Tu̱ʼun káʼa̱n xíʼin na̱ sána̱ʼa̱

Xíniñúʼu chika̱a̱ún nde̱e xíʼin na̱ kúni̱ sákuaʼa letra. Ki̱vi̱ kixaʼún sána̱ʼúnna, ka̱ʼún xíʼinna ndáaña va̱ʼa ni̱ʼina ta ná kutu̱ʼvana kaʼvina ta taana letra. Saáchi tá ná kutu̱ʼva va̱ʼana saá kivi kaʼvina Tu̱ʼun Ndióxi̱, kaʼvina nu̱ú se̱ʼena tutu ña̱ kúni̱ miína, kivi katana yaa nu̱ú Ndióxi̱, kivi kaʼvina iin texto á ndakuiinna nu̱ú ndákutáʼanyó sákuaʼayó xa̱ʼa Ndióxi̱, ta ku̱a̱ʼáka ña̱ kivi keʼéna tá ná sákuaʼana letra.

Ka̱ʼún xíʼinna ña̱ va̱ása xíniñúʼu kaʼvina ki̱vi̱ iin iin na̱ʼná ña̱ va̱xi nu̱ú tutu yóʼo. Letra válí ña̱ va̱xi nu̱ú tutu yóʼo ña̱ kaʼvi mií na̱ sána̱ʼa̱ kúú ña̱yóʼo.

Tá xa̱sána̱ʼúnna, ta xíniún kǒó kívi va̱ʼa kaʼvina, saá kúú ña̱ kuee kuee sána̱ʼúnna. Kivi kuniñúʼún tutu yóʼo ña̱ sána̱ʼún iin grupo á iinda̱á na̱ yiví. Tá íyo iin pizarrón, kiviva kuniñúʼúnña, ta tá kǒóña, mitúʼun tutu yóʼo kuniñúʼún xíʼinna.

Ku̱a̱ʼá hora kuniñúʼún ña̱ sána̱ʼúnna, tá iin iin semana, ña̱kán kamaka kutu̱ʼvana. Ki̱vi̱ sána̱ʼúnna, ndakooún tarea ná keʼéna veʼena.

Tá iin iin na̱ sána̱ʼún taxiún iin tutu yóʼo ndaʼa̱na. Ka̱ʼa̱n xíʼinna ná ndukúna iin lápi á iin lapicero xíʼin iin tutu nu̱ú taana.

Vi̱íní ka̱ʼún xíʼinna, kuee kuee sána̱ʼúnna. Saá koo kuún ka̱ʼún xíʼinna.

Tá íyoka ña̱ kúni̱ún kunda̱a̱-iniún, kaʼvi ña̱ káʼa̱n página 62 nda̱a página 64. ☞