PRIMERA ÑA̱ JUAN

1 Káʼa̱nndi̱ xíʼinndó xa̱ʼa̱ ta̱ kúúmií tu̱ʼun ña̱ táxi ña̱ kutakuyó, ta̱ íyo nda̱a̱ tá xa̱ʼa̱, ta̱ xi̱niso̱ʼondi̱ ni̱ka̱ʼa̱n, ta̱ xi̱ni nu̱úndi̱ ta xi̱nindi̱ ña̱ ke̱ʼéra, ta̱ ti̱inndi̱ xíʼin ndaʼa̱ndi̱. 2 (Viíní ni̱xa̱a̱ndi̱ na̱kunda̱a̱-inindi̱ xa̱ʼa̱ ña̱ táxi yiváyó ña̱ kutakuyó ndiʼi tiempo, ta ña̱yóʼo kúú ña̱ nátúʼunndi̱ xa̱ʼa̱ xíʼinndó). 3 Káʼa̱nndi̱ xíʼinndó xa̱ʼa̱ ta̱ xi̱niso̱ʼondi̱ ni̱ka̱ʼa̱n ta xi̱nindi̱ nu̱úra. Kéʼéndi̱ ña̱yóʼo ña̱ va̱ʼa kutáʼanndó xíʼinndi̱ chi miíndi̱ kítáʼanndi̱ xíʼin yiváyó ta saátu xíʼin se̱ʼera ta̱ Jesucristo. 4 Káʼyíndi̱ ña̱yóʼo nu̱úndó ña̱ va̱ʼa ná kusi̱íní-iniyó.

5 Ña̱yóʼo kúú ña̱ xi̱niso̱ʼondi̱ ni̱ka̱ʼa̱nra, ta nátúʼunndi̱ xa̱ʼa̱ña xíʼinndó: Ndióxi̱ kúúra luz, ta ni loʼo ña̱ naá kǒo kúúmiíra. 6 Tá káʼa̱nyó “Kítáʼanndi̱ xíʼinra” soo ndákundeéyó xíkayó nu̱ú naá,* ña̱ vatáva* kúú ña̱ káʼa̱nyó ta va̱ása ndíku̱nyó ña̱ nda̱a̱. 7 Miíra íyora nu̱ú íyo luz, ta miíyó tá xíkayó nu̱ú íyo luz* va̱ʼaní kítáʼanyó ta ni̱i̱ se̱ʼera ta̱ Jesús kúú ña̱ ndákata ku̱a̱chiyó.

8 Tá káʼa̱nyó “Kǒo ku̱a̱chi kúúmiíndi̱”, sándaʼviyó miívayó ta kǒo ña̱ nda̱a̱ ndíka̱a̱ níma̱yó. 9 Ndióxi̱ nda̱kúní-inira ta va̱ʼaní-inira, tá ná natúʼunyó xíʼinra xa̱ʼa̱ ku̱a̱chiyó* koo káʼnuva-inira xa̱ʼa̱ña ta saátu xa̱ʼa̱ ndiʼi ña̱ʼa ña̱ va̱ása va̱ʼa ña̱ ke̱ʼéyó. 10 Tá káʼa̱nyó “Nda̱a̱ ni iin yichi̱ ta̱ʼán ki̱ʼvindi̱ ku̱a̱chi”, nda̱a̱ táki̱ʼva íyo na̱ káʼa̱n xa̱ʼa̱ Ndióxi̱ ña̱ kúúra ta̱ vatá saá íyoyó ta va̱ása kándíxayó ña̱ káʼa̱nra.

2 Se̱ʼe miíi̱, káʼi̱n ña̱yóʼo xíʼinndó ña̱ va̱ʼa ná kǒo ki̱ʼvindó ku̱a̱chi. Soo tá íyo iin ndóʼó ni̱ki̱ʼvi ku̱a̱chi, íyo iin ta̱ chíndeétáʼan xíʼinyó ta íyora xíʼin yiváyó: ta̱yóʼo kúú ta̱ Jesucristo iin ta̱ nda̱kúní-ini. 2 Ta̱yóʼo kúú ta̱ ni̱so̱kó mií xa̱ʼa̱ ku̱a̱chiyó ña̱ va̱ʼa ndakutáʼan ma̱níyó xíʼin Ndióxi̱, soo su̱ví xa̱ʼa̱ mií kuitíyó níkeʼéraña chi ke̱ʼéturaña xa̱ʼa̱ ndiʼi na̱ yiví. 3 Tá ndákundeéyó ndíku̱nyó ña̱ káʼa̱n leyra, saá kúú ña̱ náʼa̱yó ña̱ xíni̱yóra. 4 Ta na̱ káʼa̱n “Yi̱ʼi̱ xíni̱vai̱ra”, soo va̱ása ndíku̱nna ña̱ káʼa̱n leyra na̱ vatáva* kúúna ta va̱ása káʼa̱nna ña̱ nda̱a̱. 5 Soo tá iinna ndíku̱nna ña̱ káʼa̱nra, náʼa̱na ña̱ ndixaní kúʼvi̱-inina xínina Ndióxi̱, ña̱kán kúnda̱a̱-iniyó ña̱ kítáʼanyó xíʼinra. 6 Na̱ káʼa̱n ña̱ kítáʼanna xíʼin ta̱ Jesús, xíniñúʼu keʼéna nda̱a̱ táki̱ʼva ke̱ʼé ta̱kán.

7 Ndóʼó na̱ kúʼvi̱ní-inii̱ xínii̱, va̱ása káʼi̱n xíʼinndó xa̱ʼa̱ iin ley xa̱á, chi iin ña̱ xa̱a̱ íyo tá ya̱chi̱ kúú ña̱ káʼi̱n xíʼinndó xa̱ʼa̱, ta xa̱a̱ xíni̱ndó xa̱ʼa̱ ña̱yóʼo. Ley yatá yóʼo kúú tu̱ʼun ña̱ xa̱a̱ xi̱niso̱ʼondó. 8 Soo ni saá, ley ña̱ káʼi̱n xíʼinndó xa̱ʼa̱ iin ña̱ xa̱áva kúúña, ta ta̱ va̱ʼaní chínúu yichi̱ nu̱úyó xíʼin ña̱yóʼo kúú ta̱ Cristo ta saátu miíndó. Saáchi ña̱ naá xa̱a̱ ku̱a̱ʼa̱nña, ta luz ña̱ ndixa xa̱a̱ ki̱xáʼa ndáye̱ʼe̱níña.

9 Na̱ káʼa̱n ña̱ xíkana nu̱ú íyo luz soo sáa̱-inina xínina na̱ ñanina, táʼan ndíka̱a̱kavana nu̱ú ña̱ naá. 10 Na̱ kúʼvi̱-ini xíni ñanina xíkana nu̱ú luz ta kǒo nda̱a̱ ni iin ña̱ kivi sandákava na̱yóʼo. 11 Soo na̱ sáa̱-ini xíni ñanina íyona nu̱ú naá ta xíkana nu̱ú naá, ta va̱ása xíni̱na ndáa míí ku̱ʼu̱nna saáchi ña̱ naá nda̱kasiña nu̱úna.

12 Se̱ʼe miíi̱, káʼyíi̱ ña̱yóʼo nu̱úndó chi xa̱a̱ i̱xakáʼnu-ini Ndióxi̱ xa̱ʼa̱ ku̱a̱chindó, i̱xakáʼnu-inira xa̱ʼa̱ ku̱a̱chindó xa̱ʼa̱ ki̱vi̱ ta̱kán.* 13 Ndóʼó na̱ íyo se̱ʼe, káʼi̱n ña̱yóʼo xíʼinndó saáchi ni̱xa̱a̱ndó na̱kunda̱a̱-inindó xa̱ʼa̱ ta̱ íyo nda̱a̱ tá xa̱ʼa̱. Ndóʼó na̱ va̱lí kúa̱an, káʼi̱n ña̱yóʼo xíʼinndó saáchi va̱ása níndakavandó ndaʼa̱ ta̱ Ndi̱va̱ʼa. Ndóʼó na̱ va̱lí na̱ kúʼvi̱ní-inii̱ xínii̱, káʼi̱n ña̱yóʼo xíʼinndó saáchi ni̱xa̱a̱ndó na̱kunda̱a̱-inindó xa̱ʼa̱ yiváyó. 14 Ndóʼó na̱ íyo se̱ʼe, káʼi̱n ña̱yóʼo xíʼinndó saáchi ni̱xa̱a̱ndó na̱kunda̱a̱-inindó xa̱ʼa̱ ta̱ íyo nda̱a̱ tá xa̱ʼa̱. Ndóʼó na̱ va̱lí kúa̱an, káʼi̱n ña̱yóʼo xíʼinndó saáchi ndakú íyo inindó ta kándíxandó ña̱ káʼa̱n tu̱ʼun Ndióxi̱, ta kǒo níndakavandó ndaʼa̱ ta̱ Ndi̱va̱ʼa.

15 Va̱ása kuʼvi̱-inindó kunindó ñuyǐví yóʼo ni ña̱ʼa ña̱ íyo nu̱úña. Tá iin na̱ yiví kúʼvi̱-inina xínina ñuyǐví yóʼo, va̱ása kúʼvi̱-inina xínina yiváyó. 16 Saáchi na̱ ñuyǐví yóʼo kúni̱nína keʼéna ña̱ʼa ña̱ va̱ása va̱ʼa, ña̱ kútóo ku̱ñuna ta saátu ña̱ kútóo nduchúnu̱úna, ta ni̱nuní kúnina* xíʼin ña̱ʼa ña̱ kúúmiína, ndiʼi ña̱yóʼo su̱ví kuenta yiváyó kúúña chi kuenta na̱ ñuyǐví yóʼova kúúña. 17 Ta saátu na̱ ñuyǐví yóʼo na̱ ndiʼi-xa̱ʼa̱va kúúna, ta ndiʼi ña̱ʼa ña̱ kútóo na̱ yiví keʼéna ndiʼi-xa̱ʼa̱tu ña̱yóʼova, soo na̱ kéʼé ña̱ kúni̱ Ndióxi̱ kutakuna ndiʼi tiempo.

18 Ndóʼó na̱ va̱lí na̱ kúʼvi̱ní-inii̱ xínii̱, xa̱a̱ hora nu̱ú ndíʼi kúúña. Ndóʼó xi̱niso̱ʼondó ña̱ va̱xi ta̱ íyo contra ta̱ Cristo.* Ta vitin xa̱a̱ ku̱a̱ʼání kúú na̱ contra ta̱ Cristo, xa̱ʼa̱ ña̱yóʼo kúnda̱a̱-iniyó ña̱ xa̱a̱ hora nu̱ú ndíʼi kúúña. 19 Na̱kán na̱ xi̱ñuʼu xíʼinvayó xi̱kuuna soo va̱ása níxi̱yona nda̱a̱ táki̱ʼva íyo miíyó; saáchi tá níxi̱yona nda̱a̱ táki̱ʼva íyo miíyó va̱ása keevína ku̱ʼu̱nna. Soo ke̱ena ku̱a̱ʼa̱nna ña̱ va̱ʼa kunda̱a̱ káxi iniyó ña̱ su̱ví ndiʼivína kítáʼan xíʼinyó. 20 Saáchi ta̱ yi̱i̱ kúú ta̱ nda̱kaxin ndóʼó, ta ndiʼi ndóʼó kúnda̱a̱va-inindó xa̱ʼa̱ ña̱ nda̱a̱. 21 Káʼi̱n ña̱yóʼo xíʼinndó, su̱ví xa̱ʼa̱ ña̱ kǒo kúnda̱a̱-inindó xa̱ʼa̱ ña̱ nda̱a̱, chi kúnda̱a̱va-inindó xa̱ʼa̱ña saáchi kǒo nda̱a̱ ni iin ña̱ vatá kána ti̱xin ña̱ nda̱a̱.

22 ¿Ndáa ta̱ kúú ta̱ vatá? ¿Á su̱ví ta̱yóʼo kúú ta̱ kǒo xíín ndakuni ta̱ Jesús ña̱ kúúra ta̱ Cristo? Ta̱yóʼo kúú ta̱ íyo contra ta̱ Cristo, ta̱ kǒo xíín ndakuni yiváyó xíʼin se̱ʼera. 23 Saáchi ndiʼi na̱ kǒo ndákuni se̱ʼe Ndióxi̱ va̱ása kítáʼanna xíʼin yiváyó. Soo na̱ ndákuni se̱ʼe Ndióxi̱ kítáʼanvana xíʼin yiváyó. 24 Ta ndóʼó xíniñúʼu ndakundeéndó keʼéndó ña̱ xi̱niso̱ʼondó tá xa̱ʼa̱. Chi tá kéʼéndó ña̱ xi̱niso̱ʼondó tá xa̱ʼa̱, kutáʼanvandó xíʼin se̱ʼe Ndióxi̱ ta saátu kutáʼanndó xíʼin ta̱ kúú yiváyó. 25 Ta ña̱yóʼo kúú ña̱ ni̱ka̱ʼa̱nra ndakiʼinyó: ña̱ kutakuyó ndiʼi tiempo.

26 Káʼi̱n ña̱yóʼo xíʼinndó chi íyo na̱ kúni̱ sandáʼvi ndóʼó. 27 Ndióxi̱ nda̱kaxinra ndóʼó xíʼin espíritu santo ta ña̱yóʼo íyoña xíʼinndó, ta va̱ása xíniñúʼundó ña̱ sanáʼa̱ ni iinna ndóʼó. Ndióxi̱ xíniñúʼura espíritu yóʼo ña̱ va̱ʼa sanáʼa̱ra ndóʼó xa̱ʼa̱ ndiʼi ña̱ʼa, ta ña̱ nda̱a̱ kúú ña̱yóʼo su̱ví ña̱ vatá kúúña. Xa̱ʼa̱ ña̱kán ndakundeéndó kutáʼanndó xíʼinra nda̱a̱ táki̱ʼva sa̱náʼa̱ espíritu santo ndóʼó. 28 Xa̱ʼa̱ ña̱yóʼo, ndóʼó na̱ se̱ʼe miíi̱ ndakundeéndó kutáʼanndó xíʼinra, ña̱kán tá ná na̱ʼa̱ra ndee̱ ña̱ kúúmiíra va̱ása yi̱ʼvíyó ka̱ʼa̱nyó xíʼinra, ta tá xa̱a̱ ná koora* xíʼinyó ná kǒo kuxíkáyó nu̱úra xa̱ʼa̱ ña̱ kúkaʼan nu̱úyó. 29 Tá kúnda̱a̱-inindó ña̱ nda̱kú-inira, kúnda̱a̱-inindó ña̱ ndiʼi na̱ kéʼé ña̱ nda̱kú* kúúna se̱ʼera.

3 Kiʼin va̱ʼandó kuenta ña̱ kúʼvi̱ní-ini yiváyó Ndióxi̱ xínira miíyó, ña̱kán káʼa̱nra ña̱ kúúyó se̱ʼera ta ña̱ ndixa kúúva ña̱yóʼo. Xa̱ʼa̱ ña̱kán na̱ ñuyǐví va̱ása xíni̱na miíyó saáchi ta̱ʼán xa̱a̱na kuxini̱nara. 2 Ndóʼó na̱ kúʼvi̱ní-inii̱ xínii̱, vitin kúúyó se̱ʼe Ndióxi̱ soo kúma̱níva kunda̱a̱-iniyó ndáa ki̱ʼva kooyó chí nu̱únínu. Soo kúnda̱a̱-iniyó nda̱a̱ tá xa̱a̱ ná na̱ʼa̱ Ndióxi̱ miíra, saá kúú ña̱ xa̱a̱yó kooyó nda̱a̱ táki̱ʼva íyo miíra, saáchi kuni nu̱úyó ndáa ki̱ʼva íyora. 3 Ndiʼi na̱ xáa̱ kándíxa ta̱yóʼo va̱ása xíniñúʼu keʼékana ña̱ yaku̱a̱ chi ta̱yóʼo kǒo ña̱ yaku̱a̱ kúúmiíra.

4 Ndiʼi na̱ ndákundeé kíʼvi ku̱a̱chi yáʼandosóna ña̱ káʼa̱n ley, chi ku̱a̱chi yáʼandosóña ña̱ káʼa̱n ley. 5 Ndóʼó kúnda̱a̱-inindó xa̱ʼa̱ ta̱kán ña̱ ki̱xira ña̱ va̱ʼa ndoo ku̱a̱chiyó chi ta̱kán kǒo ku̱a̱chi kúúmiíra. 6 Ndiʼi na̱ kítáʼan xíʼinra va̱ása kíʼvikana ku̱a̱chi, ndiʼi na̱ ndákundeé kíʼvi ku̱a̱chi ta̱ʼán kuninara, ta ni ta̱ʼán xa̱a̱na kunda̱a̱-inina xa̱ʼa̱ra. 7 Ndóʼó na̱ se̱ʼe miíi̱, kǒo taxindó ña̱ sandáʼvi nda̱a̱ ni iin na̱ yiví ndóʼó. Na̱ kéʼé ña̱ va̱ʼa* iin na̱ nda̱kú-ini kúúna, nda̱a̱ táki̱ʼva íyo ta̱kán chi ta̱ nda̱kú-ini kúúra. 8 Ndiʼi na̱ ndákundeé kíʼvi ku̱a̱chi kéʼéna nda̱a̱ táki̱ʼva kéʼé ta̱ Ndi̱va̱ʼa, saáchi nani tá xa̱ʼa̱ví ki̱xáʼa ta̱ Ndi̱va̱ʼa kíʼvira ku̱a̱chi. Xa̱ʼa̱ ña̱yóʼo kúú ña̱ ki̱xi se̱ʼe Ndióxi̱: ña̱ va̱ʼa sandíʼi-xa̱ʼa̱ra ña̱ʼa ña̱ kéʼé ta̱ Ndi̱va̱ʼa.

9 Saáchi ndiʼi na̱ ni̱xa̱a̱ ku̱u se̱ʼe Ndióxi̱ va̱ása kíʼvikana ku̱a̱chi chi kúúmiína espíritu santo* Ndióxi̱, ta va̱ása kíʼvikana ku̱a̱chi chi xa̱a̱ se̱ʼe Ndióxi̱ kúúna. 10 Ña̱yóʼo kúú ña̱ chindeétáʼan xíʼinyó ña̱ va̱ʼa ndakuniyó ndáana kúú se̱ʼe Ndióxi̱ ta ndáana kúú se̱ʼe ta̱ Ndi̱va̱ʼa: na̱ kǒo kéʼé ña̱ nda̱kú* su̱ví se̱ʼe Ndióxi̱ kúúna ta saátu na̱ va̱ása kúʼvi̱-ini xíni ñanina. 11 Saáchi ña̱yóʼo kúú tu̱ʼun ña̱ xi̱niso̱ʼondó nani tá xa̱ʼa̱ví: ña̱ ná kuʼvi̱-iniyó kunitáʼanyó, 12 ta va̱ása keʼéyó nda̱a̱ táki̱ʼva ke̱ʼé ta̱ Caín, chi se̱ʼe ta̱ Ndi̱va̱ʼa xi̱kuu ta̱yóʼo ta xa̱ʼníra ñanira. ¿Nda̱chun xa̱ʼnírara? Saáchi ta̱ Caín xi̱keʼéra ña̱ va̱ása va̱ʼa, soo ñanira ña̱ va̱ʼava kúú ña̱ xi̱keʼé ta̱yóʼo.

13 Ñaniyó, va̱ása ndakanda̱-inindó* tá sáa̱-ini na̱ yiví xínina ndóʼó. 14 Saáchi miíyó nda̱a̱ táki̱ʼva íyo na̱ ni̱xi̱ʼi̱ saá ni̱xi̱yoyó, soo vitin tákuvayó xa̱ʼa̱ ña̱ kúʼvi̱-iniyó xíniyó na̱ ñaniyó. Na̱ va̱ása kúʼvi̱-ini xíni inkana nda̱a̱ táki̱ʼva íyo na̱ ni̱xi̱ʼi̱ saá íyona. 15 Ndiʼi na̱ sáa̱-ini xíni ñanina iin na̱ xáʼní kúúna, ta ndóʼó kúnda̱a̱-inindó ña̱ ni iin na̱ xáʼní va̱ása ni̱ʼína ña̱ kutakuna ndiʼi tiempo. 16 Xa̱ʼa̱ ña̱yóʼo ni̱xa̱a̱yó na̱kunda̱a̱-iniyó ndáa ki̱ʼva xíniñúʼu kuʼvi̱-iniyó kunitáʼanyó: saáchi ta̱kán ni̱xi̱ʼi̱ra xa̱ʼa̱yó* ta saátu miíyó xíniñúʼu kuviyó xa̱ʼa̱ na̱ ñaniyó. 17 Soo tá iinna kúúmiína ku̱a̱ʼá ña̱ʼa, ta xítona ña̱ kúma̱ní ña̱ʼa nu̱ú na̱ ñanina soo va̱ása chíndeétáʼanna xíʼinna, ¿á kivi ka̱ʼa̱n na̱yóʼo ña̱ kúʼvi̱-inina xínina Ndióxi̱? 18 Ndóʼó na̱ se̱ʼe miíi̱, va̱ása xíniñúʼu ka̱ʼa̱n kuitíyó ña̱ kúʼvi̱-iniyó xíniyó inkana, chi xíʼin ndinuʼu-iniyó xíniñúʼu kuʼvi̱-iniyó kuniyóna, ta na̱ʼa̱yóña xíʼin ña̱ kéʼéyó.

19 Saá kúú ña̱ xa̱a̱yó kunda̱a̱-iniyó ña̱ kúúmiíyó ña̱ nda̱a̱ ta va̱ása kaka-iniyó* ña̱ kúʼvi̱-ini Ndióxi̱ xínira miíyó, 20 ni sáxo̱ʼvi̱va níma̱yó miíyó xa̱ʼa̱ ku̱a̱ʼání ña̱ʼa, ná ndakaʼányó ña̱ káʼnukava Ndióxi̱ nu̱ú níma̱yó ta kúnda̱a̱-inira xa̱ʼa̱ ndiʼi ña̱ʼa. 21 Ndóʼó na̱ kúʼvi̱ní-inii̱ xínii̱, tá va̱ása sáxo̱ʼvi̱ níma̱yó miíyó, va̱ása kakaví-iniyó* ka̱ʼa̱nyó xíʼin Ndióxi̱; 22 ta ndiʼi ña̱ ndúkúyó nu̱úra táxivaraña ndaʼa̱yó, saáchi kándíxayó chiñu ña̱ xáʼndara ta kéʼéyó ña̱ kútóora. 23 Ta ña̱yóʼo kúú chiñu ña̱ xáʼndara nu̱úyó: ña̱ ná kandíxayó se̱ʼera* ta̱ Jesucristo ta saátu ña̱ ná kuʼvi̱-iniyó kunitáʼanyó nda̱a̱ táki̱ʼva ni̱ka̱ʼa̱nra xíʼinyó. 24 Ta na̱ kándíxa chiñu ña̱ xáʼndara kítáʼanna xíʼinra ta ta̱kán kítáʼanra xíʼin na̱yóʼo. Ta xa̱ʼa̱ ña̱ ta̱xira espíritu santo ndaʼa̱yó kúnda̱a̱-iniyó ña̱ kítáʼanra xíʼinyó.

4 Ndóʼó na̱ kúʼvi̱ní-inii̱ xínii̱, kǒo kandíxandó ndiʼi tu̱ʼun ña̱ náʼa̱ ña̱ kúúña kuenta Ndióxi̱, va̱ʼaka kotondó á ndixa kuenta Ndióxi̱ kúúña chi xa̱a̱ ku̱a̱ʼání na̱ profeta vatá ki̱xáʼa íyo ñuyǐví yóʼo.

2 Ña̱yóʼo kúú ña̱ chindeétáʼan xíʼinndó ña̱ va̱ʼa kunda̱a̱-inindó á kuenta Ndióxi̱ kúú tu̱ʼun ña̱ káʼa̱nna xíʼinndó: kuenta Ndióxi̱ kúúña tá káʼa̱nna xa̱ʼa̱ ta̱ Jesucristo ña̱ ki̱xira nu̱ú ñuʼú yóʼo ña̱ xi̱kuura iin na̱ yiví. 3 Soo tá va̱ása ndákunina ta̱ Jesús, tu̱ʼun ña̱ káʼa̱n na̱yóʼo su̱ví kuenta Ndióxi̱ kúúña. Ta na̱ kúú contra ta̱ Cristo* kúú na̱ káʼa̱n tu̱ʼun yóʼo, xi̱niso̱ʼondó ña̱ kixaa̱ña ta vitin xa̱a̱ iníí nu̱ú ñuʼú ndíka̱a̱ña.

4 Ndóʼó na̱ kúʼvi̱ní-inii̱ xínii̱, se̱ʼe Ndióxi̱ kúúndó ta ku̱chiñundó nu̱ú na̱kán* chi káʼnuníka ta̱ kítáʼan xíʼin ndóʼó nu̱úka ta̱ kítáʼan xíʼin na̱ ñuyǐví. 5 Na̱ profeta vatá yóʼo kuenta na̱ ñuyǐví yóʼo kúúna ta káʼa̱nna ña̱ʼa ña̱ kútóo na̱ ñuyǐví, xa̱ʼa̱ ña̱yóʼo xíniso̱ʼo na̱ ñuyǐví yóʼo ña̱ káʼa̱nna. 6 Miíyó kúúyó kuenta Ndióxi̱. Na̱ xáa̱ kúnda̱a̱-ini xa̱ʼa̱ Ndióxi̱ xíniso̱ʼona ña̱ káʼa̱nyó, ta na̱ va̱ása xíniso̱ʼo ña̱ káʼa̱nyó su̱ví kuenta Ndióxi̱ kúúna. Ña̱yóʼo chíndeétáʼan xíʼinyó ña̱ ndakuniyó ndáa tu̱ʼun kúú ña̱ nda̱a̱ ta ndáaña kúú ña̱ vatá.*

7 Ndóʼó na̱ kúʼvi̱ní-inii̱ xínii̱, ná ndakundeéyó kuʼvi̱-iniyó kunitáʼanyó saáchi Ndióxi̱ kúú ta̱ siʼnaka ni̱kuʼvi̱-ini xi̱ni inkana, ña̱kán ndiʼi na̱ kúʼvi̱-ini xíni inkana se̱ʼe Ndióxi̱ kúúna ta xíni̱na Ndióxi̱. 8 Na̱ va̱ása kúʼvi̱-ini xíni inkana, ta̱ʼán xa̱a̱na kuxini̱na Ndióxi̱, chi Ndióxi̱ kúúra ña̱ kúʼvi̱-ini. 9 Ndióxi̱ ni̱na̱ʼa̱ra ña̱ kúʼvi̱-inira xínira miíyó tá chi̱ndaʼára se̱ʼera ta̱ mitúʼun ña̱ ki̱xira ñuyǐví yóʼo, ta xa̱ʼa̱ ña̱ ke̱ʼé ta̱yóʼo kivi ni̱ʼíyó ña̱ kutakuyó. 10 Ndióxi̱ chi̱ndaʼára se̱ʼera ña̱ va̱ʼa ni̱so̱kóra miíra xa̱ʼa̱ ku̱a̱chiyó tasaá ndakutáʼan ma̱níyó xíʼin Ndióxi̱, ke̱ʼéra ña̱yóʼo xa̱ʼa̱ ña̱ kúʼvi̱-inira xínira miíyó su̱ví xa̱ʼa̱ ña̱ kúʼvi̱-ini miíyó xíniyóra.

11 Ndóʼó na̱ kúʼvi̱ní-inii̱ xínii̱, tá ña̱yóʼo kúú ña̱ ke̱ʼé Ndióxi̱ ña̱ ni̱na̱ʼa̱ra ña̱ kúʼvi̱ní-inira xínira miíyó, saátu miíyó xíniñúʼu kuʼvi̱-iniyó kunitáʼanyó. 12 Nda̱a̱ ni iinna ta̱ʼán kunina Ndióxi̱. Tá ndákundeéyó kúʼvi̱-iniyó xínitáʼanyó, Ndióxi̱ íyora xíʼinyó ta náʼa̱ra ña̱ ndixaní kúʼvi̱-inira xínira miíyó. 13 Ta xa̱ʼa̱ ña̱yóʼo kúú ña̱ kúnda̱a̱-iniyó ña̱ kítáʼanyó xíʼinra ta saátu ta̱kán kítáʼanra xíʼinyó, saáchi ta̱xira espíritu santo ndaʼa̱yó. 14 Ta saátu xi̱niyó ña̱ chi̱ndaʼá yiváyó se̱ʼera ña̱ sakǎkura na̱ yiví ta nátúʼunyó xa̱ʼa̱ ña̱yóʼo. 15 Tá iinna ndákunina ña̱ kúú ta̱ Jesús se̱ʼe Ndióxi̱, Ndióxi̱ kítáʼanra xíʼin na̱yóʼo ta na̱yóʼo kítáʼanna xíʼin Ndióxi̱. 16 Miíyó ni̱xa̱a̱yó na̱kunda̱a̱-iniyó ña̱ kúʼvi̱-ini Ndióxi̱ xínira miíyó ta va̱ása xíka-iniyó xa̱ʼa̱ ña̱yóʼo.

Ndióxi̱ kúúra ña̱ kúʼvi̱-ini, ta na̱ ndákundeé kúʼvi̱-ini xíni Ndióxi̱ kítáʼanna xíʼinra, ta Ndióxi̱ kítáʼanra xíʼin na̱yóʼo. 17 Siaʼa kúú ña̱ náʼa̱yó ña̱ ndixaní kúʼvi̱-iniyó xíniyó Ndióxi̱, tasaá tá ná kixaa̱ ki̱vi̱ ña̱ ndatiinra ku̱a̱chi va̱ása kaka-iniyó* ña̱ ka̱ʼa̱nyó chi nda̱a̱ táki̱ʼva íyo ta̱kán* saátu íyo miíyó ndóoyó ñuyǐví yóʼo. 18 Na̱ yiví na̱ kúʼvi̱-ini xíni Ndióxi̱ va̱ása yíʼvina. Chi tá ndixaní kúʼvi̱-iniyó va̱ása yíʼviyó chi ña̱ yíʼviyó sásiña nu̱úyó. Chi tá iin na̱ yiví yíʼvina su̱ví na̱ ndixa kúʼvi̱-ini kúúna. 19 Miíyó kúʼvi̱-iniyó xíniyó Ndióxi̱ chi siʼnaka ta̱kán ni̱kuʼvi̱-ini xi̱ni miíyó.

20 Tá iinna káchina “Yi̱ʼi̱ kúʼvi̱-inii̱ xínii̱ Ndióxi̱” soo sáa̱-inina xínina ñanina iin na̱ vatáva kúúna. Saáchi na̱ va̱ása kúʼvi̱-ini xíni na̱ ñanina na̱ va̱ʼa xínina, va̱ása kívi kuʼvi̱-inina kunina Ndióxi̱ ta̱ va̱ása kívi kunina. 21 Ña̱yóʼo kúú chiñu xáʼndara nu̱úyó: na̱ kúʼvi̱-ini xíni Ndióxi̱ saátu ná kuʼvi̱-inina kunina ñanina.

5 Ndiʼi na̱ kándíxa ta̱ Jesús ña̱ kúúra ta̱ Cristo kúúna se̱ʼe Ndióxi̱, ta ndiʼi na̱ kúʼvi̱-ini xíni Ndióxi̱ kúʼvi̱tu-inina xínina na̱ se̱ʼe Ndióxi̱. 2 Tá kúʼvi̱-iniyó xíniyó Ndióxi̱ ta sáxi̱nuyó chiñu ña̱ xáʼndara, saá kúú ña̱ kúnda̱a̱-iniyó ña̱ kúʼvi̱-iniyó xíniyó na̱ se̱ʼera. 3 Tá kúʼvi̱-iniyó xíniyó Ndióxi̱ keʼévayó chiñu ña̱ xáʼndara nu̱úyó; ta chiñu ña̱ xáʼndara nu̱úyó va̱ása yo̱ʼvi̱nívíña,* 4 saáchi ndiʼi na̱ kúú se̱ʼe Ndióxi̱ kúchiñuna xíʼin ñuyǐví yóʼo. Xa̱ʼa̱ ña̱ kándíxayó Ndióxi̱ kúú ña̱ ku̱chiñuyó xíʼin ñuyǐví yóʼo.

5 ¿Ndáana kuchiñu xíʼin ñuyǐví yóʼo? ¿Á su̱ví na̱ kándíxa ta̱ Jesús ña̱ kúúra se̱ʼe Ndióxi̱ kúú na̱ kuchiñu xíʼinña? 6 Ta̱ Jesucristo ki̱xira xíʼin ti̱kui̱í ta saátu xíʼin ni̱i̱; su̱ví xíʼin ti̱kui̱í kuití níkixira chi ki̱xitura xíʼin ni̱i̱. Ta ña̱ espíritu santo kúú ña̱ náʼa̱ ña̱ ndixava kúú ña̱yóʼo. 7 Íyo u̱ni̱ ña̱ʼa ña̱ náʼa̱ nu̱úyó ndáa ta̱ kúú ta̱ Jesús: 8 espíritu santo, ti̱kui̱í xíʼin ni̱i̱, ta u̱ni̱ saá ña̱yóʼo inkáchi ña̱ʼa káʼa̱nña xa̱ʼa̱.

9 Miíyó kándíxavayó ña̱ káʼa̱n na̱ yiví, soo ña̱ káʼa̱n Ndióxi̱ káʼnuníkava ña̱yóʼo. Saáchi mií Ndióxi̱ kúú ta̱ káʼa̱n xa̱ʼa̱ ta̱ Jesús ña̱ kúúra se̱ʼera. 10 Na̱ yiví na̱ kándíxa se̱ʼe Ndióxi̱ náʼa̱na ña̱ ndiʼi ña̱ sa̱kuaʼana nu̱ú Ndióxi̱ ndíka̱a̱ña níma̱na. Soo na̱ yiví na̱ va̱ása kándíxa Ndióxi̱ nda̱a̱ táki̱ʼva íyo na̱ káʼa̱n xa̱ʼa̱ra ña̱ kúúra iin ta̱ vatá* saá íyona, chi kǒo kándíxana ña̱ ni̱ka̱ʼa̱nra xa̱ʼa̱ se̱ʼera. 11 Ta ña̱yóʼo kúú ña̱ káʼa̱nra: Ndióxi̱ ta̱xira ña̱ kutakuyó ndiʼi tiempo ta se̱ʼera kúú ta̱ xíniñúʼura ña̱ va̱ʼa taxira ña̱yóʼo ndaʼa̱yó. 12 Na̱ kítáʼan xíʼin se̱ʼe Ndióxi̱, ni̱ʼína ña̱ kutakuna; na̱ va̱ása kítáʼan xíʼin se̱ʼe Ndióxi̱ va̱ása ni̱ʼína ña̱ kutakuna.

13 Káʼyíi̱ ña̱yóʼo nu̱ú ndóʼó na̱ kándíxa se̱ʼe Ndióxi̱,* ña̱ va̱ʼa kunda̱a̱-inindó ña̱ kutakundó ndiʼi tiempo. 14 Kándíxaníyó ña̱yóʼo: nda̱a̱ ndáaka ña̱ʼa ná ndukúyó nu̱ú Ndióxi̱, tá kítáʼanña xíʼin ña̱ kúni̱ra, xíniso̱ʼovara ña̱ káʼa̱nyó xíʼinra. 15 Xa̱ʼa̱ ña̱ va̱ása xíka-iniyó ña̱ xíniso̱ʼora ña̱ káʼa̱nyó xíʼinra ni nda̱a̱ ndáaka ña̱ ndúkúyó nu̱úra, kúnda̱a̱ káxi iniyó ña̱ ndakiʼinvayóña.

16 Soo tá iinna xi̱nina iin na̱ ñanina ña̱ kíʼvina iin ku̱a̱chi ña̱ va̱ása xíniñúʼu kuvina xa̱ʼa̱, va̱ʼa ka̱ʼa̱nna xíʼin Ndióxi̱ xa̱ʼa̱ na̱yóʼo ta Ndióxi̱ taxira ña̱ kutakuna. Ña̱yóʼo kúú ña̱ xíniñúʼu keʼéna xa̱ʼa̱ na̱ kǒo kíʼvi iin ku̱a̱chi ña̱ xíniñúʼu kuvina xa̱ʼa̱. Soo íyo iin ku̱a̱chi ña̱ xíniñúʼu kuvina xa̱ʼa̱, ta va̱ása káʼi̱n xíʼinndó ña̱ ka̱ʼa̱nndó xíʼin Ndióxi̱ xa̱ʼa̱ ña̱yóʼo. 17 Ndiʼi ña̱ va̱ása va̱ʼa* iin ku̱a̱chi kúú ña̱yóʼo, soo íyo iin ku̱a̱chi ña̱ va̱ása xíniñúʼu kuvina xa̱ʼa̱.

18 Kúnda̱a̱-iniyó ña̱ ni iin na̱ kúú se̱ʼe Ndióxi̱ va̱ása ndákundeéna kíʼvina ku̱a̱chi, chi ta̱ kúú se̱ʼe* Ndióxi̱ ndáara na̱yóʼo,* ta ta̱ Ndi̱va̱ʼa kǒo nda̱a̱ ni iin ña̱ʼa kivi keʼéra xíʼin na̱yóʼo. 19 Miíyó kúnda̱a̱-iniyó ña̱ kúúyó kuenta Ndióxi̱ soo iníísaá ñuyǐví ndíka̱a̱ña ndaʼa̱ ta̱ Ndi̱va̱ʼa. 20 Miíyó kúnda̱a̱-iniyó ña̱ ki̱xi se̱ʼe Ndióxi̱ ñuyǐví yóʼo ta chi̱ndeétáʼanra xíʼinyó ña̱ kunda̱a̱-iniyó xa̱ʼa̱ Ndióxi̱ ta̱ nda̱a̱. Ta xa̱ʼa̱ ña̱ ke̱ʼé se̱ʼera ta̱ Jesucristo va̱ʼa kutáʼanyó xíʼinra. Saá íyoña, ta̱yóʼo kúú Ndióxi̱ ta̱ nda̱a̱, ta̱ táxi ña̱ kutakuyó ndiʼi tiempo. 21 Ndóʼó na̱ se̱ʼe miíi̱, kiʼinníndó kuenta ña̱ kǒo ndasakáʼnundó nda̱a̱ ni iin ña̱ʼa ña̱ ndásakáʼnu na̱ yiví.