PRIMERA ÑA̱ TIMOTEO

1 Yi̱ʼi̱ ta̱ Pablo kúi̱ apóstol ta̱ Cristo Jesús, chi mií Ndióxi̱ ta̱ sáka̱ku miíyó kúú ta̱ nda̱kaxin yi̱ʼi̱ ta saátu ta̱ Cristo Jesús ta̱ ndátuyó taxi iin ña̱ va̱ʼa ndaʼa̱yó, 2 yi̱ʼi̱ kúú ta̱ chíndaʼá carta yóʼo ndaʼún Timoteo,* ta nda̱a̱ táki̱ʼva íyo se̱ʼe miíi̱ saá íyoún ta inkáchi íyo ña̱ kándíxayó:

Mií yiváyó Ndióxi̱ xíʼin tátayó ta̱ Cristo Jesús, va̱ʼaní ná koo inina xíʼún, ná kundáʼvi-inina kunina yóʼó ta va̱ʼaní ná kutáʼún xíʼinna.

3 Tá xa̱a̱ ku̱nu̱mí ku̱ʼi̱n chí Macedonia, ni̱ka̱ʼi̱n xíʼún ña̱ ná kindo̱ún chí Éfeso, ta saátu vitin káʼi̱n xíʼún ña̱ ná ka̱ʼún xíʼin sava na̱ yiví, ña̱ ná kǒo sanáʼa̱na ña̱ vatá,* 4 ni ná kǒo kuniso̱ʼona cuento vatá ni ña̱ káʼa̱n na̱ nándukú xa̱ʼa̱ ki̱vi̱ na̱ táʼanna na̱ ni̱xi̱yo xi̱naʼá. Chi ña̱yóʼo va̱ása ndáyáʼviña, ta kíxáʼana xíkaní-inina xa̱ʼa̱ ña̱yóʼo ta su̱ví ña̱ chindeétáʼan xíʼinna kúúña ña̱ va̱ʼa xa̱a̱na kandíxakana Ndióxi̱. 5 Káʼi̱n ña̱yóʼo xíʼún chi kúni̱i̱ ña̱ ndiʼiyó ná kuʼvi̱-iniyó kunitáʼanyó xíʼin ndiʼi níma̱yó, ña̱ va̱ʼaní ná koo ña̱ xínitúni̱yó ta xíʼin ndinuʼu-iniyó ná kandíxayó Ndióxi̱. 6 Ta xa̱ʼa̱ ña̱ kǒo kéʼéna ña̱yóʼo, savana kíxáʼana ndáʼyi̱ nu̱ú táʼanna ta ni va̱ása ndáyáʼvi ña̱ káʼa̱nna. 7 Kúni̱na sanáʼa̱na xa̱ʼa̱ ña̱ káʼa̱n ley, soo ni va̱ása kúnda̱a̱-inina xíʼin tu̱ʼun ña̱ káʼa̱nna ta ni va̱ása kúnda̱a̱-inina xíʼin ña̱ʼa ña̱ ndeéní sánáʼa̱na.

8 Soo miíyó kúnda̱a̱va-iniyó ña̱ va̱ʼaníva íyo Ley tá viíní kéʼéyó ña̱ káʼa̱nña, 9 ta kúnda̱a̱-iniyó ña̱ va̱ása níkuva̱ʼa ley xa̱ʼa̱ na̱ kéʼé ña̱ va̱ʼa. Ña̱yóʼo na̱kuva̱ʼaña xa̱ʼa̱ na̱ yiví na̱ yáʼandosó ña̱ káʼa̱n ley, na̱ íxaso̱ʼo, na̱ va̱ása íxato̱ʼó Ndióxi̱, na̱ yiví ku̱a̱chi, na̱ va̱ása nda̱kú-ini, na̱ kúndasí xíni ña̱ʼa ña̱ yi̱i̱ ña̱ kúú kuenta Ndióxi̱, na̱ xáʼní yivá, na̱ xáʼní siʼí, na̱ xáʼní inkakana, 10 na̱ yiví na̱ kéʼé ku̱a̱chi kini,* ta̱a ta̱ kísi̱ xíʼin inka ta̱a,* na̱ íxakuíʼná na̱ yiví, na̱ káʼa̱n ña̱ vatá, na̱ kǒo sáxi̱nu ña̱ káʼa̱nna, saátu ndiʼi ña̱ʼa ña̱ kǒo kítáʼan xíʼin ña̱ nda̱a̱, 11 tu̱ʼun yóʼo kítáʼanña xíʼin tu̱ʼun ña̱ va̱ʼaní* ña̱ ta̱xi Ndióxi̱ ta̱ si̱í-ini ndaʼíi̱ ña̱ natúʼi̱n xa̱ʼa̱ña.

12 Táxii̱ tíxa̱ʼvi ndaʼa̱ tátayó ta̱ Cristo Jesús chi ta̱xira ndee̱ ndaʼíi̱ ta xi̱ndaa-inira yi̱ʼi̱, ña̱kán ta̱xira chiñu yóʼo ndaʼíi̱, 13 ni tá ya̱chi̱ xi̱ka̱ʼa̱n-ndi̱va̱ʼi̱ xa̱ʼa̱ Ndióxi̱, i̱xandi̱va̱ʼi̱ xíʼin na̱ ñuura ta ni̱nuní xi̱kuni̱i̱. Soo ke̱ʼíi̱ ndiʼi ña̱yóʼo xa̱ʼa̱ ña̱ va̱ása níxi̱kunda̱a̱-inii̱ xa̱ʼa̱ Ndióxi̱ ta va̱ása níxikandíxai̱ra, xa̱ʼa̱ ña̱yóʼo ta̱ Cristo ku̱ndáʼvi-inira xi̱nira yi̱ʼi̱. 14 Soo Ndióxi̱ ni̱na̱ʼa̱ra ña̱ va̱ʼaní-inira xíʼi̱n, ta ta̱ Cristo Jesús chi̱ndeétáʼanra xíʼi̱n ña̱ va̱ʼa kandíxai̱ Ndióxi̱, ta saátu ni̱na̱ʼa̱ra ña̱ ni̱kuʼvi̱-inira xi̱nira yi̱ʼi̱. 15 Ña̱ nda̱a̱va kúú ña̱yóʼo ta xíniñúʼu kandíxanaña: ta̱ Cristo Jesús, ki̱xira ñuyǐví yóʼo ña̱ va̱ʼa sakǎkura na̱ yiví na̱ kúúmií ku̱a̱chi, ta nu̱ú ndiʼika na̱yóʼo, yi̱ʼi̱ kúú ta̱ kúúmiíníka ku̱a̱chi. 16 Soo ta̱yóʼo ku̱ndáʼviníka-inira xi̱nira yi̱ʼi̱ ni xi̱kui̱ ta̱ kúúmiíníka ku̱a̱chi nu̱ú ndiʼina, ta xíʼin ña̱yóʼo ta̱ Cristo na̱ʼa̱ra nu̱ú na̱ xa̱a̱ kandíxañaʼá ña̱ kúee íyo inira ta taxira ña̱ kutakuna ndiʼi tiempo.

17 Ndióxi̱ kúú Rey ta̱ íyo ndiʼi tiempo, ta̱ va̱ása ndíʼi-xa̱ʼa̱, ta̱ kǒo kívi kuniyó, iinlá ta̱yóʼo kúú Ndióxi̱, ná ixato̱ʼóyóra ta ná ndasakáʼnuyóra ndiʼi tiempo. Saá koo.

18 Timoteo, se̱ʼe miíi̱, káʼi̱n ña̱yóʼo xíʼún nda̱a̱ táki̱ʼva íyo profecía ña̱ ni̱ka̱ʼa̱nna xa̱ʼún, tá ná keʼún ña̱ ni̱ka̱ʼa̱nna xa̱ʼún, xa̱ún koún nda̱a̱ táki̱ʼva íyo iin soldado ta̱ xíni̱ní kanitáʼan, 19 kǒo sandákoún ña̱ kandíxaún Ndióxi̱ ta va̱ʼaní ná koo ña̱ xínitúni̱ún, chi savana kǒo kéʼékana ña̱yóʼo ña̱kán ndi̱ʼi-xa̱ʼa̱ ña̱ kándíxana ta ndo̱ʼona nda̱a̱ táki̱ʼva ndóʼo tú barco tú ndi̱ʼi-xa̱ʼa̱ ta ni̱ki̱ʼvinú* ti̱xin mar. 20 Ta ki̱ʼva saá ndo̱ʼo ta̱ Himeneo xíʼin ta̱ Alejandro, ña̱kán nda̱taxii̱ u̱vi̱ saá na̱yóʼo ndaʼa̱ ta̱ Ndi̱va̱ʼa ta xíʼin castigo ña̱ nda̱kiʼinna ná sakúaʼana ña̱ kǒo ka̱ʼa̱n-ndi̱va̱ʼana xa̱ʼa̱ Ndióxi̱.

2 Ña̱kán, ña̱ nu̱ú ña̱ káʼi̱n xíʼinndó kúú ña̱ ná kuakundáʼvindó nu̱ú Ndióxi̱, ka̱ʼa̱nndó xíʼinra, ka̱ʼa̱n-ndáʼvindó xa̱ʼa̱ inkana ta taxindó tíxa̱ʼvi ndaʼa̱ Ndióxi̱ xa̱ʼa̱ ndiʼi na̱ yiví, 2 xa̱ʼa̱ na̱ rey ta saátu xa̱ʼa̱ ndiʼi na̱ kúúmií iin chiñu káʼnu, ña̱ va̱ʼa kǒo kundi̱ʼi̱-iniyó ta xíʼin ndinuʼu-iniyó ndasakáʼnuyó Ndióxi̱ ta xíʼin ña̱ to̱ʼó keʼéyóña. 3 Va̱ʼaní ña̱yóʼo nu̱ú Ndióxi̱ ta̱ sáka̱ku miíyó ta kúsi̱í-inira xíʼin ña̱yóʼo, 4 chi ña̱ kúni̱ra kúú ña̱ ná ka̱ku ndiʼi na̱ yiví, ta ná xa̱a̱na kunda̱a̱ káxi inina mií ña̱ nda̱a̱ xa̱ʼa̱ra. 5 Saáchi iinláva kúú Ndióxi̱ íyo ta iinláva kúú ta̱ chíndeétáʼan xíʼin na̱ yiví ña̱ ndakutáʼan ma̱nína xíʼin Ndióxi̱: ta̱yóʼo kúú ta̱ Cristo Jesús, 6 ta̱ nda̱taxi mií ña̱ va̱ʼa chaʼvira* xa̱ʼa̱ ndiʼiyó. Ña̱yóʼo kúú ña̱ ka̱ʼa̱nna xa̱ʼa̱ tá xa̱a̱ ná kixaa̱ mií tiempo. 7 Xa̱ʼa̱ ña̱yóʼo kúú ña̱ nda̱kaxin Ndióxi̱ yi̱ʼi̱, ña̱ natúʼi̱n xa̱ʼa̱ra ta koi̱ apóstol, ña̱ va̱ʼa sanáʼi̱ na̱ va̱ása kúú judío xa̱ʼa̱ ña̱ kandíxana Ndióxi̱ ta saátu xa̱ʼa̱ ña̱ nda̱a̱. Va̱ása sándaʼvii̱ chi ña̱ nda̱a̱va kúú ña̱ káʼi̱n.

8 Ña̱ kúni̱i̱ kúúña, tá káʼa̱n na̱ ta̱a xíʼin Ndióxi̱ ni nda̱a̱ ndáaka nu̱ú xíkana, ná ndaniʼina ndaʼa̱na tá káʼa̱nna xíʼinra ta xíʼin ndinuʼu-inina ná keʼénaña, ná va̱ása sa̱a̱na, ta ni ná kǒo natúʼun kúáchina. 9 Saátu ná ñaʼá, ña̱ va̱ʼa livi kuna̱ʼa̱ná va̱ása xíniñúʼu kundi̱ʼi̱ní-ininá xa̱ʼa̱ ndáa ki̱ʼva koo lazo ña̱ katúnná xi̱níná,* ni ña̱ kuniñúʼuná oro á perla, ni ña̱ kundixiná ti̱ko̱to̱ ña̱ yaʼviní, chi va̱ʼaka ná kiʼinná kuenta xíʼin ki̱ʼva ña̱ ndásaviíná miíná ta viíní ná ndakanixi̱níná xa̱ʼa̱ ña̱yóʼo ta ná kooña xíʼin ña̱ to̱ʼó. 10 Saá íyoña, ña̱ va̱ʼa livi kuna̱ʼa̱ná xíniñúʼu keʼéná ña̱ va̱ʼa, nda̱a̱ táki̱ʼva kéʼé ná ñaʼá ná ndásakáʼnu Ndióxi̱ xíʼin ndinuʼu-ininá.

11 Tá sánáʼa̱na,* ná ñaʼá ná kǒo ka̱ʼa̱nná ta ná kundiku̱nná ña̱ káʼa̱nna xíʼinná. 12 Va̱ása táxii̱ ña̱ sanáʼa̱ ná ñaʼá ni ña̱ kaʼndaná chiñu nu̱ú na̱ ta̱a; nu̱úka ña̱yóʼo ná kǒo ka̱ʼa̱nná. 13 Saáchi siʼnaka ta̱ Adán na̱kuva̱ʼa, tándi̱ʼi na̱kuva̱ʼa ñá Eva. 14 Ta saátu, ta̱ Ndi̱va̱ʼa sa̱ndáʼvira ñá ñaʼá ta ni̱ki̱ʼviñá ku̱a̱chi ta su̱ví ta̱ Adán kúú ta̱ nísandáʼvira. 15 Ña̱ koo se̱ʼe ná ñaʼá kúú ña̱ chindeétáʼan xíʼinná ña̱ kǒo keʼéná ña̱ va̱ása va̱ʼa, soo xíniñúʼu ndakundeéná kandíxaná Ndióxi̱, kuʼvi̱-ininá kuniná inkana ta viíní koo ña̱ keʼéná nu̱ú Ndióxi̱ ta ndíchiní ná koo ña̱ ndákanixi̱níná.

3 Ña̱ káʼi̱n yóʼo, ña̱ nda̱a̱va kúúña: tá iin ta̱a chíka̱a̱níra ndee̱ ña̱ xa̱a̱ra koora anciano, iin ña̱ va̱ʼava kúú ña̱ kúni̱ra keʼéra. 2 Iin ta̱ anciano viíní xíniñúʼu keʼéra tasaá kǒo ni iinna ka̱ʼa̱n ña̱ va̱ása va̱ʼa xa̱ʼa̱ra, iin kuití xíniñúʼu koo ñá síʼira, nda̱a̱ ndáaka ña̱ kéʼéra ná kiʼinníra kuenta xíʼinña, xíniñúʼu viíní ndakanixi̱níra,* nda̱kúní ná koo ña̱ keʼéra,* va̱ʼaní ná koo inira ta ná kuxini̱ va̱ʼara sanáʼa̱ra. 3 Va̱ása xíniñúʼu koora iin ta̱ xíʼiní,* ni ta̱ kútóoní kanitáʼan ta ni va̱ása ndakanixi̱níra ña̱ nina ña̱ káʼa̱n miíra xíniñúʼu keʼéna.* Ná kǒo kutóora sakákura ku̱a̱chi* ta ná kǒo kutóoníra kuumiíra xu̱ʼún. 4 Xíniñúʼu viíní kuniʼira yichi̱ nu̱ú na̱ veʼera, ta na̱ se̱ʼera ná kandíxana ña̱ káʼa̱nra ta viíní ná keʼéna 5 (saáchi, tá iin ta̱a va̱ása xíni̱ra kuniʼira yichi̱ nu̱ú na̱ veʼera, ¿ndáa ki̱ʼva kundaara na̱ congregación Ndióxi̱?). 6 Va̱ása xíniñúʼu koora iin ta̱ sa̱kán nda̱kundiku̱n ta̱ Cristo ña̱ va̱ʼa ná kǒo kuta̱a-inira ta ndakiʼinra tu̱ndóʼo ña̱ nda̱kiʼin ta̱ Ndi̱va̱ʼa. 7 Ta saátu nda̱a̱ na̱ kǒo ñúʼu ti̱xin congregación xíniñúʼu ka̱ʼa̱n va̱ʼa xa̱ʼa̱ra, chi saá kǒo nda̱a̱ ni iinna kivi sakúiso ku̱a̱chiñaʼá xa̱ʼa̱ nda̱a̱ ni iin ña̱ʼa ta va̱ása ndakavara ndaʼa̱ ta̱ Ndi̱va̱ʼa.

8 Ta saátu na̱ siervo ministerial, xíniñúʼu koona na̱ xa̱a̱ xu̱xa-ini,* va̱ása ka̱ʼa̱nna ña̱ vatá,* va̱ása koʼona ku̱a̱ʼání ndixi,* ná kǒo kundi̱ʼi̱-inina xa̱ʼa̱ ña̱ kuumiína ku̱a̱ʼání ña̱ʼa, 9 viíní ná koo ña̱ xínitúni̱na ta ná kǒo kuxíkána nu̱ú ña̱ yi̱i̱ ña̱ íyo se̱ʼé xa̱ʼa̱,* ña̱yóʼo kúú ña̱ xa̱a̱ kándíxana.

10 Tá xa̱a̱ ni̱na̱ʼa̱na ña̱ va̱ʼaní káchíñuna, ta saátu tá kǒo nda̱a̱ ni iin na̱ kivi chika̱a̱ ku̱a̱chiñaʼá, va̱ʼava xa̱a̱na koona siervo ministerial.

11 Ta saátu ná ñaʼá xíniñúʼu xu̱xa koo ininá, ná kǒo kutóoná chika̱a̱ná ku̱a̱chi síkí xa̱ʼa̱ inkana. Nda̱a̱ ndáaka ña̱ kéʼéná xíniñúʼu kiʼinníná kuenta xíʼinña ta xíʼin ndiʼi ña̱ kéʼéná ná na̱ʼa̱ná ña̱ nda̱kúní íyo ininá xíʼin Ndióxi̱.

12 Iin kuití xíniñúʼu koo ñá síʼi na̱ siervo ministerial ta saátu xíniñúʼu viíní kuniʼina yichi̱ nu̱ú na̱ veʼena ta saátu nu̱ú na̱ va̱lí se̱ʼena. 13 Saáchi na̱ ta̱a na̱ viíní kéʼé chiñu, ka̱ʼa̱n va̱ʼana xa̱ʼa̱na ta va̱ása kukaʼan nu̱ú na̱yóʼo ka̱ʼa̱nna xa̱ʼa̱ ña̱ kándíxana ta̱ Cristo Jesús.

14 Ni si̱lóʼova kúma̱ní xa̱i̱ kotoi̱ yóʼó, káʼyíi̱ ña̱yóʼo ku̱xa̱a̱ nu̱ún. 15 Chi ni ná va̱ása xa̱a̱ kamai̱, kunda̱a̱va-iniún ndáaña keʼún xa̱ʼa̱ ña̱ kúún táʼan na̱ veʼe Ndióxi̱ na̱ kúú congregación Ndióxi̱ ta̱ táku, chi na̱yóʼo kúú na̱ ndákiʼin tu̱ʼun ña̱ nda̱a̱ ta chíndeétáʼanna xíʼinña. 16 Ña̱ nda̱kú koo ini na̱ yiví xíʼin Ndióxi̱, ña̱ yi̱i̱ ña̱ íyo se̱ʼé xa̱ʼa̱ kúú ña̱yóʼo ta ndáyáʼviníña: ‘Ta̱ Jesús ni̱xa̱a̱ra ku̱ura iin na̱ yiví, Ndióxi̱ ni̱ka̱ʼa̱nra xa̱ʼa̱ra ña̱ kúúra iin ta̱ nda̱kú-ini tá ndu̱u tukura iin espíritu i̱xaara, ki̱tara nu̱ú na̱ ángel, ndiʼi ñuu na̱túʼunna xa̱ʼa̱ra, na̱ ñuyǐví ka̱ndíxanara, ta chí ndiví nda̱kiʼinnara ta ndu̱káʼnura’.

4 Soo tu̱ʼun ña̱ kúú kuenta Ndióxi̱ káʼa̱n káxiña, ña̱ chí nu̱únínu kixaa̱ iin tiempo ña̱ ku̱a̱ʼánína sandákoona ña̱ kandíxana Ndióxi̱ ta kuniso̱ʼona tu̱ʼun vatá ña̱ náʼa̱ ña̱ kúúña kuenta Ndióxi̱ ta saátu kuniso̱ʼona ña̱ sánáʼa̱ na̱ ta̱chí ndi̱va̱ʼa, 2 ta ndiʼi ña̱yóʼo kuuña xa̱ʼa̱ ña̱ kéʼé na̱ ta̱a na̱ káʼa̱n ña̱ vatá* chi ni loʼo va̱ása va̱ʼaka íyo ña̱ xínitúni̱na, chi íyoña nda̱a̱ táki̱ʼva íyo iin nu̱ú ka̱nina tuni̱. 3 Na̱yóʼo káʼa̱nna xíʼin na̱ yiví ña̱ va̱ása va̱ʼa tindaʼa̱na ta saátu káʼa̱nna xíʼinna ña̱ va̱ása va̱ʼa kuxuna ña̱ʼa ña̱ i̱xava̱ʼa Ndióxi̱ kuxu na̱ kándíxa miíra, ta na̱ kándíxa miíra kúnda̱a̱ va̱ʼa inina xa̱ʼa̱ ña̱ nda̱a̱ ta táxina tíxa̱ʼvi ndaʼa̱ra tá xíxina ña̱yóʼo. 4 Ndiʼi ña̱ i̱xava̱ʼa Ndióxi̱ va̱ʼaníña, va̱ása xíniñúʼu kundasína kunina ni iin ña̱ʼa tá táxina tíxa̱ʼvi ndaʼa̱ Ndióxi̱ xa̱ʼa̱ña, 5 saáchi xíʼin tu̱ʼun Ndióxi̱ ndúyi̱i̱ña ta saátu tá táxina tíxa̱ʼvi ndaʼa̱ Ndióxi̱ xa̱ʼa̱ña.

6 Tá ná taxiún consejo yóʼo ndaʼa̱ na̱ ñaniyó, xa̱ún koún iin ta̱ va̱ʼaní káchíñu nu̱ú ta̱ Cristo Jesús, iin ta̱ xu̱xa-ini xíʼin ña̱ nda̱a̱, iin ta̱ va̱ʼaní ndíku̱n ña̱ sa̱kuaʼara. 7 Soo xíniñúʼu kundasíún kuniún cuento vatá ña̱ nátúʼun na̱ yiví* ña̱ va̱ása kúni̱ Ndióxi̱ xínira. Soo nu̱úka ña̱yóʼo chika̱a̱níún ndee̱ ña̱ va̱ʼa xa̱ún ndasakáʼnún Ndióxi̱ xíʼin ndinuʼu-iniún. 8 Saáchi ña̱ ejercicio, loʼova chíndeétáʼanña xíʼinyó soo ña̱ ndasakáʼnuyó Ndióxi̱ xíʼin ndinuʼu-iniyó kivi chindeétáʼanña xíʼinyó nu̱ú nda̱a̱ ndáaka ña̱ʼa, chi táxiña ña̱ va̱ʼa ndaʼa̱yó tiempo vitin ta saátu chí nu̱únínu. 9 Ña̱ nda̱a̱va kúú ña̱yóʼo ta xíniñúʼu kandíxanaña. 10 Xa̱ʼa̱ ña̱yóʼo kúú ña̱ chíka̱a̱níyó ndee̱ ta káchíñuníyó chi ta̱ ndáaní-iniyó kúú Ndióxi̱ ta̱ táku, ta̱ sáka̱ku ndiʼi na̱ yiví na̱ nda̱kú íyo ini xíʼinra.

11 Ndakundeún ka̱ʼún xa̱ʼa̱ ña̱yóʼo ta sanáʼúnña. 12 Nda̱a̱ ni iinna ná kǒo ka̱ʼa̱n xa̱ʼún ña̱ va̱ása ndáyáʼviún xa̱ʼa̱ ña̱ kúún iin ta̱ loʼo. Nu̱úka ña̱yóʼo iin yichi̱ va̱ʼaní chinúún nu̱ú na̱ ndásakáʼnu Ndióxi̱ xíʼin ndinuʼu-inina, chinúu yichi̱ nu̱úna xíʼin ki̱ʼva ña̱ káʼún, xíʼin ki̱ʼva ña̱ kéʼún, xíʼin ña̱ kúʼvi̱-iniún xíniún inkana, xíʼin ña̱ kándíxaún Ndióxi̱ ta saátu xa̱ʼa̱ ña̱ kǒo kéʼún ña̱ yaku̱a̱. 13 Ni kúma̱níka xa̱i̱, ndakundeún viíníka kaʼviún nu̱ú inkana, taxiún consejo ndaʼa̱na ta saátu sanáʼúnna. 14 Kiʼinníún kuenta xíʼin ña̱ ta̱xi Ndióxi̱ ndaʼún tá ni̱ka̱ʼa̱n na̱ profeta xa̱ʼa̱ ña̱ keʼún ta chi̱núu na̱ anciano ndaʼa̱na xi̱níún.* 15 Ndakaniníxi̱ní xa̱ʼa̱ ndiʼi ña̱yóʼo, kundi̱ʼi̱ní-ini xa̱ʼa̱ña, ña̱ va̱ʼa ndiʼina ná kuni ña̱ ku̱a̱ʼa̱n xúxaka-iniún xíʼin tu̱ʼun Ndióxi̱. 16 Kiʼin va̱ʼún kuenta xíʼin ña̱ kéʼún ta saátu ña̱ sánáʼún. Kǒo sandákoún keʼún ña̱yóʼo chi saá kúú ña̱ sakǎkún miíún ta saátu na̱ xíniso̱ʼo ña̱ káʼún.

5 Va̱ása kue̱ʼe̱ní ka̱ʼún xíʼin iin ta̱ xi̱ku̱a̱ʼa̱. Va̱ʼaka viíní taxiún consejo ndaʼa̱ra nda̱a̱ táki̱ʼva keʼún xíʼin yiváún; ta na̱ ta̱a na̱ válíka, ka̱ʼún xíʼinna nda̱a̱ táki̱ʼva ka̱ʼún xíʼin ñaniún; 2 ta ná ñaʼá ná náʼnuka, ka̱ʼún xíʼinná nda̱a̱ táki̱ʼva ka̱ʼún xíʼin siʼún, ta ná ñaʼá ná válíka, ka̱ʼún xíʼinná nda̱a̱ táki̱ʼva ka̱ʼún xíʼin ku̱ʼvaún, ta ixato̱ʼóníúnná.

3 Kundaaníún* ná ñaʼá ná ni̱xi̱ʼi̱ yií, ná ndixa kúma̱ní ña̱ʼa nu̱ú.* 4 Soo tá iin ñá ñaʼá ñá ni̱xi̱ʼi̱ yií, íyo se̱ʼeñá á se̱ʼeñániñá, na̱yóʼo siʼnaka ti̱xin veʼe miína ná na̱ʼa̱na ña̱ nda̱kú íyo inina xíʼin Ndióxi̱ ta ná ndakundeéna kundaana na̱ yivána xíʼin na̱ xi̱ína, chi nda̱a̱ táki̱ʼva íyo na̱ níkána nu̱ú saá íyona, chi ña̱yóʼo kúú ña̱ kíndo̱oní-ini Ndióxi̱ xíʼin. 5 Soo ñá ñaʼá ñá ni̱xi̱ʼi̱ yií ta ki̱ndoo ndáʼvi va̱ʼañá, ndáaní-iniñá Ndióxi̱ ta ñuú xíʼin káʼñu* káʼa̱nníñá xíʼin Ndióxi̱ ta xákundáʼviñá nu̱úra. 6 Soo ñá ñaʼá ñá kéʼé ña̱ kúni̱ miíñá* nda̱a̱ táki̱ʼva íyo ñá ni̱xi̱ʼi̱ saá íyoñá ni tákuvañá. 7 Ndakundeún ka̱ʼún ña̱yóʼo xíʼinna, ña̱kán nda̱a̱ ni iinna va̱ása kivi ka̱ʼa̱n xa̱ʼa̱na ña̱ kéʼéna ña̱ va̱ása va̱ʼa. 8 Saáchi tá iinna va̱ása táxina ña̱ xíniñúʼu na̱ veʼena ta ni va̱ása táxina ña̱ xíniñúʼu na̱ ndóo ti̱xin veʼe miína, na̱yóʼo va̱ása kándíxakana ña̱ kándíxayó, ta kinika íyo ña̱ kéʼéna nu̱ú iin na̱ yiví na̱ va̱ása kándíxa Ndióxi̱.

9 Ñá ñaʼá ñá ni̱xi̱ʼi̱ yií ñá kivi kunúu ki̱vi̱ nu̱ú lista, xíniñúʼu kuumiíñá ki̱ʼva 60 ku̱i̱ya̱ á yáʼaka, ta saátu tá iin kuití yiíñá ni̱xi̱yo. 10 Xíniñúʼu kuxini̱na xa̱ʼa̱ñá ña̱ va̱ʼaní ke̱ʼéñá, tá kúú ña̱ viíní sa̱kuaʼnuñá se̱ʼeñá, ña̱ va̱ʼaní ni̱xi̱yo iniñá, ña̱ nda̱katañá xa̱ʼa̱ na̱ nda̱kaxin Ndióxi̱,* ña̱ chi̱ndeétáʼanñá xíʼin na̱ xóʼvi̱ ta saátu ña̱ ni̱ndi̱ʼi̱ní-iniñá ke̱ʼéñá ndiʼi ña̱ va̱ʼa.

11 Soo ná válíka ná ni̱xi̱ʼi̱ yií, kǒo kaʼyíún ki̱vi̱ná nu̱ú lista, saáchi náyóʼo nu̱úka ña̱ kuni̱ná keʼéná chiñu ta̱ Cristo kíxáʼa kúni̱kaná ku̱su̱nná xíʼin iin ta̱a ta va̱ʼaka tíndaʼa̱ná. 12 Saáchi chaʼvi miíva náyóʼo xa̱ʼa̱ ña̱ va̱ása nísaxínuná ña̱ ki̱ndooná keʼéná. 13 Ta saátu káanná* ña̱ kǒo nda̱a̱ ni iin ña̱ʼa keʼéná ta veʼe tá veʼe xíkaná. Ta su̱ví nda̱saa ña̱yóʼo kuití kéʼéná chi káʼa̱nná ña̱ vatá* ta ndíʼi̱ní-ininá xa̱ʼa̱ ña̱ kéʼé inkana* ta káʼa̱nná xa̱ʼa̱ ña̱ va̱ása xíniñúʼu ka̱ʼa̱nná. 14 Xa̱ʼa̱ ña̱kán ña̱ kúni̱i̱ kúúña, ná válíka ná ni̱xi̱ʼi̱ yií ná tindaʼa̱ná, ná koo se̱ʼená ta ná kundi̱ʼi̱ní-ininá xa̱ʼa̱ veʼená tasaá va̱ása ka̱ʼa̱nndaa inka na̱ yiví xa̱ʼa̱yó. 15 Soo savaná sa̱ndákooná ña̱ nda̱a̱ ta nda̱kundiku̱nná ta̱ Ndi̱va̱ʼa. 16 Tá iin ñá ku̱ʼvayó íyo ná táʼanñá ná ni̱xi̱ʼi̱ yií, ná chindeétáʼanñá xíʼinná ña̱ va̱ʼa kǒo kundi̱ʼi̱-ini na̱ congregación xa̱ʼa̱ náyóʼo tasaá na̱ congregación chindeétáʼanna xíʼin ná ni̱xi̱ʼi̱ yií ná ndixa kúma̱ní ña̱ʼa nu̱ú.*

17 Na̱ anciano na̱ viíní níʼi yichi̱ nu̱ú na̱ congregación xíniñúʼu ixato̱ʼóníkana na̱yóʼo, ta na̱ xíniñúʼu keʼéníkana saá xíʼin kúú na̱ chíka̱a̱ní ndee̱ ña̱ sánáʼa̱na xa̱ʼa̱ tu̱ʼun Ndióxi̱ ta káʼa̱nna xa̱ʼa̱ña. 18 Saáchi nu̱ú tu̱ʼun Ndióxi̱ káchiña: “Va̱ása ndakasiún ña̱ʼa yuʼú tí toro tá xíkarí nu̱ú trigo ña̱ xáñi̱ndosóríña”.* Inka táʼvítuña káchiña: “Saáchi na̱ káchíñu ndakiʼinna ya̱ʼvina xa̱ʼa̱ ña̱ káchíñuna”. 19 Kǒo ndatiún ku̱a̱chi xíʼin iin ta̱ xi̱ku̱a̱ʼa̱ tá kǒo u̱vi̱ á u̱ni̱ testigo níka̱ʼa̱n xa̱ʼa̱ra ña̱ ni̱ki̱ʼvira ku̱a̱chi. 20 Nu̱ú ndiʼina ka̱ʼún xíʼin na̱ ni̱ki̱ʼvi ku̱a̱chi ña̱ va̱ása va̱ʼa ña̱ ke̱ʼéna, ña̱ va̱ʼa ná kuni inkana ta va̱ása keʼéna táʼan ña̱yóʼo. 21 Kúnda̱a̱-ini Ndióxi̱, saátu ta̱ Cristo Jesús xíʼin na̱ ángel na̱ nda̱kaxin mií Ndióxi̱ ña̱ xáʼndai̱ chiñu yóʼo nu̱ún ña̱ inkáchi ná ndatiún ku̱a̱chi xíʼin ndiʼina.

22 Kǒo kamaní chinúún ndaʼún xi̱ní nda̱a̱ ni iin ta̱a.* Kǒo kuisoún ku̱a̱chi xa̱ʼa̱ ña̱ kéʼé inkana. Viíní ná koo ña̱ keʼún.

23 Va̱ása koʼokaún ti̱kui̱í,* va̱ʼaka loʼo vino koʼún xa̱ʼa̱ ña̱ kúʼvi̱ ti̱xiún chi chi̱to̱ní kíʼin kue̱ʼe̱ yóʼó.

24 Ku̱a̱chi ña̱ kéʼé sava na̱ yiví, ndiʼivana xíni̱ xa̱ʼa̱ña ta ndi̱ku̱n kama ndátiinna ku̱a̱chi xíʼinna, ta inkatuna ku̱a̱ʼáka tiempo yáʼa saá kúnda̱a̱-inina xa̱ʼa̱ ku̱a̱china. 25 Ta saátu ña̱ʼa ña̱ va̱ʼa ña̱ kéʼé iin na̱ yiví ndiʼina kúnda̱a̱-ini xa̱ʼa̱ña, ta ña̱ va̱ása va̱ʼa ña̱ kéʼé iin na̱ yiví kǒo kívi koo se̱ʼé xa̱ʼa̱ña.

6 Na̱ káchíñu nu̱ú inkana, ná ixato̱ʼónína na̱ káchíñuna nu̱ú, ña̱ va̱ʼa nda̱a̱ ni iin yichi̱ va̱ása ka̱ʼa̱nna ña̱ va̱ása va̱ʼa xa̱ʼa̱ Ndióxi̱ ni xa̱ʼa̱ ña̱ sánáʼa̱ra. 2 Ta na̱ káchíñu nu̱ú iin na̱ ndásakáʼnu Ndióxi̱ ná va̱ása ndakanixi̱nína ña̱ kǒo xíniñúʼu ixato̱ʼóna na̱ káchíñuna nu̱ú xa̱ʼa̱ ña̱ kúúna ñanina. Chi ña̱ xíniñúʼu keʼéna kúú ña̱ viíníka kachíñuna nu̱ú na̱yóʼo, saáchi na̱ ndakiʼin ña̱ va̱ʼa xa̱ʼa̱ chiñu ña̱ kéʼéna kúú na̱ ñanina na̱ kúʼvi̱ní-inina xínina, na̱ inkáchi ndásakáʼnu Ndióxi̱ xíʼinna.

Yóʼó, ndakundeún sanáʼún ña̱yóʼo ta saátu ña̱ taxiún consejo yóʼo ndaʼa̱na. 3 Soo tá iin ta̱a sánáʼa̱ra inka ña̱ʼa ña̱ va̱ása kítáʼan xíʼin chiñu ña̱ xa̱ʼnda tátayó Jesucristo, ni va̱ása kítáʼanña xíʼin ña̱ sa̱náʼa̱na miíyó xa̱ʼa̱ ndáa ki̱ʼva ndasakáʼnuyó Ndióxi̱, 4 ta̱a ta̱ sánáʼa̱ ña̱yóʼo kúta̱aní-inira ta va̱ása kúnda̱a̱-inira xa̱ʼa̱ nda̱a̱ ni iin ña̱ʼa. Kútóoníra sakákura ku̱a̱chi ta saátu ña̱ natúʼun kúáchira xa̱ʼa̱ nda̱a̱ ndáaka ña̱ʼa. Ta xa̱ʼa̱ ña̱yóʼo kíxáʼa na̱ yiví kúkúini̱-inina xínitáʼanna,* kánitáʼanna, káʼa̱n-ndi̱va̱ʼana xíʼin táʼanna ta va̱ása ndáa-ini táʼankana, 5 ta ndiʼi tiempo nátúʼun kúáchina xa̱ʼa̱ ña̱ʼa ña̱ ni loʼo va̱ása ndáyáʼvi, ta kéʼéna ña̱yóʼo chi va̱ása va̱ʼaka íyo ña̱ ndákanixi̱nína ta kǒo ña̱ nda̱a̱ kúúmiína chi kúni̱na ndasakáʼnuna Ndióxi̱ xa̱ʼa̱ ña̱ kúni̱na ndakiʼinna iin ña̱ʼa. 6 Ta ndixa kúúvaña, tá ndásakáʼnuyó Ndióxi̱ xíʼin ndinuʼu-iniyó ku̱a̱ʼání ña̱ va̱ʼa ndákiʼinyó ta kúsi̱í-iniyó xíʼin ña̱ xa̱a̱ kúúmiíyó. 7 Saáchi tá ka̱kuyó ñuyǐví yóʼo kǒo ña̱ʼaví níkixaa̱ xíʼinyó, ta tá ná kuviyó kǒo nda̱a̱ ni iin ña̱ʼa ku̱ʼu̱n xíʼinvíyó. 8 Ña̱kán, nani íyo loʼo ña̱ kuxuyó xíʼin ti̱ko̱to̱yó ña̱ kundixiyó ná kusi̱í-iniyó xíʼin ña̱yóʼo.

9 Ta na̱ kúni̱ní ndukúiká, íyoní ña̱ sándaʼvi miína ta kóyona ndaʼa̱ña ta kíxáʼa kútóona ku̱a̱ʼání ña̱ʼa ña̱ va̱ása ndáyáʼvi ta ña̱yóʼo sáxo̱ʼvi̱níñana ta ndíʼi-xa̱ʼa̱na íxaaña. 10 Ta xa̱ʼa̱ ña̱ kútóonína kuumiína xu̱ʼún, ku̱a̱ʼání tu̱ndóʼo kíxi nu̱úna, ta xa̱ʼa̱ ña̱ kútóonína kuumiína ña̱yóʼo, savana sa̱ndákoona ña̱ kándíxana Ndióxi̱ ta ku̱a̱ʼání tu̱ndóʼo sákakuna xíʼin miína.

11 Soo yóʼó ta̱ ndásakáʼnu Ndióxi̱, kuxíká nu̱ú ña̱yóʼo. Nu̱úka ña̱yóʼo, chika̱a̱ ndee̱ ña̱ keʼún ña̱ va̱ʼa, ña̱ ndinuʼu-iniún ndasakáʼnún Ndióxi̱, ña̱ kandíxaún Ndióxi̱, ña̱ kuʼvi̱-iniún kuniún inkana, ña̱ ixandakú-iniún ta saátu ña̱ vitá koo iniún. 12 Kanitáʼan ña̱ ndakiʼún tu̱ʼun ña̱ kándíxaún. Chika̱a̱ ndee̱ ña̱ ndakiʼún ña̱ kutakún ndiʼi saá tiempo ña̱ taxi Ndióxi̱ ndaʼún, ta ku̱a̱ʼání na̱ yiví na̱túʼún xíʼin xa̱ʼa̱ ña̱yóʼo.

13 Nu̱ú Ndióxi̱ ta̱ táxi ña̱ táku ndiʼi ña̱ʼa, ta saátu nu̱ú ta̱ Cristo Jesús ta̱ va̱ʼaní ni̱ka̱ʼa̱n nu̱ú chútú na̱ yiví tá ni̱xa̱a̱ra nu̱ú ta̱ Poncio Pilato, káʼi̱n xíʼún 14 ña̱ ná kuniso̱ʼún ña̱ ni̱ka̱ʼi̱n xíʼún ta kǒo keʼún ña̱ yaku̱a̱ ta kǒo taxiún ña̱ ka̱ʼa̱nna ña̱ va̱ása va̱ʼa xa̱ʼa̱ña nda̱a̱ tá ná na̱ʼa̱ tátayó Jesucristo ndee̱ ña̱ kúúmiíra, 15 saáchi tá ná kixaa̱ tiempo, iinlá saá ta̱ xáʼndachíñu ta̱ si̱íní íyo ini, na̱ʼa̱ra ndee̱ ña̱ kúúmiíra. Ta̱yóʼo kúú Rey nu̱ú na̱ xáʼndachíñu ña̱ kúúna rey, ta xáʼndachíñura nu̱ú nda̱a̱ ndáaka na̱ chíñu, 16 iinlá ta̱yóʼo kúú ta̱ va̱ása kívi kuvi ta íyora nu̱ú íyo iin luz ña̱ ndeéní táxa* ta nda̱a̱ ni iinna kǒo kívi kuyatin, nda̱a̱ ni iin na̱ yiví ta̱ʼán kuni ta̱yóʼo ta va̱ása kivi kuninara. Ná ndukáʼnu ta̱yóʼo ta ndiʼi tiempo ná koo ndee̱ ña̱ kúúmiíra. Saá koo.

17 Chiñu ña̱ xáʼndai̱ nu̱ún yóʼo kúú ña̱ ka̱ʼún xíʼin na̱ ku̱i̱ká na̱ íyo tiempo vitin:* ná kǒo ndakanixi̱nína ña̱ ndáyáʼviníkana nu̱ú inkana, ná kǒo kandíxana ña̱ ku̱i̱ká ña̱ íyo loʼo kuití tiempo, va̱ʼaka Ndióxi̱ ná kandíxana chi ta̱yóʼo kúú ta̱ táxi ndiʼi ña̱ sákusi̱í-iniyó. 18 Ka̱ʼa̱n xíʼinna ná keʼéna ña̱ va̱ʼa, saá íyoña, ku̱a̱ʼání ña̱ va̱ʼa ná keʼéna, va̱ʼaní ná koo inina ta ná taxina ña̱ kúúmiína ndaʼa̱ inkana, 19 tá ná keʼéna ña̱yóʼo ndakiʼinna ña̱ ku̱i̱ká ña̱ táxi Ndióxi̱, ña̱yóʼo kúni̱ kachiña ña̱ va̱ʼaní kundoona chí nu̱únínu, saá ndixa kúú ña̱ xa̱a̱na va̱ʼaní kutakuna nda̱a̱ táki̱ʼva ni̱ka̱ʼa̱n mií Ndióxi̱.

20 Timoteo, kundaaníún ña̱ ta̱xi Ndióxi̱ ndaʼún, kǒo kuniso̱ʼún tu̱ʼun ña̱ va̱ása ndáyáʼvi ña̱ kǒo kítáʼan xíʼin ña̱ kúni̱ Ndióxi̱, ni kǒo kuniso̱ʼún ña̱ káʼa̱n na̱ yiví na̱ ndákanixi̱ní ña̱ ndíchinína, soo ña̱ ndíchi ña̱ kúúmiína kǒo kítáʼanña xíʼin ña̱ nda̱a̱. 21 Ta xa̱ʼa̱ ña̱ ni̱nuní kúnina xíʼin ña̱ ndíchi ña̱ kúúmiína, savana sa̱ndákoona ña̱ kandíxana Ndióxi̱.

Va̱ʼaní ná koo ini Ndióxi̱ xíʼinndó.