Na̱ yiví íxava̱ʼana iin veʼe káʼnu

KU̱A̱ʼÁ ku̱i̱ya̱ ni̱ya̱ʼa. Na̱ se̱ʼe ta̱ Noé ni̱xi̱yo ku̱a̱ʼá se̱ʼena, ta na̱yóʼo xa̱ʼnuna ta ni̱xi̱yo ku̱a̱ʼátu se̱ʼe na̱yóʼova. Ta kama ndu̱ku̱a̱ʼá na̱ yiví nu̱ú Ñuʼú yóʼo.

Ta tiempo saá ni̱xi̱yo iin ta̱a xi̱naní Nemrod, ta̱yóʼo xi̱kuu se̱ʼexíkúá ta̱ Noé. Ta su̱ví ta̱a va̱ʼa níxikuura chi xi̱xaʼníra kití ta xi̱xaʼníra na̱ yiví. Ta̱ Nemrod yóʼo nda̱sara miíra rey ña̱ va̱ʼa kaʼndachíñura nu̱ú na̱ yiví. Ndióxi̱ kǒo níxikutóora ña̱yóʼo.

Ña̱ tiempo saá iinva tu̱ʼun xi̱ka̱ʼa̱nna. Ta̱ Nemrod xi̱kuni̱ra ña̱ iin kundoo ndiʼi na̱ yiví ña̱ va̱ʼa kaʼndachíñura nu̱úna. ¿Á xíni̱ún ndáaña ke̱ʼéra? Ni̱ka̱ʼa̱nra xíʼinna ná keʼéna iin ñuu ta ná keʼéna iin veʼe káʼnu nu̱úña. Nu̱ú na̱ʼná yóʼo kotoún kéʼéna ndo̱ʼo.

Jehová va̱ása níkutóora ña̱ kéʼéna veʼe káʼnu yóʼo. Chi xi̱kuni̱ra ña̱ koona iníísaá nu̱ú Ñuʼú yóʼo. Ta na̱ yiví yóʼo ni̱ka̱ʼa̱nna: “Ná keʼéyó iin ñuu ta keʼéyó iin veʼe káʼnu nu̱úña ta ná xa̱a̱ xi̱níña nda̱a̱ chí ndiví”. Tasaá kunúu va̱ʼa tu̱ʼunyó ta ndukáʼnukayó nu̱ú Ndióxi̱.

Ndióxi̱ kǒo nítaxikara keʼéna veʼe káʼnu yóʼo. ¿Á xíni̱ún ndáaña ke̱ʼéra xíʼin na̱yóʼo? Ki̱xaʼára na̱samara tu̱ʼunna kǒo níxika̱ʼa̱nkana iin tu̱ʼun. Ta saá kǒo níkunda̱a̱-inina xíʼin tu̱ʼun táʼanna. Ña̱kán ñuu yóʼo xi̱naníña Babel á Babilonia ña̱ kúni̱ kachi ʼnu̱ú kǒo níkunda̱a̱-inina xíʼin tu̱ʼun táʼannaʼ.

Ta vitin sa̱ndákoona ñuu Babel. Ta na̱ xi̱ka̱ʼa̱n iin nu̱ú tu̱ʼun, ndiʼi na̱yóʼo ku̱a̱ʼa̱nna koona inka xiyo.