Ta̱ Ndi̱va̱ʼa xítondosóra ta̱ Jesús

Tándi̱ʼi nda̱kuchi ta̱ Jesús, espíritu Ndióxi̱ níʼi-ñaʼá ña̱ ni̱xa̱ʼa̱nra nu̱ú ñuʼú yi̱chí. Va̱ása níxixira 40 ki̱vi̱, xa̱ʼa ña̱yóʼo xíʼi̱níra so̱ko. Tasaá ni̱xa̱a̱ ta̱ Ndi̱va̱ʼa ña̱ kotondosórara. Siʼna ni̱ka̱ʼa̱nra: “Tá ndixa se̱ʼe Ndióxi̱ kúún, ka̱ʼa̱n xíʼin yu̱u̱ yóʼo ná nduuña si̱táva̱ʼa”. Ta̱ Jesús nda̱kuiinra ta ni̱ka̱ʼa̱nra ña̱ va̱xi nu̱ú tu̱ʼun Ndióxi̱ xíʼinra: “Tu̱ʼun Ndióxi̱ káchiña, su̱ví ña̱ kuxu kuití na̱ yiví va̱ʼa taxi kutakuna, chi xíniñúʼutu kuniso̱ʼona ndiʼi ña̱ káʼa̱n Jehová”.

Ta̱ Ndi̱va̱ʼa tuku ni̱ka̱ʼa̱nra xíʼin ta̱ Jesús: “Tá ndixa se̱ʼe Ndióxi̱ kúún, sakána xíʼin miíún sa̱tá templo, chi tu̱ʼun Ndióxi̱ káchiña ña̱ chindaʼá Ndióxi̱ ángel ña̱ saka̱kuna yóʼó”. Ta̱ Jesús tuku ni̱ka̱ʼa̱nra ña̱ va̱xi nu̱ú tu̱ʼun Ndióxi̱: “Tu̱ʼun Ndióxi̱ káchiña va̱ása xíniñúʼu kotondosóyó Jehová”.

Tándi̱ʼi, ta̱ Ndi̱va̱ʼa ni̱na̱ʼa̱ra ndiʼi reino xíʼin ña̱ ku̱i̱ká ña̱ íyo ñuyǐví yóʼo nu̱ú ta̱ Jesús ta ni̱ka̱ʼa̱nra: “Ndiʼi ña̱yóʼo taxii̱ ndaʼún tá ná ndasakáʼnún yi̱ʼi̱”. Ta̱ Jesús nda̱kuiinra: “Kúaʼan ta̱ Ndi̱va̱ʼa, chi tu̱ʼun Ndióxi̱ káchiña iinlá Jehová kúú ta̱ xíniñúʼu ndasakáʼnuyó”.

Tasaá ku̱a̱ʼa̱n ta̱ Ndi̱va̱ʼa, ta ki̱xi na̱ ángel ta̱xina ña̱ kuxu ta̱ Jesús. Tándi̱ʼi, ki̱xaʼá ta̱ Jesús nátúʼunra xa̱ʼa Reino Ndióxi̱, chi chiñu yóʼo kúú ña̱ ta̱xi Jehová ndaʼa̱ra keʼéra nu̱ú ñuʼú yóʼo. Na̱ yiví xi̱kutóonína ña̱ sa̱náʼa̱ ta̱ Jesús, ta xi̱ndiku̱nna sa̱tára nda̱a̱ míí nu̱ú ku̱a̱ʼa̱nra.