Carta na̱ Cuerpo Gobernante: 2017

Ñaniyó xíʼin ku̱ʼvayó:

Xa̱a̱ kúyatin u̱vi̱ mil i̱ñu̱ ciento ku̱i̱ya̱, ta̱ profeta Ezequiel xi̱nira iin visión, xi̱nira iin carro káʼnuní tú kúúmií Ndióxi̱. Soo ña̱ nda̱ka̱nda̱ní-inira xíʼin kúú ña̱ kamaní xíkanú. Iin nda̱a̱ táki̱ʼva ku̱a̱ʼa̱n taxa saá xínunú, ta tá káva̱nú ni loʼo kǒo xíkundichinú (Ezeq. 1:4, 9, 12, 14, 16-27).

¿Ndáaña sándakaʼán ña̱ visión yóʼo miíyó? Ndiʼi na̱ ndóo chí ndiví ndeéní káchíñuna. Ta, ¿ndáaña kéʼétu na̱ ñuura na̱ ndóo nu̱ú ñuʼú yóʼo? Ña̱ ku̱u ku̱i̱ya̱ ni̱ya̱ʼa káʼa̱nña xa̱ʼa ña̱ kéʼé Jehová xíʼin na̱ ñuura ña̱ ndeéní ka̱ma ku̱a̱ʼa̱n chiñu ña̱ kéʼéna.

Ñuu ña̱ Estados Unidos ku̱a̱ʼání na̱ ñúʼu Betel ña̱ Brooklyn nása̱mana ta ku̱a̱ʼa̱nna koona chí Warwick (Nueva York) nu̱ú nda̱koo Betel ña̱ xa̱á, ta inkana ku̱a̱ʼa̱nna koona inka Betel. Ta savatuna ta̱xina inka chiñu ndaʼa̱na ta va̱ása ñúʼukana Betel. Ta sava país, na̱ ñúʼu Betel káchíñunína nu̱ú kúva̱ʼa veʼe á nu̱ú sándaʼanaña, ta savatuna ku̱a̱ʼa̱nna inka ñuu. Ni ku̱a̱ʼání ndóʼó va̱ása xíniñúʼu na̱samandó inka ñuu, soo ndeéní káchíñundó ñuu nu̱ú ndóondó.

Ndi̱ʼi̱ na̱ Cuerpo Gobernante ndeéní kúsi̱í-inindi̱ ña̱ xítondi̱ káchíñuníndó na̱ hermano ña̱ va̱ʼa ku̱ʼu̱n chiñu Jehová. Xa̱a̱ xíni̱ndi̱ ku̱a̱ʼáníndó ku̱a̱ʼa̱nndó kachíñundó nu̱ú kúma̱níní na̱ publicador. Savatundó nátúʼunndó xa̱ʼa Ndióxi̱ xíʼin na̱ káʼa̱n inka tu̱ʼun. Ndiʼindó káchíñuníndó, nda̱a̱ na̱ xa̱a̱ ku̱chée xíʼin na̱ ndeé ndóʼo chíka̱a̱níndó ndeé ña̱ kéʼéndó chiñu Jehová, tasaá náʼa̱ndó ña̱ káʼa̱n ta̱ Ndi̱va̱ʼa su̱ví ña̱ nda̱a̱ kúúña ( 1 Cor. 9:24).

Káʼa̱nndi̱ xíʼinndó Jehová kúsi̱íní-inira xa̱ʼa ña̱ chíka̱a̱níndó ndée (Heb. 6:10). Ndiʼi ña̱ kéʼéndó, kéʼéndóña táki̱ʼva ke̱ʼé ta̱ Abrahán xíʼin ñá Sara. Tá xa̱a̱ ndíka̱a̱ra 70 ku̱i̱ya̱ra sa̱ndákoora ñuu Ur ta ku̱a̱ʼa̱nra xíʼin na̱ veʼera chí Canaán. Ta kán ni̱xi̱yora iin ciento ku̱i̱ya̱ nda̱a̱ ki̱vi̱ ni̱xi̱ʼi̱ra. Ta̱yóʼo chi̱ka̱a̱níra ndée ta saátu ñá síʼíra ña̱ ka̱chíñunína nu̱ú Jehová (Gen. 11:31; Hech. 7:2, 3).

Iin ña̱ va̱ʼaní kúúña tá ndákanixi̱níyó xa̱ʼa ña̱ kéʼéyó, á kéʼéyó táki̱ʼva ke̱ʼé ta̱ Abrahán xíʼin ñá síʼíra. Chi ndiʼi na̱ kéʼé chiñu Ndióxi̱ sáxi̱nuna ña̱ ni̱ka̱ʼa̱n ta̱ Jesús. Ta̱yóʼo ni̱ka̱ʼa̱nra: “Kúaʼánndó nu̱ú ndiʼi na̱ yiví ña̱ iníísaá ñuyǐví ta sanáʼa̱ndóna, ña̱ ná kundiku̱nna yi̱ʼi̱, ta ná ndakuchina xíʼin ki̱vi̱ yiváyó xíʼin ki̱vi̱ se̱ʼera tasaá xíʼin ki̱vi̱ espíritu santo” (Mat. 28:19).

Tá ni̱ka̱ʼa̱n ta̱ Jesús “kúaʼánndó”, ña̱yóʼo kúni̱ kachiña ña̱ xíniñúʼu ku̱ʼu̱nyó á xíniñúʼu kachíñuyó. Xa̱ʼa ña̱yóʼo kúsi̱íní-inindi̱ chi ndiʼi ndóʼó na̱ ndíku̱n sa̱tá ta̱ Jesús ku̱a̱ʼání chiñu ke̱ʼéndó nu̱ú Ndióxi̱ tá ku̱i̱ya̱ ni̱ya̱ʼa. Ña̱yóʼo náʼa̱ña mií Jehová kúú ta̱ chíka̱a̱ bendición ña̱ va̱ʼa ku̱a̱ʼa̱n tu̱ʼunra ña̱ iníísaá ñuyǐví ta íyora chíndeé táʼanra xíʼin ndiʼi na̱ káchíñu nu̱úra (Mar 13:10).

Ku̱a̱ʼání na̱ yiví xa̱a̱ sákuaʼana xa̱ʼa Ndióxi̱, tá ku̱i̱ya̱ ni̱ya̱ʼa xa̱a̱ 8,340,847 kúú na̱ publicador, ta 10,115,264 kúú na̱ yiví na̱ xa̱a̱ káʼvina xíʼin. Xíʼin ña̱yóʼo náʼa̱ña ña̱ kamaní ku̱a̱ʼa̱n carro Ndióxi̱ ta saátu ndóʼó chíka̱a̱níndó ndée ña̱ káchíñundó. Kǒo sandákoondó ña̱ kachíñukandó nu̱ú Ndióxi̱, chi ndáa loʼoní tiempo kúú ña̱ kúma̱ní ña̱ kivi ka̱ku na̱ yiví.

Ña̱ texto ku̱i̱ya̱ 2017 va̱ʼaní sándakaʼánña miíyó. Ña̱ texto yóʼo káchiña: “Kandíxa Jehová ta keʼé ña̱ va̱ʼa” (Sal. 37:3). Tá kéʼéyó ña̱ káʼa̱n texto yóʼo ta káchíñuyó nu̱ú Jehová, náʼa̱yó ña̱ kándíxayóra. Ná kǒo nandósóyó chi va̱ása íyo miíyó. Ta̱ Jesús ni̱ka̱ʼa̱nra: “Kotondó, íyoi̱ xíʼinndó ndiʼi tiempo nda̱a̱ ná ndiʼi-xa̱ʼa ñuyǐví” (Mat. 28:20). ¿Á va̱ása sáxi̱nura ña̱ ni̱ka̱ʼa̱nra túvindó?

Ná ndakaʼányó chi Jehová chíka̱a̱ra bendición ndiʼi chiñu ña̱ kéʼéyó nu̱úra. Ni ku̱a̱ʼá kúú chiñu ña̱ kéʼéyó á ni loʼo kúúña, soo ña̱ ndáyáʼvi va̱ʼa nu̱úra kúúña va̱ása sandákooyó kéʼéyóña ta xíʼin ña̱ si̱í-ini keʼéyóña. Tá kéʼéyó ña̱ káʼa̱nra sákusi̱íníyó-inira (2 Cor. 9:6, 7). Xa̱ʼa ña̱yóʼo ná ka̱ʼa̱nníyó xíʼin Jehová, ná kaʼviníyó tu̱ʼunra, ta ná kusi̱í-iniyó natúʼunyó xa̱ʼara xíʼin na̱ yiví. Tá saá ná keʼéyó va̱ʼaní kutáʼanyó xíʼinra.

Ta̱ Ndi̱va̱ʼa xa̱a̱ kúnda̱a̱-inira ña̱ xa̱a̱ ku̱yatinní ndiʼi-xa̱ʼara, xa̱ʼa ña̱yóʼo kúni̱níra ná sandákooyó Jehová (Rev. 12:12). Xíniñúʼura ndiʼi ña̱ íyo ñuyǐví yóʼo ña̱ sándáʼvira miíyó ña̱ keeyó ti̱xin ñuu Ndióxi̱. Soo tá yatinní ná kooyó xíʼin Jehová, va̱ása kuchiñura xíʼinyó (Sal. 16:8). Kǒo nandósóndó xa̱ʼa ña̱ kúni̱níndi̱ xínindi̱ ndóʼó ta táxindi̱ tixaʼvi ndaʼa̱ndó xa̱ʼa ña̱ chíndeé táʼanndó xíʼinndi ña̱ nátúʼunndó xa̱ʼa Reino Ndióxi̱ ña̱ tiempo vitin.

Na̱ ñanindó,

Na̱ Cuerpo Gobernante na̱ testigo Jehová