Pregunta Ña̱ Kéʼé Na̱ Káʼvi Tutu Yóʼo

¿Nda̱chun tá sánana na̱ testigo Jehová na̱ʼná ta̱ Pablo sánananara ña̱ chálá xi̱níra á ña̱ kǒo ku̱a̱ʼá yixí xi̱níra?

Mií ña̱ nda̱a̱ ni iinyó na̱ ndóo tiempo vitin va̱ása xíni̱yó nda̱a̱ ki̱ʼva ni̱xi̱yo ta̱ Pablo. Ña̱ na̱ʼná ta̱ apóstol Pablo ña̱ sánana kuitívandi̱ kúú ña̱yóʼo, su̱ví mií nda̱a̱ táki̱ʼva ni̱xi̱yora saá íyo ña̱ sánanandi̱, chi kǒo prueba ndáni̱ʼíndi̱ ña̱ va̱ʼa kunda̱a̱-inindi̱ nda̱saa ni̱xi̱yora.

Soo ni saá íyo iin ña̱ káʼa̱n xa̱ʼa ndáa ki̱ʼva ni̱xi̱yo ta̱ apóstol Pablo. Tá kúú revista ña̱ ka̱na 1 tí marzo ña̱ 1902, ni̱ka̱ʼa̱nña xa̱ʼa ña̱ naní Hechos de Pablo y Tecla, iin tutu ña̱ ka̱na tá ku̱i̱ya̱ 150, yóʼo kúú nu̱ú va̱xi ña̱ káʼa̱n ndáa ki̱ʼva ni̱xi̱yo ta̱ Pablo ta sana ña̱yóʼo kúú ña̱ káxika káʼa̱n xa̱ʼara ta ku̱a̱ʼána xíni̱ xa̱ʼaña: “Iin ta̱a ta̱ kúíti, ta̱ chálá xi̱ní, yakuá ni̱xi̱yo xa̱ʼara, ndakúní ni̱xi̱yora, yixí xi̱kuára xi̱kitáʼanníña, káni̱ loʼo ni̱xi̱yo si̱ti̱nra”.

Iin diccionario káʼa̱n xa̱ʼa ña̱ tutu Hechos de Pablo y Tecla (The Oxford Dictionary of the Christian Church [edición de 1997]) sana ña̱ ndixa kúú ña̱ va̱xi nu̱úña. Tá tiempo xi̱naʼá i̱xato̱ʼónína ña̱ tutu yóʼo, xa̱ʼa ña̱yóʼo ki̱ʼva 80 manuscrito ta̱vána ta íyotuña inkaka nu̱ú tu̱ʼun. Xa̱ʼa ña̱yóʼo na̱ʼná ña̱ sánanandi̱ kítáʼanña xíʼin ña̱ káʼa̱nna xa̱ʼa ta̱ Pablo.

Soo ná ndakaʼányó su̱ví ki̱ʼva náʼa̱ ta̱ Pablo kúú ña̱ ndáyáʼvika. Tá xi̱xikara xi̱natúʼunra xa̱ʼa Ndióxi̱, na̱ yiví ni̱ka̱ʼa̱nna xa̱ʼara: “Iin ta̱a ta̱ vitá kúni kúúra, ni iinna kǒo kútóo ña̱ káʼa̱nra” (2 Cor. 10:10). Soo va̱ása xíniñúʼu nandosóyó ña̱ mií ta̱ Jesús kúú ta̱ nda̱ka̱xin ta̱ Pablo ña̱ keʼéra chiñu nu̱úra. Saátu ná ndakaʼányó ña̱ ku̱a̱ʼání chiñu ke̱ʼéra nu̱ú Ndióxi̱ xa̱ʼa ña̱ nda̱kundiku̱nra ta̱ Jesús (Hech. 9:3-5, 15; 22:6-8). Ta ná ndakanixi̱níyó ña̱ ku̱a̱ʼání ña̱ va̱ʼa ndákiʼinyó xa̱ʼa ña̱ ka̱ʼyíra ku̱a̱ʼání libro ña̱ va̱xi nu̱ú Biblia.

Ta̱ Pablo va̱ása níka̱ʼa̱nra xa̱ʼa ki̱ʼva ña̱ xi̱na̱ʼa̱ra, ta ni va̱ása ni̱ka̱ʼa̱nra xa̱ʼa ña̱ xi̱keʼéra tá kúma̱níka ndakundiku̱nra ta̱ Jesús (Hech. 26:4, 5; Filip. 3:4-6). Ta miíra ni̱ka̱ʼa̱n ña̱yóʼo: “Yi̱ʼi̱ kúú mií ta̱ va̱ása ndáyáʼvika nu̱ú na̱ apóstol, ta va̱ása xíniñúʼu kui̱ apóstol” (1 Cor. 15:9). Ta saátu ka̱ʼyíra ña̱yóʼo: “Yi̱ʼi̱ ta̱ va̱ása ndáyáʼvika nu̱ú ndiʼi na̱ apóstol, kúúmiíi̱ iin chiñu káʼnuní, ña̱ natúʼi̱n ña̱ va̱ʼa xa̱ʼa ta̱ Cristo xíʼin na̱ yiví ta ku̱a̱ʼání kúúña” (Efes. 3:8). Ña̱ xi̱natúʼun ta̱ Pablo kúú ña̱ ndáyáʼvika nu̱ú ña̱ ndáa ki̱ʼva xi̱na̱ʼa̱ra.