Xa̱va̱ʼaní ke̱ʼún ña̱yóʼo

Vitin kúú ña̱ xa̱sa̱kuaʼún kaʼviún letra. Xa̱sa̱kuaʼún letra ña̱ xíniñúʼuyó tá taayó tu̱ʼun sâví. Saátu xa̱sa̱kuaʼún kaʼviún ña̱ káʼa̱n Tu̱ʼun Ndióxi̱ xa̱ʼa ña̱ xi̱kuu xi̱naʼá, xa̱sa̱kuaʼún kataún yaa Ndióxi̱. Saátu xa̱xíniún nandukún texto ña̱ va̱xi nu̱ú Tu̱ʼun Ndióxi̱.

Ndakundeékaún sákuaʼún kaʼviún ta saátu ña̱ taaún letra. Ndakaʼún chi ná chika̱a̱kaún nde̱e, saá kúú ña̱ kutu̱ʼva va̱ʼakaún kaʼviún ta kuchiñu va̱ʼakaún taaún letra.

Tá kúni̱ún kachiñún nu̱ú Ndióxi̱, saá kúú ña̱ xíniñúʼu kutu̱ʼva va̱ʼún nandukún texto ña̱ va̱xi nu̱ú Tu̱ʼun Ndióxi̱, ta xíniñúʼu vi̱íní kaʼviúnña. Tutu yóʼo chindeé táʼan xíʼún ña̱ va̱ʼa keʼún ña̱yóʼo.

Xa̱va̱ʼaní ke̱ʼún ña̱yóʼo ta ndakundeékaún keʼúnña (Filipenses 3:16).