Ndi̱ʼi-xa̱ʼa ñuu Jerusalén

Na̱ ñuu Judá va̱ása ndásakáʼnukana Jehová chi ndióxi̱ vatá ndásakáʼnuna. Soo ndiʼi tiempo xi̱kuni̱va Jehová chindeérana ta chi̱ndaʼára ku̱a̱ʼání na̱ profeta nu̱úna. Soo va̱ása níxixiniso̱ʼona ta xi̱xaku̱ndaana na̱yóʼo. Jehová xi̱kuni̱ra ña sandákoona na̱ ndióxi̱ vatá. Soo ¿ndáaña ke̱ʼéra?

Ta̱ Nabucodonosor kúú rey ñuu Babilonia, xa̱a̱ ku̱a̱ʼání ñuu sa̱ndíʼi-xa̱ʼara. Ta ña̱ yichi̱ nu̱ú ña̱ ki̱xira ka̱nitáʼanra xíʼin na̱ ñuu Jerusalén, nda̱kiʼinra ta̱ rey Joaquín, na̱ príncipe, na̱ xíka nu̱ú ku̱a̱chi, xíʼin na̱ va̱ʼa íxava̱ʼa ña̱ʼa ku̱a̱ʼa̱nna xíʼinra chí ñuu Babilonia. Nda̱kiʼintura ndiʼi ña̱ʼa ña̱ íyo ini templo Jehová. Tasaá ta̱ Nabucodonosor nda̱ka̱xinra ta̱ Sedequías ña̱ koora rey nu̱ú na̱ ñuu Judá.

Ta̱ rey Sedequías xi̱kandíxara ña̱ xi̱ka̱ʼa̱n ta̱ Nabucodonosor. Soo na̱ profeta vatá xíʼin inka na̱ yiví ni̱ka̱ʼa̱nna xíʼinra ña̱ kǒo keʼékara ña̱ káʼa̱n ta̱ rey ñuu Babilonia. Ta̱ Jeremías ni̱ka̱ʼa̱nra xíʼinra: “Tá ná kǒo kandíxaún ña̱ káʼa̱nra, ku̱a̱ʼá na̱ yiví kuvi, koo so̱ko ta kixi kue̱ʼe̱ nu̱ú na̱ ñuu Judá”.

Ni̱ya̱ʼa u̱na̱ ku̱i̱ya̱ ta̱ rey Sedequías kúni̱ra kanitáʼanra xíʼin na̱ ñuu Babilonia, ni̱ka̱ʼa̱nra xíʼin na̱ ñuu Egipto ña̱ chindeénara. Ta̱ Nabucodonosor ni̱ka̱ʼa̱nra xíʼin na̱ soldadora ña̱ kanitáʼanna xíʼin na̱ ñuu Jerusalén. Ta na̱yóʼo ni̱xa̱a̱na xi̱kundoona sa̱táña. Ta̱ Jeremías ni̱ka̱ʼa̱nra xíʼin ta̱ Sedequías: “Jehová káchira tá ná ndataxiún miíún, miíún xíʼin na̱ ñuún va̱ása kuvindó. Soo ta ná kanitáʼún xíʼinna kaʼmina ñuu Jerusalén ta ndakiʼinna yóʼó”. Ta̱ Sedequías nda̱kuiinra: “Kanitáʼanvai̱ xíʼinna”.

Tá ni̱ya̱ʼa iin ku̱i̱ya̱ sava, na̱ ñuu Babilonia sa̱ndiʼi-xa̱ʼana iin táʼvi nama̱ ña̱ íyo sa̱tá ñuu Jerusalén. Ta kán ni̱ki̱ʼvina ta xa̱ʼmina ñuu yóʼo. Saátu xa̱ʼmina ña̱ templo, xa̱ʼnína ku̱a̱ʼání na̱ yiví ta nda̱kiʼinnana ku̱a̱ʼa̱n xíʼinna.

Ta̱ Sedequías xi̱nura, soo na̱ ñuu Babilonia ni̱xa̱ʼa̱nna sa̱tára ta ti̱innara yatin ñuu Jericó ta níʼinara ku̱a̱ʼa̱nna nu̱ú ta̱ rey Nabucodonosor, ta i̱xanduxara xíʼin ta̱ Sedequías ña̱ ná kotora nda̱saa xa̱ʼnína se̱ʼera. Tándi̱ʼi ta̱vára nduchúnu̱ú ta̱yóʼo ta chi̱ka̱a̱rara ini veʼeka̱a. Kán ni̱xi̱ʼi̱ra. Soo ña̱yóʼo ni̱ka̱ʼa̱n Jehová xíʼin na̱ ñuu Judá: “Ná ya̱ʼa 70 ku̱i̱ya̱ ndikóndó ñuu Jerusalén”.

¿Ndáaña ndoʼo na̱ va̱lí na̱ ku̱a̱ʼa̱n chí ñuu Babilonia? ¿Á nda̱kú koo inina xíʼin Jehová?