Carta na̱ Cuerpo Gobernante

Ñaniyó xíʼin ku̱ʼvayó:

Xa̱ʼa̱ ña̱ kúʼvi̱-iniyó xíniyó Jehová xíʼin na̱ yiví, xíniso̱ʼoyó ña̱ va̱xi nu̱ú Biblia nu̱ú káʼa̱nña: “Kúáʼanndó nu̱ú ndiʼi na̱ yiví ta sanáʼa̱ndóna ña̱ ná kundiku̱nna yi̱ʼi̱. Ta sandákuchindóna” (Mat. 28:​19, 20; Mar. 12:​28-31). Tá ndixaní kúʼvi̱-iniyó xíniyó na̱ yiví saá kúú ña̱ va̱ʼaní sanáʼa̱yóna, tasaá chindeétáʼanyó xíʼinna ña̱ ni̱ʼína ña̱ kutakuna ndiʼi tiempo (Hech. 13:48).

Tá ya̱chi̱ xi̱chika̱a̱níyó ndee̱ ña̱ sakúaʼa xíʼin xi̱níyó ña̱ ka̱ʼa̱nyó xíʼin na̱ yiví ta saátu ña̱ taxiyó tutu ndaʼa̱na. Soo vitin xíniñúʼu natúʼunyó xíʼin na̱ yiví xa̱ʼa̱ ña̱ kúni̱na kunda̱a̱-inina xa̱ʼa̱. Tá kéʼéyó ña̱yóʼo saá náʼa̱yó ña̱ kúʼvi̱-iniyó xíniyóna. Xa̱a̱ síín íyo iin tá iin na̱ yiví, ña̱kán ná ka̱ʼa̱nyó xíʼinna xa̱ʼa̱ ña̱ sándi̱ʼi̱-inina. Tutu yóʼo ku̱va̱ʼaña ña̱ chindeétáʼanña xíʼinyó keʼéyó ña̱yóʼo.

Tutu yóʼo kúúmiíña 12 lección ta ti̱xin ña̱yóʼo kúúmiíña 12 ña̱ʼa ña̱ xíniñúʼu keʼéyó tá xa̱a̱ nátúʼunyó xíʼin na̱ yiví xa̱ʼa̱ Ndióxi̱, tasaá na̱ʼa̱yó ña̱ kúʼvi̱-iniyó xíniyóna. Iin tá iin lección káʼa̱nña xa̱ʼa̱ ta̱ Jesús á xa̱ʼa̱ na̱ xi̱ndasakáʼnu Ndióxi̱ na̱ ni̱xi̱yo tá siglo nu̱ú, na̱ ni̱na̱ʼa̱ iin tá iin ña̱ va̱xi nu̱ú tutu yóʼo tá xi̱natúʼunna xíʼin na̱ yiví xa̱ʼa̱ Ndióxi̱. Vitin va̱ása kúni̱kayó sakúaʼa xíʼin xi̱níyó ña̱ ka̱ʼa̱nyó xíʼin na̱ yiví, chi ña̱ kúni̱yó kúú ña̱ na̱ʼa̱yó ña̱ kúʼvi̱-iniyó xíniyóna ta ndíʼi̱-iniyó xa̱ʼa̱na. Ndiʼi ña̱ va̱xi nu̱ú tutu yóʼo kiviva chindeétáʼanña xíʼinyó, soo sava ña̱yóʼo va̱ʼaníka chindeétáʼanña xíʼinyó tá xa̱a̱ ku̱a̱ʼa̱nyó natúʼunyó xíʼin na̱ yiví veʼe tá veʼe, tá xa̱a̱ kéʼéyó revisita á tá xa̱a̱ káʼviyó xíʼinna.

Tá xa̱a̱ káʼviún iin tá iin lección ndakanixi̱ní ndáa ki̱ʼva kuniñúʼún ña̱ va̱xi nu̱ú lección kán ña̱ natúʼún xíʼin na̱ yiví na̱ íyo ñuu nu̱ú íyoún. Ndáyáʼviva ña̱ sakúaʼayó ndáa ki̱ʼva natúʼunyó xíʼin na̱ yiví, soo ña̱ ndáyáʼvika kúú ña̱ kuʼvi̱-iniyó kuni̱yó Jehová xíʼin na̱ yiví. Ná ndakundeéyó kuʼvi̱ka-iniyó kuniyóna chi saá kúú ña̱ kivi chindeétáʼanyó xíʼinna ña̱ xa̱a̱na ndasakáʼnuna Jehová.

Kúsi̱íní-inindi̱ ña̱ káchíñundi̱ xíʼinndó (Sof. 3:9). Ku̱a̱ʼání ña̱ va̱ʼa taxi Jehová ndaʼa̱ndó xa̱ʼa̱ ña̱ kúʼvi̱ní-inindó xínindóra ta saátu ña̱ chíndeétáʼanndó xíʼin na̱ yiví ña̱ xa̱a̱na ndasakáʼnunara.