Ta̱ Jesús sándáʼara na̱ kúúmií kue̱ʼe̱

TÁ XÍKA ta̱ Jesús ku̱a̱ʼa̱nra ñuu tá ñuu, sándáʼara na̱ kúúmií kue̱ʼe̱. Ña̱ milagro ña̱ kéʼéra kama na̱kunda̱a̱-ini inka na̱ ñuu yatin xa̱ʼa ña̱yóʼo. Ku̱a̱ʼa̱nna nu̱úra xíʼin na̱ ndu̱chiʼña, na̱ kǒo túvi nu̱ú, xíʼin na̱ kúúmií inka kue̱ʼe̱. Ta ndiʼi na̱yóʼo sa̱ndáʼara.

Xa̱yáʼa u̱ni̱ ku̱i̱ya̱ ña̱ sa̱ndákuchi ta̱ Juan ta̱ Jesús. Ta vitin ta̱ Jesús káʼa̱nra xíʼin na̱ apóstol ña̱ ku̱ʼu̱nra chí ñuu Jerusalén ta kán kaʼnínara, ta ni̱ka̱ʼa̱nra xa̱ʼa ña̱ ndatakura. Soo sándáʼa tá sándáʼakavara na̱ yiví.

Ta̱ Jesús sánáʼa̱ra iin ki̱vi̱ sábado. Ta ki̱vi̱ yóʼo kúú ña ndákiʼinndée na̱ ñuu Judá. Nána ñá va̱xi nu̱ú na̱ʼná yóʼo, xa̱ku̱a̱ʼa̱n 18 ku̱i̱ya̱ na̱kutosoñá ta kǒo kívi kaka nda̱kúñá. Ta̱ Jesús sa̱ndáʼavarañá.

Xa̱ʼa ña̱yóʼo, ni̱sa̱a̱ní na̱ su̱tu̱, ta iin na̱yóʼo ni̱ka̱ʼa̱n: ʼI̱ñu̱va ki̱vi̱ xíniñúʼu kachíñuyó, ta saá kixindó ndaʼandó, su̱ví ki̱vi̱ sábadoʼ.

Soo nda̱kuiin ta̱ Jesús: ʼSu̱ví na̱ yiví va̱ʼa kúúndó, ¿á kǒo ndáxinndó burro sa̱na̱ndó ki̱vi̱ sábado ña̱ ku̱ʼu̱nndó xíʼinrí koʼorí ti̱kui̱í? Ta ndachun kǒo xíínndó ndaʼa ñá ndáʼvi yóʼo, ta xa̱ku̱a̱ʼa̱n 18 ku̱i̱ya̱ kúúmiíñá kue̱ʼe̱ʼ. Tá ni̱ka̱ʼa̱n ta̱ Jesús ña̱yóʼo ni̱kukaʼanva nu̱úna.

Tándi̱ʼi nda̱kiʼin ta̱ Jesús ku̱a̱ʼa̱nra xíʼin na̱ apóstol chí ñuu Jerusalén. Tá xa̱kuyatinna nu̱ú ndíka̱a̱ ñuu Jericó, u̱vi̱ na̱ kǒo túvi nu̱ú ki̱xaʼána kánanara: ʼJesús chindeé táʼan xíʼinndi̱ʼ, káchina.

Ta̱ Jesús ka̱narana ki̱xa̱a̱na ta ni̱ka̱ʼa̱nra xíʼinna: ʼ¿Ndáaña kúni̱ndó?ʼ Ta ni̱ka̱ʼa̱nna xíʼinra: ʼTáta kúni̱ndi̱ sandáʼún nu̱úndi̱ʼ. Ta̱ Jesús ti̱inra nduchú nu̱úna ta nda̱ʼavaña. ¿Á xíni̱ún ndáa xa̱ʼa kúúña ke̱ʼé ta̱ Jesús ndiʼi milagro yóʼo? Saáchi kúʼvi̱-inira xínirana ta kúni̱ra ná kandíxanara. Ña̱yóʼo sánáʼa̱ña miíyó tá ná kaʼndachíñu ta̱ Jesús nda̱a̱ ni iin na̱ yiví kǒo kuumiíka kue̱ʼe̱ nu̱ú Ñuʼú yóʼo.