¿Ndáa tu̱ʼun va̱ʼa kúú ña̱ xíniñúʼu kunda̱a̱-iniyó?

1. ¿Ndáa tu̱ʼun va̱ʼa kúú ña̱ káʼa̱n Ndióxi̱ xíʼinyó?

Ndióxi̱ kúni̱ra si̱íní ná kundoo ndiʼiyó nu̱ú Ñuʼú yóʼo. I̱xava̱ʼara Ñuʼú ta i̱xava̱ʼara ndiʼi ña̱ʼa ña̱ íyo nu̱úña xa̱ʼa ña̱ kúʼvi̱-inira xínira miíyó. Xa̱kuyatin sandiʼi-xa̱ʼara ndiʼi tu̱ndóʼo, tasaá va̱ʼaní kundoo ndiʼi na̱ yiví nu̱úña. Kaʼvi Jeremías 29:11.

Ni iin na̱ chíñu ñuyǐví yóʼo kǒo kúchiñuna sandiʼi-xa̱ʼana ndiʼi tu̱ndóʼo ni kue̱ʼe̱ ni ña̱ xíʼi̱ na̱ yiví. Soo íyo iin tu̱ʼun va̱ʼa ña̱ kúni̱ Ndióxi̱ kunda̱a̱-iniyó. Xa̱kuyatin sandiʼi-xa̱ʼara ndiʼi na̱ xáʼndachíñu ñuyǐví yóʼo. Se̱ʼera ta̱ Jesús kúú ta̱ kaʼndachíñu iníísaá ñuyǐví. Na̱ ñuu Ndióxi̱ va̱ʼaní kundoona ta ni kǒoka kue̱ʼe̱ koo nu̱úna. Kaʼvi Isaías 25:8; 33:24 xíʼin Daniel 2:44.

2. ¿Ndachun ndáʼyáviní tu̱ʼun va̱ʼa ña̱ káʼa̱n Ndióxi̱ xíʼinyó?

Ña̱ ná ndiʼi-xa̱ʼa tu̱ndóʼo yóʼo, xíniñúʼu sandiʼi-xa̱ʼa Ndióxi̱ ndiʼi na̱ yiví na̱ kéʼé ña̱ kini (Sofonías 2:3). Ta, ¿ama sandiʼi-xa̱ʼara na̱yóʼo? Xi̱naʼáví ni̱ka̱ʼa̱n Tu̱ʼun Ndióxi̱ xa̱ʼa ndiʼi tu̱ndóʼo ña̱ íyo tíempo vitin. Ndiʼi ña̱ xíniyó vitin kúúña iin séña ña̱ xa̱kuyatin sandiʼi-xa̱ʼa Ndióxi̱ ndiʼi ña̱ kini. Kaʼvi 2 Timoteo 3:1-5.

3. ¿Ndáaña xíniñúʼu keʼéyó?

Xíniñúʼu kaʼviyó Tu̱ʼun Ndióxi̱ tasaá va̱ʼa sakuaʼayó xa̱ʼara. Ta ña̱yóʼo nda̱a̱ tá íyo iin carta ña̱ chíndaʼá iinna ku̱a̱ʼa̱n nu̱ú se̱ʼe ma̱ni̱na, saá íyoña. Chi ña̱yóʼo káʼa̱nña xíʼinyó ndáaña xíniñúʼu keʼéyó ta saá si̱í koo-iniyó kundooyó tíempo vitin, ta káʼa̱nña xíʼinyó ndáaña xíniñúʼu keʼéyó ta saá va̱ʼa kutakuyó ndiʼi tíempo. Tá kíxaʼáyó káʼviyó ña̱ Biblia su̱ví ndiʼina kusi̱í-ini. Soo va̱ása taxiyó sandakava na̱yóʼo iniyó, chi bendición ña̱ taxi Ndióxi̱ ndaʼa̱yó va̱ʼaka ña̱yóʼo nu̱ú ndiʼika ña̱ʼa. Kaʼvi Proverbios 29:25 xíʼin Revelación (Apocalipsis) 14:6, 7.