Nda̱kandaní-inii̱ xíʼin ña̱ káxi káʼa̱n ña̱ Biblia

ÑA̱ NDO̱ʼI̱:

Ka̱kui̱ chí Székesfehérvár, iin ñuu ña̱ kíndo̱o chí Hungría ta xa̱a̱ yáʼaka mil ku̱i̱ya̱ íyoña ta liviní ña̱ʼa nátúʼunna xa̱ʼa̱ña. Soo tá ni̱xi̱yo ña̱ Segunda Guerra Mundial ku̱a̱ʼání ña̱ʼa kini ku̱u ta kǒo nándósó-inii̱ xa̱ʼa̱ña.

Xa̱ʼnui̱ xíʼin na̱ xi̱íi̱. Ndákaʼánníi̱ xa̱ʼa̱na ta mií ñá ndákaʼán va̱ʼakai̱ xa̱ʼa̱ kúú xi̱tái̱n ñá Elisabeth. Ñáyóʼo sa̱náʼa̱ña yi̱ʼi̱ ña̱ kandíxai̱ Ndióxi̱. Nani tá kúúmiíi̱ u̱ni̱ ku̱i̱ya̱i̱ sa̱náʼa̱ñá yi̱ʼi̱ ña̱ ndiʼi ñuú ka̱ʼi̱n oración ña̱ Padrenuestro. Soo tá xa̱a̱ kúúmiíi̱ 30 ku̱i̱ya̱, saáví ni̱xa̱i̱ na̱kunda̱a̱-inii̱ ndáaña kúni̱ kachi oración yóʼo.

Na̱ xi̱íi̱ kúú na̱ sa̱kúaʼnu yi̱ʼi̱, saáchi na̱ yivái̱ ñuú xíʼin káʼñu xi̱kachíñuna ña̱ va̱ʼa satána iin veʼe nu̱ú koondi̱. U̱vi̱ yichi̱ nu̱ú yo̱o̱ xi̱ndatakandi̱ ña̱ va̱ʼa kuxundi̱ xíʼin na̱ veʼendi̱. Ndákaʼánníi̱ xa̱ʼa̱ ki̱vi̱ sábado tá xi̱ndataka ndiʼindi̱.

Tá ku̱i̱ya̱ 1958 ni̱xi̱nu ña̱ xi̱kuni̱ní na̱ yivái̱: ku̱chiñuna sa̱tána iin veʼe. Nda̱a̱ vitinví kúú ña̱ va̱ʼa ndakiʼinna kuenta xíʼi̱n. Ni̱kusi̱íkaví-inii̱, soo va̱ása ku̱a̱ʼá tiempo níkusi̱í-inii̱, saáchi tá ni̱ya̱ʼa i̱ñu̱ yo̱o̱ ni̱xi̱ʼi̱va yivái̱ xíʼin cáncer.

Ku̱suchíkaví-inii̱. Ndákaʼíi̱n ña̱ ni̱ka̱ʼi̱n ña̱yóʼo xíʼin Ndióxi̱: “Xa̱kundáʼvikavíi̱ nu̱ún ña̱ ná sakǎkún yivái̱. Ndákaʼánkavíi̱ xa̱ʼa̱ra, ¿nda̱chun kǒo níxiniso̱ʼún ña̱ ni̱ka̱ʼi̱n xíʼún?”. Xi̱kuni̱kavíi̱ kunda̱a̱-inii̱ ndáa míí ndíka̱a̱ yivái̱. Xi̱ndakanixi̱níi̱: “¿Á chí ndiví ku̱a̱ʼa̱nra á ni loʼokaví kǒo ndákaʼánra xa̱ʼa̱ndi̱?”. Xi̱sa̱a̱kaví-inii̱ xi̱xinii̱ na̱ va̱lí na̱ táʼan tákuka yivá.

Ku̱a̱ʼání ku̱i̱ya̱ ndiʼi ki̱vi̱ xi̱xa̱ʼi̱n nu̱ú ni̱ndu̱xu̱n yivái̱. Xi̱xi̱kuxíti̱i̱ kán ta xi̱ka̱ʼi̱n xíʼin Ndióxi̱: “Ndúkúníi̱ ña̱ ma̱ní nu̱ún kúni̱i̱ kunda̱a̱-inii̱ ¿á chí ndiví ku̱a̱ʼa̱n yivái̱ á ndáa míí ku̱a̱ʼa̱nra?”. Xi̱ka̱ʼa̱nnítui̱ xíʼinra ña̱ ná chindeétáʼanra xíʼin ña̱ va̱ʼa kunda̱a̱-inii̱ ndáa xa̱ʼa̱ kúú ña̱ i̱xava̱ʼara miíyó.

Tá xi̱kuumiíi̱ 13 ku̱i̱ya̱ ki̱xáʼíi̱ sákuaʼi̱ tu̱ʼun alemán chi xi̱ndakanixi̱níi̱ ña̱ kivi xa̱i̱ kunda̱a̱-ini xa̱ʼa̱ ña̱ʼa ña̱ kúni̱níi̱ kunda̱a̱-inii̱ xa̱ʼa̱ nu̱ú tutu ña̱ xi̱tavá na̱ alemán. Tá ku̱i̱ya̱ 1967 nda̱kiʼi̱n ku̱a̱ʼi̱n kaʼvii̱ chí ñuu Jena, ña̱ xi̱ndika̱a̱ chí Alemania oriental. Ku̱a̱ʼání libro na̱ filósofo alemán ka̱ʼvii̱, mií ña̱ ku̱a̱ʼá va̱ʼaka ka̱ʼvii̱ kúú ña̱ káʼa̱n xa̱ʼa̱ nda̱chun kúú ña̱ íyoyó ñuyǐví yóʼo. Ni íyova sava ña̱ ku̱tói̱ ña̱ ka̱ʼvii̱ nu̱ú libro kán, soo kǒo níchindeétáʼanña xíʼi̱n ña̱ kunda̱a̱-inii̱ xa̱ʼa̱ mií ña̱ ndixa xi̱kuni̱i̱ kunda̱a̱-inii̱ xa̱ʼa̱. Xi̱ka̱ʼa̱nkavíi̱ xíʼin Ndióxi̱ ña̱ ná chindeétáʼanra xíʼi̱n ña̱ va̱ʼa kunda̱a̱-inii̱ xa̱ʼa̱ña.

ÑA̱ BIBLIA CHI̱NDEÉTÁʼANÑA XÍʼI̱N ÑA̱ NA̱SAMAI̱:

Tá ku̱i̱ya̱ 1970 ndi̱kói̱ chí Hungría ta kán xi̱nitáʼi̱n xíʼin ñá Rose. Tá ni̱ya̱ʼa loʼo tiempo ti̱ndaʼa̱ndi̱, nda̱kiʼinndi̱ ku̱a̱ʼa̱nndi̱ koondi̱ chí Austria. Ta xi̱ndakanixi̱níndi̱ ku̱ʼu̱nndi̱ nda̱a̱ Sydney, Australia, nu̱ú ni̱xi̱yo iin xitoi̱.

Tá ni̱ya̱ʼa loʼo tiempo ña̱ ndóondi̱ chí Austria nda̱ni̱ʼíi̱ chiñu kachíñui̱. Iin ki̱vi̱, iin ta̱ káchíñu kán ni̱ka̱ʼa̱nra xíʼi̱n ña̱ kivi chindeétáʼan Biblia xíʼi̱n ña̱ va̱ʼa kunda̱a̱-inii̱ xa̱ʼa̱ ña̱ xi̱nda̱ka̱tu̱ʼíi̱n miíi̱ ta ta̱xira u̱vi̱ libro ndaʼíi̱ ña̱ xi̱ka̱ʼa̱n xa̱ʼa̱ ña̱yóʼo. Kamaní ka̱ʼvii̱ña, soo xi̱kuni̱kai̱ kunda̱a̱-inii̱. Ña̱kán chi̱ndaʼíi̱ tutu ku̱a̱ʼa̱n ndaʼa̱ na̱ testigo Jehová, na̱ i̱xava̱ʼa tutu kán, ta ni̱ka̱ʼi̱n xíʼinna ña̱ ná chindaʼákanaña ndaʼíi̱.

Mií ki̱vi̱ ña̱ ni̱xi̱nu iin ku̱i̱ya̱ ti̱ndaʼa̱ndi̱ ni̱xa̱a̱ iin ta̱ loʼo testigo Jehová veʼendi̱. Ta̱yóʼo ta̱xira ndaʼíi̱ tutu ña̱ ndu̱kúi̱ ta ni̱ka̱ʼa̱nra xíʼi̱n á kúni̱kai̱ sakúaʼi̱ xa̱ʼa̱ Biblia. Ta ni̱ka̱ʼi̱n xíʼinra ña̱ kúni̱vai̱. Xa̱ʼa̱ ña̱ xi̱kuni̱níi̱ sakúaʼi̱ xa̱ʼa̱ Biblia, u̱vi̱ yichi̱ nu̱ú semana xi̱kaʼvindi̱ ta ku̱mí hora xi̱kaʼvindi̱ iin iin yichi̱.

Xi̱kusi̱íkaví-inii̱ xa̱ʼa̱ ndiʼi ña̱ xi̱sakúaʼi̱ nu̱ú Biblia. Tá xi̱niñúʼuna Biblia miíi̱ ña̱ tu̱ʼun húngaro ta ni̱na̱ʼa̱na nu̱úi̱ nu̱ú va̱xi ki̱vi̱ Ndióxi̱, ni loʼo kǒo níkivi kandíxai̱ña. Ki̱ʼva 27 ku̱i̱ya̱ ni̱xa̱ʼi̱n misa ta nda̱a̱ ni iin yichi̱ kǒo níxiniso̱ʼi̱ ka̱ʼa̱nna ki̱vi̱ Jehová. Nda̱kanda̱ní-inii̱ xa̱ʼa̱ ña̱ káxiní sánáʼa̱ Biblia. Tá kúú, iin ña̱ nda̱kanda̱ní-inii̱ xíʼin kúú ña̱ káʼa̱nña xa̱ʼa̱ na̱ ni̱xi̱ʼi̱ ña̱ va̱ása kúnda̱a̱ka-inina ta íyona nda̱a̱ táki̱ʼva íyo na̱ kísi̱ (Eclesiastés 9:​5, 10; Juan 11:​11-15). Ta saátu na̱kunda̱a̱-inii̱ ña̱ koo iin ñuyǐví xa̱á nu̱ú va̱ása kuvika na̱ yiví (Apocalipsis 21:​3, 4). Ta vitin kándíxavai̱ ña̱ ndataku na̱ ni̱xi̱ʼi̱ ta kivi kuni tukui̱ yivái̱ nu̱ú ñuyǐví xa̱á (Hechos 24:15).

Ñá Rose xi̱kutóoníñá kaʼviñá tu̱ʼun Ndióxi̱, ña̱kán kamaní ka̱ʼvindi̱ ta nu̱ú u̱vi̱ yo̱o̱ xa̱a̱ sa̱ndíʼivana ka̱ʼvina libro kán xíʼinndi̱. Xi̱xa̱ʼa̱nndi̱ ndiʼi reunión xíʼin na̱ testigo Jehová ta xi̱ndakanda̱ní-inindi̱ xa̱ʼa̱ ña̱ xi̱kuni̱nína xi̱xinitáʼanna, xa̱ʼa̱ ña̱ va̱ʼaní-inina ta saátu xa̱ʼa̱ ña̱ viíní kítáʼanna (Juan 13:​34, 35).

Tá ku̱i̱ya̱ 1976 nda̱kiʼinndi̱ ku̱a̱ʼa̱nndi̱ koondi̱ chí Australia. Ndi̱ku̱n tá ni̱xa̱a̱ndi̱ na̱ndukúndi̱ na̱ testigo Jehová ta viíní nda̱kiʼinna ndi̱ʼi̱. Tá ku̱i̱ya̱ 1978 nda̱kuchindi̱ ta ndu̱undi̱ testigo Jehová.

ÑA̱ VA̱ʼA ÑA̱ NDA̱KIʼI̱N:

Nda̱a̱ vitinví ni̱xa̱i̱ na̱kunda̱a̱-inii̱ xa̱ʼa̱ ña̱ xi̱kuni̱níi̱ kunda̱a̱-inii̱ xa̱ʼa̱. Kúsi̱ínítu-inii̱ ña̱ sa̱kúaʼi̱ xa̱ʼa̱ Jehová saáchi nda̱a̱ táki̱ʼva íyo yivái̱ saá íyora (Santiago 4:⁠8). Ta saátu, chí nu̱únínu ndátui̱ ndikói̱ kunii̱ yivái̱ nu̱ú ñuyǐví xa̱á ña̱ káʼa̱n Ndióxi̱ taxira ndaʼa̱yó (Juan 5:​28, 29).

Tá ku̱i̱ya̱ 1989 ndi̱kóndi̱ chí Hungría ña̱ va̱ʼa natúʼunndi̱ xa̱ʼa̱ Ndióxi̱ xíʼin na̱ veʼendi̱, na̱ migondi̱ ta saátu xíʼin inkaka na̱ yiví. Ta kúsi̱íní-inindi̱ chi xa̱a̱ ku̱a̱ʼání na̱ yiví sánáʼa̱ndi̱, ta xa̱a̱ yáʼaka 70 kúú na̱ ni̱xa̱a̱ ndu̱u testigo Jehová, nda̱a̱ siʼíi̱.

Yáʼaka 17 ku̱i̱ya̱ ni̱ka̱ʼi̱n xíʼin Ndióxi̱ ña̱ xi̱kuni̱i̱ kunda̱a̱-inii̱ xa̱ʼa̱ sava ña̱ʼa, ta xa̱a̱ ki̱ʼva 39 ku̱i̱ya̱ kúú ña̱ ni̱xa̱i̱ na̱kunda̱a̱-inii̱ xa̱ʼa̱ ña̱yóʼo. Ta nda̱a̱ vitin ndákundeékavai̱ káʼi̱n xíʼin Ndióxi̱, soo ña̱ káʼi̱n xíʼinra vitin kúú ña̱yóʼo: “Tíxa̱ʼviníún yivá miíi̱ ta̱ íyo chí ndiví, xa̱ʼa̱ ña̱ nda̱kuiún ndiʼi ña̱ ni̱ka̱ʼi̱n xíʼún tá ni̱xi̱yo loʼi̱”.