Tu̱ʼun ña̱ ku̱a̱ʼa̱n nu̱ú na̱ íyo se̱ʼe:

Na̱ íyo se̱ʼe, kúni̱na ná kuʼvi̱-ini na̱yóʼo kunina Jehová ta ná ndataxina miína ndaʼa̱ra. ¿Ndáa ki̱ʼva chindeétáʼanna xíʼin se̱ʼena ña̱ xa̱a̱na ndakuchina? ¿Ta ama kúú ña̱ xa̱a̱ va̱ʼa ndakuchi na̱ va̱lí yóʼo?

Ta̱ Jesús ni̱ka̱ʼa̱nra xíʼin na̱ discípulora ña̱ ná ku̱ʼu̱nna natúʼunna xíʼin ndiʼi na̱ yiví ña̱ ná kundiku̱nnara ta xa̱a̱na ndakuchina (Mat. 28:19). Ta ña̱ va̱ʼa xa̱a̱na ndakuchina, xíniñúʼu koona discípulo ta̱ Cristo. Ta ña̱ koona discípulora su̱ví xíniñúʼu kuití kandíxanara ta kunda̱a̱-inina ña̱ sa̱náʼa̱ra; chi xíniñúʼu keʼéna ndiʼi chiñu ña̱ xa̱ʼndara. Ta nda̱a̱ na̱ va̱lí kuchiñu keʼé ña̱yóʼo.

Viíní koo ejemplo chindúʼúndó nu̱ú na̱ va̱lí se̱ʼendó ta viíní sanáʼa̱ndóna xa̱ʼa̱ Jehová (Deut. 6:6-9). Kuniñúʼundó ña̱ libro Kivi koo si̱íún vitin ta saátu chí nu̱únínu ña̱ va̱ʼa sanáʼa̱ndó na̱ va̱lí se̱ʼendó mií ña̱ nda̱a̱ ña̱ va̱xi nu̱ú Biblia ta chindeétáʼanndó xíʼinna ná kuniñúʼuna ña̱ va̱xi nu̱ú Biblia tá ndáka̱xinna ña̱ keʼéna. Sanáʼa̱ndóna ña̱ viíní ná ka̱ʼa̱nna xa̱ʼa̱ ña̱ kándíxana Ndióxi̱ (1 Ped. 3:15). Ndiʼi ña̱ sánáʼa̱ndóna, ndee̱ ña̱ chíka̱a̱ndó xíʼinna, ña̱ káʼvi miína Biblia, tá káʼvitundó xíʼinna, ña̱ reunión xíʼin na̱ migona na̱ íyo ti̱xin congregación. Ña̱yóʼo kúú ña̱ chindeétáʼan xíʼinna ña̱ xa̱a̱na ndakuchina ta chika̱a̱kana ndee̱ ña̱ ndasakáʼnukana Ndióxi̱. Saátu va̱ása nandósóndó ña̱ chindeétáʼanndó xíʼinna ña̱ keʼéna ku̱a̱ʼáka chiñu nu̱ú Ndióxi̱.

Proverbios 20:11 káchiña: “Nda̱a̱ ta̱ loʼo kivi ka̱ʼa̱n va̱ʼana xa̱ʼa̱ra tá nina ña̱ va̱ʼa kéʼéra”. ¿Ndáaña náʼa̱ ña̱ na̱ va̱lí se̱ʼún kúúna discípulo ta̱ Jesús ta xa̱a̱ íyo tu̱ʼvana ña̱ ndakuchina?

Ña̱ Biblia káʼa̱nña ña̱ 12 loʼo ku̱i̱ya̱ ta̱ Jesús ta xa̱a̱ va̱ʼaní ni̱xi̱yo so̱ʼora (Luc. 2:51). Ta saátu na̱ va̱lí na̱ kúni̱ ndakuchi xíniñúʼu va̱ʼaní kuniso̱ʼona ña̱ káʼa̱n yivána xíʼinna (Hech. 5:29; Col. 3:20). Soo sava yichi̱ na̱ va̱lí yóʼo keʼévana ña̱ va̱ása va̱ʼa. Soo xíniñúʼu chika̱a̱na ndee̱ ña̱ kundiku̱nna ejemplo ta̱ Jesús ta ndiʼina kiʼin kuenta ña̱ va̱ʼaní xíniso̱ʼo na̱yóʼo.

Saátu ndáyáʼviní na̱ʼa̱ na̱ va̱lí yóʼo ña̱ kúni̱kana kunda̱a̱-inina xa̱ʼa̱ ña̱ va̱xi nu̱ú Biblia (Luc. 2:46). Ndakanixi̱ní xa̱ʼa̱ pregunta yóʼo: “¿Á kúsi̱í-ini na̱ va̱lí se̱ʼíi̱ ña̱ ku̱ʼu̱nna reunión ta taxina comentario? ¿Á kútóona kaʼvina Biblia ta ndakanixi̱nína xa̱ʼa̱ ña̱ káʼvina? (Sal. 122:1; Mat. 4:4).

Na̱ va̱lí na̱ kúni̱ ndakuchi siʼnaka chiñu Ndióxi̱ chíka̱a̱na ndee̱ keʼéna (Mat. 6:33). Ta kúnda̱a̱-inina ña̱ xíniñúʼu natúʼunna xíʼin na̱ yiví xa̱ʼa̱ ña̱ kándíxana Ndióxi̱. Ta ku̱a̱ʼá chiñu kéʼéna nu̱úra. Ta va̱ása kúkaʼan nu̱úna ña̱ natúʼunna xíʼin na̱ maestrona saátu xíʼin na̱ va̱lí na̱ káʼvi xíʼinna escuela ña̱ kúúna testigo Jehová. Saátu viíní sákuaʼana ña̱ ya̱ʼana ti̱xin reunión ña̱ xíyo ma̱ʼñú semana.

Na̱ va̱lí na̱ kúni̱ ndakuchi chíka̱a̱na ndee̱ ña̱ va̱ása kéʼéna ña̱ kini. Ña̱kán viíní ndáka̱xinna ndáana kutáʼanna xíʼin, ta kíʼinna kuenta xíʼin yaa ña̱ xíniso̱ʼona, película ña̱ xítona, programa ña̱ va̱xi nu̱ú televisión, videojuego á xíʼin ña̱ xítona nu̱ú Internet (Prov. 13:20; 1 Cor. 15:33).

Tíxa̱ʼvi ña̱ chíka̱a̱ní na̱ íyo se̱ʼe ndee̱ xíʼin na̱ va̱lí se̱ʼena, ku̱a̱ʼání na̱ va̱lí yóʼo xáa̱na sákuaʼana ña̱ nda̱a̱ xa̱ʼa̱ Ndióxi̱ ta nda̱a̱ ndákuchina. Jehová ná chika̱a̱ bendición ndóʼó xa̱ʼa̱ ña̱ chíka̱a̱níndó ndee̱ ña̱ sánáʼa̱ndó se̱ʼendó ña̱ xa̱a̱na ndakuchina.

Tu̱ʼun ña̱ ku̱a̱ʼa̱n nu̱ú na̱ publicador na̱ kúma̱ní ndakuchi:

Ña̱ ka̱ʼviún Biblia chi̱ndeétáʼanña xíʼún ña̱ ni̱xa̱ún ku̱nda̱a̱-iniún xa̱ʼa̱ Ndióxi̱, ta chi̱ndeéña yóʼó ña̱ va̱ʼa ni̱xa̱ún ka̱ndíxaún ña̱ káʼa̱nra keʼéra chí nu̱únínu saátu chi̱ndeétáʼanña xíʼún ña̱ xu̱xaka iniún xíʼin tu̱ʼun Ndióxi̱ ta ni̱xa̱ún ku̱ún publicador. Ta kúsi̱íní-inindi̱ xa̱ʼa̱ chiñu ña̱ kéʼún (Juan 17:3; Heb. 11:6).

Tá kúma̱níka sakuaʼún xíʼin na̱ testigo Jehová, sana xi̱xa̱ʼa̱nvaún inka veʼe-ñu̱ʼu á sanatu va̱ása níxi̱kutóún nda̱a̱ ni iin religión. Sana xi̱keʼún sava ña̱ va̱ása níxi̱kutóo Ndióxi̱. Soo vitin xa̱ʼa̱ ña̱ ni̱xa̱ún ka̱ndíxaún Ndióxi̱ ta ndi̱kó-iniún xa̱ʼa̱ ndiʼi ña̱ va̱ása va̱ʼa níxi̱keʼún. Ta vitin xa̱a̱ nda̱koún ndiʼi ña̱ xi̱keʼún tá ya̱chi̱ ta vitin xa̱a̱ keʼún ña̱ kúni̱ Ndióxi̱ (Hech. 3:19).

Sana nda̱a̱ tá loʼún sa̱náʼa̱ na̱ yiváún yóʼó xa̱ʼa̱ Ndióxi̱, ta ña̱yóʼo chi̱ndeétáʼanña xíʼún ña̱ keʼún ña̱ va̱ʼa ta va̱ása ki̱ʼviún ku̱a̱chi nu̱ú Ndióxi̱ (2 Tim. 3:15). Ta sa̱kuaʼún ña̱ kundeé-iniún ña̱ va̱ása ki̱ʼviún ku̱a̱chi kini. Ta xa̱ʼa̱ ña̱ kándíxaún Ndióxi̱ káʼún xíʼin inka na̱ yiví xa̱ʼa̱ ña̱ kándíxaún. Ta xa̱ʼa̱ ndiʼi ña̱ ni̱xa̱ún sa̱kuaʼún, ni̱xa̱ún ku̱ún publicador.

Sana loʼún á sana xa̱a̱ chéevaún sa̱kuaʼún xa̱ʼa̱ Jehová, soo vitin xa̱a̱ ndákanixi̱níún ña̱ ndataxiún miíún ndaʼa̱ Jehová ta ndakuchiún. Ki̱vi̱ ndátaxiyó miíyó ndaʼa̱ Jehová saá kúú ña̱ káʼa̱nyó xíʼinra ña̱ iinlá miíra kúni̱yó kachíñuyó nu̱ú ndiʼi tiempo (Mat. 16:24). Tasaá xáa̱yó ndákuchiyó (Mat. 28:19, 20). Ña̱ ni̱xa̱a̱yó nda̱taxiyó miíyó ndaʼa̱ Jehová ta nda̱kuchiyó, kúni̱ kachiña ña̱ nda̱kaxinyó kachíñuyó nu̱ú Ndióxi̱ ta viíní keʼéyó chiñura, iin ña̱ va̱ʼaní kúú ña̱yóʼo.

Tu̱ʼun Ndióxi̱ káʼa̱nña ña̱ tá nda̱kuchi ta̱ Jesús, ta̱ ndi̱va̱ʼa xi̱tondosórara nu̱ú ñuʼú yi̱chí (Mat. 4:1). Saátu nda̱a̱ táki̱ʼva sa̱kuaʼún nu̱ú Biblia, kivitu koo prueba nu̱ún, ta kookaña nu̱ún tá ná ndiʼi ndakuchiún (Juan 15:20). Sana na̱ veʼún va̱ása kutóona ña̱ sákuaʼún xa̱ʼa̱ Ndióxi̱, ta sana na̱ káʼvi xíʼún escuela kusi̱kindaana yóʼó, saátu na̱ káchíñu xíʼún ta saátu na̱ migoún (Mat. 10:36). Ña̱kán ndiʼi tiempo ndakaʼún xa̱ʼa̱ ña̱ ni̱ka̱ʼa̱n ta̱ Jesús: “Ña̱ nda̱a̱ káʼi̱n xíʼinndó nda̱a̱ ndáaka na̱ sandákoo veʼena, ñanina, ku̱ʼvana, siʼína, yivána, se̱ʼena á ñuʼúna xáʼíi̱ ta saátu xa̱ʼa̱ tu̱ʼun va̱ʼa, ta tiempo vitin ndakiʼinna veʼena, ñanina, ku̱ʼvana, siʼína, se̱ʼena, ñuʼúna, ta nda̱a̱ yáʼaka cien yichi̱ ndakiʼinnaña nu̱úka ña̱ xi̱kuumiína, soo kixitu tu̱ndóʼo nu̱úna, ta chí nu̱únínu kutakuna ndiʼi tiempo” (Mar. 10:29, 30). Ni nda̱a̱ ndáaka tu̱ndóʼo ná kixi nu̱ún, va̱ása ndakoún ña̱ ndasakáʼnún Jehová ta saátu ña̱ kundiku̱ún ña̱ káʼa̱nra.

Tá kúni̱ún ndakuchiún, ka̱ʼa̱n xíʼin ta̱ coordinador na̱ anciano. Ña̱ va̱ʼa ná kotona á xa̱a̱ íyo tu̱ʼvaún ña̱ ndakuchiún, ta na̱ anciano nda̱ka̱tu̱ʼúnna yóʼó pregunta ña̱ va̱xi nu̱ú tutu yóʼo. Ta xa̱a̱ kivi kaʼvi kúeún xa̱ʼa̱ ña̱yóʼo.

Tá ná kixáʼa kúeún kaʼviún ña̱ pregunta yóʼo, kaʼvi ndiʼi texto ña̱ va̱xi nu̱úña ta ndakanixi̱ní xa̱ʼa̱ña. Kivi kaʼyíún sava ña̱ kuniñúʼún tá ná nda̱ka̱tu̱ʼunna yóʼó. Ta tá ná kixáʼa na̱ anciano keʼéna pregunta xíʼún, kivi kuniñúʼún ña̱ tutu yóʼo ta saátu kivi kuniñúʼún ña̱ ka̱ʼyíún nu̱úña. Tá va̱ása kúnda̱a̱ va̱ʼa iniún xíʼin pregunta, ka̱ʼa̱n xíʼin na̱ sánáʼa̱ yóʼó á iin na̱ anciano ña̱ ná chindeétáʼanna xíʼún.

Tá ná nda̱ka̱tu̱ʼun na̱ anciano yóʼó, va̱ása xíniñúʼu ku̱a̱ʼání ka̱ʼún, ná ndakuiin kuitíún míí ña̱ ndáka̱tu̱ʼunna yóʼóva. Kivitu kuniñúʼún iin á u̱vi̱ texto ña̱ va̱xi nu̱ú ña̱ tutu yóʼo.

Tá na̱ anciano ki̱ʼinna kuenta ña̱ íxaa ma̱níka loʼo kunda̱a̱-iniún ña̱ káʼa̱n Biblia, kivi ndukúna iin na̱ chindeé yóʼó ña̱ va̱ʼa kunda̱a̱ va̱ʼa iniún xa̱ʼa̱ña, tasaá va̱ʼa xa̱ún ndakuchiún chí nu̱únínu loʼoka.

[Ña̱ káʼa̱n xíʼin na̱ anciano ña̱ congregación: Ña̱ taxi yichi̱ nu̱úndó ndáa ki̱ʼva nda̱ka̱tu̱ʼunndó na̱ kúni̱ ndakuchi, va̱xiña nu̱ú página 54 nda̱a̱ 59].