¿Yóó kúú na̱ va̱ása ítáʼan xíʼin Ndióxi̱?

Ra̱ Ndiva̱ʼa sâání-inira xínira Ndióxi̱. Ki̱ví nu̱ú xi̱kuura iin ángel va̱ʼa, ndí tá ndi̱ʼi ni̱ya̱ʼandosóra tu̱ʼun Jehová. Ra̱ Ndiva̱ʼa ndákundiééra kéʼéra ña̱ vǎʼá nu̱ú Ndióxi̱ ta ku̱a̱ʼání tu̱ndóʼo táxira ndaʼá na̱ yiví. Ra̱ Ndiva̱ʼa va̱ása va̱ʼa inira, ni va̱ása káʼa̱nra ña̱ nda̱a̱, ta ra xáʼní kúúra (Juan 8:44).

Ku̱a̱ʼá na̱ ángel nda̱kutáʼan xíʼin ra̱ Ndiva̱ʼa ña̱ sâá-inina xínina Ndióxi̱, kǒé kándixana ra. Tu̱ʼun Ndióxi̱ káʼa̱ña chi na̱ ángel yóʼo nanína demonio á tachí ndiva̱ʼa. Ndi̱a̱ tá íyo ra̱ Ndiva̱ʼa saátu íyo na̱yóʼo, sâání-inina xínina na̱ yiví. Kútóona keʼéna ña̱ vǎʼá xíʼin na̱ yiví (Mateo 9:32, 33; 12:22). Jehová sandiʼira xa̱ʼá ta̱ Ndiva̱ʼa xíʼin na̱ kúú tachí ndiva̱ʼa. Loʼoní tíempo ndôo nu̱úna ña̱ keʼéna ña̱ vǎʼá á ña̱ ni̱kuu xíʼin na̱ yiví (Revelación 12:12).

Átu kúni̱yó kutáʼan va̱ʼayó xíʼin Ndióxi̱, va̱ása keʼéyó ña̱ kúni̱ ra̱ Ndiva̱ʼa. Ra̱ Ndiva̱ʼa xíʼin na̱ kúú tachí ndiva̱ʼa sâání-inina xínina Ndióxi̱. Va̱ása ítáʼana xíʼin Ndióxi̱ ta kúni̱na kuxíkayó nu̱ú Ndióxi̱. Ña̱kán, xíniñúʼu ndakaxinyó yóó kúni̱yó sákusi̱íyó-ini: ra̱ Ndiva̱ʼa á Jehová. Átu kúni̱yó kutiakuyó ndisaá tíempo, xíniñúʼu asaayó nina ña̱ kúni̱ Ndióxi̱. Ra̱ Ndiva̱ʼa xíni̱ va̱ʼara sandáʼvira na̱ yiví, ku̱a̱ʼání ña̱ xíniñúʼura ña̱ ná ndakavana keʼéna ña̱ kini. Saá íxaara ña̱ sándáʼvira ku̱a̱ʼání na̱ yiví (Revelación 12:9).