Íyoní tu̱ndóʼo veʼe ta̱ David

TÁNDI̱ʼI ki̱xaʼá ta̱ David xáʼndachíñura ñuu Jerusalén, mií Jehová chi̱ndeé táʼan xíʼin na̱ soldado ta̱ David ta ku̱a̱ʼání ñuu ni̱kuchiñuna xíʼin. Jehová ni̱ka̱ʼa̱nra xíʼin na̱ ñuu Israel ña̱ taxira ñuʼú ñuu Canaán ndaʼa̱na. Ta vitin, chi̱ndeé táʼanra xíʼinna ta ndiʼi ñuʼú ña̱ Canaán ndu̱u ñuʼúna.

Ta̱ David iin ta̱ chíñu va̱ʼa kúúra. Kúni̱ra xínira Jehová. Ña̱kán míí ña̱ nu̱ú va̱ʼa ke̱ʼéra tá ni̱xa̱a̱ra ñuu Jerusalén kúúña nda̱kiʼinra caja ña̱ trato ña̱ chi̱ka̱a̱ Ndióxi̱ xíʼin na̱ ñuu Israel ku̱a̱ʼa̱n xíʼinra chí ñuu Jerusalén. Kúni̱ra keʼéra iin veʼe nu̱ú chindúʼura caja yóʼo.

Ni̱ya̱ʼa loʼo ku̱i̱ya̱, ta̱ David ke̱ʼéra iin ku̱a̱chi káʼnu. Xíni̱vara va̱ása va̱ʼa kiʼinra ña̱ʼa inkana. Soo iin xi̱kuaa, tá níndichira xi̱ní veʼera, ta xi̱tora chí ni̱nu̱ liviní iin ñaʼá xi̱nira. Bat-seba naníñá ta yiíñá kúú ta̱ Urías, iin ta̱ Soldado ta̱ káchíñu nu̱úra.

Ta̱ David ni̱kutóoníra xi̱nira ñá Bat-seba ta xa̱ʼndara chiñu ña̱ ná ku̱ʼu̱nna xa̱ʼañá ta kixiñá veʼera. Ta yiíñá kǒo íyo yatinra xíʼinñá chi nu̱ú ku̱a̱chiva ndíka̱a̱ra. Ta̱ David ni̱ki̱si̱ra xíʼinñá, tándi̱ʼi na̱kunda̱a̱-inira ñúʼu se̱ʼeñá. Ta ni̱ndi̱ʼiní-inira, ta ni̱ka̱ʼa̱nra xíʼin ta̱ Joab ta̱ níʼi yichi̱ nu̱ú na̱ soldado, ña̱ ná chinúura ta̱ Urías nu̱ú na̱ ku̱a̱ʼa̱n ku̱a̱chi ta saá va̱ʼa kuvira. Tá ni̱xi̱ʼi̱ ta̱ Urías, ta̱ David ti̱ndaʼa̱ra xíʼin ñá Bat-seba.

Ni̱sa̱a̱ní Jehová xíʼin ta̱ David. Ta chi̱ndaʼára ta̱ profeta Natán ku̱a̱ʼa̱nra ka̱ʼa̱nra xíʼin ta̱ David xa̱ʼa ña̱ ke̱ʼéra. Koto nu̱ú na̱ʼná, yóʼo káʼa̱n ta̱ Natán xíʼin ta̱ David. Ta̱ David nda̱ndikóní-inira xa̱ʼa ña̱ ke̱ʼéra, xa̱ʼa ña̱yóʼo kǒo níxaʼní Jehová ta̱yóʼo. Jehová káchira xíʼinra: ʼXa̱ʼa ña̱ ke̱ʼún ña̱yóʼo, ku̱a̱ʼání tu̱ndóʼo koo nu̱únʼ. Vitin íyoní tu̱ndóʼo nu̱ú ta̱ David.

Míí ña̱ nu̱ú va̱ʼa ndo̱ʼora kúúña ni̱xi̱ʼi̱ se̱ʼe ñá Bat-seba. Ta ta̱ Amnón se̱ʼe nu̱ú ta̱ David, i̱xandúxara xíʼin ñá Tamar ku̱ʼvara ta ni̱ki̱si̱ra xíʼinñá. Xa̱ʼa ña̱yóʼo ni̱sa̱a̱ní ta̱ Absalón ta xa̱ʼníra ta̱ Amnón. Tándi̱ʼi ku̱a̱ʼání na̱ yiví sa̱ndáʼvi ta̱ Absalón chi kúni̱ra ña̱ ná ndasanara rey. Soo nda̱a̱ vitinví ni̱kuchiñu ta̱ David xíʼin ta̱ Absalón, ta ta̱yóʼo ni̱xi̱ʼi̱vara. Ku̱a̱ʼání tu̱ndóʼo ki̱xi nu̱ú ta̱ David.

Tá míí tiempo kúú ndiʼi ña̱yóʼo, saá ka̱ku se̱ʼe ñá Bat-seba ta̱ naní Salomón. Tá xa̱ku̱chée ta̱ David ta ki̱ʼin kue̱ʼe̱ra, se̱ʼera ta̱ Adonías kúni̱ra nduura rey nu̱úra. Tasaá ni̱ka̱ʼa̱n ta̱ David xíʼin ta̱ su̱tu̱ Sadoc ná sákáara aceite xi̱ní ta̱ Salomón, tasaá kunda̱a̱-inina ta̱yóʼo kuu rey. Loʼo tiempo ni̱ya̱ʼa ta ni̱xi̱ʼi̱va ta̱ David tá ndíka̱a̱ra 70 ku̱i̱ya̱ra. Soo 40 ku̱i̱ya̱ xa̱ʼndachíñura. Ta̱ vitin ta̱ Salomón kúú rey.