Ni̱ka̱ʼyi̱ letra kándíka veʼe

¿NDÁA ña̱ʼa kúúña kúú yóʼo? Iin vikó káʼnu kéʼé na̱ yiví yóʼo. Ta̱ rey ñuu Babilonia ku̱a̱ʼání na̱ yiví ka̱nara. Ta xíniñúʼura copa ña̱ oro, ña̱ plata xíʼin ko̱ʼo̱ kúnu ini ña̱ ta̱vána ini templo Jehová ñuu Jerusalén. Iin kama kuití ka̱na iin ndaʼa̱na ta ki̱xaʼáña káʼyíña letra kandíka veʼe. Ndiʼina ni̱yi̱ʼvína.

Ta̱ Belsasar, ta̱ se̱ʼeñáni ta̱ Nabucodonosor, kúú rey vitin. Ta ka̱nara na̱ ndíchi ná kixina, ta káchira: ʼNa̱ kaʼvi letra yóʼo ta ka̱ʼa̱nna xíʼi̱n ndáaña kúni̱ kachiña, ku̱a̱ʼání ña̱ʼa taxii̱ ndaʼa̱na ta xa̱a̱na kaʼndachíñuna xíʼi̱nʼ. Soo ni iin na̱yóʼo kǒo níkuchiñu kaʼvi letra yóʼo ta ni kǒo níkunda̱a̱-inina ndáaña kúni̱ kachiña.

Siʼí ta̱ rey Belsasar tá xi̱niso̱ʼoñá nátúʼunnína, ni̱ki̱ʼvíñá nu̱ú ndóona xíxina. Ta ni̱ka̱ʼa̱nñá xíʼin ta̱ rey: ʼKǒo yíʼvíún, chi xíʼin miíún íyo iin ta̱a ta̱ xíni̱ xa̱ʼa na̱ ndióxi̱ yi̱i̱ ta kivi chindeéra yóʼó. Chi tá xi̱kuu xi̱ún ta̱ Nabucodonosor rey, ta̱xira chiñu ndaʼa̱ ta̱yóʼo ña̱ kuniʼi chíñura xíʼin ndiʼi na̱ ndíchi na̱ xi̱kachíñu nu̱úra. Daniel naníra. Kanara ná kixira ka̱ʼa̱nra xíʼún ndáaña kúni̱ kachi letra yóʼoʼ.

Ta ndi̱ku̱n saá ni̱xa̱ʼa̱nna nda̱kiʼinna ta̱ Daniel. Tá ki̱xa̱a̱ra kǒo níxiinra ndakiʼinra ña̱ʼa ña̱ táxina ndaʼa̱ra. Tasaá ki̱xaʼára káʼa̱nra ndachun ki̱ndaa Jehová chiñu ndaʼa̱ ta̱ Nabucodonosor xi̱íra. ʼTa̱ Nabucodonosor iin ta̱ ta̱aní-ini xi̱kuura, Jehová ta̱xira castigo ndaʼa̱raʼ, káchi ta̱ Daniel.

ʼSoo miíún xa̱xíni̱ún xa̱ʼa ndiʼi ña̱yóʼo, ta ni saáví tá xi̱kaa ta̱kán saá káún. Chi ta̱váún copa xíʼin ko̱ʼo̱ kúnu ini ña̱ ñúʼu ini templo Jehová ta xíniñúʼún ña̱yóʼo. Ta ndásakáʼnún ndióxi̱ ña̱ i̱xava̱ʼana xíʼin yu̱u̱ xíʼin yitu̱n ta kǒo íxato̱ʼún Jehová. Xa̱ʼa ña̱yóʼo chi̱ndaʼá Ndióxi̱ iin ndaʼa̱na ña̱ ka̱ʼyíña letra yóʼoʼ, káchi ta̱ Daniel.

ʼÑa̱ letra yóʼo káchiña: “MENÉ, MENÉ, TEKEL, PARSÍN”ʼ, káchi ta̱ Daniel.

ʼMENÉ kúni̱ kachiña, Ndióxi̱ kindaara ña̱ xáʼndachíñún ta sandiʼi-xa̱ʼaraña. TEKEL kúni̱ kachiña, Ndióxi̱ ka̱tara yóʼó nu̱ú balanza ta xi̱nira su̱ví ta̱a va̱ʼa kúún. PARSÍN kúni̱ kachiña, ña̱ xáʼndachíñún taxiraña ndaʼa̱ na̱ ñuu Media xíʼin na̱ ñuu Persia.ʼ

Tá kúma̱níka sandiʼi ta̱ Daniel ka̱ʼa̱nra ña̱yóʼo. Na̱ ñuu Media xíʼin na̱ ñuu Persia ki̱xaʼána kánitáʼanna xíʼin na̱ ñuu Babilonia. Ta ti̱inna na̱ yiví ta xa̱ʼnína ta̱ rey Belsasar. Míí ñu̱ú saá ni̱xi̱nu ña̱ káʼa̱n letra ña̱ ni̱ka̱ʼyi̱ kandíka veʼe yóʼo. Soo, ¿ndáaña ndo̱ʼo na̱ ñuu Israel vitin? Chí nu̱únínu sakuaʼayó xa̱ʼa ña̱yóʼo, soo vitin ná kuniyó ndáaña ndo̱ʼo ta̱ Daniel.