Káʼyi̱ kándíka veʼe

Tá ni̱ya̱ʼa tiempo, ta̱ Belsasar ki̱xaʼá kúú rey ña̱ ñuu Babilonia. Iin ñu̱ú, ke̱ʼéra iin vikó ña̱ kuxura xíʼin iin mil ña̱ yiví. Na̱ yiví yóʼo kúú na̱ kúúmií chiñu va̱ʼaka. Ta ni̱ka̱ʼa̱nra xíʼin na̱ káchíñu nu̱úra ña̱ tavána vaso ña̱ oro ña̱ nda̱kiʼin ta̱ Nabucodonosor ini templo Jehová. Ta̱ Belsasar xíʼin na̱ yiví na̱ xíxi xíʼinra xi̱niñúʼuna ña̱ vaso yóʼo tá ki̱xaʼátuna ndásakáʼnuna ndióxi̱na. Soo iin kama kita iin ndaʼa̱ ta ki̱xaʼáña káʼyíña kándíka veʼe nu̱ú ndóona xíxina.

Ni̱yi̱ʼvíní ta̱ Belsasar. Ta ka̱nara na̱ kéʼé magia ta ni̱ka̱ʼa̱nra: “Ndáa ndóʼó ná kuchiñu ka̱ʼa̱n xíʼi̱n ndáaña kúni̱ kachi ña̱ ni̱ka̱ʼyi̱ yóʼo ta taxii̱ iin chíñu káʼnu kuumiíndó nu̱ú na̱ ñuu Babilonia”. Soo ni iinna va̱ása níkuchiñu. Tasaá ki̱xa̱a̱ ñá reina ta ni̱ka̱ʼa̱nñá: “Iin ta̱a ta̱ naní Daniel va̱ʼa xi̱ka̱ʼa̱nra ña̱ kúni̱ kachi xa̱ni ña̱ xi̱kuumií ta̱ Nabucodonosor. Ta̱kán kuchiñu ka̱ʼa̱n xíʼún ña̱ kúni̱ kachi tu̱ʼun yóʼo”.

Ta̱ Daniel ku̱a̱ʼa̱nra nu̱ú ta̱ rey. Tá ni̱xa̱a̱ra, ta̱ Belsasar ni̱ka̱ʼa̱nra xíʼinra: “Tá ná kuchiñún kaʼviún tu̱ʼun yóʼo ta ka̱ʼún xíʼi̱n ña̱ kúni̱ kachiña, taxii̱ iin siki̱ ña̱ oro ndaʼún ta taxii̱ ña̱ xa̱ún koún iin ta̱ chíñu káʼnu nu̱ú na̱ ñuu Babilonia”. Ta̱ Daniel nda̱kuiinra: “Va̱ása kúni̱i̱ña. Soo ni saá ka̱ʼa̱nvai̱ xíʼún ndáaña kúni̱ kachi tu̱ʼun yóʼo. Yiváún ta̱ Nabucodonosor, iin ta̱ ta̱aní-ini xi̱kuura, xa̱ʼa ña̱yóʼo íyo iin ña̱ i̱xaa Jehová xíʼinra ña̱ ná kǒo kuta̱aka-inira. Yóʼó xa̱a̱ xíni̱ún ndiʼi ña̱ ndo̱ʼora, soo ni saá va̱ása ní ixato̱ʼún Jehová. Ta xi̱niñúʼún vaso ña̱ oro xi̱ʼún tá vino. Xa̱ʼa ña̱yóʼo Ndióxi̱ ka̱ʼyíra tu̱ʼun yóʼo: MENÉ, MENÉ, TEQUEL xíʼin PARSÍN. Ña̱yóʼo kúni̱ kachiña na̱ ñuu Media xíʼin na̱ ñuu Persia sandiʼi-xa̱ʼana ñuu Babilonia, ta yóʼó va̱ása kookaún Rey”.

Ña̱ ñuu Babilonia va̱ʼaní na̱kuva̱ʼaña, nda̱a̱ ni iinna kǒo kuchiñu xíʼinña túvi mií na̱ ñuu yóʼo. Sa̱tá ña̱ ñuu yóʼo íyo nama̱ náʼnu xíʼin iin yu̱ta kúnuní. Soo míí ñu̱ú saá na̱ ñuu Media xíʼin na̱ ñuu Persia ni̱ki̱ʼvina ñuu Babilonia. Ta̱ Ciro, rey na̱ ñuu Persia, chi inka xiyo chi̱ka̱a̱ra yu̱ta tasaá ni̱ya̱ʼa na̱ soldadora ta ni̱xa̱a̱na míí yéʼé ñuu. Tá ni̱xa̱a̱na xa̱a̱ núnáva yéʼé. Na̱ soldado ki̱xaʼána kánitáʼanna xíʼin na̱ ñuu yóʼo, ta xa̱ʼnína ta̱ rey. Vitin ta̱ Ciro kúú ta̱ xáʼndachíñu nu̱ú na̱ ñuu Babilonia.

Tá ku̱i̱ya̱ nu̱ú ña̱ ki̱xaʼá xáʼndachíñu ta̱ Ciro ni̱ka̱ʼa̱nra ña̱yóʼo: “Jehová ni̱ka̱ʼa̱n xíʼi̱n ña̱ xíniñúʼu sandáʼi̱ templondó ña̱ níndichi chí ñuu Jerusalén. Na̱ judío na̱ kúni̱ ku̱ʼu̱n va̱ʼa ku̱ʼu̱nvana chindeé táʼanna”. Xa̱ʼa ña̱yóʼo ku̱a̱ʼánína ndi̱kó chí ñuuna tá xa̱a̱ ni̱ya̱ʼa 70 ku̱i̱ya̱ ña̱ ndi̱ʼi-xa̱ʼa ñuu Jerusalén. Tasaá ni̱xi̱nu ña̱ ni̱ka̱ʼa̱n Jehová. Ta̱ Ciro ta̱xira vaso ña̱ oro xíʼin ña̱ plata xíʼin ndiʼi ña̱ʼa ña̱ nda̱kiʼin ta̱ Nabucodonosor ini templo Ndióxi̱. ¿Á xi̱niún nda̱saa xi̱niñúʼu Jehová ta̱ Ciro ña̱ va̱ʼa chi̱ndeé táʼanra xíʼin na̱ ñuura?