SEGUNDA ÑA̱ TESALONICENSES

1 Yi̱ʼi̱ ta̱ Pablo xíʼin ta̱ Silvano* ta saátu ta̱ Timoteo, káʼyíndi̱ ña̱yóʼo ku̱xa̱a̱ nu̱ú ndóʼó na̱ congregación na̱ íyo chí Tesalónica, na̱ kúú kuenta yiváyó Ndióxi̱ ta saátu ta̱ táta Jesucristo:

2 Va̱ʼaní ná koo ini yiváyó Ndióxi̱ xíʼinndó saátu tátayó Jesucristo ta va̱ʼaní ná kutáʼanndó xíʼinna.

3 Ndiʼi yichi̱ táxiníndi̱ tíxa̱ʼvi ndaʼa̱ Ndióxi̱ xa̱ʼa̱ ndóʼó na̱ ñaniyó. Iin ña̱ va̱ʼava kúú ña̱ keʼéndi̱ ña̱yóʼo saáchi kándíxaníkandó Ndióxi̱ ta ña̱ kúʼvi̱-inindó xínitáʼanndó ku̱a̱ʼa̱n xáʼnuníka ña̱yóʼo. 4 Ña̱kán, miíndi̱ va̱ʼaní káʼa̱nndi̱ xa̱ʼa̱ndó xíʼin na̱ congregación Ndióxi̱ xa̱ʼa̱ ña̱ kúndeé-inindó* yáʼandó nu̱ú ku̱a̱ʼá tu̱ndóʼo ta kándíxaníndó Ndióxi̱ ni íxandi̱va̱ʼana xíʼinndó. 5 Ña̱yóʼo náʼa̱ña ña̱ nda̱kúní tíin Ndióxi̱ ku̱a̱chi, ta xa̱ʼa̱ ña̱yóʼo kúú ña̱ kivi ki̱ʼvindó ti̱xin Reino Ndióxi̱ chi xa̱ʼa̱ ña̱yóʼo kúú ña̱ xóʼvi̱níndó.

6 Xa̱ʼa̱ ña̱ nda̱kúní kéʼé Ndióxi̱ ndiʼi ña̱ʼa, taxira castigo ndaʼa̱ na̱ sáxo̱ʼvi̱ ndóʼó. 7 Soo ndiʼi ndóʼó na̱ xóʼvi̱ ña̱yóʼo, Ndióxi̱ sandíkora-inindó ta saátu sandíkora-ini ndi̱ʼi̱va. Ta ña̱yóʼo kuuña tá ná kita tátayó Jesús chí ndiví ma̱ʼñú ñuʼu̱ ña̱ xíxi̱, ta kutáʼan na̱ ángel na̱ íyoní ndee̱ xíʼinra. 8 Tasaá taxira castigo ndaʼa̱ na̱ va̱ása xíni̱ Ndióxi̱ ta saátu na̱ kǒo xíín kandíxa tu̱ʼun va̱ʼa* xa̱ʼa̱ tátayó Jesús. 9 Mií tátayó ndatiinra ku̱a̱chi xíʼin na̱yóʼo. Ta castigo ña̱ taxira ndaʼa̱na kúú ña̱ sandíʼi-xa̱ʼa̱ va̱ʼarana, xa̱ʼa̱ ña̱yóʼo va̱ása kunikarana ta ni va̱ása kuniñúʼura ndee̱ra ña̱ chindeétáʼanra xíʼinna, 10 tá ná kixi tátayó ña̱ ndukáʼnura xíʼin na̱ ñanira na̱ nda̱kaxin Ndióxi̱,* ndiʼi na̱ kándíxañaʼá ndakanda̱ní-inina.* Ta xa̱ʼa̱ ña̱ ka̱ndíxandó ndiʼi ña̱ ni̱ka̱ʼa̱nndi̱ xíʼinndó kootu ndóʼóva xíʼinna.

11 Ña̱kán, ndiʼi tiempo káʼa̱nndi̱ xíʼin Ndióxi̱ xa̱ʼa̱ndó ña̱ va̱ʼa ná ka̱ʼa̱n Ndióxi̱ ña̱ va̱ʼaní íyo ña̱ kéʼéndó xa̱ʼa̱ ña̱ nda̱kaxinra ndóʼó, ta ná kuniñúʼura ndee̱ra ña̱ keʼéra ndiʼi ña̱ va̱ʼa ña̱ kúni̱ miíra ta ná saxínura ña̱ kéʼéndó xa̱ʼa̱ ña̱ kándíxandóra. 12 Tasaá, ki̱vi̱ tátayó Jesús ndukáʼnuña xa̱ʼa̱ ña̱ kéʼéndó ta saátu ndóʼó ndukáʼnundó xa̱ʼa̱ ña̱ kítáʼanndó xíʼinra. Ta ndiʼi ña̱yóʼo xi̱nuña xa̱ʼa̱ ña̱ va̱ʼaní-ini Ndióxi̱ ta saátu ta̱ táta Jesucristo.

2 Soo ñaniyó, káʼa̱nndi̱ xíʼinndó xa̱ʼa̱ ki̱vi̱ ña̱ xa̱a̱ ná koo* tátayó Jesucristo xíʼinyó ta saátu ña̱ ndakutáʼanyó xíʼinra, 2 kǒo taxindó ña̱ kamaní sasánana xi̱níndó ta ni kǒo taxindó ña̱ sayíʼvina ndóʼó ña̱ ka̱ʼa̱nna ña̱ xa̱a̱ ki̱xaa̱ ki̱vi̱ Jehová* ta kuniñúʼuna tu̱ʼun ña̱ náʼa̱ ña̱ kúúña kuenta Ndióxi̱, á ña̱ ka̱ʼa̱n yuʼúna xíʼinndó, á ña̱ ka̱ʼa̱nna ña̱ ndi̱ʼi̱ chi̱ndaʼá iin carta nu̱úndó nu̱ú káʼa̱nndi̱ xa̱ʼa̱ ña̱yóʼo.

3 Kǒo taxindó ña̱ sandáʼvina ndóʼó, chi tá kúma̱níka kixaa̱ ki̱vi̱ kán siʼnaka na̱ íyo contra Ndióxi̱ koo ta saátu ta̱a ta̱ yáʼandosó ña̱ káʼa̱n ley, ta ta̱yóʼo ta̱ ndiʼi-xa̱ʼa̱ kúúra. 4 Ta̱yóʼo ndi̱va̱ʼaní-inira ta ndásakáʼnura miíra nu̱ú ndiʼika ña̱ káʼa̱nna kúú ndióxi̱ á nu̱ú ndiʼika ña̱ ndásakáʼnuna, ta ta̱yóʼo xíko̱ora* ini templo Ndióxi̱ ta nu̱ú ndiʼina káʼa̱nra ña̱ kúúra iin ndióxi̱. 5 ¿Á kǒo ndákaʼánndó ña̱ xi̱ka̱ʼi̱n ña̱yóʼo xíʼinndó tá ni̱xi̱yokai̱ xíʼinndó?

6 Vitin kúnda̱a̱-inindó ndáana sási nu̱ú ta̱a ta̱ yáʼandosó ña̱ káʼa̱n ley, ña̱ va̱ʼa ná kunda̱a̱-inina xa̱ʼa̱ra mií tiempo ña̱ xíniñúʼu kooña. 7 Mií ña̱ nda̱a̱, ña̱ va̱ása va̱ʼa ña̱ kéʼé ta̱ ta̱a yóʼo ña̱ íyo se̱ʼé kúúña, soo xa̱a̱ kéʼévaraña, ta ña̱yóʼo koo se̱ʼékaña nda̱a̱ tá ná va̱ása kooka ta̱ sási nu̱úña. 8 Tasaá ndatu̱vi xa̱ʼa̱ ta̱a ta̱ yáʼandosó ña̱ káʼa̱n ley, ta tátayó Jesús sandíʼi-xa̱ʼa̱rara xíʼin ndee̱ tu̱ʼun ña̱ káʼa̱nra* ta ña̱yóʼo kuuña tá xa̱a̱ ná na̱ʼa̱ ta̱ Jesús ña̱ íyora* xíʼinyó. 9 Tá ná ndatu̱vi xa̱ʼa̱ ta̱a ta̱ yáʼandosó ña̱ káʼa̱n ley, ta̱ Ndi̱va̱ʼa taxira ndee̱ ndaʼa̱ra ña̱ keʼéra ku̱a̱ʼání milagro, ña̱ keʼéra ku̱a̱ʼá ña̱ʼa ña̱ va̱ʼa sandáʼvira na̱ yiví ta saátu ña̱ʼa ña̱ ndakanda̱-inina* xíʼin, 10 ta kuniñúʼura ndiʼi nu̱ú ña̱ʼa ña̱ va̱ʼa sandáʼvirana. Ta ña̱yóʼo sandáʼviña na̱ yiví na̱ ndiʼi-xa̱ʼa̱, xa̱ʼa̱ ña̱ kǒo níkuʼvi̱-inina kunina ña̱ nda̱a̱ ña̱ kivi sakǎku miína. 11 Xa̱ʼa̱ ña̱yóʼo, Ndióxi̱ táxira ña̱ ná sandáʼvinana ta ná sasánana xi̱nína ña̱ va̱ʼa kandíxana ña̱ vatá, 12 ña̱ va̱ʼa ndatiinra ku̱a̱chi xíʼin na̱yóʼo chi kǒo níkandíxana ña̱ nda̱a̱, chi ni̱kusi̱íníka-inina ña̱ ke̱ʼéna ña̱ va̱ása va̱ʼa.

13 Ndiʼi yichi̱ táxindi̱ tíxa̱ʼvi ndaʼa̱ Ndióxi̱ xa̱ʼa̱ndó na̱ ñaniyó na̱ kúʼvi̱ní-ini Jehová* xínira, saáchi nani tá xa̱ʼa̱ví Ndióxi̱ nda̱kaxinra ndóʼó ña̱ va̱ʼa sakǎkura ndóʼó ta nda̱sayi̱i̱ra ndóʼó xíʼin espíritu ña̱ kúúmiíra ta saátu nda̱sayi̱i̱ra ndóʼó xa̱ʼa̱ ña̱ kándíxandó ña̱ nda̱a̱. 14 Ndióxi̱ nda̱kaxinra ndóʼó ña̱ va̱ʼa ka̱kundó saáchi ndi̱ʼi̱ na̱túʼunndi̱ tu̱ʼun va̱ʼa* xíʼinndó ta ka̱ndíxavandóña tasaá kivi ndukáʼnundó nda̱a̱ táki̱ʼva ndu̱káʼnu tátayó Jesucristo. 15 Xa̱ʼa̱ ña̱kán ñaniyó, ndakúní koo inindó ta kǒo sandákoondó ña̱ kandíxandó ña̱ʼa ña̱ sa̱kuaʼandó, ni tu̱ʼun kuití kúú ña̱ ni̱ka̱ʼa̱nndi̱ xíʼinndó á ni carta kúú ña̱ chi̱ndaʼándi̱ nu̱úndó. 16 Mií yiváyó Ndióxi̱ kúʼvi̱ní-inira xínira miíyó, ta xa̱ʼa̱ ña̱ va̱ʼaní-inira xíʼinyó sándi̱kora-iniyó ndiʼi tiempo, ta taxira iin ña̱ va̱ʼaní ndakiʼinyó chí nu̱únínu. Miíra xíʼin tátayó Jesucristo 17 ná sandíkona-inindó, ná taxina ña̱ ndakú koo inindó, tasaá ndiʼi tiempo keʼéndó ña̱ va̱ʼa ta ka̱ʼa̱nndó ña̱ va̱ʼa.

3 Ñaniyó, ndakundeéndó ka̱ʼa̱nndó xíʼin Ndióxi̱ xa̱ʼa̱ndi̱ ña̱ va̱ʼa kamaka ná xa̱xa̱ tu̱ʼun Jehová* ku̱ʼu̱nña, ta viíní ná ndakiʼinnaña nda̱a̱ táki̱ʼva viíní nda̱kiʼin ndóʼóña, 2 ta ka̱ʼa̱ntundó xíʼinra ña̱ va̱ʼa ná ka̱kundi̱ nu̱ú na̱ yiví na̱ ndi̱va̱ʼaní-ini na̱ kéʼé ña̱ va̱ása va̱ʼa, saáchi su̱ví ndiʼi na̱ yiví kándíxa Ndióxi̱. 3 Soo tátayó nda̱kúní-inira ta ndasanda̱kúra-inindó ta kundaara ndóʼó nu̱ú ta̱ Ndi̱va̱ʼa. 4 Ta saátu, ndi̱ʼi̱ na̱ ndíku̱n tátayó kǒo xíka-inindi̱ xa̱ʼa̱ndó ña̱ xíniso̱ʼovandó ña̱ káʼa̱nndi̱ xíʼinndó ta ndakundeévandó keʼéndóña. 5 Mií tátayó ná chindeétáʼan xíʼinndó ña̱ va̱ʼa kuʼvi̱-inindó kunindó Ndióxi̱ ta saátu ña̱ ndakú ná koo inindó ta ndakundeéndó kundiku̱nndó ta̱ Cristo.

6 Ñaniyó, xa̱ʼa̱ ki̱vi̱ tátayó Jesucristo káʼa̱nndi̱ xíʼinndó ña̱ ná kǒo kutáʼanndó xíʼin ni iin na̱ ñaniyó na̱ íxaso̱ʼo* ta va̱ása ndíku̱nna ña̱ sa̱náʼa̱ndi̱ ndóʼó.* 7 Ndóʼó xíni̱vandó nda̱a̱ ki̱ʼva kundiku̱nndó yichi̱ ña̱ sa̱ndákoondi̱ nu̱úndó, saáchi ndi̱ʼi̱ kéʼévandi̱ ña̱ kúni̱ Ndióxi̱. 8 Ndiʼi ña̱ xi̱xindi̱ su̱ví ña̱ níni̱ʼíndi̱ kúúña, saáchi ñuú xíʼin káʼñu* ndeéní ka̱chíñundi̱, ta ni va̱ása níndakindee̱ndi̱ chi kǒo níxikuni̱ndi̱ sandíʼi̱ndi̱-inindó ña̱ taxindó ña̱ kuniñúʼundi̱. 9 Kúúmiívandi̱ nda̱yí* ña̱ taxindó ña̱ xíniñúʼundi̱ soo xi̱kuni̱ndi̱ chinúundi̱ yichi̱ nu̱úndó ña̱ va̱ʼa kundiku̱nndó ña̱ kéʼéndi̱. 10 Saáchi tá ni̱xi̱yondi̱ xíʼinndó, xi̱ka̱ʼa̱nndi̱ ña̱yóʼo xíʼinndó: “Tá iinna kǒo xíínna kachíñuna ná va̱ása kuxuna”. 11 Saáchi na̱kunda̱a̱-inindi̱ xa̱ʼa̱ sava na̱ ñúʼu xíʼinndó ña̱ íxaso̱ʼona, chi va̱ása káchíñuna ta ña̱ kéʼé inkana ndíʼi̱-inina xa̱ʼa̱.* 12 Xíʼin na̱ yiví yóʼo káʼa̱nndi̱ ta xákundáʼvindi̱ nu̱úna xa̱ʼa̱ tátayó Jesucristo, ña̱ viíní ná kachíñuna ta xíʼin chiñu ña̱ kéʼéna ná ni̱ʼína ña̱ kuxuna.

13 Ñaniyó, kǒo sandákoondó keʼéndó ña̱ va̱ʼa. 14 Soo tá iinna kǒo xíínna kuniso̱ʼona ña̱ káʼa̱n carta yóʼo, kuenta koondó xíʼin na̱ yiví yóʼo* ta va̱ása kutáʼanndó xíʼinna ña̱ va̱ʼa ná kukaʼan nu̱úna. 15 Kǒo ndakanixi̱níndó ña̱ kúúna na̱ íyo contra xíʼinndó, va̱ʼaka ndakundeéndó taxindó consejo ndaʼa̱na nda̱a̱ táki̱ʼva kéʼéndó xíʼin ndiʼika na̱ ñaniyó.

16 Mií tátayó ta̱ sándi̱ko-ini na̱ yiví ná chindeétáʼanra xíʼinndó ña̱ kǒo kundi̱ʼi̱-inindó xa̱ʼa̱ ni iin ña̱ʼa. Mií tátayó ná koora xíʼin ndiʼindó.

17 Yi̱ʼi̱ ta̱ Pablo kúú ta̱ káʼyí ña̱yóʼo ku̱xa̱a̱ nu̱úndó ña̱ chíndeéi̱ ndóʼó.* Saá káʼyíi̱ ndiʼi carta ña̱ va̱ʼa kunda̱a̱-inindó ña̱ yi̱ʼi̱ kúú ta̱ káʼyíña.

18 Va̱ʼaní ná koo ini tátayó Jesucristo xíʼin ndiʼi ndóʼó.