¿Ndáaña xíniñúʼu keʼé na̱ tíndaʼa̱ ña̱ va̱ʼa si̱íní kundoo xíʼin táʼanna?

1. ¿Ndachun xíniñúʼu tindaʼa̱ va̱ʼana?

Jehová iin Ndióxi̱ ta̱ si̱íní-ini kúúra, ta kúni̱ra si̱íní ná kooyó xíʼin na̱ veʼeyó ña̱kán káʼa̱nra tu̱ʼun va̱ʼa xíʼinyó (1 Timoteo 1:11). Ta ta̱yóʼo kúú ta̱ chi̱ndúʼu xa̱ʼa ña̱ tíndaʼa̱yó. Tá ná tindaʼa̱ va̱ʼayó si̱íníka kundooyó xíʼin se̱ʼeyó.

Nu̱ú Ndióxi̱ na̱ tíndaʼa̱ va̱ʼa xíniñúʼu koo xíʼin táʼanna ndiʼi tíempo. Na̱ chíñu ñuyǐví yóʼo chi̱ndúʼuna iin ley ña̱ káʼa̱n xa̱ʼa ña̱ tindaʼa̱ va̱ʼayó, ta na̱ sákuaʼa xa̱ʼa Ndióxi̱ xíniñúʼu kandíxana ley yóʼo (Lucas 2:1, 4, 5). Jehová va̱ása kúni̱ra ña̱ sandáʼvi-táʼan na̱ xa̱tindaʼa̱ ña̱ ku̱su̱nna xíʼin inkana (Hebreos 13:4). Jehová ni loʼo kǒo kúni̱ra ña̱ sandákootáʼan na̱ xa̱ti̱ndaʼa̱ (Malaquías 2:16). Soo táxivara sandákootáʼanna tá xaa ñá síʼína á yíi̱na ni̱ki̱ʼvina xíʼin inka ñaʼá a inka ta̱a tá nda̱a̱ kivi xa̱a̱na tindaʼa̱ tukuvana. Kaʼvi Mateo 19:3-6, 9.

2. ¿Nda̱saa xíniñúʼu kundoo xíʼin táʼan na̱ ti̱ndaʼa̱?

Jehová síín i̱xava̱ʼara ta̱a ta síín i̱xava̱ʼara ñaʼá ña̱kán tá tíndaʼa̱na va̱ʼa chindeé táʼanna xíʼin táʼanna (Génesis 2:18). Ta̱ ta̱a kúú ta̱ xíniñúʼu kaʼndachiñu ti̱xin veʼera ta ta̱yóʼo kúú ta̱ xíniñúʼu kachíñu ña̱ va̱ʼa taxira ña̱ kuxu na̱ veʼera ta xíniñúʼu sanáʼa̱rana xa̱ʼa Ndióxi̱. Ta xa̱ʼa ña̱ kúni̱ra ñá síʼíra nda̱a̱ sava yichi̱ sandákoora chiñu ña̱ kútóora keʼéra. Na̱ ti̱ndaʼa̱ xíniñúʼu kuʼvi̱-inina kuni táʼanna ta tǒʼo koo xíʼin táʼanna. Chi u̱vi̱ saána kúú na̱ yiví ku̱a̱chi xa̱ʼa ña̱yóʼo xíniñúʼu koona ña̱ káʼnu-ini xa̱ʼa táʼanna ta saá si̱í koo xíʼin táʼanna. Kaʼvi Efesios 4:31, 32; 5:22-25, 33 xíʼin 1 Pedro 3:7.

3. ¿Á xíniñúʼu sandákootáʼan na̱ ti̱ndaʼa̱ ta va̱ása va̱ʼa ndóo xíʼin táʼanna?

Tá va̱ása va̱ʼa ndóo xíʼin táʼanna xíniñúʼu chika̱a̱kana ndée ña̱ kuʼvi̱-inina kunitáʼanna (1 Corintios 13:4, 5). Tu̱ʼun Ndióxi̱ va̱ása káʼa̱nña ña̱ va̱ʼa taʼví-táʼanna tá íyo ku̱a̱chi ti̱xin veʼena. Kaʼvi 1 Corintios 7:10-13.

4. ¿Ndasaa kúni̱ Ndióxi̱ koo na̱ va̱lí?

Jehová kúni̱ra si̱íní ná koo na̱ va̱lí. Ña̱kán sánáʼa̱ra na ndáaña kúú ña̱ xíniñúʼu keʼéna ña̱ va̱ʼa si̱íka koona. Va̱ʼaníka koona tá ná kuniso̱ʼona ña̱ káʼa̱n yivána xíʼin siʼína chi xíni̱ka na̱yóʼo nu̱úna (Colosenses 3:20). Ta kúni̱tura ná keʼéna ña̱ káʼa̱nra ta xíʼin ña̱ káʼa̱n se̱ʼera Jesús tasaá si̱íka koona. Kaʼvi Eclesiastés 11:9–12:1; Mateo 19:13-15 xíʼin 21:15, 16.

5. ¿Ndáaña xíniñúʼu keʼéndó ña̱ va̱ʼa si̱í kundoondó xíʼin se̱ʼendó?

Na̱ íyo se̱ʼe xíniñúʼu koo veʼena, kachíñuna ña̱ va̱ʼa taxina ña̱ kuxu se̱ʼena ta satána á kueena ti̱ko̱to̱na (1 Timoteo 5:8). Ta su̱ví ña̱yóʼo kuití keʼéna. Xíniñúʼu sanáʼa̱na se̱ʼena ña̱ kuʼvi̱-inina kúnina Ndióxi̱ ta keʼéna ña̱ kúni̱ra (Efesios 6:4). Tá ki̱vi̱ kéʼéna ña̱ káʼa̱n Ndióxi̱ saá náʼa̱na ña̱ kúni̱na Ndióxi̱ ta se̱ʼena xítona ña̱yóʼo ta sákuaʼana keʼéna ña̱yóʼo. Tá ki̱vi̱ sánáʼa̱na se̱ʼena xa̱ʼa ña̱ káʼa̱n Tu̱ʼun Ndióxi̱ ña̱yóʼo chindeéníña se̱ʼena. Kaʼvi Deuteronomio 6:4-7 xíʼin Proverbios 22:6.

Xíniñúʼu vií ka̱ʼa̱nna xíʼin na̱ va̱lí se̱ʼena xa̱ʼa chiñu ña̱ kéʼéna. Sava yichi̱ xíniñúʼu taxina konsejo ndaʼa̱na ta saá kiʼinna iin yichi̱ va̱ʼa (Proverbios 22:15). Tá táxina konsejo ndaʼa̱ se̱ʼena ná kǒo nda̱ʼyu kinina nu̱úna á kani ndiva̱ʼanana. Kaʼvi Colosenses 3:21.

Na̱ testigo Jehová xa̱ku̱a̱ʼání tutu távana ña̱ ku̱a̱ʼa̱n ndaʼa̱ na̱ chée ta íyotu tutu ña̱ ku̱a̱ʼa̱n ndaʼa̱ na̱ va̱lí se̱ʼevana. Ta ndiʼi ña̱yóʼo távánaña nu̱ú Biblia. Kaʼvi Salmo 19:7, 11.