COLOSENSES

1 Yi̱ʼi̱ ta̱ Pablo ta̱ nda̱kaxin Ndióxi̱ ña̱ koi̱ apóstol ta̱ Cristo Jesús, miíi̱ xíʼin ñaniyó ta̱ Timoteo, 2 káʼa̱nndi̱ xíʼin ndóʼó na̱ nda̱kaxin Ndióxi̱.* Ta saátu xíʼin na̱ ñaniyó na̱ nda̱kúní íyo ini kítáʼan xíʼin ta̱ Cristo, na̱ ndóo chí ñuu Colosas:

Va̱ʼaní ná koo ini yiváyó Ndióxi̱ xíʼinndó ta va̱ʼaní ná kutáʼanndó xíʼinra.

3 Ndiʼi yichi̱ táxindi̱ tíxa̱ʼvi ndaʼa̱ Ndióxi̱, ta̱ kúú yivá tátayó Jesucristo tá káʼa̱nndi̱ xa̱ʼa̱ndó xíʼinra, 4 saáchi na̱kunda̱a̱-inindi̱ xa̱ʼa̱ndó ña̱ va̱ʼaní kándíxandó ta̱ Cristo Jesús ta saátu ña̱ kúʼvi̱ní-inindó xínindó ndiʼi na̱ nda̱kaxin Ndióxi̱* 5 xa̱ʼa̱ ña̱ íyo iin ña̱ ndátundó ndakiʼinndó chí ndiví. Ndóʼó xa̱a̱ na̱kunda̱a̱va-inindó xa̱ʼa̱ ña̱ ndátundó ndakiʼinndó tá na̱túʼunna xíʼinndó xa̱ʼa̱ ña̱ nda̱a̱, ña̱ kúú tu̱ʼun va̱ʼa.* 6 Ta tu̱ʼun va̱ʼa yóʼo kúú ña̱ xa̱a̱ nda̱kiʼinndó. Nda̱a̱ táki̱ʼva ku̱a̱ʼánína ku̱a̱ʼa̱n kúnda̱a̱-ini xa̱ʼa̱ tu̱ʼun va̱ʼa ta iníísaá xáxa̱ña ku̱a̱ʼa̱nña, saátu kúu xíʼin ndóʼó nani tá xi̱niso̱ʼondó ña̱ nda̱a̱ ta na̱kunda̱a̱-inindó ña̱ va̱ʼaní íyo ini Ndióxi̱ xíʼinndó. 7 Ña̱yóʼo kúú ña̱ sa̱náʼa̱ ta̱ Epafras ndóʼó, ñanindi̱ ta̱ kúni̱níndi̱ xínindi̱ ta kítáʼanra káchíñura xíʼinndi̱ nu̱ú ta̱ Cristo, ta chíndeétáʼanra xíʼinndó xa̱ʼa̱ ña̱ kǒondi̱ íyo xíʼinndó. 8 Ta na̱túʼuntura xíʼinndi̱ ña̱ kúʼvi̱-inindó xínitáʼanndó xa̱ʼa̱ ña̱ chíndeétáʼan ña̱ espíritu santo xíʼinndó.

9 Xa̱ʼa̱ ña̱yóʼo nani tá xi̱niso̱ʼondi̱ ña̱yóʼo xa̱ʼa̱ndó, kǒo sándakoondi̱ ña̱ ka̱ʼa̱nndi̱ xíʼin Ndióxi̱ xa̱ʼa̱ndó ta saátu ña̱ ndukúndi̱ nu̱úra ña̱ ná chindeétáʼanra xíʼinndó ña̱ kunda̱a̱ va̱ʼa inindó xa̱ʼa̱ ña̱ kúni̱ra, ta ndíchiní ná koondó ta ná chindeétáʼan espíritu santo xíʼinndó ña̱ kunda̱a̱ va̱ʼa inindó, 10 ña̱ va̱ʼa viíní keʼéndó nda̱a̱ táki̱ʼva kúni̱ mií Jehová* ta sakúsi̱índó-inira, nani ndákundeéndó kéʼéndó ndiʼi ña̱ va̱ʼa, ta sákuaʼakandó ña̱ va̱ʼa kunda̱a̱ káxi inindó xa̱ʼa̱ Ndióxi̱. 11 Ta saátu káʼa̱nndi̱ xíʼinra ña̱ ná kuniñúʼura ndee̱ra ña̱ ndasandakúra-inindó, ña̱ va̱ʼa kúee koo inindó ta kusi̱í-inindó ya̱ʼandó nu̱ú nda̱a̱ ndáaka ña̱ʼa, 12 nani táxindó tíxa̱ʼvi ndaʼa̱ yiváyó ta̱ sa̱náʼa̱ ndóʼó ña̱ va̱ʼa ndakiʼinndó herencia xíʼin na̱ nda̱kaxinra,* na̱ ñúʼu nu̱ú íyo luz.

13 Ta̱kán sa̱kǎkura miíyó ña̱ kǒo kaʼndachíñuka ña̱ naá nu̱úyó ta sa̱ndáya̱ʼara miíyó nu̱ú xáʼndachíñu se̱ʼera ta̱ kúʼvi̱ní-inira xínira, 14 chi ta̱yóʼo kúú ta̱ xi̱niñúʼura ña̱ va̱ʼa cha̱ʼvira xa̱ʼa̱yó* ta sakǎkura miíyó tasaá ndoo ku̱a̱chiyó. 15 Ta̱yóʼo kúú na̱ʼná Ndióxi̱ ta̱ kǒo kívi kuniyó, ta̱ nu̱ú va̱ʼa na̱kuva̱ʼa nu̱ú ndiʼika ña̱ʼa; 16 saáchi ta̱yóʼo kúú ta̱ xi̱niñúʼu Ndióxi̱ ña̱ ke̱ʼéra ndiʼika ña̱ʼa ña̱ íyo chí ndiví ta saátu ña̱ íyo nu̱ú ñuʼú, ña̱ʼa ña̱ va̱ʼa kuniyó xíʼin ña̱ʼa ña̱ kǒo kívi kuniyó ta saátu nda̱a̱ ndáaka na̱ chíñu. Ndióxi̱ xi̱niñúʼurara ña̱ ke̱ʼéra ndiʼika ña̱ʼa ta xa̱ʼa̱ miíra na̱kuva̱ʼaña. 17 Ta saátu, ta̱yóʼo kúú ta̱ xa̱a̱ ya̱chi̱ka íyo nu̱ú ndiʼika ña̱ʼa, Ndióxi̱ xi̱niñúʼurara ña̱ ke̱ʼéra ndiʼika ña̱ʼa, 18 ta̱yóʼo kúú ta̱ níʼi yichi̱ nu̱ú ña̱ congregación ña̱ íyo nda̱a̱ táki̱ʼva íyo ku̱ñura. Ta̱yóʼo kúú ta̱ nu̱ú,* ta̱ siʼnaka nda̱taku nu̱ú ndiʼika na̱ ni̱xi̱ʼi̱ ña̱ va̱ʼa koora ta̱ nu̱ú va̱ʼaka; 19 saáchi ña̱ xi̱kuni̱ Ndióxi̱ kúú ña̱ ndiʼi ña̱ va̱ʼa ña̱ kúúmiíra ná kuumiítu ta̱yóʼovaña, 20 ta ta̱yóʼo kúú ta̱ xi̱niñúʼura ña̱ va̱ʼa ndakutáʼan ma̱níra xíʼin ndiʼika ña̱ʼa, ña̱ íyo nu̱ú ñuʼú ta saátu ña̱ íyo chí ndiví, ta xi̱niñúʼura ni̱i̱ ta̱yóʼo ña̱ ni̱xi̱ta̱ tá xi̱tikaara ndaʼa̱ iin yitu̱n tú sa̱xóʼvi̱-ñaʼá* ña̱ ndakutáʼan ma̱níra xíʼin ndiʼina.

21 Saáchi ni̱xi̱yo iin tiempo ña̱ xíkání ni̱xi̱yondó nu̱ú Ndióxi̱ ta nda̱a̱ táki̱ʼva íyo na̱ sáa̱-ini xíni Ndióxi̱ saá ni̱xi̱yondó, chi xi̱ndakanixi̱níndó xa̱ʼa̱ ña̱ʼa ña̱ va̱ása va̱ʼa, 22 soo vitin nda̱kutáʼan ma̱níndó xíʼinra xa̱ʼa̱ ña̱ nda̱taxi se̱ʼera ña̱ tákura ta ni̱xi̱ʼi̱ra xa̱ʼa̱ndó ña̱ va̱ʼa koondó na̱ yi̱i̱, na̱ kǒo ni iin ña̱ va̱ása va̱ʼa kúúmií, ta kǒo ku̱a̱chi kuumiíndó ña̱ kunditandó nu̱úra. 23 Ta ña̱yóʼo ndakiʼinndóña tá ná ndakundeéndó kandíxandó Ndióxi̱, chi ña̱yóʼo kúú ña̱ chindeétáʼan xíʼinndó ña̱ tuun va̱ʼa kuitandó ta va̱ása nandósóndó xa̱ʼa̱ ña̱ ndátundó ndakiʼinndó, ña̱ ni̱ka̱ʼa̱nna xíʼinndó tá na̱kunda̱a̱-inindó xa̱ʼa̱ tu̱ʼun va̱ʼa, ta ndiʼi na̱ yiví kúnda̱a̱-inina xa̱ʼa̱ tu̱ʼun va̱ʼa yóʼo. Yi̱ʼi̱ ta̱ Pablo kúú ta̱ nátúʼun xa̱ʼa̱ tu̱ʼun va̱ʼa yóʼo.

24 Kúsi̱í-inii̱ ña̱ xóʼvi̱i̱ xa̱ʼa̱ndó, ta ndiʼi ña̱ xóʼvi̱i̱ yóʼo, ndakundeékavai̱ xo̱ʼvi̱i̱ña ña̱ va̱ʼa chindeétáʼi̱n xíʼin ku̱ñu ta̱ Cristo, ña̱ kúú congregación. 25 Ni̱xa̱i̱ ku̱i̱ ta̱ káchíñu ti̱xin congregación yóʼo nda̱a̱ táki̱ʼva ta̱xi mií Ndióxi̱ chiñu ndaʼíi̱ ña̱ vií va̱ʼa natúʼi̱n xa̱ʼa̱ tu̱ʼunra ña̱ va̱ʼa chindeétáʼi̱n xíʼin ndóʼó, 26 ña̱ natúʼi̱n xa̱ʼa̱ ña̱ yi̱i̱ ña̱ ni̱xi̱yo se̱ʼé xa̱ʼa̱* ku̱a̱ʼání tiempo,* ta ku̱a̱ʼání na̱ yiví na̱ ni̱xi̱yo tá ya̱chi̱ kǒo níkunda̱a̱-inina xa̱ʼa̱ña. Soo vitin, na̱ nda̱kaxin Ndióxi̱* kúnda̱a̱-inina xa̱ʼa̱ña, 27 Ndióxi̱ kúú ta̱ nda̱kaxin ña̱ natúʼunra xíʼin ndiʼika na̱ ñuu xa̱ʼa̱ ña̱ yi̱i̱ ña̱ va̱ʼaní ña̱ ni̱xi̱yo se̱ʼé xa̱ʼa̱. Ña̱ ni̱xi̱yo se̱ʼé yóʼo kúú ña̱ xa̱a̱ndó ndakiʼinndó iin ña̱ va̱ʼaní xíʼin ta̱ Cristo, ta ña̱ ndátundó ndakiʼinndó iin ña̱ liviní kúúña. 28 Ta̱yóʼo kúú ta̱ nátúʼunyó xa̱ʼa̱, nátúʼunyó xíʼin ndiʼi na̱ yiví ta xíniñúʼuyó ña̱ ndíchi ña̱ sánáʼa̱yóna, chi kúni̱yó ña̱ ndiʼi na̱ yiví na̱ kuyatin nu̱ú Ndióxi̱ ná koona na̱ ndíku̱n ta̱ Cristo, ta ná koona na̱ yiví xu̱xa-ini. 29 Ta xa̱ʼa̱ ña̱yóʼo kúú ña̱ káchíñuníi̱ ta chíka̱a̱níi̱ ndee̱ xa̱ʼa̱ ña̱ táxira ndee̱ ndaʼíi̱ ta ña̱yóʼo kúú ña̱ ndásandakúní-inii̱.

2 Saáchi kúni̱i̱ ña̱ ná kunda̱a̱-inindó ña̱ chíka̱a̱níi̱ ndee̱ ña̱ chindeétáʼi̱n xíʼin ndóʼó, xíʼin na̱ ndóo ñuu Laodicea ta saátu xíʼin ndiʼi na̱ ta̱ʼán kuni yi̱ʼi̱. 2 Kéʼíi̱ ña̱yóʼo ña̱ va̱ʼa ndasandakúi̱-inindó ta viíní kutáʼanndó xa̱ʼa̱ ña̱ kúʼvi̱-inindó xínitáʼanndó, tasaá kúú ña̱ xa̱a̱ndó kuumiíndó ña̱ ku̱i̱ká. Ña̱ ku̱i̱ká yóʼo kúú ña̱ kuxini̱ va̱ʼandó ta kunda̱a̱ káxi inindó xa̱ʼa̱ ña̱ yi̱i̱ ña̱ ni̱xi̱yo se̱ʼé xa̱ʼa̱* i̱xaa Ndióxi̱, ta ña̱ ni̱xi̱yo se̱ʼé yóʼo kúú ta̱ Cristo. 3 Ndiʼi ña̱ ndíchi xíʼin ña̱ kivi kunda̱a̱-iniyó xa̱ʼa̱, nda̱a̱ táki̱ʼva íyo ña̱ íyo se̱ʼé saá íyoña, ta ta̱yóʼo kúú ta̱ kúúmiíña. 4 Káʼi̱n ña̱yóʼo xíʼinndó ña̱ va̱ʼa ná kǒo taxindó ña̱ sandáʼvi nda̱a̱ ni iinna ndóʼó xíʼin tu̱ʼun ña̱ káʼa̱nna, xa̱ʼa̱ ña̱ kúni̱na saxínu̱na-inindó.* 5 Ni kǒi̱ íyo xíʼinndó, ndákaniníxi̱níi̱ xa̱ʼa̱ndó ta kúsi̱í-inii̱ xa̱ʼa̱ ña̱ viíní kéʼéndó ta nda̱kúní íyo inindó kándíxandó ta̱ Cristo.

6 Xa̱ʼa̱ ña̱kán, nda̱a̱ táki̱ʼva xa̱a̱ ka̱ndíxandó ta̱ Cristo Jesús ta̱ kúú tátayó, kǒo sandákoondó ña̱ kutáʼanndó xíʼinra. 7 Nda̱a̱ táki̱ʼva xa̱a̱ sa̱kuaʼandó, ña̱ kándíxandó ta̱ Cristo xíniñúʼu ndasandakúña-inindó, ta kútu̱ní* ná koondó nda̱a̱ táki̱ʼva íyo iin yitu̱n tú kúnuní ñúʼu ti̱oʼo,* ta saátu ndeéníka kandíxandó Ndióxi̱ tá ná taxindó tíxa̱ʼvi ndaʼa̱ra.

8 Kuentaní koondó ña̱ va̱ʼa ná kǒo sandáʼvi na̱ ñuyǐví ndóʼó xíʼin tu̱ʼun ña̱ ndíchi ña̱ káʼa̱nna ta saátu xíʼin tu̱ʼun vatá ña̱ va̱ása ndáyáʼvi, chi ña̱yóʼo xi̱ní miívana kánaña ta kuenta ñuyǐví yóʼo kúúña ta su̱ví kuenta ta̱ Cristo kúúña. 9 Saáchi ta̱yóʼo kúú ta̱ kúúmií ndiʼi ña̱ va̱ʼa ña̱ kúúmií Ndióxi̱. 10 Ta xa̱ʼa̱ ta̱yóʼo kúú ña̱ kúúmiíndó ndiʼi ña̱ʼa, chi ta̱yóʼo kúú ta̱ xáʼndachíñu nu̱ú nda̱a̱ ndáaka na̱ xáʼndachíñu. 11 Xa̱ʼa̱ ña̱ kítáʼanndó xíʼin ta̱yóʼo nda̱a̱ táki̱ʼva íyo na̱ ni̱ta̱ʼnda̱ nu̱ú yi̱i̱* saá íyondó, soo su̱ví na̱ yiví kúú na̱ níkeʼé ña̱yóʼo xíʼinndó chi ni̱ta̱ʼnda̱ nu̱ú yi̱i̱ndó* nda̱a̱ táki̱ʼva kéʼé na̱ ndíku̱n ta̱ Cristo, ta ña̱yóʼo kúni̱ kachiña ña̱ kǒo kéʼékandó ña̱ kútóo ku̱ñundó. 12 Saáchi ndóʼó nda̱a̱ táki̱ʼva íyo na̱ ni̱ndu̱xu̱n xíʼinra saá íyondó tá nda̱kuchindó xa̱ʼa̱ ña̱ ni̱xi̱ʼi̱ra, ta xa̱ʼa̱ ña̱ kítáʼanndó xíʼinra nda̱a̱ táki̱ʼva íyo na̱ nda̱taku* xíʼinra saá íyondó xa̱ʼa̱ ña̱ kándíxaníndó ndee̱ ña̱ kúúmií Ndióxi̱, chi ta̱yóʼo kúú ta̱ sa̱ndátakuñaʼá tá ni̱xi̱ʼi̱ra.

13 Ta saátu, nda̱a̱ táki̱ʼva íyo na̱ ni̱xi̱ʼi̱ saá ni̱xi̱yondó xa̱ʼa̱ ku̱a̱chi ña̱ xi̱kuumiíndó ta saátu xa̱ʼa̱ ña̱ kǒo níta̱ʼnda̱ nu̱ú yi̱i̱ndó,* soo Ndióxi̱ ta̱xira ña̱ kutakundó ta kutáʼanndó xíʼin ta̱ Cristo. Ta xa̱ʼa̱ ña̱ va̱ʼaní-inira i̱xakáʼnu-inira xa̱ʼa̱ ndiʼi ku̱a̱chiyó, 14 ta sa̱ndíʼi-xa̱ʼa̱ra Ley ña̱ ni̱ka̱ʼyi̱ ña̱ sákuiso ku̱a̱chi miíyó ta kǒo nítaxikara kooña chi nda̱a̱ táki̱ʼva íyo ña̱ ka̱tikaara ndaʼa̱ iin yitu̱n tú sáxo̱ʼvi̱* saá ni̱xi̱yoña. 15 Ta xa̱ʼa̱ ña̱yóʼo ki̱ndaara ña̱ kúúmií ndiʼi na̱ chíñu ta ni̱na̱ʼa̱rana nu̱ú ndiʼina ña̱ va̱ʼa kukaʼan nu̱úna, chi ku̱chiñura xíʼinna ta nda̱kiʼinrana ku̱a̱ʼa̱n xíʼinra ña̱ koona nda̱a̱ táki̱ʼva íyo na̱ ñúʼu veʼeka̱a.

16 Ni iinna ná kǒo ka̱ʼa̱n xíʼinndó xa̱ʼa̱ ndáaña xíniñúʼu kuxundó á koʼondó á ña̱ xíniñúʼu keʼéndó iin vikó xa̱ʼa̱ yo̱o̱ xa̱á, á xa̱ʼa̱ ki̱vi̱ sábado. 17 Ña̱yóʼo ndána̱ʼa̱ña ña̱ʼa ña̱ xi̱niñúʼu kixi chí nu̱únínu soo mií ña̱ ndixa ndákiʼin nu̱úña kúú ku̱ñu ta̱ Cristo. 18 Kuenta koondó xíʼin na̱ náʼa̱ ña̱ kúúna iin na̱ yiví na̱ vitá-ini, soo kéʼé kuitínaña xa̱ʼa̱ ña̱ kúni̱na kuni inkanana, ta ndásakáʼnutuna na̱ ángel.* Chi kivi kasina nu̱úndó ña̱ ndakiʼinndó premio. Na̱ yiví yóʼo nina ña̱ xíto kuitína káʼa̱nna xa̱ʼa̱. Ta ña̱ ndákanixi̱nína kúú ña̱ va̱ʼaníka túvi miína, soo ña̱yóʼo ni loʼo va̱ása ndáyáʼviña, 19 ta va̱ása kítáʼanna xíʼin ta̱ kúú xi̱nína* chi ta̱yóʼo kúú ta̱ chíndeétáʼan xíʼin iníísaá ku̱ñu ña̱ kuumiíña ndiʼi ña̱ xíniñúʼuña, ta nu̱ú ndákutáʼan leke xíʼin tu̱chu kúú ña̱ chíndeétáʼan xíʼinña ña̱ viíní kutáʼanña ta xáʼnuña ku̱a̱ʼa̱nña chi Ndióxi̱ kúú ta̱ sákuaʼnu ña̱yóʼo.

20 Tá xa̱a̱ ku̱ndasíndó xi̱nindó ña̱ʼa ña̱ íyo nu̱ú ñuyǐví yóʼo ta ni̱xi̱ʼi̱ndó xíʼin ta̱ Cristo, ¿nda̱chun kúú ña̱ kéʼékandó nda̱a̱ táki̱ʼva kéʼé na̱ ñuyǐví yóʼo? ¿Nda̱chun kúú ña̱ kándíxandó ña̱ káʼa̱nna 21 “kǒo tiún, kǒo kotondosóún, kǒo tu̱ndaa ndaʼún”? 22 Ndiʼi ña̱yóʼo káʼa̱nña xa̱ʼa̱ ña̱ʼa ña̱ ndíʼi-xa̱ʼa̱ tá xa̱a̱ xíniñúʼunaña. Chiñu ña̱ xáʼnda na̱ yiví kúúña ta ña̱ sánáʼa̱ miína kúúña. 23 Náʼa̱ ña̱ ndíchiva íyo ña̱ káʼa̱nna, soo ña̱yóʼo va̱ása chíndeétáʼanña xíʼinna ña̱ kǒo keʼéna ña̱ kútóo ku̱ñuna, saáchi miína ndáka̱xin ndáa ki̱ʼva ndasakáʼnuna Ndióxi̱ ta su̱ví na̱ ndixa vitá-ini kúúna ni sáxo̱ʼvi̱na miína.*

3 Soo tá na̱ nda̱taku* xíʼin ta̱ Cristo kúúndó, ndakundeéndó ndukúndó ña̱ʼa ña̱ íyo chí ndiví nu̱ú íyo ta̱ Cristo chí ndaʼa̱ kúaʼa Ndióxi̱. 2 Nina ña̱ʼa ña̱ íyo chí ndiví ndakanixi̱níndó xa̱ʼa̱ ta su̱ví xa̱ʼa̱ ña̱ʼa ña̱ íyo nu̱ú ñuʼú yóʼo. 3 Saáchi ndóʼó ni̱xi̱ʼi̱ndó, ta ña̱ tákundó íyoña ndaʼa̱ ta̱ Cristo nda̱a̱ táki̱ʼva kúni̱ mií Ndióxi̱. 4 Tá ná na̱ʼa̱ ta̱ Cristo ta̱ táxi ña̱ tákuyó* ndee̱ ña̱ kúúmiíra, kunituna ndóʼóva ña̱ ndukáʼnundó xíʼinra.

5 Xa̱ʼa̱ ña̱kán, sandíʼi-xa̱ʼa̱ndó ndiʼi ña̱ kútóo ku̱ñundó keʼéña tá kúú ña̱ ki̱ʼvindó ku̱a̱chi kini,* ña̱ kutóondó keʼéndó ña̱ yaku̱a̱, ña̱ kuni̱níndó ku̱su̱nndó xíʼin inkana, ña̱ ndakanixi̱níndó xa̱ʼa̱ ña̱ va̱ása va̱ʼa, ta saátu ña̱ kutóondó kuumiíndó ku̱a̱ʼání ña̱ʼa, chi ña̱yóʼo nda̱a̱ táki̱ʼva íyo ña̱ ndasakáʼnundó inka ndióxi̱ saá íyoña. 6 Saáchi Ndióxi̱ taxira castigo ndaʼa̱ ndiʼi na̱ kéʼé ña̱yóʼo. 7 Saá kúú ña̱ xi̱keʼé ndóʼó tá ya̱chi̱. 8 Soo vitin kǒo kéʼékandó nda̱a̱ ni iin ña̱yóʼo: va̱ása sa̱a̱níndó, kǒo keʼéndó nda̱a̱ ni iin ña̱ va̱ása va̱ʼa, va̱ása ka̱ʼa̱nndó tu̱ʼun ña̱ sáxo̱ʼvi̱-ini inkana ta ni loʼo kǒo ka̱ʼa̱nndó tu̱ʼun kini. 9 Kǒo ka̱ʼa̱nndó ña̱ vatá* xíʼin táʼanndó. Sandákoondó ki̱ʼva ña̱ ni̱xi̱yondó tá ya̱chi̱ ta saátu ndiʼi ña̱ xi̱keʼéndó. 10 Xíniñúʼu kixáʼandó ndasaxa̱ándó ki̱ʼva ña̱ kéʼéndó, ta nani kúnda̱a̱ káxi inindó xa̱ʼa̱ ña̱ nda̱a̱, ki̱ʼva ña̱ íyondó ndúxa̱áña ku̱a̱ʼa̱nña ña̱ va̱ʼa xa̱a̱ña kooña nda̱a̱ táki̱ʼva íyo mií ta̱ i̱xava̱ʼaña, 11 ta nu̱ú na̱ ndúxa̱á, inkáchi íyo ndiʼina, ni kúúna na̱ griego á na̱ judío, ni ni̱ta̱ʼnda̱ nu̱ú yi̱i̱na* á ni va̱ása níta̱ʼnda̱ nu̱ú yi̱i̱na,* ni kúúna na̱ inka ñuu á ni kúúna na̱ escita,* ni kúúna esclavo á ni kúúna na̱ yiví libre, saáchi ta̱ Cristo kúú ndiʼi ña̱ʼa ta miíyó kítáʼanyó xíʼinra.

12 Xa̱ʼa̱ ña̱ kúʼvi̱ní-ini Ndióxi̱ xínira ndóʼó nda̱kaxinra ndóʼó ta kúúndó na̱ yi̱i̱, kundáʼvi-inindó kunindó inkana, va̱ʼa koo inindó, va̱ása ni̱nu kunindó,* vitá koo inindó ta kúee koo inindó. 13 Kǒo sandákoondó ña̱ kundeé-inindó xíʼin ña̱ kéʼé inkana xíʼinndó ta xíʼin ndiʼi níma̱ndó koo káʼnu-inindó xa̱ʼa̱na, ni íyo iin ña̱ va̱ása va̱ʼa ke̱ʼéna xíʼinndó. Jehová* xíʼin ndiʼi níma̱ra i̱xakáʼnu-inira xa̱ʼa̱ndó, xa̱ʼa̱ ña̱kán saátu xíniñúʼu keʼé miíndó. 14 Soo nu̱ú ndiʼika ña̱yóʼo, kuʼvi̱ní-inindó kunitáʼanndó, chi ndiʼi na̱ kúʼvi̱-ini xínitáʼan va̱ʼaní kítáʼanna.

15 Ta̱ Cristo ná sandíko-inindó, saáchi ka̱nara ndóʼó ña̱ sandíkora-inindó ta xa̱a̱ndó koondó iin ku̱ñu xíʼinra. Ta saátu ndakundeéndó taxindó tíxa̱ʼvi. 16 Ta ndiʼi ña̱ sánáʼa̱ ta̱ Cristo ná kutúña níma̱ndó, saá xa̱a̱ndó koondó na̱ yiví ndíchi. Ndakundeéndó sanáʼa̱ndó inkana, katandó salmo, ndasakáʼnundó Ndióxi̱, katandó yaa nu̱úra ña̱ taxindó tíxa̱ʼvi ndaʼa̱ra tasaá ndasandakúndó-ini táʼanndó.* Xíʼin ndiʼi níma̱ndó katandó yaa nu̱ú Jehová.* 17 Nda̱a̱ ndáaka ña̱ kéʼéndó á káʼa̱nndó, keʼéndóña xa̱ʼa̱ ki̱vi̱ tátayó Jesús, ta xa̱ʼa̱ ki̱vi̱ ta̱yóʼo taxindó tíxa̱ʼvi ndaʼa̱ yiváyó Ndióxi̱.

18 Ndóʼó ná ti̱ndaʼa̱, kundiku̱nndó ña̱ káʼa̱n yiíndó xíʼinndó nda̱a̱ táki̱ʼva xíniñúʼu keʼé na̱ ndíku̱n tátayó. 19 Ndóʼó na̱ ta̱a na̱ íyo ñá síʼi, ndakundeéndó kuʼvi̱-inindó kunindó ñá síʼindó ta va̱ása sa̱a̱ndó xíʼinñá. 20 Na̱ va̱lí, kuniso̱ʼondó ndiʼi ña̱ káʼa̱n na̱ yivándó xíʼinndó chi ña̱yóʼo kúú ña̱ kútóo tátayó. 21 Ndóʼó na̱ íyo se̱ʼe,* kǒo sasáa̱ndó se̱ʼendó ña̱ va̱ʼa ná kǒo ndakava-inina. 22 Ndóʼó na̱ esclavo, kuniso̱ʼondó ndiʼi ña̱ káʼa̱n na̱ káchíñundó nu̱ú, va̱ása keʼéndó ña̱yóʼo xa̱ʼa̱ ña̱ xíto kuitína ndóʼó, xa̱ʼa̱ ña̱ kúni̱ndó kindo̱o va̱ʼandó nu̱ú na̱ yiví, chi xíʼin ndiʼi níma̱ndó xíniñúʼu kuniso̱ʼondó ña̱ káʼa̱nna ta ixato̱ʼóníndó* Jehová.* 23 Nda̱a̱ ndáaka ña̱ kéʼéndó, keʼéndóña xíʼin ndiʼi níma̱ndó* nda̱a̱ táki̱ʼva íyo ña̱ kéʼéndó xa̱ʼa̱ Jehová* ta su̱ví xa̱ʼa̱ na̱ yiví, 24 saáchi kúnda̱a̱-inindó ña̱ mií Jehová* taxi ña̱ va̱ʼa ndaʼa̱ndó ña̱ ndakiʼinndó herencia. Koondó esclavo ta̱ káchíñundó nu̱ú, ta̱ Cristo. 25 Na̱ kéʼé ña̱ʼa ña̱ va̱ása va̱ʼa chaʼvivana xa̱ʼa̱ ña̱ kéʼéna, saáchi Ndióxi̱ inkáchi ndatiinra ku̱a̱chi xíʼin ndiʼina.

4 Ndóʼó na̱ íyo na̱ káchíñu nu̱ú, viíní keʼéndó xíʼin na̱ káchíñu nu̱úndó ta inkáchi keʼéndó xíʼinna chi ndakaʼánndó ña̱ íyotu iin ta̱ káchíñundó nu̱ú chí ndiví.

2 Ndakundeéndó ka̱ʼa̱nndó xíʼin Ndióxi̱, ta nani kéʼéndóña kunditoní nu̱úndó ta taxiníndó tíxa̱ʼvi ndaʼa̱ra. 3 Ta nani kéʼéndó ña̱yóʼo ka̱ʼa̱ntundó xa̱ʼa̱ ndi̱ʼi̱ xíʼin Ndióxi̱. Ka̱ʼa̱nndó xíʼinra ña̱ ná chindeétáʼanra xíʼinndi̱ ña̱ natúʼunndi̱ xa̱ʼa̱ra tasaá va̱ʼa natúʼunndi̱ xa̱ʼa̱ ña̱ yi̱i̱ ña̱ íyo se̱ʼé xa̱ʼa̱* ta̱ Cristo, chi xa̱ʼa̱ ña̱yóʼo kúú ña̱ núʼni cadena ndaʼíi̱. 4 Ta saátu ka̱ʼa̱nndó xíʼinra ña̱ va̱ʼa kuchiñui̱ káxiní natúʼi̱n xa̱ʼa̱ ña̱yóʼo nda̱a̱ táki̱ʼva xíniñúʼu keʼíi̱ña.

5 Kiʼinníndó kuenta ña̱ vií keʼéndó tá kítáʼanndó xíʼin na̱ va̱ása ñúʼu ti̱xin congregación ta viíní kuniñúʼundó tiempo ña̱ kúúmiíndó. 6 Nda̱a̱ táki̱ʼva ndúya̱si̱n iin ña̱ʼa ña̱ xíxina tá kíta ñi̱i̱ xíʼinña saá xíniñúʼu koo tu̱ʼun ña̱ ka̱ʼa̱nndó, viíní ná kooña ña̱ va̱ʼa kunda̱a̱-inindó ndáa ki̱ʼva ndakuiinndó yuʼú iin iinna.

7 Ta̱ Tíquico, ñanii̱ ta̱ kúni̱níi̱ xínii̱, ta̱yóʼo nda̱kúní íyo inira ta inkáchi kítáʼanra káchíñura xíʼi̱n nu̱ú tátayó, ta̱yóʼo kúú ta̱ natúʼun xíʼinndó ndáa ki̱ʼva íyoi̱. 8 Chíndaʼíi̱ra nu̱úndó ña̱ va̱ʼa ná kunda̱a̱-inindó ndáa ki̱ʼva íyondi̱ ta saátu ña̱ va̱ʼa sandíkora-inindó. 9 Ta̱yóʼo xa̱a̱ra xíʼin ta̱ Onésimo, ñanii̱ ta̱ kúʼvi̱ní-inii̱ xínii̱ ta nda̱kúní íyo inira, ta̱ ke̱e chí nu̱ú íyo ndóʼó. Na̱yóʼo kúú na̱ natúʼun xíʼinndó xa̱ʼa̱ ndiʼi ña̱ kúu yóʼo.

10 Ta̱ Aristarco ta̱ ndíka̱a̱ xíʼi̱n veʼeka̱a, chíndeéníra ndóʼó* ta saátu ta̱ Marcos ñani kúáchi* ta̱ Bernabé (ta nda̱a̱ táki̱ʼva xa̱a̱ kúnda̱a̱-inindó, viíní xíniñúʼu ndakiʼinndó ta̱yóʼo tá ná xa̱a̱ra nu̱úndó), 11 ta saátu ta̱ Jesús ta̱ káʼa̱nna Justo xíʼin, ta ndiʼi na̱yóʼo na̱ ni̱ta̱ʼnda̱ nu̱ú yi̱i̱* kúúna. Na̱yóʼo kuití kúú na̱ kítáʼan káchíñu xíʼi̱n ña̱ natúʼunndi̱ xa̱ʼa̱ Reino Ndióxi̱ ta sándi̱konína-inii̱. 12 Ta̱ Epafras, ta̱ ke̱e chí nu̱ú íyo ndóʼó ta kúúra esclavo ta̱ Cristo Jesús, chíndeéníra ndóʼó. Ta̱yóʼo káʼa̱nníra xíʼin Ndióxi̱ xa̱ʼa̱ndó ña̱ va̱ʼa ndakúní koo inindó nda̱a̱ táki̱ʼva íyo na̱ yiví na̱ xu̱xa-ini ta ni loʼo kǒo xíka-inina xa̱ʼa̱ ña̱ kúni̱ Ndióxi̱. 13 Yi̱ʼi̱ kúú ta̱ ndákuiin xa̱ʼa̱ra ña̱ chíka̱a̱níra ndee̱ xa̱ʼa̱ndó ta saátu xa̱ʼa̱ na̱ ndóo chí Laodicea xíʼin Hierápolis.

14 Ta̱ Lucas, ta̱ kúni̱níyó xíniyó ta̱ kúú médico, chíndeéníra ndóʼó ta saátu ta̱ Demas. 15 Ka̱ʼa̱nndó xíʼin na̱ hermano na̱ ndóo chí Laodicea ña̱ chíndeéníi̱na ta saátu ñá Ninfa xíʼin na̱ congregación na̱ ndákutáʼan veʼeñá. 16 Tá ná ndiʼi kaʼvindó carta yóʼo, chindaʼándóña ná ku̱ʼu̱nña ndaʼa̱ na̱ ndóo chí Laodicea ña̱ va̱ʼa kaʼvinaña, ta ná taxituna ña̱ chi̱ndaʼíi̱ ndaʼa̱na ña̱ va̱ʼa kaʼvindóña. 17 Ta saátu ka̱ʼa̱nndó ña̱yóʼo xíʼin ta̱ Arquipo: “Kiʼinníún kuenta xíʼin chiñu ña̱ nda̱kiʼún nu̱ú tátayó ña̱ va̱ʼa saxínúnña”.

18 Yi̱ʼi̱ ta̱ Pablo kúú ta̱ káʼyí ña̱yóʼo ña̱ va̱ʼa chindeíi̱ ndóʼó.* Ndakaʼánndó xa̱ʼíi̱ ña̱ núʼni cadena ndaʼíi̱. Va̱ʼaní ná koo ini Ndióxi̱ xíʼinndó.