Junio

Jehová ta̱xira ku̱a̱ʼání bendición nda’a̱ na̱ cristiano na̱ ni̱xi̱yo tá siglo nu̱ú ni yo̱ʼvi̱ní ña̱ ni̱ya̱ʼana nu̱ú. Tá siglo nu̱ú, na̱ yiví xi̱ ixandi̱va̱ʼanína xíʼin na̱ cristiano tá xi̱natúʼunna xa̱ʼa̱ Ndióxi̱. Ná kotoyó ndáaña ndo̱ʼo ta̱ Bernabé xíʼin ta̱ apóstol Pablo tá xíkana nátúʼunna xíʼin na̱ yiví xa̱ʼa̱ Ndióxi̱ chí Listra. Iin ki̱vi̱, va̱ʼaní nda̱kiʼin na̱ yiví na̱yóʼo ta va̱ʼaní xi̱niso̱ʼona ña̱ xi̱natúʼunna. Soo tándi̱ʼi, sava na̱ yiví na̱ sáa̱-ini xíni ta̱ apóstol Pablo ni̱ka̱ʼa̱nna ña̱ va̱ása va̱ʼa xa̱ʼa̱ra, ta xa̱ʼa̱ ña̱yóʼo ku̱a̱ʼání na̱ yiví ka̱ninara xíʼin yu̱u̱ ta nda̱kanixi̱nína ña̱ ni̱xi̱ʼi̱ra (Hech. 14:19). Soo ta̱ Bernabé xíʼin ta̱ Pablo nda̱kiʼinna ku̱a̱ʼa̱nna inka lugar ta nda̱kundeéna na̱túʼunna xa̱ʼa̱ Ndióxi̱. ¿Ndáaña va̱ʼa nda̱kiʼinna xa̱ʼa̱ ña̱yóʼo? Ku̱a̱ʼání na̱ yiví nda̱kundiku̱nna ta̱ Cristo. Ta na̱yóʼo chi̱kaa̱nína ndee̱ xíʼin inka na̱ cristiano xíʼin tu̱ʼun ña̱ xi̱ka̱ʼa̱nna xíʼinna ta saátu xíʼin ña̱ xi̱keʼéna (Hech. 14:​21, 22). Ta̱ Bernabé xíʼin ta̱ Pablo va̱ása níndakava-inina xa̱ʼa̱ ña̱ i̱xandi̱va̱ʼa na̱ yiví xíʼinna. Ta saátu miíyó ná va̱ása taxiyó ña̱ ndakava-iniyó ta ná ndakundeéyó keʼéyó chiñu ña̱ ta̱xi Ndióxi̱ ndaʼa̱yó. Tá saá ná keʼéyó, ku̱a̱ʼání bendición taxi Ndióxi̱ ndaʼa̱yó. w23.04 16, 17 párr. 13, 14

Ku̱a̱ʼání na̱ xi̱saa̱-ini xi̱xini ta̱ rey David ña̱kán ndiʼi tiempo xi̱ka̱ʼa̱nra xíʼin Jehová ña̱ ná chindeétáʼanra xíʼinra. Ta̱ David xi̱kandíxaníra ña̱ xi̱xiniso̱ʼo Jehová oración ña̱ xi̱keʼéra nu̱úra ta saátu ña̱ xi̱ndakuiinraña. Ta saátu miíún kivi kandíxaún ña̱ ndakuiin Jehová oración ña̱ káʼún xíʼinra. Ña̱ Biblia sáná’a̱ña miíyó ña̱ mií Jehová kivi taxira ndee̱ xíʼin ña̱ ndíchi ndaʼa̱yó ña̱ va̱ʼa kuchiñuyó ya̱ʼayó nu̱ú nda̱a̱ ndáaka tu̱ndóʼo ña̱ ná kixi nu̱úyó. Ta saátu sa̱kuaʼayó ña̱ kivi kuniñúʼura na̱ hermanoyó xíʼin na̱ yiví na̱ kǒo ndásakáʼnu miíra ña̱ va̱ʼa chindeétáʼanna xíʼinyó. Ni sava yichi̱ kǒo ndákuiin Jehová oraciónyó nda̱a̱ táki̱ʼva kúni̱ miíyó, soo kándíxavayó ña̱ ndakuiinraña. Táxira mií ña̱ xíniñúʼuyó ta mií tiempo ña̱ xíniñúʼuyóña táxiraña ndaʼa̱yó. Ña̱kán xíʼin ndinuʼu-iniyó ná ka̱ʼa̱nyó xíʼin Jehová ta ná kandíxayó ña̱ kundaara miíyó tiempo vitin, ta chí nu̱únínu taxira ndiʼi ña̱ xíniñúʼuyó (Sal. 145:16). w23.05 8 párr. 4; 13 párr. 17, 18

Ndakanixi̱ní ndáaña va̱ʼa ndakiʼún tá ná chikaa̱ún ndee̱ ña̱ sáxi̱nún ña̱ nda̱kaxiún keʼún. Tá ña̱ kúni̱ún kúú ña̱ kaʼviún tu̱ʼun Ndióxi̱ á ña̱ keʼún oración, ndakanixi̱ní ndáa ki̱ʼva chindeétáʼan ña̱yóʼo xíʼún ña̱ va̱ʼa viíka kutáʼún xíʼin Jehová (Sal. 145:​18, 19). Tá ña̱ kúni̱ún kúú ña̱ kuumiíún ña̱ va̱ʼa táʼan ña̱ kúúmií Jehová, ndakanixi̱ní ndáa ki̱ʼva chindeétáʼan ña̱yóʼo xíʼún ña̱ va̱ʼa xa̱ún kutáʼan viíún xíʼin inkana (Col. 3:14). ¿Ndáaña kivika keʼún? Kaʼyí nu̱ú iin tutu ndáa xa̱ʼa̱ kúú ña̱ kúni̱ún keʼún sava ña̱ʼa, ta tá ná ya̱ʼa tiempo kivi taváún tutu yóʼo ta kotoún ndiʼi ña̱ ka̱ʼyiún nu̱úña. Saátu, kutáʼan xíʼin na̱ yiví na̱ chíkaa̱ ndee̱ xíʼún (Prov. 13:20). Sava yichi̱ ni kǒo kúsi̱í-iniyó keʼéyó sava ña̱ʼa. Soo, ¿á ña̱yóʼo kúni̱ kachiña ña̱ va̱ása kivika saxínuyó ña̱ kúni̱yó keʼéyó? Va̱ásaví. Kivi chikaa̱yó ndee̱ ña̱ saxínuyó ña̱ ki̱ndooyó keʼéyó ni tá va̱ása kúsi̱í-iniyó keʼéyó ña̱yóʼo. Sana ixayo̱ʼvi̱ ña̱yóʼo xíʼún, soo kusi̱íní-iniún tá ná saxínúnña. w23.05 27, 28 párr. 6-8

Iin tá iinyó ndáka̱xinyó ndáaña keʼéyó, ña̱kán tá va̱ása vií kána ña̱yóʼo miíyó kúú na̱ kúúmií ku̱a̱chi. Va̱ʼaka ná natúʼunyó xa̱ʼa̱ ku̱a̱chiyó, ná chikaa̱yó ndee̱ ña̱ nasamayó ki̱ʼva ña̱ íyoyó ta ná kǒo ndikóyó keʼéyó ña̱ va̱ása va̱ʼa. Ña̱yóʼo chindeétáʼan xíʼinyó ña̱ ndakundeéyó kunuyó carrera ña̱ xínuyó ku̱a̱ʼa̱nyó. Tá ni̱ka̱ʼún á ke̱ʼún iin ña̱ʼa ña̱ va̱ása va̱ʼa kǒo kívika nasamaún ña̱yóʼo, ña̱kán kǒo ndakaniníkaxi̱níún xa̱ʼa̱ña. Kǒo chika̱ún ku̱a̱chi inkana ta kǒo ka̱ʼún ña̱ su̱ví ku̱a̱chi miíún níxi̱yoña. Ta tá va̱ása va̱ʼa kúni̱ún xa̱ʼa̱ ña̱ ke̱ʼún, ka̱ʼa̱n xíʼin Jehová ná chindeétáʼanra xíʼún, ka̱ʼa̱n xíʼinra ña̱ ku̱a̱chi miíún xi̱kuuña ta ná ixakáʼnu-inira xa̱ʼún (Sal. 25:11; 51:​3, 4). Tá ke̱ʼún á ni̱ka̱ʼún ña̱ va̱ása va̱ʼa xíʼin inkana, ndukú ña̱ káʼnu-ini nu̱úna ta saátu kivi ka̱ʼún xíʼin na̱ anciano ña̱ chindeétáʼanna xíʼún (Sant. 5:​14, 15). Sakúaʼa xíʼin ña̱ va̱ása va̱ʼa kéʼún, ta chikaa̱ ndee̱ ña̱ kǒo keʼékaúnña. Kǒo kaka-iniún saáchi mií Jehová chindeétáʼan xíʼún chi kúndáʼviní-inira xínira yóʼó (Sal. 103:​8-13). w23.08 28, 29 párr. 8, 9

Tá ni̱xi̱yo loʼo ta̱ rey Jehoás chi̱kaa̱ra ndee̱ ña̱ ndasakáʼnura Jehová, saáchi ta̱ Jehoiadá kúú ta̱ chi̱ndeétáʼan xíʼinra. Tá ni̱xi̱ʼi̱ ta̱ Jehoiadá ta̱ Jehoás xi̱niso̱ʼora ña̱ ni̱ka̱ʼa̱n na̱ príncipe, soo na̱yóʼo su̱ví Jehová níxi̱ndasakáʼnuna chi xa̱a̱ ndióxi̱ vatáva ki̱xáʼa ndásakáʼnuna (2 Crón. 24:​4, 17, 18). Jehová ku̱suchíní-inira xíʼin ña̱yóʼo, soo ni saá xi̱ndakundeévara xi̱chindaʼára na̱ profeta ña̱ ka̱ʼa̱nra xíʼinna ña̱ ndikó tukuna ndasakáʼnunara. Soo na̱yóʼo kǒo níxiniso̱ʼovína ña̱ xi̱ka̱ʼa̱n na̱ profeta xíʼinna. Ta̱ Zacarías xi̱kuura se̱ʼe ta̱ Jehoiadá, ta ta̱ Zacarías yóʼo xi̱kuura su̱tu̱, profeta ta xi̱kuutura primo ta̱ Jehoás. Soo ni saá, na̱yóʼo kǒo níxiinna kuniso̱ʼona ña̱ xi̱ka̱ʼa̱nra. Mií ta̱ Jehoás xa̱ʼndachiñu ña̱ kaʼnína ta̱ Zacarías (2 Crón. 22:11; 24:​19-22). Ta̱ Jehoás kǒo ní ixato̱ʼókara Jehová, ña̱kán ña̱yóʼo kúú ña̱ káʼa̱n Jehová xíʼin na̱ yiví na̱ kǒo kúni̱ xíni miíra: “Na̱ kúndasí xíni yi̱ʼi̱ kundasíi̱ kunii̱na” (1 Sam. 2:30). Tá ni̱ya̱ʼa tiempo iin tiʼvi loʼo na̱ soldado sirio ni̱xa̱ʼa̱nna ka̱nitáʼanna xíʼin ta̱ Jehoás, soo na̱ soldado ta̱yóʼo ku̱a̱ʼáníva xi̱kuuna ni saá ku̱chiñuva na̱ sirio xíʼinna ta ndeéní tu̱kue̱ʼe̱ ta̱ Jehoás. Tá xa̱a̱ nda̱kiʼin na̱ sirio ku̱a̱ʼa̱nna mií na̱ xi̱kachíñu nu̱ú ta̱ Jehoás xa̱ʼnínara xa̱ʼa̱ ña̱ xa̱ʼníra ta̱ Zacarías (2 Crón. 24:​24, 25). w23.06 18, 19 párr. 16, 17

Ta̱ apóstol Pablo ni̱xa̱ʼa̱nra ñuu Éfeso ña̱ na̱túʼunra xíʼin na̱ yiví xa̱ʼa̱ tu̱ʼun Ndióxi̱ (Hech. 19:​1, 8-10; 20:​20, 21). Xi̱kuʼvi̱ní-ini ta̱ Pablo xi̱xinira na̱ hermano kán, ta xi̱kuni̱ra chindeétáʼanra xíʼinna ña̱ nda̱kú koo inina xíʼin Jehová. Na̱ yiví na̱ ni̱xi̱yo ñuu Éfeso, xi̱ñuʼuna veʼe-ñu̱ʼu vatá ta xi̱kandíxana ña̱ magia ta saátu xi̱kuumiína ku̱a̱ʼání costumbre. Ku̱a̱ʼání ña̱ kini xi̱keʼéna ta kǒo níxi̱kukaʼan nu̱úna xa̱ʼa̱ ña̱ xi̱keʼéna. Nina ña̱ xi̱kisi̱ xíʼin táʼanna xi̱xitona tá xi̱xaʼa̱nna teatro, ta saátu xi̱keʼéna ña̱yóʼo vikó ña̱ xi̱kuumiína (Efes. 5:3). Kǒo níxi̱xoʼvi̱kana xa̱ʼa̱ ña̱ xi̱keʼéna (Efes. 4:​17-19). Ña̱kán kǒo níxi̱ndi̱ʼi̱ka-inina tá xi̱keʼéna ña̱ va̱ása va̱ʼa, saáchi xi̱keʼéna ña̱ kúni̱ miína ta kǒo níxi̱ndakanixi̱nína ña̱ ndataxina kuenta ndaʼa̱ Jehová. Xa̱ʼa̱ ña̱ kǒo níxi̱xini̱na ndáaña kúú ña̱ va̱ʼa ta ndáaña kúú ña̱ kini, ña̱kán ni̱ka̱ʼa̱n ta̱ Pablo xíʼinna ña̱ íyona nu̱ú naá “ta va̱ása ndákiʼinna ña̱ káʼa̱n Ndióxi̱”. Soo sava na̱ xi̱ndoo ñuu Éfeso va̱ása níxi̱ñuʼukana nu̱ú ña̱ naá. w24.03 20 párr. 2; 21 párr. 4-6

Xa̱ʼa̱ ña̱ xi̱kuu ta̱ Gedeón juez ña̱ ñuu Israel, ku̱a̱ʼání ña̱ʼa xi̱xiniñúʼu keʼéra ta xi̱kunaáníra. Tá ñuú tá ni̱xa̱ʼa̱n ta̱ Gedeón ka̱nitáʼanra xíʼin na̱ Madián, na̱yóʼo xi̱nuna ku̱a̱ʼa̱nna ta ta̱yóʼo xi̱kundiku̱nra ku̱a̱ʼa̱nra sa̱tána. Ke̱era chí Jezreel ta ni̱xa̱a̱ra nda̱a̱ chí yu̱ta Jordán ta sana ni̱xi̱yoní tú iñú chí yuʼú yu̱ta yóʼo (Juec. 7:22). Tá saá, ¿ndáaña ke̱ʼéra? ¿Á va̱ása níxa̱ʼa̱nkara sa̱tána? Ni̱xa̱ʼa̱nvara sa̱tána. Ni ku̱naáníra xíʼin na̱ 300 ta̱a na̱ ku̱a̱ʼa̱n xíʼinra, nda̱kundeéna xi̱nuna ku̱a̱ʼa̱nna sa̱tá na̱ ñuu Madián ta ni̱ko̱so̱kavana tá yu̱ta Jordán ta nda̱ni̱ʼívana na̱yóʼo ta sa̱ndíʼi-xa̱ʼa̱nana (Juec. 8:​4-12). Chi ña̱yóʼo kúú ña̱ ke̱ʼé ta̱ Gedeón ta chi̱ndeétáʼanva Jehová xíʼinra (Juec. 6:​14, 34). Iin yichi̱ u̱vi̱ na̱ rey na̱ ñuu Madián nándosóna sa̱tá camello saáchi na̱ xínu ku̱a̱ʼa̱n kúúna nu̱ú ta̱ Gedeón, soo ta̱ Gedeón xíʼin na̱ ta̱a kítáʼan xíʼinra ki̱xáʼana xínuna ku̱a̱ʼa̱nna sa̱tá na̱yóʼo (Juec. 8:​12, 21). Soo Jehová chi̱ndeétáʼanra xíʼin ta̱ Gedeón xíʼin na̱ kítáʼan xíʼinra ta ku̱chiñuna ni̱ni̱ʼína na̱yóʼo ta xa̱ʼnínana. Saátu ndóʼó na̱ anciano, kivi kandíxandó ña̱ mií Jehová taxi ndee̱ ndaʼa̱ndó, saáchi kǒo kúnaára ta miíra taxi ndee̱ ña̱ xíniñúʼundó (Is. 40:​28, 29). w23.06 6 párr. 14; 7 párr. 16

Kivi nda̱kú koo iniyó xíʼin Ndióxi̱ ni nda̱a̱ ndáaka tu̱ndóʼo ná kixi nu̱úyó ta ná kundaa-iniyó Jehová. Ná ka̱ʼa̱nyó xa̱ʼa̱ ña̱ ndo̱ʼo ta̱ juez Barac, ku̱a̱ʼání ña̱ va̱ʼa nda̱kiʼinra xa̱ʼa̱ ña̱ xi̱niso̱ʼora ña̱ ni̱ka̱ʼa̱n Jehová xíʼinra. Tá tiempo kán na̱ ñuu Israel va̱ása níxi̱yo tu̱ʼvana ña̱ ku̱ʼu̱nna nu̱ú ku̱a̱chi saáchi kǒo escudo ni lanza níxikuumiína. Nisaá Jehová ni̱ka̱ʼa̱nra xíʼin ta̱ Barac ña̱ ná ku̱ʼu̱nra kanitáʼanra xíʼin ta̱ Sísara xíʼin na̱ soldado cananeo na̱ ku̱a̱ʼa̱n xíʼinra (Juec. 5:8). Ñá profeta Débora ni̱ka̱ʼa̱nñá xíʼin ta̱ Barac ña̱ ná nuura yuku̱ á xi̱kí ña̱ Tabor tasaá xa̱a̱ra yoso̱ ña̱ kanitáʼanra xíʼin ta̱ Sísara xíʼin na̱ yiví na̱ ku̱a̱ʼa̱n xíʼin 900 carreta. Sana nda̱kanixi̱ní ta̱ Barac ña̱ kuchiñu na̱ yiví kán kanitáʼanna xíʼinna. Soo, nisaá xi̱niso̱ʼovara ña̱ ni̱ka̱ʼa̱n Jehová xíʼinra. Nani va̱xinuu ta̱ Barac chí yuku̱ xíʼin soldadora, ndeéní sa̱kúun Jehová sa̱vi̱. Xa̱ʼa̱ ña̱kán ni̱ti̱in ndiʼi carreta na̱ soldado na̱ ku̱a̱ʼa̱n xíʼin ta̱ Sísara nu̱ú nda̱ʼyi̱ ta ku̱chiñu ta̱ Barac sa̱ndiʼi-xa̱ʼa̱ra ndiʼina (Juec. 4:​1-7, 10, 13-16). Saátu miíyó kuchiñuyó nu̱ú nda̱a̱ ndáaka tu̱ndóʼo ña̱ ná kixi nu̱úyó tá kándíxayó ña̱ káʼa̱n Jehová ta saátu tá xíniso̱ʼoyó ndiʼi ña̱ káʼa̱n na̱ ñuura xíʼinyó. w23.07 19 párr. 17, 18

Xíniñúʼu kúee koo iniyó ña̱ va̱ʼa ka̱kuyó tá ná kixaa̱ ki̱vi̱ Jehová. Nda̱a̱ táki̱ʼva ni̱xi̱yo na̱ xi̱ndasakáʼnu Ndióxi̱ tiempo xi̱naʼá, saátu miíyó xíniñúʼu kundatuyó ña̱ va̱ʼa ni̱ʼiyó ña̱ káʼa̱nra taxira ndaʼa̱yó chí nu̱únínu (Heb. 6:​11, 12). Biblia chítáʼanña miíyó xíʼin iin na̱ chíʼi (Sant. 5:​7, 8). Na̱ chíʼi, siʼna chíʼina si̱ʼva tándi̱ʼi kóso̱naña, soo kǒo kúnda̱a̱ káxi-inina ama kuaʼnuña. Soo ndátuna ta kǒo xíka-inina ña̱ ndakiʼinvana ña̱ chi̱ʼina. Ta saátu kéʼé na̱ ndásakáʼnu Ndióxi̱ saáchi ndíʼi̱-inina xa̱ʼa̱ chiñura soo kǒo xíni̱na ama kixaa̱ ki̱vi̱ra (Mat. 24:42). Miíyó ndátuyó ña̱ sáxi̱nu Jehová ña̱ ni̱ka̱ʼa̱nra keʼéra chí nu̱únínu, soo tá ná kixáʼa kundi̱ʼi̱ní-iniyó kivi kunaáyó ta loʼo tá loʼo kivi kixáʼayó kuxíkayó nu̱ú Jehová. Ta saátu kivi kixáʼa kundi̱ʼi-iniyó xa̱ʼa̱ ña̱ʼa ña̱ sákusi̱í kuití iniyó tiempo vitin. Soo tá kúee íyo iniyó ta ndátuyó, saá kúú ña̱ ka̱kuyó tá ná kixaa̱ ki̱vi̱ Jehová (Miq. 7:7). w23.08 22 párr. 7

Tá nándukú va̱ʼayó xa̱ʼa̱ tutu ña̱ Daniel xíʼin ña̱ Apocalipsis saá kúnda̱a̱-iniyó, ña̱ xa̱ʼa̱ imagen yóʼo ndána̱ʼa̱ña na̱ chíñu Estados Unidos xíʼin na̱ Reino Unido, ta na̱yóʼo kúú na̱ xáʼndachíñu tiempo ña̱ ndóoyó vitin. Tá ni̱ka̱ʼa̱n ta̱ Daniel xíʼin ta̱ Nabucodonosor ndáaña kúni̱ kachi xa̱ni ña̱ ni̱xa̱níra, ña̱yóʼo ni̱ka̱ʼa̱nra xa̱ʼa̱ na̱ chíñu yóʼo: “Loʼo ndeé koo ña̱ reino ta loʼo vitátu kooña”. ¿Nda̱chun vitá kooña? Saáchi na̱ ñuu na̱ xáʼndachíñuna nu̱ú va̱ása kandíxana “kutáʼan viína”. Ña̱ káʼa̱n ta̱ Daniel xa̱ʼa̱ imagen ña̱ xi̱ni ta̱ Nabucodonosor chíndeétáʼanña xíʼinyó kunda̱a̱-iniyó xa̱ʼa̱ ña̱ʼa ña̱ ndáyáʼviní. Ña̱ nu̱ú, na̱ chíñu Estados Unidos xíʼin na̱ Reino Unido xa̱a̱ náʼa̱na ña̱ ndakúnína. Tá kúú, ki̱táʼanna ña̱ ka̱nitáʼanna tá ni̱xi̱yo Primera xíʼin Segunda Guerra Mundial ta ku̱chiñuvana. Soo loʼo tá loʼo na̱ chíñu yóʼo va̱ása kúúmiíkana ndee̱. Saáchi na̱ yiví na̱ ndóo nu̱ú xáʼndachíñuna kánitáʼan xíʼin táʼan miína ta saátu kǒo kándíxana ña̱ káʼa̱n na̱ chíñu yóʼo. Ña̱ u̱vi̱, na̱ chíñu Estados Unidos xíʼin na̱ Reino Unido kúú na̱ so̱ndíʼi kaʼndachíñu nu̱ú ñuyǐví yóʼo, tá kúma̱níka kixaa̱ Reino Ndióxi̱ sandíʼi-xa̱ʼa̱ña ndiʼi na̱ chíñu na̱ íyo nu̱ú ñuʼú yóʼo. w23.08 10 párr. 12, 13

Ku̱a̱ʼání tu̱ndóʼo xi̱yaʼa ta̱ David nu̱ú, xa̱ʼa̱ ña̱kán xi̱ndi̱ʼi̱ní-inira (Sal. 18:​4, 5). Soo, tá xi̱kiʼinra kuenta ña̱ kúʼvi̱ní-ini Jehová xínirara, ña̱yóʼo chi̱ndeétáʼan xíʼinra ña̱ kǒo ndakava-inira. Ta̱ David nda̱kanixi̱níra ña̱ mií Jehová xi̱xa̱ʼan xíʼinra nu̱ú íyo “ku̱a̱ʼání ku̱ʼu̱ kúíi̱” ta saátu nu̱ú kivi “ndakindeéra nu̱ú íyo ku̱a̱ʼání ti̱kui̱í”. Ña̱yóʼo chi̱ndeétáʼan xíʼinra ña̱ ndakiʼinra ndee̱ra tasaá kusi̱í-inira ndasakáʼnura Jehová (Sal. 18:​28-32; 23:2). Tá yáʼayó nu̱ú tu̱ndóʼo kivi ka̱ʼa̱nyó ña̱yóʼo “xa̱ʼa̱ ña̱ kúʼvi̱ní-ini Jehová xínira yi̱ʼi̱ ta̱ʼán kuvii̱” (Lam. 3:22; Col. 1:11). Ku̱a̱ʼání na̱ yiví xi̱saa̱-ini xi̱xini ta̱ David ta xi̱kuni̱na kaʼnínara. Soo, xa̱ʼa̱ ña̱ xi̱kuʼvi̱ní-ini Jehová xi̱xinirara kǒo níyi̱ʼvíra. Xi̱ndakanixi̱níra ña̱ ni̱xi̱yo Jehová síi̱nra ña̱ chindeétáʼanra xíʼinra. Ña̱kán, tá xi̱tara nu̱ú Jehová ni̱ka̱ʼa̱nra: “Sa̱kǎkura yi̱ʼi̱ nu̱ú ndiʼi ña̱ síyíʼví yi̱ʼi̱” (Sal. 34:4). Xi̱kuni̱nína kaʼnína ta̱ David, soo xa̱ʼa̱ ña̱ xi̱kuʼviní-ini Jehová xi̱xinirara kǒo níyi̱ʼvíra. w24.01 29, 30 párr. 15-17

Sákuaʼa xíʼin ña̱ va̱ása va̱ʼa ke̱ʼé ta̱ Jehoás ta va̱ása keʼúnña. Tá ni̱xi̱ʼi̱ ta̱ su̱tu̱ káʼnu Jehoiadá, va̱ása va̱ʼa na̱ nda̱kaxin ta̱ Jehoás kutáʼan xíʼinra (2 Crón. 24:​17, 18). Xi̱niso̱ʼora ña̱ ni̱ka̱ʼa̱n na̱ príncipe na̱ va̱ása kúʼvi̱-ini xíni Jehová. Kǒo ña̱ va̱ʼa níndoʼora xa̱ʼa̱ ña̱ xi̱niso̱ʼora ña̱ ni̱ka̱ʼa̱nna. Xa̱ʼa̱ ña̱ xi̱niso̱ʼora ña̱ ni̱ka̱ʼa̱n na̱ migora ku̱a̱ʼání ña̱ va̱ása va̱ʼa ke̱ʼéra. Tá ta̱xi primora ta̱ Zacarías consejo ndaʼa̱ra, ni̱ka̱ʼa̱nra xíʼin na̱ káchíñu nu̱úra ña̱ ná kaʼnínara (2 Crón. 24:​20, 21; Mat. 23:35). Iin ta̱ kíʼví xi̱kuu ta̱ Jehoás xa̱ʼa̱ ña̱ ke̱ʼéra ña̱yóʼo. Va̱ʼaníva ña̱ nda̱kaxinra ke̱ʼéra tá ni̱xi̱yo loʼora, soo tá xa̱ʼnura xa̱ʼníra na̱ yiví ta kǒo níndasakáʼnukara Jehová. Tá ni̱ya̱ʼa tiempo, na̱ káchíñu nu̱úra xa̱ʼnínara (2 Crón. 24:​22-25). Va̱ʼaníva koora tá níxiniso̱ʼora ña̱ ni̱ka̱ʼa̱n na̱ ndásakáʼnu Jehová. w23.09 9 párr. 6

Ta̱ Jesús ki̱ʼinra kuenta ña̱ kiviva nda̱kú koo ini ta̱ Pedro xíʼin Ndióxi̱. Ña̱kán, ta̱ Jesús ni̱ka̱ʼa̱nra xíʼinra “va̱ása yi̱ʼvíkaún”. Tá xi̱ni ta̱ Pedro ña̱ ndáaní-ini ta̱ Jesús miíra va̱ʼaní ku̱nira. Ña̱kán, tá ni̱ya̱ʼa tiempo ta̱ Pedro xíʼin ñanira ta̱ Andrés nda̱koona chiñu ña̱ xi̱kuumiína ña̱ xi̱tiinna ti̱a̱ká, ta ki̱xáʼana ndíku̱nna iinlá ta̱ Jesús. Ta xa̱ʼa̱ ña̱ ke̱ʼéna ña̱yóʼo ku̱a̱ʼání ña̱ va̱ʼa nda̱kiʼinna (Mar. 1:​16-18). Xa̱ʼa̱ ña̱ xi̱kuu ta̱ Pedro discípulo ta̱ Jesús, ku̱a̱ʼání ña̱ va̱ʼa xi̱nira. Tá kúú, xi̱nira tá sa̱ndáʼa ta̱ Jesús na̱ ndeéndóʼo, ta̱vára ta̱chí ndi̱va̱ʼa ña̱ xi̱kumií na̱ yiví ta nda̱a̱ sa̱ndátakura sava na̱ yiví (Mat. 8:​14-17; Mar. 5:​37, 41, 42). Saátu xi̱nira iin visión ña̱ ni̱na̱ʼa ndáa ki̱ʼva kaʼndachíñu ta̱ Jesús chí ndiví, ta ña̱yóʼo va̱ʼaní chi̱ndeétáʼanña xíʼinra (Mar. 9:​1-8; 2 Ped. 1:​16-18). Xa̱ʼa̱ ña̱ chi̱kaa̱ ta̱ Pedro ndee̱ ta kǒo níndakava-inira ña̱kán ku̱a̱ʼání ña̱ va̱ʼa nda̱kiʼinra. w23.09 21 párr. 4, 5

Nu̱ú primera carta ña̱ ka̱ʼyí ta̱ apóstol Pedro, ni̱ka̱ʼa̱nra ña̱ xíniñúʼu kuʼvi̱ní-iniyó kuniyó inkana, saáchi tá kéʼéyó ña̱yóʼo ndiʼi tiempo koo tu̱ʼvayó ña̱ ixakáʼnu-iniyó xa̱ʼa̱na (1 Ped. 4:8). Tá ka̱ʼyí ta̱ Pedro tu̱ʼun yóʼo sana nda̱kaʼánra xa̱ʼa̱ ña̱ ni̱ka̱ʼa̱n ta̱ Jesús xíʼinra. Ta̱ Pedro nda̱kanixi̱níra ña̱ va̱ʼaní-inira chi ni̱ka̱ʼa̱nra ña̱ u̱xa̱ yichi̱ví ixakáʼnu-inira xa̱ʼa̱ na̱ yiví, soo ta̱ Jesús ni̱ka̱ʼa̱nra xíʼinra ña̱ 77 yichi̱ví xíniñúʼu ixakáʼnu-inira xa̱ʼa̱na. Ña̱yóʼo kúni̱ kachiña ña̱ ndiʼi tiempo xi̱niñúʼu keʼéra ña̱yóʼo ta saátu xíniñúʼu keʼé miíyó (Mat. 18:21). ¿Á íxayo̱ʼvi̱ña xíʼún keʼún ña̱ káʼa̱n texto yóʼo? Tá saá íyoña, kǒo ndakava-iniún saáchi ndiʼiyó sana xa̱a̱ íxayo̱ʼvi̱ña xíʼinyó ña̱ ixakáʼnu-iniyó xa̱ʼa̱ iin na̱ yiví xa̱ʼa̱ ña̱ kúúyó na̱ yiví ku̱a̱chi. Soo iin ña̱ kivi keʼún kúú, ña̱ chika̱ún ndee̱ ña̱ ixakáʼnu-iniún xa̱ʼa̱ na̱ ke̱ʼé ña̱ va̱ása va̱ʼa xíʼún tasaá vií kutáʼan tukundó. w23.09 29 párr. 12

Tá ndíkaa̱ ta̱ Jonás ini ti̱a̱ká, xi̱kunda̱a̱-inira ña̱ kuniso̱ʼova Jehová oración ña̱ ke̱ʼéra, saáchi nda̱ndikóva-inira. Ta kǒo níxi̱ka-inira ña̱ mií Jehová kuniso̱ʼorara ta chindeétáʼanra xíʼinra. Tá ki̱tara ini ti̱a̱ká, xa̱a̱ ni̱xi̱yo tu̱ʼvara keʼéra ña̱ ni̱ka̱ʼa̱n Jehová xíʼinra (Jon. 2:10–3:4). ¿Á xa̱a̱ sava yichi̱ tá yáʼún nu̱ú iin tu̱ndóʼo ndíʼi̱ní-iniún ta xa̱ʼa̱ ña̱kán kǒo kívi keʼún oración? ¿Á túviún ña̱ kǒoka ndeún ña̱ kaʼviún? Ndakaʼán chi Jehová kúndaa̱va-inira xíʼin ña̱ yáʼún nu̱ú. Ni sava yichi̱ kǒo níʼún tu̱ʼun ña̱ ka̱ʼún xíʼin Jehová, soo ta̱kán xa̱a̱ xíni̱vara ndáa ki̱ʼva chindeétáʼanra xíʼún (Efes. 3:20). Tá ndóʼún iin kue̱ʼe̱ á ndákavaní-iniún ta kǒo káchi-iniún kaʼviún, iin ña̱ kivi keʼún kúú ña̱ kuniso̱ʼún audio ña̱ kúúmií Biblia á inkaka tutu ña̱ tává na̱ ñuu Ndióxi̱. Inka ña̱ kivi keʼún kúú ña̱ chika̱ún yaa kuniso̱ʼún nu̱ú jw.org. Jehová kúni̱vara chindeétáʼanra xíʼún, ña̱kán tá kéʼún oración nu̱úra tasaá nándukún ña̱ kivi chindeétáʼan xíʼún nu̱ú tu̱ʼunra, kán kivi ndani̱ʼún ña̱ xíniñúʼún ña̱ taxi ndee̱ ndaʼún. w23.10 13 párr. 6; 14 párr. 9

Nda̱a̱ táki̱ʼva ni̱xi̱yo ini ña̱ tabernáculo saátu ni̱xi̱yo ini ña̱ templo ña̱ ni̱xi̱yo ñuu Jerusalén tá xa̱a̱ ni̱ya̱ʼa ku̱i̱ya̱. U̱vi̱ xi̱ndataʼví ini ña̱yóʼo: iinña xi̱naní “Ña̱ yi̱i̱” ta inkaña xi̱naní “Ña̱ yi̱i̱ní”, ta iin cortina xi̱ndataʼví ini ña̱yóʼo (Heb. 9:​2-5; Éx. 26:​31-33). Ini cuarto ña̱ xi̱naní “Ña̱ yi̱i̱” ni̱xi̱yo iin candelabro ña̱ oro, ta ini ña̱kán xi̱ndikaa̱ iin altar ña̱ oro ña̱ xi̱xiniñúʼuna ña̱ xi̱chiʼmána ta saátu xi̱ndichi iin mesa nu̱ú xi̱ndóso si̱ta̱váʼa ña̱ xi̱taxina ndaʼa̱ Ndióxi̱. Na̱ su̱tu̱ na̱ nda̱kaxin Jehová kuití kúú na̱ va̱ʼa xi̱kiʼvi ini cuarto ña̱ xi̱naní “Ña̱ yi̱i̱” ña̱ va̱ʼa keʼéna chiñu nu̱úra (Núm. 3:​3, 7, 10). Ini cuarto “Ña̱ yi̱i̱ní” xi̱ndikaa̱ arca ña̱ trato, ta ña̱ oro xi̱kuuña ta ña̱yóʼo xi̱ndana̱ʼa̱ña ña̱ mií Jehová ni̱xi̱yo kán (Éx. 25:​21, 22). Iinlá ta̱ va̱ʼa xi̱kiʼvi nda̱a̱ ini cuarto ña̱ xi̱naní “Ña̱ yi̱i̱ní” xi̱kuu ta̱ su̱tu̱ káʼnu. Iin yichi̱ nu̱ú ku̱i̱ya̱ xi̱xiyo ña̱ xi̱naní: ki̱vi̱ ña̱ ndóo ku̱a̱china. Ki̱vi̱ yóʼo kúú ña̱ xi̱kiʼvi ta̱ su̱tu̱ káʼnu xíʼin ni̱i̱ kití ña̱ va̱ʼa chaʼvira xa̱ʼa̱ ku̱a̱chi miíra xíʼin xa̱ʼa̱ ku̱a̱chi na̱ ñuu (Lev. 16:​2, 17). Tá ni̱ya̱ʼa tiempo, Jehová xi̱niñúʼura espíritu santora ña̱ ka̱ʼa̱nra ndáaña xi̱ndana̱ʼa̱ ña̱ʼa ña̱ xi̱ñuʼu ini ña̱ tabernáculo (Heb. 9:​6, 7). w23.10 27 párr. 12

Ku̱a̱ʼání yichi̱ káʼa̱n Biblia tu̱ʼun yóʼo: “Kuʼvi̱-inindó kunitáʼanndó” (Juan 15:12; Rom. 13:8; 1 Tes. 4:9; 1 Ped. 1:22; 1 Juan 4:11). Soo ña̱ kúʼvi̱-iniyó xíniyó inkana níma̱yó ndíka̱ ña̱yóʼo ta ni iin na̱ yiví kǒo kívi kuniña. Tá saá, ¿ndáa ki̱ʼva na̱ʼa̱yó nu̱ú inkana ña̱ kúʼvi̱-iniyó xíniyóna? Kivi na̱ʼa̱yó ña̱yóʼo xíʼin ña̱ káʼa̱nyó ta saátu xíʼin ña̱ kéʼéyó. Íyo ku̱a̱ʼání ki̱ʼva ña̱ kivi na̱ʼa̱yó nu̱ú na̱ hermano ña̱ kúʼvi̱-iniyó xíniyóna, ta Biblia káʼa̱nña xa̱ʼa̱ sava ña̱yóʼo: “Nina ña̱ nda̱a̱ ka̱ʼa̱nndó xíʼin táʼanndó” (Zac. 8:16). “Vií koondó xíʼin táʼanndó” (Mar. 9:50). “Siʼnaka miíndó keʼé ña̱yóʼo ña̱ ixato̱ʼó táʼanndó” (Rom. 12:10). “Viíní ndakiʼin-táʼanndó” (Rom. 15:7). “Kǒo sandákoondó ña̱ [...] koo káʼnu-inindó xa̱ʼa̱na” (Col. 3:13). “Chindeétáʼanndó xíʼin táʼanndó tá yáʼandó nu̱ú tu̱ndóʼo” (Gál. 6:2). “Ndakundeéndó sandíkondó-ini táʼanndó” (1 Tes. 4:18). “Ndasandakúndó-ini táʼanndó” (1 Tes. 5:11). “Ka̱ʼa̱nndó xíʼin Ndióxi̱ xa̱ʼa̱ táʼanndó” (Sant. 5:16). w23.11 9 párr. 7, 8

Ndiʼi ki̱vi̱ íyo ku̱a̱ʼání ña̱ ndáka̱xinyó keʼéyó ta xíniñúʼu na̱ʼa̱yó á kándíxayó Ndióxi̱ tá ndáka̱xinyó keʼéyó ña̱yóʼo. Tá kúú, ndáka̱xinyó ndáana kutáʼan xíʼinyó, ndáaña sakúsi̱í-iniyó, ndáaña sakúaʼayó xa̱ʼa̱, ndáa ki̱ʼva keʼéyó xíʼin na̱ ti̱ndaʼa̱ xíʼinyó, ndáa ki̱ʼva sakúaʼnuyó se̱ʼeyó á ndáa chiñu kachíñuyó. Ta ña̱yóʼo kivi ndakanixi̱níyó xa̱ʼa̱: “¿Ndáaña náʼa̱ ndiʼi ña̱ ndáka̱xii̱n keʼíi̱? ¿Á náʼi̱ xíʼin ña̱ ndáka̱xii̱n keʼíi̱ ña̱ loʼova tiempo íyo ña̱ʼa ñuyǐví yóʼo ta xa̱a̱ ku̱nu̱míníva kixaa̱ ñuyǐví xa̱á? ¿Á ndákanixi̱níi̱ nda̱a̱ táki̱ʼva ndákanixi̱ní na̱ ñuyǐví yóʼo ña̱ va̱ása kivi kutakuyó ndiʼi saá tiempo?” (Mat. 6:​19, 20; Luc. 12:​16-21). Tá ná chikaa̱yó ndee̱ ña̱ kandíxakayó ña̱ xa̱a̱ ku̱yatinní kixaa̱ ñuyǐví xa̱á, viíní koo ña̱ ndaka̱xinyó keʼéyó. Yáʼatuyó nu̱ú tu̱ndóʼo nu̱ú xíniñúʼu na̱ʼa̱yó ña̱ kándíxayó Ndióxi̱. Tá kúú, tá íxandi̱va̱ʼana xíʼinyó, tá kúúmiíyó iin kue̱ʼe̱ ña̱ va̱ása kívi ndaʼa̱yó xíʼin á tá kúúmiíyó inkaka tu̱ndóʼo ña̱ kivi sandákava-iniyó. Sana tá sa̱kán kíxáʼa tu̱ndóʼo yóʼo nu̱úyó va̱ása íxayo̱ʼvi̱víña xíʼinyó. Soo tá xa̱a̱ naʼá ñúʼuyó ndaʼa̱ tu̱ndóʼo yóʼo xíniñúʼu kandíxaníyó Ndióxi̱ ña̱ va̱ʼa kundeé-iniyó ta kusi̱í-iniyó ndasakáʼnuyóra (1 Ped. 1:​6, 7). w23.04 27 párr. 4, 5

Tá xa̱a̱ ndi̱ʼi ke̱ʼéyó oración nu̱ú Jehová ná keʼéyó ña̱ ni̱ka̱ʼa̱nyó xíʼinra. Iin ta̱ hermano kúni̱ra ku̱ʼu̱nra asamblea regional, ta káʼa̱nra xíʼin Jehová ña̱ ná chindeétáʼanra xíʼinra ña̱ ná taxi ta̱ patrónra permiso ña̱ ku̱ʼu̱nra. ¿Ndáaña kivi keʼé Jehová ña̱ va̱ʼa ndakuiinra oraciónra? Sana kivi chindeétáʼanra xíʼin ta̱ hermano kán ña̱ ndakú koo inira ta ka̱ʼa̱nra xíʼin ta̱ patrónra. Soo ta̱ hermano kán xíniñúʼu ku̱ʼu̱nra ta ka̱ʼa̱nra xíʼinra. Ta sana ku̱a̱ʼá yichi̱ xíniñúʼu ku̱ʼu̱nra nu̱úra ta nda̱a̱ kivi ka̱ʼa̱nra xíʼinra ña̱ kivi nasamara ki̱vi̱ ña̱ káchíñura xíʼin inka na̱ káchíñu kán. Ta nda̱a̱ kivi ka̱ʼa̱nra xíʼinra ña̱ kǒo chaʼvirara xa̱ʼa̱ ña̱ ki̱vi̱ kán. Jehová kúni̱ra ña̱ ná ka̱ʼa̱n ni̱ʼiyó xíʼinra xa̱ʼa̱ ña̱ʼa ña̱ sándi̱ʼi̱-iniyó. Ta̱ Jesús ni̱ka̱ʼa̱nra ña̱ sava yichi̱ va̱ása ndi̱ku̱n kamaví ndakuiin Jehová yuʼúyó (Luc. 11:9). Soo ná kǒo ndakava-iniyó. Ná chikaa̱yó ndee̱ ña̱ ka̱ʼa̱n ni̱ʼiyó xíʼin Jehová xa̱ʼa̱ ña̱ kúni̱yó (Luc. 18:​1-7). Tá tuku ta tuku káʼa̱nyó xa̱ʼa̱ iin ña̱ʼa, náʼa̱yó nu̱ú Jehová ña̱ ndixa kúni̱yó chindeétáʼanra xíʼinyó ta kándíxaníyó ña̱ kivi keʼéraña. w23.11 22 párr. 10, 11

Jehová ni̱ka̱ʼa̱nra xíʼin ta̱ Abrahán ña̱ ti̱xin na̱ veʼe ta̱yóʼo ku̱a̱ʼání na̱ ñuu ndakiʼinna bendición (Gén. 15:5; 22:18). Ta̱ Abrahán xi̱kandíxaníra Ndióxi̱. Ña̱kán, kǒo níxi̱ka-inira ña̱ xi̱nuva ña̱ ni̱ka̱ʼa̱nra xíʼinra. Soo, ta̱ Abrahán xa̱a̱ 100 ku̱i̱ya̱ xi̱kuumiíra ta ñá Sara 90, ta kǒo nda̱a̱ ni iin se̱ʼena níxi̱yo (Gén. 21:​1-7). Soo Biblia káʼa̱nña, ta̱ Abrahán “ka̱ndíxara ña̱ xa̱a̱ra koora yivá ndiʼi na̱ ñuu nda̱a̱ táki̱ʼva ni̱ka̱ʼa̱n Ndióxi̱ xíʼinra” (Rom. 4:18). Ta ni̱xi̱nuva ña̱ xi̱ndatu ta̱ Abrahán. Saáchi ka̱kuva se̱ʼera, ta Isaac xi̱naníra. Soo, ¿nda̱chun xi̱kandíxaní ta̱ Abrahán ña̱ saxínu Jehová ña̱ ni̱ka̱ʼa̱nra xíʼinra? Ta̱ Abrahán xi̱xini̱níra ndáa ki̱ʼva íyo Jehová, xa̱ʼa̱ ña̱kán kǒo níxi̱ka-inira ña̱ saxínuvara ña̱ ni̱ka̱ʼa̱nra xíʼinra (Rom. 4:21). Jehová ni̱ka̱ʼa̱nra ña̱ iin ta̱a ta̱ nda̱kúní-ini ni̱xi̱yo ta̱ Abrahán xa̱ʼa̱ ña̱ xi̱kandíxanírara ta xi̱kusi̱íní-inira xíʼinra (Sant. 2:23). w23.12 8 párr. 1, 2

Chikaa̱ ndee̱ ña̱ va̱ʼa ná kundaa-inina yóʼó. Ña̱yóʼo kúni̱ kachiña ña̱ chika̱ún ndee̱ keʼún ndiʼi chiñu ña̱ táxina ndaʼún. Ndakanixi̱ní xa̱ʼa̱ ejemplo ta̱ Jesús. Ta̱yóʼo viíní xi̱keʼéra ndiʼi chiñu ña̱ xi̱kuumiíra, ke̱ʼéra ndiʼi ña̱ ni̱ka̱ʼa̱n Jehová xíʼinra ni sava yichi̱ i̱xayo̱ʼvi̱vaña xíʼinra keʼéraña. Xi̱kuʼviní-inira xi̱xinira na̱ yiví soo na̱ xi̱kuʼvi̱níka-inira xi̱xinira xi̱kuu na̱ discípulora ta nda̱a̱ ni̱xi̱ʼi̱ra xa̱ʼa̱na (Juan 13:1). Táki̱ʼva ke̱ʼé ta̱ Jesús, chikaa̱ ndee̱ ña̱ keʼún ndiʼi chiñu ña̱ táxina ndaʼún, ta tá va̱ása xíni̱ún keʼúnña vitá koo iniún ta ka̱ʼa̱n xíʼin iin na̱ hermano ña̱ ná chindeétáʼanna xíʼún (Rom. 12:11). Ta ndiʼi chiñu ña̱ keʼún keʼéña “xa̱ʼa̱ Jehová ta su̱ví xa̱ʼa̱ na̱ yiví” (Col. 3:23). Xa̱ʼa̱ ña̱ kúún iin ta̱ ku̱a̱chi koo sava ña̱ʼa ña̱ kǒo kuchiñún keʼún, xa̱ʼa̱ ña̱kán xíniñúʼu ndakuniún ña̱ va̱ása va̱ʼa íyo sava ña̱ kéʼún (Prov. 11:2). w23.12 26 párr. 8

Tá ndákuchiyó saá xáa̱yó ndúuyó na̱ veʼe Jehová ta “kúsi̱íní-iniyó”. Na̱ nda̱kuchi va̱ʼaní kítáʼanna xíʼin Jehová ta káʼa̱nna táki̱ʼva ni̱ka̱ʼa̱n ta̱ David: “Si̱íní íyo na̱ ndáka̱xiún ta kánaúnna ña̱ koona yéʼún” (Sal. 65:4). Su̱ví ndiʼiví na̱ yiví táxi Jehová ña̱ ki̱ʼvina ti̱xin ñuura. Jehová ndáka̱xinra na̱ yiví na̱ náʼa̱ ña̱ kúni̱na koona migora (Sant. 4:8). Ña̱yóʼo káʼa̱n Jehová xíʼin na̱ migora: “Taxii̱ ña̱ʼa ndaʼa̱ndó nda̱a̱ ná kǒo kuma̱níkaña nu̱úndó” (Mal. 3:10; Jer. 17:8). Tá xa̱a̱ ndákuchiyó, saá kúú ña̱ kíxáʼayó káchíñuyó nu̱ú Jehová. Ndiʼi miíyó na̱ xa̱a̱ nda̱kuchi, xíniñúʼu chikaa̱yó ndee̱ ña̱ saxínuyó ña̱ ki̱ndooyó keʼéyó nu̱ú Jehová ta nda̱kú koo iniyó xíʼinra tá yáʼayó nu̱ú tu̱ndóʼo á tá kúni̱yó keʼéyó ña̱ kini (Ecl. 5:​4, 5). Saátu ná kundiku̱nyó yichi̱ ta̱ Jesús ta ná keʼéyó ndiʼi chiñu ña̱ xáʼndara (Mat. 28:​19, 20; 1 Ped. 2:21). w24.03 8 párr. 1-3

Tá kǒo kútóondó ña̱ inkáchi kutáʼanndó á sana xa̱a̱ síín síín ña̱ʼa kútóo iin iinndó, á savatu sása̱a̱ táʼanndó. ¿Ndáaña kivi keʼéndó tá saá ndóʼondó? Ndakanixi̱níndó xa̱ʼa̱ ñuʼu̱ xíxi̱. Tá sa̱kán ndákokoña loʼova xíxi̱ña, soo tá kíxáʼayó táanyó titu̱n nu̱úña xáʼnukavaña. Ta ki̱ʼva saá xíniñúʼu keʼéndó xíʼin táʼanndó. Xíniñúʼu tavándó loʼo tiempo iin iin ki̱vi̱ ña̱ va̱ʼaka kutáʼan xíʼin táʼanndó. Kotondó ndáa ña̱ʼa kúú ña̱ kútóo u̱vi̱ saándó keʼéndó (Sant. 3:18). Tá ná kixáʼandó inkáchi keʼéndó sava ña̱ʼa, ña̱yóʼo chindeétáʼanña xíʼinndó ña̱ kixáʼa tukundó kuʼvi̱-inindó kuni táʼanndó. Na̱ xa̱a̱ ti̱ndaʼa̱ ndáyáʼviní ña̱ ixato̱ʼó táʼanna. Ña̱yóʼo íyoña nda̱a̱ táki̱ʼva íyo ña̱ tíviyó nu̱ú iin titu̱n tú xa̱a̱ nda̱koko ña̱ va̱ʼa ná kǒo nda̱ʼvanú. Ta ki̱ʼva saá kivi kundoʼo na̱ ti̱ndaʼa̱ tá va̱ása íxato̱ʼó táʼanna, kamaníva sandákoona ña̱ kuʼvi̱-inina kunitáʼanna. Soo tá ná chika̱a̱na ndee̱ ña̱ ixato̱ʼó táʼanna, ña̱yóʼo chindeétáʼan xíʼinna ña̱ va̱ása sandákoona ña̱ kuʼvi̱-inina kunitáʼanna. Sana ndákanixi̱níún ña̱ to̱ʼóníún soo ndakaʼán chi ña̱ ndáyáʼvika kúú ndáa ki̱ʼva kúni yiíún á ñá síʼún xíʼin ña̱ kéʼún. w23.05 24 párr. 14, 15

Biblia káʼa̱nña xa̱ʼa̱ ku̱a̱ʼání na̱ xi̱ndasakáʼnu Ndióxi̱ tiempo tá ya̱chi̱, na̱ ni̱ka̱ʼa̱n ña̱ xi̱yiʼvínína xa̱ʼa̱ tu̱ndóʼo ña̱ xi̱yaʼana nu̱ú, saáchi na̱ xi̱saa̱-ini xi̱xinina xi̱kuni̱na kaʼnínana ta saátu xi̱yaʼana nu̱ú inkaka tu̱ndóʼo (Sal. 18:4; 55:​1, 5). Ta miíyó, ¿á íyo na̱ íxandi̱va̱ʼa xíʼinyó? Tá kúú na̱ káchíñu xíʼinyó, na̱ káʼvi xíʼinyó escuela, na̱ veʼeyó á na̱ chíñu. Ta, ¿á ni̱ka̱ʼa̱n na̱ doctor xíʼinyó ña̱ si̱lóʼo tiempo kutakuyó chi kǒoka ta̱tán ña̱ kuniñúʼuyó xíʼin kue̱ʼe̱ ña̱ ndóʼoyó? ¿Ndáaña kéʼé Jehová ña̱ va̱ʼa chindeétáʼanra xíʼinyó? Jehová sándi̱kora-iniyó ta kǒo ndíʼi̱ka-iniyó. Ndáyáʼviní ña̱ taváyó tiempo ña̱ ka̱ʼa̱nyó xíʼin Jehová ta saátu ña̱ kaʼviyó tu̱ʼunra (Sal. 77:​1, 12-14). Ña̱kán, tá ná ya̱ʼayó nu̱ú iin tu̱ndóʼo ña̱ yo̱ʼvi̱, ña̱ siʼna xíniñúʼu keʼéyó kúú ña̱ ka̱ʼa̱nyó xíʼin yiváyó Jehová. Ná ka̱ʼa̱nyó xíʼinra xa̱ʼa̱ ndiʼi ña̱ sándi̱ʼi̱-iniyó ta saátu xa̱ʼa̱ ña̱ sáyi̱ʼví miíyó. Ná taxiyó ña̱ ndakuiinra oraciónyó ta ná taxiyó ña̱ sandíkora-iniyó (Sal. 119:28). w24.01 24 párr. 14; 25 párr. 16

Ña̱ va̱ʼa keʼéyó iin chiñu ña̱ kúni̱yó keʼéyó nu̱ú Ndióxi̱, ndáyáʼviní ña̱ kuni̱yó keʼéyó ña̱yóʼo, ¿nda̱chun? Saáchi tá chi̱kaa̱-iniyó ña̱ saxínuyó iin ña̱ ndakaxinyó keʼéyó, chika̱a̱nívayó ndee̱ ña̱ saxínuyóña. Tá kúni̱níyó keʼéyó iin ña̱’a, va̱ása ixayo̱ʼvi̱ña xíʼinyó ña̱ saxínuyóña. Tá saá, ¿ndáaña chindeétáʼan xíʼún ña̱ kuni̱kaún keʼún chiñu nu̱ú Ndióxi̱? Ka̱ʼa̱n xíʼin Jehová ña̱ ná chindeétáʼanra xíʼún ña̱ kusi̱íka-iniún keʼún iin chiñu. Espíritu santora kúú ña̱ chindeétáʼan xíʼún ña̱ saxínún ña̱yóʼo. Sava yichi̱ ndáka̱xinyó keʼéyó iin ña̱ʼa chi túviyó ña̱ xíniñúʼu keʼéyóña, soo mií ña̱ nda̱a̱ sana ni kǒo kúni̱víyó keʼéyóña. Ndakanixi̱ní xa̱ʼa̱ ña̱ kéʼé Jehová xa̱ʼún (Sal. 143:5). Ta̱ apóstol Pablo nda̱kanixi̱níra xa̱ʼa̱ ña̱ va̱ʼaní ni̱xi̱yo ini Jehová xíʼinra, ta ña̱yóʼo chi̱ndeétáʼan xíʼinra ña̱ ka̱chíñura nu̱úra xíʼin ndiʼi níma̱ra (1 Cor. 15:​9, 10; 1 Tim. 1:​12-14). Ta saátu yóʼó, tá ndákanixi̱níún xa̱ʼa̱ ña̱ kéʼé Jehová xa̱ʼún, ña̱yóʼo chindeétáʼanña xíʼún ña̱ saxínún chiñu ña̱ kúni̱ún keʼún (Sal. 116:12). w23.05 27 párr. 3-5

Jehová kúú yiváyó ta kúni̱ra ña̱ ná ndasakáʼnuyó ki̱vi̱ra (Sal. 119:108). ¿Á kúni̱ kachi ña̱yóʼo ña̱ íyora nda̱a̱ táki̱ʼva íyo na̱ yiví na̱ kúni̱ ña̱ ná ka̱ʼa̱n va̱ʼana xa̱ʼa̱na tasaá va̱ʼa kunina? Va̱ásaví. Ta̱ Ndi̱va̱ʼa káʼa̱nra ña̱ miíyó na̱ yiví va̱ása nda̱kú koo iniyó xíʼin Jehová ta kǒo ndakiʼinyó tu̱ʼunra tá ná ya̱ʼayó nu̱ú tu̱ndóʼo (Job 1:​9-11; 2:4). Soo ta̱ Job ni̱na̱ʼa̱ra ña̱ su̱ví ña̱ ndixa kúú ña̱ káʼa̱n ta̱ Ndi̱va̱ʼa. Ta miíyó, ¿ndáaña kivi keʼéyó? Ña̱ kivi keʼéyó kúú ña̱ ndasakáʼnuyó Jehová chi saá náʼa̱yó ña̱ vatá kúú ña̱ káʼa̱n ta̱ Ndi̱va̱ʼa. Nu̱ú miíyó ndáyáʼviní ña̱ nda̱kú koo iniyó xíʼin Jehová ta sakúsi̱íyó-inira (Prov. 27:11). w24.02 9 párr. 4, 5

Tá xa̱a̱ ni̱xi̱ʼi̱ ta̱ Moisés xíʼin ta̱ Josué, Jehová nda̱kaxinra na̱ juez ña̱ va̱ʼa kuniʼina yichi̱ nu̱ú na̱ ñuura. Ta saátu tá xa̱a̱ xáʼndachíñu na̱ rey, Jehová nda̱kaxinra na̱ profeta ña̱ kuniʼina yichi̱ nu̱ú na̱ ñuu. Na̱ rey na̱ nda̱kú ni̱xi̱yo ini xíʼin Jehová xi̱xiniso̱ʼona ña̱ xi̱kaʼa̱n na̱ profeta. Tá kúú, ta̱ rey David vitá ni̱xi̱yo inira ta xi̱niso̱ʼora ña̱ ni̱ka̱ʼa̱n ta̱ profeta Natán xíʼinra (2 Sam. 12:​7, 13; 1 Crón. 17:​3, 4). Ta̱ rey Jehosafat ka̱ndíxara ña̱ ni̱ka̱ʼa̱n ta̱ profeta Jahaziel xíʼinra ta ni̱ka̱ʼa̱nra xíʼin na̱ ñuu Judá ña̱ ná kandíxana ña̱ xi̱kaʼa̱n na̱ profeta Ndióxi̱ (2 Crón. 20:​14, 15). Tá ni̱ya̱ʼa ta̱ rey Ezequías nu̱ú tu̱ndóʼo ni̱ka̱ʼa̱nra xíʼin ta̱ profeta Isaías ña̱ chindeétáʼanra xíʼinra (Is. 37:​1-6). Mií Jehová xi̱chindeétáʼan xíʼin na̱ rey (2 Crón. 20:​29, 30; 32:22). Mií Jehová xi̱xiniñúʼu na̱ profeta ña̱ va̱ʼa kuniʼina yichi̱ nu̱ú na̱ ñuu. w24.02 21 párr. 8

Ta̱ Ndi̱va̱ʼa kúni̱ra ña̱ ná kitáʼanyó xíʼin na̱ yiví na̱ kéʼé ña̱ kini, tasaá kǒo kuniso̱’okayó ña̱ ká’a̱n Jehová xíʼinyó. Ta miíyó xíniñúʼu kiʼinníkayó kuenta tiempo vitin, ¿nda̱chun? Saáchi su̱ví na̱ yiví kuití kivi kitáʼanyó xíʼin, saáchi tiempo vitin íyo ña̱ va̱xi nu̱ú internet ña̱ kivi sakúxíka miíyó nu̱ú Jehová. Ni káʼa̱nva na̱ yiví xíʼinyó ña̱ keʼéyó ña̱ kini, soo ná kǒo taxiyó ña̱ sandáʼvina miíyó (Efes. 4:​19, 20). Ná ndakanixi̱níyó xa̱ʼa̱ pregunta yóʼo: “¿Á chíkaa̱i̱ ndee̱ ña̱ kǒo kutáʼi̱n xíʼin na̱ káʼvi xíʼi̱n escuela á na̱ káchíñu xíʼi̱n? ¿Á ndakú íyo inii̱ ta káʼi̱n xa̱ʼa̱ ña̱ kándíxai̱ xíʼin na̱ yiví ni kúsikindaana yi̱ʼi̱?”. Ta saátu nda̱a̱ táki̱ʼva káchi 2 Timoteo 2:​20-22, ná ndaka̱xin viíyó na̱ koo migoyó ti̱xin congregación. Ta ná ndakaʼányó ña̱ su̱ví ndiʼina chindeétáʼan xíʼinyó ña̱ nda̱kú koo iniyó xíʼin Jehová. w24.03 22, 23 párr. 11, 12

¿Á xa̱a̱ ndákanixi̱níún ndáa ki̱ʼva káa Jehová? Kǒo kívi kuniyó Jehová, soo Biblia káʼa̱nña xa̱ʼa̱ ku̱a̱ʼání ki̱ʼva ña̱ náʼa̱ra. Tá kúú, Biblia káʼa̱nña ña̱ kúúra “ñu̱ʼu á ña̱ ka̱ndii” ta saátu iin “escudo”. Kúútura iin “ñuʼu̱ ña̱ xíxi̱” (Sal. 84:11; Heb. 12:29). Ta̱ profeta Ezequiel xi̱nira iin visión ta ni̱ka̱ʼa̱nra ña̱ nda̱a̱ táki̱ʼva íyo yu̱u̱ ña̱ zafiro ña̱ yéʼe̱ní saá íyo Jehová, ta chí sa̱tára íyo iin arcoíris tí liviní (Ezeq. 1:​26-28). Xa̱ʼa̱ ña̱ kǒo kívi kotoyó Jehová, sana íxayo̱ʼvi̱ña xíʼinyó kandíxayó ña̱ kúni̱ra xínira miíyó. Á savatuyó xa̱ʼa̱ ña̱ ndo̱ʼoyó tá ya̱chi̱ ndákanixi̱níyó ña̱ va̱ása kuʼvi̱ví-ini Jehová kunira miíyó. Soo, Jehová kúnda̱a̱va-inira ña̱ xóʼvi̱níyó xa̱ʼa̱ ña̱ ndo̱ʼoyó tá ya̱chi̱, ña̱kán ta̱xira Biblia ndaʼa̱yó ña̱ va̱ʼa kunda̱a̱-iniyó ndáa ki̱ʼva íyora tasaá kotoyó ña̱ kúʼvi̱níva-inira xínira miíyó (1 Juan 4:8). Ndiʼi ña̱ kéʼé Jehová, kéʼéraña xa̱ʼa̱ ña̱ kúni̱níra xínira miíyó (Mat. 5:​44, 45). w24.01 26 párr. 1-3

Jehová nda̱kaxinra ta̱ Moisés ña̱ tavára na̱ ñuu Israel chí ñuu Egipto. Jehová xi̱niñúʼura iin vi̱kó ña̱ va̱ʼa kuniʼira yichi̱ nu̱úna tá káʼñu, ta tá ñuú xi̱niñúʼura iin ñuʼu̱ (Éx. 13:21). Ta̱ Moisés xi̱ndiku̱nra vi̱kó yóʼo, xa̱ʼa̱ ña̱yóʼo miíra xíʼin na̱ ñuu Israel ni̱xa̱a̱na nu̱ú ndíkaa̱ tá mar Rojo. Tá xi̱ni na̱ ñuu Israel ña̱ va̱xi na̱ soldado egipcio ni̱yi̱ʼvinína saáchi nda̱kanixi̱nína ña̱ kǒo nu̱ú ku̱ʼu̱nna. Soo, mií Jehová kúú ta̱ ni̱ka̱ʼa̱n xíʼin ta̱ Moisés ña̱ ku̱ʼu̱nra xíʼinna nda̱a̱ kán (Éx. 14:2). Tándi̱ʼi, Jehová ke̱ʼéra iin milagro ta sa̱kǎkurana (Éx. 14:​26-28). Ki̱ʼva 40 ku̱i̱ya̱ xi̱niñúʼu ta̱ Moisés vi̱kó ña̱ va̱ʼa kuniʼira yichi̱ nu̱ú na̱ ñuu Israel tá xi̱ñuʼuna desierto (Éx. 33:​7, 9, 10). Tá xi̱nuu vi̱kó yóʼo saá kúú ña̱ xi̱kaʼa̱n Ndióxi̱ xíʼin ta̱ Moisés ta tándi̱ʼi ta̱ Moisés xi̱kaʼa̱nra xíʼin na̱ ñuu ndáaña xi̱xiniñúʼu keʼéna. Ña̱kán, na̱ ñuu Israel xi̱nina prueba ña̱ xi̱naʼa̱ ña̱ ndixa nda̱kaxin Jehová ta̱ Moisés ña̱ kuniʼira yichi̱ nu̱úna. w24.02 21 párr. 4, 5