʼun Ndióxi̱, ná ndakundeéyó viíní kakayó ti̱xin yichi̱ yóʼo.

17 Ñaniyó, inkáchi ndakutáʼanndó ta keʼéndó nda̱a̱ táki̱ʼva kéʼé yi̱ʼi̱ ta kotondó ndáa ki̱ʼva kéʼé na̱ ndíku̱n yichi̱ ña̱ sa̱ndákoondi̱ nu̱úna. 18 Chi íyo ku̱a̱ʼání na̱ xi̱ka̱ʼi̱n xa̱ʼa̱ tá ya̱chi̱, soo vitin ndáa xákui̱ káʼi̱n xa̱ʼa̱na, chi nu̱ú na̱kán va̱ása ndáyáʼvika ña̱ ni̱xi̱ʼi̱ ta̱ Cristo ndaʼa̱ yitu̱n tú sa̱xóʼvi̱* miíra. 19 Na̱kán na̱ ndiʼi-xa̱ʼa̱va kúúna; ta kéʼéna ña̱ kúni̱ miína, ta ña̱yóʼo nda̱sanaña ndióxi̱na, ta ni̱nuní kúnina* xa̱ʼa̱ ña̱ʼa ña̱ xíniñúʼu kukaʼan nu̱úna xíʼin, ta ndákanixi̱nína xa̱ʼa̱ ña̱ʼa ña̱ íyo nu̱ú ñuʼú. 20 Soo miíyó chí ndiví kundooyó ta ndátuníyó iin ta̱ sakǎku miíyó ta̱ ki̱xi chí ndiví, tátayó Jesucristo, 21 ta ndee̱ ña̱ kúúmiíra ña̱ xáʼndachíñura nu̱ú ndiʼi ña̱ʼa, ña̱yóʼo kúú ña̱ kuniñúʼura ña̱ va̱ʼa ndasara ku̱ñuyó ña̱ ni loʼo va̱ása ndáyáʼvi ña̱ xa̱a̱ña kooña nda̱a̱ táki̱ʼva íyo ku̱ñu miíra.

4 Ñaniyó* na̱ kúʼvi̱ní-inii̱ xínii̱, kúni̱níi̱ xa̱i̱ kunii̱ ndóʼó, ndóʼó kúú na̱ sákusi̱íní-inii̱ ta nda̱a̱ táki̱ʼva íyo iin corona ña̱ kánuu xi̱níi̱ saá íyondó. Ndóʼó na̱ kúʼvi̱ní-inii̱ xínii̱, nda̱kúní koo inindó xíʼin Ndióxi̱,* nda̱a̱ táki̱ʼva xa̱a̱ ni̱ka̱ʼi̱n xíʼinndó.

2 Xákundáʼvii̱ nu̱ú ñá Evodia xíʼin ñá Síntique ña̱ inkáchi ná koo ña̱ ndákanixi̱níná xa̱ʼa̱ ña̱ ndíku̱nná tátayó. 3 Ta yóʼó ta̱ va̱ʼaní kítáʼan káchíñu xíʼi̱n, káʼi̱n xíʼún ña̱ ná chindeétáʼún xíʼin ná ñaʼá yóʼo. Náyóʼo chíka̱a̱níná ndee̱ ña̱ natúʼunná xa̱ʼa̱ tu̱ʼun va̱ʼa,* ta kítáʼanná xíʼi̱n ña̱ kéʼéndi̱ chiñu yóʼo ta saátu xíʼin ta̱ Clemente xíʼin ndiʼika na̱ kítáʼan káchíñu xíʼi̱n. Ta na̱yóʼo ni̱ka̱ʼyi̱ ki̱vi̱na nu̱ú libro nu̱ú va̱xi ki̱vi̱ na̱ kutaku.

4 Ndiʼi tiempo kusi̱í-inindó xa̱ʼa̱ ña̱ ndíku̱nndó Ndióxi̱,* tuku káʼi̱n xíʼinndó: kusi̱í-inindó. 5 Ndiʼina ná kunda̱a̱-ini ña̱ va̱ʼaní ndákanixi̱níndó. Ndióxi̱* yatinní íyora xíʼinyó. 6 Kǒo kundi̱ʼi̱-inindó xa̱ʼa̱ nda̱a̱ ni iin ña̱ʼa. Nu̱úka ña̱yóʼo nda̱a̱ ndáaka ña̱ ndóʼondó ka̱ʼa̱nndó xíʼin Ndióxi̱ xa̱ʼa̱ña, kuakundáʼvindó nu̱úra ta taxindó tíxa̱ʼvi ndaʼa̱ra ta ndukúndó ña̱ xíniñúʼundó nu̱úra, 7 tá ná keʼéndó ña̱yóʼo, Ndióxi̱ va̱ʼaní sandíkora-inindó, ta nda̱a̱ miíndó kǒo kunda̱a̱-ini ndáa ki̱ʼva sandíkora-inindó. Ta saá kúú ña̱ kundaara níma̱ndó xíʼin ña̱ ndákanixi̱níndó, nani ndíku̱nndó ta̱ Cristo Jesús.

8 Xa̱ʼa̱ ña̱kán ñaniyó, ndakundeéndó ndakanixi̱níndó xa̱ʼa̱ ndiʼi ña̱ʼa ña̱ kúú ña̱ nda̱a̱, ndiʼi ña̱ʼa ña̱ ndáyáʼvi, ndiʼi ña̱ʼa ña̱ nda̱kú, ndiʼi ña̱ʼa ña̱ va̱ása yaku̱a̱, ndiʼi ña̱ʼa ña̱ chíka̱a̱-iniyó kuʼvi̱-iniyó kunitáʼanyó, ndiʼi ña̱ʼa ña̱ káʼa̱n va̱ʼana xa̱ʼa̱, ndiʼi ña̱ʼa ña̱ va̱ʼa ta saátu ndiʼi ña̱ʼa ña̱ sákusi̱í-ini Ndióxi̱. 9 Ndakundeéndó keʼéndó ndiʼi ña̱ sa̱náʼi̱ ndóʼó ta ka̱ndíxandóña, ña̱ xi̱niso̱ʼondó ni̱ka̱ʼi̱n ta xi̱nindó ke̱ʼíi̱, tasaá Ndióxi̱ ta̱ sándi̱ko-ini na̱ yiví koora xíʼinndó.

10 Kúsi̱íní-inii̱ ta táxiníi̱ tíxa̱ʼvi ndaʼa̱ Ndióxi̱* chi ki̱xáʼa ndíʼi̱ tuku inindó xa̱ʼíi̱ saáchi ni xi̱ndi̱ʼi̱va-inindó xa̱ʼíi̱ va̱ása níkivi na̱ʼa̱ndó ña̱yóʼo. 11 Va̱ása káʼi̱n ña̱yóʼo xíʼinndó xa̱ʼa̱ ña̱ kúma̱ní ña̱ʼa nu̱úi̱, chi sa̱kuaʼi̱ kusi̱í-inii̱ ni nda̱a̱ ndáaka ña̱ yáʼi̱ nu̱ú. 12 Va̱ʼa kutakui̱ ni ku̱a̱ʼá ña̱ʼa kúúmiíi̱ á loʼoña kúúmiíi̱. Ni nda̱a̱ ndáaka ña̱ yáʼi̱ nu̱ú, sa̱kuaʼi̱ keʼíi̱ iin ña̱ʼa ña̱ loʼoní na̱ yiví xíni̱ keʼé, ni íyo ku̱a̱ʼá ña̱ kuxui̱ á ni kǒoña íyo, ña̱ kuumiíi̱ ku̱a̱ʼá ña̱ʼa á ña̱ kǒo ni loʼo ña̱ʼa kuumiíi̱ ta sa̱kuaʼi̱ ña̱ va̱ʼa kunii̱ xíʼin ña̱yóʼo. 13 Kúúmiíi̱ ndee̱ ña̱ keʼíi̱ nda̱a̱ ndáaka ña̱ʼa chi íyo ta̱ táxi ndee̱ ndaʼíi̱ ña̱ keʼíi̱ña.

14 Soo ni saá va̱ʼaníva ña̱ ke̱ʼéndó ña̱ chi̱ndeétáʼanndó xíʼi̱n tá ni̱ya̱ʼi̱ nu̱ú tu̱ndóʼo. 15 Saáchi kúnda̱a̱-ini ndóʼó na̱ ñuu Filipos, tándi̱ʼi sa̱kuaʼandó xa̱ʼa̱ tu̱ʼun va̱ʼa ta ki̱tai̱ ñuu Macedonia, iinlá ndóʼó kúú congregación na̱ chi̱ndeétáʼan xíʼi̱n ta nda̱a̱ ni iinkana kǒo níkeʼé ña̱yóʼo. 16 Saáchi tá íyoi̱ chí ñuu Tesalónica, ndóʼó su̱ví iin kuití yichi̱ níchindaʼándó ña̱ kuniñúʼi̱, chi u̱vi̱ví yichi̱ chi̱ndaʼándóña. 17 Kéʼíi̱ ña̱yóʼo soo su̱ví xa̱ʼa̱ ña̱ kúni̱i̱ ná taxindó ña̱ʼa ndaʼíi̱ kúúña, chi ña̱ kúni̱i̱ kúú ña̱ ná ndakiʼinndó ku̱a̱ʼá ña̱ va̱ʼa xa̱ʼa̱ ña̱ va̱ʼa-inindó. 18 Soo ni saá, kúúmiíi̱ ndiʼiva ña̱ xíniñúʼu nu̱úi̱, ta nda̱a̱ ku̱a̱ʼákaña kúúmiíi̱. Íyo ndiʼiva ña̱ xíniñúʼi̱ chi ta̱ Epafrodito nda̱taxivara ña̱ chi̱ndaʼándó ndaʼíi̱, chi ña̱yóʼo nda̱a̱ táki̱ʼva íyo ña̱ sóko̱na nu̱ú Ndióxi̱ ña̱ xáʼa̱n támi saá íyoña, iin ña̱ kíndo̱oní-ini Ndióxi̱ xíʼin. 19 Ta xa̱ʼa̱ ndiʼi ña̱ kéʼéndó yóʼo, Ndióxi̱ miíi̱ taxira ndiʼi ña̱ xíniñúʼundó, ta kuniñúʼura ta̱ Cristo Jesús ña̱ taxira ña̱ va̱ʼa ndaʼa̱ndó ta ña̱yóʼo kǒo nda̱a̱ ni iin ña̱ʼa kítáʼan xíʼinña. 20 Ndiʼi tiempo ná ndukáʼnu mií yiváyó Ndióxi̱. Saá koo.

21 Ka̱ʼa̱nndó xíʼin ndiʼi na̱ nda̱kaxin Ndióxi̱* na̱ kítáʼan xíʼin ta̱ Cristo Jesús ña̱ chíndeéníi̱na,* na̱ ñaniyó na̱ íyo xíʼi̱n yóʼo chíndeénína ndóʼó. 22 Ndiʼi na̱ nda̱kaxin Ndióxi̱* chíndeénína ndóʼó,* soo mií na̱ chíndeé va̱ʼaka ndóʼó kúú na̱ veʼe ta̱ César.

23 Va̱ʼaní ná koo ini tátayó Jesucristo xíʼinndó xa̱ʼa̱ ña̱ va̱ʼaní íyo ki̱ʼva ña̱ ndákanixi̱níndó.