¿Ndáaña ndákanixi̱níún xa̱ʼa Biblia?

ÑA̱ KÁʼA̱N BIBLIA

“Ndiʼi ña̱ ni̱ka̱ʼyi̱ nu̱ú tutu yi̱i̱ tu̱ʼun Ndióxi̱ kúúña” (2 Timoteo 3:16, Traducción del Nuevo Mundo).

¿NDÁAÑA VA̱ʼA NDAKIʼÚN TÁ NÁ KAʼVIÚNÑA?

Kunda̱a̱-iniún xa̱ʼa ku̱a̱ʼání ña̱ʼa va̱ʼa ña̱ ndákatuʼún miíún (Proverbios 2:1-5).

Taxiña iin yichi̱ va̱ʼa nu̱ún, ña̱ va̱ʼa koún (Salmo 119:105).

Va̱ʼa kunda̱a̱-iniún xa̱ʼa ña̱ʼa va̱ʼa ña̱ koo chí nu̱únínu (Romanos 15:4).

¿Á VA̱ʼA KANDÍXAYÓ ÑA̱ KÁʼA̱N BIBLIA?

Va̱ʼava, yóʼo sakuaʼayó xa̱ʼa u̱ni̱ ña̱ʼa:

• Iin nu̱ú káʼa̱n ndiʼi ña̱ va̱xi nu̱ú Biblia. U̱vi̱ xiko ta̱a kúú na̱ ka̱ʼyí ña̱ Biblia ta iin mil i̱ñu̱ ciento ku̱i̱ya̱ ka̱ʼyínaña. Ku̱a̱ʼání na̱ ka̱ʼyí ña̱yóʼo ta su̱ví iin tiempo níxindoo ndiʼina, ni saáví iinva ña̱ʼa káʼa̱n iníísaá Biblia xa̱ʼa.

• Na̱ ka̱ʼyíña nina ña̱ nda̱a̱ ka̱ʼyína. Sava na̱ káʼyí tutu chíse̱ʼé yu̱ʼu̱na xa̱ʼa tu̱ndóʼo ña̱ ndóʼo na̱ ñuuna, nina ña̱ va̱ʼa kuití káʼyína. Soo na̱ ka̱ʼyí tu̱ʼun Ndióxi̱ va̱ása níchise̱ʼé yu̱ʼu̱na xa̱ʼa ku̱a̱chi ña̱ ke̱ʼéna á ña̱ ke̱ʼé na̱ ñuuna (2 Crónicas 36:15, 16; Salmo 51:1-4).

• Ndiʼi ña̱ káʼa̱n Biblia xínu nu̱úña. Tá kúma̱níka u̱vi̱ ciento ku̱i̱ya̱ saáví ni̱ka̱ʼa̱n ña̱ Biblia ña̱ ndiʼi-xa̱ʼa ñuu Babilonia ña̱ ni̱xi̱yo xi̱naʼá (Isaías 13:17-22). Soo kǒo níkáʼa̱n kuitíña ndáaña ndoʼo ñuu yóʼo, chi nda̱a̱ ni̱ka̱ʼa̱nña ndáa ta̱ sandiʼi-xa̱ʼaña (Isaías 45:1-3).

  Ta ku̱a̱ʼáka ña̱ va̱xi nu̱ú Biblia ña̱ ni̱ka̱ʼa̱nña kuu xi̱naʼá, ni̱xi̱nu ndiʼi ña̱yóʼo. ¿Á su̱ví saá kúú ña̱ ndátunyó koo tu̱ʼun Ndióxi̱? (2 Pedro 1:21).