PRIMERA ÑA̱ PEDRO

1 Yi̱ʼi̱ ta̱ Pedro, kúi̱ apóstol ta̱ Jesucristo, ta káʼyíi̱ ña̱yóʼo ku̱xa̱a̱ nu̱ú ndóʼó na̱ ke̱e ku̱a̱ʼa̱n* kundoo chí Ponto, Galacia, Capadocia, Asia xíʼin Bitinia. Ndióxi̱ kúú ta̱ nda̱kaxin ndóʼó 2 ta miíra kúú yiváyó ta̱ íyo chí ndiví ta nda̱kaxinra ndóʼó nda̱a̱ táki̱ʼva kúni̱ miíra. Ta̱yóʼo ta̱xira espíritu santo ndaʼa̱ndó ña̱ va̱ʼa ndasayi̱i̱ra ndóʼó. Ke̱ʼéra ña̱yóʼo ña̱ va̱ʼa kuniso̱ʼondó ña̱ káʼa̱nra ta xi̱niñúʼura ni̱i̱ ta̱ Jesucristo ña̱ va̱ʼa xa̱a̱ndó koondó na̱ yiví na̱ kǒo ña̱ yaku̱a̱ kúúmií.

Káʼa̱nníi̱ xíʼin Ndióxi̱ ña̱ va̱ʼaní ná koo inira xíʼinndó ta ná chindeétáʼanra xíʼinndó ña̱ táxi̱n koo inindó.

3 Ná ndukáʼnu Ndióxi̱ ta̱ kúú yivá tátayó Jesucristo. Xa̱ʼa̱ ña̱ kúndáʼviní-inira xínira miíyó, ta̱xira ña̱ kaku tukuyó ña̱ va̱ʼa koo iin ña̱ kundatuyó ndakiʼinyó ta ña̱yóʼo va̱ása ndiʼi-xa̱ʼa̱ña. Ndátuyó ndakiʼinyó ña̱yóʼo xa̱ʼa̱ ña̱ nda̱taku ta̱ Jesucristo. 4 Ta̱xira ña̱ kaku tukuyó ña̱ va̱ʼa kundatuyó ndakiʼinyó iin ña̱ ki̱ndoora taxira ndaʼa̱yó. Ña̱ ndátuyó ndakiʼinyó va̱ása ndíʼi-xa̱ʼa̱ña, kǒo ña̱ yaku̱a̱ kúúmiíña ta ndiʼi tiempo kooña. Ta xa̱a̱ chí ndiví íyo tu̱ʼvaña xa̱ʼa̱ ndóʼó 5 na̱ ndáa Ndióxi̱ xíʼin ndee̱ ña̱ kúúmiíra xa̱ʼa̱ ña̱ kándíxandóra. Ndáara ndóʼó ña̱ va̱ʼa ndakiʼinndó bendición ña̱ sakǎkura ndóʼó ta na̱ʼa̱ káxira ña̱yóʼo tá ná kixaa̱ tiempo nu̱ú ndíʼi. 6 Xa̱ʼa̱ ña̱kán kúú ña̱ kúsi̱íní-inindó, ni xóʼvi̱vandó loʼo kuití tiempo xa̱ʼa̱ ña̱ yáʼandó nu̱ú ku̱a̱ʼání tu̱ndóʼo, soo sana koova sava tu̱ndóʼo nu̱úndó 7 ña̱ va̱ʼa na̱ʼa̱ndó ndáa ki̱ʼva íyo ña̱ kándíxandó Ndióxi̱. Chi saá kúú ña̱ ka̱ʼa̱n va̱ʼana xa̱ʼa̱ndó ta ndukáʼnundó tá ná na̱ʼa̱ ta̱ Jesucristo ndee̱ ña̱ kúúmiíra. Tá ná ya̱ʼandó nu̱ú tu̱ndóʼo ta na̱ʼa̱ndó ña̱ kándíxaníndó Ndióxi̱, ña̱yóʼo kúú ña̱ ndáyáʼviníka nu̱ú oro ña̱ xa̱a̱ xi̱tondosóna nu̱ú ñuʼu̱, ta ni saá ña̱ oro yóʼo ndíʼi-xa̱ʼa̱vaña. 8 Ni nda̱a̱ ni iin yichi̱ va̱ása níxinindóra, kúʼvi̱va-inindó xínindóra. Ni vitin va̱ása xítondóra, náʼa̱vandó ña̱ kándíxaníndóra ta xa̱ʼa̱ ña̱yóʼo ndeéní kúsi̱í-inindó, 9 ta xa̱ʼa̱ ña̱ kándíxandóra kusi̱íní-inindó: chi na̱ ka̱kuva kúúndó.

10 Na̱ profeta na̱ ni̱ka̱ʼa̱n xa̱ʼa̱ ña̱ va̱ʼaní-ini Ndióxi̱ xíʼinndó, ni̱nda̱ka̱tu̱ʼunna ndáa ki̱ʼva koo ña̱ ka̱ku na̱ yiví ta na̱ndukúna xa̱ʼa̱ ña̱yóʼo. 11 Xa̱a̱ ya̱chi̱ka Ndióxi̱ xi̱niñúʼura espíritu santo ña̱ va̱ʼa ka̱ʼa̱nra xíʼin na̱ profeta ña̱ xo̱ʼvi̱ ta̱ Cristo ta tándi̱ʼi ndukáʼnura. Na̱ profeta ndeéní xi̱nandukúna xa̱ʼa̱ ña̱yóʼo ña̱ va̱ʼa kunda̱a̱-inina ndáaña kundoʼo ta̱ Cristo ta ama kúú ña̱ kundoʼora ña̱yóʼo. 12 Ndióxi̱ ni̱na̱ʼa̱ra nu̱ú na̱ profeta ña̱ va̱ása níkachíñuna xa̱ʼa̱ miína chi xa̱ʼa̱ ndóʼóva ka̱chíñuna. Na̱ profeta ka̱ʼyína xa̱ʼa̱ ña̱ na̱kunda̱a̱-inindó, ta espíritu santo ña̱ ki̱xi chí ndiví kúú ña̱ chi̱ndeétáʼan xíʼin na̱ na̱túʼun xíʼinndó xa̱ʼa̱ tu̱ʼun va̱ʼa yóʼo. Ta nda̱a̱ na̱ ángel kúni̱nína kunda̱a̱-inina xa̱ʼa̱ ña̱yóʼo.

13 Ña̱kán koo tu̱ʼvandó ña̱ ndeéní kachíñundó, viíní ndakanixi̱níndó ta kandíxaníndó ña̱ na̱ʼa̱ra ña̱ va̱ʼa-inira xíʼinndó tá xa̱a̱ ná na̱ʼa̱ ta̱ Jesucristo ndee̱ ña̱ kúúmiíra. 14 Vitin kúúndó se̱ʼe Ndióxi̱ na̱ va̱ʼaní kándíxa ña̱ káʼa̱nra. Xa̱ʼa̱ ña̱kán sandákoondó ña̱ va̱ása va̱ʼa ña̱ xi̱kuni̱ndó keʼéndó tá ta̱ʼán kunda̱a̱-inindó xa̱ʼa̱ra; 15 nu̱úka ña̱yóʼo, nda̱a̱ ndáaka ña̱ kéʼéndó na̱ʼa̱ndó ña̱ kúúndó na̱ yi̱i̱, nda̱a̱ táki̱ʼva íyo mií ta̱ nda̱kaxin ndóʼó chi ta̱ yi̱i̱ kúú ta̱kán, 16 chi tu̱ʼun Ndióxi̱ káchiña: “Xíniñúʼu koondó na̱ yi̱i̱, chi ta̱ yi̱i̱ kúú yi̱ʼi̱”.

17 Tá káʼa̱nndó xíʼin yiváyó ta̱ nda̱kúní ndátiin ku̱a̱chi xíʼin na̱ yiví nda̱a̱ táki̱ʼva íyo ña̱ kéʼéna, to̱ʼóní keʼéndó tá káʼa̱nndó xíʼinra nani ndóo tóondó* nu̱ú ñuʼú yóʼo. 18 Saáchi ndóʼó kúnda̱a̱-inindó ña̱ mií Ndióxi̱ kúú ta̱ sa̱kǎku ndóʼó nu̱ú ndiʼi ña̱ xi̱keʼé na̱ táʼanndó na̱ xi̱ndoo xi̱naʼá, chi ndiʼi ña̱ xi̱keʼé na̱kán va̱ása ndáyáʼviña, ta su̱ví oro á plata kúú ña̱ níxiniñúʼura ña̱ sakǎkura ndóʼó chi ña̱ ndíʼi-xa̱ʼa̱va kúú ña̱yóʼo. 19 Nu̱úka ña̱yóʼo xi̱niñúʼura ni̱i̱ ta̱ Cristo ña̱ ndáyáʼviní, ña̱ íyo nda̱a̱ táki̱ʼva íyo ni̱i̱ iin tí ndikachi* tí va̱ʼaní náʼa̱ ta kǒo nda̱a̱ ni iin ña̱ va̱ása va̱ʼa kúúmiírí. 20 Xa̱a̱ ya̱chi̱ví nda̱kaxinra ta̱yóʼo tá kúma̱ní kixáʼa xa̱ʼa̱ ñuyǐví, ta xa̱ʼa̱ ndóʼó kúú ña̱ ki̱xira* tá xa̱a̱ ndi̱ʼi ki̱vi̱ kán. 21 Xa̱ʼa̱ ta̱kán ndóʼó kándíxandó Ndióxi̱ ta̱ sa̱ndátakuñaʼá ta ta̱xira ña̱ káʼnuní xa̱a̱ra koora tasaá ndóʼó kandíxandó Ndióxi̱ ta kundaa-inindóra.

22 Ta vitin ndóʼó na̱samandó ki̱ʼva ña̱ íyondó ta kǒoka ña̱ va̱ása va̱ʼa kéʼéndó xa̱ʼa̱ ña̱ kándíxandó ña̱ nda̱a̱ ña̱ káʼa̱n tu̱ʼun Ndióxi̱, ta ña̱yóʼo chíndeétáʼanña xíʼinndó ña̱ ndixaní kuʼvi̱-inindó kunitáʼanndó nda̱a̱ táki̱ʼva kúʼvi̱-inindó xínindó na̱ veʼendó. Xa̱ʼa̱ ña̱kán xíʼin ndiʼi níma̱ndó kuʼvi̱ní-inindó kunitáʼanndó. 23 Ndóʼó ka̱ku tukundó, soo va̱ása níkakundó ti̱xin iin si̱ʼva̱* ña̱ ndíʼi-xa̱ʼa̱ chi ka̱kundó ti̱xin iin si̱ʼva̱ ña̱ táxi ña̱ táku, chi ka̱kundó xa̱ʼa̱ tu̱ʼun ña̱ káʼa̱n Ndióxi̱ ta̱ táku ta̱ íyo ndiʼi tiempo. 24 Saáchi “ndiʼi na̱ yiví nda̱a̱ táki̱ʼva íyo ku̱ʼu̱ saá íyona ta ndiʼi ña̱ va̱ʼa ña̱ kúúmiína íyoña nda̱a̱ táki̱ʼva íyo iin yita ña̱ íyo chí yuku̱;* ku̱ʼu̱ yíchi̱ña ta yita kóyoña, 25 soo tu̱ʼun Jehová* ndiʼi tiempo íyoña”. Ta “tu̱ʼun” yóʼo kúú tu̱ʼun va̱ʼa ña̱ na̱túʼunna xíʼinndó.

2 Xa̱ʼa̱ ña̱kán, sandákoondó keʼéndó ndiʼi ña̱ va̱ása va̱ʼa, ña̱ sandáʼvindó, ña̱ ka̱ʼa̱nndó ña̱ vatá,* ña̱ koo ña̱ kúini̱-inindó* ta saátu ña̱ chika̱a̱ndó ku̱a̱chi síkí inkana. 2 Ta nda̱a̱ táki̱ʼva íyo na̱ va̱lí na̱ sa̱kán káku ña̱ kúni̱nína chichínna leche siʼína, saátu xíniñúʼu keʼé ndóʼó ña̱ chika̱a̱níndó ndee̱ ña̱ nandukúndó ña̱ nda̱a̱ ña̱ va̱xi nu̱ú tu̱ʼun Ndióxi̱ ña̱ íyo nda̱a̱ táki̱ʼva íyo leche* tá va̱ʼaní. Tasaá kúú ña̱ va̱ʼa kuaʼnundó ta ka̱kundó 3 ta kivi keʼéndó ña̱yóʼo tá xa̱a̱ xíni̱ va̱ʼandó xa̱ʼa̱ ña̱ va̱ʼaní-ini tátayó.

4 Nani kúyatinndó nu̱úra, ta̱kán íyora nda̱a̱ táki̱ʼva íyo iin yu̱u̱ ña̱ táku ña̱ kǒo níxiin na̱ yiví kunina, soo Ndióxi̱ nda̱kaxinrara ta ndáyáʼviníra nu̱úra, 5 ndóʼó nda̱a̱ táki̱ʼva íyo yu̱u̱ ña̱ táku saá íyondó ta espíritu santo kúú ña̱ chíndeétáʼan xíʼinndó ña̱ va̱ʼa xa̱a̱ndó koondó iin veʼe, tasaá xa̱a̱ndó koondó su̱tu̱ na̱ yi̱i̱ na̱ so̱kó ña̱ʼa ndaʼa̱ Ndióxi̱ nda̱a̱ táki̱ʼva níʼi espíritu santo yichi̱ nu̱úndó, ta ndakiʼinra ña̱ so̱kóndó xa̱ʼa̱ ña̱ ke̱ʼé ta̱ Jesucristo. 6 Saáchi nu̱ú tu̱ʼun Ndióxi̱ káchiña: “Kotondó, chí Sion chindúʼi̱ iin yu̱u̱ ña̱ nda̱kaxii̱n, iin yu̱u̱ mií ña̱ ndáyáʼvi va̱ʼaka ta ndiʼi na̱ kándíxa ña̱kán va̱ása ndakava-inina”.*

7 Xa̱ʼa̱ ña̱kán, nu̱ú miíndó ndáyáʼviníva ta̱yóʼo chi kándíxandóra. Soo nu̱ú na̱ va̱ása kándíxañaʼá “yu̱u̱ ña̱ ku̱ndasí na̱ íxava̱ʼa veʼe, ña̱yóʼo ni̱xa̱a̱ña ndu̱uña yu̱u̱ ña̱ ndáyáʼvi va̱ʼaka”,* 8 ta saátu ni̱xa̱a̱ña ndu̱uña “iin yu̱u̱ ña̱ sandákava na̱ yiví ta kasiña yichi̱ nu̱úna”. Ndákavana chi kǒo kándíxana ña̱ káʼa̱n tu̱ʼun Ndióxi̱ ta na̱ yiví na̱ kéʼé táʼan ña̱yóʼo saá kúú ña̱ kundoʼovana. 9 Soo ndóʼó kúúndó “iin tribu na̱ nda̱kaxinra ña̱ kaʼndachíñundó ta koondó su̱tu̱, kúúndó iin ñuu yi̱i̱, kúúndó ñuu ña̱ nda̱kaxin mií Ndióxi̱ ta iníí xíniñúʼu natúʼunndó xa̱ʼa̱ ña̱ va̱ʼaní-ini Ndióxi̱”* chi ta̱kán kúú ta̱ nda̱tavá ndóʼó nu̱ú ña̱ naá ña̱ koondó nu̱ú íyo luz. 10 Ni̱xi̱yo iin tiempo ña̱ va̱ása níxi̱kuundó iin ñuu soo vitin kúúndó ñuu Ndióxi̱; ni̱xi̱yo iin tiempo ña̱ va̱ása níxikundáʼvi-ini Ndióxi̱ kunira ndóʼó soo vitin kúndáʼviva-inira xínira ndóʼó.

11 Xa̱ʼa̱ ña̱ kúúndó na̱ inka ñuu ta ndóo tóondó* nu̱ú ñuʼú yóʼo, káʼi̱n xíʼinndó ña̱ ná kǒo keʼéndó ña̱ kúni̱ ku̱ñundó chi ña̱yóʼo nda̱a̱ táki̱ʼva íyo ña̱ kánitáʼan xíʼinndó saá íyoña. 12 Ndakundeéndó viíní keʼéndó nu̱ú na̱ yiví, ña̱kán tá ná ka̱ʼa̱nna iin ña̱ va̱ása va̱ʼa xa̱ʼa̱ndó miína kuni nu̱úna ña̱ va̱ʼaní íyo ña̱ kéʼéndó ta xa̱ʼa̱ ña̱kán ndasakáʼnuna Ndióxi̱ tá ná kixira ña̱ ndatiinra ku̱a̱chi.

13 Xa̱ʼa̱ ña̱ ndíku̱nndó tátayó kandíxandó ña̱ káʼa̱n na̱ yiví na̱ kúúmií iin chiñu, tá kúú na̱ rey chi kúúmií na̱yóʼo iin chiñu ña̱ káʼnuka, 14 ta kandíxatundó ña̱ káʼa̱n na̱ chíñu na̱ chi̱ndaʼára ña̱ taxina castigo ndaʼa̱ na̱ kéʼé ña̱ va̱ása va̱ʼa ta ka̱ʼa̱n va̱ʼana xa̱ʼa̱ na̱ kéʼé ña̱ va̱ʼa. 15 Saáchi ña̱ kúni̱ Ndióxi̱ kúúña, xíʼin ña̱ kéʼéndó ná ndakasindó yuʼú na̱ kíʼvi na̱ káʼa̱n sána mií. 16 Koondó na̱ yiví libre soo su̱ví xa̱ʼa̱ ña̱yóʼo keʼéndó ña̱ va̱ása va̱ʼa, nu̱úka ña̱yóʼo kachíñundó nu̱ú Ndióxi̱. 17 Ixato̱ʼóndó ndiʼi na̱ yiví, kuʼvi̱ní-inindó kunindó ndiʼi na̱ inkáchi kítáʼan ndásakáʼnu Ndióxi̱ xíʼinyó, ixato̱ʼóndó Ndióxi̱, ixato̱ʼóndó ta̱ kúú rey.

18 Ndóʼó na̱ káchíñu nu̱ú inkana, ixato̱ʼóníndó na̱ káchíñundó nu̱ú, su̱ví nda̱saa na̱ va̱ʼaní kéʼé á na̱ viíní ndákanixi̱ní chi nda̱a̱ na̱ va̱ása kéʼé ña̱yóʼo xíniñúʼu ixato̱ʼóndó. 19 Tá iinna kúndeé-inina* tá íxandi̱va̱ʼa na̱ yiví xíʼinna ta yáʼana nu̱ú tu̱ndóʼo xa̱ʼa̱ ña̱ kándíxana* ña̱ káʼa̱n Ndióxi̱, kúsi̱íní-ini Ndióxi̱ xíʼin ña̱ kéʼéna. 20 Soo tá kúndeé-inindó tá kánina ndóʼó xa̱ʼa̱ ña̱ ni̱ki̱ʼvindó ku̱a̱chi ¿á ña̱ va̱ʼaví kúú ña̱yóʼo? Soo tá kúndeé-inindó xóʼvi̱ndó xa̱ʼa̱ ña̱ kéʼéndó ña̱ va̱ʼa, ña̱yóʼo ndixa kúú ña̱ kúsi̱íní-ini Ndióxi̱ xíʼin.

21 Saáchi xa̱ʼa̱ ña̱yóʼo kúú ña̱ nda̱kaxinna ndóʼó chi nda̱a̱ mií ta̱ Cristo ni̱xo̱ʼvi̱ xa̱ʼa̱ndó tasaá va̱ʼaní yichi̱ sa̱ndákoora nu̱úndó ña̱ va̱ʼa keʼéndó ndiʼi ña̱ ke̱ʼéra. 22 Ta̱kán va̱ása níki̱ʼvira ku̱a̱chi ta va̱ása níka̱ʼa̱nra nda̱a̱ ni iin ña̱ vatá. 23 Tá ni̱ka̱ʼa̱n-ndi̱va̱ʼana xíʼinra va̱ása níka̱ʼa̱n-ndi̱va̱ʼara xíʼinna, tá sa̱xóʼvi̱nara va̱ása níka̱ʼa̱nra ña̱ saá keʼéra xíʼinna, nu̱úka ña̱yóʼo sa̱ndákoora ndiʼiña ndaʼa̱ ta̱ nda̱kúní ndátiin ku̱a̱chi. 24 Miíra nda̱kiʼin ku̱a̱chiyó tá xi̱tikaara ndaʼa̱ yitu̱n ña̱ va̱ʼa nda̱a̱ táki̱ʼva koo na̱ kuvi saá kooyó xa̱ʼa̱ ku̱a̱chiyó, soo kutakuyó ña̱ keʼéyó ña̱ nda̱kú. Ta “xa̱ʼa̱ ña̱ tu̱kue̱ʼe̱ra* ndóʼó ni̱xa̱a̱ndó nda̱ʼandó”. 25 Saáchi ndóʼó nda̱a̱ táki̱ʼva íyo ndikachi* tí nda̱ñúʼu saá íyondó, soo vitin ndi̱kóndó nu̱ú ta̱ ndáa ndóʼó, ta̱ kíʼin kuenta xíʼinndó.

3 Ta saátu ndóʼó ná xa̱a̱ ti̱ndaʼa̱, kundiku̱nndó ña̱ káʼa̱n yiíndó xíʼinndó. Chi tá va̱ása kándíxara ña̱ káʼa̱n tu̱ʼun Ndióxi̱, kiviva xa̱a̱ra kandíxaraña xa̱ʼa̱ ña̱ viíní íyo ña̱ kéʼéndó ta va̱ása xíniñúʼuví ka̱ʼa̱nndó nda̱a̱ ni iin ña̱ʼa xíʼinra, 2 chi miíra kuni nu̱úra ña̱ viíní íyo ña̱ kéʼéndó ta saátu ña̱ íxato̱ʼóníndóra. 3 Ña̱ va̱ʼa livi kuna̱ʼa̱ ndóʼó ná ñaʼá, kǒo kundi̱ʼi̱ní-inindó xa̱ʼa̱ ndáa ki̱ʼva koo lazo ña̱ katúnndó xi̱níndó ni ña̱ kuniñúʼundó oro á ña̱ kundixindó ti̱ko̱to̱ ña̱ yaʼviní, 4 va̱ʼaka ña̱ ná ndasalivi ndóʼó ná koo ña̱ ndíka̱a̱ níma̱ndó, ña̱ kúee íyo inindó xíʼin ña̱ vitá íyo inindó, chi ña̱yóʼo kúú ña̱ ndáyáʼviníka nu̱ú Ndióxi̱ ta va̱ása ndíʼi-xa̱ʼa̱ña. 5 Saáchi ña̱yóʼo kúú ña̱ xi̱ndasalivi ná ñaʼá ná xi̱ndoo tiempo xi̱naʼá, nákán va̱ʼaní xi̱ndasakáʼnu Ndióxi̱ ta xi̱ndaa-ininára ta saátu va̱ʼaní xi̱ndiku̱nná ña̱ xi̱ka̱ʼa̱n yiíná, 6 nda̱a̱ táki̱ʼva xi̱kandíxa ñá Sara ña̱ xi̱ka̱ʼa̱n ta̱ Abrahán xíʼinñá ta xi̱ka̱ʼa̱nñá xíʼinra táta.* Ndóʼó kúúndó se̱ʼe ñákán tá ndákundeéndó kéʼéndó ña̱ va̱ʼa ta va̱ása yíʼvindó.

7 Saátu xíniñúʼu keʼé ndóʼó na̱ ta̱a na̱ xa̱a̱ ti̱ndaʼa̱, viíní xíniñúʼu keʼéndó xíʼin ñá síʼindó.* Ixato̱ʼóníndóñá ta kiʼinníndó kuenta xíʼinñá nda̱a̱ táki̱ʼva keʼéndó xíʼin iin ña̱ʼa ña̱ yi̱i̱ní saáchi ni̱ʼítu ñáyóʼo ña̱ kutakuñá xíʼinndó xa̱ʼa̱ ña̱ va̱ʼaní-ini Ndióxi̱, tá ná kǒo keʼéndó ña̱yóʼo va̱ása kuniso̱ʼo Ndióxi̱ ña̱ ka̱ʼa̱nndó xíʼinra.

8 Inkáchi ná koo ki̱ʼva ña̱ ndákanixi̱níndó ta na̱ʼa̱ndó ña̱ kúnda̱a̱-inindó xíʼin ña̱ ndóʼo inkana, kuʼvi̱-inindó kunindóna nda̱a̱ táki̱ʼva kúʼvi̱-inindó xínindó na̱ veʼendó, kundáʼvi-inindó kunindóna ta vitá koo inindó. 9 Tá kéʼéna ña̱ va̱ása va̱ʼa xíʼinndó va̱ása keʼéndó saá xíʼinna, tá káʼa̱n-ndi̱va̱ʼana xíʼinndó va̱ása ka̱ʼa̱n-ndi̱va̱ʼandó xíʼinna, nu̱úka ña̱yóʼo keʼéndó ña̱ va̱ʼa xíʼinna. Saáchi xa̱ʼa̱ ña̱yóʼo kúú ña̱ nda̱kaxin Ndióxi̱ ndóʼó ña̱ ndakiʼinndó iin ña̱ va̱ʼaní.*

10 Saáchi “na̱ chíndayáʼviní ña̱ tákuna ta kúni̱na si̱í koona, xíniñúʼu kiʼinnína kuenta xíʼin yuʼúna ña̱ va̱ʼa kǒo ka̱ʼa̱nna ña̱ va̱ása va̱ʼa ta kǒo sandáʼvina inkana. 11 Ná kuxíkána nu̱ú ña̱ va̱ása va̱ʼa ta ná keʼéna ña̱ va̱ʼa, ná chika̱a̱na ndee̱ ña̱ viíní kutáʼanna xíʼin inkana. 12 Chi Jehová* xítora na̱ kéʼé ña̱ nda̱kú ta xíniso̱ʼora ña̱ káʼa̱nna, soo Jehová* kúndasíra xínira na̱ kéʼé ña̱ va̱ása va̱ʼa”.

13 Saáchi, ¿ndáana ixandi̱va̱ʼa xíʼinndó tá kúni̱níndó keʼéndó ña̱ va̱ʼa? 14 Soo ni ná xo̱ʼvi̱vandó xa̱ʼa̱ ña̱ kéʼéndó ña̱ nda̱kú, kusi̱íva-inindó. Va̱ása yi̱ʼvíndó nu̱ú ña̱ yíʼvi na̱kán* ta ni kǒo kundi̱ʼi̱-inindó. 15 Nu̱úka ña̱yóʼo, xíʼin ndiʼi níma̱ndó xíniñúʼu ndakunindó ña̱ kúú ta̱ Cristo tátayó ta xíniñúʼu ixato̱ʼóyóra. Saátu koo tu̱ʼvaníndó ña̱ ndakuiinndó yuʼú na̱ ndáka̱tu̱ʼun ndóʼó xa̱ʼa̱ ña̱ kándíxandó soo vitání koo inindó ndakuiinndó yuʼúna ta xíʼin ña̱ to̱ʼó keʼéndóña.

16 Va̱ʼaní ná koo ña̱ kéʼéndó tasaá viíní koo ña̱ xínitúni̱ndó nu̱ú Ndióxi̱, ta nda̱a̱ ndáaka ña̱ ná ka̱ʼa̱nna xa̱ʼa̱ndó, miína ná kukaʼan nu̱ú xa̱ʼa̱ ña̱ va̱ʼaní kéʼéndó chi kúúndó na̱ ndíku̱n ta̱ Cristo. 17 Saáchi va̱ʼaka kúú ña̱ xo̱ʼvi̱yó xa̱ʼa̱ ña̱ kéʼéyó ña̱ va̱ʼa tá ña̱yóʼo kúú ña̱ kúni̱ mií Ndióxi̱, nu̱úka ña̱ xo̱ʼvi̱yó xa̱ʼa̱ ña̱ kéʼéyó ña̱ va̱ása va̱ʼa. 18 Saáchi ta̱ Cristo iin kuití yichi̱ ni̱xi̱ʼi̱ra xa̱ʼa̱ ku̱a̱chiyó ta va̱ása ndikókara keʼéra ña̱yóʼo, iin ta̱ nda̱kú-ini ni̱xi̱ʼi̱ra xa̱ʼa̱ na̱ va̱ása nda̱kú-ini, ña̱ va̱ʼa ku̱ʼu̱nndó xíʼinra nu̱ú Ndióxi̱, iin na̱ yiví xi̱kuura tá xa̱ʼnínara soo nda̱takura ña̱ koora chí ndiví. 19 Saáchi iin espíritu kúúra tá ni̱xa̱ʼa̱nra ni̱ka̱ʼa̱nra xíʼin na̱ ángel na̱ ñúʼu veʼeka̱a ña̱ ndatiinna ku̱a̱chi xíʼinna, 20 chi na̱yóʼo va̱ása níxiinna kandíxana ña̱ ni̱ka̱ʼa̱n Ndióxi̱ xíʼinna tá tiempo ta̱ Noé, tiempo saá kúeení ni̱xi̱yo ini Ndióxi̱ xi̱ndatura nani kúva̱ʼa tú arca ta loʼo kuití kúú na̱ yiví ni̱ka̱ku, u̱na̱ kuití xi̱kuuna* ta va̱ása níxi̱ʼi̱na xíʼin ti̱kui̱í.

21 Ta ña̱ ku̱u yóʼo kítáʼanña xíʼin ña̱ ndákuchindó chi ña̱yóʼo kúú ña̱ sakǎku ndóʼó vitin xa̱ʼa̱ ña̱ nda̱taku ta̱ Jesucristo (ña̱ ndákuchindó kǒo kúni̱ kachiña ña̱ kíndaaña ña̱ yaku̱a̱ ña̱ kúúmií ku̱ñundó chi ña̱ xíniñúʼu keʼéndó kúú ña̱ ka̱ʼa̱nndó xíʼin Ndióxi̱ ña̱ viíní ná koo ña̱ xínitúni̱ndó). 22 Ta̱kán íyora chí ndaʼa̱ kúaʼa Ndióxi̱ saáchi ku̱a̱ʼa̱nra chí ndiví ta na̱ ángel xíʼin nda̱a̱ ndáaka na̱ kúúmií ndee̱ ndíku̱nna ña̱ káʼa̱nra.

4 Xa̱ʼa̱ ña̱ ni̱xo̱ʼvi̱ ta̱ Cristo tá xi̱kuura iin na̱ yiví, saátu ndóʼó xíniñúʼu ndakundeéndó ndakanixi̱níndó nda̱a̱ táki̱ʼva ndákanixi̱ní ta̱yóʼo. Chi na̱ yiví na̱ ni̱xo̱ʼvi̱ va̱ása kíʼvikana ku̱a̱chi, 2 ña̱kán tiempo ña̱ kíndo̱o nu̱úna kutakuna va̱ása xíniñúʼunaña ña̱ keʼéna ña̱ kútóo na̱ ñuyǐví yóʼo, chi xíniñúʼunaña ña̱ keʼéna ña̱ kúni̱ Ndióxi̱. 3 Saáchi xa̱a̱ ku̱a̱ʼání tiempo kúú ña̱ ke̱ʼéndó ña̱ kúni̱ na̱ ñuyǐví yóʼo, xi̱keʼéndó ña̱ kini ña̱ kéʼé na̱ kǒo kúkaʼan nu̱ú,* xi̱kutóondó keʼéndó ña̱ʼa ña̱ va̱ása va̱ʼa, ku̱a̱ʼání ndixi xi̱xiʼindó, xi̱xa̱ʼa̱nndó vikó nu̱ú kininí kéʼéna, xi̱xa̱ʼa̱nndó vikó nu̱ú ku̱a̱ʼání ndixi xíʼina ta xi̱ndasakáʼnundó ña̱ʼa ña̱ va̱ása va̱ʼa ña̱ kǒo xíniñúʼu ndasakáʼnundó. 4 Ta na̱kán ndákanda̱ní-inina xa̱ʼa̱ ña̱ va̱ása kítáʼankandó xíʼinna ña̱ keʼéndó ña̱ va̱ása va̱ʼa, xa̱ʼa̱ ña̱yóʼo káʼa̱nna ña̱ va̱ása va̱ʼa xa̱ʼa̱ndó. 5 Soo ta̱ íyo tu̱ʼva ña̱ ndatiinra ku̱a̱chi xíʼin na̱ táku ta saátu xíʼin na̱ ni̱xi̱ʼi̱, ta̱kán kúú ta̱ ndatiin ku̱a̱chi xíʼin na̱ yiví yóʼo. 6 Xa̱ʼa̱ ña̱kán kúú ña̱ na̱túʼunna xa̱ʼa̱ tu̱ʼun va̱ʼa xíʼin na̱ ni̱xi̱ʼi̱,* ña̱kán ni ndátiinna ku̱a̱chi xíʼin na̱yóʼo nda̱a̱ táki̱ʼva ndátiinna ku̱a̱chi xíʼin na̱ yiví, kiviva chindeétáʼan espíritu santo xíʼinna ña̱ va̱ʼa kunda̱a̱-inina ndáa ki̱ʼva kutakuna.

7 Soo xa̱a̱ ku̱yatinní ndiʼi-xa̱ʼa̱ ndiʼi ña̱ʼa, xa̱ʼa̱ ña̱kán viíní ndakanixi̱níndó ta kǒo sandákoondó ña̱ ka̱ʼa̱nndó xíʼin Ndióxi̱. 8 Soo mií ña̱ ndáyáʼvika kúú ña̱ kuʼvi̱ní-inindó kunitáʼanndó, saáchi na̱ kúʼvi̱-ini xíni inkana ndiʼi tiempo íyo tu̱ʼvana ña̱ koo káʼnu-inina xa̱ʼa̱ táʼanna. 9 Va̱ʼaní koo inindó xíʼin táʼanndó ta va̱ása ka̱ʼa̱n kúáchindó. 10 Xa̱ʼa̱ ña̱ kúúndó na̱ káchíñu nu̱ú Ndióxi̱, xa̱a̱ síín síín íyo ki̱ʼva ña̱ ni̱na̱ʼa̱ra ña̱ va̱ʼaní-inira xíʼinndó, ña̱kán viíní keʼéndó chiñu ña̱ ta̱xira ndaʼa̱ndó ña̱ va̱ʼa chindeétáʼanndó xíʼin inkana. 11 Tá íyo iin ndóʼó na̱ xíni̱ní ka̱ʼa̱n, ka̱ʼa̱nndó xa̱ʼa̱ ña̱ káʼa̱n Ndióxi̱, ta tá íyo iin ndóʼó na̱ chíndeétáʼan xíʼin inkana, na̱ʼa̱ndó ña̱ xíniñúʼundó ndee̱ ña̱ táxi Ndióxi̱ ña̱ va̱ʼa keʼéndó ña̱yóʼo. Chi saá nda̱a̱ ndáaka ña̱ kéʼéndó ndasakáʼnundó Ndióxi̱ xa̱ʼa̱ ña̱ chíndeétáʼan ta̱ Jesucristo xíʼinndó. Ndióxi̱ kúúmiíníra ndee̱ ta xíniñúʼu ndukáʼnura ndiʼi tiempo. Saá koo.

12 Ndóʼó na̱ kúʼvi̱ní-inii̱ xínii̱, va̱ása ndakanda̱-inindó* tá yáʼandó nu̱ú tu̱ndóʼo ña̱ yo̱ʼvi̱ní ña̱ íyo nda̱a̱ táki̱ʼva íyo ñuʼu̱. 13 Nu̱úka ña̱yóʼo kusi̱íní-inindó tá xóʼvi̱ndó nda̱a̱ táki̱ʼva ni̱xo̱ʼvi̱ ta̱ Cristo, chi saá kúú ña̱ kusi̱í-inindó tá ná na̱ʼa̱ra ndee̱ ña̱ kúúmiíra. 14 Tá káʼa̱n-ndi̱va̱ʼana xíʼinndó* xa̱ʼa̱ ña̱ ndíku̱nndó ta̱ Cristo kúsi̱íva-inindó, saáchi kúúmiíndó espíritu santo Ndióxi̱, espíritu ña̱ va̱ʼaní.

15 Tá xóʼvi̱ndó, ná va̱ása xo̱ʼvi̱ndó xa̱ʼa̱ ña̱ kúúndó na̱ xáʼní, á xa̱ʼa̱ ña̱ kúúndó na̱ kui̱ʼná, á xa̱ʼa̱ ña̱ kéʼéndó ña̱ʼa ña̱ va̱ása va̱ʼa, á xa̱ʼa̱ ña̱ kíʼvi niʼnindó xíʼin ña̱ kéʼé inkana.* 16 Soo tá xóʼvi̱ndó xa̱ʼa̱ ña̱ ndíku̱nndó ta̱ Cristo kǒo kukaʼan nu̱úndó; va̱ʼaka ndasakáʼnundó Ndióxi̱ xa̱ʼa̱ ña̱ kéʼéndó nda̱a̱ táki̱ʼva kéʼé na̱ ndíku̱n ta̱ Cristo. 17 Saáchi vitin kúú tiempo ña̱ nda̱kaxin Ndióxi̱ ña̱ ndatiinra ku̱a̱chi xíʼin na̱ yiví. Ta na̱ siʼnaka kixáʼara ndatiinra ku̱a̱chi xíʼin kúú na̱ ñuura. Soo tá siʼnaka miíyó ná ndatiinra ku̱a̱chi xíʼin, ¿ndáaña kundoʼo na̱ va̱ása xíín kuniso̱ʼo tu̱ʼun va̱ʼa* xa̱ʼa̱ Ndióxi̱? 18 “Tá yo̱ʼvi̱ní ka̱ku na̱ yiví na̱ nda̱kú-ini, ¿ndáaña kundoʼo na̱ yiví na̱ kǒo íxato̱ʼó Ndióxi̱ ta saátu na̱ kíʼvi ku̱a̱chi?”. 19 Ña̱kán na̱ xóʼvi̱ xa̱ʼa̱ ña̱ kéʼéna ña̱ kúni̱ Ndióxi̱ ta̱ i̱xava̱ʼa miíyó, ná ndakundeéna keʼéna ña̱ va̱ʼa ta ná kundaaní-ininara chi ta̱kán nda̱kúní-inira.

5 Ña̱kán, xa̱ʼa̱ ña̱ kúútu yi̱ʼi̱va anciano ta xi̱nii̱ ndiʼi ña̱ ni̱xo̱ʼvi̱ ta̱ Cristo, ta saátu yi̱ʼi̱ ndakiʼi̱n ña̱ va̱ʼa ña̱ ndakiʼin na̱ nda̱kaxin Ndióxi̱ tá ná ndukáʼnuna. Ña̱yóʼo kúú ña̱ káʼi̱n xíʼin na̱ anciano na̱ ñúʼu xíʼinndó: 2 kundaandó na̱ congregación na̱ kúú ndikachi* sa̱na̱ Ndióxi̱ na̱ ta̱xira ndaʼa̱ndó ta kiʼinníndó kuenta xíʼinna. Va̱ása keʼéndóña xíʼin ña̱ ndúxa, va̱ʼaka xíʼin ndinuʼu-inindó keʼéndóña nu̱ú Ndióxi̱ ta ni va̱ása keʼéndóña xa̱ʼa̱ ña̱ kútóoníndó kuumiíndó ku̱a̱ʼání ña̱ʼa, va̱ʼaka xíʼin ña̱ si̱í-ini keʼéndóña, 3 ta ni va̱ása kuni̱ndó kaʼndachíñundó nu̱ú na̱ ta̱xira ndaʼa̱ndó kundaandó,* chi ña̱ xíniñúʼu keʼéndó kúú ña̱ chinúundó yichi̱ nu̱ú na̱ kúú ndikachi sa̱na̱ Ndióxi̱. 4 Ta tá ná kixi ta̱ pastor káʼnu, ndóʼó ndakiʼinndó iin ña̱ va̱ʼaní* ña̱ va̱ása ndíʼi-xa̱ʼa̱.

5 Ta saátu ndóʼó na̱ ta̱a na̱ válíka, kundiku̱nndó ña̱ káʼa̱n na̱ ta̱a na̱ xa̱a̱ chéeka nu̱úndó.* Ndiʼi ndóʼó vitání koo inindó xíʼin táʼanndó chi Ndióxi̱ kúndasíra xínira ña̱ kéʼé na̱ ni̱nuní kúni* soo va̱ʼa-inira xíʼin na̱ vitá-ini.

6 Ña̱kán, vitání koo inindó nu̱ú Ndióxi̱ ta̱ íyoní ndee̱* ña̱ va̱ʼa taxira ña̱ ndukáʼnundó tá ná kixaa̱ mií tiempo, 7 ta sandákoondó ndiʼi ña̱ sándi̱ʼi̱-inindó ndaʼa̱ Ndióxi̱, chi ta̱yóʼo ndíʼi̱ní-inira xa̱ʼa̱ndó. 8 Ndíchiní koondó ta kiʼinníndó kuenta chi ta̱ Ndi̱va̱ʼa sáa̱ní-inira xínira ndóʼó, ta nda̱a̱ táki̱ʼva kéʼé tí ndikaʼa* tí ndúkue̱ʼe̱ní ta ndúkúrí ña̱ʼa ña̱ kaxírí saá kéʼéra, ta káva̱ndura xíkara nu̱ú íyondó. 9 Soo ndakúní koo inindó kandíxandó Ndióxi̱ ta kǒo keʼéndó ña̱ kúni̱ ta̱ Ndi̱va̱ʼa, chi kúnda̱a̱va-inindó ña̱ ndiʼi na̱ inkáchi kítáʼan ndásakáʼnu Ndióxi̱ xíʼinyó yáʼana nu̱ú táʼan tu̱ndóʼo ña̱ yáʼa miíndó nu̱ú. 10 Tá xa̱a̱ ni̱xo̱ʼvi̱ndó loʼo tiempo, mií Ndióxi̱ ta̱ va̱ʼaní-ini, ta̱ ka̱na ndóʼó ña̱ kutáʼanndó xíʼin ta̱ Cristo ta saátu ña̱ ndukáʼnundó ndiʼi tiempo, miíra sanáʼa̱ ndóʼó nda̱a̱ ná xa̱a̱ndó koo tu̱ʼvandó, miíra taxi ndee̱ ndaʼa̱ndó, miíra chindeétáʼan xíʼinndó ña̱ nda̱kú koo inindó ta chindeétáʼanra xíʼinndó ña̱ kútu̱ní* kunditandó. 11 Miíra kúú ta̱ kúúmií ndee̱ ndiʼi tiempo. Saá koo.

12 Ñaniyó ta̱ Silvano,* iin ta̱ nda̱kúní-ini kúú ta̱yóʼo ta chi̱ndeétáʼanra xíʼi̱n ña̱ ka̱ʼyíi̱ carta yóʼo nu̱úndó. Loʼo kuitíva kúú ña̱ ka̱ʼyíi̱ nu̱úndó, soo ka̱ʼyíi̱ña ku̱xa̱a̱ nu̱úndó ña̱ va̱ʼa chika̱a̱ña ndee̱ xíʼinndó, ta saátu ña̱ kunda̱a̱-inindó ña̱ va̱ʼaní-ini Ndióxi̱ xíʼinndó ta kǒo nandósó-inindó xa̱ʼa̱ ña̱yóʼo. 13 Ñá* íyo chí Babilonia chíndeéñá ndóʼó,* ñá nda̱kaxin Ndióxi̱ nda̱a̱ táki̱ʼva íyo ndóʼó, ta saátu ta̱ Marcos ta̱ íyo nda̱a̱ táki̱ʼva íyo se̱ʼe miíi̱. 14 Viíní ndakiʼinndó inkana ta numindóna.*

Va̱ʼaní ná kundoo ndiʼi ndóʼó na̱ ndíku̱n ta̱ Cristo.