Ndióxi̱ káʼa̱nra taxira iin ñuʼú livi

TÁ KÁA na̱ʼná ña̱ va̱xi yóʼo, saá káa iin ñuʼú livi ña̱ ni̱na̱ʼa̱ Ndióxi̱ nu̱ú ta̱ profeta Isaías. Tá xa̱ni̱xi̱ʼi̱ ta̱ Jonás saá ni̱xi̱yo ta̱yóʼo.

Liviní káa ñuʼú yóʼo, ¿saá? ¿Á kǒo sándakaʼán na̱ʼná yóʼo miíún xa̱ʼa iin ña̱ xa̱xi̱niún nu̱ú tutu yóʼo? Tá káa ñuʼú nu̱ú ni̱xi̱yo ta̱ Adán xíʼin ñá Eva saá káaña. Soo, ¿á kixa̱a̱ iin ki̱vi̱ ña̱ ndulivi iníísaá nu̱ú Ñuʼú yóʼo?

Jehová ni̱ka̱ʼa̱nra xíʼin ta̱ profeta Isaías ña̱ ná taara xa̱ʼa iin ñuʼú livi nu̱ú koo na̱ ñuu Ndióxi̱ chí nu̱únínu. Ta káchira: ‘Tí ndiva̱ʼyí xíʼin tí ndikachi va̱ʼava kutáʼanrí kundoorí. Tí si̱ndi̱ki̱ válí xíʼin tí león válí va̱ʼava kutáʼanrí kaxáʼanrí, ta na̱ va̱líva kundaarí. Nda̱a̱ ta̱ lée loʼo va̱ʼava kusíkíra nu̱ú íyo ya̱vi̱ tí ko̱o̱ xa̱tu ta va̱ása kaxíríraʼ.

Ku̱a̱ʼána ka̱ʼa̱n: ‘Ni su̱ví ña̱ ndixa kúú ña̱yóʼo, chi ndiʼi tiempo íyo tu̱ndóʼo, ta ndiʼi tiempo koovañaʼ. Soo, ¿nda̱saa xi̱kaa ñuʼú ña̱ ta̱xi Ndióxi̱ ndaʼa̱ ta̱ Adán xíʼin ñá Eva ña̱ kundoona?

Ndióxi̱ ta̱xira iin ñuʼú livi ndaʼa̱na. Xa̱ʼa ña̱ kǒo níkandíxana Ndióxi̱, ña̱kán kǒo níxindookana nu̱úña, ta ndu̱chéena ta ni̱xi̱ʼi̱vana. Ndióxi̱ káʼa̱nra taxira iin ñuʼú livi ña̱ kundoo na̱ ndixa kándíxañaʼá, tá xi̱kaa ña̱ ta̱xira ndaʼa̱ ta̱ Adán xíʼin ñá Eva saá kooña.

Nu̱ú ñuyǐví xa̱á ña̱ koo chí nu̱únínu, kǒoka tu̱ndóʼo koo. Va̱ʼaní kooña. Na̱ yiví kǒoka kue̱ʼe̱ kuumiína ta si̱íkaví kundoona, nda̱a̱ tá xi̱kuni̱ Ndióxi̱ tá xa̱ʼa saá koona. Chí nu̱únínu loʼoka sakuaʼakayó nda̱saa keʼé Ndióxi̱ ña̱yóʼo.