Xa̱kuyatin ndiʼi-xa̱ʼa tu̱ndóʼo

¿NDÁA ña̱ʼa kúú ña̱ xítoún nu̱ú na̱ʼná yóʼo? Ku̱a̱ʼánína va̱xi xíʼin kuáyi̱ yaa. Soo koto, ¿ndáa míí ke̱erí va̱xirí? Chí ndiví va̱xirí xínukavírí sa̱tá vikó va̱xirí. ¿Á íyo kuáyi̱ chí ndiví?

Su̱ví kuáyi̱ tí ndixa kúúrí. Saáchi kuáyi̱ kǒo kívi kakarí nu̱ú vikó. Soo ña̱ Biblia káʼa̱nña xa̱ʼa kuáyi̱ tí íyo chí ndiví. ¿Á xíni̱ún ndachun káʼa̱nña xa̱ʼarí?

Saáchi tá xi̱naʼá xi̱xiniñúʼuna kuáyi̱ nu̱ú xi̱xikana ku̱a̱chi. Ña̱kán káʼa̱n ña̱ Biblia xa̱ʼa savana ña̱ va̱xina chí ndiví xíʼin kuáyi̱. Tasaá náʼa̱na Ndióxi̱ kúú ta̱ chíndaʼá-ñaʼá ña̱ va̱xina kanitáʼanna xíʼin na̱ yiví na̱ ndóo nu̱ú Ñuʼú yóʼo. ¿Ama kuu ña̱yóʼo? Tá ná ki̱xa̱a̱ Armagedón saá ndiʼi-xa̱ʼa ndiʼi tu̱ndóʼo.

Ta̱ Jesús kúú ta̱ níʼi yichi̱ nu̱ú na̱ va̱xi kanitáʼan xíʼin na̱ va̱xi nu̱ú ku̱a̱chi ña̱ naní Armagedón. ¿Á ndákaʼún ña̱ nda̱ka̱xin Jehová ta̱ Jesús ña̱ kuura rey? Xa̱ʼa ña̱yóʼo ndíka̱a̱ corona xi̱níra va̱xira. Ta yuchu̱ ña̱ níʼira kúni̱ kachiña va̱xira kaʼníra ndiʼi na̱ kǒo kéʼé ña̱ kúni̱ Ndióxi̱. ¿Á ndákanda̱-iniyó ña̱ káʼa̱n Ndióxi̱ sandiʼi-xa̱ʼara ña̱ yiví na̱ kéʼé ña̱ va̱ása va̱ʼa?

Nandukú historia 10 nu̱ú libroún. ¿Ndáa ña̱ʼa kúú ña̱ kúú yóʼo? Sa̱vi̱ kini sándiʼi-xa̱ʼará ndiʼi na̱ yiví na̱ kéʼé ña̱ kini. ¿Yukú na̱ sa̱kóon sa̱vi̱ kini yóʼo? Jehová kúú ta̱ sa̱kóonra. Vitin koto nu̱ú historia 15. ¿Ndáa ña̱ʼa kúú ña̱ kúú yóʼo? Jehová xíniñúʼura ñuʼu̱ ña̱ sándiʼi-xa̱ʼara ñuu Sodoma xíʼin ñuu Gomorra.

Vitin koto nu̱ú historia 33. ¿Ndáaña ndóʼo tí kuáyi̱ sa̱na̱ na̱ ñuu Egipto xíʼin tú carrona tú xíka nu̱ú ku̱a̱chi? ¿Yukú na̱ sa̱ndáa mar sa̱tá na̱ ñuu Egipto? Jehová kúú ta̱ i̱xaa saá, ña̱ va̱ʼa sa̱kákura na̱ ñuura. Vitin koto historia 76. Jehová ta̱xira ndi̱ʼi-xa̱ʼa na̱ ñuu Israel xa̱ʼa ña̱ xi̱keʼéna ña̱ kini.

Ña̱kán ná kǒo ndakanda̱-iniyó ña̱ chindaʼá Jehová na̱ xíka nu̱ú ku̱a̱chi nu̱úra ña̱ kixina sandiʼi-xa̱ʼana ndiʼi ña̱ kini ña̱ íyo nu̱ú Ñuʼú yóʼo. ¿Ndáaña kuu tá ná sandiʼi-xa̱ʼara ndiʼi tu̱ndóʼo? Nu̱ú inka página sakuaʼayó xa̱ʼa ña̱yóʼo.