Nda̱ni̱ʼína iin ña̱ va̱ʼaníka

KU̱A̱ʼÁNÍ na̱ ndásakáʼnu Ndióxi̱ va̱ása kéʼéna vikó ña̱ Navidad. ¿Á ndíko-inina ña̱ kǒo kéʼéna ña̱yóʼo? ¿Á kuni̱na ndikóna keʼéna sava ña̱ xi̱keʼéna tá ya̱chi̱? ¿Á túvi na̱ va̱lí se̱ʼena ña̱ sana ña̱ va̱ʼa kúú ña̱yóʼo ta kǒo kéʼénaña? Ná kotoyó ña̱ káʼa̱n sava na̱ testigo Jehová na̱ íyo iníísaá ñuyǐví.

Ña̱ ndákaʼánna xa̱ʼa̱ ta̱ Jesús. “Tá kúma̱ní koi̱ testigo Jehová, sava yichi̱ kuití xi̱xaʼi̱n veʼe-ñu̱ʼu. Xi̱xaʼa̱n kuitíi̱ tá xi̱xiyo Navidad á Pascua. Soo nda̱a̱ ni iin yichi̱ va̱ása níndakanixi̱níi̱ xa̱ʼa̱ ta̱ Jesús. Ta vitin, ña̱ kǒo kéʼíi̱ vikó ña̱ Navidad, u̱vi̱ yichi̱ nu̱ú semana ndákutáʼi̱n xíʼin na̱ congregación ta sanáʼi̱ na̱ yiví ña̱ káʼa̱n Biblia xa̱ʼa̱ ta̱ Jesús.” (ÑÁ EVE, AUSTRALIA.)

Ña̱ taxina regalo. “Kúsi̱íní-inii̱ tá táxina regalo ndaʼíi̱ tá va̱ása ndátui̱ ña̱yóʼo. Ta kútóoníi̱ kéʼíi̱ tarjeta xíʼin dibujo ña̱ va̱ʼa sáníʼi̱ña inkana. Ta saá kusi̱í-ini na̱kán, ta saátu miíi̱.” (TA̱ REUBEN, IRLANDA DEL NORTE.)

Chindeétáʼanyó xíʼin na̱ kúma̱ní ña̱ʼa nu̱ú. “Kúsi̱íní-inindi̱ ña̱ keʼéndi̱ ña̱ʼa ña̱ ku̱ʼu̱n kuxu na̱ ndeé ndóʼo. Ta saátu xáʼa̱n postre xíʼindi̱, yita a iin regalo ña̱ chindeétáʼan xíʼinna ña̱ va̱ʼa kunina. Ta ña̱yóʼo kivi keʼéyóña nda̱a̱ ndáaka ki̱vi̱.” (ÑÁ EMILY, AUSTRALIA.)

Ña̱ ndatakayó xíʼin na̱ familia. “Tá xa̱a̱ ndátaka na̱ familia, na̱ va̱lí se̱ʼena va̱ʼaka xáa̱na xínina xitona, xi̱i̱na ta saátu na̱ primona. Ta xa̱ʼa̱ ña̱ kǒo kéʼéndi̱ vikó táʼan ña̱ kéʼé na̱ ñuyǐví, na̱ veʼendi̱ kúnda̱a̱-inina ña̱ xáʼa̱nndi̱ nu̱úna xa̱ʼa̱ ña̱ kúnindi̱ xínindi̱na ta su̱ví xa̱ʼa̱ ña̱ nduxa̱ kúú ña̱ xáʼa̱nndi̱.” (ÑÁ WENDY, ISLAS CAIMÁN.)

Ña̱ táxi̱n kooyó. “Xa̱ʼa̱ ña̱ ku̱a̱ʼání ña̱ʼa xi̱keʼíi̱ tá xi̱xiyo Navidad, kǒo nítaxiña tiempo ndaʼíi̱ ña̱ ndakanixi̱níi̱ xa̱ʼa̱ ña̱ táxi̱n kooyó. Sa̱kuaʼi̱ ña̱ káʼa̱n Biblia ña̱ kúni̱ Ndióxi̱ taxira ña̱ vií koo na̱ yiví. Kúnda̱a̱-inii̱ ña̱ chí nu̱únínu na̱ se̱ʼi̱ va̱ʼaní koona.” (ÑÁ SANDRA, ESPAÑA.)