¿Á kivi chindeétáʼan Biblia xíʼi̱n?

¿NDÁAÑA KEʼÚN?

Ndakanixi̱ní xa̱ʼa̱ ña̱yóʼo: Ta̱ David xíkara ku̱a̱ʼa̱nra inka ñuu ta xa̱a̱ ñuú kúúña. Ta xa̱ʼa̱ ña̱ naání va̱ása xíni̱ra ndáa míí ndíka̱a̱ra. Saá kúú ña̱ ki̱ʼinra kuenta ña̱ xi̱nuʼnira. Sana íyo inka yichi̱ ni̱ki̱ʼvira ta kǒo níkiʼinra kuenta.

¿Ndáaña keʼún tá yóʼó níxi̱yo ta̱ David?

KUNDATU TA NDAKANIXI̱NÍ

Ku̱a̱ʼá kúú ña̱ kivi keʼún:

1. Nda̱ka̱tu̱ʼún na̱ xíni̱ yichi̱.

2. Kuniñúʼún iin ñuʼu̱ ña̱ kutuu̱n nu̱ún.

3. Ndakundeún kakaún nda̱a̱ ná ndani̱ʼún yichi̱ nu̱ú xíniñúʼu ku̱ʼún.

Ña̱ va̱xi ti̱xin ña̱ C ña̱kán kúú mií ña̱ kíʼvika.

Ña̱ B sana va̱ʼaka loʼoña, saáchi kivi kuumiíún iin ñuʼu̱ ña̱ kutuu̱n nu̱ún iníísaá yichi̱ kán.

Ki̱ʼva saá íyo ña̱ Biblia.

Libro yóʼo kúú ña̱ va̱ʼaníka chindeé yóʼó ña̱ keʼún ña̱yóʼo:

• Na̱ʼa̱ña yichi̱ nu̱ún tá yáʼún nu̱ú iin tu̱ndóʼo.

• Chindeéña yóʼó ña̱ kunda̱a̱-iniún ndáa ki̱ʼva íyoún ta ndáaña keʼún ña̱ va̱ʼaka koún.

• Sánáʼa̱ña yóʼó ndáa ki̱ʼva viíka koún.

ÑA̱ KÁʼA̱N XA̱ʼA̱ KU̱A̱ʼÁNÍ ÑA̱ NDÁKA̱TU̱ʼUNYÓ MIÍYÓ

Tá kíxáʼayó káʼa̱nyó, kíxáʼayó ndáka̱tu̱ʼunyó xa̱ʼa̱ sava ña̱ʼa:

• ¿Nda̱chun ña̱ ndíʼi kúú chí ndiví?

• ¿Ndáa ña̱ʼa na̱kuva̱ʼa tí ki̱mi?

Tándi̱ʼi kíxáʼayó ndáka̱tu̱ʼunyó xa̱ʼa̱ ña̱ʼa ña̱ íyo ñuyǐví yóʼo:

• ¿Nda̱chun íyoní ña̱ kini?

• ¿Nda̱chun xíʼi̱ na̱ yiví?

¿Á xa̱a̱ xíni̱ún ña̱ nu̱ú Biblia kivi kunda̱a̱-iniún xa̱ʼa̱ ndiʼi ña̱yóʼo?

Ku̱a̱ʼání na̱ yiví káʼa̱nna ña̱ cuento kúú ña̱ va̱xi nu̱ú Biblia, á savatuna káʼa̱nna ña̱ yo̱ʼvi̱níña á ña̱ kúúña iin libro ña̱ yatání ta va̱ása va̱ʼaka consejo ña̱ táxiña. Soo ¿á ña̱ ndixa kúú ña̱yóʼo?

Tá kúú, na̱ yiví túvina ña̱ Biblia káʼa̱nña ña̱ míí Ndióxi̱ kúú ta̱ xáʼndachíñu nu̱ú ñuʼú yóʼo. Soo, ¿á ña̱ nda̱a̱ kúú ña̱yóʼo? Nu̱ú ñuyǐví yóʼo íyoní ña̱ kini. Iníísaá íyo tu̱ndóʼo, íyo kue̱ʼe̱, ña̱ xíʼi̱, na̱ ndáʼvi xíʼin ña̱ sándiʼi-xa̱ʼa̱ ñuʼú. ¿Á va̱ʼa chika̱a̱yó ku̱a̱chi Ndióxi̱ ta̱ kúʼvi̱ní-ini xíni miíyó xa̱ʼa̱ ndiʼi ña̱yóʼo?

¿Á kúsi̱í-iniún kunda̱a̱-iniún ndáana kúú na̱ xáʼndachíñu nu̱ú ñuyǐví yóʼo? Ña̱ káʼa̱n ña̱ Biblia kivi chindeétáʼanña xíʼún.

Tá kúú miíún sana xa̱a̱ ki̱ʼún kuenta ña̱ consejo ña̱ va̱xi nu̱ú folleto yóʼo ka̱naña nu̱ú ña̱ Biblia. Na̱ testigo Jehová kándíxanína ña̱ Biblia kúú ña̱ va̱ʼaní níʼi yichi̱ nu̱úyó saáchi “xíʼin ta̱chí yi̱i̱ Ndióxi̱ ni̱ka̱ʼyi̱ña, ta va̱ʼaní sánáʼa̱ña, ta chíka̱a̱ña miíyó yichi̱ nda̱kú tasaá násamaña miíyó xíʼin ña̱ kéʼéyó” (2 Timoteo 3:16, 17). Chika̱a̱ ndee̱ ña̱ kunda̱a̱-iniún xa̱ʼa̱ libro yóʼo, iin ña̱ xa̱a̱ ku̱a̱ʼání tiempo íyo soo va̱ʼanítuña tiempo ña̱ ndóoyó vitin.