SEGUNDA ÑA̱ PEDRO

1 Yi̱ʼi̱ ta̱ Simón Pedro, kúi̱ apóstol ta̱ Jesucristo ta káchíñui̱ nu̱úra, ta káʼyíi̱ ña̱yóʼo ku̱xa̱a̱ nu̱úndó, chi xa̱ʼa̱ ña̱ nda̱kúní-ini Ndióxi̱ ta saátu ta̱ sáka̱ku miíyó ta̱ Jesucristo, ndóʼó ni̱xa̱a̱ndó ka̱ndíxandó ña̱ nda̱a̱, nda̱a̱ táki̱ʼva kéʼé miíndi̱:

2 Va̱ʼaní ná koo ini Ndióxi̱ xíʼinndó ta viíní ná kutáʼanndó xíʼinra xa̱ʼa̱ ña̱ ni̱xa̱a̱ndó na̱kunda̱a̱ va̱ʼa inindó xa̱ʼa̱ra ta saátu xa̱ʼa̱ tátayó Jesús, 3 saáchi mií ndee̱ Ndióxi̱ chi̱ndeétáʼan xíʼinyó ña̱ va̱ʼa nda̱kiʼinyó* ndiʼi ña̱ xíniñúʼuyó ta kuniñúʼuyó ña̱ tákuyó ña̱ ndasakáʼnuyóra. Nda̱kiʼinyó ndiʼi ña̱yóʼo saáchi sa̱kuaʼa va̱ʼayó xa̱ʼa̱ Ndióxi̱. Miíra kúú ta̱ ka̱na miíyó xa̱ʼa̱ ña̱ kúúra Ndióxi̱ káʼnu ta va̱ʼaní-inira. 4 Ta xa̱ʼa̱ ña̱yóʼo kúú ña̱ ki̱ndoora taxira* ña̱ ndáyáʼviní ndaʼa̱yó, ña̱ va̱ʼaní íyo, ta xa̱ʼa̱ ña̱ ki̱ndoo Ndióxi̱ kivi xa̱a̱ndó koondó iin espíritu nda̱a̱ táki̱ʼva íyo miíra, saáchi xa̱a̱ sa̱ndákoondó ña̱ kini ña̱ kútóoní na̱ ñuyǐví yóʼo keʼéna.

5 Xa̱ʼa̱ ña̱kán, chika̱a̱níndó ndee̱ ña̱ kandíxandó Ndióxi̱ ta keʼéndó ña̱ va̱ʼa; chika̱a̱níndó ndee̱ ña̱ sakúaʼa va̱ʼandó; 6 ta saátu ña̱ ka̱ʼnu̱-inindó; chika̱a̱níndó ndee̱ ña̱ kundeé-inindó; ta saátu ña̱ nda̱kú koo inindó xíʼin Ndióxi̱; 7 chika̱a̱níndó ndee̱ ña̱ kuʼvi̱-inindó kunindó ndiʼi na̱ hermano; ta saátu ña̱ kuʼvi̱-inindó kunindó ndiʼi na̱ yiví. 8 Tá ndákundeéndó kéʼéndó ña̱yóʼo, ña̱ sa̱kuaʼa va̱ʼandó xa̱ʼa̱ tátayó Jesucristo chindeétáʼanña xíʼinndó ña̱ ndakundeéndó kuaʼnundó ta va̱ása koondó nda̱a̱ táki̱ʼva íyo iin yitu̱n tú kǒo ku̱i̱ʼi táxi.

9 Ndiʼi na̱ kǒo kéʼé ña̱yóʼo nda̱a̱ táki̱ʼva íyo na̱ kúáa* saá íyona ta ndákasina nu̱úna ña̱ va̱ása kotona nu̱ú íyo luz, ta nándósó-inina ña̱ xa̱a̱ ndo̱o ku̱a̱china ña̱ ni̱ki̱ʼvina tá ya̱chi̱. 10 Xa̱ʼa̱ ña̱kán ñaniyó, chika̱a̱níndó ndee̱ ña̱ nda̱kú koo inindó xa̱ʼa̱ ña̱ kúúndó na̱ nda̱kaxin Ndióxi̱ ta ka̱nara ndóʼó, saáchi tá ná ndakundeéndó keʼéndó ña̱yóʼo nda̱a̱ ni iin yichi̱ va̱ása sandákoondó kandíxandó Ndióxi̱. 11 Tá kéʼéndó ña̱yóʼo ndakiʼinndó iin bendición ña̱ va̱ʼaní, ña̱ koondó ti̱xin Reino ña̱ íyo ndiʼi tiempo ña̱ kúú kuenta tátayó Jesucristo ta̱ sáka̱ku miíyó.

12 Xa̱ʼa̱ ña̱kán, ndiʼi tiempo kúni̱i̱ sandákaʼíi̱n ndóʼó xa̱ʼa̱ ña̱yóʼo ni xa̱a̱ kúnda̱a̱va-inindó xa̱ʼa̱ña ta kándíxaníndó ña̱ nda̱a̱ ña̱ sa̱kuaʼandó. 13 Soo ña̱ va̱ʼava kúú ña̱ sándakaʼán tukui̱ ndóʼó xa̱ʼa̱ ña̱yóʼo nanika tákui̱ ini ku̱ñu* yóʼo, 14 saáchi kúnda̱a̱-inii̱ ña̱ ndáa si̱lóʼova tiempo kutakui̱ ti̱xin ku̱ñu* yóʼo nda̱a̱ táki̱ʼva na̱kunda̱a̱-inii̱ i̱xaa tátayó Jesucristo. 15 Chika̱a̱níi̱ ndee̱ ña̱ va̱ʼa tá xa̱a̱ ná kǒokai̱ koo xíʼinndó kuchiñu miívandó ndakaʼánndó xa̱ʼa̱ ndiʼi ña̱yóʼo.

16 Tá na̱túʼunndi̱ xíʼinndó xa̱ʼa̱ ndee̱ ña̱ kúúmií tátayó Jesucristo ta saátu xa̱ʼa̱ tiempo tá xa̱a̱ ná koora* xíʼinyó, su̱ví cuento vatá ña̱ káʼa̱n na̱ yiví kúú ña̱ níxiniñúʼundi̱ ña̱ ka̱ʼa̱nndi̱ xíʼinndó xa̱ʼa̱ ña̱yóʼo, chi xi̱ni nu̱ú miívandi̱ ña̱ kúúmiíníra ña̱ káʼnu. 17 Saáchi ndu̱káʼnuní ta̱yóʼo i̱xaa yiváyó Ndióxi̱, tá ni̱ka̱ʼa̱n mií Ndióxi̱ ta̱ kúúmií ña̱ káʼnu tu̱ʼun yóʼo: “Ta̱yóʼo kúú se̱ʼi̱ ta̱ kúʼvi̱ní-inii̱ xínii̱; ta̱ sákusi̱í-inii̱”. 18 Saá íyoña, ndi̱ʼi̱ kúú na̱ xi̱niso̱ʼo tu̱ʼun ña̱ ki̱xi chí ndiví tá ñúʼundi̱ xíʼinra chí yuku̱* ña̱ yi̱i̱.

19 Ña̱kán kándíxaníndi̱ ña̱ ndiʼi ña̱ ni̱ka̱ʼa̱n Ndióxi̱ xi̱nuvaña. Ndóʼó va̱ʼaní kuniso̱ʼondó ña̱yóʼo. Ndiʼi tu̱ʼun yóʼo nda̱a̱ táki̱ʼva íyo iin lámpara ña̱ túun nu̱ú naá saá xíniñúʼu kooña níma̱ndó. Ndakundeéndó keʼéndó ndiʼi ña̱yóʼo nda̱a̱ tá ná tu̱vi ta kana tí ki̱mi. 20 Saáchi ndóʼó kúnda̱a̱va-inindó, ndiʼi ña̱ ni̱ka̱ʼa̱n na̱ profeta ña̱ va̱xi nu̱ú tu̱ʼun Ndióxi̱ su̱ví xi̱ní na̱ yiví níkanaña. 21 Saáchi ndiʼi ña̱ ni̱ka̱ʼa̱n na̱ profeta ña̱ ni̱ka̱ʼyi̱ nu̱ú tu̱ʼun Ndióxi̱ va̱ása níka̱ʼyi̱ña xa̱ʼa̱ ña̱ xi̱kuni̱ mií na̱ yiví, saáchi Ndióxi̱ kúú ta̱ xi̱niñúʼu espíritu santora ña̱ va̱ʼa chindeétáʼanra xíʼin na̱ yiví ña̱ va̱ʼa ka̱ʼa̱nna xa̱ʼa̱ña.

2 Saáchi nda̱a̱ táki̱ʼva ni̱xi̱yo na̱ profeta vatá ti̱xin na̱ ñuu Ndióxi̱ tá tiempo xi̱naʼá, saátu vitinva sava na̱ kítáʼan xíʼinndó kúú na̱ kixáʼa sanáʼa̱ ña̱ vatá.* Na̱yóʼo kixáʼana sanáʼa̱na ña̱ vatá chi kuni̱na ña̱ ná sandákoondó ña̱ kandíxandó Ndióxi̱, keʼé se̱ʼéna ña̱yóʼo ta kundasína kunina ta̱ nda̱satáñaʼá* ta xa̱ʼa̱ ña̱ keʼéna ña̱yóʼo kamaní ndiʼi-xa̱ʼa̱na. 2 Ta ku̱a̱ʼánína kixáʼana keʼéna ña̱ kini ña̱ kǒo kúkaʼan nu̱úna xíʼin* nda̱a̱ táki̱ʼva kéʼé na̱ yiví yóʼo. Xa̱ʼa̱ ña̱ kéʼéna ña̱yóʼo kixáʼa inkana ka̱ʼa̱nna ña̱ va̱ása va̱ʼa xa̱ʼa̱ yichi̱ Ndióxi̱. 3 Ta xa̱ʼa̱ ña̱ kúni̱na kuumiína ku̱a̱ʼání ña̱ʼa, ka̱ʼa̱nna ña̱ vatá ña̱ kuni̱na sandáʼvina ndóʼó. Soo xa̱a̱ ya̱chi̱kaví ni̱ka̱ʼa̱n Ndióxi̱ ña̱ ndatiinra ku̱a̱chi xíʼin na̱yóʼo ta na̱ ndiʼi-xa̱ʼa̱ kúúvana.

4 Saáchi Ndióxi̱ ta̱xivara castigo ndaʼa̱ na̱ ángel na̱ ni̱ki̱ʼvi ku̱a̱chi ta chi̱ka̱a̱rana ini ña̱ Tártaro* ta ka̱túnrana xíʼin cadena ta ta̱ánrana nu̱ú naání, nani ndátuna ña̱ ndatiinra ku̱a̱chi xíʼinna. 5 Ta saátu ta̱xira castigo ndaʼa̱ na̱ ñuyǐví na̱ xi̱ndoo xi̱naʼá, soo sa̱kǎkura ta̱ Noé ta̱ nda̱kúní ni̱xi̱yo ini na̱túʼun xa̱ʼa̱ Ndióxi̱, sa̱kǎkurara xíʼin inka u̱xa̱ na̱ yiví tá ku̱un sa̱vi̱ kini sa̱tá na̱ yiví na̱ kǒo íxato̱ʼó Ndióxi̱. 6 Ta sa̱ndíʼi-xa̱ʼa̱ra ñuu Sodoma xíʼin Gomorra nda̱a̱ ni̱xa̱a̱ña ndu̱uña ya̱a̱ ta nda̱tiinra ku̱a̱chi xíʼin ñuu yóʼo, ke̱ʼéra ña̱yóʼo ña̱ va̱ʼa na̱ʼa̱ra nu̱ú na̱ yiví na̱ kǒo íxato̱ʼó-ñaʼá ndáaña kuu chí nu̱únínu. 7 Ta saátu sa̱kǎkura ta̱ Lot iin ta̱a ta̱ nda̱kúní-ini chi ta̱yóʼo kǒo níkundeéka-inira xíʼin ña̱ xi̱keʼé na̱ yiví na̱ ndi̱va̱ʼaní-ini,* chi xi̱keʼéna ña̱ kǒo kúkaʼan nu̱úna xíʼin,* 8 saáchi ndiʼi ki̱vi̱, ta̱ Lot ta̱ nda̱kúní ni̱xi̱yo ini, xi̱xoʼvi̱níra xa̱ʼa̱ ndiʼi ña̱ʼa ña̱ va̱ása va̱ʼa ña̱ xi̱xinira xi̱keʼéna ta saátu ña̱ xi̱xiniso̱ʼora xa̱ʼa̱ tá ni̱xi̱yora ñuu kán. 9 Saáchi Jehová* sáka̱kuvara na̱ ndixaní kándíxa miíra tá yáʼana nu̱ú tu̱ndóʼo, ta na̱ va̱ása kéʼé ña̱ nda̱kú ndátuna ndiʼi-xa̱ʼa̱na tá ná kixaa̱ ki̱vi̱ ña̱ ndatiinra ku̱a̱chi xíʼinna, 10 ta na̱ kundoʼo ña̱yóʼo kúú na̱ íxayaku̱a̱ ku̱ñu inkana ta kǒo íxato̱ʼóna na̱ xáʼndachíñu nu̱úna.

Xa̱ʼa̱ ña̱ kǒo kúkaʼan nu̱úna ta so̱ʼonína va̱ása yíʼvina ka̱ʼa̱n-ndi̱va̱ʼana xa̱ʼa̱ na̱ ndu̱káʼnu i̱xaa Ndióxi̱.* 11 Soo na̱ ángel, ni íyoníkava ndee̱na nu̱ú na̱ sánáʼa̱ ña̱ vatá, va̱ása nátúʼunna xa̱ʼa̱na ta ni kǒo káʼa̱n-ndi̱va̱ʼana xa̱ʼa̱na, kǒo kéʼéna ña̱yóʼo xa̱ʼa̱ ña̱ íxato̱ʼóna Jehová.* 12 Chi na̱ ta̱a yóʼo káʼa̱n-ndi̱va̱ʼana xa̱ʼa̱ ña̱ʼa ña̱ kǒo xíni̱na xa̱ʼa̱, ta íyona nda̱a̱ táki̱ʼva íyo kití tí kǒo ña̱ xínitúni̱ tí ka̱ku ña̱ tiinnarí ta kaʼnínarí. Ta xa̱ʼa̱ ña̱ kéʼéna ña̱ va̱ása va̱ʼa, ndiʼi-xa̱ʼa̱na 13 ta ndakiʼinna castigo xa̱ʼa̱ ña̱ kéʼéna ña̱ʼa ña̱ va̱ása va̱ʼa.

Kútóonína keʼéna ña̱ kúni̱ ku̱ñuna ni kúúña tá káʼñu.* Ta na̱kán kúsi̱íní-inina sánáʼa̱na ña̱ vatá tá ndákutáʼanna xíʼinndó tá íyo iin vikó, ta íyona nda̱a̱ táki̱ʼva íyo iin mancha ña̱ íxayaku̱a̱ iin ti̱ko̱to̱ ta íyotuna nda̱a̱ táki̱ʼva íyo mancha ña̱ kána nu̱ú na̱ yiví. 14 Ta na̱yóʼo kúni̱nína ku̱su̱nna xíʼin na̱ va̱ása nítindaʼa̱na xíʼin, ta va̱ása kúni̱na sandákoona ña̱ ki̱ʼvina ku̱a̱chi ta sándaʼvina na̱ loʼoní kándíxa Ndióxi̱ ta xíʼin ndiʼi níma̱na kúni̱na kuumiína ku̱a̱ʼání ña̱ʼa. Ndióxi̱ taxira castigo ndaʼa̱ na̱yóʼo. 15 Sa̱ndákoona yichi̱ nda̱kú ta inkava yichi̱ nda̱kiʼinna ku̱a̱ʼa̱nna. Ta ndíku̱nna yichi̱ ta̱ Balaam se̱ʼe ta̱ Beor, chi ta̱yóʼo ke̱ʼéra ña̱ va̱ása va̱ʼa xa̱ʼa̱ ña̱ xi̱kuni̱níra chaʼvinara, 16 ta ni̱ka̱ʼa̱nna xíʼinra* ña̱ va̱ása va̱ʼa íyo ña̱ kéʼéra. Ta iin burro, iin kití tí kǒo kívi ka̱ʼa̱n, ni̱ka̱ʼa̱nrí nda̱a̱ táki̱ʼva káʼa̱n na̱ yiví ta sa̱sirí nu̱ú ta̱ profeta yóʼo ña̱ kǒo keʼékara ña̱ kíʼvi ña̱ xi̱kuni̱ra keʼéra.

17 Ta íyona nda̱a̱ táki̱ʼva íyo iin pozo* nu̱ú kǒo ti̱kui̱í ñúʼu, ta íyotuna nda̱a̱ táki̱ʼva íyo vi̱kó núu,* ña̱ ndákiʼin ku̱a̱ʼa̱n xíʼin ta̱chí ña̱ ndeéní káni ta iin lugar nu̱ú naání ku̱ʼu̱nna. 18 Ni̱nuní kúnina* xíʼin ña̱ káʼa̱nna soo ña̱yóʼo ni loʼo va̱ása ndáyáʼviña. Kéʼéna ña̱ kǒo kúkaʼan nu̱úna xíʼin* ta sáxi̱nu̱na-ini* na̱ yiví ña̱ keʼé tukuna ña̱ va̱ása va̱ʼa, sándaʼvinana ña̱ keʼéna ña̱ʼa ña̱ va̱ása va̱ʼa ña̱ xa̱a̱ sa̱ndákoona. 19 Na̱ maestro na̱ sánáʼa̱ ña̱ vatá yóʼo, káʼa̱nna xíʼin inkana ña̱ kivi koona na̱ yiví libre, soo mií na̱ maestro yóʼo kúúna esclavo chi ñúʼuna ndaʼa̱ ku̱a̱chi. Saáchi tá iin na̱ yiví kúchiñuna xíʼin inkana, na̱ va̱ása níkuchiñu yóʼo xáa̱na ndúuna esclavona. 20 Saá íyoña, tá iinna xa̱a̱ sa̱ndákoona ña̱ yaku̱a̱ ña̱ íyo ñuyǐví yóʼo, xa̱ʼa̱ ña̱ na̱kunda̱a̱ va̱ʼa inina xa̱ʼa̱ tátayó Jesucristo ta̱ sáka̱ku miíyó soo ndíkó tukuna kéʼéna ña̱yóʼo ta táxina ña̱ kuchiñuña xíʼinna, ndeéníka íyo ku̱a̱china vitin nu̱ú ña̱ xi̱kuumiína tá ya̱chi̱. 21 Saáchi va̱ʼaníkava kooña tá kǒo níxa̱a̱na kunda̱a̱-inina xa̱ʼa̱ yichi̱ ña̱ nda̱kú, nu̱úka ña̱ ni̱xa̱a̱na na̱kunda̱a̱-inina xa̱ʼa̱ ley Ndióxi̱ ta ku̱xíkána nu̱úña. 22 Ta ndo̱ʼona nda̱a̱ táki̱ʼva káchi tu̱ʼun yóʼo: “Tí ti̱na* ndi̱kó tukurí xa̱xírí ña̱ ndu̱xanrí, ta kini̱ tí xa̱a̱ chi̱chi ndi̱kó tukurí ni̱ki̱tarí nu̱ú nda̱ʼyi̱”.

3 Ndóʼó na̱ kúʼvi̱ní-inii̱ xínii̱, xa̱a̱ carta ña̱ u̱vi̱ kúú ña̱ káʼyíi̱ nu̱úndó, ta nda̱a̱ táki̱ʼva ke̱ʼíi̱ xíʼin ña̱ nu̱ú, tuku sándakaʼíi̱n ndóʼó ña̱ va̱ʼa viíní ná ndakanixi̱níndó, 2 ña̱ va̱ʼa ndakaʼánndó ndiʼi ña̱ ni̱ka̱ʼa̱n na̱ profeta na̱ nda̱kúní ni̱xi̱yo ini, ta saátu ña̱ ndakaʼánndó ndiʼi ña̱ sa̱náʼa̱ tátayó ta̱ sa̱kǎku miíyó, ta̱yóʼo xi̱niñúʼura na̱ apóstol* ña̱ va̱ʼa natúʼunna xa̱ʼa̱ ña̱yóʼo xíʼinndó. 3 Ta xíniñúʼu kunda̱a̱-inindó xa̱ʼa̱ ña̱yóʼo, ki̱vi̱ nu̱ú ndíʼi, koo na̱ kusi̱kindaa ña̱ va̱ʼa ta keʼéna ña̱ʼa ña̱ va̱ása va̱ʼa ña̱ kúni̱ miína, 4 ta kachina: “Ta̱kán ni̱ka̱ʼa̱nra ña̱ kixira, soo ¿nda̱chun kǒora íyo* yóʼo vitin? Saáchi nani tá ni̱xi̱ʼi̱ na̱ táʼanndi̱ na̱ xi̱ndoo tiempo xi̱naʼá, kǒo ña̱ nínasa̱maví chi nda̱a̱ táki̱ʼva íyo ñuyǐví yóʼo tá na̱kuva̱ʼaña i̱xaa Ndióxi̱ tá xa̱ʼa̱, saá íyoña vitinva”.

5 Na̱kán kǒo xíínna ndakunina ña̱yóʼo: ña̱ xa̱a̱ tiempo xi̱naʼáví kúú ña̱ na̱kuva̱ʼa ndiví, ta mií Ndióxi̱ kúú ta̱ ni̱ka̱ʼa̱n ña̱ ná ndata̱ʼví ñuʼú nu̱ú ti̱kui̱í ta kindo̱oña ma̱ʼñú ti̱kui̱í, 6 ta na̱ yiví na̱ xi̱ndoo tiempo saá, ndi̱ʼi-xa̱ʼa̱na tá chu̱tú ti̱kui̱í nu̱ú ñuʼú yóʼo. 7 Soo xa̱ʼa̱ tu̱ʼun ña̱ ni̱ka̱ʼa̱n mií Ndióxi̱, ndiví xíʼin ñuʼú ña̱ íyo tiempo vitin ña̱ kokova* kúúña tá ná ndatiinra ku̱a̱chi ta sandíʼi-xa̱ʼa̱ra na̱ yiví na̱ kǒo íxato̱ʼó-ñaʼá.

8 Ndóʼó na̱ kúʼvi̱ní-inii̱ xínii̱, kǒo nandósó-inindó xa̱ʼa̱ ña̱yóʼo: nu̱ú Jehová* iin ki̱vi̱ mil ku̱i̱ya̱ kúúña, ta mil ku̱i̱ya̱ iin ki̱vi̱ kúúña nu̱úra. 9 Ku̱a̱ʼání na̱ yiví ndákanixi̱nína ña̱ kúáchi̱ní Jehová* ña̱ saxínura ña̱ káʼa̱nra. Soo su̱ví saá íyoña, ta̱yóʼo kúee íyo inira chi kǒo kúni̱ra ña̱ ndiʼi-xa̱ʼa̱ nda̱a̱ ni iin ndóʼó, chi ña̱ kúni̱ra kúú ña̱ ná ndikó-ini ndiʼindó. 10 Soo ki̱vi̱ Jehová* kixiña nda̱a̱ táki̱ʼva kéʼé iin ta̱ kui̱ʼná. Ki̱vi̱ saá ndeéní ni̱ʼi ta ndañúʼu ndiví, ta ña̱ʼa ña̱ íyo chí ndiví ta saátu ña̱ íyo nu̱ú ñuʼú yóʼo ndutavaña xa̱ʼa̱ ña̱ ndu̱niʼníníña,* ta ñuʼú yóʼo xíʼin ña̱ʼa ña̱ íyo nu̱úña koko ndiʼiña.

11 Tá saá kúú ña̱ kundoʼo ndiʼi ña̱ʼa yóʼo, xíniñúʼu viíní ndakanixi̱níndó xa̱ʼa̱ ndiʼi ña̱ kéʼéndó. Ta saátu xíniñúʼu koondó na̱ yi̱i̱ ta na̱ʼa̱ndó xíʼin ña̱ kéʼéndó ña̱ nda̱kú íyo inindó xíʼin Ndióxi̱, 12 nani ndátundó ta íyo tu̱ʼvaníndó* ña̱ kixaa̱ ki̱vi̱ Jehová,* chi saá kúú ña̱ ndiʼi-xa̱ʼa̱ ndiví ixaa ñuʼu̱, ta ña̱ʼa ña̱ íyo chí ndiví xíʼin ña̱ íyo nu̱ú ñuʼú ndutaña xa̱ʼa̱ ña̱ niʼníní.* 13 Soo ndátuyó ña̱ kixaa̱ iin ndiví xa̱á xíʼin iin ñuʼú xa̱á nda̱a̱ táki̱ʼva ni̱ka̱ʼa̱n Ndióxi̱, ta nu̱ú ña̱yóʼo ndiʼina nina ña̱ va̱ʼa keʼéna.

14 Xa̱ʼa̱ ña̱kán, ndóʼó na̱ kúʼvi̱ní-inii̱ xínii̱, xa̱ʼa̱ ña̱ ndátundó ña̱yóʼo chika̱a̱níndó ndee̱ ña̱ viíní keʼéndó, ta kǒo nda̱a̱ ni iin ña̱ yaku̱a̱ kuumiíndó nu̱ú Ndióxi̱, ta va̱ʼaní kutáʼanndó xíʼinra. 15 Ta saátu ndakanixi̱níndó, ña̱ kúee íyo ini tátayó kúú ña̱ chíndeétáʼan xíʼinndó ña̱ ka̱kundó, nda̱a̱ táki̱ʼva ka̱ʼyí ñaniyó ta̱ Pablo nu̱úndó, ta̱ kúʼvi̱ní-iniyó xíniyó, tá nda̱kiʼinra ña̱ ndíchi. 16 Ta̱kán ni̱ka̱ʼa̱nra xa̱ʼa̱ ndiʼi ña̱yóʼo nu̱ú carta ña̱ ka̱ʼyíra. Soo na̱ kǒo ña̱ ndíchi kúúmií íxayo̱ʼvi̱níña xíʼinna ña̱ kunda̱a̱-inina xíʼin sava ña̱ káʼa̱n ña̱yóʼo ta násamana ña̱ káʼa̱nña, nda̱a̱ táki̱ʼva kéʼéna xíʼin ndiʼika ña̱ va̱xi nu̱ú tu̱ʼun Ndióxi̱, ta xa̱ʼa̱ ña̱yóʼo ndiʼi-xa̱ʼa̱vana.

17 Ndóʼó na̱ kúʼvi̱ní-inii̱ xínii̱, xa̱ʼa̱ ña̱ xa̱a̱ kúnda̱a̱-inindó xa̱ʼa̱ ña̱yóʼo, kiʼinníndó kuenta ña̱ kǒo sana-inindó xíʼin ña̱ vatá* ña̱ sánáʼa̱ na̱ kéʼé ña̱ va̱ása va̱ʼa,* chi ña̱yóʼo kivi sandákavaña ndóʼó. 18 Nu̱úka ña̱yóʼo viíní keʼéndó, ña̱ va̱ʼa na̱ʼa̱ tátayó Jesucristo ta̱ sáka̱ku miíyó ña̱ va̱ʼa-inira xíʼinndó ta chika̱a̱ndó ndee̱ ña̱ kunda̱a̱ va̱ʼa inindó xa̱ʼa̱ra. Ná ndukáʼnura vitin ta saátu ndiʼi tiempo. Saá koo.