SEGUNDA ÑA̱ TIMOTEO

1 Yi̱ʼi̱ ta̱ Pablo ta̱ nda̱kaxin Ndióxi̱ ña̱ koi̱ apóstol ta̱ Cristo ña̱ natúʼi̱n xíʼin na̱ yiví ña̱ ndakiʼinna ña̱ kutakuna, chi ña̱yóʼo kúú ña̱ ndákiʼin na̱ kítáʼan xíʼin ta̱ Cristo Jesús, 2 yi̱ʼi̱ kúú ta̱ chíndaʼá carta yóʼo ndaʼún Timoteo ta nda̱a̱ táki̱ʼva íyo se̱ʼe miíi̱ ta̱ kúʼvi̱ní-inii̱ xínii̱ saá íyoún:

Mií yiváyó Ndióxi̱ xíʼin tátayó ta̱ Cristo Jesús va̱ʼaní ná koo inina xíʼún, ná kundáʼvi-inina kunina yóʼó ta va̱ʼaní ná kutáʼún xíʼinna.

3 Táxiníi̱ tíxa̱ʼvi ndaʼa̱ Ndióxi̱ ta ndiʼi tiempo ndákaʼíi̱n xa̱ʼún tá xákundáʼvii̱ nu̱ú Ndióxi̱ ta kéʼíi̱ ña̱yóʼo ñuú xíʼin káʼñu.* Viíní íyo ña̱ xínitúni̱i̱ káchíñui̱ nu̱úra nda̱a̱ táki̱ʼva ke̱ʼé na̱ táʼi̱n na̱ xi̱ndoo xi̱naʼá. 4 Tá ndákaʼíi̱n xa̱ʼa̱ ña̱ xa̱kún, kúni̱níi̱ kunii̱ yóʼó ña̱ va̱ʼa kusi̱í-inii̱. 5 Saáchi ndákaʼíi̱n xa̱ʼún ña̱ ndinuʼuní-iniún kándíxaún Ndióxi̱ nda̱a̱ táki̱ʼva ke̱ʼé xi̱táún ñá Loida ta saátu siʼún ñá Eunice, ta va̱ása xíka-inii̱ ña̱ saá kúú ña̱ kéʼékavaún.

6 Xa̱ʼa̱ ña̱kán, sándakaʼíi̱n yóʼó ña̱ kiʼinníún kuenta xíʼin* ña̱ ta̱xi Ndióxi̱ ndaʼún, ña̱ nda̱kiʼún tá chi̱núi̱ ndaʼíi̱ xi̱níún.* 7 Saáchi espíritu santo ña̱ táxi Ndióxi̱ ndaʼa̱yó, chíndeétáʼanña xíʼinyó ña̱ va̱ása i̱yoní koo iniyó, ta táxiña ña̱ ndakú koo iniyó, ña̱ kuʼvi̱-iniyó kuniyó Ndióxi̱* ta saátu ña̱ viíní ndakanixi̱níyó. 8 Xa̱ʼa̱ ña̱kán kǒo kukaʼan nu̱ún ña̱ natúʼún xa̱ʼa̱ tátayó Jesús ni xa̱ʼa̱ yi̱ʼi̱ ña̱ ndíka̱i̱ veʼeka̱a xa̱ʼa̱ra. Nu̱úka ña̱yóʼo, kundeé-iniún xo̱ʼvi̱ún xa̱ʼa̱ tu̱ʼun va̱ʼa* ta kundaaní-iniún ndee̱ ña̱ kúúmií Ndióxi̱. 9 Miíra sa̱kǎku miíyó ta ka̱nara miíyó ña̱ xa̱a̱yó kooyó na̱ yi̱i̱ ta su̱ví xa̱ʼa̱ ña̱ níkeʼé miíyó kúúña, chi xa̱ʼa̱ ña̱ kúni̱ miíra kúú ña̱ ka̱nara miíyó ta saátu xa̱ʼa̱ ña̱ va̱ʼaní-inira. Xa̱a̱ íyo ku̱a̱ʼání tiempo ni̱na̱ʼa̱ Ndióxi̱ ña̱ va̱ʼaní íyo inira xíʼinyó ta xi̱niñúʼura ta̱ Cristo Jesús ña̱ ke̱ʼéra ña̱yóʼo. 10 Soo vitin xa̱a̱ kúnda̱a̱ káxi iniyó xa̱ʼa̱ ña̱yóʼo xa̱ʼa̱ ña̱ náʼa̱ ta̱ Cristo Jesús ndee̱ ña̱ kúúmiíra, ta ta̱yóʼo kúú ta̱ sáka̱ku miíyó. Ta̱yóʼo sa̱ndíʼi-xa̱ʼa̱ra ndee̱ ña̱ kúúmií ña̱ xáʼní na̱ yiví ta xi̱niñúʼura tu̱ʼun va̱ʼa ña̱ na̱ʼa̱ra nu̱úyó ndáa ki̱ʼva ndakiʼinyó ña̱ kutakuyó, ta ku̱ñu ña̱ ndakiʼinyó va̱ása ta̱ʼyi̱ña, 11 ta nda̱kaxinna yi̱ʼi̱ ña̱ natúʼi̱n xa̱ʼa̱ tu̱ʼun va̱ʼa yóʼo, ña̱ koi̱ apóstol ta saátu ña̱ sanáʼi̱.

12 Xa̱ʼa̱ ña̱kán kúú ña̱ xóʼvi̱i̱ ndiʼi ña̱yóʼo soo va̱ása kúkaʼan nu̱úi̱. Saáchi xíni̱vai̱ ndáa ta̱ kúú ta̱ kándíxai̱ ta ndáa-inii̱ ña̱ kivi kundaara ndiʼi ña̱ ta̱xii̱ ndaʼa̱ra nda̱a̱ ná kixaa̱ ki̱vi̱ kán. 13 Kǒo sandákoún tu̱ʼun va̱ʼa ña̱ xi̱niso̱ʼún ni̱ka̱ʼi̱n, ndakundeún kandíxaún Ndióxi̱ ta kuʼvi̱-iniún kuniún inkana nda̱a̱ táki̱ʼva kéʼé na̱ kítáʼan xíʼin ta̱ Cristo Jesús. 14 Espíritu santo ña̱ íyo xíʼinyó ná chindeétáʼanña xíʼún ña̱ kundaún ña̱ ndáyáʼviní nda̱kiʼún.

15 Xa̱a̱ kúnda̱a̱va-iniún ña̱ ndiʼi na̱ ta̱a na̱ ndóo chí Asia, sa̱ndákoona yi̱ʼi̱, nda̱a̱ ta̱ Figelo xíʼin ta̱ Hermógenes. 16 Mií Ndióxi̱ ná kundáʼvi-ini kuni na̱ veʼe ta̱ Onesíforo, saáchi ku̱a̱ʼání yichi̱ chi̱ka̱a̱ra ndee̱ xíʼi̱n ta kǒo níkukaʼan nu̱úra kunira yi̱ʼi̱ ni núʼni cadena ndaʼíi̱ ndíka̱i̱ veʼeka̱a. 17 Chi tá ki̱xaa̱ra chí Roma, na̱ndukúra yi̱ʼi̱ ta kǒo nísandákoora keʼéraña nda̱a̱ tá nda̱ni̱ʼíra yi̱ʼi̱. 18 Mií tátayó ná chindeétáʼan xíʼinra ña̱ kundáʼvi-ini Jehová* kunirara tá ná kixaa̱ ki̱vi̱ kán. Xa̱a̱ kúnda̱a̱va-iniún xa̱ʼa̱ ndiʼi chiñu ña̱ ke̱ʼéra chí Éfeso.

2 Xa̱ʼa̱ ña̱kán se̱ʼe miíi̱, ndakundéún ka̱ʼún xíʼin Ndióxi̱ ña̱ ná taxira ndee̱ ndaʼún xa̱ʼa̱ ña̱ náʼa̱ ta̱ Cristo Jesús ña̱ va̱ʼaní-inira xíʼún. 2 Ña̱ʼa ña̱ xi̱niso̱ʼún ni̱ka̱ʼi̱n ta ku̱a̱ʼánína xíni̱ xa̱ʼa̱ ña̱yóʼo, sanáʼa̱ña na̱ ta̱a na̱ nda̱kúní-ini ña̱ va̱ʼa koo tu̱ʼvana sanáʼa̱na inkana. 3 Xa̱ʼa̱ ña̱ ndíku̱ún ta̱ Cristo Jesús ta íyoún nda̱a̱ táki̱ʼva íyo iin soldado kundeé-iniún ya̱ʼún nu̱ú nda̱a̱ ndáaka tu̱ndóʼo ña̱ ná kixi nu̱ún. 4 Iin na̱ yiví na̱ kúú soldado va̱ása ndúkúna inka chiñu ña̱ va̱ʼa ni̱ʼína ña̱ kuxuna tá kúni̱na kindo̱o va̱ʼana nu̱ú na̱ yiví na̱ nda̱kaxinñaʼá ña̱ koona soldado. 5 Nda̱a̱ na̱ sísikí va̱ása ndakiʼinna premio tá va̱ása ndíku̱nna ki̱ʼva ña̱ ni̱ka̱ʼa̱nna xíʼinna ña̱ xíniñúʼu kusíkína. 6 Ta̱ chíʼi ta ndeéní káchíñura, tá ná kana ña̱ chi̱ʼira ta̱yóʼo kúú ta̱ siʼnaka kaxíña. 7 Kǒo sandákoún ña̱ ndakanixi̱níún xa̱ʼa̱ ña̱ káʼi̱n xíʼún; mií tátayó kúú ta̱ taxi ña̱ kunda̱a̱-iniún xíʼin ndiʼi ña̱ʼa.

8 Ndakaʼán ña̱ nda̱taku ta̱ Jesucristo ta ti̱xin na̱ veʼe ta̱ David ki̱xira, ña̱yóʼo kúú tu̱ʼun va̱ʼa* ña̱ nátúʼi̱n xa̱ʼa̱, 9 ta xa̱ʼa̱ ña̱yóʼo kúú ña̱ xóʼvi̱i̱ ta ndíka̱i̱ veʼeka̱a nda̱a̱ táki̱ʼva íyo iin ta̱ kéʼé ña̱ va̱ása va̱ʼa. Soo tu̱ʼun Ndióxi̱ va̱ása núʼnivíña xíʼin cadena. 10 Xa̱ʼa̱ na̱ nda̱kaxin Ndióxi̱ kúú ña̱ íxandakú-inii̱ nu̱ú ndiʼi ña̱ʼa, ña̱ va̱ʼa sakǎku ta̱ Cristo Jesús na̱yóʼo ta xa̱a̱na ndukáʼnuna ndiʼi tiempo. 11 Ña̱ nda̱a̱va kúú ña̱yóʼo ta va̱ása xíka-iniyó xa̱ʼa̱ña, tá ná kuviyó xíʼinra xa̱a̱vayó kutakuyó xíʼinra; 12 tá ná chika̱a̱yó ndee̱ ña̱ kundeé-iniyó,* kaʼndachíñuvayó xíʼinra; soo tá ná ka̱ʼa̱nyó ña̱ va̱ása xíni̱yóra saátu miíra ka̱ʼa̱nra ña̱ va̱ása xíni̱ra miíyó; 13 ni va̱ása nda̱kú ná koo ini miíyó, ta̱kán nda̱kúva koo inira saáchi xa̱a̱ saá kúú ki̱ʼva ña̱ íyovara.

14 Va̱ása sandákoún ka̱ʼún xa̱ʼa̱ ña̱yóʼo xíʼinna, ta nu̱ú Ndióxi̱ ka̱ʼún xíʼinna ña̱ ná kǒo ka̱ʼa̱n kúáchina xa̱ʼa̱ nda̱a̱ ni iin ña̱ʼa chi ña̱yóʼo va̱ása ndáyáʼviña ta va̱ása chíndeétáʼanña xíʼin na̱ xíniso̱ʼoña. 15 Chika̱a̱níún ndee̱ ña̱ va̱ʼa kusi̱í-ini Ndióxi̱ xíʼin ña̱ kéʼún, ña̱ va̱ʼa xa̱ún koún iin ta̱ va̱ʼaní káchíñu, ta̱ kǒo kúkaʼan nu̱ú xa̱ʼa̱ nda̱a̱ ni iin ña̱ʼa, ta̱ xíni̱ní kuniñúʼu tu̱ʼun Ndióxi̱.* 16 Kǒo kuniso̱ʼún tu̱ʼun ña̱ va̱ása ndáyáʼvi ña̱ kǒo kítáʼan xíʼin ña̱ kúni̱ Ndióxi̱, chi na̱ káʼa̱n ña̱yóʼo xa̱a̱na kuxíkána nu̱ú Ndióxi̱, 17 ta tu̱ʼun ña̱ káʼa̱nna íyoña nda̱a̱ táki̱ʼva íyo kue̱ʼe̱ táʼyi ña̱ káa̱ ku̱a̱ʼa̱n.* Ña̱yóʼo kúú ña̱ ndo̱ʼo ta̱ Himeneo xíʼin ta̱ Fileto. 18 Chi na̱yóʼo sa̱ndákoona ña̱ nda̱a̱ ta káʼa̱nna ña̱ xa̱a̱ nda̱takuva na̱ yiví ta ku̱a̱chi na̱yóʼo savana va̱ása kándíxakana Ndióxi̱. 19 Soo Ndióxi̱ kúú ta̱ chi̱ndúʼú xa̱ʼa̱ ña̱yóʼo ta íyoña nda̱a̱ táki̱ʼva íyo nu̱ú kána xa̱ʼa̱ veʼe, ta kútu̱ní íyoña ta kúúmiíña sello yóʼo: “Jehová* xíni̱vara na̱ kúú kuenta miíra” ta “Ndiʼi na̱ xíniñúʼu ki̱vi̱ Jehová* ña̱ káʼa̱nna xíʼinra ña̱ ná chindeétáʼanra xíʼinna ná kǒo keʼékana ña̱ va̱ása va̱ʼa”.

20 Nda̱a̱ táki̱ʼva xa̱a̱ kúnda̱a̱-inindó, ini iin veʼe káʼnu su̱ví ki̱si ña̱ oro xíʼin ña̱ plata kuití kúú ña̱ íyo, chi íyotu ña̱ na̱kuva̱ʼa xíʼin yitu̱n ta saátu xíʼin ñuʼú. Savaña xíniñúʼunaña ña̱ keʼéna ña̱ʼa ña̱ ndáyáʼvi soo inkaña xíniñúʼunaña ña̱ keʼéna ña̱ʼa ña̱ va̱ása ndáyáʼvi. 21 Nda̱a̱ ndáaka na̱ ná kuxíká nu̱ú na̱ íyo nda̱a̱ táki̱ʼva íyo na̱yóʼo, xa̱a̱na koona nda̱a̱ táki̱ʼva íyo iin ki̱si ña̱ ndáyáʼvi ña̱ ndu̱yi̱i̱ ta ta̱ xíʼin kuentaña kuniñúʼuraña ña̱ keʼéra ña̱ va̱ʼa. 22 Xa̱ʼa̱ ña̱kán, kǒo keʼún ña̱ kútóoní na̱ va̱lí kúa̱an keʼéna, va̱ʼaka chika̱a̱níún ndee̱ ña̱ keʼún ña̱ va̱ʼa, ña̱ kandíxaníún Ndióxi̱, ña̱ kuʼvi̱-iniún kuniún inkana ta kǒo kundi̱ʼi̱-iniún.* Keʼé ndiʼi ña̱yóʼo ta kutáʼan xíʼin na̱ kándíxa Ndióxi̱ xíʼin ndinuʼu-inina.

23 Ta saátu, va̱ása natúʼun kúáchiún xíʼin na̱ káʼa̱n xa̱ʼa̱ ña̱ʼa ña̱ va̱ása ndáyáʼvi chi xa̱ʼa̱ ña̱yóʼo kúú ña̱ kíxáʼa na̱ yiví kánitáʼanna. 24 Na̱ káchíñu nu̱ú Ndióxi̱ va̱ása xíniñúʼu kanitáʼanna xíʼin nda̱a̱ ni iinna chi to̱ʼóní xíniñúʼu koona xíʼin ndiʼina, xíniñúʼu kuxini̱ va̱ʼana sanáʼa̱na, va̱ása kundi̱va̱ʼana xíʼin na̱ íxandi̱va̱ʼa xíʼinna 25 ta xíniñúʼu vitání koo inina sanáʼa̱na na̱ kǒo xíín kandíxa ña̱ káʼa̱nna. Chi sana taxi Ndióxi̱ ña̱ ndikó-inina ta xa̱a̱na kuxini̱ va̱ʼana ña̱ nda̱a̱, 26 tasaá ndakáxi-inina ta sa̱ñána ndaʼa̱ ta̱ Ndi̱va̱ʼa, saáchi ti̱in tákurana ña̱ keʼéna ña̱ kúni̱ra.

3 Soo xíniñúʼu kunda̱a̱-iniún ña̱ ki̱vi̱ nu̱ú ndíʼi, koo tiempo ña̱ yo̱ʼvi̱ní* ta kǒo kundeé-inina xíʼinña. 2 Saáchi na̱ yiví kuʼvi̱-inina kunina miína, kutóonína kuumiína xu̱ʼún, kuta̱a-inina, ni iinna kǒo kundayáʼvi nu̱úna, ka̱ʼa̱n-ndi̱va̱ʼana xa̱ʼa̱ Ndióxi̱, va̱ása kandíxana ña̱ káʼa̱n na̱ yivána, va̱ása taxina tíxa̱ʼvi, va̱ása nda̱kú koo inina, 3 va̱ása kuʼvi̱-inina kunina na̱ veʼena, va̱ása kindo̱o-inina xíʼin ni iin ña̱ʼa, ka̱ʼa̱nna tu̱ʼun síkí, va̱ása ka̱ʼnu̱-inina, ndi̱va̱ʼaní koo inina,* va̱ása kuʼvi̱-inina kunina ña̱ va̱ʼa, 4 xi̱kótáʼanna, so̱ʼoní koona,* ni̱nuní kunina, kutóoníkana keʼéna ña̱ kúni̱ miína nu̱úka ña̱ kuʼvi̱-inina kunina Ndióxi̱, 5 na̱ʼa̱na ña̱ kúúna na̱ yiví na̱ ndásakáʼnu Ndióxi̱, soo xíʼin ña̱ kéʼéna na̱ʼa̱na ña̱ su̱ví ña̱ ndixa kúúña. Kǒo kutáʼún xíʼin na̱ kéʼé ña̱yóʼo.* 6 Ta ti̱xin na̱yóʼo kána sava na̱ ta̱a na̱ sándaʼvi, ta na̱yóʼo kíʼvina veʼe ná ñaʼá ná kándíxa ndiʼi ña̱ káʼa̱nna xíʼinná, ná kíʼvi ku̱a̱ʼání ku̱a̱chi, ta kéʼéná ña̱ kúni̱ miíná chi ña̱yóʼo kúú ña̱ xáʼndachíñu nu̱úná, 7 soo ni ndiʼi tiempo sákuaʼaná, kǒo kívi xa̱a̱ná kuxini̱ va̱ʼaná xa̱ʼa̱ ña̱ nda̱a̱.

8 Saáchi nda̱a̱ táki̱ʼva i̱xaa ta̱ Janes xíʼin ta̱ Jambres ña̱ ni̱xi̱yona contra ta̱ Moisés saátu kéʼé na̱ ta̱a yóʼo. Íyona contra ña̱ nda̱a̱, soo Ndióxi̱ va̱ása kíndo̱o-inira xíʼin ña̱ kéʼéna chi va̱ása kándíxanara. 9 Soo va̱ása va̱ʼa kana ña̱ kúni̱na keʼéna, saáchi ndiʼina kiʼin kuenta ña̱ kúúna na̱ kíʼvi, nda̱a̱ táki̱ʼva ku̱u xíʼin u̱vi̱ saá na̱ ta̱a na̱ xa̱a̱ ni̱ka̱ʼa̱nyó xa̱ʼa̱. 10 Soo yóʼó, va̱ʼaní ndíku̱ún ndiʼi ña̱ sánáʼi̱, ndiʼi ña̱ kéʼíi̱, ña̱ chi̱ka̱a̱-inii̱ saxínui̱, ña̱ kándíxai̱ Ndióxi̱, ña̱ kúee íyo inii̱, ña̱ kúʼvi̱-inii̱ xínii̱ ndiʼina ta saátu ña̱ íxandakú-inii̱, 11 ta kúnda̱a̱-iniún ña̱ i̱xandi̱va̱ʼanína xíʼi̱n, ta sa̱xóʼvi̱nína yi̱ʼi̱, tá kúú ña̱ ndo̱ʼi̱ chí ñuu Antioquía, Iconio xíʼin Listra. Ku̱ndeé-inii̱* xíʼin ndiʼi tu̱ndóʼo yóʼo ta mií tátayó kúú ta̱ sa̱kǎku yi̱ʼi̱ nu̱ú ndiʼiña. 12 Saáchi ndiʼi na̱ kúni̱ ndasakáʼnu Ndióxi̱ ta kúni̱na kutáʼanna xíʼin ta̱ Cristo Jesús, ixandi̱va̱ʼatuna xíʼin na̱yóʼova. 13 Soo na̱ ndi̱va̱ʼa-ini ta saátu na̱ sándaʼvi, kininíka xa̱a̱na keʼéna ta sandáʼvina na̱ yiví ta ki̱ʼva saátu keʼé inka na̱ yiví xíʼinna ña̱ sandáʼvinana.

14 Soo yóʼó kǒo sandákoún ña̱ sa̱náʼa̱na yóʼó ni ña̱ chi̱ndeétáʼanna xíʼún ni̱xa̱ún ka̱ndíxaún, chi xíni̱vaún ndáa na̱ yiví kúú na̱ sa̱náʼa̱ ña̱yóʼo yóʼó, 15 ta nani tá ka̱kuvíún* xa̱a̱ xíni̱ún xa̱ʼa̱ ña̱ ni̱ka̱ʼyi̱ nu̱ú tutu yi̱i̱,* ta ña̱yóʼo kúú ña̱ kivi chindeétáʼan xíʼún ña̱ va̱ʼa ndíchi koún ta kivi ka̱kún xa̱ʼa̱ ña̱ kándíxaún ta̱ Cristo Jesús. 16 Ndiʼi ña̱ ni̱ka̱ʼyi̱ nu̱ú tutu yi̱i̱ tu̱ʼun Ndióxi̱ kúúña, ta chíndeétáʼanña xíʼinyó ña̱ va̱ʼa sanáʼa̱yó na̱ yiví, ña̱ va̱ʼa na̱ʼa̱ña nu̱úyó ndáaña kúú ña̱ va̱ása va̱ʼa, ndásanda̱kúña ndiʼi ña̱ʼa, ta kivi nasamaña ña̱ ndákanixi̱ní na̱ yiví ña̱ va̱ʼa xa̱a̱ña kooña nda̱a̱ táki̱ʼva kúni̱ mií Ndióxi̱, 17 tasaá na̱ káchíñu nu̱ú Ndióxi̱ vií va̱ʼa sakúaʼana ta kuxini̱ va̱ʼana keʼéna nda̱a̱ ndáaka chiñu ña̱ va̱ʼa.

4 Ta̱ Cristo Jesús ndatiinra ku̱a̱chi xíʼin na̱ táku ta saátu xíʼin na̱ ni̱xi̱ʼi̱ tá ná na̱ʼa̱ káxira ndee̱ ña̱ kúúmiíra ta saátu tá ná kaʼndachíñura ti̱xin Reinora. Nu̱ú ta̱ Cristo Jesús ta saátu nu̱ú Ndióxi̱ káʼi̱n ña̱yóʼo xíʼún: 2 natúʼún xa̱ʼa̱ tu̱ʼun Ndióxi̱, kundi̱ʼi̱ní-iniún keʼúnña ni kúúña tiempo va̱ʼa á tiempo ña̱ yo̱ʼvi̱, chindeétáʼan xíʼin inkana ña̱ vií ná keʼéna, ka̱ʼa̱n xíʼinna xa̱ʼa̱ ña̱ va̱ása va̱ʼa kéʼéna, taxi consejo ndaʼa̱na, kúee koo iniún xíʼinna ta viíní sanáʼúnna. 3 Saáchi kixaa̱ iin tiempo, na̱ yiví kundasína kunina ña̱ nda̱a̱, ta xa̱ʼa̱ ña̱ kúni̱na keʼéna ña̱ kúni̱ miína ndukúna na̱ sánáʼa̱ ña̱ kúni̱ miína kuniso̱ʼona. 4 Va̱ása kuniso̱ʼokana ña̱ nda̱a̱ ta kixáʼana kuniso̱ʼona cuento vatá. 5 Soo yóʼó, viíní ndakanixi̱níún xa̱ʼa̱ ndiʼi ña̱ kéʼún, kundeé-iniún* nu̱ú nda̱a̱ ndáaka tu̱ndóʼo ña̱ va̱xi nu̱ún, ndakundéún natúʼún xa̱ʼa̱ tu̱ʼun va̱ʼa ta viíní saxínún chiñu ña̱ kúúmiíún.

6 Saáchi yi̱ʼi̱ íyoi̱ nda̱a̱ táki̱ʼva íyo vino tá sákaana sa̱tá ña̱ sóko̱na nu̱ú Ndióxi̱, ta xa̱a̱ ku̱yatinní sa̱ñái̱.* 7 Ku̱chiñui̱ viíní ka̱nitáʼi̱n, ku̱chiñui̱ xi̱nui̱ ta ni̱xa̱i̱ nda̱a̱ nu̱ú ndíʼi ta kǒo nísandákoi̱ ña̱ kandíxai̱ Ndióxi̱. 8 Ta vitin tátayó ta̱ nda̱kúní tíin ku̱a̱chi xa̱a̱ íyo tu̱ʼvara ña̱ taxira iin corona ndaʼíi̱, corona yóʼo kúú ña̱ ndákiʼin na̱ nda̱kú-ini, taxira ña̱yóʼo ndaʼíi̱ ki̱vi̱ kán xa̱ʼa̱ ndiʼi ña̱ ke̱ʼíi̱, soo su̱ví yi̱ʼi̱ kuití ndakiʼin ña̱yóʼo chi taxituraña ndaʼa̱ ndiʼi na̱ kúni̱ní ña̱ ná kixaa̱ ki̱vi̱ ña̱ na̱ʼa̱ra ndee̱ ña̱ kúúmiíra.

9 Chika̱a̱níún ndee̱ ña̱ kamaní kixiún kuniún yi̱ʼi̱. 10 Saáchi ta̱ Demas sa̱ndákoora yi̱ʼi̱ ta nda̱kundiku̱nra ñuyǐví* yóʼo ta nda̱kiʼinra ku̱a̱ʼa̱nra chí Tesalónica; ta̱ Crescente ku̱a̱ʼa̱nra chí Galacia, ta ta̱ Tito ku̱a̱ʼa̱nra chí Dalmacia. 11 Ndáa iinlá ta̱ Lucas íyo xíʼi̱n yóʼo. Ná kixi ta̱ Marcos xíʼún saáchi ta̱yóʼo chindeétáʼanníra xíʼi̱n ña̱ va̱ʼa keʼíi̱ chiñu nu̱ú Ndióxi̱. 12 Ta̱ Tíquico chi̱ndaʼíi̱ra ku̱a̱ʼa̱nra chí ñuu Éfeso. 13 Tá ná kixiún, kuniʼi rollo ta saátu ti̱ko̱to̱i̱ ña̱ ndíxii̱ tiempo vi̱xin, ña̱ sa̱ndákoi̱ veʼe ta̱ Carpo chí ñuu Troas, soo ña̱ kúni̱kai̱ ná kixi xíʼún kúú pergamino.*

14 Ta̱ Alejandro, ta̱ íxava̱ʼa ña̱ʼa ña̱ cobre sa̱xóʼvi̱níra yi̱ʼi̱. Jehová* kúú ta̱ ndatiin ku̱a̱chi xíʼinra. 15 Saátu miíún kuentaní koún xíʼin ta̱yóʼo, saáchi ni loʼo kǒo níxiinra kuniso̱ʼora ña̱ xi̱ka̱ʼa̱nndi̱.

16 Tá nu̱ú va̱ʼa ni̱xa̱ʼi̱n nu̱ú na̱ chíñu ña̱ ndatiinna ku̱a̱chi xíʼi̱n kǒo nda̱a̱ ni iinna níxi̱yo xíʼi̱n, saáchi ndiʼina sa̱ndákoona yi̱ʼi̱. Soo kǒo kúni̱i̱ ña̱ ndatiin Ndióxi̱ ku̱a̱chi xíʼinna xa̱ʼa̱ ña̱yóʼo. 17 Soo tátayó, ni̱xi̱yovara xíʼi̱n ta nda̱sandakúra-inii̱ ña̱ va̱ʼa natúʼi̱n xíʼin ndiʼina xa̱ʼa̱ tu̱ʼun Ndióxi̱ ta ndiʼi na̱ ñuu kunda̱a̱-ini xa̱ʼa̱ ña̱yóʼo, ta saátu sa̱kǎkura yi̱ʼi̱ nu̱ú tí ndikaʼa.* 18 Mií tátayó sakǎku yi̱ʼi̱ nu̱ú nda̱a̱ ndáaka ña̱ʼa ña̱ va̱ása va̱ʼa. Ta sakǎkura yi̱ʼi̱ ña̱ koi̱ ti̱xin Reinora ña̱ íyo chí ndiví. Ndiʼi tiempo ná ndukáʼnura. Saá koo.

19 Ka̱ʼa̱n xíʼin ñá Prisca ta saátu xíʼin ta̱ Áquila ña̱ chíndeéníi̱na* ta saátu na̱ veʼe ta̱ Onesíforo.

20 Ta̱ Erasto ni̱ndo̱ora chí ñuu Corinto, ta ta̱ Trófimo sa̱ndákoi̱ra chí ñuu Mileto chi ta̱ ndeéndóʼo kúúra. 21 Chika̱a̱níún ndee̱ ña̱ va̱ʼa kixaún tá kúma̱níka kixáʼa tiempo vi̱xin.

Ta̱ Eubulo chíndeéníra yóʼó, ta saátu ta̱ Pudente, ta̱ Lino, ñá Claudia xíʼin ndiʼika na̱ ñaniyó.

22 Mií tátayó ná koo xíʼún xa̱ʼa̱ ña̱ va̱ʼaní íyo ki̱ʼva ña̱ ndákanixi̱níún. Va̱ʼaní ná koo inira xíʼin ndiʼindó.