Tá nda̱taku ta̱ Jesús nda̱a̱ tá xi̱ndika̱a̱ ta̱ Pablo veʼeka̱a

Tá ni̱ya̱ʼa u̱ni̱ ki̱vi̱ ni̱xi̱ʼi̱ ta̱ Jesús, saá nda̱takura. Míí ki̱vi̱ saá u̱ʼu̱n yichi̱ ki̱tara nu̱ú na̱ discípulo, ta ki̱takara nu̱úna ti̱xin ña̱ 40 ki̱vi̱. Ta savana ndítana xi̱nina tá ku̱a̱ʼa̱nra chí ndiví. Tá ni̱ya̱ʼa u̱xu̱ ki̱vi̱, saá ta̱xi Ndióxi̱ espíritu yi̱i̱ra ndaʼa̱ na̱ xi̱ñuʼu ñuu Jerusalén.

Ni̱ya̱ʼa tiempo, na̱ sáa̱-ini xíni Ndióxi̱ ti̱inna na̱ apóstol ta chi̱ka̱a̱nana veʼeka̱a. Soo iin ta̱ ángel ta̱vávarana. Ta na̱yóʼo kúútu na̱ ku̱un yu̱u̱ ta̱ Esteban ta ni̱xi̱ʼi̱ra. Ta sakuaʼatuyó xa̱ʼa ña̱ nda̱ka̱xin ta̱ Jesús iin ta̱ kuumií iin chiñu káʼnu nu̱úra, ta̱yóʼo kúú ta apóstol Pablo. Tá ni̱xi̱ʼi̱ ta̱ Jesús ni̱ya̱ʼa u̱ni̱ ku̱i̱ya̱ sava, Ndióxi̱ chi̱ndaʼára ta̱ apóstol Pedro ña̱ ku̱ʼu̱nra natúʼunra xíʼin ta̱ Cornelio, soo ta̱yóʼo xíʼin na̱ veʼera su̱ví na̱ ñuu Israel kúúna.

Ni̱ya̱ʼa 13 ku̱i̱ya̱ saá ki̱ta ta̱ Pablo ku̱a̱ʼa̱nra natúʼunra xíʼin na̱ yiví xa̱ʼa Ndióxi̱ ña̱ yichi̱ nu̱ú. Ña̱ yichi̱ u̱vi̱, ta̱ Timoteo ni̱xa̱ʼa̱n xíʼinra. Ta̱ Pablo xíʼin na̱ ni̱xi̱ka xíʼinra ku̱a̱ʼání ña̱ ndo̱ʼona tá ni̱xi̱kana na̱túʼunna xa̱ʼa Ndióxi̱. Tándi̱ʼi, ta Pablo xi̱ndika̱a̱ra veʼeka̱a ñuu Roma. Tá ni̱xi̱nu u̱vi̱ ku̱i̱ya̱ ki̱tara veʼeka̱a, soo tándi̱ʼi tuku chi̱ka̱a̱nara veʼeka̱a tasaá xa̱ʼnínara. Ndiʼi ña̱ TÁʼVI 7 ku̱uña ti̱xin ña̱ 32 ku̱i̱ya̱.