Tá ka̱ku ta̱ Jesús nda̱a̱ tá ni̱xi̱ʼi̱ra

Ndióxi̱ chi̱ndaʼá iin ángel naní Gabriel ku̱a̱ʼa̱n nu̱ú iin ñá loʼo kúa̱an ñá xi̱naní María. Ta ni̱ka̱ʼa̱nra xíʼinñá ña̱ kaku iin se̱ʼeñá ta kuura rey ndiʼi tiempo. Ta̱ Jesús kúúra, ta ka̱kura veʼe nu̱ú xíxáʼan tí kití, ta yóʼo kúú nu̱ú ki̱xi na̱ xi̱ndaa kití xi̱toniʼninara. Tándi̱ʼi iin ki̱mi níʼi yichi̱ nu̱ú sava na̱ ke̱e chí nu̱ú kíta Ñu̱ʼu ña̱ ni̱xa̱a̱na nu̱ú ta̱ Jesús. Yóʼo sakuaʼayó ndáana sa̱ndáye̱ʼe̱ tí ki̱mi yóʼo ta nda̱saa va̱ʼa ni̱ka̱ku ta̱ Jesús nu̱ú na̱ xi̱kuni̱ kaʼní-ñaʼá.

Tá ni̱ya̱ʼa tiempo, tá xa̱ndíka̱a̱ra 12 ku̱i̱ya̱. Na̱túʼunra xíʼin na̱ maestro na̱ sánáʼa̱ xa̱ʼa Ndióxi̱ ini templo. Tá ni̱ya̱ʼa xa̱ʼu̱n u̱ni̱ ku̱i̱ya̱ saá nda̱kuchira ta ki̱xaʼára sánáʼa̱ra na̱ yiví xa̱ʼa Ndióxi̱, chi xa̱ʼa míí ña̱yóʼo chi̱ndaʼá Ndióxi̱ miíra ki̱xira nu̱ú Ñuʼú yóʼo. Ña̱kán nda̱ka̱xinra 12 na̱ apóstol ña̱ ná chindeéna miíra ña̱ sanáʼa̱na na̱ yiví xa̱ʼa Ndióxi̱.

Ku̱a̱ʼání milagro ke̱ʼé ta̱ Jesús. Sa̱kuxura ku̱a̱ʼání na̱ yiví xíʼin loʼo kuití ti̱a̱ká xíʼin si̱táva̱ʼa. Sa̱ndáʼara na̱ xi̱kuumií kue̱ʼe̱ ta sa̱ndátakura na̱ ni̱xi̱ʼi̱. Ta sakuaʼatuyó xa̱ʼa ku̱a̱ʼání ña̱ ndo̱ʼora tá xa̱kuyatin kuvira ta xíʼin ña̱ ke̱ʼéna xíʼinra tá xa̱ʼnínara. Ta̱ Jesús u̱ni̱ ku̱i̱ya̱ sava ni̱xi̱kara sa̱náʼa̱ra na̱ yiví xa̱ʼa Ndióxi̱, ta ña̱ TÁʼVI 6 yóʼo yáʼa 34 ku̱i̱ya̱ ku̱uña.