Ta̱ loʼo Jesús

Ta̱ José xíʼin ñá María ñuu Nazaret ndóona xíʼin ta̱ Jesús xíʼin inkaka na̱ se̱ʼena. Ta̱ José chiñu carpintero káchíñura ña̱ va̱ʼa sákuxura na̱ veʼera. Ta saátu sánáʼa̱rana xa̱ʼa Jehová. Miíra xíʼin na̱ veʼera kútóonína ku̱ʼu̱nna sinagoga ña̱ ndasakáʼnuna Ndióxi̱. Ndiʼi ku̱i̱ya̱ xi̱xa̱ʼa̱nna ñuu Jerusalén ña̱ vikó pascua.

Tá ndíka̱a̱ ta̱ Jesús 12 ku̱i̱ya̱, ku̱a̱ʼa̱nra xíʼin na̱ veʼera chí Jerusalén. Ñuu yóʼo iin chútú na̱ yiví na̱ ndasakáʼnu pascua. Tándi̱ʼi vikó, ta̱ José xíʼin na̱ veʼera ndi̱kóna chí ñuuna, ta ndákanixi̱nína ña̱ ku̱a̱ʼa̱n ta̱ Jesús xíʼin na̱ táʼanna. Soo tá nándukúnara, kǒora níndani̱ʼína.

Tasaá ndi̱kóna chí ñuu Jerusalén ta u̱ni̱ ki̱vi̱ ni̱xi̱kana na̱ndukúnara. Nda̱a̱ vitin nda̱ni̱ʼínara ini templo ndíka̱a̱ra. Níndúʼúra xíʼin na̱ maestro, va̱ʼakaví xíniso̱ʼora ña̱ káʼa̱nna ta ndáka̱tu̱ʼunrana. Na̱ maestro yóʼo ndákanda̱kaví-inina xíʼin ña̱ káʼa̱nra ta ki̱xaʼána ndáka̱tu̱ʼunnara. Ta ndákanda̱-inina ña̱ va̱ʼaní ndákuiinra. Ta va̱ʼaní kúnda̱a̱-inira xíʼin ley Jehová.

Ta̱ José xíʼin ñá María ni̱ndi̱ʼi̱kaví-inina xa̱ʼara. Ñá María ni̱ka̱ʼa̱nñá xíʼinra: “Ta̱ loʼo ni̱xi̱kaníndi̱ na̱ndukúndi̱ yóʼó. ¿Mií xi̱ndika̱ún?”. Ta̱ Jesús nda̱kuiinra: “¿Á kǒo xíni̱vandó ña̱ xíniñúʼu kundikai̱ veʼe yivái̱?”.

Ta̱ Jesús ndi̱kóra xíʼin na̱ yivára chí Nazaret. Ta̱ José sa̱náʼa̱ra ta̱ Jesús chiñu ña̱ carpintero. ¿Nda̱saa ni̱xi̱yo ta̱ Jesús tá ni̱xi̱yo loʼora túviún? Tá xáʼnu ta̱ Jesús ku̱a̱ʼa̱nra ndúndíchikara ku̱a̱ʼa̱nra. Ña̱kán kúʼvi̱ní-inina xíninara ta saátu Ndióxi̱ xi̱kuninírara.