Pregunta Ña̱ Kéʼé Na̱ Káʼvi Tutu Yóʼo

Tá u̱vi̱ na̱ ndásakáʼnu Ndióxi̱ ta̱ʼán tindaʼa̱na ta u̱vi̱ saána inkáchi veʼe ni̱ki̱si̱na, ta ña̱yóʼo va̱ása va̱ʼa náʼaña, ¿á kúni̱ kachi ña̱yóʼo ña̱ xa̱a̱ ni̱ki̱ʼvina iin ku̱a̱chi ndeé xíʼin táʼanna ta xíniñúʼu tiin na̱ comité judicial ku̱a̱chi xíʼinna?

Saá íyoña. Tá kǒoka inka ña̱ kivi ndakiʼin miína xa̱ʼa ña̱ ku̱u yóʼo, iin comité judicial tiin ku̱a̱chi xíʼinna saáchi íyo ña̱ náʼa̱ ña̱ ni̱ki̱ʼvina ku̱a̱chi xíʼin táʼanna (1 Cor. 6:18).

Na̱ anciano nándukú va̱ʼana xa̱ʼa ña̱yóʼo ña̱ va̱ʼa kunina á xíniñúʼu keʼéna iin comité judicial. Tá kúú, ¿á xa̱a̱ na̱ xíka xíʼin táʼan kúú u̱vi̱ saána? ¿Á xa̱a̱ táxina consejo ndaʼa̱na xa̱ʼa ña̱ ndeéní kúúna xíʼin táʼanna? ¿Nda̱chun inkáchi veʼe ki̱ndo̱o u̱vi̱ saána? ¿Á xa̱a̱ saá nda̱kanixi̱nína keʼéna? ¿Á íyokava inka xa̱ʼa kúú ña̱ ndo̱ʼona ña̱yóʼo tá kúú sana ña̱ ndo̱ʼo kamavana kúúña, ta kǒoka iinka ña̱ níkivi keʼéna ta inkáchi veʼe ni̱ki̱si̱na? (Ecl. 9:11). ¿Ndáamií ni̱ki̱si̱na? Xa̱ʼa ña̱ va̱ása inkáchi ña̱ kúú xíʼin ndiʼina, na̱ anciano xíniñúʼu na̱ndukú va̱ʼana xa̱ʼaña.

Tá xa̱a̱ na̱kunda̱a̱ va̱ʼa ini na̱ anciano xa̱ʼa ña̱yóʼo ndáa ki̱ʼva ku̱uña, saá kúú ña̱ kunina á xíniñúʼu keʼéna iin comité judicial xíʼinna á va̱ása xíniñúʼu keʼénaña.