TITO

1 Yi̱ʼi̱ ta̱ Pablo káchíñui̱ nu̱ú Ndióxi̱ ta kúi̱ apóstol ta̱ Jesucristo, ña̱ kándíxai̱ Ndióxi̱ xíʼin chiñu ña̱ kéʼíi̱ ña̱ kúi̱ apóstol kítáʼanña xíʼin ña̱ kándíxa na̱ nda̱kaxin Ndióxi̱ ta saátu kítáʼanña xíʼin ña̱ nda̱a̱, ta ña̱yóʼo kúú ña̱ náʼa̱ nu̱úyó ndáa ki̱ʼva ndasakáʼnuyó Ndióxi̱ xíʼin ndinuʼu-iniyó, 2 kándíxai̱ Ndióxi̱ xa̱ʼa̱ ña̱ ki̱ndoora taxira ña̱ kutakuyó ndiʼi tiempo ta ña̱yóʼo xa̱a̱ ku̱a̱ʼání tiempo ki̱ndoora taxiraña, Ndióxi̱ ni loʼoví va̱ása káʼa̱nra ña̱ vatá.* 3 (Ndióxi̱ ta̱ sáka̱ku miíyó, tá ki̱xaa̱ mií tiempo ña̱ nda̱kaxinra, xi̱niñúʼura yi̱ʼi̱ ña̱ va̱ʼa natúʼi̱n xa̱ʼa̱ tu̱ʼunra xíʼin na̱ yiví ta kunda̱a̱-inina xa̱ʼa̱ña). 4 Yi̱ʼi̱ kúú ta̱ chíndaʼá carta yóʼo ndaʼún Tito, ta nda̱a̱ táki̱ʼva íyo se̱ʼe miíi̱ saá íyoún ta inkáchi íyo ña̱ kándíxayó:

Mií yiváyó Ndióxi̱ xíʼin tátayó ta̱ Cristo Jesús ta̱ sáka̱ku miíyó va̱ʼaní ná koo inina xíʼún ta va̱ʼaní ná kutáʼún xíʼinna.

5 Sa̱ndákoi̱ yóʼó chí Creta ña̱ va̱ʼa ndasaviún ña̱ʼa ña̱ va̱ása va̱ʼa íyo ta saátu ña̱ ndaka̱xiún na̱ koo anciano iin tá iin ñuu, ta keʼún ña̱yóʼo nda̱a̱ táki̱ʼva xa̱a̱ ni̱ka̱ʼi̱n xíʼún: 6 ta̱ anciano, viíní xíniñúʼu keʼéra ta saá kǒo ni iinna ka̱ʼa̱n ña̱ va̱ása va̱ʼa xa̱ʼa̱ra, iin kuití xíniñúʼu koo ñá síʼira ta na̱ va̱lí se̱ʼera ná koona na̱ kándíxa Ndióxi̱, ná kǒo keʼéna ña̱ kúni̱ miína ni ná va̱ása koona na̱ so̱ʼoní. 7 Saáchi ta̱ anciano xa̱ʼa̱ ña̱ ndíʼi̱ní-inira xa̱ʼa̱ chiñu Ndióxi̱ viíní xíniñúʼu keʼéra tasaá kǒo ni iinna ka̱ʼa̱n ña̱ va̱ása va̱ʼa xa̱ʼa̱ra, ni va̱ása ndakanixi̱níra ña̱ nina ña̱ káʼa̱n miíra xíniñúʼu keʼéna, ni va̱ása xíniñúʼu kamaní sa̱a̱ra, va̱ása xíniñúʼu koora iin ta̱ xíʼiní ni ta̱ kútóoní kanitáʼan ta ná kǒo kundi̱ʼi̱ní-inira xa̱ʼa̱ ña̱ kuumiíra ku̱a̱ʼání ña̱ʼa. 8 Ta ña̱ xíniñúʼu keʼéra kúú ña̱ va̱ʼaní koo inira, ná kuʼvi̱-inira kunira ña̱ va̱ʼa, viíní ná ndakanixi̱níra,* va̱ʼaní ná koo ña̱ keʼéra, nda̱kú ná koo inira xíʼin Ndióxi̱ ta ná sakúaʼara ka̱ʼnu̱-inira. 9 Xíniñúʼu kuniñúʼura tu̱ʼun Ndióxi̱ ña̱ viíní sanáʼa̱ra inkana tasaá kivi kuniñúʼura ña̱ nda̱a̱ ña̱ va̱ʼa chika̱a̱ra ndee̱ xíʼin inkana, ta na̱ va̱ása xíín kandíxa ña̱yóʼo ná na̱ʼa̱ra nu̱úna ña̱ va̱ása va̱ʼa íyo ña̱ kéʼéna.

10 Saáchi ku̱a̱ʼání na̱ yiví so̱ʼonína, káʼa̱n sána miína ta sándaʼvina inkana soo mií na̱ kéʼéníka ña̱yóʼo kúú na̱ káʼa̱n ña̱ xíniñúʼu ta̱ʼnda̱ nu̱ú yi̱i̱* na̱ yiví. 11 Xíniñúʼu ndakasiyó yuʼú na̱ ta̱a yóʼo chi xa̱ʼa̱ ña̱ kúni̱na kuumiína ku̱a̱ʼání ña̱ʼa sánáʼa̱na ña̱ va̱ása xíniñúʼu sanáʼa̱na, ta xa̱ʼa̱ ña̱ kéʼéna ña̱yóʼo sándaʼvina na̱ yiví xíʼin na̱ veʼena ta na̱yóʼo sándakoona Ndióxi̱. 12 Ta iin ta̱ kúú profeta miína káchira: “Na̱ ñuu Creta nina ña̱ vatá káʼa̱nna ta íyona nda̱a̱ táki̱ʼva íyo tí kití tí kue̱ʼe̱ní ta nina ña̱ kuxuna ndíʼi̱ní-inina xa̱ʼa̱ ta xúxánnína”.

13 Ña̱ nda̱a̱ kúú ña̱yóʼo. Xa̱ʼa̱ ña̱kán ndakundeé ka̱ʼa̱n xíʼinna ña̱ va̱ása va̱ʼa íyo ña̱ kéʼéna ña̱ va̱ʼa ná kandíxaníkana Ndióxi̱, 14 ta ná kǒo kuniso̱ʼona cuento ña̱ ndáku xi̱ní mií na̱ judío ta saátu ná kǒo kuniso̱ʼona chiñu ña̱ xáʼnda na̱ ta̱a na̱ kǒo ndíku̱n ña̱ nda̱a̱. 15 Na̱ kǒo kéʼé ña̱ yaku̱a̱ ni iin ña̱ʼa va̱ása yaku̱a̱ nu̱úna. Soo na̱ kéʼé ña̱ yaku̱a̱ ta va̱ása kándíxana Ndióxi̱, ndiʼi ña̱ʼa ña̱ yaku̱a̱ kúúña nu̱úna, saáchi xa̱a̱ ku̱yaku̱a̱ xi̱nína ta saátu ña̱ xínitúni̱na. 16 Nu̱ú ndiʼi na̱ yiví káʼa̱nna ña̱ xíni̱na Ndióxi̱ soo xíʼin ña̱ kéʼéna náʼa̱na ña̱ kúndasí nu̱úna xíninara, saáchi Ndióxi̱ kúkininí-inira xínirana ta kǒo xíniso̱ʼona ña̱ káʼa̱nra ta va̱ása kuniñúʼurana ña̱ keʼéna nda̱a̱ ni iin ña̱ va̱ʼa.

2 Soo yóʼó, ndakundeún ka̱ʼún xa̱ʼa̱ ña̱ kítáʼan xíʼin ña̱ nda̱a̱. 2 Na̱ ta̱a na̱ xa̱a̱ náʼnuka, nda̱a̱ ndáaka ña̱ kéʼéna ná kiʼinnína kuenta xíʼinña, ná na̱ʼa̱na ña̱ kúúna na̱ xa̱a̱ xu̱xa-ini, viíní ná ndakanixi̱nína, ná kandíxanína Ndióxi̱, ná kuʼvi̱-inina kunina inkana ta ndakúní ná koo inina. 3 Ta saátu ná ñaʼá ná náʼnuka,* xíʼin ña̱ kéʼéná ná na̱ʼa̱ná ña̱ íxato̱ʼóná Ndióxi̱, ná kǒo kutóoná chika̱a̱ná ku̱a̱chi síkí xa̱ʼa̱ inkana, ná va̱ása koʼoná ku̱a̱ʼání ndixi* ta ná sanáʼa̱ná ña̱ va̱ʼa, 4 ta saá kúú ña̱ viíní taxiná consejo ndaʼa̱* ná ñaʼá ná válíka ña̱ va̱ʼa kuʼvi̱-ininá kuniná yiíná ta saátu na̱ va̱lí se̱ʼená, 5 viíní ná ndakanixi̱níná, ná kǒo keʼéná ña̱ yaku̱a̱, ná kachíñuníná ti̱xin veʼená,* ta va̱ʼaní ná koo ininá, ta ná kundiku̱nná ña̱ káʼa̱n yiíná xíʼinná tasaá kǒo ka̱ʼa̱nna ña̱ va̱ása va̱ʼa xa̱ʼa̱ tu̱ʼun Ndióxi̱.

6 Ta saátu, ndakundeún taxiún consejo ndaʼa̱ na̱ ta̱a na̱ válíka ña̱ va̱ʼa viíní ná ndakanixi̱nína, 7 ta saátu miíún, chinúu yichi̱ nu̱úna xíʼin ndiʼi ña̱ va̱ʼa ña̱ kéʼún, ta xíʼin ña̱ to̱ʼó sanáʼún ndiʼi ña̱ va̱ʼa, 8 kuniñúʼu tu̱ʼun va̱ʼa, ña̱ va̱ʼa ná kǒo ka̱ʼa̱nna ña̱ va̱ása va̱ʼa xa̱ʼa̱ ña̱ káʼún, tasaá na̱ sáa̱-ini xíni miíyó kukaʼan nu̱úna chi kǒo nda̱a̱ ni iin ña̱ va̱ása va̱ʼa kivi ka̱ʼa̱nna xa̱ʼa̱yó. 9 Na̱ káchíñu nu̱ú inkana ná ixato̱ʼónína na̱ káchíñuna nu̱ú, ta ná kandíxana nda̱a̱ ndáaka ña̱ káʼa̱nna xíʼinna, ná sakúsi̱ína-inina, ná va̱ása natúʼun kúáchina xíʼinna, 10 ná kǒo ixakuíʼnána ña̱ʼa na̱ káchíñuna nu̱ú, ná na̱ʼa̱na xíʼin ña̱ kéʼéna ña̱ kivi kundaa-ininana, ña̱ va̱ʼa ná kuni inkana ña̱ va̱ʼaní íyo ndiʼi ña̱ sánáʼa̱ Ndióxi̱ ta̱ sáka̱ku miíyó.

11 Saáchi Ndióxi̱ ni̱na̱ʼa̱ra ña̱ va̱ʼaní-inira xa̱ʼa̱ ña̱ sáka̱kura ndiʼi na̱ yiví. 12 Ña̱ va̱ʼa ña̱ kúúmií Ndióxi̱ sánáʼa̱ña miíyó ña̱ kǒo keʼéyó ña̱ va̱ása va̱ʼa ni ña̱ kúni̱ ku̱ñuyó keʼéña, sánáʼa̱tuña miíyó ña̱ viíní ndakanixi̱níyó, viíní koo ki̱ʼva ña̱ kutakuyó ta xíʼin ndinuʼu-iniyó ndasakáʼnuyó Ndióxi̱ ni ndóoyó ñuyǐví* yóʼo, 13 nani ndátuyó ña̱ xi̱nu ña̱ sákusi̱íní-iniyó ta saátu ña̱ na̱ʼa̱ Ndióxi̱ ta̱ káʼnu ndee̱ ña̱ kúúmiíra ta saátu ta̱ Jesucristo ta̱ sáka̱ku miíyó. 14 Ta̱yóʼo nda̱taxira miíra xa̱ʼa̱yó ña̱ va̱ʼa sakǎkura miíyó nu̱ú nda̱a̱ ndáaka ña̱ va̱ása va̱ʼa* ta saátu ña̱ nda̱sayi̱i̱ra iin ñuu ña̱ kúú kuenta miíra, ta na̱yóʼo kúni̱nína keʼéna ña̱ va̱ʼa.

15 Kǒo sandákoún ña̱ ka̱ʼún xa̱ʼa̱ ña̱yóʼo, taxi consejo ndaʼa̱na* ta ka̱ʼa̱n xíʼinna xa̱ʼa̱ ña̱ va̱ása va̱ʼa kéʼéna chi ña̱yóʼo kúú chiñu ña̱ nda̱kiʼún. Ná kǒo ka̱ʼa̱nna xa̱ʼún ña̱ va̱ása ndáyáʼviún.

3 Ndakundeé ka̱ʼa̱n xíʼinna ña̱ ná kuniso̱ʼona ña̱ káʼa̱n na̱ chíñu, ná koo tu̱ʼvana ña̱ keʼéna ndiʼi ña̱ va̱ʼa, 2 ná kǒo ka̱ʼa̱nna ña̱ va̱ása va̱ʼa xa̱ʼa̱ nda̱a̱ ni iin na̱ yiví, ná kǒo kutóona sakákuna ku̱a̱chi, viíní ná ndakanixi̱nína ta va̱ʼaní ná koo inina xíʼin ndiʼina. 3 Saáchi tá ya̱chi̱ na̱ yiví na̱ kíʼvi xi̱kuuyó, va̱ása níxikandíxayó ña̱ káʼa̱n Ndióxi̱, na̱ yiví xi̱sandáʼvina miíyó, xi̱keʼéyó ña̱ xi̱kuni̱ miíyó, nina ña̱ʼa ña̱ sákusi̱í-iniyó xi̱ndi̱ʼi̱-iniyó xa̱ʼa̱, kininí ni̱xi̱yo ki̱ʼva ña̱ xi̱takuyó, xi̱kuuyó na̱ yiví na̱ kúini̱,* mií na̱ kininíka xi̱keʼé xi̱kuuyó ta xi̱sa̱a̱-iniyó xi̱xini táʼanyó.

4 Soo tá ni̱na̱ʼa̱ Ndióxi̱ ta̱ sáka̱ku miíyó ña̱ va̱ʼaní-inira xíʼinyó ta saátu ña̱ kúʼvi̱ní-inira xínira na̱ yiví, 5 ta̱yóʼo sa̱kǎkura miíyó, soo su̱ví xa̱ʼa̱ ña̱ níkeʼéyó iin ña̱ nda̱kú kúúña chi xa̱ʼa̱ ña̱ ku̱ndáʼvi-inira xi̱nira miíyó kúúña. Ta̱kán sa̱kǎkura miíyó ta nda̱sara miíyó na̱ yiví limpio, ta ña̱yóʼo kúú ña̱ chi̱ndeé miíyó ña̱ kutakuyó ta xi̱niñúʼura espíritu santo ña̱ va̱ʼa ndasaxa̱ára miíyó. 6 Ta̱kán xi̱niñúʼura ta̱ Jesucristo ta̱ sáka̱ku miíyó ña̱ va̱ʼa ta̱xira ña̱ espíritu santo yóʼo ndaʼa̱yó, 7 ta̱kán ke̱ʼéra ña̱yóʼo ña̱ va̱ʼa xa̱a̱yó kooyó na̱ yiví na̱ ndátu kutaku ndiʼi tiempo, chi ña̱yóʼo kúú ña̱ ni̱ka̱ʼa̱nra taxira ndaʼa̱yó ta xa̱a̱yó ndakiʼinyó ña̱yóʼo xa̱ʼa̱ ña̱ ni̱na̱ʼa̱ra ña̱ va̱ʼaní-inira xíʼinyó. Ña̱yóʼo kúú ña̱ chíndeé miíyó ña̱ xa̱a̱yó kooyó na̱ yiví na̱ nda̱kú-ini.

8 Ña̱ káʼi̱n yóʼo ña̱ nda̱a̱va kúúña, kúni̱i̱ ña̱ ná ndakundeún ka̱ʼún xa̱ʼa̱ ña̱yóʼo xíʼin na̱ ni̱xa̱a̱ ka̱ndíxa Ndióxi̱ ta ná kǒo sandákoona keʼéna ña̱ va̱ʼa. Ña̱yóʼo va̱ʼaníña ta chíndeétáʼanña xíʼin na̱ yiví.

9 Soo kǒo natúʼun kúáchiún xa̱ʼa̱ ni iin ña̱ʼa ña̱ va̱ása ndáyáʼvi, ni kǒo natúʼun kúáchiún xíʼin na̱ nándukú xa̱ʼa̱ ki̱vi̱ na̱ táʼanna na̱ ni̱xi̱yo xi̱naʼá, ni xíʼin na̱ nátúʼun kúáchi xa̱ʼa̱ ña̱ káʼa̱n Ley, saáchi va̱ása ndáyáʼvi ña̱yóʼo ta su̱ví ña̱ chindeétáʼan xíʼún kúúña. 10 Soo ta̱ ta̱a ta̱ sánáʼa̱ ña̱ vatá,* tá xa̱a̱ u̱vi̱ yichi̱ ni̱ka̱ʼún xíʼinra* ta kǒo níxiinra kuniso̱ʼora, kǒo kutáʼankaún xíʼinra, 11 saáchi ta̱ ta̱a yóʼo va̱ása ndíka̱a̱kara yichi̱ nda̱kú ta kíʼvira ku̱a̱chi ta xíʼin ña̱ kéʼéra náʼa̱ra ña̱ ndísora ku̱a̱chi.

12 Tá ná chindaʼíi̱ ta̱ Ártemas á ta̱ Tíquico xa̱a̱ra nu̱ún, chika̱a̱níún ndee̱ ña̱ xa̱ún kuniún yi̱ʼi̱ chí Nicópolis chi kán kúú nu̱ú nda̱kaxii̱n koi̱ tiempo vi̱xin. 13 Taxi ndiʼi ña̱ xíniñúʼu ta̱ Apolos ta saátu ta̱ Zenas, iin ta̱ xíni̱ va̱ʼa xa̱ʼa̱ Ley, ña̱ va̱ʼa ná kǒo kuma̱ní ni iin ña̱ʼa nu̱úna tá ná keena ku̱ʼu̱nna. 14 Soo na̱ kítáʼan xíʼin miíyó, ná chika̱a̱nína ndee̱ ña̱ keʼéna ña̱ va̱ʼa, ña̱kán tá iin kama ná kuma̱ní iin ña̱ʼa nu̱ú inkana, kivi chindeétáʼanna xíʼin na̱ kúma̱níña nu̱ú, tasaá xa̱a̱na koona na̱ kéʼé ña̱ va̱ʼa.

15 Ndiʼi na̱ íyo xíʼi̱n yóʼo chíndeénína yóʼó.* Ka̱ʼa̱n xíʼin na̱ inkáchi ndásakáʼnu Ndióxi̱ xíʼinyó ta kúʼvi̱ní-inina xínina miíyó ña̱ chíndeéníi̱na.

Ndióxi̱ ná na̱ʼa̱ra ña̱ va̱ʼaní-inira xíʼin ndiʼi ndóʼó.