Nda̱taku se̱ʼe iin ñá ni̱xi̱ʼi̱ yií

Tá kǒo sa̱vi̱ níxi̱yo, Jehová ni̱ka̱ʼa̱nra xíʼin ta̱ Elías: “Kúaʼan chí ñuu Sarepta. Kán íyo iin ñaʼá ñá ni̱xi̱ʼi̱ yií ta ñáyóʼo taxi ña̱ʼa kuxún”. Tá ni̱xa̱a̱ra yéʼé ñuu xi̱nira iin ñaʼá ñá ni̱xi̱ʼi̱ yií ndákayañá titu̱n ta ndu̱kúra ti̱kui̱í koʼora nu̱úñá. Tá ku̱a̱ʼa̱nñá ndukúñárá, ta̱ Elías ni̱ka̱ʼa̱ntura: “¿Á kivi taxiún kuxuíi̱?”. Soo ñáyóʼo nda̱kuiinñá: “Kǒo ni loʼo ña̱ʼa nu̱úi̱ kuxún. Ña̱ kúúmiíi̱ kúú harina xíʼin aceite ña̱ keʼíi̱ ña̱ kuxuíi̱ xíʼin se̱ʼi̱”. Soo ta̱ Elías ni̱ka̱ʼa̱nra: “Jehová ni̱ka̱ʼa̱nra tá ná keʼún ña̱ kuxui̱ va̱ása ndiʼi aceite xíʼin harina ña̱ kúúmiíún ndiʼi tiempo ña̱ kǒo sa̱vi̱ koon”.

Xa̱ʼa ña̱yóʼo ku̱a̱ʼa̱nñá chí veʼeñá ta ke̱ʼéñá ña̱ kuxu ta̱ Elías. Ñáyóʼo xíʼin se̱ʼeñá va̱ása níndiʼi ña̱ kuxuna ndiʼi tiempo ña̱ kǒo sa̱vi̱ ni̱xi̱yo nda̱a̱ tá ni̱ka̱ʼa̱n Jehová. Ta va̱ása níndiʼi harina xíʼin aceite ini jarra ña̱ kúúmiíñá.

Soo tándi̱ʼi íyo iin ña̱ suchí-ini ku̱u. Ta̱ loʼo se̱ʼeñá ki̱ʼin kue̱ʼe̱ra ta ni̱xi̱ʼi̱ra, soo ñáyóʼo ni̱ka̱ʼa̱nñá xíʼin ta̱ Elías ña̱ ná chindeérañá. Ta̱ Elías nda̱kiʼinra ta̱ loʼo yóʼo. Ta ku̱a̱ʼa̱nra inka cuarto ña̱ íyo chí ni̱nu. Tasaá chi̱núurara nu̱ú xi̱tora ta ni̱ka̱ʼa̱nra: “Jehová, káʼa̱n ndáʼvii̱ xíʼún, sandátaku ta̱ loʼo yóʼo”. ¿Á xíni̱ún nda̱chun ndákanda̱-iniyó tá sa̱ndátaku Jehová ta̱ loʼo yóʼo? Saáchi nda̱a̱ iin na̱ yiví ta̱ʼán ndataku tiempo saá. Ta inka tukuña, ñá nána yóʼo xíʼin ta̱ loʼo se̱ʼeñá su̱ví na̱ ñuu Israel kúúna.

Tasaá ta̱ loʼo yóʼo ki̱xaʼá ndákiʼinra ta̱chíra ta nda̱takura. Ta̱ Elías ni̱ka̱ʼa̱nra xíʼin ñáyóʼo: “Koto, tákuva se̱ʼún”. Ni̱kusi̱íní-iniñá ta ni̱ka̱ʼa̱nñá xíʼin ta̱ Elías: “Vitin na̱kunda̱a̱-inii̱ Ndióxi̱ kúú ta̱ chi̱ndaʼá yóʼó. Ta ndiʼi ña̱ káʼún xínuña chi Jehová kúú ta káʼa̱nña xíʼún”.