PRIMERA ÑA̱ TESALONICENSES

1 Yi̱ʼi̱ ta̱ Pablo xíʼin ta̱ Silvano* ta saátu ta̱ Timoteo káʼyíndi̱ ña̱yóʼo ku̱xa̱a̱ nu̱ú ndóʼó na̱ congregación na̱ íyo chí Tesalónica, na̱ kúú kuenta yiváyó Ndióxi̱ ta saátu ta̱ táta Jesucristo:

Va̱ʼaní ná koo ini yiváyó Ndióxi̱ xíʼinndó ta va̱ʼaní ná kutáʼanndó xíʼinra.

2 Ndiʼi yichi̱ táxindi̱ tíxa̱ʼvi ndaʼa̱ Ndióxi̱ tá káʼa̱nndi̱ xa̱ʼa̱ndó xíʼinra, 3 saáchi tá káʼa̱nndi̱ xíʼin Ndióxi̱ ndákaʼánníndi̱ xa̱ʼa̱ chiñu ña̱ kéʼéndó nu̱úra chi kándíxandóra ta kúʼvi̱-inindó xínindóra. Saátu ndákaʼánndi̱ ña̱ kúndeé-inindó* yáʼandó nu̱ú tu̱ndóʼo xa̱ʼa̱ ña̱ ndátundó ndakiʼinndó ña̱ taxi tátayó Jesucristo. 4 Ñaniyó na̱ kúʼvi̱ní-ini Ndióxi̱ xínira, kúnda̱a̱va-inindi̱ ña̱ miíra kúú ta̱ nda̱kaxin ndóʼó, 5 saáchi tá na̱túʼunndi̱ xa̱ʼa̱ tu̱ʼun va̱ʼa* xíʼinndó, su̱ví tu̱ʼun kuití níxi̱yo ña̱yóʼo, chi xi̱kuumiíníña ndee̱, xi̱kuumiíña espíritu santo ta va̱ása níxi̱ka-inindi̱ xa̱ʼa̱ ña̱ na̱túʼunndi̱ xíʼinndó. Ndóʼó kúnda̱a̱va-inindó ndáa ki̱ʼva ke̱ʼéndi̱ tá ni̱xi̱yondi̱ xíʼinndó ña̱ va̱ʼa chindeétáʼanndi̱ xíʼinndó. 6 Saáchi ke̱ʼéndó nda̱a̱ táki̱ʼva ke̱ʼé ndi̱ʼi̱ ta saátu nda̱a̱ táki̱ʼva ke̱ʼé tátayó, chi ni ni̱xi̱yoní tu̱ndóʼo nu̱úndó ña̱ espíritu santo chi̱ndeétáʼan xíʼinndó ña̱ ni̱kusi̱í-inindó tá xi̱niso̱ʼondó xa̱ʼa̱ Ndióxi̱. 7 Ta xa̱ʼa̱ ña̱yóʼo va̱ʼaní yichi̱ sa̱ndákoondó nu̱ú na̱ kándíxa Ndióxi̱ na̱ ndóo chí Macedonia xíʼin Acaya.

8 Mií ña̱ nda̱a̱, xa̱ʼa̱ ña̱ ke̱ʼé ndóʼó, na̱ ndóo chí Macedonia xíʼin Acaya na̱kunda̱a̱-inina xa̱ʼa̱ tu̱ʼun Jehová,* soo su̱ví ña̱yóʼo kuití kúú ña̱ níkunda̱a̱-inina xa̱ʼa̱, chi iníísaá na̱kunda̱a̱-inina xa̱ʼa̱ ña̱ kándíxandó Ndióxi̱, xa̱ʼa̱ ña̱kán kǒo nda̱a̱ ni iinka ña̱ xíniñúʼu ka̱ʼa̱nndi̱. 9 Saáchi na̱yóʼo ndákundeéna káʼa̱nna xa̱ʼa̱ ña̱ yichi̱ nu̱ú ña̱ xi̱nindi̱ ndóʼó, ta saátu ndáa ki̱ʼva sa̱ndákoondó ndióxi̱ vatá ña̱ xi̱ndasakáʼnundó ta ki̱xáʼandó ndásakáʼnundó Ndióxi̱ ta̱ nda̱a̱, iin Ndióxi̱ ta̱ táku, ta ni̱xa̱a̱ndó ndu̱undó na̱ káchíñu nu̱úra, 10 ta ndátundó ña̱ kixi se̱ʼera chí ndiví chi ta̱yóʼo kúú ta̱ sa̱ndátakura, ta̱yóʼo kúú ta̱ Jesús ta̱ sakǎku miíyó nu̱ú tu̱ndóʼo ña̱ kixi chí nu̱únínu.

2 Ñaniyó, kúnda̱a̱-inindó ña̱ íyo iin xa̱ʼa̱ kúú ña̱ ni̱xa̱a̱ndi̱ nu̱úndó. 2 Nda̱a̱ táki̱ʼva xa̱a̱ kúnda̱a̱-inindó, ni̱xo̱ʼvi̱níndi̱ ta i̱xandi̱va̱ʼanína xíʼinndi̱ chí ñuu Filipos, soo Ndióxi̱ ta̱xira ña̱ ndakú koo inindi̱ ña̱ va̱ʼa natúʼunndi̱ xíʼinndó tu̱ʼun va̱ʼa* xa̱ʼa̱ra ni ni̱xi̱yoní tu̱ndóʼo* nu̱úndi̱. 3 Saáchi ña̱ káʼa̱nndi̱ xíʼinndó* su̱ví ña̱ vatá* kúúña chi ña̱ va̱ʼava kúú ña̱ ndíka̱a̱-inindi̱ tá káʼa̱nndi̱ xíʼinndó ta va̱ása sándaʼvindi̱ ndóʼó, 4 xa̱ʼa̱ ña̱ kíndo̱o-ini Ndióxi̱ xíʼin ña̱ kéʼéndi̱ ta nda̱kaxinra ndi̱ʼi̱ ña̱ natúʼunndi̱ xa̱ʼa̱ tu̱ʼun va̱ʼa, ta va̱ása nátúʼunndi̱ xa̱ʼa̱ ña̱ kindo̱o va̱ʼandi̱ nu̱ú na̱ yiví, chi kéʼéndi̱ña ña̱ kindo̱o va̱ʼandi̱ nu̱ú Ndióxi̱ ta̱ kúnda̱a̱-ini xa̱ʼa̱ ña̱ ñúʼu níma̱ na̱ yiví.

5 Ndóʼó, kúnda̱a̱-inindó ña̱ va̱ása níxiniñúʼundi̱ tu̱ʼun livi ña̱ sandáʼvindi̱ ndóʼó, ni ña̱ na̱ʼa̱ndi̱ ña̱ kúúndi̱ na̱ yiví va̱ʼa, ña̱ va̱ʼa ndakiʼinndi̱ iin ña̱ʼa. Ndióxi̱ xíni̱ va̱ʼavara xa̱ʼa̱ ña̱yóʼo. 6 Ni va̱ása ndúkúndi̱ ña̱ ka̱ʼa̱n va̱ʼandó xa̱ʼa̱ndi̱ á ña̱ ka̱ʼa̱n va̱ʼa inkana xa̱ʼa̱ndi̱, ni kiviva ndukúndi̱ ña̱ taxindó ña̱ xíniñúʼundi̱ xa̱ʼa̱ ña̱ kúúndi̱ apóstol ta̱ Cristo. 7 Nu̱úka ña̱yóʼo viíní ke̱ʼéndi̱ xíʼinndó nda̱a̱ táki̱ʼva kéʼé iin ñá ñaʼá tá sáchichínñá ña̱ loʼo se̱ʼeñá ta viíní ndáañá na̱ va̱lí se̱ʼéñá. 8 Xa̱ʼa̱ ña̱ kúni̱níndi̱ xínindi̱ ndóʼó, su̱ví kuití tu̱ʼun va̱ʼa xa̱ʼa̱ Ndióxi̱ níxikuni̱ndi̱ natúʼunndi̱ xíʼinndó, chi nda̱a̱ chi̱ka̱a̱-inindi̱ kuvindi̱ xa̱ʼa̱ndó chi ni̱xa̱a̱ndi̱ ni̱kuʼvi̱ní-inindi̱ xi̱nindi̱ ndóʼó.

9 Ñaniyó, ndákaʼánvandó ña̱ ndeéní chi̱ka̱a̱ndi̱ ndee̱ ta ka̱chíñuníndi̱. Tá na̱túʼunndi̱ tu̱ʼun va̱ʼa xa̱ʼa̱ Ndióxi̱ xíʼinndó, ñuú xíʼin káʼñu* ndeéní ka̱chíñundi̱ ña̱ va̱ʼa kǒo sandíʼi̱ndi̱-inindó ña̱ ndukúndi̱ ña̱ xíniñúʼundi̱ nu̱úndó. 10 Ndóʼó kúnda̱a̱va-inindó ta saátu Ndióxi̱, ña̱ nda̱kúní ke̱ʼéndi̱ xíʼin ndóʼó na̱ kándíxa Ndióxi̱ ta viíní ke̱ʼéndi̱ xíʼinndó ta kǒo ni iin na̱ kivi chika̱a̱ ku̱a̱chi ndi̱ʼi̱ xa̱ʼa̱ ndáa ki̱ʼva ke̱ʼéndi̱ xíʼinndó. 11 Saáchi ndóʼó kúnda̱a̱ va̱ʼava inindó chi nda̱a̱ táki̱ʼva kéʼé iin ta̱a xíʼin se̱ʼera saá ke̱ʼéndi̱ xíʼinndó, xi̱taxindi̱ consejo ndaʼa̱ndó, xi̱sandíkondi̱-inindó, ta xi̱ka̱ʼa̱nndi̱ xíʼin iin tá iinndó ndáa ki̱ʼva keʼéndó 12 ña̱ va̱ʼa ndakundeéndó keʼéndó nda̱a̱ táki̱ʼva kúni̱ mií Ndióxi̱, chi ta̱yóʼo kúú ta̱ ka̱na ndóʼó ña̱ ki̱ʼvindó ti̱xin Reinora ta ndukáʼnundó ixaara.

13 Xa̱ʼa̱ ña̱kán, ndiʼi tiempo táxindi̱ tíxa̱ʼvi ndaʼa̱ Ndióxi̱ xa̱ʼa̱ndó, saáchi tá na̱kunda̱a̱-inindó xa̱ʼa̱ tu̱ʼun Ndióxi̱ ña̱ na̱túʼunndi̱ xíʼinndó, va̱ása níndakanixi̱níndó ña̱ kúúña tu̱ʼun na̱ yiví, chi ka̱ndíxandó ña̱ ndixa tu̱ʼun Ndióxi̱ kúúña ta ña̱yóʼo kúú ña̱ chíndeétáʼan xíʼin ndóʼó na̱ kándíxa Ndióxi̱. 14 Ñaniyó, ndóʼó kéʼéndó nda̱a̱ táki̱ʼva kéʼé na̱ congregación Ndióxi̱ na̱ kítáʼan xíʼin ta̱ Cristo Jesús na̱ íyo chí Judea saáchi ndóʼó ni̱xo̱ʼvi̱ndó i̱xaa na̱ ñuu miíndó, nda̱a̱ táki̱ʼva xóʼvi̱ na̱kán íxaa na̱ judío, 15 chi na̱yóʼo nda̱a̱ xa̱ʼnína ta̱ táta Jesús xíʼin na̱ profeta, ta i̱xandi̱va̱ʼana xíʼinndi̱. Ta saátu va̱ása kéʼéna ña̱ kúni̱ Ndióxi̱, chi ña̱ kéʼé na̱yóʼo su̱ví ña̱ chíndeétáʼan xíʼin na̱ yiví kúúña 16 chi ndiʼi tiempo kíʼvina ku̱a̱chi ta va̱ása táxina ña̱ natúʼunndi̱ xíʼin na̱ yiví na̱ va̱ása kúú judío ña̱ va̱ʼa xa̱a̱na ka̱kuna. Soo vitin xa̱a̱ ki̱xaa̱ tu̱ndóʼo nu̱úna, chi sáa̱ Ndióxi̱ xíʼinna.

17 Ñaniyó, tá sa̱ndákoondi̱ ndóʼó loʼo tiempo (ni kǒovandi̱ níxi̱yo xíʼinndó soo ñúʼuva-inindi̱ xa̱ʼa̱ndó), xi̱kuni̱níndi̱ kuni tukundi̱ ndóʼó ta xa̱ʼa̱ ña̱kán chi̱ka̱a̱níndi̱ ndee̱ ña̱ va̱ʼa keʼéndi̱ ña̱yóʼo. 18 Xa̱ʼa̱ ña̱yóʼo xi̱kuni̱níndi̱ xa̱a̱ndi̱ kotondi̱ ndóʼó. Yi̱ʼi̱ ta̱ Pablo, su̱ví iin yichi̱ kuití níxi̱kuni̱i̱ xa̱i̱ chi u̱vi̱ví yichi̱ xi̱kuni̱i̱ xa̱i̱, soo ta̱ Ndi̱va̱ʼa sa̱sira nu̱úndi̱. 19 Saáchi, ¿ndáaña ndátundi̱?, ¿ndáaña sakúsi̱í-inindi̱?, ¿á ndáaña koo corona ña̱ sakúsi̱í-inindi̱, ña̱ kunúu xi̱níndi̱ kuitandi̱ nu̱ú tátayó Jesús tá xa̱a̱ íyora yóʼo?* ¿Á su̱ví ndóʼó kúúna? 20 Saá íyoña, ndóʼó kúú na̱ sákusi̱í-inindi̱ ta va̱ʼaní kúnindi̱ xa̱ʼa̱ndó.*

3 Xa̱ʼa̱ ña̱kán, tá kǒo níkivika ixandakú-inindi̱, va̱ʼaka nda̱kanixi̱níndi̱ ña̱ kindo̱o miíndi̱ chí Atenas, 2 ta chi̱ndaʼándi̱ ñaniyó ta̱ Timoteo ku̱xa̱a̱ra nu̱úndó, ta̱yóʼo ta̱ káchíñu nu̱ú Ndióxi̱ kúúra ta nátúʼunra tu̱ʼun va̱ʼa* xa̱ʼa̱ ta̱ Cristo. Chi̱ndaʼándi̱ra ña̱ va̱ʼa ndasandakúra-inindó ta saátu ña̱ sandíkora-inindó ña̱ va̱ʼa kandíxakandó Ndióxi̱, 3 ta saá ni iinndó kǒo ndakava-ini ixaa tu̱ndóʼo yóʼo. Chi kúnda̱a̱va-inindó ña̱ ndiʼivayó ya̱ʼa nu̱ú tu̱ndóʼo yóʼo.* 4 Saáchi tá ni̱xi̱yondi̱ xíʼinndó, xi̱ka̱ʼa̱nndi̱ xíʼinndó ña̱ ya̱ʼayó nu̱ú tu̱ndóʼo, ta xa̱a̱ kúnda̱a̱-inindó ña̱ saá kúú ña̱ kúuva. 5 Xa̱ʼa̱ ña̱kán, tá kǒo níkundeéka-inii̱, chi̱ndaʼíi̱ ta̱ Timoteo ku̱xa̱a̱ra nu̱úndó ña̱ va̱ʼa kunda̱a̱-inii̱ á nda̱kú íyo inindó xíʼin Ndióxi̱, chi sana sandákava ta̱ Ndi̱va̱ʼa* ndóʼó ndaʼa̱ ku̱a̱chi chi tá saá ná kuu va̱ása kundayáʼviví chiñu ña̱ ke̱ʼéndi̱.

6 Soo sa̱kán ndi̱kó ta̱ Timoteo ña̱ ni̱xa̱ʼa̱nra xi̱nira ndóʼó ta va̱ʼaní ña̱ nátúʼunra xíʼinndi̱ xa̱ʼa̱ndó, ña̱ nda̱kúní íyo inindó ta kúʼvi̱ní-inindó xínitáʼanndó. Saátu ni̱ka̱ʼa̱nra ña̱ ndákaʼánníndó xa̱ʼa̱ndi̱ ta kúni̱níndó kunindó ndi̱ʼi̱ nda̱a̱ táki̱ʼva xa̱a̱ kúni̱ní miíndi̱ kunindi̱ ndóʼó. 7 Xa̱ʼa̱ ña̱kán ñaniyó, ña̱ kúnda̱a̱-inindi̱ ña̱ nda̱kúní íyo inindó, sándi̱koníña-inindi̱ ni yáʼandi̱ nu̱ú ku̱a̱ʼání tu̱ndóʼo. 8 Saáchi nda̱a̱ ndúndakú-inindi̱ tá kúnda̱a̱-inindi̱ ña̱ nda̱kúní íyo inindó ndíku̱nndó tátayó. 9 Ta ¿ndáa ki̱ʼva na̱ʼa̱ndi̱ ña̱ táxiníndi̱ tíxa̱ʼvi ndaʼa̱ Ndióxi̱ xa̱ʼa̱ndó ta saátu ña̱ sákusi̱íníndó-inindi̱? 10 Ñuú xíʼin káʼñu,* xíʼin ndiʼi ndee̱ndi̱ xákundáʼvindi̱ nu̱ú Ndióxi̱ ña̱ ná kivi kuni nu̱úndi̱ ndóʼó tasaá kivi chindeétáʼanndi̱ xíʼinndó ña̱ kandíxakandó Ndióxi̱.

11 Mií yiváyó Ndióxi̱ xíʼin tátayó Jesús, ná kunána yichi̱ nu̱úndi̱ ña̱ va̱ʼa xa̱a̱ndi̱ kotondi̱ ndóʼó. 12 Mií tátayó ná taxi ña̱ kuʼvi̱níka-inindó kunitáʼanndó ta saátu ña̱ kuʼvi̱-inindó kunindó inkana, nda̱a̱ táki̱ʼva kúʼvi̱ní-inindi̱ xínindi̱ ndóʼó, 13 ta saátu ña̱ ná ndasandakúra-inindó* ta kǒo nda̱a̱ ni iin ña̱ va̱ása va̱ʼa kuumiíndó nu̱ú yiváyó Ndióxi̱ tá xa̱a̱ íyo* tátayó Jesús xíʼin ndiʼi na̱ nda̱kaxin Ndióxi̱.*

4 Ñaniyó, xa̱a̱ sa̱náʼa̱ndi̱ ndóʼó ndáa ki̱ʼva keʼéndó ña̱ va̱ʼa sakúsi̱índó-ini Ndióxi̱, ta saá kúú ña̱ kéʼévandó. Soo vitin káʼa̱nndi̱ xíʼinndó ta xákundáʼvindi̱ nu̱úndó xa̱ʼa̱ tátayó Jesús ña̱ ná ndakundeékandó keʼéndó ña̱yóʼo. 2 Chi ndóʼó xa̱a̱ xíni̱vandó xa̱ʼa̱ chiñu ña̱ xa̱ʼnda tátayó Jesús nu̱úndi̱ ka̱ʼa̱nndi̱ xíʼinndó.

3 Ña̱yóʼo kúú ña̱ kúni̱ Ndióxi̱: ña̱ ná koondó na̱ yi̱i̱ ta ná kǒo ki̱ʼvindó ku̱a̱chi kini.* 4 Iin tá iin miíndó xíniñúʼu sakúaʼandó ka̱ʼnu̱ndó-inindó ta kǒo keʼéndó ña̱ kúni̱ ku̱ñundó, ña̱ va̱ʼa ná kooña ña̱ yi̱i̱ ta kindo̱o-ini Ndióxi̱ xíʼin ña̱ kéʼéndó, 5 ta ndóʼó va̱ása xíniñúʼu keʼéndó nda̱a̱ táki̱ʼva kéʼé na̱ yiví na̱ va̱ása xíni̱ xa̱ʼa̱ Ndióxi̱ chi na̱yóʼo ndeéní kúni̱na ku̱su̱nna xíʼin inkana ta ni loʼo va̱ása xáa̱-inina xíʼin ña̱ kéʼéna. 6 Nda̱a̱ ni iinna kǒo xíniñúʼu keʼéna ña̱ va̱ása va̱ʼa ta saxóʼvi̱na ñanina, chi xa̱a̱ káxiní ni̱ka̱ʼa̱nndi̱ xíʼinndó, Jehová* taxira castigo ndaʼa̱ na̱ kéʼé ndiʼi ña̱yóʼo. 7 Saáchi Ndióxi̱ va̱ása níkanara miíyó ña̱ kooyó na̱ yiví yaku̱a̱ chi ka̱nara miíyó ña̱ kooyó na̱ yi̱i̱. 8 Xa̱ʼa̱ ña̱kán, na̱ va̱ása kándíxa ña̱yóʼo su̱ví na̱ yiví kúú na̱ va̱ása xíínna kandíxana, chi Ndióxi̱ kúú ta̱ va̱ása xíínna kandíxana, chi ta̱yóʼo kúú ta̱ táxi espíritu santo ndaʼa̱na.

9 Soo va̱ása xíniñúʼu ka̱ʼa̱nvíndi̱ xíʼinndó ña̱ ná kuʼvi̱-inindó kunindó inkana nda̱a̱ táki̱ʼva kéʼéndó xíʼin na̱ veʼendó. Saáchi mií Ndióxi̱ kúú ta̱ sánáʼa̱ ndóʼó ndáa ki̱ʼva kuʼvi̱-inindó kunitáʼanndó. 10 Ta xa̱a̱ saá kúú ña̱ kéʼévandó xíʼin ndiʼi na̱ ñaniyó na̱ ndóo chí Macedonia. Soo káʼa̱nndi̱ xíʼinndó ñaniyó ña̱ ná ndakundeékandó keʼéndó ña̱yóʼo. 11 Chika̱a̱ndó ndee̱ ña̱ viíní kutáʼanndó xíʼin inkana, ta xa̱ʼa̱ chiñu miíndó kundi̱ʼi̱-inindó ta chika̱a̱níndó ndee̱ ña̱ kachíñundó nda̱a̱ táki̱ʼva xa̱a̱ ni̱ka̱ʼa̱nndi̱ xíʼinndó, 12 ña̱ va̱ʼa ná kuni na̱ yiví* ña̱ viíní kéʼéndó ta kǒo nda̱a̱ ni iin ña̱ʼa kuma̱ní nu̱úndó.

13 Ta saátu ñaniyó, kúni̱ndi̱ ña̱ ná kunda̱a̱ káxi inindó ndáaña kundoʼo na̱ ni̱xi̱ʼi̱ ña̱ va̱ʼa ná kǒo kusuchí-inindó nda̱a̱ táki̱ʼva ndóʼo na̱ yiví na̱ kǒo nda̱a̱ ni iin ña̱ʼa ndátu ndakiʼin chí nu̱únínu. 14 Saáchi tá kándíxayó ña̱ ni̱xi̱ʼi̱ ta̱ Jesús ta nda̱takura saátu kándíxayó ña̱ taxi Ndióxi̱ ña̱ kutaku na̱ ni̱xi̱ʼi̱ xa̱ʼa̱ ña̱ ndíku̱nna ta̱ Jesús ña̱ va̱ʼa koona xíʼinra. 15 Tu̱ʼun Jehová* kúú ña̱ xíniñúʼundi̱ ña̱ káʼa̱nndi̱ ña̱yóʼo xíʼinndó: miíyó na̱ táku tá ná kixaa̱* tátayó, ku̱ʼu̱nvayó chí ndiví. Soo siʼnaka na̱ xa̱a̱ ni̱xi̱ʼi̱ ndataku ta tándi̱ʼi saá ndataku miíyó; 16 tasaá tátayó kixira chí ndiví ta kuniso̱ʼoyó ta̱chíra ña̱ kaʼndara chiñu, kuniso̱ʼoyó ta̱chíra ña̱ kúúra iin arcángel, ta kuniʼira trompeta Ndióxi̱, ta na̱ xa̱a̱ ni̱xi̱ʼi̱ na̱ xi̱ndiku̱n ta̱ Cristo na̱yóʼo kúú na̱ siʼnaka ndataku. 17 Tándi̱ʼi, tá ná ka̱ku miíyó na̱ táku, ku̱ʼu̱nyó xíʼinna chí sa̱tá vi̱kó ña̱ va̱ʼa ndakutáʼanyó xíʼin tátayó, tasaá kooyó xíʼinra ndiʼi tiempo. 18 Xa̱ʼa̱ ña̱kán ndakundeéndó sandíkondó-ini táʼanndó xíʼin tu̱ʼun yóʼo.

5 Ñaniyó va̱ása xíniñúʼu ka̱ʼa̱n tukundi̱ xíʼinndó xa̱ʼa̱ ki̱vi̱ á tiempo ña̱ nda̱kaxin Ndióxi̱, 2 saáchi ndóʼó kúnda̱a̱ va̱ʼa inindó ña̱ ki̱vi̱ Jehová* kixiña nda̱a̱ táki̱ʼva kéʼé iin ta̱ kui̱ʼná tá ñuú. 3 Tá ná kixáʼana ka̱ʼa̱nna “Vitin va̱ʼaní ndóo ndiʼiyó ta kǒoka ña̱ sándi̱ʼi̱-iniyó”, iin kama kixaa̱ ña̱ ndiʼi-xa̱ʼa̱na nda̱a̱ táki̱ʼva ndóʼo iin ñaʼá ñá xa̱a̱ ku̱nu̱mí kaku se̱ʼe. 4 Soo ndóʼó na̱ ñaniyó, va̱ása íyondó nu̱ú naá, ña̱ iin kama kuití kixaa̱ ki̱vi̱ kán nu̱úndó nda̱a̱ táki̱ʼva ndóʼo na̱ kui̱ʼná, 5 chi ndiʼi ndóʼó íyondó nda̱a̱ táki̱ʼva íyo na̱ xíka nu̱ú íyo luz ta saátu íyondó nda̱a̱ táki̱ʼva íyo na̱ xíka tá káʼñu* chi miíyó va̱ása kúúyó kuenta ña̱ ñuú ni ña̱ naá.

6 Xa̱ʼa̱ ña̱kán, ná kǒo ku̱su̱nyó nda̱a̱ táki̱ʼva kéʼé inkana. Va̱ʼaka ná kunditoyó ta ná koo káxi iniyó. 7 Na̱ kísi̱, ñuú kúú ña̱ kísi̱na; ta na̱ xínii,* ñuú kúú ña̱ kéʼéna ña̱yóʼo. 8 Soo miíyó kúúyó na̱ xíka tá káʼñu,* ña̱kán ná koo káxi iniyó ta ná kandíxaníyó Ndióxi̱ ta ná kundaaní-iniyóra, ta saátu ná kuʼvi̱ní-iniyó kunitáʼanyó chi ña̱yóʼo nda̱a̱ táki̱ʼva íyo ña̱ ndási kándíkayó saá íyoña, ta saátu ná kandíxayó ña̱ sakǎku Ndióxi̱ miíyó chi ña̱yóʼo nda̱a̱ táki̱ʼva íyo iin casco ña̱ ndási xi̱níyó saá íyoña, 9 saáchi Ndióxi̱ va̱ása níndaka̱xinra miíyó ña̱ taxira castigo ndaʼa̱yó, chi nda̱kaxinra miíyó ña̱ va̱ʼa ka̱kuyó xa̱ʼa̱ ña̱ ke̱ʼé tátayó Jesucristo. 10 Ta̱kán ni̱xi̱ʼi̱ra xa̱ʼa̱yó, ña̱kán ni ndítoyó á ni ni̱ki̱si̱yó* xa̱a̱yó kooyó xíʼinra. 11 Ña̱kán ndakundeéndó sandíkondó-ini táʼanndó ta ndasandakúndó-ini táʼanndó nda̱a̱ táki̱ʼva xa̱a̱ kéʼéndó.

12 Ta vitin ñaniyó, káʼa̱nndi̱ xíʼinndó ña̱ ná ixato̱ʼóníndó na̱ ñúʼu xíʼinndó ta ndeéní káchíñuna, na̱ níʼi yichi̱ nu̱úndó ña̱ kéʼéndó chiñu tátayó ta táxina consejo ndaʼa̱ndó. 13 Na̱ʼa̱ndó ña̱ ndáyáʼviní na̱yóʼo nu̱úndó, ta kuʼvi̱ní-inindó kunindóna xa̱ʼa̱ chiñu ña̱ kéʼéna ta saátu viíní kutáʼanndó xíʼin inkana. 14 Ñaniyó, xákundáʼvindi̱ nu̱úndó ña̱ ná chindeétáʼanndó xíʼin na̱ va̱ása kándíxa,* ta saátu sandíkondó-ini na̱ nda̱kava-ini, ta chindeétáʼanndó xíʼin na̱ vitá kúni, ta kúee koo inindó xíʼin ndiʼina. 15 Tá iinna kéʼéna ña̱ va̱ása va̱ʼa xíʼinndó, kiʼin va̱ʼandó kuenta ña̱ kǒo keʼéndó saá xíʼinna. Nu̱úka ña̱yóʼo chika̱a̱ndó ndee̱ ña̱ keʼéndó ña̱ va̱ʼa xíʼin táʼanndó, ta saátu xíʼin inkana.

16 Ndiʼi tiempo kusi̱í-inindó. 17 Ka̱ʼa̱nníndó xíʼin Ndióxi̱. 18 Taxindó tíxa̱ʼvi xa̱ʼa̱ ndiʼi ña̱ʼa. Ña̱yóʼo kúú ña̱ kúni̱ Ndióxi̱ xa̱ʼa̱ ña̱ ndíku̱nndó ta̱ Cristo Jesús. 19 Kǒo kasindó nu̱ú ña̱ espíritu santo* ña̱ chindeétáʼanña xíʼinndó. 20 Kǒo kundasíndó kunindó ña̱ʼa ña̱ káʼa̱n Ndióxi̱. 21 Viíní nandukúndó xa̱ʼa̱ ndiʼi ña̱ʼa, ta kǒo sandákoondó ña̱ va̱ʼa. 22 Kǒo keʼéndó nda̱a̱ ni iin ña̱ va̱ása va̱ʼa.

23 Káʼi̱n xíʼin Ndióxi̱ ta̱ sándi̱ko-inindó, ña̱ ná ndasayi̱i̱ra ndóʼó ña̱ va̱ʼa kachíñundó nu̱úra. Tasaá ñaniyó, espíritu* ña̱ kúúmiíndó, ña̱ tákundó,* ta saátu ku̱ñundó ná va̱ása kuyaku̱a̱ña, ta viíní ná kooña nda̱a̱ tá ná kixaa̱* tátayó Jesucristo yóʼo. 24 Ta̱ kána ndóʼó nda̱kúní íyo inira ta keʼévara ña̱ ni̱ka̱ʼa̱nra.

25 Ñaniyó, ndakundeéndó ka̱ʼa̱nndó xíʼin Ndióxi̱ xa̱ʼa̱ndi̱.

26 Viíní ndakiʼinndó ndiʼi na̱ hermano ta numindóna.*

27 Xa̱ʼa̱ ki̱vi̱ tátayó, xákundáʼvii̱ nu̱úndó ña̱ ná kaʼvindó carta yóʼo nu̱ú ndiʼi na̱ ñaniyó.*

28 Va̱ʼaní ná koo ini tátayó Jesucristo xíʼinndó.